Служба в честь святых и праведных богоотец Иоакима и Анны. И святаго мученика Севериана

ВЕ́ЧЕР

На Го́споди, воззва́х: стихи́ры пра́здника 3, глас 1.

Подо́бен: Небе́сных чино́в:

Иоаки́м и А́нна торжеству́ют,/ Нача́ток ро́ждше на́шего спасе́ния,/ еди́ну Богоро́дицу,/ с ни́миже и мы пра́зднуем днесь,/ от ко́рене о́наго Иессе́ева// блажа́ще Де́ву Чи́стую.

Боговмести́мая Отрокови́ца/ и Богоро́дица Чи́стая,/ проро́ков сла́ва, Дави́дова Дщи/ днесь ражда́ется от Иоаки́ма и А́нны целому́дренныя,/ и Ада́мова кля́тва, я́же на нас,// потребля́ется рождество́м Ея́.

Я́же пре́жде непло́дная страна́/ зе́млю плодоно́сну ражда́ет/ и, от непло́дныя утро́бы плод свят да́вши, млеко́м пита́ет./ Чу́до стра́шно! Пита́тельница Жи́зни на́шея,/ я́же Небе́сный Хлеб во чре́ве прие́мши,// млеко́м от сосцу́ пита́ется.

И́ны стихи́ры святы́х, глас 4.

Подо́бен: Дал еси́ зна́мение:

Прииди́те ны́не, лику́им пе́сненно,/ о празднолю́бцы!/ И ве́рно пра́зднуим, па́мять почита́юще/ Иоаки́ма и А́нны, честны́я дво́ицы;/ ти́и бо роди́ша нам Богома́терь/ и Де́ву Чи́стую./ Те́мже и преста́вишася от привре́менных к нетле́нным/ и присноживы́м жили́щем,// моля́щеся спасти́ся нам.

Ве́село красу́ется тварь вся днесь,/ Богоро́дице Всепе́тая,/ ле́тнюю принося́щи па́мять единому́дренно/ Твои́х роди́телей,/ Иоаки́ма чуднаго,/ ку́пно и А́нны, торжеству́ющи:/ ра́дость бо исхода́тайствоваша,/ Тя па́че наде́жды израсти́вше, Свет облиста́вшую/ и Пита́тельницу Жи́зни на́шея.

Ра́дуется днесь А́нна, игра́ющи ду́хом,/ и весели́тся, ра́дующися,/ улучи́вши жела́ние,/ его́же жела́ше дре́вле, благоча́дия:/ обеща́ния бо плод и благослове́ния боже́ственный прозябе́,/ Мари́ю Всенепоро́чную,/ Бо́га на́шего ро́ждшую/ и Со́лнце возсия́вшую/ во тьме спя́щим.

Сла́ва, и ны́не, глас 5. Ефре́ма Кари́я:

О блаже́нная дво́ица,/ вы всех роди́телей превзыдо́сте,/ я́ко тва́ри всея́ Преиму́щую прозябли́ есте́!/ Истинно блаже́н еси́, Иоаки́ме,/ таковы́ Отрокови́цы быв роди́тель./ Блаже́нна ложесна́ твоя́, А́нно,/ я́ко Ма́терь Жи́зни на́шея прозябла́ еси́;/ блаже́ни сосцы́, и́миже воздои́ла еси́ млеко́м Пита́вшую/ Пита́ющаго вся́кое дыха́ние,/ Его́же моли́те, вам, всеблаже́ннии, мо́лимся,/ поми́ловатися душа́м на́шим.

А́ще ли случи́тся в пято́к ве́чера: Сла́ва, пра́здника. И ны́не, Богоро́дичен пе́рвый гла́са настоя́щаго.

На стихо́вне стихи́ры, глас 2.

Подо́бен: Егда́ от Дре́ва:

А́нна богому́дренна и́стиною,/ гнездо́ пти́че ви́девши на дре́ве пре́жде,/ свое́ безча́дие помяну́вши, вопия́ше:/ увы́ мне, Го́споди, Го́споди,/ аз, гре́шна, еди́на обнища́х плодотворе́ния от Тебе́./ Тогда́ Человеколю́бец Бог/ плод ей Де́ву, Честне́йшую всея́ тва́ри, даде́.

Стих: Слы́ши, Дщи, и виждь,/ и приклони́ у́хо Твое́.

А́нна богому́дренна вои́стину/ безча́дное боле́ние непло́дия позна́вши пе́рвее,/ те́мже, моля́щися, вопия́ше к Бо́гу:/ печа́льну и непло́дну у́зу разреши́,/ и рожду́ Свято́е роди́ти Тя Иму́щую Сло́во,/ е́же, Влады́ко Христе́ Жизнода́телю, да́руеши Ей:/ роди́т бо Тя, Спа́са всем челове́ком.

Стих: Лицу́ Твоему́ помо́лятся/ бога́тии лю́дстии.

Истинно Влады́ка и Бог же, Твою́ моли́тву услы́шав,/ я́ко Са́ррину пре́жде,/ внегда́ услы́ша А́нгелов глас, ра́дость тебе́ пропове́дающ:/ Бо́жию Ма́терь роди́ши./ И возопи́ла еси́ весе́лием души́:/ Влады́ка и Госпо́дь, Бог мой и Творе́ц,// и́стиною мне оста́ви укоре́нив, ро́ждшей Присноде́ву.

Сла́ва, и ны́не, глас 8:

И́же из непло́дных ложе́сн/ жезл, Святу́ю Богоро́дицу, израсти́вше,/ из Нея́же Спасе́ние ми́ру возсия́, Христо́с Бог,/ сопру́г свят и сожи́тельство свя́то, Иоаки́м и А́нна,/ ти́и, преста́вльшеся к Небе́сным селе́нием,/ с свое́ю Дще́рию, Пречи́стою Де́вою,/ со А́нгелы лику́ют, о ми́ре моли́твы творя́ще./ С ни́миже и мы, соше́дшеся благоче́стно, воспева́юще, глаго́лем:/ и́же Богоотрокови́цею и Пречи́стою Мари́ею/ прароди́теле Христо́вы наре́кшеся,// моли́теся о душа́х на́ших.

Тропа́рь святы́х, глас 2:

Пра́ведных Твои́х, Го́споди, па́мять пра́зднующе,/ те́ми мо́лим Тя:// спаси́ ду́ши на́ша.

Или́ сей, глас 1:

И́же в зако́нней благода́ти пра́ведни бы́вше,/ Младе́нца богода́ннаго породи́ша нам Иоаки́м и А́нна./ Те́мже днесь све́тло торжеству́ет,/ ве́село пра́зднующи, Боже́ственная Це́рковь, честну́ю ва́шу па́мять,/ сла́вящи Бо́га,// воздви́гшаго рог спасе́ния нам в дому́ Дави́дове.

Сла́ва, и ны́не, пра́здника: Рождество́ Твое́, Богоро́дице Де́во: Пи́сан на пра́здник.

Слу́жба му́ченика пое́тся на повече́рии.

Кано́н, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.

Одержа́ше веле́ние нечести́вое/ жре́ти и́долом безду́шным же и глухи́м,/ побежда́ше же Христо́с,/ му́ченическими кре́пкими и до́блими противле́нии.

Свобожда́ше от уз отмета́ющияся Христа́/ и вся, я́же обре́те чту́щия Того́ Бо́га,/ вся́чески начина́ше му́чити,/ но, прилу́чся тебе́, богому́дре, посрами́ся.

Удиви́л еси́, му́чениче, злочести́ваго,/ до́блественне устреми́вся на суди́ще,/ и бого́в ло́жных обличи́л еси́ со дерзнове́нием/ не́мощь, и гни́лость, и некре́пость.

Богоро́дичен: Вмести́ла еси́ еди́на Небесы́ Невмести́маго, Отрокови́це,/ во утро́бе Твое́й, боголе́пне Все́льшагося в Тя/ и естество́ челове́ческое от Тебе́ Прие́мшаго.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,// и пое́т Тя дух мой.

Ра́довался еси́, бие́мь за Христа́, му́дре, ра́нами неми́лостивно,/ име́л бо еси́ изве́стное боле́зней воздая́ние.

Жи́лами ссека́емь, измене́нием ча́стым, сла́вне, мучи́телей,/ и сие́, я́коже в чужде́м телеси́, не ощуща́л еси́.

Обре́л еси́ возме́здие от Христа́, му́дре,/ вене́ц прие́м пра́вды и ра́дость несконча́емую.

Богоро́дичен: Вся, Бли́жняя моя́, Добра́ и Непоро́чна бысть,/ Тя прови́дя дре́вле, вопия́ше Соломо́н в пе́снех.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.

Ласка́нии мучи́тель твою́ умягчи́ти, му́чениче, кре́пость/ и победи́ти тя наде́яся, не́бо стреля́ти мня́ше.

Не чу́вствуеши, безу́мне, Христо́ву си́лу, укрепля́ющу мя/ проти́ву боле́знем и трудо́м?/ мучи́телю взыва́л еси́, пресла́вне.

А́ще не бы си́ла свы́ше, пода́нная мне,/ мучи́телю взыва́ше Севериа́н,/ ка́ко у́бо бых могл, плоть сый, претерпе́ти отсече́ния уде́с?

Богоро́дичен: Пресвята́я Богоневе́сто,/ даждь ми по́мощь мольба́ми Твои́ми/ изба́витися льсти́ваго,/ да Тя сла́влю, Наде́жду мою́.

Песнь 5

Ирмо́с: У́тренююще вопие́м Ти,/ Го́споди, спаси́ ны,/ Ты бо еси́ Бог наш,// ра́зве Тебе́ ино́го не ве́мы.

На дре́во воздви́жен был еси́, сла́вне,/ и по те́лу стро́ган ногтьми́/ за всех Влады́чествующаго.

Бо́же мой, вопия́л еси́,/ укрепи́ по́двиг сей сконча́ти мне муче́ния, стру́жему.

Я́ко ви́де тя мучи́тель, сла́вне,/ неосла́бно му́ки терпя́ща,/ ужасе́ся окая́нный.

Богоро́дичен: Наде́ждо и Предста́тельнице, и покро́ве мой, Богоро́дице,/ спаса́й мя мольба́ми Твои́ми от собла́зн змии́ных.

Песнь 6

Ирмо́с: Ри́зу мне пода́ждь све́тлу,/ одея́йся све́том я́ко ри́зою,// Многоми́лостиве Христе́ Бо́же наш.

В темни́це тя заключи́ лю́тый/ и гла́дом пону́ди тя отврещи́ся Христа́,/ Его́же возлюби́л еси́, блаже́нне, от ю́ности.

Ведо́м, му́дре, в темни́цу,/ вся зря́щия тя Христа́ не отступи́ти,/ со дерзнове́нием уча́, нака́зовал еси́.

Мече́м усещи́ тя, му́чениче,/ лю́тый и безу́мный мучи́тель повеле́,/ не поже́рша и́долом, но ты небре́гл еси́.

Богоро́дичен: В ри́зу ми облещи́ся све́та/ Твои́ми моли́твами сотвори́,/ Богоневе́сто Влады́чице,/ в День Су́дный, пою́ща Тя.

Седа́лен, глас 1.

Подо́бен: Лик а́нгельский:

До́блестию души́ вооруже́н, богому́дре,/ изда́л еси́ себе́ к разли́чным му́кам,/ любо́вию распала́емь Влады́ки, пребога́те./ Тем обличи́л еси́ мучи́телей неи́стовство/ и вене́ц от Бо́га прия́л еси́ побе́ды нетле́нный.

Песнь 7

Ирмо́с: В нача́ле зе́млю основа́вый/ и Небеса́ Сло́вом утверди́вый,/ благослове́н еси́ во ве́ки,// Го́споди, Бо́же оте́ц на́ших.

Ка́мением о́стрым уста́ твоя́ сокруши́ нечести́вый,/ пропове́дающа со дерзнове́нием Христа́ посреде́ пребеззако́нников./ Его́же сла́вы получи́в,/ ны́не лику́еши та́мо.

Пове́шен на стене́, страстоте́рпче, мучи́теля мно́гим гне́вом,/ к ка́мени тя́жку привя́зан,/ не отве́рглся еси́ Христа́, отце́в Бо́га препросла́вленна.

О тве́рдаго противле́ния твоего́, блаже́нне!/ О те́плыя любве́ к Зижди́телю!/ Ея́же ра́ди венце́м украси́ тя нетле́нным,/ до́бре пострада́вша.

Богоро́дичен: Ты мой еси́ свет, Дево Богоро́дице,/ Ты еси́ ра́дость и покро́в,/ и приста́нище мое́, Благослове́нная,/ и Тя сла́влю, я́ко ро́ждшую Бо́га отце́в на́ших.

Песнь 8

Ирмо́с: Царя́ Небе́снаго,/ Его́же пою́т во́и а́нгельстии,// хвали́те и превозноси́те во вся ве́ки.

Претерпе́л еси́ ра́ны до конца́, во́ине Христо́в,/ и преста́вился еси́, ра́дуяся,/ к Вы́шнему, преблаже́нне, Ца́рствию.

Не посрами́лся еси́, Христа́ ра́ди, доблему́дренне,/ претерпе́в му́ки разли́чныя,/ те́мже и просла́вился еси́ во вся ве́ки.

Венцено́сец со страда́льцы ны́не лику́я и́стинно окру́г Царя́,/ помина́й ве́рою твою́ па́мять творя́щих.

Богоро́дичен: Богороди́тельнице, христиа́н Предста́тельнице,/ изми́ ны вся́кия ну́жды,/ да Тя пое́м во вся ве́ки.

Песнь 9

Ирмо́с: Вои́стину Богоро́дицу/ Тя испове́дуем,/ спасе́ннии Тобо́ю, Де́ва Чи́стая,// с безпло́тными ли́ки Тя велича́юще.

Рука́ми тебе́ лю́бящих, блаже́нне,/ твое́ те́ло опря́тано погребе́ся, я́ко свя́то,/ и исцеле́ний источа́ет струи́, в сла́ву Бо́жию.

О чу́до, ка́ко воста́ уме́рый о́трок/ и срета́ше твое́ те́ло на пути́, к погребе́нию несо́мо,/ му́чениче всечу́дне!

Получи́в ве́чное, блаже́нне, Ца́рство/ и Влады́це че́стне предстоя́,/ о пою́щих тя те́пле моли́ся.

Богоро́дичен: Диви́шася А́нгелов чинонача́лия,/ воплоще́нна зря́ще Тя нося́щую/ Творца́ веко́в, Присноде́ву.

Стихи́ры, глас 4.

Подо́бен: Дал еси́ зна́мение:

Жи́лами ссека́емь/ Христа́ ра́ди, сла́вне,/ и на дре́ве пове́шен,/ и пло́тию стру́жемь неми́лостивно бричми́7,/ жре́ти же и́долом повелева́емь, му́дре,/ не отве́рглся еси́ всех Го́спода,/ но обличи́л еси́ боле́зньми твои́ми/ не́мощь и ху́дость и́дольскую// и был еси́ А́нгелов собесе́дник.

Ра́дуяся, отлучи́лся еси́ к по́двигу,/ я́ко зако́нный страда́лец, досточу́дне,/ до́блим смы́слом,/ о му́ках, му́чениче, неради́в,/ сме́ртию же Христу́/ уподо́битися тща́ся, чу́дне,/ тем тя венце́м Ца́рствия украси́/ Иису́с Человеколю́бец// и Спас душ на́ших.

Сла́ва, глас то́йже:

У́зник ведо́м/ и я́звами крася́ся,/ зря́щим повелева́л еси́/ подо́битися нра́ву твоему́,/ к Небе́сным, блаже́нне, воздая́нием смотря́щим,/ я́же мно́го весе́лие и красоту́ подаю́т,/ я́ко нетле́нная и во ве́ки пребыва́ющая,/ в них пребыва́ющия// творя́ще насле́дники Ду́хом.

И ны́не, пра́здника:

Днесь излия́ся Боже́ственное бога́тство/ благода́ти Влады́ки/ во вся ми́ра концы́/ от исто́чника непло́дныя,/ дарова́ния источа́ющаго и́стинно/ и возвеща́ющаго Сего́ происхожде́ние/ любо́вию рождество́ Ея́ чту́щим/ и вопию́щим: Иису́се Всеси́льне,// Ты еси́ Спас душ на́ших.

НА У́ТРЕНИ

На Бог Госпо́дь: тропа́рь пра́здника два́жды. Сла́ва, богоотце́в. И ны́не, пра́здника.

По 1-м стихосло́вии седа́лен, глас 3.

Подо́бен: Де́ва днесь:

Де́ва днесь и Богоро́дица Мари́я,/ черто́г неразори́мый Небе́снаго Жениха́, ражда́ется/ от непло́дныя А́нны Бо́жиею во́лею,/ носи́ло Бо́жия Сло́ва угото́вльшися:/ в сие́ бо предповеле́ся бы́ти Отрокови́ца/ и Ма́ти су́щия Жи́зни.

Сла́ва, и ны́не, то́йже.

По 2-м стихосло́вии седа́лен, глас 4.

Подо́бен: Ско́ро предвари́:

Дави́де, я́же кля́тся тебе́ дре́вле Пома́завый тя,/ плод от чресла́ твоего́ на престо́ле твое́м испо́лни, дав Мари́ю./ Зри́ши бо ю́же от А́нны Иу́довы и ра́дуешися,/ из Нея́же Христо́с воплоти́ся, Спас вся́ческих,/ безме́рною бла́гостию спаса́я род наш.

Сла́ва, и ны́не, то́йже.

Кано́н пра́здника со ирмосо́м на 6 и святы́х на 6 же.

Кано́н пра́здника, глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ Я́же изведе́ из рабо́ты еги́петския,// я́ко просла́вися.

Гряди́те, ве́рнии, Ду́хом Боже́ственным ра́дующеся,/ Ю́же от непло́дове днесь прише́дшую челове́ков на спасе́ние/ Присноде́ву Отрокови́цу пе́сньми почти́м.

Ра́дуйся, Чи́стая, Ма́ти и Рабо́ Христа́ Бо́га,/ Я́же пе́рвому Хода́таица блаже́нству,/ челове́ческий род, Тя вси досто́йно пе́сньми сла́вим.

Жи́зни ражда́ется днесь мост,/ и́мже челове́цы, воззва́ние паде́ния, е́же от а́да, обре́тшии,/ Христа́ Жизнода́вца пе́сньми прославля́ют.

Ин кано́н святы́х, его́же краегране́сие: Твоя́ роди́тели, Всечи́стая, пою́ целому́дренно.

Глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ Вопло́щшееся же Сло́во всезло́бныи́ грех потреби́ло есть,/ Препросла́вленный Госпо́дь,// сла́вно бо просла́вися.

Свещу́, мы́сленное Со́лнце возблиста́вшую,/ Пло́тию от Нея́ возсия́вшее,/ доброде́телей светлостьми́ просиява́юще,/ роди́ти сподо́бистеся, А́нно богому́драя и Иоаки́м присноблаже́нный.

Всеобра́зным зре́нием к Бо́гу/ и́стинно богоприя́тный Иоаки́м и А́нна боже́ственная,/ неукло́нно моля́щеся, Пречи́стую Богоро́дицу роди́ша,/ пребо́льшую всея́ тва́ри свя́тостию.

Превысо́ку иму́ще жизнь,/ жития́ же све́тлость,/ всех вку́пе роди́телей бы́сте земны́х превы́шшии,/ Нетле́нну Де́ву я́ко роди́вше/ и богоотцы́ и́стинно Тоя́ ра́ди бы́вше.

Богоро́дичен: Спасе́ния всего́ нача́льницы,/ блаже́ннейший Иоаки́м и А́нна сла́вная,/ Чи́стую, и Непоро́чную, и Пречи́стую Богоро́дицу роди́ша,/ богоче́стия Сию́ прие́мше воздая́ние.

Песнь 3

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́// в сердца́ нас, пою́щих Тя.

Непоро́чно Бо́гу пожи́вший,/ всех роди́сте Спасе́ние,/ богому́дрии роди́теле/ Зижди́теля Ро́ждшия и Бо́га на́шего.

Всем жизнь источа́яй Госпо́дь/ от непло́дове произведе́ Де́ву,/ в Ню́же всели́тися изво́ли,/ и по Рождестве́ сохрани́в нетле́нну.

А́ннин плод, Мари́ю, днесь,/ Грозд ро́ждшую живоно́сный,/ я́ко Богоро́дицу воспои́м,/ Предста́тельницу же всех и Помо́щницу.

Ин

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,// и несть пра́веден, па́че Тебе́, Го́споди.

Непло́дствующая, и дете́й лише́нная,/ и слеза́ми Соде́теля моля́щая,/ еди́ну Благослове́нную сподо́билася еси́ роди́ти,/ богоприя́тная А́нно, зову́щи,/ я́ко несть свят, ра́зве Тебе́, Го́споди.

И́же сожи́тельницу обогати́в Боже́ственною благода́тию,/ Иоаки́м боже́ственный и богоглаго́ливый/ Хода́таицу спасе́ния челове́ком роди́ти сподо́бися./ К Не́йже взыва́ем, я́ко несть непоро́чны, па́че Тебе́, Влады́чице.

Воспое́м всечестну́ю сопру́гу,/ от нея́же возсия́ нам Де́ва,/ всех тва́рей превы́шши су́щи,/ Бо́га бо роди́, к Нему́же возопии́м,/ я́ко несть свят, па́че Тебе́, Го́споди.

Богоро́дичен: Непло́днаго поно́са избе́гши,/ роди́ А́нна Богоро́дицу,/ Е́вы бо поноше́ние пресла́вно потре́бльшую,/ к Не́йже взыва́ем,/ я́ко несть непоро́чны, па́че Тебе́, Влады́чице.

Конда́к пра́здника, глас 4:

Иоаки́м и А́нна поноше́ния безча́дства/ и Ада́м и Е́ва от тли сме́ртныя свободи́стася, Пречи́стая,/ во святе́м рождестве́ Твое́м./ То пра́зднуют и лю́дие Твои́,/ вины́ прегреше́ний изба́вльшеся,/ внегда́ зва́ти Ти:// непло́ды ражда́ет Богоро́дицу и Пита́тельницу Жи́зни на́шея.

Икос:

Моли́тва ку́пно и воздыха́ние непло́дства и безча́дства/ Иоаки́ма же и А́нны благоприя́тное/ и во у́ши Госпо́дни вни́де, и прозябе́ плод живоно́сен ми́ру./ Ов бо моли́тву на горе́ творя́ше, о́ва же в саде́ поноше́ние ноша́ше,/ но с ра́достию непло́ды ражда́ет Богоро́дицу и Пита́тельницу Жи́зни на́шея.

Седа́лен, глас 5.

Подо́бен: Собезначальное:

Иоаки́м и А́нна торжеству́ют,/ по Бо́зе бо досто́йно благода́ть обрето́ша/ и роди́ша плод, богоприя́тен храм,/ Де́ву и Чи́стую Ма́терь Бо́жию,/ еди́ну Благослове́нную, моля́щуюся непреста́нно/ спасти́ся душа́м на́шим.

Сла́ва, и ны́не, то́йже.

Песнь 4

Ирмо́с: Услы́шах, Го́споди,/ слух Твоего́ смотре́ния/ и просла́вих Тя,// Еди́не Человеколю́бче.

Воспева́ем Тя, Го́споди,/ ве́рным спаси́тельное приста́нище пода́вшаго всем,/ Тебе́ Ро́ждшую.

Тя, Богоневе́сто,/ похвалу́ всем Христо́с яви́ и держа́ву/ пою́щим ве́рно Твое́ та́инство.

Неискусобра́чная Влады́чице,/ Твои́ми моли́твами избавля́еми прегреше́ний,/ благоразу́мно вси Тя ублажа́ем.

Ин

Ирмо́с: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щься,/ и спасл еси́ всего́ мя челове́ка./ Тем зову́ Ти:// сла́ва си́ле Твое́й, Го́споди.

Ра́дуяся, Де́ву от непло́дове прие́млет,/ Ея́же ра́ди непло́дие мирско́е разреши́ся, Рождество́м де́вствующую,/ Иоаки́м богому́дрый и богоприя́тный.

Пра́отец Бо́жий Иоаки́м/ ны́не предлага́ет нам трапе́зу духо́вную, пребога́тый:/ я́ко Богома́терь и Пренетле́нную Отрокови́цу роди́л есть.

Умерщвле́ния и тли челове́ки спа́сшую/ благода́ть предлага́ет,/ хотя́щую бы́ти Ма́терь Бо́жию,/ Сло́во Присносу́щное прие́мшую,/ несказа́нно воплоща́емое.

От ко́рене Иессе́ева сопру́г возсия́,/ от него́же прозябе́ жезл, Цвет нося́щий,/ всего́ мя челове́ка облагово́нствующ ми́ром Божества́.

Богоро́дичен: Напра́ви мое́, Богоро́дице, житие́,/ повеле́нии Боже́ственными наставля́ющи/ вопло́щшагося Сло́ва из Тебе́,/ и к све́ту наста́ви, Де́во Ма́ти, Мари́е Богоневе́сто.

Песнь 5

Ирмо́с: Сеннопи́санный мрак гада́ний разори́в/ и ве́рных прибы́тием и́стины,/ Богоотрокови́цею, озари́в сердца́,// и нас све́том Твои́м, Христе́, наста́ви.

Воспои́м, лю́дие, всех вину́/ су́щаго по нам бы́ти Вино́внаго:/ Ея́же о́бразу ра́довахуся сподобля́еми проро́цы,/ явле́нное спасе́ние от Той плодя́ще.

От су́ха прозябе́ние жезла́ иере́ева/ Изра́илю показа́ проразсужде́ние,/ и ны́не све́тлость прозя́бших пресла́вно све́тит,/ от непло́дове всесла́вное рожде́ние.

Ин

Ирмо́с: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́треннюю, Царю́ ми́ра,/ просвети́ мя сия́нием Твои́м,// ино́го бо, ра́зве Тебе́, бо́га не зна́ю.

Целому́дренная дво́ица,/ чистоты́ заря́ сия́ющая,/ ю́же де́вства боже́ственным сия́нием украси́вшую непло́дное естество́ челове́ческое/ нам породи́ А́нна и Иоаки́м богоприя́тный.

Де́вственный богоукра́шенный престо́л,/ И́же всех превы́шши, дла́нию Боже́ственною,/ целому́дрия честны́й сопру́г и богому́драя дво́ица породи́,/ А́нна и Иоаки́м всехва́льнии.

Восто́ку Свы́ше я́вльшуся/ в наставле́ние заблу́ждших/ светоно́сную дверь/ боже́ственный Иоаки́м и А́нна, богому́дренно пожи́вшии,/ роди́ти, богови́дцы, я́ве сподо́бишася.

Зако́на Новаго богопи́санную скрижа́ль,/ на не́йже реше́ние грехо́в Ве́тхаго Зако́на Боже́ственное Сло́во прообрази́ пре́жде,/ я́ко от ка́мене, ны́не усече́/ манове́нием Вседержи́тель от непло́дове.

Богоро́дичен: Заре́ю Твое́ю, Богома́ти,/ уму́ моему́ озари́тися, омраче́нному грехо́м,/ повели́, Де́во,/ неве́дения мрак и прегреше́ний потребля́ющи,/ ины́я бо па́че Тебе́ храни́тельницы не вем.

Песнь 6

Ирмо́с: Ко Го́споду от ки́та Ио́на возопи́:/ Ты мя возведи́ из глубины́ а́да, молю́ся,/ да я́ко Изба́вителю, во гла́се хвале́ния,// и́стины же ду́хом пожру́ Тебе́.

Ко Го́споду в ско́рби непло́дства возопи́ша/ Богома́тере богому́дрии роди́тели/ и Сию́ в ро́ды родо́в роди́ша,/ на о́бщее спасе́ние и похвалу́.

Прия́та Небе́сный дар от Бо́га досто́ин/ Богома́тере богому́дрии роди́тели,/ саме́х Херуви́мов превы́шшее носи́ло,/ Сло́ва и Зижди́теля Роди́тельницу.

Ин

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:// от тли, Бо́же, мя возведи́.

Плодови́тое се́мя,/ е́же дре́вле непло́ды А́нна восприе́мши,/ от Боже́ственнаго осия́ния Отрокови́цу роди́ти сподо́бися,/ все́ми тва́рьми влады́чествующую.

Ны́не непло́ды ро́ждши, во́лею Бо́жиею,/ покоре́нием прия́ти Де́ву,/ ро́ждшую кроме́ плотски́я во́ли,/ Самому́ восхоте́вшу Бо́гу проявле́нно.

Озари́вся Иса́ия Ду́хом,/ Иоаки́ма и А́нны рождество́,/ сви́ток нов, ви́де,/ в не́мже написа́ся Сло́во воплоща́емо.

Богоро́дичен: Та́инству предтече́т та́инство:/ пре́жде бо неплодя́щая благода́ть/ породи́ спасе́ния Хода́таицу,/ де́вства рожде́нием я́вльшуюся нам.

Конда́к, глас 2.

Подо́бен: Вы́шних ища́:

Ра́дуется ны́не А́нна,/ непло́дства разреши́вшися соу́з,/ и пита́ет Пречи́стую,/ созыва́ющи вся воспе́ти/ Дарова́вшаго от чре́ва ея́ челове́ком// еди́ну Ма́терь и Неискусому́жную.

И́кос:

Я́же уз пре́жде безча́дства моли́твою изба́вльшися,/ призыва́ет ны спра́здновати чудеси́/ и да́ры принести́ Рожде́нней,/ моля́щияся пред Не́ю с любо́вию,/ Е́йже я́ко иногда́ де́вы предтеча́ху ско́ро, лику́юще и вопию́ще:/ се прии́де всех воззва́ние,/ се Ада́м свободи́ся,/ я́ко А́нна плод прозябе́,/ еди́ну Ма́терь и Неискусому́жную.

Песнь 7

Ирмо́с: Купина́ в горе́ огненеопа́льная и росоно́сная пещь халде́йская/ я́ве предписа́ Тя, Богоневе́сто,/ Боже́ственный бо невеще́ственный в веще́ственнем чре́ве Огнь неопа́льно прия́ла еси́./ Те́мже из Тебе́ Ро́ждшемуся пое́м:// благослове́н еси́, Бо́же оте́ц на́ших.

Твое́ в веще́ственных явле́ниих/ законополо́жник возбрани́ся разуме́ти/ и вели́кое, Пречи́стая, та́инство,/ не му́дрствовати земноре́вностная обра́зно наказу́емь иногда́./ Те́мже, уди́влься чудеси́, глаго́лаше:/ благослове́н Бог оте́ц на́ших.

Го́ру и дверь Небе́сную и мы́сленную Тя ле́ствицу/ боголе́пно лик боже́ственный пронарече́,/ от Тебе́ бо Ка́мень отсече́ся не рука́ми му́жескими,/ и дверь, е́юже про́йде Госпо́дь, И́же чуде́с Бог оте́ц на́ших.

Ин

Ирмо́с: Богопроти́вное веле́ние/ беззако́ннующаго мучи́теля/ высо́к пла́мень вознесло́ есть;/ Христо́с же простре́ богочести́вым отроко́м ро́су духо́вную,// Сый благослове́н и препросла́влен.

От ко́рене прозя́бши, дво́ице свята́я, Давида богому́драго,/ жезл всесвяще́нный, Де́ву Чи́стую, ми́ру породи́сте,/ Цвет свяще́ннейший нам, Христа́, безсе́менно возсия́вшую.

Свещу́ многосве́тлую Богоро́дицу/ А́нна боже́ственная, я́коже златоза́рен све́щник, нося́щи,/ мир весь просвети́ боже́ственным све́том,/ де́вства све́тлыми сия́ньми.

Прароди́телие сла́внии/ воплоти́вшагося за неизрече́нную ми́лость Бо́га Вседержи́теля/ от Дще́ре богому́дрыя ва́шея, пребога́тии,/ ны́не мне, прибе́гшему к вам, согреше́ний разреше́ние испроси́те.

Богоро́дичен: Я́ко су́ще пребо́льшии роди́телей,/ все́ми Влады́чествующую тва́рьми роди́сте, Мари́ю Пречи́стую,/ ро́ждшую Бо́га, Пло́тию обложе́на,/ нам уподо́бльшася за благоутро́бие мно́гое.

Песнь 8

Ирмо́с: В пещи́ о́трочестей прообрази́л еси́ иногда́ Твою́ Ма́терь, Го́споди,/ о́браз, же Сия́ из огня́ изыма́ше неопа́льно входя́щия, / Ю́же пое́м, я́вльшуюся Тобо́ю конце́м днесь,// и превозно́сим во вся ве́ки.

Я́же к Бо́гу на́шего примире́ния предопределе́нная ски́ния/ е́же бы́ти ны́не начина́ет,/ иму́щи роди́ти Сло́ва, нам дебельство́м Пло́ти я́вльшася,/ Его́же пое́м, из не су́щих во е́же бы́ти Тем прие́мшии,/ и превозно́сим во вся ве́ки.

Непло́дства преложе́ние мирско́е благи́х разреши́ непло́дство/ и я́сно чу́до Христа́ показа́, к земны́м прише́дша,/ Его́же пое́м, из не су́щих во е́же бы́ти Тем прие́мшии,/ и превозно́сим во вся ве́ки.

Ин

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода,// и превозноси́те во вся ве́ки.

Бога́тством кипя́щии доброде́телей/ сла́вою Боже́ственною укра́шенную Цари́цу Де́ву/ Иоаки́м честны́й и А́нна целому́дренная роди́ша,/ ю́же вся тварь пое́т я́ко Богоро́дицу.

Жезл си́лы нам ва́ми, дру́ги Бо́жиими, по́слан бысть,/ Всенепоро́чная Неве́ста,/ Еюже посреде́ враго́в безбо́жных одолева́ем,/ кова́рствия тех попира́юще.

Ору́жие нам от Бо́га благоволе́ния/ тобо́ю, сопру́же свяще́ннейший, дарова́ся,/ и́мже ны́не мы, ве́рнии, кра́сне при́сно венча́емся,/ Бо́га ро́ждшая Чи́стая Де́во Ма́ти.

Си́ла Бо́жия плодоноше́нием непло́дствующее чре́во отве́рзе,/ и предгряде́т Дверь де́вства све́тлостьми,/ Ея́же ра́ди Сло́во прии́де к земны́м,/ вопло́щься неизрече́нным сло́вом.

Богоро́дичен: Светоли́тии из Тебе́ Воплоще́ннаго нас ра́ди/ просвеще́нная дво́ица изря́дная роди́телей Твои́х/ да бу́дет, Пренепоро́чная Влады́чице,/ хода́тайство нам благ Небе́сных.

Песнь 9

Ирмо́с: Я́же пре́жде Со́лнца Свети́льника Бо́га возсия́вшаго,/ пло́тски к нам прише́дшаго,/ из боку́ Деви́чу неизрече́нно воплоти́вшая,/ Благослове́нная Всечи́стая,// Тя, Богоро́дице, велича́ем.

И́же непокори́вым лю́дем из ка́мене источи́в во́ду,/ благопокори́вым же язы́ком да́рует от чресл непло́дных плод на весе́лие нам,/ Тя, Богома́ти Пречи́стая,/ ю́же досто́йно велича́ем.

Напра́снаго дре́вняго Отъя́тельницу осужде́ния и прама́тере исправле́ние,/ ю́же ро́да к Бо́гу вину́ присвое́ния, к Зижди́телю мост,/ Тя, Богоро́дице, велича́ем.

Ин

Ирмо́с: Безнача́льна Роди́теля Сын, Бог и Госпо́дь,/ вопло́щься от Де́вы, нам яви́ся,/ омраче́нная просвети́ти, собра́ти расточе́нная,// тем Всепе́тую Богоро́дицу велича́ем.

Единому́дреннии и единоду́шнии доброде́телию су́ще,/ Пречи́стыя Де́вы честни́и роди́телие,/ соверша́ющим усе́рдно прехва́льную и сла́вную па́мять ва́шу,/ свяще́ннейший, спасти́ся моли́теся.

Па́жить разруша́ете сме́ртную, сла́внии,/ Жи́зни Ма́терь све́тло ро́ждшии,/ потре́бльшую сея́ прило́г/ и безсме́ртныя жи́зни исхода́таившую наде́жду ве́ры ра́ди.

Кра́сное я́ко со́лнце Иоаки́м,/ единя́яся светоно́сней луне́ А́нне,/ породи́ де́вства лучу́,/ Е́юже Заря́ Боже́ственнаго Существа́,/ пло́ти по Ипоста́си соедини́вшися, нам возсия́.

Целому́дренно пожи́вше и благоче́стно, блаже́ннии,/ ны́не сла́дости несказа́нныя сподо́бистеся,/ Богоявле́ния получи́вше И́же от вас ми́ру я́вльшагося,/ Его́же моли́те спасти́ся душа́м на́шим.

Свети́лен.

Подо́бен: Посети́л ны есть:

Я́же Е́вы кля́тву Потре́бльшая/ ны́не ражда́ется от ста́рец непло́дных,/ от А́нны и Иоаки́ма,/ Ю́же со А́нгелы вси по до́лгу в пе́снех, ве́рнии, да восхва́лим.

Сла́ва, и ны́не:

Я́ко от со́лнца со́лнце и от луны́ луна́,/ от А́нны и Иоаки́ма Всенепоро́чная Отрокови́ца роди́ся/ и просвети́ ми́ра концы́ Свои́м сия́нием,/ Ю́же пою́ще, досто́йно ублажи́м,/ соверша́юще честну́ю их па́мять.

На стихо́вне стихи́ры пра́здника, глас 6.

Подо́бен: Тридне́вен:

Ны́не игра́й, проро́че Дави́де,/ се бо от чресл твои́х Де́ва,/ Богоотрокови́ца Мари́я,/ роди́ся пресла́вно,/ Ея́же ра́ди земни́и боже́ственно// обрето́ша воззва́ние паде́ния.

Стих: Слы́ши, Дщи, и виждь,// и приклони́ у́хо Твое́.

Умерщвле́ния совлачи́тся ти́ны, благода́тию,/ Ада́м со Е́вою,/ и оживля́ются всеро́дная,/ от непло́дныя бо ро́ждшися/ и́стинно, Богоро́дица// мирско́е разреши́ непло́дство.

Стих: Лицу́ Твоему́ помо́лятся// бога́тии лю́дстии.

Всечестно́е Твое́ рождество́/ све́тло торжеству́ем со А́нгелы,/ Ма́ти Де́во Чи́стая./ Но, о Богороди́тельнице,/ не преста́й защища́ти христиа́н,// воспева́ющих Тя.

Сла́ва, и ны́не, пра́здника, глас 2:

Днесь Всенепоро́чная Чи́стая произы́де от непло́дове,/ днесь вся́ческая ра́дуются в Тоя́ рождестве́./ Ада́м уз разреша́ется, и Ева кля́твы свободи́ся,/ Небе́сная вся веселя́тся,/ и мир челове́ком да́руется./ Мы же, славосло́вяще, вопие́м:/ сла́ва в вы́шних Бо́гу, и на земли́ мир,// в челове́цех благоволе́ние.

НА ЛИТУРГИ́И

Блаже́нны пра́здника, песнь 1-я, 2-го гла́са, на 4, и святы́х, песнь 6-я, на 4. Проки́мен пра́здника, и до отда́ния. Та́же святы́х, глас 4: Ди́вен Бог во святы́х Свои́х,// Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Апо́стол к Гала́том, зача́ло 210, от полу́. Аллилу́ия, глас 1: Спасе́ние пра́ведных от Го́спода, и Защи́титель их есть во вре́мя ско́рби. Ева́нгелие от Луки́, зача́ло 36. Прича́стен пра́здника, и святы́х: Ра́дуйтеся, пра́веднии, о Го́споде, пра́вым подоба́ет похвала́.