Служба в честь святыя мученицы Агрипины

Стихи́ры му́ченицы, глас 4.

Подо́бен: Дал еси́ зна́мение:

Рим тя предлага́ет,/ я́коже цветоно́сный ши́пок благово́нен,/ Агрипи́но многострада́льная,/ ве́рных мы́сль благоуха́я воня́ми доброде́тельными/ и злосмра́дие страсте́й отгоня́я благода́тию всегда́,/ му́чеников удобре́ние,/ Це́ркве утвержде́ние,/ дев похвала́ и чуде́с пучи́на.

Бога́тство я́ко многоце́нно, Сикели́и тя дае́т,/ в Ри́ме пострада́вшую, Христо́с Бог наш,/ иде́же прише́дши, сла́вная му́ченице,/ де́монов лука́вое мно́жество отго́ниши/ предста́тельством твои́м./ Те́мже тя ублажа́ем/ и свято́е твое́ дне́сь пра́зднуем страда́ние,/ Агрипи́но многострада́льная.

Ноша́ху на ра́менах тя Ва́сса и Па́вла,/ повеле́нием вся́ческая Нося́щаго,/ места́ пременя́юще и долготу́ пучи́ны,/ му́ченице Агрипи́но,/ чудоде́йствия стра́шная соверша́ющи Боже́ственною благода́тию,/ почи́ла еси́ на ме́сте,/ иде́же Бог учини́,/ утружде́нным поко́й бы́вши, всехва́льная.

И́ны стихи́ры Богоро́дицы, глас и подо́бен то́йже.

Егда́ пое́ши аллилу́ия, си́и стихи́ры глаго́ли пре́жде:

Ра́дуйся, солнцезра́чная луче́,/ Со́лнца незаходи́маго престо́ле,/ Я́же Со́лнце возсия́вши недоуме́нное./ Ра́дуйся, уме́, облиста́яй Боже́ственными сия́ньми,/ заре́ мо́лнийная, освети́вшая земли́ концы́,/ и́стинное зла́та блиста́ние,/ вседо́брая и Пренепоро́чная,/ Свет невече́рний ве́рным облиста́вши.

Скве́рну отмы́й стра́стнаго се́рдца моего́,/ Богоро́дице Всепе́тая,/ и вся я́звы и гное́ния сего́,/ я́же от греха́, очи́сти, Чи́стая,/ и ума́ моего́ уста́ви непостоя́ние,/ я́ко да си́лу Твою́ и вели́кое заступле́ние/ велича́ю, окая́нный и непотре́бный раб Твой.

Не́мощь и разслабле́ние,/ Де́во Ма́ти Всенепоро́чная,/ души́ моея́ преложи́ в кре́пость и си́лу,/ стра́хом и любо́вию твори́ти же и де́яти оправда́ния Христо́ва,/ я́ко да избе́гну огня́ нестерпи́маго/ и насле́дие Небе́сное и жи́знь непреходи́мую/ Тобо́ю восприиму́, веселя́ся всегда́.

Сла́ва, и ны́не, глас и подо́бен то́йже:

Бесо́вскими преклоне́на прило́гми/ и в ров поги́бели вве́ржена,/ уще́дри, Влады́чице,/ и утверди́ мя на ка́мени доброде́телей,/ и, наве́ты вра́жия разо́рши,/ сподо́би мя твори́ти повеле́ния Твоего́ Сы́на и Бо́га на́шего,/ я́ко да улучу́ оставле́ние в Де́нь суда́.

Крестобогоро́дичен, подо́бен то́йже:

Распина́ема Христа́ Человеколю́бца ви́дящи Пречи́стая/ и ре́бра ископова́ема копие́м,/ пла́чущи, вопия́ше:/ что сие́, Сы́не Мой?/ Что Ти безблагода́тнии лю́дие возда́ша,/ за я́же сотвори́л еси́ до́брая им,/ и тщи́шися безча́дствовати Мя, Вселюбе́знейший?/ Удивля́юся, Благоутро́бне, Твоему́ во́льному распя́тию.

Тропа́рь, глас 4:

А́гница Твоя́, Иису́се, Агрипи́на/ зове́т ве́лиим гла́сом:/ Тебе́, Женише́ мой, люблю́,/ и, Тебе́ и́щущи, страда́льчествую,/ и сраспина́юся, и спогреба́юся креще́нию Твоему́,/ и стражду́ Тебе́ ра́ди,/ я́ко да ца́рствую в Тебе́,/ и умира́ю за Тя, да и жи́ву с Тобо́ю;/ но, я́ко же́ртву непоро́чную, приими́ мя, с любо́вию поже́ршуюся Тебе́./ Тоя́ моли́твами, я́ко Ми́лостив, спаси́ ду́ши на́ша.

Кано́н, его́же краегране́сие: Христо́ву неве́сту Агрипи́ну хвалю́. Глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Сия́нием благода́ти, облиста́вшим тебе́ свы́ше, мрак отжени́ неве́дения моего́/ и пода́ждь ми моли́твами твои́ми, Агрипи́но, благода́ть/ воспе́ти твоя́, му́ченице, чудеса́.

Со́лнца светле́йши я́ко и́стинно возсия́ла еси́ на тве́рди Це́ркве Христо́вы/ и просвети́ла еси́ заря́ми по́двиг, му́ченице, и чуде́с твои́х ми́ра концы́.

Жениха́ безсме́ртнаго, Жизнода́вца жела́ющи, я́ко дар, страда́ние Сему́ принесла́ еси́/ и восприя́ла еси́ Небе́сное Ца́рство и вене́ц нетле́нен, му́ченице сла́вная.

Руко́ю Влады́ки твоего́ окормля́ема, преплыла́ еси́ непостоя́нное мо́ре нече́стия, честна́я,/ и устреми́лася еси́ ко приста́нищу вы́шния све́тлости, Агрипи́но Богоблаже́нная.

Богоро́дичен: Денни́ца возсия́ в сердца́х, Пренепоро́чная, ве́рою чту́щих Тя, Бо́жию Ма́терь,/ и озари́ де́нь светоно́сный, Христо́с,/ И́же из ложе́сн Твои́х возсия́, Препе́тая.

Песнь 3

Ирмо́с: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́.

Же́злием бие́ма, ра́довашеся, си́ми ко́сти нече́стия сокруша́ющи и вопию́щи:/ Твоея́ любве́ ничто́же мя разлучи́т, Христе́.

Да враго́в наготу́ обличи́ши, му́ченице, риз совлекла́ся еси́,/ сего́ ра́ди нетле́ния оде́жду тебе́ Христо́с даде́.

Уста́, глаго́лющая беззако́нно на тя, зако́нно, Христо́ва му́ченице, загради́шася,/ вели́чия Спа́са пропове́дающей ти.

Протя́г на земли́ те́ло твое́, нече́стия служи́тель осу́етися,/ просте́рт бо ко Влады́це ум твой име́ла еси́.

Богоро́дичен: Глаго́л благоче́стно испо́лнися Иса́иин:/ Де́ва бо роди́ воплоще́нна Жизнода́вца и Спа́са душ на́ших.

Седа́лен, глас 4.

Подо́бен: Ско́ро предвари́:

И́же ка́мению служа́щии пре́лестию мно́гою отягчава́ют ка́мением тя,/ испове́дающую Христа́, ка́меня необори́маго./ Те́мже, сконча́вшися, пресла́вных чуде́с, сла́вная Агрипи́но, облиста́ла еси́ зарю́,/ просвеща́ющую ду́ши нас, восхваля́ющих тя.

Сла́ва, и ны́не, Богоро́дичен:

Еди́на, ро́ждшая Творца́ всех,/ еди́на, украси́вшая челове́чество Рождество́м Твои́м, Богоневе́сто,/ изба́ви мя от се́ти льсти́ваго врага́,/ поста́ви мя на ка́мени Христо́вых хоте́ний,/ Того́ моля́щи приле́жно, Его́же воплоти́ла еси́.

Крестобогоро́дичен:

На Кресте́ Тя возвы́шена я́ко узре́ Пречи́стая Ма́ти Твоя́, Сло́ве Бо́жий,/ ма́терски рыда́ющи, веща́ше:/ что но́вое и стра́нное сие́ чу́до, Сы́не Мой?/ Ка́ко, Жи́знь всех, вкуша́еши сме́рти,/ оживи́ти ме́ртвыя хотя́, я́ко Милосе́рд?

Песнь 4

Ирмо́с: Седя́й в сла́ве на престо́ле Божества́,/ во о́блаце ле́гце/ прии́де Иису́с Пребоже́ственный/ Нетле́нною Дла́нию и спасе́ зову́щая:/ сла́ва, Христе́, си́ле Твое́й.

Во́лю Того́ боя́щихся творя́й А́нгелом, му́ченице, разреша́ет тя уз и стесне́ния,/ разори́вшую вся́кое нече́стие соу́зом любве́ Христа́, Жениха́ твоего́.

Умертви́вшися любве́ ра́ди Умертви́вшаго всю кре́пость сме́ртную,/ благода́ть источа́еши присноживо́тную,/ страстьми́ умерщвле́нныя исцеля́еши, Агрипи́но,/ му́чеников Христо́вых удобре́ние.

Превозше́дши любо́вию Жениха́ твоего́ вся́ку плотску́ю любо́вь,/ терпе́ла еси́ тве́рдо, внегда́ бие́ме бы́ти боле́зненне, вопию́щи:/ не разлучи́т мя любве́ Твоея́, Христе́, мук преще́ние.

Блаже́ннаго совокупле́ния тро́ичным жела́нием пострада́вших/ Ва́ссы и, Агрипи́ны целому́дрыя кто му́жество изрече́т?/ И́мже показа́ша не́мощну и́дольскую кре́пость держа́вно.

Богоро́дичен: Цари́ца Де́ва, злато́ю оде́ждою укра́шена, Сы́ну Царю́ ны́не предстои́т,/ Я́же без разсужде́ния А́нгелы превосходя́щи, зову́щия:/ сла́ва, Христе́, си́ле Твое́й.

Песнь 5

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Свет незаходи́мый, все́льшийся в твое́ те́ло, явля́ше тя зря́щим в нощи́, я́ко во дни,/ зарю́, чуде́с испуща́ющую.

Нескве́рная а́гница, Па́стыря стопа́м после́дующи,/ я́коже же́ртва непоро́чна, Сему́ принесе́ся боже́ственно.

Ум иму́щи све́тел, проро́чествия испо́лнен,/ бу́дущая, я́ко су́щая, сла́вная Ва́ссо,/ предглаго́лати сподо́билася еси́.

Богоро́дичен: О Ма́ти Бо́жия, души́ моея́ озлобле́ние исцели́,/ ро́ждшая Преблага́го Сло́ва, всех ублажа́юща.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Облиста́вшее от Ри́ма, я́ко незаходи́мое со́лнце,/ те́ло святы́я му́ченицы Сикели́я прие́мши,/ мра́ка де́монскаго избавля́ется лю́тости.

До́блественно требога́тыя святы́я му́ченицы, я́же пре́жде сме́рти уме́ршия,/ в ча́янии муче́ния, уме́ршее твое́ живоно́сное те́ло принесо́ша.

Ору́жие врага́ на тебе́ изнемо́же,/ и́бо, я́ко град, низложи́ла еси́, неиму́щ основа́ния, сего́ горды́ню, Агрипи́но,/ трудо́м сла́вных по́двигов твои́х.

Исцеля́ется прикоснове́нием те́ла твоего́ кровоточи́вая,/ прокаже́ннии очища́ются, ве́рою притека́юще,/ отбега́ет же и ин всяк неду́г призыва́нием свята́го твоего́, му́ченице, и́мене.

Богоро́дичен: Глаго́лы Гаврии́ла, Де́во Всенепоро́чная, ны́не прие́мше, вопие́м:/ ра́дуйся, Ма́ти еди́на благослове́нная,/ ра́дуйся, две́ре, Со́лнца пра́вды иму́щи.

Конда́к, глас 4.

Подо́бен: Яви́лся еси́:

Све́тлых по́двиг твои́х светоно́сный наста́ де́нь,/ во́ньже почита́ющи сих, Боже́ственная Це́рковь вся созыва́ет ве́село вопи́ти тебе́:/ ра́дуйся, де́во и му́ченице, Агрипи́но всечестна́я.

Песнь 7

Ирмо́с: Спасы́й во огни́ авраа́мския Твоя́ о́троки/ и халде́и уби́в,/ я́же Пра́вда пра́ведно уловля́ше,/ препе́тый Го́споди,/ Бо́же оте́ц на́ших, благослове́н еси́.

Голуби́ца, я́коже злата́, ору́жием Креста́ огражда́ема,/ ага́ряны, и́же в нощи́ ко гра́ду твоему́ прибли́жившияся, потреби́ла еси́,/ спа́сши ве́рныя от скверноуби́йства сих, му́ченице.

Многови́дныя Христа́ ра́ди претерпе́вши боле́зни, му́ченице,/ неболе́зненно обрела́ еси́ в том и безсме́ртно наслажде́ние, зову́щи:/ препе́тый Го́споди, Бо́же оте́ц на́ших, благослове́н еси́.

Свяще́нник чу́дный и чудоде́йством сия́я, твоя́ чудеса́ зря, Агрипи́но,/ Бо́га велича́ше и, веселя́ся, поя́ше:/ Бо́же оте́ц на́ших, благослове́н еси́.

Тве́рдым по́мыслом тве́рдое твое́ к страсте́м нося́щи те́ло,/ же́нскую ника́коже чу́ла еси́ не́мощь, зову́щи, де́во, Влады́це:/ благослове́н еси́, Го́споди, Бо́же оте́ц на́ших.

Богоро́дичен: Ро́ждшая Бо́га, пребыва́еши по рождестве́ Де́вою/ и млеко́м пита́еши ма́терски подо́бно Пита́теля ми́ра, Пренепоро́чная,/ Ему́же пою́ще, зове́м:/ Бо́же оте́ц на́ших, благослове́н еси́.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ е́сть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Но́щь, я́ко де́нь, зря́шеся нося́щим, му́ченице, твоя́ мо́щи./ Ме́сто благоуха́шеся вся́ко, тя прие́млющее./ Де́монское ополче́ние вельми́ отгоня́шеся./ Исцеле́ний излива́ются ка́пли превознося́щим Христа́ во вся ве́ки.

Жениха́ безсме́ртнаго жела́ющи, в след благоуха́ний Сего́ текла́ еси́,/ Того́ страсте́м и сме́рти подо́бящися, му́ченице сла́вная, и взыва́ющи:/ Го́спода по́йте, дела́, и превозноси́те Его́ во ве́ки.

Несумне́нну иму́щи ве́ру,/ еле́ем просве́щши крове́й твои́х, му́ченице, свещу́ твою́,/ вну́трь вошла́ еси́ черто́га Небе́сныя ра́дости, пою́щи:/ Го́спода по́йте, дела́, и превозноси́те Его́ во ве́ки.

Ви́дети красоту́ Госпо́дню, Сего́ же Це́рковь посеща́ти жела́ющи,/ я́ко на колесни́це кро́ве своея́ взе́мшися, пою́щи, к Сему́ дости́гла еси́:/ Го́спода по́йте, дела́, и превозноси́те Его́ во ве́ки.

Богоро́дичен: Купина́, я́же пре́жде прообразо́ваше стра́нное рождества́ Твоего́ та́инство,/ неопа́льна пребы́сть, Пренепоро́чная:/ и́бо о́гнь родила́ еси́ Божества́, неопа́льна пребыла́ еси́, Отрокови́це,/ те́мже Тя пое́м во вся ве́ки.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Ма́нием вся творя́щаго к концу́ муче́ния Агафони́ка с Ва́ссою вку́пе и Па́влою усе́рдно тща́щеся,/ я́ко вои́стинну друже́бно, обрето́ша жела́ния край.

В небе́сных черто́зех всели́вшися, де́во,/ и неви́димых добро́ты смотря́ющи, и прие́млющи Бо́жию све́тлость,/ тя пою́щия уясни́.

Вене́ц положи́ся благода́тей на версе́ твое́м, Агрипи́но,/ я́ко сконча́вшей тече́ние и ве́ру соблю́дшей некра́дому,/ и пра́ведных чи́нове красно́ тя прия́ша.

Я́ко предстоя́щи Зижди́телю со дерзнове́нием Влады́це,/ му́ченице Агрипи́но, со все́ми от ве́ка святы́ми/ проси́ согреше́ний проще́ния тя пою́щим, до́брая де́во.

Богоро́дичен: Вся Содержа́щаго ма́терски подо́бно Твои́ми рука́ми нося́щи, Де́во Мари́е,/ руки́ мя изба́ви борца́,/ я́ко да Твое́, спаса́емь, восхвалю́ вели́чие.