Служба в честь святыя мученицы и прехвальныя Евфимии, сиречь предела отцев
ВЕ́ЧЕР
На Го́споди, воззва́х: стихи́ры глас 8.
Подо́бен: О, пресла́внаго чудесе́:
О, пресла́внаго чудесе́!/ Госпо́дня а́гница,/ Того́ во́льной подобя́щися ме́ртвости,/ боле́зньми страда́ния лежа́щи во гро́бе,/ кро́ве излия́ние источа́ет си́лою Ду́ха,/ ю́же почерпа́юще душа́м на очище́ние,/ вся́ческих хвалу́ прино́сим Бо́гу всегда́.
О, пресла́внаго чудесе́!/ Ка́ко у́бо ме́ртвым естество́м/ прехва́льная стоя́ше страстоно́сица днесь,/ Боже́ственный сви́ток держа́щи,/ сопроти́вным его́ не даю́щи,/ отце́м же вверя́ющи./ О му́ченице сла́вная, вселе́нныя похвало́,/ спаса́й ны́не моли́твами твои́ми/ незы́блему Це́рковь Христо́ву.
Боже́ственных оте́ц собра́ние,/ ве́ры преде́л, на твоя́ пе́рси полага́ет,/ его́же у́бо, пресла́вная, прие́мши,/ я́ко храня́щи Боже́ственную ве́ру непоколеби́му/ и побежда́ющи вся́ку е́ресь,/ посрами́ла еси́ лжесла́вная засту́пники./ Темже тя чтим и ублажа́ем.
Сла́ва, глас 6:
Одесну́ю Спа́са предста́ де́ва,/ и страстоно́сица, и му́ченица Евфи́мия,/ оде́яна доброде́тельми побе́дными/ и преукра́шена еле́ем чистоты́ и кро́вию страда́ния,/ и вопию́щи к Нему́, ра́достно свещу́ держа́щи:/ в воню́ благоуха́ния Твоего́ теко́х, Христе́ Бо́же,/ я́ко уя́звлена Твое́ю любо́вию аз,/ не отлучи́ мене́, Женише́ Небе́сный./ Тоя́ моли́твами посли́ нам, Всеси́льне Спа́се, ми́лости Твоя́.
И ны́не, Богоро́дичен или́ Крестобогоро́дичен.
Подо́бен: Всю отложи́вше:
Ору́жие, я́коже рече́ Симео́н,/ се́рдце Твое́ про́йде,/ Пречи́стая Влады́чице,/ егда́ узре́ла еси́ из Тебе́ Возсия́вшаго/ неизрече́нным сло́вом,/ от беззако́нных, я́ко осужде́на, возноси́ма на Крест,/ о́цтом и же́лчию напоя́емаго,/ ре́бра же пробода́ема,/ и ру́це и но́зе пригвожда́емы,/ и, рыда́ющи, восклица́ла еси́,/ ма́терски вопию́щи:/ что сие́, Ча́до сладча́йшее,/ но́вое та́инство?
На стихо́вне Окто́иха.
Та́же глаго́лем припе́в: Ди́вен Бог во святы́х Свои́х,/ Бог Изра́илев.
И пое́м стихи́ру, глас 3:
Пе́сньми да почти́тся му́ченица Христо́ва:/ подоба́ет бо вои́стинну ей хвала́м сосло́вие,/ я́ко испле́тши вене́ц своему́ верху́./ Сия́ бо вои́стинну неукло́нна и тверда́,/ мно́гих мучи́телей суро́вства низложи́./ Те́мже и зовя́ше, ра́достно стра́ждущи:/ Ты ми бу́ди, Го́споди, по́мощь и не оста́ви мене́.
Сла́ва, глас 6:
Оде́яна доброде́тельми/ и просвеще́на по́мыслом,/ ми́ро пролива́ющи в сердца́ ве́рных,/ от восто́к возсия́вши, я́ко звезда́ све́тлая,/ и собо́р сотво́рши/ Свята́го Ду́ха прише́ствием Боже́ственных оте́ц,/ не преста́й о нас моля́щи ко Христу́,/ Евфи́мие всехва́льная,/ спасти́ся душа́м на́шим.
И ны́не, Богоро́дичен или́ Крестобогоро́дичен.
Подо́бен: Тридне́вен:
Лю́ди беззако́ннейшия,/ без пра́вды пригвожда́ющия Тя на Дре́ве,/ Де́ва и Чи́стая Ма́ти Твоя́ зря́щи,/ я́коже Симео́н прорече́,/ утро́бою, Спа́се, уязвля́шеся.
Тропа́рь, глас 4:
А́гница Твоя́, Иису́се, Евфи́мия/ зове́т ве́лиим гла́сом:/ Тебе́, Женише́ мой, люблю́,/ и, Тебе́ и́щущи, страда́льчествую,/ и сраспина́юся, и спогреба́юся креще́нию Твоему́,/ и стражду́ Тебе́ ра́ди,/ я́ко да ца́рствую в Тебе́,/ и умира́ю за Тя, да и живу́ с Тобо́ю,/ но, я́ко же́ртву непоро́чную, приими́ мя, с любо́вию поже́ршуюся Тебе́./ Тоя́ моли́твами,/ я́ко Ми́лостив, спаси́ ду́ши на́ша.
Или́ сей тропа́рь, глас то́йже:
Жениха́ твоего́ Христа́ возлюби́вши/ и свещу́ твою́ све́тлу угото́вльши,/ доброде́тельми возсия́вши, всехва́льная Евфи́мие,/ тем возшла́ еси́ с Ним на брак,/ вене́ц страда́ния от Него́ прие́мши./ Но от бед изба́ви нас,/ чту́щих ве́рою па́мять твою́.
НА У́ТРЕНИ
Кано́н святы́я Евфи́мии, глас 8.
Песнь 1
Ирмо́с: Колесницегони́теля фарао́ня погрузи́/ чудотворя́й иногда́,/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.
Чи́стыми луча́ми Ду́ха облиста́ющи и мра́чную пре́лести тьму разори́вши,/ нощь разреши́ безме́рных зол мои́х и просвеще́ние ми пода́ждь,/ му́ченице страстоте́рпице прехва́льная.
Боле́зни плотски́я до́блественне претерпе́ла еси́/ и к неболе́зненному ра́достно наслажде́нию, му́ченице, премину́ла еси́./ Те́мже молю́ тя:/ души́ моея́ боле́знь твои́ми моли́твами претвори́ и ко спасе́нию наста́ви.
Неве́сто честна́я, и чи́стая, и нескве́рная Царя́ Христа́,/ злы́я скве́рны души́ моея́ очи́сти, боле́знь мою́ исцели́,/ неисце́льныя стра́сти уврачу́й се́рдца моего́,/ я́ко да восхвалю́ тя, спаса́емый.
Богоро́дичен: Я́же от земли́ до небе́с дося́жущи ле́ствица Небе́сная,/ по не́йже Сло́во Бог к челове́ком сни́де, Благослове́нная Чи́стая,/ несказа́нно чу́до, недомы́сленно виде́ние, спаса́й к Тебе́ прибега́ющия.
Песнь 3
Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ еди́не Человеколю́бче.
Ря́снами я́ко златы́ми, тя, страда́льческими бие́нии оде́янну, де́во,/ пребога́тое Сло́во ви́дев,/ в Небе́сная жили́ща Безпло́тных чино́в ра́доватися приведе́.
Во благово́ние, му́ченице, ми́ра, от Чи́стыя Возсия́вшаго, потекла́ еси́ усе́рдно,/ ми́ро Боже́ственных исцеле́ний ми́ру источи́ла еси́./ Те́мже вопию́: смра́дныя стра́сти се́рдца моего́ ны́не отжени́.
Ду́шу мою́, неду́гующую тлетво́рными страстьми́,/ и к стремни́нам пре́лести попо́лзшуюся, му́ченице прехва́льная,/ осене́нии Боже́ственными исцели́ и утверди́ не побежда́тися.
Богоро́дичен: Ра́дуйся, еди́на ро́ждши вся́ческих Го́спода,/ ра́дуйся, жизнь исхода́таившая,/ ра́дуйся, приосене́нная и несеко́мая горо́,/ ве́рных утвержде́ние, еди́на Всенепоро́чная.
Ин конда́к, глас 4:
Во страда́нии свое́м до́бре подвиза́ся/ и по сме́рти нас освяща́еши чуде́с тече́нием, всехва́льная./ Тем твое́ успе́ние пое́м,/ ве́рою прибега́юще в Боже́ственную твою́ це́рковь,/ да изба́вимся неду́г душе́вных и чуде́с благода́ть поче́рпем.
Седа́лен, глас 8.
Подо́бен: Прему́дрости:
Крове́й твои́х струя́ми, му́ченице Христо́ва,/ пото́п нечести́вым при́сно де́йствуеши, всехва́льная,/ ту́чами же благода́тными слове́сныя ни́вы напая́ющи всегда́,/ в ни́хже возрасти́ла еси́ клас ве́ры./ Тем пресла́вно и по сме́рти яви́лася еси́ о́блак,/ источа́ющ живо́тное свиде́тельство, страстоте́рпице прехва́льная,/ моли́ся Христу́ Бо́гу согреше́ний оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Ру́це Твои́ Боже́ственнии,/ и́миже Созда́теля понесла́ еси́, Де́во Пресвята́я, вопло́щшагося благосты́нею,/ просте́рши, умоли́ Его́ изба́вити нас от искуше́ний, и страсте́й, и бед,/ хва́лящих Тя любо́вию и вопию́щих:/ сла́ва Все́льшемуся в Тя, сла́ва Проше́дшему из Тебе́,/ сла́ва Изба́вльшему нас рождество́м Твои́м.
Крестобогоро́дичен:
Зря́щи Тя, Христе́, Всенепоро́чная Ма́ти, ме́ртва на Кресте́ просте́рта, вопия́ше:/ Сы́не Мой, собезнача́льне Отцу́ и Ду́ху,/ что неизрече́нное Твое́ сие́ смотре́ние,/ и́мже спасл еси́ пречи́стых рук Твои́х, Ще́дре, созда́ние?
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Себе́ сама́го пла́чу, житие́ неиспра́влено име́я всегда́,/ му́ченице сла́вная, помози́ ми/ и бу́дущаго суда́ свободи́.
Я́же огнь единора́бный Боже́ственными одожде́нии увяди́вши,/ огня́ мя свободи́ и ве́чнаго осужде́ния.
Де́вства сосу́д, Ду́ха Свята́го жили́ще, Евфи́мие,/ вся́каго мя изба́ви сопроти́внаго вре́да хода́тайством твои́м.
Богоро́дичен: Милосе́рдия Твоего́ бе́здну призыва́ющу пода́ждь ми,/ Я́же Благосе́рдаго ро́ждшая и Спа́са всех, пою́щих Тя.
Песнь 5
Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.
Я́коже посреде́ звезд со́лнце многосве́тло, му́ченице, просия́ла еси́/ су́щим с тобо́ю му́чеником и мир страда́нием озари́ла еси́./ Но молю́ ти ся:/ омраче́нное мое́ се́рдце страсте́й мгло́ю просвети́.
Неусы́пною моли́твою успи́, всехва́льная, душетле́нныя се́рдца моего́ стра́сти,/ и бо́дрость Боже́ственную пода́ждь ми, лежа́щему на одре́ уны́ния,/ ле́ности же сну порабоще́ну.
Лове́ц лука́вых мя се́ти запя́ша53, я́коже пти́цу,/ и лю́те уязви́хся, и рука́ми злы́ми ны́не держи́м есмь,/ избра́нная Госпо́дня голуби́це, помози́ ми и от сих зло́бы исхити́.
Богоро́дичен: Ма́тернее дерзнове́ние, е́же к Сы́ну Твоему́, иму́щи, Всечи́стая,/ сро́днаго промышле́ния, е́же о нас, не пре́зри, мо́лимся:/ я́ко Тя и еди́ну, христиа́не, ко Влады́це очище́ние ми́лостивно предлага́ем.
Песнь 6
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Я́же звере́й стремле́ния претерпе́вши кре́пко,/ звере́й мя мы́сленных моли́твами твои́ми изба́ви,/ лю́то оскорбля́ющих мя и напа́дающих неща́дно на не́мощь мою́.
Повину́вшися и́гу Боже́ственному,/ покори́ла еси́ го́рдаго врага́, нога́ми же сокруши́ла еси́,/ от него́же у́бо исхити́, му́ченице страстоте́рпице,/ прека́ющаго к покро́ву твоему́.
Прошла́ еси́, му́ченице, лю́тое мук волне́ние/ и ко приста́нищу жи́зни пра́ве дости́гла еси́./ Те́мже в пучи́не сласте́й жития́ обурева́ема спаси́ мя.
Богоро́дичен: Да изба́вимся от лют прегреше́ний моли́твами Твои́ми, Богороди́тельнице Чи́стая,/ и да улучи́м, Пречи́стая, Бо́жие сия́ние/ из Тебе́ неизрече́нно воплоще́ннаго Сы́на Бо́жия.
Конда́к, глас 6.
Подо́бен: Е́же о нас:
По́двиги во страда́льчестве, по́двиги в ве́ре/ положи́ла еси́ те́пле за Христа́, Жениха́ твоего́./ Но и ны́не я́коже е́реси и враго́в шата́ние/ под но́ги во́инству на́шему покори́ти моли́ Богоро́дицею,/ я́же от шести́сот три́десяти Богоно́сных оте́ц/ преде́л прие́мшая/ и храня́щая, всехва́льная.
И́кос:
Что твои́х страда́ний, или́ что исправле́ний,/ или́ что твоего́ де́вства, или́ жития́ непоро́чнаго твоего́?/ Ты бо возвесели́ла еси́ Отца́, я́ко Сы́ну, уневе́стившися/ и Ду́ху Свято́му себе́ украси́вши./ Кто довле́ет к сим? Кто глаго́лати ны́не возмо́жет,/ коли́ки тя осиява́ют доброде́тели незаходи́мы?/ Я́ко от восто́ка бо гро́бу возсия́вшу,/ всем сия́еши и лучи́ пуща́еши на земли́, и в мо́ри,/ и во всю подсо́лнечную, освеща́еши и благоуха́еши концы́./ Те́мже и сви́ток, вве́ренный от шести́сот и три́десятих Богоно́сных оте́ц,/ преде́л прие́мши, сохрани́ла еси́, всехва́льная.
Песнь 7
Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.
Кровьми́ пла́мень пре́лести погаси́ла еси́, Богому́драя страстоте́рпице, вря́щими54,/ те́мже погаси́ пещь смире́ннаго моего́ телесе́ моли́тв твои́х одожде́ньми.
Увы́, душе́ моя́ всеокая́нная, согреша́ющи и не ка́ющися,/ ка́ко Судии́ стра́шному наде́ешися предста́ти?/ Потщи́ся Го́споду возопи́ти:/ Бо́же, очи́сти мя.
Отроко́м трие́м подо́бящися, попра́ла еси́ огнь, Богому́драя отрокови́це,/ те́мже нестерпи́маго огня́ и пла́мене мя ве́чнаго изба́ви,/ прибега́ющаго в покро́в твой.
Богоро́дичен: Во всего́ челове́ка обле́кся Всенепоро́чный, кроме́ греха́,/ из чре́ва Твоего́, Чи́стая, про́йде Плотоно́сец,/ Его́же моли́ ве́рою Тя чту́щия спасти́.
Песнь 8
Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше,/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Украси́вшися, сла́вная, му́ками теле́сными,/ Сло́ву кра́сному чи́сто обручи́лася еси́, соблю́дшему тя нетле́нну./ Те́мже истле́вша мя страстьми́ вся́кими кра́сна покажи́ и́скренним покая́нием,/ я́ко да при́сно тя ублажу́, я́ко благу́ю предста́тельницу.
Сви́ток Бо́жий бысть се́рдце твое́, нося́ зако́н Бо́жий, напи́сан Ду́хом,/ и сви́ток вве́рила еси́ правосла́вия, му́ченице честна́я./ Те́мже молю́: лука́вое письмо́, деви́це, зол мои́х раздра́вши,/ в кни́зе написа́ти мя моли́, чи́стая, спасе́нных.
Зако́ном уме́рши естества́, па́че естества́ кро́ви от умерщвле́на источа́еши те́ла,/ жи́зни на́шея борца́ си́ми, честна́я, умертви́вши/ и ве́рным живоно́сное здра́вие да́рующи./ Сего́ ра́ди вопию́ ти:/ умерщвле́нную ду́шу мою́ воскреси́.
Богоро́дичен: Тя, Чистую и непоро́чную, Де́во, жела́ющи,/ непоро́чно и ду́шу и те́ло соблюде́, страсте́й разгоре́ния терпе́нием опа́льши,/ искуше́ние же мно́гих претерпе́вши мук,/ и ны́не в Небе́сных селе́ниих лику́ет, с Тобо́ю веселя́щися во вся ве́ки.
Песнь 9
Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.
Да Твою́ добро́ту све́тлую, прехва́льная, у́зрит, Влады́ко,/ добро́ту презре́ телесе́ и ми́ра, любо́вию зову́щи:/ Женише́, Сло́во О́тчее, лице́ Твое́ покажи́ ми многорачи́тельное,/ его́же Боже́ственными добро́тами уя́звлена есмь.
У́треневала еси́ ко И́же из чре́ва О́тча пре́жде денни́цы Возсия́вшему/ и свет была́ еси́, со́лнца мно́жае облиста́ющи./ Те́мже мя просвети́, вопию́, Евфи́мие сла́вная,/ помраче́ннаго де́монскими лука́выми прило́ги.
Тре́петен быва́ю, прие́м во уме́ стра́шное суди́ще:/ дея́ния бо стяжа́х, вводя́щая мя в лю́тыя му́ки./ Я́же му́ки го́рькия, му́ченице, претерпе́вшая твоего́ ра́ди Рачи́теля,/ осужде́ния мя го́рькаго свободи́.
Боже́ственный вои́стинну сла́вий, и́же ве́сну Небе́сную дости́гши,/ чи́стая ла́стовице, кра́сная го́рлице всехва́льная, голуби́це удобре́ная,/ лю́тых обстоя́ний нас спаси́ и Бо́жия сла́вы улучи́ти сподо́би.
Богоро́дичен: Просвети́, две́ре све́та, о́чи се́рдца моего́, молю́ся,/ я́ко да не усну́ в смерть безбо́жных дея́ний, да ве́рою Тя воспою́,/ да велича́ю Тя, А́нгелов похвало́, и му́ченик свяще́нных честно́е сосло́вие.
Свети́лен.
Подо́бен: Жены́, услы́шите:
Стра́нно, и пресла́вно, и вели́кое чудоде́йство, лю́дие, просла́вите вси:/ я́ко по сме́рти сви́ток всесве́тлая Евфи́мия прие́мши сохрани́/ и победоно́сцы показа́ правосла́вныя отцы́ в Халкидо́нстем гра́де.
Богоро́дичен:
Прему́дрость Ипоста́сную, и Сло́во Пресу́щное,/ и Врача́ теле́с и душ ро́ждшая,/ гное́ния и я́звы души́ моея́ исцели́, лю́тыя и ле́тныя,/ и се́рдца моего́ уста́ви боле́зни, Де́во.
На хвали́тех стихи́ры на 4, глас 3.
Самогла́сны:
Страстоте́рпческое торжество́, ве́рнии,/ богому́дренне соверша́емо ви́дяще,/ чу́дному в сове́тех Бо́гу на́шему,/ благода́рственно пе́ние воспои́м./ И́бо неви́димую держа́ву сопроти́вныя си́лы/ в же́нском естестве́ победи́/ и Боже́ственную Свою́ си́лу/ в не́мощи соверши́в до́брыя му́ченицы,/ тоя́ моли́твами спаса́ет ду́ши на́ша.
Истины ча́шу от свои́х крове́й страда́льческих/ прехва́льная му́ченица Христо́ва поче́рпши/ и сию́ всегда́ предлага́ющи Це́ркви,/ в не́йже церко́вный Пита́тель/ прему́дрости гла́сом созыва́ет, глаго́лющи:/ почерпи́те пи́во воскресе́ния свиде́тельное,/ неве́рных отгони́тельное/ и страсте́й очисти́тельное,/ благочести́вым же душа́м храни́тельно,/ Спа́су зову́щим:/ напои́вый нас пото́ком пи́щи духо́вныя,/ спаси́ ду́ши на́ша.
И́же кро́вию Христо́вою ду́шу зна́менавшии в день избавле́ния,/ кровь святу́ю, от му́ченическаго исто́чника кипя́щу нам,/ с весе́лием духо́вным проро́чески почерпе́м,/ живото́чных страсте́й Спа́совых и присносу́щныя сла́вы образоде́тельно./ Те́мже Ему́ возопии́м:/ прославля́емый во святы́х Твои́х Го́споди,/ прехва́льныя Твоея́ страстоте́рпицы моли́твами/ спаси́ ду́ши на́ша.
Сла́ва, глас 8:
Всяк язы́к да подви́жется к похвале́нию прехва́льныя Евфи́мии,/ весь род и во́зраст всяк,/ ю́ноши и де́вы, Христо́ву де́ву и му́ченицу похвала́ми венча́ем:/ зако́нно бо му́жествовавши/ и сла́бость же́нскую отве́ргши/ страда́льческими боле́зньми мучи́теля врага́ низложи́,/ небе́сным же и Боже́ственным венце́м украси́вшися,/ мо́лится Жениху́ и Бо́гу/ дарова́ти нам ве́лию ми́лость.
И ны́не, Богоро́дичен или́ Крестобогоро́дичен.
Подо́бен: О, пресла́внаго чудесе́:
Тя ви́дящи, пригвожда́ема на Кресте́, Иису́се,/ и стра́сти прие́млюща во́лею,/ Де́ва и Ма́ти Твоя́, Влады́ко,/ увы́ Мне,– вопия́ше,–/ Ча́до сла́дкое,/ ра́ны непра́ведно ка́ко терпи́ши,/ Врачу́, исцели́вый челове́ческое неможе́ние/ и от тли всех изба́вивый милосе́рдием Твои́м?
На стихо́вне Окто́иха.
Та́же глаго́лем припе́в: В це́рквах благослови́те Бо́га,/ Го́спода от исто́чник Изра́илевых.
И пое́м стихи́ру, глас 8:
Ра́дуйся, преде́ле ве́ры./ Ра́дуйся, законоположе́ние святы́х оте́ц, богоневе́сто./ Ра́дуйся, тве́рдое храни́ло нам, ве́рным./ Ра́дуйся, сла́во Це́ркве Христо́вы./ Ра́дуйся, дев сто́лпе одушевле́нный,/ ра́дуйся, ми́рная мирополо́жница сла́вная,/ ея́же ра́ди ве́рным источа́еши исцеле́ния,/ му́ченице прехва́льная.
Сла́ва, глас 1:
Днесь ли́цы оте́честии, всехва́льная,/ собра́вшеся́ Христа́ ра́ди,/ сви́ток тебе́ прино́сят правосла́вныя ве́ры,/ его́же прии́мши в честны́я твоя́ ру́ки,/ храни́ши до сконча́ния./ Те́мже и челове́к ликостоя́ния, соше́дшеся,/ твое́ страда́ние почита́ем, вопию́ще благоче́стно:/ ра́дуйся, всехва́льная,/ я́же же́нское естество́ в му́жеское преложи́вши ополче́ние./ Ра́дуйся, прехва́льная,/ я́же правосла́вную и отцы́ пре́данную ве́ру неврежде́нну сохра́ньши./ Ра́дуйся, моля́щаяся о душа́х на́ших.
И ны́не, Богоро́дичен или́ Крестобогоро́дичен.
Подо́бен: Всехва́льнии му́ченицы:
Своего́ А́гнца/ А́гница и Непоро́чная Влады́чица/ на Кресте́ я́ко ви́де, зра́ка не иму́ща, ниже́ добро́ты,/ увы́ Мне,– рыда́ющи, глаго́лаше:/ где добро́та Твоя́ за́йде, Сладча́йший,/ где благоле́пие?/ Где благода́ть блиста́ющая о́браза Твоего́,/ Сы́не Мой любе́знейший?
НА ЛИТУРГИ́И
Блаже́нны Окто́иха, на 4. И Евфи́мии: песнь 3-я, на 4. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Апо́стол к Кори́нфяном, зача́ло 181. Аллилу́ия, глас 1: Терпя́, потерпе́х Го́спода, и внят ми. Ева́нгелие от Луки́, зача́ло 33. Прича́стен: В па́мять ве́чную бу́дет пра́ведник:
