Служба в честь святителя Софрония, епископа Иркутскаго

Тропа́рь, глас 4:

От ю́ности Христа́ возлюби́л еси́, блаже́нне Софро́ние,/ до́бре упра́вил еси́ и́ноческия оби́тели/ и, архиере́йства са́ном почте́н быв,/ упа́сл еси́ Ирку́тскую па́ству,/ те́мже и по преставле́нии дарова́ния чуде́с от Бо́га прия́л еси́/ и мо́лиши Христа́ Бо́га/ изба́вити нас от бед и спасти́ ду́ши на́ша.

Конда́к, глас 4:

Соиме́ннаго му́дрости иера́рха,/ изря́дное Це́ркве Ирку́тския украше́ние,/ отца́ на́шего святи́теля Софро́ния любо́вию восхва́лим, вси ве́рнии,/ той бо е́сть храни́тель гра́да и страны́ сея́/ и моли́твенник о душа́х на́ших.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры на 8, глас 8:

О́тче, святи́телю Софро́ние,/ чи́стый сосу́де Свята́го Ду́ха,/ пра́вило благоче́стия,/ гра́да Ирку́тска церко́вное украше́ние/ и всея́ Сиби́ри утвержде́ние,/ ревни́телю апо́столов, иера́рхов похвало́,/ Христа́ Архипа́стыря моли́/ дарова́ти душа́м на́шим/ мир и ве́лию ми́лость.

О́тче свяще́ннейший Софро́ние,/ Бо́жия зако́ны невреди́мы соблюда́л еси́/ и, лю́ди твоя́ науча́я благоче́стию,/ ве́ре, любви́ и милосе́рдию,/ мона́шествующим пра́вило жи́зни полага́л еси́,/ сам показу́я о́браз доброде́тели,/ всяк чин и во́зраст стра́ху Бо́жию уча́,/ всех приводя́ ко спасе́нию,/ прося́ коему́ждо у Бо́га ве́лия ми́лости.

Боже́ственная благода́ть призва́ тя, блаже́нне,/ во святи́теля вели́каго гра́да Ирку́тска и страны́ Сиби́рския,/ пра́вило бы́ти ве́ры и о́браз кро́тости,/ тем же, Богому́дре,/ житие́ твое́ тя прекра́сна показа́,/ архиере́ев был еси́ спобо́рник,/ преподо́бных соприча́стник и пра́ведных,/ и ны́не предстоя́ Престо́лу Святы́я Тро́ицы,/ моли́ о спасе́нии душ на́ших.

По твое́м честне́м преставле́нии,/ святи́телю о́тче Софро́ние,/ мно́га ле́та храни́ми бы́ша мо́щи твоя́,/ источа́я чудеса́ с ве́рою призыва́ющим тя,/ егда́ же приспе́ вре́мя прославле́ния твоего́,/ испепели́ся гроб твой запале́нием о́гненным/ и мо́щи со оде́ждею изнури́шася,/ грех ра́ди на́ших и скве́рнаго жития́,/ я́ко недосто́йным су́щим име́ти сокро́вище Небе́сное,/ но и по сих при́сно с на́ми пребыва́еши,/ да́руя нам мир и ве́лию ми́лость.

Сла́ва, глас 6:

Сла́вная и свяще́нная Це́рковь Сиби́рская,/ архиере́ев собо́р и вся́каго чи́на лю́дие,/ ны́не воеди́но собери́теся,/ све́тло да торжеству́ем па́мять Софро́ния,/ па́стыря на́шего и учи́теля,/ ра́достно ему́ взыва́юще:/ ра́дуйся, Тро́ицы побо́рниче;/ ра́дуйся, Ирку́тския ка́федры украше́ние;/ ра́дуйся, но́вый и изря́дный чудотво́рче,/ святы́х бо моще́й твои́х честны́я оста́нки,/ не престая́, сия́ют чудесы́,/ озаря́юще и увеселя́юще избра́нныя лю́ди твоя́,/ и́хже Ева́нгелием породи́л еси́/ и в Правосла́вии утверди́л еси́,/ и ны́не моли́ся, свя́тче, о нас ко Го́споду.

И ны́не, глас то́йже: Кто Тебе́ не ублажи́т:

Вход. Проки́мен дне. Чте́ния три святи́тельская.

При́тчей чте́ние (главы́ 10, 3 и 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти,/ не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ е́сть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва./ От уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да,/ честна́я бо реку́,/ и блаже́н челове́к, и́же пути́ моя́ сохрани́т:/ исхо́ди бо мои́ – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас/ и предлага́ю мой глас сыново́м челове́ческим,/ я́ко аз, прему́дрость, устро́их сове́т/ и ра́зум, и смысл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая,/ я́ко и́стине поучи́тся горта́нь мой,/ ме́рзки же предо мно́ю устны́ лжи́выя./ С пра́вдою вси глаго́лы уст мои́х:/ ничто́же в них стро́потно, ниже́ развраще́нно./ Вся пра́ва су́ть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

Прему́дрости Соломо́новы чте́ние (глава́ 10):

Уста́ пра́веднаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавля́ет от сме́рти./ Сконча́вшуся му́жу пра́ведну не поги́бнет наде́жда,/ сын бо пра́веден ражда́ется в живо́т/ и во благи́х свои́х плод пра́вды обы́мет./ Свет пра́ведным всегда́/ и от Го́спода обря́щут благода́ть и сла́ву./ Язы́к му́дрых до́брая све́сть,/ и в се́рдце их почи́ет му́дрость./ Лю́бит Госпо́дь преподо́бная сердца́,/ прия́тни же ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго./ Постига́ет бо жела́ющия ю,/ пре́жде да́же, разуме́ти ю,/ и удо́бь у́зрится от лю́бящих ю./ У́треневавый к ней не утруди́тся,/ и бдяй ея́ ра́ди вско́ре без печа́ли бу́дет./ Я́ко досто́йных ея́ сама́ обхо́дит и́щущи,/ и во стезя́х ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́/ и возлюби́х ю, и поиска́х от ю́ности моея́./ И взыска́х неве́сту привести́ себе́,/ я́ко всех Влады́ка возлюби́ ю./ Таи́бница бо есть Бо́жия хи́трости/ и обрета́тельница дел его́./ Труды́ ея́ су́ть доброде́тели,/ целому́дрию же и ра́зуму та учи́т, пра́вде и му́жеству,/ и́хже потре́бнее ничто́же есть в жити́и челове́ком./ А́ще же и мно́гаго иску́сства жела́ет кто,/ ве́сть дре́вняя и бы́ти хотя́щая разсмо́трит./ Све́сть изви́тия слове́с и разреше́ния гада́ний,/ зна́мения и чудеса́ проразуме́ет и сбытия́ време́н и лет,/ и всем сове́тник есть благ,/ я́ко безсме́ртие есть в ней и благосла́вие во обще́ние слове́с ея́./ Сего́ ра́ди бесе́довах ко Го́споду и помоли́хся Ему́,/ и рех от всего́ се́рдца моего́:/ Бо́же отце́в и Го́споди ми́лости,/ сотвори́вый вся сло́вом Твои́м/ и му́дрости Твое́ю устро́ивый челове́ка,/ да владе́ет бы́вшими от Тебе́ тварми́,/ и да управля́ет мир в преподо́бии и пра́вде./ Да́ждь ми Твои́х престо́лов приседя́щую прему́дрость/ и не отлучи́ мене́ от о́трок Твои́х,/ я́ко аз раб Твой и сын Рабы́ни Твоея́./ Посли́ ю с Небе́с от свята́го жили́ща Твоего́/ и от Престо́ла сла́вы Твоея́,/ да су́щи со мно́ю научи́т мя,/ что благоуго́дно есть пред Тобо́ю./ И наста́вит мя в ра́зум и сохрани́т мя в сла́ве свое́й./ Помышле́ния бо сме́ртных вся боязли́ва/ и погреши́тельна умышле́ния их.

Прему́дрости Соломо́новы чте́ние (глава́ 4):

Похваля́ему пра́веднику возвеселя́тся лю́дие,/ безсме́ртие бо есть па́мять его́,/ я́ко от Го́спода познава́ется и от челове́к,/ и уго́дна Го́сподеви душа́ его́./ Возлюби́те у́бо, о му́жие, му́дрость и поживете́,/ восхощи́те ея́ и нака́зани бу́дете,/ нача́ло бо ея́ любы́ и соблюде́ние зако́на./ Почти́те прему́дрость, да во ве́ки ца́рствуете./ Возвещу́ вам и не скры́ю от вас та́ин Бо́жиих:/ я́ко Той му́дрости Наста́вник есть и му́дрых Испра́витель,/ и вся́кому смы́слу и де́лу Хитре́ц./ И всем смы́слом научи́т му́дрость,/ есть бо в ней дух разу́мен и свят и сия́ние све́та присносу́щнаго/ и о́браз бла́гости Бо́жия./ Та дру́ги Бо́жия и проро́ки устроя́ет,/ благоле́пнейши же есть со́лнца и па́че вся́каго сотворе́ния звезд,/ све́ту сосужда́ема, обрета́ется пе́рвейши./ Та угожда́ющих ей от боле́зней изба́ви и наста́ви на стези́ пра́выя,/ даде́ им ра́зум име́ти свят и сохрани́ я от ловя́щих и по́двиг кре́пок подаде́ им./ Да разуме́ют вси, я́ко си́льнейши всего́ есть благоче́стие/ и никогда́же премо́жет зло́ба му́дрости,/ ниже́ пре́йдет злы́я облича́ющи суд./ Реко́ша же в себе́, помы́сливше непра́ведно:/ наси́льствуем пра́ведному и не пощади́м преподо́бства его́,/ ни усрами́мся седи́н ста́рости многоле́тны./ Бу́дет бо нам кре́пость зако́н и улови́м пра́веднаго,/ я́ко неуго́ден нам есть и проти́вится дело́м на́шим/ и поно́сит нам отпаде́ние зако́на/ и облича́ет нам согреше́ния наказа́ния на́шего./ Возвеща́ет нам ра́зум име́ти Бо́жий/ и о́трока Госпо́дня себе́ имену́ет./ Бы́сть нам на обличе́ние помышле́нием на́шим,/ и тя́жек нам есть и ви́димь,/ я́ко неподо́бно ины́м житие́ его́ и измене́ны стези́ его́,/ в поруга́ние вмени́хомся ему́/ и удаля́ется от путе́й на́ших, я́ко от нечисто́т,/ и блажи́т после́дняя пра́ведных./ Уви́дим у́бо, а́ще словеса́ его́ и́стинна су́ть,/ иску́сим я́же сбыва́ются ему́./ Руга́нием и му́кою истя́жем его́,/ да разуме́ем кро́тость его́/ и иску́сим беззло́бство его́,/ сме́ртию безобра́зною осу́дим его́,/ бу́дет бо посеще́ние от слове́с его́./ Сия́ помы́слиша и прельсти́шася,/ ослепи́ бо я зло́ба их/ и не разуме́ша та́ин Бо́жиих,/ и не разсуди́ша, я́ко Ты еси́ Бог Еди́н,/ живота́ име́яй и сме́рти вла́сть,/ и спаса́яй во вре́мя ско́рби, и избавля́яй от вся́каго зла./ Щедр и Ми́лостив и дая́ преподо́бным Свои́м благода́ть,/ и Свое́ю мы́шцею го́рдым противля́яся.

На лити́и стихи́ра хра́ма и свято́му, глас 1:

Влады́ки Христа́ стопа́м после́дуя,/ све́том Боже́ственнаго Ду́ха просвети́вся,/ вмести́лище чистоты́ показа́лся еси́,/ Небе́сных виде́ний прича́стник был еси́,/ те́мже Христо́с насле́дника тя Ца́рствия показа́/ и сожи́теля со все́ми святы́ми,/ е́же и нам улучи́ти, о́тче, моли́ся,/ соверша́ющим любо́вию па́мять твою́.

Сла́ва, глас 7:

Печа́ль неизрече́нная пости́же па́ству Ирку́тскую,/ егда́ честны́я мо́щи и свяще́нная ра́ка/ возгоре́шася в нощи́ о́гненным запале́нием./ Но и по сих неоску́дный исто́чник чуде́с показа́лся еси́,/ святи́телю Христо́в Софро́ние:/ гра́ду – огражде́ние, ве́рным ча́дам – в ду́се укрепле́ние/ и святы́я ве́ры утвержде́ние.

И ны́не, глас то́йже:

Под кров Твой прибега́ем, Влады́чице,/ вопие́м Ти, вси земноро́днии:/ упова́ние на́ше, Богоро́дице,/ изба́ви ны от безме́рных прегреше́ний/ и спаси́ ду́ши на́ша.

На стихо́вне стихи́ры, глас 5:

Ра́дуйтеся, лю́дие гра́да Ирку́тска,/ се бо вторы́й чудотво́рец яви́ся,/ врач и помо́щник во вся́кой ско́рби,/ цели́тель и бесо́в прогони́тель,/ гра́ду защи́тник и страсте́й укроти́тель,/ моли́твенник неусы́пный ко Го́споду о всех,/ с ве́рою к нему́ прибега́ющих.

Стих: Честна́ пред Го́сподем/ смерть преподо́бных Его́.

Ра́дуйся, свяще́нная главо́,/ о́тче Богоприя́тне Софро́ние,/ пра́выя ве́ры основа́ние,/ испо́лнителю вся́кия доброде́тели,/ ни́щих пита́телю и ско́рбных утеше́ние,/ врачу́ безме́здный немощству́ющих,/ кре́пкая наде́ждо всех,/ те́плою ве́рою тя призыва́ющих.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ра́дуйся, ра́досте на́ша, Софро́ние,/ моли́твенниче и ско́рбных сострада́льниче,/ ты бо, я́ко А́нгел, на земли́ пожи́л еси́,/ незло́бием и пра́вдою украша́емь,/ све́тлый пу́ть к Бо́гу показу́яй,/ и по отше́ствии от земны́х нас не оставля́еши./ Сла́вим тя, о́тче Богоприя́тне.

Сла́ва, глас 3:

Сла́ва Тебе́, Христе́ Бо́же,/ апо́столов похвало́ и му́чеников весе́лие,/ святи́телей и свяще́нников благоле́пие,/ преподо́бных сла́досте духо́вная./ Сла́ва Тебе́, Христе́ Спа́се,/ я́ко яви́л еси́ нам/ чудотво́рца но́ва и пресла́вна.

И ны́не, глас то́йже:

Ра́дости испо́лни се́рдце мое́, Де́во,/ прии́мшая от Гаврии́ла ра́дости веща́ние,/ ны́не печа́ль грехо́вную во мне потребля́ющи,/ се́рдце мое́ испо́лни/ любо́вию ко Го́споду.

Тропа́рь, глас 4:

От ю́ности Христа́ возлюби́л еси́, блаже́нне Софро́ние,/ до́бре упра́вил еси́ и́ноческия оби́тели/ и, архиере́йства са́ном почте́н быв,/ упа́сл еси́ Ирку́тскую па́ству,/ те́мже и по преставле́нии дарова́ния чуде́с от Бо́га прия́л еси́/ и мо́лиши Христа́ Бо́га/ изба́вити нас от бед и спасти́ ду́ши на́ша.

Ин тропа́рь, глас 1:

Ско́рый в беда́х и ско́рбех засту́пниче,/ о́тче иера́рше страны́ Сиби́рския,/ святи́телю Софро́ние,/ на Небеси́ предстоя́й с первоиера́рхом Ирку́тския Це́ркве и все́ми святы́ми,/ вы́ну и́маши благоволе́ние Го́спода сла́вы,/ при́зри на лю́ди, притека́ющия к честны́м оста́нкам святы́х моще́й твои́х,/ с ве́рою и любо́вию сле́зно прося́щия твоея́ по́мощи и заступле́ния,/ моли́, Его́же пропове́дал еси́ лю́дем Сиби́ри,/ изба́вити я от находя́щих зол и наве́тов вра́жиих,/ просвети́ти люде́й олядене́вшая дре́вле неве́рием сердца́,/ дарова́ти утвержде́ние ве́ры Христо́вы/ и спасти́ ду́ши на́ша.

НА У́ТРЕНИ

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен воскре́сен или́ пра́здника.

По 1-м стихосло́вии седа́лен, глас 1:

Излия́ся благода́ть Ду́ха во уста́х твои́х, о́тче прему́дре Софро́ние,/ и был еси́ па́стырь Христо́ва ста́да,/ уча́ слове́сныя о́вцы бли́жняго люби́ти, я́коже себе́,/ Бо́га же всем се́рдцем и все́ю кре́постию,/ и ве́рным бы́ти Ему́ да́же до сме́рти.

Сла́ва, и ны́не, Богоро́дичен:

Святе́йшая Безпло́тных Сил Небе́сных,/ Честне́йшая всея́ тва́ри, Богоро́дице,/ моли́ся ко Го́споду со святи́телем Софро́нием и все́ми святы́ми/ от бед и мно́гих зол изба́витися нам, я́ко Блага́я.

По 2-м стихосло́вии седа́лен, глас 2:

Прему́дренно соблю́л еси́ себе́, Софро́ние, от ловле́ний вселука́ваго/ и в коне́ц низложи́л еси́ того́,/ Правосла́вия был еси́ столп и утвержде́ние,/ те́мже, соше́дшеся дне́сь, па́мять твою́ почита́ем.

Сла́ва, и ны́не, Богоро́дичен:

Иму́ще Тя, Богоро́дице, упова́ние и предста́тельство,/ вра́жиих наве́т не убои́мся,/ я́ко спаса́еши ду́ши на́ша.

По полиеле́и седа́лен, глас 3:

Равноа́нгельно пожи́л еси́, о́тче, на земли́,/ ра́вное стоя́ние и́маши со А́нгелы на Небеси́,/ те́мже тя, я́ко челове́ка Бо́жия ублажа́юще,/ па́мять соверша́ем ра́достно,/ ча́юще от Христа́ Бо́га на́шего/ моли́твами твои́ми улучи́ти мир и ве́лию ми́лость.

Сла́ва, и ны́не, Богоро́дичен:

Без се́мене зачала́ еси́ от Ду́ха Свята́го,/ и, славосло́вяще, воспева́ем Тя:/ ра́дуйся, Пресвята́я Де́во.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Иоа́нна, зача́ло 35.

По 50-м псалме́ стихи́ра, глас 6:

Чу́до ве́лие зрим в запале́нии моще́й твои́х,/ о́тче наш святи́телю Софро́ние./ Не ума́лися бо си́ла чудоде́йственная в тебе́,/ ниже́ свято́е ме́сто запусте́ло есть,/ но, я́ко заря́ со́лнечная,/ просвеща́еши ве́рных сердца́,/ ве́ровати науча́я в Тро́ицу Единосу́щную,/ во Еди́но Божество́.

Кано́н Богоро́дицы, я́же в повече́рии настоя́щего гла́са на 6 и свята́го на 6, глас 2. Ирмосы́ кано́на свята́го, катава́сия по уста́ву.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Сла́ву возсле́м Христу́, Бо́гу на́шему,/ ди́вному во святы́х Свои́х,/ па́мять уго́дника Его́ дне́сь прославля́юще.

Втора́го тя засту́пника гра́ду на́шему прия́хом,/ от вся́ких находя́щих на ны зол/ твои́м предста́тельством нас сохрани́.

Всех благи́х дел о́браз себе́ показу́я па́стве твое́й,/ привле́кл еси́ мно́ги ду́ши во спасе́ние,/ и́же и улучи́ша ра́йскаго утеше́ния наслажде́ние, пою́ще:/ не́сть свят, па́че Тебе́, Го́споди.

Богоро́дичен: Бу́ря напа́стей обдержи́т ны, Влады́чице, и во́лны скорбе́й,/ но, предвари́вши, пода́ждь нам ру́ку по́мощи/ и те́плое заступле́ние и предста́тельство Твое́.

Песнь 3

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́бося дух мой, внегда́ пе́ти:/ не́сть свят, я́коже Бог наш,/ и не́сть пра́веден, па́че Тебе́, Го́споди.

Я́ко адама́нт драгоце́ннейший, возсия́л еси́ ко украше́нию Це́ркве Росси́йския,/ блиста́яй непоро́чностию жития́,/ да и мы, недосто́йнии, све́та Христо́ва наслади́мся.

Теплото́ю ве́ры согре́й сердца́ на́ша, от мра́ка грехо́внаго иззя́бшия,/ дух благоче́стия и стра́ха Бо́жия вкорени́ в нас,/ па́мять твою́ ублажа́ющих.

Любо́вию утверди́вся Христо́вою, яви́лся еси́, я́ко река́,/ Сиби́рскую страну́ напая́я уче́нием слове́с, Богоблаже́нне Софро́ние,/ те́мже любо́вию па́мять твою́ соверша́ем.

Богоро́дичен: Удиви́ла еси́ вои́стинну ны́не на нас благодея́ния/ и ми́лости Твоя́, Влады́чице,/ те́мже сла́вим мно́гое милосе́рдие Твое́.

Ин конда́к, глас 3:

Па́стырей Нача́льнику, Христу́,/ труди́лся еси́, святи́телю Софро́ние,/ на па́жити духо́вней се́верныя страны́ на́шея,/ язы́цы монго́льстии от пре́лести и скве́рны и́дольския избавля́я,/ приве́л еси́ я к све́ту ве́ры Христо́вой,/ и ны́не, со А́нгелы Влады́чню Престо́лу предстоя́,/ моли́ непреста́нно о всех нас,/ изба́вити ны от бед и спасти́ ду́ши на́ша.

Седа́лен, глас 5:

Блаже́н ты, иера́рше Софро́ние, вои́стинну и треблаже́н еси́:/ соверше́нною прилепля́яся к Бо́гу любо́вию, и вся лю́ди возлюби́л еси́,/ ду́шу полага́я за па́ству твою́, бе́дствующим благодея́ния творя́,/ ду́ши напая́я смире́нием и покоре́нием промышле́нию Боже́ственному./ Сего́ ра́ди тя ублажа́ем.

Сла́ва, и ны́не, Богоро́дичен:

Стена́ непобеди́мая нам, христиа́ном, Ты еси́, Де́во Богоро́дице,/ к Тебе́ бо прибега́юще, невреди́ми пребыва́ем/ и, па́ки согреша́юще, и́мамы Тя Моли́твенницу./ Тем, благодаря́ще, вопие́м Ти:/ ра́дуйся, Благода́тная, Госпо́дь с Тобо́ю.

Песнь 4

Ирмо́с: Услы́шах, Го́споди,/ сла́вное Твое́ смотре́ние/ и просла́вих, Человеколю́бче,/ непостижи́мую Твою́ си́лу.

Иера́рше Бо́жий, предстоя́ Престо́лу Го́спода сла́вы,/ моли́ся у́бо мир дарова́ти стране́ на́шей/ и от всех лю́тых изба́витися.

Та́ко просвети́ся свет твой пред челове́ки твои́ми до́брыми де́лы,/ и́мже яви́лся еси́ в ско́рбех уте́шитель, боля́щим врач благода́тный,/ да, вси лю́дие Ирку́тстии, просла́вим Отца́ Небе́снаго,/ дарова́вшаго нам тебе́, вели́каго чудотво́рца.

Ду́ха Пресвята́го храм, о́тче, был еси́,/ вмеща́ющ в себе́ Боже́ственную Прему́дрость,/ на домострои́тельство Це́ркве Христо́вы и мона́шествующим на утвержде́ние.

Богоро́дичен: Удивля́ется вся земля́ и вси язы́цы чудя́тся,/ зря́ще мно́гое Твое́ милосе́рдие, Влады́чице, к стране́ на́шей и ро́ду христиа́нскому,/ оба́че неисправле́ние на́ше ве́рою ко благоче́стию премени́.

Песнь 5

Ирмо́с: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́ ино́го бо́га не зна́ем.

Ели́цы во Христа́ крести́хомся, лю́дие Ирку́тския па́ствы,/ вку́пе соше́дшеся дне́сь, облеко́хомся в ра́дость духо́вную,/ па́мять святи́теля прославля́юще.

Любве́ Христо́вы подража́тель быв, вся на́ша братоненавиде́ния умири́,/ да, тобо́ю в любви́ ева́нгельстей споспешеству́еми,/ благогове́йно хва́лим тя.

Непреобори́м яви́лся еси́ в де́ле Госпо́дни, Софро́ние,/ во всем покаря́яся во́ли Его́ святе́й,/ нима́ло не взира́я на челове́ков негодова́ния, поя́ всегда́:/ ра́зве Тебе́ ино́го бо́га не зна́ю.

Богоро́дичен: Боже́ственным Твои́м сия́нием, Блага́я, исцели́ на́ша стра́сти,/ я́же от невнима́ния нам прихо́дят:/ мо́лит Тя о сем и святы́й Софро́ний.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Яви́ся па́ки благода́ть спаси́тельная па́стве Ирку́тстей/ в прославле́нии, блаже́нне, па́мяти твое́й,/ не бо по грехо́м на́шим воздаде́ся нам,/ но те́плаго моли́твенника обрето́хом, чту́щия па́мять твою́.

Па́стыря тя до́браго ве́мы, до́бре ста́до твое́ упа́сшаго,/ и ны́не па́ству твою́ в ве́ре и единомы́слии сохрани́,/ во е́же пребы́ти нам в сою́зе любве́ и ми́ра/ и досто́йным бы́ти ве́чныя любве́.

Напита́л еси́ а́лчущия пра́вды пи́щею Небе́сною:/ хлеб бо а́нгельский бы́сть сло́во твое́, Софро́ние,/ изыма́я от плене́ния грехо́внаго ду́ши чад твои́х/ и ко Христу́ тех приводя́.

Богоро́дичен: Тре́петом содержи́ми есмы́, Блага́я,/ ужаса́ют бо нас ловле́ния лука́ваго,/ но Ты, Влады́чице, от бе́здны грехо́вныя нас возведи́.

Конда́к, глас 4:

Соиме́ннаго му́дрости иера́рха,/ изря́дное Це́ркве Ирку́тския украше́ние,/ отца́ на́шего святи́теля Софро́ния любо́вию восхва́лим, вси ве́рнии,/ той бо есть храни́тель гра́да и страны́ сея́/ и моли́твенник о душа́х на́ших.

И́кос:

Целому́дрия добро́тами уязви́вся, святи́телю,/ невозвра́тным жела́нием после́довал еси́ Сотво́ршему тя,/ вся́ко плотско́е наслажде́ние возненави́дел еси́/ и я́ко ино́е со́лнце Ирку́тстей па́стве возсия́л еси́,/ тем и Христо́с да́ром тя чуде́с обогати́./ Помина́й нас, чту́щих пресве́тлую па́мять твою́, да зове́м ти:/ ра́дуйся, архиере́йскаго са́на удобре́ние;/ ра́дуйся, гра́да Ирку́тска духо́вное украше́ние;/ ра́дуйся, полу́денныя страны́ Росси́йския прозябе́ние;/ ра́дуйся, полу́нощныя страны́ Сиби́рския похвало́;/ ра́дуйся, чуде́с не ума́ливый в опале́нии моще́й твои́х;/ ра́дуйся, нося́й вене́ц пра́вды в Небе́снем Ца́рствии./ Ра́дуйся, Софро́ние Богому́дре, моли́твенниче о душа́х на́ших.

Песнь 7

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ е́сть:/ Христо́с же простре́ Богочести́вым отроко́м ро́су духо́вную,/ Сын благослове́н и препросла́влен.

Ра́дости исполня́емся, лю́дие гра́да Ирку́тска,/ соше́дшеся на честно́е прославле́ние твое́,/ да еди́неми усты́ и се́рдцем Тро́ицу Единосу́щную, тя просла́вльшую, почти́м,/ Е́йже ты, святи́телю, предстои́ши, моля́ся о душа́х на́ших.

О́тче, святи́телю Софро́ние, предстоя́ на Небесе́х,/ не забу́ди ны, до́лу су́щих:/ от вся́кия находя́щия напа́сти сохрани́,/ вся раздо́ры и бра́ни умири́,/ да про́чее вре́мя живота́ на́шего безпеча́льни пребу́дем,/ огражда́еми моли́твами твои́ми.

Трисо́лнечный Свет почи́л есть в тебе́, святи́телю Софро́ние,/ пресве́тлую свещу́ тя показа́ лю́дем Свои́м,/ целе́бника и врача́ безме́здна, пою́щим Го́сподеви:/ Сый благослове́н и препросла́влен.

Богоро́дичен: Ма́ти Де́во Препросла́вленная,/ угаси́ пе́щь страсте́й на́ших милосе́рдием Твои́м,/ да воспое́м Тя во ве́ки со избра́нными Твои́ми.

Песнь 8

Ирмо́с: Пе́щь иногда́ о́гненная/ в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Сла́вы, я́же от челове́к, восприя́ти не восхоте́в,/ Бо́жиим произволе́нием честны́я мо́щи твоя́ о́гненным запале́нием премени́л еси́,/ да то́чию от Христа́ Бо́га просла́вишися,/ те́мже науча́я нас не земна́го, но Небе́снаго Ца́рствия вожделева́ти,/ его́же улучи́ти ча́ем моли́твами твои́ми, предста́телю, наш.

Я́ко луч све́та Христо́ва возсия́л еси́ в стране́ Сиби́рстей,/ святи́телю блаже́нне Софро́ние,/ просвеща́я вся́каго гряду́щаго путе́м ева́нгельским,/ да, све́том твои́м озаря́еми, не заблу́дим в пути́ грехо́внем/ и ве́чнаго Све́та дости́гнем,/ иде́же вку́пе с тобо́ю жизнь ве́чную насле́дуем.

Апо́стола втора́го Сиби́ри, Софро́ния, просла́вим,/ непоро́чному житию́ того́ после́дуем/ и, вся грехо́вная злопомне́ния отри́нувше, зове́м:/ ра́дуйся, Софро́ние, гра́да на́шего заступле́ние.

Богоро́дичен: Е́сть вои́стинну святы́й сей день, в о́ньже собра́ нас Ма́терь Бо́жия/ просла́вити уго́дника Своего́ Софро́ния, во хра́ме Ея́ почива́ющаго/ и чудесы́ свои́ми пе́ти нас побужда́ющаго:/ благослови́те, вся дела́ Госпо́дня, Го́спода.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Ве́ру соблюде́, тече́ние земно́е сконча́,/ про́чее даде́ся тебе́ вене́ц в Ца́рствии Христо́ве./ Утверди́ и нас, малове́рием коле́блемых,/ да не бу́дем неве́рни, но ве́рни,/ и, взира́юще на честны́й о́браз твой, спасе́ние улучи́м.

И́же с ве́рою призыва́ху тя, уго́дниче Бо́жий,/ ве́лию благода́ть получи́ша,/ явля́ешибося в ско́рбех жите́йских уте́шитель,/ в печа́лех помо́щник, неду́г многообра́зных цели́тель,/ от вся́ких бед и зол изба́витель:/ не оста́ви чудотво́рною по́мощию нас,/ па́мять твою́ ве́рою чту́щих.

Мы́слию твое́ю к ве́чному и нетле́нному устреми́лся еси́,/ вся же земна́я – сла́ву и бога́тство – отри́нул еси́./ Помози́ и нам, наста́вниче ди́вный, да взыску́ем пра́вды и Ца́рствия Бо́жия,/ да, тле́нную ми́ра юдо́ль преше́дше,/ в час сме́ртный христиа́нский кончи́ны сподо́бимся/ и вку́пе с тобо́ю лицезре́ти Го́спода сла́вы досто́йни бу́дем.

Богоро́дичен: А́нгелов Цари́цу,/ архиере́йскаго, пресви́терскаго и мона́шескаго чи́на Влады́чицу/ и всего́ ро́да христиа́нскаго Покрови́тельницу,/ прииди́те, вси, восхва́лим и поклони́мся Ей,/ Та бо нело́жно обеща́ся бы́ти нам Помо́щница до сконча́ния ве́ка.

Свети́лен:

Свет Христо́в бога́тно в тя всели́ся, прему́дре Софро́ние,/ да, предугото́вав чистото́ю жи́зни ду́шу твою́,/ сотвори́т тя насле́дника Ца́рствия Небе́снаго/ и моли́твенника о душа́х на́ших.

Сла́ва, и ны́не, Богоро́дичен:

Сла́досте А́нгелов, святи́телей и преподо́бных ра́дование,/ христиа́н всех Предста́тельнице, Де́во Ма́ти Госпо́дня,/ заступи́ нас и изба́ви от ве́чных мук.

На хвали́тех стихи́ры, глас 4:

Воздержа́нием до́бре воспита́вся,/ на пресла́вную высоту́ доброде́телей возше́л еси́,/ святи́тельства оде́ждею и жития́ све́тлостию укра́шен,/ Боже́ственною осиява́емь благода́тию,/ просвети́ и нас, восхваля́ющих тя,/ моли́твами твои́ми, Софро́ние.

Прему́дре Софро́ние,/ Це́рковь Христо́ву ты укра́сил еси́,/ вруче́нный тебе́ тала́нт умно́жил еси́,/ в ра́дость сподо́бився вни́ти Го́спода твоего́,/ Ему́же предстоя́ со А́нгелы, свя́те,/ моли́ о душа́х на́ших.

Я́коже зла́то, огне́м искуша́емо, чи́сто явля́ется,/ та́ко и честны́я твоя́ мо́щи, о́тче Софро́ние,/ искуше́ни бы́ша в пеще́ре,/ да све́тлостию чуде́с возсия́ют па́че,/ озаря́юще ду́ши,/ малове́рия о́блаком омраче́нныя,/ во е́же просла́вити Христа́, Спаси́теля на́шего,/ и Его́ вели́кую ми́лость.

Егда́ ро́ду на́шему явле́ни бы́ша нетле́нныя мо́щи твоя́,/ блаже́нне иера́рше Софро́ние,/ вра́жиим ненавиде́нием во огни́ попали́шася сия́,/ хотя́щу ему́ нивочто́же вмени́ти сла́ву твою́,/ Бог же мно́жайшими чудесы́ просла́ви тя/ и моли́твенника сотвори́ о душа́х на́ших.

Сла́ва, глас 8:

О́тче Софро́ние,/ благи́й и ве́рный ра́бе Госпо́день,/ приле́жный де́лателю виногра́да Христо́ва,/ оби́тели и́ноков до́бре устро́ив,/ па́ству твою́ напои́в водо́ю живо́ю,/ се́мя благоче́стия в лю́дех возрасти́л еси́/ и, ны́не ра́дуяся и Бо́гу предстоя́,/ моли́ся со все́ми святы́ми/ о спасе́нии душ на́ших.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

НА ЛИТУРГИ́И

Блаже́нны от кано́на свята́го, пе́сни 1-я и 3-я. Проки́мен, глас 1: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Услы́шите сия́, вси язы́цы, внуши́те, вси, живу́щии по вселе́нней. Апо́стол ко Евре́ем, зача́ло 318. Ева́нгелие от Матфе́я, зача́ло 11. Прича́стен: В па́мять ве́чную:

Моли́тва

Свя́тче Бо́жий, святи́телю Христо́в, до́брый па́стырю слове́снаго ста́да, челове́че Бо́жий, но́вый чудотво́рче и неусы́пный к Бо́гу моли́твенниче за страну́ сию́, о́тче Софро́ние, при́зри с высоты́ Небе́сныя на нас, с ве́рою и любо́вию покланя́ющихся о́бразу твоему́ и честны́м оста́нкам святы́х моще́й, в на́ше утеше́ние избы́вшим от всепояда́ющаго огня́. При́зри, свя́тче Бо́жий, и ви́ждь на́ше нестрое́ние и раздо́ры, на́шу ту́гу, ско́рбь и серде́чную боле́знь, от лише́ния бра́тския любве́ пребыва́ющия. Испроси́ у Христа́ Бо́га коему́ждо нам благода́ти смире́ния, позна́ние свое́й греховности и самоукоре́ния, да, внима́юще ки́йждо свое́й со́вести, преста́нем осужда́ти бли́жняго, клевета́ти и поноша́ти, но, соедини́вшеся друг ко дру́гу любо́вию, сподо́бимся ми́рно во смире́нии про́чее вре́мя живота́ на́шего пожи́ти и улучи́ти христиа́нскую кончи́ну. Да, совоку́пльшеся в бу́дущей жи́зни со все́ми святы́ми и с тобо́ю, па́стырю наш, просла́вим Еди́наго в Тро́ице сла́вимаго Бо́га, Отца́, и Сы́на, и Свята́го Ду́ха во ве́ки веко́в. Ами́нь.