Служба в честь святаго Емилиана исповедника, епископа Кизическаго
НА ВЕЧЕ́РНИ
На Го́споди, воззва́х: стихи́ры пра́здника, глас 4.
Подо́бен: Дал еси́ зна́мение:
Прииди́те, и мы до́брым измени́мся измене́нием, Богому́дрии, дне́сь,/ Христу́ спреобрази́вшеся/ благоче́стно и ра́достно,/ на высоту́ возне́сшеся доброде́тели,/ высо́че возра́дуемся:/ за милосе́рдие бо безобра́зие преобра́жся челове́ка,/ на Фаво́ре уясни́ Спас душ на́ших.
О любозри́телие су́щих па́че ума́/ и любопослу́шницы!/ У́мно у́зрим Христа́,/ облиста́вша Боже́ственными заря́ми,/ и огласи́мся Роди́тельным гла́сом,/ возлю́бленнаго пропове́дающе Сы́на,/ укре́пльшаго челове́ческую не́мощь на Фаво́ре/ и источи́вшаго просвеще́ние душ на́ших.
Дне́сь показа́л еси́ Твое́ Божество́, Го́споди,/ честны́м апо́столом Твои́м/ Моисе́ю и Илии́ же,/ я́ко Бог зако́на и благода́ти сый,/ избавля́я нас от сме́ртных ны́не соу́з,/ с ни́миже Твое́ человеколю́бное смотре́ние сла́вим,/ Иису́се Всеси́льне,/ Спа́се душ на́ших.
И́ны стихи́ры свята́го, глас то́йже.
Подо́бен: Зва́нный свы́ше:
И́же о́браз Христо́в я́ве поче́т,/ егда́ Льво́во суровство́ разгоре́ся и лю́ди восколеба́, обновля́я Копрони́мову безбо́жную е́ресь,/ тогда́ сего́, прему́дре, я́ве обличи́л еси́,/ твое́ дерзнове́ние прии́м,/ совоку́плену архиере́ев прише́ствию./ Те́мже показа́лся еси́ до́блейший во́ин Христо́в, всеблаже́нне/ Его́же моли́ спасти́ и просвети́ти ду́ши на́ша.
И́же в Небе́сныя оби́тели всели́лся еси́,/ егда́ сопроти́вный нрав безбо́жный и злочести́вый показа́,/ в заточе́ниях осуди́ твою́ тве́рдость./ Тогда́ рая́, отону́дуже испадо́хом,/ еди́но оте́чество, Богогла́се, я́ве ве́дый,/ с весе́лием, ра́дуяся, претерпе́л еси́./ Те́мже пра́ведно нетле́нный сподо́бился еси́ живо́т зре́ти, Христа́,/ Его́же моли́ спасти́ и просвети́ти ду́ши на́ша.
О́гнен язы́к прему́дро име́я,/ егда́ сме́сный инопле́менный зако́н положи́,/ не покланя́тися веля́щ Христо́ву честно́му о́бразу,/ Лев окая́нный,/ тогда́ ты Боже́ственный зако́н сопроти́в положи́л еси́,/ я́ко прехо́дит поклоне́ние ико́нное,/ я́коже не́где не́кто рече́, к первообра́зному./ И твои́м сло́вом, я́ко от гро́ма, устраши́ся/ зве́рь злоимени́тый,/ всечестны́й о́тче, Богоглаго́ливе свяще́нне.
Сла́ва, и ны́не, глас 1:
И́же дре́вле с Моисе́ом глаго́лавый на горе́ Сина́йстей о́бразы,/ Аз е́смь, глаго́ля, Сый,/ дне́сь на горе́ Фаво́рстей преобра́жся пред ученики́,/ показа́ началообра́зную добро́ту зра́ка,/ в Себе́ восприи́м челове́ческое существо́./ И таковы́я благода́ти свиде́тели поста́вль,/ Моисе́я и Илию́, о́бщники творя́ше весе́лия,/ провозвеща́ющия сла́вное Креста́ ра́ди/ и спаси́тельное воскресе́ние.
На стихо́вне стихи́ры, глас 2.
Подо́бен: До́ме Евфра́фов:
Гора́ Бо́жия Фаво́р/ о И́мени Твое́м, Спа́се,/ ра́дуется,/ Отцу́ возлю́бленна Тя/ Сы́на пропове́дуя.
Стих: Твоя́ су́ть небеса́,/ и Твоя́ есть земля́.
Чу́до бя́ше ви́дети,/ Со́лнца сла́вы,/ в преображе́нии/ чу́вственнаго со́лнца/ лучи́ скры́вшаго.
Стих: Фаво́р и Ермо́н/ о И́мени Твое́м возра́дуетася.
От земли́ у́бо ученицы́,/ Моисе́й же от ме́ртвых/ и Илия́ я́ко свы́ше,/ Тебе́ преобразу́ему,/ раболе́пно предста́ша.
Сла́ва, и ны́не, глас 1:
Твоего́ Единоро́днаго Сы́на/ прови́дев Ду́хом плотско́е к челове́ком прише́ствие,/ Богооте́ц Дави́д,/ издале́ча к весе́лию созыва́ет тварь/ и проро́чески взыва́ет:/ Фаво́р и Ермо́н о И́мени Твое́м возра́дуются./ На сию́ бо возше́д го́ру, Спа́се, со ученики́ Твои́ми,/ очерне́вшее Ада́мово естество́,/ преобра́жся, облиста́ти па́ки сотвори́л еси́,/ претвори́в е в Твоего́ Божества́ сла́ву же и све́тлость./ Те́мже вопие́м Ти:/ Соде́телю вся́ческих Го́споди, сла́ва Тебе́.
Тропа́рь пра́здника, глас 7:
Преобрази́лся еси́ на горе́, Христе́ Бо́же,/ показа́вый ученико́м Твои́м сла́ву Твою́,/ я́коже можа́ху,/ да возсия́ет и нам, гре́шным,/ Свет Твой присносу́щный/ моли́твами Богоро́дицы,/ Светода́вче, сла́ва Тебе́.
НА У́ТРЕНИ
По 1-й стихоло́гии седа́лен, глас 4.
Подо́бен: Удиви́ся Ио́сиф:
На горе́ Фаво́рстей преобрази́лся еси́, Иису́се,/ и о́блак све́тел, протяза́ющся, я́ко се́нь, апо́столы сла́вою покры́,/ те́мже и на зе́млю ниц па́даху, не терпя́ще зре́ти све́тлости/ непристу́пныя сла́вы лица́ Твоего́, Безнача́льне Спа́се, Христе́ Бо́же./ И́же тогда́ сим Свет Твой возсия́вый, просвети́ ду́ши на́ша.
Сла́ва, и ны́не, то́йже.
По 2-й стихоло́гии седа́лен, глас и подо́бен то́йже:
Непристу́пною Твое́ю, Христе́, сла́вою Боже́ственнаго Твоего́ Све́та преобра́жся,/ Твоя́ облиста́л еси́ Боже́ственныя ученики́, Иоа́нна, и Петра́, и Иа́кова,/ ужаси́л еси́ тех Боже́ственною благода́тию./ Глас же Оте́ч, возлю́бленнаго Сы́на свиде́тельствующ, слы́шаша/ и ви́деша лица́ Твоего́ сла́ву, Спа́се./ И́же всех, Сло́ве, спасти́ хотя́, просвети́ ду́ши на́ша.
Сла́ва, и ны́не, то́йже.
Кано́н пра́здника кир Иоа́нна, со ирмосо́м на 8, глас 8.
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Моисе́й, на мо́ри проро́чески ви́дев/ о́блаком и столпо́м дре́вле о́гненным сла́ву Госпо́дню, вопия́ше:/ Изба́вителю и Бо́гу на́шему пои́м.
Я́ко ка́менем, те́лом покры́вся,/ обоже́нием Неви́димаго зря, Моисе́й Богови́дец взыва́ше:/ Изба́вителю и Бо́гу на́шему пои́м.
Ты на горе́ зако́нней и на Фаво́рстей/ ви́ден был еси́ Моисе́ем во мра́це дре́вле,/ во Све́те же ны́не непристу́пнем Божества́.
Кано́н свята́го, на 4, глас 1.
Песнь 1
Ирмо́с: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,/ изра́ильтяном пу́ть глубины́ новосоде́лавшая.
С преми́рными живы́й чинонача́льствы, Богому́дре блаже́нне,/ творя́щия твое́ ра́достно любе́зное торжество́, о́тче,/ назира́я, спасе́ния сподо́би.
Ве́сь Влады́це спримеси́вся и отону́дными облиста́вся огнесия́ньми,/ все просвети́л еси́ твои́ми уче́ньми благочести́выми торжество́,/ я́ко священноявле́н я́влься, Богому́дре Богоприя́тне.
Ум влады́ку страсте́м доброде́телию, святи́телю, поста́вил еси́,/ я́коже пра́веден строи́тель души́ и те́ла, о́тче,/ подая́ кому́ждо потре́бная.
Таи́нник изря́ден су́щих па́че ума́, Це́ркви я́ве предстоя́, яви́лся еси́, пресла́вне,/ и держа́вен и́стины побо́рник, че́люсти льво́в сокруша́я/ и загражда́я уста́.
Богоро́дичен: Еди́наго во двою́ благоче́стно от утро́бы Твоея́ рожде́нна ве́мы естества́х, Пренепоро́чная,/ Бо́га вку́пе па́че естества́ и Челове́ка,/ иму́ща соверше́нна коего́ждо сво́йства.
Песнь 3
Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
Осеня́ющая сла́ва в се́ни пе́рвее и Моисе́еви бесе́дующи, Твоему́ уго́днику,/ о́браз бы́сть облиста́вшаго неизрече́нно/ на Фаво́ре, Влады́ко, Твоего́ преображе́ния.
Совзыдо́ша Ти, Сло́ве Единоро́дный,/ вы́шнии апо́стольстии верси́ на го́ру Фаво́рскую,/ и сопредста́ша Ти Моисе́й же и Илия́, я́ко Бо́жия слуги́, Еди́не Человеколю́бче.
Бог Сло́во сый, весь зе́млен бы́сть,/ всему́ Божеству́ смеси́в челове́чество во ипоста́си Свое́й,/ ю́же во двою́ существу́ Моисе́й и Илия́ же ви́деша на горе́ Фаво́ре.
Ин
Ирмо́с: Еди́не, ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й:/ одушевле́нный хра́ме неизрече́нныя сла́вы Твоея́, Человеколю́бче.
Моли́твенника Богому́дра Христу́, ве́рнии, тя предлага́ем,/ Того́ ра́ди све́тло до́бльствовавша, и о́браз Сего́ поче́тша,/ и зако́н соблю́дша честна́го пропове́дания,/ и ю́же свы́ше ве́ру сохра́нша.
Му́чеников утвержде́ние яви́лся еси́, Богому́дре досточу́дне,/ злочести́вое шата́ние низложи́л еси́, Це́ркве я́влься забра́ло незы́блемо и неукло́нно/ и хода́тай Боже́ствен, тве́рдо облича́я безу́мныя.
Я́да е́реси испи́в до сы́тости, вселука́вый учи́тельным твои́м сло́вом обличи́ся:/ све́том бо тьма отгоня́ется и обнажа́ется плете́ние лука́ваго сове́та/ Боже́ственныя му́дрости сия́ньми.
Богоро́дичен: Све́тлым Тя гла́сом ны́не от души́ вои́стинну Богома́терь, Бо́га ро́ждшую, пропове́даем,/ воплоще́нна из Тебе́ Безпло́тнаго, в нас все́льшася,/ не преложе́ние прие́мша, ни смеше́нием сме́шшася, Всенепоро́чная.
По 3-й пе́сни конда́к свята́го, глас 3:
До́бляго тя побо́рника по Тро́ице я́вльшася/ Це́рковь сла́вит, пою́щи, Емилиа́не,/ за ню́же пострада́л еси́./ Сего́ ра́ди почита́ем па́мять твою́,/ язы́ческаго наше́ствия изба́ви рабы́ твоя́.
Седа́лен, глас то́йже.
Подо́бен: Боже́ственныя ве́ры:
Боже́ственным Ду́хом просвеще́н,/ пропове́дал еси́ со дерзнове́нием правосла́вия, всеблаже́нне, преда́ния/ и царя́ посрами́л еси́ беззако́ннаго, в заточе́ния непра́ведно отсыла́емь./ О́тче преподо́бне, Христа́ Бо́га моли́ дарова́ти нам ве́лию ми́лость.
Сла́ва, и ны́не, пра́здника.
Подо́бен: Красоте́ де́вства:
Боже́ственныя Твоея́ сла́вы сия́ние, я́коже можа́ху,/ показа́л еси́, Сло́ве Бо́жий, ученико́м Твои́м, на Фаво́рстей горе́ преобразу́яйся,/ и́мже спросвети́хомся и мы, пою́щии Тя,/ Еди́не Неизме́нне и Безсме́ртне Го́споди, Тебе́ бо ве́рою вопие́м:/ сла́ва, Христе́, Ца́рствию Твоему́.
Песнь 4
Ирмо́с: Из пло́ти Твоея́ лучи́ Божества́/ исхожда́ху проро́ком и апо́столом./ Тем нача́льницы, пою́ще, взыва́ху:/ сла́ва си́ле Твое́й, Го́споди.
И́же купину́ сохрани́вый неврежде́ну, прикосну́вшуюся огню́,/ Моисе́ю богосия́нную плоть показа́л еси́, Влады́ко, пою́щему:/ сла́ва си́ле Твое́й, Го́споди.
Скры́ся заре́ю Божества́ чу́вственное со́лнце,/ я́ко на горе́ Фаво́ре ви́дев Тя преобразу́ющася, Иису́се мой:/ сла́ва си́ле Твое́й, Го́споди.
Огнь, не опаля́я ве́щи теле́сныя, ви́ден бысть невеще́ствен,/ я́коже Моисе́ю и апо́столом яви́лся еси́, Илии́ же, Влады́ко,/ еди́н от двою́, во дву соверше́нну естеству́.
Ин
Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние.
Возмо́гл еси́ шата́ние низложи́ти льсти́ваго,/ присво́ився доброде́телию, всеблаже́нне Емилиа́не,/ Всемогу́щему и Си́льному во бране́х, пребога́те, и ны́не зове́ши:/ сла́ва си́ле Твое́й, Го́споди.
Приима́л еси́ го́рькая заточе́ния, отсыла́емь,/ терпели́в показа́лся еси́, Богому́дре Емилиа́не, сло́вом благода́ти огра́ждся,/ священнотаи́нниче чу́дне, Бо́гу взыва́я:/ сла́ва си́ле Твое́й, Го́споди.
Зако́нно яви́лся еси́, из де́тства освяще́н,/ по́стными просвети́вся, всеблаже́нне Емилиа́не, пе́рвыми обуче́ньми,/ и архиере́й, священному́чениче, по́слежде показа́лся еси́, Богоно́се преизря́дне.
Богоро́дичен: И́же вся́кия вы́ше разумева́емый тва́ри,/ е́же па́че ума́ живонача́льна богозда́ния на земли́ соверша́я та́инство,/ де́вства укра́шену светлостьми́, во Твою́ утро́бу всели́ся, Пречи́стая.
Песнь 5
Ирмо́с: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма́, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.
Вети́йствующий язы́к Твоего́ вели́чества не мо́жет веща́ти:/ я́ко бо, Держа́й живо́т и сме́ртию Влады́й,/ предста́вил еси́ на Фаво́рстей горе́ Моисе́я и Илию́,/ свиде́тельствующия Твое́ Божество́.
И́же рука́ми неви́димыми созда́в по о́бразу Твоему́, Христе́, челове́ка,/ началообра́зную Твою́ в созда́нии добро́ту показа́л еси́,/ не я́ко во о́бразе, но я́ко Сам Сый по существу́,/ Бог был еси́ и Челове́к.
Сраствори́вся неслия́нно, угль горя́щ показа́л еси́ нам Божества́,/ попаля́ющ у́бо грехи́, души́ же просвеща́ющ, на Фаво́рстей горе́,/ Моисе́я со Илие́ю, ученико́в же старе́йшия удиви́л еси́.
Ин
Ирмо́с: Бог Сый ми́ра, Оте́ц щедро́т,/ Вели́каго Сове́та Твоего́ А́нгела,/ мир подава́юща, посла́л еси́ нам;/ тем, Богоразу́мия к Све́ту наста́вльшеся,/ от но́щи у́тренююще,/ славосло́вим Тя, Человеколю́бче.
Разуме́в проразуме́нием Боже́ственным Христо́с вели́кия твоея́ души́ предложе́ние,/ вели́кими почестьми́ украси́ я́ве, оде́ждами свяще́нства тя уясни́в/ и му́ченическими страда́ньми, священнотаи́нниче всече́стне.
Привле́к благода́ть Ду́ха, ре́ки уче́ний поче́рпл еси́,/ всеблаже́нне освяще́нне, ста́да Христо́ва,/ те́мже, тобо́ю о́браз Его́ почита́ти навы́кше и святы́х всех,/ богобо́рца посрамля́ем.
Умертви́в пло́ти твоея́ мудрова́ние в по́стных боле́знех, пребога́те,/ заре́ю Ду́ха оживи́л еси́ ум./ Те́мже во обои́х просия́л еси́, иера́рше,/ Бо́гу благоугоди́в, священному́чениче досточу́дне.
Богоро́дичен: Святы́х Свята́я, Де́во Чи́стая, Святы́х Свята́го родила́ еси́,/ всех освяща́ющаго Христа́ Изба́вителя./ Те́мже Тя, Цари́цу и Влады́чицу всех,/ я́ко Ма́терь Зижди́теля тва́ри пропове́дуем.
Песнь 6
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Я́ко ве́лие и стра́шное узре́ся ви́дение дне́сь:/ с небесе́ у́бо чу́вственное, от земли́ же несравне́нное/ облиста́ Со́лнце пра́вды мы́сленное на горе́ Фаво́рстей.
Пре́йде у́бо се́нь зако́нная, изнемо́гшая,/ прии́де же я́ве Христо́с и́стина,– Моисе́й возопи́,/ на Фаво́ре ви́дев Твое́ Божество́.
Столп о́гненный – Христа́ преобразу́ющася,/ о́блак же – я́ве благода́ть Ду́ха, осени́вшую на Фаво́ре,/ предсказа́ша явле́ннейше.
Ин
Ирмо́с: Из утро́бы Ио́ну младе́нца изблева́ морски́й зверь,/ якова́ прия́т;/ в Де́ву же все́льшееся Сло́во/ и плоть прие́мшее про́йде, сохра́ньшее нетле́нну./ Его́же бо не пострада́ истле́ния,/ ро́ждшую сохрани́ неврежде́нну.
Уста́вити восхоте́в па́жить е́реси, усе́рдно к беда́м отлучи́лся еси́/ и обличи́л еси́ со дерзнове́нием, всеблаже́нне, нрав держа́щаго безбо́жия,/ ты пе́рвее глаго́лати наче́н собра́нному собо́ру богому́дрому.
Еди́наго Христа́ те́пле любя́ и Сего́ улучи́ти Боже́ственнаго сия́ния жела́я,/ иера́рше Госпо́день Богоприя́тне, му́ченическу показа́л еси́, о́тче, тве́рдость,/ просия́в пе́рвее поще́нием, и сугу́бы венцы́ прия́л еси́ я́ве.
Горе́ твой ум Бо́гу близ/ и Боже́ственными заря́ми, блаже́нне, сия́ющ, име́л еси́, преподо́бне,/ легко́ жития́ преплы́л еси́ мо́ре и ко приста́нищем Небе́сным ны́не устреми́лся еси́,/ ве́тры Свята́го Ду́ха направля́емь, Богодухнове́нне.
Богоро́дичен: Спасти́ челове́ческое естество́, я́ко Милосе́рд,/ истле́вшее лю́те за́вистию змии́ною, Пребоже́ственный благоизво́лив,/ во чре́во твое́ всели́ся, и плоть неизме́нна бы́сть,/ еди́ну Тя, Чи́стую, обре́т, Богоро́дице Де́во Пречи́стая.
Конда́к пра́здника, глас 7. Самогла́сен:
На горе́ преобрази́лся еси́,/ и я́коже вмеща́ху ученицы́ Твои́,/ сла́ву Твою́, Христе́ Бо́же, ви́деша,/ да егда́ Тя у́зрят распина́ема,/ страда́ние у́бо уразуме́ют во́льное,/ ми́рови же пропове́дят,/ я́ко Ты еси́ вои́стинну О́тчее сия́ние.
И́кос:
Воста́ните, лени́вии, и́же всегда́ ни́зу пони́кшии в зе́млю души́ моея́ по́мыслы,/ возми́теся и возвы́ситеся на высоту́ Боже́ственнаго восхожде́ния./ Притеце́м к Петру́ и к Зеведе́евым/ и вку́пе со о́неми Фаво́рскую го́ру дости́гнем,/ да ви́дим с ни́ми сла́ву Бо́га на́шего, глас же услы́шим,/ его́же свы́ше слы́шаша и пропове́даша О́тчее сия́ние.
Песнь 7
Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су о́гнь преложи́ша, вопию́ще:/ благослове́н еси́, Го́споди Бо́же, во ве́ки.
Ны́не ви́дена бы́ша апо́столом неви́димая Божества́ во пло́ти,/ на горе́ Фаво́рстей облиста́вша, вопию́щим:/ благослове́н еси́, Го́споди Бо́же, во ве́ки.
Ужасо́шася стра́хом, уди́вльшеся благоле́пию Боже́ственнаго Ца́рства,/ на горе́ Фаво́рстей апо́столи, вопию́ще:/ благослове́н еси́, Го́споди Бо́же, во ве́ки.
Ны́не неуслы́шанная услы́шана бы́ша:/ без отца́ бо Сын от Де́вы Оте́ческим гла́сом сла́вно свиде́тельствуется,/ я́ко Бог и Челове́к То́йже во ве́ки.
Положе́нием не был еси́ Вы́шняго, существо́м же Сын возлю́блен,/ пре́жде Сый, нам прибли́жился еси́ непрело́жно:/ благослове́н еси́, Го́споди Бо́же, во ве́ки.
Ин
Ирмо́с: Тебе́, у́мную, Богоро́дице, пе́щь/ разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.
Святи́телей благоле́пное украше́ние, о́тче, ты еси́ вои́стинну:/ ца́рствовав бо над страстьми́, столп неруши́м яви́лся еси́, досточу́дне, Це́ркви забра́ло,/ хва́льнаго велича́я Бо́га, препросла́вленнаго.
Но́вый Дави́д нам показа́лся еси́, иноплеме́нная уче́ния пра́щею низложи́в/ добролу́чных твои́х слове́с, пресла́вне, и учи́тельными стреля́ньми,/ хва́льнаго имену́я Бо́га, препросла́вленнаго.
Стал еси́ све́тло, о́тче, на суди́щи мучи́теля Христа́ ра́ди/ и словеса́, я́ко от исто́чника Боже́ственна, источи́л еси́,/ всем бо пропове́дал еси́ ико́нное поклоне́ние,/ я́ве ве́дый преходи́ти то к первообра́зному.
Богоро́дичен: Странноле́пно де́вствуеши, ро́ждши всех Творца́,/ на престо́ле Херуви́мстем почива́ющаго,/ еди́на Всеблаже́нная, Де́во Ма́ти Всепе́тая,/ хва́льнаго отце́в Бо́га и препросла́вленнаго.
Песнь 8
Ирмо́с: Седмери́цею пе́щь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Услы́шавше, Влады́ко, от Отца́ свиде́тельствуема,/ и я́ко челове́ческа тверде́йша зра́ка зре́ти лица́ Твоего́ блиста́ния не терпя́ще,/ Твои́ ученицы́ на зе́млю ниц па́даху, со стра́хом пою́ще:/ свяще́нницы, благослови́те, лю́дие, превозноси́те во вся ве́ки.
Ца́рствующим еси́ Царь прекра́сен и и́же всю́ду владя́щим Госпо́дь си́лен,/ Блаже́н и во све́те живы́й непристу́пнем,/ Ему́же ученицы́ уди́вльшеся, Моисе́й же и Илия́ вопия́ху:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
Я́ко Не́бом владу́щему, и земле́ю госпо́дствующему,/ и над преиспо́дними о́бласть иму́щему, Христе́, предста́ша Ти:/ от земли́ у́бо – апо́столи, я́ко с Небесе́ же – Фесви́тянин Илия́,/ Моисе́й же – от ме́ртвых, пою́ще согла́сно:/ лю́дие, превозноси́те во вся ве́ки.
Уны́ние ражда́ющия печа́ли на земли́ оста́виша апо́столов избра́ннии, Человеколю́бче,/ я́ко Тебе́ после́доваша, ко и́же от земли́ преложе́нию Боже́ственнаго жития́./ Те́мже и, по достоя́нию Твоего́ Богоявле́ния улучи́вше, поя́ху:/ лю́дие, превозноси́те Его́ во ве́ки.
Ин
Ирмо́с: Чу́да преесте́ственнаго/ росода́тельная изобрази́ пе́щь о́браз:/ не бо, я́же прия́т, пали́т ю́ныя,/ я́ко ниже́ о́гнь Божества́ Де́вы,/ в ню́же вни́де утро́бу./ Тем, воспева́юще, воспое́м:/ да благослови́т тва́рь вся Го́спода/ и превозно́сит во вся ве́ки.
Всю огне́м мы́сленным хвра́стную е́реси попали́л еси́ пе́щь, призыва́нием Боже́ственным,/ я́коже Илия́, и иере́и сту́дныя закла́л еси́ мече́м духо́вным./ И ны́не воспева́еши, веселя́ся:/ да благослови́т тва́рь вся Го́спода и превозно́сит во вся ве́ки.
Благода́ти же и си́лы Боже́ственныя испо́лнен яви́лся еси́, треблаже́нне,/ целому́дрия добро́тою укра́шен боголе́пно, благоче́стие непрело́жное держа́л еси́./ С ни́мже ны́не Влады́це предстоя́,/ да благослови́т тва́рь, вопие́ши, Го́спода и превозно́сит во вся ве́ки.
Свы́ше певцы́ твоя́ назира́еши, свяще́нный о́тче Богому́дре,/ показу́я стезю́ нам пра́вую твои́ми моли́твами и сокруша́я ересе́й шата́ния,/ да со дерзнове́нием пое́м, ико́ну Христо́ву почита́юще, и поклони́мся,/ и Богоро́дицы, и святы́х всех.
Богоро́дичен: Поро́ка не́сть в добро́те Твое́й, Де́во:/ Ты бо, еди́на Пречи́стая, яви́лася еси́ от ве́ка Всечи́стая,/ де́вства луча́ми озари́вши мир и чистоты́ све́том./ Те́мже, воспева́юще, пое́м:/ да благослови́т тва́рь вся Го́спода и превозно́сит во вся ве́ки.
Песнь 9
Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к. / Те́мже Пречи́стую Богоро́дицу, ве́рнии, велича́ем.
Да Твое́ пока́жеши я́ве неизрече́нное второ́е сни́тие,/ я́ко да Вы́шний Бог яви́шися,/ стоя́ посреде́ бого́в, апо́стол на Фаво́ре,/ Моисе́я же и Илию́, неизрече́нно осия́л еси́./ Те́мже вси Тя, Христе́, велича́ем.
Прииди́те, Мне покори́теся, лю́дие, возше́дше на го́ру святу́ю пренебе́сную,/ невеще́ственно ста́нем во гра́де Жива́го Бо́га/ и у́зрим мы́сленно Божество́ невеще́ственное,/ Отца́ и Ду́ха, в Сы́не Единоро́днем облиста́ющее.
Привле́кл еси́ любо́вию мя, Спа́се,/ и премени́л еси́ Боже́ственным Твои́м жела́нием,/ но попали́ огне́м невеще́ственным грехи́ моя́/ и насы́титися Твоея́ пи́щи сподо́би,/ да, обое́ игра́я, велича́ю, Бла́же, вели́чия Твоя́.
Ин
Ирмо́с: О́браз чи́стаго рождества́ Твоего́/ огнепали́мая купина́ показа́ неопа́льная,/ и ны́не на нас напа́стей свире́пеющую угаси́ти мо́лимся пе́щь,/ да Тя, Богоро́дице,/ непреста́нно велича́ем.
Обре́л еси́ боле́зней возме́здие, в Небе́сных, Богоно́се, се́лех, Емилиа́не,/ ны́не жи́ти сподо́блен му́ченик с Боже́ственными во́инствы,/ я́ко Боже́ственный святи́тель, священному́чениче пречу́дне.
Сло́вом и му́дростию изря́дне укра́шен яви́лся еси́ повеле́ньми, Емилиа́не,/ те́мже Христо́с венча́ честну́ю твою́ главу́, пребога́те,/ Его́же ны́не моли́ о нас при́сно, мо́лимся.
Врата́ Небе́сная, преподо́бне, отве́рз, Влады́ка прия́т, Емилиа́не, твою́ ду́шу,/ на ме́стех прохла́дных упоко́ив, я́ко пра́ведника,/ и ны́не обхо́диши о́крест Престо́ла всех Царя́.
Богоро́дичен: О, па́че ума́ чуде́с Твои́х, Богороди́тельнице,/ еди́на Всечи́стая Влады́чице!/ Вся бо ужаса́ет А́нгельская во́инства и челове́ков разли́чныя собо́ры./ Тем Тя, Богоро́дице, непреста́нно велича́ем.
Свети́лен пра́здника:
Све́те неизме́нный, Сло́ве, Све́та Отца́ нерожде́нна, в явле́ннем све́те Твое́м,/ дне́сь на Фаво́ре Свет ви́дехом Отца́, Свет и Ду́ха,/ Све́том наставля́ющаго всю тва́рь.
Сла́ва, и ны́не, то́йже.
На стихо́вне стихи́ры, глас 2.
Подо́бен: До́ме Евфра́фов:
Бла́го же па́че ума́ ра́дости,/ е́йже сподо́бися/ на Фаво́рстей горе́/ Боже́ственный верх/ учени́к Твои́х, Го́споди.
Стих: Твоя́ су́ть небеса́,/ и Твоя́ есть земля́.
Зна́мение новоле́пно/ Божества́ показу́ет/ пре́жде Креста́ ученико́м,/ я́ко со́лнце, облиста́в,/ Христо́с на горе́ дне́сь.
Стих: Фаво́р и Ермо́н/ о И́мени Твое́м возра́дуетася.
Прииди́те, земноро́днии,/ взы́дем усе́рдно/ на го́ру Фаво́рскую,/ зре́ти во сла́ве/ Христа́ преобразу́ющася.
Сла́ва, и ны́не, глас 1:
Неодержи́мое Твоего́ светоли́тия/ и непристу́пное Божества́/ зря́ще апо́столов лу́чшии/ на горе́ преображе́ния, Безнача́льне Христе́,/ Боже́ственным измени́шася у́жасом/ и, о́блаком осия́вшеся све́тлым,/ глас слы́шаху Оте́ч,/ известву́ющ та́инство Твоего́ вочелове́чения:/ я́ко еди́н еси́ и по воплоще́нии,/ Сын Единоро́дный и Спас ми́ра.
НА ЛИТУРГИ́И
Блаже́нны пра́здника, пе́снь 3-я, обои́х кано́нов, со ирмосо́м на 6.
