Служба в честь святых чудотворцев Муромских князя Петра, во иноцех Давида, и княгини Февронии, во инокинях Евфросинии

ВЕ́ЧЕР

Блаже́н муж: 1-й антифо́н. На Го́споди, воззва́х: стихи́ры, творе́ние господи́на Пахо́мия мона́ха, глас 4.         

Подо́бен: Я́ко до́бля:

Прииди́те, духо́вне соше́дшеся днесь, ве́рнии,/ на́ша засту́пники восхва́лим,/ прего́рдаго зми́я попра́вшия,/ Петра́ благочести́ваго вку́пе с Февро́ниею,/ чудотво́рцы Му́ромския,/ яко́ целому́дрия рачи́тели,/ Христу́ моля́щияся о спасе́нии душ на́ших.

Наста́ ны́не всесве́тлая па́мять ва́ша,/ пресла́вный Пе́тре с прему́дрою Февро́ниею,/ осеня́ющи новоизбра́нныя лю́ди./ Тем Христа́ моли́те о спасе́нии всех,/ любо́вию вас непреста́нно, блаже́ннии, почита́ющих,/ чудотво́рцев Му́ромских.

Пе́рвее у́бо, прехва́льнии,/ от ю́ности ва́шея Христу́ рабо́тасте,/ су́щая в ми́ре сем, я́ко уме́ты, презре́вше/ и сего́ ра́ди ми́лостынею и моли́твами/ до́бре Тому́ угоди́вше./ Тем и по сме́рти исцеле́ние подава́ете всем,/ ве́рою вас почита́ющим.

И́ны стихи́ры, творе́ние Михаи́ла мона́ха, глас 2.

Подо́бен: Ки́ими похва́льными:

Ки́ими похва́льными венцы́/ венча́ем блаже́ннаго Петра́/ вку́пе с прему́дрою Февро́ниею,/ разделе́ных те́лом и совоку́пленых благода́тию?/ О́ваго, я́ко прему́дра зми́я победи́вшаго,/ о́ву же, я́ко целому́дрия сохра́нницу./ Сего́ ра́ди, соше́дшеся, воспое́м пе́сньми ра́достными,/ си́це глаго́люще:/ ра́дуйтеся, прехва́льнии,/ люде́й правосла́вных похвале́ние,/ земли́ Росси́йския заступле́ние,/ оте́чества своего́ храни́телие,/ вас бо безсме́ртныя сла́вы венцы́ венча́ Христо́с Бог,/ име́яй ве́лию ми́лость.

Ки́ими пе́сненными добро́тами/ восхва́лим Петра́ блаже́ннаго/ с прехва́льною Февро́ниею?/ Я́ко богоразу́мная кри́ла,/ прелете́вшая от земли́ на Не́бо,/ и прибли́жившася престо́лу Святы́я Тро́ицы,/ и со А́нгелы ве́село ликовству́ющая,/ и Христу́ моля́щаяся о устрое́нии ми́ра/ и о сохране́нии земли́ Росси́йския от наше́ствия сопроти́вных/ и междоусо́бныя бра́ни,/ и́же любо́вию восхваля́ют/ и непреста́нно почита́ют/ Му́ромския чудотво́рцы.

Ки́ими пе́сньми духо́вными похва́лим блаже́нных,/ спле́тшихся любо́вию вку́пе обою́?/ Пе́сньми ра́достными воспое́м, си́це глаго́люще:/ ра́дуйтеся, блаже́ннии и треблаже́ннии,/ в боголю́бии пожи́вшии,/ смире́ние и поще́ние сохра́ньшии/ и ми́лостыню да́рующии,/ о не́йже Сам Христо́с та́ко рече́:/ блаже́ни ми́лостивии, я́ко ти́и поми́ловани бу́дут./ И сего́ ра́ди вопие́м к ним си́це:/ пресла́вный Пе́тре вку́пе с прему́дрою Февро́ниею,/ моли́те Христа́ о гра́де сро́дствия ва́шего/ и нам низпосла́ти мир и ве́лию ми́лость.

Ки́ими смире́нными устна́ми/ воспое́м Петра́ блаже́ннаго с пречестно́ю Февро́ниею,/ яви́вшихся в Росси́йстей земли́ но́вых чудотво́рцев/ и свети́л незаходи́мых?/ Со́лнца мы́сленнаго зве́зды пресве́тлыя,/ просвеща́ющия весь мир чуде́с све́тлостию,/ печа́льных утеше́ние,/ плене́нных избавле́ние от го́рькия рабо́ты,/ кре́пость и забра́ло гра́да на́шего./ Те́мже прииди́те, вси ве́рнии,/ пра́здник блаже́нных псало́мски торжеству́ем,/ да моли́твами их вра́жия шата́ния вся Христо́с низложи́т,/ име́яй ве́лию ми́лость.

Сла́ва, глас 6. Самогла́сен:

Блаже́нно и треблаже́нно оте́чество ва́ше,/ блаже́н и град, в не́мже жили́ще име́сте,/ прече́стен же и свят храм,/ в не́мже положе́на бы́ша честна́я телеса́ ва́ша,/ пресла́вный Пе́тре с прему́дрою Февро́ниею,/ Христу́ моли́теся,/ Его́же от ю́ности возлюби́сте,/ сохрани́ти оте́чество ва́ше/ и душа́м на́шим дарова́ти мир и ве́лию ми́лость.

И ны́не, Богоро́дичен.

Вход. Проки́мен дне. Чте́ния преподо́бническая.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очеса́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же суть в ми́ре./ Ибо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (главы 5 и 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́,/ внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

На стихо́вне стихи́ры, глас 2.

Подо́бен: До́ме Евфра́фов:

Я́ко вели́кое со́лнце,/ вселе́нней всей/ яви́стеся, блаже́ннии,/ чудесы́ просвеща́юще весь мир,/ те́мже, соше́дшеся, вси воспое́м вас.

Стих: Честна́ пред Го́сподем/ смерть преподо́бных Его́.

Све́том сия́я/ Боже́ственныя благода́ти,/ пресве́тлый ваш пра́здник ра́достен всем,/ его́же, ра́дующеся,/ и́скренно вси восхва́лим.

Стих: Что́ возда́м Го́сподеви о всех,/ я́же воздаде́ ми?

Прииди́те, му́ромстии наро́ди,/ вели́цыи и ма́лии,/ восхва́лим в вас пре́жде ца́рствовавшия,/ те́плыя предста́тели,/ но́выя чудотво́рцы, Петра́ и Февро́нию.

Сла́ва, глас 8. Самогла́сен:

Ра́дуйся и весели́ся о Го́споде, гра́де Му́роме,/ и све́тло торжеству́й и лику́й, Це́рковь Бо́жия,/ в не́йже лежи́т честно́е сокро́вище,/ пресла́вных но́вых чудотво́рцев/ Петра́ благочести́ваго и Февро́нии прему́дрыя,/ сокро́вище дра́го и ковче́г пресла́вен,/ телеса́, чудеса́ точа́щая всем, притека́ющим с ве́рою./ Сего́ ра́ди прииди́те, вси лю́дие,/ соше́дшеся, ве́рнии, поклони́мся святы́м./ Тецы́те, собра́вшеся, и псало́мски восплещи́те рука́ми,/ и, лику́юще, ра́дуйтеся, и, веселя́щеся, си́це глаго́лите:/ ра́дуйтеся, пресла́внии чудотво́рцы,/ Пе́тре блаже́нне и Февро́ние Богому́драя,/ гра́да бо на́шего утвержде́ние/ и нас, ве́рных, спасе́ние./ И ны́не, в па́мяти ва́шей,/ испроси́те у Христа́ дарова́ти душа́м на́шим/ мир и ве́лию ми́лость.

И ны́не, Богоро́дичен.

Тропа́рь, глас 8:

Яко благочести́ваго ко́рене пречестна́я о́трасль был еси́,/ до́бре во благоче́стии пожи́в, блаже́нне Пе́тре,/ та́ко и с супру́жницею твое́ю, прему́дрою Февро́ниею,/ в ми́ре Бо́гу угоди́вше и преподо́бных житию́ сподо́бистеся./ С ни́миже моли́теся Го́сподеви/ сохрани́ти без вре́да оте́чество ва́ше,/ да вас непреста́нно почита́ем.

Сла́ва, и ны́не, Богоро́дичен: И́же нас ра́ди рожде́йся от Де́вы:

НА У́ТРЕНИ

На Бог Госпо́дь: тропа́рь, два́жды. Сла́ва, и ны́не, Богоро́дичен.

По 1-й стихоло́гии седа́лен, глас 1.

Подо́бен: Лик А́нгельский:

Вси пра́зднуем вку́пе всесвяту́ю па́мять Петра́ и Февро́нии прему́дрых,/ Це́рковь бо сла́вит, вопию́щи к ним:/ моли́твами ва́шими, блаже́ннии, исцели́те неду́ги и боле́зни на́ша/ и вся́ких искуше́ний изба́вите ве́рою па́мять ва́шу восхваля́ющих.

Сла́ва, и ны́не, Богоро́дичен:

Чу́до чуде́с, Благода́тная, в Тебе́ зря́щи, тварь ра́дуется:/ зачала́ бо еси́ безсе́менно родила́ еси́ неизрече́нно,/ Его́же чинонача́лия А́нгелов ви́дети не мо́гут./ Того́ моли́ о душа́х на́ших.

По 2-й стихоло́гии седа́лен, глас 3.

Подо́бен: Красоте́ де́вства:

Иму́ще дух и́стинный, прему́дрии,/ те́мже мы, соше́дшеся, ве́рнии, па́мять ва́шу велича́ем,/ и облобыза́ем честну́ю ра́ку, исцеле́ния получа́юще неоску́дно,/ и, пою́ще, рцем си́це:/ Пе́тре пресла́вне ку́пно с супру́жницею Февро́ниею,/ Христу́ моли́теся сохрани́ти оте́чество ва́ше,/ и разруши́ти междоусо́бную страсте́й на́ших брань,/ и дарова́ти нам ве́лию ми́лость.

Сла́ва, и ны́не, Богоро́дичен:

Красоте́ де́вства Твоего́ и пресве́тлой чистоте́ Твое́й Гаврии́л удиви́вся,/ вопия́ше Ти, Богоро́дице:/ ку́ю Ти похвалу́ принесу́ досто́йную?/ Что́ же возымену́ю Тя?/ Недоумева́ю и ужаса́юся./ Те́мже, я́ко повеле́н бых, вопию́ Ти:/ ра́дуйся, Благода́тная.

Хвали́те И́мя Госпо́дне: Припе́в:

Ублажа́ем вас, святи́и чудотво́рцы Пе́тре и Февро́ние,/ и чтим святу́ю па́мять ва́шу,/ вы бо мо́лите за ны/ Христа́, Бо́га на́шего.

Псало́м избра́нный: Блаже́н муж, боя́йся Го́спода:

По полиеле́и седа́лен, глас 8.

Подо́бен: Прему́дрости:

Прииди́те, вси лю́дие, хвалу́ принесе́м пресла́вным и богому́дрым чудотво́рцем/ Петру́ и Февро́нии, си́це вопию́ще:/ ра́дуйся, преблаже́нне Пе́тре, и́же го́рдаго зми́я свире́пство погуби́л еси́;/ та́кожде и ны́не с супру́жницею твое́ю засту́пницы и хода́таи бу́дите оте́честву ва́шему,/ и сопроти́вных го́рдость низложи́те,/ и грехо́в оставле́ние испроси́те/ чту́щим любо́вию святу́ю па́мять ва́шу.

Сла́ва, и ны́не, Богоро́дичен:

О Тебе́ ра́дуется, Благода́тная, вся́кая тварь,/ А́нгельский собо́р и челове́ческий род,/ освяще́нный хра́ме и раю́ слове́сный,/ де́вственная похвало́, из Нея́же Бог воплоти́ся/ и Младе́нец бысть пре́жде век сый Бог наш:/ ложесна́ бо Твоя́ престо́л сотвори́ и чре́во Твое́ простра́ннее небе́с соде́ла./ О Тебе́ ра́дуется, Благода́тная, вся́кая тварь, сла́ва Тебе́.

Та́же степе́нна, 4-го гла́са, антифо́н 1-й. Проки́мен: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Всяк град и страна́,/ сла́вному гра́ду на́шему сра́дуйтеся,/ и псало́мски восплещи́те рука́ми вку́пе,/ духо́вное днесь торжество́ пра́зднующе/ Петра́ благочести́ваго и Февро́нии сла́вныя,/ и пе́сньми похвали́те,/ всечестны́й сей день соверша́юще,/ в весе́лии вопию́ще си́це:/ приими́те пе́ние люде́й ва́ших, блаже́ннии,/ и моля́щимся пода́йте неоску́дно/ исцеле́ние и ве́лию ми́лость.

Кано́н Богоро́дицы, со ирмосо́м на 6, глас 2: Нетре́ну, необы́чну: Святы́м же два кано́на на 8. Кано́н святы́м, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Песнь Твоему́ уго́днику, на земли́ Тебе́ просла́вльшему,/ Петру́ принести́, Бо́же, да́руй ми,/ я́ко да Смыслода́вца пе́сньми возвели́чу Тя.

Вас, преблаже́ннии, оте́честву ва́шему,/ я́ко пресве́тлое со́лнце, Христо́с показа́,/ чудесы́ всех озаря́ющее, ве́рою к вам приходя́щих.

Я́ко о теле́сных небре́гше, и земна́я, я́ко тле́нная, возненави́девше,/ и сего́ ра́ди ми́ра отре́кшеся, преподо́бных че́сти сподо́бистеся,/ с ни́миже о ми́ре моли́теся.

Богоро́дичен: Пречи́стая Богоро́дице, ро́ждшая пло́тию присносу́щное Сло́во Безнача́льнаго Отца́, Присноде́во,/ Ему́же ны́не взыва́ем:/ Изба́вителю Бо́гу на́шему пои́м.

Други́й кано́н чудотво́рцем, творе́ние господи́на Михаи́ла мона́ха, глас 1.

Песнь 1

Ирмо́с: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.

Благочести́ваго и венцено́снаго Петра́ вку́пе с Февро́ниею,/ соше́дшеся, по достоя́нию восхва́лим,/ чуде́с пода́теля оби́льных и спаса́ющаго ду́ши на́ша.

Пе́сньми и пе́ньми духо́вными восхва́лим блаже́нных вку́пе, си́це глаго́люще:/ ра́дуйтеся, прехва́льнии,/ оте́честву ва́шему пресве́тлии свети́льницы и тве́рдии засту́пницы.

Аще и на коне́ц лет новопросвеще́нная Росси́йская земля́ сих блаже́нных израсти́,/ но дре́вних че́сти сподо́бишася:/ дарова́ния бо чуде́с оби́льно подаю́т приходя́щим к ним.

Богоро́дичен: Ума́ моего́, Всенепоро́чная,/ омраче́ния све́том Твои́м отжени́ и тьмы изба́ви мя ве́чнующия,/ я́ко да пою́ вели́чия Твоя́.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Безпомо́щным бу́ди помо́щник, блаже́нне Пе́тре,/ и печа́льным ми́лостивное утеше́ние,/ да, твои́ми моли́твами избавля́еми, почита́ем тя.

Я́коже иногда́ зми́я уби́в, коне́чному безве́стию пре́дал еси́,/ та́ко и ны́не твое́ оте́чество борю́щих победи́, треблаже́нне,/ да тя прославля́ем.

Виждь уны́ние, виждь печа́ль, виждь беду́, на ны напа́дающую от проти́вных,/ те́мже моли́твою твое́ю ко Го́споду премени́, Пе́тре,/ да благоче́стно тя почита́ем.

Богоро́дичен: Тебе́ вси стяжа́хом, христиа́не, прибе́жище и сте́ну/ и Тебе́ славосло́вим немо́лчно, Безневе́стная.

Ин

Ирмо́с: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми не́бо утвержде́й второ́е/ и основа́вый на вода́х зе́млю, Всеси́льне.

Тебе́ в чудесе́х сла́вна росси́йским страна́м показа́ Бог, Пе́тре преблаже́нне,/ и украси́ тя Небе́сными дарми́./ Того́ ны́не моли́ поми́ловати всех нас.

Свети́льницы пресве́тлии, я́коже со́лнце второ́е, сия́юще,/ нас озари́те, соверша́ющих па́мять ва́шу,/ преблаже́ннии Пе́тре и Февро́ние.

Весе́лия хода́тай наста́ нам,/ светоно́сный день Петра́ и Февро́нии прему́дрых,/ и́же ве́рою воспева́ющим их да́руют ве́лию ми́лость.

Богоро́дичен: Изба́ви нас от всех напа́стей/ и от мно́гих собла́зн зми́евых и тьмы, Всенепоро́чная,/ Я́же Свет поро́ждшая нам невече́рний.

Седа́лен, глас 4:

Благослове́нному и светоно́сному торжеству́,/ я́коже со́лнцу возсия́вшему, Петра́ и Февро́нии, во всем ми́ре,/ к ни́мже стеце́мся, ве́рнии, и непреста́нно вопие́м си́це:/ а́ще и преидо́сте от земли́, пресла́внии, но нас не отлучи́стеся/ и та́мо со А́нгелы Тро́ице предстоите́,/ Ю́же моли́те спасти́ ду́ши на́ша.

Сла́ва, и ны́не, Богоро́дичен:

Сло́во О́тчее, Христа́ Бо́га на́шего, от Тебе́ воплоти́вшагося, позна́хом, Богоро́дице Де́во,/ Еди́на Чи́стая, Еди́на Благослове́нная./ Тем непреста́нно Тя, воспева́юще, велича́ем.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Я́ко хода́тай и засту́пник оте́честву твоему́,/ я́ко сопроти́вных реши́тель бу́ди, заступа́я лю́ди твоя́,/ тебе́, Пе́тре, сла́вящия.

Я́ко в Небе́сных оби́телех с преподо́бными и пра́ведными веселя́ся,/ преблаже́нне Пе́тре ку́пно с Февро́ниею,/ не преста́й моля́ о лю́дех твои́х.

Тебе́ мо́лимся, преблаже́нне, сопроти́вных шата́ние низложи́/ и неду́ги челове́ков облегчи́,/ я́ко да во гла́сех хвале́ния тебе́ велича́ем.

Богоро́дичен: Очище́ние на́шим да́руй прегреше́нием, я́ко Пребла́г,/ и умири́ мир Твой, Бо́же, моли́твами ро́ждшия Тя.

Ин

Ирмо́с: Ду́хом прови́дя, проро́че, Авваку́ме, Словесе́ воплоще́ние,/ пропове́дал еси́, вопия́:/ внегда́ прибли́житися ле́том, позна́ешися,/ внегда́ приити́ вре́мени, пока́жешися./ Сла́ва си́ле Твое́й, Го́споди.

Зми́я у́бо иногда́ уби́в, блаже́нне, коне́чней того́ па́губе пре́дал еси́,/ та́ко и ны́не, Пе́тре, оте́чество твое́ сохраня́й ненаве́тно/ вку́пе с Февро́ниею моли́твами твои́ми.

Заре́ю трисо́лнечныя благода́ти сия́я све́тлый ваш пра́здник, блаже́ннии,/ страстна́го омраче́ния бесо́вскаго избавля́йте/ творя́щих ве́рою па́мять ва́шу.

Днесь день святы́й пра́здничный/ мона́хов созыва́ет стада́ на весе́лие и трапе́зу духо́вную/ и на пи́щу нетле́нныя жи́зни и Боже́ственнаго наслажде́ния чудотво́рцев.

Богоро́дичен: Разуме́в проро́к Ду́хом Бо́жиим,/ го́ру Тя приосене́нную преднаписа́, Чи́стая;/ иста́явшую зно́ем мно́гих прегреше́ний ду́шу мою́ прохлади́ хода́тайством Твои́м, Де́во,/ еди́на бо Ты челове́ком исправле́ние.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Земля́ освяти́ся, прие́мши честна́я телеса́ ва́ша,/ Богоблаже́ннии Пе́тре и Февро́ние,/ челове́цы же, прие́млюще ва́ми исцеле́ние, Христа́ сла́вят,/ и́скренно вас просла́вльшаго.

А́ще и преидо́сте от земли́, но к Небе́сным доспе́сте/ и та́мо со А́нгелы Тро́ице предста́сте,/ Ю́же моли́те спасти́ любо́вию вас почита́ющих, блаже́ннии.

Я́ко зве́зды пресве́тлыя и я́ко незаходи́мое со́лнце, стяжа́вше вас,/ оте́чество ва́ше хва́лится,/ почита́юще па́мять ва́шу пречестну́ю, Пе́тре и Февро́ние.

Богоро́дичен: Де́ву пое́м Тя по рождестве́, Богоро́дице,/ Ты бо пло́тию Бо́га Сло́ва нам родила́ еси́,/ Ему́же вси си́це зове́м:/ пути́ на́ша напра́ви, мо́лим Ти ся.

Ин

Ирмо́с: Све́тлый нам возсия́й Свет присносу́щный,/ у́тренюющим о судьба́х за́поведей Твои́х,/ Влады́ко Человеколю́бче, Христе́, Бо́же наш.

О предо́брая дво́ице!/ О пресве́тлая свети́ла!/ О благосопряже́ние, един свет во двою́ телесе́ сущ!/ О свети́льницы блази́и своему́ жити́ю бы́вше!/ Яре́м бо Госпо́день взе́мше, Тому́ от души́ после́довасте ве́рою.

Досточу́дная и пресла́вная па́мять ва́ша возсия́ в Росси́йстей земли́, блаже́ннии,/ и ра́достно ве́рных весели́т собо́р,/ и́скренно вас в пе́снех, святи́и, сла́вящих.

Святи́тели и свяще́нницы, мона́си и прости́и, и ста́рцы со ю́нотами,/ и всяк во́зраст, све́тло предыгра́йте,/ па́мять пресла́вных Петра́ и Февро́нии в пе́снех велича́юще.

Богоро́дичен: Светообра́зный Христо́в храм, Отрокови́це,/ моли́твами Твои́ми Отцу́ и Сыну и Свято́му Ду́ху и нас хра́мы сотвори́,/ преподо́бныя содева́ющи, Пречи́стая.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/к Тебе́ бо возопи́х, и услы́ши мя,/ Бо́же спасе́ния моего́.

О пречестна́я дво́ице!/ О вели́цыи свети́льницы!/ Освяти́те и просла́вите любо́вию вас в пе́снех сла́вящих, чудотво́рцы.

Я́ко пресве́тлая дво́ице и я́ко пречестна́я верста́ и благосочета́ние,/ яре́м Госпо́день взе́мше, Тому́ от души́ порабо́тасте.

Я́ко сове́тницы до́брии своему́ жити́ю,/ еди́ну мысль во двою́ те́лу иму́ще, мир чудесы́ просвеща́ете,/ те́мже и нас озари́те моли́твами ва́шими.

Богоро́дичен: Уясня́ют проро́честии гла́си Бо́жию Тя, Де́во, Роди́тельницу,/ пое́м же Тя и мы, ви́дяще сбытие́ честны́х прорица́ний,/ де́вству вои́стинну и чистоте́ вмести́лище.

Ин

Ирмо́с: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.

От прече́стна ко́рене израсте́ ветвь пресла́вная,/ и, благоче́стно на земли́ пожи́в, Пе́тре,/ прия́телище чи́сто Ду́ха Свята́го был еси́:/ просвеща́й пою́щих ны́не па́мять твою́.

Весе́лия днесь испо́лнися Росси́йская земля́,/ в наро́читый день пра́здника ва́шего, пресла́внии чудотво́рцы,/ и, пою́щи, си́це глаго́лет:/ моли́те Христа́ сохрани́ти оте́чество ва́ше от язы́ка чужда́го.

Сиро́т и вдови́ц засту́пницы, и в беда́х необори́мии помо́щницы,/ и всех притека́ющих к вам приста́нище небу́рное,/ и неле́стное ути́шие су́щих во гресе́х.

Богоро́дичен: Вели́чия Тебе́, Чи́стая, сотвори́ Христо́с Бог наш,/ Его́же моли́ при́сно возвели́чити и в нас бога́тую Его́ ми́лость,/ Пренепоро́чная Влады́чице.

Конда́к, глас 8.

Подо́бен: Взбра́нной:

Ми́ра сего́ княже́ние и сла́ву вре́менну помышля́я,/ сего́ ра́ди благоче́стно в ми́ре пожи́л еси́, Пе́тре,/ ку́пно и с супру́жницею твое́ю прему́дрою Февро́ниею,/ ми́лостынею и моли́твами Бо́гу угоди́вше./ Те́мже, и по сме́рти неразлу́чно во гро́бе лежа́ще,/ исцеле́ние неви́димо подава́ете,/ и ны́не Христу́ моли́теся/ сохрани́ти град же и лю́ди, и́же вас сла́вящих.

И́кос:

Уясни́ язык мой, Спа́се, и умири́ се́рдце мое́,/ разшири́ уста́ моя́ и напо́лни Ду́ха и прему́дрости,/ да и́миже возглаго́лю и воспою́ си́це Твоя́ чудотво́рцы:/ ра́дуйся, Пе́тре блаже́нне с прехва́льною Февро́ниею вку́пе./ Ра́дуйтеся, зе́мли Росси́йстей засту́пницы и князе́м правосла́вным помо́щницы./ Ра́дуйтеся, оте́честву ва́шему храни́тели и гра́ду на́шему утвержде́ние./ О пречестна́я дво́ице и благо́е сопряже́ние, Христу́ моли́теся/ сохрани́ти град и лю́ди, и́же вас сла́вящих.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.

В боле́зни к тебе́ прибега́ющих избавля́й, пребла́женне Пе́тре/ ку́пно с Февро́ниею, Христу́ вопию́щих:/ оте́ц на́ших Бо́же, благослове́н еси́.

Всем приста́нище бу́дите, преблаже́ннии,/ и небу́рное оти́шие су́щим во гресе́х,/ да и мы с ва́ми Христу́ возопие́м:/ оте́ц на́ших Бо́же, благослове́н еси́.

Прибе́жище да ми бу́дите в день гне́ва, Богоблаже́ннии,/ я́ко посреде́ хожду́ сете́й мно́гих:/ те́мже изба́вите мя от них, да возмогу́ воспе́ти вас.

Днесь пресла́вная па́мять Петра́ и Февро́нии, я́ко со́лнце, возсия́ в ми́ре,/ в ню́же соше́дшеся, вси воспое́м си́це:/ оте́ц на́ших Бо́же, благослове́н еси́.

Богоро́дичен: Ка́пля Богото́чная, от Тебе́ ро́ждшаяся, мир освяти́, Богоро́дице Де́во:/ ка́пли мне ми́лости источи́,/ освяща́ющия ду́ши и помышле́ния земны́х.

Ин

Ирмо́с: О́троцы, благоче́стию совоспита́ни,/ злочести́ваго веле́ния небре́гше,/ о́гненнаго преще́ния не убоя́шася,/ но, посреди́ пла́мене стоя́ще, поя́ху:/ отце́в Бо́же, благослове́н еси́.

Во всех страна́х про́йде веща́ние,/ я́ко гра́ду Му́рому яви́шася чудотво́рцы пресла́внии,/ да́рующе мно́жество исцеле́ний всем, приходя́щим к ним/ и ве́рою пою́щим их.

Се ны́не стеко́шася от всех градо́в и стран вси святи́телие, и свяще́нницы,/ и мона́си, и прости́и, бога́тии и убо́зии, вси ра́дующеся вку́пе,/ хвалу́ возда́ти вам, Богоблаже́ннии.

Чудесы́ у́бо твои́ми, я́ко цвет, процве́л еси́, пресла́вне Пе́тре, я́коже рече́ проро́к:/ пра́ведник, я́ко фи́никс, процвете́т./ Сего́ ра́ди вси тя ны́не сла́вим, блаже́нне.

Богоро́дичен: Тебе́, Всесвята́я Чи́стая, раби́ Твои́,/ всегда́ во дни и в нощи́ мо́лим сокруше́нною мы́слию,/ прося́ще избавле́ние пода́ти грехо́в на́ших Твои́ми моли́твами.

Песнь 8

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

Очи́сти и прости́ согреше́ния на́ша, Безгре́шне,/ моли́твами Твои́х уго́дник Петра́ и Февро́нии,/ да пое́м Тя, Христе́, во ве́ки.

И́же от сердца́ руко́ю недосто́йною приноси́мое вам хвале́ние, блаже́ннии, приими́те/ и мольбу́ сотвори́те о нас ко Христу́ Бо́гу.

Тро́ичен: Певце́м, Тебе́ пою́щим, Тро́ице Пресвята́я,/ согреше́ния оста́ви, я́ко Пребла́га,/ моли́тв ра́ди Петра́ и Февро́нии, да Тя пое́м во ве́ки.

Богоро́дичен: Божества́ сосу́д бы́вши, Чи́стая,/ просвети́ мя в повеле́нии Све́та ходи́ти, Пречи́стая,/ от чре́ва Твоего́ возсия́вшаго и просвети́вшаго ве́рных сердца́.

Ин

Ирмо́с: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки.

А́нгельстии чи́нове хва́лят вас, пресла́внии,/ и челове́честии ро́ди пою́т непреста́нно,/ творя́ще ве́рно па́мять ва́шу.

Досто́йными похвала́ми воспе́ти пресла́вныя чудотво́рцы/ ум и смысл да́руй ми, Христе́ Бо́же,/ я́ко да пою́, ра́дуяся, па́мять их.

Побе́да имени́та вои́стинну ве́рным лю́дем,/ в беда́х кре́пцыи помо́щницы яви́шася,/ Петр ку́пно с Февро́ниею.

Богоро́дичен: Уврачу́й, Пречи́стая, стра́сти се́рдца моего́, ро́ждшая всех Царя́ Бо́га,/ и пра́ведных ча́сти яви́ мя прича́стника, Богоро́дице Де́во,/ Христа́, Сына Твоего́, умоли́вши.

Песнь 9

Ирмо́с: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

От ю́ности ва́шея чи́стую со́весть иму́ще к Бо́гу,/ сего́ ра́ди, благоче́стно пожи́вше, к Вы́шним преидо́сте./ Моли́те Христа́ о нас, да вас любо́вию почита́ем.

Я́ко предстоя́ще Святе́й Тро́ице с преподо́бными и пра́ведными,/ моли́теся, блаже́ннии, изба́вити нас вся́каго преще́ния и гне́ва,/ да вас непреста́нно велича́ем.

Лю́дие твои́ мо́лят тя, Богоблаже́нне Пе́тре,/ ку́пно моли́ Христа́ с прему́дрою Февро́ниею,/ с не́юже в ми́ре богоуго́дно пожи́л еси́,/ изба́вити нас от вся́ких зол.

Богоро́дичен: О, чудесе́ вели́каго!/ Ка́ко вмести́ся во утро́бу Твою́ Христо́с Бог, ника́коже вмести́мый?/ Его́же за хва́лящия Тя умоли́, Де́во, от бед изба́вити нас/ и от беззако́нных челове́к всегда́.

Ин

Ирмо́с: Светоно́сный о́блак, во́ньже всех Влады́ка,/ я́ко дождь с Небесе́ на руно́, сни́де/ и воплоти́ся нас ра́ди,/ быв Челове́к, Безнача́льный,/ велича́ем вси яко Ма́терь Бо́га на́шего Чи́стую.

Красе́н душе́ю и те́лом и благоче́стием сия́я, сла́вне Пе́тре,/ Боже́ственнаго испо́лнен ра́зума и прему́дрости, орга́н Свята́го Ду́ха был еси́,/ по сме́рти у́бо к безсме́ртней жи́зни/ и неконча́емому блаже́нству преше́л еси́, ра́дуяся.

Я́ко у́тро, я́ко день све́тлый, ваш пра́здник яви́ся, сла́внии,/ а́ки струя́, происхо́дит от ра́ки ва́шея исцеле́ний вся́ких/ и ве́рных сердца́ напоя́ет, любо́вию вас почита́ющих.

Вели́к щит и вели́ка кре́пость земли́ Росси́йстей/ обре́лся еси́, блаже́нне Пе́тре вку́пе с Февро́ниею,/ наро́ду правосла́вному похвале́ние и сла́ва во всех язы́цех,/ и ны́не мо́лим вы сохрани́ти оте́чество ва́ше от ва́рварскаго нахожде́ния.

Богоро́дичен: Я́же Свет ро́ждшая Боже́ственный,/ омраче́ннаго мя все́ми прило́ги лука́ваго,/ и во уны́нии живу́щаго, и прогневля́ющаго Бо́га,/ Всенепоро́чная, просвети́ и наста́ви к до́брым дело́м,/ я́ко вина́ всех благи́х.

Свети́лен.

Подо́бен: Посети́л ны:

И́же благоче́стно пра́зднующим па́мять ва́шу, Богоблаже́ннии Пе́тре и Февро́ние,/ вку́пе ми́рно пожи́вше и благоче́стно,/ моли́те Христа́ грехо́в оставле́ние дарова́ти рабо́м ва́шим.

Богоро́дичен:

Пресвята́я Богоро́дице, упова́ние на́ше и похвало́,/ Тя еди́ну ве́дуще, ве́рою покланя́ющеся, мо́лим:/ ра́дуйся, Неискусобра́чная Свята́я Мари́е, покро́ве и огражде́ние на́ше/ и Помо́щница су́щим в беда́х./ Моли́ Христа́, Сына Твоего́, за рабы́ Твоя́, на Тя бо наде́емся.

На хвали́тех стихи́ры, на 4, глас 4.

Подо́бен: Зва́нный свы́ше:

Я́ко светоза́рное со́лнце,/ блаже́ннии, от за́пада возсия́вше,/ всю Росси́йскую зе́млю просвети́сте/ и к све́ту весе́лия наста́висте;/ и ны́не о пою́щих вас, Пе́тре блаже́нне с прему́дрою Февро́ниею,/ и сла́вящих лю́дех, и прося́щих исцеле́ния,/ и ко Христу́ и́скренно притека́ющих/ моли́те спасти́ и просвети́ти ду́ши на́ша.

О, вели́кое и несказа́нное чу́до/ Боже́ственныя благода́ти,/ Петра́ блаже́ннаго с прему́дрою Февро́ниею/ ка́ко возмо́жем воспе́ти или́ изглаго́лати?/ О́ваго я́ко хра́бра и богочести́ва,/ о́ву же я́ко му́дру и благове́рие храня́щу./ Ов у́бо го́рдаго зми́я победи́,/о́ва же смире́ние любля́ше;/ и ны́не Христу́ Бо́гу мо́лятся/ спасти́ и просвети́ти ду́ши на́ша.

Всечестны́й приспе́ пра́здник святы́х чудотво́рцев,/ хода́тайствуя всем спасе́ние,/ в не́мже, та́йно восплеска́вше, к ним си́це рцем:/ ра́дуйтеся, свети́ла те́мным мы́сленнаго Со́лнца;/ ра́дуйся, Пе́тре ку́пно с супру́жницею твое́ю,/ благове́рие храня́ще во Еди́нстве Святы́я Тро́ицы,/ Ю́же моли́те спасти́ и просвети́ти ду́ши на́ша.

Пе́рвее у́бо, прехва́льнии,/ от ю́ности своея́ Христу́ порабо́тавше,/ су́щаго в ми́ре сем/ я́ко прехва́льна позна́вше/ и сего́ ра́ди ми́лостынею и моли́твами/ до́бре Тому́ угоди́вше./ Те́мже и по сме́рти исцеле́ние подава́ете всем,/ ве́рою вас почита́ющим, Пе́тре и Февро́ние,/ и ве́лию ми́лость.

Сла́ва, глас 2. Самогла́сен:

Прииди́те, вси язы́цы,/ восплещи́те рука́ми и ликовству́йте,/ прииди́те, вси росси́йстии святи́телие и свяще́нницы,/ мона́си же и прости́и,/ духо́вне возвесели́мся/ в наро́читый день пра́здника но́вых чудотво́рцев Му́ромских,/ Петра́ блаже́ннаго и Февро́нии прему́дрыя./ И сих, я́ко цве́ты, хвала́ми и пе́сньми почти́м,/ си́це глаго́люще:/ ра́дуйтеся, пресла́внии,/ Небе́снии челове́цы, земни́и А́нгели,/ Ду́ха Свята́го оби́телище,/ ева́нгельскому гла́су у́бо возсле́дницы,/ тем и прия́сте вме́сто тле́нных нетле́нная./ И ны́не в па́мяти ва́шей моли́те Христа́ Бо́га/ сохрани́ти оте́чество ва́ше/ и поми́ловати град и лю́ди, почита́ющия вас,/ и спасти́ ду́ши на́ша.

И ны́не, Богоро́дичен: На Тя упова́ние:

Та́же, славосло́вие вели́кое. Тропа́рь. И отпу́ст.

НА ЛИТУРГИ́И

Блаже́нны, от кано́на 1-го песнь 3-я, на 4, и друга́го песнь 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех, и́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода: Ева́нгелие от Матфе́я, зача́ло 10. Прича́стен: Ра́дуйтеся, пра́веднии, о Го́споде:

Моли́тва

О вели́цыи уго́дницы Бо́жии и преди́внии чудотво́рцы, благове́рнии кня́же Пе́тре и княги́не Февро́ние, гра́да Му́рома предста́тели и храни́тели и о всех нас усе́рднии ко Го́споду моли́твенницы! К вам прибега́ем и вам мо́лимся со усе́рдием кре́пким: принеси́те за нас, гре́шных, святы́я моли́твы ва́ша ко Го́споду Бо́гу, и испроси́те нам у бла́гости Его́ вся благопотре́бная душа́м и телесе́м на́шим: ве́ру пра́ву, наде́жду бла́гу, любо́вь нелицеме́рну, благоче́стие непоколеби́мое, в до́брых де́лех преуспе́яние, ми́ра умире́ние, земли́ плодоно́сие, возду́ха благорастворе́ние, душа́м и телесе́м здра́вие и ве́чное спасе́ние. Исхода́тайствуйте у Царя́ Небе́снаго Це́ркви Святе́й и всей стране́ Росси́йстей мир, тишину́ и благоустрое́ние и всем нам житие́ благополу́чное и до́брую христиа́нскую кончи́ну. Огради́те оте́чество ва́ше, град Му́ром и вся гра́ды Росси́йския от вся́каго зла и вся правове́рныя лю́ди, к вам приходя́щия и моще́м ва́шим покланя́ющияся, осени́те благода́тным де́йством благоприя́тных моли́тв ва́ших, и вся проше́ния их во бла́го испо́лните. Ей, чудотво́рцы святи́и! Не пре́зрите моли́тв на́ших, со умиле́нием вам возноси́мых, но бу́дите о нас при́снии предста́тели ко Го́споду и сподо́бите нас по́мощию ва́шею свято́ю спасе́ние ве́чное получи́ти и Ца́рствие Небе́сное унасле́довати, да славосло́вим неизрече́нное человеколю́бие Отца́, и Сы́на, и Свята́го Ду́ха, в Тро́ице покланя́емаго Бо́га, во ве́ки веко́в. Ами́нь.