Служба в честь знамения, бывшее от иконы Пресвятыя Владычицы нашея Богородицы, во граде Пскове, иже над Мирожею рекою, во обители Святаго Спаса
НА ВЕЛИ́ЦЕЙ ВЕЧЕРНИ
Блаже́н муж: 1-й антифо́н.
На Го́споди, воззва́х: стихи́ры на 8, глас 1.
Подо́бен: Прехва́льнии му́ченицы:
Пала́та одушевле́нная Христо́ви еди́на бысть,/честна́я бо Твоя́ ико́на в це́ркви Бо́жии предста́влена,/ от нея́же зна́мение ужа́сно ви́девше, уми́льно вопие́м Ти:/ бу́ди, Влады́чице, ве́рным держа́ва и стена́ необори́ма/ и град Твой, Богома́ти, спаси́, воспева́ющий держа́ву Твою́./ Храм Святы́я Тро́ицы Единосу́щныя,/ Твою́, Влады́чице, чудотво́рную ико́ну име́я в себе́,/ всегда́ освяща́ет вся ве́рою притека́ющия,/ те́мже Тя по до́лгу ублажа́ем, всем вы́ну упова́ние,/ душа́м на́шим тве́рдый покро́в и держа́ву.
Глас 4:
Град, почита́ющий Тя/ и по до́лгу сла́вящий,/ огражда́еши, Всепе́тая,/ от безбо́жных, Чи́стая, иноплеме́нник,/ от гла́да же, и тру́са, и напра́сныя сме́рти,/ и междоусо́бныя бра́ни всегда́,/ Де́во Неискусобра́чная,/ сего́ ра́ди сла́вим Тя, Пречи́стая Богоневе́сто,/ челове́ком Помо́щнице.
Ико́ну зра́ка Твоего́,/ Пречи́стая Богоблагода́тная Влады́чице,/ дарова́ла еси́ гра́ду Твоему́/ бога́тство неотъе́млемо,/ покро́в же, и сла́ву, и необори́мую сте́ну,/ исцеле́ний сокро́вище,/ чуде́с исто́чник приснотеку́щ,/ приста́нище же спасе́нное обурева́емым всегда́,/ сего́ ра́ди пое́м Тя, Препе́тая Чи́стая.
Почерпи́те, челове́цы,/ спасе́ние душа́м и здра́вие телесе́м,/ река́ бо всем предлежи́т,/ о́браз Присноде́вы,/ источа́ющи нам чуде́с струи́,/ омыва́ющи сердца́м омраче́ния,/ стра́сти прогоня́ющи/ и ду́ши освяща́ющи благода́тию Боже́ственною.
Добро́ту тя Иа́ковлю/ и ле́стницу Небе́сную ве́мы,/ по не́йже сни́де Госпо́дь на зе́млю,/ те́хже тогда́ о́брази Твою́ честь и сла́ву, Богоро́дице, проявля́ху:/ Ты бо родила́ еси́ Бо́га всех,/ Тя блажа́т Небе́снии А́нгели и земни́и челове́цы,/ я́ко за весь мир мо́лишися/ и покрыва́еши ми́лостию/ и́же Твой честны́й соверша́ющих зна́мения пра́здник.
Сла́ва, и ны́не, глас 8:
Ужасну́шася разу́мная вся чинонача́лия,/ духо́вно совоку́пльше лик,/ и недоумева́хуся с на́ми и ду́си пра́ведных су́щии,/ зри́телие бы́вше виде́нию преужа́сному/ и зна́мению преди́вному,/ ви́дяще о́браз Цари́цы всех,/ от него́же из о́чию сле́зы теча́ху,/ и Свои́ пречи́стеи дла́ни просте́рши к Ро́ждшемуся из Нея́,/ возврати́ти гнев, подвиза́ющийся на ны,/ и прося́щи ми́ру умире́ния,/ и держа́вам утвержде́ния,/ и Бо́жиим церква́м благостоя́ния,/ и спасе́ния душа́м на́шим.
Вход. Проки́мен дне. И чте́ния Богоро́дичная.
Бытия́ чте́ние (глава́ 28):
Изы́де Иа́ков от студенца́ кля́твеннаго и и́де в Харра́нь./ И обре́те ме́сто, и спа та́мо: за́йде бо со́лнце,/ и взят от ка́мения ме́ста того́, и положи́ возгла́вие себе́, и спа на ме́сте о́ном./ И сон ви́де./ И се ле́стница, утвержде́на на земли́, ея́же глава́ досяза́ше до небе́с,/ и Ангели Бо́жии восхожда́ху и низхожда́ху по ней./ Госпо́дь же утвержда́шеся на ней и рече́:/ Аз Бог Авраа́мов, отца́ твоего́, и Бог Исаа́ков, не бо́йся:/ земля́, иде́же ты спи́ши на ней, тебе́ дам ю и се́мени твоему́./ И бу́дет се́мя твое́, я́ко песо́к земны́й, и распространи́тся на мо́ре, и ли́ву, и се́вер, и на восто́ки;/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́, а́може а́ще по́йдеши./ И возвращу́ тя в зе́млю сию́, я́ко не и́мам тебе́ оста́вити, до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́, и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́: я́ко стра́шно ме́сто сие́;/ несть сие́, но дом Бо́жий, и сия́ врата́ Небе́сная.
Проро́чества Иезеки́илева чте́ние (главы́ 43 и 44):
Та́ко глаго́лет Госпо́дь:/ бу́дет от дне осма́го и про́чее, сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы, глаго́лет Адонаи́ Госпо́дь./ И обрати́ мя на путь врат святы́х вне́шних,/ зря́щих на восто́ки, и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их;/ я́ко Госпо́дь Бог Изра́илев про́йдет и́ми, и бу́дут затворе́на./ Яко Игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х, су́щих к се́веру, пря́мо хра́му,/ и ви́дех, и се испо́лнь сла́вы храм Госпо́день.
При́тчей чте́ние (глава́ 9):
Прему́дрость созда́ Себе́ дом и утверди́ столпо́в седмь./ Закла́ Своя́ же́ртвенная, и раствори́ в ча́ши Свое́й вино́,/ и угото́ва Свою́ трапе́зу./ Посла́ Своя́ рабы́, созыва́ющи с высо́ким пропове́данием на ча́шу, глаго́лющи:/ И́же есть безу́мен, да уклоня́тся ко Мне./ И тре́бующим ума́ рече́:/ Прииди́те, яди́те Мой хлеб и пи́йте вино́, е́же раствори́х вам./ Оста́вите безу́мие и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я прии́мет себе́ безче́стие,/ облича́яй же нечести́ваго опоро́чит себе́:/ обличе́ния бо нечести́вому ра́ны ему́./ Не облича́й злых, да не возненави́дят тебе́./ Облича́й прему́дра, и возлю́бит тя./ Даждь прему́дрому вину́, и прему́дрший бу́дет./ Сказу́й пра́ведному, и приложа́т приима́ти./ Нача́ло прему́дрости страх Госпо́день и сове́т святы́х ра́зум:/ разуме́ти бо зако́н по́мысла есть блага́го./ Сим бо о́бразом мно́гое поживе́ши вре́мя,/ и приложа́тся тебе́ ле́та живота́.
На лити́и стихи́ры, глас 6:
Злата́я кади́льнице,/ ру́чко и же́зле,/ свети́льниче златоза́рный/ и сви́тче Боже́ственный,/ в не́мже персто́м Бо́жиим/ Сло́во написа́ся,/ Тебе́ велича́ем.
Да́руй нам, Богоро́дице,/ по́мощь от печа́ли, на Тя наде́ющимся,/ ве́рным прибе́жище,/ избавля́й от бед рабы́ Твоя́, Деви́це,/ к Тебе́ бо по Бо́зе упова́ние вси возлага́ем.
Влады́чице, Ма́ти Изба́вителя,/ приими́ моле́ние раб Твои́х,/ а́ще и недосто́йне моля́щих Ти ся,/ да мо́лишися за ны/ к ро́ждшемуся из Тебе́ Влады́це ми́ру,/ Ты бу́ди нам Изба́вительница.
Я́же ра́дость от А́нгела прии́мшая/ и ро́ждши Зижди́теля Твоего́,/ Де́во, спаси́ Тебе́ велича́ющих.
Влады́чице, приими́ моли́тву раб Твои́х/ и изба́ви нас/ от вся́кия ну́жды и печа́ли.
Сла́ва, и ны́не, глас 8:
Что у́бо, му́жие богохрани́маго гра́да Пско́ва,/ ви́девше преди́вное зна́мение/ от Твоего́ пречи́стаго о́браза, Пресвята́я Влады́чице,/ сле́зы от пречи́стую о́чию, и ужа́сшеся,/ усре́тше со свяще́нным чи́ном,/ тре́петни со слеза́ми си́це глаго́лаху:/ не пре́зри, Влады́чице, воздыха́ния раб Твои́х,/ и не отри́ни моле́ний на́ших вконе́ц,/ но моли́ о нас Сы́на Твоего́ и Бо́га на́шего,/ и ми́лостива и человеколюби́ва Того́ нам покажи́,/ изба́витися нам пра́веднаго Его́ преще́ния,/ Ты бо еси́, Пречи́стая, заступле́ние душа́м на́шим.
На стихо́вне стихи́ры, глас 2.
Подо́бен: До́ме Евфра́фов:
Сла́ва на Небеси́/ и на земли́ торжество́,/ я́ко Богоро́дица/ со святы́ми все́ми/ за вся ны к Сы́ну Своему́ мо́лится.
Стих: Слы́ши, Дщи, и виждь,/ и приклони́ у́хо Твое́.
Прииди́те, ве́рнии,/ во святу́ю сию́ це́рковь,/ зде бо Богоро́дица/ Свое́ю ми́лостию покрыва́ет лю́ди/ от вся́ких напа́стей вра́жиих.
Стих: Лицу́ Твоему́/ помо́лятся бога́тии лю́дстии.
Пречи́стая Богоро́дице,/ не забу́ди нас,/ Твои́х рабо́в,/ но за ны помоли́ся,/ ве́рою пою́щих Тя.
Сла́ва, и ны́не, глас 8:
Дал еси́ зна́мение животво́рное/ от о́браза Пречи́стыя Твоея́ Ма́тере, Сло́ве,/ его́же зря́ще, любе́зно облобыза́ем,/ и, от Сея́ ра́дости испо́лнившеся,/ стра́шны враго́м и борю́щим с на́ми явля́емся,/ и, та́инство Прему́дрости Бо́жия уви́девше,/ хва́лим па́че сло́ва Ро́ждшую Тя,/ Иису́се, чуде́сная Добро́то,/ спаси́ всех нас, я́ко Милосе́рд.
Тропа́рь, глас 4:
Я́ко звезда́ пресве́тлая/ возсия́ в Росси́йстей земли́: / от ико́ны честна́го о́браза Твоего́, Богоро́дице Де́во,/ из обою́ о́чию теко́ша сле́зы Твоя́, я́ко река́,/ и ви́девше наро́ди пско́встии, му́жи и жены́ и со ча́ды,/ с пла́чем моля́щеся о́бразу Твоему́, си́це глаго́лаху:/ о Пресвята́я Влады́чице Богоро́дице,/ не забу́ди гре́шных раб Твои́х,/ моля́щися Христу́ Бо́гу на́шему спасти́ся нам.
НА У́ТРЕНИ
На Бог Госпо́дь: тропа́рь три́жды.
По 1-м стихосло́вии седа́лен, глас 4:
О́чи мы́сленнеи очи́стивше,/ прии́дем, торжеству́юще све́тло, чту́ще Богоотрокови́цу,/ добро́ту Иа́ковлю и Неве́сту всех Царя́, Христа́ Бо́га на́шего,/ Сия́ бо показа́ся Не́бо, и кра́сная пала́та, и це́рковь одушевле́нна,/ и Сея́ си́лою сопроти́вных побежда́ем.
Сла́ва, и ны́не, глас то́йже.
По 2-м стихосло́вии седа́лен, глас 4:
Не умолчи́м никогда́, Богоро́дице,/ си́лы Твоя́ глаго́лати, недосто́йнии:/ а́ще бо Ты не бы предстоя́ла моля́щи,/ кто бы нас изба́вил от толи́ких бед,/ кто же бы сохрани́л до ны́не свобо́дны?/ Не отсту́пим, Влады́чице, от Тебе́,/ Твоя́ бо рабы́ спаса́еши при́сно от вся́ких лю́тых.
Сла́ва, и ны́не, то́йже.
Велича́ние:
Велича́ем Тя,/ Пресвята́я Де́во,/ богоизбра́нная Отрокови́це,/ и чтем о́браз Твой честны́й,/ и́мже показа́ла еси́/ пречу́дное зна́мение.
И псало́м избра́нный: Помяни́, Го́споди, Дави́да:
По полиеле́и седа́лен, глас 8.
Подо́бен: Ве́ре Бо́жии:
Я́же Небе́с превы́шшая су́щи, Херуви́м вои́стину сла́внейши,/ всея́ тва́ри честне́йши, Де́во Пречи́стая,/ днесь благода́рственная, раби́ Твои́, прино́сим о́бразу честна́го подо́бия Твоего́,/ Ты бо стра́нно и преди́вно зна́мение показа́ла еси́ от пречи́стаго Твоего́ о́браза,/ те́мже согла́сно вопие́м Ти: Влады́чице Богоро́дице,/ моли́ Христа́ Бо́га согреше́ний оставле́ние дарова́ти нам,/ Тебе́ бо и́мамы наде́жду, раби́ Твои́.
Сла́ва, и ны́не, то́йже.
Та́же степе́нна, 1-й антифо́н 4-го гла́са. Проки́мен, глас 4: Помяну́ и́мя Твое́/ во вся́ком ро́де и ро́де. Стих: Слы́ши, Дщи, и виждь, и приклони́ у́хо Твое́. Вся́кое дыха́ние: Ева́нгелие от Луки́, зача́ло 4.
По 50-м псалме́ стихи́ра, глас 8: Что у́бо, му́жие: (пи́сана на вели́цей вече́рни, сла́вник на лити́и).
Кано́на два Пресвяте́й Богоро́дице: 1-й кано́н со ирмосо́м на 8, 2-й кано́н на 6.
Кано́н благода́рственный Пресвяте́й Богоро́дице, его́же краегране́сие сицево́: Даждь ми сло́во, Сло́ве Бо́жий, восхвали́ти Ро́ждшую Тя. Глас 6.
Песнь 1
Ирмо́с: Волно́ю морско́ю/ Скры́вшаго дре́вле/ гони́теля мучи́теля/ под земле́ю скры́ша спасе́нных о́троцы,/ но мы, я́ко отрокови́цы,/ Го́сподеви пои́м,/ сла́вно бо просла́вися.
Прииди́те, всех ве́рных благочести́вое мно́жество, духо́вно лик совоку́пльше,/ Пречи́стую Ма́терь Сло́ва пе́сньми похва́лим,/ зря́ще от пречи́стаго Ея́ о́браза зна́мение преди́вное показа́вшееся,/ е́же и воспои́м боже́ственными пе́сньми.
Я́коже ле́ствицу превысо́кую зрим Тя днесь, Де́во Всенепоро́чная,/ е́юже к Небе́сней высоте́ прехо́дим,/ Тя бо Предста́тельницу и непобеди́мое утвержде́ние стяжа́вше, Пречи́стая,/ наве́т вра́жиих избавля́емся и спаса́емся, ве́рою к Тебе́ притека́ющии.
Богоро́дичен: В рождестве́ тли не прие́мши,/ тле́ния всех нас, Де́во, измени́,/ печа́ли уставля́ющи, Ма́терним Твои́м дерзнове́нием, Богора́дованная.
Ин кано́н, глас 8.
Песнь 1
Ирмо́с: Посече́нный несеко́маго пресече́,/ и ви́де со́лнце зе́млю, ю́же не ви́де;/ лю́таго врага́ вода́ потопи́,/ и непреходи́мое про́йде Изра́иль,/ песнь же воспева́шеся:/ Го́сподеви пои́м, сла́вно бо просла́вися.
Боже́ственныя си́лы жезл преоблиста́я бла́гостию,/ святы́м зна́мением от свята́го жили́ща, яви́ся чу́до па́че естества́/ от о́браза Твоего́, Пречи́стая.
Ви́деша пресла́вное днесь зна́мение,/ бы́вшее от боже́ственнаго Твоего́ зра́ка, Ма́ти Бо́жия,/ и е́же о Тебе́ та́инство пропове́дающееся, Богоро́дице Де́во,/ издале́ча зря́щии Твоя́ чудеса́.
Наде́жду иму́ще на Тя, Богороди́тельнице, и несумне́нну ве́ру,/ гра́да сего́ наро́ди/ Тебе́ гра́ду забра́ло положи́ша, Де́во Неискусобра́чная.
Богоро́дичен: Я́ко жи́ву Ма́терь Сло́ва ви́дев Тя наро́д многочи́сленный,/ зна́мение изря́дно показа́вшу,/ и обстоя́ще Твою́ всечестну́ю ико́ну со свяще́нным собо́ром, ру́це возде́вше к высоте́,/ моля́хуся, Тебе́ призыва́юще на по́мощь.
Катава́сия: Отве́рзу уста́ моя́:
Песнь 3
Ирмо́с: Тобо́ю, Христе́, Небеса́ утвержда́ема вся,/ Сло́во Бо́жие и Си́ла,/ испове́дуют сла́ву неизрече́нну/ и вседе́тельныя руки́ Твоея́ сотворе́ние,/ несть бо пресвя́т, ра́зве Тебе́, Го́споди.
Умилосе́рдися на ста́до Твое́, Пречи́стая,/ и мир гра́ду Твоему́ да́руй,/ сопроти́вных че́люсти сокруши́ и тех не́мощны до конца́ покажи́.
О́бщаго Па́стыря и Влады́ку поро́ждши, Христа́, Де́во Неискусобра́чная,/ Тому́ помоли́ся настоя́щаго гне́ва изба́витися нам/ и проти́внаго обстоя́ния, Влады́чице.
Богоро́дичен: Ми́лостивая, Ми́лостиваго ро́ждши Спа́са,/ виждь озлобле́ние и воздыха́ние люде́й Твои́х:/ ускори́, Пречи́стая, уще́дрити ны.
Ин
Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.
Приклони́ у́хо Твое́, Блага́я, и виждь озлобле́ние на́ше и бед умноже́ние,/ к Тебе́ бо душе́внеи о́чи простира́ем, Влады́чице,/ с пла́чем коле́на преклоня́ем, мо́лим Тя, вопию́ще:/ сла́ва, Богома́ти, зна́мению Твоему́.
Пою́т Тя, Богоро́дице, а́нгельстии чи́ни и пра́зднуют проро́цы,/ патриа́рси со святи́тели, теку́ще во святу́ю це́рковь, с ни́миже тогда́ и боголюби́вии наро́ди,/ ви́девше Тя, Цари́це, за ны, гре́шныя, к Сы́ну моля́щуся/ поми́ловати град и лю́ди, в нем живу́щия и сла́вящия Твоего́ пречи́стаго о́браза преди́вное зна́мение.
О пресла́вное зна́мение, испо́лнено у́жаса!/ Ви́девше тогда́ наро́ди от Твоея́ всечестны́я ико́ны, Богороди́тельнице, от обою́ о́чию сле́зы исходя́ща,/ стра́хом одержи́ми, со слеза́ми си́це взыва́ху:/ Влады́чице, не оста́ви нас.
Богоро́дичен: Зна́мения ны́не наста́ день,/ зна́мения ико́ны Твоея́, Де́во Богороди́тельнице,/ пра́здник све́тел соверша́юще, вопие́м Ти:/ несть, Пречи́стая, па́че Тебе́, Богоневе́сто.
Седа́лен, глас 8:
Ю́же дре́вле лик проро́ческий пропове́да дверь Небе́сную,/ неопали́мую купину́, и све́щник многосве́тлый, злату́ю кади́льницу, ру́чку и жезл,/ пресла́вно днесь и ди́вно зна́мение показа́./ Те́мже благода́рственная пе́ния воспису́ем Ти, раби́ Твои́, Богоро́дице:/ моли́ Христа́ Бо́га согреше́ний оставле́ние дарова́ти,/ Тебе́ бо и́мамы наде́жду, раби́ Твои́.
Сла́ва, и ны́не, то́йже.
Песнь 4
Ирмо́с: Удиви́ся Твой ра́зум от мене́,/ услы́шавшу пресла́вная веле́ния смотре́ния Твоего́,/ укрепи́ся же возлюбле́нием Твоего́ схожде́ния,/ Ты бо моея́ нищеты́ не отве́рглся еси́.
Почита́ющий Тя град, Пречи́стая, и по до́лгу блажа́щий,/ огражда́й от безбо́жных, Чи́стая, иноплеме́нник,/ Ты бо тому́ еси́, Пречи́стая, бога́тство неотъе́млемо, покро́в же и держа́ва.
Не мо́жет Тя сло́во челове́ческое, ни язы́к хвали́ти досто́йно,/ от Тебе́ бо без се́мене Живода́вец Бог/ воплоти́тися, Пречи́стая, изво́ли.
Богоро́дичен: Помози́, Пречи́стая, спасти́ся пою́щим Тя/ и изба́ви от проти́вных наше́дшаго преще́ния, Богороди́тельнице.
Ин
Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.
Я́же Клас прозя́бши и возрасти́вши животво́рный,/ неора́нная ни́ва, даю́щи ми́рови жизнь,/ Богоро́дице, спаса́й пою́щия Тя.
Многобога́тый дар и неотъе́млемое сокро́вище дал еси́ гра́ду Твоему́,/ ико́ну Пречи́стыя Твоея́ Ма́тере, Сло́ве,/ и сея́ по́мощию проти́вных низлага́й.
В боже́ственнем хра́ме Твое́м, Богора́дованная,/ иде́же чудотво́рная Твоя́ ико́на поста́влена бысть, во утвержде́ние богохрани́мому гра́ду на́шему,/ совоку́пльшеся, Тя прославля́ем.
Богоро́дичен: Собо́ри ве́рных и вся́ко состоя́ние челове́ческое веселя́тся,/ совоку́пльшеся в честне́м хра́ме Твое́м,/ зря́ще в нем, я́коже пресве́тлое со́лнце, о́браз Пречи́стыя Твоея́ Ма́тере, Сло́ве.
Песнь 5
Ирмо́с: Сою́зом любве́ связу́еми, апо́столи,/ влады́чествующему все́ми себе́ Христу́ возло́жше,/ кра́сны но́ги очища́ху,/ благовеству́юще всем мир.
Те́плая Засту́пнице к Тебе́ прибега́ющим и ненаде́ющимся наде́ждо,/ виждь озлобле́ния люде́й Твои́х/ и пода́ждь Твою́ по́мощь, Пречи́стая.
Я́же Огнь ро́ждшая Боже́ственный,/ проти́вных, Де́во Пречи́стая, моли́твы Твоея́ огне́м попали́,/ я́ко су́щи Ма́ти Зижди́теля, Всепе́тая.
Богоро́дичен: Чи́стая Богоневе́сто,/ недоуме́нныя лю́ди уще́дри Ма́терними Твои́ми моли́твами/ и е́же на ны сопроти́вных обстоя́ние претвори́ вско́ре моли́твами Твои́ми.
Ин
Ирмо́с: Вску́ю мя отри́нул еси́/ от лица́ Твоего́, Све́те незаходи́мый, / и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.
Вели́кий преднапису́ет Тя во проро́цех Моисе́й/ ковче́г, и трапе́зу, и све́щник, и ру́чку,/ обра́зно явля́я воплоще́ние е́же от Тебе́ Вы́шняго, Ма́ти Де́во.
Я́ко щито́м, огражда́еми непобеди́мою Твое́ю си́лою, Де́во,/ сопроти́вных побежда́ем неизрече́нное мно́жество, Всепе́тая.
Богоро́дичен: Ты бога́тство неистощи́мое, исцеле́ний исто́чник/ ве́рою прибега́ющим к хра́му Твоему́,/ иде́же пребыва́ет честны́й о́браз Твой, Влады́чице.
Песнь 6
Ирмо́с: Ят бысть,/ но не удержа́н в пе́рсех ки́товых Ио́на,/ Твой бо о́браз нося́,/ страда́вшаго и погребе́нию да́вшагося,/ я́ко от черто́га, от зве́ря изы́де./ Приглаша́ше же кустоди́и:/ храня́щии су́етная н ло́жная,/ ми́лость сию́ оста́вили есте́.
Изба́ви нас язы́ческаго наше́ствия и град Твой, Всепе́тая,/ и не преда́ждь до конца́ поги́бнути насле́дию Твоему́, Пречи́стая,/ но си́лою Ро́ждшагося из Тебе́, Влады́чице, проти́вных низложи́.
Многосогре́шших к Тебе́ не пре́зри, но приими́ мольбу́ Ма́тере Твоея́ о нас, Ще́дре,/ да не похва́лятся сопроти́внии: где есть Бог их? глаго́люще,/ но да разуме́ют вси, я́ко Ты, Изба́витель, с на́ми еси́.
Богоро́дичен: Ны́не по́мощи прии́де вре́мя, ны́не премене́нию потре́ба, Чи́стая,/ к Сы́ну Твоему́ и Бо́гу моли́ся,/ я́ко да уще́дрит согреши́вших нас и належа́щаго гне́ва изба́вит.
Ин
Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.
Псалмы́ Тя воспева́ем, Обра́дованная,/ и немо́лчно Ти, е́же ра́дуйся, вопие́м,/ Ты бо источи́ла еси́ всем ра́дость.
Зна́мение стра́шно и вещь пресла́вну от Твоея́ ико́ны, Влады́чице,/ днесь пра́зднующе, лю́дие Твои́, Богоро́дице,/ похва́льная, я́ко досто́йно похвалы́, прино́сим Ти, глаго́люще:/ ра́дуйся, Обра́дованная.
Богоро́дичен: Честну́ю ико́ну Твою́ ра́достным се́рдцем и душе́ю/ облобыза́ем, веселя́щеся,/ и, те́плою ве́рою прикаса́ющеся, исцеле́ние почерпа́ем.
Конда́к, глас 7:
Засту́пнице христиа́ном непосты́дная/ и Предста́тельнице гра́ду на́шему Пско́ву,/ не пре́зри моле́ния нас, гре́шных,/ ви́дящих от Твоего́ честна́го о́браза сле́зы теку́ща из обою́ о́чию/ и моля́щихся приле́жно,/ но предвари́, я́ко Блага́я, на по́мощь нам, ве́рно к Тебе́ прибега́ющим,/ услы́ши на́ша моле́ния, Богоро́дице,/ и изба́ви нас от нахожде́ния пога́ных,/ ускори́ же на моли́тву на́шу и потщи́ся на умоле́ние,/ заступа́ющи при́сно, Богоро́дице, чту́щих Тя:/ ра́дуйся, Де́во, христиа́ном похвало́.
И́кос:
Разреши́ тьму мои́х прегреше́ний, во уме́ мое́м лежа́щую,/ и Твои́м мя све́том просвети́, Де́во, я́ко да возмогу́ Тебе́ похвалу́ принести́,/ Ю́же Оте́ц восхвали́, и Дух Святы́й осени́, Сын же и Сло́во Бо́жие всели́ся/ и, нетле́нно от пречи́стою Твое́ю боку́ проше́д, с челове́ки поживе́,/ те́мже гре́шнии мы и недосто́йнии раби́ Твои́, днесь соверша́юще свяще́нное торжество́,/ зна́мение бы́вшее честны́я ико́ны Твоея́, и́мже преди́вное чу́до показа́ла еси́,/ и Твоему́ чудеси́ уди́вльшеся, Твои́х бога́тных дарова́ний испо́лнившеся,/ вме́сто благово́нных арома́т, ели́ко возмо́жно нам, земны́м, похва́льная прино́сим Тебе́, глаго́люще:/ ра́дуйся, покро́ве и наде́ждо гра́ду Твоему́;/ ра́дуйся, я́ко проти́вных си́лою Твое́ю низлага́ем;/ ра́дуйся, Разу́мнаго Со́лнца Ма́ти, ве́рных просвеща́ющи, неве́рных же помрача́ющи;/ ра́дуйся, Де́во, христиа́ном похвало́.
Песнь 7
Ирмо́с: Неизрече́нное чу́до:/ в пещи́ Изба́вивый преподо́бныя о́троки из пла́мене/ во Гро́бе мертв, бездыха́нен полага́ется/ во спасе́ние нас, пою́щих:/ Изба́вителю Бо́же,/ благослове́н еси́.
Вои́стину сокро́вище честно́е гра́ду Твоему́ ико́на Твоя́ дарова́ся, Пречи́стая,/ ю́же са́ми зря́ще, чудеси́ удивля́емся и Сы́ну Твоему́ вопие́м:/ благослове́н Бог оте́ц на́ших.
Я́коже иногда́ ниневи́тяны покая́ния ра́ди пощади́л еси́, Сло́ве Бо́жий, про́поведию Ио́ны проро́ка,/ та́кожде и зде показа́ о́бразом Пречи́стыя Твоея́ Ма́тере, Христе́, вопию́щим:/ благослове́н Бог оте́ц на́ших.
Богоро́дичен: Храм Тя Бо́жий, Влады́чице, ве́дуще,/ во святе́м хра́ме Твое́м ру́це нечи́стеи дви́жем на моли́тву:/ виждь озлобле́ние на́ше и пода́ждь Твою́ по́мощь, Богоро́дице.
Ин
Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.
Виждь, Пречи́стая, озлобле́ние раб Твои́х, и не отри́ни в коне́ц,/ Твое́ бо есмы́ достоя́ние и Твое́ю наде́ждею крепи́мся,/ да вси вопие́м Ти: ра́дуйся, Обра́дованная.
Светоно́сная благода́ть и исцеле́ние даде́ся гра́ду Твоему́,/ о́браз Твой, Пречи́стая,/ его́же любе́зно облобыза́юще, велича́ем.
Богоро́дичен: Незаходи́маго Све́та свеща́, Боже́ственнаго Сия́ния яви́ся све́щник,/ златосия́яй и мир озаря́яй заре́ю чи́стаго де́вства,/ пою́щия Тя спаса́еши, Благослове́нная, Я́же Бо́га пло́тию ро́ждши.
Песнь 8
Ирмо́с: Ужасни́ся, боя́йся, Не́бо,/ и да подви́жатся основа́ния земли́:/ се бо в мертвеца́х вменя́ется в вы́шних Живы́й/ и во Гроб мал странноприе́млется./ Его́же, о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Собезнача́льнаго Сло́ва Отцу́, Де́во Пречи́стая, нетле́нно родила́ еси́,/ Того́ моли́, Богороди́тельнице, от сопроти́вных напа́стей спасти́ся пою́щим:/ де́ти, благослови́те, свяще́нницы, по́йте и превозноси́те Его́ во ве́ки.
Его́же пропове́даша на Престо́ле превысо́це Иса́ия,/ Сего́ в ложесна́х, Де́во, вмести́ла еси́ и нетле́нно породила́ еси́,/ Того́ моли́ спасти́ся гра́ду Твоему́, пою́щу:/ де́ти, благослови́те, свяще́нницы, по́йте и превозноси́те Его́ во ве́ки.
Богоро́дичен: Еди́на су́ща Блага́я, Преблага́го Сло́ва умоли́ приле́жно,/ настоя́щаго гне́ва гра́ду Твоему́ изба́витися, несумне́нною ве́рою Сы́ну Твоему́ зову́щим:/ де́ти, благослови́те, свяще́нницы, по́йте и превозноси́те Его́ во ве́ки.
Ин
Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Сопроти́вных разжже́нныя пламенови́дныя на нас угаси́ стре́лы,/ я́ко да Тя пое́м, Чи́стая, во ве́ки.
Па́че естества́ Соде́теля и Спа́са, Бо́га Сло́ва родила́ еси́, Де́во,/ те́мже Тя пое́м, Чи́стая, во ве́ки.
Я́ко нетле́нное зерца́ло име́я град Твой ико́ну Твою́, Пречи́стая,/ сопроти́вящихся низлага́ем и Сы́ну Твоему́ вопие́м:/ благослови́те, вся дела́ Госпо́дня, Го́спода.
Богоро́дичен: Что Ти принесе́м, Пречи́стая, от всея́ тва́ри сла́вимей?/ Недоуме́емся, Владычице, то́чию е́же Гаврии́л научи́:/ ра́дуйся, Обра́дованная.
Песнь 9
Ирмо́с: Стра́нствия Влады́чня/ и безсме́ртныя трапе́зы/ на го́рнем ме́сте высо́кими умы́,/ ве́рнии, прииди́те, наслади́мся,/ возше́дша Сло́ва, от Сло́ва научи́вшеся,/ Его́же велича́ем.
О́ком милосе́рдым Твои́м свы́ше при́зри на град и лю́ди Твоя́, Пречи́стая,/ ины́я бо по́мощи не и́мамы, то́кмо Тебе́, Всенепоро́чная,/ да Тя вси, я́ко Ма́терь Бо́жию, непреста́нно велича́ем.
Еди́на ро́ждши Сло́во воплоще́нно, Де́во Всепе́тая,/ приснотеку́щий исто́чник исцеле́ний излива́вши/ ве́рою притека́ющим ко хра́му Твоему́, Пречи́стая.
Богоро́дичен: Раби́ Твои́, вопие́м Ти, Пречи́стая Ма́ти Бо́жия:/ обы́чныя ми́лости Твоя́ на град и лю́ди ми́лостивно покажи́,/ сопроти́вных обстоя́ний нас измени́, да Тя вси непреста́нно велича́ем.
Ин
Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.
Се вре́мя благоприя́тно и день спасе́ния,/ зна́мение ико́ны Твоея́, Пречи́стая,/ е́же пра́зднующе све́тло, духо́вно торжество́ соверша́ем.
Боже́ственною све́тлостию озаря́ему/ зрим днесь, Пречи́стая, ико́ну Твою́ честну́ю,/ е́йже кла́няющеся, Тя велича́ем.
Мы́сли очи́стивше, празднолю́бнаго гра́да Пско́ва собо́ри свяще́нных лико́в/ и всех ве́рных благочести́вое мно́жество, восхвали́те Ма́терь Сло́ва,/ е́же от Тоя́ о́браза бы́вшее преди́вное зна́мение,/ ему́же со стра́хом кла́няющеся, велича́ем.
Богоро́дичен: Де́вства Твоего́ зна́мение невреди́мо сохрани́ Сло́во Бо́жие, из Тебе́ проше́д,/ сохрани́ти и град Твой мо́лимся неразори́мь,/ Де́во Всепе́тая, да Тя непреста́нно велича́ем.
Свети́лен.
Подо́бен: Жены́, услыши́те:
Вожделе́в Твое́й добро́те, Пречи́стая, в Тя всели́ся/ и Тя Засту́пницу гра́ду Твоему́ Сло́во Бо́жие дарова́, / его́же сохраня́й заступле́нием Твои́м при́сно,/ я́ко да Тя ублажа́ем, Пренепоро́чная Отрокови́це.
Сла́ва, и ны́не, то́йже.
На хвали́тех стихи́ры Богоро́дице, глас 4. Самогла́сны:
Се храм пресве́тел/ и ме́сто свяще́ния,/ иде́же честна́я ико́на Ма́тере Бо́жия Сло́ва,/ приступи́те, челове́цы, и исцеле́ние почерпи́те,/ я́ко спасе́ние Тоя́ ра́ди дарова́ся/ ро́ду челове́ческому.
Что Тя, Богороди́тельнице, нареку́?/ Це́рковь Боже́ственную, вертогра́д еде́мский имену́ю,/ и Но́ев, Чи́стая, ковче́г, спаса́ющий нас,/ ца́рское свяще́ние и всесвя́т язы́к,/ Христа́ Бо́га на́шего собо́р,/ Моисе́ову же киво́ту уподо́блю Тя,/ еще́ же очисти́лище, и жезл прозя́бший нареку́,/ све́щник, и ру́чку, и кади́льницу всезлату́ю,/ к Тебе́ бо прибега́ет всяк ве́рный/ и испроша́ет ве́лию ми́лость.
Я́же ненаде́жным упова́ние изве́стно,/ согреша́ющим спасе́ние,/ Мари́е Всепе́тая, Чи́стая Богороди́тельнице,/ приими́ моле́ние на́ше,/ и испроси́ разреше́ние,/ я́же согреши́хом в житии́,/ Ма́терними Твои́ми моли́твами/ спаси́ от бед и бу́дущаго суда́, Влады́чице,/ вели́кия ра́ди Твоея́ ми́лости.
Ра́дуйся, непосты́дная Предста́тельнице;/ ра́дуйся, Преблага́я Богоро́дице;/ ра́дуйся, очисти́лище ми́ру;/ ра́дуйся, ра́досте скорбя́щим и приста́нище обурева́емым;/ ра́дуйся, я́же всем помога́ющи су́щим в ну́ждах;/ Ты сохрани́ нас, Влады́чице,/ и всех изба́ви ско́рбных, Всенепоро́чная,/ почита́ющих Твое́ ди́вное зна́мение.
Сла́ва, и ны́не, глас 5:
Востру́бим трубо́ю пе́сней,/ прекло́ньшися бо свы́ше, всех Цари́ца, Ма́ти Де́ва/ благослове́ньми венчава́ет воспева́ющих Ю;/ лю́дие да стеку́тся/ и Цари́це да воспле́щут в пе́снех, Царя́ ро́ждшей,/ сме́ртию одержи́мыя пре́жде/ разреши́ти человеколю́бно благоизво́лившаго;/ па́стыри и учи́тели,/ до́бляго Па́стыря Пречи́стую Ма́терь, Сло́ва,/ в честне́м Ея́ хра́ме соше́дшеся, восхва́лим,/ све́щник златоза́рный и светоно́сный о́блак,/ Небе́с ши́ршую, одушевле́нный же ковче́г,/ огнезра́чный Влады́чний престо́л,/ манноприе́мную злату́ю ста́мну,/ затворе́нную Сло́ва дверь,/ всем христиа́ном прибе́жище,/ пе́сньми благогла́сными похваля́юще, си́це рцем:/ пала́то Сло́ва,/ сподо́би смире́нных нас Небе́снаго Ца́рствия,/ вся бо возмо́жна хода́тайству Твоему́.
Славосло́вие вели́кое и отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 3. Песнь Богоро́дицы: Вели́чит душа́ Моя́ Го́спода,/ и возра́довася дух Мой о Бо́зе, Спа́се Мое́м. Стих: Я́ко призре́ на смире́ние Рабы́ Своея́, се бо от ны́не ублажа́т Мя вси ро́ди. Апо́стол к Филипписи́ем, зача́ло 240. Аллилу́ия, глас 8: Слы́ши, Дщи, и виждь, и приклони́ у́хо Твое́. Ева́нгелие от Луки́, зача́ло 54. Прича́стен: Ча́шу спасе́ния прииму́, и и́мя Госпо́дне призову́.
