Служба в честь святаго мученика Иулиана Египетскаго и иже с ним
ВЕ́ЧЕР
На Го́споди, воззва́х: стихи́ры, глас 2:
Ки́ими благохва́льными венцы́/ увязе́м страстоте́рпца Христо́ва?/ Све́тло подвиза́вшася и страда́вшаго,/ Иулиа́на предо́бляго,/ вели́каго в преподо́бных и му́ченицех,/ Еги́пта похвалу́ и удобре́ние,/ победи́теля Маркиа́на лю́таго,/ его́же шата́ние Христо́с низложи́,/ име́яй ве́лию ми́лость.
Ки́я духо́вныя пе́сни,/ Иулиа́не сла́вне, тебе́ принесе́м?/ В де́встве с Васили́ссою жи́ти возжеле́вшему/ и сконча́вшемуся в многообра́зных му́ках,/ и сострада́льцем твои́м, я́ко твердому́дренным,/ за и́стину пострада́вшим ра́достно./ Сконча́вшеся бо си́и вма́ле,/ испо́лниша ле́та до́лга,/ Христо́м уще́дрени,/ подаю́щим ве́лию ми́лость.
Ки́ими му́ченическими пе́сньми/ восхва́лим страстоте́рпцы?/ С Мариони́ллою Ке́лсия,/ и со Анто́нием преиму́щаго Иулиа́на,/ и Анаста́сия, того́ моли́твою воскреше́нна,/ всеблаже́нныя небожи́тели,/ на земли́ нас призира́ющия/ и от бед избавля́ющия,/ Христу́ моля́щияся/ дарова́ти нам ве́лию ми́лость.
И́ны стихи́ры, глас 4.
Подо́бен: Я́ко до́бля:
Я́ко зве́зды многосве́тлыя,/ мы́сленно возсия́сте на тве́рди ве́ры,/ добропобе́днии му́ченицы,/ све́том по́двигов и чуде́с луча́ми/ всю тва́рь просвеща́юще./ Те́мже соверша́ем дне́сь/ светоно́сную и святу́ю па́мять ва́шу,/ веселя́щеся о вас, Боговенча́ннии.
Богому́дрый Анто́ний/ и тве́рдый Анаста́сий,/ Боже́ственнии же Келси́й и Мариони́лла/ да воспою́тся с Васили́ссою целому́дренною,/ и́же вси сла́внаго име́яху/ Иулиа́на и́стины о́браз/ и вси с ним сла́ву Небе́сную улучи́ша,/ я́ко Госпо́дни служи́телие.
По́стников благоле́пие/ и му́чеников благосла́вие/ яви́лся еси́, преподо́бнострада́льче,/ мно́гия бо Христу́ предпосла́л еси́,/ венцы́ де́вства и страда́льчества увенча́нныя,/ и преста́вился еси́, Иулиа́не Богоблаже́нне,/ к ве́чному с си́ми весе́лию.
Сла́ва, глас 6:
Дне́сь созыва́ет нас на трапе́зу духо́вную/ па́мять во́инов Христо́вых,/ и́хже воспои́м, глаго́люще:/ ра́дуйся, Иулиа́не преподобному́чениче,/ и́же да́нный тебе́ тала́нт преумно́живый/ и мно́жества спасе́нных Бо́гу приведы́й;/ ра́дуйся, Васили́ссо преподо́бная,/ я́ко, над страстьми́ воцари́вшися,/ Христу́ соца́рствуеши с со́нмом дев;/ ра́дуйтеся, и́же от те́рния кри́ни,/ Ке́лсие и Мариони́лло блаже́ннии,/ я́ко Сам Госпо́дь яви́ вам и́стину;/ ра́дуйся, Анто́ние с седмию́ ца́рскими о́троки,/ я́ко жрец сый Влады́ки,/ за Него́ же́ртва прия́тна с те́ми был еси́;/ ра́дуйся, Анаста́сие, из ме́ртвых воздви́гнутый,/ я́ко Ла́зарю уподо́бился еси́, дру́гу Христо́ву,/ но, о многосве́щный све́щниче Ду́ха,/ не преста́йте, богатносве́тлии,/ моли́тися за ны ко Го́споду.
И ны́не, Богоро́дичен: Кто Тебе́ не ублажи́т:
На стихо́вне стихи́ры, глас 5.
Подо́бен: Ра́дуйся:
Ра́дуйся, солнцеобра́зный у́ме,/ Уму́ предстоя́й Пе́рвому/ в сла́ве Небе́сней и незаходи́мом све́те,/ Иулиа́не и и́же с тобо́ю/ собо́ре преподо́бных и му́чеников,/ подвиза́вшиися в по́стничестве и страда́нии/ и восприя́вшии побе́ды воздая́ния,/ лю́таго велиа́ра победи́вше./ Сих всех ублажа́юще, возопии́м:/ помо́щники нам бу́дите,/ любо́вию вас, всечестни́и, почита́ющим.
Стих: Ди́вен Бог во святы́х Свои́х,/ Бог Изра́илев.
Ра́дуйтеся, Тро́ицы уго́дницы,/ Це́ркве кра́сное ополче́ние,/ таи́нницы Бо́жия Сло́ва,/ Иулиа́не, в чудесе́х великоимени́те,/ и Васили́ссо прехва́льная,/ благосла́вный Анаста́сие/ со Анто́нием свяще́ннейшим,/ Келси́ем и Мариони́ллою,/ ди́вный бо Госпо́дь во святы́х Свои́х/ в вас преди́вен бы́сть,/ тем дерзнове́ние к Нему́ иму́ще,/ хода́таи о нас бу́дите,/ с ве́рою вас, святи́и, призыва́ющих.
Стих: Святы́м, и́же су́ть на земли́ Его́,/ удиви́ Госпо́дь вся хоте́ния Своя́ в них.
Ра́дуйтеся, страда́льцы Христо́вы досточу́днии,/ Ца́рствия Небе́снаго насле́дницы,/ его́же ра́ди претерпе́сте бичева́ния и терза́ния,/ жже́ния и вся́кий вид мук,/ удивля́еми от всех, предо́блии, тве́рдостию и зна́меньми,/ и́миже благоче́стие утверди́сте/ и просла́вистеся на земли́ и горе́ ку́пно,/ защи́тники нам бу́дите,/ усе́рдно к вам, блаже́ннии, прибега́ющим.
Сла́ва, глас 8:
Вельми́ терпя́ в му́ках, Иулиа́не преподо́бне,/ поне́сл еси́ узи́лища лю́тое,/ вери́г тя́жесть и ног утесне́ние,/ огне́м и водо́ю искуше́н был еси́/ с терпеливоду́шными сострада́льцы твои́ми/ и звере́й стремле́ние обузда́л еси́,/ ме́ртваго же, я́ко от сна, возста́вил еси́/ и слепы́я просвети́л еси́,/ Христу́ чудесы́ обогати́вшу тя/ не то́чию при жи́зни, но и по сме́рти,/ я́же бо в тебе́ благода́ть Бо́жия и моще́м твои́м прису́ща е́сть,/ и́мже покланя́ющеся, мо́лим тя, страстоте́рпче:/ уврачу́й стра́сти душ и теле́с на́ших.
Тропа́рь, глас 1:
Све́тлыя по́стничества по́двиги,/ ра́дуяся, поне́сл еси́, Иулиа́не Богоблаже́нне, с преподо́бною Васили́ссою,/ и страда́ния до́бльственно претерпе́л еси́/ с честны́ми твои́ми сострада́льцы,/ с ни́миже моли́ Христа́ Бо́га/ спасти́ся душа́м на́шим.
НА У́ТРЕНИ
По 1-м стихосло́вии седа́лен, глас 3:
Восхва́лим, ве́рнии, Иулиа́на, ди́внаго в преподо́бных и му́ченицех,/ и с ним Васили́ссу достоблаже́нную,/ му́ченики же Ке́лсия с ма́терию и Анто́ния со Анаста́сием,/ и́хже земля́ и́мать свяще́нная телеса́, Не́бо же святы́я ду́ши:/ подае́т бо нам Бог их ра́ди бога́тую Свою́ ми́лость.
Сла́ва:
Мно́жество преподо́бных и му́ченик Тебе́, Спа́се, приведе́ся/ с до́блим Иулиа́ном и ди́вною Васили́ссою,/ и́же, о́крест Тебе́ со А́нгелы лику́юще,/ пою́т пе́снь трисвяту́ю.
И ны́не, Богоро́дичен:
Ма́терь Тя Бо́жию ве́мы вси,/ Де́ву вои́стинну и по рождестве́ я́вльшуюся,/ любо́вию прибега́ющии к Твое́й бла́гости,/ Тя бо и́мамы, гре́шнии, предста́тельство,/ Тя стяжа́хом во искуше́ниих спасе́ние,/ еди́ну Всенепоро́чную.
По 2-м стихосло́вии седа́лен, глас 5:
Я́ко ревни́тели благоче́стия,/ я́ко рачи́тели и́стины и теку́щих презри́тели,/ за Христа́ прия́сте му́ки и сме́рть,/ Иулиа́не Богому́дре с честны́ми сострада́льцы,/ тем ве́рою соверша́ющих па́мять ва́шу/ от бед изба́вите свои́м ко Го́споду предста́тельством.
Сла́ва:
Предочи́стил еси́ себе́ по́стническим житие́м, Иулиа́не, с Васили́ссою/ и с не́ю предпосла́л еси́ мно́гия, освяще́нныя Бо́гови,/ та́же и Антипа́тову супру́жницу и сы́на сы́ны показа́л еси́ Ца́рствия,/ и́мже спострада́в, взя́лся еси́ в ве́чное наслажде́ние.
И ны́не, Богоро́дичен:
Те́плое заступле́ние су́щим в беда́х,/ и Помо́щницу на́шу, и к Бо́гу премене́ние,/ Е́юже тли изба́вихомся, Богоро́дицу, ве́рнии, ублажа́ем.
Кано́н, глас 8.
Песнь 1
Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ пе́снь Бо́гови воспева́юща.
Дости́гнув к твое́й па́мяти, преподо́бнострада́льче,/ дви́жу устне́ мои́ к пе́нию,/ ты же сло́во ми да́ждь твои́ми к Бо́гу моли́твами/ и страда́вших с тобо́ю, всеблаже́нне.
Раче́нием чистоты́ одержи́м, Иулиа́не,/ де́вствовати наста́вил еси́ Васили́ссу,/ и, окормле́нием Боже́ственным житие́ безсупру́жных избра́вшее/ мно́жеству тех наста́вники и, спаси́телие бы́сте.
Род, и бога́тство, и наслажде́ние плотско́е любве́ ра́ди Христо́вы презре́в/ и, взем, преподо́бне, крест,/ с блаже́нною неве́стою твое́ю мона́шествовал еси́ боголе́пно.
Я́ко крин сладково́нный и я́ко ши́пок,/ процвели́ есте́ во цве́тнице Боже́ственнаго поще́ния, Иулиа́не и Васили́ссо,/ облагоуха́юще притека́ющия к вам, всехва́льнии.
Богоро́дичен: Неискусобра́чно Христа́ родила́ еси́,/ И́же по нас и нас ра́ди восприя́вша естество́, Пречи́стая,/ и неизме́нна по обои́м пребы́вша,/ Его́же моли́ дарова́ти ми грехо́в и искуше́ний избавле́ние.
Песнь 3
Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко не́сть свят, па́че Тебе́, Еди́не Человеколю́бче.
И́же му́дре вся устроя́я, Сло́во,/ и земны́я ко спасе́нию направля́я,/ от земли́ преставля́ет тя, Васили́ссо,/ и вся духо́вныя се́стры твоя́/ пре́жде лю́таго на христиа́ны гоне́ния.
Я́ко удобре́нная и Богоуго́дная де́ва,/ духо́вная же ма́ти и води́тельница дев,/ с те́ми златови́дными кри́лы чистоты́ и любве́ Боже́ственныя/ к Небе́сным возлете́ла еси́.
По́стничествовав пе́рвее во оби́тели,/ во́ждь был еси́, Иулиа́не, тьмы́ и́ноков,/ и́хже приве́л еси́ Христу́, пострада́вших огне́м,/ та́же и сам му́ки претерпе́л еси́, утвержда́я ве́рныя.
Богоро́дичен: Мы́сленная показа́лася еси́ две́рь/ И́же с высоты́ восто́ка су́щим на земли́ я́вльшася, Де́во:/ Тобо́ю бо к нам Сло́во прии́де,/ во е́же спасти́ вся от безслове́сия, Богоневе́стная.
Седа́лен, глас 4.
Подо́бен: Удиви́ся Ио́сиф:
Я́ко многосве́тлое со́лнце с луно́ю посреде́ многочи́сленных звезд,/ та́ко Иулиа́н с Васили́ссою среди́ мно́жества преподо́бных свои́х,/ блиста́ющии благода́тию на Небеси́,/ иде́же е́сть всех веселя́щихся жили́ще.
Ин седа́лен, глас 5.
Подо́бен: Собезнача́льное:
Пятостру́нную гу́сль Свята́го Ду́ха,/ тве́рдыя страстоте́рпцы но́выя благода́ти,/ восхва́лим, ве́рнии, Боже́ственнаго Иулиа́на, свяще́ннаго Анто́ния,/ Ке́лсия с Мариони́ллою и тве́рдаго Анаста́сия,/ моля́щияся ко Го́споду о чту́щих святу́ю па́мять их.
Сла́ва, и ны́не, Богоро́дичен:
Не премолчи́м при́сно, Богоро́дице Де́во,/ благода́рственно воспева́ти от се́рдца Твоя́ ми́лости, Влады́чице, раби́ Твои́, вопию́щи и глаго́лющи:/ Пресвята́я Де́во, предвари́ и изба́ви нас от враг ви́димых и неви́димых,/ и от ну́жды и вся́каго преще́ния,/ Ты бо еси́ на́ше заступле́ние.
Песнь 4
Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.
Оби́тель твоя́, Иулиа́не, сожже́на бы́вши, храня́ше сла́дкая пе́ния,/ и слы́шавших та целя́ше неду́ги в показа́ние дел твои́х,/ в воспомина́ние же богособра́ннаго со́нма сожже́нных.
Вери́гами отягче́на и поруга́ема узре́в тя, Келси́й/ отверза́ет зе́ницы души́ своея́:/ ви́дит бо тя, свя́те, А́нгелы окружа́ема и венча́ема, и воззва́:/ си́ле Твое́й сла́ва, Человеколю́бче.
С тобо́ю, Иулиа́не, Келси́й восхоте́в страда́ти и умре́ти,/ оте́ческое отри́ну нече́стие и му́ченик Христо́в яви́ся,/ ма́тере своея́ Мариони́ллы сопребыва́нием наслажда́яся.
Богоро́дичен: Су́щим на земли́ уподо́бився Небе́сный,/ небе́сны сих соде́ла/ и, пострада́в естество́м страда́тельным,/ Боже́ственнаго безстра́стия прича́стие дарова́,/ Сего́ у́бо Ро́ждшую сла́вим.
Песнь 5
Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя е́сть чужда́я тьма́, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.
Исцели́л еси́, Иулиа́не, сло́вом слепа́го,/ е́же не возмого́ша соде́яти и́дольстии жрецы́,/ мучи́тель у́бо, обезгла́вив прозре́вша,/ тебе́ предаде́ ины́м лю́тым му́кам.
Заключе́ния и бие́ний я́звы претерпе́в,/ ди́вен и Богоно́сен показа́лся еси́, досточу́дне./ Маркиа́н же, хотя́ победи́ти твое́ благодерзнове́ние,/ посра́млен яви́ся, я́ко на Бо́га вражду́яй.
О, мно́гаго твоего́, Иулиа́не, к Бо́гу дерзнове́ния:/ твое́ю моли́твою ме́ртвый возстае́т,/ и́же ба́нею пакибытия́ возрожде́н, Анаста́сий именова́ся,/ сын вои́стинну воскресе́ния сый.
Ко Христу́ огне́м любве́ пали́ми, сора́довахуся страстоте́рпцы,/ преда́ли бы́вше огню́ за благоче́стие и невреди́мы сохра́ншеся,/ Го́спода госпо́дствующих прославля́ху.
Богоро́дичен: Ра́дость ми́ру роди́вшая, Присноде́во,/ души́ моея́ уны́ние отжени́ и напра́ви мое́ помышле́ние твори́ти Боже́ственная,/ да ра́достным се́рдцем сла́влю Тя, Богора́дованная.
Песнь 6
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Седмочи́сленный ублажи́м лик ца́рских отроко́в,/ боже́ственне совокупля́емь с пресви́тером Анто́нием,/ я́ко низложи́ша враги́ и сла́ву прия́ша му́ченичества.
Седмери́ца ю́ных испове́дник, Анто́нием окормля́ема, с двадеся́тицею во́инов,/ непоро́чныя же́ртвы, нас ра́ди поже́ршемуся Христу́ приведо́шася,/ Его́ ра́ди усе́чени бы́вше.
Твое́ю моли́твою, Иулиа́не, и су́щих с тобо́ю/ храм и́дольский паде́ся ве́сь/ и бы́вшии в нем погибо́ша,/ просе́дшаяся же земля́, изверга́ющи о́гнь, пожига́ше пога́ны.
Богоро́дичен: Рабы́ Твоя́, Христе́, уще́дри, воспева́ющия Тя,/ Твоея́ Пречи́стыя Ма́тере мольба́ми, я́ко Благоутро́бен,/ и преподо́бных и му́ченик предста́тельством.
Конда́к, глас 8.
Подо́бен: Взбра́нной:
И́же в преподо́бных и му́ченицех/ пресла́внаго Иулиа́на и сподви́жников его́/ любо́вию па́мять почита́ем дне́сь,/ я́ко просла́вивших Го́спода Боже́ственными де́лы/ и просла́вленных Го́сподом Боже́ственными чудесы́,/ и́хже пе́сньми увенча́им, зову́ще:/ ра́дуйтеся, во́ини Христо́вы непобеди́мии.
И́кос:
А́нгел во пло́ти, Иулиа́не, был еси́ на земли́,/ по́стничеством воскриле́н и страда́льчеством укра́шен./ Отону́дуже возбужда́еши вопи́ти:/ ра́дуйся, прозябе́ние честно́е Ливи́и:/ ра́дуйся, свети́льниче благоче́стия./ Ра́дуйся, мона́шествующих с Васили́ссою преиму́щий;/ ра́дуйся, страда́вших с тобо́ю наста́вниче./ Ра́дуйся, я́ко приобщи́лся еси́ страсте́м Христо́вым;/ ра́дуйся, я́ко, с таи́нники Твои́ми пострада́в, обре́л еси́ неконча́емый живо́т./ Ра́дуйтеся, Анто́ние и Анаста́сие блаже́ннии;/ ра́дуйтеся, Мариони́лло и Келси́е сла́внии./ Ра́дуйтеся, пятери́це му́ченик прехва́льная;/ ра́дуйтеся, А́нгелом равностоя́тели./ Ра́дуйтеся, небожи́телие венцено́снии;/ ра́дуйтеся, сла́вы Бо́жией светоза́рнии зри́телие./ Ра́дуйтеся, во́ини Христо́вы непобеди́мии.
Песнь 7
Ирмо́с: Бо́жия снизхожде́ния/ о́гнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.
Небе́снаго утеше́ния сподо́бишася страда́льцы, бы́вше в заключе́нии:/ предста́ша бо им сожже́ннии му́ченицы и Васили́сса с со́нмом дев, пою́ще:/ благослове́н еси́, Бо́же оте́ц на́ших.
Посреде́ со́нма неве́рных вы огня́ претерпе́сте му́ку/ и главны́я ко́жи содра́ние/ и оче́с лю́те лише́ни бы́сте, страда́льцы вседо́блии, пою́ще:/ благослове́н еси́, Бо́же оте́ц на́ших.
Я́ве на по́прищи бра́вшеся со зверьми́,/ соблюдо́стеся невреди́ми от тех,/ и, во гла́вы усече́ни, ду́ши своя́ преда́сте Христу́, пою́ще:/ благослове́н еси́, Бо́же оте́ц на́ших.
Богоро́дичен: Де́во Всечестна́я, от страсте́й безче́стия изба́ви мя,/ да ра́достно зову́ Ти:/ ра́дуйся, чистоты́ черто́же;/ ра́дуйся, сокро́вище де́вства;/ ра́дуйся, вмести́лище свято́е отце́в Бо́га.
Песнь 8
Ирмо́с: Седмери́цею пе́щь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Да мно́гое воздая́ние на Небеси́ получи́ши,/ му́ки мно́жайшия претерпе́л еси́, Иулиа́не,/ четвери́цу сострада́льцев прии́м,/ с ни́миже тече́ние сла́вно сконча́в,/ сла́виши Христа́ во ве́ки.
И́хже, я́ко беззако́нных, умертви́ша,/ сих па́че просла́ви И́же сла́вы Госпо́дь,/ неве́рныя же погуби́ трус и град,/ и иге́мон, изъяде́н червьми́, и́здше,/ му́чеником лику́ющим и пою́щим Христа́ во ве́ки.
Чуде́с де́йство даде́ся тебе́, Иулиа́не,/ и вене́ц нетле́ния прия́л еси́ от руки́ Влады́чни,/ я́ко му́ченик и я́ко наста́вник мона́шествующих,/ с те́ми превознося́ Его́ во ве́ки.
Богоро́дичен: Преизоби́лием бла́гости ту́не мя поми́луй, Влады́чице,/ Я́же благоутро́бия Исто́чник ро́ждшая:/ ми́лости бо досто́йное не и́мам что принести́ Тебе́,/ благословля́емой во ве́ки.
Песнь 9
Ирмо́с: Ужасе́ся о сем Не́бо/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бы́сть простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют.
Потреби́тели пре́лести и побо́рники Боже́ственныя ве́ры,/ церко́вныя столпы́ и тве́рдыя адама́нты,/ Христо́вы ору́жники, ве́рою страстоте́рпцы в пе́снех да почту́тся.
Анто́ния пресви́тера со Анаста́сием воспева́ю,/ и с Келси́ем Мариони́ллу, и с ни́ми чу́днаго Иулиа́на,/ лобыза́я с ве́рою честны́й о́браз их.
Не преста́й моли́тися с таи́нники твои́ми, Иулиа́не, о нас,/ соверша́ющих святу́ю па́мять ва́шу,/ и целе́бным моще́м ва́шим покланя́ющимся, всеблаже́ннии.
Богоро́дичен: Во утро́бу, Христе́ Спа́се мой, деви́ческую всели́вся,/ яви́лся еси́ ми́ру Твоему́/ и обеща́лся еси́ всегда́ бы́ти с рабы́ Твои́ми,/ моли́твами у́бо Ро́ждшия Тя мир ста́ду Твоему́ да́руй.
Ексапостила́рий.
Подо́бен: Со ученики́ взы́дем:
По́стничествовав пе́рвее,/ спо́стники твоя́ приве́л еси́ Христу́, Богоблаже́нне,/ страда́льчествовав же по́слежде,/ сострада́льцы твоя́ показа́л еси́ венцено́сны,/ с ни́миже, Иулиа́не, бу́ди хода́тай о нас ко Го́споду.
Сла́ва, и ны́не, пра́здника или́ Богоро́дичен:
Держа́вным Твои́м покро́вом, Чи́стая,/ нас, рабо́в Твои́х, сохраня́й всегда́ от наве́т вра́жиих неврежде́нных./ Тя бо еди́ну стяжа́хом прибе́жище в напа́стех.
На хвали́тех стихи́ры, глас 8:
Заря́ трисве́тлаго Божества́,/ блиста́ющая в тебе́,/ ди́вна тя, Иулиа́не, яви́,/ я́ко духоно́сна и испо́лнена благода́ти,/ ея́же проси́ и нам, воспева́ющим тя.
Горе́ со А́нгелы лику́еши/ и назира́еши любо́вию пра́зднующия тебе́/ и помина́ющия по́двиги и чудеса́ твоя́,/ Иулиа́не преподобному́чениче,/ притека́ющим к ра́це моще́й твои́х/ источа́я неоску́дную благода́ть исцеле́ний.
Ра́дуйтеся, свяще́ннейшии му́ченицы,/ пяточи́сленный ли́че Небе́снаго двора́,/ пятиве́твенное и благопло́дное дре́во Еде́мское,/ пятисве́щный свети́льниче Сио́на,/ хра́ме пятисоста́вный Тро́ицы,/ на земли́ и на Небеси́ вас просла́вльшия.
Сла́ва, глас 4:
И́ноческое житие́ возлюби́в,/ произволе́нием му́ченик был еси́,/ тве́рдым же страда́нием/ о́браз показа́лся еси́ взе́мшим крест/ и после́довавшим стопа́м Христо́вым,/ Иулиа́не всеизя́щне,/ тем, во обои́х благоиску́сен быв,/ тьму́ име́л еси́ подража́телей/ и тех предпосла́л еси́ Бо́гови,/ к Нему́же и сам по мно́гих му́ках/ преше́л еси́ с сострада́льцы твои́ми,/ с ни́миже моли́ся о нас, приснопа́мятне.
И ны́не, пра́здника или́ Богоро́дичен.
Славосло́вие вели́кое и отпу́ст.
НА ЛИТУРГИ́И
Блаже́нны, пра́здника пе́снь рядова́я со ирмосо́м на 4 и свята́го на 4.
Тропари́
Стих: Блаже́ни есте́, егда́ поно́сят вам, и изжену́т,/ и реку́т всяк зол глаго́л на вы, лжу́ще Мене́ ра́ди.
Я́ко крин сладково́нный и ши́пок,/ процвели́ есте́ во цве́тнице Боже́ственнаго поще́ния, Иулиа́не и Васили́ссо,/ облагоуха́юще притека́ющия к вам, всехва́льнии.
Стих: Ра́дуйтеся и весели́теся,/ я́ко мзда ва́ша мно́га на Небесе́х.
Тебе́, Иулиа́не, во страда́нии, А́нгелы венча́ема узре́в, Келси́й/ тве́рдый му́ченик Христо́в яви́ся,/ с ма́терию свое́ю Мариони́ллою прии́м вене́ц нетле́нный.
Сла́ва: Воскреше́нный Анаста́сий и свяще́нный Анто́ний/ непоро́чныя же́ртвы Пресвяте́й Тро́ице со Иулиа́ном приведо́шася/ и мо́лятся о почита́ющих па́мять их.
И ны́не: Рабы́ Твоя́, Христе́, уще́дри, я́ко Благоутро́бен,/ Пресвяты́я Ма́тере Твоея́ мольба́ми,/ преподо́бных же и му́ченик предста́тельством.
