Служба в честь святаго преподобномученика Макария Каневскаго, чудотворца
НА ВЕЛИ́ЦЕЙ ВЕЧЕ́РНИ
На Го́споди, воззва́х:стихи́ры предпра́зднства 3, глас 1 (зри день сей вы́ше) , и свята́го 5, глас 2:
Прииди́те, возра́дуемся Го́сподеви,/ преподобному́ченика Мака́рия па́мять све́тло пра́зднующе:/ наставля́ет бо той нас словесы́ и де́лы свои́ми,/ ка́ко доброде́тельне во Христе́ жи́ти,/ и ско́рби со упова́нием на Го́спода терпе́ти,/ и сме́рти не страши́тися теле́сныя,/ но ве́рны до после́дняго издыха́ния бы́ти Спа́су Христу́/ и жи́зни вене́ц улучи́ти.// Моли́твами блаже́ннаго Мака́рия, Бо́же, поми́луй нас.
Го́спода Иису́са/ от ю́ности премно́го возлюби́вый,/ вда́лся еси́ на по́двиги духо́вныя, свя́те Мака́рие,/ и стра́ждущим и угнете́нным помо́щник был еси́,/ и смерть му́ченическую от ага́рян прия́л еси́ му́жественне,/ те́мже тя засту́пника те́плаго ве́рным Христо́с Бог показа́,// да́руяй ми́рови ве́лию ми́лость.
Ку́ю похвалу́ принесе́м ти, свя́те Мака́рие?/ Я́ко цвет благоуха́нен Це́ркве Христо́вы яви́лся еси́,/ неуста́нно бо учи́л еси́ лю́ди/ позна́нию ве́ры Христо́вы,/ гре́шников приводя́ к покая́нию,/ та́йная челове́ческаго се́рдца ве́дый,/ и бу́дущая, я́ко настоя́щая, зрел еси́,/ и ча́да твоя́ вся подви́гнул еси́ терпе́ти за И́мя Христо́во,/ те́мже моли́твами твои́ми, блаже́нне,// да́рует Спас наш ве́рным ве́лию ми́лость.
Сла́ва, глас то́йже:
Ца́рства Небе́снаго насле́дник был еси́, Мака́рие,/ ты бо о́ное приобре́л еси́ по́двиги твои́ми,/ сла́ву тле́ннаго ми́ра всю презре́в/ и Христу́ Спа́су словесы́ и де́лы порабо́тав,/ за́поведей Его́ не отве́ргся,/ и ри́зы своя́ убели́л еси́ в Кро́ви А́гнца,/ нас ра́ди Страсть подъя́вша во́льную,/ подаю́щаго ве́рным рабо́м Свои́м// вене́ц жи́зни нетле́нныя.
И ны́не, предпра́зднства, глас 4: Всечестно́е Твое́ рождество́: (зри день сей вы́ше).
Вход, проки́мен дне. Чте́ния 3 преподо́бническая.
Прему́дрости Соломо́новы чте́ние (главы́ 5 и 6):
Пра́ведницы во ве́ки живу́т, и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние Свое́ и вооружи́т тварь в месть враго́м./ Облече́тся в броня́ пра́вды и возложи́т шлем, суд нелицеме́рен./ Прии́мет щит непобеди́мый, преподо́бие./ Поостри́т же напра́сный гнев во ору́жие;/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я, ре́ки же потопя́т я на́гло./ Сопроти́в ста́нет им дух си́лы, и, я́ко ви́хор, разве́ет их/ и опустоши́т всю зе́млю беззако́ние, и злоде́йство превратя́т престо́лы си́льных./ Слы́шите у́бо, ца́рие, и разуме́йте, навы́кните судии́ конце́в земля́./ Внуши́те, держа́щии мно́жества и гордя́щиися о наро́дех язы́ков,/ я́ко дана́ есть от Го́спода держа́ва вам и си́ла от Вы́шняго.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исхо́д их./ И е́же от нас ше́ствие сокруше́ние, они́ же суть в ми́ре./ И́бо пред лице́м челове́ческим а́ще и му́ку прии́мут, упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Яко зла́то в горни́ле искуси́ их, и я́ко всепло́дие же́ртвенное прия́т я./ И во вре́мя посеще́ния их возсия́ют и, я́ко и́скры по сте́блию, потеку́т./ Су́дят язы́ком и облада́ют людьми́, и воцаря́тся Госпо́дь в них во ве́ки./ Наде́ющиися Нань разуме́ют и́стину и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́, и посеще́ние во избра́нных Его́.
Прему́дрости Соломо́новы чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости житие́ нескве́рное./ Благоуго́ден Бо́гу быв, возлю́блен бысть, и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́, или́ лесть прельсти́т ду́шу его́./ Раче́ние бо зло́бы помрача́ет до́брая, и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга./ Уго́дна бо бе Го́споду душа́ его́, сего́ ра́ди потща́ся от среды́ лука́вствия./ Лю́дие же ви́девше и не разуме́вше, ниже́ положи́вше в помышле́нии таково́е./ Я́ко благода́ть и ми́лость в преподо́бных Его́, и посеще́ние во избра́нных Его́.
На лити́и стихи́ры, глас 1:
Ду́хом Боже́ственным укрепля́емь,/ яви́лся еси́ сло́ва Бо́жия вели́кий пропове́дник,/ свя́те Мака́рие,/ и люде́й нечести́вых испра́витель,/ и му́ченик за Христа́ Спа́са ди́вный,// Его́же моли́ поми́ловати ду́ши на́ша.
Ми́ра сего́ су́етная отве́рг,/ по́двиги духо́вныя прия́л еси́, Мака́рие,/ и вели́кий свети́льник ве́рным показа́лся еси́,/ ко спасе́нию ве́чному правосла́вныя лю́ди приводя́,/ и смерть за Христа́ Спа́са прия́ти не устраши́лся еси́,/ Его́же моли́ проще́ние грехо́в всем нам дарова́ти// и ве́лию ми́лость душа́м на́шим.
Глас 8:
И́же по о́бразу соблюды́й невреди́мо,/ о́тче Мака́рие,/ е́же по Христо́ве ве́ре,/ сопроти́вился еси́ терпели́вно,/ не устраши́вся мучи́тельскаго преще́ния,/ но духо́вным мече́м того́ уби́л еси́;/ тем дерзнове́ние стяжа́в к Бо́гу,/ спаса́й чту́щия тя от вся́ких бед,// преподо́бный страда́льче.
Сла́ва, глас 3:
Спа́са Христа́ измла́да возлюби́в,/ прии́де Мака́рий во оби́тель О́вручскую/ и, та́мо словесе́м проро́к,/ апо́стол и преподо́бных поуча́яся,/ вели́кий просвети́тель люде́й правосла́вных яви́ся,/ по́слежде же во гра́де Ка́неве/ безтре́петно ду́шу свою́ за Христа́ положи́/ и вене́ц му́ченический от Него́ прия́т./ О сем ве́дуще, Спа́су мо́лимся:/ Мака́рия Переясла́вскаго моли́твами, Христе́,/ наста́ви нас бы́ти в ве́ре на́шей тве́рды// и спасе́ние ве́чное улучи́ти, Влады́ко Го́споди.
И ны́не, предпра́зднства, глас 4: Всеми́рная ра́дость: (зри день сей вы́ше).
На стихо́вне стихи́ры, глас 5.
Подо́бен: Ра́дуйся:
Ра́дуйся, Це́ркве Правосла́вныя украше́ние,/ благоче́стия вели́кий подви́жниче,/ звезде́ све́тлая, путь ко Христу́ показу́ющая,/ ве́ры правосла́вныя неустраши́мый защи́тниче,/ враго́в ви́димых и неви́димых устраше́ние,/ во́ине Спа́сов, в му́жестве неодоле́нный,/ Того́ моли́, блаже́нне Мака́рие,// дарова́ти душа́м на́шим ве́лию ми́лость.
Стих: Пра́ведник, я́ко фи́никс, процвете́т,// я́ко кедр, и́же в Лива́не, умно́жится.
Ра́дуйся, ра́зума Боже́ственнаго сокро́вище,/ Све́та Невече́рняго вели́кий пропове́дниче,/ злых нра́вов испра́вителю,/ к покая́нию нечести́выя обраща́яй,/ непра́во судя́щих гро́зный обличи́телю,/ лю́ди неради́выя вразумля́яй/ и на по́двиги за Христа́ Спа́са ве́рных наставля́яй,/ Того́ моли́, свя́те Мака́рие,// дарова́ти чту́щим тя ве́лию ми́лость.
Стих: Насажде́ни в дому́ Госпо́дни// во дво́рех до́му Бо́га на́шего процвету́т.
Ра́дуйся, вели́кий о́бразе жития́ и́ноческаго,/ А́нгелов досто́йный собесе́дниче,/ ве́рным благода́ть Бо́жию да́руяй,/ заблужда́ющих ко спасе́нию наставля́яй,/ до́брый и кро́ткий люде́й правосла́вных па́стырю,/ душ немощству́ющих врачу́ ре́вностный,/ Врача́ душ и теле́с на́ших ве́рный служи́телю,/ Того́ моли́, вели́кий подви́жниче,// низпосла́ти ве́рным ве́лию ми́лость.
Сла́ва, глас 8:
Доко́ле, о душе́ моя́, в прегреше́ниих утопа́еши?/ Доко́ле о спасе́нии свое́м неради́ши?/ Вре́мя ма́ло уже́, Судия́ при две́рех стои́т./ Воспомяни́ Мака́рия блаже́ннаго житие́,/ ка́ко той просия́ доброде́тельми вели́кими/ и гре́шных привожда́ше к покая́нию,/ и Спа́су Христу́ со слеза́ми возопи́й:/ моли́твами преподобному́ченика Мака́рия, Христе,/ на путь спасе́ния наста́ви мя.
И ны́не, предпра́зднства, глас 4: Всеми́рная ра́дость: (зри день сей вы́ше).
Тропа́рь, глас 8:
Ко всечестне́й ра́це многоцеле́бных моще́й твои́х,/ преподобному́чениче Мака́рие,/ мы, гре́шнии, со умиле́нием притека́юще,/ дар исцеле́ния прие́млем./ Ты бо при́сно источа́еши боля́щим здра́вие, печа́льным утеше́ние/ и всех чту́щих тя вся́кое исполня́еши тре́бование,/ моля́ся Христу́ Бо́гу, да спасе́т ду́ши на́ша.
Ин тропа́рь, глас 4:
Боже́ственным жела́нием весь сам себе́ от ю́наго во́зраста Го́сподеви возложи́в,/ яви́лся еси́ свети́льник све́тлый гра́ду твоему́,/ поуча́я всех и́стинней ве́ре и житию́ богоуго́дному,/ преподобному́чениче Мака́рие, О́вручская похвало́./ Сего́ ра́ди, я́ко а́гнец непоро́чный,/ от распрелюби́вых враго́в гони́мый,/ возше́л еси́ во оби́тель Ка́невскую,/ иде́же я́ко па́стырь до́брый ду́шу твою́ положи́л еси́ за о́вцы твоя́./ И ны́не ко всечестне́й ра́це многоцеле́бных моще́й твои́х мы, гре́шнии, со умиле́нием притека́юще,/ исцеле́ния прие́млем, многострада́льне./ Ты бо при́сно источа́еши боля́щим здра́вие, печа́льным утеше́ние/ и всем чту́щим тя вся́кое исполня́еши тре́бование,// моля́ся Христу́ Бо́гу, да спасе́т ду́ши на́ша.
НА У́ТРЕНИ
По 1-м стихосло́вии седа́лен, глас 1:
Лю́дие правосла́внии,/ днесь к ра́це моще́й преподобному́ченика Мака́рия стеце́мся/ и воспомя́нем словеса́ и дела́ сего́ му́жа вели́каго,/ и́миже свети́льник Це́ркве Правосла́вней яви́ся/ и те́плый засту́пник почита́ющим святу́ю па́мять его́./ Того́ моли́твами, Христе́ Спа́се,/ Твой мир пода́ждь нам, гре́шным,/ Еди́не Человеколю́бче.
Сла́ва, и ны́не, предпра́зднства или́ Богоро́дичен:
Упова́ние христиа́ном, Пресвята́я Де́во,/ Его́же родила́ еси́, Бо́га, па́че ума́ и сло́ва,/ непреста́нно моли́ с вы́шними Си́лами и с преподобному́чеником Мака́рием/ да́ти оставле́ние грехо́м на́шим.
По 2-м стихосло́вии седа́лен, глас 1:
О вели́кий и сла́вный преподобному́чениче Мака́рие,/ Це́ркве Христо́вы необори́мый защи́тниче/ и сло́ва Бо́жия неуста́нный пропове́дниче,/ моли́ Христа́ Бо́га на́шего/ шу́ияго стоя́ния на стра́шнем суди́щи Его́ нас изба́вити и ве́чнаго муче́ния гее́нскаго,/ те́плый наш моли́твенниче.
Сла́ва, и ны́не, предпра́зднства или́ Богоро́дичен:
Моли́тву прие́мши от нас,/ в кров Твой, Пречи́стая Де́во, прибега́ющих,/ не преста́й моля́щи Человеколю́бца,/ спасти́ся рабо́м Твои́м.
По полиеле́и седа́лен, глас 8.
Подо́бен: Повеле́нное та́йно:
По сла́внем страда́нии твое́м, свя́те Мака́рие,/ и от ага́рян нечести́вых главы́ отсече́нии/ яви́л есть Христо́с нетле́нный мо́щи твоя́,/ и мы, лобыза́юще сия́, вопие́м ти:/ от пре́лести лука́ваго спаса́й нас моли́твами, свя́те, твои́ми.
Сла́ва, и ны́не, Богоро́дичен:
От любве́ душе́вныя вопию́ Ти, Влады́чице,/ Пресве́тлаго Со́лнца заре́,/ спасе́ния дверь,/ Небе́сная врата́,/ мы́сленная ле́стнице всех христиа́н:/ мольбу́ приими́ Тя блажа́щих, наде́ждо душ на́ших,/ и спасе́ние нам да́руй.
Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем,/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 6:
Насле́дниче Бо́жий, соприча́стниче Христо́в,/ служи́телю Госпо́день, свя́те Мака́рие,/ по и́мени твоему́ та́ко и житие́ твое́:/ спросия́ бо седи́не ра́зум,/ свиде́тельствоваше све́тлость лица́ твоего́ душе́вное незло́бие,/ изве́ствоваше кро́тость сло́во молчали́вое./ Жизнь твоя́ сла́вна,/ и успе́ние со святы́ми,/ моли́ о душа́х на́ших.
Кано́н предпра́зднства со ирмосо́м на 6.
И свята́го на 8, его́же краестро́чие: Мака́риа моли́твами поми́луй нас, Спа́се. Глас 8.
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.
Мно́гими содержи́м напа́стьми,/ к тебе́, преподобно-му́чениче Мака́рие, прибега́ю, утеше́ния душе́внаго иски́й./ Предста́тельством свои́м у Влады́ки Христа́ ты ми помози́.
А́нгел во пло́ти всем житие́м свои́м яви́лся еси́, Мака́рие,/ лю́ди правосла́вныя ко спасе́нию приводя́,/ и Це́ркве Христо́вы вели́кий свети́льник:/ те́мже па́мять твою́, ве́рнии, соше́дшеся, по до́лгу почита́ем.
Богоро́дичен: К Тебе́, Пречи́стая Влады́чице,/ Нача́льника спасе́ния на́шего ро́ждшая,/ со слеза́ми прибега́ю:/ покро́в ми бу́ди во всех ско́рбех и обстоя́ниих.
Катава́сия: Крест начерта́в:
Песнь 3
Ирмо́с: Небе́снаго кру́га/ Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́и́,/ жела́ний кра́ю, ве́рных утвержде́ние,// Еди́не Человеколю́бче.
А́нгелов и челове́ков Творе́ц умудри́ тя, блаже́нне Мака́рие,/ мир сей су́етный оста́вити и в мона́шестем житии́ подвиза́тися:/ моли́, Мака́рие, Спа́са на́шего,/ да да́рует нам любо́вь к Нему́ тве́рду име́ти/ и житие́ доброде́тельное проводи́ти.
Рабо́тати Христу́ Еди́ному всем се́рдцем вожделе́в,/ прише́л еси́ по кончи́не роди́телей твои́х, Мака́рие, во оби́тель О́вручскую/ и та́мо, ду́хом Бо́жиим наставля́ем, пи́щею име́л еси́ писа́ния Боже́ственная;/ моли́ Спа́са на́шего, Мака́рие,/ да и мы, гре́шнии, о́ная возлю́бим, я́ко исто́чник богодохнове́нный.
Богоро́дичен: Исцели́ душе́вныя моя́ я́звы, Влады́чице,/ к заступле́нию Твоему́ прибега́юща,/ и моли́ Сы́на Твоего́ от напа́стей изба́вити мя,/ Ты бо Изба́вителя ми́ру несказа́нно родила́ еси́.
Конда́к и и́кос предпра́зднства (зри день сей вы́ше).
Седа́лен, глас 8:
А́гнца Бо́жия, грехи́ ми́ра взе́млющаго,/ крест на рамена́х твои́х поне́сл еси́, Мака́рие,/ е́же гра́ды О́вруч и Ка́нев в де́лех твои́х очи́ма свои́ма узре́ша:/ Переясла́в же Приднепро́вский тобо́ю хва́лится,/ я́ко та́мо мо́щи твоя́ чудеса́ мно́га источи́ша,/ оба́че и Черка́ссы град ра́дуется, имы́й мо́щи твоя́ ны́не:/ и́хже благогове́йно лобыза́юще,/ Христу́ Бо́гу пе́сньми свяще́нными хвалу́ возсыла́ем.
Сла́ва, и ны́не, предпра́зднства, глас 8:
Я́ко Де́ву в жена́х, без се́мене ро́ждшую Бо́га пло́тию,/ вси блажи́м, ро́ди челове́честии,/ Огнь бо всели́ся в Тя Боже́ственный,/ и, я́ко Младе́нца, дои́ши Зижди́теля и Го́спода./ Те́мже а́нгельстии собо́ри и челове́честии ро́ди досто́йно сла́вят пресвято́е рождество́ Твое́,/ и мы согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ воспева́ющим досто́йно па́мять Твою́.
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.
Мно́гия лю́ди, Мака́рие, научи́л еси́ житию́ доброде́тельному,/ и́же приходи́ша к тебе́ во оби́тель/ послу́шати словеса́ твоя́ и утеше́ние душе́вное обрести́./ Уте́ши и нас, милосе́рдне, в находя́щих на ны ско́рбех и обстоя́ниих.
От ю́ности твоей, Мака́рие,/ ни о чесо́м же земне́м, то́кмо об угожде́нии Бо́гу пеки́йся,/ житие́ мона́шеское возлюби́л еси́/ и, власть прие́м наставля́ти и поуча́ти и́ноки,/ не то́кмо о́ных, но и мирски́я лю́ди сло́ву Бо́жию ре́вностно учи́л еси́;/ помози́ нам моли́твами твои́ми, о́тче,/ да и мы словеса́ Госпо́дня взы́щем, я́ко сокро́вище некра́домое.
Богоро́дичен: Лю́тыя неду́ги на́ша душе́вныя и теле́сныя исцели́ моли́твами твои́ми, Влады́чице,/ Ты бо Ма́ти всем ве́рным еси́,/ на по́мощь и покро́в Твой наде́ющимся.
Песнь 5
Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,// Человеколю́бче.
Иски́й ми́ра, о не́мже Спас наш апо́столом рекл есть:/ мир оставля́ю вам, мир Мой даю́ вам,/ укроти́л еси́ в тру́дных обстоя́ниих, Мака́рие, гнев бра́тии во оби́тели О́вручстей,/ прия́в власть, во́ли Госпо́дней себе́ преда́в.
Твое́ богому́дрое наставле́ние, Мака́рие,/ я́ко мед сла́дкий напая́ше всех к тебе́ приходя́щих:/ ты бо, по глаго́лу апо́столову,/ го́рняя, а не земна́я всегда́ му́дрствовати лю́ди учи́л еси́.
Богоро́дичен: Влады́чице и Ма́ти Изба́вителя,/ оживи́ ду́ши на́ша,/ мо́лим Тя, грехо́м умерщвле́ннии,/ да пое́м Тя, Живо́т и Воскресе́ние всех ро́ждшую.
Песнь 6
Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:// от тли, Бо́же, возведи́ мя.
А́да и сме́рти Победи́теля, Христа́ Спа́са,/ во́ин преизря́дный яви́лся еси́, Мака́рие,/ егда́ е́реси лати́нския после́дователие/ словесы́ и де́лы злы́ми тща́хуся отврати́ти тя от пути́ пра́ваго;/ ты же, Спа́су всех ти помога́ющу, вся ко́зни о́ных одоле́л еси́.
Мно́жество ага́рян, свя́те Мака́рие,/ восхоте́ша разори́ти град О́вруч и оби́тель его́;/ ты же не мече́м, не копие́м, не я́драми о́гненными,/ но моли́твою ко Го́споду град от враго́в спасл еси́.
Богоро́дичен: Исто́ргни мя от мрачнаго сна грехо́внаго/ хода́тайством к Сы́ну Твоему́, Влады́чице,/ да Той наста́вит мя сле́довати всегда́ Боже́ственным словесе́м Его́.
Конда́к, глас 2:
По́стническое и равноа́нгельное житие́ твое́/ страда́льческими уясни́л еси́ по́двиги/ и А́нгелом совсе́льник яви́лся еси́, богоблаже́нне Мака́рие,// с ни́ми Христу́ Бо́гу моля́ся не преста́й о всех нас.
И́кос:
Отве́рг ми́ра сего́ сла́ву тле́нную,/ восхоте́л еси́ Еди́ному Христу́ всем житие́м свои́м угожда́ти, блаже́нне Мака́рие,/ те́мже труды́, и поще́нии, и моли́твою ко Спа́су непреста́нно воспита́в ду́шу свою́,/ страда́ний теле́сных и сме́рти не убоя́лся еси́,/ е́же и засвиде́тельствовал еси́,/ егда́ нечести́вии ага́ряне, град Ка́нев разори́вше, муче́нием тя и главы́ отсече́нию преда́ша,/ не о земне́м бо, тле́нием, но о го́рнем помышля́л еси́ всегда́, Мака́рие,/ А́нгелом бо и святы́м друг тща́лся еси́ бы́ти,/ с ни́миже непреста́нно моли́ о всех нас.
Песнь 7
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша пою́ще:// отце́в Бо́же, благослове́н еси́.
Милосе́рдия и по́мощи Спа́са Го́спода ча́я,/ егда́ разори́ша ага́ряне оби́тель О́вручскую,/ отше́л еси́, Мака́рие, подвиза́тися в Ки́ево-Пече́рскую Ла́вру./ Похваля́юще дерзнове́ние твое́, вопие́м:/ оте́ц на́ших Бо́же, благослове́н еси́.
И в Ка́неве гра́де нача́льник оби́тели сый,/ я́коже и во О́вруче, учи́л еси́, Мака́рие,/ и́ноков и мирски́х по за́поведем Бо́жиим жи́ти,/ непреста́нно о душа́х челове́ческих попече́ние име́я,/ да благослове́н бу́дет Бог оте́ц на́ших.
Лени́ваго и неблагонра́внаго сы́на жены́ благочести́выя/ учи́л еси́ со тща́нием приле́жно твори́ти моли́тву Госпо́дню,/ и сие́ испра́ви неради́ваго и обрати́ о́наго ко Го́споду,/ Ему́же вси ве́рнии вопие́м:/ оте́ц на́ших Бо́же, благослове́н еси́.
Богоро́дичен: У́зы сме́рти и а́да Расто́ргшаго,/ страда́ньми, сме́ртию и Воскресе́нием род челове́ческий от ве́чнаго осужде́ния Спа́сшаго Ма́ти,/ Того́ моли́, да проще́ние грехо́в всем ве́рным да́рует.
Песнь 8
Ирмо́с: Царя́ Небе́снаго,/ Его́же пою́т во́и а́нгельстии,// хвали́те и превозноси́те во вся ве́ки.
Испра́вил еси́, богому́дре Мака́рие, посыла́нием та́йным пе́нязей и пи́сьменным увеща́нием судию́ гра́дскаго,/ мздои́мца и непра́ведно суд лю́дем творящаго,/ Судию́ бо живы́м и ме́ртвым во уме́ свое́м зрел еси́, блаже́нне,/ словеса́, дела́ и мы́сли челове́ческая ве́дуща,/ Его́же ве́рнии пое́м и превозно́сим во вся ве́ки.
Наше́ствие попуще́нием Бо́жиим враго́в на град Ка́нев/ предве́дети и ве́рным откры́та дано́ бысть тебе́, блаже́нне Мака́рие,/ благоче́стия ра́ди твоего́,/ да не уныва́ющий, но бо́дрствующий обря́щутся,/ егда́ низпо́слет испыта́ние Спас наш,/ Его́же пое́м и превозно́сим во вся ве́ки.
Тро́ичен: Страсте́й лю́тых, и́миже гре́шнии обдержи́ми есмы́,/ изба́ви ны, Триипоста́сная Тро́ице,/ и помози́ нам в житии́ на́шем дела́ блага́я твори́ти,/ да ве́чное спасе́ние приобря́щем.
Богоро́дичен: Влады́чице и Ма́ти Изба́вителя,/ услы́ши нас, моля́щихся Тебе́ и прося́щих Твоея́ по́мощи и заступле́ния,/ умоли́ Сы́на Твоего́, Христа́ Бо́га на́шего,/ да прости́т прегреше́ния на́ша,/ и изба́вит нас ве́чнаго осужде́ния и му́ки,/ и да поми́лует нас в день су́дный.
Песнь 9
Ирмо́с: Вои́стину Богоро́дицу/ Тя испове́дуем,/ спасе́ннии Тобо́ю, Де́во Чи́стая,// с безплотными ли́ки Тя велича́юще.
Сокруши́ти возмого́ша врази́ многочи́сленнии врата́ оби́тели Ка́невския,/ оба́че не возмого́ша сокруши́ти му́жество твое́, Мака́рие,/ егда́ узре́ша тя пред враты́ стоя́ща,/ во власяни́цу оде́яна, со кресто́м в руце́ и на пе́рсех;/ моли́ Спа́са о нас, свя́те,/ да отжене́т от нас дух боя́зни страда́ний и сме́рти теле́сныя.
Пору́ган и уничиже́н был еси́, Мака́рие, ага́ряны нечести́выми,/ и́же, би́вше и терза́вше те́ло твое́, главу́ твою́ отсеко́ша,/ оба́че на Небеси́ яви́лся еси́ сла́вою и че́стию укра́шен./ Моли́ся, Мака́рие, да не лиши́т и нас, гре́шных,/ Спас наш Небе́снаго Ца́рствия Своего́.
А́дова врата́ и вереи́ сокруши́вшему Христу́ Бо́гу на́шему после́довал еси́/ во всем житии́ твое́м, преподобному́чениче Мака́рие,/ те́мже прия́тие сме́рти от враго́в не устраши́ тя,/ оба́че рекл еси́ о́ным безбоя́зненне:/ мое́ сокро́вище на Небесе́х есть,/ иде́же и живе́ши с го́рними Си́лами, блаже́нне.
Свети́льник све́тлый ми́ру всему́ яви́лся еси́, Мака́рие,/ я́ко еще́ при житии́ твое́м на земли́/ моли́твами твои́ми многоразли́чная боля́щих исцеле́ния соверша́хуся;/ та́кожде и ны́не зрим о́ныя от святы́х моще́й твои́х, во сла́ву Спа́са Христа́,/ Его́же раб благи́й и ве́рный яви́лся еси́.
Богоро́дичен: Ели́цы к заступле́нию Твоему́ притека́ют, Влады́чице,/ николи́же посра́млени отхо́дят:/ Ты бо наде́жда всех конце́в земли́ еси́,/ я́ко Ма́ти Изба́вителя душ на́ших,/ милосе́рдия ра́ди на зе́млю к лю́дем соше́дшаго.
Свети́лен, глас 2:
Вели́каго ве́ры и благоче́стия подви́жника,/ преподобному́ченика Мака́рия восхва́лим,/ мно́гия бо лю́ди сло́ва Бо́жия пропове́данием от ве́чныя сме́рти спасе́/ и, я́ко добр во́ин Христо́в, по глаго́лу апо́столову, злопостражда́л есть,/ и ве́рным путь показу́ет к Ца́рству Небе́сному.
Сла́ва, и ны́не, предпра́зднства (зри день сей вы́ше).
На хвали́тех стихи́ры 4, глас 4:
Весели́теся, лю́дие правосла́внии,/ торжеству́йте, лю́бящии Сио́на:/ се бо Мака́рия Переясла́вскаго,/ А́нгела земна́го и челове́ка Небе́снаго,/ нетле́нием моще́й и чудесы́ от них мно́гими/ Христо́с Спас просла́ви/ и те́плаго о лю́дех моли́твенника всем показа́,// душе́вныя и теле́сныя неду́ги в лю́дех исцеля́юща.
Ре́вностный побо́рник ве́ры правосла́вныя/ яви́лся еси́ на земли́, Мака́рие,/ ко́зней не страша́ся вра́жиих,/ Го́спода бо Вседержи́теля/ всегда́ зрел еси́ пред очи́ма твои́ма,/ живы́ми и ме́ртвыми облада́юща,/ в ра́дость Свою́ до́брых и ве́рных рабо́в Свои́х// всегда́ вводя́щаго.
Де́латель му́дрый виногра́да Христо́ва/ яви́лся еси́, Мака́рие,/ и́ноков и мирски́х житию́ доброде́тельному поуча́я,/ гре́шных обличе́нием приводя́ к покая́нию,/ в го́рних помышле́ньми свои́ми пребыва́я всегда́,/ и по отше́ствии от земли́ Ца́рства Небе́снаго удосто́ился еси́,// во́льная страда́ния за Христа́ претерпе́в, богоблаже́нне.
Ра́дости ве́чныя по кончи́не жития́ земна́го/ дости́гл еси́, Мака́рие,/ те́сными бо враты́ и у́зким путе́м в житии́ твое́м ходи́л еси́,/ сла́ву тле́ннаго ми́ра в ничто́же вмени́в,/ и живо́т свой за Христа́ Го́спода положи́л еси́,/ и́же вене́ц нетле́ния тебе́ подаде́,/ и дар исцеле́ния неду́гов душе́вных и теле́сных// честны́м моще́м твои́м.
Сла́ва, глас 8:
Го́споди, егда́ с челове́ки на земли́ пребыва́л еси́,/ земна́я учи́л еси́ не собира́ти себе́ сокро́вища,/ тле́нию бо и хище́нием подве́ржени суть,/ но Небе́сная некра́домая./ Твои́м же словесе́м Мака́рий Переясла́вский в житии́ после́дуя,/ ага́ряном нечести́вым му́чащим рече́:/ не на земли́, но на Небеси́ сокро́вище мое́ есть./ Моли́твами преподобному́ченика Твоего́, Христе́,// Небе́снаго Ца́рствия сподо́би рабы́ Твоя́.
И ны́не, предпра́зднства: Пронарече́нная всех Цари́це: (зри день сей вы́ше).
Славосло́вие вели́кое и отпу́ст.
На Литурги́и слу́жба предпра́зднства и преподо́бнаго.
