Служба в честь святых четыредесяти пяти мучеников, иже в Никополи Арменстей
ВЕ́ЧЕР
На Го́споди, воззва́х: стихи́ры, глас 1.
Подо́бен: Всехва́льнии му́ченицы:
Всехва́льнии му́ченицы,/ вы, ка́мением сокруша́еми,/ Христа́ ка́мене не отверго́стеся неруши́маго,/ но, победоно́сцы благода́тию бы́вше,/ со а́нгельскими ли́ки ра́дуетеся./ С ни́миже моли́теся/ дарова́ти душа́м на́шим/ мир и ве́лию ми́лость.
Добропобе́днии му́ченицы,/ в темни́цах ку́пно затворя́еми,/ я́ко за́поведем Бо́жиим храни́тели,/ и истаява́еми жа́ждею,/ с Небесе́ ро́су прия́сте,/ вас духо́вно прохла́ждшу./ Те́мже моли́теся/ дарова́ти душа́м на́шим/ мир и ве́лию ми́лость.
Непобеди́мии му́ченицы,/ жизнь и́стинную жела́юще/ и при́сно пребыва́ющую,/ смерть непра́ведну беззако́нным мече́м,/ ра́дующеся, подъя́сте,/ и ны́не с му́ченики весели́теся,/ с ни́миже моли́теся/ дарова́ти душа́м на́шим/ мир и ве́лию ми́лость.
Сла́ва, и ны́не, Богоро́дичен:
Всепе́тая Влады́чице,/ наде́жде ве́рных и утвержде́ние,/ прибе́жище и по́мощь, Тя мо́лим:/ от вся́кия беды́ рабы́ Твоя́ сохрани́,/ ве́рою покланя́ющияся Рождеству́ Твоему́./ Его́же моли́ дарова́ти душа́м на́шим/ мир и ве́лию ми́лость.
Крестобогоро́дичен:
Своего́ А́гнца А́гница и Непоро́чная Влады́чица/ на Кресте́ я́ко ви́де, зра́ка не иму́ща, ниже добро́ты,/ увы́ Мне,– рыда́ющи, глаго́лаше,–/ где добро́та Твоя́ за́йде, Сладча́йший?/ Где благоле́пие?/ Где благода́ть блиста́ющая о́браза Твоего́,/ Сы́не Мой любе́знейший?
Тропа́рь, глас 1:
Единоу́мне душе́ю свя́зани бы́вше,/ четы́редесять с пятьми́ страда́льцы святи́и,/ на врага́ ополчи́стеся,/ победи́телие же я́вльшеся,/ прия́сте венцы́ от Христа́ Бо́га/ и ве́чное муче́ний ва́ших воздая́ние,/ ты́я и нам улучи́ти моли́те,/ благоче́стно пе́сньми вас велича́ющим.
Ин тропа́рь, глас 4:
Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего,/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами/ спаси́ ду́ши на́ша.
НА У́ТРЕНИ
Кано́н, его́же краегране́сие: Боговенча́нный полк пою́ му́чеников. Глас 5.
Песнь 1
Ирмо́с: Спаси́телю Бо́гу,/ в мо́ри лю́ди немо́крыми нога́ми наста́вльшему/ и фарао́на со всево́инством пото́пльшему,/ Тому́ Еди́ному пои́м, я́ко просла́вися.
Богому́дренно, ве́рнии, во́ини Христо́вы и страстоте́рпцы воспое́м,/ я́ко потреби́тели ле́сти и победи́тели све́тлы,/ Бо́гу побе́дную песнь пою́ще, я́ко просла́вися.
На земли́ страда́льцы подвиза́вшеся све́тло и му́ки претерпе́сте,/ на Небесе́х венцы́ прия́сте,/ согла́сно воспева́юще песнь побе́дную, я́ко просла́вися.
Еди́нством душе́вным свя́зани ве́рно, от ле́сти отврати́стеся/ и победи́тели венцено́сцы яви́стеся,/ согла́сно воспева́юще песнь побе́дную, я́ко просла́вися.
Богоро́дичен: Пречи́стая Ма́ти Бо́жия,/ воплоще́ннаго из Тебе́/ и от недр Роди́тельных не отлучи́вшагося Бо́га непреста́нно моли́/ от вся́каго обстоя́ния спасти́, я́же созда́.
Песнь 3
Ирмо́с: Си́лою Креста́ Твоего́, Христе́,/ утверди́ мое́ помышле́ние,/ во е́же пе́ти и сла́вити/ спаси́тельное Твое́ Вознесе́ние.
Ра́зумом Христо́вым во́ини укра́шени,/ нечести́ваго врага́ потопи́сте струя́ми крове́й ва́ших.
Те́ло свое́ преда́вше го́рьким и лю́тым му́кам, достохва́льнии му́ченицы,/ и Боже́ственное насле́дие восприя́сте ве́рою.
Ка́менным, страстоте́рпцы, мета́нием повеле́нием мучи́теля сокруша́еми,/ благове́рия держа́ву кре́пко соблюдо́сте.
Богоро́дичен: Непреста́нно моли́, Чи́стая, с му́ченики Проше́дшаго из чресл Твои́х/ изба́вити от ле́сти диа́воли пою́щия Тя, Всенепоро́чная.
Седа́лен, глас 4.
Подо́бен: Вознесы́йся:
Во́ини Христо́вы до́блии, подви́гшеся до́бре,/ лука́ваго врага́ до конца́ потопи́ша кро́вными струя́ми,/ ка́мением сокруша́еми и мечи́ ссека́еми,/ огне́м сожига́еми и в во́ду вмета́еми, венцено́сцы показа́шася я́ве,/ те́мже что́ми суть и ве́рою сла́вими.
Сла́ва, и ны́не, Богоро́дичен:
И́же на престо́ле Херуви́мстем седя́й и в не́дрех О́тчих водворя́яся,/ я́ко на престо́ле святе́м седи́т Свое́м, Влады́чице, в не́дрех Твои́х:/ вопло́щся бо, Бог вои́стинну воцари́ся над все́ми язы́ки,/ и разу́мно ны́не пои́м Ему́./ Его́же умоли́ спасти́ся рабо́м Твои́м.
Крестобогоро́дичен:
И́же от Безнача́льнаго Отца́ рожде́ннаго,/ напосле́док Тя пло́тию ро́ждшая, на Кресте́ ви́сяща зря́щи, Христе́,/ увы́ Мне, любе́знейший Иису́се, вопия́ше,–/ ка́ко сла́вимый я́ко Бог от А́нгел,/ от беззако́нных ны́не челове́к, Сы́не, хотя́ распина́ешися?/ Пою́ Тя, Долготерпели́ве.
Песнь 4
Ирмо́с: Услы́шах слух си́лы Креста́,/ я́ко рай отве́рзеся им,/ и возопи́х:/ сла́ва си́ле Твое́й, Го́споди.
Боголюби́выми содержи́ми обы́чаи,/ богопроти́внаго врага́ страда́льческий лик победи́л есть,/ благода́тию Спа́совою укрепля́емь.
Богозва́нный полк страстоте́рпец Христо́вых,/ богопроти́вных мно́жество злочести́вых враг победи́сте, воспева́юще:/ сла́ва си́ле Твое́й, Го́споди.
Свет непристу́пный ви́девше страстоте́рпцы, в темни́це седя́ще,/ многобо́жия тьму и́дольския ле́сти разори́ша,/ Бо́жиею си́лою укрепля́еми.
Богоро́дичен: Осени́ Тя, Де́во, Вы́шняго си́ла и рай соде́ла Тя,/ живо́тное дре́во иму́щи посреде́, Хода́тая и Го́спода.
Песнь 5
Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве бо Тебе́, ино́го не зна́ем.
Словесы́ воспита́ни Ду́ха Свята́го,/ и́дольское безслове́сие му́ченицы упраздни́ша.
Зве́зды светоно́сныя бы́вше страстоте́рпцы/ и цве́ты ве́ры благоуха́ния испуща́юще.
Ни́ва яви́стеся, святи́и, Вы́шняго,/ серпы́ муче́ния пожина́еми, всехва́льнии.
Богоро́дичен: Не преста́й моля́щи, Богоро́дице, Его́же родила́ еси́,/ спасти́ ду́ши на́ша, приле́жно воспева́ющих Тя.
Песнь 6
Ирмо́с: Обы́де мя бе́здна,/ гроб мне кит бысть,/ аз же возопи́х к Тебе́, Человеколю́бцу,/ и спасе́ мя десни́ца Твоя́, Го́споди.
Веселя́щеся, му́ченицы вопия́ху:/ в ру́це Твои́, Влады́ко Человеколю́бче, приими́ ду́хи на́ша и поко́й их:/ Тебе́ бо лю́бим, еди́наго Многоми́лостиваго.
А́нгелов равносе́льницы бы́ша лик му́ченик Твои́х, Человеколю́бче,/ тече́ние бо сконча́вше, ны́не мо́лят спасти́ся душа́м на́шим.
Му́ченическая сла́ва, му́ченическая красота́,/ му́ченический ли́че Богоизбра́нный,/ приле́жно моли́те спасти́ся всем, прибега́ющим к вам.
Богоро́дичен: Зача́тия Твоего́ безсе́меннаго чу́до/ ко́е сло́во изрещи́ мо́жет, Пренепоро́чная?/ Бо́га бо зачала́ еси́, за милосе́рдие к нам прише́дшаго.
Конда́к, глас 8.
Подо́бен: Я́ко нача́тки:
Христа́ ра́ди, му́ченицы, мно́гия му́ки подъя́сте,/ и многобо́жие низложи́сте все и́дольское,/ и разруши́сте безбо́жие вся́кия пре́лести,/ Христо́вою си́лою сия́ попра́вше,/ нас всех ве́рно науча́ете вопи́ти я́ве: аллилу́ия.
Песнь 7
Ирмо́с: В пещи́ о́гненней/ песносло́вцы спасы́й о́троки,/ благослове́н Бог оте́ц на́ших.
В пещи́, Христо́, страстоте́рпцы Твои́ вопия́ху:/ благослове́н Бог оте́ц на́ших.
Просвеще́ни све́том Тро́ическим, страда́льцы,/ с весе́лием ду́ши своя́ преда́ша, пою́ще:/ благослове́н Бог оте́ц на́ших.
Предстоя́ще Бо́гу, венцено́сцы страда́льцы, с весе́лием,/ Тому́ за ны моли́теся.
Богоро́дичен: Я́ко спасе́ние на́ше, Тя, Богоро́дице, мо́лим:/ моли́ за ны Вопло́щшагося из Тебе́.
Песнь 8
Ирмо́с: Из Отца́ пре́жде век рожде́ннаго Сы́на и Бо́га/ и в после́дняя ле́та воплоще́ннаго от Де́вы Ма́тере,/ свяще́нницы, по́йте,/ лю́дие, превозноси́те во вся ве́ки.
С му́ченики бу́ди проше́ние на́ше ве́рных,/ и тех насле́дия прича́стницы бу́дем,/ Христа́ пою́ще и превознося́ще Его́ во ве́ки.
Ра́достию серде́чною лик терпели́вых страда́лец от Христа́ венцы́ боголе́пно прие́млет,/ и све́тло пое́т, и превозно́сит Его́ во ве́ки.
Струя́ми крове́й ва́ших обагри́вшеся, достохва́льнии,/ и на Небесе́х во ве́ки со Христо́м ца́рствуете,/ благоче́стно пою́ще и превознося́ще Его́ во ве́ки.
Богоро́дичен: Херуви́м вы́шши яви́лася еси́, Богоро́дице Чи́стая,/ во чре́ве Твое́м Седя́щаго на них поне́сши,/ Его́же со безпло́тными, земни́и, славосло́вим и превозно́сим во ве́ки.
Песнь 9
Ирмо́с: Тя, па́че ума́ и словесе́ Ма́терь Бо́жию,/ в ле́то Безле́тнаго/ неизрече́нно ро́ждшую,/ ве́рнии, единому́дренно велича́ем.
За о́бщее спасе́ние моли́теся, пресла́внии му́ченицы, Христу́ предстоя́ще,/ Его́же ра́ди и му́ки претерпе́сте.
Си́лою кре́пкою преле́стную тве́рдость низложи́сте, непобеди́мии,/ и ны́не в жили́щах Небе́сных со А́нгелы жи́ти сподо́бистеся.
Зако́нными обы́чаи му́ченическими победи́вше го́рдаго мучи́теля/ и венцы́ прия́сте пра́ведныя, всечестни́и.
Богоро́дичен: Ра́дуйся, Богоро́дице, Ма́ти Христа́ Бо́га,/ Его́же родила́ еси́, моли́ с му́ченики/ грехо́в оставле́ние дарова́ти ве́рою воспева́ющим Тя.
