Служба в честь святителя Нифонта, Патриарха Константинопольскаго
ВЕ́ЧЕР
На Го́споди, воззва́х: стихи́ры, глас 2:
Егда́ уязви́лся еси́ жела́нием сугу́баго по́стничества,/ Ни́фонте преподо́бне,/ тогда́, я́ко еле́нь жа́ждущий,/ прите́кл еси́ на святу́ю Го́ру Афо́нскую/ и, обте́к тоя́ свяще́нная места́,/ обита́ти возжеле́л еси́/ в честне́й оби́тели Предте́чи,/ с ни́мже моли́ся о чту́щих святу́ю па́мять твою́.
Егда́ осия́н был еси́ в моли́тве све́том благода́ти,/ столп яви́лся еси́ светови́днейший,/ озаря́я Афо́н и досяза́я Небесе́:/ све́тлостию бо дел и слове́с твои́х/ мона́шествующия Горы́ наставля́л еси́/ на веду́щее к Небеси́ безстра́стие/ и соверше́нство дея́ния и зре́ния,/ е́же улучи́ти и нам моли́ся,/ чту́щим святу́ю па́мять твою́.
Егда́ изволе́нием Бо́жиим/ на вселе́нский престо́л возведе́н был еси́,/ Ни́фонте сла́вне,/ я́коже со́лнце, просвеща́л еси́ ве́рныя,/ согрева́я сердца́ их Боже́ственным уче́нием,/ и был еси́ па́стырь Це́ркве и́стинный,/ пасы́й лю́ди на па́жити спаси́тельней./ И нам проси́ спасе́ния,/ чту́щим святу́ю па́мять твою́.
Сла́ва, глас 1:
Весели́ся, святоиме́нный Афо́не,/ в па́мяти Богоно́снаго Ни́фонта,/ сей бо, я́ко насажде́ние благода́тное,/ неувяда́емое и присноживо́е,/ процвете́ на холме́х святы́я Горы́/ и благоуха́ния испо́лни насе́льники ея́,/ израсти́в Ду́хом Святы́м животво́рное всепло́дие./ Те́мже, пе́сньми воспева́юще преподо́бнаго,/ возопии́м Христу́, того́ просла́вльшему:/ моли́твами Твоего́ уго́дника/ благоуго́дны Тебе́ яви́ ны,/ я́ко Благ и Человеколю́бец.
И ны́не, пра́здника или́ Богоро́дичен.
На стихо́вне, Сла́ва, глас 4:
Во святи́телех преподо́бнаго и в преподо́бных святи́теля,/ мона́шествующих ли́цы, святи́тельскими вку́пе и преподо́бническими/ похвалы́ увенча́им Ни́фонта треблаже́ннаго,/ сей бо, по́стничеством во Афо́не предочи́стився/ и прия́телище быв Свята́го Ду́ха,/ па́стырь последи́ показа́ся Фессалони́к и Влахи́и/ и Вселе́нский Патриа́рх Константи́ня гра́да,/ житие́м же и сло́вом наставля́я пасо́мыя,/ мно́ги спасе́ны приведе́ ко Го́споду,/ подаю́щему мир и ве́лию ми́лость.
Тропа́рь, глас 3:
Де́лы просия́л еси́ благоче́стия,/ высокотво́рным смире́нием украша́емь,/ Афо́на похвало́, патриа́рхов удобре́ние,/ Ни́фонте сла́вне,/ моли́ся о нас, любо́вию сла́вящих тя.
Сла́ва, и ны́не, Богоро́дичен.
НА У́ТРЕНИ
По 1-й стихоло́гии седа́лен, глас 1:
Подража́тель был еси́, Ни́фонте, Анто́ния и Па́вла,/ Ефре́ма, Евфи́мия, Са́ввы и про́чих сла́вных по́стников,/ бо́дренно проше́дших путь креста́,/ и́же скита́хуся в пусты́нях и гора́х./ Тем поревнова́в, свя́те,/ в пусты́ни Горы́ Афо́на во умерщвле́нии пло́ти пожи́л еси́/ и ны́не, с преподо́бными торжеству́я на Небеси́, моли́ спасти́ся нам.
Сла́ва, и ны́не, пра́здника или́ Богоро́дичен:
Безневе́стная Чи́стая Богоро́дице Де́во,/ еди́на Предста́тельнице ве́рных и покро́ве,/ бед, и скорбе́й, и лю́тых обстоя́ний всех изба́ви,/ на Тя упова́ние иму́щих, Отрокови́це,/ и ду́ши на́ша спаси́ Боже́ственными мольба́ми Твои́ми.
По 2-й стихоло́гии седа́лен, глас 4:
Досто́йный прее́мник яви́лся еси́, иера́рше, ди́вных святи́телей Христо́вых,/ доброде́тельми укра́шенных и просла́вленных чудесы́,/ и́же труды́ и беды́ понесо́ша, Це́ркве Правосла́вие охраня́юще,/ сим после́дуя, Ни́фонте,/ ско́рби, изгна́ния и уничиже́ния претерпе́л еси́ ве́ры ра́ди./ Дерзнове́ние у́бо име́я, проси́ нам ми́ра и ве́лии ми́лости.
Сла́ва, и ны́не, пра́здника или́ Богоро́дичен:
Де́во Всенепоро́чная, Пресу́щнаго Бо́га ро́ждшая,/ со святи́телем Того́ непреста́нно моли́/ оставле́ние прегреше́ний и исправле́ние жития́ да́ти нам пре́жде конца́,/ ве́рою и любо́вию пою́щим Тя по до́лгу, еди́на Всепе́тая.
Кано́н, глас 8.
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Пресве́тлою сла́вою Божества́ озаря́емь, Боже́ственный о́тче,/ души́ моея́ мглу разжени́,/ да воспою́ сла́вныя по́двиги твоя́, Христо́в иера́рше.
Благочести́ваго ко́рене о́трасль сый, блаже́нне,/ зако́н животво́рный всех Влады́ки от ю́ности возлюби́л еси́/ и вся́кое беззако́ние умерщвля́ющее возненави́дел еси́.
Теку́щих непостоя́нства избежа́в,/ веще́ственная на духо́вная премени́л еси́, я́ко Богому́дрый,/ и благода́тию Бо́жиею обогати́лся еси́, благосла́вне.
Четвери́цу доброде́телей приусво́ил еси́, преподо́бне,/ целому́дрие, му́дрость, му́жество и пра́вду,/ и те́ми возше́л еси́ на высоту́ богозре́ния.
Боже́ственными бодростьми́, посто́м же и моли́твою вооружи́вся,/ пло́ти, ми́ра и диа́вола победи́тель, о́тче, был еси́,/ Всемогу́щия Тро́ицы осене́н си́лою.
Богоро́дичен: Ма́ти Бо́жия,/ моли́тися не преста́й о живу́щих в Горе́ Твое́й,/ да напра́вит Госпо́дь стопы́ на́ша по словеси́ Своему́,/ да благода́ть и ми́лость от Него́ обря́щем.
Песнь 3
Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
Плотско́е му́дрование раче́нием Боже́ственным препобеди́в,/ прите́кл еси́ всеусе́рдно на святу́ю Го́ру,/ иде́же, Богозва́нне, стяжа́л еси́ смире́нием высо́кая.
Все́льник сый оби́тели Предте́чи, блаже́нне,/ благоугоди́л еси́ Бо́гови преподо́бническими труды́ твои́ми/ и мона́шествующих Афо́на яви́лся еси́ наста́вник и засту́пник.
Исти́ны ревни́теля уве́девше тя, святого́рстии и́ноцы/ Богому́дрыми словесы́ твои́ми просвеща́хуся и позна́нию во́ли Бо́жии поуча́хуся./ Те́мже тя, о́тче отце́в, почита́ем.
Трисо́лнечнаго Божества́ невече́рний свет прии́м в се́рдце свое́м,/ показа́лся еси́ столп пресве́тлый,/ всю Го́ру озаря́я, Ни́фонте богатносве́тле.
Богоро́дичен: Держа́вное прибе́жище и́ноком Горы́ Твоея́, Богоро́дице,/ не пре́зри нас, притека́ющих к заступле́нию Твоему́,/ но, предваря́ющи, спа́сай от вся́кия беды́ и ско́рби.
Седа́лен, глас 4:
Вы́шних ища́, прия́л еси́ бога́тство некра́домо благода́ти,/ и вся обогаща́еши ве́рныя, свяще́ннейший Ни́фонте,/ и сердца́ весели́ши притека́ющих к тебе́./ Тем, досто́йную мзду твои́х трудо́в прии́м от Подвигополо́жника Христа́,/ моли́ся Тому́ прегреше́ний оставле́ние дарова́ти/ пра́зднующим любо́вию святу́ю па́мять твою́.
Сла́ва, и ны́не, пра́здника или́ Богоро́дичен:
Сло́во О́тчее, Христа́ Бо́га на́шего, от Тебе́ воплоти́вшагося, позна́хом, Богоро́дице Де́во,/ еди́на Чи́стая, еди́на Благослове́нная./ Тем непреста́нно Тя, воспева́юще, велича́ем.
Песнь 4
Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.
Ты был еси́, всече́стне, по́стник,/ во а́лчбе и жа́жди пребыва́яй и трезвя́йся во бде́ниих и моли́твах,/ ты друг друго́м и враго́в примире́ние,/ ты стра́нных упокое́ние и в беда́х помо́щник.
Ты, о́тче, смире́н, кро́ток, незло́бив, безмо́лвен и сострада́телен ко всем показа́лся еси́,/ ты заступле́ние си́рых, ни́щих бога́тство,/ утеше́ние скорбя́щих и всех исправле́ние, досточу́дне.
Ты, преподо́бне, мона́шествующим Горы́ Афо́нския свети́льник, утвержде́ние и ра́дование,/ ты в по́двизех и доброде́телех ясне́йший о́браз,/ живопису́яй нам спаси́тельную стезю́ дея́ния и зре́ния.
Ты, Ни́фонте, наста́вник возжеле́нен был еси́,/ сла́док словесы́, прост нра́вы, духо́вными дарова́нии пребога́т,/ Пресвято́ю Тро́ицею ущедря́емь во спасе́ние мно́гих, Богоприя́тне.
Богоро́дичен: Ты патриа́рхов сла́ва, Влады́чице,/ святи́телей похвала́ пресве́тлая,/ Ты по́стников украше́ние и и́ноков освяще́ние,/ Ты ве́рных спасе́ние и ми́ра всего́ покро́в, Преблагослове́нная.
Песнь 5
Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.
По́стничеством предочи́стив ду́шу и те́ло, прехва́льне,/ свяще́нства сподо́бился еси́ пома́зания свята́го/ и был еси́ иере́ев благоле́пие.
Сосу́д свяще́н сый Ду́ха благода́ти,/ испроси́ нам освяще́ние,/ любо́вию почита́ющим, священнотаи́нниче, па́мять твою́.
В высоту́ любве́ дости́г, всече́стне,/ на высо́цем све́щнице Це́ркве поста́вился еси́,/ архипа́стырь быв христоимени́тым лю́дем.
Тро́ическим сия́нием озаря́емь,/ Боже́ственных, Ни́фонте, позна́л еси́ уче́ний глубину́/ и па́ству твою́ те́ми умудря́л еси́.
Богоро́дичен: Тебе́, Богоизбра́нная, Предста́тельницу и́мамы непосты́дную:/ изба́ви, Госпоже́, Го́ру и оби́тель сию́ от наше́ствия язы́к,/ я́ко твое́ достоя́ние.
Песнь 6
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Велича́ют тя, Богому́дре, Фессалони́кский град и Византи́я сла́вная/ и с ни́ми святоиме́нный Афо́н,/ иму́ще тя па́стыря и моли́твенника.
Ублажа́ет тя Влахи́йская страна́ и ра́дуется о тебе́,/ сладкоглаго́ливаго уче́ния твоего́ наслади́вшися и моли́тв,/ и́миже утвержда́л еси́ ю.
Ка́ко досто́йно почти́м труды́, боле́зни и по́ты,/ подъя́тыя тобо́ю, иера́рше, па́ствы ра́ди твоея́,/ гоне́ния же от враг ви́димых и неви́димых?
Да сла́ву неизме́нную благоугоди́вших Тро́ице улучи́ши на Небеси́,/ сла́ву земну́ю, о́тче, презре́л еси́,/ изгна́ние, озлобле́ние же и уничиже́ние терпя́ исти́ны ра́ди.
Богоро́дичен: Ра́дуйся, стено́ необори́мая и́ночествующих в насле́дии Твое́м, Присноде́во,/ и ору́жие непобеди́мое на борю́щия ны,/ спа́сающая Тя призыва́ющия.
Конда́к, глас 8:
Сла́вных по́двигов твои́х, святи́телю Христо́в,/ светоно́сная па́мять возсия́ днесь,/ услажда́ющи ду́ши и освяща́ющи/ лобыза́ющих твоя́ честны́я мо́щи./ Те́мже с весе́лием зове́м ти:/ ра́дуйся, Ни́фонте Богому́дре.
И́кос:
А́нгела тя зря́ще во пло́ти, свя́те,/ удивле́нием содержи́ми о вели́ких исправле́ниих твои́х по́стнических и па́стырских,/ сицева́я ра́достная тебе́ прино́сим:/ ра́дуйся, све́та Боже́ственнаго прия́телище;/ ра́дуйся, доброде́телей сокро́вище./ Ра́дуйся, Це́ркве непоколеби́мый сто́лпе;/ ра́дуйся, Правосла́вия ревни́телю./ Ра́дуйся, свети́льниче Афо́на пресве́тлый;/ ра́дуйся, звездо́, Восто́к озаря́ющая./ Ра́дуйся, па́дающих возста́ние;/ ра́дуйся, согреша́ющих исправле́ние./ Ра́дуйся, я́ко яви́лся еси́ ве́рный служи́тель Бо́жий;/ ра́дуйся, я́ко вшел еси́ в ве́чную ра́дость Го́спода своего́./ Ра́дуйся, от бед избавля́яй призыва́ющия тя;/ ра́дуйся, от вся́ких злых подая́й свобожде́ние./ Ра́дуйся, Ни́фонте Богому́дре.
Песнь 7
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.
Лише́нный престо́ла твоего́, я́ко други́й Златоу́ст, непра́ведно,/ дарова́лся еси́ па́ки, всече́стне, Афо́ну, взыва́ющему о тебе́:/ отце́в Бо́же, благослове́н еси́.
Всели́вся, я́коже и пе́рвее, во оби́тели Дионисиа́тстей, украси́тель тоя́ был еси́,/ вели́ким же смире́нием и терпе́нием твои́м, свя́те, вся и́ноки Горы́ удиви́л еси́, взыва́ющия о тебе́:/ отце́в Бо́же, благослове́н еси́.
Егда́ ты, досточу́дне, яви́лся еси́ к бе́дствовавшим в мо́ри,/ а́бие бысть тишина́, и вси спасо́шася от потопле́ния./ Но и на́ше утиши́ волне́ние страсте́й моли́твами твои́ми, да пое́м:/ отце́в Бо́же, благослове́н еси́.
Апо́столов прее́мника, вели́ких святи́телей единонра́вна,/ по́стников ревни́теля, мо́лим тя, Ни́фонте:/ бу́ди хода́тай ко Пресвяте́й Тро́ице о нас, пою́щих:/ отце́в Бо́же, благослове́н еси́.
Богоро́дичен: Ди́вна Ты, Влады́чице, во святе́м Горы́ Твоея́/ и па́стыре слове́сных ове́ц Сы́на Твоего́, Ни́фонте прехва́льнем,/ его́же моли́твами соблюда́й нас в ми́ре и любви́, да пое́м:/ отце́в Бо́же, благослове́н еси́.
Песнь 8
Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Страда́льческаго жития́ твоего́, прехва́льне, подража́телие, ученицы́ твои́ Мака́рий и Иоаса́ф,/ моли́твами твои́ми укрепле́ннии,/ му́жески за Христа́ пострада́ша, вопию́ще:/ му́ченицы, превозноси́те Его́ во ве́ки.
Тече́ние сконча́в, Богому́дре, ве́ру соблю́л еси́,/ про́чее соблюде́ся тебе́ вене́ц пра́вды от Христа́,/ угото́ванный лю́бящим его́ па́стырем и вопию́щим:/ святи́телие, превозноси́те Го́спода во ве́ки.
Егда́ гони́тель твой, свя́те, не обрета́ше при жи́зни и по сме́рти поко́я,/ ты, я́ко незло́бивый, принесе́нием моще́й твои́х/ по́дал еси́ тому́ проще́ние и поко́й, во е́же всем вопи́ти:/ лю́дие, превозноси́те Го́спода во ве́ки.
Я́ко за́поведей ева́нгельских храни́тель,/ от вся́кия скве́рны пло́ти и ду́ха очище́н,/ Пресвяты́я Тро́ицы был еси́ свяще́нное жили́ще./ Тем притека́ющия к моще́м твои́м освяща́еши, во е́же тем вопи́ти:/ раби́ Госпо́дни, превозноси́те Го́спода во ве́ки.
Богоро́дичен: Изба́ви, о Всеблага́я Госпоже́,/ су́щия во Афо́не рабы́ Твоя́ от лю́тых в житии́ сем и по кончи́не,/ да благода́рственно о Тебе́ взыва́ем:/ преподо́бнии, превозноси́те Го́спода во ве́ки.
Песнь 9
Ирмо́с: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.
Свя́тостию дел и благода́тию слове́с твои́х наслади́вшиися, всеблаже́нне, и́же во Влахи́и, ве́рнии/ и пра́ха от гро́ба твоего́ иска́ху прикосну́тися,/ ди́внаго во святы́х Свои́х Го́спода велича́юще.
Сострада́тельный ко всем нрав твой ви́дев,/ Всеблаги́й Бог исто́чник показа́ чуде́с честны́я оста́нки твоя́, всехва́льне,/ с ве́рою к ним припа́дающим и Вы́шняго Даропода́теля велича́ющим.
Свиде́тельствуют гра́ди и ве́си Влахи́и оби́лие благода́ти,/ исте́кшия от твои́х моще́й, всесла́вне,/ в принесе́нии бо тех исцеле́ния повсю́ду подава́хуся Го́спода о тебе́ велича́ющим.
Престо́лу предстоя́ Трисо́лнечнаго Божества́,/ я́ко преподо́бен, я́ко святи́тель, я́ко патриа́рх дея́нием и зре́нием,/ проси́ нам, Богоприя́тне, ми́ра и спасе́ния,/ да о тебе́ Пресвяту́ю Тро́ицу велича́ем.
Богоро́дичен: Мари́е Всепе́тая, моли́твы Твоего́ уго́дника Ни́фонта приими́ о нас,/ соверша́ющих па́мять его́,/ да, предста́тельством того́ спасе́ннии Тобо́ю,/ с Безпло́тными ли́ки Тя велича́ем.
Свети́лен:
Огнь Пресвята́го Ду́ха прия́в в ду́шу твою́, о́тче,/ яви́лся еси́ весь о́гнен, я́коже ви́дяху тя и́ноцы Дионисиа́та,/ Боже́ственною бо любо́вию пламене́я,/ просвеща́еши и согрева́еши с ве́рою притека́ющия к тебе́,/ святи́телю Ни́фонте пребога́те.
Сла́ва, и ны́не, пра́здника или́ Богоро́дичен:
С Бо́гом на Тя, Пречи́стая, упова́ние возлага́ем,/ И́же из Тебе́ проше́дшему сраспина́еми Христу́;/ Твои́ми же к Нему́ мольба́ми невреди́мы да́же до конца́ нас сохрани́.
На хвали́тех стихи́ры, глас 4:
Прииди́те, все мно́жество мона́шествующих на Афо́не, стеце́мся/ и воспои́м святи́теля Христо́ва Ни́фонта,/ дру́га Богома́тере и́скренняго,/ о́браз жития́ по́стническаго,/ пра́вило ве́ры Правосла́вныя/ и зерца́ло всех доброде́телей,/ моля́щася о спасе́нии душ на́ших.
Днесь ра́дуются в па́мяти твое́й, Ни́фонте приснопа́мятне,/ влахи́йстии лю́дие, елла́дстии и фраки́йстии/ и Афо́на насе́льницы,/ отца́ и па́стыря тя иму́ще,/ житие́ твое́ свято́е ве́дущии/ и благода́тию не престаю́щии наслажда́тися/ от целе́бных моще́й твои́х./ Моли́ся о спасе́нии душ на́ших.
Оде́ждею святи́тельскою украси́вся,/ изгна́ния претерпе́л еси́, свя́те,/ и ско́рби разли́чныя и лю́тыя,/ му́ченик вои́стинну произволе́нием,/ я́коже Иоа́нн, златы́й усты́,/ его́же и сла́внаго престо́ла сподо́бился еси́ бы́ти насле́дник/ и ве́чныя сла́вы соуча́стник,/ Ни́фонте достохва́льне,/ моли́ся о спасе́нии душ на́ших.
Сла́ва, глас 5:
Равноа́нгельнаго жития́ твоего́ изря́дство/ и души́ благода́тную ле́поту зря,/ а́нгельский сонм ликова́ше,/ Ни́фонте Богому́дре преподо́бне,/ в честне́м успе́нии твое́м,/ полцы́ же те́мных а́дских сил,/ безси́льно яря́щеся, лю́те посрамля́хуся,/ ты бо, презре́в вся земна́я наслажде́ния,/ весь к Небеси́ впере́н был еси́,/ иде́же лику́я ны́не со А́нгелы,/ у Христа́ испроси́ нам мир и ве́лию ми́лость.
И ны́не, пра́здника или́ Богоро́дичен.
Славосло́вие вели́кое. И отпу́ст.
