Служба в честь возвращения мощей преподобнаго Иоанна Рыльскаго из Терново в Рыльский монастырь

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 1.

Подо́бен: Небе́сных чино́в:

Вре́менная оста́вль жела́телем вре́менных,/ тле́нных любве́, я́ко скоропрехо́дныя, отбе́гл еси́, о́тче,/ и, сла́сти возненави́дев теле́сныя,/ в пусты́ню всели́лся еси́,/ ми́ра отре́кся, и, зе́льным воздержа́нием плоть истни́в,/ земны́й А́нгел показа́лся еси́, Богоно́се.

Жела́нием лу́чших распала́емь, о́тче,/ и Авраа́мскаго услы́шав гла́са,/ любе́зне тя призыва́юща,/ мир оста́вил еси́/ и в пусты́ню всели́лся еси́,/ иде́же к Бо́гу прича́стием ум свой просвети́в/ и ду́шу воздержа́нием очи́стив,/ благи́х наде́жд исполне́ние прия́л еси́, Богоприя́тне.

Я́рость души́ любо́вию к Бо́гу обузда́в,/ и по́хоть зе́льным воздержа́нием увяди́в,/ и ум чи́стою на Не́бо впери́в моли́твою,/ Влады́це своему́ и Бо́гу угоди́л еси́, о́тче,/ И́же тя на земли́ си́лою чуде́с просла́ви/ и в преми́рная селе́ния дух твои́ всели́, Богоблаже́нне.

Вле́поту6 Дух Бо́жий почи́ на тя, Иоа́нне,/ чи́стаго се́рдцем, по ева́нгельскому веле́нию,/ смире́нна же му́дростию и бодра́ в моли́твах, о́тче,/ бога́та слеза́ми и коле́н преклоне́нии,/ вышеесте́ственным и чу́дным воздержа́нием,/ любве́ же и кро́тости испо́лнена и виде́ньми возвыша́ема.

Сла́ва, глас 6:

Мяте́жа мирска́го избе́г,/ добр ше́ственник к Небесе́м был еси́ ле́ствицею доброде́телей мно́гих:/ житие́м бо Ангелы удиви́в, возвесели́л еси́,/ бе́сы же ужаси́в, посрами́л еси́/ и чуде́с изря́ден де́латель показа́лся еси́./ И ны́не Тро́ице предстоя́ со а́нгельскими чи́нми, Иоа́нне досточу́дне,/ испроси́ нам, и́же с ве́рою ра́це моще́й твои́х покланя́ющимся,/ ве́лия и бога́тыя ми́лости.

И ны́не, Богоро́дичен:

Никто́же, притека́яй к Тебе́,/ посра́млен от Тебе́ исхо́дит,/ Пречи́стая Богоро́дице Де́во,/ но про́сит благода́ти/ и прие́млет дарова́ние к поле́зному проше́нию.

На стихо́вне стихи́ры, глас 2.

Подо́бен: До́ме Евфра́фов:

Гряди́, и́ноков сосло́вие, ра́достно,/ обступи́ мо́щи честны́я/ Иоа́нна блаже́ннаго,/ поя́ пе́ние с весе́лием/ спаси́тельное.

Стих: Святы́м, и́же суть на земли́ Его́,/ удиви́ Госпо́дь вся хоте́ния Своя́ в них.

Пусты́не, ра́дуйся,/ горо́ Бо́жия, весели́ся,/ иногда́ бо ми́ра бе́гая,/ ны́не же от Те́рнова преноси́мый,/ Иоа́нн к тебе́ прии́де.

Стих: Восхва́лятся преподо́бнии во сла́ве/ и возра́дуются на ло́жах свои́х.

Хва́лим высо́кое/ твое́ житие́, Иоа́нне,/ блажи́м сла́вную твою́ па́мять,/ почита́ем и честны́х моще́й твои́х/ днесь возвраще́ние.

Сла́ва, и ны́не, Богоро́дичен:

Горе́ Тя а́нгельстии/ сла́вят ли́цы,/ до́ле же челове́честии, моля́ще, пою́т ро́ди,/ Де́во Влады́чице,/ Бо́га нам пло́тию ро́ждшая.

Тропа́рь пи́сан на вели́цей вече́рни.

Сла́ва, и ны́не, Богоро́дичен.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 5.

Подо́бен: Преподо́бне о́тче:

Преподо́бне о́тче, Богому́дре Иоа́нне,/ е́же па́че ума́ блаже́нства жела́нием распала́емь,/ и ми́ра суеты́ отре́кся,/ и в пусты́ню Ры́льскую всели́вся,/ пи́щу вмени́л еси́ вышеесте́ственное воздержа́ние,/ нищету́ же – бога́тство и́стинное,/ па́че вся́каго благосла́вия – ху́дость,/ напа́сти же и многоразли́чная от бесо́в искуше́ния – упокое́ние./ Те́мже ны́не жела́емых край я́ко дости́г,/ проси́ нам ми́ра и ве́лия ми́лости.

Преподо́бне о́тче, всече́стне Иоа́нне,/ о́крест моще́й твои́х предстоя́ще,/ восхваля́ем труды́ твоя́ и страда́ния,/ сла́вим равноа́нгельное воздержа́ние,/ блажи́м по пусты́ни ме́стная прехожде́ния,/ диви́мся чудесе́м, и́миже обогати́лся еси́,/ почита́ем па́мять твою́ святу́ю,/ возвеща́ем честна́я пренесе́ния,/ усе́рдно пое́м днесь возвраще́ние/ и согла́сно зове́м в честне́м хра́ме твое́м:/ проси́ нам ми́ра и ве́лия ми́лости.

Преподо́бне о́тче, равноа́нгельне Иоа́нне,/ во мно́зем терпе́нии неде́ланною те́ло пита́л еси́ пи́щею,/ ду́шу же непреста́нною просвеща́л еси́ моли́твою,/ до́ндеже Бо́гови прибли́зился еси́/ и, дея́нием наче́н, виде́нием же соверши́в,/ дух твой в блаже́нная возне́сл еси́ селе́ния,/ те́ло же твое́ на земли́ нетле́нно соблюде́ся,/ его́же днесь возвраще́ние/ любо́вию почита́юще, вопие́м ти:/ проси́ нам ми́ра и ве́лия ми́лости.

Сла́ва, глас 6:

Прииди́те, те́ло обсту́пим ди́внаго Иоа́нна многотерпели́вное,/ бе́сы посрами́вшее и А́нгелы возвесели́вшее,/ житие́м жесто́ким Бо́гу угоди́вшее/ и ле́тными прехожде́ньми тле́нию неподпа́дшее./ Весели́теся, и́ноцы, в горе́ Ры́льстей живу́щии,/ се бо преподо́бный с ва́ми жи́тельствовати па́ки прии́де,/ и до́блественне на стра́сти дерза́йте,/ наста́вника иму́ще, неви́димо вас свои́ми моли́твами укрепля́юща,/ к нему́же вку́пе вси возопии́м, глаго́люще:/ ра́дуйся Иоа́нне, Тро́ицы честно́е жили́ще,/ рая́ жи́телю и Ца́рствия Христо́ва насле́дниче./ Ра́дуйся, чуде́с мно́жеством от Христа́ Бо́га на́шего обогаще́нный,/ моли́твенниче и те́плый наш предста́телю/ . Но я́ко дерзнове́ние име́я ко Го́споду,/ не преста́й моли́тися/ о и́же ве́рою и любо́вию почита́ющих честну́ю па́мять твою́.

И ны́не, Богоро́дичен: Кто Тебе́ не ублажи́т:

Вход. Проки́мен дне. И чте́ния 3 преподо́бническая.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 5):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их, и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры самогла́сны, глас 1:

Учени́к Госпо́день от младе́нства был еси́, преподо́бне,/ и́бо, крест на ра́мо взем и у́зким путе́м ше́ствуя,/ вся уме́ты вмени́л еси́, да Христа́ приобря́щеши./ А́нгелом поревнова́в воздержа́нием и моли́твою,/ бесо́м сопроти́вился еси́ му́жески,/ Иоа́нне Богому́дре, моли́твенниче о душа́х на́ших.

Глас 2:

Ду́ха Боже́ственнаго сия́ние явле́нне восприи́м, блаже́нне о́тче,/ ду́хи лука́вствия прого́ниши/ и чудоде́йствием звезда́ све́тлая ми́рови явля́ешися,/ су́щия в нощи́ греха́ просвеща́я/ и проше́ния с ве́рою к тебе́ притека́ющим подава́я,/ чту́щим твой светоно́сный пра́здник,/ Иоа́нне преподо́бне, и́ноков украше́ние.

Глас 4:

Све́том доброде́телей свое́ уясни́в житие́/ и заре́ю Боже́ственнаго све́та ду́шу просвети́в,/ све́тло преше́л еси́ жития́ твоего́ по́прище./ Во све́тлостех же святы́х ны́не дости́г/ и Све́ту Предве́чному со А́нгельскими чи́нми я́ко предстоя́,/ от тьмы нас грехо́вныя изыма́й, Богоно́се о́тче Иоа́нне,/ све́том благода́ти просвеща́я/ и Све́та невече́рняго прича́стники сотворя́я моли́твами твои́ми.

Глас 6:

Пресла́вных чуде́с де́йствы обогати́вся,/ приснопа́мятне о́тче,/ в животе́ же и по сме́рти бе́сы лука́выя прогоня́я,/ боля́щия исцеля́я,/ неве́рныя ка́знию ужаса́я и ве́рныя чудесы́ уясня́я,/ зе́млю про́йде исправле́ний твои́х мно́жество/ и сла́ва твоя́ всю́ду протече́./ Те́мже, собра́вшеся в честне́м хра́ме твое́м/ и святы́х твои́х моще́й возвраще́ние чту́ще,/ мо́лимтися приле́жно:/ моли́ спасти́ся душа́м на́шим.

В ра́дость Ангелом пожи́л еси́, преподо́бне о́тче,/ и во обличе́ние бесо́м,/ в ре́вность же и похвалу́ Бо́га лю́бящим,/ в ликова́ние святы́м и в на́ше, чад твои́х, весе́лие.

Сла́ва, глас 3:

Пра́здник моще́й возвраще́ния Иоа́нна Богоно́снаго,/ и́же, со́лнцу подо́бне, днесь сия́ет,/ с ве́рою приходя́щих просвеща́ет/ и коему́ждо проше́ния подае́т./ Те́мже, соше́дшеся и того́ ублажа́юще,/ Христу́ Бо́гу на́шему вси воззове́м единогла́сно:/ Человеколю́бче Влады́ко,/ возста́ви сень па́дшую/ и коне́чному запусте́нию не преда́ждь,/ е́йже врато́м а́довым не одоле́ти рекл еси́./ Да не премо́гут беззако́ния на́ша пучи́ну Твоея́ ми́лости,/ но за бла́гость Твою́ уще́дри лю́ди Твоя́/ моли́твами святы́х Твои́х.

И ны́не, Богоро́дичен:

Без се́мене от Боже́ственнаго Ду́ха,/ во́лею же О́тчею зачала́ еси́ Сы́на Бо́жия,/ от Отца́ без ма́тере пре́жде век су́ща,/ нас же ра́ди из Тебе́ без отца́ бы́вша,/ пло́тию родила́ еси́ и Младе́нца млеко́м пита́ла еси́./ Те́мже не преста́й моли́ти/ изба́витися от бед душа́м на́шим.

На стихо́вне стихи́ры самогла́сны, глас 1:

Ры́льская горо́, взыгра́й:/ просвети́вый бо тя жи́тель твой,/ от мно́га тя вре́мене оста́вль, па́ки прии́де./ Ра́дуйтеся, ми́ра отре́кшиися:/ я́коже бо дре́вле мир, си́це ны́не град оста́вив,/ наста́вник ваш к вам в пусты́ню притече́./ Восплещи́те в весе́лии рука́ми, христоимени́тии о́крест лю́дие,/ и вси вку́пе к ра́це моще́й отца́ Богоно́снаго припаде́м,/ любе́зне сия́ лобыза́юще и Христа́ сла́вяще.

Стих: Честна́ пред Го́сподем/ смерть преподо́бных Его́.

Те́сным путе́м неукло́нно ше́ствовав и приско́рбным, преподо́бне о́тче,/ в ве́чный досто́йно вшел еси́ живо́т,/ широ́каго же отвраща́тися, я́ко в па́губу вводя́щаго, всем завеща́л еси́/ и, дре́вних ревну́я отце́в вся́ческим доброде́телем,/ тех и дарова́ний сподо́бился еси́./ Те́мже ны́не на Небеси́ водворя́яся,/ твои́ми к Бо́гу моли́твами/ избавля́й всех нас от па́губы грехо́вныя.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Чи́ста тя душе́ю и те́лом ублажа́ем, преподо́бне о́тче,/ А́нгела земна́го воздержа́нием/ и челове́ка Небе́снаго непреста́нным Бо́га славосло́вием/ и к Го́рним оби́телем ума́ утвержде́нием,/ иде́же всегда́ твое́ жела́ние восхище́нно име́я/ и отону́дуже озаре́ние прие́м,/ Небе́снаго Ца́рствия насле́дием от Христа́ Бо́га обогати́лся еси́./ Тем ны́не моли́ спасти́ся/ пра́зднующим честны́х моще́й твои́х возвраще́ние.

Сла́ва, глас 8:

Ца́рскаго виде́ния отре́клся еси́,/ ца́рствующих Царю́ угоди́ти жела́я, преблаже́нне,/ и ничто́же от разлуча́ющих Того́ Боже́ственныя любве́/ в себе́ име́ти восхоте́в,/ даро́в ца́рских не прия́л еси́;/ тем смиренному́дрия о́браз был еси́/ и пустынножи́тель всеизря́ден,/ ху́ждшее вконе́ц покори́вый лу́чшему/ и плоть порабо́тивый ду́ху/ и е́же по о́бразу сохрани́вый неврежде́нно./ И ны́не с преподо́бными тя почита́юще, Иоа́нне всеблаже́нне,/ мо́лим тя приле́жно:/ моли́ спасти́ся душа́м на́шим.

И ны́не, Богоро́дичен.

На благослове́нии хле́бов тропа́рь преподо́бнаго два́жды и Богоро́дице, Де́во: еди́ножды.

Тропа́рь преподо́бнаго, глас 4:

Твои́х моще́й возвраще́нием/ оби́тель твоя́ обогати́ся,/ це́рковь же твоя́, прие́мши я, просвети́ся/ и, крася́щися, ве́рных созыва́ет с весе́лием/ светоно́сный твой све́тло пра́здновати день,/ гряди́те, глаго́лющи,/ и приими́те благода́тей дарова́ния.

Ин тропа́рь, глас то́йже:

Те́ло смири́в поще́нием,/ ду́шу же возвы́сив пе́нием,/ сосу́д яви́ся избра́н Свято́му Ду́ху,/ Иоа́нне, о́тче наш,/ в чистоте́ се́рдца твоего́, преподо́бне, пожи́в./ Тем, дерзнове́ние име́я ко Го́споду,/ моли́ спасти́ся душа́м на́шим.

НА У́ТРЕНИ

На Бог Госпо́дь: тропа́рь преподо́бнаго, дважды. Сла́ва, и ны́не, Богоро́дичен.

По 1-м стихосло́вии седа́лен, глас 3.

Подо́бен: Красоте́ де́вства:

Красоты́ вожделе́в Боже́ственныя и удали́вся кра́сных ми́ра су́етнаго,/ воздержа́нием и моли́твою А́нгелы с челове́ки удиви́л еси́./ Тем поко́й ти бысть преставле́ние,/ и́мже к блаже́нству ве́чному преше́д,/ свы́ше назира́й лю́ди твоя́,/ прося́ у Бо́га нам ве́лия и бога́тыя ми́лости.

Сла́ва, и ны́не, Богоро́дичен, глас то́йже:

Красоте́ де́вства Твоего́ и пресве́тлой чистоте́ Твое́й/ Гаврии́л удиви́вся, вопия́ше Ти, Богоро́дице:/ ку́ю Ти похвалу́ принесу́ досто́йную?/ Что же возъимену́ю Тя?/ Недоумева́ю и ужаса́юся./ Те́мже, я́ко повеле́н бых, вопию́ Ти:/ ра́дуйся, Благода́тная.

По 2-м стихосло́вии седа́лен, глас 4.

Подо́бен: Удиви́ся Ио́сиф:

Удиви́шася А́нгели па́че естества́ подвиго́м твои́м:/ сле́зному оче́с твои́х тече́нию и всено́щному на моли́тве стоя́нию,/ в мра́чней пеще́ре вселе́нию и бесо́вских ко́зней терпе́нию,/ и́миже дух твой досто́йно в преми́рная дости́же селе́ния,/ твоя́ же мо́щи честны́я нетле́нно предлежа́т ча́дом твои́м,/ я́же возвраще́ние тех с любо́вию пра́зднующе, тя ублажа́ем, Иоа́нне, о́тче наш.

Сла́ва, и ны́не, Богоро́дичен, глас то́йже:

Удиви́ся Ио́сиф, е́же па́че естества́ зря, и внима́ше мы́слию,/ и́же на руно́ дождь,/ в безсе́меннем зача́тии Твое́м, Богоро́дице,/ купину́, огне́м неопали́мую,/ жезл Ааро́нов прозя́бший,/ и, свиде́тельствуя, обру́чник Твой и храни́тель свяще́нником взыва́ше:/ Де́ва ражда́ет и по рождестве́ па́ки Де́ва пребыва́ет.

По полиеле́и седа́лен, глас 8.

Подо́бен: Прему́дрость и Сло́во:

От ю́ности вся оста́вив жите́йская, кра́сная же и ле́потная,/ усе́рдно после́довал еси́ Зва́вшему тя, преподо́бне,/ в посте́х и по́двизех те́ло изнуря́я/ и к лу́чшим себе́ при́сно взима́я,/ отону́дуже и благода́ть прия́л еси́ неду́жныя цели́ти и стра́сти прогони́ти./ Иоа́нне преблаже́нне, моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен,

глас и подо́бен то́йже:

Я́ко Де́ву и еди́ну в жена́х, Тя, безсе́менно ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́ся в Тя Божества́,/ и, я́ко Младе́нца, дои́ши Зижди́теля и Го́спода./ Те́мже, а́нгельский и челове́ческий род, досто́йно сла́вим всесвято́е рождество́ Твое́ и согла́сно вопие́м Ти:/ моли́ Христа́ Бо́га прегреше́ний оставле́ние дарова́ти/ досто́йно пою́щим сла́ву Твою́.

Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Ду́ха Свята́го благода́тию/ собра́вшеся днесь, христоимени́тии,/ лик соста́вим в честне́м хра́ме отца́ на́шего/ и, Преблага́го сла́вяще Влады́ку,/ к преподо́бному моле́бне воззове́м:/ моли́ся приле́жно Го́сподеви/ изба́витися вся́каго вре́да душетле́ннаго/ чту́щим любо́вию све́тлый пра́здник/ моще́й твои́х возвраще́ния.

Кано́н преподо́бному, глас 1, его́же краегране́сие: Похвалу́ ти, о́тче Иоа́нне, плету́, Дими́трий.

Песнь 1

Ирмо́с: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,/ изра́ильтяном путь глубины́ новосоде́лавшая.

Плести́ пе́ние сие́ ма́лое моще́й возвраще́нию Твоего́ уго́дника, Христе́,/ во отверзе́ние уст мои́х сло́во ми да́руй/ по достоя́нию сего́ воспе́ти, Человеколю́бче.

Озари́ мя ра́зумом к пе́нию сему́ моли́твами твои́ми, о́тче Иоа́нне,/ свя́тости твое́й веща́ти словеса́ похвале́ния, я́ко жи́ву ти су́щу,/ жи́ви бо Бо́гови пра́веднии вси.

Хвалю́ твое́ в пусты́ни пребыва́ние,/ ублажа́ю я́же в ней по́двиги,/ прославля́ю ангелоподо́бное воздержа́ние, почита́ю па́мять твою́,/ воспева́ю и честны́х моще́й твои́х возвраще́ние.

Богоро́дичен: Всяк ум досто́йно похвали́ти Тя не мо́жет а́нгельский и челове́ческий, Де́во,/ Бо́га бо па́че ума́ и сло́ва родила́ еси́.

Песнь 3

Ирмо́с: Еди́не, ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й:/ одушевле́нный хра́ме/ неизрече́нныя сла́вы Твоея́, Человеколю́бче.

Анто́ния Вели́каго и други́х, дре́вле просия́вших оте́ц, житию́ поревнова́в, о́тче,/ сих и чуде́с де́латель Боже́ственною благода́тию был еси́, преподо́бне,/ те́мже тя по до́лгу ублажа́ем.

Лука́вых бесо́в мно́гая в пусты́ни нападе́ния нивочто́же вмени́в, блаже́нне,/ доброде́тельми на Небеса́, я́коже ле́ствицею, к вожделе́нному Христу́, Влады́це твоему́, возше́л еси́.

Удали́вся челове́к, Бо́гу прибли́зился еси́;/ тле́нное оста́вив житие́, нетле́нное стяжа́л еси́;/ зде у́бо Бог тя просла́ви чудесы́,/ та́мо же Ца́рствием тя обогати́ Небе́сным.

Богоро́дичен: Тя, ро́ди родо́в, по до́лгу восхваля́ем, по достоя́нию не возмога́юще, Влады́чице:/ Еди́на бо Невмести́маго вмести́ла еси́ Го́спода/ и огнь Божества́ во чре́ве Твое́м неопа́льно понесла́ еси́.

Ин конда́к, глас 6.

Подо́бен: Е́же о нас:

Благода́тию Бо́жиею нас обогати́л еси́/ и де́лы благи́ми извести́л еси́,/ зва́нием яви́ся, Иоа́нне, уго́дник Христа́ Бо́га./ В моли́твах и посте́х дарова́ний Бо́жия Ду́ха испо́лнися/ и бысть неду́гом прогони́тель/ и засту́пник душа́м на́шим.

Седа́лен, глас 8.

Подо́бен: Прему́дрость и Сло́во:

Прему́дрости на пе́рсех возле́гшему/ и в рожде́нных жена́ми бо́льшему/ тезоимени́тством обога́щся,/ житию́ тех поревнова́л еси́ чистото́ю серде́чною,/ и пусты́нным пребыва́нием, и вышеесте́ственным воздержа́нием./ Тем жили́ще Свята́го Ду́ха яви́лся еси́ и чуде́с де́йствы просла́вился еси́./ Иоа́нне преподо́бне, моли́ Христа́ Бо́га грехо́в оставле́ние дарова́ти/ пра́зднующим любо́вию честну́ю па́мять твою́.

Сла́ва, и ны́не, Богоро́дичен,

глас и подо́бен то́йже:

Прему́дрость ро́ждши и Сло́во, Христа́ Бо́га на́шего,/ Еди́на Всенепоро́чная Богоневе́сто,/ крин яви́лася еси́ благово́нный,/ от удо́лий смире́ния челове́ческаго произрасты́й,/ и о́блак солнцезра́чный, свет Боже́ственный на земли́ откры́вый./ Тем в воню́ ми́ра духо́внаго приими́ вопль се́рдца моего́:/ моли́, Его́же родила́ еси́, грехо́в оставле́ние пода́ти/ воспева́ющим досто́йно сла́ву Твою́.

Песнь 4

Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му,/ во спасе́ние на́ше и обновле́ние.

Иноков сосло́вие и вси ны́нешняго ро́да правосла́внии,/ сте́кшеся усе́рдно, к ра́це припаде́м ди́внаго Иоа́нна,/ да ки́йждо дар ра́вен усе́рдию своему́ прии́мет.

Оте́чество свое́, я́коже со́лнце, осия́в,/ и в иноплеме́нных чудесы́ просия́л еси́,/ Сре́дец же и Те́рнов благода́тельствовав, в пусты́ню па́ки возврати́лся еси́,/ иде́же Влады́це своему́ угоди́л еси́.

Твоя́ оби́тель, ви́девши тя днесь, я́ко жи́ва, к ней возвраща́ющася,/ возра́довася неизрече́нно и с любо́вию прия́ тя мно́гою,/ я́коже отца́ своего́ и те́плаго засту́пника.

Богоро́дичен: Чи́стая Благослове́нная, Яже еди́на кля́твы всех свободи́вшая, Девома́ти Мари́е,/ со апо́столы, и му́ченики, и проро́ки моли́ из чре́ва Твоего́ Проше́дшаго/ спасти́ ду́ши пою́щих Тя.

Песнь 5

Ирмо́с: Просвети́вый сия́нием/ прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия/ правосла́вно пою́щих Тя.

Еди́н Еди́ному собесе́довати жела́я, я́коже Моисе́й на горе́,/ удали́лся еси́ в пусты́нях и, весь ум твой углуби́в в богомы́слии,/ просия́л еси́ чуде́с светлостьми́ и мно́гою сла́вою.

Иоа́нне всече́стне, А́нгелов равностоя́телю,/ твои́х моще́й возвраще́ние чту́ще,/ я́коже Дави́д пред се́нным дре́вле ковче́гом, ска́чуще ду́хом,/ с ве́рою игра́ем, веселя́щеся.

О, вели́каго жела́ния твоего́ пусты́ни Ры́льския, о́тче,/ е́же ны́не я́ве сотвори́л еси́,/ к ней возвра́щся многострада́льным и честны́м те́лом твои́м, Богоблаже́нне.

Богоро́дичен: Авваку́м Тя дре́вле го́ру мы́сленную и сень доброде́телей/ проро́ческим ду́хом ви́дев, Пречи́стая, пропове́даше,/ я́ко от ю́га прише́дшаго Сло́ва/ и от Тебе́ плоть прие́мшаго.

Песнь 6

Ирмо́с: Обы́де нас после́дняя бе́здна,/ несть избавля́яй,/ вмени́хомся, я́ко о́вцы заколе́ния,/ спаси́ лю́ди Твоя́, Бо́же наш,/ Ты бо кре́пость немощству́ющих и исправле́ние.

На стра́сти му́жески подвиза́вся, о́тче,/ бесо́м сопроти́вился еси́ до́блественно/ и, плоть покори́в ду́ху, хлеб а́нгельский, по пи́санному, ял еси́,/ блаже́нство дости́г ве́чнующее.

Не́мощь естества́ вышеесте́ственным жела́нием и к Бо́гу любо́вию укрепи́в, о́тче,/ же́стокий7 жи́тель пусты́ни был еси́/ и оте́честву твоему́ моли́твенник богоприя́тен показа́лся еси́.

Е́же от Те́рнова моще́й твои́х возвраще́ние днесь пра́зднующе,/ любо́вь изря́дную, я́же к тебе́, показу́ем/ и, пе́сньми похва́льными усе́рдно тя ублажа́юще,/ ми́лости Бо́жия про́сим получи́ти моли́твами твои́ми.

Богоро́дичен: Покры́й ста́до Сы́на Твоего́ кро́вом Своея́ бла́гости, Влады́чице,/ вся́каго гне́ва избавля́ющи./ и зла́го обстоя́ния, и му́ки ве́чныя предста́тельством Твои́м.

Конда́к, глас 2.

Подо́бен: В моли́твах Неусыпа́ющую:

Тве́рдым умо́м и непреста́нными моли́твами/ бори́теля врага́ си́лу всегуби́тельную до конца́ побори́в,/ досто́йно от Христа́ просла́вился еси́,/ Иоа́нне всеблаже́нне./ Тем твои́х днесь моще́й возвраще́ния/ све́тлый соверша́юще пра́здник в весе́лии,/ согла́сно вопие́м ти:/ ста́ду и лю́дем твои́м ты еси́ с Бо́гом, о́тче преподо́бне,/ похвала́ и утвержде́ние.

И́кос:

Сего́ преподо́бнаго Иоа́нна пе́сньми почита́юще/ и того́ к нам честны́х моще́й возвраще́ние све́тло пра́зднующе, си́це к нему́ возопии́м:/ блаже́н еси́, о́тче, от младе́нства Го́сподеви порабо́тав/ и ничесо́же Того́ любви́ предпоче́т,/ но вся уме́ты вмени́в, да Христа́ приобря́щеши,/ И́же тя несе́янным се́менем и хле́бом а́нгельским препита́,/ и чуде́с дарова́ньми оби́льне обогати́,/ и царя́ жела́нника виде́ния твоего́ показа́,/ по сме́рти же те́ло твое́ нетле́нием просла́ви,/ и от ме́ста на ме́сто пренесе́ньми почте́,/ и повсю́ду свети́льник, чудесы́ сия́ющий, сотвори́,/ последи́ же в оби́тель твою́ па́ки возврати́,/ я́ко вои́стинну ста́ду и лю́дем твои́м похвалу́ и утвержде́ние.

Песнь 7

Ирмо́с: Тебе́, у́мную, Богоро́дице, пещь,/ разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.

Любо́вию Боже́ственною разжига́емь, любве́ мирски́я отре́клся еси́/ и, крест на ра́мо взем, Христу́ после́довал еси́, зовы́й:/ оте́ц на́ших Бо́же, благослове́н еси́.

Его́же от ю́ности всем се́рдцем возлюби́л еси́, Бо́га,/ Тому́ во всей жи́зни усе́рдно порабо́тал еси́, преподо́бне о́тче, зовя́ к Нему́ при́сно:/ оте́ц на́ших Бо́же, благослове́н еси́.

Твои́х честны́х моще́й к нам возвраще́ние нас к любви́ твое́й подви́же, преподо́бне о́тче,/ и к пе́нию всех нас возста́ви, и зва́ти научи́:/ оте́ц на́ших Бо́же, благослове́н еси́.

Богоро́дичен: У́мнии Тя горе́ сла́вят чи́нове, Де́во Чи́стая,/ до́ле же на земли́ челове́честии ублажа́ют ро́ди,/ при́сно зову́ще Сы́ну Твоему́ ра́достно:/ оте́ц на́ших Бо́же, благослове́н еси́.

Песнь 8

Ирмо́с: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.

Доброде́тели твоя́, я́ко кади́ло благово́нное, к Бо́гу взыдо́ша,/ те́мже твое́ нетле́нное те́ло благоуха́нием почте́ся,/ его́же возвраще́ние ны́не пра́зднующе, зове́м:/ благослови́те, вся дела́ Госпо́дня, Го́спода.

И́же зе́млю и мо́ре потреби́ти хваля́йся, тебе́ прирази́вся,/ посра́млен бысть, преподо́бне о́тче, и до конца́ низложе́н,/ тем, ду́хом веселя́ся, взыва́л еси́:/ благослови́те, вся дела́ Госпо́дня, Го́спода.

Мо́ре су́етнаго жития́ до́бре преплы́в корабле́м воздержа́ния,/ ве́рою окормля́емь и я́дрилом8 любве́ Христо́вы носи́мь,/ в приста́нище дости́гл еси́, зовя́:/ благослови́те, вся дела́ Госпо́дня, Го́спода.

Богоро́дичен: И́же от дел свои́х наде́жды спасе́ния не иму́ще,/ к Твое́й прибега́ем ми́лости, Влады́чице,/ и мо́лимся грехо́в проще́ние Тобо́ю улучи́ти, зову́ще:/ благослови́те, вся дела́ Госпо́дня, Го́спода.

Песнь 9

Ирмо́с: Образ чи́стаго рождества́ Твоего́/ огнепали́мая купина́ показа́ неопа́льная./ И ны́не на нас напа́стей свире́пеющую угаси́ти мо́лимся пещь,/ да Тя, Богоро́дице,/ непреста́нно велича́ем.

Тя Христо́с чуде́сными дарова́ньми просла́ви, еще́ на земли́ живу́щаго, о́тче,/ и неде́ланною препита́ пи́щею, и нетле́нно те́ло твое́ по сме́рти соблюде́,/ его́же возвраще́ние по си́ле днесь любо́вию восхваля́ем.

Ра́ди мно́жества грехо́в мои́х и дерзну́тия9 к похвале́ твое́й/ да не отри́неши мене́ же и пе́ния сего́ ма́лаго,/ но, я́ко блага́го Влады́ки учени́к,/ ма́лый сей труд показа́вшему благода́ть пода́ждь, ели́ко во́лиши.

Иоа́нне всече́стне, це́рковь и су́щая в ней ча́да твоя́/ от враг ви́димых и неви́димых сохраня́й, окормля́я ко спасе́нию,/ в стра́шный же День суда́ в своя́ с собо́ю Небе́сная селе́ния прие́мля.

Богоро́дичен: И́ноцы Тя во всем ми́ре, в гора́х и пусты́нях пожи́вшии,/ наде́жду правосла́вно стяжа́ша и Хода́таицу спасе́ния, горо́ Бо́жия одушевле́нная,/ ве́рных похвало́ и непогреши́тельное упова́ние, Пренепоро́чная Влады́чице.

Свети́лен, глас 3.

Подо́бен: Посети́л ны есть:

Посети́л ны есть ми́лостию Спас наш честны́х моще́й твои́х возвраще́нием, Иоа́нне всеблаже́нне./ Тем, соше́дшеся днесь, мо́лим тя:/ моли́ся Христу́ Бо́гу о всех нас.

Сла́ва, и ны́не, Богоро́дичен,

глас и подо́бен то́йже:

Свет прие́мшая во утро́бе Боже́ственный и Преве́чный,/ просвети́ рабы́ Твоя́, Пречи́стая Богоро́дице,/ из Тебе́ бо роди́ся Еди́н те́мныя просвеща́яй Бог.

На хвали́тех стихи́ры, глас 5.

Подо́бен: Ра́дуйся, по́стнических:

Ра́дуйся, Иоа́нне треблаже́нне,/ мона́шествующих вои́стинну красото́,/ хра́ме честны́й Всесвята́го Ду́ха,/ Христо́во со Отце́м чи́стое пребыва́лище,/ Ца́рствия Небе́снаго насле́дниче/ и чуде́с преди́вных исто́чниче!/ Но я́ко дерзнове́ние стяжа́вый ко Го́споду,/ испроси́ пра́зднующим честны́х моще́й твои́х возвраще́ние/ мир и ве́лию ми́лость.

Ра́дуйся, Иоа́нне треблаже́нне,/ пусты́ни Ры́льския пе́рвый насе́льниче,/ Христа́ Бо́га на́шего уго́дниче,/ кро́ткаго Учи́теля кро́ткий учени́че,/ земна́я с земны́м оста́вивый/ и Небе́сная с Небе́сными насле́довавый./ Но, о похвало́ и украше́ние наро́ду твоему́,/ испроси́ пра́зднующим честны́х моще́й твои́х возвраще́ние/ мир и ве́лию ми́лость.

Ра́дуйся, Иоа́нне треблаже́нне,/ и́же а́нгельское житие́ на земли́ пожи́вый,/ и плоть ду́хови порабо́тивый,/ и воздержа́нием свети́льник себе́ ми́рови яви́вый,/ Святе́й же Тро́ице оби́тель себе́ соде́лавый/ и дарова́ния чуде́с сподо́бивыйся неду́ги исцеля́ти/ и пра́зднующим честны́х моще́й твои́х возвраще́ние/ дарова́ти мир и ве́лию ми́лость.

Ра́дуйся, Иоа́нне треблаже́нне,/ его́же мо́щи всечестны́я оби́льно/ исцеле́ния источа́ют приходя́щим ве́рою,/ благоуха́ния духо́внаго всех исполня́ют/ и де́монскую тьму дале́че прогоня́ют./ Те́мже мо́лим тя вся́каго наве́та вра́жия нас изба́вити/ и пра́зднующим честны́х моще́й твои́х возвраще́ние/ дарова́ти мир и ве́лию ми́лость.

Сла́ва, глас 3:

Но́вое оби́тели Ры́льстей пра́зднество/ возвраще́нием моще́й Иоа́нна блаже́ннаго дарова́ Христо́с Бог./ Те́мже, преподо́бнаго ублажа́юще пе́сненно,/ Того́ просла́вим согла́сно и вси усе́рдно возопии́м, взыва́юще:/ Человеколю́бче Влады́ко,/ моли́твами Твоего́ уго́дника и всех святы́х/ Це́ркви Твое́й исправле́ние да́руй,/ ю́же искупи́л еси́ честно́ю Кро́вию,/ и правосла́вным согреше́ний проще́ние пода́ждь и ве́лию ми́лость.

И ны́не, Богоро́дичен, глас то́йже:

Вельми́ согреша́юща мя, Отрокови́це,/ исхи́ти вели́кою Твое́ю моли́твою пла́мене ну́жднаго/ и испра́ви, Чи́стая, Твои́ми мольба́ми,/ ко спасе́нным стезя́м наставля́ющи мя/ ма́терними Твои́ми моли́твами.

Славосло́вие вели́кое. Ектении́. И отпу́ст.

НА ЛИТУРГИ́И

Блаже́нны от кано́на преподо́бнаго, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зачало 213. Аллилу́ия, глас 8: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя Его́. Ева́нгелие от Матфе́я, зача́ло 10. Прича́стен: В па́мять ве́чную:

Моли́тва

Земна́я звездо́ чуде́сная, я́же от преде́л Сре́дца гра́да возсия́вшая, и све́щниче живы́й, и́же всю зе́млю Бо́лгарскую све́том пра́вды Бо́жия осиява́яй, преди́вный в по́стницех уго́дниче Бо́жий, о́тче Иоа́нне, преподо́бных у́бо ра́дование, Це́ркве Бо́лгарския украше́ние, ве́ры Правосла́вныя кре́пкое утвержде́ние, ско́рый помо́щниче к тебе́ с ве́рою и любо́вию притека́ющим и вели́кий пред Го́сподем о всех нас предста́телю! Приими́, преблаже́нне, моле́ния на́ша и умоли́ Христа́ Бо́га на́шего, я́ко да вси, тобо́ю неви́димо охраня́еми и сою́зом бра́тския любве́ связу́еми, лю́дие слове́нстии в ми́ре пребыва́ют и благоче́стии, и да изба́вит их Госпо́дь от враг ви́димых и неви́димых, от наше́ствия иноплеме́нник, от неду́га и гла́да, от вся́кия ско́рби и вся́каго зла. Предстоя́щим же зде и моля́щимся пред честно́ю ра́кою моще́й твои́х испроси́, преподо́бне, у Го́спода на́шего Иису́са Христа́ вся, я́же ко спасе́нию проше́ния, да вси с тобо́ю непреста́нно прославля́ем всесвято́е Имя Отца́ и Сы́на и Свята́го Ду́ха, ны́не, и при́сно, и во ве́ки веко́в. Ами́нь.