Служба в честь святаго мученика Иакинфа
ВЕ́ЧЕР
На Го́споди, воззва́х: стихи́ры, глас 8.
Подо́бен: О, пресла́внаго чудесе́:
Ка́мень положи́ся краеуго́льный, в Сио́не избра́н,/ и недви́жимо основа́ние,/ на не́мже созда́шася му́ченик полцы́,/ с ни́миже победоно́сец Иаки́нф/ Небе́сною сия́ет све́тлостию./ , О, неизрече́ннаго Твоего́ милосе́рдия, Влады́ко!/ Имже, Христе́,/ спаси́ ду́ши на́ша,/ я́ко еди́н Милосе́рд.
Иерусали́м проте́кл еси́,/ град Бо́жий све́тлый,/ я́коже ка́мень, быв обагре́н кро́вию,/ червлени́цею страда́ния./ И ны́не моли́ся я́вственне,/ лику́я и ра́дуяся,/ спаса́й моли́твами твои́ми/ твою́ пресла́вную и свяще́нную па́мять/ пра́зднующия, преблаже́нне.
Име́я я́ко му́ченик непобеди́м/ ко Влады́це Христу́ дерзнове́ние благоприя́тно,/ я́ко зако́нен страда́лец/ благопода́тно слы́шание О́наго,/ мольба́ми не преста́й, досточу́дне,/ па́мять творя́ ве́рно пою́щих тя/ и напа́стей сих изыма́я и обстоя́ния.
Сла́ва, и ны́не, Богоро́дичен:
Плоть от крове́й Твои́х прие́м,/ Первове́чный Бог Тя Предста́тельницу показа́ челове́ком, Чи́стая./ Те́мже изба́ви рабы́ Твоя́ от вся́кия беды́ и обстоя́ния/ и се́тей лука́ваго врага́/ и сия́ния причасти́тися сподо́би избра́нных,/ вся сла́вящия и покланя́ющияся Тебе́.
Крестобогоро́дичен:
Что́ зри́мое виде́ние,/ е́же Мои́ма очи́ма ви́дится, о Влады́ко?/ Содержа́й всю тварь, на Дре́во воздви́жен быв,/ и умира́еши, всем дая́й жизнь,–/ Богоро́дица, пла́чущися, глаго́лаше,/ егда́ узре́ на Кресте́ возноси́ма/ из Нея́ неизрече́нно возсия́вшаго Бо́га и Челове́ка.
Тропа́рь, глас 4:
Му́ченик Твой, Го́споди, Иаки́нф/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости;/ того́ моли́твами/ спаси́ ду́ши на́ша.
Кано́н, его́же краегране́сие: Тя, све́тлый му́чениче, хвалю́ ка́мень. Глас 8.
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Тя, сия́нием му́ченическим многоце́нна ка́меня бы́вша Боже́ственныя Це́ркве,/ ны́не призыва́ю помо́щника твои́х похва́л бы́ти ми.
Земну́ю сла́ву оста́вль, Небе́сную сла́ву насле́довал еси́,/ всегда́ сый со Влады́кою всех, венцено́сче му́чениче сла́вне.
Во́зраста ю́ностное и ума́ до́блественное,/ по Христе́ показа́л еси́, му́чениче страстоте́рпче,/ на лесть му́жествовав.
Богоро́дичен: Всем су́щим Соде́тель,/ спасе́ния ра́ди челове́ча во Твою́ утро́бу всели́вся,/ воплоща́ется, Богома́ти, е́же по нам назида́яся.
Песнь 3
Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.
Юноша сый, ста́рческий, му́дре, ра́зум, му́чениче Христо́в, яви́лся еси́, име́я,/ и му́дростию укра́шен.
Тече́ние спе́шно му́ченически поте́к, дости́гл еси́ му́ченик до́блести/ и честно́е венча́ние.
Богоро́дичен: Напра́ви моли́твами Твои́ми к Небе́сному восхо́ду благоче́стно, Обра́дованная,/ Богоро́дицу Тя му́дрствующия.
Ин конда́к, глас 4:
Ка́мень че́стен показа́ся, Иаки́нфе,/ в Го́рнем о́ном све́тлем гра́де водрузи́ся,/ в разу́мнем Сио́не блиста́я све́тло,/ освеща́я вся, чту́щия честно́е твое́ страда́ние,/ моли́ спасти́ся нам, твою́ па́мять почита́ющим.
Седа́лен, глас 3.
Подо́бен: Боже́ственныя ве́ры:
Ка́мень че́стен Це́ркве, храни́м в сокро́вищах Небе́сных, был еси́, Иаки́нфе,/ покланя́ющияся ка́мению обличи́л еси́ и муче́ния ча́шу испи́л еси́,/ му́чениче сла́вне, Христа́ Бо́га моли́ дарова́ти нам ве́лию ми́лость.
Сла́ва, и ны́не, Богоро́дичен:
Боже́ственнаго естества́ не отлу́чся, плоть быв во чре́ве Твое́м,/ но Бог вочелове́чся и пребы́сть, Иже по рождестве́ Ма́терь Тя Де́ву,/ я́ко пре́жде рождества́, сохрани́в Всенепоро́чну, еди́н Госпо́дь,/ Того́ приле́жно моли́ дарова́ти нам ве́лию ми́лость.
Крестобогоро́дичен:
Нескве́рная Агница Сло́ва, Нетле́нная Де́ва Ма́ти,/ на Кресте́ зря́щи пове́шена из Нея́ без боле́зни прозя́бшаго,/ ма́терски подо́бно рыда́ющи, вопия́ше:/ увы́ Мне, Ча́до Мое́, ка́ко стра́ждеши во́лею,/ хотя́ изба́вити от страсте́й безче́стия челове́ка?
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Страда́лец зако́нен, боле́зньми благоче́стия обложи́вся, яви́лся еси́, пребога́те,/ мучи́телей суровства́ не ужа́слся еси́.
Ка́меня, глаго́лемаго иаки́нфа14, вене́ц с Небесе́, Богому́дре, прие́м,/ ликова́ти сподо́бился еси́ с Небе́сными, я́ко Небе́сен.
До́блим смы́слом благоче́стия сло́во пропове́дал еси́/ и мучи́теля обличи́л еси́ непобеди́мым нра́вом, всеблаже́нне.
Богоро́дичен: Я́же Бо́га Вседержи́теля еди́на прие́мши, Богоблаже́нная,/ от вся́каго обстоя́ния и бед изба́ви пою́щия Тя.
Песнь 5
Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.
Неи́стовствующаго мучи́теля обличи́л еси́, страстоте́рпче,/ си́лою непобеди́мою от Бо́га оде́явся.
Безсме́ртно стяжа́л еси́ благоче́стие, венцено́сче,/ смерть во́льную за Христа́ прие́м.
Богоро́дичен: Да изба́вимся моли́твами Твои́ми, Пречи́стая, сете́й врага́,/ чту́щии па́че сло́ва Твое́ Рождество́.
Песнь 6
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Муче́ньми нечести́вых му́ченик стражда́, ра́довашеся,/ и стра́стию безстра́стнаго ум укрепля́я,/ егда́ безу́мными к Страстополо́жнику неосла́бно ведя́шеся.
Иаки́нф я́ко све́тлый, сень Боже́ственную просвети́л еси́,/ я́ко червле́ною избра́нною страда́ния кро́вию,/ возложе́ние был еси́ перворо́дных Це́ркве, пресла́вне.
Богоро́дичен: Да изба́вимся от лю́тых прегреше́ний моли́твами Твои́ми, Богороди́тельнице Чи́стая,/ и да получи́м, Пречи́стая, Боже́ственнаго сия́ния,/ из Тебе́ неизрече́нно воплоще́ннаго Сы́на Бо́жия.
Конда́к, глас 6:
Дре́во жи́зни посреде́ души́ своея́,/ ве́ру Твою́, Христе́, стяжа́вый Твой му́ченик,/ еде́мскаго рая́ честне́йший бысть,/ дре́во пре́лести зми́евы погуби́в дерзнове́нно ду́хом,/ венча́ся сла́вою Твое́ю, Многоми́лостиве.
Песнь 7
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.
Самоде́ржца нося́ страсте́й я́ве,/ благочести́вый по́мысл пи́щу беззако́нных оплева́л еси́, преблаже́нне,/ Боже́ственным сло́вом пита́емь,/ оте́ц на́ших,– вопия́,– Бо́же, благослове́н еси́.
Свяще́нно заколе́ние сам Го́сподеви ближа́йший прине́слся еси́, му́дре,/ душе́вною чистото́ю и ума све́тлостию,/ оте́ц на́ших,– вопия́,– Бо́же, благослове́н еси́.
Богоро́дичен: Па́дающу ро́ду челове́ческому, Де́во, сме́ртнаго ра́ди истле́ния,/ Исто́чник безсме́ртия и Жизнь нетле́нную заче́нши, упоко́ила еси́/ отце́в Бо́га, Чи́стая, Благослове́нная.
Песнь 8
Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
От лю́тыя тесноты́ и темни́цы к простра́нней широте́ рая́/ и кра́сней дости́гл еси́, святы́х ви́дя, светови́дныя све́тлости/ и, а́нгельския смотря́я ли́ки, Бо́гу предстоя́, приле́жно вопие́ши:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
Ты Бо́га возлюби́л еси́ от души́ да́же до кро́ве,/ ко греху́, страда́льче блаже́нне, сопротивля́яся и враги́ я́ве убива́я,/ и, побе́дными украша́емь венцы́, усе́рдно взыва́еши:/ свяще́нницы, благослови́те, лю́дие, превозноси́те во вся ве́ки.
Я́ко благоле́пно возложе́ние, я́ко ка́мень прозра́чен,/ я́ко свяще́нна багряни́ца, украси́л еси́ храм Небе́сный./ Святы́х свята́я му́ченическими сия́нии украси́в, непреста́нно взыва́еши:/ свяще́нницы, благослови́те, лю́дие, превозноси́те во вся ве́ки.
Богоро́дичен: Сло́во Бо́жие Безнача́льное/ па́че сло́ва родила́ еси́ на благодея́ние слове́снаго естества́,/ И́мже избавля́емся тлетво́рнаго умерщвле́ния и животворя́щий прия́хом Дух,/ те́мже Тя, Богоро́дицу и́стинную и су́щую, сла́вим, Де́во, во вся ве́ки.
Песнь 9
Ирмо́с: Тя, Неискусобра́чную Ма́терь Бо́га Вы́шняго,/ Тя, па́че ума́ ро́ждшую сло́вом вои́стинну Бо́га,/ вы́шшую пречи́стых Сил,/ немо́лчными славословле́нии велича́ем.
Ми́лостива сотвори́ твои́ми моли́твами Влады́ку,/ всем, ве́рно пою́щим твое́ непобеди́мое стра́да́ние,/ и́мже и́дольскую лесть упраздни́л еси́,/ сло́во же благоче́стия уясни́л еси́.
Виде́нием прекра́сен а́нгельским во́инством, я́ко Небе́сным ша́ром, Иаки́нфе,/ обагре́н кро́вию, и́же по Христе́ испове́дания и ве́ры,/ и венце́м муче́ния укра́шен.
Весь был еси́ Бо́жие всесвяще́нно прия́телище,/ те́ло и ду́шу освяти́л еси́ неосла́бным сопротивле́нием,/ к мучи́тельстей бра́ни и беззако́нней бы́вши,/ те́мже тя вси ублажа́ем.
Богоро́дичен: Умертви́ во мне, Влады́чице, еще́ живу́щий грех,/ оживи́ душе́вное умерщвле́ние де́йством и́стинныя Жи́зни,/ ро́ждшияся из утро́бы Твоея́ за неизрече́нное милосе́рдие,/ благоче́стно Тя велича́ющих.
