Служба в честь святых мученик Трофима, Феофила и иже с ними

НА ВЕЧЕ́РНИ

На Го́споди, воззва́х: стихи́ры, глас 1.

Подо́бен: Всехва́льнии му́ченицы:

Вшел еси́ в суди́ще тве́рдо, му́чениче,/ страда́ния и терза́ния терпе́л еси́,/ и уязви́лся еси́, уязви́в врага́ борца́,/ и побе́ду взял еси́ на него́, Трофи́ме./ Те́мже моли́ дарова́ти душа́м на́шим/ мир и ве́лию ми́лость.

Лик му́ченик веды́й, му́дре, с собо́ю, пострада́л еси́/ и, с те́ми ра́дуяся,/ Небе́сная блага́я восприя́л еси́ досто́йно./ С ни́миже нас помина́й,/ ве́рою на земли́ восхваля́ющих тя,/ Христу́ моля́ся дарова́ти душа́м на́шим/ мир и ве́лию ми́лость.

Трофи́ма и Фео́фила, ве́рнии,/ с про́чими тремина́десяте восхва́лим му́ченики:/ честны́ми бо кровьми́ огнь пре́лести уже́ угаси́вше,/ в Вы́шнем живу́т Ца́рствии,/ при́сно прося́ще дарова́ти душа́м на́шим/ мир и ве́лию ми́лость.

Сла́ва, и ны́не, Богоро́дичен:

Увы́ мне, что́ бу́ду?/ Ум и ду́шу и те́ло оскверни́в прегреше́ньми,/ что сотворю́?/ Ка́ко же избежу́ пла́мене нестерпи́маго,/ нереши́мых уз и ве́чных?/ Но, о Всенепоро́чная!/ Пре́жде конца́ моли́ Сы́на Твоего́/ пода́ти ми оставле́ние.

Крестобогоро́дичен:

Де́ва Нескве́рная,/ иногда́ на Дре́ве ви́девши/ Его́же роди́ из безсе́менныя утро́бы,/ не терпя́щи утро́бнаго уязвле́ния,/ власы́ терза́ющи, глаго́лаше:/ ма́нием Содержа́й тварь всю,/ ка́ко, я́ко осужде́нный,/ на Крест вознесе́н еси́,/ вся́ко хотя́й спасти́ челове́чество?

Тропа́рь, глас 4:

Я́ко во́ини, му́ченицы непобеди́мии,/ тече́нием невозбра́нным в суди́лище неве́рных внидо́сте/ и ве́ры ра́ди мно́гия му́ки претерпе́сте,/ Христа́ испове́дающе Еди́наго со дерзнове́нием./ Того́ моли́те, Трофи́ме и Фео́филе с про́чими,/ я́ко да тяготу́ страсте́й отло́жше,/ ва́ше ны́не страда́ние пое́м, страстоте́рпцы непреобори́мии.

Ин тропа́рь, о́бщий, глас то́йже:

Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего:/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами/ спаси́ ду́ши на́ша.

Кано́н, творе́ние Андре́я Кри́тскаго, глас 4.

Песнь 1

Ирмо́с: Воспою́ Тебе́, Го́споди Бо́же мой,/ я́ко изве́л еси́ лю́ди из рабо́ты еги́петския,/ покры́л же еси́ колесни́цы фарао́новы и си́лу.

Воспою́ Тебе́, Го́споди Бо́же мой,/ я́ко возсия́л еси́ нам день весе́лия, лесть разоря́ющ,/ па́мять му́ченик Твои́х.

Со́лнце просия́л еси́ в ми́ре, в ве́рней я́влься, му́чениче, тве́рди,/ в не́йже облиста́л еси́ страда́нии твои́ми концы́.

Кро́вию твое́ю напои́ся, златы́ми струя́ми, воспита́вшее тя оте́чество, блаже́нне Трофи́ме,/ пи́щею неиждиву́щею, страда́нии твои́ми пита́ющеся.

Тро́ичен: Тро́ицу просла́вим правосла́вно,/ со Отце́м Сы́на и Ду́ха Свята́го,/ Еди́но Божество́, Еди́ницу Триипоста́сную.

Богоро́дичен: А́нгел весть Тебе́ с Небесе́, е́же к Бо́гу премене́ния, Де́во, принесе́/ и мир собра́ на ра́дость благове́щения.

Песнь 3

Ирмо́с: В Го́споде Бо́зе мое́м/ се́рдце мое́ утверди́ся,/ тем немощству́ющии препоя́сашася си́лою.

На суди́щи му́ченик со стра́ждущими с ним ураня́емь, ра́довашеся,/ прови́дя неизглаго́ланное мздовоздая́ние.

Исте́кшая твоя́ кровь безбо́жие попали́,/ теплоту́ Богоразу́мия всем вжег, Трофи́ме.

Я́ко со́лнце звезд, посреде́ иму́ще му́ченика, омрачи́ша лесть/ страда́льцы Твои́, Го́споди.

Тро́ичен: Триипоста́сному Естеству́, еди́наго Ца́рствия Божеству́,/ Отцу́ поклони́мся, Сы́ну и Ду́ху Свято́му.

Богоро́дичен: В ма́терех Де́ва и в де́вах Ма́ти была́ еси́,/ о́неми же и удивля́еши вся́ку мысль, Чи́стая.

Седа́лен, глас 1.

Подо́бен: Лик А́нгельский:

До́блественным по́мыслом проше́д му́ки и побе́ду на них прие́м, блаже́нне,/ во́лка преложи́л еси́ во а́гня Боже́ственною благода́тию,/ и повину́л еси́ страда́ти с тобо́ю ве́рою./ Те́мже вси ра́достно тя почита́ем, пресла́вне Трофи́ме.

Богоро́дичен:

Упова́ние христиа́н, Пресвята́я Де́во,/ Его́же родила́ еси́, Бо́га, па́че ума́ же и сло́ва,/ непреста́нно моли́ с Вы́шними си́лами/ пода́ти оставле́ние грехо́в на́ших всех и исправле́ние жития́/ ве́рою и любо́вию при́сно Тя сла́вящим.

Крестобогоро́дичен:

Нескве́рная А́гница, А́гнца и Па́стыря, пове́шена на Дре́ве, ме́ртва зря́щи/ и пла́чущи, веща́ше, ма́терски восклица́ющи:/ ка́ко претерплю́ Твое́ е́же па́че сло́ва, Сы́не Мой, сни́тие/ и во́льныя стра́сти, Бо́же Преблаги́й?

Песнь 4

Ирмо́с: Услы́шах, Бо́же, слух Твой и убоя́хся,/ разуме́х дела́ Твоя́ и ужасо́хся, Го́споди,/ я́ко Твоего́ хвале́ния испо́лнь земля́.

Услы́шах, Бо́же, му́ченик тве́рдое му́жество,/ и́мже стра́ждуще показа́ша по любви́ Твое́й,/ и, уди́влься, сла́влю Тя, Еди́не Спа́се.

Ве́ры щито́м огражде́н вели́кий му́ченик/ и, меч духо́вный мы́сленно извле́к, главы́ отсече́ нечести́вым.

Красото́ю доброде́телей укра́шен, вели́кий му́чениче, и сла́вою венча́н,/ гони́теля посрами́л еси́, за Христа́ прии́м огнь и заколе́ния.

Тро́ичен: Во Еди́ном Существе́ пою́ Три Ипоста́си Богонача́лия,/ Отца́, и Сы́на, и Ду́ха,/ я́ко еди́но сия́ние Трисо́лнечнаго Естества́, Еди́н Бог.

Богоро́дичен: Де́во, ка́ко дои́ши?/ Ка́ко ма́терними ражда́еши зако́ны?/ Его́же бо родила́ еси́, вопло́щся, Бог есть,/ обновля́я естество́, я́ко весть Сам.

Песнь 5

Ирмо́с: Мрак разреши́ греха́ моего́,/ внегда́ возсия́ти Ти,/ у́тро све́тлое за́поведей Твои́х, Го́споди,/ непристу́пный Све́те.

Мрак отгна́л еси́ безбо́жия све́тлыми пропове́дании,/ Богосия́нными испове́дании твои́ми враги́ посрами́л еси́,/ Трофи́ме страда́льче Христо́в.

Я́ко Бо́га возлюби́л еси́, му́чениче боголю́бне,/ именоно́сно показа́ся богоме́рзкия па́губы прогна́ние,/ му́ченик Христо́в изря́ден быв.

От ва́шея кро́ве оде́явше багряни́цу по́честь,/ на Небесе́х сца́рствуете Бо́гу всех, му́ченицы, я́ко Тому́ подо́бницы.

Тро́ичен: Равносла́вная, равноче́стная Тро́ице,/ Безнача́льне О́тче нерожде́нне, рожде́нне Сы́не и Ду́ше Святы́й,/ Ты еси́ Бог мой, Го́споди, непристу́пный Све́те.

Богоро́дичен: В де́вах ро́ждшую и в ма́терех Тя Чи́стую Де́ву пое́м,/ Бо́жий нескве́рный сосу́д,/ из Него́же про́йде Госпо́дь, Спас вся́ческих.

Песнь 6

Ирмо́с: Бу́рею грехо́вною погружа́емь,/ я́ко во чре́ве ки́тове содержи́мь,/ с проро́ком зову́ Ти:/ возведи́ от тли живо́т мой,/ Го́споди, и спаси́ мя.

Ка́мением и дреко́лием сокруша́еми, ника́коже отступи́сте от ве́ры,/ но потреби́тели, блаже́ннии, бы́сте идолонеи́стовства,/ взе́мше побе́ды по́чести.

Воздви́жен на высоту́ и стру́жемь, и́дольскую лесть обличи́л есть Богосло́в Трофи́м,/ напита́в ве́рных сердца́ уче́нии досто́йно пода́тельными.

Зве́зды страда́нии просия́вше, неве́рия мрак разори́сте./ Те́мже день озари́вше спаси́тельный,/ во́ньже спасти́ся нам, моли́теся, му́ченицы Госпо́дни.

Тро́ичен: Единоца́рственная, сообра́зная Тро́ице безнача́льная,/ равноче́стная, Триипоста́сная, Еди́нице неразде́льная, Божество́м пресу́щная,/ О́тче, и Сы́не, и Святы́й Ду́ше, Тебе́ пое́т вся тварь.

Богоро́дичен: Па́че естества́ Твое́ Рождество́, я́ко безсе́менно, ма́терски подо́бно па́ки ражда́еши,/ зако́ном естества́, преи́стинно обоя́,/ да умолча́т скве́рныя е́реси о Тебе́, Богоро́дице Чи́стая.

Песнь 7

Ирмо́с: О́гнь, паля́ в пещи́, истряса́шеся,/ о́троцы ороша́хуся/ и, пою́ще, глаго́лаху:/ благослове́н еси́, Еди́н Сый/ Бо́же оте́ц на́ших.

Плоть преоби́дящим страда́льцем Твои́м А́нгели удиви́шася и земни́и взыва́ху:/ благослове́н еси́, еди́ный Бог оте́ц на́ших.

Высока́ мы́шца си́лы Твоея́, сия́ сокруши́ враги́ Твоя́, Го́споди,/ сконча́вшимся в ве́ре му́чеником Твои́м в му́ках го́рьких.

О́вии у́бо ка́мением побива́ются, страстоно́сицы Твои́, друзи́и же сжига́еми,/ с ни́миже Трофи́м скончава́шеся, Тебе́ воспева́я су́щему Бо́гу:/ оте́ц на́ших Бо́же, благослове́н еси́.

Тро́ичен: Трисо́лнечное Божество́, Еди́но Ца́рствие, Безнача́льне, Присносу́щне, О́тче, и Сы́не, и Ду́ше:/ благослове́н, Еди́н Сый Бо́же оте́ц на́ших.

Богоро́дичен: О, стра́шнаго та́инства!/ о́, стра́ннаго чудесе́!/ Ка́ко и Ма́ти яви́ся, и Де́вою пребы́сть,/ благослове́нна еди́на, ро́ждшая Бо́га оте́ц на́ших!

Песнь 8

Ирмо́с: Вся дела́ Бо́жия и вся тварь, благослови́те Го́спода,/ преподо́бнии и смире́ннии се́рдцем, по́йте Его́/ и превозноси́те во вся ве́ки.

Столп яви́лся еси́ мы́сленный, утвержда́я стра́ждущия с тобо́ю, Трофи́ме,/ погуби́л еси́ нечести́вых шата́ние ве́рою Христо́вою,/ Его́же превозно́сим во ве́ки.

Све́тлым лице́м предста́в на суди́щи, беззако́нныя ужаси́л еси́./ Показа́л еси́ ра́достное твое́ е́же за Христа́ страда́ние,/ Его́же превозно́сим во ве́ки.

Не́бо многозве́здное я́влься, страда́льцев Богоизбра́нный собо́р/ озари́ богови́дно су́щия в ми́ре ве́рою Христо́вою,/ Его́же превозно́сим во ве́ки.

Тро́ичен: Безнача́льнаго Отца́ и Сы́на со Святы́м воспое́м Ду́хом,/ Тро́ицу Единосу́щную, Еди́но нача́ло и Божество́,/ хва́ляще и пою́ще Его́ во ве́ки.

Богоро́дичен: Всяк Тя язы́к земноро́дных пое́т, Де́во,/ я́ко Свет Непристу́пный возсия́ла еси́, просвеща́ющаго мир Христа́ Бо́га,/ Его́же превозно́сим во ве́ки.

Песнь 9

Ирмо́с: Тя, Неискусобра́чную Богоро́дицу,/ Небе́сный черто́г, ро́ждшую Нача́льника спасе́ния на́шего,/ пе́сньми велича́ем.

Тя, проше́дшаго чу́дно страда́ния тече́ние/ и вене́ц прие́мша победи́тельно от Христа́ Бо́га,/ страда́льче, пе́сньми велича́ем.

Тя, богоявле́нна страда́льца,/ я́ко вожда́ я́вльшася стра́ждущих с тобо́ю моисе́йски к нестаре́ющейся жи́зни,/ пе́сньми велича́ем.

Ли́че досто́ин Бо́гу му́ченический, я́ко победи́вший пре́лесть/ и венцы́ от Бо́га прии́мший све́тлы,/ моли́теся спасти́ся нам.

Тро́ичен: Тя, Триипоста́сную Еди́ницу и нераздели́мое Существо́,/ Отца́, и Сы́на, и Свята́го Ду́ха,/ пе́сньми велича́ем.

Богоро́дичен: Тя, купину́, ю́же Моисе́й прови́де,/ горя́щу и неопаля́ему, огнь прие́мшу Божества́,/ пе́сньми велича́ем.