Служба в честь святителя Германа, архиепископа Казанскаго

Тропа́рь, глас 4:

От ю́ности и́го Христо́во усе́рдно восприи́м,/ бде́нными по́двиги поста́ и моли́твы просла́вился еси́./ Отону́дуже призыва́ющу тя Бо́гу на служе́ние Це́ркви/ в новопросвеще́ннем ца́рстве Каза́нстем,/ вку́пе со святи́телем Гу́рием воззва́н был еси́,/ иде́же я́ко первонача́льник/ созда́нной тобо́ю в гра́де Свия́жске оби́тели/ и досто́йный первосвяти́телю прее́мник яви́лся еси́./ Ду́хом предстоя́ Престо́лу Влады́чню,/ моли́ся, святи́телю Ге́рмане, со святи́телем Гу́рием/ правосла́вней па́стве во благоче́стии преспева́ти/ и тьме́ инове́рия све́том ве́ры разгна́тися.

Конда́к, глас 4:

До́блестями преподо́бия и пра́вды/ вруче́нное тебе́ слове́сное ста́до озаря́я/ и на зла́чных Сло́ва Христо́ва па́житях пита́я,/ на пра́вый пу́ть за́поведей Госпо́дних/ си́лою ду́ха твоего́ наставля́л еси́ е./ Те́мже и ны́не, осеня́емое цельбоно́сными чудотворе́нии твои́ми,/ в святу́ю па́мять твою́, зове́м тебе́:/ не преста́й, святи́телю, предста́тельствовати/ пред Пастыренача́льником о ста́де твое́м,/ я́ко па́ствы твоея́ утвержде́ние/ и су́щим по тебе́ святи́телем удобре́ние.

НА МАЛОЙ ВЕЧЕ́РНИ

На Го́споди, воззва́х: стихи́ры на 4, глас 2:

Святи́телю о́тче Ге́рмане,/ в день прославле́ния па́мяти твое́й/ яви́, я́ко в зерца́ле,/ потемне́нным мы́слям на́шим/ све́тлый о́браз доброде́телей твои́х,/ да, после́дуя приме́ру свята́го жития́ твоего́,/ со стезе́й стро́потных наста́вимся/ на пра́выя пути́ благоугожде́ния Го́споду/ и спасе́ния душ на́ших.

Презре́в блага́я ро́да/ и достоя́ния твоего́,/ изше́л еси́ на те́сный путь Христо́в,/ иде́же а́ще и превозвы́сился еси́/ па́че ине́х до́блестями послуша́ния,/ оба́че смиренному́дрием/ твори́л себе́ ме́ньша всех./ Сего́ ра́ди от Вознося́щаго смире́нныя/ превознесе́н еси́.

Преподо́бных житию́ после́дуя приле́жно,/ по́стническими освяти́лся еси́ дея́ньми,/ те́мже освяти́ ду́ши на́ша твои́ми моли́твами/ и испроси́ нам благода́ть/ после́довати по стезя́м/ Богоуго́днаго тече́ния твоего́, преблаже́нне.

Возше́л еси́ на высоту́ безстра́стия,/ све́том Богове́дения озаря́емый,/ и во све́те лица́ Бо́жия ходя́,/ блужда́ющия во тьме́ страсте́й/ пра́во ходи́ти наставля́л еси́;/ те́мже вси Де́йствовавшаго в тебе́ Свое́ю благода́тию прославля́ем.

Сла́ва, глас 3:

Де́вственным лико́м соприча́стника,/ воздержа́ния блюсти́теля,/ смире́ния Христо́ва подража́теля,/ свети́льника Це́ркве, святи́теля Ге́рмана/ честну́ю па́мять пе́сненно восхва́лим.

И ны́не:

Прему́дрости сокро́вище ве́мы Тя, Пречи́стая,/ и точа́щую благода́тию исто́чник приснотеку́щий ра́зума;/ ка́пли ве́дения одожди́ нам, Влады́чице,/ е́же воспева́ти Тя при́сно.

На стихо́вне стихи́ры, глас 5:

Во оби́тели твое́й лик и́ночествующих собра́в/ и храм благоле́пен/ во сла́ву безсме́ртнаго Успе́ния Бо́жия Ма́тере созда́в,/ в нем те́ло твое́ предложи́л еси́,/ я́ко дар освяще́н:/ Ейже моли́ся изба́витися нам/ от внеза́пныя сме́рти/ и непосты́дно ста́ти/ пред Судие́ю Пра́ведным.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Ра́дуется свяще́нное сосло́вие/ и вси, в день па́мяти твое́й к тебе́ притека́ющии:/ на тебе́ бо излия́ся нетле́ние,/ я́ко ми́ро святы́ни/ и благоуха́ния Христо́ва.

Стих: Уста́ моя́ возглаго́лют прему́дрость,/ и поуче́ние се́рдца моего́ ра́зум.

Излия́ся благода́ть во устна́х твои́х, святи́телю,/ пото́ком бо благи́х слове́с и дея́ний твои́х/ напая́еши в пе́снех и хвале́ниих/ тя велича́ющия.

Сла́ва, глас то́йже:

Благоче́стно на престо́ле/ новопросвеще́нныя Каза́нския па́ствы святи́тельствуя/ и су́щия от ро́да ага́рянскаго/ озари́в уче́нием твои́м,/ Тро́ицу во Еди́ном Божестве́/ почита́ти научи́л еси́,/ приводя́ омраче́нных к Све́ту Невече́рнему:/ и́мже наслажда́яся,/ озаря́й свы́ше ста́до твое́.

И ны́не:

Еди́ну Тя Всенепоро́чную/ Соде́тель Сло́во обре́т,/ всели́ся в Твое́ чре́во,/ содева́я на́ше спасе́ние благода́тию/ за неизрече́нную ми́лость.

Тропа́рь, глас 4 ( зри день сей ни́же)

Сла́ва, и ны́не, Богоро́дичен: Е́же от ве́ка утае́нное:

НА ВЕЛИ́ЦЕЙ ВЕЧЕ́РНИ

Блаже́н муж: На Го́споди воззва́х: стихи́ры на 8, глас 6:

От мла́дости, преподо́бне,/ всего́ себе́ возложи́в Христу́/ и Того́ ра́ди любве́/ до́льнаго ми́ра чу́вственныя красоты́ оста́вив,/ ско́рбная и жесто́кая терпе́ти произво́лил еси́./ Те́мже ны́не во Све́те Незаходи́мом/ с ли́ки ве́рно подвиза́вшихся/ зря преми́рную красоту́,/ моли́ся подвигополо́жнику Христу́/ о спасе́нии душ на́ших.

Таи́бницу дел Бо́жиих –/ Прему́дрость возлюби́в,/ Христа́ Еди́наго возжеле́л еси́:/ крест на ра́мо взем,/ Тому́ усе́рдно после́довал еси́,/ кре́пким воздержа́нием/ и всено́щным в умиле́нной моли́тве стоя́нием/ плоть твою́ ду́ху покори́л еси́./ И ны́не, ликовству́я вку́пе со вше́дшими/ те́сным путе́м в ра́дость Го́спода своего́,/ соде́лай моли́твами твои́ми, святи́телю,/ и нам ше́ствовати путя́ми живо́тными.

Ди́вных свиде́ний Бо́жиих/ стяжа́в любому́дрие,/ име́л еси́ зако́н посреде́ чре́ва твоего́,/ и се́рдце непоро́чно во оправда́ниих святы́х:/ сего́ ра́ди процве́л еси́,/ я́ко дре́во, насажде́нное при исхо́дищах вод,/ и я́ко ма́слина плодови́та в дому́ Бо́жии./ Моли́ся, святи́телю,/ и нам в дому́ Бо́жии не безпло́дным бы́ти.

Богоблаже́нне о́тче Ге́рмане,/ пра́вды ра́ди Ца́рствия Христо́ва/ вся, я́же на земли́, я́ко уме́ты вмени́в,/ ум твой безстра́стием просвети́л еси́,/ нището́ю Христо́вою обогати́вся,/ путе́м непоро́чным тече́ние соверши́л еси́./ Те́мже и по преставле́нии твое́м/ в нетле́нии пребыва́я,/ моли́ и нам от тле́ния грехо́внаго/ неврежде́нным бы́ти.

И́ны стихи́ры, глас 7:

Изволе́нием Ду́ха Свята́го,/ избра́нием Це́ркве и держа́вным гла́сом/ корми́ла Каза́нския па́ствы прия́л еси́,/ ю́же управля́я сло́вом и́стины,/ тща́лся еси́ предста́вити Христу́,/ я́ко ни́ву благовозде́ланну./ Те́мже, святи́телю, име́я дерзнове́ние ко Го́споду,/ вы́ну предста́тельствуй,/ ве́ры и благоче́стия плода́ми изоби́ловатися ей/ и вся́ким разнове́рием непло́дствовати.

Глас 5:

Я́ко Апо́столом после́дователя ве́рна/ и наста́вника све́том благода́ти/ сло́во растворя́юща,/ пре́жде те́мный, ны́не же просвеще́нный град Каза́нь,/ прие́м тя, ра́дуется,/ па́ства же твоя́, озаря́емая све́том жития́ твоего́,/ вы́ну весели́тся:/ приме́ром бо по́двигов твои́х/ на стези́ пра́выя наставля́емии,/ и́мамы тя путевождя́ благоприя́тна/ ко спасе́нию душ на́ших.

Сла́ва, глас 8:

Прииди́те, правосла́вных собо́ри,/ све́тлыя Свия́жския оби́тели основа́теля/ и новопросвеще́нныя Це́ркве Каза́нския па́стыря,/ чудотво́рца Ге́рмана пе́сненно восхва́лим:/ той бо, в благоле́пии святи́тельства/ принося́ же́ртву хвале́ния,/ и себе́ самаго́ приноша́ше/ в же́ртву благоуго́дну Бо́гови,/ о слове́сном ста́де свое́м,/ и сло́вом Христо́вым,/ мно́ги, во тьме блужда́вшия неве́рия,/ ко све́ту ве́ры напра́ви./ Тем и по преставле́нии неоску́дно источа́ет да́ры/ любо́вию почита́ющим па́мять его́.

И ны́не, Богоро́дичен, глас 8: Ца́рь Небе́сный:

Проки́мен дне. Чте́ния три святи́тельская.

При́тчей чте́ние (главы́ 10, 3, 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти,/ не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва./ От уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да!/ честна́я бо реку́:/ и блаже́н челове́к, и́же пути́ мои́ сохрани́т:/ исхо́ди бо мои́ – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас/ и предлага́ю мой глас сыново́м челове́ческим./ Я́ко аз, прему́дрость, устро́их сове́т,/ и ра́зум, и смы́сл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая,/ я́ко и́стине поучи́тся горта́нь мой,/ ме́рзски же пре́до мно́ю устны́ лжи́выя./ С пра́вдою вси глаго́лы уст мои́х:/ ничто́же в них стро́потно, ниже́ развраще́нно./ Вся пра́ва суть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

Прему́дрости Соломо́новы чте́ние (гла́вы 10, 6, 8, 9):

Уста́ пра́веднаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавля́ет их от сме́рти./ Сконча́вшуся му́жу пра́ведну, не поги́бнет наде́жда./ Сын бо пра́веден ражда́ется в живо́т/ и во благи́х свои́х плод пра́вды объи́мет./ Свет пра́ведным всегда́,/ и от Го́спода обря́щут благода́ть и сла́ву,/ язы́к му́дрых до́брая свесть,/ и в се́рдце их почи́ет му́дрость./ Лю́бит Госпо́дь преподо́бная сердца́,/ прия́тни же Ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго:/ постига́ет бо жела́ющия ю,/ пре́жде да́же разуме́ти ю,/ и удо́бь у́зрится от лю́бящих ю./ У́треневавый к ней не утруди́тся,/ и бдяй ея ра́ди вско́ре без печа́ли бу́дет./ Я́ко досто́йных ея́ сама́ обхо́дит, и́щущи,/ и во стезя́х ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́,/ и возлюби́х ю, и поиска́х от ю́ности мое́я./ И взыска́х неве́сту привести́ себе́,/ я́ко всех Влады́ка возлюби́ ю./ Таи́бница133 бо есть Бо́жия хи́трости/ и обрета́тельница дел Его́./ Труды́ ея́ суть доброде́тели:/ целому́дрию же и ра́зуму та учи́т,/ пра́вде и му́жеству,/ и́хже потре́бнее ничто́же есть в житии́ челове́ком./ А́ще же и многоиску́сства жела́ет кто,/ весть дре́вняя и бы́ти хотя́щая разсмо́трит:/ свесть изви́тия слове́с и разреше́ния гада́ний,/ зна́мения, и чудеса́ проразуме́ет,/ и сбытия́ време́н и лет,/ и всем сове́тник есть благ./ Я́ко безсме́ртие есть в ней/ и благосла́вие во обще́нии слове́с ея́./ Сего́ ра́ди бесе́довах ко Го́споду,/ и помоли́хся Ему́,/ и рех от всего́ се́рдца моего́:/ Бо́же отце́в и Го́споди ми́лости,/ сотвори́вый вся Сло́вом Твои́м/ и му́дростию Твое́ю устро́ивый челове́ка,/ да владе́ет бы́вшими от Тебе́ тва́рьми/ и да управля́ет мир в преподо́бии и пра́вде,/ даждь ми Твои́х Престо́лов приседя́щую прему́дрость/ и не отлучи́ мене́ от о́трок Твои́х,/ я́ко аз раб Твой и сын рабы́ни Твоея́./ Посли́ ю с Небе́с от свята́го жили́ща Твоего́/ и от Престо́ла сла́вы Твоея́,/ да, су́щи со мно́ю, научи́т мя,/ что благоуго́дно есть пред Тобо́ю,/ и наста́вит мя в ра́зум,/ и сохрани́т мя в сла́ве свое́й./ Помышле́ния бо сме́ртных вся боязли́ва/ и погреши́тельна умышле́ния их.

Прему́дрости Соломо́новы чте́ние (гла́вы 4, 6, 7, 2):

Похваля́ему пра́веднику возвеселя́тся лю́дие:/ безсме́ртие бо есть па́мять его́,/ я́ко от Го́спода познава́ется и от челове́ков,/ и уго́дна Го́споду душа́ его́./ Возлюби́те у́бо, о му́жие, му́дрость и поживете́,/ восхощи́те ея́ и нака́зани бу́дете,/ Нача́ло бо ея́ – любы́ и соблюде́ние зако́на./ Почти́те прему́дрость, да во ве́ки ца́рствуете./ Возвещу́ вам и не скры́ю от вас та́ин Бо́жиих,/ я́ко Той му́дрости Наста́вник есть,/ и му́дрых Испра́витель,/ и вся́кому смы́слу и де́лу Хитре́ц./ И всем смы́слом научи́т му́дрость:/ есть бо в ней Дух Разу́мен и Свят,/ и сия́ние Све́та Присносу́щнаго,/ и о́браз бла́гости Бо́жия;/ та́я дру́ги Бо́жия и проро́ки устроя́ет./ Благоле́пнейши же есть со́лнца/ и па́че вся́каго сотворе́ния звезд,/ све́ту сосужда́ема, обрета́ется пе́рвейши./ Та́я, угожда́ющия ей, от боле́зни изба́ви/ и наста́ви на стези́ пра́выя./ Даде́ им ра́зум име́ти свят,/ и сохрани́ от ловя́щих,/ и по́двиг кре́пок подаде́ им./ Да разуме́ют вси,/ я́ко си́льнейши всего́ есть благоче́стие./ И никогда́же премо́жет зло́ба му́дрости,/ ниже́ пре́йдет, злы́я облича́ющи, суд./ Реко́ша же в себе́, помы́сливше непра́ведно:/ наси́льствуем пра́веднаго/ и не пощади́м преподо́бства его́,/ ни усрами́мся седи́н ста́рости многоле́тны./ Бу́дет бо нам кре́пость зако́н,/ и улови́м пра́веднаго,/ я́ко неуго́ден нам есть:/ и проти́вится дело́м на́шим,/ и поно́сит нам отпаде́ние зако́на,/ и облича́ет нам согреше́ния наказа́ния на́шего./ Возвеща́ет нам ра́зум име́ти Бо́жий/ и о́трока Госпо́дня себе́ имену́ет./ Бысть нам на обличе́ние помышле́ний на́ших,/ и тя́жек нам есть, и ви́димь:/ я́ко неподо́бно ины́м житие́ его́,/ и измене́ны стези́ его́./ В поруга́ние вмени́хомся ему́:/ и удаля́ется от путе́й на́ших, я́ко от нечисто́т,/ и блажи́т после́дняя пра́ведных./ Уви́дим у́бо,/ а́ще словеса́ его́ и́стинна суть,/ иску́сим, я́же сбыва́ются ему́./ Руга́нием и му́кою истя́жем его́,/ да разуме́ем кро́тость его́,/ и иску́сим беззло́бство его́:/ сме́ртию безобра́зною осу́дим его́,/ бу́дет бо посеще́ние от слове́с его́./ Сия́ помы́слиша и прельсти́шася:/ ослепи́ бо я зло́ба их./ И не разуме́ша та́ин Бо́жиих,/ и не разсуди́ша, я́ко Ты еси́ Бог Еди́н,/ живота́ име́яй и сме́рти власть,/ и спаса́яй во вре́мя ско́рби,/ и избавля́яй от вся́каго зла́./ Щедр и ми́лостив,/ и дая́й преподо́бным Свои́м благода́ть,/ и Свое́ю мы́шцею го́рдым противля́яйся.

На лити́и стихи́ры, глас 6:

Гла́сом предержа́щаго и собо́ром первосвяти́телей/ в новопросвеще́нную Каза́нскую страну́/ основа́телем вели́кия оби́тели посыла́ешися;/ иде́же, весь ум твой впери́в в Зижди́теля вся́ческих,/ вельми́ подвиза́лся еси́/ в созда́нии оби́тели/ и в собра́нии ли́ка мона́шествующих,/ неусы́пно моля́ся ко Го́споду,/ да, возгради́в ю досто́йно,/ яви́ши жили́щем по Го́споде жи́тельствующих,/ во е́же вку́пе с ни́ми подвиза́тися о спасе́нии свое́м/ и наставля́ти на путь спасе́ния/ и ве́рных, и неве́рующих.

Лику́ют в па́мяти твое́й, святи́телю Ге́рмане,/ па́ствы Каза́нския ча́да твоя́,/ с ни́ми же ку́пно ра́дуются/ и вси ча́да Це́ркви Росси́йския,/ любо́вию хва́ляще тебе́ Просла́вившаго,/ я́ко такова́ нам хода́тая и моли́твенника/ дарова́л есть в тебе́.

Сия́нием доброде́телей твои́х/ сотвори́ тя Христо́с,/ я́ко град верху́ горы́,/ пове́дающий вели́кия дела́ Бо́жия,/ и, я́ко свети́льник, поста́ви тя на све́щнице,/ да тобо́ю наставля́емии,/ ве́ру неразде́льну соблюде́м/ и во све́те де́йственной ве́ры/ у́зрим Свет Незаходи́мый.

Сла́ва, глас 3:

О́тче Богому́дре Ге́рмане,/ вели́к показа́лся еси́ де́лы и словесы́:/ пася́ слове́сное ста́до/ на зла́чных па́житях сло́ва Христо́ва,/ из неве́рия в ве́ру приводи́л еси́/ и, благовествова́нием породи́в ча́да послуша́ния,/ сия́ обручи́л еси́ чистото́ю Христу́,/ подаю́щему мир душа́м на́шим.

И ны́не:

Прииди́те, вси концы́ земни́и,/ честно́е преставле́ние Богома́тере восхва́лим,/ в ру́це бо Сы́на ду́шу непоро́чную положи́./ Те́мже святы́м Успе́нием Ея́ мир оживотвори́вся,/ во псалме́х, и пе́ниих, и пе́снех духо́вных/ со Безпло́тными и Апо́столы пра́зднует све́тло.

На стихо́вне стихи́ры, глас 5:

Ра́дуйся, свяще́нная главо́,/ святи́телю Ге́рмане,/ ты отверже́нием ми́ра Ева́нгельски,/ те́сным путе́м Христу́ после́довав,/ победи́тель страсте́й яви́лся еси́/ и, кра́сными доброде́телей исправле́ньми/ и́нокам и па́стве твое́й возсия́в,/ те́ми, я́ко ле́ствицею,/ на Не́бо возше́л еси́,/ иде́же в ра́дости святы́х предстоя́ Христу́ Бо́гу,/ моли́ дарова́ти мир/ и единомы́слие ста́ду твоему́.

Стих: Услышите сия, вси язы́цы,/ внуши́те, вси, живу́щии по вселе́нней.

Ра́дуйся, Богому́дре Ге́рмане,/ ты, сия́нием Уте́шителя просвети́вся,/ ору́жием Креста́ ко́зни предста́теля тьмы́ победи́в,/ де́йствием святы́я про́поведи на ме́сте зла́чне/ ста́до твое́ упа́сл еси́/ и па́лицею ве́ры проти́вныя отгна́л еси́./ О, Богому́дрый виногра́да Христо́ва де́лателю!/ Сотвори́ предста́тельством твои́м,/ да не бу́дем и мы безпло́дным ро́ждием/ в Боже́ственном вертогра́де лозы́ Христа́.

Стих: Уста́ пра́веднаго поуча́тся прему́дрости,/ и язы́к его́ возглаго́лет суд.

Ра́дуйся, Богоблаже́нне Ге́рмане,/ осене́нный благода́тию свы́ше,/ чистото́ю жи́зни и нетле́нием в сме́рти озари́лся еси́,/ источа́я исцеле́ния,/ ду́ши от страсте́й и телеса́/ от многообра́зных неду́г врачу́еши./ И ны́не ско́рбных наведе́ний разгони́ о́блацы/ от соверша́ющих любо́вию твое́ пра́зднество.

Сла́ва, глас 5:

Ди́вный Бог во святы́х Свои́х,/ в пусты́нях, гора́х и верте́пах/ многообра́зными по́двиги просия́вших,/ па́че ди́вен явля́ется в тех,/ и́же по́стнически живу́ще в ми́ре,/ я́ко свети́ла, просия́ша/ посреде́ ро́да стропти́ва,/ сподвиза́юще и ходя́щих по стро́потным путя́м к исправле́нию;/ си́це, святи́телю,/ благоукраси́вся по́стническими доброде́тельми,/ и на престо́ле святи́тельства/ Богосве́тлыми добро́тами сия́л еси́./ Те́мже, венча́нный от Подвигополо́жника,/ моли́ся вку́пе со святи́тели Гу́рием и Варсоно́фием/ земле́ Росси́йстей Богоуго́дней бы́ти/ и сыново́м росси́йским спасти́ся.

И ны́не, глас то́йже:

Воспо́йте, лю́дие,/ Ма́тери Бо́га на́шего, воспо́йте:/ днесь бо пречестну́ю ду́шу Свою́ во всесвяты́я дла́ни,/ И́же из Нея́ вопло́щшагося без се́мене, предае́т;/ Его́же и мо́лит непреста́нно/ дарова́ти вселе́нней мир и ве́лию ми́лость.

Тропа́рь, глас 4:

От ю́ности и́го Христо́во усе́рдно восприи́м,/ бде́нными по́двиги поста́ и моли́твы просла́вился еси́./ Отону́дуже призыва́ющу тя Бо́гу на служе́ние Це́ркви/ в новопросвеще́ннем ца́рстве Каза́нстем,/ вку́пе со святи́телем Гу́рием воззва́н был еси́,/ иде́же я́ко первонача́льник/ созда́нной тобо́ю в гра́де Свия́жске оби́тели/ и досто́йный первосвяти́телю прее́мник яви́лся еси́./ Ду́хом предстоя́ Престо́лу Влады́чню,/ моли́ся, святи́телю Ге́рмане, со святи́телем Гу́рием/ правосла́вней па́стве во благоче́стии преспева́ти/ и тьме инове́рия све́том ве́ры разгна́тися.

Ин тропа́рь, глас то́йже:

Я́ко вели́ким па́стырем единонра́вна/ и учи́телем вселе́нныя единомы́сленна,/ Це́ркве Бо́жия служи́теля усе́рдна/ и строи́теля Та́ин Христо́вых благогове́йна,/ сте́кшеся, благове́рнии лю́дие,/ Свия́жския оби́тели Богому́драго основа́теля/ и Каза́нския новопросвеще́нныя па́ствы святи́теля Ге́рмана/ пе́сньми и пе́нии восхва́лим, глаго́люще:/ не преста́й присеща́ти моли́твами твои́ми на всю па́ству твою́/ и в ве́ре и благоче́стии блюди́ невреди́мо.

НА У́ТРЕНИ

На Бог Госпо́дь: тропа́рь свято́му два́жды. Сла́ва, и ны́не, Богоро́дичен.

По 1-м стихосло́вии седа́лен, глас 4:

От ю́ности на́йде на тя, присноблаже́нне, Боже́ственное раче́ние:/ еще́ бо о́трок сый, па́че ме́ры и во́зраста/ в воздержа́нии и посте́ пребыва́л еси́./ Отону́дуже роди́вшие тя, дви́жими сердобо́лием, удержава́ху тя,/ да не повреди́тся от по́стнаго изнуре́ния теле́сный соста́в твой./ Ты же, непоколеби́мою стопо́ю идя́ стезе́ю воздержа́ния,/ взыва́л еси́ Христу́ Бо́гу:/ к Тебе́ приве́ржен есмь от чре́ва ма́тере моея́,/ Ты еси́ мой Покрови́тель.

Сла́ва, и ны́не, Богоро́дичен:

Младе́нствующи пло́тию и соверше́нна душе́ю,/ Святы́й Киво́т в дом Бо́жий вхо́дит/ воспита́тися Боже́ственною благода́тию.

По 2-м стихосло́вии седа́лен, глас 4:

Егда́ тя и́ноки Ста́рицкия оби́тели моля́ху,/ да бу́деши началово́ждь оби́тели и блюсти́тель спасе́ния душ их,/ ты, Богому́дре, глаго́лы смире́ния рекл еси́ им:/ а́ще и корми́ло корабе́льное неиску́сному не вверя́ется ко́рмчему,/ кольми́ па́че спасе́ние душ неве́дущему духо́внаго пути́ наста́внику./ Оба́че, я́ко искуше́нный в сло́ве и ра́зуме,/ единоду́шным моле́нием бра́тии восприя́в корми́ло духо́вное/ и священноархимандри́т быв,/ яви́л в себе́ до́браго вождя́ и наста́вника душ во спасе́ние.

Сла́ва, глас 2:

Плоть очи́стив воздержа́нием,/ дух твой Богомы́слием на высоту́ Богоподо́бия возвы́сил еси́/ и нас, пленя́емых страстьми́,/ на е́же по подо́бию твои́ми моли́твами наста́ви и возведи́.

И ны́не:

От всех искуше́ний и бед душе́вных свободи́ ны,/ притека́ющия к Тебе́, мольба́ми Твои́ми, Ма́ти Христа́ Бо́га.

По полиеле́и, седа́лен, глас 8:

В моли́твенной ке́ллии твое́й,/ я́ко основа́тель оби́тели и вождь новоначально и́ночествующих,/ непреста́нныя приноси́л еси́, преподо́бне, со слеза́ми моли́твы Богома́тери:/ да благоволи́т новоустроя́емую оби́тель избра́ть в ме́сто святы́ни,/ и в ней лик и́ночествующих,/ денноно́щно служа́ Бо́гу во спасе́ние свое́,/ и всем приходя́щим сло́вом и де́лом спасе́ние Бо́га и Христа́ да возвеща́ет.

Сла́ва, глас 3:

Я́ко подви́жник кре́пкий,/ путе́м и́ноческой жи́зни восходя́ от си́лы в си́лу по степе́нем священнонача́лия,/ призыва́емь был еси́ и на высоту́ престо́ла Всеросси́йския митропо́лии,/ во е́же со все́ю Це́рковию служи́ти Бо́гу вся́ческих,/ оба́че и вы́ну приноси́л еси́, свя́те,/ Го́споду благоприя́тную же́ртву о благостоя́нии страны́ Росси́йския/ и о умире́нии Це́ркве Правосла́вныя.

И ны́не:

Безневе́стная, Чи́стая Богоро́дице Де́во,/ Еди́на ве́рных предста́тельство и покро́ве,/ бед, и скорбей, и лю́тых обстоя́ний всех изба́ви,/ на Тя упова́ние, Отрокови́це, иму́щих,/ и ду́ши на́ша спаси́ Боже́ственными Твои́ми моли́твами.

Степе́нна, 1-й антифо́н 4-го гла́са. Проки́мен, глас 4: Уста́ моя́ возглаго́лют прему́дрость,/ и поуче́ние се́рдца моего́ ра́зум. Стих: Уста́ пра́веднаго поуча́тся прему́дрости,/ и язы́к его́ возглаго́лет суд. Вся́кое дыха́ние: Ева́нгелие от Иоа́нна, зача́ло 36.

По 50-м псалме́ стихи́ра, глас 6:

Челове́че Бо́жий,/ ве́рный ра́бе и слуго́ Госпо́день,/ сосу́де избра́нный,/ сто́лпе и утвержде́ние Це́ркве,/ Ца́рствия насле́дниче,/ не премолчи́, за ны вопия́ ко Го́споду.

Кано́ны Богоро́дице, со ирмосо́м 8-го гла́са: Во́ду проше́д: на 6, и святи́телю, того́же гла́са, на 8.

Песнь 1

Ирмос: Мо́ре огусти́л еси́,/ погрузи́вый со ору́жием го́рдаго фарао́на,/ и лю́ди спасл еси́ немо́кренно, Го́споди,/ и ввел еси́ я в го́ру святы́ни, вопию́щия:/ пои́м Тебе́, Бо́гу на́шему, песнь побе́дную,/ яко просла́вися.

Иисусу: Иису́се, прославля́ющий святы́х Тво́их,/ озари́ потемне́нную мысль и омраче́нное на́ше чу́вство,/ да возвести́м хвалы́ святи́телю Твоему́/ и, восхваля́я его́, восхва́лим Тя, ди́внаго во святы́х.

Припев: Святи́телю о́тче Ге́рмане, моли́ Бо́га о нас.

Боже́ственная благода́ть избра́ тя, святи́телю,/ да пока́жеши си́лу ея́/ в очище́нии прирожде́нной всем сына́м Ада́млим не́мощи естества́/ и в благода́тней чистоте́ да послу́жиши ро́ду твоему́/ во сла́ву Христа́ и спасе́ние душ.

Простра́нный путь мирска́го жития́ оста́вив,/ с отъя́тием власо́в земно́е пристра́стие отсе́кл еси́,/ и, к Го́рнему ум и се́рдце твое́ устреми́в,/ де́лы глаголал еси:/ Госпо́дь – кре́пость и упова́ние мое́.

Еди́ному Бо́гу всего́ себе́ возложи́в,/ Тому́ во дни и в нощи́ рабо́тал еси́,/ служа́ посто́м, всено́щным в моли́тве стоя́нием/ и вся́ким ско́рбным самолише́нием,/ зовя́ в кре́пости ду́ха:/ Госпо́дь – утеше́ние мое́.

Сла́ва:

Всеору́жием Креста́ низложи́в мы́сленных, вою́ющих на ду́шу враго́в,/ в благооти́шие безстра́стия дости́гл еси́/ и, побе́дныя от вседе́тельныя руки́ восприя́в по́чести,/ спобо́рствуй и нам изба́витися от плене́ния грехо́внаго/ и в приста́нище спасе́ния дости́гнути.

И ны́не,

Богоро́дичен: Ви́дящи не́мощь мою́ теле́сную,/ смуще́ние душе́вное и озлобле́ние серде́чное,/ посеще́ния сподо́би Боже́ственнаго, Всенепоро́чная Де́во,/ и спаси́ мя моли́твами Твои́ми.

Песнь 3

Ирмос: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,/ возвесели́хся о спасе́нии Твое́м.

Нощны́ми моли́твами и глубо́ким утренева́нием/ по любви́ ко Го́споду умертви́л еси́ пло́ти мудрова́ние./ И ны́не из до́льних в Небе́сныя возше́д оби́тели,/ не преста́й моли́тися о нас,/ среди́ мирски́я ле́сти бре́нныя жи́зни путь преходя́щих.

Мы́слию благоразсу́дною и жела́нием очище́нным/ преподо́бных жи́тельству ревнова́л еси́,/ сего́ ра́ди с благоугоди́вшими, преподо́бне, Го́споду/ насле́довал еси́ нетле́ние и жизнь несконча́емую.

В челове́ческом естестве́/ Невеще́ственных жи́тельству от всея́ души́ твоея́ тща́лся еси́ подража́ти,/ отоню́дуже с Невеще́ственными ли́ки сподо́бился еси́ Престо́лу Бо́жию предстоя́ти.

Дви́жимый ре́вностию ду́ха,/ вели́ки по́двиги на земли соверши́л еси́, свя́те:/ небла́зненно бо протека́я путь спасе́ния,/ ты, в тве́рдости душе́вней, а́ки адама́нт,/ вся земна́я нивочто́же вмени́в,/ Еди́наго Христа́ приобрести́ тща́лся еси́.

Сла́ва:

Низложи́л еси́ ополче́ния мы́сленных враго́в кре́пким твои́м воздержа́нием/ и непристу́пен яви́лся еси́ им чистото́ю ду́ха;/ моли́твами твои́ми отжени́ от нас мра́чное злых духо́в нахожде́ние.

И ны́не,

Богоро́дичен: Очи́сти, Чи́стая, нечи́стую ду́шу мою́ от мно́жества прегреше́ний,/ во глубину́ поги́бели попо́лзшуюся,/ и в час сме́ртный огради́ мя от оглаго́лания де́монов/ и осужде́ния изба́ви.

Конда́к, глас 4:

Бо́дрствуя в моли́твах,/ послуша́ния до́брый рачи́тель быв,/ в терпе́нии стяжа́л еси́ ду́шу твою́,/ де́лы смиренному́дрия и кро́тости изря́дствуя,/ престо́л святи́тельства благове́рием и благоче́стием украси́л еси́,/ о́тче священнонача́льниче Ге́рмане,/ моли́ Христа́ Бо́га о всем ста́де твое́м,/ я́ко па́ствы твоея́ утвержде́ние/ и су́щим по тебе́ святи́телем све́тлое украше́ние.

Седа́лен, глас 7:

Благознамени́т путь восхожде́ния твоего́, блаже́нне:/ из глубо́каго бо смире́нной и́ноческой жи́зни послуша́ния/ моле́нием Ста́рицкой бра́тии воззва́н был еси́ к нача́льствованию./ Возврати́вся же на пре́жний поко́й по любви́ к душе́вному поко́ю,/ па́ки из о́наго предержа́щим гла́сом воззва́н был еси́/ в новопросвеще́нную Каза́нскую па́ству для устрое́ния вели́кой оби́тели,/ от оби́тельнаго же благоустрое́ния воззва́н еси́/ на престо́л святи́тельскаго благоуправле́ния./ Упра́ви, святи́телю, и нам полага́ти восхожде́ние в се́рдце/ по степене́м исправле́ния жи́зни и дел.

Сла́ва, глас 4:

Вождь быв, преподо́бне,/ взыску́ющим спасе́ния своего́ путе́м жи́зни и́ноческой/ в чистоте́, послуша́нии и нестяжа́тельности,/ тем предше́ствовал еси́ де́йственным приме́ром твои́м/ в след Началовождя́ спасе́ния, путе́м креста́ и самоотверже́ния.

И ны́не:

Вели́ких дарова́ний, Де́во Богома́ти, Ты сподо́билася еси́,/ я́ко родила́ еси́ пло́тию Еди́наго от Тро́ицы, Христа́ Жизнода́вца,/ во спасе́ние душ на́ших.

Песнь 4

Ирмо́с: Проро́к Авваку́м, у́мныма очи́ма прови́де, Го́споди,/ прише́ствие Твое́,/ тем и вопия́ше:/ от ю́га прии́дет Бог./ Сла́ва си́ле Тво́ей,/ сла́ва снизхожде́нию Твоему́.

Не дал еси́ сна очесе́м твои́м и ве́ждом дрема́ния,/ донде́же день благода́ти озари́ твое́ се́рдце/ и Боговмести́мым соде́ла селе́нием Тро́ицы,/ Е́йже предстоя́, спаса́й град и лю́ди твоя́.

Зва́ния Небе́снаго прича́стник быв,/ нача́ток соста́ва ве́ры соблю́л и си́лы гряду́щаго ве́ка возвести́л еси́ лю́дем./ И ны́не восхваля́ющих ве́рою твоя́ по́двиги/ просвеща́й повеле́ньми Влады́ки вся́ческих/ и сотвори́ досто́йны бы́ти насле́дия Небе́снаго.

Труда́ми неосла́бными, а́лчбою и жа́ждою/ и всено́щным в моли́тве стоя́нием удруча́л еси́ плоть твою́, святи́телю,/ и ны́не преми́рно упокоева́ешися.

Ми́рно протека́л еси́, о́тче,/ путь жи́зни твое́й стезе́ю и́ноческою,/ явля́я в себе́ о́браз смире́ния и уничиже́ния./ Те́мже Призира́ющий на смире́нныя вознесе́ тя и в жи́зни вре́менней,/ и по кончи́не твое́й.

Сла́ва,

Иису́су: Чи́ни А́нгельстии ужасо́шася ди́вному снизхожде́нию Твоему́, Сло́ве Бо́жий,/ зря́ще Тя, Творца́ Своего́, до ра́бия зра́ка снизше́дша./ С ни́ми же и мы, пе́рстнии, благода́рственно взыва́ем:/ сла́ва смотре́нию Твоему́, Человеколю́бче.

И ны́не,

Богоро́дичен: Простира́ю ру́це, и преклоня́ю коле́на се́рдца,/ и припа́даю к Тебе́, Пречи́стая:/ воздви́гни мя с одра́ ле́ности,/ я́ко да отря́сши грехо́вное разслабле́ние,/ воспою́ благода́ть Твою́.

Песнь 5

Ирмо́с: Го́споди Бо́же наш,/ мир даждь нам,/ Го́споди Бо́же наш, стяжи́ ны,/ Го́споди, ра́зве Тебе́, ино́го не ве́мы,/ И́мя Твое́ имену́ем.

Оби́тель зи́ждяй в благооти́шное приста́нище взыску́ющих Бо́га,/ в отреше́нии от жите́йских попече́ний,/ ты, блаже́нне, вку́пе и сам себе денноно́щно созида́л/ духо́вным трезве́нием и Боже́ственным раче́нием,/ во оби́тель Обетова́вшему приити́ со Отце́м Свои́м к лю́бящему/ и оби́тель в не́м сотвори́ти.

Созда́в хра́м в сла́ву и во успе́нии Свое́м на́с не оставля́ющей,/ самаго́ себе́ чистото́ю тща́лся еси́ созида́ти в хра́м Ду́ху Свято́му,/ я́ко да и в веще́ственном и духо́вном хра́ме/ в ду́хе и и́стине соверша́ем благоприя́тное служе́ние Го́споду.

Огражда́я созида́емую тобо́ю оби́тель веще́ственным огражде́нием,/ огражда́л еси́ ю па́че бде́нными моли́твами,/ отража́я и собла́зны ви́димые/ и наве́ты духо́в неви́димых от духо́вных ча́д твои́х.

Науча́л еси́ преда́вшихся духо́вному водительству твоему́/ и сло́вом Христо́вым,/ да ки́йждо взе́мши кре́ст свой,/ для благода́тнаго врачева́ния боле́зней и неду́гов естества́,/ в бо́дрости ду́ха ше́ствует в сле́д Подвигополо́жника,/ па́че же науча́л еси́ приме́ром Христоподража́тельной жи́зни,/ явля́я всего́ до́браго и Богоуго́днаго о́браз в само́м себе́.

Сла́ва,

Иису́су: Овча́ есмь Твоего́ ста́да, Спа́се,/ лежу́ пред врата́ми двора́ Твоего́, боле́зньми разслаблен;/ я́ко Па́стырь До́брый, стру́пы моя́ обяжи́, гно́йныя ра́ны очи́сти/ и воздви́гни мя́ к пра́вому хожде́нию путе́м за́поведей/ предста́тельством святи́теля Твоего́.

И ны́не,

Богоро́дичен: Нам, лю́бящим тя, святи́телю, и любо́вию почита́ющим,/ и в хра́ме в твой пра́здник лику́ющим,/ испроси́ моли́твами Пречи́стыя исправле́ние жития́/ и прегреше́ний проще́ние.

Песнь 6

Ирмо́с: Я́ко во́ды морски́я, Человеколю́бче,/ волна́ми жите́йскими обурева́юся./ Те́мже, я́ко Ио́на,/ та́ко вопию́ Ти:/ возведи́ от тли живо́т мой,/ Благоутро́бне Го́споди.

По святи́теле Гу́рии/ па́стыря тя и вождя́ Христо́с поста́ви Каза́нстей па́стве,/ его́же досто́йным прее́мником явля́я себе́ де́лы и словесы́,/ и жизнь твою́ в такове́м же по́двизе ве́ры и преподо́бия сконча́л еси́./ Вку́пе предстоя́ с ним Престо́лу Святы́я Тро́ицы,/ моли́ непреста́нно о всех нас.

Я́коже по чу́дном Богови́дце Моисе́е/ ди́внаго дарова́ вождя́ лю́дем Свои́м Бог – Иису́са Нави́на,/ та́ко по первопресто́льнике Гу́рии/ новопросвеще́нному гра́ду Каза́ни яви́ тя Христо́с па́стыря ве́рна,/ и́же, церко́вная прие́м корми́ла и к трудо́м труды́ прилага́я,/ дея́нием и ра́зумом всех ко Христу́ приводи́ти тща́лся еси́.

Ца́рским путе́м зако́на Христо́ва неукло́нно ше́ствовав, святи́телю,/ тем же путе́м руководи́л еси́ ко спасе́нию не то́чию чад Правосла́вия,/ но и ага́рянский род из мра́ка магомета́нства к све́ту Христо́ву приводи́л еси́,/ возводя́ из заблужде́ния в ве́ру спаси́тельную.

Я́ко свети́ло мы́сленное,/ просвеща́я луча́ми добро́т твои́х Каза́нскую па́ству/ и су́щия в ней Христоимени́тыя лю́ди в позна́нии Христа́,/ моли́, святи́телю, всем во све́те Христо́вом узре́ти свет спасе́ния.

Сла́ва,

Иису́су: Виждь души́ моея́, Спа́се, обурева́ние грехо́вное!/ Му́тныя пото́ки беззако́ний, наводни́в все существо́ мое́,/ внидо́ша да́же до потопле́ния ду́ха моего́,/ но я́ко повелева́яй ве́тром и мо́рю,/ к благооти́шному приста́нищу укроще́ния страсте́й мои́х/ моли́твами уго́дника Твоего́ упра́ви мя.

И ны́не,

Богоро́дичен: Проро́цы Тя я́сно провозвести́ша, Отрокови́це,/ Ма́терь Бо́жию Апо́столи в ми́ре пропове́даша,/ му́ченицы испове́даша, святи́телие просла́виша,/ и мы вси Богоро́дицу Тя вои́стинну велича́ем.

Конда́к, глас 4:

До́блестями преподо́бия и пра́вды/ вруче́нное тебе́ слове́сное ста́до озаря́я/ и на зла́чных Сло́ва Христо́ва па́житях пита́я,/ на пра́вый путь за́поведей Госпо́дних/ си́лою ду́ха твоего́ наставля́л еси́ е./ Те́мже и ны́не, осеня́емое цельбоно́сными чудотворе́нии твои́ми,/ в святу́ю па́мять твою́, зове́м тебе́:/ не преста́й, святи́телю, предста́тельствовати/ пред Пастыренача́льником о ста́де твое́м,/ я́ко па́ствы твоея́ утвержде́ние/ и су́щим по тебе́ святи́телем удобре́ние.

И́кос:

Пе́ние, приноси́мое тебе́ благогове́йною мы́слию,/ благосе́рдно приими́ от нас, святи́телю,/ си́це кра́сные следы́ жи́зни твое́й,/ а́ще и недосто́йно, хвала́ми зна́менающих:/ ра́дуйся, пра́ведных роди́телей честно́е прозябе́ние,/ и Волокола́мския оби́тели в и́ноческих по́двигах воспита́ние,/ и в ме́ру му́жа возраще́ние;/ ра́дуйся, в Ста́рицкой оби́тели положи́вый восхожде́ние к священнонача́лию/ и в гра́де Свия́жске благоле́пныя оби́тели основа́телю;/ ра́дуйся, первосвяти́телю Каза́нския па́ствы,/ Гу́рию досто́йный прее́мниче;/ ра́дуйся, оби́тели твоея́ сла́во,/ гра́да Свия́жска огражде́ние,/ па́ствы твоея́ благоле́пие/ и су́щим по тебе́ святи́телем хвала́ и изря́дное удобре́ние.

Песнь 7

Ирмо́с: Халде́йская пещь, огне́м распала́емая,/ ороша́шеся Ду́хом, Бо́жиим предстоя́нием/ о́троцы поя́ху:/ благослове́н еси́, Бо́же оте́ц на́ших.

Возлия́ся вода́ искуше́ния до души́ твоея́,/ и бу́ря гне́ва и гоне́ния возшуме́ о́крест тебе́, святи́телю,/ егда́ благоду́шно рекл еси́ сло́во и́стины пред царе́м,/ оба́че пребы́л еси́ непоколеби́м,/ апо́стольским сло́вом утвержда́я себе́,/ я́ко Бо́гу подоба́ет повинова́тися па́че, не́жели челове́ком в и́стине.

Небоя́зненно уста́ твоя́ отве́рзл еси́/ в защи́ту непови́нности и правоты́ святи́теля Фили́ппа;/ а́ще же и не возмо́гл еси́ загради́ти бездве́рная уста́ зло́бы,/ оба́че, яви́в кре́пость в безтре́петном оправда́нии му́жа пра́веднаго,/ оста́вил еси́ веко́м приме́р свято́й ре́вности,/ с каково́ю глаго́лал еси́ и́стину пред царе́м Гро́зным.

Прича́стник быв, блаже́нне, скорбе́й мяте́жной жи́зни,/ я́ко сам искуси́выйся,/ и нас, искуша́емых, изба́ви ско́рбнаго обстоя́ния/ моли́твами твои́ми.

Тверд в пра́вде и и́стине был еси́, святи́телю,/ не убоя́вся гне́ва царе́ва,/ неустраши́мо веща́л еси́ сло́во во оправда́ние святи́теля Фили́ппа./ С ним предстоя́ Подвигополо́жнику в чи́не свиде́телей и́стины,/ моли́ся, да не отпаде́м в ско́рби от и́стины.

Сла́ва,

Тро́ице: Непостижи́мая Прему́дросте,/ неизсле́димая бла́госте,/ Вседержа́вное могу́щество и вседе́тельное смотре́ние,/ Самосу́щная Светонача́льная Тро́ице,/ рабо́в Твои́х пе́ние приими́, вопию́щих:/ благослове́н еси́, Бо́же оте́ц на́ших.

И ны́не,

Богоро́дичен: Ско́рый Твой покро́в, и по́мощь, и ми́лость/ покажи́ на рабе́х Твои́х,/ и во́лны, Чи́стая, укроти́ су́етных помышле́ний,/ и па́дших нас воздви́гни, Богоро́дице:/ ве́мы бо, ве́мы, Де́во, я́ко мо́жеши, елика хо́щеши.

Песнь 8

Ирмо́с: А́нгели и Небеса́, на Престо́ле Сла́вы Седя́щаго/ и я́ко Бо́га непреста́нно сла́вимаго,/ благослови́те, по́йте/ и превозноси́те Его́ во ве́ки.

Оправда́ния ри́зу соблю́д све́тлу,/ во све́тлости святы́я вшел еси́/ и венце́м нетле́ния венча́лся еси́;/ неле́пый зрак прегреше́ний Богоуго́дным хода́тайством твои́м/ совлецы́ с ве́тхаго на́шего челове́ка/ и чи́стыми покая́ния оде́ждами облеки́ но́ваго,/ я́ко облече́нный нетле́нною сла́вою но́ваго челове́ка/ и сия́ющий на Небесе́х преподо́бием и пра́вдою.

Свы́ше Небе́сным предста́тельством/ до́лу цельбоно́сным благоуха́нием моще́й твои́х/ озаря́я к тебе́ притека́ющих,/ низпосли́, святи́телю, по коего́ждо потре́бе бла́гое и поле́зное.

Украси́в жизнь твою́ непоро́чностию/ и святи́тельский престо́л добле́стями па́стырства о Христе́,/ предстоя́ Престо́лу Архиере́я, проше́дшаго Небеса́,/ моли́ся о исполне́нии проше́ний соверша́ющих любо́вию па́мять твою́.

Ве́дуще тя, святи́телю, пода́теля исцеле́ний,/ к тебе́ возно́сим моли́твенный глас:/ уврачу́й многоле́тныя стра́сти душ на́ших/ и от стрел вра́жиих неврежде́нных сохрани́ под кров твой прибега́ющих,/ утвержда́я на ка́мени Боже́ственных за́поведей.

Сла́ва,

Иису́су: Исто́чниче бла́гости и прему́дрости сокро́вище, Иису́се,/ яви́л еси́ от земны́х недр нетле́нныя мо́щи Твоего́ уго́дника,/ моли́твами его́ исцели́ душе́вныя на́ши не́мощи/ по вели́цей Твое́й ми́лости.

И ны́не,

Богоро́дичен: Нетле́нная Де́во и Мати,/ нас, тле́ющих в по́хотех преле́стных,/ от ле́сти тли́теля ра́зумов и серде́ц сохрани́/ и стезе́ю новотворя́щаго покая́ния к нетле́нию душе́вному упра́ви.

Песнь 9

Ирмо́с: Чу́жде ма́терем де́вство,/ и стра́нно де́вам деторожде́ние,/ на Тебе́, Богоро́дице, обоя́ устро́ишася./ Тем Тя, вся племена́ земна́я,/ непреста́нно велича́ем.

Пра́ведно и благоче́стно пожи́в на земли́,/ в Го́рних ны́не живе́ши оби́телех/ и, созерца́я Сла́ву Бо́жию, моли́ся о нас,/ прегреше́ниями лише́нных Сла́вы Бо́жией.

В земно́й жи́зни сохрани́в душе́вную и теле́сную чистоту́,/ облече́нный благода́тию в све́тлость ея́,/ предстои́ши ны́не со А́нгелы Пресвяте́й Тро́ице:/ Е́йже не преста́й вопи́ти о проще́нии и очище́нии свы́ше грехо́в на́ших/ и измове́нии о́ных и́стинным на́шим покая́нием.

Пра́востию дел, я́ко оде́ждою многоце́нною, оде́явся,/ живо́ю ве́рою и любо́вию, я́ко пресве́тлым венце́м, венча́лся еси́, святи́телю./ Те́мже, в благоле́пии чистоты́ предстоя́ Спа́су всех,/ моли́ся, да не яви́мся на Суде́ его бездерзнове́нны, на́ги/ и покры́ты студо́м осужде́ния.

Па́ству и град твой огражда́й твои́ми моли́твами,/ я́ко тве́рдыми забра́лы, от вра́жеских наве́тов и обстоя́ний,/ взыва́я Христу́:/ я́же дал ми еси́, сохрани́,/ да превозно́сят Тя во вся ве́ки.

Сла́ва,

Тро́ице: О́тче Небе́сный –/ Трисия́ннаго Божества́ исто́чное нача́ло,/ Сы́не Бо́жий –/ Ипоста́сное зижди́тельное Сло́во О́тчее,/ Ду́ше Святы́й –/ из Существа́ Того́жде Безнача́льнаго Све́та Отца́ ве́чно исходя́щий и все освяща́ющий,/ Тро́ице Свята́я,/ поми́луй, спаси́ и соблюди́ нас,/ на Тя всю наде́жду жи́зни и спасе́ния возлага́ющих.

И ны́не,

Богоро́дичен: Умири́, Христе́, тезоимени́тое Твое́ жи́тельство/ мольбами Пречи́стыя Ма́тери Твоея́,/ оте́чество на́ше храни́ непоколеби́мо, Це́рковь и Правосла́вие,/ да, утвержда́яся уста́ми и се́рдцем во благоче́стии,/ прославля́ем Тя со Отце́м и Пресвяты́м Ду́хом Твои́м во ве́ки.

Свети́лен, глас 4:

Во святи́телех благоче́стно пожи́в,/ лю́ди к Богоразу́мию наста́вил еси́/ и, до́бре Бо́гу угоди́в,/ от Него́ нетле́нием и чудесы́ просла́влен еси́./ Сего́ ра́ди, святи́телю, мо́лим тя:/ не забу́ди град сей, его́же возлюби́л еси́,/ и всю зе́млю на́шу,/ в не́йже те́ло твое́ предложи́л еси́,/ и моли́ просла́вившаго Тя непреста́нно о всех нас.

Сла́ва, и ны́не, Богоро́дичен:

Влады́чице Небесе́ и земли́,/ иму́щая дерзнове́ние моли́тися о всем ми́ре/ и о всех, притека́ющих под благооти́шный кров Твой,/ моли́ со святи́телем Ге́рманом/ неизглагола́нно Вопло́щшагося от Тебе́ милосе́рдия ра́ди,/ да прии́мет в сла́ву Имени Своего́ ску́дную песнь на́шу/ и низпо́слет нам благода́ть досто́йно пе́ти и моли́тися Ему́,/ Ди́вному во святы́х.

На хвали́тех стихи́ры на 4, глас 5:

О́браз, святи́телю, был еси́ ве́рным,/ серде́чною правостию и жития́ смиренному́дрием,/ и́миже, я́ко крила́ми ле́гкими,/ к высоте́ Небе́снаго блаже́нства возлете́в,/ Престо́лу Сла́вы предстои́ши,/ предста́тельствуй о соверша́ющих ве́рою и любо́вию па́мять твою́.

Жезло́м святи́тельства ста́до твое́ упа́сл еси́/ на зла́чных па́житях за́поведей Христо́вых/ и благоче́стия пропове́данием освети́л еси́/ Це́рковь па́ствы твоея́,/ я́же стяжа́вши от недр земны́х бога́тство неиждива́емое,/ сокро́вище, благоуха́ния Боже́ственнаго испо́лненное –/ нетле́нныя мо́щи твоя́,/ взыва́ет на́ми:/ моли́, святи́телю, Человеколю́бца Бо́га/ непреста́нно о всех нас.

Глас 6:

Приими́, святи́телю,/ на́ше пе́сненное хвале́ние/ и вонми́ смире́нной моли́тве на́шей,/ я́ко ве́рный хода́тай/ и те́плый моли́твенник за ны Христу́ Бо́гу,/ Его́же соде́лай ми́лостива,/ да проше́ния на́ша тобо́ю испо́лнит во бла́го/ и спасе́ние душ на́ших.

Сла́ва, глас 2:

Храм всече́стен Бо́жией Ма́тери воздви́гл еси́,/ да под кро́вом Ея́/ сози́ждеши себе́ и чад оби́тели твоея́ во спасе́ние./ Е́йже моли́ся, святи́телю,/ да благода́тию Го́спода и мы сози́ждемся в храм Бо́жий/ и в жили́ще Ду́ха Свята́го.

И ны́не, глас 3:

Приими́ от нас песнь исхо́дную,/ Ма́ти Жива́го Бо́га,/ и светоно́сною Твое́ю и Боже́ственною/ осени́ благода́тию,/ стране́ победи́тельная,/ Христолюби́вым лю́дем мир,/ укрепле́ние пою́щим,/ и душа́м на́шим спасе́ние подаю́щи.

Славосло́вие вели́кое.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 1: Уста́ моя́ возглаго́лют прему́дрость,/ и поуче́ние се́рдца моего́ ра́зум. Стих: Услы́шите сия́, вси язы́цы: Апо́стол ко Евре́ем, зача́ло 318. Ева́нгелие от Луки́, зача́ло 24. Прича́стен: В па́мять ве́чную.