Служба в честь святаго мученика Леонтия

Стихи́ры, глас 8.

Подо́бен: Что вы нарече́м:

Что́ тя имену́ем, сла́вне?/ Елла́дское приноше́ние,/ я́ко устреми́вшася от нея́;/ фи́ническое очище́ние, я́ко заколе́на в ней;/ свети́льника, я́ко во тьме́ возблиста́вшаго;/ до́бля, я́ко непобеди́ма бию́щими./ Многообра́зное твое́ благозва́ние,/ Лео́нтие всеблаже́нне,/ моли́ спасти́ся душа́м на́шим.

Что тя, страстоте́рпче, пронарече́м?/ Во́ина Христо́ва, я́ко погуби́теля враго́в;/ царя́ страсте́й, я́ко благоче́стия страда́льца;/ пита́теля а́лчущих, я́ко нищелю́бца;/ пра́ведника, я́ко рачи́теля небому́дренна./ Разли́чная твоя́ страда́ния, светле́йша боре́ния./ Моли́ спасти́ся душа́м на́шим.

Кто не почуди́тся тебе́, Лео́нтие?/ Я́ко все́льника прие́м нетле́ния исто́чника,/ ре́ки благодея́ния источа́еши ве́рным/ и всем безме́здно незави́стна приноша́еши, жа́ждущим дарова́ния,/ весели́ши же причаща́ющияся вода́м бла́гости./ Моли́ спасти́ся душа́м на́шим.

Сла́ва, глас 1:

Страстоте́рпче Лео́нтие прехва́льне,/ от любве́ Христо́вы тя ни о́гнь, ни ра́ны,/ ни меч отлучи́ти возмого́ша,/ но, му́жески пострада́в посреди́ мучи́телей,/ и́дольския же́ртвы разори́л еси́, Богому́дре,/ и ны́не, венцено́сче, лику́еши на Небесе́х./ Приле́жно моли́ о душа́х на́ших.

Крестобогоро́дичен.

Подо́бен: Небе́сных чино́в:

У Креста́ предстоя́щи Сы́на и Бо́га Твоего́/ и долготерпе́ние Того́ смотря́ющи,/ глаго́лаше, пла́чущи, Ма́ти Чи́стая:/ увы́ Мне, Ча́до сладча́йшее,/ что сия́ стра́ждеши непра́ведно, Сло́ве Бо́жий,/ да спасе́ши челове́чество?

На стихо́вне Окто́иха. Сла́ва, глас 4:

Да весели́тся Не́бо дне́сь све́тло/ и земля́ да ра́дуется ве́рно/ в па́мять му́ченика Лео́нтия,/ и́бо наста́вший де́нь не же́ртвами безслове́сными,/ но же́ртвою хвалы́ от цвете́ц духо́вных венчава́ется:/ укра́шен бо, с на́ми предстоя́/ и безкро́вну слу́жбу Венцеда́вцу принося́,/ мольбу́ прино́сит све́тло/ во дворы́ ра́йския дости́гнути/ ве́рно творя́щим па́мять его́.

Крестобогоро́дичен.

Подо́бен: Я́ко до́бля:

Распина́ема Христа́ Человеколю́бца ви́дящи Пречи́стая/ и ре́бра ископова́ема копие́м,/ пла́чущи, вопия́ше:/ что сие́, Сы́не Мой?/ Что́ Ти безблагода́тнии лю́дие возда́ша,/ за я́же сотвори́л еси́ до́брая им,/ и тщи́шися безча́дствовати Мя, Вселюбе́знейший?/ Удивля́юся, Благоутро́бне,/ Твоему́ во́льному распя́тию.

Тропа́рь, глас 4:

Му́ченик Твой, Го́споди, Лео́нтий/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами/ спаси́ ду́ши на́ша.

Кано́н, творе́ние Иоа́нна мона́ха, глас 4.

Песнь 1

Ирмо́с: Воспою́ Тебе́, Го́споди Бо́же мой,/ я́ко изве́л еси́ лю́ди из рабо́ты еги́петския,/ покры́л же еси́ колесни́цы фарао́новы и си́лу.

Зако́н похва́льных доброде́тель твоя́ не отпа́дает,/ Христо́в уго́дниче Лео́нтие:/ Той бо е́сть тебе́ похвала́ и бога́тство неотъе́млемо.

Жела́я, блаже́нне, пачеесте́ственных, нескве́рну ду́шу, де́вством же те́ло украси́в,/ к Вы́шнему пути́ благоле́пно устро́ил еси́.

Держа́ву взял еси́ на пре́лесть,/ му́ченическую че́сть хваля́ преподо́бно, сла́вный Лео́нтие,/ при́сно тебе́ жела́емаго.

Богоро́дичен: Тебе́ вси притека́ем, Богоро́дице, я́ко Побо́рнице тве́рдей,/ на мольбу́ дви́жуще Тя изба́вит ста́до Твое́ от вся́каго обстоя́ния.

Песнь 3

Ирмо́с: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́.

Обы́чай благоукраше́н и му́дрость, благода́ть же от Бо́га стяжа́в, Лео́нтие,/ яви́лся еси́ и́стинный страда́лец и му́ченик изря́ден.

Возложи́те ду́ши живо́му Бо́гу,–/ твои́м сво́инником приглаша́л еси́, Лео́нтие,–/ Царю́ же, ве́чно пребыва́ющему, во́инствуйте.

Источи́ благоче́стия глаго́лы медото́чный и боголюбе́зный язы́к твой,/ рабы́ же нече́стия, ху́льники, низлага́ше.

Богоро́дичен: Ра́дуйся, Ма́ти Неискусобра́чная, Бо́га Сло́ва во утро́бе Твое́й вмести́вшая/ и ро́ждшая воплоще́ннаго, я́ко Бо́га вку́пе и Челове́ка.

Седа́лен, глас 4.

Подо́бен: Ско́ро предвари́:

Крест, я́коже ору́жие, восприе́м,/ к боре́нию отлучи́лся еси́ неви́димых враго́в,/ до́блественне же пострада́л еси́./ Те́мже, потреби́в си́лу их, возме́здие прия́л еси́, чуде́с благода́ть,/ моля́ спасти́ся нам, му́чениче Лео́нтие пресла́вне.

Сла́ва, и ны́не, Богоро́дичен:

Чи́стая, Всенепоро́чная и Неискусому́жная,/ Я́же еди́на Безле́тнаго Сы́на и Сло́ва Бо́жия в ле́то ро́ждши,/ Сего́ со святы́ми и честны́ми патриа́рхи, и му́ченики, и проро́ки, и преподо́бными моли́/ дарова́ти нам очище́ние и ве́лию ми́лость.

Крестобогоро́дичен:

На Кресте́ Тя возвы́шена я́ко узре́ Пречи́стая Ма́ти Твоя́, Сло́ве Бо́жий,/ ма́терски рыда́ющи, веща́ше:/ что но́вое и стра́нное сие́ чу́до, Сы́не Мой?/ Ка́ко, Жи́знь всех, вкуша́еши сме́рти,/ оживи́ти ме́ртвыя хотя́, я́ко Милосе́рд?

Песнь 4

Ирмо́с: Небеса́ доброде́тель Твоя́ покры́ла е́сть,/ и земля́ испо́лнися сла́вы Твоея́, Христе́./ Те́мже ве́рно вопие́м:/ сла́ва си́ле Твое́й, Го́споди.

Я́ростию де́монскою одержи́мый/ тя, любо́вию Боже́ственною содержи́маго, неми́лостивно ураня́ше,/ му́чениче страстоте́рпче Лео́нтие.

Тя улови́ти и я́ти хотя́щему ко и́стине де́рзостне отвеща́л еси́,/ я́ко блаже́нна претя́щаго непщу́я,/ му́чениче страстоте́рпче Лео́нтие.

И́же на Дре́ве тебе́ ра́ди пригвожде́йся пло́тию,/ на дре́ве тя свя́зана Его́ ра́ди зря,/ кре́пости напо́лни и благода́ти.

Богоро́дичен: Херуви́мских чино́в преиму́щая/ и Бо́га, на руку́ седя́щаго, с пло́тию носи́вшая,/ ра́дуйся, Богоро́дице Всепе́тая.

Песнь 5

Ирмо́с: Стяжа́вый ны, избра́нныя лю́ди, кро́вию Твое́ю, Го́споди,/ Твой мир да́ждь нам,/ во единомы́слии сохраня́я ста́до Твое́.

Овча́, к заколе́нию гото́во, приведе́ся, Лео́нтие всесла́вне,/ мучи́тельскому суди́щу за Христа́ самово́льне предста́л еси́.

Низложи́ти твоея́ души́ кре́пость покуша́шеся пре́лести пови́нный,/ распе́ншагося Го́спода, я́коже злоде́я челове́ка, уничижа́я.

Да поги́бнут бо́зи, зе́млю и не́бо я́ве не сотво́ршии,/ распны́й бо ся всех Соде́тель е́сть,–/ му́чениче, глаго́лал еси́.

Богоро́дичен: Ра́дуйся, Пресвята́я, Чи́стая, Неискусобра́чная,/ Свята́я Мари́е Богоневе́сто,/ я́ко Бо́га родила́ еси́, онебеси́вшаго род наш.

Песнь 6

Ирмо́с: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил.

Тих у́бо притека́ющим ве́рою, Лео́нтие,/ и сло́во, растворе́но имы́й Боже́ственною со́лию,/ же́сток же враго́м Христо́вым явля́лся еси́.

Ра́дуяся у́бо, ве́рный Твой раб Лео́нтий/ отдая́ше себе́ свиде́тельству Ца́рствия Твоего́,/ но не терпя́ху врази́ Твоея́, Христе́, и́стины.

Разжиза́хуся я́ростию, я́коже зве́рие, беззако́нии и ру́це возлага́ху,/ я́ко на лов, на му́ченика наше́дше,/ расто́ргнути неща́дно непобеди́маго.

Богоро́дичен: Не и́мамы, ра́зве Тебе́, засту́пницы, Пречи́стая,/ пою́щии Пресвято́е Рождество́ Твое́, Влады́чице./ Те́мже мо́лимся:/ благопребы́тна сотвори́ Его́ рабо́м Твои́м.

Конда́к, глас 3.

Подо́бен: Де́ва дне́сь:

Мучи́телей посрами́л еси́ лука́вая кова́рства/ и е́ллинов обличи́л еси́ безбо́жное служе́ние,/ возсия́л еси́ богоразу́мия всем челове́ком уче́ньми благоче́стия,/ Богому́дре му́чениче./ Сего́ ра́ди твою́ па́мять почита́ем любо́вию,/ прему́дре Лео́нтие.

И́кос:

Хода́тая Бо́гу и челове́ком Го́спода,/ на́шу, земны́х, нищету́ прие́мшаго от Неискусому́жныя Чи́стыя Богоро́дицы,/ и распе́ншася, и воздви́гша от тли челове́чество, призыва́ю дарова́ти,/ я́ко да му́драго Лео́нтия ны́не восхвалю́/ и пове́м све́тлая его́ и кра́сная страда́ния,/ я́же показа́ до́бре, му́жеством, и ве́рою, и любо́вию вооруже́н;/ сего́ ра́ди почита́ем любо́вию му́драго Лео́нтия.

Песнь 7

Ирмо́с: Спасы́й во огни́ авраа́мския Твоя́ о́троки/ и халде́и уби́в,/ я́же Пра́вда пра́ведно уловля́ше,/ препе́тый Го́споди, Бо́же оте́ц на́ших,/ благослове́н еси́.

Тве́рдостию ра́зума, я́коже плене́ннии о́троцы,/ с пла́менем искуше́ний и ле́сть попра́ Лео́нтий непобеди́мый, поя́ Тебе́:/ Го́споди, Бо́же оте́ц на́ших, благослове́н еси́.

Безпристра́стием пло́ть забы́в,/ кре́пко ра́ны за Христа́, я́ко непобеди́м му́ченик, терпе́л еси́,/ поя́ Твоему́ Зижди́телю:/ Бо́же оте́ц на́ших, благослове́н еси́.

Му́дростию и любо́вию Христо́вою естества́ тве́рдо удержа́в тле́нное сопряже́ние,/ живоно́сную произво́лил еси́ сме́рть, воспева́я, Лео́нтие:/ Бо́же оте́ц на́ших, благослове́н еси́.

Сло́ва и Ду́ха со Отце́м, еди́но Триипоста́сное Естество́ богосло́вствуя,/ неукло́нный и непобеди́мый му́ченик взыва́ше:/ препе́тый Го́споди, Бо́же оте́ц на́ших, благослове́н еси́.

Богоро́дичен: Безсе́менно во утро́бе и па́че естества́ прие́мшую Непреме́ннаго Бо́га,/ за милосе́рдие челове́ком приме́шшася, благоче́стно воспое́м,/ я́ко Ма́терь Бо́жию во ве́ки.

Песнь 8

Ирмо́с: На Кресте́ пло́тию пригвожде́ннаго/ и показа́вшаго нам ору́жие во спасе́ние,/ о́троцы, превозноси́те Христа́, Бо́га на́шего, во ве́ки.

Терпя́ше плотски́я ра́ны му́ченик и безпло́тнаго врага́ зело́ побежда́ше, поя́:/ превозноси́те Христа́ Бо́га на́шего во ве́ки.

Све́тло ум ко Влады́це в боде́ниих терно́вных просте́рл еси́,/ любо́вию, му́чениче, превозноси́те,– вопия́,– Христа́, Бо́га на́шего, во ве́ки.

Побе́да тебе́ Христо́с е́сть, му́чениче,/ Его́же ра́нами плотски́ми просла́вил еси́, взыва́я:/ о́троцы, превозноси́те Христа́, Бо́га на́шего, во ве́ки.

Богоро́дичен: Тя пресла́вно, о Богома́ти,/ ро́дове вси земни́и, Чи́стая, ублажа́ем,/ я́ко Тобо́ю к Небеси́ вознесо́хомся, Де́во Ма́ти.

Песнь 9

Ирмо́с: Рождество́ Твое́ нетле́нно яви́ся:/ Бог из боку́ Твое́ю про́йде,/ я́ко Плотоно́сец яви́ся на земли́/ и с челове́ки поживе́./ Тя, Богоро́дице, тем вси велича́ем.

Тро́ицы служи́тель показа́лся еси́, послужи́в, Лео́нтие, непоро́чно,/ Ему́же вся коле́на покланя́ются Небе́сных, и земны́х, и преиспо́дних,/ Его́же пою́ще, досто́йно велича́ем.

Ви́дети жела́я невеще́ственно лице́м открове́нным Госпо́дню сла́ву,/ нача́л совлече́ся и власте́й еди́но,/ пропове́дав Триипоста́сное Божество́.

Возвесели́ся твои́м испове́данием и тебе́ испове́да досто́йно пред Отце́м Спас./ Его́же умоли́, страстоте́рпче, всем спасти́ся,/ ве́рою велича́ющим па́мять твою́.

Богоро́дичен: Вы́шних чино́в вы́шши еси́, Де́во Богоро́дице,/ я́ко еди́на позна́лася еси́ Вы́шняго селе́ние, Благослове́нная./ Те́мже Тя вси Богоро́дицу возвеща́ем.

Свети́лен.

Подо́бен: Не́бо звезда́ми:

Иску́шся, я́коже зла́то, огне́м и му́ками,/ досто́ин яви́лся еси́ дар Бо́га Вы́шняго, всесла́вне страстоте́рпче,/ о нас ны́не помоли́ся.

Богоро́дичен:

Держа́вным Твои́м кро́вом от враго́в наве́та нас, Чи́стая, Твоя́ рабы́, сохрани́ неврежде́ны:/ Тя бо стяжа́хом еди́ну прибе́жище в ну́ждах.

НА ЛИТУРГИ́И

Проки́мен, глас 7: Возвесели́тся пра́ведник о Го́споде: Стих: Услы́ши, Бо́же, глас мой: Апо́стол Дея́ний, зача́ло 29. Аллилу́ия, глас 4: Пра́ведник, я́ко фи́никс, процвете́т: Ева́нгелие от Иоа́нна, зача́ло 52. Прича́стен: В па́мять ве́чную бу́дет пра́ведник: