Служба в честь святителя Питирима, епископа Тамбовскаго

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 2.

Подо́бен: До́ме Евфра́фов:

Прииди́те, ве́рнии,/ просла́вим всех благ Пода́теля, Бо́га,/ дарова́вшаго нам но́ваго чудотво́рца,/ святи́теля Питири́ма,/ моля́щагося непреста́нно о всех нас.

Ра́дуйся, Тамбо́вская страно́,/ из тебе́ бо возсия́ но́вый свети́льник благода́ти,/ разгоня́яй тьму искуше́ний и бед/ от вопию́щих ве́рно:/ святи́телю о́тче Питири́ме, моли́ Бо́га о всех нас.

Ве́лия ве́ры зна́мения:/ от воды́ исто́чника чудеса́ соверша́ются,/ и ри́за святи́теля чудоде́йствует,/ и гроб его́ к жи́зни приво́дит/ вся, с ве́рою покланя́ющияся ему́.

Сла́ва, глас то́йже, самогла́сен:

Восхва́лим днесь, бра́тие, святи́теля Питири́ма,/ в пе́снех духо́вных воскли́кнем ему́:/ ра́дуйся, па́стырю наш до́брый,/ лю́ди Бо́жия на торжество́ твое́ собра́вый;/ ра́дуйся, А́нгелы и челове́ки в славосло́вии совокупи́вый;/ ра́дуйся, архиере́ев украше́ние и свяще́нников добро́то;/ ра́дуйся, боля́щих исцеле́ние и скорбя́щих утеше́ние;/ ра́дуйся, те́плый моли́твенниче о всех нас.

И ны́не, Богоро́дичен:

Непроходи́мая врата́,/ та́йно запеча́тствованная,/ Благослове́нная Богоро́дице Де́во,/ приими́ моле́ния на́ша/ и принеси́ Твоему́ Сы́ну и Бо́гу,/ да спасе́т Тобо́ю ду́ши на́ша.

На стихо́вне стихи́ры, глас 4:

Ра́дуйся, блаже́нне о́тче Питири́ме:/ посто́м и бде́нием ду́шу и те́ло от страсте́й очи́стив/ и ле́потами доброде́телей себе́ украси́в,/ оби́тель Ду́ха Свята́го был еси́,/ и ны́не во оби́телех Небе́сных водворя́ешися,/ моля́ся о чту́щих тя.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Святи́телю о́тче Питири́ме,/ ны́не со А́нгелы на Небеси́ ликовству́я/ и с ли́ки святы́х предстоя́ Престо́лу Царя́ Сла́вы,/ моли́ся о спасе́нии душ на́ших.

Стих: Блаже́н муж, боя́йся Го́спода,/ в за́поведех Его́ восхо́щет зело́.

При́зри с Небесе́, о́тче наш Питири́ме,/ на ны, земны́я, не́мощию обложе́нныя,/ почита́ющия ны́не святу́ю па́мять твою́,/ и умоли́ Отца́ Небе́снаго,/ да обрати́т нас от беззако́ний на́ших/ и приведе́т на ме́сто блаже́нства с тобо́ю.

Сла́ва, глас то́йже:

Прииди́те, благове́рнии лю́дие,/ пра́здник све́тлый соста́вим:/ Бо́жий бо святи́тель Питири́м/ предстои́т днесь Престо́лу благода́ти,/ врачу́ет неду́ги на́ша/ и мо́лится о душа́х на́ших.

И ны́не, Богоро́дичен:

Вы́шнии ли́цы, Богоро́дице Де́во,/ пою́т с ни́жними,/ сла́вяще непреста́нно/ Ро́ждшагося от Тебе́, Пречи́стая.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 1.

Подо́бен: Прехва́льнии му́ченицы:

Наста́ день све́тлаго торжества́:/ лику́ют А́нгели на Небеси́,/ ра́дуются челове́цы на земли́,/ весели́тся весь собо́р церко́вный,/ сла́вит Бо́га,/ ди́внаго во святы́х Свои́х,/ я́вльшаго святи́теля Питири́ма,/ но́ваго чудотво́рца,/ предста́теля земли́ Росси́йския.

Ра́дуйся, земле́ Росси́йская,/ весели́ся, гра́де Тамбо́ве,/ красу́йся, благочести́вых собра́ние:/ днесь бо Влады́ка и Госпо́дь всех,/ Небе́сный Архиере́й и Спас наш,/ венча́ет венце́м ве́чныя сла́вы/ ве́рнаго раба́ Своего́,/ святи́теля Питири́ма, па́стыря до́браго,/ те́пле моля́щагося о ста́де свое́м.

Прииди́те, благочести́вии лю́дие,/ у́зрите днесь чуде́с мно́жество:/ еди́нем прикоснове́нием ко гро́бу святи́теля Бо́жия/ неду́жнии здра́ви быва́ют, де́мони прогоня́ются,/ скорбя́щии отра́ду прие́млют,/ и ра́дости исполня́ется ве́рных собра́ние,/ соше́дшихся в па́мять его́.

И́ны стихи́ры, глас 4.

Подо́бен: Я́ко до́бля:

Днесь град Тамбо́в о Бо́зе досто́йно весели́тся,/ имея засту́пником свои́м Питири́ма святи́теля,/ и с ним вся Росси́йская страна́ ду́хом ра́дуется./ Те́мже и мы, ве́рнии, соше́дшеся,/ псалмы́ и пе́сньми да восхва́лим Питири́ма преди́внаго,/ ми́лости и чистоты́ сокро́вище,/ свети́льника Це́ркве пресве́тлаго,/ исто́чника чуде́с неисчерпа́емаго/ и к Бо́гу моли́твенника непосты́днаго/ с ве́рою и любо́вию чту́щих святу́ю па́мять его́.

За́поведи ева́нгельския,/ не скрыва́ти себе́ сокро́вища на земли́,/ блюсти́тель ве́рный показа́лся еси́, святи́телю,/ стяжа́ния твоя́ му́дре расточа́я,/ хра́мы Бо́жия и и́ноческия оби́тели устроя́я,/ а́лчущия пита́я и наги́я одева́я;/ те́мже и прия́т тя в ве́чныя кро́вы нас ра́ди Обнища́вый,/ Его́же моли́ грехо́в оставле́ние дарова́ти/ ве́рою и любо́вию чту́щим святу́ю па́мять твою́.

В боле́зни сме́ртней/ во́плем кре́пким возопи́л еси́ ко Го́споду/ и услы́шан был еси́ от благогове́инства твоего́:/ Сам бо Христо́с яви́ся тебе́ на о́блаце,/ благослове́нием служи́теля Себе́ ве́рна тя зна́менуя/ и исцеле́ние ти да́руя./ Тому́ помоли́ся, Богови́дче святи́телю,/ и нам сре́сти Того́ на о́блацех со все́ми святы́ми,/ егда́ прии́дет во сла́ве суди́ти ми́ру всему́.

Сла́ва, глас 5:

Я́коже во дни святы́х апо́стол/ главотя́жи и убру́сцы Па́вловы чудоде́йствоваху,/ та́ко и днесь ри́за архиере́я Бо́жия Питири́ма,/ ду́хом апо́стольским осия́ннаго,/ положе́на су́щи на неду́жныя,/ подае́т хромы́м хожде́ние,/ слепы́м прозре́ние, разсла́бленным си́лу и кре́пость,/ пла́чущим утеше́ние, отча́янным наде́жду,/ всем же ве́рным ве́лию ми́лость.

И ны́не, Богоро́дичен: В Чермне́м мо́ри:

Вход. Проки́мен дне. И чте́ния три.

При́тчей чте́ние (главы́ 3 и 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ей,/ в шу́йце же ей бога́тство и сла́ва,/ от уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да!/ честна́я бо реку́,/ и блаже́н челове́к, и́же пути́ моя́ сохрани́т:/ исхо́ди бо мои́, исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас/ и предлага́ю мой глас сыново́м челове́ческим:/ я́ко аз, прему́дрость, устро́их сове́т,/ и ра́зум, и смысл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки:/ честна́я бо реку́ и отве́рзу от усте́н пра́вая,/ я́ко и́стине поучи́тся горта́нь моя́,/ ме́рзски же предо мно́ю устны́ лжи́выя./ С пра́вдою вси глаго́лы уст мои́х:/ ничто́же в них стро́потно, ниже́ развраще́нно./ Вся пра́ва суть разумева́ющим и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

При́тчей чте́ние (главы́ 10 и 11):

Уста́ пра́веднаго ка́плют прему́дрость,/ язы́к же непра́веднаго поги́бнет./ Устне́ муже́й пра́ведных ка́плют благода́ти,/ уста́ же нечести́вых развраща́ются./ Ме́рила льсти́вая ме́рзость пред Го́сподем,/ вес же пра́веден прия́тен Ему́./ Иде́же а́ще вни́дет досажде́ние, та́мо и безче́стие,/ уста́ же смире́нных поуча́ются прему́дрости./ Соверше́ние пра́вых наста́вит их,/ и поползнове́ние отрица́ющихся упасе́т их./ Не по́льзуют име́ния в день я́рости,/ пра́вда же изба́вит от сме́рти./ У́мер пра́ведный, оста́ви раска́яние,/ нару́чна же быва́ет и посмея́тельна нечести́вых па́губа./ Пра́вда непоро́чнаго исправля́ет пути́,/ в нече́стие же па́дает непра́вда./ Пра́вда муже́й пра́вых изба́вит их,/ безсове́тием же пленя́ются беззако́ннии./ Сконча́вшуся му́жу пра́ведну, не поги́бнет наде́жда,/ похвала́ же нечести́вых поги́бнет./ Пра́ведник от ло́ва убе́гнет,/ в него́же ме́сто предае́тся нечести́вый./ Во усте́х нечести́вых сеть гра́жданом,/ чу́вство же пра́ведных благоспе́шное./ Во благи́х пра́ведных испра́вится град,/ и в поги́бели нечести́вых ра́дование./ Во благослове́нии пра́вых возвы́сится град,/ усты́ же нечести́вых раскопа́ется./ Руга́ется гра́жданом лише́нный ра́зума,/ муж же му́дрый безмо́лвие во́дит.

Прему́дрости Соломо́ни чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется,/ седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шник, преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 3:

Днесь ликовству́ет ве́рных мно́жество:/ святи́телей и свяще́нников сосло́вие,/ мона́шествующих и мирски́х собра́ние,/ ста́рцы и младе́нцы,/ ю́ныя и вдови́цы,/ кни́жницы и про́стии/ еди́неми усты́ и се́рдцем сла́вят Го́спода,/ явле́нием но́ваго моли́твенника и чудотво́рца/ подаю́щаго ми́ру ве́лию ми́лость.

Ве́рою и любо́вию соше́дшеся днесь,/ восхва́лим, бра́тие, вино́вника пра́здника на́шего:/ ра́дуйся, святи́телю Питири́ме,/ тве́рдый сто́лпе церко́вный;/ ра́дуйся, храни́телю земли́ Росси́йския;/ ра́дуйся, гра́да Тамбо́ва све́тлое украше́ние;/ ра́дуйся, о́тче кро́ткий и ми́лостивый;/ ра́дуйся, вдов и сиро́т пита́телю;/ ра́дуйся, оби́димых ско́рый предста́телю;/ ра́дуйся, боля́щих безме́здный цели́телю;/ ра́дуйся, те́плый моли́твенниче о всех нас.

Сла́ва, глас 4:

Пресла́вная днесь содева́ются во гра́де Тамбо́ве:/ слепи́и прозира́ют и хро́мии хо́дят,/ неми́и глаго́лют и глуси́и слы́шат,/ разсла́бленнии возстаю́т и ни́щии благовеству́ют/ предста́тельством святи́теля и чудотво́рца Питири́ма,/ зову́ще и глаго́люще:/ сла́ва Бо́гу, Спаси́телю на́шему.

И ны́не, Богоро́дичен: При́зри на моле́ния:

На стихо́вне стихи́ры, глас 8.

Подо́бен: О, пресла́внаго чудесе́:

О́тче преподо́бне Питири́ме,/ со А́нгелы и ли́ки святы́х/ воспева́яй ны́не Святу́ю Тро́ицу/ и от нас любо́вию твое́ю не отступи́вый,/ помина́й ста́до твое́,/ е́же собра́л еси́, му́дре,/ сохраня́й е́ от волко́в душепа́губных/ и путеводи́ невреди́мо/ во огра́ду Ца́рства Небе́снаго.

Стих: Честна́ пред Го́сподем/ смерть преподо́бных Его́.

Дом Ду́ха Свята́го был еси́/ в житии́ твое́м, о́тче наш Питири́ме,/ ве́рою и любо́вию себе́ предочи́стив,/ ны́не же Престо́лу Небе́снаго Домовлады́ки Христа́ предстоя́,/ помоли́ся Ему́ усе́рдно,/ да очи́стит нас от страсте́й душевре́дных,/ и всели́тся в сердца́х на́ших/ со Отце́м и Ду́хом,/ и введе́т нас в Ца́рство Небе́сное.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Гра́да Вя́зьмы честно́е прозябе́ние,/ десни́цею Бо́жиею во град Тамбо́в пренесе́нное,/ благода́тию Ду́ха Свята́го напое́нное/ и плоды́ доброде́телей украше́нное,/ о́тче наш Питири́ме,/ моли́ за ны Христа́ Бо́га,/ да не посече́т ны, я́ко безпло́дную смоко́вницу,/ но да всели́т ны,/ иде́же свет лица́ Его́.

Сла́ва, глас 6:

Возьми́те, врата́ Небе́сная, кня́зи ва́ша,/ и А́нгели, верхи́ подыми́те:/ Сам бо Царь Небесе́ и земли́ гряде́т/ и вво́дит в Го́рнюю сла́ву/ ве́рнаго раба́ Своего́, преподо́бнаго Питири́ма,/ па́стыря до́браго и учи́теля Богому́драго,/ мно́гими по́ты и труды́ еще́ в житии́/ а́нгельскую чистоту́ стяжа́вшаго,/ тле́нную сла́ву земну́ю презре́вшаго/ и Небе́снаго Ца́рствия возжеле́вшаго.

И ны́не, Богоро́дичен: Творе́ц и Изба́витель:

На благослове́нии хле́бов тропа́рь святи́телю, дважды, и Богоро́дице, Де́во: еди́ножды.

Тропа́рь святи́телю, глас 4:

Ве́ры и благоче́стия наста́вниче,/ Це́ркве свети́льниче, мона́шествующих о́бразе,/ святи́телю Питири́ме прему́дре,/ ста́до твое́ благоче́стно упа́сл еси́/ и ко Христу́ приве́л еси́,/ те́мже в Вы́шних венце́м сла́вы украше́н,/ с на́ми на земли́ ду́хом пребыва́еши, сия́я чудесы́./ Моли́ Христа́ Бо́га/ спасти́ся душа́м на́шим.

НА У́ТРЕНИ

На Бог Госпо́дь: тропа́рь святи́телю, дважды. Сла́ва, и ны́не, Богоро́дичен: Е́же от ве́ка утае́нное:

По 1-м стихосло́вии седа́лен, глас 7:

Я́коже дре́вле неду́жнии исцеля́хуся еди́нем прикоснове́нием кра́я риз Христо́вых,/ та́ко и ны́не боля́щии врачу́ются, ри́зы твоея́ косну́вшеся,/ в не́йже предстоя́л еси́ Престо́лу Благода́ти, архиере́ю Бо́жий, о́тче наш Питири́ме./ Сего́ ра́ди сла́вим Бо́га и вопие́м ти:/ уврачу́й и на́ша неду́ги душе́вныя и теле́сныя, свя́те, мо́лим тя.

Сла́ва, и ны́не, Богоро́дичен:

Стена́ и покро́в еси́, Влады́чице,/ и приста́нище небу́рное всем, в беда́х су́щим/ и ко Твоему́ заступле́нию с ве́рою притека́ющим./ Те́мже и мы со дерзнове́нием вопие́м Ти:/ спаса́й нас от нужд и обстоя́ний, Милосе́рдая Ма́ти.

По 2-м стихосло́вии седа́лен, глас 2:

Сози́жду Це́рковь Мою́, и врата́ а́дова не одоле́ют ей,–/ рекл еси́ дре́вле, Спа́се, ученико́м Твои́м, и ны́не зрим сбытие́ слове́с сих:/ егда́ бо неве́рие и суеве́рие возста́ша на Це́рковь Твою́,/ воздви́гл еси́ но́ваго чудотво́рца,/ благоче́стным житие́м и чудесы́ мно́гими святу́ю ве́ру утвержда́юща и враги́ ея́ посрамля́юща./ Те́мже, ра́дующеся, вопие́м Ти:/ ди́вен еси́ во святы́х Твои́х, Го́споди.

Сла́ва, и ны́не, Богоро́дичен:

Его́же от Ду́ха Свя́та безсе́менно родила́ еси́,/ моли́ со святи́телем Питири́мом утверди́ти нас в правосла́вии и единомы́слии,/ Де́во Пречи́стая и Неискусобра́чная.

По полиеле́и седа́лен, глас 4:

Егда́ поста́влен был еси на све́щнице Це́ркве Тамбо́вския,/ не дал еси́ сна очи́ма твои́ма, ниже́ ве́ждома дрема́ния, спаса́я слове́сныя твоя́ о́вцы,/ немощны́я укрепля́я, неду́жныя врачу́я, заблу́ждшия исправля́я,/ стропо́тная смиря́я кро́тостию твое́ю,/ и ны́не не преста́й моли́ти Спа́са Христа́, о́тче наш Питири́ме,/ да даст па́стырем Це́ркве ре́вность и бде́ние о душа́х.

Сла́ва, и ны́не, Богоро́дичен:

О Пречи́стая Богоро́дице Де́во,/ моли́ Сы́на Твоего́ и Бо́га на́шего,/ да очи́стит нас от беззако́ний на́ших и да́рует нам ра́дость спасе́ния,/ лобыза́ющим честны́й о́браз преподо́бнаго Питири́ма и вопию́щим:/ сла́ва снизхожде́нию Твоему́, Человеколю́бче.

Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Иоа́нна, зача́ло 36.

По 50-м псалме́ стихи́ра, глас 6:

Ки́ими похва́льными пе́сньми/ ублажи́м святи́теля Питири́ма,/ Правосла́вныя ве́ры храни́теля и неве́рия обличи́теля,/ благоче́стия побо́рника и нече́стия гро́зное вразумле́ние,/ мона́хов и мирски́х наста́вника,/ архиере́ев и свяще́нников украше́ние,/ его́же ра́ди Христо́с земли́ Росси́йстей/ да́рует мир и ве́лию ми́лость.

Кано́н Богоро́дицы со ирмосы́ на 6 и свята́го на 8, два кано́на. Кано́н святи́телю Питири́му, глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь сла́вно бо просла́вися.

Христе́, Све́те и́стинный, ра́зум мой просвети́ и се́рдце очи́сти,/ да просла́влю па́мять уго́дника Твоего́, Богоно́снаго Питири́ма.

О́тче преподо́бне Питири́ме,/ огнезра́чному Престо́лу в Вы́шних предстоя́ и Трисо́лнечными светлостьми́ озаря́емь,/ просвети́ глубину́ зол мои́х,/ я́ко да и аз пою́: сла́вно бо просла́вися.

Я́коже Моисе́й Богови́дец дре́вле спасе́ Изра́иля от руки́ фарао́новы,/ та́ко и ты, Богоно́сне о́тче, свободи́ мя от рабо́ты врагу́,/ да, ра́дуяся, сла́влю Бо́га, ди́внаго во святы́х Свои́х.

Богоро́дичен: Влады́чице и Ма́ти Изба́вителя,/ предста́тельством Твои́м умоли́ Сы́на Твоего́,/ да потреби́т живу́щий во мне грех/ и изведе́т мя в свобо́ду сла́вы чад Свои́х.

Ин кано́н святи́телю Питири́му, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Во све́те непристу́пнем лицу́ Бо́жию предстоя́, Богому́дре святи́телю,/ просвети́ душ наших омраче́ние и даждь сло́во,/ я́ко да восхва́лим, ра́дующеся, твою́, всеблаже́нне, па́мять.

От ю́ности, преподо́бне, плотска́я мудрова́ния покори́л еси́ ду́ху/ и, в безстра́стие оде́явся, сосу́д избра́н яви́лся еси́ благода́ти свяще́нства/ и па́стырь и́стинен ста́ду твоему́,/ моли́ся, о́тче, спасти́ся нам.

Жизнь твоя́ непоро́чна, о́тче, и успе́ние со святы́ми,/ па́мять же, я́ко пра́веднаго, с похвала́ми./ Христу́ о нас моли́ся, поле́зное прося́:/ мно́го бо мо́жет моли́тва пра́веднаго поспешеству́ема.

Богоро́дичен: Треволне́ния помысло́в и страсте́й/ и бе́здна грехо́в окая́нную мою́ ду́шу обыдо́ша./ Даждь ми ру́ку по́мощи, Де́во Богоро́дице, ве́рных прибе́жище.

Катава́сия: Отве́рзу уста́ моя́:

Песнь 3

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

Я́коже дре́вле пра́ведная А́нна свое́ ча́до,/ вдал еси́ себе́ сама́го, о́тче Питири́ме, в дар Бо́гу./ Утверди́ и мене́ на ка́мени за́поведей Его́, да зову́:/ несть свят, я́ко Бог наш.

О́тче Питири́ме, моли́твами твои́ми утверди́ ум и се́рдце на́ше во Го́споде,/ возвы́си рог христиа́н правосла́вных,/ да заградя́тся уста́ враго́в ве́ры и возвесели́мся о спасе́нии свое́м.

У цельбоно́снаго гро́ба но́ваго чудотво́рца да не хва́лится си́льный си́лою свое́ю,/ да не хва́лится му́дрый му́дростию свое́ю,/ да не хва́лится бога́тый бога́тством свои́м,/ но о сем да хва́лится хва́ляйся,/ е́же разуме́ти и зна́ти Го́спода и стяжа́ти бога́тство благода́ти Его́.

Богоро́дичен: Пречи́стая Де́во, Неискусобра́чная Ма́ти,/ непло́дную ду́шу мою́ и безча́дную плодоно́сну покажи́ благода́тию Сы́на Твоего́,/ моли́твами но́ваго чудотво́рца Питири́ма, да зову́ и аз со все́ми ве́рными:/ несть свят, я́коже Бог наш.

Ин

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Иоа́нну Ми́лостивому подо́бяся,/ ми́лостив к тре́бующим в житии́ твое́м яви́лся еси́, преподо́бне,/ и ни́щих вои́стинну был еси́ оте́ц,/ и ны́не, в Вы́шних живы́й, ми́лостив бу́ди тя ублажа́ющим.

Прикоснове́нием к ри́зам Христо́вым мно́зи неду́жнии здра́ви бы́ша дре́вле,/ и ны́не возлага́ющии на ся ри́зы святи́теля/ и тех во благогове́нии каса́ющиися/ от вся́ких неду́гов прие́млют исцеле́ние./ Те́мже у́бо, бра́тие, ева́нгельски просла́вим Бо́га,/ власть дарова́вшаго такову́ю челове́ком.

Ко́рмчий до́брый быв кораблю́ Христо́вы Це́ркве,/ изба́ви, о́тче, ста́до твое́ от бу́ри грехо́в, бед же и скорбе́й,/ приводя́ ны во приста́нища ти́хая Боже́ственныя во́ли.

Богоро́дичен: Е́юже Не́бо и дворы́ Госпо́дни челове́ком отверзо́шася,/ Пречи́стую Ма́терь Де́ву пе́сньми почти́м:/ несть чи́стыя, я́коже Ты, Пречи́стая,/ и несть непоро́чныя, па́че Тебе́, Влады́чице.

Седа́лен, глас 2:

А́ще и за́йде пре́жде под зе́млю те́ло твое́,/ но, я́ко со́лнце из о́блак, возсия́, луча́ми благода́ти блиста́яся./ Те́мже па́мять твою́ соверша́юще, святи́телю, со стра́хом покланя́емся/ и, я́ко о́бщему отцу́, те́пле мо́лимся:/ изба́ви ны, ча́да твоя́, от бед и ну́ждных обстоя́ний.

Сла́ва, и ны́не, Богоро́дичен:

Упова́ние христиа́н, Пресвята́я Де́во,/ Его́же родила́ еси́ па́че ума́ и сло́ва, умоли́, смоле́бника Питири́ма прии́мши,/ оставле́ние прегреше́ний и жития́ исправле́ние пода́ти нам,/ да пое́м Тя при́сно, возвели́чившую род наш.

Песнь 4

Ирмо́с: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

От ю́ности чистото́ю де́вства А́нгелом в житии́ поревнова́л еси́,/ спасе́нию челове́ков послужи́л еси́, о́тче Питири́ме,/ и к Бо́гу взыва́л еси́, вопия́:/ сла́ва си́ле Твое́й, Го́споди.

Я́коже А́нгел во пло́ти, горе́л еси́, свя́те, огне́м любве́ Христо́вы/ и вруче́нныя тебе́ лю́ди позна́нием Сы́на Бо́жия просвети́л еси́, зову́щия:/ сла́ва си́ле Твое́й, Го́споди.

А́нгеле земны́й и челове́че Небе́сный, испроси́ и нам, гре́шным, спасе́ние у Христа́ Бо́га,/ да и мы ку́пно с тобо́ю зове́м:/ сла́ва си́ле Твое́й, Го́споди.

Богоро́дичен: О Ма́ти Сло́ва и Де́во, сохрани́ ны непоро́чны от страсте́й безче́стных,/ да Христу́, все́льшуся в нас, пое́м:/ сла́ва си́ле Твое́й, Го́споди.

Ин

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Предста́теля о нас те́плейша и помо́щника гото́вейша/ тя, о́тче, су́щии в ско́рбех, стяжа́хом:/ не то́чию бо люде́й па́ствы твоея́ во гра́де Тамбо́ве,/ но и дале́че су́щия, призыва́ющия же и́мя твое́, соблюда́еши от вся́каго зла.

Христа́ еди́наго жела́л еси́, преподо́бне, и весь Христо́в был еси́:/ Тому́ в житии́ невозвра́тно после́довал еси́,/ Того́ тща́лся еси́ дости́гнути./ Те́мже ны́не Жела́ннаго обре́т, и нас моли́твами твои́ми ста́ду избра́нных сопричти́.

Служи́тель ве́рен сый Святы́я Тро́ицы,/ тре́ми Боже́ственными доброде́тельми, ве́рою, наде́ждою и любо́вию, окая́нную мою́ ду́шу просвети́/ и в бу́дущем ве́це Триеди́наго Бо́га зре́ти мя сподо́би.

Богоро́дичен: Ра́дость ми́ру роди́вшая, Го́спода,/ ра́дости Небе́сныя прича́стники нас сотвори́, Де́во Всепе́тая,/ да глас Тебе́ вопие́м Арха́нгелов:/ ра́дуйся, Благода́тная, Госпо́дь с Тобо́ю.

Песнь 5

Ирмо́с: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю.

Све́том Твои́м всю вселе́нную озари́вый,/ просвети́ тьму мою́, Го́споди,/ мрак души́ моея́ разжени́,/ в честне́й па́мяти уго́дника Твоего́ Питири́ма.

Свети́льник сый Со́лнца Пра́веднаго,/ озаря́яся при́сно Све́том невече́рним, о́тче наш Питири́ме,/ облиста́й ум и се́рдце на́ше,/ да, ра́дующеся, Спа́су на́шему пое́м:/ ино́го, ра́зве Тебе́, бо́га не зна́ем.

Что Тебе́ принесе́м, Христе́ Спа́се наш,/ ки́я пе́сни воспое́м благосе́рдию Твоему́,/ я́ко возсия́л еси́ нам свет спасе́ния,/ избавле́ние от беззако́ний на́ших чудесы́ мно́гими святи́теля Питири́ма.

Богоро́дичен: Ма́ти Свята́я, Богоро́дице, ро́ждшая Свет Непристу́пный,/ не пре́зри моле́ния недосто́йных чад Твои́х, во тьме грехо́в су́щих,/ но просвети́ нас све́том богове́дения, да, у́тренююще, сла́вим Тя.

Ин

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.

Прови́дев души́ твоея́ добро́ту,/ Пастыренача́льник Христо́с па́стыря тя до́бра и учи́теля изря́дна ста́ду Своему́ показа́,/ те́мже и прия́т тя в черто́г Небе́сный со святи́тельми,/ и́хже житию́ му́дре поревнова́л еси́./ С ни́ми у́бо на Небеси́ моли́ся о всех нас.

Теле́сныя не́мощи нахо́дят на ны, и беды́ отвсю́ду окружа́ют ны./ Изми́ у́бо ны от тех моли́твами твои́ми, святи́телю:/ врача́ бо тя и́мамы богодарова́ннаго в боле́знех и уте́шителя в ско́рбех.

За́поведи Христо́вы сотвори́в и тем ста́до твое́ научи́в,/ ве́лий по достоя́нию нарече́н еси́ во Ца́рствии Небе́снем./ Потщи́ся, о́тче, и нас ввести́ во дворы́ Госпо́дни:/ мы бо есмы́ ча́да твоя́ и о́вцы слове́снаго твоего́ ста́да.

Богоро́дичен: Небе́сных сла́во и земны́х весе́лие, Пречи́стая Де́во,/ я́ко Цари́ца, со все́ми святы́ми непреста́нно за ны моли́ся Сы́ну Твоему́:/ на Тя бо все упова́ние по Бо́зе возложи́хом.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Бе́здна зол мои́х смуща́ет мя/ и низво́дит мя во глубину́ отча́яния,/ но Ты, Бо́же, пучи́на ми́лости сый неисчерпа́емая,/ даждь ми ру́ку по́мощи, я́ко Петро́ви,/ предста́тельством ми́лостиваго уго́дника Питири́ма, и спаси́ мя.

Бе́здно ми́лости и щедро́т, Го́споди,/ уще́дри ны, поги́бшее созда́ние Твое́,/ укроти́ во́лны страсте́й на́ших/ и в приста́нище спасе́ния ны возведи́,/ моли́тв ра́ди святи́теля Питири́ма.

О́тче наш Питири́ме, служи́телю ве́рный Ми́лостиваго Бо́га,/ умоли́ Его́ благосты́ню, да и́миже весть судьба́ми спасе́т ны, погиба́ющия,/ и яви́т нам всемогу́щую по́мощь по твоему́ предста́тельству.

Богоро́дичен: Пресвята́я Влады́чице, Ма́ти милосе́рдия,/ обыше́дше, обыдо́ша нас врази́ ве́ры на́шея, и несть заступа́ющаго, и погиба́ем,/ пото́цы бо беззако́ний премого́ша ны, и отчаява́емся,/ но Ты Ма́терними Твои́ми щедро́тами приклони́ Сы́на Твоего́ на ми́лость,/ да спасе́т ны от бед, я́коже от ки́та Ио́ну.

Ин

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Па́стырю до́брый, Христо́вы лю́ди Боже́ственными уче́нии упасы́й/ и доброде́тельми души́ твоея́ воспита́вый,/ не оста́ви и нас во гресе́х на́ших поги́бнути,/ но в ни́хже и сам я́ко челове́к искуша́емь был еси́,/ и нам, искуша́емым, ны́не помози́.

О, ве́лие чу́до!/ Гроб святи́теля о́бщая всем враче́бница быва́ет,/ безме́здная вои́стинну и гото́вая:/ прииди́те, челове́цы, со стра́хом и ве́рою,/ ту́не приими́те здра́вие душа́м и телесе́м ва́шим,/ Го́спода сла́вяще и уго́дника Того́ ублажа́юще.

Гра́ду твоему́ засту́пник бу́ди, свя́те о́тче,/ и всю страну́ на́шу необори́мым твои́м предста́тельством огради́,/ да вси с весе́лием зове́м ти:/ ра́дуйся, Тамбо́вская похвало́, Питири́ме приснопа́мятне.

Богоро́дичен: Под кров Твой, Влады́чице, вси земноро́днии, прибега́ем/ и душа́ми умиле́нными вопие́м Ти:/ всемо́щным хода́тайством Твои́м, Богома́ти, ми́лостива нам сотвори́,/ Его́же пречи́сто родила́ еси́, Христа́ Бо́га на́шего.

Конда́к, глас 8:

Мона́хов наста́вника изря́дна и святи́теля всем лю́дем ми́лостива,/ чудотво́рца преди́вна и моли́твенника о нас неусы́пна,/ соше́дшеся, воспои́м Питири́ма, Тамбо́вския земли́ похвалу́.

И́кос:

Воспои́м днесь, ве́рнии, святи́теля вели́каго в пе́снех и пе́ниих духо́вных:/ ра́дуйся, о́тче Богоно́сне Питири́ме, Смоле́нския земли́ о́трасль пречестна́я,/ во гра́де Вя́зьме благода́тию Бо́жиею напое́нная и, я́ко крин, процве́тшая,/ Тамбо́вскую же страну́ плоды́ доброде́телей обогати́вшая;/ ра́дуйся, па́стырю до́брый, насажде́нием и́стинныя ве́ры и све́том благоче́стия тьму нече́стия разгна́вый;/ ра́дуйся, спаси́тельными труды́ твои́ми и по́двиги мно́ги неве́рныя обрати́вый и ко Христу́ приведы́й;/ ра́дуйся, чу́дную ико́ну Богома́тере гра́ду Тамбо́ву в насле́дие оста́вивый,/ от нея́же многоразли́чная исцеле́ния источа́ются;/ ра́дуйся, свои́ма рука́ма ископа́вый кла́дязи воды́ неисчерпа́емыя,/ ю́же с ве́рою пию́щии прие́млют неду́гов исцеле́ние и от душепа́губных страсте́й свобожде́ние;/ ра́дуйся, посеще́нием твои́м со дру́ги твои́ми, святи́телем Митрофа́ном и Боголюби́вым Васи́лием,/ Тамбо́вския де́бри и леса́ облагоуха́вый;/ ра́дуйся, тем нача́ло и́ноческаго жития́ та́мо положи́вый,/ в ми́ре же живу́щим о́браз и́стинныя дру́жбы показа́вый;/ ра́дуйся, Тамбо́вския земли́ похвало́.

Песнь 7

Ирмо́с: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.

Го́споди Бо́же наш, Любы́ неизрече́нная,/ челове́ка пе́рстнаго па́че зла́та и сребра́ о́бразом Твои́м украси́л еси́,/ вся́кими дарова́нии и чудесы́ мно́гими обогати́л еси́./ Те́мже, па́мять чудотво́рца Твоего́ Питири́ма соверша́юще, вопие́м Ти:/ благослове́н еси́, Бо́же оте́ц на́ших.

Преподо́бне о́тче Питири́ме,/ о́браз Созда́теля своего́ в души́ твое́й от страсте́й очи́стив и любо́вию Бо́жиею распаля́емь,/ пре́дал еси́ себе́ на служе́ние во́ли Его́, всегда́ взыва́я:/ благослове́н еси́, Бо́же оте́ц на́ших.

Я́коже дре́вле о́троцы благочести́вии в Вавило́не,/ и́стинную ве́ру во стране́ Тамбо́встей, о́тче Питири́ме, утверди́л еси́ и нече́стие обличи́л еси́,/ всегда́ тружда́яся, благовеству́я, моля́ся и поя́:/ благослове́н Бог оте́ц на́ших.

Богоро́дичен: Пресвята́я Влады́чице Богоро́дице,/ о́браз Твой честны́й гра́ду Тамбо́ву в благослове́ние и покро́в держа́вен/ рука́ма святи́теля Питири́ма дарова́ла еси́,/ да славосло́вим Тобо́ю Держа́внаго Христа́, Бо́га на́шего.

Ин

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Приле́жное о ста́де твое́м попече́ние име́л еси́, о́тче,/ житие́м и сло́вом на путь спасе́ния вся до́бре наставля́я./ Те́мже заблу́ждшаго мя на стезя́х поги́бели,/ я́ко па́стырь сострада́телен, твое́ овча́ ны́не взыщи́, вопию́ща:/ благослове́н еси́, Го́споди Бо́же, во ве́ки.

Сло́во Госпо́дне, я́ко чи́стии се́рдцем Бо́га у́зрят, на тебе́, свя́те о́тче, испо́лнися./ Ви́дел бо еси́ теле́сныма очи́ма Спа́са Христа́, послу́шающа моли́тву твою́, Ему́же взыва́л еси́:/ благослове́н еси́, Го́споди Бо́же, во ве́ки.

На ме́сте моли́твенных твои́х по́двигов ископа́л еси́ исто́чник воды́ благода́тныя,/ от него́же благогове́йнии лю́дие/ почерпа́ют неду́гов исцеле́ния, а́ще воспро́сят твоея́ по́мощи,/ и не раска́ются, зову́ще:/ благослове́н еси́, Го́споди Бо́же, во ве́ки.

Богоро́дичен: От сна грехо́внаго воспряни́, о окая́нная душе́ моя́,/ и ко еди́ней Засту́пнице всех воззови́:/ Ма́ти Де́во, спаси́ мя моли́твами Твои́ми/ и избра́нных ча́сти сподо́би, вопию́ща:/ благослове́н еси́, Го́споди Бо́же, во ве́ки.

Песнь 8

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода,/ и превозноси́те во вся ве́ки.

Го́споди Бо́же мой,/ пла́мень о́гненный дре́вле в ро́су отроко́м благочести́вым преложи́вый,/ пла́мень страсте́й мои́х угаси́ росо́ю моли́тв благочести́ваго святи́теля Питири́ма,/ да Тя превозношу́ с ним и аз во вся ве́ки.

О́тче наш Питири́ме,/ слез твои́х тече́ньми о́гненная искуше́ния страсте́й и по́хотей плотски́х угаси́л еси́/ и, я́ко во цве́тнице, в чи́стем се́рдце твое́м при́сно ликовствова́л еси́:/ вся дела́, благослови́те, пойте Господа.

Чи́стою боголюби́вою душе́ю со А́нгелы огнезра́чному Престо́лу Бо́га ны́не предстоя́,/ и отту́ду незаходи́мыми заря́ми облистава́емь,/ и чудесы́ мно́гими нам сия́я,/ просвети́, о́тче Питири́ме, облежа́щую нас тьму неве́рия и суеве́рия,/ да пое́м и благослови́м ди́внаго во святы́х Свои́х Бо́га во ве́ки.

Богоро́дичен: Я́коже огне́м пе́щным, страстьми́ пали́мый, зову́ Ти блу́дный аз:/ Влады́чице Чи́стая, Ма́ти Всемогу́щаго,/ спаси́ и изба́ви мя от о́гненнаго осужде́ния.

Ин

Ирмо́с: Победи́тели мучи́теля и пла́мене/ благода́тию Твое́ю бы́вше,/ за́поведем Твои́м зело́ прилежа́ще,/ о́троцы вопия́ху:/ благослови́те, вся дела́ Госпо́дня, Го́спода.

Ико́ну Богома́тере во освяще́ние, покро́в и огражде́ние гра́ду твоему́ прине́сл еси́, о́тче,/ я́же исто́чник благода́тных исцеле́ний и от вся́ких напа́стей щит держа́вен показа́ся вопию́щим:/ благослови́те, вся дела́ Госпо́дня, Го́спода.

Скоропослу́шный помо́щник в ско́рбех и боле́знех быва́еши, преподо́бне, призыва́ющим тя ве́рою,/ о́вым у́бо в со́ниих явля́яся,/ о́вым я́ве предстоя́,/ о́вым же та́йно благоде́я, вопию́щим:/ благослови́те, вся дела́ Госпо́дня, Го́спода.

Святота́тцу дерзнове́нному во хра́ме твое́м, возста́в от гро́ба, я́ве предста́л еси́, святи́телю,/ гро́зным преще́нием призва́в того́ к покая́нию./ Моли́ и нам да́тися пре́жде конца́ покая́нию, зову́щим:/ благослови́те, вся дела́ Госпо́дня, Го́спода.

Богоро́дичен: Ублажа́ют Тя вси ро́ди челове́честии,/ я́ко родила́ еси́ без отца́ Сы́на пло́тию,/ пре́жде век Сы́на Бо́жия без ма́тере су́ща,/ Ему́же вопие́м:/ благослови́те, вся дела́ Госпо́дня, Го́спода.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Отца́ Безнача́льнаго Сло́ве, Сы́не Единоро́дный,/ челове́ка па́дшаго хотя́ обнови́ти, Сын Де́вы яви́лся еси́,/ и, грехи́ всего́ ми́ра взем, на Крест возне́сл еси́,/ и отту́ду распросте́ртыма дла́ньма расточе́нная ча́да Бо́жия собра́л еси́;/ те́мже и мы, днесь сою́зом любве́ Твоея́ связу́еми/ и ди́внаго уго́дника Твоего́ Питири́ма па́мять соверша́юще,/ Ро́ждшую Тя велича́ем.

Воплоще́нному Сы́ну Бо́жию подража́я,/ па́че ине́х смири́л еси́ себе́, преподо́бне о́тче Питири́ме,/ те́мже и любо́вь Бо́жию стяжа́л еси́/ и заблу́ждшая ча́да Бо́жия приве́л еси́ ко Отцу́ Небе́сному,/ сла́вити Его́ благосе́рдие.

Испо́лнь любве́ Христо́вы, о́тче наш Питири́ме,/ сло́вом и житие́м па́ству твою́ поуча́л еси́/ си́рыя призира́ти, ни́щия пита́ти, скорбя́щия утеша́ти./ Помоли́ся Спа́су Христу́,/ да и мы днесь в па́мять твою́ украси́м себе́ сострада́нием и ми́лостынями,/ я́коже ча́да Бо́жия возлю́бленная.

Богоро́дичен: Ма́ти Свята́я, Безму́жная Де́во,/ во чре́ве Твое́м Бо́га и Челове́ка воеди́но совокупи́вшая,/ да́руй и нам, расточе́нным, соедини́тися во еди́нем Христе́, Сы́не Твое́м,/ на Не́мже утверди́ся Це́рковь, Тя велича́ющая.

Ин

Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Па́стырскою ре́вностию распаля́емь,/ и́ны о́вцы, я́же не бе́ша от ста́да твоего́, приве́л еси́ ко Христу́,/ ерети́чествующих мно́жества вразумля́я, неве́рныя же све́том богопозна́ния озаря́я,/ да бу́дет, по глаго́лу Спа́сову, еди́но ста́до и еди́н па́стырь.

Тя, я́ко Небе́снаго врача́,/ дар исцеле́ний от Го́спода прии́мша, усе́рдно мо́лим, святи́телю:/ твои́х моли́тв Небе́сным врачева́нием исцели́ лю́тыя неду́ги душ и теле́с на́ших.

Благода́рное сие́ пе́ние чад твои́х не пре́зри, уго́дниче Бо́жий,/ но благосе́рдием твои́м приими́ е́ и Творцу́ вся́ческих принеси́,/ да Той ми́лостив бу́дет тя почита́ющим.

Богоро́дичен: От бед спаси́ и от страсте́й свободи́, Влады́чице, рабы́ Твоя́ святи́теля Питири́ма моле́нием:/ Тя бо необори́мую сте́ну, вси су́щии, в печа́лех и́мамы,/ я́ко ро́ждшую Спасе́ние на́ше.

Свети́лен.

Подо́бен: Не́бо звезда́ми:

Свети́ла на небеси́ Утверди́вый/ яви́ тя Це́ркви Свое́й но́вую звезду́ пресве́тлую,/ ду́ха светлостьми́ и чуде́с сия́нии нас озаря́ющую и нечести́выя посрамля́ющую,/ неусы́пный предста́телю наш, святи́телю о́тче Питири́ме.

Сла́ва, и ны́не, Богоро́дичен:

Ма́ти Пречи́стая, ро́ждшая Свет неизрече́нный,/ сы́ны Све́та покажи́ ны и зри́тели блаже́нства Небе́снаго бы́ти сподо́би,/ да, ра́дующеся, с Тобо́ю и преподо́бным Питири́мом зове́м:/ Светода́вче Христе́ Бо́же наш, сла́ва Тебе́.

На хвали́тех стихи́ры на 4, глас 3:

Прииди́те, вси язы́цы,/ уразуме́йте та́йну ве́ры на́шея:/ святи́тель Бо́жий Питири́м, храни́тель дарова́ний духо́вных,/ те́лом в зе́млю отше́дый,/ ду́хом любве́ Христо́вы с ве́рными и днесь пребыва́ет/ и ве́село от вся́кия беды́ спаса́ет,/ разли́чная содева́я чудеса́;/ о́во пома́занием еле́я от гро́ба его́,/ о́во питие́м целе́бныя воды́ из кла́дязя его́,/ о́во моли́твою пред гро́бом и ли́ком его́,/ о́во возложе́нием ри́зы его́,/ о́во виде́нием его́, я́ко жи́ва су́ща,/ о́во еди́нем призыва́нием и́мене его́,/ стра́ждущия тя́жкими неду́ги здра́вы от одра́ воздвиза́я,/ сомня́щияся в ве́ре укрепля́я,/ заблу́ждшия исправля́я,/ бе́дствующия в пути́ от потопле́ния водна́го спаса́я,/ да благодаря́т всегда́ благоде́ющаго им Бо́га/ и велича́ют но́ваго уго́дника Его́/ и чудотво́рца Питири́ма.

Богоблаже́нне о́тче Питири́ме,/ вся кра́сная ми́ра сего́ возненави́дев,/ зако́н же Бо́жий возлюби́в,/ плоть твою́ посто́м и бде́нием изнури́л еси́,/ ду́шу же слез струя́ми от страсте́й очи́стил еси́,/ смире́нием и кро́тостию, терпе́нием и любо́вию украси́л еси́/ и а́нгельски еще́ на земли́ пожи́л еси́;/ сего́ ра́ди, я́ко свети́льник многосве́тлый,/ мно́гими чудесы́ просия́л еси́/ и исто́чник вели́ких даро́в Бо́жиих показа́лся еси́./ Моли́ просла́вльшаго тя Го́спода,/ да просвети́т тьму грехо́в и беззако́ний на́ших/ и да́рует земли́ Росси́йстей/ мир и ве́лию ми́лость.

О́тче Богоно́сне Питири́ме,/ на го́ру доброде́телей возше́д высо́ких,/ Бо́га в души́ твое́й, я́ко в храме, нося́,/ возводи́л еси́ па́ству твою́ уче́ньми за́поведей Христо́вых,/ я́ко ле́ствицею, от земли́ к Небеси́,/ сего́ ра́ди и оби́тели и́ноческия благоустроя́л еси́,/ и хра́мы Бо́жия вся́кими благоле́потами украша́л еси́,/ и моля́щияся в них поуча́л еси́./ Хра́мы и нас Ду́ха Свята́го сотвори́ моли́твами твои́ми,/ я́ко предста́тель наш, вели́кий Питири́ме.

Сла́ва, глас 8:

Мона́хов мно́жества и мирски́х люде́й собра́ния,/ наста́вника тя почита́ем/ и я́ко учи́теля богому́дра сла́вим тя, о́тче наш Питири́ме:/ вся бо в житии́ твое́м неле́ностне/ на стези́ спасе́ния наставля́л еси́/ и ны́не любо́вию твое́ю всех объе́млеши,/ струи́ ми́лости Бо́жия излива́еши/ с ве́рою призыва́ющим тя./ Моли́ за ны, о́тче свяще́ннейший,/ да сподо́бимся Ца́рствия Небе́снаго,/ иде́же ты в незаходи́мей сия́еши сла́ве.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое. Тропа́рь свята́го. Ектении́ и отпу́ст.

НА ЛИТУРГИ́И

Блаже́нны от кано́на свята́го, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол ко Евре́ем, зача́ло 335. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник:

Моли́тва

Благослове́н и препросла́влен Госпо́дь Бог, призва́вый тя, святи́телю о́тче наш Питири́ме, от пе́рваго часа́ де́лателя в виногра́д Свой, яви́вый в тебе́ послуша́ние во́ли Его́ неукло́нное, ре́вность Предте́чеву и любо́вь Па́влову, та́же и на све́щник Це́ркве Тамбо́вския тя поста́вивый и архиере́я вели́ка тя показа́вый. Благода́тию святи́тельства укрепля́емь и огне́м любве́ Христо́вы распаля́емь, не дал еси́, па́стырю наш до́брый, сна очи́ма твои́ма, ниже́ ве́ждома дрема́ния, на всяк день тружда́яся, моля́ся и благовеству́я, неве́рныя просвеща́я, заблу́ждшия вразумля́я, па́дшия возставля́я, немощны́я укрепля́я, пла́чущия утеша́я, всем быв вся, я́коже и святы́й Па́вел, да вся́ко не́кия спасе́ши. Егда́ же вре́мя де́лания твоего́ в вертогра́де Домовлады́ки Христа́ испо́лнися и отше́л еси́ от земны́х в селе́ния Го́рняя прия́ти мзду трудо́в твои́х, даде́ся ти, уго́дниче Бо́жий, Престо́лу Царя́ Сла́вы с ли́ки святы́х предстоя́ти и отту́ду па́ству твою́ назира́ти, за ны, гре́шныя, моли́тися, не́мощи немощны́х носи́ти, неду́ги цели́ти, ско́рби утоля́ти. Сего́ ра́ди от дне блаже́ннаго успе́ния твоего́ ве́рнии не преста́ша притека́ти к тебе́ в ско́рбех и боле́знех, и о́вии прикоснове́нием ри́зы твоея́, о́вии от воды́ из кла́дязя твоего́ здра́вие и избавле́ние от вся́ких бед улуча́ху. Те́мже и ны́не, к цельбоно́сному гро́бу твоему́ соше́дшеся, сла́вим Бо́га, ди́внаго во святы́х Свои́х, и тебе́, о́тче свяще́ннейший, велича́ем и мо́лим: не отступа́й от нас любо́вию твое́ю, сохраня́й моли́твами твои́ми Це́рковь Правосла́вную незы́блему от неве́рия и раско́ла, страну́ же Росси́йскую от бед и напа́стей защити́, мир и безмяте́жие той да́руя, от вся́ких враго́в огради́, па́стырем Це́ркве Святы́я благопоспеши́, дела́ рук их испра́ви и ре́вностию о спасе́нии вруче́ннаго им слове́снаго ста́да сердца́ их распали́, вся же ны в послуша́нии спаси́тельному благове́стию Христо́ву соблюди́ и де́ло спасе́ния, я́ко еди́но на потре́бу, вменя́ти помози́, да ку́пно с тобо́ю еди́неми усты́ и еди́нем се́рдцем вси на всяк день и час пое́м и сла́вим Спа́са Христа́ со Отце́м и Святы́м Ду́хом во ве́ки веко́в. Ами́нь.

И́на моли́тва

О вели́кий уго́дниче Бо́жий и пресла́вный чудотво́рче, святи́телю Питири́ме! К тебе́ смире́нно припа́даем и усе́рдно мо́лимся: яви́ нам, гре́шным, любо́вь твою́ оте́ческую и многомо́щное твое́ заступле́ние. Ве́руем бо, я́ко ве́лие дерзнове́ние и́маши ко Го́споду и я́ко мно́го мо́жет предста́тельство твое́ пред Престо́лом бла́гости Его́. Сохрани́ моли́твами твои́ми Це́рковь Святу́ю от ересе́й и раско́лов, от суеве́рия и неве́рия. Испроси́ нам ве́ру пра́ву, наде́жду несомне́нну, любо́вь нелицеме́рну, в до́брых де́лех преспе́яние, во искуше́ниих му́жество, в злострада́ниих терпе́ние, в моли́твах постоя́нство, мир и благоустрое́ние стране́ на́шей, здра́вие же и спасе́ние лю́дем ея́. При́зри ми́лостивно на предстоя́щия и моля́щияся пред свято́ю ико́ною твое́ю и вся проше́ния их во бла́го испо́лни, и всем вся в жи́зни вре́менней и ве́чней потре́бная да́руй, во сла́ву ди́внаго во святы́х Свои́х Бо́га, в Тро́ице сла́вимаго и покланя́емаго, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.