Служба святаго преподобномученика Адриана, Пошехонскаго чудотворца

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 6:

Ве́сь от ю́ности Христу́ возложи́лся еси́, преподо́бне,/ и, мирски́я стра́сти отве́ргнув,/ мона́х и́стинный был еси́,/ Адриа́не Богому́дре,/ и оби́тель Боже́ственнаго Ду́ха яви́лся еси́,/ пострада́в да́же до кро́ве,/ от Христа́ увенча́лся еси́ досто́йно,/ Его́же моли́ спасти́ся душа́м на́шим.

Посто́м и моли́твою вооружи́вся,/ ю́ностныя стра́сти победи́л еси́, Адриа́не всече́стне,/ и, во оби́тели преподо́бнаго Корни́лия подвиза́вся,/ дости́гл еси́ в му́жа соверше́нна о Христе́,/ Ему́же ны́не со А́нгелы предстои́ши/ и при́сно мо́лишися спасти́ся душа́м на́шим.

Лю́дие пребеззако́ннии,/ собра́вшеся во оби́тель твою́, преподо́бне,/ со ору́жием и дреко́льми,/ сме́рти му́ченичестей тя преда́ша,/ Адриа́не многострада́льне,/ те́мже, чту́ще свято́е твое́ страда́ние,/ мо́лим тя, Христо́в уго́дниче:/ помоли́ся ко Го́споду спасти́ся душа́м на́шим.

Сла́ва, глас то́йже:

От младе́нчества Христу́ угоди́в, преподо́бне,/ венце́м му́ченическим от Него́ украси́лся еси́ досто́йно,/ и, чуде́с благода́ть получи́в,/ исцеля́еши неду́жныя,/ с ве́рою к тебе́ притека́ющия,/ Адриа́не преблаже́нне,/ моли́твенниче о душа́х на́ших.

И ны́не, Богоро́дичен: Досто́йно е́сть:

На стихо́вне стихи́ры, глас 1:

Прехва́льно житие́ твое́, Адриа́не Богоно́сне,/ ди́вно терпе́ние твое́ и незло́бие, страстоте́рпче преподо́бне,/ пресла́вны и чудотворе́ния твоя́,/ и́миже просла́ви тя Христо́с, Небе́сный Венцеда́тель,/ Его́же моли́ дарова́ти нам/ мир и ве́лию ми́лость.

Стих: Честна́ пред Го́сподем/ смерть преподо́бных Его́.

Преподобному́чениче всече́стне,/ твое́ житие́ равноа́нгельно бы́сть на земли́,/ твоя́ му́ченическая кончи́на,/ я́коже же́ртва ту́чна, Бо́гови яви́ся,/ И́же чуде́с благода́тию тя просла́ви/ и твои́ми моли́твами да́рует нам/ мир и ве́лию ми́лость.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Пребога́тое сокро́вище исцеле́ний/ яви́ся нам всечестна́я ра́ка твоя́,/ Адриа́не преподо́бне, страда́льче всеблаже́нне;/ за мучи́телей твои́х моли́лся еси́ Бо́гу,/ я́ко и́стинный Христо́в подо́бник,/ и, му́ченическую кончи́ну восприя́в,/ чудесы́ просла́вился еси́./ Те́мже и ны́не помоли́ся/ о ве́рно чту́щих святу́ю па́мять твою́,/ дарова́ти нам мир и ве́лию ми́лость.

Сла́ва, глас 4:

Ору́жием Креста́ Христо́ва,/ преподобному́чениче Адриа́не,/ победи́л еси́ вся диа́вольския искуше́ния,/ последи́ же от люде́й всезло́бных до кро́ве пострада́в,/ му́ченическую кончи́ну восприя́л еси́,/ и со страстоте́рпцы увенча́лся еси́,/ и мо́лишися Христу́ о душа́х на́ших.

И ны́не, Богоро́дичен: При́зри на моле́ние Твои́х раб, Всенепоро́чная:

Тропа́рь пи́сан на вели́цей вече́рни.

И ны́не, Богоро́дичен: Е́же от ве́ка утае́нное:

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 4:

Духо́вным жела́нием распали́вся, преподо́бне,/ вся, я́же в ми́ре кра́сная, возненави́дел еси́,/ Христа́ еди́наго возлюби́в,/ и, Его́ ра́ди оте́чество твое́ оста́вив,/ путе́м те́сным ше́ствовал еси́ и́ноческаго жития́,/ Адриа́не преблаже́нне,/ моли́твенниче о душа́х на́ших.

Житие́ твое́ благо́е/ во оби́тели преподо́бнаго Корни́лия,/ Адриа́не Богоно́сне,/ привлече́ на тя благода́ть Ду́ха Свята́го,/ и был еси́ сосу́д Его́ избра́н и че́стен./ Те́мже А́нгельскаго собесе́дования досто́ин яви́лся еси́/ и Боже́ственных виде́ний сподо́бился еси́,/ я́ко и́стинный Христо́в уго́дник/ и моли́твенник о душа́х на́ших.

Госпо́дь, хотя́ яви́ти тебе́, преподо́бне о́тче,/ ме́сто, пусты́нное для твоего́ безмо́лвия,/ посла́ к тебе́ А́нгела Своего́ и наста́вника,/ и́же во о́бразе стра́нника ста́рца приведе́ тя в пусты́ню,/ Бо́гом тебе́ предуста́вленную,/ и а́бие неви́дим бы́сть,/ Адриа́не Богоно́сне, моли́твенниче о душа́х на́ших.

Сла́ва, глас 6:

Прииди́те, ве́рнии,/ прииди́те, и́ноков ликостоя́ния/ и пусты́ни сея́ ча́да духо́вная,/ восхва́лим Христа́ Бо́га,/ просла́вльшаго зде Своего́ уго́дника,/ преподобному́ченика и чудотво́рца Адриа́на,/ его́же святы́я мо́щи,/ многоле́тне в земли́ сокрове́нныя в пу́сте ме́сте,/ яви́ чуде́сно на утеше́ние и исцеле́ние на́ше,/ я́ко неду́ги врачу́ет страстоте́рпец Христо́в/ и мо́лится о душа́х на́ших.

И ны́не, Богоро́дичен: Кто Тебе́ не ублажи́т:

Вход, проки́мен дне, чте́ния три преподобномученическия.

Прему́дрости Соломо́ни чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же су́ть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бы́сть/ и живы́й посреде́ гре́шник преста́влен бы́сть./ Восхище́н бы́сть, да не зло́ба измени́т ра́зума его́/ или́ ле́сть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (гла́вы 5 и 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние Свое́/ и вооружи́т тва́рь в ме́сть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́,/ внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

На лити́и стихи́ры, глас 2:

Егда́, Боже́ственным жела́нием распала́емь,/ пустынножи́тельствовати возжеле́л еси́, о́тче Богому́дре,/ тогда́ Бог о́бразом преди́вным/ А́нгела, я́ко стра́нна челове́ка, тебе́ посла́,/ и́же тя в пусты́ню путеводи́в/ и а́бие неви́дим та́мо пред тобо́ю сотвори́ся,/ да та́ко удостове́ришися, я́ко Безпло́тный тебе́ яви́ся,/ уго́дниче Бо́жий преди́вный/ и моли́твенниче наш при́сный, Адриа́не преподо́бне.

Егда́ прише́л еси́ в пусты́ню, преподо́бне о́тче,/ ико́ну Пречи́стыя Богоро́дицы с собо́ю нося́,/ и ту на дре́ве поста́вил еси́,/ чу́до ве́лие сотвори́ся от нея́:/ рыболо́ву дерзнове́нному, ико́ну сня́ти восхоте́вшу,/ ру́це и но́зе разслабе́ша,/ и я́ко мертв бы́сть,/ да не дерзне́т про́чее на достоя́ние твое́,/ уго́дниче Бо́жий преди́вный/ и моли́твенниче наш при́сный, Адриа́не преподо́бне.

Егда́ прии́де вре́мя отше́ствия твоего́ ко Го́споду,/ о́тче преблаже́нне,/ разбо́йницы лю́тии на оби́тель твою́ нападо́ша/ и сию́ разгра́биша,/ тебе́ же ра́нами и огне́м истяза́вше/ и к коне́м привяза́вше,/ го́рьцей преда́ша сме́рти,/ у́мер еси́ те́лом, но не ду́хом,/ и́же воспари́ в Го́рняя селе́ния ко Го́споду,/ уго́дниче Бо́жий преди́вный,/ и моли́твенниче наш при́сный, Адриа́не преподо́бне.

Сла́ва, глас то́йже:

Оста́вив мир, преподо́бне о́тче,/ преми́рно подвиза́лся еси́ в пусты́ни/ и псалмопе́нии немо́лчно Бо́га сла́вил еси́,/ служа́ сло́вом и де́лом спасе́нию челове́ческому,/ те́мже сла́вим святу́ю па́мять твою́ и вопие́м ти:/ ра́дуйся, страстоте́рпче преподо́бне,/ моли́твенниче о душа́х на́ших.

И ны́не, Богоро́дичен: О, чудесе́ но́ваго:

На стихо́вне стихи́ры, глас 4:

Пусты́нныя по́двиги терпели́во проходи́л еси́,/ преподо́бне о́тче,/ алка́я и жажда́я, сна очесе́м твои́м не дал еси́/ и вся́чески пло́ть твою́ удручи́л еси́,/ до́ндеже безстра́стия дости́гл еси́,/ и с Бо́гом и А́нгелы досто́йно бесе́довал еси́,/ Адриа́не приснопа́мятне.

Стих: Честна́ пред Го́сподем/ смерть преподо́бных Его́.

Всели́вся в пусты́ню, о́тче Богому́дре,/ ча́да послуша́ния в ней духо́вно породи́л еси́/ и Бо́гови сия́ приве́л еси́/ уче́нием твои́м святы́м,/ е́же всем бы́сть на по́льзу душе́вную,/ Адриа́не приснопа́мятне.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Весели́лся еси́, преподо́бне о́тче, ду́хом твои́м,/ ви́дев це́рковь Бо́жия Ма́тере, в пусты́ни твое́й зи́ждиму,/ в не́йже ны́не моща́ми твои́ми святы́ми почива́еши/ и вся ны освяща́еши чуде́с твои́х благода́тию,/ Адриа́не приснопа́мятне.

Сла́ва, глас 8:

Весе́лие ве́чное и ра́дость несконча́емую/ унасле́довал еси́, преподобному́чениче сла́вне,/ пострада́в от всезло́бных разбо́йник,/ венце́м му́ченическим увенча́лся еси́/ от Христа́, Царя́ и Бо́га,/ Ему́же моли́ся/ за чту́щия святу́ю и всечестну́ю па́мять твою́.

И ны́не, Богоро́дичен: Безневе́стная Де́во:

На благослове́нии хле́бов тропа́рь, глас 4:

Христо́ву му́ченику Адриа́ну тезоимени́т был еси́, преподо́бне,/ мно́гия труды́ подъя́л еси́ в жи́зни вре́менней,/ оби́тель и́ноческую созида́я в пусты́ни,/ иде́же пострада́л еси́ да́же до кро́ве от злых разбо́йник/ и му́ченическую смерть от них прия́л еси́,/ Адриа́не сла́вне,/ чуде́с благода́тию обогати́вся,/ предстои́ши всех Царю́, Христу́ Бо́гу,/ Его́же моли́ спасти́ся душа́м на́шим.

Ин тропа́рь, глас 4:

А́ще и сме́ртию ну́ждною у́мерл еси́,/ а́ще и сме́ртная се́нь внеза́пу на́йде на тя,/ оба́че, я́ко де́ву му́друю, ду́шу твою́ обре́те Христо́с/ и в черто́г Свой Небе́сный введе́,/ и со святы́ми всели́,/ чудесы́ возвели́чив и́мя твое́,/ Адриа́не му́чениче преподо́бне,/ Ему́же моли́тву о нас сотвори́,/ па́мять твою́ почита́ющих.

НА У́ТРЕНИ

На Бог Госпо́дь: тропа́рь то́йже. Сла́ва, и ны́не, Богоро́дичен: Е́же от ве́ка утае́нное:

По 1-м стихосло́вии седа́лен, глас 4:

Све́том чуде́с по сме́рти сия́я, преподобному́чениче Адриа́не,/ благода́тно просвеща́еши ду́ши на́ша,/ врачу́я вся́кия теле́сныя в нас неду́ги прикоснове́нием к честны́м и многоцеле́бным моще́м твои́м./ Те́мже сла́вим тя, целе́бника благода́тнаго.

Сла́ва, и ны́не, Богоро́дичен:

Под кров Твой, Пречи́стая Де́во, прибега́ющих мольбу́ прие́мши,/ непреста́нно моли́ о нас Человеколю́бца, спасти́ рабы́ Твоя́.

По 2-м стихосло́вии седа́лен, глас 4:

Я́вльшагося ти А́нгела ви́дев, преподо́бне о́тче Адриа́не, не позна́л еси́ его́,/ но мня челове́ка стра́нна бы́ти,/ с любо́вию ввел еси́ его́ в свою́ ке́ллию,/ с ни́мже пото́м ше́ствуя, пусты́ни дости́гл еси́/ и, неви́дима спу́тника твоего́ узре́в,/ воспе́л еси́ Христу́ хвале́бную пе́снь: аллилу́ия.

Сла́ва, и ны́не, Богоро́дичен:

В Твой покро́в Боже́ственный аз прибего́х, смире́нный, Богоро́дице, молю́:/ поми́луй, Чи́стая, я́ко беззако́ния моя́ превзыдо́ша главу́ мою́,/ и бою́ся, Влады́чице, муче́ния и трепе́щу,/ моли́тву сотвори́, Чи́стая, к Сы́ну Твоему́ от сих изба́вити мя.

По полиеле́и седа́лен, глас 8:

Смире́ние христоподража́тельное возлюби́л еси́, Адриа́не Богому́дре,/ и нищету́ па́че бога́тства избра́л еси́,/ да смири́вшемуся нас ра́ди до ра́бия зра́ка Христу́ уго́ден бу́деши,/ И́же, венце́м му́ченическим тя увенча́в, чудесы́ мно́гими просла́ви./ Ему́же помоли́ся, преподо́бне, за чту́щия любо́вию святу́ю па́мять твою́.

Сла́ва, и ны́не, Богоро́дичен:

Я́ко Всенепоро́чная Неве́сто Творца́,/ я́ко Неискусому́жная Ма́ти Изба́вителя,/ Прия́телище я́ко су́щи Уте́шителя, Всепе́тая,/ беззако́нию мя су́ща скве́рное обита́лище/ и де́моном игра́лище в ра́зуме бы́вша,/ потщи́ся от тех злоде́йствия мя изба́вити/ и све́тло жили́ще доброде́телей соверши́, Светоно́сная, Нетле́нная,/ отжени́ о́блак страсте́й и Вы́шняго прича́стия сподо́би/ и Све́та невече́рняго моли́твами Твои́ми.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех,/ я́же воздаде́ ми? Вся́кое дыха́ние: Ева́нгелие от Ма́рка, зача́ло 37.

По 50-м псалме́ стихи́ра, глас 6:

Го́ры, и хо́лми, и дубра́ва пусты́нная,/ возра́дуйтеся с на́ми в торжестве́ свята́го засту́пника на́шего,/ преподобному́ченика и чудотво́рца Адриа́на,/ его́же святы́я мо́щи стяжа́хом сокро́вище исцеле́ний/ и того́ и́мамы отца́ и уте́шителя,/ моля́щася при́сно ко Го́споду/ о спасе́нии душ на́ших.

Кано́н, глас 3.

Песнь 1

Ирмо́с: Су́шу глубороди́тельную зе́млю/ со́лнце наше́ствова иногда́:/ я́ко стена́ бо, огусте́ обапо́лы вода́/ лю́дем пешемореходя́щим/ и богоуго́дно пою́щим:/ пои́м Го́сподеви, сла́вно бо просла́вися.

А́гнче Бо́жий, Иису́се Всеблаги́й,/ прему́дрости и смы́сла Пода́телю,/ да́ждь ми, Сло́ве Бо́жий, гре́шному и недосто́йному, воспе́ти уго́дника Твоего́,/ до́бляго страда́льца и чудотво́рца Адриа́на,/ его́же в чудесе́х сла́вно просла́вил еси́.

Был еси́ вои́стинну де́латель до́брый виногра́да Христо́ва, Адриа́не блаже́нне,/ в пусты́ни его́ насади́в и слез твои́х струя́ми сию́ напои́в,/ плод трудо́в твои́х Бо́гови прине́сл еси́, зовы́й:/ сла́вно бо просла́вися.

Всего́ себе́ в же́ртву Бо́гу прине́сл еси́, преподо́бне,/ волю́ твою́ всеце́ло Ему́ повину́в,/ А́нгеловым указа́нием пусты́ни дости́гл еси́/ и в ней трудолю́бно подвиза́лся еси́, при́сно поя́ Го́сподеви:/ сла́вно бо просла́вися.

Богоро́дичен: Господороди́тельнице, Влады́чице Пречи́стая,/ моли́, Его́же родила́ еси́, Бо́га и Спа́са на́шего, со преподобному́чеником Адриа́ном,/ да ми́лостив нам бу́дет в Де́нь су́дный.

Песнь 3

Ирмо́с: Непло́дная душе́ и безча́дная,/ стяжи́ плод благосла́вный,/ веселя́щися, возопи́й/ утверди́хся Тобо́ю, Бо́же,/ не́сть свят, не́сть пра́веден,/ па́че Тебе́, Го́споди.

Ду́хом Го́сподеви рабо́тая,/ за́поведи Христо́вы от ю́ности твоея́ возлюби́л еси́, о́тче преблаже́нне,/ и сия́ свет стезя́м твои́м име́л еси́, Богоно́сне,/ те́мже непреткнове́нно возше́л еси́ на го́ру Небе́сную, иде́же ра́достно пое́ши:/ не́сть свят и не́сть пра́веден, па́че Тебе́, Го́споди.

Егда́ позави́де враг спасе́ния челове́ческаго твои́м по́двигом, преподо́бне,/ зло́бных разбо́йник наусти́ разгра́бити оби́тель твою́/ и тя му́ченичестей сме́рти преда́ти,/ но ты среди́ муче́ний кро́тце вопия́л еси́:/ не́сть свят и не́сть пра́веден, па́че Тебе́, Го́споди.

Житие́ твое́ равноа́нгельное и страда́ние непови́нное, Адриа́не всече́стне,/ в воню́ благоуха́ния духо́внаго восприя́ Госпо́дь и дарова́ тебе́ ве́лию благода́ть целе́бную,/ е́юже безме́здно врачу́еши ду́ши и телеса́ на́ша, да хвале́бно пое́м:/ не́сть свят и не́сть пра́веден, па́че Тебе́, Го́споди.

Богоро́дичен: Зачала́ и родила́ еси́ О́тчее Сло́во,/ Его́же моли́, Богоро́дице, со преподобному́чеником Адриа́ном/ изба́вите от бед рабы́ Твоя́, вои́стинну призыва́ющия Тя,/ святы́й одушевле́нный Бо́жий Киво́те.

Седа́лен, глас 3:

Бога́тство тле́нное и сла́ву мимотеку́щую оста́вил еси́, преподо́бне о́тче,/ и́нок соверше́н быв, пусты́ни дости́гл еси́/ и в ней трудолю́бно подвиза́лся еси́,/ во́лею же Бо́жиею та́мо му́ченически пострада́л еси́ от лю́тых разбо́йник/ и ны́не со А́нгелы и му́ченики Влады́це всех предстои́ши,/ моля́ся непреста́нно о всех нас.

Сла́ва, и ны́не, Богоро́дичен:

Я́ко неде́лан, Де́во, виногра́д, прекра́сный Грозд прозябла́ еси́,/ источа́ющий нам вино́ спасе́ния, всех веселя́щее,/ те́мже, я́ко вино́вную до́брым, ублажа́юще, вопие́м со А́нгелом:/ ра́дуйся, Благода́тная, Госпо́дь с Тобо́ю.

Песнь 4

Ирмо́с: Положи́л еси́ к нам тве́рдую любо́вь, Го́споди:/ Единоро́днаго бо Твоего́ Сы́на/ за ны на смерть дал еси́./ Те́мже Ти зове́м, благодаря́ще:/ сла́ва си́ле Твое́й, Го́споди.

Егда́ му́чити нача́ша тя всезло́бнии разбо́йницы, преподо́бне о́тче,/ тогда́ кро́тце им веща́л еси́:/ почто́, о челове́цы, му́чити мя хо́щете/ и от све́та сего́ сла́дкаго отлучи́ти мя тщите́ся,/ но молю́, осла́бите ми ма́ло,/ да помолю́ся ко Го́споду и возопию́:/ сла́ва си́ле Твое́й, Го́споди.

Я́ко зве́ри ди́вии, устреми́шася на тя разбо́йницы, о́тче преблаже́нне,/ и ножа́ми изра́ниша все те́ло твое́,/ о́гнь к ра́нам твои́м прилага́юще, лю́те тя му́чиша,/ ты же за них моли́лся еси́ Бо́гу и, му́чимый, взыва́л еси́:/ сла́ва си́ле Твое́й, Го́споди.

Исполня́я за́поведь Христо́ву, страда́льче преподо́бне,/ среди́ муче́ний, я́ко первому́ченик Стефа́н, моли́лся еси́ за своя́ мучи́тели, взыва́я:/ Го́споди, не поста́ви им греха́ сего́./ И до после́дняго издыха́ния твоего́ ве́рно пел еси́:/ сла́ва си́ле Твое́й, Го́споди.

Богоро́дичен: Кади́льнице всезлата́я, Мари́е Всенепоро́чная,/ с преподобному́чеником Адриа́ном, ве́рным твои́м слуго́ю, моли́ Христа́ Бо́га, Его́же родила́ еси́,/ изба́витися нам от бед и огня́ ве́чнующаго,/ да, спасе́ннии моли́твами Твои́ми, возопие́м:/ сла́ва Тебе́, Всеблагослове́нная.

Песнь 5

Ирмо́с: К Тебе́ у́тренюю, всех Творцу́,/ преиму́щему всяк ум ми́рови,/ зане́ свет повеле́ния Твоя́,/ в ни́хже наста́ви мя.

Сокруши́л еси́ терпе́нием всю си́лу вра́жию, преподобному́чениче добропобе́дный,/ и, муче́ния пу́ть до́блестно проше́д,/ дости́гл еси́ в несконча́емый поко́й Небе́сный,/ иде́же со А́нгелы лику́еши во све́те всех Творца́.

Моли́тве, бы́вшей во усте́х твои́х, страда́льче преподо́бне,/ по земли́ ко́ньми влачи́мый, преда́л еси́ ду́шу твою́ в ру́це Жива́го Бо́га/ и победоно́сно со сла́вою возше́л еси́ в черто́г Его́ Небе́сный.

Нечести́вии разбо́йницы не умили́шася,/ ви́девша кончи́ну твою́ му́ченическую, преподо́бне о́тче,/ но са́мое те́ло твое́ ме́ртвое похи́тиша и сокры́ша,/ е́же ди́вно откры́ Госпо́дь и просла́ви тя чуде́с благода́тию.

Богоро́дичен: Упова́ние и наде́жда Ты еси́, Пречи́стая Богоро́дице, всем правосла́вным христиа́ном:/ спаси́ лю́ди, ве́рно Тебе́ моля́щияся, сомоли́твенника прие́мь преподобному́ченика Адриа́на,/ и́мя Твое́ просла́вльшаго оби́телию,/ во сла́ву Твою́ посвяще́нною.

Песнь 6

Ирмо́с: Бе́здна после́дняя грехо́в обы́де мя,/ и исчеза́ет дух мой;/ но простры́й, Влады́ко, высо́кую Твою́ мы́шцу,/ я́ко Петра́, мя, Упра́вителю, спаси́.

Призва́н был еси́ во дворы́ Небе́сныя, страстоте́рпче преподо́бне,/ те́ло твое́, му́ченически ура́ненное, оста́вил еси́ нам в насле́дие духо́вное,/ е́же разбо́йницы а́ще и скры́ша, но Бог ди́вно откры́ и оби́тели твое́й дарова́,/ я́ко сокро́вище бога́тое исцеле́ний.

Разуме́им вси Бо́жие преди́вное смотре́ние/ во откры́тии и пренесе́нии святы́х моще́й твои́х, преподобному́чениче Адриа́не,/ я́же мно́го неве́домы бы́вше/ и в пу́сте ме́сте земле́ю покрове́ни лежа́вше,/ ны́не всем явле́ни и от всех почита́еми быва́ют.

Свяще́нства благода́ть прие́м на земли́, о́тче преподо́бне,/ в ски́нии Небе́сней ны́не священноде́йствуеши/ и со дерзнове́нием мо́лиши Триеди́наго Бо́га о Це́ркви Святе́й и оби́тели твое́й,/ почита́ющей ве́рно святу́ю па́мять твою́.

Богоро́дичен: Ты еси́, Пречи́стая Богоро́дице, и прибе́жище на́ше и утвержде́ние,/ Тя стяжа́ Помо́щницу преподобному́ченик Адриа́н,/ сооруди́вый во и́мя Твое́ храм че́стен в пусты́ни,/ с ни́мже моли́ Сы́на Твоего́ и Бо́га на́шего/ пода́ти нам спасе́ние и грехо́в оставле́ние.

Конда́к, глас 6:

Жите́йския молвы́ избежа́в, преподо́бне,/ в пусты́ню всели́лся еси́,/ и, та́мо оби́тель и́ноков возгради́в,/ последи́ от разбо́йник му́ченически пострада́л еси́,/ и ны́не сия́еши нетле́нием и чудесы́,/ Адриа́не многострада́льне,/ моли́твенниче о душа́х на́ших.

И́кос:

А́нгелом собесе́дника и му́чеником сострада́льца,/ пе́сньми духо́вными восхва́лим, бра́тие:/ той бо нача́льник оби́тели бы́сть/ и, ангелоподо́бне в ней подвиза́вся, му́ченически сконча́ся,/ о́браз всем нам в себе́ подава́я терпе́ния и незло́бия,/ и́же, мучи́мь, не пререка́ше/ и, убива́емь, за уби́йцы своя́ моля́шеся,/ ны́не же, увенча́н от Христо́вой десни́цы,/ чудесы́ сия́ет и вся ны благода́тне озаря́ет, да зове́м ему́: ра́дуйся, Адриа́не многострада́льне, моли́твенниче о душа́х на́ших.

Песнь 7

Ирмо́с: Трие́ о́троцы в пещи́, Тро́ицу прообрази́вше,/ преще́ние о́гненное попра́ша/ и, пою́ще, вопия́ху:/ благослове́н еси́, Бо́же оте́ц на́ших.

Пою́ще, сла́вим твоя́ по́двиги пусты́нныя, преподо́бне о́тче,/ и, твое́ страда́ние му́ченическое воспомина́юще,/ про́сим твоего́ моли́твеннаго предста́тельства за ны ко Го́споду, Ему́же вопие́м:/ благослове́н еси́, Бо́же оте́ц на́ших.

Кро́вию твое́ю обагре́нный и ра́ны нося́ на те́ле твое́м,/ я́ко у́твари драги́я, предста́л еси́, преподо́бне, всех Царю́ Христу́ Бо́гу,/ Ему́же помоли́ся, страда́льче, и за ны, гре́шныя,/ чту́щия святу́ю па́мять твою́ и вопию́щия:/ благослове́н еси́, Бо́же оте́ц на́ших.

Христу́, нас ра́ди на Кресте́ ру́це Свои́ распросте́ршему,/ подо́бствовал во́льным распя́тием пло́ти твоея́ со страстьми́ грехо́вными, Адриа́не преблаже́нне,/ последи́ ре́занием и о́гненным опале́нием от разбо́йник/ сию́ в же́ртву жи́ву Бо́гу прине́сл еси́, зовы́й:/ благослове́н еси́, Бо́же оте́ц на́ших.

Богоро́дичен: От утро́бы Твоея́ про́йде у́мное, Богоро́дице, Со́лнце,/ Сего́ моли́, я́ко Сы́на Твоего́ и Бо́га, со преподобному́чеником Адриа́ном/ возсия́ти нам день спасе́ния и сы́ны све́та показа́ти,/ да ра́достно от души́ вопие́м:/ благослове́нна еси́, Всенепоро́чная Влады́чице.

Песнь 8

Ирмо́с: Веще́ственнаго огня́ пла́мень/ Невеще́ственным увяди́ша Богозри́мии о́троцы и поя́ху:/ благослови́те, вся дела́ Госпо́дня, Го́спода.

Мо́лим тя, преблаже́нне:/ помоли́ся ко Го́споду,/ стране́ на́шей в ми́ре пребыва́ти,/ и всем лю́дем росси́йским спасти́ся,/ да ра́достно вопие́м просла́вльшему тя Влады́це:/ благослови́те, вся дела́ Госпо́дня, Го́спода.

Враги́ неви́димыя победи́л еси́, преподо́бне,/ от ви́димых же всезло́бных разбо́йников ра́ны лю́тыя претерпе́л еси́ до́блественне,/ и, му́ченическую кончи́ну восприе́мь,/ но́вый му́ченик яви́лся еси́ в земли́ Росси́йстей, зовы́й Бо́гу, тя венча́вшему:/ благослови́те, вся дела́ Госпо́дня, Го́спода.

Возшуме́ на тя лю́тая бу́ря страда́ний теле́сных, о́тче Богому́дре,/ но не поколеба́ му́жества души́ твоея́ и терпе́ния твоего́ кре́пкаго:/ взира́л бо еси́ на воздая́ние Небе́сное/ и моли́твенно вопия́л еси́ среди́ муче́ний:/ благослови́те, вся дела́ Госпо́дня, Го́спода.

Богоро́дичен: Ще́драго и Человеколюби́ваго Бо́га роди́ти, Богоро́дице, сподо́билася еси́,/ Сего́ моли́, Неискусобра́чная Отрокови́це, с Адриа́ном многострада́льным/ ниспосла́ти нам ве́ры утвержде́ние и ве́лию ми́лость.

Песнь 9

Ирмо́с: В зако́не се́ни и писа́ний/ о́браз ви́дим, ве́рнии:/ всяк му́жеский пол, ложесна́ разверза́я,/ свят Бо́гу./ Тем Перворожде́нное Сло́во/ Отца́ Безнача́льна./ Сы́на, первородя́щася Ма́терию неискусому́жно,/ велича́ем.

Анто́ния Пече́рскаго духо́вное порожде́ние,/ и Корни́лия Коме́льскаго пусты́нное воспита́ние,/ Адриа́не преподо́бне, сих доброде́тели в себе́ совокупи́л еси́/ и был еси́ до́брый насле́дник обои́х,/ с ни́миже тя вку́пе, я́ко ве́рна уго́дника Бо́жия, в пе́снех велича́ем.

Безмо́лвие пусты́нное возлюби́л еси́, Богому́дре о́тче,/ и, красоту́ Небе́сную мы́сленным о́ком созерца́я,/ к ней по́двигами пусты́нными восходи́л еси́,/ А́нгел земны́й и челове́к Небе́сный вои́стинну быв./ Те́мже тя немо́лчно в пе́снех велича́ем.

Рыда́ние го́рькое оста́вил еси́ бра́тии твое́й, Адриа́не многострада́льне,/ егда́ лю́те му́чима и убие́нна от разбо́йник тя ви́девше,/ лиши́шася и свята́го твоего́ телесе́,/ увезе́ннаго из твоея́ оби́тели и безве́стне сокрове́ннаго в земли́,/ е́же обре́тше и о сем ра́дующеся, в пе́снех тя велича́ем.

Богоро́дичен: Чужды́х нас яви́, Влады́чице, вла́сти лю́таго мироде́ржца/ и в час кончи́ны на́шея на по́мощь ускори́ к нам, безпомо́щным:/ приво́дим Ти на умоле́ние за ны ве́рнаго Твоего́ уго́дника и слугу́ Адриа́на страстоте́рпца преподо́бнаго,/ с ни́мже вку́пе за ны Христу́ помоли́ся/ и от поги́бели ве́чныя нас изба́вити,/ да Тя непреста́нно велича́ем.

Свети́лен, глас 1:

Ди́вное чу́до пропове́дуем,/ А́нгела, страннообра́зно я́вльшагося/ и преподо́бному сопу́тствовавша до Бо́гом угото́ванныя ему́ пусты́ни,/ иде́же а́бие неви́дим бы́сть,/ да сла́вим А́нгелов и челове́ков Творца́.

Сла́ва, и ны́не, Богоро́дичен:

Тя пе́сньми ублажа́ем, Де́во,/ Бо́га бо родила́ еси́ и на руку́ носи́ла еси́,/ Того́ моли́ спасти́ ду́ши на́ша.

На хвали́тех стихи́ры, глас 2:

Преподо́бне о́тче Адриа́не,/ све́том доброде́телей твои́х возсия́л еси́,/ я́ко звезда́ Богосве́тлая,/ и о́браз безстра́стия нам в себе́ явля́еши,/ да после́дуем свято́му твоему́ приме́ру/ и вку́пе с тобо́ю унасле́дуем/ Ца́рство Небе́сное.

Преподо́бне о́тче Адриа́не,/ ты Ева́нгелие Христо́во свет стезя́м твои́м име́л еси́/ и был еси́ па́стырь до́брый/ тобо́ю со́браннаго и́ноческаго ста́да,/ руководя́ духо́вная ча́да твоя́ путя́ми пра́выми/ в Ца́рство Небе́сное.

Преподо́бне о́тче Адриа́не,/ возлюби́в Пречи́стую Богоро́дицу,/ по Бо́зе все упова́ние твое́ на Ту возложи́л еси́,/ и храм в пусты́ни твое́й во и́мя Ея́ успе́ния освяти́л еси́,/ и оби́тель и́ноком возгради́л еси́,/ и мно́гия ду́ши челове́ческия приве́л еси́, уго́дниче Бо́жий,/ в Ца́рство Небе́сное.

Сла́ва, глас 8:

Сле́зное твое́ рыда́ние,/ и моли́твенное воздыха́ние не умили́ разбо́йников,/ тя му́чивших, преподо́бне о́тче,/ к ни́мже кро́тце веща́л еси́:/ за ко́е де́ло хо́щете мя уби́ти?/ Аз приидо́х к вам повеле́нием Бо́жиим,/ на спасе́ние ва́ше,/ вы же мя ны́не сме́рти предае́те,/ но молю́ся вам, отцы́ и бра́тие,/ отпустите́ мя в пре́жнее мое́ селе́ние,/ иде́же и́ноческое мое́ положи́х обеща́ние,/ да та́мо почи́ю о Го́споде./ Но не послу́шаша тя разбо́йницы/ и лю́тей сме́рти тя преда́ша,/ уго́дниче Бо́жий многострада́льный,/ в Небе́сная тя селе́ния посла́вше, ко Го́споду,/ моли́тися о душа́х на́ших.

И ны́не, Богоро́дичен: Влады́чице, приими́ моли́тву раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое и отпу́ст.

НА ЛИТУРГИ́И

Блаже́нны от кано́на пе́сни 3-я и 6-я. Апо́стол к Ри́мляном, зача́ло 99. Ева́нгелие от Луки́, зача́ло 64. Прича́стен: Ра́дуйтеся, пра́веднии:

Моли́тва

Преподо́бне о́тче преблаже́нне Адриа́не, перве́йший пусты́ни Пошехо́нския просвети́телю и мона́шескаго жития́ в ней основа́телю, прише́дый в ню со А́нгелом Госпо́дним и освети́вый ю Пресвяты́я Богоро́дицы чудотво́рною ико́ною и благода́тию, в не́йже и яви́лся еси́ по́двиги твои́ми пресве́тлое целому́дрия зерца́ло, прекра́сный смиренному́дрия о́бразе, одушевле́нный терпе́ния сто́лпе, изве́стное воздержа́ния пра́вило, и́стинный нестяжа́ния и нищеты́ люби́телю и всесоверше́нный Христо́в уго́дниче, се мы, гре́шнии, смире́нно припа́дая, мо́лим тя: приими́ моле́ния на́ша и вознеси́ я на же́ртвенник благоутро́бия Бо́жия. Испроси́ нам предста́тельством твои́м у Всеми́лостиваго Бо́га на́шего мир ми́ру, Це́ркви Святе́й утвержде́ние, согла́сие в ве́ре, преуспе́яние во благоче́стии и доброде́телех христиа́нских, да досто́йны яви́мся щедро́т и ми́лостей благосе́рдаго Бо́га; па́ству твою́ духо́вную непреста́ни управля́ти жезло́м му́дрости духо́вныя; подвиза́ющимся помози́, разсла́бленныя укрепи́, па́дающия возста́ви, споспеши́ всем нам и́го Христо́во в терпе́нии и благоду́шии понести́, и всех нас упра́вити в ми́ре и в покая́нии сконча́ти живо́т наш и со упова́нием спасе́ния пресели́тися во блаже́нныя не́дра Авраа́мова, иде́же ты ра́достно по труде́х земны́х опочива́еши, прославля́я со все́ми святы́ми Триипоста́снаго Бо́га, Отца́ и Сы́на и Свята́го Ду́ха, в безконе́чныя ве́ки веко́в. Ами́нь.