Служба в честь явления мощей преподобных отец наших Григория и Кассиана, иже на Авнезе
ВЕ́ЧЕР
Блаже́н муж: 1-й антифо́н. На Го́споди, воззва́х: стихи́ры на 6, глас 8.
Подо́бен: Что вас нарече́м:
Стра́сти победи́вше теле́сныя/ воздержа́ния кре́пким ору́жием, преподо́бнии,/ безстра́стием сердца́ своя́ просвети́вше,/ бесо́вская помрачи́сте козноде́йствия,/ чуде́сными заря́ми блиста́юще, пресла́внии,/ разли́чныя неду́ги врачу́ете/ и ду́хи лука́выя отгоня́ете,/ моли́те спасти́ся душа́м на́шим.
Ве́трилом Креста́ направля́еми,/ пучи́ну непостоя́ннаго ле́гце преидо́сте, прему́дрии,/ в приста́нище ти́хое безмо́лвия всели́стеся,/ вся, я́же в ми́ре, оста́висте,/ да безце́нный би́сер – Христа́ Бо́га приобрето́сте,/ Его́же сия́нием просвети́стеся,/ моли́те спасти́ся душа́м на́шим.
Боле́зньми и труды́ теле́сными/ измени́вше неболе́зненно наслажде́ние,/ Григо́рие и Кассиа́не всеблаже́ннии,/ те́сный путь по́стничества преидо́сте,/ ра́йскаго простра́нствия достиго́сте, веселя́щеся,/ с ли́ки святы́х в мы́сленных черто́зех всели́стеся,/ моли́те спасти́ся душа́м на́шим.
Сла́ва, глас то́йже:
Пусты́ня, я́же пре́жде непло́дствующи,/ ны́не весели́тся,/ зря́щи в себе́ ста́да и́нок собира́ема/ в па́мять Григо́рия и Кассиа́на всеблаже́нных,/ с ни́ми же, о празднолю́бцы, соше́дшеся/ во обре́тение моще́й преподо́бных оте́ц,/ любе́зно обстоя́ще честны́я гро́бы, глаго́лем си́це:/ ра́дуйтеся, святи́и, исто́чницы чудесе́м неоску́днии;/ ра́дуйтеся, отцы́ Богому́дрии,/ я́ко свои́м терпе́нием многоко́зненнаго диа́вола уязви́ша;/ ра́дуйтеся, преблаже́ннии,/ я́ко венцы́ побе́дными увязо́шася от руки́ всех Царя́ Христа́ Бо́га,/ Ему́же предстоя́ще,/ моли́теся мир ми́рови дарова́ти, и Церква́м единомы́слие,/ и оте́честву на́шему побе́ды на сопроти́вныя,/ и душа́м на́шим ве́лию ми́лость.
И ны́не, Богоро́дичен: Царь Небе́сный:
Вход. Проки́мен дне и чте́ния 3 преподо́бническая.
Прему́дрости Соломо́новы чте́ние (главы 5 и 6):
Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка, облако́в на наме́рение полетя́т./ И от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И, вма́ле нака́зани бы́вше, вели́кими благоде́тельствовали бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется,/ седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На стихо́вне стихи́ры, глас 5.
Подо́бен: Ра́дуйся:
Ра́дуйтеся, преподо́бнии отцы́ пусты́ннии,/ прекра́снии сосу́ди честни́и,/ Пресвята́го Ду́ха в себе́ нося́щии,/ крест свой на ра́мо взе́мше,/ после́довасте Христу́ невозвра́тным по́мыслом/ и плотска́я мудрова́ния ду́хови повину́сте,/ благи́ми же де́лы украси́вшеся,/ те́мже и Христо́с дарова́нием чуде́с обогати́ вас,/ разли́чныя неду́ги исцеля́ти,/ Григо́рие и Кассиа́не прехва́льнии,/ Боже́ственнаго человеколю́бия про́сим получи́ти ва́шими моли́твами/ и ми́рови дарова́ти ве́лию ми́лость.
Стих: Честна́ пред Го́сподем/ смерть преподо́бных Его́.
Ра́дуйтеся, отцы́ преблаже́ннии,/ сле́зными исто́чники ду́ши своя́ очи́стивше,/ всено́щными бде́нии к Бо́гу присво́истеся,/ от Него́же укрепля́еми,/ земна́я, я́ко тле́юща, оста́висте,/ собра́сте в души́ свое́й Боже́ственное сокро́вище Ду́ха,/ и Вы́шняго достоя́ния насле́дницы показа́стеся,/ и ны́не в Небе́сных селе́ниих водвори́стеся,/ со А́нгелы ликовству́юще./ Сего́ ра́ди Боже́ственнаго человеколю́бия/ про́сим получи́ти моли́твами ва́шими, преподо́бнии,/ и ми́рови дарова́ти ве́лию ми́лость.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Ра́дуйтеся, преподо́бнии отцы́ преблаже́ннии,/ прекра́сное ло́зие виногра́да Христо́ва бы́сте,/ источа́юще вино́ нам исцеле́ний незави́стных,/ с ве́рою притека́ющим к свято́му ва́шему хра́му,/ па́че же к чудотво́рней ра́це честны́х моще́й ва́ших./ Слепи́и, приходя́ще, прозира́ют,/ разсла́бленнии укрепля́ются, ска́чуще отхо́дят,/ ду́си лука́вии отгоня́ются призыва́нием вас, святи́и,/ тем и мы Боже́ственнаго человеколю́бия/ про́сим получи́ти ва́шими моли́твами./ Моли́теся о нас Еди́ному Хри́сту Бо́гу на́шему/ дарова́ти ми́рови ве́лию ми́лость.
Сла́ва, глас 6:
По́стничестии ли́цы соше́дшеся днесь,/ многоцеле́бныя мо́щи Григо́рия и Кассиа́на любе́зно целу́юще,/ сии́ бо, хвала́м досто́йнии,/ подви́гшеся, на земли́ неви́димаго врага́ ополче́ния му́жески победи́ша,/ те́мже сла́вно от Бо́га венча́шася,/ по сме́рти прии́мше от Христа́ дарова́ния цельба́м,/ про́сят мир ми́рови/ и душа́м на́шим ве́лию ми́лость.
И ны́не, Богоро́дичен.
Тропа́рь, глас 4:
Бо́же оте́ц на́ших,/ творя́й при́сно с на́ми по Твое́й кро́тости,/ не отста́ви ми́лость Твою́ от нас,/ но моли́твами их/ в ми́ре упра́ви живо́т наш.
Ин тропа́рь, глас 8:
Правосла́вия наста́вницы,/ благоче́стия и чистоты́ учи́телие,/ Це́ркви Волого́дстей богодарова́нное украше́ние,/ преподо́бнии отцы́ на́ши Григо́рие и Кассиа́не,/ моли́те Ми́лостиваго Бо́га,/ да ва́шим предста́тельством пода́ст благода́ть и мир стране́ на́шей/ и душа́м на́шим спасе́ние.
НА У́ТРЕНИ
На Бог Госпо́дь: тропа́рь святы́х, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 4.
Подо́бен: Красоте́ де́вства:
Земна́я и мимотеку́щая возненави́десте, Богому́дрии,/ распя́стеся ми́рови и с ми́ром к преми́рному, ра́дующеся, взыдо́сте,/ отню́дуже и Подвигополо́жник Христо́с Бог вели́кими да́ры обогати́ вас,/ те́мже ва́шу па́мять почита́ем, преподо́бнии.
Сла́ва, и ны́не, Богоро́дичен:
Де́во Всенепоро́чная,/ И́же Пресу́щнаго Бо́га ро́ждшая,/ со преподо́бными Того́ непреста́нно моли́/ оставле́ние прегреше́ний и исправле́ние жития́ да́ти нам пре́жде конца́,/ ве́рою и любо́вию пою́щим Тя по до́лгу, Еди́на Всепе́тая.
По 2-м стихосло́вии седа́лен, глас 1.
Подо́бен: Лик А́нгельский:
И́стинные сверши́телие за́поведем Христо́вым яви́стеся/ и Тому́ сою́зом любве́ привяза́стеся,/ нищету́ возлюби́сте и пусты́нное озлобле́ние па́че мирска́го пристра́стия,/ Небе́сной сла́ве с А́нгелы сподо́бистеся,/ тем моли́те Христа́ Бо́га о чту́щих па́мять ва́шу, преподо́бнии.
Сла́ва, и ны́не, Богоро́дичен:
Всех Творца́ и Бо́га и Соде́теля, Всенепоро́чная Чи́стая, Ду́хом Боже́ственным в ложесна́х зача́т/ и без истле́ния родила́ еси́./ Его́же сла́вяще, Тя воспева́ем, Де́во,/ я́ко пала́ту Царя́ всех и христиа́ном всем заступле́ние.
По полиеле́и седа́лен, глас 5.
Подо́бен: Собезнача́льное Сло́во:
Одожде́нием слез ва́ших, преподо́бнии,/ сло́во Бо́жие, все́янное в земли́ серде́ц ва́ших,/ до́бре возрасти́сте и умно́жисте, я́ко прему́дрии,/ те́мже мо́лим вы:/ непло́дствующия ду́ши на́ша доброде́тельми/ моли́твами свои́ми добропло́дны покажи́те/ да благода́рственно почита́ем всечестну́ю па́мять ва́шу.
Сла́ва, и ны́не, Богоро́дичен:
Пречи́стая Де́во, нас поми́луй,/ ве́рою прибега́ющих к Тебе́, Милосе́рдой,/ и прося́щих Твое́ те́плое, Влады́чице, заступле́ние./ Мо́жеши бо, я́ко Блага́я всех спасти́,/ я́ко су́щи Ма́ти Бо́га Вы́шняго,/ ма́терними Свои́ми мольба́ми при́сно объе́мши, Обра́дованная.
Степе́нна 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.
По 50-м псалме́ стихи́ра, глас 6, зри сла́вник на стихо́вне.
Кано́н Богоро́дицы и святы́м со ирмосо́м на 6, глас 4.
Песнь 1
Ирмо́с: Пое́м песнь побе́дную Еди́ному Бо́гу,/ сотво́ршему пресла́вная:/ дре́вле бо фарао́на/ со всево́инством в мо́ри погрузи́.
Посли́ свы́ше благода́ть Ду́ха Твоего́, Христе́ Спа́се,/ и отве́рзи ми устне́,/ я́ко да возмогу́ по достоя́нию воспе́ти просла́вльшия Тя преподо́бныя.
Просвети́выйся благода́тию Свое́ю, Го́споди,/ просвети́ ми се́рдце и ум,/ да воспою́ Ти, Христе́, хвалу́ в па́мять Григо́рия и Кассиа́на, преподо́бных Твои́х.
Трисия́нным све́том Божества́ просвети́вшеся, преподо́бнии,/ мра́чную тьму грехо́в отгна́сте,/ покая́ния све́тлую зарю́ пода́ти пою́щему вас моли́теся.
Богоро́дичен: Звезда́, я́же от Иа́кова, возсия́ из Тебе́, Чи́стая, я́ко Бог,/ изчита́я мно́жество преподо́бных звезд,/ те́мже Того́ сия́ньми отыми́ мои́х грехо́в тьму.
Песнь 3
Ирмо́с: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною Му́дростию, Христе́,/ несть бо свят, па́че Тебе́, Человеколю́бче.
И́же над все́ми су́щаго Еди́наго Бо́га возлюби́сте вседу́шно, преподо́бнии,/ сего́ ра́ди ви́димая вся, я́ко не су́щая, преоби́десте/ и Того́ Еди́наго Христа́ приобрето́сте.
О земны́х всех, я́ко преходя́щих, небрего́сте, отцы́ всему́дрии,/ и сего́ ра́ди Небе́сных благ сподо́бистеся,/ и́же от ве́ка угото́ва Бог лю́бящим Его́.
А́нгельским житие́м на земли́ пожи́вше, Григо́рие и Кассиа́не пресла́внии,/ нестяжа́ние возлюби́сте,/ те́мже Небе́сное бога́тство от Бо́га прия́ли есте́, прему́дрии.
Богоро́дичен: Его́же пло́тию родила́ еси́, всех Бо́га,/ я́ко Сы́на Своего́ моли́,/ разреше́ние зол мои́х да́ти ми от жите́йских обстоя́ний.
Седа́лен, глас 8.
Подо́бен: Прему́дрости:
Слез ва́ших тече́нием, преподо́бнии,/ погаси́ли есте́ пла́мень страсте́м,/ и источи́ли есте́ ре́ки чудесе́м исцеле́ния,/ и прия́сте от Бо́га Небе́сная наслажде́ния и со А́нгелы вселе́ние./ Тем, соше́дшеся по до́лгу,/ почита́ем всечестну́ю и моле́бную па́мять ва́шу, преблаже́ннии Богоно́снии отцы́ Григо́рие и Кассиа́не,/ моли́те Христа́ Бо́га согреше́нием оставле́ние дарова́ти/ чту́щим любо́вию святу́ю па́мять ва́шу.
Сла́ва, и ны́не, Богоро́дичен:
Я́ко Де́ву и еди́ну в жена́х, Тя, без се́мене ро́ждшую, Бо́га пло́тию/ вси ублажа́ем, ро́ди челове́честии,/ Огнь бо всели́ся в Тя Божества́/ и я́ко Младе́нца дои́ши Зижди́теля и Го́спода,/ тем а́нгельский и челове́ческий род досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.
Песнь 4
Ирмо́с: Неизсле́дный Бо́жий Сове́т,/ е́же от Де́вы воплоще́ния/ Тебе́, Вы́шняго,/ проро́к Авваку́м усмотря́я, зовя́ше:/ сла́ва си́ле Твое́й, Го́споди.
Сокро́вище нетле́нное цельба́м днесь нам от Бо́га дарова́ся/ явле́нием честны́х моще́й ва́ших,/ Григо́рие и Кассиа́не преподо́бнии.
Авраа́му поревнова́сте пра́отцу, преподо́бнии,/ вся своя́ оста́вльше и в пусты́ню всели́стеся,/ я́коже он в зе́млю обетова́ния.
Фарисе́йское киче́ние возненави́девше, преподо́бнии,/ и мытаре́ву смире́нию ревну́юще,/ те́мже и Госпо́дь сла́вою превознесе́ вас.
Богоро́дичен: Оскверне́ннаго мя ка́лом греха́/ моли́тв Твои́х окропи́ иссо́пом/ и омы́й скве́рну страсте́й мои́х, Влады́чице,/ и я́ви Ду́ху Свято́му жили́ще.
Песнь 5
Ирмо́с: Нечести́вии не у́зрят сла́вы Твоея́, Христе́,/ но мы Тя, Единоро́дне,/ Оте́ческия Сла́вы сия́ние Божества́,/ от но́щи у́тренююще,/ воспева́ем Тя, Человеколю́бче.
Ка́менем ве́ры утверди́вшеся, святи́и,/ вра́жеских ветр не убоя́стеся/ и припре́ния мы́сленных рек к душе́вней ва́шей хра́мине.
Сказа́ти кто возмо́жет бы́вшая ва́ша чудеса́, преподо́бнии,/ слепы́я бо просвеща́ете, исцеля́ете неду́жныя,/ к вам притека́ющия.
У́глия стра́стная ту́чею слез свои́х погаси́сте, преподо́бнии,/ пло́ти моея́ мы́сленная распале́ния, молю́ся, погаси́те/ моли́твами свои́ми, пресла́внии.
Богоро́дичен: Рай жи́зни, Богоро́дице, су́щий,/ сме́рти грехо́вныя и страсте́й многообра́зных/ изба́ви мя, раба́ Твоего́, вско́ре.
Песнь 6
Ирмо́с: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли избави́ мя, Иису́се, Царю́ сил.
Ду́ха Свята́го помава́нием, преподо́бнии,/ ле́гце преидо́сте мо́ре жития́ сего́,/ волна́ми вра́жиими не влада́еми,/ соблюдо́сте теле́сныя ва́ши корабли́.
Еги́пта страсте́й избего́сте, прему́дрии,/ и мо́ре мы́сленное жития́ многомяте́жнаго преидо́сте,/ и в зе́млю ра́йскаго обетова́ния, ра́дующеся, всели́стеся.
Сла́вящая Мя просла́влю Са́м,– рече́ Госпо́дь,/ те́мже и просла́ви вас,/ е́же твори́ти на земли́ зна́мения и чудеса́ пресла́вная.
Богоро́дичен: Це́рковь Тя Бо́жию и пала́ту душе́вную преподо́бных лик разуме́в,/ мо́лит Тя, Еди́ну, отъи́мшую на́ше поноше́ние.
Конда́к, глас 4.
Подо́бен: Яви́лся еси́:
И́же плотска́я мудрова́ния Ду́хови повину́вше/ и вся, я́же на земли́, презре́вше,/ Христу́, Еди́ному Бо́гу, прилепи́вшеся, святи́и,/ и Того́ ра́ди в пусты́ню всели́шася,/ источа́ете ны́не исцеле́ния/ с ве́рою притека́ющим к моще́м ва́шим,/ поле́зная нам проси́те от Бо́га/ моли́твами ва́шими богоприя́тными,/ Григо́рие и Кассиа́не преподо́бнии.
И́кос:
Свяще́нная и Богому́драя дво́ице оте́ц пречу́дная,/ на земли́ до́бре подви́гшеся,/ целому́дренно и пра́ведно пожи́вшая,/ по́стнически испыта́вшеся, любо́вию и наде́ждею вооружи́вшеся и ве́рою огради́вшеся,/ разори́ша хи́трости вра́жия кова́рствия/ и, с ли́ки святы́х всех Царя́ Христа́ Престо́лу предстоя́ще,/ Его́же све́том просвеща́еми, подо́бными венцы́ венча́стеся,/ во всем ми́ре чуде́сными заря́ми блиста́юще,/ поле́зная нам проси́те от Бо́га моли́твами ва́шими богоприя́тными,/ Григо́рие и Кассиа́не преподо́бнии.
Песнь 7
Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Сокро́вище бы́ша мне́вшему,/ свеща́ горя́щая яви́стеся, преподо́бнии,/ те́мже отемне́нное грехи́ се́рдце мое́/ све́том моли́тв ва́ших, святи́и, просвети́те,/ да пою́ всегда́:/ препе́тый отце́м Бог, благослове́н еси́.
Разреши́, Григо́рие преподо́бне, моли́твами свои́ми/ ду́шу мою́, свя́занную прило́ги льсти́ваго,/ я́коже разреши́л еси́ свя́заннаго, я́ко да благода́рственно пою́:/ препе́тый отце́м Бог, благослове́н еси́.
Сокро́вища тле́юща иска́вша иногда́/ отри́нусте, от гро́ба ва́шего, святи́и, разсла́бивше,/ и па́ки пока́явшуся здра́вия сокро́вища нетле́ния пода́сте, пою́щу:/ отце́м Бог, благослове́н еси́.
Богоро́дичен: Раздери́, Де́во Чи́стая, Твоего́ Сы́на ору́жием/ мои́х грехо́в рукописа́ние и спаси́ мя, пою́ща:/ препе́тый оте́ц на́ших Бо́же, благослове́н еси́.
Песнь 8
Ирмо́с: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.
Разсла́бленнаго иногда́, моля́щася, святи́и, возста́висте/ и сего́ быстре́е ходи́ти напра́висте./ И мене́, ослабе́вша благи́ми дея́нии, моля́щася,/ укрепи́те ко благодея́нием, да взыва́ю:/ благослови́те, вся дела́ Госпо́дня, Го́спода.
Ослепле́ны зени́цы души́ моея́/ просвети́те све́том моли́тв ва́ших, преподо́бнии,/ и́же слепы́х просвети́сте дре́вле,/ с ни́миже да пою́ всегда́:/ благослови́те, вся дела́ Госпо́дня, Го́спода.
Отрокови́цу, ю́же на земли́ пове́ржену, боле́знующу,/ иногда́ явле́нием ва́шим, святи́и, возста́висте и здра́вие соверше́нно пода́сте,/ не к тому́ такова́я бы́ти, ей реко́сте.
Согни́вша и воземерде́вша, ра́ны души́ моея́ неисце́льныя/ моли́твами ва́шими, святи́и, исцели́те,/ я́коже согни́вша и смердя́ща иногда́ здра́ва показа́сте, да пою́:/ благослови́те, вся дела́ Госпо́дня, Го́спода.
Богоро́дичен: Изба́влься кля́твы пе́рвыя Тобо́ю,/ Пречи́стая Богома́ти Благослове́нная, Влады́чице Благода́тная,/ тем ве́рою пою́:/ благослови́те, вся дела́ Госпо́дня, Го́спода.
Песнь 9
Ирмо́с: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови благослове́ние процвела́ еси́./ Тем Тя вси велича́ем.
Певце́м, и́же пою́щим вас и честно́е обре́тение ва́ше торжеству́ющим,/ моли́твами ва́шими от враг мы́сленных и ви́димых/ изба́витися моли́теся, преподо́бнии.
Я́ко крин, в по́стнических удо́лиих процвето́сте, Григо́рие и Кассиа́не,/ днесь пра́ведным удобре́ние показа́стеся,/ благода́тию Ду́ха сия́юще и озаря́юще ве́рно пою́щих свяще́нное ва́ше торжество́.
Си́лою Бо́жиею укрепля́еми,/ неви́димаго врага́ шата́ния не́мощна показа́сте/ и в чудесе́х сла́вни от Бога́ яви́стеся,/ те́мже ва́ше почита́ем обре́тение.
Богоро́дичен: Спаси́, Богоро́дице, и́же к Тебе́ прибега́ющих/ от бед, и паде́жа греха́45, и бу́ри теле́сных страсте́й,/ и волне́ний ну́ждных печа́ли и жития́, и зло́бы лука́вствия.
Свети́лен:
Я́ко два свети́ла, возсия́сте в пусты́ни,/ зе́млю Ру́сскую просвеща́ете заря́ми чуде́с, преподо́бнии,/ во тьме грехо́вней су́щия ны озари́те све́том/ И́же в вас Су́щаго Бо́жия Ду́ха.
Сла́ва, и ны́не, Богоро́дичен:
И́же от Бо́га ми́рови по́данным благи́м Ты вина́ бысть, Богоро́дице,/ ны́не ми́лостива сотвори́ о о́бщем спасе́нии на́шем благопреме́ннаго Бо́га.
На хвали́тех стихи́ры, глас 1.
Подо́бен: Прехва́льнии му́ченицы:
Преподо́бнии отцы́,/ ва́ши мо́щи земля́ не потаи́ла есть,/ но Не́бо прия́т вы/ и чудеса́ ва́ша я́сно пропове́даша вас./ Свеща́ разу́мная ве́рным яви́шася,/ и ны́не моли́теся дарова́ти душа́м на́шим/ мир и ве́лию ми́лость.
Преподо́бнии отцы́,/ лико́м по́стническим совокупи́стеся,/ безстра́стием украша́еми,/ всели́стеся в селе́ния пра́ведных,/ иде́же свет не заходя́й,/ его́же наслажда́етеся,/ и ны́не моли́теся дарова́ти душа́м на́шим/ мир и ве́лию ми́лость.
Преподо́бнии отцы́,/ душа́ми чи́стыми пресла́вно/ Пречи́стому сподо́бистеся Бо́гу и Творцу́ всех/ же́ртву Тому́ – дух сокруше́н принести́,/ я́ко храни́тели веле́ний Его,/ и ны́не моли́теся дарова́ти душа́м на́шим/ мир и ве́лию ми́лость.
Сла́ва, глас 6:
Возра́дуемся духо́вно днесь,/ честну́ю па́мять оте́ц соверша́юще,/ в не́йже всесвяще́нныя их и целе́бныя обрето́шася мо́щи,/ слове́сныя венцы́ плету́ще,/ венча́ем честны́я их главы́,/ сия́ бо смире́нием и посто́м сотро́ша главу́ неви́димаго врага́,/ я́ко зла́то в горни́ле, терпе́нием искуси́вшеся./ И ны́не све́тлии светле́йшему предстоя́т Престо́лу всех Царя́/ и прие́млют венцы́ побе́ды,/ и́хже, призыва́юще, мо́лим:/ моли́те Христа́ Бо́га/ дарова́ти оте́честву на́шему на проти́вныя побе́ды,/ и ве́ры соедине́ние,/ и душа́м на́шим ве́лию ми́лость.
И ны́не, Богоро́дичен.
Славосло́вие вели́кое и отпу́ст.
На Литурги́и слу́жба преподо́бническая
