Служба в честь святых младенец четыренадесяти тысящ, Христа ради избиенных от Ирода в Вифлееме Иудейстем, и преподобнаго отца нашего Маркелла, игумена обители Неусыпаемых

На Го́споди, воззва́х: стихи́ры святы́х, глас 4.

Подо́бен: Я́ко до́бля:

Сокро́вища сокрове́ннаго/ иски́й, пребеззако́нный/ незло́бивыя закла́ о́троки днесь,/ и Рахи́ль неуте́шна бя́ше,/ непра́ведно зря́щи заколе́ние/ и безвре́менную смерть/ и́хже, пла́каше, боля́щи утро́бою,/ но сия́ весели́тся,/ в не́дрех Авраа́мовых ны́не ви́дящи.

Царя́ Безле́тнаго,/ под ле́том бы́вша,/ царь пребеззако́нный взыска́/ и, не обре́т уби́ти Его́,/ младе́нцев пожа́т неискусозло́бное мно́жество,/ я́же соде́ла му́ченики,/ я́ко не мня́ше,/ и гра́жданы Вы́шняго Ца́рствия,/ того́ во ве́ки пребезу́мие облича́ющия.

От Де́вы ро́ждшуся Тебе́, Преве́чный Го́споди,/ и за бла́гость младе́нствовавшу,/ лик младе́нцев приведе́ся/ му́ченическою кро́вию,/ нему́тну ду́шу просвети́в пра́веднейше,/ я́же всели́л еси́ во оби́тели присноживо́тныя,/ И́родову облича́ющи зло́бу/ и суро́вейшее пребезу́мие.

Преподо́бнаго стихи́ры, глас и подо́бен то́йже:

Воздержа́ния о́браз/ показа́лся еси́ мона́шествующим,/ Богоно́се Марке́лле,/ воздержа́нием столп о́гненный,/ взима́яся Ду́хом, прему́дре, от земли́ на Небеса́,/ и чистоты́ собесе́дник,/ безмо́лвия же и́стинный и́стинно храни́тель/ и му́жества столп одушевле́н,/ пра́вило же к доброде́тели изве́стнейшее.

Страсте́й взыгра́ния/ увяди́л еси́, преподо́бне,/ бде́нием кре́пким, и поуче́нием Писа́ний,/ и моли́твою приле́жною,/ и слез точе́нием./ Те́мже вои́стинну яви́лся еси́/ Влады́це досто́йное жили́ще/ и исцеле́ния ве́рою приходя́щим ты подае́ши,/ безсме́ртнаго сподобля́яся наслажде́ния.

Наслажда́яся ясне́йше/ добро́ты Влады́ки Твоего́,/ зерца́лом разре́шшимся, всеблаже́нне, плотски́м/ и явле́нием, су́щим зде,/ моли́ о чи́сте хва́лящих/ па́мять твою́ всесвяще́нную/ и псалмы́ же и пе́сньми почита́ющих,/ я́ко да улучи́м ми́лость в День Су́дный.

Сла́ва, младе́нцев, глас 8.

Андре́я Кри́тскаго: И́род пребеззако́нный,/ ви́дя звезду́, па́че всея́ тва́ри светле́йшую, смуща́шеся/ и млекопита́емыя младе́нцы из объя́тий ма́терних восхища́ше./ Елисаве́т же, взе́мши Иоа́нна,/ ка́мень моля́ше, глаго́лющи:/ приими́ ма́терь с ча́дом./ Гора́ прия́т Предте́чу./ Я́сли же храня́ху сокро́вище,/ Его́же звезда́ возвести́,/ и волсви́ поклони́шася:/ Го́споди, сла́ва Тебе́.

И ны́не, глас то́йже:

Пресла́вное та́инство устроя́ется днесь,/ обновля́ется естество́,/ и Бог Челове́к быва́ет,/ е́же бе, пребы́сть,/ и е́же не бе, прия́т,/ ни смеше́ния претерпе́в,/ ниже́ разделе́ния.

На стихо́вне стихи́ры пра́здника, глас 6.

Подо́бен: Тридне́вен:

Та́инство ужа́сное зрю:/ Бог бо, И́же го́рстию содержа́й всю тварь,/ объе́млется пло́тию в я́слех безслове́сных/ и ру́бищи повива́ется,/ повива́яй мгло́ю мо́ре.

Стих: Из чре́ва пре́жде денни́цы роди́х Тя,/ кля́тся Госпо́дь и не раска́ется.

Безпло́тный воплоща́ется Бог,/ и начина́ется Безнача́льный,/ и по́лный ны́не истощева́ется/ в ма́лом верте́пе от Де́вы,/ и Младе́нец млеко́м пита́ется,/ препитова́я вся́кое дыха́ние.

Стих: Рече́ Госпо́дь Го́сподеви моему́:/ седи́ одесну́ю Мене́.

Играют в Рождестве́ Христо́ве па́стырие/ и сла́вят со А́нгелы,/ и звезда́ дароно́сит,/ и волсви́ покланя́ются,/ и челове́цы, спасе́ни бы́вше,/ Богоро́дицу велича́ют.

Сла́ва, младе́нцев, глас 8.

Андре́я Кри́тскаго: Иису́су ро́ждшуся в Вифлее́ме Иуде́йстем,/ Иуде́йская держа́ва упраздни́ся./ Да игра́ют младе́нцы, за Христа́ закала́еми,/ Иуде́я да рыда́ет:/ глас бо слы́шан бысть в Ра́ме,/ Рахи́ль, пла́чущи, рыда́ет,/ я́коже пи́шет, по ча́дех свои́х,/ младе́нцы бо изби́в, И́род пребеззако́нный/ исполня́ше Писа́ние,/ Иуде́ю насыща́я непови́нныя кро́ве;/ и земля́ у́бо червленя́шеся кровьми́ младе́нцев,/ от язы́к же Це́рковь та́инственне очища́ется/ и в красоту́ одея́ется./ Прии́де И́стина,/ Бог яви́ся в се́ни седя́щим, от Де́вы роди́выйся,/ во е́же спасти́ нас.

И ны́не, глас то́йже. Иоа́нна мона́ха:

Го́споди, в Вифлее́м прише́д,/ в верте́п всели́лся еси́,/ Не́бо престо́л име́я,/ во я́слех восклони́лся еси́,/ Его́же во́инства окружа́ют А́нгел,/ па́стырем снизше́л еси́,/ да спасе́ши, я́ко благоутро́бен, род наш, сла́ва Тебе́.

Тропа́рь святы́м, глас 1:

Боле́зньми святы́х, и́миже о Тебе́ пострада́ша,/ умоле́н бу́ди, Го́споди,/ и вся на́ша боле́зни исцели́,/ Человеколю́бче, мо́лимся.

Сла́ва, преподо́бному, глас 8:

В тебе́, о́тче, изве́стно спасе́ся е́же по о́бразу:/ прии́м бо Крест, после́довал еси́ Христу́/ и, де́я, учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней./ Те́мже и со А́нгелы сра́дуется, преподо́бне Марке́лле, дух твой.

И ны́не, пра́здника, глас 4:

Рождество́ Твое́, Христе́ Бо́же наш,/ возсия́ ми́рови свет ра́зума,/ в нем бо звезда́м служа́щии/ звездо́ю уча́хуся/ Тебе́ кла́нятися, Со́лнцу Пра́вды,/ и Тебе́ ве́дети с высоты́ восто́ка./ Го́споди, сла́ва Тебе́.

НА У́ТРЕНИ

На Бог Госпо́дь: тропа́рь пра́здника еди́ножды и младе́нцев еди́ножды. Сла́ва, преподо́бнаго. И ны́не, пра́здника.

По 1-й стихоло́гии седа́лен, глас 5.

Подо́бен: Собезнача́льное Сло́во:

Звезды́ сия́нием озари́вшеся,/ от Перси́ды волсви́ приидо́ша в верте́п Вифлее́мский,/ да́ры изря́дны рожде́нному Царю́ от Де́вы и Ма́тере прине́сше благода́рно,/ от язы́ков наставля́еми в поклоне́ние Тому́.

Сла́ва, и ны́не, то́йже.

По 1-й стихоло́гии седа́лен, глас 8.

Подо́бен: Воскре́се из ме́ртвых:

Свире́лей па́стырских уставля́я песнь,/ во́инство а́нгельское возглаша́ет, глаго́ля:/ хвалу́ воспо́йте Боже́ственную, овца́ми владу́щии,/ возопи́йте, пою́ще,/ я́ко роди́ся Христо́с Госпо́дь,/ благоволи́вый спасти́ я́ко Бог род челове́ческий.

Сла́ва, и ны́не, подо́бен то́йже:

Пресла́вно, ве́рнии, та́инство сие́,/ Бог от Де́вы роди́ся, я́коже весть./ Чи́ни А́нгельстии, уди́вльшеся снизхожде́нию Его́, зову́т, воспева́юще:/ я́ко роди́ся Христо́с Госпо́дь,/ благоволи́вый спасти́ я́ко Бог род челове́ческий.

Кано́н пра́здника кир Космы, глас 1 со ирмосо́м на 6 (зри день 25-й) и святы́х два кано́на на 8. Кано́н святы́х младе́нцев на 4, глас 4.

Песнь 1

Ирмо́с: Предели́в пучи́ну чермну́ю Бог,/ фарао́на погрузи́вый в ней,/ прове́д Моисе́я немо́кренно в пусты́ню/ и одожди́в ма́нну в снедь лю́дем Изра́илевым,/ я́ко си́лен.

Звезда́ возсия́ в Вифлее́ме/ и Еде́ма от мра́чныя разреши́ кля́твы,/ и спасе́ния день да́руется родонача́льником,/ из де́вственна о́блака просия́вый Иису́с,/ су́щих во тьме просвеще́ние.

Три́знище днесь младе́нцев отве́рзеся ве́рным за Христа́ и Бо́га,/ враго́в облича́я нача́ла и вла́сти/ и И́родов облича́я му́жески младоу́мный гнев смы́сленно.

Богоро́дичен: Боже́ственное утвержде́ние и стена́ неруши́ма, Чи́стая,/ и мы́сленный мост при́сно,/ и необори́мь столп, и основа́ние, и покро́в,/ его́же ра́ди спаса́емся вси от бед,/ Ты еси́ вои́стинну.

Кано́н преподо́бнаго, глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь пои́м, вопия́ше.

Обновля́ется тварь, и земны́х естество́ новотвори́тся/ пло́тию Творца́ всех, па́че ума́ Христа́ ражда́ема/ из Чи́стыя и Пресвяты́я Ма́тере.

Ра́зум прие́м, о́тче, от Бо́га и́стины,/ и непреста́нно взыска́в Его́ житие́м, Марке́лле, чи́стым,/ и Боже́ственным и доброде́тельми угоди́л еси́.

Богоро́дичен: Земля́ оте́ческия кля́твы, я́же во Еде́ме, избавле́ние прия́т:/ на ней Изба́вителю ро́ждшуся, Чи́стая, из Тебе́,/ и обно́вльшу ю, и освяти́вшу.

Песнь 3. Ин. Младе́нцев

Ирмо́с: Утвержда́яй гром и созида́яй дух,/ утверди́ мене́, Го́споди,/ да Тя пою́ и́стинно/ и творю́ во́лю Твою́,/ я́ко несть свят, я́ко Ты, Бо́же наш.

Де́вственною две́рию проше́д, Соде́тель и Бог наш/ плотски́й дом Себе́ созда́ неизглаго́ланно, и Младе́нец бысть,/ и во я́слех восклони́ся.

Све́рстницы де́ти – страда́льцы Христо́ва вопло́щения,/ И́родово неразу́мное ослепи́ша неи́стовство/ и о́чи всесве́тлии Це́ркве яви́шася.

Богоро́дичен: Из Тебе́ безо́тчий яви́ся, безма́терен пре́жде веко́в Госпо́дь,/ и зи́ждется преесте́ственно, и назда́ние да́рует су́щим из Ада́ма обоже́ния, Де́во Неискусобра́чная.

Ин. Преподо́бнаго

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Облацы, ка́плите на зе́млю сла́дость весе́лия:/ из о́блака бо све́тла возсия́ Христо́с,/ в верте́пе пло́тски па́че вся́кия мы́сли ражда́емь.

Тве́рдостию души́ на враги́ мы́сленныя вооружи́вся, Богоно́се,/ посе́кл еси́ тех ополче́ния держа́вно/ и побе́ды увя́злся еси́ венце́м.

Богоро́дичен: От пречи́стых Твои́х, Чи́стая, и честны́х крове́й вопло́щся неизрече́нно,/ Сло́во Бо́жие показа́, я́ко Бог тва́рей, Тя всех Влады́чицу.

Конда́к и и́кос пра́здника.

Конда́к младе́нцев, глас 6.

Подо́бен: Е́же о нас:

В Вифлее́ме ро́ждшуся Царю́, волсви́ от Перси́ды с да́ры прихо́дят,/ звездо́ю свы́ше наставля́еми,/ но И́род смуща́ется и пожина́ет младе́нцы, я́ко пшени́цу,/ и рыда́ет себе́,/ я́ко держа́ва его́ вско́ре разори́тся.

Конда́к преподо́бнаго, глас 8.

Подо́бен: Взбра́нной

Я́ко звезда́,кра́сно сия́я,/ от Ефе́са провозсия́л еси́ нам, всеблаже́нне, пости́жно,/ и доброде́тельми возгреме́л еси́,/ наста́вник и́ноком мно́гим быв, преподо́бне,/ того́ ра́ди и ца́рствующий град просвети́л еси́,/ и сего́ ра́ди вопие́м ти:/ ра́дуйся, о́тче всеблаже́нне Марке́лле.

И седа́лен младе́нцев, глас 4.

Подо́бен: Яви́лся еси́:

Ро́ждшемуся днесь от Де́вы младе́нцев во́инство/ я́ко Творцу́ и Царю́ прия́тная прино́сятся заколе́ния,/ предложе́нная Христу́ ве́ры ра́ди.

Сла́ва, преподо́бному, глас 4.

Подо́бен: Ско́ро предвари́:

Чистоты́ у́гльми предочи́стив ду́шу,/ те́ло обузда́л еси́ к нетле́нней кре́пости, всехва́льне Марке́лле,/ тем и показа́лся еси́ оби́телище Боже́ственное,/ неду́ги отгоня́я и просвеща́я ве́рою при́сно приходя́щия к тебе́/ и восхваля́ющия тя.

И ны́не, глас то́йже.

Подо́бен: Удиви́ся Ио́сиф:

Удиви́ся, уве́дев, И́род, царь лю́тый,/ ища́ я́ростию, проти́ву боря́ ро́ждшемуся на земли́ Царю́, ю́ному Христу́,/ и, боя́знию и стра́хом мно́гим содержи́мь,/ посыла́ет во́инство уби́ти с я́ростию де́ти, в Вифлее́ме младе́нствующия,/ ку́пно с ни́ми уби́ти покуша́яся Созда́теля, за благоутро́бие обнища́вшаго:/ из де́вственныя бо утро́бы произы́де, спасти́ хотя́ род наш.

Песнь 4. Ин. Младе́нцев

Ирмо́с: Услы́шах слух Твой и убоя́хся, проро́к глаго́лаше,/ разуме́х дела́ Твоя́, и удиви́хся, и возопи́х:/ сла́ва си́ле Твое́й, Го́споди.

Де́ва и Не́бо, Небе́сныя и земны́я,/ Рождество́м хода́тайствовавши, па́че ума́ примири́/ и вражды́ средосте́ние разори́.

Младе́нец мно́жество му́ченически, по Бо́зе всех пострада́вше, по́чести страда́ния от Него́ прие́млет:/ и́хже ра́ди И́род весьма́ устыде́ся.

Богоро́дичен: Боже́ственное Сло́во во утро́бе заче́нши, стра́шным Сло́вом/ па́че сло́ва породила́ еси́ пло́тию, Всенепоро́чная./ Те́мже Тя, Богоро́дицу, сла́вим.

Ин. Преподо́бнаго

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Ви́девше, Го́споди, е́же в верте́пе Твое́ сни́тие,/ чи́нове мы́сленнии стра́хом ужасо́шася/ и воспе́ша, Христе́, недомы́сленную Твою́ ми́лость.

Боле́зни, преподо́бне, и по́ты твоя́ с кро́вными струя́ми младе́нцев сме́шени, Марке́лле,/ Ро́ждшемуся пло́тию да́ры че́стны принесо́шася.

Богоро́дичен: Кра́сну Тя добро́тою, преоблиста́ющую/ Сы́на Твоего́ заре́ю, язы́честии дароно́сцы, Чи́стая, ви́девше,/ виде́ние но́во и пресла́вно воспе́ша.

Песнь 5. Ин. Младе́нцев

Ирмо́с: Возсия́й ми, Го́споди, свет повеле́ний Твои́х,/ я́ко к Тебе́ дух мой у́тренюет и пое́т Тя:/ Ты бо еси́ Бог наш,/ и к Тебе́ прибега́ю, Царю́ ми́ра.

Чу́вственное у́бо со́лнце о́блаки покрыва́ется,/ У́мное же и Всеневеще́ственное, безме́рным благоутро́бием в плоть оде́явся,/ в верте́пе днесь пелена́ми повива́ется нас ра́ди.

Скверноуби́йства кровьми́ И́род оскверня́ется:/ Влады́ку бо всех, Бо́га и Царя́, уби́ти покуша́яся,/ на о́троки неи́стовствует и свире́пствует лю́те.

Богоро́дичен: Заре́ю моли́твы Твоея́, Богороди́тельнице Чи́стая,/ слепоту́ се́рдца моего́ озари́,/ я́ко еди́на свети́льника Го́спода/ и сла́вы со́лнце возсия́вши Христа́.

Ин. Преподо́бнаго

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Прелива́ется ча́ша благоутро́бия Твоего́, Христе́, во творе́ния вся,/ и оби́льно сия́ ми́лости испо́лни,/ пло́тию я́вльшуся и ро́ждшуся Тебе́.

Ве́щнаго, преподо́бне, души́ помраче́ния/ и вся́кия земны́я и тле́нныя красоты́/ боле́зньми очи́стив твоего́ по́стничества,/ равноа́нгелен показа́лся еси́ в ми́ре, Марке́лле.

Богоро́дичен: Струи́ источи́ мы́сленныя безсме́ртия/ из Тебе́ пло́тию рожде́йся в верте́пе, Чи́стая,/ и челове́ческое естество́ напои́ нетле́нием,/ обогати́в сие́, я́ко Благоутро́бен.

Песнь 6. Ин. Младе́нцев

Ирмо́с: Бу́ря мя мно́гих согреше́ний мои́х потопля́ет,/ и изнемога́ет дух мой;/ но Ты, Го́споди,/ я́ко ми́лостив, сшед,/ возведи́ живо́т мой.

Боже́ственное вопло́щения Сло́ва соверша́ется днесь та́инство, Богоро́дице:/ Тобо́ю бо яви́ся пло́тию Бог Преве́чный,/ да обожи́т прия́тие.

Рахи́ль, у́бо чад пла́чущи,/ дре́вле провозвести́ за Христа́ младе́нцев, прие́мших безго́дное заколе́ние;/ тем и отрица́шеся, уте́шитися не хотя́щи.

Богоро́дичен: Боже́ственное Рождество́ Твое́, Всесвята́я,/ прозя́бшую пресече́ в раи́ кля́тву/ и, стезю́ дре́ва жи́зни челове́ком отве́рзши,/ благослове́ние источи́.

Ин. Преподо́бнаго

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.

Ми́ра благово́ннейшая издаде́ земля́ в себе́ па́че смы́сла,/ неистоще́ннаго ми́ра, от Чи́стыя пло́тию источи́вшаго/ и челове́ки благово́ния Боже́ственнаго испо́лнившаго.

Жития́ привре́менное и нестоя́нное му́дре усмотри́в, Марке́лле,/ к присностоя́щим душе́вное возвы́сил еси́ жела́ние,/ е́же получи́л еси́ боле́зньми по́стничества.

Богоро́дичен: Ражда́ется безле́тный Бог Сло́во во пло́ти из Тебе́, Де́во Пречи́стая,/ да жи́знь безле́тную челове́ком,/ и насле́дие ве́чное, и сла́ву пода́ст нетле́нную.

Конда́к, глас 4.

Подо́бен: Яви́лся еси́:

Звезда́ волхвы́ посла́ к Ро́ждшемуся,/ и И́род непра́ведное во́инство посла́ лю́то,/ уби́ти мня во я́слех/ я́ко Младе́нца лежа́ща.

И́кос:

Го́рним и до́льным, ны́не вку́пе веселя́щимся/ во явле́нии всех Царя́,/ И́род сам то́кмо с пророкоуби́йцы Иуде́и соболе́знует: ле́по бо самы́м им то́кмо рыда́ти,/ не бо от ны́не ца́рствовати и́мут;/ но ца́рство Госпо́дне и еще́ держа́вствовати и́мать,/ де́рзости враго́в отража́ющее/ и мно́жества ве́рных созыва́ющее/ с честны́ми младе́нцы взира́ти/ И́же во я́слех я́ко Младе́нца лежа́ща.

Песнь 7. Ин. Младе́нцев

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Весели́тся днесь Вифлее́м с на́ми,/ Тя бо, Невмести́маго, в верте́пе прие́млет,/ благослове́н еси́,– вопия́,– еди́н Бог оте́ц на́ших.

Незло́бива же́ртва и нескве́рная за Тя предзакала́ется, Бо́жий Сло́ве, вопию́щи:/ благослове́н еси́, Го́споди, Бо́же оте́ц на́ших.

Богоро́дичен: Ра́дуйся, небу́рное покая́ния приста́нище,/ в не́же прибега́юще, Богоро́дице, зове́м:/ благослове́на еси́ Еди́на, ро́ждшая Бо́га оте́ц на́ших.

Ин. Преподо́бнаго

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Поколеба́вшуюся безбо́жием всю тварь И́же в верте́пе Рожде́йся/ утверди́ позна́нием Свои́м па́ки, непреста́нно зову́щую Ему́:/ благослове́н еси́, Бо́же оте́ц на́ших.

Огне́м у́бо по́стничества попали́л еси́, Марке́лле, плотски́я сла́сти,/ безстра́стия же росо́ю напои́л еси́ ду́шу, вопия́ Христу́ све́тло:/ благослове́н еси́, Бо́же оте́ц на́ших.

Богоро́дичен: Ви́де вся тварь, Богоневе́сто, Боже́ственная вели́чия Твоя́,/ пло́тию из Тебе́ Влады́це всех и Бо́гу ро́ждшуся во гра́де Вифлее́ме,/ и с па́стырьми и волхвы́ Тя воспе́.

Песнь 8. Ин. Младе́нцев

Ирмо́с: Вся́ческая, Влады́ко, прему́дростию Твое́ю соста́вил еси́,/ земли́ же па́ки утверди́л еси́, я́коже ве́си, дно,/ основа́нием водрузи́вый на вода́х безме́рных./ Тем вси вопие́м, воспева́юще:/ благослови́те, дела́ Госпо́дня, непреста́нно Го́спода.

А́нгели сла́вят власть Ро́ждшагося,/ па́стырие чудя́тся, и волсви́ покланя́ются,/ Небеса́ возвеща́ют звездо́ю Зижди́теля;/ с ни́миже вси, воспева́юще, вопие́м:/ благослови́те, дела́ Госпо́дня, Го́спода.

Мно́жество неискусозло́бное во́инствует Влады́це днесь кро́вию/ и на И́рода тве́рдо вооружа́ется, Тебе́, Христе́, ро́ждшуся./ Тем вси вопие́м, воспева́юще:/ благослови́те, дела́ Госпо́дня, Го́спода.

Богоро́дичен: Де́ву Тя, Чи́стая, храм, и дверь, и о́блак,/ купину́ неопали́му, и ста́мну ма́нны, и жезл прозя́бший,/ киво́т, и све́щник, и скрижа́ли Заве́та,/ го́ру святу́ю, из нея́же ка́мень отсече́ся,/ проро́цы Бо́жии пропове́даша.

Ин. Преподо́бнаго

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Светоно́сною тварь оде́ждею одева́ется,/ и пе́рвое се́тование все отложи́,/ Обнови́телю и Влады́це ро́ждшуся на земли́:/ Его́же превозно́сим во ве́ки.

Вооружи́вся доброде́тельми, преподо́бне Марке́лле,/ ополче́ния де́монов побори́л еси́,/ и я́ко победи́тель на ты́я взял еси́ одоле́ния,/ и чуде́с благода́ть от Бо́га прия́л еси́.

Богоро́дичен: И́же из Тебе́ в верте́пе роди́выйся, Всенепоро́чная,/ ве́чныя челове́ком оби́тели угото́ва/ и́скренно, Богоро́дице, пою́щим Тя/ и превознося́щим несказа́нное Твое́ Рождество́.

Песнь 9. Ин. Младе́нцев

Ирмо́с: Я́ко сотвори́ мне вели́чия Си́льный,/ и свя́то И́мя Его́,/ и ми́лость Его́/ в род и род боя́щимся Его́.

Весь в Тебе́ вмеща́ется,/ И́же в не́дрех сый Отца́,/ и зи́ждется Зижди́тель Небесе́,/ и истощава́ется мене́ ра́ди,/ и, в пелена́х пови́вся, разреша́ет прегреше́ний плени́цы.

В Ра́ме слы́шася Рахи́ли го́рькое рыда́ние,/ плач же, и увы́, и сокруше́ние:/ скверноуби́йца бо враг, на ча́да Вифлее́мская, И́род показа́ся.

Богоро́дичен: Рождество́м Твои́м, Де́во, обожи́хомся, сме́ртнии:/ Бо́га бо, Пита́теля всех и единосла́вна Отцу́,/ и ражда́еши, и млеко́м пита́еши./ О, стра́ннаго чудесе́!

Ин. Преподо́бнаго

Ирмо́с: Бо́га/ челове́ком невозмо́жно ви́дети,/ на Него́же не смеют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Позна́на показа́ся, Христе́, ми́лость,/ я́же па́че ума́, Твоего́ Человеколю́бия язы́ком:/ пло́тию бо, Влады́ко, обнища́л еси́,/ да прича́стники бога́тства лу́чшаго, Го́споди, сотвори́ши ны,/ я́ко Благ и Многоми́лостив.

Крест на ра́мена взем, блаже́нне, Христо́в,/ и, Сего́ стра́сти подража́я,/ распя́лся еси́ ми́ру весь, о́тче Марке́лле:/ прича́стник бо был еси́ воскресе́ния и сла́вы лу́чшия,/ в не́йже нас помина́й.

Богоро́дичен: Сы́ны Бо́жия ны соде́ла рожде́йся пло́тию Бог из Тебе́, Всечи́стая,/ и пе́рвое даде́ достоя́ние Того́ прие́мшим,/ и Богома́терь Тя славосло́вящим приле́жно, и велича́ющим.

Свети́лен младе́нцев.

Подо́бен: Крест храни́тель:

Зла́чную ни́ву младе́нец, богобо́рствуя И́род,/ посла́в, незре́лую пожа́, окая́нный,/ и, ро́ждшагося Го́спода не возмо́г уби́ти,/ вся́каго сра́ма исполня́ется.

Сла́ва, и ны́не, пра́здника:

Посети́л ны есть свы́ше Спас наш, Восто́к восто́ков,/ и су́щии во тьме и се́ни обрето́хом и́стину:/ и́бо от Де́вы роди́ся Госпо́дь.

На хвали́тех стихи́ры, святы́м на 4, глас 1.

Самогла́сны. Киприа́ново:

Пречи́стому Твоему́ Рождеству́,/ Христе́ Бо́же,/ пе́рвая же́ртва бысть младе́нцы:/ И́род бо я́ти Тя, нея́таго, восхоте́в, не позна́,/ му́ченический приводя́ Тебе́ лик./ Тем Тя мо́лим, вочелове́чшагося,/ спасти́ ду́ши на́ша.

Глас 2:

Во у́ши Го́спода Савао́фа вни́де заколе́ние ва́ше,/ младе́нцы честни́и:/ Того́ бо ра́ди кровь пролия́сте,/ и в не́дрех Авраа́мовых почива́ете,/ и И́родову во ве́ки ме́рзскую зло́бу отри́нусте/ си́лою ро́ждшагося Христа́.

Глас 3:

Ме́рзско И́родово детоуби́йство,/ ме́рзскаго убие́ния Его́ ра́ди,/ и чиста́ дете́й же́ртва,/ я́ко све́рстных Христу́ на́шего спасе́ния,/ но́ваго закла́ния предпожре́на и предпосла́на./ Не пла́чи, Рахи́ль, чад, помина́ющи не́дра Авраа́мова,/ иде́же всех есть веселя́щихся жили́ще.

Сла́ва, глас 5:

Преподо́бне о́тче,/ не дал еси́ сна твои́м очесе́м,/ ни ве́ждом твои́м дрема́ния,/ до́ндеже ду́шу и те́ло от страсте́й свободи́л еси́/ и тебе́ сама́го угото́вал еси́ Ду́ха жили́ще:/ прише́д бо, Христо́с со Отце́м/ оби́тель в тебе́ сотвори́;/ и Единосу́щныя Тро́ицы уго́дник быв,/ великопропове́дниче о́тче наш Марке́лле,/ моли́ спасти́ся нам.

И ны́не, глас то́йже:

Зря́щи Тя, тварь вся,/ в Вифлее́ме пло́тию ражда́ема,/ Созда́теля и Зижди́теля всех,/ новотвори́тся па́ки и обновля́ется;/ со́лнца же свет простре́, и земля́ ра́дуется,/ волсви́ из Перси́ды Царю́ всех да́ры прино́сят./ Па́стырие чудя́тся, уди́вльшеся,/ и Бо́гу во пло́ти с Ро́ждшею покланя́хуся./ О, чудесе́! Пита́тель пита́ется Ма́терию Всечи́стою/ ра́ди мирска́го спасе́ния и обновле́ния.

На стихо́вне стихи́ры, глас 6.

Подо́бен: А́нгельския:

Воспе́ша Христа́, от Де́вы ро́ждшася, го́ры и хо́лми,/ и удо́лия, и поля́;/ звезда́ же Сего́ волхво́м с небесе́ показа́,/ лежа́ща я́ко Младе́нца в верте́пе,/ те́лом ра́бским оде́яна./ К Нему́же зове́м: благослове́н рожде́йся,/ Бо́же наш, сла́ва Тебе́.

Стих: Из чре́ва пре́жде денни́цы роди́х Тя,/ кля́тся Госпо́дь и не раска́ется.

Что́ Твоя́ мно́гая и недомы́сленная нищета́,/ ея́же ра́ди обогати́ся Ада́м Боже́ственными?–/ вопия́ше Де́ва,/ на объя́тиих держа́щи Емману́ила,/ Бо́га и Зижди́теля,/ плоть от Нея́ прие́мшаго./ К Нему́же зове́м:/ благослове́н рожде́йся,/ Бо́же наш, сла́ва Тебе́.

Стих: Рече́ Госпо́дь Го́споведи моему́:/ седи́ одесну́ю Мене́.

У́тро мы́сленное/ возсия́ла еси́, Де́во, Со́лнце Христа́,/ на объя́тиих Твои́х держа́щи,/ И́мже просвеща́ется слове́сное естество́ все/ сия́нием позна́ния соверше́ннаго/ и нетле́ния сподобля́ется,/ ве́рно зову́щее:/ благослове́н рожде́йся,/ Бо́же наш, сла́ва Тебе́.

Сла́ва, глас и подо́бен то́йже:

Ны́не на земли́ явля́ется Отроча́,/ И́же от Отца́ рожде́йся пре́жде век:/ ра́дуйся, вся тварь, Небеса́ да веселя́тся,/ ви́дящи у́бо пре́жде отринове́нныя,/ па́ки Бо́гу присвое́ны,/ и Тому́ зову́щия:/ благослове́н рожде́йся,/ Бо́же наш, сла́ва Тебе́.

И ны́не:

Усты́ приснопла́менными воспева́ют/ Небе́сных преми́рныя Си́лы ро́ждшагося в верте́пе/ за неизрече́нную ми́лость;/ язы́ки и мы пе́ти/ бре́нными да сподо́бимся,/ непреста́нно Тому́ зову́ще:/ благослове́н рожде́йся,/ Бо́же наш, сла́ва Тебе́.

НА ЛИТУРГИ́И

Блаже́нны пра́здника, от кано́на песнь 7-я, и святы́х младе́нцев песнь 6-я. Проки́мен, глас 6: Хвали́те, о́троцы, Го́спода,/ хвали́те И́мя Госпо́дне. Стих: Вселя́я непло́довь в дом, ма́терь, о ча́дех веселя́щуся. Апо́стол к Кори́нфяном, зача́ло 180. Аллилу́ия, глас 5: Проли́яша кровь их, я́ко во́ду. Ева́нгелие от Матфе́я, зача́ло 4. Прича́стен: Ра́дуйтеся, пра́веднии, о Го́споде.