Служба в честь святых преподобномучеников Феодора и Василия, в Ближних пещерах почивающих

НА ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры преподо́бному Фео́дору, глас 6.

Подо́бен: Все отло́жше:

Все собра́л еси́ тле́нное сокро́вище,/ и, Христо́ву после́дуя рече́нию,/ о́тче наш Фео́доре блаже́ннейший,/ разда́л еси́ то тре́бующим,/ и сих рука́ми внесл еси́ на ме́сто некра́домо,/ отню́дуже све́том благода́ти обогати́вся,/ просия́л еси́ в ми́ре, а́ки со́лнце;/ и ны́не предстоя́ со дерзнове́нием Влады́це,/ све́тлых твои́х дарова́ний луча́ми просвети́ пою́щия па́мять твою́.

Жела́я у́мное восприя́ти бога́тство,/ о чу́вственней не ради́л еси́,/ е́же преда́в в ру́ки ни́щих,/ сам изво́лил еси́ в нищете́ обнища́вшему нас ра́ди Христу́ после́довати,/ и, Того́ крест на ра́мо восприе́мь,/ те́сный путь проше́л еси́,/ и по кончи́не блаже́нней простра́нная места́ насле́довал еси́,/ иде́же со А́нгелы водворя́яся,/ моли́ о восхваля́ющих тя, Фео́доре преблаже́нне.

Вся оста́вль кра́сная сего́ ми́ра,/ и́ноческий о́браз восприе́мь ра́достно/ и в нем до́бре подвиза́вся,/ в те́мную всели́лся еси́ пеще́ру,/ иде́же мно́гим воздержа́нием и труды́ плоть свою ду́хови покори́л еси́/ и, уязви́в уязвля́ющаго тя супоста́та,/ прогна́л еси́ того́ кре́стным ору́жием./ И ны́не во све́те живы́й непристу́пнем,/ помяни́ и нас, пра́зднующих честно́е твое́ преставле́ние.

И́ны стихи́ры преподо́бному Васи́лию, глас 4.

Подо́бен: Дал еси́ зна́мение:

Зако́н, и́же в писании, исполня́я,/ преподо́бне Васи́лие,/ стяжа́в любо́вь к Бо́гу,/ возлюби́л еси́ и бли́жняго, я́ко сам себе́,/ и того́ утверди́л еси́, блаже́нне,/ не поколеба́тися от неви́димаго врага́,/ на́ньже дарова́ тебе́ кре́пость Иису́с Человеколю́бец/ и Спас душ на́ших.

Имы́й во усте́х, преблаже́нне,/ со́лию благода́ти сло́во растворе́нно,/ согни́вшееся сребролю́бием се́рдце утверди́л еси́ в добростоя́ние па́ки,/ кры́ющагося же зми́я яви́л еси́ ко́зни/ и прогна́л того́ дале́че о И́мени Христо́ве,/ Его́же устраша́ются проти́вныя си́лы.

Тве́рдый любве́ сою́зом связа́вшеся, преблаже́ннии отцы́,/ обрето́стеся еще́ в жи́зни сей а́ки град тверд,/ его́же не возмого́ша ле́стнии подкопа́ти лю́таго велиа́ра служи́телие/ и, претво́ршеся в бе́гство, я́звеннии падо́ша,/ вы же воспе́сте во хвале́нии:/ си́ла на́ша и кре́пость Иису́с Человеколю́бец/ и Спас душ на́ших.

Сла́ва, глас 6:

Треблаже́ннии отцы́,/ до́блии ору́жницы Христо́вы,/ вы глаго́лом непреста́нныя моли́твы,/ восприе́мше щит несумне́нныя ве́ры,/ упова́нием же на Бо́га препоя́савшеся,/ побе́дили есте́ де́монския полки́/ и, в кро́ви муче́ний ва́ших ри́зы испра́вше14,/ внидо́сте в Черто́г Небе́сный,/ отню́дуже и нас не забу́дите,/ но уще́дрите ны,/ прося́ще нам у Христа́ Бо́га ми́ра и ве́лия ми́лости.

И ны́не, пра́здника.

Вход. Проки́мен дне. И чте́ния 3 преподо́бническая.

Прему́дрости Соломо́ни чте́ние (главы́ 5 и 6):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я́ и мы́шцею защити́т их./ Прии́мет всеору́жие – рве́ние свое́/ и вооружи́т тварь в месть враго́м./ Облече́тся в броня́ пра́вды и возложи́т шлем – суд нелицеме́рен./ Прии́мет щит непобеди́мый – преподо́бие./ Поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка, облако́в на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я́ на́гло./ Сопроти́в ста́нет им дух си́лы и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́ни чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние, они же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют,/ и, я́ко и́скры по сте́блию, потеку́т./ Су́дят язы́ком и облада́ют людьми́, и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шник преста́влен бысть,/ восхище́н бысть, да не зло́ба измени́т ра́зума его́/ или лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На стихо́вне стихи́ры, глас 2.

Подо́бен: Егда́ от Дре́ва:

Егда́ благода́ть Ду́ха Пресвята́го/ огне́м те́плыя любве́ к Бо́гу/ распали́ твое́ се́рдце, преподо́бне,/ тогда́, вся презре́в кра́сная ми́ра сего́/ и Влады́чним стопа́м после́дуя,/ те́сный в жи́зни сей изво́лил еси́ путь ше́ствовати,/ крест Христо́в на ра́му нося́,/ и долготерпе́нием вшел еси́ в простра́нная места́,/ отню́дуже и нас не забу́ди,/ ве́рою блажа́щих твою́ честну́ю па́мять, Васи́лие.

Стих: Восхваля́тся преподо́бнии во сла́ве/ и возра́дуются на ло́жах свои́х.

Бе́гая молвы́ и мяте́жа,/ пленя́ющаго ум челове́ческий в напа́сти,/ вся отве́рг, преблаже́нне,/ на безмо́лвное отше́л еси́ ме́сто,/ в те́мную всели́вся пеще́ру,/ и ту сотвори́л еси́ а́ки рай не́кий прекра́сен,/ мно́гими же труды́ в ней пожи́в,/ неви́димыя враги́ одоле́л еси́/ и А́нгелом собесе́дник показа́лся еси́./ И ны́не с ни́ми Влады́це Христу́ предстоя́,/ моли́ и о нас, свя́те Фео́доре,/ да изба́вимся от вся́кия молвы́ и напа́сти.

Стих: Честна́ пред Го́сподем/ сме́рть преподо́бных Его́.

Ле́ствицу ви́дяще, отцы́ свяще́ннейшии,/ от горы́ святы́я Пече́рския к небеси́ утвержде́нну,/ на не́йже Бо́жия Ма́ти положи́ Свое́ селе́ние,/ и а́нгельстии ли́цы со святы́ми по ней к Небеси́ восхожда́ху,/ тех стопа́м после́довали есте́, а́ки безпло́тни,/ и, возше́дше ве́дением и дея́нием,/ ны́не предстоите́ Святе́й Тро́ице,/ иде́же помяни́те и нас, покланя́ющихся моще́м ва́шим, преблаже́ннии.

Сла́ва, глас 1:

Мно́гими по́двиги просия́вше в ми́ре,/ святи́и му́ченицы, Фео́доре чу́дне с Васи́лием доблему́дрым,/ преиспещре́нною ри́зою оде́ястеся/ и живете́ ны́не во све́те присносу́щнем,/ отню́дуже прини́кше на земна́я,/ све́тлых дарова́ний ва́ших луча́ми/ нас, во тьме жития́ сего́ бе́дствующих, просвети́те/ и испроси́те от Христа́ Бо́га ве́лию ми́лость.

И ны́не, пра́здника.

Тропа́рь, глас 1:

Сою́зом любве́ связа́вшеся, преподо́бнии,/ всяк сою́з ко́зней вра́жиих попра́сте,/ страда́ние же и сме́рть непови́нне/ от сребролюби́ваго кня́зя претерпе́сте до́бле,/ тем мо́лим вас, вку́пе пожи́вших/ и венцы́ муче́ния прие́мших,/ моли́теся Го́сподеви о нас,/ я́ко да во мно́зей любви́, ве́ре и наде́жди до́бре пожи́вше,/ всегда́ ублажа́ем вас,/ Фео́доре и Васи́лие добропобе́днии.

Сла́ва, и ны́не, пра́здника.

НА У́ТРЕНИ

На Бог Госпо́дь: тропа́рь пра́здника два́жды. Сла́ва, преподо́бным. И ны́не, пра́здника.

По 1-м стихосло́вии седа́лен, глас 1.

Подо́бен: Гроб Твой, Спа́се:

До́брую дво́ицу преблаже́нных оте́ц, прииди́те, лю́дие, пе́сньми почти́м:/ си́и бо, мно́го искуше́ни бы́вше, чисте́е зла́та яви́шася в ми́ре/ и ны́не, Престо́лу Влады́чню предстоя́ще,/ во мно́гих напа́стех бе́дствующим посо́бствуют,/ да прии́мут от всех искуше́ний свобожде́ние.

Сла́ва, и ны́не, пра́здника или́ Богоро́дичен:

Ми́ру всему́ Ско́рая Помо́щнице и обурева́емым ти́хое приста́нище,/ нас, вла́ющихся самохо́тных страсте́й волна́ми,/ приведи́ в тишину́ ско́рую бла́гости Твоея́/ и изба́ви от бед пою́щих Ти:/ ра́дуйся, всех ра́досте и спасе́ние.

По 2-м стихосло́вии седа́лен, глас 4.

Подо́бен: Яви́лся еси́:

Мно́гими по́ты потруди́вшеся и муче́ние непови́нне прие́мше, отцы́ богому́дрии,/ прейдо́сте на ме́сто упокое́ния,/ иде́же со А́нгелы лику́юще, моли́те Всеще́драго Влады́ку/ прия́ти и нам отра́ду, от враго́в стра́ждущим:/ мы бо есмы́ ча́да ва́ша и о́вцы слове́сныя уче́ний ва́ших.

Сла́ва, и ны́не, пра́здника или́ Богоро́дичен:

Яви́ся нам в час сей, Пречи́стая Де́во,/ и, приноси́мыя Тебе́ мольбы́ прие́мши, донеси́ Сы́ну Твоему́,/ Его́же носи́ла еси́ на ру́ку ма́терню,/ прося́щи нам грехо́в разреше́ния;/ мы бо есмы́ раби́ Твои́,/ иму́щии Тя Ско́рую Предста́тельницу и Моли́твенницу о душа́х на́ших.

По полиеле́и седа́лен, глас 8:

Вертогра́д заключе́нный Бо́жия Ма́тере/ израсти́ нам два цветца́ неувяда́емыя, Фео́дора и Васи́лия, до́блия му́ченики,/ и́миже и́ночествующии ра́дости исполня́ются и чу́дная оби́тель облагоуха́ется;/ сих лю́дие хвала́ми почита́ют, прие́млюще от моще́й их исцеле́ние/ и иму́ще их к Бо́гу те́плыя моли́твенники.

Сла́ва, и ны́не, пра́здника или́ Богоро́дичен:

Те́плая Предста́тельнице су́щим в скорбе́х и гре́шником Спору́чнице, Чи́стая Де́во,/ не пре́зри слез и воздыха́ния на́шего,/ но преклони́ся на человеколю́бную Твою́ бла́гость/ и спаси́ рабы́ Твоя́ от всех прило́гов бесо́вских и обстоя́ний.

Степенна 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 38.

По 50-м псалме́ стихи́ра, глас 6: Треблаже́ннии отцы́: (зри Сла́вник на Го́споди, воззва́х)

Кано́н преподо́бным, глас 2.

Песнь 1

Ирмо́с: Нетре́ну, необы́чну,/ немо́кренно морску́ю ше́ствовав стезю́,/ избра́нный вопия́ше Изра́иль:/ Го́сподеви пои́м, я́ко просла́вися.

Нетре́н хотя́й по́стничества путь ше́ствовати,/ Фео́дор сла́вный, ева́нгельски ми́ра сего́ суе́тий отре́кся и бога́тство разда́в ни́щим,/ еди́н би́сер, Христа́, стяжа́, Ему́же и пое́т:/ я́ко просла́вися.

Ви́дя, блаже́нне, я́ко мир во зле лежи́т,/ не восхоте́л еси́ на тле́ние сего́ взира́ти,/ тем всели́лся еси́ в пеще́ру,/ мно́га ле́та пребы́в, воздержа́нию прилежа́ и трудо́м, на Еди́наго взира́я Бо́га.

Зави́дя, враг вселука́вый раска́янием разда́нных име́ний/ вве́рже тя, преподо́бне, во отча́яние, на мно́ги дни помрача́я,/ но ты испове́данием па́ки испра́вился еси́/ и посрами́л еси́ хотя́щаго тя посрами́ти.

Я́ко соверше́н и́нок, соверше́нное нестяжа́ние имы́й,/ увеща́л еси́ Фео́дора, преподо́бне Васи́лие,/ не раскаева́тися, я́ко прехо́дит ми́ра сего́ о́браз,/ но на Небе́сная взира́ти, я́ко та пребыва́ют во ве́ки.

Богоро́дичен: От влеку́щаго мя к тле́нию руки́ исхи́ти, Влады́чице,/ к нетле́нным же взира́ти устро́й/ и напра́ви живо́т наш, я́ко Ско́рая Помо́щница и исправле́ние челове́ком.

Песнь 3

Ирмо́с: Лук сокруши́ся си́льных/ держа́вою Твое́ю, Христе́,/ и си́лою немощству́ющии препоя́сашася.

Лук сокруши́ся велиа́ра, напряже́нный на тя, о́тче,/ ты бо, прие́мь я́ко меч, глаго́лал еси́ Иису́совы моли́твы, пресе́кл еси́ того́;/ и и́же пе́рвее неду́говав, сребролю́бием омра́чаемь,/ последи́, препоя́сався Боже́ственною си́лою, был еси́ врагу́ в я́зву.

Услы́шал еси́, преподо́бне, я́ко погуби́ зла́то и живо́т,/ раска́явыйся иногда́ о разда́нней ми́лостыне,/ пла́кал еси́ го́рько и, тем от сребролю́бнаго неду́га избы́в, возопи́л еси:/ прославля́ю, Бла́же, непостижи́мую Твою́ ми́лость.

А́ки единоутро́бнии, возлю́бльшеся с собо́ю, Васи́лие и Фео́доре,/ ненави́дящаго добра́ преуспе́янием в за́поведех Госпо́дних посрами́ли есте́ велиа́ра./ И мене́ ко преуспева́нию тех утверди́те,/ да вку́пе прославля́ю с ва́ми непостижи́мую Бо́жию ми́лость.

Отше́дшу тебе́ на послуша́ние, преподо́бне Васи́лие,/ обре́т враг вре́мя и преобрази́вся в твой о́браз,/ вообрази́ Фео́дору па́ки любле́ние разда́нных и́мений,/ я́ко не помяну́ Иису́совы моли́твы в бесе́де неполе́зней.

Мня́йся стоя́ти, да не паде́шися, всяк блюди́ся,/ я́коже сбы́стся на Фео́доре блаже́ннем:/ той бо, мня́йся прогна́вый супоста́та, прия́ его́ па́ки,/ и бы́ли бы́ша ему́ после́дняя го́рша пе́рвых,/ а́ще не бы от сих спасла́ его́ непостижи́мая Бо́жия бла́гость.

Богоро́дичен: Нечу́вствен сый, возмни́хся в доброде́телех стоя́ти, неве́дый, я́ко падо́хся,/ но Ты, Ско́рая Помо́щнице, возведи́ мя, Чи́стая Де́во,/ и научи́ мя усе́рдно Бо́жия за́поведи твори́ти,/ да прославля́ю Твою́, Ма́ти Бо́жия, несказа́нную ми́лость.

Седа́лен, глас 8:

От зло́бы нача́льника врага́ уязви́лся еси́, о́тче,/ изли́шнее с тем бесе́довав о непо́лезных,/ не помина́я сего́, я́ко тлят бесе́ды злы обы́чаи благи́я,/ но сие́ все бысть Бо́гом попуща́емо,/ да искуше́ние твое́ яви́тся чисте́е зла́та и бо́льший вене́ц тебе́ исхода́тайствует,/ его́же и прие́м последи́, моли́ся Христу́ Бо́гу и нам того́жде не лиши́тися,/ чту́щим любо́вию святу́ю па́мять твою́.

Сла́ва, и ны́не, пра́здника или́ Богоро́дичен:

Стре́лы лука́ваго, плотски́м раздеже́нием15 напое́нны, уязви́ша мое́ се́рдце,/ и лежу́ мертв, живота́ отча́явся,/ пла́стырь цельбы́ Твоея́ приложи́ ми, Чи́стая Де́во,/ я́ко Целе́бница всего́ христиа́нскаго рода.

Песнь 4

Ирмо́с: Услы́шах, Го́споди,/ сла́вное Твое́ смотре́ние/ и просла́вих, Человеколю́бче,/ непости́жимую Твою́ си́лу.

Услы́шав всегуби́тель, я́ко в бесе́де не помина́еши И́мене Го́спода Иису́са, Фео́доре,/ прия́т де́рзость и сове́тует проси́ти у Бо́га,/ е́же пода́тися тебе́ мно́жеству зла́та и сребра́,/ разда́ннаго ра́ди твоего́ бога́тства,/ ты же не помяну́л еси́, я́ко хотя́щии богати́тися впада́ют в напа́сть и в зло неисцели́мо.

Вся бе́сом сове́туемая прие́мь, преподо́бне,/ ви́дел еси́ бе́са во сне, а́ки а́нгела во све́тлости вели́цей,/ показу́ющаго тебе́ в пеще́ре сокро́вище,/ е́же, прокопа́в мало, обре́т, вма́ле не погуби́л еси́ многоце́ннаго би́сера, Христа́,/ Его́же благода́тию, пады́й, па́ки испра́вился еси́.

Ко́рень сребролю́бия в тебе́ хотя́ прорасти́ти в ве́тви,/ диа́вол вта́йне наноси́мыми помышле́нии и я́ве явле́нием во о́бразе Васи́лия/ сове́тует со обре́тенным зла́том в чу́ждую страну́ бежа́ти/ и притяжа́ти себе́ се́ла на потре́бу,/ да та́ко, удали́вся, преподо́бне, ме́ста сего́ свята́го,/ отпаде́ши и Бо́жия благода́ти.

Живота́ продолже́нием и ста́рости на́шествием враг устраша́я,/ к любоиме́нию привлека́ет тя, Фео́доре,/ хотя́ отъя́ти тебе́ па́мять, да не помина́еши Ре́кшаго:/ не пецы́теся о у́трии, Бог бо пече́тся о вас.

Богоро́дичен: Отъя́т лука́вый мне па́мять, да не помина́ю Ре́кшаго:/ не пецы́теся душе́ю вашею;/ и та́ко в душегу́бную веде́т мя страну́,/ да та́мо, Бо́жия благода́ти обнища́в, сконча́юся./ Но, Чи́стая Де́во, не попусти́ ми в коне́чную сию́ па́сти поги́бель.

Песнь 5

Ирмо́с: Угль Иса́ии проявле́йся,/ Со́лнце из де́вственныя утро́бы/ возсия́ во тьме заблу́ждшим,/ Богоразу́мия просвеще́ние да́руя.

Угль еще́ име́яй, блаже́нне, опаля́ющий со́весть твою́ студо́м, отвеща́л еси́ бе́су:/ обеща́хся зде в пеще́ре живо́т мой сконча́ти,/ ка́ко у́бо ны́не бегле́ц бу́ду?/ Но зде поживу́ и вся сотворю́ повеле́нная тобо́ю.

Па́ки супоста́т предлага́ет,/ я́ко уве́дано бу́дет обре́тенное сокро́вище, и прети́т отъя́тием о́наго,/ с ни́мже сове́тует от ме́ста сего́ бежа́ти,/ его́же послу́шав сове́та, приуготовля́лся еси́ к бежа́нию,/ а́ще не бы́ша удержа́ли тя, Фео́доре, преподо́бных оте́ц моли́твы,/ па́че же Са́мыя Богома́тере десни́ца.

И́стиннаго послу́шателя и име́ний нестяжа́теля,/ блаже́ннаго Васи́лия, отгна́л еси́, Фео́доре,/ я́ко облича́вша тя, пре́лестию бесо́вскою ослепле́нна,/ той же, отгоня́емь, не пререка́ше, па́че же моля́ше Бо́га,/ да тя изба́вит от сатани́нских ловле́ний.

При мно́гих свиде́телех да оправди́шися, Васи́лие,/ прише́л еси́ с бра́тиею ко прельще́нному, того́ уверя́я,/ я́ко не с тобо́ю, но с бе́сом, во о́бразе твое́м вчера́ и пре́жде того́ бы́вшим/ и ко́зни своя́ распростира́ющим, он бесе́дова.

Богоро́дичен: Враг многоко́зненный, хотя́ мя запя́ти,/ во многоли́чныя претворя́ется о́бразы и де́йствует в мы́сли мое́й,/ да удалю́ся Твоего́, Ма́ти Пречи́стая, покро́ва;/ но Ты, Влады́чице, не попусти́ на мя такова́го искуше́ния.

Песнь 6

Ирмо́с: Глас глаго́л моле́бных/ от боле́зненныя, Влады́ко, души́ услы́шав,/ от лю́тых мя изба́ви:/ еди́н бо еси́ на́шего спасе́ния вино́вен.

Глас глаго́лов Иису́совы моли́твы я́ко услы́ша льсти́вый,/ не дерзну́ к тебе́, Фео́доре, приступи́ти,/ но, пораже́н, бе́гаше от твоея́ пеще́ры,/ ты же, о си́ле тоя́ моли́твы укрепи́вся,/ и вся́кому, к тебе́ приходя́щему, не отверза́л еси́ двере́й,/ до́ндеже испове́сть, я́ко Госпо́дь Иису́с Христо́с на́шему спасе́нию вино́вен.

От толи́каго ро́ва поги́бели изба́влен сый, Фео́доре,/ ископа́л еси́ ров глубо́к и поги́бельное сокро́вище в он вве́ргл еси́,/ присыпа́я и любоиме́ния па́мять, глаго́ля в себе́:/ несть и́но что та́ко и́ноком, я́ко любоиме́ние, душевре́дно.

Мно́гими труды́ томя́ себе́, Фео́доре,/ да не, пра́зден сый, впаде́ши в безстра́шие и ле́ность,/ поста́вил еси́ же́рновы,/ и, меля́ на бра́тию жи́то, во усте́х име́л еси́ непреста́нно Иису́сову моли́тву,/ и та́ко на неви́димаго врага́ укрепи́лся еси́.

Хотя́ супоста́т устраши́ти тя, блаже́нне,/ сотвори́ глас, а́ки гро́ма, и ме́ляше в же́рновы,/ но ты, разуме́в того́ де́йство, запрети́л еси́ тому́,/ и бысть, а́ки пле́нник, повину́яся и меля́,/ до́ндеже пять возо́в изме́ле жи́та в нощь еди́ну.

Богоро́дичен: В ле́ности мя су́ща всегда́ враг пленя́ет/ и поуча́ет мя на непотре́бная дела́,/ но Ты, Мари́е, Ма́ти Бо́га моего́, прожени́ того́,/ мене́ же научи́ порабо́тити плоть ду́ху/ и послужи́ти Бо́гу моему́ в преподо́бии и правде.

Конда́к, глас 2:

Добр сове́тник я́влься блаже́нному Фео́дору, Богому́дре Васи́лие,/ изба́вил еси́ того́ сове́том свои́м от пре́лести диа́воли/ и ко све́ту богоразу́мия наста́вль./ С те́мже по́слежде блаже́нную прия́л еси́ кончи́ну,/ устреле́н непра́ведно быв во утро́бу от сребролюби́ваго кня́зя./ И ны́не, предстоя́ Го́сподеви,/ моли́ся непреста́нно о всех нас.

И́кос:

Премно́жеством доброде́телей ва́ших, преподо́бнии,/ я́ко сад кра́сный, испо́лнь су́ще/ и, я́ко от рая́, процвели́ есте́ поще́нием и моли́твами,/ всех благоуха́юще от вони́ мно́гих ва́ших трудо́в, и по́двигов, и по́тов преподо́бнических,/ в ни́хже преидо́сте благоиску́сно к безско́рбному животу́/ и венце́м побе́дным увязо́стеся;/ моли́те непреста́нно о всех нас.

Песнь 7

Ирмо́с: Вети́и яви́шася о́троцы любому́дрейшии дре́вле,/ от богоприя́тныя бо души́, богосло́вяще устна́ми, поя́ху:/ Пребоже́ственный отце́в и наш Бо́же,/ благослове́н еси́.

Вети́йствовати, блаже́ннии отцы́, хотя́ще,/ о мы́слех открыва́ху друг дру́гу и разсужда́ху о́ба, а́ще богоуго́дны мы́сли их бы́ша./ Сих, бра́тие, подража́юще,/ разсужде́нием бра́тним мы́сли своя́ искуша́йте, ки́я суть от Бо́га.

По́двигом и трудо́м преподо́бнаго Фео́дора ревную́ще,/ не дади́м труда́ на́шего и́ным,/ но я́коже той сам на ке́ллию свою дрова́ ноша́ше,/ та́ко и мы потруди́мся на нас,/ а́ще хо́щем, да враг нам празднолю́бием не стужа́ет.

Ненави́дяще, бе́си блаже́нному па́кости творя́ху,/ ели́ко бо той со мно́гим трудо́м древа́ на го́ру ноша́ше,/ толи́ко они́ па́ки с горы́ низверга́ху,/ но, труд заде́юще ста́рцу, са́ми подъя́ша труды́ и томле́ние.

Вервь треплете́нна есть непреста́нная моли́тва от чи́ста се́рдца,/ е́юже Фео́дор блаже́нный связа́ зло́бныя ду́хи,/ и бы́ша ему́, а́ки пле́нницы, повину́ющеся/ и нося́ще древа́ на созида́ние ве́тхаго монастыря́, и́же сгоре́ пре́жде.

Мно́гими труды́ лука́вии ду́си томи́ми и безче́ствуеми,/ вопия́ху на блаже́нных, хва́лящеся и глаго́люще:/ лю́тии нам супоста́ти, Фео́дор и Васи́лий,/ с ни́миже не преста́нем бра́тися, до́ндеже предади́м я сме́рти,/ не ве́дуще, я́ко сим честне́йшему венцу́ вино́вни бу́дут.

Богоро́дичен: Тобо́ю, Влады́чице, укрепля́ема ви́дяще мя, бе́сове скреже́щут зубы/ и хва́лятся непреста́нно бра́тися со мною, до́ндеже одоле́ют./ Но Ты, Засту́пнице моя́, не преда́ждь мя в их ру́ки,/ но изми́ мя от тех наве́тов.

Песнь 8

Ирмо́с: О подо́бии зла́те небре́гше, треблаже́ннии ю́ноши,/ неизме́нный и живы́й Бо́жий о́браз ви́девше,/ среди́ огня́ воспева́ху:/ осуществова́нная да пое́т Го́спода вся тварь/ и превозно́сит во вся ве́ки.

Подо́бием вся́каго злохи́трства своего́ нача́ша бе́сове поощря́ти злы́я челове́ки,/ да бы́ша погуби́ли тя, Фео́доре,/ те́мже ная́тии изво́зницы со мно́гою укори́зною к судии́ оклевета́ша тя, свя́те;/ но ты, о сем не радя́, взыва́л еси́:/ да пое́т Го́спода вся тварь и превозно́сит Его́ во ве́ки.

В подо́бии блаже́ннаго Васи́лия прии́де бес па́ки к не́коему боля́рину безчелове́чну,/ оклевета́я Фео́дора за обре́тенное сокро́вище,/ с ни́мже, рече́, хо́щет на и́ну страну́ бежа́ти;/ злочести́вый же он не ве́дяше,/ я́ко святи́и еди́но сокро́вище и́мут, Христа́,/ Его́же превозно́сят хвала́ми во ве́ки.

В подо́бии Васи́лия злочести́вый боля́рин приведе́ ко кня́зю бе́са,/ и́же и тому́ солга́ о сокро́вищи на тя, свя́те,/ и сове́товаше, да и́мут и мно́гими му́ками да истя́жут от Тебе́ зла́то;/ но ты, блаже́нне, ничто́же боя́ся, кре́пко вооружи́лся еси́ на супоста́та,/ удали́вшагося от Го́спода во ве́ки.

Во у́трие князь, а́ки на лов или́ на не́коего во́ина кре́пкаго сам иды́й,/ улови́ тя, блаже́нне, и, приве́д в дом, пе́рвее ласка́нии истя́зоваше сокро́вища от Тебе́,/ ему́же отвеща́л еси́, свя́те:/ обрето́х сокро́вище и ви́дех мно́жество сосу́дов златы́х,/ я́же па́ки закопа́х, я́ко ми неполе́зно,/ и моли́х Го́спода, да забу́ду о́но во ве́ки.

Богоро́дичен: Закопа́х вве́ренный мне тала́нт, я́ко раб лени́вый,/ и ника́коже па́мятствую, я́ко и́мам о приобре́тении о́наго отве́т да́ти моему́ Влады́це./ Тем молю́ Тя, Всечи́стая Пресвята́я Де́во,/ помози́ ми тала́нт сотвори́ти сугу́бый,/ я́ко да обря́щу Го́спода моего́ ми́лостива во ве́ки.

Песнь 9

Ирмо́с: Весь еси́ жела́ние, весь сла́дость,/ Сло́ве Бо́жий, Де́вы Сы́не,/ Бо́же бого́в, Го́споди, святы́х Пресвяты́й,/ тем Тя вси с Ро́ждшею велича́ем.

Жела́я разреши́тися от уз плотски́х и со Христо́м бы́ти,/ свя́зан был еси́ от кня́зя непови́нне;/ и, му́чим кре́пко, му́чащаго врага́ уму́чил еси́, Фео́доре блаже́ннейший.

От пло́ти Твоея́ струя́ми кровь теча́ше и обагри́ власяни́цу,/ в ню́же, а́ки во многоце́нную порфи́ру, оде́ян, в Небе́сный Черто́г вшел еси́,/ иде́же с Ро́ждшею Бо́га в Тро́ице велича́еши.

Пове́шен и ды́мом удавля́емь,/ та́же огне́м зело́ опаля́емь был еси́, блаже́нне,/ но Бо́жия десни́ца сохрани́ тя це́ла,/ я́ко ниже́ власяни́це твое́й огнь прикосну́ся,/ и, а́ки в прохла́дне ме́сте, во пла́мени стоя́, Христа́ с Ро́ждшею прославля́л еси́.

Пре́лести бесо́встей ве́ровав князь,/ дерзну́ я́ти тя, ца́рствующего над страстьми́, Васи́лие,/ и по́слуха хотя́ име́ти на Фео́дора, вопроша́ше о сокрове́ннем зла́те;/ ты же несумне́нно того́ и предстоя́щих обличи́л еси́,/ я́ко бе́сом прельще́нных.

Шу́мен сый от вина́, не стерпе́в обличе́ния твоего́,/ князь безу́мный стрело́ю уязви́ тя от лу́ка;/ ты же, блаже́нне, проро́чествовал еси́ ему́, глаго́ля,/ я́ко и сам то́южде стрело́ю я́звен бу́дет,/ и сбы́стся глаго́л твой, блаже́нне, вскоре.

Богоро́дичен: Возшуме́ша врази́ на́ши, Госпоже́, и обыдо́ша о́крест,/ пуща́юще грехолю́бныя на ны стре́лы./ Но Ты, Влады́чице, град су́щи тве́рд, стена́ необори́ма и щит кре́пкий,/ защити́ и сохрани́ с Сы́ном Тя велича́ющих.

Свети́лен:

В темни́цу вве́ржени, отцы́ блаже́ннии,/ по мно́гих му́ках изведе́ ду́ши ва́ша Госпо́дь от уз плотски́х/ и введе́ во свет присносу́щный испове́датися И́мени Его́ свято́му,/ иде́же со а́нгельскими ликостоя́нии веселя́щеся,/ помяни́те и нас, ле́тнюю па́мять ва́шу почита́ющих.

Сла́ва, и ны́не, пра́здника или́ Богоро́дичен:

Уловле́н сый грехолю́бными сетьми́ от супоста́та/ и в темни́цу со́вестнаго ослепле́ния вве́ржен,/ не ви́жду со́лнца за́поведей Го́спода моего́,/ но к Тебе́, Чи́стая, вопи́ю:/ возсия́й ми покая́ния со́лнце и согре́й луча́ми бла́гости Твоея́ оледене́вшее се́рдце,/ да сла́влю вы́ну Твою́ ско́рую по́мощь.

На хвали́тех стихи́ры, самогла́сны, глас 1:

Кто по достоя́нию восхвали́ти возмо́жет труды́ и по́двиги ва́ша,/ отцы́ достоблаже́ннии,/ в теле́сных бо соста́вех а́ки безпло́тнии пожи́сте/ и, к Бо́гу у́мы ва́ша впери́вше,/ на Небеса́ возлете́сте,/ и, ны́не Престо́лу Вы́шняго предстоя́ще,/ приле́жно моли́теся/ умири́ти мир и спасти́ ду́ши на́ша.

Кто не удиви́тся терпе́нию ва́шему, святи́и,/ я́ко, непови́нне враго́м оклевета́нни,/ от сребролюби́ваго кня́зя мно́гая томле́ния подъя́сте,/ и, до конца́ претерпе́вше,/ борю́щагося с вами неви́димо побе́дили есте́,/ и прия́сте вене́ц побе́дныя по́чести от руки́ Госпо́дни,/ от Нея́же и мы сию́ да восприи́мем, моли́теся.

Блаже́нна земля́, напи́вшаяся кро́ви ва́шея,/ до́блии испове́дницы Христо́вы,/ блаже́нна пеще́ра,/ храня́щая мо́щи ва́ша,/ я́ко многоце́нное сокро́вище,/ не под спу́дом, но я́ве лежа́щия во гро́бе,/ в не́мже су́ще те́лом,/ душа́ми предстоите́ со а́нгельскими ли́ки/ и на земли́ прого́ните ду́хи лука́выя,/ от ни́хже и нас сохрани́те/ и моли́теся Христу́ Бо́гу спасти́ся душа́м на́шим.

Сла́ва, глас 3:

Прииди́те, восхва́лим, бра́тие, достоблаже́нныя отцы́ на́ша,/ Васи́лия с Фео́дором чу́дным,/ си́и бо, пе́рвее вся́каго пристра́стия отре́кшеся/ и в безстра́стие тща́щеся дости́гнути,/ о жи́зни сей неради́ша,/ и сме́рть изво́лиша ра́ди Го́спода своего́ подъя́ти от сребролюби́ваго кня́зя,/ и, победи́телие яви́вшеся,/ ра́тника и супоста́та врага́ победи́ша,/ и ны́не сла́вою и че́стию венча́ются от Вы́шняго Влады́ки,/ Его́же и мо́лят непреста́нно/ дарова́ти мир ми́рови и душа́м на́шим ве́лию ми́лость.

И ны́не, пра́здника или́ Богоро́дичен:

Наде́ждо ми́ру, Благослове́нная Де́во,/ не забу́ди нас, пою́щих Тя,/ но моли́ся вы́ну за непотре́бныя рабы́ Своя́,/ изба́витися нам от вся́ких бед и обсто́ний.

Славосло́вие вели́кое. Ектении́. И отпу́ст.

На Литурги́и слу́жба о́бща преподобному́чеником.