Служба в честь святаго праведнаго Стефана Высокаго, деспота Сербскаго

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 1:

Прииди́те, лю́дие, воспои́м Стефа́на Высо́каго,/ де́спота Се́рбскаго,/ я́ко до́бля во́ина и до́браго строи́теля,/ пра́во пра́вяща на престо́ле оте́чества своего́,/ лю́ди своя́ защища́юща,/ и принесе́м ему́ сугу́быя похвалы́,/ благодаря́ще Го́спода,/ дарова́вшаго нам сицевы́я ми́лости Своя́.

От благочести́ваго ко́рене произше́д,/ прине́сл еси́ тебе́ сама́го,/ я́ко плод ревнова́ния и любве́,/ святы́й пра́ведный де́споте Стефа́не,/ си́цево лю́ди твоя́ возлюби́л еси́,/ те́мже и на Небеси́ ны́не торжеству́еши,/ моля́ся ко Го́споду о всех нас.

Пресве́тло укра́шен Правосла́вною ве́рою,/ преблаже́нне де́споте Стефа́не,/ я́ко благочести́в скипетроно́сец,/ показа́лся еси́ преизря́ден побо́рник Пресвяты́я Тро́ицы,/ от Нея́же просвети́вся,/ оте́чество твое́ от пога́ных ага́рян соблю́л еси́,/ и ны́не моли́ся о спасе́нии душ на́ших.

Приступи́те с любо́вию, вси благочести́вии лю́дие,/ благогла́сными пе́сньми воспои́м Стефа́на блаже́ннаго, де́спота Се́рбскаго,/ и́же во́зрастом бе высо́кий,/ вои́стинну же высо́кий и ду́хом,/ и́бо, с высоты́ восприя́в оправда́ние,/ высо́кое просвеще́ние наро́ду се́рбскому дарова́,/ устро́ив высо́кое учи́лище Ре́савское,/ во е́же всех нас возвести́ на высоту́ Небе́сную.

Сла́ва, глас 6:

Весели́ся, страно́ Ре́савская/ и вся земле́ Се́рбская,/ воскли́кни, оби́тель Манаси́е,/ Ре́саво реко́, подви́гни струи́ своя́:/ се бо влады́ка твой, де́спот Се́рбский Стефа́н Высо́кий,/ торжеству́ет на Небеси́,/ и́бо, прише́д, Госпо́дь глаго́ла ему́:/ благи́й ра́бе, до́брый и ве́рный,/ вни́ди в ра́дость Го́спода твоего́.

И ны́не, Богоро́дичен, глас то́йже:

Пресвята́я Влады́чице Богоро́дице,/ се ны́не припа́даем Ти и мо́лим Тя:/ покажи́, Чи́стая, на ны, рабы́ Твоя́,/ ма́тернюю Твою́ ми́лость/ и ско́рый Твой покро́в и по́мощь,/ ве́мы бо, Де́во Пречи́стая,/ я́ко мо́жеши, ели́ка хо́щеши.

На стихо́вне стихи́ры, глас 2:

Яви́лся еси́ любому́др наро́ду се́рбскому,/ повину́яся ева́нгельским повеле́нием,/ ревнова́л еси́ о спасе́нии люде́й свои́х.

Стих: Вознесо́х избра́ннаго/ от люде́й Мои́х.

Сто́лпе ве́ры, защи́тниче порабоще́нных,/ святы́й пра́ведный де́споте Стефа́не,/ не преста́й моля́ся о спасе́нии наро́да се́рбскаго.

Стих: Сего́ ра́ди пома́за Тя, Бо́же, Бог Твой/ еле́ем ра́дости па́че прича́стник Твои́х.

Во вре́мя лю́таго порабоще́ния земли́ Се́рбския/ яви́лся еси́ наро́ду се́рбскому/ крепча́йший предста́тель.

Сла́ва, глас 6, самогла́сен:

Кто мо́жет изрещи́ вся боле́зни и труды́ твоя́,/ блаже́нне Стефа́не,/ я́же подъя́л еси́ спасе́ния ра́ди наро́да се́рбскаго,/ во е́же сохрани́ти его́/ и изба́вити лю́таго и́га ага́рянскаго,/ и́бо безме́рна ре́вность твоя́/ и велича́йшее попече́ние о избавле́нии оте́чества твоего́/ и правосла́внем благоче́стии наро́да се́рбскаго.

И ны́не, Богоро́дичен, глас то́йже:

Богома́ти Влады́чице,/ даждь нам по́мощь Твою́/ и изба́ви нас от бед и скорбе́й/ и всех прегреше́ний на́ших,/ Ты бо родила́ еси́ Изба́вителя всех.

Тропа́рь пи́сан на вели́цей вече́рни.

Сла́ва, и ны́не, Богоро́дичен.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры, глас 2:

Стефа́не, во́ине прекра́сный,/ Ца́рствия Небе́снаго насле́дниче,/ по́слан был еси́ земли́ на́шей,/ я́ко Соломо́н ро́ду изра́ильскому,/ му́дростию Бо́жиею укра́шен,/ держа́ву свою́ проходи́л еси́/ и лю́ди своя́ учи́л еси́,/ да, Христу́ моля́щеся, уве́дят и́стину Е́го/ и, сла́вяще человеколю́бие Его́, вседу́шно пою́т:/ сла́ва держа́ве Твое́й, Го́споди.

Весели́ся днесь, сла́вная Ла́вро Манаси́е,/ се бо ве́рнии ро́да се́рбскаго/ собира́ются под святы́я ку́полы твоя́/ просла́вити и́мя свята́го кти́тора твоего́,/ и́же со святы́ми А́нгелы и Богоуго́дники/ предстои́т Престо́лу Бо́жию/ и с ни́ми мо́лится о оте́честве свое́м./ Мы же, почита́юще па́мять его́, Го́сподеви вопие́м:/ моли́твами му́драго Стефа́на, Го́споди,/ поми́луй и сохрани́ нас.

Ки́ими похвала́ми воспое́м, Стефа́не, труды́ твоя́,/ и́миже, утвержда́я свято́е Правосла́вие,/ в земли́ свое́й хра́мы стро́ил еси́,/ лю́дем же свои́м веле́л еси́/ о зако́не Бо́жии прилежа́ти/ и, всех вели́кою любо́вию возлюби́в,/ оте́чество свое́ благода́ти Христо́вей возве́л еси́,/ те́мже и вся земля́ на́ша сла́вит тя днесь/ и, чту́щи па́мять твою́, вопие́т:/ Стефа́не прему́дре,/ побо́рствуй нам моли́твами твои́ми у Го́спода на́шего/ и укрепи́ ны духо́вными си́лами.

Вели́кою ра́достию се́рдце на́ше исполня́ется днесь,/ и се ны́не собра́хомся поклони́тися ра́це свята́го,/ избавля́ющаго моли́твами свои́ми сы́ны ро́да своего́/ и возводя́щаго их ле́ствицами жи́зни ве́чныя,/ да приведе́т их ку́пно с ним сла́вити вели́чие Бо́жие/ и служи́ти Престо́лу Христо́ву огнезра́чному.

Боже́ственною благода́тию озаря́емь,/ Стефа́не великоимени́те,/ уразуме́л еси́, ки́ими по́двиги одушевля́ти лю́ди своя́,/ любо́вию ве́ры Правосла́вныя сердца́ их возгрева́л еси́/ и, собира́я их под ма́терни криле́ ея́,/ оте́чество твое́ уподо́бил еси́ Ца́рствию Бо́жию,/ сего́ ра́ди мо́лим тя, свя́те:/ моли́твами твои́ми отжени́ от нас о́блаки неве́рия/ и борю́щия ны враги́ сокруши́.

Сла́ва, глас то́йже:

Что тя нарече́м, похвало́ оте́чества се́рбскаго?/ Со́лнце ли, благода́тною теплото́ю оживля́ющее мир христиа́нский,/ звезду́ ли, бога́тою наде́ждею сия́ющую удруче́нному ро́ду христиа́нскому?/ Се ны́не, ве́дяще тя ангелоподо́бна,/ ку́пно с пра́ведники служа́ща Го́сподеви,/ отверза́ем ти сердца́ своя́,/ мирски́ми страда́ньми уязвле́ная,/ и мо́лим тя, великоимени́те:/ хода́тайствуй у Престо́ла Го́спода сил/ о укрепле́нии оте́чества своего́/ и спасе́нии душ на́ших.

И ны́не, Богоро́дичен: Пре́йде сень зако́нная:

Вход. Проки́мен дне и чте́ния три.

При́тчей чте́ние (главы́ 10 и 11):

Уста́ пра́веднаго ка́плют прему́дрость,/ язы́к же непра́веднаго поги́бнет./ Устне́ муже́й пра́ведных ка́плют благода́ти,/ уста́ же нечести́вых развраща́ются./ Ме́рила льсти́вая – ме́рзость пред Го́сподем,/ вес же пра́ведный прия́тен Ему́./ Иде́же а́ще вни́дет досажде́ние, та́мо и безче́стие,/ уста́ же смире́нных поуча́ются прему́дрости./ Соверше́ние пра́вых наста́вит их,/ и поползнове́ние отрица́ющихся упасе́т их./ Не по́льзуют име́ния в день я́рости,/ пра́вда же изба́вит от сме́рти./ У́мер пра́ведный оста́ви раска́яние,/ нару́чна же быва́ет и посмея́тельна нечести́вых па́губа./ Пра́вда непоро́чнаго исправля́ет пути́,/ в нече́стие же па́дает непра́вда./ Пра́вда муже́й пра́вых изба́вит их,/ безсове́тием же пленя́ются беззако́ннии./ Сконча́вшуся му́жу пра́ведну, не поги́бнет наде́жда,/ похвала́ же нечести́вых поги́бнет./ Пра́ведник от ло́ва убе́гнет,/ вме́сто же его́ предае́тся нечести́вый./ Во усте́х нечести́вых сеть гра́жданом,/ чу́вство же пра́ведных благоспе́шное./ Во благи́х пра́ведных испра́вится град,/ и в поги́бели нечести́вых ра́дование./ Во благослове́нии пра́вых возвы́сится град,/ усты́ же нечести́вых раскопа́ется./ Руга́ется гра́жданом лише́нный ра́зума,/ муж же му́дрый безмо́лвие во́дит.

Прему́дрости Соломо́новы чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань, разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 3:

Прииди́те, бра́тие,/ восхва́лим, ра́дующеся, де́спота Высо́каго,/ его́же Госпо́дь возлюби́в,/ показа́ мудре́йша челове́к кни́жных,/ и́хже и собра́в в сла́внем гра́де Ре́саве,/ я́коже пчелы́ трудолю́бныя,/ повеле́ им писа́ньми святы́ми свои́ми/ возноси́ти сла́ву Це́ркве Христо́вы/ и напая́ти ду́ши люде́й его́/ уче́нием сло́ва Бо́жия,/ его́же сла́достию освяти́ и ду́ши на́ша.

Лю́дие ро́да се́рбскаго,/ тецы́те ко хра́му Стефа́на Высо́каго/ и принеси́те благода́рственныя моли́твы,/ помина́юще па́мять его́ святу́ю/ и песнь ему́ благогове́йно воспою́ще:/ ра́дуйся, Стефа́не люби́ме, во дво́рех Небе́сных/ и моли́ся о спасе́нии на́шем.

Сла́ва, глас 8:

Днесь де́спот Стефа́н предстои́т Го́споду/ и со А́нгелы возно́сит благода́рныя хвалы́,/ мно́гими бо благодея́ньми уми́лостивися Госпо́дь ча́дом его́ се́рбским./ Прии́дем у́бо и мы/ и, припа́дающе ра́це его́, помо́лимся:/ Го́споди, спаси́ ны/ и во святе́м Правосла́вии утверди́ ны.

И ны́не, Богоро́дичен, глас то́йже:

Исхити́ мя, Влады́чице, руки́ зми́я человекоуби́йцы,/ хотя́ща мя лука́вством поглоти́ти до конца́;/ сокруши́ че́люсти его́, молю́ Тя, и ко́зни разори́,/ я́ко да избы́в от ногте́й его́,/ велича́ю заступле́ние Твое́.

На стихо́вне стихи́ры, глас 2:

Му́дра тя ревни́теля Правосла́вия восхваля́ем днесь/ и, и́щуще моли́тв твои́х пра́ведных ко Спаси́телю на́шему,/ припа́даем ти, Стефа́не,/ вознося́ще в ве́ре всехва́льную па́мять твою́:/ на тебе́ бо почи́ Дух Святы́й,/ Его́же благода́тию не премолчи́ моли́тися/ утверди́ти ду́ши на́ша.

Стих: Вознесо́х избра́ннаго/ от люде́й Мои́х.

Всехва́льне де́споте Высо́кий,/ еще́ в жи́зни на земли́ восте́кл еси́ на высоту́ доброде́тели,/ да Небе́сными венцы́ укра́шен бу́деши/ и со А́нгелы святы́ми водвори́шися во оби́тели пра́ведник,/ иде́же не преста́й с ни́ми моли́тися/ о спасе́нии душ на́ших.

Стих: Сего́ ра́ди пома́за Тя, Бо́же, Бог Твой/ еле́ем ра́дости па́че прича́стник Твои́х.

На скрижа́лех се́рдца твоего́/ име́я напи́санныя за́поведи Бо́жия,/ подража́л еси́ Богому́дрым роди́телем свои́м:/ до́брая де́лал еси́,/ чужд же был еси́ тщесла́вныя горды́ни./ Сего́ ра́ди ны́не мо́лим тя:/ моли́ся вы́ну о спасе́нии всех нас.

Сла́ва, глас 8:

Днесь А́нгели на Небеси́ ра́дуются,/ зря́ще лю́ди Бо́жия,/ вознося́щия па́мять му́жа Богоизбра́ннаго,/ мы же, с ни́ми сла́вяще и́мя Стефа́на равноапо́стольнаго,/ воскли́кнем к нему́ с любо́вию сыно́внею:/ ра́дуйся, Стефа́не Высо́кий,/ со́лнце незаходи́мое земли́ Се́рбския,/ не забу́ди ны, сы́ны твоя́,/ и пра́ведными свои́ми моли́твами проси́ у Вы́шняго,/ да укрепи́т десни́цу на́шу на враги́ оте́чества на́шего/ и пода́ст душа́м на́шим ве́лию Свою́ ми́лость.

И ны́не, Богоро́дичен: Безневе́стная Де́во:

На благослове́нии хле́бов тропа́рь свята́го дважды. И Богоро́дице, Де́во: единожды.

Тропа́рь свята́го, глас 8:

С высоты́ восприя́в увеща́ние,/ оте́честву твоему́ был еси́ предста́тель и просвети́тель,/ святы́й пра́ведный де́споте Стефа́не,/ супоста́ты побежда́яй, и лю́ди своя́ просвеща́яй,/ и мно́гия хра́мы устроя́яй,/ сего́ ра́ди чту́ще тя, мо́лим:/ моли́ Христа́ Бо́га о спасе́нии наро́да се́рбскаго.

НА У́ТРЕНИ

На Бог Госпо́дь: тропа́рь свята́го, дважды. Сла́ва, и ны́не, Богоро́дичен.

По 1-м стихосло́вии седа́лен, глас 1:

О́браз благоче́стия яви́вся, бога́тая дарова́ния духо́вная обре́л еси́ у Христа́,/ И́же и просла́ви тя сла́вою неувяда́емою,/ дру́га тя в раи́ соде́лав А́нгелом Свои́м./ С ни́миже моли́ся о спасе́нии душ на́ших.

Сла́ва, и ны́не, Богоро́дичен:

О Ма́ти Христа́ Бо́га на́шего,/ вонми́ моли́твам нас, недосто́йных,/ се бо, окая́ннии, в беда́х призыва́ем Тя, вопию́ще: ра́дуйся, Благода́тная./ И про́сим Тя:/ моли́ся Сы́ну Твоему́ и Бо́гу на́шему о спасе́нии душ на́ших.

По 2-м стихосло́вии седа́лен, глас 4:

Бога́тством духо́вным жела́я обогати́ти род свой,/ писа́тели Боже́ственных веле́ний я́ко напе́рсныя дру́ги име́л еси́/ и, вку́пе с ни́ми труди́вся,/ кни́жныя ри́зницы своя́ исполня́л еси́, я́ко жи́тницы, Бо́жия благода́ти,/ в ни́хже всегда́ сы́нове ро́да се́рбскаго ду́ши своя́ насыща́юще, сла́вят па́мять твою́.

Сла́ва, и ны́не, Богоро́дичен:

Пресвята́я Влады́чице Богоро́дице,/ испроси́ нам у Сы́на Твоего́ благода́ть неугаса́ющую/ и спасе́ние ве́чное душа́м на́шим.

Велича́ние:

Велича́ем тя,/ святы́й пра́ведный де́споте Стефа́не,/ и чтим святу́ю па́мять твою́,/ ты бо мо́лиши за нас/ Христа́, Бо́га на́шего.

Псало́м избра́нный: Госпо́дь мне Помо́щник и не убою́ся:

По полиеле́и седа́лен, глас 8:

Присту́пим, бра́тие, ра́це Стефа́на Богому́драго/ и воздади́м досто́йную хвалу́ и́мени его́, велегла́сно вопию́ще:/ ра́дуйся, похвало́ ро́да се́рбскаго,/ досто́ин бо яви́лся еси́ венце́в неувяда́емых у Престо́ла Христо́ва,/ Ему́же, припа́дая, моли́ся/ утверди́ти оте́чество на́ше в благоде́нствии и святе́м Правосла́вии.

Сла́ва, и ны́не, Богоро́дичен:

Иму́ще Тя неотсту́пную Хода́таицу у Престо́ла Отца́ Небе́снаго/ о гре́шнем ро́де челове́честем,/ смире́нно припа́даем Ти и мо́лим Тя:/ на стези́ покая́ния наста́ви ны,/ изба́ви ду́ши на́ша от грехо́вныя поги́бели/ и сотвори́ ны досто́йны со А́нгелом взыва́ти Ти:/ ра́дуйся, Неве́сто Неневе́стная.

Степе́нна, 1-й антифо́н 4-го гла́са. Проки́мен, глас 4: Десни́ца Госпо́дня вознесе́ мя,/ десни́ца Госпо́дня сотвори́ си́лу. Стих: Не умру́, но жив бу́ду и пове́м дела́ Госпо́дня. Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

От ю́ности твоея́ избра́л еси́ путь све́та Боже́ственнаго,/ Стефа́не ди́вне,/ и, ше́ствуя им, лю́ди твоя́ ко Христу́ приводи́л еси́./ Го́рькая страда́ния испыта́ се́рдце твое́,/ но си́ла благода́ти Христо́вы крепля́ше дух твой/ и яви́ тя благоде́теля стра́ждущим/ и уте́шителя опеча́ленней ма́тери твое́й;/ бу́ди же и нам всем путеводи́тель всему́ благо́му/ и моли́ся Влады́це Спаси́телю/ дарова́ти душа́м на́шим мир и ве́лию ми́лость.

Кано́н Богоро́дицы со ирмосо́м на 6 и свята́го на 8, глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Восхвали́ти прему́драго отве́рзи ми ум, Го́споди,/ наста́ви мя Ду́хом Твои́м Святы́м,/ да воспою́ па́мять его́ по достоя́нию.

Похвало́ вели́кая кни́жным лю́дем земли́ Се́рбския,/ уте́хо уничиже́нным и ра́досте опеча́ленным,/ помяни́ всех си́рых, стра́ждущих ны́не,/ и моли́ся о них у Престо́ла огнезра́чнаго.

О блаже́нне де́споте Высо́кий,/ на све́щнице оте́чества твоего́ свети́ло вели́кое всему́ был еси́ ро́ду на́шему,/ освеща́я ему́ путь к Ца́рствию Небе́сному.

Богоро́дичен: Ма́ти ми́лостивая Христа́ Бо́га на́шего,/ Его́же кроме́ зако́на естества́ родила́ еси́,/ не преста́й моли́твами Свои́ми проси́ти ми́лости Его́,/ да спасе́т ны от прегреше́ний на́ших.

Песнь 3

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Наде́ждею испо́лнил еси́ сердца́ люде́й твои́х,/ опеча́ленных поги́бельными ра́тьми ага́рянскими,/ и, укрепи́в сердца́ их му́жеством, подо́бно Иису́су Нави́ну,/ возве́л еси́ их к побе́де на враги́.

Сто́лпе ве́ры, вождю́ Богоизбра́нный,/ научи́л еси́ нас в беда́х бо́дрствовати/ и в моли́твах Го́сподеви неусыпа́ти.

Му́дрости ева́нгельския носи́телю,/ а́нгельских медото́чных слове́с учи́телю,/ утверди́ ны в си́ле Богове́дения.

Богоро́дичен: Притецы́те, бра́тие,/ единоду́шно принесе́м Богоро́дице досто́йное Ея́ хвале́ние,/ Та бо нас спаса́ет моли́твами Свои́ми воплоти́вшемуся от Нея́ Спаси́телю.

Седа́лен, глас 6:

Све́тлость Небе́снаго сия́ния яви́лся еси́ оте́честву твоему́,/ обновля́я в нем ра́дости непобеди́маго Креста́/ и просвеща́я погиба́ющия во тьме лю́ди твоя́,/ Стефа́не а́нгелоподо́бне, хва́лим тя.

Сла́ва, и ны́не, Богоро́дичен:

О Пресвята́я Тро́ице, в Не́йже сла́вим Еди́наго Бо́га,/ при́зри на ны, в ве́ре коле́блемыя, и сохрани́ ду́ши на́ша невреди́мы,/ я́ко да сла́вим Тя со А́нгелы,/ при́сно Ти хвалы́ принося́ще.

Песнь 4

Ирмо́с: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Стефа́не, се́рбския души́ ра́дование,/ разуме́хом бо́ли души́ твоея́ о поги́бшем роди́тели твое́м/ и друго́в его́, пре́дков на́ших,/ и се мо́лим тя:/ отжени́ от нас сли́чную77 печа́ль.

Лю́дие се́рбстии, возведи́те очеса́ своя́ к Небеси́/ и у́зрите до́блестнаго Стефа́на Высо́каго посреде́ пре́дков на́ших,/ торжеству́юща ны́не с ни́ми во сла́ве Бо́жией,/ всегда́ побежда́ющей враги́ Креста́ Правосла́внаго.

Я́ко оре́л, паря́щий небе́сными высота́ми,/ Стефа́н му́дрый воздви́жеся на высоту́ Боже́ственнаго уче́ния/ и наставля́ше духо́вными писа́ньми пре́дки на́ша,/ от ни́хже и мы сия́ прия́вше, восхваля́ем и́мя его́,/ я́ко вели́каго благоде́теля ро́да се́рбскаго.

Богоро́дичен: Богоро́дице, Ма́ти Христа́ Бо́га на́шего,/ всегда́ помина́ем Тя и в моли́твах возно́сим и́мя Твое́,/ прося́ще Твоего́ хода́тайства у Престо́ла Сотво́ршаго вселе́нную/ о спасе́нии душ на́ших.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Се́рбие, Бо́гом возлю́бленная,/ по́мни всегда́ дни вели́ких скорбе́й и страда́ний,/ я́же ча́да твоя́ терпя́ху грехо́в ра́ди роди́телей свои́х,/ от ни́хже всегда́ да сохрани́т ны Госпо́дь.

Стефа́н яви́ся любому́др наро́ду своему́/ и, повину́яся словесе́м ева́нгельским,/ крепля́ше се́рдце свое́ ду́хом пра́вды, ду́хом любве́ и соболе́знования к лю́дем свои́м.

Прииди́те, люби́телие Боже́ственнаго законове́дения,/ и почерпи́те му́дрость исто́чников Христо́вых учи́лищ,/ я́же откры́ Стефа́н Высокий душа́м на́шим.

Богоро́дичен: Ве́лия сла́ва Твоя́, Пресвята́я Богоро́дице, возно́сится в ро́де се́рбстем,/ ему́же Сын Твой посла́ апостолоподо́бна ревни́теля, Стефа́на де́спота,/ и́же воздви́же и освяти́ лю́ди своя́ ве́рою Христо́ва спасе́ния.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

И́гом лю́таго порабоще́ния оте́чество се́рбское обремене́но бысть,/ и вси го́рько пла́кахуся,/ но Стефа́н му́дрый утеша́ше всех упова́нием ве́лиим на Го́спода Всеси́льнаго.

Земле́ Се́рбская, преда́ждь забве́нию лю́тыя го́рести/ и возвесели́ся со́лнцу благода́ти, получе́нному де́спотом Стефа́ном,/ его́же теплото́ю согрева́ет всегда́ сердца́ сыно́в твои́х.

Мно́жество вдов и стра́ждущих припа́даху тебе́, Стефа́не,/ и пла́кахуся о ча́дех свои́х и о бра́тии, изги́бших с роди́телем твои́м,/ ты же, милосе́рдовав о них, вся́кому воздава́л еси́ к жи́зни потре́бная,/ утеша́я их Бо́жиим правдолю́бием.

Богоро́дичен: Ра́дуйся, звездо́, Со́лнце спасе́ния ро́ждшая,/ к Твоему́ покро́ву прибега́ем и мо́лимся:/ изба́ви ны, стра́ждущия, от мно́жества лю́тых прегреше́ний/ и к Сы́ну Твоему́ приведи́ нас.

Конда́к, глас 4:

Ве́рнаго Твоего́ во́ина Стефа́на Высо́каго возлюби́в,/ низпосла́л еси́ ему́ си́лы благода́ти, Христе́ Бо́же,/ во е́же уве́дети та́йны Небе́сныя/ и ревнова́ти о сла́ве Твое́й,/ е́йже кла́няющеся и мы,/ всегда́ мо́лим Тя:/ поми́луй нас, Спа́се, во Ца́рствии Твое́м.

И́кос:

Му́дрости исто́чник обре́т в Христо́ве Ева́нгелии, де́споте всехва́льне,/ ду́ши ро́да своего́ воздви́гл еси́ к высота́м Престо́ла Вы́шняго./ Сего́ ра́ди и мы, сы́нове твои́, припа́даем ти и, сла́вяще и́мя твое́, вопие́м:/ ра́дуйся, Стефа́не, о́трасле благоче́стия роди́теля великому́ченика;/ ра́дуйся, благогове́йныя ма́тере ча́до вожделе́нное./ Ра́дуйся, полко́в ага́рянских потреби́телю;/ ра́дуйся, защи́тниче оте́чества и стра́ждущаго ро́да христиа́нскаго./ Ра́дуйся, дру́же пропове́дников Боже́ственных уче́ний;/ ра́дуйся, опеча́ленных уте́шителю./ Ра́дуйся, кре́посте духо́вная престо́льнаго Бе́лграда твоего́ и всего́ ро́да се́рбскаго;/ ра́дуйся, святи́телей се́рбских Са́ввы и Симео́на Мироточи́ваго сомоли́твенниче./ Ра́дуйся, де́споте Высо́кий, хвало́ на́ша, ве́чно живу́щая;/ ра́дуйся, Стефа́не, Ца́рствия Бо́жия сожи́телю./ Ра́дуйся, моли́твенниче о низпосла́нии нам благода́ти Христо́вы;/ ра́дуйся, свети́льниче, Бо́гом поста́вленный освеща́ти нам путь к Ца́рствию Небе́сному./ Ра́дуйся, А́нгелов собесе́дниче о спасе́нии душ на́ших;/ ра́дуйся, наде́ждо на́ша в беда́х ми́ра сего́./ Ра́дуйся, де́споте Высо́кий, живу́щий высото́ю а́нгельския жи́зни;/ ра́дуйся, сла́вныя Ла́вры Манаси́и зижди́телю./ Ра́дуйся, Стефа́не, Бо́гом избра́нный вождю́ наш духо́вный,/ ра́дуйся и моли́ся ко Го́споду дарова́ти нам и всему́ ро́ду се́рбскому/ кре́пость к побе́де на враги́ на́ша.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

В хра́мех твои́х собира́емся днесь пра́здновати па́мять твою́, Стефа́не,/ изоби́льно бо в них источа́ется благода́ть лю́дем твои́м,/ от се́рдца призыва́ющим тя в моли́твах свои́х.

Вне́мля моли́твам чад твои́х, Стефа́не,/ не оставля́еши си́рых страда́ти, благоде́тель бо еси́ ро́да своего́,/ и про́сиши всем по́мощь у Го́спода.

С похвала́ми па́мяти твое́й прихо́дим ти днесь, Стефа́не му́дре,/ кре́пость бо еси́ всем, а́лчущим пра́вды Бо́жия/ и исцеле́ния духо́внаго в печа́лех жи́зни ми́ра сего́.

Богоро́дичен: Пита́тельница еси́ Пита́теля тва́ри, Богоро́дице Пресвята́я,/ сего́ ра́ди, а́ще и недосто́йнии, припа́даем Ти и про́сим моли́тв Твои́х Сы́ну Твоему́,/ да пода́ст душа́м на́шим кре́пость спасе́ния/ в причаще́нии свята́го Те́ла и Кро́ве Его́.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Оте́чество твое́ ра́дуется, Стефа́не, сла́вяще пра́здник па́мяти твоея́,/ благода́тными бо да́ры Ду́ха Свята́го укра́шен был еси́;/ моли́ся у́бо, да и ду́ши на́ша бу́дут просвеще́ны благода́тию Его́ Боже́ственною.

Па́че зла́та и ка́мений многоце́нных душа́ твоя возлюби́ му́дрость Ева́нгелия Христо́ва,/ те́мже и мо́лим тя, Стефа́не вожделе́нне,/ да и нас во́диши ко спасе́нию,/ пита́я ду́ши на́ша се́ю му́дростию.

Коль светла́ яви́ся нам днесь па́мять твоя́, христолюби́ве наш просвети́телю,/ коль вели́кое твое́ попече́ние бысть о правосла́внем благоче́стии ро́да се́рбскаго,/ сего́ ра́ди моли́твенно припа́даем ти/ и ублажа́ем па́мять твою́, ве́чно живу́щую.

Богоро́дичен: Я́ко ю́ноши, в пещи́ несгара́емии, просла́виша Триипоста́снаго Бо́га,/ та́ко и мы, Пресвята́я Богоро́дице, ве́рою озаря́емии,/ сла́вим де́вство Твое́, нетле́нное и по рождестве́ на́шего Спаси́теля.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная, Богоро́дице,/ Чи́стая Присноде́во.

Я́ко стена́ ве́ры неколе́бленная, показа́лся еси́ о́браз ро́ду на́шему, де́споте всехва́льне,/ и душа́ твоя́ в ве́ре вознесе́на бысть ли́ку А́нгельскому,/ моли́ся и о нас, да, и мы поми́ловани бу́дем от прегреше́ний/ и со А́нгелы да пое́м сла́ву Бо́жию.

Сквозе́ огнь и во́ду искуше́ни бы́хом грехо́в ра́ди оте́ц на́ших,/ ны́не же, иму́ще тя хода́тая у Престо́ла Бо́жия,/ припа́даем ра́це твое́й и про́сим тя, Стефа́не,/ да моли́твами твои́ми огради́ши нас от искуше́ний/ и утверди́ши ны в братолю́бии.

В словесе́х Боже́ственных писа́ний/ созна́л еси́ бла́гость и милосе́рдие Бо́жие, де́споте всехва́льне,/ и сподо́бился еси́ Ца́рствия Его́ Вы́шняго,/ моли́ и о нас, ча́дех твои́х,/ да сподо́бимся с тобо́ю бы́ти в Ца́рствии Бо́жии.

Богоро́дичен: Христо́с, Сия́ние ве́чное, возсия́ нам от ложе́сн Твои́х, Богоро́дице,/ сего́ ра́ди, гре́шнии, припа́даем Ти,/ да моли́твами Твои́ми хода́тайствуеши у Сы́на Своего́/ спасти́ ны от тьмы грехо́вныя.

Свети́лен:

Све́том Богодухнове́нных писа́ний озари́вся,/ вождь кре́пок во́ином избра́нным яви́лся еси́, Стефа́не,/ и́мя се́рбское просла́вил еси́, любому́дрыя му́жи удиви́л еси́,/ сердца́ же Христо́вых враго́в стра́хом испо́лнил еси́,/ при́зри ны́не и на ны от Небе́сных черто́гов/ и сокруши́ враги́, борю́щия нас.

Сла́ва, и ны́не, Богоро́дичен:

Изба́вивши мир от кля́твы зако́нныя/ безсе́менным Рождество́м, Богоотрокови́це,/ вели́кия сла́вы сподо́билася еси́,/ и ны́не предстоя́щи огнезра́чному Престо́лу от Тебе́ Рожде́ннаго,/ моли́ся о спасе́нии ве́рно почита́ющих Тя.

На хвали́тех стихи́ры, глас 8:

Прииди́те, бра́тие, ублажи́м вели́каго Бо́жия уго́дника,/ и́же го́рдость бе оте́честву своему́,/ му́жеством бо и му́дростию просла́вися,/ сме́ртию же взят быв, земли́ предаде́ся,/ но душа́ его́ на Не́бо вознесе́на,/ иде́же от А́нгелов святы́х украше́н бысть венцы́ неувяда́емыми,/ да, ве́чно живу́ще, сла́вит И́мя Госпо́дне.

Стефа́не прему́дре,/ мно́гою сла́вою на земли́ обле́клся еси́,/ мно́гия бо враги́ безбо́жныя низложи́в,/ благоче́стие в ста́де Христо́ве утверди́л еси́,/ сего́ ра́ди и ве́чныя жи́зни удосто́ился еси́,/ в не́йже пребыва́я,/ не преста́й моли́тися о спасе́нии душ на́ших.

Ви́дяще тя, де́споте блаже́нне,/ пеку́щася о ча́дех твои́х,/ мно́гия супоста́ты побежда́юща/ и моля́щася Го́сподеви/ дарова́ти нам, сыново́м твои́м,/ кре́пость духо́вную и ве́ру непоколеби́мую,/ сего́ ра́ди помина́юще тя в беда́х ве́ка сего́, взыва́ем ти:/ моли́ся ко Го́споду дарова́ти нам побе́ды на сопроти́вныя/ и душа́м на́шим ве́лию ми́лость.

Просвеще́нием Христо́вым/ духо́вная очеса́ ве́рнаго твоего́ наро́да отверза́л еси́/ и ду́ши всех в оте́честей ве́ре утвержда́л еси́,/ Стефа́не, де́споте ди́вне,/ сего́ ра́ди и мы мо́лим тя,/ да моли́твами свои́ми утверди́ши и нас во святе́м Правосла́вии/ и укрепи́ши ны в любви́ ко Христу́,/ Спаси́телю ро́да на́шего.

Сла́ва, глас 6:

Изоби́луя любо́вию ко свято́му Правосла́вию/ и святи́телем наро́да своего́ подража́я,/ хра́мы мно́ги и оби́тели благогове́йным и́ноком стро́ил еси́,/ они́ же, изоби́лующе уче́нием Богопре́даннаго нам зако́на Бо́жия,/ возноша́ху пе́сньми и́мя твое́ и роди́телей твои́х,/ воздаю́ще хвалы́ досто́йныя благоче́стию/ и любви́ всех вас ко Христу́,/ Ему́же моли́теся всегда́ поми́ловати ду́ши на́ша.

И ны́не, Богоро́дичен, глас то́йже:

Влады́чице, приими́ моле́ния на́ша/ и испроси́ нам у Сы́на Твоего́ благода́ть ве́чную/ и спасе́ние душа́м на́шим.

НА ЛИТУРГИ́И

Блаже́нны от кано́на, песни 3-я и 6-я. Проки́мен, глас 4: Десни́ца Госпо́дня вознесе́ мя,/ десни́ца Госпо́дня сотвори́ си́лу. Стих: Не умру́, но жив бу́ду и пове́м дела́ Госпо́дня. Апо́стол ко Ефесе́ем, зача́ло 233. Аллилу́ия, глас 1: Сохрани́ душа́ моя́ свиде́ния Твоя́ и возлюби́ я́ зело́. Стих: Я́ко несть льсти во язы́це мое́м. Ева́нгелие от Луки́, зача́ло 24. Прича́стен: В па́мять ве́чную: