Служба в честь святаго мученика и архидиакона Евпла

НА ВЕЧЕ́РНИ

На Го́споди, воззва́х: стихи́ры пра́здника, глас 1.

Подо́бен: Небе́сных чино́в:

И́же с Моисе́ом глаго́лавый дре́вле/ на горе́ Сина́йстей о́бразы, глаго́ля:/ Аз есмь Бог Сый;/ днесь же на горе́ Фаво́рстей преобрази́ся,/ началообра́зное показу́я, луча́ми облиста́яся./ Те́мже, Христе́, велича́ю Твою́ си́лу.

Пое́мь осо́бь Твоя́, Христе́, ученики́,/ Петра́, Иа́кова и Иоа́нна,/ во́лею на го́ру сих возве́л еси́,/ чу́до стра́шное показа́в/ и нестерпи́мое Боже́ственнаго прише́ствия Твоего́ издале́ча/ присносу́щное благоле́пие.

Твоего́, Христе́, прише́ствия непостижи́маго/ тре́петни бы́вше апо́столи дре́вле,/ ниц на зе́млю па́дше,/ Боже́ственней Твое́й дивля́хуся си́ле:/ со́лнца просия́в светле́е, Бла́же,/ неизрече́нною си́лою Твое́ю.

И́ны стихи́ры свята́го, глас 4.

Подо́бен: Дал еси́ зна́мение:

До́бре преше́л еси́ страда́ния пучи́ну,/ благопла́вав, пребога́те, дыха́нии Ду́ха,/ и в ти́хое приста́нище устреми́лся еси́ Ца́рствия Бо́жия,/ в не́мже боле́зней твои́х возме́здие бога́тно восприя́л еси́/ и со А́нгелы предстои́ши Влады́це тва́ри,/ венцено́сче блаже́нне.

В порфи́ру, от кро́ве обагре́ну твоея́, оде́ян, сла́вне,/ и побе́ды венце́м живонача́льною руко́ю увязе́н,/ на Небесе́х живе́ши, сца́рствуя Всеще́дрому./ Те́мже тя ублажа́ем,/ я́ко и́стинна му́ченика, и Сло́ва служи́теля,/ и ве́ры утвержде́ние.

Евпл чу́дный,/ та́ин служи́тель Влады́чних быв,/ я́ко овча́ незло́биво, себе́ сама́го приведе́,/ посече́н быв мече́м,/ благово́нно приноше́ние/ и а́гня Боже́ственное быв./ Того́ у́бо ублажа́ем,/ свяще́нное его́ страда́ние свяще́нно пра́зднующе,/ мучениколю́бцы, днесь.

Сла́ва, и ны́не, глас то́йже:

Гора́, я́же иногда́ мра́чна и ды́мна,/ ны́не же честна́ и свята́ есть,/ на не́йже но́зе Твои́ стоя́сте, Го́споди,/ преве́чное бо сокрове́нное та́инство/ напосле́док явле́но сотвори́,/ стра́шное Твое́ преображе́ние,/ Петру́, и Иоа́нну, и Иа́кову./ И́же, такова́ сия́ния лица́ Твоего́ не терпя́ще/ и све́тлости риз Твои́х,/ ниц на лице́ земли́ покрыва́хуся,/ и́же и у́жасом одержи́ми, дивля́хуся,/ ви́дяще Моисе́я и Илию́, глаго́люща с Тобо́ю,/ хотя́щая приключи́тися Тебе́;/ и глас от Отца́ свиде́тельствоваше, глаго́ля:/ Сей есть Сын Мой возлю́бленный,/ о Не́мже благоизво́лих,/ Того́ послу́шайте,/ И́же и да́рует ми́рови ве́лию ми́лость.

На стихо́вне стихи́ры, глас 2.

Подо́бен: До́ме Евфра́фов:

Естество́, е́же во Ада́ме,/ Христо́с обнови́ти хотя́,/ на го́ру ны́не/ восхо́дит Фаво́рскую,/ обнажа́я ученико́м Божество́.

Стих: Твоя́ суть небеса́,/ и Твоя́ есть земля́.

Свет трисия́нный,/ облиста́в неизрече́нно,/ Боже́ственныя Твоея́ сла́вы,/ на горе́ Фаво́рстей, Спа́се,/ вся́ческая уясни́.

Стих: Фаво́р и Ермо́н/ о И́мени Твое́м возра́дуетася.

Внеза́пу ученицы́,/ премене́ние ви́девше оде́жды/ и всего́ телесе́ Твоего́, Сло́ве,/ ни́цы па́дше,/ поя́ху.

Сла́ва, и ны́не, глас 4:

На горе́ высо́це преобра́жся, Спас,/ верхо́вныя име́я ученики́,/ пресла́вно облиста́л есть,/ показу́я, я́ко высото́ю доброде́телей облиста́вше,/ и Боже́ственней сла́ве сподо́бятся./ Глаго́лющии со Христо́м Моисе́й и Илия́ пока́зоваху,/ я́ко живы́ми и ме́ртвыми облада́ет/ и И́же дре́вле зако́ном и проро́ки глаго́лавый есть Бог,/ Ему́же и глас Оте́ч из о́блака све́тла послу́шествоваше, глаго́лющий:/ Того́ послу́шайте,/ И́же Кресто́м а́да плени́вша/ и ме́ртвым да́рующа живо́т ве́чный.

Тропа́рь, глас 4:

Му́ченик Твой, Го́споди, Евпл/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами/ спаси́ ду́ши на́ша.

Сла́ва, и ны́не, пра́здника, глас 7:

Преобрази́лся еси́ на горе́, Христе́ Бо́же,/ показа́вый ученико́м Твои́м сла́ву Твою́,/ я́коже можа́ху,/ да возсия́ет и нам, гре́шным,/ Свет Твой присносу́щный/ моли́твами Богоро́дицы,/ Светода́вче, сла́ва Тебе́.

НА У́ТРЕНИ

По 1-й стихоло́гии седа́лен, глас 4.

Подо́бен: Удиви́ся Ио́сиф:

На горе́ Фаво́рстей преобрази́лся еси́, Бо́же,/ посреди́ Илии́ и Моисе́я прему́дрых со Иа́ковом, и Си́моном, и Иоа́нном./ Петр же, сый ту, сия́ Тебе́ глаго́лаше:/ добро́ есть зде сотвори́ти три се́ни/ еди́ну Моисе́ю, и еди́ну Илии́, и еди́ну Тебе́, Влады́це Христу́./ И́же тогда́ сим Свет Твой возсия́вый, просвети́ души на́ша.

Сла́ва, и ны́не, то́йже.

По 2-й стихоло́гии седа́лен, глас то́йже.

Подо́бен: Яви́лся еси́ днесь:

Пра́здник пресве́тел Влады́чень прии́де,/ прииди́те вси, на го́ру, у́мно предочи́стившеся, взы́дем Фаво́рскую,/ Христа́ ви́дети.

Сла́ва, и ны́не, то́йже.

Кано́н пра́здника со ирмосо́м на 8. Творе́ние кир Космы́, глас 4.

Песнь 1

Ирмо́с: Ли́цы изра́ильтестии,/ невла́жными стопа́ми/ понт Че́рмный и вла́жную глубину́ прогна́вше,/ вса́дники триста́ты враги́ ви́дяще в ней погруже́ны,/ с весе́лием поя́ху:/ пои́м Бо́гу на́шему, я́ко просла́вися.

Глаго́лы живо́тныя друго́м Христо́с/ и о Боже́ственнем наказу́я Ца́рствии, рече́:/ во Мне Отца́ позна́йте;/ Све́том я́ко облиста́я непристу́пным, в ра́дости пою́ще:/ пои́м Бо́гу на́шему, я́ко просла́вися.

Си́лою язы́к облече́теся, дру́зи ученицы́,/ чу́дни же бу́дете в бога́тстве их, я́ко сла́вы напо́лнитеся,/ я́ко явлю́ся светле́е со́лнца, облиста́я в ра́дости пою́щих:/ пои́м Бо́гу на́шему, я́ко просла́вися.

Днесь Христо́с, на горе́ Фаво́рстей просия́в я́сно Боже́ственною заре́ю,/ я́коже обеща́ся, ученико́м обнажи́ зрак,/ светоно́сныя же напо́лнившеся Боже́ственныя зари́, в ра́дости поя́ху:/ пои́м Бо́гу на́шему, я́ко просла́вися.

Ин кано́н свята́го на 4, его́же краегране́сие: Сла́внаго Е́впла благоче́стно восхваля́ю. Творе́ние Ио́сифово, глас 4.

Песнь 1

Ирмо́с: Триста́ты кре́пкия,/ Рожде́йся от Де́вы,/ безстра́стия во глубине́/ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние.

Ору́жием Креста́ до́бре преплы́в, вшел еси́ в приста́нище жи́зни,/ в не́мже ра́достно водворя́яся, сла́вне,/ уста́ви се́рдца моего́ многомяте́жное волне́ние,/ ти́хо сла́вити па́мять твою́.

Всесве́тлая звезда́, доброде́тельными уче́нии озаря́я ве́рныя,/ возсия́л еси́, му́дре, честне́й тве́рди, Е́впле, церко́вней/ и мрак отгна́л еси́ де́монский си́лою духо́вною.

Вжиля́емь, му́дре, Боже́ственною си́лою,/ дерзнове́нным по́мыслом, Бо́га, от Бо́га рожде́ннаго, пропове́дал еси́,/ распя́тие во́лею претерпе́вшаго и сме́ртию сме́рть разо́ршаго.

Да подви́жатся к твоему́ хвале́нию вся́ка уста́,/ я́ко из уст вра́жиих Боже́ственными уче́нии, Богоно́се, исхи́тил еси́,/ вся, благопоко́рно прие́мшия словеса́ твоя́, страстоно́сче Христо́в до́блественне.

Богоро́дичен: Уясни́в Твою́ Христо́с утро́бу светоно́сную сни́тием стра́шным,/ я́ко со́лнце, Чи́стая, су́щим в ми́ре возсия́,/ реша́ многобо́жия мглу те́мную и просвеща́я ми́ра концы́.

Песнь 3

Ирмо́с: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́.

Во всего́ Ада́ма обле́кся, Христе́,/ очерне́вшее, измени́в, просвети́л еси́ дре́вле естество́/ и измене́нием зра́ка Твоего́ богосоде́лал еси́.

Столпо́м огнезра́чным и о́блаком дре́вле/ И́же в пусты́ни Изра́иля веды́й,/ днесь на горе́ Фаво́рстей неизрече́нно во све́те Христо́с просия́.

Ин

Ирмо́с: Я́ко непло́ды роди́ от язы́к Це́рковь,/ и мно́гое в ча́дех изнемо́же со́нмище,/ чу́дному Бо́гу на́шему возопии́м:/ Свят еси́, Го́споди.

Себе́ сама́го изда́л еси́, я́ко а́гнец,/ во́лею закла́тися хотя́ за Христа́,/ тебе́ ра́ди во́лею обнища́вшаго и закла́вшася, Е́впле всеблаже́нне.

Заколе́ние непоро́чно, благово́нна же́ртва/ и приноше́ние соверше́нно прине́слся еси́ Бо́гу, ра́достно, блаже́нне, вопия́:/ Свят еси́, Го́споди.

Зако́ны утвержда́емь Ева́нгельскими, Богому́дре,/ посреди́ муже́й беззако́нных предста́л еси́, зовы́й я́ве:/ не и́щущим обрето́хся, обличи́ти сих злоче́стие.

Богоро́дичен: Бог, посреди́ Тебе́ всели́вся,/ ника́ко де́вства Твоего́ ключа́ поколеба́, Чи́стая,/ Его́же приле́жно моли́, утверди́ти вся, пою́щия Тя.

Конда́к свята́го, глас 1.

Подо́бен: Лик а́нгельский:

Зако́ны Христо́вы в руку́ обнося́,/ предста́л еси́, вопия́ враго́м, в по́двизе:/ самозва́н есмь страда́льчествовати тверде́йши./ Те́мже, приклони́в ра́достно вы́ю твою́,/ подъ́ял еси́ усече́ние мече́м,/ сконча́вый тече́ние твое́.

Седа́лен, глас 1.

Подо́бен: Гроб Твой, Спа́се:

Ору́жием Креста́ до́бре преплы́в,/ вшел еси́ в приста́нище ти́хо Небе́сных жили́щ,/ в не́мже водворя́яся,/ творя́щим твою́ па́мять моле́бную твои́х по́двиг днесь, моли́ся Зижди́телю,/ изба́витися от вся́кия ну́жды и скорбе́й.

Сла́ва, глас 4:

Христо́вых та́ин досто́ин бысть, Богому́дре Е́впле,/ возсия́л еси́ блиста́нием Боже́ственнаго Ду́ха,/ блазнь13 всю до конца́ потреби́л еси́,/ тем страда́нием зми́я победи́./ Но я́ко же́ртва прия́тна принесе́ся Творцу́,/ сего́ ра́ди вопие́м ти:/ моли́ Христа́ Бо́га о всех нас.

И ны́не, пра́здника, глас то́йже.

Подо́бен: Удиви́ся Ио́сиф:

Непристу́пною Твое́ю, Христе́, сла́вою Боже́ственнаго Твоего́ Све́та, преобра́жся,/ Твоя́ облиста́л еси́ Боже́ственныя ученики́, Иоа́нна, и Петра́, и Иа́кова,/ ужаси́л еси́ тех Боже́ственною благода́тию./ Глас же Оте́ч, возлю́бленнаго Сы́на свиде́тельствующ, слы́шаша/ и ви́деша лица́ Твоего́ сла́ву, Спа́се./ И́же всех, Сло́ве, спасти́ хотя́, просвети́ ду́ши на́ша.

Песнь 4

Ирмо́с: Услы́шах сла́вное смотре́ние Твое́, Христе́ Бо́же,/ я́ко роди́лся еси́ от Де́вы,/ да от ле́сти изба́виши зову́щия:/ сла́ва си́ле Твое́й, Го́споди.

Зако́н в Сина́и писа́нием вообража́я, Христе́ Бо́же,/ во о́блаце, и огни́, и мра́це, и в ви́хре яви́лся еси́ носи́м:/ сла́ва си́ле Твое́й, Го́споди.

Да уве́риши сла́вное строе́ние Твое́, Христе́ Бо́же,/ я́ко Сый пре́жде век и То́йже на о́блаце восхожде́ние положи́вый,/ на Фаво́ре неизрече́нно просия́л еси́.

Соглаго́люще, предстоя́ху раболе́пно Тебе́, Влады́це Христу́,/ к ни́мже па́рою огня́ и мра́ка и то́нким хла́дом бесе́довал еси́:/ сла́ва си́ле Твое́й, Го́споди.

Возвеща́ху сла́вное Креста́ ра́ди Твоего́, на Фаво́р прише́дше,/ и́же во огни́ Тя и купине́ дре́вле предви́девый Моисе́й/ и взя́тый на колесни́це о́гненней Илия́, Христе́.

Ин

Ирмо́с: Любве́ ра́ди, Ще́дре, Твоего́ о́браза,/ на Кресте́ Твое́м стал еси́,/ и раста́яшася язы́цы:/ Ты бо еси́, Человеколю́бче,/ кре́пость моя́ и хвале́ние.

Храм одушевле́н Тро́ицы Пресвяты́я я́ко вои́стинну яви́лся еси́/ и хра́мы и́дольския, Е́впле, низложи́л еси́ ору́жием ве́ры.

Наслажда́яся добро́тою Боже́ственною, Е́впле,/ ра́ны, и боле́зни, и вся́кия му́ки, блаже́нне, преоби́дел еси́/ и, ра́дуяся, пострада́л еси́.

Высокому́дренное се́рдце Паламни́ово,/ смири́вся, Богому́дре, смири́л еси́, му́чениче,/ и к Возне́сшему челове́ки возше́л еси́.

Распаля́емь ре́вностию Влады́ки,/ вся́ку лесть, му́чениче, запали́л еси́ вои́стинну/ и к муче́нию усе́рдно отлучи́лся еси́.

Богоро́дичен: Мо́лят бога́тии лю́дие Твои́ Тя ро́ждшую Отрокови́цу,/ обогати́вшаго всех Боже́ственными разуме́нии, Христа́ Бо́га на́шего.

Песнь 5

Ирмо́с: От све́та пресеки́й перворо́дный свет,/ я́ко во све́те дела́ пою́т Тя, Христе́, Соде́теля,/ во све́те Твое́м пути́ на́ша напра́ви.

Пред лице́м Твои́м го́ры уклони́шася,/ свет бо и пред нога́ми неботе́чныя лучи́, Христе́, со́лнца прии́де,/ зрак зе́млен я́ко прия́ти благоволи́л еси́.

Се Спас,–/ вопия́ху Моисе́й и Илия́ ученико́м,/ на горе́ святе́й Фаво́рстей оглаша́емым,–/ Христо́с, Его́же дре́вле провозвести́хом Су́щаго Бо́га.

Неизме́нное естество́, челове́ческому приме́шся,/ оби́льно невеще́ственнаго Божества́ Свет/ изобнажи́в апо́столом, неизрече́нно возсия́.

Тя, присносу́щное сия́ние, во Оте́честей сла́ве/ ученицы́ я́ко ви́девше возсия́вша, Христе́, Тебе́ вопия́ху:/ во све́те Твое́м пути́ на́ша напра́ви.

Ин

Ирмо́с: Нечести́вии не у́зрят сла́вы Твоея́, Христе́,/ но мы Тя, Единоро́дне,/ Оте́ческия сла́вы Сия́ние Божества́,/ от но́щи у́тренююще,/ воспева́ем Тя, Человеколю́бче.

Весь манове́нии Боже́ственными просве́щся и му́жеством укре́плься,/ я́ко лев изря́ден, ты к суди́щу, наде́яся, поте́кл еси́,/ злоче́стие побежда́я.

Дае́т тебе́ безпеча́льную жизнь Изба́витель,/ за Него́же сме́рть го́рькую, страстоно́сче сла́вне, претерпе́вшему,/ и с ли́ки причита́ет тя му́ченик до́бльствовавша.

Преклони́л еси́ вы́ю твою́ усе́рдным по́мыслом/ и, во главу́ усе́чен, Христу́ ясне́е и чисте́е прибли́жился еси́, преподо́бне,/ наслажда́яся обоже́ния.

Богоро́дичен: Вы́шши яви́лася еси́ А́нгел вои́стинну,/ А́нгелов Творца́ па́че ума́ ро́ждши,/ просла́вльшаго святы́я му́ченики, Пресвята́я Ма́ти Де́во.

Песнь 6

Ирмо́с: Внегда́ скорбе́ти ми,/ возопи́х ко Го́споду,/ и услы́ша мя Бог спасе́ния моего́.

Сия́ния па́че со́лнца Свет ясне́йший, Спас, просия́в на Фаво́ре,/ нас просвети́л есть.

Возше́д на го́ру Фаво́рскую, преобрази́лся еси́, Христе́,/ и, лесть всю омрачи́в, нас просвети́л еси́.

Тя Бо́га позна́вше сла́внии апо́столи,/ на Фаво́ре же, Христе́, уди́вльшеся, коле́на преклони́ша.

Ин

Ирмо́с: Приидо́х во глубины́ морски́я,/ и потопи́ла мя есть бу́ря мно́гих грехо́в,/ но, я́ко Бог, из глубины́, возведи́ живо́т мой, Многоми́лостиве.

Точа́ кровь, предста́л еси́ твоему́ Подвигополо́жнику, до́блий Е́впле Богому́дре,/ и от Него́ венцы́ прия́л еси́ побе́ды, ра́дуяся.

Стал еси́ пред суди́щем му́жески,/ Влады́чния зако́ны рука́ми твои́ми, Е́впле, держа́/ и я́вственно беззако́нныя, преподо́бне, облича́я усе́рдно.

Мук мно́жества не убоя́вся, ни ужа́сся меча́,/ и́стину ты на суди́щи мучи́телей благоче́стно пропове́дал еси́/ и лесть умертви́л еси́.

Богоро́дичен: О, чу́до пресла́вно!/ Ка́ко ражда́еши, иску́са му́жеска не позна́вши?/ Ка́ко же пита́еши, Де́во Ма́ти, Пода́теля вои́стинну млека́/ и Пита́теля всея́ тва́ри?

Конда́к пра́здника, глас 7:

На горе́ преобрази́лся еси́,/ и я́коже вмеща́ху ученицы́ Твои́,/ сла́ву Твою́, Христе́ Бо́же, ви́деша,/ да егда́ Тя у́зрят распина́ема,/ страда́ние у́бо уразуме́ют во́льное,/ ми́рови же пропове́дят,/ я́ко Ты еси́ вои́стинну О́тчее сия́ние.

И́кос:

Воста́ните, лени́вии, и́же всегда́ ни́зу пони́кшии в зе́млю души́ моея́ по́мыслы,/ возми́теся и возвы́ситеся на высоту́ Боже́ственнаго восхожде́ния./ Притеце́м к Петру́ и к Зеведе́евым/ и вку́пе со о́неми Фаво́рскую го́ру дости́гнем,/ да ви́дим с ни́ми сла́ву Бо́га на́шего, глас же услы́шим,/ его́же свы́ше слы́шаша и пропове́даша О́тчее сия́ние.

Песнь 7

Ирмо́с: Авраи́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:/ оте́ц на́ших Бо́же, благослове́н еси́.

Облиста́вшеся Све́том непристу́пныя сла́вы на Фаво́рстей горе́,/ апо́столи Христу́ вопия́ху:/ оте́ц на́ших Бо́же, благослове́н еси́.

Сия́нием Боже́ственнаго шу́ма, и росода́тельным о́блаком, Христе́,/ и заре́ю Твое́ю наслажда́еми, апо́столи поя́ху:/ оте́ц на́ших Бо́же, благослове́н еси́.

В непристу́пном Све́те, я́ко ви́де Тя Петр,/ на Фаво́рстей горе́ облиста́вша, Христе́, возопи́:/ оте́ц на́ших Бо́же, благослове́н еси́.

С Нача́льником жи́зни Христо́м су́ще, де́ти Зеведе́евы,/ я́ко испусти́ зра́ка Свет, возгреме́ша:/ оте́ц на́ших Бо́же, благослове́н еси́.

Ин

Ирмо́с: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди,/ Бо́же оте́ц на́ших.

Ка́плющи твоя́ кровь на зе́млю,/ угаси́ огнь пре́лести, всеблаже́нне,/ Христо́ву же Це́рковь бога́тно напои́ла есть,/ благоче́стно воспева́ющую тя.

Име́я му́дрость кре́пку и непоколеби́м по́мысл,/ пре́лесть потря́сл еси́/ и предстоя́щия лжи нело́жными обличи́л еси́ уче́нии, Е́впле всему́дре.

Дверь тебе́ ра́йская, Е́впле, му́чениче Христо́в, отве́рзеся, блаже́нне,/ укра́шена ви́девши Боже́ственным страда́нием и побе́дным венце́м.

У́глем Боже́ственным очи́стив, му́чениче, ду́шу,/ у́глие погаси́л еси́ многобо́жия, зовы́й:/ благослове́н еси́, Го́споди, Бо́же оте́ц на́ших.

Богоро́дичен: Твою́ Боже́ственную утро́бу пещь пе́рсская вообрази́, Пренепоро́чная,/ спаса́ет ю́ноши неопа́льны, взыва́ющи:/ Го́споди, Бо́же оте́ц на́ших, благослове́н еси́.

Песнь 8

Ирмо́с: В Вавило́не о́троцы,/ Боже́ственною распала́емы ре́вностию,/ мучи́теля и пла́мене преще́ние му́жески попра́ша/ и, посреде́ огня́ вве́ржени, ороша́еми, поя́ху:/ благослови́те, вся дела́ Госпо́дня, Го́спода.

Манове́нием вся нося́й, нога́ми пречи́стыми на го́ру взы́де Фаво́рскую Христо́с,/ на не́йже па́че со́лнечныя лучи́ облиста́ лице́м,/ и́же зако́ну старе́йшия и благода́ти показа́ пою́щия:/ благослови́те, вся дела́ Госпо́дня, Го́спода.

Непристу́пною сла́вою на горе́ я́влься неизрече́нно Фаво́рстей,/ неодержи́мый и незаходи́мый Свет, О́тчее сия́ние,/ тварь уясни́в, челове́ки обожи́, пою́щия:/ благослови́те, вся дела́ Госпо́дня, Го́спода.

Священноле́пно стоя́ще Моисе́й же и Илия́ на горе́ Фаво́ре,/ Боже́ственныя начерта́ние я́сно ипоста́си ви́девше,/ Христа́, во Оте́честей облиста́вша сла́ве, воспева́ху:/ благослови́те, вся дела́ Госпо́дня, Го́спода.

И́же во зра́це Боже́ственнаго ра́ди явле́ния лице́ просла́вися иногда́ Моисе́ово,/ Христо́с же, я́ко ри́зою, Све́том и сла́вою одева́ется,/ Све́та бо самоде́телен Сый, озаря́ет пою́щия:/ благослови́те, вся дела́ Госпо́дня, Го́спода.

От светоро́дна о́блака Христа́ ученицы́ объя́та зря́ще на Фаво́ре/ и ни́цы на зе́млю па́дше, ум просве́щше,/ со Отце́м Сего́ поя́ху и Ду́хом:/ благослови́те, вся дела́ Госпо́дня, Го́спода.

Ин

Ирмо́с: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

Неду́гов вся́ческих очище́ние и духо́в лю́тых прогоне́ние твоя́ суть мо́щи,/ я́же обступи́вше, вопие́м:/ благослови́те, вся дела́ Госпо́дня, Го́спода.

О тебе́ ве́рных собо́р возра́довася,/ ко Христу́ тя хода́тая стяжа́в,/ и моли́твенника те́пла, и предста́теля, всеблаже́нне Е́впле диа́коне,/ святы́х А́нгел собесе́дниче.

Соше́дшеся, почерпи́те, челове́цы,/ неду́гов разли́чных исцеле́ние от ра́ки му́ченика и возопи́йте ве́рою:/ благослови́те, вся дела́ Госпо́дня, Го́спода.

Богоро́дичен: Украси́ся, Чи́стая Всенепоро́чная, па́че вся́каго а́нгельскаго благоле́пия,/ Творца́ ро́ждши челове́ков и А́нгелов./ Ему́же пое́м:/ благослови́те, вся дела́ Госпо́дня, Го́спода.

Песнь 9

Ирмо́с: Рождество́ Твое́ нетле́нно яви́ся:/ Бог из боку́ Твое́ю про́йде,/ я́ко Плотоно́сец яви́ся на земли́/ и с челове́ки поживе́./ Тя, Богоро́дице, тем вси велича́ем.

Ужа́сни но́вым светоли́тием внеза́пу ученицы́ осве́щшеся, друг дру́га зря́ху,/ уди́вльшеся же и к земли́ прекло́ньшеся,/ Тебе́, Влады́це всех, поклони́шася.

Шум из о́блака посыла́шеся богогла́сен, известву́я чу́до:/ Оте́ц бо Све́тов,– Сей есть Сын Мой возлю́бленный,– апо́столом вопия́ше:/ Того́ послу́шайте.

Но́вая ви́девше и пресла́вная, глас Оте́ческий внуши́вше,/ на Фаво́ре Словесе́ слуги́, изображе́ние Первообра́знаго,/ Сей есть,– вопия́ху,– Спас наш.

О́бразе непреме́нный Су́щаго, недви́жиме, печа́ть неизме́нна,/ Сы́не, Сло́ве, му́дросте и мы́шце, десни́це Вы́шняго, Си́ло,/ Тя воспева́ем со Отце́м же и Ду́хом.

Ин

Ирмо́с: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови Благослове́ние процвела́ еси./ Тем Тя вси велича́ем.

Ви́дети сподо́бився вои́стинну, пребога́те, да́льная,/ тебе́ жела́емое стяжа́л еси́ жела́ние,/ я́ко дости́г са́мое жела́нных соверше́ние,/ жела́ния твоего́ я́ве прехо́д, Е́впле, диа́коне досточу́дне.

Я́ко ски́петр, держа́ Крест, блаже́нне, руко́ю твое́ю,/ багряни́цу, ю́же от крове́й свяще́нных твои́х омочи́л еси́, све́тло обложе́н,/ Христу́ Царю́ ны́не предстои́ши,/ Е́впле, диа́коне досточу́дне.

Днесь Ката́нии честна́я митропо́лия, храни́теля тоя́ изря́дна тя стяжа́вши,/ пра́зднует, Боже́ственное соверша́ющи твое́ страда́ние,/ со все́ми епа́рхиями и гра́ды,/ ю́же снабди́ши твои́ми мольба́ми.

Со́лнце всесве́тло я́ве был еси́/ и к сия́нию пресели́лся еси́, му́чениче, Боже́ственному,/ прича́стием обожа́емь Боже́ственным, блаже́нне,/ и ны́не просвеща́еши пою́щия твое́ светоно́сное страда́ние.

Богоро́дичен: Све́та луча́ми, е́же в Тебе́, Богоневе́сто, ду́шу мою́ просвети́,/ лежа́щую в ро́ве поги́бели возста́ви,/ враги́ разража́ющи, оскорбля́ющия при́сно се́рдце мое́/ и к страсте́м порева́ющия мя.

Свети́лен пра́здника:

Све́те неизме́нный, Сло́ве, Све́та Отца́ нерожде́нна, в явле́ннем све́те Твое́м,/ днесь на Фаво́ре Свет ви́дехом Отца́, Свет и Ду́ха,/ Све́том наставля́ющаго всю тварь.

Сла́ва, и ны́не, то́йже.

На стихо́вне стихи́ры, глас 2.

Подо́бен: До́ме Евфра́фов:

Ра́дуется тро́ица/ Боже́ственных апо́стол,/ я́же Тро́ицу ви́де,/ по существу́ Еди́наго,/ на горе́ Фаво́рстей.

Стих: Твоя́ суть небеса́,/ и Твоя́ есть земля́.

Бла́гоже тебе́, Фаво́ре,/ и́же пе́рвее мра́чный:/ Све́та бо сподо́бился еси́,/ не чу́вственнаго со́лнца,/ но Вы́шния све́тлости.

Стих: Фаво́р и Ермо́н/ о И́мени Твое́м возра́дуетася.

Све́том у́бо/ Твоего́ лица́ осия́вшеся,/ ученицы́ Твои́, Спа́се,/ не терпя́ще зари́,/ на зе́млю внеза́пу падо́ша.

Сла́ва, и ны́не, глас и подо́бен то́йже:

Глас же Оте́ч/ с Небесе́ слы́шан бысть:/ Сей есть,– вопию́щий,–/ Сын возлю́бленный Мой,/ Того́ вси послу́шайте.

НА ЛИТУРГИ́И

Блаже́нны пра́здника, обои́х кано́нов песнь 6-я со ирмосо́м на 6.