Служба в честь святых равноапостольных седмочисленных славяноболгарских просветителей Мефодия и Кирилла, Климента и Наума, Саввы, Горазда и Ангелария

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 1.

Подо́бен: Всехва́льнии му́ченицы:

Седмочи́сленницы сла́внии,/ вас вся́ческих Зижди́тель седмода́рным Ду́хом украси́,/ и писме́н изложе́нием наро́д бо́лгарский ва́ми просвети́,/ и к ве́ре приведе́,/ Ему́же ны́не моли́теся/ дарова́ти душа́м на́шим/ мир и ве́лию ми́лость.

Седмочи́сленницы сла́внии,/ вы бо́лгаром воструби́сте в Тро́ице Еди́наго Бо́га/ и, я́коже седмию́ труба́ми/ сте́ны Иерихо́на иногда́ падо́ша,/ и́долы сокруши́сте, пропове́давше Христа́,/ Ему́же ны́не моли́теся/ дарова́ти душа́м на́шим/ мир и ве́лию ми́лость.

Седмочи́сленницы сла́внии,/ ва́ше днесь све́тлое торжество́ благоче́стно соверша́юще,/ с ра́достию вас ублажа́ем, Кири́лле и Мефо́дие, Кли́менте,/ Нау́ме со Са́ввою и Гора́зде со Ангела́рием!/ Те́мже Христу́ моли́теся/ дарова́ти душа́м на́шим/ мир и ве́лию ми́лость.

Сла́ва, глас 6:

Преподо́бнии седмочи́сленницы,/ вы, доброде́тели от младе́нства обучи́вшеся,/ орга́ни бы́сте Свята́го Ду́ха/ и, от Него́ ры́барское восприе́мше худо́жество,/ болга́р улови́сте к благоче́стию./ Те́мже дерзнове́ние иму́ще ко Го́споду,/ мир испроси́те душа́м на́шим.

И ны́не, Богоро́дичен:

Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми Твои́ми/ поми́ловатися душа́м на́шим.

На стихо́вне стихи́ры, глас 2.

Подо́бен: До́ме Евфра́фов:

Све́том доброде́телей/ болга́ры и далма́ты/ седмочи́сленницы сла́внии,/ научи́вше правосла́вно,/ к Боже́ственней ве́ре приведо́ша.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Учи́тели и сострада́тели,/ помо́щники и предста́тели/ и Небе́сныя вас/ стяжа́вше гра́жданы,/ досто́йно ны́не ублажа́ем.

Стих: Моисе́й и Ааро́н во иере́ех Его́,/ и Самуи́л в призыва́ющих Имя Его́.

Воспева́ем Бо́гови,/ да́вшему врачевство́/ душа́м и телесе́м/ Боже́ственныя седмочи́сленники/ и ве́ры пропове́дники.

Сла́ва, и ны́не, Богоро́дичен:

Влады́чице Чи́стая,/ Ма́ти Емману́илева,/ со апо́столы святы́ми моли́/ спасти́ся ро́ду христиа́нскому.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры, глас 2.

Подо́бен: Ки́ими похва́льными венцы́:

Ки́ими похва́льными венцы́/ венча́ем седмочи́сленники сла́вныя?/ Разделе́нныя телесы́ и совоку́пленныя ду́хом,/ Богоно́сныя побо́рники Тро́ицы,/ за про́поведь Ева́нгелия пострада́вшия,/ свети́ла, Далма́цию просвети́вшая,/ столпы́, Болга́рию утверди́вшия,/ и́хже венцы́ сла́вы, я́ко победи́тели, венча́ет Христо́с Бог наш,/ име́яй ве́лию ми́лость.

Ки́ими пе́сненными цветы́/ увязе́м седмочи́сленники сла́вныя?/ Равноапо́стольныя дарова́нии и единоче́стныя благода́тию,/ кра́сная Ду́ха прия́телища,/ па́стыри христоподо́бныя ве́рою,/ учи́тели догма́тов церко́вных верхо́вныя,/ земны́я а́нгелы небе́сною сла́вою,/ и́хже почествова́ Христо́с Бог наш,/ име́яй ве́лию ми́лость.

Ки́ими пе́сненными добро́тами/ похва́лим седмочи́сленники сла́вныя?/ Кири́лла со Мефо́дием,/ Кли́мента, Нау́ма со Са́ввою/ и Гора́зда со Ангела́рием,/ и́же в Трие́х Ли́цех Еди́наго Бо́га нам возвести́вшия/ и ве́ру Правосла́вную утверди́вшия./ Сих бо вои́стинну досто́йно/ безсме́ртныя сла́вы венцы́ венча́ет Христо́с Бог наш,/ име́яй ве́лию ми́лость.

Сла́ва, глас 6:

Та́йныя днесь Ду́ха трубы́,/ Богоно́сныя отцы́ восхва́лим седмосветлоза́рныя,/ и́же равноапо́стольною му́дростию/ сла́ву Бо́жию я́сно пропове́даша/ и к Небеси́ нам восхо́д показа́ша,/ изложе́нием писме́н бо́лгарская мно́жества обнови́ша/ и и́долом служе́ние огне́м Ду́ха попали́ша./ Те́мже воззове́м к ним, глаго́люще:/ отцы Боже́ственнии и равноапо́стольнии,/ моли́теся ко Го́споду/ утверди́ти в Правосла́вии род наш/ и спасти́ ду́ши на́ша.

И ны́не, Богоро́дичен: Кто Тебе́ не ублажи́т:

Вход. Проки́мен дне. И чте́ния 3 святи́тельская.

При́тчей чте́ние (главы́ 3 и 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ей,/ в шу́йце же ей бога́тство и сла́ва,/ от уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да!/ честна́я бо реку́,/ и блаже́н челове́к, и́же пути́ моя́ сохрани́т:/ исхо́ди бо мои́, исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас/ и предлага́ю мой глас сыново́м челове́ческим:/ я́ко аз, прему́дрость, устро́их сове́т,/ и ра́зум, и смысл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки:/ честна́я бо реку́ и отве́рзу от усте́н пра́вая,/ я́ко и́стине поучи́тся горта́нь моя́,/ ме́рзски же предо мно́ю устны́ лжи́выя./ С пра́вдою вси глаго́лы уст мои́х:/ ничто́же в них стро́потно, ниже́ развраще́нно./ Вся пра́ва суть разумева́ющим и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

При́тчей чте́ние (главы́ 10 и 11):

Уста́ пра́веднаго ка́плют прему́дрость,/ язы́к же непра́веднаго поги́бнет./ Устне́ муже́й пра́ведных ка́плют благода́ти,/ уста́ же нечести́вых развраща́ются./ Ме́рила льсти́вая ме́рзость пред Го́сподем,/ вес же пра́веден прия́тен Ему́./ Иде́же а́ще вни́дет досажде́ние, та́мо и безче́стие,/ уста́ же смире́нных поуча́ются прему́дрости./ Соверше́ние пра́вых наста́вит их,/ и поползнове́ние отрица́ющихся упасе́т их./ Не по́льзуют име́ния в день я́рости,/ пра́вда же изба́вит от сме́рти./ У́мер пра́ведный, оста́ви раска́яние,/ нару́чна же быва́ет и посмея́тельна нечести́вых па́губа./ Пра́вда непоро́чнаго исправля́ет пути́,/ в нече́стие же па́дает непра́вда./ Пра́вда муже́й пра́вых изба́вит их,/ безсове́тием же пленя́ются беззако́ннии./ Сконча́вшуся му́жу пра́ведну, не поги́бнет наде́жда,/ похвала́ же нечести́вых поги́бнет./ Пра́ведник от ло́ва убе́гнет,/ в него́же ме́сто предае́тся нечести́вый./ Во усте́х нечести́вых сеть гра́жданом,/ чу́вство же пра́ведных благоспе́шное./ Во благи́х пра́ведных испра́вится град,/ и в поги́бели нечести́вых ра́дование./ Во благослове́нии пра́вых возвы́сится град,/ усты́ же нечести́вых раскопа́ется./ Руга́ется гра́жданом лише́нный ра́зума,/ муж же му́дрый безмо́лвие во́дит.

Прему́дрости Соломо́ни чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется,/ седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шник, преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 1:

Прииди́те, празднолю́бцев собо́ри,/ пе́сненное похвале́ние принесе́м днесь/ блаже́нным равноапо́столом седмочи́сленным,/ и́же, высото́ю ра́зума неукло́нно воззре́вше/ и безве́стную глубину́ прему́дрости Бо́жия ви́девше,/ Богому́дрыми уче́нии каменосерде́чныя ро́ды бо́лгарския обогати́ша/ и мо́лятся о душа́х на́ших.

Глас 2:

Боже́ственными дея́нии телеса́ и ду́ши зако́нно обучи́вше,/ правосла́вныя возгреме́сте догма́ты/ и, со а́нгельскими смеси́вшеся си́лами,/ Триипоста́сному Бо́гу побе́дную песнь непреста́нно воспева́ете,/ к Нему́же и мы вопие́м:/ И́же в Тро́ице познава́емый Бо́же,/ моли́твами седмочи́сленник Твои́х/ поми́луй и спаси́ нас.

Глас 3:

Вели́кая сла́во Це́ркве Христо́вы,/ седмочи́сленницы сла́внии,/ по́двигом до́брым му́жественно подви́гшеся/ и тече́ние про́поведи сконча́вше,/ Небе́сная селе́ния достиго́сте/ и, со А́нгелы ра́дующеся,/ о нас всегда́ моли́теся/ изба́витися душа́м на́шим.

Сла́ва, глас 4:

Возсия́ша до́брая ва́ша дела́, седмочи́сленницы сла́внии,/ я́коже со́лнце, на земли́ и на небеси́:/ безнача́льное бо рождество́ Сы́на/ и Ду́ха исхожде́ние от Еди́наго Отца́ пропове́давше,/ еретики́ посрами́сте/ и ко и́стинней ве́ре Христо́вей свире́пыя язы́ки улови́сте./ Те́мже моли́теся ко Го́споду/ дарова́ти нам ве́лию ми́лость.

И ны́не, Богоро́дичен: При́зри на моле́ние Твои́х раб, Всенепорочная:

На стихо́вне стихи́ры, глас 5.

Подо́бен: Ра́дуйся, по́стнических:

Ра́дуйся, седмочи́сленников ли́че,/ Болга́рии кре́пкая забра́ла,/ столпи́ Далма́ции и утвержде́ние,/ Тро́ицы побо́рницы./ Христо́вых люде́й упа́сшии на па́житех Боже́ственных догма́т/ и ересе́й волко́в дале́че от них прогна́вшии,/ уми́ светообра́знейшии и прему́дрости пучи́но,/ со Арха́нгелы ны́не ра́достно водворя́ющеся,/ Христа́ умоли́те/ дарова́ти душа́м на́шим/ мир и ве́лию ми́лость.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Ра́дуйся, седмочи́сленников ли́че,/ земны́я тве́рди зве́зды/ и свети́ла Трисо́лнечнаго Сия́ния,/ зари́ любве́ неистощи́мыя,/ Ду́ха Свята́го орга́ни,/ благода́ти я́снии пропове́дницы,/ благоглаго́ливии Писа́ний учи́телие,/ зако́на Бо́жия велегла́снии провозве́стницы,/ рая́ досто́йнии жи́телие/ и до́льних к го́рнему наста́вницы,/ Христа́ умоли́те/ дарова́ти душа́м на́шим/ мир и ве́лию ми́лость.

Стих: Моисе́й и Ааро́н во иере́ех Его́,/ и Самуи́л в призыва́ющих И́мя Его́.

Ра́дуйся, седмочи́сленников ли́че,/ Мефо́дие и Кири́лле,/ Кли́менте и Нау́ме,/ Са́вво, Гора́зде и Ангела́рие,/ земни́и а́нгели неботе́чнии,/ бо́лгаров похвале́ние и далма́тов ра́досте,/ вра́чеве иску́снейшии,/ приснотеку́щия Ду́ха ре́ки,/ напои́вшия зе́млю пропове́данием,/ сосцы́, источа́ющии неиждива́емо спасе́ния млеко́,/ прему́дрости драгоце́ннейшая добро́то,/ Христа́ умоли́те/ дарова́ти душа́м на́шим/ мир и ве́лию ми́лость.

Сла́ва, глас 8:

Неботе́чною возше́дше колесни́цею,/ седмочи́сленницы сла́внии,/ доброде́телей достиго́сте верх воздержа́нием,/ и, сосу́ди бы́вше Свята́го Ду́ха,/ чуде́с показа́нии каменосерде́чныя язы́ки/ к непоро́чней ве́ре Христо́вей улови́сте,/ и, боле́зненных подвиго́в ва́ших мзду досто́йно прии́мше,/ Еде́ма насле́дницы бы́сте/ и Небе́сным свесели́теся чинонача́лием./ Но моли́теся Спа́су, всех Бо́гу,/ умири́ти мир и спасти́ ду́ши на́ша.

И ны́не, Богоро́дичен: Безневе́стная Де́во:

Тропа́рь, глас 1:

Венцы́ хвале́ния увенча́им седмочи́сленники сла́вныя,/ Кири́лла со Мефо́дием, Кли́мента, Нау́ма со Са́ввою/ и Гора́зда со Ангела́рием,/ я́ко свети́ла возсия́вшия/ и Триеди́наго Бо́га нам благовести́вшия,/ столпы́ незы́блемыя Це́ркве Бо́лгарския/ и богодухнове́нныя побо́рники сло́ва на́шего,/ бесо́вское и́долом поклоне́ние упраздни́вшия/ и Христу́ Бо́гу моля́щияся,/ Це́рковь на́шу утверди́ти/ и душа́м на́шим дарова́ти/ мир и ве́лию милость.

НА У́ТРЕНИ

На Бог Госпо́дь: тропа́рь святы́х два́жды. Сла́ва, и ны́не, Богоро́дичен.

По 1-м стихосло́вии седа́лен, глас 1.

Подо́бен: Гроб Твой, Спа́се:

Трубы́ Христо́вы, седмочи́сленники сла́вныя, почти́м днесь, вси ве́рнии,/ Тро́ицу Бо́га нам возвести́вшия, от Отца́ же рожде́ние и происхожде́ние,/ и извле́кшия нас из глубины́ неве́рствия/ к Правосла́вней ве́ре Ду́ха благода́тию.

Сла́ва, и ны́не, Богоро́дичен:

Мари́е, честно́е Влады́ки прия́телище,/ воскреси́ ны, па́дшия в про́пасть лю́таго отча́яния, и прегреше́ний, и скорбе́й,/ Ты бо еси́ гре́шным спасе́ние, и по́мощь, и кре́пкое предста́тельство/ и спаса́еши рабы́ Твоя́.

По 2-м стихосло́вии седа́лен, глас 4.

Подо́бен: Ско́ро предвари́:

Седмочи́сленницы сла́внии, чуде́с исто́чницы,/ ве́рно почита́ющия вас от бед и скорбе́й изба́вите си́лою Влады́ки Христа́,/ я́ко иму́ще к Нему́ дерзнове́ние и предстоя́ще при́сно с Го́рними си́лами.

Сла́ва, и ны́не, Богоро́дичен:

Ско́ро предвари́, пре́жде да́же не порабо́тимся враго́м,/ ху́лящим Тя и претя́щим нам, Христе́ Бо́же наш./ Погуби́ Кресто́м Твои́м борю́щия нас,/ да разуме́ют, ка́ко мо́жет Правосла́вных ве́ра,/ моли́твами Богоро́дицы, Еди́не Человеколю́бче.

Велича́ние:

Велича́ем вас,/ святи́и равноапо́столи седмочи́сленнии,/ вся слове́нския страны́ уче́ньми свои́ми просвети́вшии/ и ко Христу приве́дшии.

По полиеле́и седа́лен, глас 8.

Подо́бен: Прему́дрость и Сло́во:

Научи́вше ро́ды бо́лгарския благоче́стию и пропове́давше ве́ру и́стинную,/ Боже́ственным Креще́нием приведо́сте к Бо́гу, всеблаже́ннии./ Триязы́ческую е́ресь прему́дренно победи́сте,/ немощству́ющих стра́сти исцеля́ете и сло́вом ду́хи прогоня́ете, преподо́бнии Тро́ицы побо́рницы./ Моли́теся ко Го́споду прегреше́ний оставле́ние дарова́ти/ пра́зднующим честну́ю ва́шу па́мять.

Сла́ва, и ны́не, Богоро́дичен:

Небе́сную дверь и киво́т,/ всесвяту́ю го́ру, светоза́рный о́блак воспои́м,/ небе́сную ле́ствицу, слове́сный рай, Е́вино избавле́ние,/ вселе́нныя всея́ вели́кое сокро́вище,/ я́ко спасе́ние в Ней соде́лася ми́рови и оставле́ние дре́вних согреше́ний./ Сего́ ра́ди вопие́м Ей:/ моли Сы́на Твоего́ и Бо́га прегреше́ний оставле́ние дарова́ти/ покланя́ющимся пресвято́му рождеству́ Твоему́.

Та́же степенна, 1-й антифо́н 4-го гла́са. Проки́мен, глас 4: Свяще́нницы Твои́ облеку́тся в пра́вду,/ и преподо́бнии Твои́ возра́дуются. Стих: Услы́шите сия́, вси язы́цы, внуши́те, вси живу́щии по вселе́нней. Вся́кое дыха́ние: Ева́нгелие от Луки́, зача́ло 51.

По 50-м псалме́ стихи́ра самогла́сна, глас 6:

Излия́ся благода́ть во устна́х ва́ших,/ преподо́бнии отцы́,/ и бы́сте па́стырие Христо́вы Це́ркве,/ уча́ще слове́сныя о́вцы/ ве́ровати в Тро́ицу Единосу́щную/ во Еди́ном Божестве́.

Кано́н святы́х, его́же краегране́сие: Седмочи́сленники, Григо́рий, воспою́. Глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Припе́в: Святи́и седмочи́сленницы, моли́те Бо́га о нас.

Свети́ла Боже́ственная мы́сленныя тве́рди, седмочи́сленницы пресве́тлии,/ Богоразу́мия све́том озари́те омраче́нный мой ум,/ я́ко да пе́сни вам воспою́, ра́дуяся.

Е́же Твои́м стопа́м после́довати седмочи́сленницы вожделе́вше,/ нас ра́ди крест и смерть претерпе́вшаго Христа́,/ Твоего́ ра́ди раче́ния плоть умертви́ша со страстьми́ и похотьми́.

Дождь седмода́рнаго Уте́шителева благоволе́ния в Вы́шних седя́й Оте́ц вам свы́ше ороси́,/ я́коже Иса́ия глаго́лаше дре́вле,/ воспочива́ющу в вас Христу́, седмочи́сленницы блаже́ннии.

Богоро́дичен: Ма́тере кроме́ пре́жде век Ражда́ющагося зачала́ еси́, Пречи́стая,/ и родила́ еси́ без Отца́ кроме́ преложе́ния или́ смеше́ния,/ и ста́ла еси́ све́тло укра́шена, я́ко Неве́ста Непоро́чная Вседержи́телю.

Песнь 3

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

О́гненная кре́пость ересе́й и триязы́чества угасе́,/ бо́лгарскую бо всю зе́млю погрузи́ша в ба́ню Креще́ния седмочи́сленницы святи́и.

Чинонача́лие церко́вное почита́юще, седмочи́сленницы/ в Рим достиго́ша, кни́ги слове́нския утверди́ша/ и про́поведию зако́на Бо́жия ро́ды бо́лгарския к Правосла́вней ве́ре приведо́ша.

Истинно благохва́лим равноапо́столы Твоя́, Христе́:/ Мефо́дия и Кири́лла, Кли́мента и Нау́ма, Са́вву, Гора́зда и Ангела́рия,/ А́нгелов совсе́льники.

Богоро́дичен: Свя́то во святы́х почива́ющаго, безсме́ртия Хода́тая, родила́ еси́, Богоро́дице,/ я́коже ви́дена была́ еси́ ни́ва неора́нная,/ всем причаща́ющимся клас живо́тный прозя́бшая.

Седа́лен, глас 4.

Подо́бен: Яви́лся еси́ днесь:

Да пра́зднует днесь Це́рковь Бо́лгарская честно́е торжество́/ седмочи́сленников честны́х и равноапо́стольных,/ и́бо ти́и утверди́ша Болга́рию Боже́ственными свои́ми догма́ты.

Сла́ва, и ны́не, Богоро́дичен:

Предста́тельство необори́мое скорбя́щих/ и те́плое заступле́ние на Тя упова́ющих, от бед мя изба́ви,/ Ты бо еси́ всех покро́в и по́мощь.

Песнь 4

Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Лю́дем слове́нским в Тро́ице пропове́дасте Бо́га,/ Испусти́теля Ду́ха и Роди́теля Сы́на Соверше́ннаго,/ рече́нием после́дующе проро́ческим и стопа́м апо́стольским, Богому́дрии.

Ева́нгельски сла́ву Бо́жию ви́дети жела́юще, чистоту́ се́рдца соблюдо́сте,/ та́же ско́рби претерпе́сте мно́гия, гоне́ния же и ра́ны мужему́дренно/ и поноше́ния зла́я за ве́ру Христо́ву, укрепля́еми Ду́хом.

Богоро́дичен: Непреста́нно о нас Бо́гу предстоя́щую Мари́ю Пречи́стую,/ прииди́те, вси ве́рнии, пе́сньми благопохва́лим,/ я́ко без сравне́ния превы́шши Серафи́м и челове́к су́щи Хода́таица Непосты́дная.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Немо́лчное веща́ние ва́ше во всю зе́млю протече́, седмочи́сленницы,/ и глаго́ли богому́дрии про́поведи ва́шея в концы́ се́вера,/ и́миже и спасо́шася ве́ровавшии в Тро́ицу Несозда́нную.

И́же Авраа́му обеща́ да́ти его́ в благослове́ние язы́ком,/ То́йже Госпо́дь ро́ду бо́лгарскому вас даде́ во благослове́ние;/ те́мже возме́здие прия́сте и в ра́дость внидо́сте Го́спода ва́шего.

К бо́лгаром по́слани бы́вше, возвести́сте им Тро́ицу Несозда́нную Божества́,/ Отца́, и Сы́на, и Ду́ха Свята́го,/ е́реси же вся всеконе́чно упраздни́сте/ и волко́в их дале́че прогна́сте.

Богоро́дичен: И́же в Вы́шних влады́чествующаго Богочелове́ка, Сы́на Твоего́, Пречи́стая,/ на земли́ воспева́ет естество́ челове́ческое,/ свы́ше же Арха́нгели и А́нгели сла́вят рождество́ Твое́ неизрече́нное.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Гобзу́ющая благода́ть святы́х седмочи́сленников да кропи́т свы́ше днесь чудеса́,/ я́ко да насы́тятся всего́ ми́ра собра́ния,/ воспева́ющая любо́вию сих пе́сньми.

Равноапо́стольски вмени́ли есте́ вся мимотеку́щая я́ко уме́ты, ли́че седмочи́сленников,/ и возлюби́ли есте́ нетле́нная Боже́ственная;/ ве́чнаго же Христа́ просла́вивше, ве́чную сла́ву улучи́ли есте́.

Изве́стно позна́в Госпо́дь по́ты ва́ша за ве́ру, Богому́дрии,/ перворожде́нных селе́ние ны́не дарова́ вам, просла́вленным.

Богоро́дичен: Греха́ идолобе́сия спасе́ род челове́ческий Бо́жие Сло́во, Богоро́дице,/ И́же на Тя с высоты́ прини́че рождество́м Свои́м, Всенепоро́чная.

Конда́к, глас 4.

Подо́бен: Вознесы́йся на Крест:

Непобеди́ми в по́стничестве я́вльшеся,/ ко́зни неви́димых враго́в Боже́ственною си́лою победи́сте;/ мно́жества же научи́вше непросвеще́нных болга́р/ Правосла́вней ве́ре,/ восприя́сте венцы́./ О нас моли́теся Христу́, седмочи́сленницы,/ да́ти прегреше́ний оставле́ние.

И́кос:

В по́стничестве возсия́вшия благоче́стия пропове́дники,/ и́стинныя столпы́ и основа́ния Це́ркве, трубы́ Боже́ственныя Христо́вых догма́т,/ и́же е́реси огне́м Ду́ха попали́ша и Правосла́вную ве́ру я́сно возвести́ша,/ Богоно́сныя седмочи́сленники, прииди́те, ве́рнии, благопохва́лим,/ си́и бо изложе́нием писме́н бо́лгарския ро́ды от ди́вия ма́слины в до́брую присади́вше,/ всех к непоро́чней ве́ре Боже́ственным Креще́нием приведо́ша./ Те́мже к ним возопии́м:/ отцы́ Боже́ственнейшии и равноапо́стольнии,/ о нас моли́теся Христу́, седмочи́сленницы,/ да́ти прегреше́ний оставле́ние.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Оте́чески вити́йствующе та́инства Ду́ха язы́ку слове́нскому седмочи́сленницы,/ и в темни́цу всажде́ни бы́вше,/ и от уз изба́вившеся, в ра́дости поя́ху:/ препе́тый отце́в Госпо́дь и Бог, благослове́н еси́.

Ра́зума Вы́шняго уче́нии цели́тели челове́ком яви́стеся на земли́,/ ны́не же, зерца́лом разре́шшимся, Всецарю́ пое́те непреста́нно:/ препе́тый отце́в Госпо́дь и Бог, благослове́н еси́.

Иско́нный Трисо́лнечный Све́те Несозда́нный, Тро́ице Пребоже́ственная,/ О́тче, Сы́не и Боже́ственный Ду́ше,/ уще́дри ны моле́нии седмочи́сленников, пою́щих:/ препе́тый отце́в Госпо́дь и Бог, благослове́н еси́.

Богоро́дичен: И селе́ние одушевле́нное, Неве́сто Всенепоро́чная,/ и пала́та кра́сная, и престо́л златозра́чный показа́лася еси́ Зижди́теля, Ему́же вопие́м:/ препе́тый отце́в Госпо́дь и Бог, благослове́н еси́.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Вся́каго озлобле́ния избавля́я и ве́чнаго муче́ния моли́твами седмочи́сленников,/ уще́дри нас, Безнача́льная Тро́ице, и Еде́ма сподо́би пою́щия:/ Го́спода по́йте, дела́, и превозноси́те Его́ во вся ве́ки.

Озари́ вас Боже́ственными отраже́нии равносла́вный свет Безвино́внаго,/ и нра́вы апо́стольскими снабде́, и ва́ми вселе́нную воздви́же пе́ти:/ Го́спода по́йте, дела́, и превозноси́те Его́ во вся ве́ки.

Богоро́дичен: Спасе́ние челове́ком Тобо́ю ны́не вои́стинну прибли́жися, Чи́стая./ Изба́ви у́бо мя согреше́ний, под кров Твой прибега́ющаго и те́пле пою́щаго:/ Го́спода по́йте, дела́, и превозноси́те Его́ во вся ве́ки.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная, Богоро́дице,/ Чи́стая Присноде́во.

Прия́телища Ду́ха, Сло́ва же пропове́дницы и Отца́ зерца́ла, седмочи́сленницы сла́внии,/ Боже́ственною ра́достию ны́не со А́нгелы весели́теся,/ Вы́шнему Престо́лу предстоя́ще.

Отцы́ седмочи́сленнии,/ Мефо́дие и Кири́лле, Кли́менте и Нау́ме, Са́вво, Гора́зде и Ангела́рие,/ непреста́нно о нас моли́теся ко Го́споду/ да́ти нам мно́гих согреше́ний проще́ние/ и Ца́рствия Го́рняго насле́дие.

Богоро́дичен: Ю́нице Чи́стая, Ма́ти Бо́жия,/ разреши́ ны от уз страсте́й, утоли́ грехо́в смуще́ние, отжени́ собла́зны лука́ваго,/ покори́ благочести́вым порожде́ния нечести́вая моли́твами Твои́ми.

Свети́лен.

Подо́бен: Жены́, услы́шите:

Седмочи́сленники днесь и пропове́дники ве́ры/ восхва́лим вси усе́рдно, Боже́ственныя равноапо́столы:/ Мефо́дия и Кири́лла, Кли́мента и Нау́ма,/ Са́вву, Гора́зда и Ангела́рия,/ бо́лгарския па́стыри и далма́тския свети́льники.

Сла́ва, и ны́не, Богоро́дичен,

глас и подо́бен то́йже:

Мари́е Честне́йшая, злата́я кади́льнице,/ Невмести́маго Божества́ прия́телище бы́вшая,/ в Не́йже Оте́ц благоволи́, Сын же всели́ся/ и Дух Святы́й, осени́в Тя, Отрокови́це, показа́ Богоро́дицу.

На хвали́тех стихи́ры, глас 8.

Подо́бен: О, пресла́внаго чудесе́:

О, пресла́внаго чудесе́!/ Седмочи́сленником Бог источи́в во́ды Свята́го Ду́ха,/ прему́дрости Своея́ испо́лни/ и бо́лгаром сих посла́ пропове́дники сло́ва и свяще́нники./ О, неизрече́ннаго Твоего́ промышле́ния, Влады́ко,/ и́мже, Христе́, спаси́ ду́ши на́ша,/ я́ко Еди́н Благоутро́бен.

О, пресла́внаго чудесе́!/ На седмочи́сленницех Бог, я́ко на седми́ столпе́х,/ водрузи́ Це́рковь неукроще́нных болга́р/ Писа́ний пропове́данием и писме́н слове́нских изобре́тением./ О, вели́ких Твои́х суде́б, Влады́ко,/ и́миже, Христе́, спаси́ ду́ши на́ша,/ я́ко Еди́н Благоутро́бен.

О, пресла́внаго чудесе́!/ Седмочи́сленником Бог дарова́в де́йство чуде́с сла́вное,/ от муче́ний изба́ви бесну́ющихся,/ и от не́мощи лю́тыя стра́ждущих,/ и всех же от скве́рны грехо́в./ О, вели́ких Твои́х чуде́с, Влады́ко,/ и́миже, Христе́, спаси́ ду́ши на́ша,/ я́ко Еди́н Благоутро́бен.

Сла́ва, глас 4:

Преподо́бнии седмочи́сленницы,/ учи́тельство апо́столов восприи́мше/ и доброде́тельным житие́м прия́телища Свята́го Ду́ха бы́вше,/ догма́ты Це́ркве Правосла́вныя до́бре изъясни́сте/ и благочести́вую ве́ру в бо́лгарех кре́пце утверди́сте./ Ны́не же на Небесе́х с невеще́ственными ли́ки/ Вы́шнему Престо́лу Святы́я Тро́ицы предстоя́ще/ и хвале́бную песнь непреста́нно пою́ще,/ моли́теся Спа́су и Го́споду/ умири́ти мир и спасти́ ду́ши на́ша.

И ны́не, Богоро́дичен, глас то́йже:

От всех бед рабы́ Твоя́ сохраня́й,/ Благослове́нная Богоро́дице,/ да Тя сла́вим,/ наде́жду душ на́ших.

Славосло́вие вели́кое. И отпу́ст.

НА ЛИТУРГИ́И

Блаже́нны от кано́на святы́х, пе́сни 3-я и 6-я. Проки́мен, глас 1: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Услы́шите сия́, вси язы́цы, внуши́те вси, живу́щии по вселе́нней. Апо́стол ко Евре́ем, зача́ло 318. Аллилу́ия, глас 2: Уста́ пра́веднаго поуча́тся прему́дрости,/ и язы́к его́ возглаго́лет суд. Ева́нгелие от Иоа́нна, зача́ло 36. Прича́стен: Ра́дуйтеся, пра́веднии, о Го́споде: