Служба в честь святаго преподобномученика Дометия
НА ВЕЧЕ́РНИ
На Го́споди, воззва́х: стихи́ры пра́здника 3, глас 4.
Подо́бен: Зва́нный свы́ше:
Пре́жде Честна́го Креста́ Твоего́ и страда́ния,/ пое́мь, и́хже проразсуди́л еси́, от свяще́нных учени́к,/ на Фаво́рскую, Влады́ко, возше́л еси́ го́ру,/ показа́ти восхоте́в сим сла́ву Твою́,/ и́же и ви́девше Тя преобрази́вшася/ и па́че со́лнца просия́вша,/ ни́цы па́дше,/ си́ле Твое́й удиви́шася, взыва́юще:/ Ты безле́тен Свет еси́, Христе́,/ и сия́ние О́тчее,/ а́ще и во́лею плоть яви́лся еси́, Неизме́нне.
И́же пре́жде век Сый Бог Сло́во,/ И́же Све́том, я́ко ри́зою, одева́яйся,/ преобразу́ющийся пред ученики́ Твои́ми,/ па́че со́лнца, Сло́ве, проси́ял еси́,/ Моисе́й же и Илия́ Тебе́ предста́ша,/ ме́ртвым и живы́м Тя, Го́спода, пове́дающе/ и Твое́ сла́вяще неизрече́нное смотре́ние, и ми́лость,/ и мно́гое милосе́рдие,/ и́мже спасл еси́ мир,/ грехо́м погиба́ющий.
От Деви́ческаго о́блака Тя рожде́нна,/ и плоть бы́вша,/ и на горе́ Фаво́рстей преобразу́ющася, Го́споди,/ и о́блаком све́тлым Тя окружа́ема,/ глас Роди́телев возлю́бленнаго Тя Сы́на,/ ученико́м предстоя́щим Тебе́, я́ве ска́зоваше,/ я́ко Единосу́щна и Единопресто́льна./ Те́мже Петр, удивля́яся,–/ добро́ есть зде бы́ти,– глаго́лаше,/ не ве́дый, е́же глаго́лаше,/ Благоде́телю Многоми́лостиве.
И́ны стихи́ры свята́го, глас 6.
Подо́бен: Всю отложи́вше:
Все отложи́в волше́бное обая́ние,/ и пе́рсское скверне́ние, и ме́рзкая служе́ния,/ Бо́гу прите́кл еси́, му́дрым промышле́нием/ окормля́ющему челове́чество,/ Его́же и́менем апо́стольски исцели́л еси́/ безслове́сных неду́ги и челове́ческия боле́зни,/ притека́ющих усе́рдно к тебе́, уго́дниче Христо́в./ Его́же со дерзнове́нием моли́/ о душа́х на́ших.
Весь возложи́л еси́ твой живо́т Го́споду/ и те́пле отлучи́лся еси́/ к по́стному тече́нию, преподо́бне,/ моли́тву несумне́нну, бде́ние всено́щное,/ пе́ние непреста́нное/ и житие́ непоро́чное и А́нгельское показу́я./ Отсю́ду де́йствием чуде́с обогати́лся еси́:/ весть бо сла́вити Госпо́дь рабы́ Своя́,/ Его́же со дерзнове́нием моли́/ о душа́х на́ших.
Весь оде́явся Кре́стным всеору́жием/ и неразруши́мым щито́м ве́ры обложи́вся,/ стра́шен был еси́/ супроти́вным де́монским ополче́нием,/ и́хже и отгна́л еси́,/ ра́ною ве́ры пома́зався/ и Боже́ственными призыва́нии,/ и в путь ше́ствующия спасл еси́ вре́да о́нех,/ Домети́е, уго́дниче Христо́в./ Его́же со дерзнове́нием моли́/ о душа́х на́ших.
Сла́ва, и ны́не, глас 6:
Прообразу́я воскресе́ние Твое́, Христе́ Бо́же,/ тогда́ поя́т три Твоя́ ученики́,/ Петра́, и Иа́кова, и Иоа́нна,/ на Фаво́р возше́л еси́./ Тебе́ же, Спа́се, преобразу́ющуся,/ Фаво́рская гора́ Све́том покрыва́шеся,/ ученицы́ Твои́, Сло́ве,/ поверго́ша себе́ до́лу на земли́,/ не терпя́ще зре́ти неви́димаго зра́ка,/ А́нгели служа́ху стра́хом и тре́петом,/ Небеса́ убоя́шася,/ земля́ вострепета́,/ ви́дяще на земли́ сла́вы Го́спода.
Вход. Проки́мен, глас 7:
Бог наш на Небеси́ и на земли́,/ вся, ели́ка восхоте́, сотвори́.
Стих: Во исхо́де Изра́илеве от Еги́пта, до́му Иа́ковля из люде́й ва́рвар,/ бысть Иуде́я святы́ня Его́, Изра́иль о́бласть Его́.
Стих: Мо́ре ви́де и побеже́,/ Иорда́н возврати́ся вспять.
Стих: Что ти есть, мо́ре, я́ко побе́гло еси́?/ И тебе́, Иорда́не, я́ко возврати́лся еси́ вспять?
Та́же ектения́.
* * *
А́ще случи́тся пра́здник сей в суббо́ту: В пято́к ве́чера пое́м проки́мен вели́кий: Бог наш на Небеси́ и на земли́: со стихи́ его́. В субботу же ве́чера в пра́здник пое́м проки́мен: Госпо́дь воцари́ся: А́ще случи́тся пра́здник сей в Неде́лю: Поем в суббо́ту ве́чера проки́мен: Госпо́дь воцари́ся: со стихи́ его́. В Неде́лю же ве́чера пое́м проки́мен вели́кий: Бог наш на Небеси́ и на земли́: со стихи́ его́.
На стихо́вне стихи́ры, глас 6.
Подо́бен: Тридне́вен:
Вообра́жся за милосе́рдие, Христе́,/ во Ада́ма, пе́рваго челове́ка, от Де́вы,/ яви́лся еси́ вторы́й Адам,/ на горе́ же, Спа́се мой, Фаво́рстей преобрази́лся еси́,/ обнажа́я Божество́ Твое́.
Стих: Твоя́ суть небеса́,/ и Твоя́ есть земля́.
Удиви́шася, зря́ще, Твоея́ благода́ти лу́чшии зако́на,/ преображе́ния, Христе́, на горе́ святе́й,/ с ни́миже покланя́емся Тебе́/ со Отце́м и Боже́ственным Ду́хом.
Стих: Фаво́р и Ермо́н/ о И́мени Твое́м возра́дуетася.
Просвеща́ется тварь я́сно/ Твои́м преображе́нием, Христе́,/ е́же Боже́ственным апо́столом на Фаво́ре,/ Моисе́ю же и Илии́, показа́л еси́, Бог Сый,/ неизрече́нно проси́яв па́че со́лнца.
Сла́ва, и ны́не, глас 5:
Прииди́те, взы́дем на го́ру Госпо́дню/ и в дом Бо́га на́шего/ и у́зрим сла́ву преображе́ния Его́/ сла́ву я́ко Единоро́днаго от Отца́,/ све́том прии́мем Свет/ и, возвы́шени бы́вше ду́хом,/ Тро́ицу Единосу́щную воспои́м во ве́ки.
Тропа́рь, глас 4:
По́стнически предподвиза́вся на горе́,/ у́мная враго́в ополче́ния/ всеору́жием Креста́ погуби́л еси́, всеблаже́нне./ Па́ки же ко страда́льчеству му́жески обле́клся еси́,/ уби́в Копрони́ма мече́м ве́ры,/ и обои́х ра́ди венча́лся еси́ от Бо́га,/ преподобному́чениче Домети́е приснопа́мятне.
Сла́ва, и ны́не, пра́здника, глас 7:
Преобрази́лся еси́ на горе́, Христе́ Бо́же,/ показа́вый ученико́м Твои́м сла́ву Твою́,/ я́коже можа́ху,/ да возсия́ет и нам, гре́шным,/ Свет Твой присносу́щный/ моли́твами Богоро́дицы,/ Светода́вче, сла́ва Тебе́.
На повече́рии конда́к пра́здника и до отда́ния.
НА У́ТРЕНИ
По 1-й стихоло́гии седа́лен, глас 4.
Подо́бен: Яви́лся еси́ днесь:
Пра́здник пресве́тел Влады́чень прии́де:/ прииди́те вси, на го́ру, у́мно предочи́стившеся, взы́дем Фаво́рскую,/ Христа́ ви́дети.
Сла́ва, и ны́не, то́йже.
По 2-й стихоло́гии седа́лен, глас 4.
Подо́бен: Удиви́ся Ио́сиф:
На горе́ Фаво́рстей преобрази́лся еси́, Бо́же,/ посреди́ Илии́ и Моисе́я прему́дрых, со Иа́ковом, и Си́моном, и Иоа́нном./ Петр же, сый ту, сия́ Тебе́ глаго́лаше:/ добро́ есть зде сотвори́ти три се́ни,/ еди́ну Моисе́ю, и еди́ну Илии́, и еди́ну Тебе́, Влады́це Христу́./ И́же тогда́ сим Свет Твой возсия́вый, просвети́ ду́ши на́ша.
Сла́ва, и ны́не, то́йже.
Кано́н пра́здника со ирмосо́м на 8. Кир Космы, глас 4.
Песнь 1
Ирмо́с: Ли́цы изра́ильтестии,/ невла́жными стопа́ми/ понт Чермны́й и вла́жную глубину́ прогна́вше,/ вса́дники триста́ты враги́ ви́дяще в ней погруже́ны,/ с весе́лием поя́ху:/ пои́м Бо́гу на́шему, я́ко просла́вися.
Глаго́лы живо́тныя друго́м Христо́с/ и о Боже́ственнем наказу́я Ца́рствии, рече́:/ во Мне Отца́ позна́йте;/ Све́том я́ко облиста́я непристу́пным, в ра́дости пою́ще:/ пои́м Бо́гу на́шему, я́ко просла́вися.
Си́лою язы́к облече́теся, дру́зи ученицы́,/ чу́дни же бу́дете в бога́тстве их, я́ко сла́вы напо́лнитеся,/ я́ко явлю́ся светле́е со́лнца, облиста́я в ра́дости пою́щих:/ пои́м Бо́гу на́шему, я́ко просла́вися.
Днесь Христо́с, на горе́ Фаво́рстей проси́яв я́сно Боже́ственною заре́ю,/ я́коже обеща́ся, ученико́м обнажи́ зрак,/ светоно́сный же напо́лнившеся Боже́ственныя зари́, в ра́дости поя́ху:/ пои́м Бо́гу на́шему, я́ко просла́вися.
Кано́н свята́го, на 4. Творе́ние Феофа́ново, глас 6.
Песнь 1
Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь пои́м, вопия́ше.
К Бо́гу отше́д, му́ченическою сия́я благода́тию,/ пою́щим тя ве́рно светоно́сную вдохни́ зарю́, моля́ Христа́, Богоблаже́нне.
Расто́рг мре́жи пре́лести, и́стинно Христу́ прите́кл еси́,/ мы́слию чи́стою пе́рсская служе́ния оста́вль/ и волше́бнаго избе́г безбо́жия.
Хи́тре усмотри́л еси́, я́ко не бог, я́ко созда́нное со́лнце,/ но ни еди́наго от ви́димых над неви́димаго Бо́га, наста́влен был еси́,/ по́мыслом му́дрым объе́мся.
Богоро́дичен: Тя, Всесвята́я Де́во, Сы́на Бо́жия ро́ждшую,/ бы́вшаго по нам ра́ди нас,/ пропове́дуем Чи́стую Богома́терь, ве́рнии, и ублажа́ем.
Песнь 3
Ирмо́с: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́.
Во всего́ Ада́ма обле́кся, Христе́,/ очерне́вшее, измени́в, просвети́л еси́ дре́вле естество́/ и измене́нием зра́ка Твоего́ богосоде́лал еси́.
Столпо́м огнезра́чным и о́блаком дре́вле/ И́же в пусты́ни Изра́иля веды́й,/ днесь на горе́ Фаво́рстей неизрече́нно во све́те Христо́с проси́я.
Ин
Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.
Изве́стною ве́рою утве́рждься, я́коже непрекло́нен столп, непрело́жен яви́лся еси́,/ ни словесы́ волше́бными, ни ра́зумом пе́рсскаго бая́ния прельще́н.
Я́да душегу́бнаго бежа́л еси́, е́же тва́ри служи́ти и со́лнце почита́ти,/ су́щаго же вои́стинну Бо́га, я́ко всех Зижди́теля,/ благоче́стия любо́вию взыска́л еси́.
Вода́м Боже́ственным прича́щся па́ки бытия́, ду́шу озари́л еси́/ и был еси́ вои́стинну сын благода́ти Бо́жия,/ насле́дник Боже́ственных наслажде́ний.
Богоро́дичен: Прему́дрость храм себе́ созда́ Боже́ствен па́че ума́ же и сло́ва,/ все́льшися в чи́стую утро́бу Твою́,/ ю́же че́стне очи́щши Ду́хом, Всенепоро́чная.
Конда́к, глас 6:
Я́ко преоби́дев тле́нная и до́лу влеку́щая мудрова́ния,/ преподобному́чениче Домети́е,/ вели́к наста́вник мона́хом показа́лся еси́,/ не устраши́вся я́рости царя́, не хотя́ща чти́ти Христа́, и́стиннаго Бо́га./ Сего́ ра́ди и сконча́лся еси́, воспева́я песнь:/ Бог есть со мно́ю, и никто́же на мя.
Седа́лен, глас 8.
Подо́бен: Прему́дрости:
Пе́рсское служе́ние оста́вль, ко Влады́це прише́л еси́,/ ба́нею Креще́ния, сла́вне, просве́щся мы́слию, и, мона́шествовав преподо́бно,/ посто́м умертви́л еси́ плотски́я стра́сти, Богому́дре Домети́е./ Те́мже пострада́в и пре́лесть победи́в, сугуб вене́ц побе́ды восприя́л еси́./ Сего́ ра́ди вопие́м тебе́:/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.
Сла́ва, и ны́не, глас то́йже.
Подо́бен: Повеле́нное:
Сокрове́нную мо́лнию под пло́тию существа́ Твоего́, Христе́,/ и Боже́ственнаго благоле́пия на святе́й показа́л еси́ горе́, Благоде́телю,/ проси́яв су́щим с Тобо́ю ученико́м/ и, разуме́вше нестерпи́му су́щу сла́ву Твою́,– Свят еси́,– возопи́ша,/ я́ко неприступе́н Сый, ви́ден был еси́ пло́тию ми́рови,/ Еди́не Человеколю́бче.
Песнь 4
Ирмо́с: Услы́шах сла́вное смотре́ние Твое́, Христе́ Бо́же,/ я́ко роди́лся еси́ от Де́вы,/ да от ле́сти изба́виши зову́щия:/ сла́ва си́ле Твое́й, Го́споди.
Зако́н в Сина́и писа́нием вообража́я, Христе́ Бо́же,/ во о́блаце, и огни́, и мра́це, и в ви́хре яви́лся еси́ носи́м:/ сла́ва си́ле Твое́й, Го́споди.
Да уве́риши сла́вное строе́ние Твое́, Христе́ Бо́же,/ я́ко Сый пре́жде век и То́йже на о́блаце восхожде́ние положи́вый,/ на Фаво́ре неизрече́нно проси́ял еси́.
Соглаго́люще, предстоя́ху раболе́пно Тебе́, Влады́це Христу́,/ к ни́мже па́рою огня́ и мра́ка и то́нким хла́дом бесе́довал еси́:/ сла́ва си́ле Твое́й, Го́споди.
Возвеща́ху сла́вное Креста́ ра́ди Твоего́, на Фаво́р прише́дше,/ и́же во огни́ Тя и купине́ дре́вле предви́девый Моисе́й/ и взя́тый на колесни́це о́гненней Илия́, Христе́.
Ин
Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.
Позна́л еси́, сла́вне, естество́м Неве́домаго,/ слове́сно взы́скал еси́ и, обре́т Сего́, возжела́в,/ поклони́лся еси́, ра́дуяся, Того́ вели́чествию.
Ли́ку целому́дрому те́пле прите́кл еси́ мона́шествующих святы́х/ и, доброде́телей ре́вностию распала́емь,/ пожи́л еси́ чи́сте в посте́х и моли́твах.
Удо́бь разреши́ соу́зы естества́ богому́дренное твое́ жела́ние, о́тче,/ и страсте́й угаси́ пещь росода́тельным просвеще́нием Свята́го Ду́ха.
Богоро́дичен: Кре́пость моя́ есть Бог и Госпо́дь, Богоро́дице Де́во,/ вопло́щшееся Сло́во Пребоже́ственное из нетле́ннаго Твоего́ чре́ва/ и живо́т нам дарова́вшее.
Песнь 5
Ирмо́с: От све́та пресеки́й перворо́дный свет,/ я́ко во све́те дела́ поют Тя, Христе́, Соде́теля,/ во све́те Твое́м пути́ на́ша напра́ви.
Пред лице́м Твои́м го́ры уклони́шася,/ свет бо и пред нога́ми неботе́чныя лучи́, Христе́, со́лнца прии́де,/ зрак зе́млен я́ко прия́ти благоволи́л еси́.
Се Спас,–/ вопия́ху Моисе́й и Илия́ ученико́м,/ на горе́ святе́й Фаво́рстей оглаша́емым,–/ Христо́с, Его́же дре́вле провозвести́хом Су́щаго Бо́га.
Неизме́нное естество́, челове́ческому приме́шся,/ оби́льно невеще́ственнаго Божества́ Свет/ изобнажи́в апо́столом, неизрече́нно возсия́.
Тя, присносу́щное сия́ние, во Оте́честей сла́ве/ ученицы́ я́ко ви́девше возсия́вша, Христе́, Тебе́ вопия́ху:/ во све́те Твое́м пути́ на́ша напра́ви.
Ин
Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.
Ра́зумом Боже́ственным сия́я, блаже́нне,/ ви́димым всем предразсуди́л еси́ неви́димых присносу́ществие,/ сия́нием чи́стоты просвеща́емь.
Боже́ственныя вкуси́в доброде́тели, безмо́лвия и отше́льствия,/ утверди́л еси́ мысль нему́тну,/ устрое́ние храня́, о́тче Домети́е.
Я́ко вои́стинну ве́лие и чу́дно,/ е́же к лу́чшему преложе́ние твое́ и всему́дрый разум,/ Вы́шняго бо руки́ изме́на и благода́ти Боже́ственныя де́ло бысть.
Богоро́дичен: Де́ва пребыла́ еси́ без вре́да/ и ма́терская показу́еши, Всенепоро́чная Влады́чице:/ де́вству бо рождество́ счета́ла еси́ и носи́ши обои́х сво́йства.
Песнь 6
Ирмо́с: Внегда́ скорбе́ти ми,/ возопи́х ко Го́споду,/ и услы́ша мя Бог спасе́ния моего́.
Сия́ния па́че со́лнца Свет ясне́йший, Спас, проси́яв на Фаво́ре,/ нас просвети́л есть.
Возше́д на го́ру Фаво́рскую, преобрази́лся еси́, Христе́,/ и, лесть всю омрачи́в, нас просвети́л еси́.
Тя Бо́га позна́вше сла́внии апо́столи,/ на Фаво́ре же, Христе́, уди́вльшеся, коле́на преклони́ша.
Ин
Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопи́ю Ти:/ возведи́ от тли живо́т мой,/ Многоми́лостиве.
Тве́рдо наноси́мое врага́ и супоста́та искуше́ние претерпе́л еси́/ и, разли́чно, преблаже́нне, искуше́н быв,/ за́вистию бори́м, победи́тель яви́лся еси́, достосла́вне.
Житие́ твое́ Боже́ственное, жизнь богови́дна и светоно́сна бысть:/ ми́ра бо кра́сная оста́вль,/ Боже́ственное благоле́пие уплоди́л еси́, Богому́дре, и красоту́.
Зна́мения и чудеса́ сподо́бился еси́ соверша́ти па́че естества́, сла́вне,/ си́лою Боже́ственною воору́жся,/ и́мый свы́ше споспешеству́ющую тебе́ благода́ть, достосла́вне.
Богоро́дичен: Све́та жили́ще, и черто́г боголе́пен па́че ума́ воплоще́ния всех, Де́во, Соде́теля:/ Ты бо еди́на яви́лася еси́ достоблаже́нное Тому́ поко́ище.
Конда́к пра́здника, глас 7, самогла́сен:
На горе́ преобрази́лся еси́,/ и я́коже вмеща́ху ученицы́ Твои́,/ сла́ву Твою́, Христе́ Бо́же, ви́деша,/ да егда́ Тя у́зрят распина́ема,/ страда́ние у́бо уразуме́ют во́льное,/ ми́рови же пропове́дят,/ я́ко Ты еси́ вои́стинну О́тчее сия́ние.
И́кос:
Воста́ните, лени́вии, и́же всегда́ ни́зу пони́кшии в зе́млю души́ моея́ по́мыслы,/ возми́теся и возвы́ситеся на высоту́ Боже́ственнаго восхожде́ния./ Притеце́м к Петру́ и к Зеведе́евым/ и вку́пе со о́неми Фаво́рскую го́ру дости́гнем,/ да ви́дим с ни́ми сла́ву Бо́га на́шего, глас же услы́шим,/ его́же свы́ше слы́шаша и пропове́даша О́тчее сия́ние.
Песнь 7
Ирмо́с: Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:/ оте́ц на́ших Бо́же, благослове́н еси́.
Облиста́вшеся Све́том непристу́пныя сла́вы на Фаво́рстей горе́,/ апо́столи Христу́ вопия́ху:/ оте́ц на́ших Бо́же, благослове́н еси́.
Сия́нием Боже́ственнаго шу́ма, и росода́тельным о́блаком, Христе́,/ и заре́ю Твое́ю наслажда́еми, апо́столи поя́ху:/ оте́ц на́ших Бо́же, благослове́н еси́.
В непристу́пном Све́те, я́ко ви́де Тя Петр,/ на Фаво́рстей горе́ облиста́вша, Христе́, возопи́:/ оте́ц на́ших Бо́же, благослове́н еси́.
С Нача́льником жи́зни Христо́м су́ще, де́ти Зеведе́евы,/ я́ко испусти́ зра́ка Свет, возгреме́ша:/ оте́ц на́ших Бо́же, благослове́н еси́.
Ин
Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее./ Веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.
На тебе́, о́тче, пресве́тлая Ду́ха благода́ть почи́/ и де́йствия пресла́вна показа́ тебе́, вопию́щему и пою́щему ве́рно:/ благослове́н еси́, Бо́же оте́ц на́ших.
Тве́рдым умо́м проше́л еси́ стезю́ поще́ния/ и при кончи́не подвиго́в му́ченик и́стинен был еси́, зовы́й Христу́:/ благослове́н еси́, Бо́же оте́ц на́ших.
Я́ко ро́ждшеся моли́твами твои́ми, де́ти тебе́, отцу́, сподвиза́шася/ и, в пеще́ре терпя́ще, страда́ша с тобо́ю, согла́сно зову́ще Христу́:/ благослове́н еси́, Бо́же оте́ц на́ших.
Богоро́дичен: Спасе́ния приста́нище Тя стяжа́вше, от бу́ри спаса́емся/ и, наде́жду, ю́же к Тебе́, я́ко основа́ние душ держа́ще, зове́м Христу́:/ благослове́н еси́, Бо́же оте́ц на́ших.
Песнь 8
Ирмо́с: В Вавило́не о́троцы,/ Боже́ственною распала́еми ре́вностию,/ мучи́теля и пла́мене преще́ние му́жески попра́ша/ и, посреде́ огня́ вве́ржени, ороша́еми, поя́ху:/ благослови́те, вся дела́ Госпо́дня, Го́спода.
Манове́нием вся нося́й, нога́ми пречи́стыми на го́ру взы́де Фаво́рскую Христо́с,/ на не́йже па́че со́лнечныя лучи́ облиста́ лице́м,/ и́же зако́ну старе́йшия и благода́ти показа́ пою́щия:/ благослови́те, вся дела́ Госпо́дня, Го́спода.
Непристу́пною сла́вою на горе́ я́влься неизрече́нно Фаво́рстей,/ неодержи́мый и незаходи́мый Свет, О́тчее сия́ние,/ тварь уясни́в, челове́ки обожи́, пою́щия:/ благослови́те, вся дела́ Госпо́дня, Го́спода.
Священноле́пно стоя́ще Моисе́й же и Илия́ на горе́ Фаво́ре,/ Боже́ственныя начерта́ние я́сно ипоста́си ви́девше,/ Христа́, во Оте́честей облиста́вша сла́ве, воспева́ху:/ благослови́те, вся дела́ Госпо́дня, Го́спода.
И́же во зра́це Боже́ственнаго ра́ди явле́ния лице́ просла́вися иногда́ Моисе́ово,/ Христо́с же, я́ко ри́зою, Све́том и сла́вою одева́ется,/ Све́та бо самоде́телен Сый, озаря́ет пою́щия:/ благослови́те, вся дела́ Госпо́дня, Го́спода.
От светоро́дна о́блака Христа́ ученицы́ объя́та зря́ще на Фаво́ре/ и ни́цы на зе́млю па́дше, ум просве́щше,/ со Отце́м Сего́ поя́ху и Ду́хом:/ благослови́те, вся дела́ Госпо́дня, Го́спода.
Ин
Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти,/ Тя превозно́сим во вся ве́ки.
Снеда́емь любо́вию, о́тче, Зижди́теля,/ зда́ний отри́нул еси́ вся́кое пристра́стие, Ду́хом Бо́жиим я́ве направля́емь,/ Его́же превозно́сим во вся ве́ки.
Земна́я попече́ния оттря́с, Небе́сными наде́ждами, о́тче, обогати́лся еси́/ и е́же о Христе́ блаже́нством,/ Его́же ны́не наслажда́ешися во вся ве́ки.
Светолу́чныя зари́, о́тче, прие́м, Свята́го и Боже́ственнаго, прему́дре, Ду́ха,/ очи́ма я́ве Сего́, блаже́нне, ви́дел еси́,/ Боже́ственных та́ин стра́шно науча́юща тя.
Богоро́дичен: Боговеща́нная цевни́ца Твоего́ пра́отца/ ковче́г Тя свят прообрази́, нося́щ Бо́га, в плоть обле́кшася,/ Его́же превозно́сим во вся ве́ки.
Песнь 9
Ирмо́с: Рождество́ Твое́ нетле́нно яви́ся:/ Бог из боку́ Твое́ю про́йде,/ я́ко Плотоно́сец яви́ся на земли́/ и с челове́ки поживе́./ Тя, Богоро́дице, тем вси велича́ем.
Ужа́сни но́вым светоли́тием внеза́пу ученицы́ осве́щшеся, друг дру́га зря́ху,/ уди́вльшеся же и к земли́ прекло́ньшеся,/ Тебе́, Влады́це всех, поклони́шася.
Шум из о́блака посыла́шеся богогла́сен, известву́я чу́до:/ Оте́ц бо Све́тов,– Сей есть Сын Мой возлю́бленный,– апо́столом вопия́ше:/ Того́ послу́шайте.
Но́вая ви́девше и пресла́вная, глас Оте́ческий внуши́вше,/ на Фаво́ре Словесе́ слуги́, изображе́ние Первоо́бразнаго,/ Сей есть,– вопия́ху,– Спас наш.
О́бразе непреме́нный Су́щаго, недви́жиме, печа́ть неизме́нна,/ Сы́не, Сло́ве, му́дросте и мы́шце, десни́це Вы́шняго, Си́ло,/ Тя воспева́ем со Отце́м же и Ду́хом.
Ин
Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти,/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.
Све́том невеще́ственным озаря́емь, светови́ден досто́йно, Богоно́се, был еси́,/ житие́ непоро́чно стяжа́в, о́тче, и всесвя́то,/ ны́не же предстои́ши моли́твенник Влады́це и Бо́гу о ста́де твое́м.
Твои́ по́двизи воздержа́ния му́ченическими по́двиги по достоя́нию венча́шася,/ и сугу́бо страда́ние показа́л еси́ благому́жеством, и́хже прия́л еси́,/ и ве́чных благ обре́л еси́ наслажде́ние.
Укре́плься си́лою Боже́ственною и благода́тию,/ я́влься всем благоче́стия учи́тель, показа́лся еси́, чудесы́ украша́емь,/ вся утвержда́я, вся исцеля́я, приходя́щия к тебе́ ве́рно, Богоблаже́нне.
Богоро́дичен: В Тебе́ соде́яся вы́ше челове́ка, па́че естества́, Де́во Богоро́дице, та́инство:/ Бо́жия бо была еси́ Роди́тельница,/ нося́щи на объя́тиих и пита́ющи Небе́сными во́инствы песносло́вимаго.
Свети́лен:
Све́те неизме́нный, Сло́ве, Све́та Отца́ нерожде́нна, во явле́ннем све́те Твое́м,/ днесь на Фаво́ре Свет ви́дехом Отца́, Свет и Ду́ха,/ Све́том наставля́ющаго всю тварь.
Сла́ва, и ны́не, то́йже.
На стихо́вне стихи́ры, глас 6.
Подо́бен: А́нгельския:
Возсия́в па́че ума́/ от Де́вы Пресвяты́я, Сло́ве Бо́жий,/ во Ада́ма весь обле́кся,/ И́же пре́жде омрачи́вшееся естество́ все просвети́л еси́,/ Боже́ственным зра́ка Твоего́ измене́нием,/ преобра́жся на горе́ Фаво́рстей, Влады́ко,/ пре́жде Честна́го Твоего́ Креста́, Христе́ Бо́же наш.
Стих: Твоя́ суть небеса́,/ и Твоя́ есть земля́.
Светоро́дным осия́ема о́блаком ви́дяще Христа́/ на Фаво́ре Боже́ственнии ученицы́,/ ни́цы со стра́хом на зе́млю прекло́ньшеся,/ ум же и се́рдце просве́щше,/ с Моисе́ом и Илие́ю зря́ще я́сно,/ воспева́ху Сего́, я́ко Бо́га,/ со Отце́м и Ду́хом.
Стих: Фаво́р и Ермо́н/ о И́мени Твое́м возра́дуетася.
Гора́, я́же иногда́ бя́ше мра́чна и ды́мна,/ се ны́не честна́ и свята́ есть./ И́же пе́рвее у́бо Изра́иля наста́вивый,/ я́коже пи́шет, столпо́м огнезра́чным и о́блаком,/ днесь просия́ неизрече́нно/ па́че со́лнца Христо́с на сей,/ я́ко Бог просвети́в вся́ческая.
Сла́ва, и ны́не, глас 5:
Зако́на и проро́ков/ Тя, Христе́, Творца́ и Испо́лнителя свиде́тельствоваша,/ зря́ще во о́блаце,/ Моисе́й Богови́дец и Илия́ огнеколесни́чник/ и неопа́льный небоше́ственник/ в преображе́нии Твое́м./ С ни́миже и нас Твоего́ просвеще́ния сподо́би, Влады́ко,/ пе́ти Тя во ве́ки.
На Литурги́и: Блаже́нны пра́здника, песнь 1-я, обои́х кано́нов со ирмосо́м на 6. Проки́мен пра́здника, и свята́го, глас 7: Честна́ пред Го́сподем/ смерть преподо́бных Его́. Стих: Что воздам Го́сподеви о всех, я́же воздаде́ ми? Апо́стол ко Ефесе́ем, зача́ло 233. Аллилу́ия, глас 4: Пра́ведник, я́ко фи́никс, процвете́т: Ева́нгелие от Иоа́нна, зача́ло 52. Прича́стен пра́здника и свята́го: В па́мять ве́чную:
* * *
А́ще ли случи́тся попра́зднство Преображе́ния Христо́ва в суббо́ту:
Тогда в пяток на Го́споди, воззва́х: Сла́ва, пра́здника. И ны́не, Богоро́дичен пе́рвый настоя́щего гласа.
* * *
А́ще ли случи́тся попра́зднство Преображе́ния Христо́ва в неде́лю:
В суббо́ту на ма́лой вече́рни стихи́ры воскре́сны и Богоро́дицы, по обы́чаю.
На вели́цей вече́рни, по обы́чной кафи́зме на Го́споди, воззва́х: стихи́ры воскре́сны 3, и Анато́лиев еди́н и пра́здника 3, того́ дне, и свята́го Мине́и 3. А́ще ли пое́тся святы́й на 6, или́ ему́же и полиеле́й, пое́м стихи́ры воскре́сны три, и пра́здника 3, и свята́го 4. Сла́ва, свята́го. А́ще же ни, Сла́ва, пра́здника. И ны́не, Богоро́дичен пе́рвый, гласа.
На лити́и стихи́ры пра́здника того́ дне рядовы́я стихо́вныя. Сла́ва, и ны́не, пра́здника, пи́сан на у́трени на стихо́вне. А́ще ли и́мать святы́й сла́вник, Сла́ва, свята́го. И ны́не, пра́здника.
На стихо́вне стихи́ры воскре́сны. Сла́ва, свята́го, а́ще есть. И ны́не, пра́здника. А́ще ли ни, Сла́ва, и ны́не, пра́здника. На благослове́нии хле́бов тропа́рь Богоро́дице Де́во: два́жды, и пра́здника, еди́ножды.
На у́трени, на Бог Госпо́дь: тропа́рь воскре́сный, два́жды. Сла́ва, свята́го, а́ще есть. И ны́не, пра́здника. А́ще ли ни, Сла́ва, и ны́не, пра́здника. По кафи́змах седа́льны воскре́сны с Богоро́дичны их, и чте́ние во Ева́нгелии толково́м, и непоро́чны с тропари́. Ипакои́ гла́са. Степе́нна, и проки́мен гласа. И Вся́кое дыхание: Ева́нгелие воскре́сно, и стихи́ра воскре́сна. Кано́н воскре́сный со ирмосо́м на 4, и Богоро́дицы на 2, и пра́здника на 4, и свята́го на 4. Катава́сия: Ли́цы изра́ильтестии: А́ще полиеле́й или́ славосло́вие, пое́м кано́н воскре́сный со ирмосо́м на 4, и пра́здника на 4, и свята́го на 6. По 3-й песни конда́к пра́здника, и свята́го, а́ще и́мать, и и́кос, и седа́лен свята́го. Сла́ва, и ны́не, пра́здника и чте́ние. По 6-й песни конда́к воскре́сный, и и́кос, и проло́г. На 9-й песни пое́м Честне́йшую: Свети́лен воскре́сный. Сла́ва, свята́го, а́ще и́мать. А́ще ли ни, Сла́ва, и ны́не, пра́здника.
На хвали́тех стихи́ры воскре́сны 4 и свята́го, а́ще и́мать, подо́бны 3 и самогла́сен, и́же на Сла́ву, пое́м с припе́вы его́. А́ще ли не и́мать святы́й хвали́тны, пое́м воскре́сны 4 и пра́здника на 4, того́ дне, стихо́вныя у́трени с припе́вы пра́здника. Сла́ва, стихи́ра ева́нгельская. И ны́не, Преблагослове́нна еси́: Славосло́вие вели́кое. По трисвято́м тропа́рь воскре́сный то́чию, ектении́, и отпу́ст, и оглаше́ние, и обы́чное исхожде́ние в притво́р. Та́же час пе́рвый.
На 1-м часе́ тропа́рь воскресный. Сла́ва пра́здника. И ны́не, Богоро́дичен часо́в. По О́тче наш: конда́к пра́здника. Та́кожде и в про́чия часы́ глаго́лем конда́к пра́здника и воскре́сный, пременя́юще, а́ще полиеле́й, и свята́го.
На Литурги́и: Блаже́нны гла́са на 6, и пра́здника песнь рядова́я на 4. А́ще ли и́мать святы́й песнь: и Блаже́нны воскре́сны на 4, и пра́здника песнь рядова́я на 4, и свята́го песнь 6-я на 4. По вхо́де тропа́рь воскре́сный и пра́здника, та́же хра́ма и свята́го, а́ще и́мать. Сла́ва, конда́к свята́го. И ны́не, пра́здника. А́ще ли не и́мать святы́й тропаря́ и конда́ка, Сла́ва, воскре́сный. И ны́не, пра́здника. Проки́мен воскре́сный гла́са и пра́здника. Апо́стол и Ева́нгелие дне. Прича́стен: Хвали́те Го́спода с Небе́с: и пра́здника. А́ще и́мать святы́й Апо́стол и Ева́нгелие, тогда́ пое́м проки́мен воскре́сный гла́са, и свята́го. Апо́стол и Ева́нгелие дне, и свята́го. Прича́стен: Хвали́те Го́спода с Небе́с: и свята́го.
