Служба в честь святаго великомученика Прокопия
ВЕ́ЧЕР
На Го́споди, воззва́х: стихи́ры на 6, глас 4.
Подо́бен: Я́ко до́бля:
С Небесе́ зва́ние твое́,/ я́коже бысть пропове́днику язы́ков,/ Проко́пие всесла́вне,/ и, просве́щся мы́слию,/ тьму оста́вил еси́ и́дольскую,/ и свети́льник ве́рных был еси́,/ Боже́ственными сия́нии честны́х твои́х по́двиг/ озаря́я концы́ ми́ра,/ сла́ва му́чеников и похвала́.
Воздержа́нием пе́рвее плотска́я взыгра́ния обузда́в,/ по́слежде к страда́нию мужему́дренно отлучи́лся еси́,/ всеблаже́нне Проко́пие,/ не пощаде́в пло́ти си́лою Ду́ха./ Те́мже всяк претерпе́л еси́ вид муче́ний,/ венцено́сец к Вы́шним ликостоя́нием восте́кл еси́.
Воево́да я́ко непобеди́м,/ Кресто́м вооружи́вся,/ то́ки кро́вными всю си́лу сопроти́вных погрузи́л еси́/ и ту́чи источи́л еси́ исцеле́ний бога́тно,/ от исто́чник излива́я, досточу́дне, спаси́тельных/ и всех напая́я,/ пла́менем страсте́й содержи́мых, Богодохнове́нне.
И́ны стихи́ры, глас то́йже.
Подо́бен: Дал еси́ зна́мение:
Я́ко Па́вла пе́рвее,/ с Небесе́ тя призва́ Иису́с И́стина,/ Проко́пие всесла́вне,/ Ему́же благоду́шно, блаже́нне, ве́ровав,/ оте́ческую пре́даную лжу/ и безбо́жную лесть оста́вил еси́/ и, ра́дуяся, отлучи́лся еси́ к боле́зненным трудо́м,/ соверше́ннаго страда́ния просве́щся мы́слию.
Трезу́бцы стру́жемь, и огне́м изнуря́емь,/ и в темни́це затворя́емь,/ пребы́л еси́ непрело́жен,/ ко предлежа́щим Боже́ственным воздая́нием/ просвеще́нным по́мыслом предзря́, му́чениче многострада́льне./ Те́мже тя венча́ Венцеда́вец Христо́с, Проко́пие,/ по́двиги сконча́вшаго и ве́ру соблю́дшаго.
О́бразом страда́ния, е́же пло́тию прия́т,/ Иису́с улови́л тя есть,/ добро́ты, Проко́пие, вожделе́в и́скренно/ Боже́ственныя души́ твоея́,/ е́йже удиви́шася врази́, терпе́нию и све́тлости./ Те́мже тя ублажа́ем со страда́вшими с тобо́ю, сла́вне,/ с ни́миже проси́ оставле́ние лю́тых пою́щим тя.
Сла́ва, глас 6:
Просия́ днесь сла́вная па́мять твоя́,/ Проко́пие многострада́льне,/ созыва́ющи нас, празднолю́бцев, ко благохвале́нию/ и сла́ве Христа́ Бо́га на́шего./ Те́мже и притека́юще к ра́це моще́й твои́х,/ исцеле́ний дарова́ния прие́млем/ и венча́вшаго тя Спа́са Христа́ воспева́ем во ве́ки,/ непреста́нно сла́вяще.
И ны́не, Богоро́дичен или́ Крестобогоро́дичен.
Подо́бен: Всю отложи́вше:
А́гнца Своего́ А́гница Нескве́рная дре́вле/ и Непоро́чная Влады́чица на Дре́ве Кре́стнем я́ко узре́,/ ма́терски восклица́ше и, дивя́щися, вопия́ше:/ Ча́до сладча́йшее,/ что́ зре́ние сие́ но́вое и пресла́вное?/ Ка́ко сонм безблагода́тный суди́щу Пила́тову предаде́ Тя/ и осужда́ет на смерть Живота́ вся́ческих?/ Но воспева́ю Твое́ неизрече́нное, Сло́ве, снизхожде́ние.
На стихо́вне Окто́иха. Сла́ва, глас 8.
Проко́пия хартофи́лакса:
Та́йными сия́нии Пресве́тлыя Тро́ицы озаря́емь,/ му́чениче Проко́пие доблему́дренне,/ положе́нием бог был еси́, обожа́емь прича́стием./ Те́мже ве́рою творя́щия твой светоно́сный пра́здник/ от напа́стей многообра́зных спаса́й твои́ми моли́твами.
И ны́не, Богоро́дичен или́ Крестобогоро́дичен.
Подо́бен: О, пресла́внаго чудесе́:
Тя ви́дящи, пригвожда́ема на Кресте́, Иису́се,/ и стра́сти прие́млюща во́лею,/ Де́ва и Ма́ти Твоя́, Влады́ко,/ увы́ Мне,– вопия́ше,– Ча́до сла́дкое:/ ра́ны непра́ведно ка́ко терпи́ши,/ Врачу́, исцели́вый челове́ческое неможе́ние/ и от тли всех изба́вивый милосе́рдием Твои́м?
Тропа́рь, глас 4:
Му́ченик Твой, Го́споди, Проко́пий/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами/ спаси́ ду́ши на́ша.
НА У́ТРЕНИ
О́ба кано́на Окто́иха без му́ченичнов и свята́го на 6, глас 4.
Песнь 1
Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.
Бога́тыми сия́нии Ду́ха облия́н,/ светоно́сный сей и честны́й пра́здник твой чту́щия,/ страсте́й мглы изба́ви и напа́стей, му́чениче Проко́пие.
Зва́ние не от челове́к бысть твое́, Проко́пие,/ но с Небесе́, я́ко Па́вла пе́рвее, Христо́с улови́,/ страсте́й Свои́х свиде́теля всеи́стиннаго тя соде́лав.
Во́инством тле́нным, прему́дре, на ве́чнующая, я́ко смы́слен, премени́в/ и сме́ртнаго царя́ на Безсме́ртнаго/ и Ца́рствие нетле́нное тебе́ подава́ющаго, Проко́пие.
Богоро́дичен: Естество́м Соде́теля родила́ еси́,/ нас обожи́вшаго па́че ума́ соедине́нием и́стинным, Богоро́дице Препе́тая,/ Его́же приле́жно моли́ просвети́ти пою́щия Тя.
Песнь 3
Ирмо́с: Не му́дростию, и си́лою,/ и бога́тством хва́лимся,/ но Тобо́ю, О́тчею Ипоста́сною Му́дростию, Христе́,/ несть бо свят, па́че Тебе́, Человеколю́бче.
Посреде́ Креста́ пресла́вно Христо́с тебе́ явля́ется,/ науча́я я́ве, е́же к нам схожде́ние,/ и тя к страда́нию призыва́я.
Храм и столп воздви́гл еси́ тебе́ сама́го Боже́ственному Ду́ху,/ ре́вностию же дыха́я Бо́жиею, хра́мы и безду́шныя истука́ны де́монския низложи́л еси́,/ му́чениче Проко́пие.
Совле́клся еси́ ко́жных риз строга́нием,/ нетле́ния же оде́ждею оде́явся, Проко́пие,/ многоко́зненнаго, му́чениче, обнажи́л еси́.
Богоро́дичен: Изба́ви мя вся́каго прило́га сопроти́внаго зми́я, Ма́ти Де́во Чи́стая,/ и се́рдце мое́ просвети́,/ ве́рою Тя сла́вящаго, Пренепоро́чная.
Седа́лен, глас 1.
Подо́бен: Гроб Твой:
Я́ко Па́вла пе́рвее, Христо́с с Небесе́, Проко́пие му́дре, тя зове́т к ве́ре,/ добро́ту Боже́ственную прове́дый се́рдца твоего́./ Те́мже пострада́л еси́ му́жески, пропове́дая стра́сти/ и Того́ к челове́ком, преблаже́нне, соше́ствие.
Сла́ва, и ны́не, Богоро́дичен:
Безневе́стная Чи́стая Богоро́дице Де́во, еди́на ве́рных Предста́тельнице и покро́ве,/ бед, и скорбе́й, и лю́тых обстоя́ний всех изба́ви, на Тя упова́ние, Отрокови́це, иму́щих,/ и ду́ши на́ша спаси́ Боже́ственными моли́твами Твои́ми.
Крестобогоро́дичен:
Зря́щи Тя, Христе́, Всенепоро́чная Ма́ти, ме́ртва на Кресте́ просте́рта, вопия́ше:/ Сы́не Мой, Собезнача́льне Отцу́ и Ду́ху,/ что́ неизрече́нное Твое́ сие́ смотре́ние,/ и́мже спасл еси́ пречи́стых рук Твои́х, Ще́дре, созда́ние?
Песнь 4
Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.
Превознесе́ннаго держа́вою нече́стия го́рдаго мучи́теля,/ ко Влады́це Боже́ственными воззре́нии взыва́я, разрази́л еси́:/ сла́ва си́ле Твое́й, Го́споди.
Явля́ется в темни́це тебе́ затворе́ну Изба́витель, Проко́пие,/ де́рзости наполня́я тя, сия́нием же просвеща́я тя/ и зва́ние сугу́бо твоему́ предспе́янию подая́.
Благода́тию Боже́ственною просвеще́но зря́ще твое́ лице́,/ неве́рия мра́ком покрове́ннии/ свет ве́ры Боже́ственным манове́нием прие́млют.
Богоро́дичен: Отягче́на сном уны́ния,/ к покая́ния у́тру мя Твое́ю неусы́пною, Влады́чице, воздви́гни моли́твою/ и спаси́ мя, Еди́на Спа́са ро́ждшая.
Песнь 5
Ирмо́с: Нечести́вии не у́зрят сла́вы Твоея́, Христе́,/ но мы Тя, Единоро́дне,/ Оте́ческия сла́вы Сия́ние Божества́,/ от но́щи у́тренююще,/ воспева́ем Тя, Человеколю́бче.
Све́том слове́с твои́х во́инство богопоко́рное приве́л еси́ Христу́,/ муче́ния кро́вию насле́довавшее с тобо́ю, Проко́пие, Ца́рство недви́жимое.
Синкли́тства яви́шася Вы́шняго прича́стницы жены́ синкли́тския,/ и ро́да све́тлости отре́кшеся,/ и умре́ти изво́лиша по Тебе́, Сло́ве Безсме́ртне.
Огне́м распаля́еми Боже́ственным ду́ши,/ опаля́емаго и неща́дно жего́маго те́ла пренебре́гше,/ я́же Твое́ возжеле́вшия Ца́рство, Многоми́лостиве.
Богоро́дичен: Заче́нши, родила́ еси́ Бо́га Емману́ила,/ на обновле́ние челове́ком, Пресвята́я Чи́стая, плоть бы́вша,/ Его́же при́сно моли́ спасти́ ду́ши на́ша.
Песнь 6
Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.
Источа́я твой медото́чный язы́к уче́ния медото́чная/ и го́рести безбо́жия вои́стинну изба́ви/ благопоко́рно тебе́ притека́ющия, му́чениче Проко́пие.
Ма́терь благоче́стие, му́чениче, стяжа́в,/ злоче́стия изыма́еши твою́ по пло́ти честну́ю ма́терь/ и приво́диши Небе́сному Отцу́ страда́ния ра́ди.
Лани́ты стружа́ желе́зом мучи́тель,/ по́мысла твоего́ тве́рдости, му́чениче, не поколеба́,/ водруже́ннаго любо́вию, стра́сти пло́тию претерпе́вшаго.
Богоро́дичен: Свята́го святы́х неизрече́нно родила́ еси́, Пресвята́я Де́во,/ ве́рныя при́сно освяща́ющаго/ и му́ченическия ли́ки со А́нгелы совокупля́ющаго.
Конда́к, глас 2.
Подо́бен: Вы́шних ища́:
Ре́вностию ко Христу́ Боже́ственною распала́емь/ и Креста́ кре́постию огражда́емь,/ враго́в шата́ние и де́рзость низложи́л еси́, Проко́пие,/ и честну́ю Це́рковь возвы́сил еси́,/ ве́рою преуспева́я и просвеща́я нас.
И́кос:
Уста́ ра́зума мне пода́ждь, Пребезнача́льне Сло́ве,/ хотя́щу пе́ти Твоего́ ору́жника Проко́пия:/ и́маши бо бога́тство милосе́рдия неизче́тно, Христе́ мой, пучи́ну Твои́х суде́б,/ да и аз душе́внаго мра́ка очи́щуся, ума́ же вся́ку скве́рну отмы́в,/ храм свяще́ния де́лы Боже́ственными Твои́ми бу́ду/ и досто́йная пою́ му́ченику, ве́рою преуспева́я и просвеща́я нас.
Песнь 7
Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.
Тя́жестию о́лова твое́й вы́и сокруша́еме, му́чениче, не чул еси́:/ носи́ти бо и́го на вы́и возжеле́л еси́ преле́гкое/ за милосе́рдие нам Приме́шшагося.
Благода́ть свы́ше исцеле́ний прие́м,/ неду́ги отъе́млеши, му́чениче, и лука́выя отгоня́еши ду́хи, вопия́:/ благослове́н еси́, Го́споди Бо́же оте́ц на́ших.
Многообра́зныя от враг я́звы прие́мля, блаже́нне,/ и огне́м опаля́емь, тве́рдостне нече́стие попали́л еси́,/ благослове́н еси́,– вопия́,– Бо́же оте́ц на́ших.
Богоро́дичен: От Де́вы нетле́нныя па́че естества́ ражда́ется Сло́во,/ И́же сло́вом вся содева́яй,/ безслове́сия хотя́ изба́вити во́льное славосло́вящия Того́ сни́тие.
Песнь 8
Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.
Свеща́ми опаля́емь лю́те,/ остны́ же подбода́емь, и ле́тным ра́нам строга́ние прие́мля,/ и боле́знуя зело́, му́чениче, взыва́л еси́:/ благослови́те, вся дела́ Госпо́дня, Го́спода.
Твое́ю десни́цею те́мная де́монов ли́ца, блаже́нне, зауши́л еси́,/ сию́ бо на у́глие горя́щее, сла́вне, опали́тися положи́л еси́,/ беззако́нному мучи́телю противля́яся и взыва́я:/ благослови́те, вся дела́ Госпо́дня, Го́спода.
Ка́меня Христа́ незы́блема, всеблаже́нне сла́вне, име́я основа́ние,/ ка́мением, Проко́пие, ра́довашеся, су́рово отягчава́емь,/ к нетя́жцей тя ра́дости облегча́ет, вопию́ща:/ благослови́те, вся дела́ Госпо́дня, Го́спода.
Богоро́дичен: Се вси, Отрокови́це, ро́ди, я́коже прорекла́ еси́, Тя ублажа́ют,/ Бо́га Блаже́ннаго ро́ждшую, блаже́нны содева́ющаго,/ и́же повеле́нием Его́ после́дующия ве́рно и вопию́щия:/ благослови́те, вся дела́ Госпо́дня, Го́спода.
Песнь 9
Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.
Возжеле́нный тебе́ получи́вшу коне́ц, велему́дренно преклони́л еси́ Бо́гу вы́ю,/ уда́рен же быв мече́м, я́коже на колесни́цу, твое́ю всел еси́ кро́вию/ и к Нему́, му́чениче, восте́кл еси́.
То́чиши ре́ки исцеле́ний, исто́чник быв чуде́с,/ уставля́еши же пла́мень страсте́й, де́монския же погружа́еши полки́/ всеси́льною Ду́ха Боже́ственною кре́постию, досточу́дне.
Всесвяту́ю твою́ па́мять ра́достно творя́щия/ вся́каго преще́ния, вся́каго же неду́га и вся́кия беды́ спаса́й, Проко́пие,/ к Зижди́телю Бо́гу свяще́нными твои́ми мольба́ми.
Богоро́дичен: Свет нам возсия́, Отрокови́це, от светоно́сныя Твоея́ утро́бы,/ Созда́тель со́лнца, и звезд, и вся́кия тва́ри,/ Его́же приле́жно моли́ просвети́ти пою́щия Тя.
Свети́лен:
С Небесе́, я́ко Па́влу, бысть тебе́ зва́ние,/ ему́же тезоимени́тно преспева́я, Проко́пие,/ Го́сподеви ли́ки му́ченик приве́л еси́,/ с ни́миже мо́лиши о хва́лящих тя.
Сла́ва, и ны́не, Богоро́дичен:
Свет ро́ждшая, Де́во,/ И́же от Све́та нерожде́нна, Незаходи́маго Све́та,/ Твои́ми неусы́пными моли́твами наставля́ющи не преста́й Тя пою́щия,/ Ма́ти Присноде́во.
На хвали́тех стихи́ры на 4, глас 2. Византи́ево:
Я́ко преуспева́я в Бо́зе,/ о всех моли́ся, страстоно́сче,/ преуспева́ти в Нем,/ му́чеником похвало́, вели́кий Проко́пие,/ я́ко дерзнове́ние име́я к Нему́/ и Того́ престо́лу при́сно предстоя́ в Богоизря́дных стезя́х/ и Боже́ственных дея́ниих, благоугожда́ющих Ему́/ и тя блажа́щих.
Глас 3. Ге́рманово:
Ю́ношеским во́зрастом подвиза́яся,/ я́коже Боже́ственнейший Па́вел,/ свы́ше Боже́ственное дарова́ние прия́л еси́,/ и лю́таго борца́ де́рзость всеору́жеством Креста́ низложи́л еси́,/ му́чеником похвало́, страстоно́сче Проко́пие,/ о нас ко Го́споду моли́ся,/ спасти́ ду́ши на́ша.
Киприа́ново: Хвала́ Бо́гови от бре́нных усте́н прино́сится/ в Боже́ственней па́мяти твое́й,/ Проко́пие многострада́льне:/ ты бо яви́лся еси́ изря́дный во́ин сло́ва ве́ры,/ победи́в в труде́х и́дольския зра́ки,/ и ны́не просвети́лся еси́ све́том Тро́ическим,/ озаря́я на́ша помышле́ния/ моли́твами твои́ми.
Глас 5:
Це́рковь днесь, оде́явшися держа́вою Твое́ю,/ му́чениче Христо́в, весели́тся/ и твою́ всеизря́дную па́мять/ по достоя́нию благохва́льно взыва́ет, почита́ющи:/ ра́дуйся, и́же Па́влу поревнова́вый,/ и Крест Христо́в взем,/ и се́ти сокруши́л еси́ чужда́го./ Ра́дуйся, му́чеников похвало́,/ Проко́пие многострада́льне,/ о нас ко Го́споду не преста́й моля́ся,/ я́ко дерзнове́ние име́я, страда́льцев украше́ние.
Сла́ва, глас 4:
Червлени́цею крове́й муче́ния твоего́/ украси́вшися, Це́рковь Бо́жия/ со́лнечныя зари́ испуща́ет,/ Проко́пие многострада́льне,/ Кресто́м бо вооружи́в себе́/ и умре́ти по Христе́ жела́я доблему́дренно,/ ко ополче́нию чужда́го супроти́ву стал еси́,/ и посрами́в умышле́ния беззако́нных,/ побе́дный во́ин я́влься Христо́в./ Те́мже мо́лим тя:/ я́ко име́я дерзнове́ние к Нему́,/ му́чеников украше́ние,/ моли́ спасти́ся душа́м на́шим.
И ны́не, Богоро́дичен или́ Крестобогоро́дичен.
Подо́бен: Я́ко до́бля:
Распина́ема Христа́ Человеколю́бца ви́дящи Пречи́стая/ и ре́бра ископава́ема копие́м,/ пла́чущи, вопия́ше:/ что́ сие́, Сы́не Мой?/ Что́ Ти безблагода́тнии лю́дие возда́ша,/ за я́же сотвори́л еси́ до́брая им,/ и тщи́шися безча́дствовати Мя, Вселюбе́знейший?/ Удивля́юся, Благоутро́бне,/ Твоему́ во́льному распя́тию.
На стихо́вне Окто́иха. Та́же глаго́лем припе́в: Ди́вен Бог во святы́х Свои́х,/ Бог Изра́илев. И пое́м стихи́ру, глас 6:
Прииди́те, вси земни́и концы́,/ духо́вный лик соста́вим,/ пе́нием тру́бный глас восприи́мше,/ и благода́рныя пе́сни принесе́м, глаго́люще:/ ра́дуйся, Христо́в во́ине, му́чениче Проко́пие,/ любо́вию бо Сего́ пострада́л еси́, блаже́нне./ Ра́дуйся, и́же те́ло отда́в на ра́ны лю́тыя/ за ве́чную и блаже́нную вои́стинну жизнь./ Ра́дуйся, несы́тною душе́ю наслажда́яся непреста́нно,/ я́ко о́бщник Христа́ Бо́га на́шего./ Те́мже о творя́щих ве́рою сла́вную па́мять твою́ моли́,/ изба́витися вся́каго гне́ва,/ и тли, и муче́ния.
Сла́ва, глас 8:
Я́коже Па́вел, зва́ние от Бо́га прие́м,/ му́чениче Проко́пие,/ и преуспева́я в Бо́зе Креста́ жела́нием,/ мучи́телей злоче́стия и муче́ния вся му́жественно посрами́л еси́./ Те́мже и до кро́ве противоста́л еси́ ко греху́,/ к неви́димым враго́м подвиза́яся,/ и мо́лишися непреста́нно Изба́вителю и Бо́гу/ дарова́ти вселе́нней мир/ и душа́м на́шим ве́лию ми́лость.
И ны́не, Богоро́дичен или́ Крестобогоро́дичен.
Подо́бен: Му́ченицы Госпо́дни:
Не терплю́, Ча́до, ви́дящи Тя, на Дре́ве усну́вша,/ бо́дрость всем подаю́щаго,/ я́ко да дре́вле преступле́ния плодо́м/ сном поги́бельным усну́вшим/ Боже́ственную и спаси́тельную бо́дрость пода́си,–/ Де́ва глаго́лаше, пла́чущися,/ Ю́же велича́ем.
НА ЛИТУРГИ́И
Блаже́нны Окто́иха и от кано́на свята́го песнь 3-я. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га,/ Го́спода от исто́чник изра́илевых. Апо́стол к Тимофе́ю, зача́ло 292. Аллилу́ия, глас 4: Пра́ведник, я́ко фи́никс, процвете́т: Ева́нгелие от Матфе́я, зача́ло 39. Прича́стен: В па́мять ве́чную:
