Служба в честь святыя преподобномученицы Параскевы

ВЕ́ЧЕР

На Го́споди, воззва́х: стихи́ры, глас 8.

Подо́бен: О, пресла́внаго чудесе́:

О, пресла́внаго о тебе́ чудесе́,/ Параске́во му́драя!/ я́ко Антони́нову го́рдость му́жески низве́ргла еси́,/ усе́рдно пострада́вши./ Те́мже по́честей Вы́шняго зва́ния и венце́в сподо́бльшися, честна́я,/ о рабе́х твои́х, ве́рою почита́ющих тя,/ моля́щися не преста́й ко Го́споду,/ поми́ловатися нам.

Му́ченице Христо́ва всехва́льная,/ Го́спода Христа́ вседу́шно вожделе́вши,/ люте́йшия муче́ний ра́ны прия́ла еси́,/ и, бичьми́ по ре́бром терза́ема,/ бие́ния вся за Возлю́бленнаго твоего́ претерпе́вши,/ венцы́ улучи́ла еси́ от Него́,/ те́мже благохва́лим тя, Богоблаже́нная.

Преподобному́ченице всесла́вная,/ кто возмо́жет изрещи́ трудо́в твои́х мзду/ и му́ченичества твоего́ до́блестная чудеса́,/ терпе́ние же и кро́тость,/ я́же показа́ла еси́, честна́я,/ а́ки безпло́тна?/ Те́мже собесе́дница яви́лася еси́ А́нгелов,/ Параске́во, неве́ста Всецаря́, сосу́д духо́вен.

Крест, я́ко ору́жие, держа́вно нося́щи, преподобному́ченице,/ ве́ру, я́ко щит, на́дежду, я́ко броню́, любо́вь, я́ко лук,/ враги́ ви́димыя и неви́димыя победи́ла еси́ Боже́ственною си́лою,/ во главу́ усе́кнута бы́вши,/ со А́нгелы лику́еши, Параске́во,/ моля́щися о воспева́ющих тя.

Сла́ва, глас 6:

Де́во му́ченице победоно́сная, Параске́во всесла́вная,/ досто́йно пра́зднующим страда́ние твое́/ моли́ изба́витися искуше́ний и скорбе́й и бу́дущаго Суда́,/ хода́тайствы твои́ми к Бо́гу,/ му́ченице всепе́тая.

И ны́не, Богоро́дичен: Кто Тебе́ не ублажи́т:

На стихо́вне стихи́ры, глас 4.

Подо́бен: Я́ко до́бляя в му́ченицех:

Многоско́рбному муче́нию преда́вши себе́, всесла́вная,/ му́жескою мы́слию претерпе́ла еси́ то́е/ и е́ллинская чти́лища, я́ко прах, истни́ла еси́,/ си́лою же Креста́ врага́ попра́ла еси́,/ хва́лящася на высоте́ звезд поста́вити престо́л,/ той бо пред нога́ма твои́ма пове́ржеся,/ а́ки вра́бий игра́я.

Стих: Терпя́, потерпе́х Го́спода, и внят ми,/ и услы́ша моли́тву мою́.

Боже́ственным Про́мыслом А́нгел дски ве́лии тяготу́/ а́бие я́ко лист показа́/ и огни́ жже́ние ветр ро́сный соде́ла,/ яково́ дре́вле отроко́м би́ше виде́ние четве́ртаго,/ с ни́миже му́ченица вопия́ше:/ Твоя́ ми́лость ве́лия, Всеще́дре,/ те́мже почита́ю, ра́дующися, Твое́ всепе́тое И́мя.

Стих: Утверди́ на ка́мени но́зе мои́/ и испра́ви стопы́ моя́.

Чистоту́ теле́сную и душе́вную све́тлость/ во всем житии́ соблю́дши,/ яви́лася еси́ нескве́рна:/ а́бие, вожделе́вши Жениха́ Христа́,/ вслед вони́ разу́мныя потекла́ еси́,/ честна́я Параске́во сла́вная,/ и ны́не моли́ Спа́са всех/ да́ти оставле́ние долго́в/ ве́рою соверша́ющим па́мять твою́.

Сла́ва, глас 6:

Прииди́те, вси концы́ земли́,/ духо́вное торжество́ соста́вим/ и Христо́ву де́ву му́ченицу восхва́лим, глаго́люще:/ ра́дуйся, Параске́во преподо́бная и богочестна́я,/ ра́дуйся, до́бре подъя́вшая му́ченичество,/ ра́дуйся, му́чеников равноче́стная и преподо́бных сожи́тельнице,/ с ни́миже моли́ спасти́ся душа́м на́шим.

И ны́не, Богоро́дичен.

Тропа́рь, глас 1:

Тща́ние иму́щи сообра́зно и́мени твоему́, тезоимени́тая,/ равноимя́нную тебе́ ве́ру в сожи́тельство избра́ла еси́,/ Параске́во победоно́сная97,/ те́мже излива́еши исцеле́ния и мо́лишися о душа́х на́ших.

НА У́ТРЕНИ

На Бог Госпо́дь: тропа́рь святы́х два́жды. Сла́ва, и ны́не, Богоро́дичен.

По 1-м стихосло́вии седа́лен, глас 4.

Подо́бен: Вознесы́йся на Крест:

Красне́йшаго Христа́ возлюби́вши и чистото́ю ду́шу укра́сивши,/ вся́кими труды́ и скорбьми́ Тому́ прибли́зилася еси́, я́ко нескве́рная му́ченица,/ и Небе́снаго черто́га сподо́билася еси́,/ Его́же моли́ за ны, тя почита́ющия, Параске́во всехва́льная.

Сла́ва, и ны́не, Богоро́дичен:

Не умолчи́м никогда́, Богоро́дице,/ си́лы Твоя́ глаго́лати, недосто́йнии,/ а́ще бо Ты не бы предстоя́ла, моля́щи,/ кто бы нас изба́вил от толи́ких бед, кто же бы сохрани́л до ны́не свобо́дны?/ Не отсту́пим, Влады́чице, от Тебе́:/ Твоя́ бо рабы́ спаса́еши при́сно от вся́ких лю́тых.

По 2-м стихосло́вии седа́лен, глас 1.

Подо́бен: Гроб Твой, Спа́се:

Я́ко нескве́рная и чи́стая а́гница, Го́сподеви та́инственно сопрягла́ся еси́,/ укра́сивши себе́ чистото́ю жи́зни и добро́тою страда́ния,/ те́мже прия́ла еси́ благода́ть исцеле́ний,/ врачу́ющи не́мощи на́ша си́лою Ду́ха.

Сла́ва, и ны́не, Богоро́дичен:

Ма́терь Тя Бо́жию све́мы вси, Де́ву вои́стинну и по рождестве́ я́вльшуюся,/ любо́вию прибега́юще к Твое́й бла́гости,/ Тебе́ бо и́мамы, гре́шнии, Предста́тельницу/ и Тебе́ стяжа́хом в напа́стех спасе́ние, еди́ну Всенепоро́чную.

Кано́н, глас 4. Творе́ние Феофа́на.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Пою́щим светоно́сную па́мять твою́, му́ченице всехва́льная,/ моли́ благода́ть дарова́ти нам и грехо́в оставле́ние, Параске́во сла́вная,/ твои́ми ко Го́споду проше́нии.

Мня разруши́ти си́лу терпе́ния твоего́, му́ченице,/ власти́тель гро́зно повелева́ше кла́нятися истука́нным,/ но му́дрыми твои́ми глаго́лы вся де́рзость его́ разруши́ся.

Му́чеников ты красота́ яви́лася еси́,/ врага́ ухищре́ния низве́ргши ору́жием креста́,/ и, власти́телей лю́тость му́ченически одоле́вши,/ богочести́вую ве́ру пропове́дала еси́.

Богоро́дичен: Сло́во от Твои́х пречи́стых крове́й, Влады́чице, ражда́ется,/ одушевле́нную плоть прие́м,/ и нас, па́дших угрызе́нием обольсти́теля,/ Боже́ственною си́лою возста́вило есть.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Утверди́л есть немощно́е Боже́ственный Дух/ и вельми́ све́тлое показа́ богоподо́бное чи́стыя твоея́ души́ сия́ние.

Укрепле́на си́лою Христа́,/ воло́виих жил неща́дная бичева́ния, му́ченице Христо́ва, претерпе́ла еси́,/ я́ко не́кий адама́нт тверде́йший.

Любо́вию, я́же к Бо́гу,/ на три́знищи тве́рдо претерпе́ла еси́ бие́ния те́ла скорпио́нами/ и неисче́тная ина́я бичева́ния.

Богоро́дичен: Ты еди́на су́щим на земли́/ преми́рных благ Пода́тельница была́ еси́, Ма́ти Бо́жия,/ те́мже Ти, ра́дуйся, зове́м.

Ин конда́к, глас 8:

Страстоте́рпице, ве́рнии, песнь Параске́ве, прииди́те, согла́сно воспои́м,/ облистава́ет бо чудесы́ в ми́ре,/ отгоня́ющи пре́лести тьму,/ подаю́щи ве́рным благода́ть незави́стную, зову́щим:/ ра́дуйся, му́ченице многострада́льная.

Седа́лен, глас 5:

От пеле́н ма́терних Христу́ себе́ посвяти́вши,/ я́ко му́ченица, Тому́ вы́ну благоугожда́ла еси́, Спаси́телю всех,/ и, де́рзость мучи́телей тве́рдо попра́вши,/ страда́ния вои́стинну му́жески претерпе́ла еси́./ Те́мже Христо́с, венча́в тя, в Небе́сный черто́г сла́вы введе́./ Параске́во досточу́дная, проси́ нам у Христа́ Бо́га оставле́ние грехо́в.

Сла́ва, и ны́не, Богоро́дичен:

Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии,/ Огнь бо всели́ся в Тя Божества́/ и, я́ко Младе́нца, дои́ши Зижди́теля и Го́спода./ Тем, а́нгельский и челове́ческий род, досто́йно сла́вим пресвято́е рождество́ Твое́ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Исцеле́ния получи́вши, и дарова́ния, и виде́ния, сла́вная,/ Боже́ственныя источа́еши то́ки благода́ти всегда́ ве́рою тя почита́ющим/ и ко хра́му твоему́ прибега́ющим.

Поро́ка вои́стинну и скве́рны ника́коже иму́щи,/ освяще́ние же телесе́ стяжа́вши,/ А́нгелов узре́ла еси́, с ни́миже возопи́ла еси́:/ сла́ва си́ле Твое́й, Го́споди.

Коль ужа́сно зна́мение стра́шнаго дне,/ внегда́ спаси́тельная страсть вообрази́ся в же́нстем телеси́ твое́м,/ крест, и тро́стие, и вене́ц, и гу́бу узре́ла еси́.

Богоро́дичен: Неискусобра́чно зачала́ еси́, о Де́во,/ и по рождестве́ яви́лася еси́ де́вствующая па́ки./ Те́мже немо́лчными гла́сы, ра́дуйся, ве́рою несумне́нною вопие́м Ти, Влады́чице.

Песнь 5

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Подвиза́лася еси́, честна́я,/ и мучи́теля вити́йствы прему́дрыми смы́сленно попра́ла еси́ пред суди́щем,/ Христа́ пропове́дающи.

Ум иму́щи тве́рдый,/ безтре́петною мы́слию постыди́ла еси́ вся и́дольская че́ствования,/ ра́зумом писа́ний.

Ло́жа у́мнаго и черто́га сподо́билася еси́,/ ликовству́ющи с де́вами богому́дрыми, Параске́во сла́вная.

Богоро́дичен: Тя, ору́жие несокруши́мое, на враги́ обраща́ем,/ Тя я́корь и наде́жду спасе́ния на́шего, Богоневе́сто, стяжа́хом.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

А́нгела прише́ствием, на пе́рсех твои́х положе́нную преве́лию дску, всечестна́я,/ и гво́зди на рука́х, сла́вная му́ченице,/ Госпо́дь ма́нием Боже́ственным ско́ро отъя́л есть.

Но́вую тя первому́ченицу Фе́клу сла́вим,/ я́ко пропове́давшую всем,/ и мно́гих просвети́вшую Боже́ственным сло́вом,/ и неве́рных к Боже́ственней ве́ре приве́дшую.

Отверзо́шася твоя́, Боже́ственных догма́т ковче́же, медото́чная уста́,/ ве́дению всех поуча́ющая с дерзнове́нием,/ Параске́во, му́чеников украше́ние.

Богоро́дичен: О чу́до, всех чуде́с стра́ннейшее!/ Я́ко Де́ва во утро́бе, Всеобъе́млющаго неискусому́жно заче́нши, не утесни́ся.

Конда́к, глас 4.

Подо́бен: Яви́лся еси́ днесь:

Храм твой, всечестна́я,/ я́ко враче́бницу душе́вную обре́тше,/ в нем вси ве́рнии/ велегла́сно почита́ем тя,/ преподобному́ченице Параске́во сла́вная.

И́кос:

Глас Жениха́, призыва́яй тя,/ я́ко неве́сту, украси́ тя венце́м безсме́ртия, Богому́драя Параске́во всехва́льная,/ и к венцено́сцем и му́чеником честны́м досто́йно сопричте́./ С ни́миже веселя́щися, помина́й соверша́ющих святы́й пра́здник твой и соше́дшихся в храм твой,/ в нем бо ны́не предстоя́ще,/ от души́ прино́сим ти пе́сни, преподобному́ченице Параске́во сла́вная.

Песнь 7

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Го́сподем сохраня́ема,/ пред суди́щем нечести́вых, му́ченице, мы́шцы укрепи́ла еси́ тве́рдо,/ пла́менем опаля́ема, внегда́ воспева́ти тебе́, зову́щей:/ благослове́н еси́, Бо́же мой и Го́споди.

Огнь горя́щий ника́коже тя,/ нечести́вых же па́че опаля́ше, отрокови́це,/ Христо́с же сохраня́ше тя неврежде́нну,/ я́коже дре́вле сохрани́, посреде́ огня́ шумя́ща,/ руко́ю кре́пкою небоя́зненныя о́троки.

Земли́ всея́ му́дро и небесе́ не сотво́ршии,/ де́монстии и́доли и бо́зи да поги́бнут,– вопия́ла еси́;/ Христо́с же Госпо́дь,– пропове́дала еси́,– Творе́ц есть вся́ческих.

Богоро́дичен: Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, зову́щим:/ благослове́нна Ты в жена́х еси́, Всенепоро́чная Влады́чице.

Песнь 8

Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.

Не су́щия бо́ги, но лжи́выя де́монов привиде́ния показа́ла еси́, му́ченице,/ и вся́чески попра́ла еси́ я́/ и вконе́ц сокруши́ла еси́,/ в весе́лии Христу́ непреста́нно пою́щи:/ благослови́те, вся дела́ Госпо́дня, Го́спода.

Ка́пищу поколеба́вшуся на земли́ прише́ствием твои́м, честна́я,/ паде́ Аполло́н и устре́лены бы́ша и́доли си́лою честна́го Креста́,/ и́мже та́инственно огражде́нна, с дерзнове́нием мно́гим вопия́ла еси́:/ вся дела́, благослови́те Го́спода.

Красото́ю и любо́вию Твое́ю, Христе́, уя́звлена, Параске́ва чи́стая/ огня́ жже́ние претерпе́, вопию́щи:/ в воню́ Боже́ственнаго ми́ра Твоего́, ны́не страда́льчествующи тве́рдо,/ теку́ непреста́нно вслед Тебе́,/ славосло́вящи Боже́ственное Твое́ И́мя.

Богоро́дичен: Ты еди́на во всех ро́дех, Де́во Пренепоро́чная, Ма́ти яви́лася еси́ Бо́жия,/ Ты Божества́ бя́ше вселе́ние, Пречи́стая,/ не опале́на огне́м непристу́пнаго Све́та./ Те́мже вси Тя славосло́вим, Мари́е Богоневе́сто.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Мимотеку́щее житие́ и привре́менное, му́ченице Богому́драя, пренебрегла́ еси́,/ красоту́ ви́девши недомы́слимую Жениха́ твоего́,/ гна́вши по Нем я́ве./ Те́мже вене́ц улучи́ла еси́ нетле́нный, до́брая де́во.

Услы́шавши глас Боже́ственный,/ с небесе́ отвеща́ющ, Параске́во, на проше́ния се́рдца твоего́,/ тече́ние бо́дро сконча́ла еси́, му́ченице честна́я,/ и к Нему́ востекла́ еси́, во главу́ усе́чена честну́ю.

Побе́ду на враги́ дарова́ти моли́ Христа́, Параске́во,/ всем к Боже́ственному хра́му твоему́ приходя́щим с тепле́йшею ве́рою,/ и грехо́в оставле́ние, и от бед избавле́ние.

Богоро́дичен: Яви́лася еси́ Херуви́мы превосходя́щая и Небе́с вы́шшая, Чи́стая Де́во Мари́е,/ Вели́каго Сове́та А́нгела ро́ждши, собезнача́льнаго Отцу́, Судию́ всех гряду́щаго.

Ексапостила́рий.

Подо́бен: Жены́, услы́шите:

Укрепле́на, до́брая де́во, Кресто́м Го́спода твоего́,/ мучи́телей де́рзость победи́ла еси́, страда́ющи до́блественне, му́ченице,/ и к венце́м побе́дным Христа́ оты́де, Параске́во всечу́дная,/ о нас моля́щися, любо́вию тя почита́ющих.

Сла́ва, и ны́не, Богоро́дичен:

Мари́е, чисте́йшая злата́я кади́льнице,/ Неразде́льныя Тро́ицы прия́телище была́ еси́,/ о не́мже Оте́ц благоволи́, и Сын всели́ся,/ и Дух Всесвяты́й, осени́вый Тя, Отрокови́це, показа́ Богоро́дицу.

На хвали́тех стихи́ры, глас 1.

Подо́бен: Небе́сных чино́в:

Во дво́рех Го́спода лику́ющи/ с о́ными му́дрыми де́вами, честна́я му́ченице,/ отто́ле прия́ла еси́, му́драя,/ благода́ть цели́ти боле́зни/ и изгоня́ти нечи́стыя ду́хи/ из приходя́щих к тебе́ ве́рою.

Сокруши́вшая кре́пость мучи́телей идоложе́ртвенных/ и к Бо́гу напра́вивши стопы́, честна́я де́во,/ ника́коже устраши́лася еси́/ бие́ния свинцо́вых мла́тов,/ ни огня́, ни терза́ния пло́ти твоея́,/ ни разваре́ния котло́в, ни ме́чнаго усече́ния.

По́двигом пе́рвее изсуши́вшая те́ло твое́, сла́вная,/ второ́е же пострада́вшая, укрепи́вшися в уме́,/ всем яви́лася еси́, му́ченице Христо́ва,/ небоко́ванный мече́ц,/ я́ко зла́то, в пещи́ искуше́нна му́ками,/ до́брая де́во.

Сла́ва, глас 2:

Во гра́де Бо́га на́шего,/ в горе́ святе́й Его́,/ та́мо всели́ся свята́я,/ свети́льник неуга́сший сохра́нши./ Услы́шим де́вы похвалу́:/ о де́вство, хра́ме Бо́жий!/ О де́вство, му́чеников сла́во!/ О де́вство, А́нгелов содру́жество!

И ны́не, Богоро́дичен:

Все упова́ние мое́ на Тя возлага́ю,/ Ма́ти Бо́жия,/ сохрани́ мя под кро́вом Твои́м.

На Литурги́и слу́жба вся му́ченице.