Служба в честь святаго мученика и архидиакона Лаврентия

НА ВЕЧЕ́РНИ

На Го́споди, воззва́х: стихи́ры пра́здника, глас 4.

Подо́бен: Дал еси́ зна́мение:

Днесь просия́л еси́,/ светови́ден, я́коже со́лнце све́тлое,/ на горе́ Фаво́рстей, показу́я друго́м Твои́м,/ я́ко Ты еси́, Спа́се, О́тчее Сло́во,/ и́же существа́ челове́ческаго за благоутро́бие/ плоть поне́сл еси́, Христе́./ Те́мже Твое́ человеколю́бное смотре́ние сла́вим,/ Иису́се Всеси́льне,/ Спа́се душ на́ших.

Днесь ра́дуются Небе́снии А́нгели,/ с челове́ки пра́зднующе, Христе́,/ Твое́ сла́вное блиста́ние/ и зре́ние, е́же на Фаво́ре,/ на не́мже предста́вил еси́ Моисе́я и Илию́,/ Христе́ Человеколю́бче,/ и Петра́, и Иа́кова, и Иоа́нна, пою́щия Тя:/ Иису́се Всеси́льне,/ Спа́се душ на́ших.

Весь ны́не ми́рный и преми́рный соста́в/ да подви́жется к похвале́нию Христа́ Бо́га на́шего,/ ме́́ртвыми и живы́ми облада́ющаго:/ боголе́пно бо преобразу́ющся,/ Себе́ предста́ви зако́на и благода́ти/ первостоя́тели и пропове́дники на Фаво́ре,/ я́коже благоизво́ли,/ Спас душ на́ших.

И́ны стихи́ры свята́го, глас 1.

Подо́бен: Небе́сных чино́в:

Послужи́в Сло́ву непоро́чно, преподо́бне,/ огне́м веще́ственным благово́нна же́ртва Го́сподеви прине́слся еси́/ и ра́дости Небе́сныя сподо́бился еси́,/ о нас моля́ всегда́,/ чту́щих тя, Лавре́нтие.

Возложи́в себе́ Го́сподеви, я́коже сокро́вище,/ и повину́яся словесе́м Его́, Богоблаже́нне,/ раздели́л еси́ бога́тно, му́чениче му́дре,/ ни́щим бога́тство некра́домое,/ муче́ния му́дро и чу́дно/ себе́ притво́ряя.

Добро́та му́чеников,/ сла́вный и чу́дный ору́жник,/ чуде́с исто́чник,/ наси́луемых помо́щник,/ звезда́ многосве́тлая,/ свяще́нный му́ченик,/ све́тло да восхва́лится ны́не Лавре́нтий.

Сла́ва, и ны́не, глас 4. Самогла́сен:

Пре́жде Креста́ Твоего́, Го́споди,/ гора́ Небеси́ подо́бяшеся,/ и о́блак, я́ко сень, протяза́шеся,/ Тебе́ преобразу́ющуся,/ от Отца́ же свиде́тельствуему,/ та́мо бе Петр со Иа́ковом и Иоа́нном,/ я́ко хотя́ху бы́ти с Тобо́ю,/ и во вре́мя преда́ния Твоего́:/ да, ви́девше чудеса́ Твоя́,/ не устраша́тся страда́ний Твои́х,/ и́мже поклони́тися нам в ми́ре сподо́би/ вели́кия ра́ди Твоея́ ми́лости.

На стихо́вне стихи́ры, глас 2. Самогла́сен:

Подо́бен: До́ме Евфра́фов:

Показа́ неизрече́нно Госпо́дь/ сла́ву Божества́/ на горе́ Фаво́рстей/ ны́не ученико́м,/ и́мже восхоте́.

Стих: Твоя́ суть небеса́,/ и Твоя́ есть земля́.

Прииди́те,/ со ученики́ притеце́м вси/ на высоту́ доброде́телей,/ я́ко да сподо́бимся/ с си́ми и благода́ти.

Стих: Фаво́р и Ермо́н/ о И́мени Твое́м возра́дуетася.

Вси земноро́днии,/ очи́стим сердца́,/ я́ко да а́бие/ прии́дет и к нам сла́ва/ Трисо́лнечныя благода́ти.

Сла́ва, и ны́не, глас 4. Самогла́сен:

Пре́жде Креста́ Твоего́, Го́споди,/ пои́м ученики́ на го́ру высо́ку,/ преобрази́лся еси́ пред ни́ми,/ луче́ю си́лы озаря́я их,/ отсю́ду у́бо человеколю́бием,/ отону́ду вла́стию,/ показа́ти хотя воскресе́ния све́тлость,/ его́же и нас, Бо́же, в ми́ре сподо́би,/ я́ко Ми́лостив и Человеколю́бец.

Тропа́рь, глас 4:

Му́ченик Твой, Го́споди, Лавре́нтий/ во страда́нии свое́м вене́ц прия́т нетле́нный от Тебе́, Бо́га на́шего,/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами/ спаси́ души на́ша.

Сла́ва, и ны́не, пра́здника, глас 7:

Преобрази́лся еси́ на горе́, Христе́ Бо́же,/ показа́вый ученико́м Твои́м сла́ву Твою́,/ я́коже можа́ху,/ да возсия́ет и нам, гре́шным,/ Свет Твой присносу́щный/ моли́твами Богоро́дицы,/ Светода́вче, сла́ва Тебе́.

НА У́ТРЕНИ

По 1-й стихоло́гии седа́лен, глас 4.

Подо́бен: Удиви́ся Ио́сиф:

На горе́ Фаво́рстей преобразу́яся, Спа́се,/ лу́чшим ученико́м показа́л еси́ сла́ву Твою́, Христе́,/ неизме́нное облиста́л еси́ Божества́./ О́блак же све́тел созва́в Илию́ и Моисе́я, глаго́люща с Тобо́ю./ Те́мже и Петр глаго́лаше:/ Ще́дре, добро́ есть зде бы́ти с Тобо́ю./ И́же тогда́ сим Свет Твой возсия́вый, просвети́ ду́ши на́ша.

Сла́ва, и ны́не, то́йже.

По 2-й стихоло́гии седа́лен, глас и подо́бен то́йже:

Непристу́пною Твое́ю, Христе́, сла́вою Боже́ственнаго Твоего́ Све́та преобра́жся,/ Твоя́ облиста́л еси́ Боже́ственныя ученики́, Иоа́нна, и Петра́, и Иа́кова,/ ужаси́л еси́ тех Боже́ственною благода́тию./ Глас же Оте́ч, возлю́бленнаго Сы́на свиде́тельствующ, слы́шаша/ и ви́деша лица́ Твоего́ сла́ву, Спа́се./ И́же всех, Сло́ве, спасти́ хотя, просвети́ ду́ши на́ша.

Сла́ва, и ны́не, то́йже.

Кано́н пра́здника со ирмосо́м на 8, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Моисе́й, на мо́ри проро́чески ви́дев/ о́блаком и столпо́м дре́вле о́гненным сла́ву Госпо́дню, вопия́ше:/ Изба́вителю и Бо́гу на́шему пои́м.

Я́ко ка́менем, те́лом покры́вся,/ обоже́нием Неви́димаго зря, Моисе́й Богови́дец взыва́ше:/ Изба́вителю и Бо́гу на́шему пои́м.

Ты на горе́ зако́нней и на Фаво́рстей/ ви́ден был еси́ Моисее́м во мра́це дре́вле,/ во Све́те же ны́не непристу́пнем Божества́.

Ин кано́н свята́го, на 4, его́же краегране́сие: Лавре́нтия держа́внаго пою́ прему́дре. Глас 4.

Песнь 1

Ирмо́с: Триста́ты кре́пкия,/ Рожде́йся от Де́вы,/ безстра́стия во глубине́/ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние.

В цве́тнице сла́дости, я́ко Христо́в во́ин, досто́йно наслажда́яся/ и а́нгельским сликовству́яй си́лам,/ сия́ние ми светоно́сное дарова́ти моли́,/ воспева́ющу тя, блаже́нне Лавре́нтие.

В по́двиги вшед честна́го му́чения,/ победоно́сный страда́лец тве́рдостию души́ показа́лся еси́, Лавре́нтие,/ венце́м правды благоле́пно оде́явся и диади́мою побе́ды.

Сын я́ко быв све́та и дне,/ пресла́вно от за́пад, я́ко со́лнце нам чу́вственно, возсия́л еси́,/ заре́ю пресве́тлою озаря́я концы́, всесла́вный му́чениче Лавре́нтие.

Богоро́дичен: Изба́вльшеся честны́м рождество́м Твои́м, Де́во,/ а́дских и тле́нных уз и зако́ннаго осужде́ния, Пречи́стая,/ – ра́дуйся, Обра́дованная,– благода́рно вопие́м Ти,/ – спаси́тельная две́ре благода́ти.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Осеня́ющая сла́ва в се́ни пе́рвее и Моисе́еви бесе́дующи, Твоему́ уго́днику,/ о́браз бысть облиста́вшаго неизрече́нно/ на Фаво́ре, Влады́ко, Твоего́ преображе́ния.

Совзыдо́ша Ти, Сло́ве Единоро́дный,/ вы́шнии апо́стольстии верси́ на го́ру Фаво́рскую,/ и сопредста́ша Ти Моисе́й же и Илия́, я́ко Бо́жия слуги́, Еди́не Человеколю́бче.

Бог Сло́во сый, весь зе́млен бысть,/ всему́ Бо́жеству смеси́в челове́чество во ипоста́си Свое́й,/ ю́же во двою́ существу́ Моисе́й и Илия́ же ви́деша на горе́ Фаво́ре.

Ин

Ирмо́с: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́.

Име́яй Креста́ побе́ду,/ к сопротивобо́рцем до́блественне ополчи́лся еси́/ и побе́ды венцено́сец яви́лся еси́, досточу́дне.

Зако́ном Христо́вым огражде́н,/ законоположе́нию злочести́вых, я́ко непобеди́м, сопроти́вился еси́/ до́блим терпе́нием, всеблаже́нне.

Си́лою Бо́жиею укрепля́емь,/ многобо́жия не́мощь разори́л еси́,/ Христо́во же преве́чное уясни́л еси́ Божество́.

Богоро́дичен: Ра́вен Отцу́ и Ду́ху естество́м, и су́ществом, и Божество́м бысть,/ челове́ком ра́вно Сло́во,/ вопло́щшееся от Тебе́, Всенепоро́чная.

Конда́к, глас 2.

Подо́бен: Вы́шних ища́:

Огне́м Боже́ственным распали́в се́рдце твое́,/ огнь страсте́й до конца́ испепели́л еси́,/ страда́льцев утвержде́ние, Богоно́се му́чениче Лавре́нтие,/ и в страда́ниих вопия́л еси́ ве́рно:/ ничто́же мя разлучи́т любве́ Христо́вы.

И́кос:

Возсия́вшаго, я́ко свети́ло неле́стное, в ми́ре,/ соше́дшеся, ве́рнии вси, пе́сньми почти́м Лавре́нтия страстоте́рпца,/ я́ко таи́нника неизрече́нных,/ того́ бо моли́твами избавля́емся лю́тых прегреше́ний./ Сердца́ очи́стивше, просла́вим Христа́,/ того́ прославля́ющаго, кре́пка в страда́нии, и глаго́люща:/ ничто́же мя разлучи́т от любве́ Христо́вы.

Седа́лен, глас 8.

Подо́бен: Прему́дрости:

Небе́сное бога́тство собра́в и ни́щим сие́ прине́с, расточи́л еси́,/ дал еси́ а́лчущим хлеб твой/ и, сим стяжа́в жизнь нетле́нную,/ во Христо́ве испове́дании просия́л еси́, сла́вне./ Те́мже, му́жествовав и зако́нно пострада́в,/ вене́ц прия́л еси́ от Бо́га трудо́в твои́х, страстоно́сче Лавре́нтие./ Моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, пра́здника, глас то́йже.

Подо́бен: Повеле́нное:

Сокрове́нную мо́лнию под пло́тию су́щества Твоего́, Христе́, и Боже́ственнаго благоле́пия/ на святе́й показа́л еси́ горе́, Благоде́телю, просия́в су́щим с Тобо́ю ученико́м./ И, разуме́вше нестерпи́му су́щу сла́ву Твою́,– Свят еси́,– возопи́ша,/ я́ко, непристу́пен Сый, ви́ден был еси́ пло́тию ми́рови, Еди́не Человеколю́бче.

Песнь 4

Ирмо́с: Из пло́ти Твоея́ лучи́ Божества́/ исхожда́ху проро́ком и апо́столом./ Тем нача́льницы, пою́ще, взыва́ху:/ сла́ва си́ле Твое́й, Го́споди.

И́же купину́ сохрани́вый неврежде́ну, прикосну́вшуюся огню́,/ Моисе́ю богосия́нную плоть показа́л еси́, Влады́ко, пою́щему:/ сла́ва си́ле Твое́й, Го́споди.

Скры́ся заре́ю Божества́ чу́вственное со́лнце,/ я́ко на горе́ Фаво́ре ви́дев Тя преобразу́ющася, Иису́се мой:/ сла́ва си́ле Твое́й, Го́споди.

Огнь, не опаля́я ве́щи теле́сныя, ви́ден бысть невеще́ствен,/ я́коже Моисе́ю и апо́столом яви́лся еси́, Илии́ же, Влады́ко,/ еди́н от двою́, во дву соверше́нну естеству́.

Ин

Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Служи́тель Сло́ва и сло́вом украше́н,/ Сло́ва любо́вию, нра́вом душе́вным закала́ется/ и с Сло́вом пра́ведно Ца́рствует ны́не,/ весе́лия и сла́вы его́ насыща́яся.

Дрема́нием нече́стия благоче́стно не воздрема́вся,/ бо́дростию Боже́ственною, му́ченическим твои́м стоя́нием/ от о́чию сон и́же в сме́рть оттря́сл еси́, му́чениче Христо́в свяще́нне.

На сопротивобо́рных злочести́ваго противле́ния и́стинными ору́жии благоче́стия огра́ждся,/ сих до конца́ низложи́л еси́ па́мять/ ве́ры ра́ди и нра́ва любо́вию.

Богоро́дичен: Скве́рну всю пе́рвыя отложи́вше сне́ди,/ живо́тным хле́бом с Небесе́ напита́емся, от земли́ Де́вы возсия́вшаго,/ Ю́же, я́ко Хода́таицу благих, воспои́м.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Вети́йствующий язы́к Твоего́ вели́чества не мо́жет веща́ти:/ я́ко бо, Держа́й живо́т и сме́ртию Влады́й,/ предста́вил еси́ на Фаво́рстей горе́ Моисе́я и Илию́,/ свиде́тельствующия Твое́ Божество́.

И́же рука́ми неви́димыми созда́в по о́бразу Твоему́, Христе́, челове́ка,/ началообра́зную Твою́ в созда́нии добро́ту показа́л еси́,/ не я́ко во о́бразе, но я́ко Сам Сый по существу́,/ Бог был еси́ и Челове́к.

Сраствори́вся неслия́нно, угль горя́щ показа́л еси́ нам Божества́,/ попаля́ющ у́бо грехи́, ду́ши же просвеща́ющ, на Фаво́рстей горе́,/ Моисе́я со Илие́ю, ученико́в же старе́йшия удиви́л еси́.

Ин

Ирмо́с: Нечести́вии не у́зрят сла́вы Твоея́, Христе́,/ но мы Тя, Единоро́дне,/ Оте́ческия сла́вы сия́ние Божества́,/ от но́щи у́тренююще,/ воспева́ем Тя, Человеколю́бче.

Неукло́нным виде́нием Боже́ственныя добро́ты зря,/ вся кра́сная, я́же на земли́, Лавре́нтие, ты преоби́дел еси́/ и лю́тыя те́ла боле́зни, досточу́дне.

Христа́, Служи́теля бы́вша нам, да́ры от Отца́ позна́в,/ служи́тель Того́ быв,/ к Нему́же кро́вию отше́л еси́, преблаже́нне.

Свяще́нно возложе́ние и украше́ние благоле́пно Христу́, блаже́нне, прине́слся еси́,/ сень уясни́л еси́ Небе́сную,/ иде́же ны́не быва́я, наслажда́ешися сия́ния.

Богоро́дичен: Соесте́ствен и сообра́зен сый Отцу́, Сын Единоро́дный,/ челове́ком бысть во́лею сро́ден,/ вопло́щся Вы́шний из чре́ва Твоего́, Ма́ти Де́во.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Я́ко ве́лие и стра́шное узре́ся виде́ние днесь:/ с небесе́ у́бо чу́вственное, от земли́ же несравне́нное/ облиста́ Со́лнце пра́вды мы́сленное на горе́ Фаво́рстей.

Пре́йде у́бо сень зако́нная, изнемо́гшая,/ прии́де же я́ве Христо́с и́стина,– Моисе́й возопи́,/ на Фаво́ре ви́дев Твое́ Божество́.

Столп о́гненный – Христа́ преобразу́ющася,/ о́блак же – я́ве благода́ть Ду́ха, осени́вшую на Фаво́ре,/ предсказа́ша явле́ннейше.

Ин

Ирмо́с: Приидо́х во глубины́ морски́я,/ и потопи́ла мя есть бу́ря мно́гих грехо́в,/ но, я́ко Бог, из глубины́ возведи́ живо́т мой, Многоми́лостиве.

Веще́ственный огнь, тя испе́к,/ Царю́ всех устро́и сла́дко бра́шно,/ на́ше спасе́ние лю́бящему и а́лчущу, всесла́вне.

Весь све́ту прибли́жился еси́ Нача́льныя Тро́ицы,/ я́ко служи́тель Тоя́, сый светови́ден, страстоте́рпче, был еси́,/ озаря́я пою́щия тя.

Укрепля́емь Боже́ственною си́лою,/ на разжже́нней сковраде́ лежа́, терпе́л еси́, му́чениче,/ любо́вию Христо́вою ду́шу огне́м разжига́я и росо́ю духо́вною.

Богоро́дичен: Была́ еси́ Бо́жия Ма́ти, Де́во, вмести́тельно прия́телище,/ престо́л одушевле́н, гора́ свята́, и киво́т, и сень богоде́лана,/ и све́щник златоза́рен.

Конда́к, глас 7:

На горе́ преобрази́лся еси,/ и я́коже вмеща́ху ученицы́ Твои́,/ сла́ву Твою́, Христе́ Бо́же, ви́деша,/ да егда́ Тя у́зрят распина́ема,/ страда́ние у́бо уразуме́ют во́льное,/ ми́рови же пропове́дят,/ я́ко Ты еси́ вои́стинну О́тчее сия́ние.

И́кос:

Воста́ните, лени́вии, и́же всегда́ ни́зу пони́кшии в зе́млю души́ моея́ по́мыслы,/ возми́теся и возвы́ситеся на высоту́ Боже́ственнаго восхожде́ния./ Притеце́м к Петру́ и к Зеведе́евым/ и вку́пе со о́неми Фаво́рскую го́ру дости́гнем,/ да ви́дим с ни́ми сла́ву Бо́га на́шего, глас же услы́шим,/ его́же свы́ше слы́шаша и пропове́даша О́тчее сия́ние.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Ны́не ви́дена бы́ша апо́столом неви́димая Божества́ во пло́ти,/ на горе́ Фаво́рстей облиста́вша, вопию́щим:/ благослове́н еси́, Го́споди Бо́же, во ве́ки.

Ужасо́шася стра́хом, уди́вльшеся благоле́пию Боже́ственнаго Ца́рства,/ на горе́ Фаво́рстей апо́столи, вопию́ще:/ благослове́н еси́, Го́споди Бо́же, во ве́ки.

Ны́не неуслы́шанная услы́шана бы́ша:/ без отца́ бо Сын от Де́вы Оте́ческим гла́сом сла́вно свиде́тельствуется,/ я́ко Бог и Челове́к То́йже во ве́ки.

Положе́нием не был еси́ Вы́шняго, существо́м же Сын возлю́блен,/ пре́жде Сый, нам прибли́жился еси́ непрело́жно:/ благослове́н еси́, Го́споди Бо́же, во ве́ки.

Ин

Ирмо́с: Спасы́й во огни́ Авраа́мския Твоя́ о́троки/ и халде́и уби́в,/ я́же Пра́вда пра́ведно уловля́ше,/ препе́тый Го́споди,/ Бо́же оте́ц на́ших, благослове́н еси́.

Тайноводи́ти предъизбра́н и служи́ти Сло́ву,/ сосу́д показа́ся свяще́н Небе́снаго хра́ма и возложе́ние, воспева́я Сотво́ршему:/ препе́тый Го́споди, Бо́же оте́ц на́ших, благослове́н еси́.

Зако́ном живота́ и́же во Христе́ огражда́емь, преблаже́нне,/ су́щим сме́рти и тли законоположи́телем ума́ не подклони́л еси́, воспева́я, Лавре́нтие:/ препе́тый Го́споди, Бо́же оте́ц на́ших, благослове́н еси́.

Я́коже не́кий, безболе́знен я́ве, те́лом обложе́н, преблаже́нне,/ до́блим по́мыслом на всея́дца огня́ дерзну́л еси́, взыва́я, пребога́те:/ препе́тый Го́споди, Бо́же оте́ц на́ших, благослове́н еси́.

Богоро́дичен: Дверь показа́лася еси́ мы́сленная восто́ка Вы́шняго,/ я́вльшагося на земли́ челове́ком из Тебе́, Богоневе́сто,/ па́че сло́ва и ума́, Бо́га отце́в благослове́ннаго.

Песнь 8

Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Услы́шавше, Влады́ко, от Отца́ свиде́тельствуема,/ и я́ко челове́ческа тверде́йша зра́ка зре́ти лица́ Твоего́ блиста́ния не терпя́ще,/ Твои́ ученицы́ на зе́млю ниц па́даху, со стра́хом пою́ще:/ свяще́нницы, благослови́те, лю́дие, превозноси́те во вся ве́ки.

Ца́рствующим еси́ Царь прекра́сен и и́же всю́ду владя́щим Госпо́дь си́лен,/ Блаже́н и во све́те живы́й непристу́пнем,/ Ему́же ученицы́ уди́вльшеся, Моисе́й же и Илия́ вопия́ху:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Я́ко Не́бом владу́щему, и земле́ю госпо́дствующему,/ и над преиспо́дними о́бласть иму́щему, Христе́, предста́ша Ти:/ от земли́ у́бо – апо́столи, я́ко с Небесе́ же – Фесви́тянин Илия́,/ Моисе́й же – от ме́ртвых, пою́ще согла́сно:/ лю́дие, превозноси́те во вся ве́ки.

Уны́ние ражда́ющия печа́ли на земли́ оста́виша апо́столов избра́ннии, Человеколю́бче,/ я́ко Тебе́ после́доваша, ко и́же от земли́ преложе́нию Боже́ственнаго жития́./ Те́мже и, по достоя́нию Твоего́ Богоявле́ния улучи́вше, поя́ху:/ лю́дие, превозноси́те Его́ во ве́ки.

Ин

Ирмо́с: Изба́вителю всех Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

Тве́рдым умо́м был еси́ нестерпи́маго пла́мене крепча́йши,/ я́ко в чужде́м телеси́ сожига́емь, блаже́нне, ве́рою поя́:/ благослови́те, вся дела́ Госпо́дня, Го́спода.

Отроко́м трие́м подо́бяся, огня́ погаси́л еси́ у́глие,/ росо́ю Боже́ственныя благода́ти, взыва́я и поя́:/ вся дела́, благослови́те, по́йте Го́спода.

Просвеще́ние Христо́с тебе́ быв, Свое́ю кре́постию препоя́са тя/ и к Себе́ возведе́, благоче́стно пою́ща:/ вся дела́, благослови́те, по́йте Го́спода.

Богоро́дичен: Ко́рене Иессе́ова жезл была́ еси́/ и Христа́ Бо́га моего́ и Го́спода па́че естества́ прозябла́ еси́, Божества́ цвет./ Вся дела́ да благословя́т, Де́во, Рождество́ Твое́.

Песнь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

Да Твое́ пока́жеши я́ве неизрече́нное второ́е сни́тие,/ я́ко да Вы́шний Бог яви́шися,/ стоя́ посреде́ бого́в, апо́стол на Фаво́ре,/ Моисе́я же и Илию́, неизрече́нно осия́л еси́./ Те́мже вси Тя, Христе́, велича́ем.

Прииди́те, Мне покори́теся, лю́дие, возше́дше на го́ру святу́ю пренебе́сную,/ невеще́ственно ста́нем во гра́де Жива́го Бо́га/ и у́зрим мы́сленно Божество́ невеще́ственное,/ Отца́, и Ду́ха, в Сы́не Единоро́днем облиста́ющее.

Привле́кл еси́ любо́вию мя, Спа́се,/ и премени́л еси́ Боже́ственным Твои́м жела́нием,/ но попали́ огне́м невеще́ственным грехи́ моя́/ и насы́титися Твоея́ пи́щи сподо́би,/ да, обое́ игра́я, велича́ю, Бла́же, вели́чия Твоя́.

Ин

Ирмо́с: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови Благослове́ние процвела́ еси́./ Тем Тя вси велича́ем.

Соверше́нно заколе́ние и прия́тно кади́ло Влады́це прине́слся еси́,/ я́коже зла́то в горни́ле, огне́м искуси́вся страда́ния,/ и украше́ние Це́ркве быв пе́рвенец, досточу́дне.

Зре́нием неукло́нным к Бо́гу обожа́емь и соедине́нием лу́чшим,/ сло́вом и Боже́ственным виде́нием,/ све́том кра́йним, Лавре́нтие, просвети́лся еси́ све́тло./ Те́мже тя вси ублажа́ем.

Я́ко со́лнце, блаже́нне, от за́пада возсия́л еси́, чу́до ве́лие и пресла́вно,/ всю просвеща́я Це́рковь твои́ми блиста́ньми, досточу́дне,/ и согрева́я вся теплото́ю ве́ры,/ те́мже тя вси ублажа́ем.

Богоро́дичен: О́бразы, Всенепоро́чная, Твоего́ рождества́ проро́цы узре́вше,/ издале́ча сим научи́вшеся,/ от Боже́ственнаго вдохнове́ния Ду́ха, ми́ру велегла́сно пропове́даша,/ и́хже сбытие́м ны́не чуди́мся.

Свети́лен. Пра́здника:

Све́те неизме́нный, Сло́ве, Све́та Отца́ нерожде́нна, в явле́ннем све́те Твое́м,/ днесь на Фаво́ре Свет ви́дехом Отца́, Свет и Ду́ха,/ Све́том наставля́ющаго всю тварь.

Сла́ва, и ны́не, то́йже.

На стихо́вне стихи́ры, глас 6.

Подо́бен: А́нгельския:

Возсияв па́че ума́/ от Де́вы Пресвяты́я, Сло́ве Бо́жий,/ во Ада́ма весь обле́кся,/ и́же пре́жде омрачи́вшееся естество́ все просвети́л еси́/ Боже́ственным зра́ка Твоего́ измене́нием,/ преобра́жся на горе́ Фаво́рстей, Влады́ко,/ пре́жде Честна́го Твоего́ Креста́, Христе́ Бо́же наш.

Стих: Твоя́ суть небеса́,/ и Твоя́ есть земля́.

Гора́, я́же иногда́ бя́ше мра́чна и ды́мна,/ се ны́не честна́ и свята́ есть:/ И́же пе́рвее у́бо Изра́иля наста́вивый,/ я́коже пи́шет, столпо́м огнезра́чным и о́блаком,/ днесь просия́ неизрече́нно,/ па́че со́лнца, Христо́с на сей,/ я́ко Бог просвети́в вся́ческая.

Стих: Фаво́р и Ермо́н/ о И́мени Твое́м возра́дуетася.

Ны́не раболе́пно бесе́дующу Влады́це,/ ви́де Ки́фа на Фаво́ре два му́жа:/ добро́ есть,– вопия́ше,– зде бы́ти,/ сотвори́м три се́ни, а́ще хо́щеши кому́ждо,/ Тебе́, Христе́ мой, еди́ну,/ с Моисе́ем же и Илии́, Твои́м рабо́м./ Е́же глаго́лаше не ве́дый,/ у́жасом же содержи́м бя́ше.

Сла́ва, и ны́не, глас то́йже:

Влады́чице Чи́стая, Богоро́дице Пресвята́я,/ изба́ви на Тя наде́ющияся от бед/ и спаси́ от вся́каго вре́да/ в нощи́ Тя и во дни,/ ны́не же и при́сно моля́щия,/ и бу́дущаго Суда́ изба́вити,/ моля́щи Твоего́ Сы́на,/ на Фаво́ре неизрече́нно облиста́вшаго.

НА ЛИТУРГИ́И

Блаже́нны пра́здника, песнь 5-я обои́х кано́нов со ирмосо́м на 6.