Служба в честь святителя Василия, епископа Рязанскаго
НА МА́ЛОЙ ВЕЧЕ́РНИ
На Го́споди, воззва́х: стихи́ры, глас 1:
Прииди́те, правосла́внии па́ствы Ряза́нския лю́дие,/ духо́вными пе́сньми восхва́лим святи́теля Васи́лия,/ при́снаго засту́пника на́шего,/ в до́брых де́лех наста́вника,/ в ско́рби и напа́сти су́щим помо́щника,/ гра́да на́шего первопресто́льника,/ непреста́нно Христу́ Бо́гу моля́щагося/ о спасе́нии душ на́ших.
Светоно́сная па́мять твоя́, святи́телю Васи́лие,/ Боже́ственныя ра́дости и весе́лия испо́лнена яви́ся;/ те́мже мы, духо́вная ча́да твоя́,/ обстоя́ще гроб твой,/ све́тло пра́зднуем день сей,/ боголе́пно славосло́вяще просла́вльшаго тя Бо́га,/ ве́дущаго прославля́ти святы́я уго́дники Своя́,/ Ему́же не преста́й моля́ся/ просвети́ти и спасти́ ду́ши на́ша.
В па́мять твою́, святи́телю о́тче Васи́лие,/ соше́дшеся любо́вию ко всечестно́му гро́бу твоему́,/ гла́сы пе́сненными дави́дски вопию́ще, глаго́лем:/ вои́стинну блаже́н муж еси́, боя́йся Го́спода,/ непоро́чно бо в путе́х Госпо́дних ходи́л еси́./ Те́мже ны́не со пра́ведными на Небесе́х водворя́яся,/ моли́ся Христу́ Бо́гу/ поми́ловатися душа́м на́шим.
Сла́ва, глас 3:
Красу́йся, гра́де Пересла́влю Ряза́нский,/ име́я в себе́, я́ко многоце́нное сокро́вище,/ честны́я мо́щи преблаже́ннаго Васи́лия,/ и́же моли́твами свои́ми к Бо́гу/ храни́т тя от вся́каго зла́го обстоя́ния,/ моля́ся непреста́нно Влады́це Христу́/ мир па́стве его́ дарова́ти/ и спасти́ ду́ши на́ша.
И ны́не, Богоро́дичен, глас то́йже:
Святи́тель Христо́в Васи́лий,/ на Тя, Богома́ти, упова́ние возложи́в,/ многоко́зненнаго врага́ я́ве посрами́л есть/ и кре́пкою ве́рою ре́чная стремле́ния победи́л есть./ Те́мже с ним, Всепе́тая,/ моли́ Сы́на Твоего́ и Бо́га/ прегреше́ний оставле́ние нам дарова́ти,/ покланя́ющимся всечестне́й ико́не Твое́й.
На стихо́вне стихи́ры, глас 6:
От ю́ности теле́сная чу́вства твоя́,/ святи́телю о́тче Васи́лие,/ воздержа́нием и стра́хом Бо́жиим умертви́л еси́,/ те́мже и на ма́нтии по вода́м ше́ствие творя́,/ богоспаса́емаго гра́да Пересла́вля дости́гл еси́,/ и в нем при хра́ме святы́х страстоте́рпцев Бори́са и Гле́ба/ престо́л архиере́йства утверди́л еси́./ Сохраня́й при́сно, мо́лим тя,/ свяще́нное ста́до твое́ от сете́й вра́жиих,/ да тя вси пе́сньми непреста́нно почита́ем.
Стих: Честна́ пред Го́сподем/ смерть преподо́бных Его́.
Многотру́ден путь в житии́ твое́м преше́л еси́,/ о́тче блаже́нне Васи́лие,/ и тем дости́гл еси́ в ти́хое приста́нище,/ иде́же пра́ведных ли́цы веселя́тся./ Не преста́й моля́ся о при́сных ча́дех твои́х,/ да вси честну́ю па́мять твою́ ра́достно почита́ем.
Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.
Ве́лие чу́до зрим, соверши́вшееся на тебе́,/ святи́телю о́тче Васи́лие,/ я́ко блаже́нное те́ло твое́ чрез мно́га ле́та нетле́нно соблюде́ся/ судьба́ми просла́вльшаго тя Вы́шняго./ Те́мже со умиле́нием мо́лим тя:/ моли́ Христа́ Бо́га спасти́ся нам,/ святу́ю па́мять твою почита́ющим.
Сла́ва, глас то́йже:
Преподо́бныя ру́ки твоя́ просте́р,/ святи́телю о́тче Васи́лие,/ испроси́ нам благода́ть и си́лу Бо́жию во спасе́ние,/ и бу́ди покро́в необори́м гра́ду твоему́,/ ему́же пе́рвый святи́тель был еси́,/ и моли́ся за ны Христу́ Бо́гу,/ да упра́вит в ми́ре жизнь на́шу и спасе́т ду́ши на́ша.
И ны́не, Богоро́дичен, глас то́йже:
Еди́ное упова́ние на́ше,/ еди́ная Наде́ждо и Прибе́жище,/ Пресвята́я Благослове́нная Ма́ти,/ покры́й и соблюди́ нас от вся́кия напа́сти/ моли́твами предста́теля на́шего Васи́лия.
Тропа́рь пи́сан на вели́цей вече́рни.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры, глас 8:
О́тче Богоно́сне Васи́лие,/ возложи́в упова́ние на Влады́ку вся́ческих,/ ше́ствие твое́ по вода́м ди́вно сотвори́л еси́:/ изгоня́емь бо непра́ведно из гра́да Му́рома,/ возше́д на просте́ртую верху́ вод ма́нтию,/ глубину́ водну́ю безбе́дно преплы́л еси́,/ и, гра́да Ряза́ни дости́г,/ престо́л архиере́йства та́мо утверди́л еси́,/ и па́ству твою́ богому́дренно упа́сл еси́./ Те́мже, припа́дающе, мо́лим тя:/ пла́вающим нам в жите́йстем мо́ри/ бу́ди приста́нище ми́ра и утеше́ния/ и моли́ся ко Го́споду,/ да простре́т нам высо́кую Свою́ мы́шцу/ и, я́ко Петра́, изба́вит нас от бу́ри и потопле́ния/ и спасе́т ду́ши на́ша.
О́тче Богому́дре Васи́лие,/ восприи́м от Бо́га да́нное тебе́ ста́до слове́сных ове́ц,/ труды́ и по́ты о нем полага́л еси́,/ расточе́нныя наше́ствием ва́рварским собира́я воеди́но,/ изнемога́ющия укрепля́я ве́рою,/ сокруше́нныя се́рдцем исцеля́я,/ заблу́ждшия на путь пра́вый наставля́я./ Те́мже и мы, твоея́ огра́ды слове́сныя о́вцы,/ цельбоно́сному гро́бу твоему́ предстоя́ще,/ мольбы́ приле́жныя тебе́ прино́сим:/ не забу́ди чад твои́х, па́стырю до́брый,/ но моли́ся о ста́де твое́м Пастыренача́льнику Христу́,/ да упасе́т нас во единомы́слии, любви́ и правове́рии/ и спасе́т ду́ши на́ша.
О́тче досточу́дне Васи́лие,/ приими́ же́ртву хвалы́ от духо́вных чад твои́х,/ све́тло пра́зднующих честну́ю па́мять твою́./ Ты бо, первосвяти́тельствуя во гра́де Ряза́ни,/ трудолю́бно во утвержде́нии пра́выя ве́ры подвиза́лся еси́,/ и многотру́дному те́лу твоему́/ та́мо положи́тися Бог изво́ли,/ иде́же и честны́я мо́щи твоя́/ по мно́гих ле́тех обрето́шася нетле́нны/ и благода́тию во святы́х Почива́ющаго/ отъе́млют неду́ги и стра́сти душе́вныя и теле́сныя./ Те́мже усе́рдно мо́лим тя:/ моли́ Христа́ Бо́га дарова́ти нам прегреше́ний оставле́ние/ и спасти́ ду́ши на́ша.
О́тче преблаже́нне Васи́лие,/ Христо́ву Престо́лу ны́не предстоя́,/ испроси́ твои́ми к Бо́гу моли́твами/ це́ркви и гра́ду твоему́ утвержде́ние,/ христолюби́вым па́стырем благо́е во всем поспеше́ние;/ о всех же, притека́ющих к цельбоно́сному гро́бу твоему́/ и ко всечестне́й ико́не Богома́тере припа́дающих,/ моли́ся приле́жно Христу́ Бо́гу/ от находя́щих искуше́ний нас изба́вити и спасти́ ду́ши на́ша.
Сла́ва, глас 6:
Егда́, чу́дное по вода́м ше́ствие творя́,/ ко гра́ду Ряза́ни прибли́жился еси́,/ тогда́ весь освяще́нный собо́р со благове́рным кня́зем и боля́ры/ и всенаро́дное мно́жество изыдо́ша во сре́тение твое́/ и, зря́ще тя, на ма́нтии плову́ща и сия́юща луча́ми,/ исходя́щими от пречи́стаго о́браза Богома́тере,/ на руку́ твое́ю держи́маго,/ просте́рше ру́це к тебе́, вопия́ху:/ о богоявле́нне наш святи́телю,/ прииди́ и низпосли́ нам благода́ть спаси́тельную,/ ю́же от Бо́га прия́л еси́;/ о богоизбра́нный наш па́стырю и учи́телю,/ прииди́ и просвети́ ны, во тьме седя́щия,/ и упаси́ на па́жити правове́рия и благоче́стия./ Те́мже и мы, па́ствы твоея́ ча́да духо́вная,/ обстоя́ще чудотво́рный гроб твой,/ иде́же положе́но есть честно́е те́ло твое́,/ святоле́пными пе́сньми тя почита́ем, глаго́люще:/ ра́дуйся, избра́нный Ду́ха Свята́го сосу́де,/ при́сно источа́яй нам дарова́ния духо́вная/ от живу́щия в тебе́ благода́ти;/ ра́дуйся, свети́льниче наш богосве́тлый,/ озаря́яй достоя́ние твое́ све́том жития́ твоего́/ и наставля́яй на стези́ за́поведей Боже́ственных;/ ра́дуйся, свяще́нная похвало́/ и утвержде́ние гра́ду на́шему.
И ны́не, Богоро́дичен: Кто Тебе́ не ублажи́т:
Вход. Проки́мен дне и чте́ния 3 святи́тельская.
При́тчей чте́ние (главы́ 10 и 8):
Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва,/ от уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да, честна́я бо реку́,/ и блаже́н челове́к, и́же пути́ моя́ сохрани́т:/ исхо́ди бо мой, исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас и предлага́ю мой глас сыново́м челове́ческим:/ я́ко аз, прему́дрость, устро́их сове́т,/ и ра́зум, и смысл аз призва́х./ Мой сове́т и утвержде́ние, мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство, ненака́заннии же, прилага́йте сердца́./ Послу́шайте мене́ и па́ки, честна́я бо реку́/ и отве́рзу от усте́н пра́вая, я́ко и́стине поучи́тся горта́нь мой,/ ме́рзки же предо мно́ю устны́ лжи́выя./ С пра́вдою вси глаго́лы уст мои́х,/ ничто́же в них стро́потно, ниже́ развраще́нно./ Вся пра́ва суть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.
Прему́дрости Соломо́новы чте́ние (главы́ 4 и 5):
Пра́ведник а́ще пости́гнет сконча́тися, в поко́и бу́дет./ Осу́дит же пра́ведник умира́яй живу́щия нечести́выя./ У́зрят бо кончи́ну пра́веднаго и не разуме́ют, что́ совеща́ша о нем,/ я́ко пове́ржет Госпо́дь нечести́выя безгла́сны ниц/ и поколе́блет их от основа́ний,/ и до после́дняго исче́знут в боле́зни, и па́мять их поги́бнет./ Прии́дут бо в помышле́ние согреше́ний свои́х ужа́сни,/ и обличи́т их сопроти́в беззако́ния их./ Тогда́ ста́нет в дерзнове́нии мно́зе пра́ведник пред лице́м оскорби́вших его́/ и отмета́ющих труды́ его́./ Ви́девше же его́, смяту́тся стра́хом мно́гим/ и ужа́снутся о пресла́вном спасе́нии его́./ Реку́т бо в себе́, ка́ющеся,/ и в тесноте́ ду́ха воздо́хнут, и реку́т:/ сей бе, его́же име́хом не́когда в посме́х/ и в при́тчу поноше́ния, безу́мнии./ Житие́ его́ вмени́хом неи́стово и кончи́ну его́ безче́стну./ Ка́ко вмени́ся в сыне́х Бо́жиих и во святы́х жре́бий его́ есть?/ У́бо заблуди́хом от пути́ и́стиннаго,/ и пра́вды свет не облиста́ нам, и со́лнце не возсия́ нам./ Беззако́нных испо́лнихомся стезь и поги́бели,/ и ходи́хом стези́ непрохо́дны,/ пути́ же Госпо́дня не разуме́хом.
Прему́дрости Соломо́новы чте́ние (главы́ 10, 6, 8 и 9):
Уста́ пра́веднаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавля́ет их от сме́рти./ Сконча́вшуся му́жу пра́ведну, не поги́бнет наде́жда./ Сын бо пра́веден ражда́ется в живо́т/ и во благи́х свои́х плод пра́вды обы́мет./ Свет пра́ведным всегда́, и от Госпо́да обря́щут благода́ть и сла́ву./ Язы́к му́дрых до́брая свесть, и в се́рдце их почи́ет му́дрость./ Лю́бит Госпо́дь преподо́бная сердца́,/ прия́тни же Ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго./ Постига́ет бо жела́ющия ю, пре́жде да́же, разуме́ти ю,/ и удо́бь у́зрится от лю́бящих ю./ У́треневавый к ней, не утруди́тся,/ и бдяй ея́ ра́ди вско́ре без печа́ли бу́дет./ Я́ко досто́йных ея́ сама́ обхо́дит, и́щущи,/ и во стезя́х ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́,/ и возлюби́х ю, и поиска́х от ю́ности моея́./ И взыска́х неве́сту привести́ себе́, я́ко всех Влады́ка возлюби́ ю./ Таи́бница бо есть Бо́жия хи́трости и обрета́тельница дел Его́./ Труды́ ея́ суть доброде́тели,/ целому́дрию же и ра́зуму та учи́т,/ пра́вде и му́жеству, и́хже потре́бнее ничто́же есть в житии́ челове́ком./ Аще же и мно́га иску́сства жела́ет кто,/ весть дре́вняя и бы́ти хотя́щая разсмо́трит./ Свесть изви́тия слове́с и разреше́ния гада́ний,/ зна́мения и чудеса́ проразуме́ет и сбытия́ време́н и лет,/ и всем сове́тник есть благ, я́ко безсме́ртие есть в ней/ и благосла́вие во обще́нии слове́с ея́./ Сего́ ра́ди бесе́довах ко Го́споду, и помоли́хся Ему́,/ и рех от всего́ се́рдца моего́:/ Бо́же отце́в и Го́споди ми́лости,/ сотвори́вый вся сло́вом Твои́м и му́дростию Твое́ю устро́ивый челове́ка,/ да владе́ет бы́вшими от Тебе́ тварьми́/ и да управля́ет мир в преподо́бии и пра́вде./ Даждь ми Твои́х престо́лов приседя́щую прему́дрость/ и не отлучи́ мене́ от о́трок Твои́х,/ я́ко аз раб Твой и сын рабы́ни Твоея́./ Посли́ ю с Небе́с от свята́го жили́ща Твоего́ и от престо́ла сла́вы Твоея́,/ да, су́щи со мно́ю, научи́т мя, что́ благоуго́дно есть пред Тобо́ю,/ и наста́вит мя в ра́зум, и сохрани́т мя в сла́ве свое́й./ Помышле́ния бо сме́ртных вся боязли́ва/ и погреши́тельна умышле́ния их.
На лити́и стихи́ра хра́ма и свята́го стихи́ры самогла́сны, глас 2:
Егда́ Боже́ственное раче́ние на́йде на тя, блаже́нне,/ тогда́, кра́сная ми́ра сего́ от души́ твоея́ отри́нув,/ богосве́тлый ум твой к Бо́гу впери́л еси́,/ и, житие́ твое́ направля́я в ти́хое приста́нище,/ восприя́л еси́ во гра́де Му́роме святы́й о́браз мона́шеский,/ и та́мо, в житии́ твое́м му́дростию и благоче́стием сия́я,/ архиере́йскаго са́на, я́ко сосу́д избра́н, сподо́бился еси́,/ и свети́льник Це́ркве пресве́тлый я́ве показа́лся еси́./ Сего́ ра́ди ублажа́ем че́стне святу́ю па́мять твою́.
Весь ум плени́в в послуша́ние ве́ры,/ благи́ми де́лы житие́ твое́ украси́л еси́/ и богоприя́тен де́латель виногра́да Христо́ва яви́лся еси́,/ тяготу́ дневну́ю и нощно́е бде́ние понесы́й терпели́вно./ Те́мже и ны́не, святи́телю Христо́в Васи́лие,/ сохраня́й от вся́каго вре́да виногра́д, тобо́ю стрего́мый,/ его́же насади́ десни́ца Вы́шняго,/ да плодоприно́сит гро́здие спасе́ния.
Возложи́в невозвра́тно наде́жду на Бо́га,/ препла́вая пучи́ну ми́ра сего́,/ молва́ми жите́йскими не погрузи́лся еси́, блаже́нне Васи́лие,/ но, при́сно Ду́хом Святы́м наставля́емь,/ кора́бль церко́вный к безбе́дному пла́ванию упра́вил еси́/ и богодухнове́нными твои́ми уче́нии/ лю́ди твоя́ на ка́мени ве́ры утверди́л еси́./ Те́мже мо́лим тя:/ страсте́й на́ших бу́рю утиши́ моли́твами твои́ми.
Сла́ва, глас 5:
Ра́дуйтеся и весели́теся о Го́споде,/ богохрани́мыя па́ствы Ряза́нския ча́да христоимени́тая,/ такова́ иму́ще святи́теля,/ его́же просла́ви Бог чуде́сным по вода́м ше́ствием/ и блаже́нное те́ло его́ соблюде́ от истле́ния,/ е́же приходя́щим к нему́ с ве́рою источа́ет да́ры освяще́ния и исцеле́ния./ Те́мже, обстоя́ще всечестны́й гроб его́,/ мо́лимся ему́, глаго́люще:/ о преблаже́нне наш святи́телю,/ непреста́нно моли́ Христа́ Бо́га/ па́стве твое́й изоби́лие плодо́в земны́х дарова́ти/ и спасти́ ду́ши на́ша.
И ны́не, Богоро́дичен:
А́нгельских чино́в ра́дование,/ су́щих на земли́ челове́ков кре́пкое предста́тельство,/ Пречи́стая Де́во,/ на Тя упова́ние возложи́хом:/ спаси́ нас от бед и скорбе́й,/ сопроти́вных сове́ты разоря́ющи,/ и на спасе́ния стези́ наста́ви нас/ моли́твами Твои́ми, Благослове́нная.
На стихо́вне стихи́ры, глас 2:
Ки́ими смире́нными усты́/ воспои́м святи́теля Васи́лия,/ раба́ Госпо́дня, освяще́нна от пеле́н,/ священнотаи́нника богому́драго,/ Небе́сным та́йнам ве́рныя научи́вшаго,/ свети́льника многосве́тлаго,/ на высоте́ церко́вней поста́вленнаго/ и све́том богове́дения достоя́ние свое́ озари́вшаго,/ ему́же моля́щеся, любо́вию вопие́м:/ святи́телю о́тче наш Васи́лие,/ моли́ся Христу́ Бо́гу/ дарова́ти ста́ду твоему́ мир и ве́лию ми́лость.
Стих: Восхва́лятся преподо́бнии во сла́ве/ и возра́дуются на ло́жах свои́х.
Ки́ими похва́льными венцы́/ почти́м свяще́нную па́мять святи́теля на́шего,/ па́стыря незло́биваго и смиренному́драго,/ смире́нному Пастыренача́льнику Христу́ подража́теля,/ целому́дрия столпа́ непоколеби́маго,/ подвиго́м отце́в Це́ркве соуча́стника и ревни́теля,/ в моли́твах и поще́ниих о́браз ста́ду своему́ показа́вшаго/ и ны́не в Це́ркви перворо́дных со архиере́и ликовству́ющаго,/ его́же ублажа́юще, любо́вию взыва́ем:/ святи́телю о́тче Васи́лие,/ моли́ся Христу́ Бо́гу/ дарова́ти душа́м на́шим мир и ве́лию ми́лость.
Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.
Ки́ими свяще́нными пе́сньми/ ублажи́м блаже́ннаго святи́теля на́шего,/ земна́го А́нгела и Небе́снаго челове́ка,/ А́нгелов собесе́дника,/ страсте́й те́мных и ко́зней де́монских низложи́теля,/ до́бляго побо́рника на ви́димыя и неви́димыя враги́,/ предста́теля и засту́пника на́шего,/ дарова́ний духо́вных и исцеле́ний теле́сных пода́теля/ и всем, притека́ющим к нему́ с ве́рою, ско́раго помо́щника,/ ему́же со усе́рдием взыва́ем:/ святи́телю о́тче Васи́лие,/ моли́ся Христу́ Бо́гу изба́вити нас от бед и скорбе́й/ и дарова́ти душа́м на́шим мир и ве́лию ми́лость.
Сла́ва, глас 6:
Егда́ обрето́шася святы́я мо́щи твоя́,/ святи́телю о́тче Васи́лие,/ тогда́ испо́лнися град Пересла́вль Ряза́нский ра́дования духо́внаго/ и стеко́шася вси, живу́щии в нем,/ кня́зи же и боля́ре,/ весь освяще́нный собо́р и вси правосла́внии лю́дие,/ благода́ти освяще́ния сподо́битися/ и исцеле́ние от неду́гов прия́ти жела́юще,/ и ра́достно со слеза́ми вопия́ху, глаго́люще:/ о святы́й о́тче наш и уго́дниче Христо́в Васи́лие!/ Сла́ва Бо́гу, просла́вльшему тя,/ сла́ва нетле́нием венча́вшему тя,/ сла́ва я́вльшему тя гра́ду на́шему засту́пника./ Те́мже и мы, духо́вная ча́да твоя́,/ па́мять твою́ честну́ю пра́зднующе/ и цельбоно́сному гро́бу твоему́ предстоя́ще,/ моле́бно вопие́м ти и глаго́лем:/ о преблаже́нне о́тче наш Васи́лие,/ моли́ Христа́ Бо́га сохрани́ти град твой от вся́кия напа́сти/ и дарова́ти душа́м на́шим мир и ве́лию ми́лость.
И ны́не, Богоро́дичен: Творе́ц и Изба́витель:
Тропа́рь, глас 4:
Пе́рвее в Му́роме святи́тельством почте́н был еси́,/ из него́же непра́ведно изгоня́емь,/ на ма́нтию, я́ко на ле́гкий кора́бль, возше́л еси́,/ на не́йже па́че естества́, я́ко безпло́тен, по вода́м ше́ствие творя́,/ промышле́нием Вы́шняго и заступле́нием Богома́тере управля́емь,/ богоспаса́емаго гра́да Ряза́ни дости́гл еси́/ и, в нем архиере́йства престо́л восприи́м,/ богода́нную па́ству Ряза́нскую до́бре упа́сл еси́./ Святи́телю о́тче наш Васи́лие,/ моли́ Христа́ Бо́га/ спасти́ся душа́м на́шим.
НА У́ТРЕНИ
На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 4:
Вельми́ ра́дуется о тебе́, святи́телю о́тче Васи́лие, град твой Ряза́нь,/ помо́щника и засту́пника тя име́я:/ пребу́ди, влады́ко, ду́хом твои́м при́сно с на́ми, моли́твы творя́ за ны к Бо́гу,/ я́ко да изба́вит нас от вся́кия ско́рби и ну́жды,/ да тя всегда́ ублажа́ем.
Сла́ва, и ны́не, Богоро́дичен:
К Тебе́ прибега́ем, Влады́чице, я́ко Помо́щнице безпомо́щных и наде́жде ненаде́жных:/ утеше́ние в ско́рбех и по́мощь нам бу́ди,/ от грехо́в и бед избавля́ющи нас, Пречи́стая.
По 2-м стихосло́вии седа́лен, глас 4:
Святи́тельства сан восприи́м,/ приле́жное попече́ние о ста́де твое́м име́л еси́, святи́телю Васи́лие,/ мрак душетле́нных искуше́ний отгоня́я,/ просвеща́я же лю́ди твоя́ све́том богове́дения,/ о всех нас приле́жно моли́ Христа́ Бо́га,/ спасти́ся душа́м на́шим.
Сла́ва, и ны́не, Богоро́дичен:
Де́во Неискусобра́чная и Благослове́нная,/ па́дающих исправле́ние и согреша́ющих избавле́ние,/ изба́ви мя от се́ти злоко́зненнаго врага́/ и утверди́ стопы́ моя́ на ка́мени за́поведей Христо́вых.
По полиеле́и седа́лен, глас 1:
Влады́це Христу́ после́довав, мир оста́вил еси́/ и, плоть покори́в ду́ху воздержа́нием, на высоту́ безстра́стия и, богоподо́бия восте́кл еси́,/ те́мже ны́не с ли́ки А́нгел Престо́лу Сла́вы предстоя́,/ моли́ Человеколю́бца Влады́ку Христа́, да спасе́т ду́ши на́ша.
Сла́ва, и ны́не, Богоро́дичен:
О Тебе́, Благода́тная, ра́дуемся и хва́лимся/ и к Бо́гу Тя и́мамы предста́тельство:/ простри́ ру́ку Твою́ святу́ю, сокруши́ враги́ на́ша/ и низпосли́ рабо́м Твои́м по́мощь от свята́го.
Степе́нна, 1-й антифо́н 4-го гла́са. Проки́мен, глас 1: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Услы́шите сия́, вси язы́цы, внуши́те, вси живу́щии по вселе́нней. Ева́нгелие от Иоа́нна, зача́ло 35, от полу́.
По 50-м псалме́ стихи́ра, глас 6:
Душе́вныя кре́пости твоея́ не премо́же си́ла вра́жия,/ святи́телю Христо́в Васи́лие,/ о Бо́зе бо укрепля́емь,/ в ничто́же вмени́л еси́ ко́зни врага́,/ о́браз сту́дныя жены́ в до́ме твое́м показу́юща,/ и вся кова́рствия его́, я́коже тка́ние паучи́нное, расто́рг,/ бу́рю сомне́ний в му́ромских лю́дех утиши́л еси́./ Тя бо пра́ведна и непоро́чна я́ве показа́ Госпо́дь,/ Ему́же моли́ся/ от ловле́ния врага́ те́мнаго нас изба́вити.
Кано́н, глас 8, его́же краегране́сие: Па́мять Васи́лия, святи́теля Ряза́ни, хвалю́.
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Прииди́те, благоче́стия рачи́телие,/ согла́сно воспои́м вси свяще́ннаго иера́рха Васи́лия/ и похва́льными пе́сньми почти́м па́мять его́,/ я́ко моли́твенника о душа́х на́ших и храни́теля гра́ду Ряза́ни.
А́нгельски на земли́ пожи́в, Богому́дре Васи́лие,/ лико́м избра́нных рабо́в Бо́жих вчини́лся еси́,/ те́мже мо́лим тя:/ моли́ Христа́ Бо́га изба́витися нам от бед и огня́ ве́чнующаго.
Моли́твами твои́ми, святи́телю Васи́лие,/ сохрани́ ста́до твое́ духо́вное от напа́стей чу́вственных и мы́сленных/ и да́же до конца́ неврежде́ны нас соблюди́.
Богоро́дичен: Я́ко сте́ну и прибе́жище стяжа́хом Тя, Богома́ти:/ спаси́ нас от бед и скорбе́й/ и от мук бу́дущих изба́ви моли́твами Твои́ми.
Песнь 3
Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.
Треволне́ния жите́йскаго пучи́ну препла́вая/ и не име́я упра́вителя помышле́ний,/ к тебе́, святи́телю Васи́лие, прибега́ю/ и от Тебе́ ожида́ю ско́рыя по́мощи.
В мо́ри мя пла́вающа и на пути́ ше́ствующа соблюди́, святи́телю,/ и наста́ви твори́ти во́лю Госпо́дню,/ я́ко да обря́щу в День су́дный соде́янных мно́ю согреше́ний разреше́ние.
Аз, любостра́стный, я́ко ладия́, обурева́юся от прегреше́ний мои́х,/ но во благоути́шное приста́нище покая́ния наста́ви мя/ моли́твами твои́ми, пречу́дне святи́телю.
Богоро́дичен: Стра́сти моего́ се́рдца исцели́, Ма́ти Всеблага́я,/ ум мой умири́ и просвети́ и напра́ви мя ходи́ти непреткнове́нно путе́м спасе́ния,/ я́ко да при́сно Тя ублажа́ю.
Седа́лен, глас 2:
Окрили́в ум ве́рою и любо́вию к Бо́гу,/ мирска́го смеше́ния возгнуша́лся еси́, святи́телю Васи́лие,/ и, крест на ра́мена твоя́ взем,/ после́довал еси́ Влады́це Христу́,/ и был еси́ храм Ду́ха Свята́го./ Те́мже вопие́м ти:/ моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́.
Сла́ва, и ны́не, Богоро́дичен:
Под кров Твой держа́вный с ве́рою прибега́ем, Богоро́дице:/ покры́й и соблюди́ нас моли́твами Твои́ми/ и спаси́ от бед и от клеветы́ злых челове́к,/ да Тя, Богома́ти, при́сно почита́ем.
Песнь 4
Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.
И́овли кре́пости во искуше́ниих не стяжа́х,/ и враг спасе́ния поглоти́ти мя тщи́тся,/ но ты, святи́телю, помози́ мне се́ти лука́ваго сокруши́ти/ моли́твами твои́ми ко Влады́це Христу́, да зову́ Ему́:/ си́ле Твое́й сла́ва, Человеколю́бче.
Любо́вию сочета́вся Христу́,/ святи́тель богоприя́тен и па́стырь и́стинен яви́лся еси́, о́тче Васи́лие./ Те́мже тя благоче́стно ублажа́юще, мо́лим:/ моли́ся Христу́ Бо́гу, да яви́т нам си́лу Свою́ во благовре́менную по́мощь.
Иера́рха тя, яко́в нам подоба́ше, стяжа́вше, тобо́ю хва́лимся/ и, в заступле́нии твое́м по́мощь обрета́юще на ви́димыя и неви́димыя враги́,/ вопие́м к Бо́гу Спаси́телю:/ си́ле Твое́й сла́ва, Человеколю́бче.
Богоро́дичен: Ангельских чино́в превы́шшая, Ма́ти Бо́жия, бу́ди ми ско́рая в беда́х Помо́щница,/ кре́пость моя́ и утвержде́ние и от враго́в защище́ние,/ да не убою́ся вра́жия преще́ния,/ но при́сно пою́ Тя и сла́влю, Всепе́тая.
Песнь 5
Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.
Святоле́пным житие́м и уче́нием твои́м, Богому́дре Васи́лие,/ мно́гия ко Христу́ приве́л еси́;/ те́мже и мы, ча́да твоя́, ны́не мо́лим тя по́мощь нам дарова́ти,/ да хо́дим непреткнове́нно в путе́х за́поведей Госпо́дних.
Во стране́ прише́льствия тече́ние до́бре соверши́в,/ ко Све́ту невече́рнему восхожде́ние обре́л еси́, преблаже́нне,/ и вене́ц све́тел прия́л еси́ от Царя́ Сла́вы Христа́,/ к Нему́же ны́не моли́ся, от помраче́ния и уны́ния душе́внаго нас свободи́ти/ и на стези́ спасе́ния стопы́ на́ша напра́вити.
Я́ко первопресто́льника и святи́теля на́шего чту́ще тя,/ мо́лим, ча́да твоя́, блаже́нне:/ от тьмы грехо́вныя изба́ви/ и све́том благода́ти просвети́ ду́ши на́ша.
Богоро́дичен: Ты еси́ просвеще́ние и избавле́ние мое́,/ Ма́ти Незаходи́маго Све́та,/ на Тя по Бо́зе наде́жду спасе́ния моего́ возлага́ю и молю́ Тя:/ изба́ви мя от належа́щих бед и скорбе́й,/ да сла́влю Тя во ве́ки.
Песнь 6
Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.
Изба́витися нам от бу́ри страсте́й/ и от потопле́ния в пучи́не зол моли́ся, святи́телю о́тче Васи́лие,/ да, моли́твами Твои́ми направля́еми,/ дости́гнем во приста́нища ти́хая Боже́ственныя во́ли.
Тя, досточу́дне Васи́лие, от водна́го потопле́ния,/ я́коже Ио́ну во чре́ве ки́тове, Госпо́дь сохрани́л есть./ О, чудесе́ но́ваго и пресла́внаго!/ Те́мже мо́лим тя:/ твои́ми ко Христу́ моли́твами изба́ви нас от потопле́ния в молве́ жите́йских попече́ний/ и тлетво́рных страсте́й.
Ежеча́сно волна́ми жите́йскими погружа́юся, и бу́ря искуше́ний потопля́ет мя./ К тебе́, о́тче Васи́лие, чу́дно по вода́м ше́ствовавшему, ны́не прибега́я, вопию́:/ моли́ся Христу́ Бо́гу,/ да изведе́т из глубины́ грехо́вныя жизнь мою́, я́ко Человеколю́бец.
Богоро́дичен: Лю́тыми страстьми́ одержи́мым ско́рая Помо́щница/ и гото́вое обурева́емым приста́нище су́щи, Ма́ти Бо́жия,/ сохрани́ мя от зло́бы и клеветы́ челове́ческия/ и не даждь ми разби́тися о ка́мень малове́рия и отча́яния,/ да не погублю́ вконе́ц ду́шу мою́.
Конда́к, глас 8:
Я́ко многосве́тлая звезда́, от гра́да Му́рома возсия́л еси́, святи́телю Васи́лие,/ по вода́м же доше́д до гра́да на́шего Ряза́ни,/ Це́рковь Бо́жию до́бре упа́сл еси́,/ просвеща́я лю́ди уче́нием и житие́м твои́м./ Помина́й и ны́не ча́да твоя́, мо́лим тя, наста́вниче наш до́брый,/ и за ны Христу́ Бо́гу и Пречи́стей Его́ Ма́тери моли́ся,/ да благода́рною душе́ю зове́м ти:/ ра́дуйся, уго́дниче Христо́в и те́плый к Бо́гу о нас моли́твенниче.
И́кос:
У́мная очеса́ всегда́ к Вы́шним возводя́,/ Небе́сных непреста́нно жела́л еси́,/ свята́го же ра́ди жития́ твоего́ архиере́йства са́ном украше́н быв,/ Це́рковь и лю́ди твои́ми уче́нии обогати́л еси́/ и, тече́ние благоче́стно соверши́в, к Бо́гу пресла́вно ду́хом преше́л еси́,/ нам святы́я мо́щи твоя́ в па́мять и освяще́ние оста́вив,/ и́мже ны́не со умиле́нием покланя́ющеся,/ мо́лимся от страсте́й треволне́ния нас сохрани́ти,/ я́ко да в тишине́ богоуго́дно пожи́вше, тебе́ благода́рно вопие́м, глаго́люще:/ ра́дуйся, о́тче Васи́лие, ско́рый помо́щниче и те́плый к Бо́гу о нас моли́твенниче.
Песнь 7
Ирмо́с: В нача́ле зе́млю основа́вый/ и Небеса́ сло́вом утверди́вый,/ благослове́н еси во ве́ки, Го́споди, Бо́же оте́ц на́ших.
Я́коже пресе́льник от гра́да Му́рома быв,/ к Богома́тери ру́це простира́я, спасе́ние обре́л еси́, святи́телю о́тче Васи́лие:/ вода́м бо, послужи́вшим тебе́ Бо́жиим манове́нием, гра́да Ряза́ни дости́гл еси́/ и, та́мо Христу́ Бо́гу угоди́в, Тому́ ны́не ра́достно пое́ши:/ благослове́н еси́, Го́споди Бо́же, во ве́ки.
Ряза́нския о́бласти благове́рнаго кня́зя и христоимени́тыя лю́ди/ ра́дости испо́лнил еси́ твои́м ди́вным по вода́м прише́ствием,/ сопу́тника и храни́теля Христа́ обре́т, к Нему́же ны́не ра́достно зове́ши:/ благослове́н еси́, Го́споди Бо́же, во ве́ки.
Я́коже трие́ о́троцы в пещи́ Вавило́нстей о́гненную си́лу угаси́ша моли́твою,/ та́ко и ты, святы́й о́тче, огнь зло́бы вра́жия и клеветы́ челове́ческия/ ве́рою и моли́твою угаси́л еси́, поя́ Бо́гу Спаси́телю:/ благослове́н еси́, Го́споди Бо́же, во ве́ки.
Богоро́дичен: Земле́ свята́я, безсе́менно произрасти́вшая Спасе́ние ми́ра, Христа́ Бо́га на́шего,/ от бу́ри сопроти́вны́я и искуше́ний изба́ви мя и из глубины́ зол возведи́,/ да пою́ непреста́нно ми́лости и щедро́ты Твоя́, Ма́ти Всеблага́я.
Песнь 8
Ирмо́с: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,/ я́ко Соде́телю всех во ве́ки.
Ангелоподо́бным житие́м возсия́л еси́, святи́телю о́тче Васи́лие,/ благоче́стия рачи́тель быв неусыпа́емь,/ те́мже со А́нгелы предстоя́ ны́не Престо́лу Влады́ки вся́ческих,/ моли́ изба́витися нам от вся́каго прило́га вра́жия, пою́щим ве́рно:/ благослови́те, вся дела́ Госпо́дня, Го́спода/ и превозноси́те Его́ во ве́ки.
На земли́ пожи́в, я́ко А́нгел, с пло́тию, я́ко безпло́тен,/ безпло́тныя враги́ под но́ги покори́л еси́./ Те́мже ны́не со А́нгелы на Небесе́х све́тло лику́я, Христу́ вопие́ши:/ благослови́те, вся дела́ Госпо́дня, Го́спода/ и превозноси́те Его́ во ве́ки.
Исто́чник благода́тных дарова́ний стяжа́в, Богоблаже́нне,/ пода́ждь ми исто́чник умиле́ния и слез,/ да омы́ю душе́вныя моя́ стра́сти/ и све́том покая́ния убелю́ очерне́вшую мою́ ду́шу, ра́достно поя́:/ благослови́те, вся дела́ Госпо́дня, Го́спода/ и превозноси́те Его́ во ве́ки.
Богоро́дичен: Христа́ нам роди́вшая, ра́дость ве́чную,/ го́рестных слез мои́х не забу́ди/ и стена́ния души́ моея́ не пре́зри, Всеблага́я,/ но яви́ на мне ми́лость и человеколю́бие Сы́на и Бо́га Твоего́.
Песнь 9
Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.
Ве́лие чу́до на тебе́ ви́дится, преблаже́нне Васи́лие,/ я́ко блаже́нное те́ло твое́ чрез мно́га ле́та соблюде́ся невреди́мо манове́нием Бо́га, ди́внаго во святы́х Свои́х,/ Его́же моли́ грехо́в проще́ние нам дарова́ти.
Адама́нт кре́пкий яви́лся еси́, святи́телю Васи́лие,/ ве́ру я́ко основа́ние непоколеби́мо в души́ твое́й име́я:/ мно́ги бо враги́ ви́димыя и неви́димыя победи́л еси́,/ я́ко добр во́ин Влады́ки Христа́,/ Ему́же моли́ся, да спасе́т тебе́ ра́ди ду́ши на́ша.
Любо́вию чту́ще твою́ па́мять, мо́лим тя, святи́телю и предста́телю наш:/ моли́ приле́жно Христа́ Бо́га о гра́де твое́м и лю́дех, изба́вити нас от вся́кия ско́рби и напа́сти,/ да тя се́рдцем и усты́ непреста́нно ублажа́ем.
Богоро́дичен: Ю́же пою́т а́нгельстии чи́ни и сла́вят патриа́рси со архиере́и я́ко Ма́терь Бо́жию,/ Тебе́, Де́во Богоро́дице, и мы, гре́шнии, припа́дающе, мо́лим:/ приста́нище ти́хое бу́ди нам, обурева́емым страстьми́,/ и от всех бед сохрани́ нас ма́терними Твои́ми моли́твами ко Христу́,/ Сы́ну Твоему́ и Бо́гу на́шему.
Свети́лен:
Ца́рственное и́мя нося́, Всецарю́ Христу́ житие́м твои́м после́довал еси́,/ Ему́же ны́не в черто́зе Небе́снем соца́рствуеши, преблаже́нне Васи́лие,/ Того́ моли́ и нас облиста́ти сла́вою Его́ Боже́ственною.
Сла́ва, и ны́не, Богоро́дичен:
Све́том Твои́м озари́ мя, Всенепоро́чная, во тьме грехо́вней содержи́маго,/ и помози́ ми ходи́ти во дни Бо́жиих повеле́ний,/ я́ко да сла́влю Тя, Всепе́тую, во ве́ки.
На хвали́тех стихи́ры, глас 2:
Преблаже́нне о́тче Васи́лие,/ я́ко безпло́тен, пожи́л еси́ на земли́/ и, тече́ние благоче́стно соверши́в,/ к Бо́гу пресла́вно ду́хом преше́л еси́,/ нам честны́я мо́щи оста́вив,/ и́мже ны́не предстоя́ще,/ мы́сли и сердца́ на́ша к тебе́ простира́ем, глаго́люще:/ помина́й нас, о́тче, свяще́нную па́мять твою́ пра́зднующих,/ и за ны Христу́ Бо́гу моли́ся,/ да твои́ми моли́твами просвети́т и спасе́т ду́ши на́ша.
Богому́дре о́тче Васи́лие,/ Христо́во ста́до слове́сных ове́ц/ на па́жити благоче́стия до́бре упа́сл еси́/ и ева́нгельскими словесы́ люде́й твои́х сердца́ напои́л еси́./ Те́мже, и по блаже́ннем преставле́нии твое́м,/ не забу́ди посеща́ти ду́хом церко́вная ча́да твоя́,/ Престо́лу же Сла́вы со святи́тели предстоя́,/ моли́ся Христу́ Бо́гу спасти́ и просвети́ти ду́ши на́ша.
Святи́телю о́тче Васи́лие,/ град и лю́ди твоя́, честну́ю па́мять твою́ пра́зднующия,/ от вся́кия ско́рби изба́ви/ и свы́ше Боже́ственную благода́ть нам низпосли́,/ да вси, тя ублажа́юще, любо́вию вопие́м:/ святи́телю наш, Бо́гу возлю́бленне,/ моли́ Христа́ Бо́га спасти́ и просвети́ти ду́ши на́ша.
Сла́ва, глас 8:
От ю́наго во́зраста рачи́тель благоче́стия был еси́:/ плоть бо ду́ху повину́в,/ воздержа́ния брозда́ми себе́ обложи́л еси́/ и, у́мным о́ком всегда́ к Вы́шним зря,/ та́мошних непреста́нно жела́л еси́./ Те́мже и по честне́м твое́м преставле́нии/ с Небе́сными ликостоя́нии совокупля́ешися/ и соца́рствуеши всеми ца́рствующему Влады́це Христу́,/ Ему́же моли́ся спасти́ и просвети́ти ду́ши на́ша.
И ны́не, Богоро́дичен:
Я́ко Всенепоро́чная Ма́ти всех Изба́вителя,/ потщи́ся от ко́зней душетле́ннаго врага́ мя изба́вити/ и ду́шу мою́ во све́тлое жили́ще доброде́телей устро́ити,/ тьму страсте́й дале́че от мене́ отгоня́ющи/ и Вы́шняго прича́стия и Све́та невече́рняго мя сподобля́ющи,/ да Тя ублажа́ю, Присноблаже́нную, ны́не и во ве́ки.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 1: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Услы́шите сия, вси язы́цы, внуши́те, вси живу́щии по вселе́нней. Апо́стол ко Евре́ем, зача́ло 318. Аллилу́ия, глас 2: Уста́ пра́веднаго поуча́тся прему́дрости, и язы́к его́ возглаго́лет суд. Стих: Зако́н Бо́га его́ в се́рдце его́, и не за́пнутся стопы́ его́. Ева́нгелие от Иоа́нна, зача́ло 36. Прича́стен: В па́мять ве́чную:
Моли́тва
Святи́телю о́тче Васи́лие! Ди́вным ше́ствием твои́м по вода́м и нетле́нием честны́х моще́й твои́х уве́рившеся, я́ко и́маши ве́лию благода́ть у Го́спода Бо́га, с ве́рою и наде́ждою к тебе́ прибега́ем и умиле́нно мо́лим тя: моли́ о нас Христа́ Бо́га на́шего, сохрани́вшаго тя, я́коже Петра́, от потопле́ния в волна́х ре́чных и от истле́ния в се́рдце земли́, да благода́ть Его́ спаси́тельная сопу́тствует нам на всех путе́х жи́зни сея́, сохраня́ющи ны невреди́мы от вся́каго зла́го обстоя́ния, вся́кий проти́вный ветр напа́стей и бу́рю страсте́й утоля́ющи, ти́хое же и безмяте́жное пла́вание в жите́йстем сем мо́ри нам да́рующи. Да прости́т нам Милосе́рдый Госпо́дь вся́кое прегреше́ние, во́льное и нево́льное, не́мощь естества́ на́шего бла́гостию Свое́ю покрыва́я, да утверди́т нас во святе́й Свое́й Правосла́вней ве́ре и благоче́стии, исполня́я сердца́ на́ша любве́ и ре́вности о соблюде́нии за́поведей Его́ ко спасе́нию душ на́ших. Це́ркви Правосла́вно-Росси́йстей да да́рует мир и благоде́нствие, да возглаго́лет в се́рдце прави́телей на́ших блага́я о ней и о всех лю́дех, да низпо́слет земли́ на́шей времена́ ми́рна, благорастворе́ны возду́хи, земли́ плодоно́сие и вся на по́льзу настоя́щаго жития́ потре́бная и да изба́вит вся гра́ды и ве́си оте́чества на́шего и всю зе́млю Ру́сскую от гла́да, губи́тельнаго огня́, смертоно́сныя я́звы и от вся́каго зла, да та́ко в ми́ре, благоде́нствии и преспе́янии в доброде́телех путь жи́зни сея́ преше́дше, вни́дем в ве́чное ца́рство, угото́ванное святы́м Его́. О всехва́льный святи́телю наш и уго́дниче Христо́в Васи́лие! Ве́руем и упова́ем, я́ко мо́жеши моли́твами твои́ми устро́ити вся блага́я душа́м и телесе́м на́шим, име́я Помо́щницу Преблагослове́нную Влады́чицу на́шу Богоро́дицу, Ея́же честно́ю и чудотво́рною ико́ною сохраня́емь, ше́ствие по вода́м, я́ко по су́ху, соверши́в, богоспаса́емаго гра́да Ряза́ни дости́гл еси́. Сего́ ра́ди приле́жно мо́лим тя: не отве́ржи нас от заступле́ния твоего́, потщи́ся на по́мощь на́шу и умоли́ за ны Го́спода и Бо́га на́шего Иису́са Христа́, изба́вльшаго тя от злоко́зненных сете́й лука́ваго и клеветы челове́ческия, да, призре́в на ны ми́лостивно, изба́вит нас от вся́кия беды́, ско́рби и боле́зни душе́вныя и теле́сныя и да сподо́бит нас, гре́шных и недосто́йных, Небе́снаго Ца́рствия Своего́ моли́твами Пресвяты́я Ма́тере Своея́ и твои́м те́плым за ны предста́тельством, всегда́, ны́не, и при́сно, и во ве́ки веко́в. Ами́нь.
И́на моли́тва
Богоизбра́нне первосвяти́телю наш и уго́дниче Христо́в Васи́лие, свя́тостию жития́ твоего́, чу́дным по вода́м пла́ванием и нетле́нием моще́й твои́х препросла́вленне! Предстоя́ Престо́лу Вседержи́теля и име́я ве́лие к Нему́ дерзнове́ние, моли́ Его́, да проба́вит ми́лость Свою́ к нам, гре́шным и недосто́йным рабо́м Свои́м, и да́рует наро́ду здра́вие, долгоде́нствие и во всем благо́е поспеше́ние: па́стырем Це́ркве да пода́ст духо́вное трезве́ние и ре́вность о спасе́нии пасо́мых; градонача́льником и судия́м страх Бо́жий, правоту́ и безкоры́стие; во́ином терпе́ние, му́жество и на враги́ одоле́ние; супру́гом взаи́мную любо́вь, ве́рность и единомы́слие; ку́плю де́ющим праводу́шие, земледе́льцем трудолю́бие и тре́звенность, си́рым призре́ние, боля́щим исцеле́ние, оби́димым заступле́ние, оклеветава́емым оправда́ние и всем лю́дем па́ствы твоея́ вся ко вре́менней и ве́чней жи́зни потре́бная. Па́че же моли́ Го́спода, моли́твенниче наш, да прости́т нам вся́кое согреше́ние, во́льное и нево́льное, и очи́стит от вся́кия скве́рны пло́ти и ду́ха; да изба́вит от ко́зней иско́ннаго врага́, ненави́стника и человекоуби́йцы, и сохрани́т от клеветы́ челове́ческия; да утверди́т во и́стинней спаси́тельней ве́ре и нелицеме́рнем благоче́стии; да соблюде́т от суему́дрия и душетле́нных уче́ний духо́в ле́стчих, де́йствующих в ве́це сем в сыне́х противле́ния; да охрани́т сердца́ на́ша от прельще́ния кра́сными ми́ра сего́ и да научи́т огреба́тися от плотски́х похоте́й и страсте́й, го́рняя му́дрствовати, а не земна́я. Моли́, о́тче наш, Всесвята́го и Боже́ственнаго Ду́ха, да возсия́ет свет благода́ти Его́ бра́тиям на́шим по пло́ти, во тьме лжеве́рия седя́щим, и да позна́ют Христа́, Бо́га Истиннаго, Еди́наго Спаси́теля всех челове́к; да возсия́ет свет сей и блужда́ющим на распу́тиих раско́ла, да вразумя́тся и прии́дут во огра́ду Правосла́вныя Це́ркве, в не́йже еди́ней несомне́нно содева́ется ве́чное спасе́ние ве́рных. О святи́телю Христо́в, моли́твенниче наш! Моли́ Христа́ Бо́га и Пречи́стую Ма́терь Его́, да упраздни́т вражды́ на́ша и нестрое́ния, соедини́т же вся ны богоподо́бною любо́вию, да в ми́ре и единомы́слии, жела́нием спасе́ния горя́ще, Го́сподеви рабо́тающе, друг дру́га тяготы́ нося́ще, до́брым по́двигом подвиза́емся и, тече́ние сконча́вше, дости́гнем в ти́хое приста́нище Небе́снаго Ца́рствия и просла́вим неизрече́нное человеколю́бие и милосе́рдие Спаси́теля на́шего Иису́са Христа́, Сы́на Бо́жия, со Безнача́льным Его́ Отце́м и Пресвяты́м Ду́хом во ве́ки веко́в. Ами́нь.
