Поиск проповеди

Проповеди на праздники:

Служба в честь святаго блаженнаго Василия, Христа ради юродиваго, Московскаго чудотворца

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 8.

Подо́бен: О, пресла́внаго чудесе:

Преблаже́нне Васи́лие,/ от ю́ности тща́лся еси́ ста́ти в День Су́дный/ кроме́ стра́ха и боя́зни/ и прия́л еси́ дерзнове́ние,/ отри́нув вся́ческия сла́дости теле́сныя,/ Христу́ после́довал еси́,/ собира́я бога́тство духо́вное,/ труды́ и терпе́нием гото́ву всегда́ име́я свещу́ твою́,/ и, ра́дуяся, возше́л еси́ на Небеса́,/ моли́ спасти́ся душа́м на́шим.

Богоблаже́нне Васи́лие,/ возненави́дев вре́менная ми́ра сего́,/ умертви́л еси́ вся плотски́я сла́дости,/ богоуго́дно подвиза́лся,/ на высоту́ восте́кл еси́ доброде́телей/ и, вра́жия ко́зни попра́в,/ побе́ды вене́ц восприя́л еси́,/ от земли́ преста́вився./ И ны́не на Небеси́ с ли́ки пра́ведных веселя́ся,/ моли́ спасти́ся душа́м на́шим.

Богодохнове́нне Васи́лие,/ потща́лся еси́ победи́ти се́ти лука́ваго,/ испо́лненныя неве́рия и сла́бости/ и всех преле́стных ми́ра сего́./ Дарова́ний Свята́го Ду́ха сподо́бився,/ показа́лся еси́ юро́д ми́ру, но Христу́ мудр:/ подвиза́лся еси́ Ца́рства ра́ди Небе́снаго,/ е́же и дости́гл еси́./ И ны́не со А́нгелы лико́вствуя,/ моли́ спасти́ся душа́м на́шим.

Сла́ва, глас то́йже, самогла́сен:

Возлюби́л еси́ Небесная/ и, возненави́дев земна́я, ме́рзка сотвори́л еси́ я,/ те́сным и ско́рбным путе́м ше́ствуя,/ победи́л еси́ стра́сти ми́ра сего́./ В терпе́нии и страда́нии храбр яви́вся,/ разори́л еси́ вся ко́зни вра́жия/ и поче́рпл еси́ жела́нием исто́чника благода́тнаго,/ и бысть благода́ть Бо́жия в се́рдцы твое́м,/ и в соверше́нная предложе́ния во́ли Бо́жией себе́ предложи́л еси́./ Преблаже́нне Васи́лие,/ моли́ спасти́ся душа́м на́шим.

И ны́не, Богоро́дичен.

На стихо́вне стихи́ры, глас 2.

Подо́бен: До́ме Евфра́фов:

Дом чистоты́,/ чу́дне Васи́лие, был еси́,/ пи́щи мно́гия, и добролю́бия теле́снаго,/ и ри́знаго одея́ния не восхоте́л еси́,/ стра́хом Бо́жиим стяжа́в безмо́лвие.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Дом Ду́ха Свята́го,/ свя́те Васи́лие, был еси́,/ дом роди́телей и всех земны́х веще́й/ от младе́нчества возненави́дев/ бу́дущия ра́ди жи́зни.

Стих: Насажде́ни в дому́ Госпо́дни/ во дво́рех Бо́га на́шего процвету́т.

Дом Христо́ва благодаре́ния,/ Богодохнове́нне, был еси́,/ бога́тство сокрове́нно в души́ име́л еси́,/ возси́я луча́ светла́ благода́ти/ в мысли твое́й.

Сла́ва, глас 5:

Приклони́л еси́ вы́ю твою́ от ю́ности/ к Боже́ственному зва́нию, преблаже́нне Васи́лие,/ и, взем яре́м спаси́тельнаго словесе́ Христа́ Бо́га на́шего,/ расто́ргнул еси́ се́ти вра́жия/ и попра́л еси́ всю́ горды́ню его́./ Ра́зум непреле́стен стяжа́в,/ посреде́ молв сохрани́л еси́ себе́,/ живы́й с до́льними и ходя́й пло́тию,/ и, ступа́яй ду́хом, ви́дел еси́ Го́рняя,/ и ско́ро восте́кл еси́ к венцу́ вы́шняго зва́ния./ моли́ спасти́ся душа́м на́шим.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 2.

Подо́бен: Егда́ от Дре́ва:

Егда́ на́йде на тя Боже́ственное раче́ние,/ Васи́лие чу́дне,/ тогда́ мирски́й мяте́ж оттря́сл еси́,/ усе́рдно после́довал еси́ Христу́,/ ско́рбным и те́сным путе́м ше́ствуя,/ и был еси́ земны́й А́нгел,/ и яви́лся еси́ Небе́сный челове́к./ Преста́вився к ве́чным оби́телем,/ предстои́ши в ра́дости святы́х Христу́ Бо́гу на́шему,/ Его́же со дерзнове́нием моли́ о душа́х на́ших.

Егда́ озари́лся еси́ Ду́хом Боже́ственным,/ тогда́ ми́ра вся кра́сная отве́ргл еси́,/ ничто́же на те́ле твое́м носи́л еси́ от тле́нных одея́ний,/ нагото́ю теле́сною Христу́ рабо́тая,/ жела́я блаже́нства ве́чнаго, презре́л еси́ до́льняя./ И ны́не предстои́ши Христу́ Бо́гу на́шему/ во сла́ве со святы́ми А́нгелы,/ Его́же со дерзнове́нием моли́ о душа́х на́ших.

Егда́, преблаже́нне Васи́лие,/ совле́клся еси́ тле́нных одея́ний,/ тогда́ обле́клся еси́ в но́ваго челове́ка,/ обновле́на Христо́вою кро́вию,/ отлага́я ве́тхая мудрова́ния,/ за́дняя забыва́я, на пре́дняя простира́яся,/ и собра́л еси́ бога́тство духо́вное,/ и прине́сл еси́ нача́тки трудо́в твои́х Христу́ Бо́гу на́шему,/ Его́же со дерзнове́нием моли́ о душа́х на́ших.

И́ны стихи́ры, глас 5.

Подо́бен: Ра́дуйся:

Ра́дуйся, Богому́дре Васи́лие,/ Свята́го Ду́ха дарова́ние вни́де в помышле́ние твое́,/ и весь свобо́ден был еси́ о Го́споде,/ всех земны́х веще́й жития́ сего́ су́етнаго./ Предспе́яй доброде́тельным по́двигом и терпе́нием,/ юро́дственное жи́тельство избра́л еси́,/ измени́в тле́нная упова́нием на Бо́га,/ жела́я сподо́битися Ца́рства Небе́снаго./ Хране́ние положи́л еси́ усто́м твои́м/ и, ходя́ путе́м за́поведей Госпо́дних,/ победи́л еси́ брань неприя́зненну,/ чист по́мысл всегда́ име́л еси́,/ ве́ры ра́ди и любве́ Бо́жия,/ и, прие́м возме́здие,/ со А́нгелы селе́ние,/ моли́ спасти́ся душа́м на́шим.

Ра́дуйся, преблаже́нне Васи́лие,/ и́же во младе́нстве благоче́стия дости́гнув,/ погаси́л еси́ пла́мень по́хотный/ и, све́том разу́мным от Бо́га просвеще́н,/ тща́ние приле́жно во уме́ име́л еси́ дне, хотя́щаго бы́ти,/ и, премени́в тле́нная наде́ждею бу́дущих благ,/ дом и жили́ще Ду́ха Свята́го, Богому́дре, был еси́,/ садя́ сады́ добры́ в души́,/ де́тели жити́я святы́х оте́ц соверша́я,/ и са́дове твои́ благоуго́дны Го́сподеви,/ И́же и по сме́рти яви́ тя нам исто́чника исцеле́ний./ И ны́не со А́нгелы на Небе́си́ лико́вствуя,/ моли́ спасти́ся душа́м на́шим.

Ра́дуйся, Богоблаже́нне Васи́лие,/ возненави́дев житие́ ми́ра сего́,/ разже́гся любо́вию Госпо́днею, я́ко огне́м,/ попали́л еси́ по́мыслы гну́сныя,/ и вся у́зы ны́нешняго жити́я преле́стныя расто́ргнул еси́,/ и благи́ми искуше́нии да́ра Христо́ва ду́шу очи́стил еси́,/ я́ко зла́то в горни́ле./ И на земли́ я́ко А́нгел был еси́, подо́́бен Серафи́му,/ обре́т би́сера добра́ и избра́нна Небе́снаго/ и прода́в име́ния твоя́ вся,/ Того́ еди́наго стяжа́л еси́ в мы́сли твое́й,/ и, благода́ть прие́м просвети́тельную,/ моли́ спасти́ся душа́м на́шим.

Сла́ва, глас 8:

Челове́че Бо́жий,/ му́же жела́ний духо́вных,/ Ца́рствия насле́дниче,/ не премолчи́ за ны вопи́ти ко Го́споду, преблаже́нне Васи́лие,/ и к ра́це моще́й твои́х притека́ющих да́ра исцеле́ния сподо́би./ И моли́ во́инству на́шему дарова́ти на враги́ побе́ду и одоле́ние/ и нам, творя́щим па́мять твою́, грехо́в проще́ние,/ и душа́м спасе́ние,/ и ми́рови мир и ве́лию ми́лость.

И ны́не, Богоро́дичен.

Вход. Проки́мен дне. Та́же паремии́.

Прему́дрости Соломо́ни чте́ние (главы́ 5 и 6):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я́ и мы́шцею защити́т их./ Прии́мет всеору́жие – рве́ние свое́/ и вооружи́т тварь в месть враго́м./ Облече́тся в броня́ пра́вды и возложи́т шлем – суд нелицеме́рен./ Прии́мет щит непобеди́мый – преподо́бие./ Поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка, облако́в на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я́ на́гло./ Сопроти́в ста́нет им дух си́лы и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́ни чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние, они же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют,/ и, я́ко и́скры по сте́блию, потеку́т./ Су́дят язы́ком и облада́ют людьми́, и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шник преста́влен бысть,/ восхище́н бысть, да не зло́ба измени́т ра́зума его́/ или лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 1:

И́же по благода́ти Бо́жии,/ да́нней ти, преблаже́нне Васи́лие,/ я́ко прему́дрый худо́жник,/ основа́ние положи́в ве́ру,/ доброде́тельми на го́ру безстра́стия возше́л еси́,/ мрак, и мглу, и бу́рю отрази́в,/ прему́дростию вы́шнею весь обле́клся еси́,/ на высоту́ возше́д, к све́ту преложи́лся еси́./ И в наро́де живы́й, я́ко в столпе́ пребыва́я,/ и ничто́же восхоте́в ми́ра сего́,/ ниже́ на те́ле твое́м что от тле́нных носи́в,/ А́нгелы удиви́л еси́ и челове́ки ужаси́л еси́,/ бе́сы посрами́л еси́./ И ны́не во све́те пребыва́я со святы́ми А́нгелы,/ моли́ спасти́ся душа́м на́шим.

Устрани́вся Го́спода ра́ди от всех земны́х,/ отлучи́лся еси́ роди́телей и сро́дник, я́ко незна́емь,/ от Свята́го Ду́ха утеше́ние восприи́м/ и безтеле́сным в телеси́ ревнова́в,/ очи́щено те́ло и просвеще́н ум име́я,/ в боголю́бие чистоты́ прише́л еси́/ и безле́ностно Христу́ после́довал еси́,/ Ему́же в Вы́шних, преблаже́нне,/ со А́нгельскими чи́ны предстоя́,/ моли́ изба́витися нам от лука́вства вра́жия/ и спасти́ся душа́м на́шим.

Ду́хом Бо́жиим наставля́емь,/ Богоблаже́нне Васи́лие,/ мирска́я треволне́ния оттря́сл еси́/ и возненави́дел еси́ любве́ ра́ди Бо́жия./ Вся жите́йская усе́рдно оста́вив/ и напра́вив но́гу Твою́ на богоуго́дную стезю́,/ прите́кл еси́ ко блаже́нному безстра́стию./ Столп кре́пости от лица́ вра́жия был еси́/ и, я́ко Небе́сный челове́к и земны́й А́нгел,/ свети́льниче неугаса́емый,/ отъе́млеши неду́ги страсте́й/ и боле́зни исцеля́еши приходя́щим ти с ве́рою,/ моли́ о спа́сении душ на́ших.

Сла́ва, глас 5:

Прииди́те, Росси́йстии собо́ри христиа́нстии,/ припаде́м к ра́це Васи́лия чу́днаго/ и возопие́м ему́ с весе́лием:/ ра́дуйся, я́ко от младе́нства добру́ ле́ствицу обре́л еси́,/ от всего́ земна́го и те́мных страсте́й прило́га,/ без преткнове́ния к Боже́ственному Све́ту прилага́лся,/ ско́рбным и те́сным путе́м Христо́ви ше́ствуя./ Ра́дуйся, преблаже́нне Васи́лие,/ си́лою Христо́вою ди́вен яви́лся еси́ в житии́ твое́м,/ я́коже от чре́ва ма́терня изше́л еси́,/ та́ко и в наро́де наг ходя́, не срамля́яся,/ мра́за и жже́ния со́лнечнаго никогда́же уклоня́яся,/ мудре́йшим юро́дством, и терпе́нием, и страда́нием Христу́ после́довал еси́./ Ра́дуйся, Богодохнове́нне Васи́лие,/ обреты́й боговиде́ния восхо́д,/ победи́л еси́ полки́ бесо́вския,/ я́ко А́нгел яви́лся еси́ в житии́ твое́м./ И кто мо́жет изчести́ чудеса́ твоя́?/ В да́льних бо страна́х по мо́рю, я́ко по су́ху, ходя́ща ви́дяху тя./ Ра́дуйся, досточу́дне Васи́лие,/ вся Христо́ва уче́ния де́лы испо́лнил еси́,/ и по преставле́нии просия́ све́тлость жити́я твоего́,/ и восприя́л еси́ бога́тство благода́тное,/ мир просвеща́я чудесы́./ Моли́ся приле́жно Христу́ Бо́гу на́шему/ дарова́ти Це́ркви на́шей мир, во утвержде́ние ве́ры христиа́нския,/ и оте́честву на сопроти́вныя побе́ды/ и спасти́ся душа́м на́шим.

И ны́не, Богоро́дичен: Храм и дверь еси́:

На стихо́вне стихи́ры, глас 8.

Подо́бен: Что вас нарече́м:

Что тя нарече́м, Васи́лие чу́дне?/ А́нгела ли? Те́ла бо отврати́лся еси́./ Херуви́ма ли? Я́ко на тебе́ почи́л есть Христо́с./ Серафи́ма ли? Я́ко непреста́нно просла́вил еси́ Христа́./ Си́лы ли? Де́йствуеши бо исцеле́ния./ Мно́га ти имена́ и бо́льша дарова́ния,/ непреста́нно моли́ спасти́ ду́ши на́ша.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Что тя нарече́м, Васи́лие преблаже́нне?/ Нагото́ю те́ла после́довал еси́ Христу́,/ мудре́йшим юро́дством прехи́трил еси́ диа́вола,/ сего́ связа́я плени́цами слез твои́х/ и бога́тство нося́ в души́ некра́домо,/ вся Христо́ва уче́ния де́лом испо́лнил еси́./ И ны́не на Небе́сех лику́я,/ непреста́нно моли́ Христа́ Бо́га/ спасти́ ду́ши на́ша.

Стих: Насажде́ни в дому́ Госпо́дни/ во дворе́х Бо́га на́шего процвету́т.

Что тя имену́ем, Васи́лие преблаже́нне?/ А́нгельски бо на земли́ пожи́л еси́ безвеще́ственно,/ ничто́же име́яй, вся содержа́л еси́./ Яви́лся еси́ зна́емь, в да́льных страна́х чудоде́йствуя,/ и Росси́йскую зе́млю чуде́с заря́ми просвети́л еси́./ Непреста́нно моли́ Христа́ Бо́га/ спасти́ ду́ши на́ша.

Сла́ва, глас 6. Самогла́сен:

Прииди́те, святи́телие и свяще́нницы,/ и моско́встии лю́дие правосла́внии,/ и вси росси́йстии соб́ори христиа́нстии,/ притеце́м к ра́це Васи́лия чу́днаго и возопие́м любо́вию:/ о преблаже́нне Васи́лие!/ Непреста́нно воздежи́ ру́це за ны ко Го́споду,/ моля́ся за Це́рковь на́шу,/ и за вся правосла́вныя христиа́ны,/ и за лю́ди Росси́йския страны́,/ изба́витися гра́ду на́шему и всем страна́м правосла́вия/ от гла́да и губи́тельства,/ и от наше́ствия иноплеме́нник, и междоусо́бныя бра́ни/ и дарова́ти во́инству на́шему на враги́ побе́ду и одоле́ние,/ и Це́рквам соедине́ние,/ и ми́ру устрое́ние,/ и душа́м на́шим ве́лию ми́лость.

И ны́не, Богоро́дичен.

Тропа́рь, глас 8:

Житие́ твое́, Васи́лие, нело́жное, и чистота́ нескве́рна,/ Христа́ ра́ди те́ло твое́ изнури́л еси́ посто́м и бде́нием,/ и мра́зом и теплото́ю со́лнечною,/ и слото́ю2 и дожде́вным о́блаком,/ и просвети́ся лице́ твое́, я́ко со́лнце,/ и ны́не прихо́дят к тебе́ Росси́йстии наро́ди и вси лю́дие,/ просла́вляюще свято́е твое́ успе́ние./ Тем Христа́ Бо́га моли́,/ да изба́вит ны от ва́рварскаго плене́ния и междоусо́бныя бра́ни/ и мир ми́рови пода́ст и душа́м на́шим ве́лию ми́лость.

Ин тропа́рь, глас то́йже:

Подо́бен: Взбра́нной Воево́де:

Я́коже бо со́лнце и луна́ нагото́ю свое́ю не срамля́ются,/ та́ко и ты, уго́дниче Христо́в Васи́лие, наг сый, не срамля́шеся,/ восприя́т бо ри́зу Ада́ма первозда́ннаго,/ ю́же он ноша́ше пре́жде в раи́,/ ты же сию́ на земли́ поноси́л еси́;/ и был еси́ до́брый купе́ц:/ ели́ко имея́ше, вся оста́ви/ и купи́ мздо́ю терпе́ния своего́ село́,/ на не́мже сокрове́н безце́нный Би́сер, Христо́с./ Сего́ ра́ди яви́ся всем гре́шным о́браз покая́ния/ и всели́ся в ра́йскую широту́,/ и, предстоя́ Христо́ви,/ не забу́ди град, в не́мже обита́, и лю́ди, преблаже́нне,/ и моли́ спасти́ ду́ши на́ша.

НА У́ТРЕНИ

На Бог Госпо́дь: тропа́рь, два́жды. Сла́ва, и ны́не, Богоро́дичен.

По 1-й стихоло́гии седа́лен, глас 8:

Яви́вся чу́ден в терпе́нии твое́м, вся́чески Христу́ угоди́л еси́, преблаже́нне Васи́лие,/ му́дрою мы́слию утверди́л еси́ ду́шу твою́, порабо́тив плотска́я мудрова́ния ду́ху,/ избра́в до́брая, Бо́га ра́ди тружда́тися, му́жески глаго́лал еси́:/ а́ще я́ра зима́, но сла́док рай, боле́зненно тружда́тися, но блаже́нно восприя́тие./ Те́мже, преблаже́нне Васи́лие, моли́ Христа́ Бо́га спасти́ ду́ши на́ша.

Сла́ва, и ны́не, Богоро́дичен:

Богоро́дице Цари́це, правосла́вных похвало́,/ ерети́ческая шата́ния разори́ и ли́ца их посрами́,/ не покланя́ющияся, Пречи́стая, о́бразу Твоему́ потреби́./ Мы же, ве́рнии раби́, Богома́ти, Сы́на Твоего́, покланя́емся о́бразу Твоему́/ и мо́лим Тя в День Су́дный изба́вити нас муче́ния/ и сподо́бити Ца́рствия Небе́снаго, Ма́ти Христа́ Бо́га.

По 2-й стихо́логии седа́лен, глас 2:

Сла́вы и бога́тства не восхоте́в,/ вся ни во что́же вмени́л еси́, преблаже́нне Васи́лие, да Христа́ приобря́щещи,/ Его́же и получи́л еси́ мно́гими труды́ и терпе́нием./ И ны́не зри́ши, и́хже о́ко не ви́де, и у́хо не слы́ша,/ и на се́рдце челове́ку не взы́де,/ я́же тебе́ угото́ва Бог, возлюби́вшему Его́./ Те́мже, му́дре, мо́лим тя: моли́ Христа́ Бо́га спасти́ ду́ши на́ша.

Сла́ва, и ны́не, Богоро́дичен:

Чу́дная Цари́це Богоро́дице, Пречи́стая Де́во Благослове́нная/ и от родо́в избра́нная земны́х на спасе́ние,/ ду́шу мою́, во гресе́х вся́ческих лю́те обурева́ему,/ наста́ви на стезю́ покая́ния, да воспо́ю Тя, ра́дуйся:/ благослове́на Ты в жена́х, Всенепоро́чная Влады́чице.

По полиеле́и седа́лен, глас 5:

Духо́вно торжеству́ем в па́мять чу́днаго Васи́лия:/ сей бо А́нгелы удиви́ и челове́ки пра́здновати устро́и,/ Христа́ сла́вити, прославля́ющаго святы́я Своя́,/ просла́ви бо его́ Госпо́дь сла́вою, ю́же зрят вси святи́и,/ сея́ сла́вы сподо́бися получи́ти./ Тем, моля́щеся, ему́ глаго́лем:/ не забу́ди нас, творя́щих святу́ю па́мять твою́, да зове́м ти:/ ра́дуйся, прему́дре Васи́лие,/ покры́вый твоя́ доброде́тели мудре́йшим юро́дством Христа́ ра́ди./ Ра́дуйся, я́ко терпели́вно Христу́ рабо́тая,/ сосу́дом пло́ти твоея́, наг сый, прия́л еси́ вене́ц нетле́нный./ Ра́дуйся, Васи́лие, хвала́м досто́йный.

Сла́ва, и ны́не, Богоро́дичен:

Богоро́дице возопие́м, ве́рнии, любо́вию:/ ра́дуйся, Бо́жие селе́ние,/ ра́дуйся, па́дших воста́ние,/ ра́дуйся, ме́ртвых воскресе́ние,/ ра́дуйся, ве́рных спасе́ние,/ ра́дуйся, ненаде́жных наде́ждо изве́стная,/ ра́дуйся, святы́х сла́во и весе́лие,/ ра́дуйся, А́нгелов торжество́ непремо́лчное./ Ра́дуйся, Обра́дованная, Госпо́дь с Тобо́ю и Тебе́ ра́ди с на́ми.

Та́же степе́нна, 1-й антифо́н 4-го гла́са. Проки́мен: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́ти ми ся к Тебе́. Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

От ю́ности, преблаже́нне, сосу́д избра́н яви́лся еси́/ и жили́ще Свята́го Ду́ха был еси́,/ кре́постию ума́ непоколеби́м пребы́л еси́/ и над страстьми́ воцари́лся еси́, великоду́шне Васи́лие./ Презре́в плотска́я одея́ния,/ процве́л еси́, я́ко крин се́льный,/ одея́вся доброде́тельми, я́ко ри́зою све́та,/ яви́лся еси́ крепкостоя́телен проти́ву зи́мныя я́рости/ и со́лнечнаго опале́ния/ и нагото́ю те́ла твоего́ после́довал еси́ Христу́ Бо́гу на́шему,/ Его́же и Крест на ра́му поне́сл еси́,/ безпреста́ни сраспина́яся Ему́./ Того́ моли́ мир вселе́нней дарова́ти/ и душа́м на́шим ве́лию ми́лость.

Кано́н Богоро́дицы со ирмосо́м на 6. И свята́го два кано́на, на 8. Кано́н пе́рвый, глас 8.

Песнь 1

Ирмо́с: Посе́ченный несеко́маго пресече́,/ и ви́де со́лнце зе́млю, юже не ви́де,/ лю́таго врага́ вода́ потопи́,/ и непроходи́мое про́йде Изра́иль./ Песнь же воспева́шеся:/ Господе́ви пои́м, сла́вно бо просла́вися.

Одея́йся све́том, я́ко ри́зою, оде́я тя, Васи́лие чу́дне, ри́зою безстра́стия./ Те́мже взима́яся ду́хом к Боже́ственному виде́нию и озари́вся благода́тию Бо́жия про́мысла,/ стра́нен показа́лся еси́ от всех сро́дник и зна́емых,/ и пресели́лся еси́ к сро́дству Небе́сному, и ны́́не живе́ши жи́знь безконе́чную.

Показа́лся еси́ Росси́йстей земли́ свети́ло вели́кое,/ просвеща́я нас све́том твои́х доброде́телей./ И кто мо́жет изчести́ мно́гия по́двиги и труды́ твоя́,/ и всено́щная стоя́ния, и ины́х мно́жества к сим доброде́телей,/ и́мже возме́здие от Бо́га прия́л еси́?

Ума́ челове́ча превзы́де чин, ди́вное на земли́ житие́ пожи́л еси́,/ бдя, и моля́ся, и тружда́яся, и наг на земли́ скита́яся,/ не име́я где главы́ подклони́ти, во всем животе́ Твое́м./ И сего́ ра́ди всели́лся еси́ во оби́тели Небе́сныя,/ мно́ги бо, рече́ Госпо́дь, оби́тели в дому́ Отца́ Моего́, по ме́ре доброде́телей.

Богоро́дичен: Ко́е спасе́ние и́но таково́, я́коже Ты, Пречи́стая Богоро́дице,/ кре́пкое поможе́ние и те́плое заступле́ние?/ Изба́ви ду́шу мою́ от се́ти диа́воли,/ Ты бо еси́ всех земны́х спасе́ние,/ спаси́ и мене́, лю́те потопля́ема волна́ми грехо́вными,/ моли́твами уго́дника Твоего́ Васи́лия.

Други́й кано́н, глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть,/ препросла́вленный Госпо́дь сла́вно бо просла́вися.

Возлюби́вый усе́рдно Го́спода и жела́тельно подвиза́яся дости́гнути Ца́рства Небе́снаго,/ просвети́лся еси́ Боже́ственною благода́тию;/ те́мныя о́блаки души́ моея́ разгони́ и ум ми озари́,/ и отве́рзи ми устне́ к пе́нию, восхвали́ти тя, преблаже́нне Васи́лие.

Анто́ний Вели́кий рече́: име́ющим здрав ум не тре́бовати писа́ния;/ на тебе́ же сбы́стся, прему́дре Васи́лие./ Главу́ твою́ всегда име́я к Небеси́ возведе́ну, очи́ма же Го́рняя зря,/ ума́ чистото́ю тща́лся еси́ ко Ада́му и к ве́рному Авраа́му.

Стра́нен сро́дник твои́х был еси́, и бли́жних любве́ чуждь,/ и во твое́м язы́це, я́ко иноязы́чен, во ино́м же в ра́зуме седя́й./ И ничто́же от земны́х одея́ний на те́ле твое́м носи́л еси́, я́коже Ада́м,/ до́ндеже не ви́дел еси́ обнаже́ния души́ твоея́,/ ниже́ безобра́зие пло́ти твоея́ позна́л еси́.

И́же себе́ позна́вый, пости́гл еси́ страх Госпо́день,/ разжже́ние плотско́е хла́дом Свята́го Ду́ха угаси́в,/ всегда́ душе́вныма очи́ма на у́мныя си́лы взира́ти изво́лил еси́/ и преплы́л еси́ вели́кую сию́ жите́йскую пучи́ну жесто́ким путе́м, Богоблаже́нне.

Богоро́дичен: Влады́чице, Ма́ти Бо́жия Пречи́стая, Благослове́нная и Пренепоро́чная,/ души́ моея́ стру́пы исцели́ и стра́сти плотски́я умертви́,/ ум мой от вся́каго вре́да вра́жия и напа́стей изми́, Богоро́дице.

Катава́сия: Крест начерта́в, Моисе́й:

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Челове́колю́бче.

Дым, и прах, и сень вмени́л еси́ кра́сная ве́ка сего́/ и ничто́же от любве́ Христо́вы па́че изво́лил еси́,/ Сего́ жела́я насы́титися сла́вы и весе́лия присносу́щнаго,/ в ня́же жела́ют А́нгели прини́кнути./ И, сих ра́дости получи́в, предстои́ши во све́те Святе́й Тро́ице, ра́дуяся,/ Е́йже моли́ся за ны, преблаже́нне Васи́лие.

Воцари́вся над страстьми́, великоду́шне Васи́лие,/ одоле́л еси́ плотско́е жела́ние, и яви́лся еси́ чистоты́ сокро́вище духо́вное,/ и сего́ ра́ди прия́л еси́ та́влу3 белу́, на не́йже напи́сано и́мя но́во, ди́вно, неве́домо./ И не бысть на души́ твое́й скве́рны, ни вра́ски4:/ убели́л бо еси́ ю то́ки слез твои́х, и ны́не непреста́нно ра́дуешися.

Ве́ру неоску́дну в души́ име́я, преблаже́нне, да́нный тебе́ тала́нт трудолю́бно возде́лал еси́/ и прия́л еси́ власть над десятию́ градо́в доброде́телей,/ бе́сы прогоня́ти, прокаже́нныя очища́ти,/ разсла́бленныя бы́стро ходи́ти, слепы́я просвеща́ти,/ и усугу́би дар всем исцеле́ния, творя́щим святу́ю па́мять твою́.

Богоро́дичен: Аз, Де́во Свята́я Богоро́дице, наде́жду име́я на Тя, спасаю́ся./ Разгони́, Влады́чице, враги́ души́ моея́ и напра́ви мя на путь жи́зненный, да, спа́сся, вопию́ Ти:/ ра́дуйся, Помо́щнице ми́ра, наде́ждо христиа́нская./ Ра́дуйся, Госпо́дь с Тобо́ю, Благослове́нная.

Ин

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят; я́коже Бог наш,/ и несть пра́веден, па́че Тебе́, Господи.

Любо́вию Бо́жиею угаси́л еси́ любо́вь роди́телей,/ меч же духо́вный всегда́ воздвиза́я, и́мже во́лю хоте́ния твоего́ отсеца́я,/ утверди́л еси́ стопы́ ра́зума твоего́ на ка́мени любве́ Христо́вы.

И́же о твое́й пло́ти не пе́кся, жизнь ми́ра сего́ возненави́дел еси́/ и о плотски́х небре́гл еси́,/ всегда́ подвиза́яся ум чист к Бо́гу предста́вити./ И прине́сл еси́ себе́, я́ко непоро́чну и благоприя́тну Вели́кому Архиере́ю же́ртву.

Е́же стяжа́л еси́ от младе́нства ве́рою несумне́нною смиренному́дрие/ и соверше́нную к Бо́гу любо́вь/ и, вся чу́вства порабо́тив, я́ко безстра́стен был еси́,/ ум от тва́ри возвы́сив, лицу́ же Госпо́дню ду́шу предста́вил еси́.

Богоро́дичен: Спаси́ мя, Ма́ти Бо́жия, спасе́ния нача́ло ми́ру я́вльшися,/ и изба́ви молвы́, и нечи́стых страсте́й, и вся́кия проти́вныя ско́рби,/ да сла́влю Тя, Богоро́дице.

Седа́лен, глас 8.

Подо́бен: Я́ко Всенепоро́чная:

От земны́х на Небе́сная помы́слив и де́лом соверши́в,/ кра́сная ми́ра сего́ во уме́ты вмени́л еси́, Христа́ ра́ди юро́д быв на земли́,/ терпе́нием и жесто́ким подвиза́нием сын све́та показа́лся еси́/ и в Ца́рствии Небе́снем све́тло зри́ши Святу́ю Тро́ицу, преблаже́нне Васи́лие./ Ю́же моли́ согреше́ний оставле́ние дарова́ти/ пра́зднующим любо́вию святу́ю па́мять твою́.

Сла́ва, други́й седа́лен, глас 4:

Быв дом Бо́жий и жили́ще Свята́го Ду́ха, блаже́нне Васи́лие,/ це́рковь те́ла твоего́ непоро́чну соблю́л еси́,/ и, прише́д, всели́ся в тя Оте́ц, и Сын, и Святы́й Дух/ и дарова́ тебе́ терпе́ние, и му́жество, и хра́брость духо́вную,/ и несму́тною мы́слию по Боже́ственному пути́ ше́ствовати./ И, прие́м дар исцеле́ний, моли́ Христа́ Бо́га спасти́ ду́ши на́ша.

И ны́не, Богоро́дичен:

Красоте́ Твое́й, Богора́дованная, Арха́нгел Гаврии́л предстоя́, дивля́шеся и вопия́ше Ти:/ О Неве́сто Неискусобра́чная, Отрокови́це небла́зненная!/ Ка́ко Ти изреку́ пре́жде век сокрове́нную та́йну?/ Ты бо еси́ Небе́сным и земны́м соедине́ние./ Ра́дуйся, Обра́дованная, Госпо́дь с Тобо́ю.

Песнь 4

Ирмо́с: Проро́к Авваку́м у́мныма очи́ма/ прови́де, Го́споди, прише́ствие Твое́,/ тем и вопия́ше:/ от ю́га прии́дет Бог./ Сла́ва си́ле Твое́й, сла́ва снизхожде́нию Твоему́.

Был еси́ под влады́кою учине́н Христо́ва повеле́ния,/ и повелевая́ рабу́ своему́, те́лу, сотвори́ти слу́жбу свою́, Христу́ рабо́тая,/ и покори́ уму́, влады́це, страстны́я по́мыслы, и был еси́ сын послуша́ния, вопия́ Христу́:/ си́ле Твое́й сла́ва, Челове́колю́бче.

Имею́щим цел ум не тре́бовати писа́ния,– рече́ Вели́кий Анто́ний./ На тебе́ сие́ сбы́стся, прему́дре Васи́лие:/ не учи́вся кни́гам, вся разуме́л еси́ Боже́ственная Писа́ния,/ непреста́нно поя́ Христу́:/ си́ле Твое́й сла́ва, Человеколю́бче.

Во гра́де, я́ко в пусты́ни, живы́й, преблаже́нне Васи́лие,/ и ни от чего́же смуща́яся, но венча́лся еси́ ра́ди трудо́в твои́х,/ посеща́я вдови́цу, я́коже Илия́ проро́к саре́фтяныню,/ и поя́ песнь немо́лчную:/ си́ле Твое́й сла́ва, Челове́колю́бче.

Богоро́дичен: И́же Отцу́ и Ду́ху Собезнача́льный от Тебе́ изво́ли роди́тися на́шего ра́ди спасе́ния/ и дарова́ Тя ро́ду христиа́нскому те́плую Засту́пницу/ и в беда́х ско́рую Помо́щницу./ Те́мже, Ма́ти безму́жная, покланя́емся ве́рно Рождеству́ Твоему́.

Ин

Ирмо́с: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Ми́ра сего́ вся возненави́дел еси́, плоть ду́ху порабо́тив,/ и, удали́вшуся тебе́ теле́сныя любве́, в юро́дство претвори́лся еси́,/ до́бре разсмотри́в преити́ тя́жкую пучи́ну, успе́х прия́ти сподо́бился еси́, чу́дне Васи́лие.

Омраче́ние возненави́дев грехо́вное и пла́менем чистоты́ пресе́к пла́мень,/ терпе́нием и мудре́йшим юро́дством, я́ко златы́ми крила́ми, на Небеса́ возлете́л еси́/ и равноа́нгельную дости́гл еси́ степе́нь.

Любо́вию Христо́вою сро́дников отре́клся еси́ и над страстьми́ царь показа́лся еси́,/ ско́рбным путе́м ше́ствуя, и, дости́гнув простра́ннаго жили́ща,/ нас, плене́нных грехо́вными страстьми́, свободи́, преблаже́нне.

Богоро́дичен: Кров, и заступле́ние, и прибе́жище бу́ди ми, Де́во, рабу́ Твоему́,/ и исцели́ мя от безме́рных зол, да пою́, Пречи́стая:/ сла́ва Рождеству́ Твоему́.

Песнь 5

Ирмо́с: Мрак ду́ши моея́ разжени́, Светода́вче Христе́ Бо́же,/ началоро́дную тьму изгна́в бе́здны,/ и да́руй ми свет повеле́ний Твои́х, Сло́ве,/ да, у́тренюя, сла́влю Тя.

Процве́т, я́ко кипари́с, посреде́ земли́ Росси́йския, уго́дниче Христо́в Васи́лие,/ прине́сл еси́ плоды́ ду́ха во мно́зе терпе́нии,/ безыме́нство, и теле́сное удруче́ние, и от бесо́в и злых челове́к озлобле́ние./ Сего́ ра́ди прия́л еси́ ны́не ве́чное утеше́ние.

Си́ла бо Моя́,– рече́ Госпо́дь,– в не́мощи соверша́ется./ Се бо на тебе́ соверши́ся Бо́жие смотре́ние, чу́дне Васи́лие,/ си́лою Христо́вою ди́вен яви́лся еси́ в житии́ твое́м,/ зло стражда́, ника́коже боле́зни ощуща́л еси́:/ облегчева́ше тя жела́ние бу́дущих благ, я́же получи́л еси́.

Зва́ние твое́ не от челове́к бысть, но от Бо́га, прему́дре Васи́лие./ И, я́ко еле́нь, жаждя́, на исто́чники воды́ живы́я поте́кл еси́,/ напитава́я ду́шу Христо́вою любо́вию, и ктому́ ника́коже от зно́я грехо́внаго вжажда́лся еси́:/ укрепи́ бо тя на се Царь ми́ра.

Богоро́дичен: А́нгели и Арха́нгели, Херуви́ми и Серафи́ми многоочи́тии,/ Нача́ла, и Вла́сти, и Госпо́дствия раболе́пно покланя́ются Рождеству́ Твоему́, Богоро́дице,/ сла́вяще Тя, Влады́чице./ Те́мже и мы, Ма́ти Преблагослове́нная, покланя́емся со стра́хом и мо́лим Тя:/ спаси́ ду́ши на́ша.

Ин

Ирмо́с: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м:/ ино́го бо, ра́зве Тебе́, бо́га не зна́ю.

И́же до тре́тияго небесе́ возше́дый рече́: мы юро́ди Христа́ ра́ди./ Ты же, преблаже́нне, по благо́дати в таково́е юро́дство преложи́лся еси́,/ досажде́ние неразу́мных люде́й претерпе́в, и ко́зни бесо́вския попра́л еси́,/ и я́ко А́нгел на земли́ яви́лся еси́ нам.

Бо́га ра́ди житие́ сла́вы ми́ра сего́ от младе́нства возненави́дел еси́,/ возлюби́в нищету́ и терпе́ние,/ огне́м печа́ли очны́я сле́зы изсуши́л еси́/ и вся ско́рбная претерпе́л еси́, преблаже́нне Васи́лие.

Прему́дростию Бо́жиею просвеще́н еси́,/ огнь веще́ственный невеще́ственным угаси́в,/ и чистото́ю жити́я твоего́ безтеле́снаго во́инства усвое́нию сподо́бился еси́.

Богоро́дичен: Источа́еши исцеле́ний струи́ боля́щим, Де́во, всю́ду,/ Тя бо исто́чника показа́ милосе́рдия, Влады́чице, ми́лости Госпо́дь,/ из Тебе́ ро́ждейся па́че ума́.

Песнь 6

Ирмо́с: Я́коже проро́ка изба́вил еси́/ из глубины́ преиспо́дния, Христе́ Бо́же,/ и мене́ от грехо́в мои́х изба́ви, я́ко Человеколю́бец,/ и упра́ви живо́т мой, молю́ся.

Кто мо́жет изчести́ чудеса́ прему́драго Васи́лия,/ его́же ви́дяху по мо́рю ше́ствующа немо́кренно, я́ко по су́ху,/ и ви́дяху неве́рнии язы́цы, дивля́хуся и, прише́дше в Россию, пове́даху:/ мы,– реко́ша,– ви́дехом такова́ челове́ка, по мо́рю ше́ствующа;/ и́стинно бо свиде́тельство и от враг прино́сится./ Мы же глаго́лем: сла́ва Бо́гу, творя́щему чудеса ди́вная.

Уподо́бился еси́, прему́дре Васи́лие, все́ми нра́вы и обы́чаем/ Симео́ну, юро́дивому Христа́ ра́ди, и Андре́ю Царегра́дскому,/ и Вели́кому отцу́ Мака́рию, и Ону́фрию, и Па́влу Фиве́йскому,/ и Макси́му чу́дному, и Проко́пию Вели́кому./ С ни́миже сожи́тель яви́лся еси́ во Ца́рствии Христа́ Бо́га на́шего.

О прему́дре Васи́лие, чу́дный житие́м и ра́зумом!/ Мо́лим тя, блаже́нне:/ моли́ Христа́ Бо́га на́шего за лю́ди правосла́вныя,/ и всем ве́рным спасе́ние испроси́, и ми́ру мир, и от грех свобожде́ние,/ и умоли́ Ца́рствию бы́ти насле́дником.

Богоро́дичен: Кто нас изба́вит от му́ки ве́чныя и от сме́рти душе́вныя,/ а́ще не Ты возде́жеши пречи́стеи ру́це, Богоро́дице, Сы́ну Твоему́ и Бо́гу на́шему?/ Да спасе́т ны, ниотку́дуже иму́щия по́мощи,/ Твои́м покро́вом, Преблагослове́нная.

Ин

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Остр ум всегда́ к Бо́гу име́в,/ я́ко нечу́вствен ко всем жите́йским был еси́,/ вся же кова́рства лука́ваго, я́ко сеть, расто́ргнул еси́/ и пресве́тлое свети́ло ми́рови показа́лся еси́, Богоблаже́нне Васи́лие.

Ду́хом Бо́жиим наставля́емь, благоюро́диве,/ чистоту́ естества́ твоего́ преесте́ственну,/ небесоподража́тельное житие́ имел еси́ и ангелоле́пное виде́ние./ Те́мже моли́ спасти́ся нам от враг на́ших.

А́нгел житие́м на земли́ показа́лся еси́,/ и, на го́ру безсме́ртия возше́д доброде́тельми, А́нгельския полки́ удиви́л еси́,/ и на враги́ храбо́рник чу́ден показа́лся еси́./ И ны́не посо́бствуй во́инству на́шему, преблаже́нне,/ да твои́ми моли́твами проти́внии побежда́ются.

Богоро́дичен: Ру́ки Твоя́ пречи́стыя, Де́во Ма́ти, просте́рши,/ покры́й на Тя наде́ющияся и Сы́ну Твоему́ зову́щия:/ всем пода́ждь, Христе́, ми́лости Твоя́.

Конда́к, глас 4:

Ду́хом Бо́жиим води́м, преблаже́нне Васи́лие,/ оттря́сл еси́ мирски́й мяте́ж,/ и жити́я треволне́ния возгнуша́лся еси́,/ и, совле́кся одея́ний тле́нных и обле́кся в ри́зу безстра́стия,/ убежа́л еси́ ловле́ния льсти́ваго мироде́ржца,/ и был еси́ стра́нен во твое́м язы́це,/ и, па́че земна́го бога́тства избра́в бога́тство Небе́сное,/ увя́злся еси́ венце́м терпе́ния./ И ны́не, преблаже́нне Васи́лие, моли́ Христа́ Бо́га/ о творя́щих святу́ю па́мять твою́, да зове́м ти:/ ра́дуйся, преблаже́нне Васи́лие.

И́кос:

Трудолю́бному житию́ твоему́ А́нгели удиви́шася,/ му́жески бо воста́л еси́ на естество́:/ разуме́в непостоя́нное жития́ сего́, совле́клся еси́ одея́ний/ и, наг сый, стал еси́ проти́ву ко́знем диа́вольским,/ я́коже хра́брый ратобо́рец, по словеси́, преблаже́нне, апо́столову:/ несть на́ша брань к кро́ви и пло́ти,/ но к нача́лом, и ко власте́м, и к миродержи́телем тьмы ве́ка сего́./ И, сему́ нагото́ю теле́сною спле́тся до́блественне,/ ни от ко́еяже стра́сти победи́лся еси́, но всех сете́й убежа́л еси́ го́рдаго велиа́ра,/ прескочи́в про́пасть а́дову, ю́же изры́ враг между́ Ла́зарем и бога́тым,/ и ны́не у Авраа́ма на ло́не почива́еши, отнесе́н святы́ми А́нгелы./ Моли́ся, преблаже́нне, Христу́ Бо́гу на́шему о творя́щих святу́ю па́мять твою́, да зове́м ти:/ ра́дуйся, преблаже́нне Васи́лие.

Песнь 7

Ирмо́с: На по́ле Деи́ре/ иногда́ мучи́тель пещь поста́ви на муче́ние Богоно́сных,/ в не́йже три о́троки песносло́вяху еди́наго Бо́га,/ трои́чно воспева́ху, глаго́люще:/ отце́в Бо́же, благослове́н еси́.

День Госпо́день всегда́ пред очи́ма зря, прему́дре Васи́лие,/ предстоя́л еси́ наг, я́коже суди́щу нелицеме́рному Сы́на Бо́жия,/ и послужи́л еси́ Влады́це Твоему́ во мно́зе терпе́нии, воспева́я:/ оте́ц на́ших Бо́же, благослове́н еси́.

Разуме́в, блаже́нне Васи́лие, я́ко ничто́же ну́жднее души́, за ню́же Христо́с у́мре и воскре́се,/ не оскверни́л еси́ ри́зы душе́вныя, ю́же прия́л еси́ от свята́го Креще́ния./ И ны́не, предстоя́ Христу́, взыва́еши:/ оте́ц на́ших Бо́же, благослове́н еси́.

Ничто́же разлучи́т мя от любве́ Христо́вы,– сия́ преблаже́нный Васи́лий глаго́лаше,–/ ни высота́, ни глубина́, ни А́нгели, ни Си́лы, ни сла́ва, ни бога́тство,/ ничто́же бо хощу́ кра́сных ми́ра сего́, па́че Иису́са сла́дкаго, Ему́же вопию́:/ оте́ц на́ших Бо́же, благослове́н еси́.

Богоро́дичен: Пре́жде рождества́ пребы́сть Де́вою Ма́ти Сы́на Бо́жия/ и по рождестве́ яви́ся па́ки Де́ва:/ Бог бо бе, иде́же хо́щет, побежда́ются естества́ чи́ни./ Ты бо яви́лася еси́ село́ простра́нно Сы́на О́тча, Благослове́нная, Ему́же вопие́м:/ благослове́н Бог оте́ц на́ших.

Ин

Ирмо́с: Богопроти́вное веле́ние/ беззако́ннующаго мучи́теля высо́к пла́мень вознесло́ есть,/ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Тве́рдый душе́ю адама́нт показа́лся еси́, блаже́нне,/ вои́стинну житие́ твое́ па́че естества́, я́коже в ка́ющихся оби́тели,/ и осяза́нием и сластьми́ ми́ра сего́ безстра́стен пребыва́я,/ ве́лий же от виде́ния пребы́л еси́ без вре́да.

Испо́лнился еси́ Свята́го Ду́ха благода́ти, разуме́в Госпо́дне благове́стие,/ широ́кий и простра́нный путь, вводя́й в па́губу, возненави́дел еси́ и возлюби́л еси́ безмо́лвие;/ те́сным и приско́рбным путе́м Христу́ после́дуя,/ от земны́х к Небе́сным оби́телем пресла́вно возше́л еси́.

Благода́рное сие́ пе́ние, приноси́мое тебе́, не пре́зри, преблаже́нне,/ но ми́лостивно приими́ и ра́дости духо́вныя испо́лни нас,/ умоли́ Го́спода пода́ти Це́ркви на́шей утвержде́ние и ми́ру устрое́ние.

Богоро́дичен: Благоутро́бия ми́лости иму́щи, смире́нныя моея́ души́ не пре́зри,/ ве́рно молю́ Тя, Отрокови́це,/ но уще́дри вско́ре, и спаси́ мя от пучи́ны согреше́ний мои́х,/ и, обно́вльши благода́ть Твою́ на мне, просвети́, Де́во Чи́стая.

Песнь 8

Ирмо́с: Победи́тели мучи́теля и пла́мене́/ благода́тию Твое́ю бы́вше,/ за́поведем Твои́м зело́ прилежа́ще,/ о́троцы вопия́ху:/ благослови́те, вся дела́ Госпо́дня, Го́спода.

Ви́дя Госпо́дь труды́ твоя́ и мно́гия по́двиги, чуде́с да́ром обогати́ тя,/ просия́л бо еси́ на све́щнице Христо́ва сия́ния,/ и яви́ тя вселе́нней зна́ема ра́ди чуде́с исцеле́ния,/ и вси вопию́т с тобо́ю, преблаже́нне:/ благослови́те, вся дела́ Госпо́дня, Го́спода и превозноси́те Его́ во ве́ки.

Слы́шал еси́, прему́дре Васи́лие, Спа́сову за́поведь:/ а́ще, рече́, челове́к весь мир приобря́щет и отщети́т ду́шу свою́,/ что даст изме́ну на души́ свое́й?/ Ты же сие́ в се́рдцы твое́м скрыл еси́/ и пе́клся еси́, ка́ко угоди́ти Бо́гу, Ему́же взыва́еши:/ благослови́те, вся дела́ Госпо́дня, Го́спода и превозноси́те Его́ во ве́ки.

Ничи́мже ме́ньши пре́жних святы́х, чу́дне Васи́лие, яви́лся еси́,/ изря́ден мно́гими труды́ и по́двиги и та́йными к Бо́гу моли́твами,/ а́ще челове́ком и неве́домы, но Бо́гом вся зри́мы и ве́домы, Ему́же вопие́ши:/ благослови́те, вся дела́ Госпо́дня, Го́спода и превозноси́те Его́ во ве́ки.

Богоро́дичен: Благослови́те, вся дела́ Госпо́дня, Го́спода, ро́ждшагося от Де́вы Мари́и,/ и спа́сшаго всеро́днаго Ада́ма от паде́ния,/ и возне́сшаго па́ки челове́чество на высоту́ Небе́сную,/ и седя́щаго одесну́ю Отца́, Ему́же вопию́т вси А́нгели:/ да благослови́т вся тварь Го́спода и превозно́сит Его́ во ве́ки.

Ин

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода,/ и превозноси́те во вся ве́ки.

Огнь стра́шный разумева́я, земны́х ничто́же возлюби́л еси́./ Печа́лию душе́вною и глубо́ким се́тованием ум во глубину́ смире́ния погрузи́л еси́,/ жела́я всели́тися в Небе́сное Ца́рство,/ е́же и получи́в, ны́не ра́дуешися ра́достию безконе́чною.

Равноа́нгельную честь досто́йно получи́л еси́, преблаже́нне Васи́лие,/ и, со безпло́тными Бо́гу предстоя́, призира́й на ны с Небе́снаго кру́га, ра́дости пода́телю,/ и возсия́й свет твой нам, я́ко да ви́дим твоя́ чудеса́.

И́мже о́бразом жела́ет еле́нь пали́м на исто́чники,/ си́це и ты, преблаже́нне, всегда́ подвиза́яся, жела́л еси́ Боже́ственнаго хоте́ния/ и вся благоуго́дно Го́сподеви соверши́л еси́./ И ны́не со святы́ми пое́ши непреста́нно:/ по́йте, вся дела́, Го́спода и превозноси́те Его́ во ве́ки.

Богоро́дичен: Лука́во вре́мя живота́ моего́ и вся́кия зло́бы испо́лнено,/ сатане́ лука́вому лю́те мя смуща́ющу,/ Ты мя исто́ргни того́, Богороди́тельнице, па́кости,/ на Тя бо все возложи́х ча́яние мое́,/ спаси́ мя Твои́ми бо́дрыми моли́твами.

Песнь 9

Ирмо́с: Благослове́н Госпо́дь, Бог Изра́илев,/ воздви́гнувый рог спасе́ния нам/ в дому́ Дави́дове, о́трока Своего́,/ в ни́хже посети́ нас восто́к с высоты́/ и напра́вил ны есть на путь ми́ра.

Я́коже рече́ Христо́с, са́мая И́стина, внутрь вас есть Ца́рство Небе́сное./ Ты бо, Васи́лие чу́дне, был еси́ сын и насле́дник Ца́рствия Бо́жия,/ е́же скрыл еси́ внутрь себе́ доброде́тельми./ Сего́ ра́ди тя вси ублажа́ем, Христа́ велича́юще.

Бди́те,– рече́ Госпо́дь,– и моли́теся, не ве́сте бо дне и часа́, ка́ко прии́дет Сын Бо́жий./ Ты же, пра́ведне Васи́лие, всегда́ гото́в сый,/ ожида́л еси́ прише́ствия Христа́ Царя́ Небе́снаго,/ Его́же и ра́достно усре́л еси́ и прия́л еси́ блаже́нство ве́чное, Христа́ велича́я.

Егда́ преста́вился еси́, преблаже́нне Васи́лие,/ тогда́ стеко́шася ца́рие и кня́зи и вси собо́ри росси́йстии,/ ю́ноши и де́вы, ста́рцы со ю́нотами твои́м честны́м моще́м поклони́тися,/ и воскли́кнуша ку́пно вси па́мять ве́чную, Христа́ велича́юще.

Богоро́дичен: Возвели́чим Ма́терь Бо́га на́шего, Ю́же пою́т вси А́нгели и Арха́нгели,/ и вси ро́ди и коле́на покланя́ются/ и блажа́т от ны́не и до ве́ка, вопию́ще:/ ра́дуйся, о Благода́тная, Госпо́дь с Тобо́ю.

Ин

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Святы́м Ду́хом утеше́ние стяжа́в, у́мных сил име́л еси́ жи́тельство, преблаже́нне./ Тем светоно́сную твою́ па́мять похваля́юще, мо́лим:/ испо́лни нас ра́дости и весе́лия духо́внаго.

Умо́м и душе́ю укра́шен, преблаже́нне,/ и многострада́льным житие́м све́тло просия́ па́мять твоя́,/ и мы, благода́тными твои́ми луча́ми просвеща́ющеся, бед и неду́г избавля́емся.

Блага́я восприя́л еси́ на Небесе́х,/ и обре́л еси́ ра́дость неизрече́нную, и нас просвети́л еси́ чудесы́,/ и ны́не пребыва́еши со святы́ми А́нгелы во све́те Святы́я Тро́ицы, преблаже́нне Васи́лие./ Сего́ ра́ди тя велича́ем.

Богоро́дичен: А́нгельстии собо́ри Тя, Богороди́тельнице, сла́вят,/ и челове́честии ро́ди пе́сньми Тя почита́ют непреста́нно,/ Ты бо Боже́ственным Рождество́м земны́я с Небе́сными совокупи́ла еси́,/ тем Тя почита́ем.

Свети́лен:

Свет Христо́в всели́ся в сердце твое́, Васи́лие чу́дне,/ совле́клся бо еси́ ве́тхаго челове́ка и яви́лся еси́ нов,/ горя́ ду́хом по Христо́ве за́поведи./ И, умно́жив тала́нт трудо́в твои́х,/ яви́лся еси́ чу́ден в да́льных страна́х/ и Росси́йскую зе́млю просвети́л еси́, чуде́с зарю́ испуща́я./ И ны́не предстои́ши во све́те Святы́я Тро́́ицы, ра́дуяся.

Сла́ва, и ны́не, Богоро́дичен:

Свет ро́ждши душ на́ших, Богоро́дице, Христа́, от Отца́ возсия́вшаго/ и отгна́вшаго тьму идолобе́сия, просвети́вшаго вся ве́рныя/ и дарова́вшаго нам бы́ти благода́тию ча́дом Бо́жиим,/ во све́те присносу́щнем водворя́тися и Ду́хом Бо́жиим освяща́тися,/ Тя воспева́ющим.

На хвали́тех стихи́ры на 4, глас 6.

Подо́бен: Всю отложи́вше:

Все отло́ж мирско́е мудрова́ние,/ поте́кл еси́, ра́дуяся,/ в след Христа́ Бо́га на́шего./ Ему́же во всем животе́ твое́м нело́жно рабо́тая,/ показа́л еси́ труды́ и по́двиги,/ и по́льзу мно́гим сотвори́л еси́,/ и убели́л еси́ ри́зу душе́вную/ сне́га беле́йши,/ да, во всем послушли́в быв Христу́,/ со дерзнове́нием моли́ся о душа́х на́ших.

Вся оста́вил еси́ Христа́ ра́ди:/ отца́ и ма́терь,/ жену́, и ча́да, и сро́дствия,/ се́ла и име́ния,/ презре́в плотска́я мудрова́ния,/ ку́пно сверг и теле́сная одея́ния,/ был еси́ Христо́в учени́к избра́нный/ и во всем послушли́в тому́ яви́лся еси́./ Его́же со дерзнове́нием моли́ о душа́х на́ших.

Весь возложи́лся еси́, му́дре Васи́лие,/ на щедро́ты Бо́га на́шего,/ упова́я получи́ти Ца́рство Небе́сное,/ е́же и получи́л еси́/ проти́во трудо́в твои́х./ И ны́не не забу́ди град и лю́ди правосла́вныя,/ изб́а́ви от гла́да теле́снаго,/ вку́пе же и душе́внаго,/ во всем бо угоди́л еси́ Христу́,/ Его́же со дерзнове́нием моли́ о душа́х на́ших.

Сла́ва, глас 8. Самогла́сен:

Страх Госпо́день всели́ся в се́рдце твое́,/ и от сего́ разуме́л еси́ лу́чшая,/ е́же по Боже́ственному пути́ ше́ствовати./ И яви́лся еси́ ра́вен святы́м отце́м, Мака́рию и отцу́ Ону́фрию,/ и Па́влу Фиве́йскому, и Макси́му чу́дному, и Проко́пию,/ сих подража́тель изря́ден был еси́,/ А́нгельскаго и безвеще́ственнаго жити́я./ И, я́коже А́нгел све́та, неизме́нно рабо́тая твоему́ Влады́це,/ преблаже́нне Васи́лие,/ моли́ спасти́ ду́ши на́ша.

И ны́не, Богоро́дичен.

НА ЛИТУРГИ́И

Блаже́нны, от 1-го кано́на песнь 3-я и от 2-го кано́на песнь 6-я. Проки́мен: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́тимися к Тебе́. Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Матфе́я, зача́ло 43. Прича́стен: В па́мять ве́чную:

Моли́тва

О вели́кий уго́дниче Христо́в, и́стинный дру́же и ве́рный ра́бе Всетворца́ Го́спода Бо́га, преблаже́нне Васи́лие! Услы́ши ны, многогре́шныя, ны́не вопию́щия к тебе́ и призыва́ющия имя́ твое́ свято́е, поми́луй ны, припа́дающия днесь к пречи́стому о́бразу твоему́, приими́ ма́лое на́ше и недосто́йное сие́ моле́ние, умилосе́рдися над убо́жеством на́шим, и моли́твами твои́ми исцели́ всяк неду́г и боле́знь души́ и те́ла на́шего гре́шнаго, и сподо́би ны тече́ние жи́зни сея́ невреди́мо от ви́димых и неви́димых враго́в безгре́шно преити́, и христиа́нскую кончи́ну, непосты́дну, ми́рну, безмяте́жну, и Небе́снаго Ца́рствия насле́дие получи́ти со все́ми святы́ми во ве́ки веко́в. Ами́нь.

И́на моли́тва

О вели́кий уго́дниче Христо́в, преблаже́нне Васи́лие! Припа́дающе к ра́це моще́й твои́х, с ве́рою лобыза́ем честны́й твой о́браз, ча́юще от него́ си́лою Бо́жиею получи́ти исцеле́ние душ и теле́с на́ших, прославля́ем вели́чество Вседержи́теля Бо́га, Его́же ты душе́ю и те́лом твои́м в жи́зни сей просла́вил еси́, ублажа́ем тве́рдость ве́ры и любве́ твоея́ ко Го́споду Савао́фу, пропове́дуем кре́пость твоего́ Ду́ха и, воспомина́юще вели́кия по́двиги доброде́тели твоея́, вопие́м к тебе́ из глубины́ серде́ц на́ших: не премолчи́ вопи́ти за ны ко Го́споду Бо́гу, те́лом бо твои́м пребыва́еши с на́ми на земли́, ду́хом же почива́еши на Небе́си́ во объя́тиих Зижди́теля твоего́. Предста́тельством у́бо твои́м у Престо́ла непристу́пныя сла́вы, испроси́, да почи́ет и на нас Дух Бо́жий, дух прему́дрости и ра́зума, дух сове́та и кре́пости, дух ве́дения и благоче́стия и стра́ха Бо́жия, и да не пре́зриши многогре́шных на́ших моле́ний. Се мы, предстоя́ще в хра́ме, посвяще́ннем и́мени твоему́ свято́му, воспису́ем ти похва́льная си́це: ра́дуйся, богоблаже́нне Васи́лие, я́ко ты, возненави́дев вре́менная ми́ра, богоуго́дно подвиза́лся еси́ и на высоту́ доброде́телей восте́кл еси́. Ра́дуйся, я́ко потща́лся еси́ победи́ти страсть со все́ми поро́чными ея́ скло́нностьми и дарова́ний Свята́го Ду́ха сподо́бился еси́. Ра́дуйся, я́ко показа́лся еси́ ми́рови юро́д бы́ти, чистото́ю же души́ мудр Бо́гови яви́лся еси́. Ра́дуйся, я́ко в терпе́нии и страда́нии храбр яви́лся еси́ и вся стре́лы лука́ваго разжже́нныя погаси́л еси́. Ра́дуйся, я́ко жела́нием от исто́чник изра́илевых всегда́ почерпа́я, благода́ти Бо́жия преиспо́лнен был еси́. Ра́дуйся, я́ко, взем яре́м спаси́тельнаго словесе́ Христа́ Бо́га на́шего, попра́л еси́ всю горды́ню ми́ра. Ра́дуйся, я́ко посреде́ молв безмо́лвие сохрани́л еси́, мысль твою́ бы́стро устремля́я к Го́рним. Ра́дуйся, я́ко ты мече́м духо́вным во́лю хоте́ния твоего́ отсеца́л еси́ и сто́пы ра́зума твоего́ утвержда́л еси́ на ка́мени любве́ Христо́вы. Ра́дуйся, я́ко совле́клся еси́ тле́нных одея́ний и обле́клся еси́ в но́ваго челове́ка, обновле́на кро́вию Христо́вою. Ра́дуйся, я́ко в ме́сто тле́нных бога́тство духо́вное собра́л еси́ и нача́тки трудо́в Христу́ Бо́гу на́шему прине́сл еси́. Ра́дуйся, я́ко и по сме́рти Госпо́дь яви тя нам исто́чника исцеле́ний. Ра́дуйся, я́ко, сла́вы и бога́тства не восхоте́в, вся в ничто́же вмени́л еси́, да Христа́ приобря́щеши, Его́же и стяжа́л еси́ мно́гими труды́ и терпе́нием. Ра́дуйся, я́ко ны́не, соединя́яся с Бо́гом, непреста́нным Его́ зре́нием наслажда́ешися и обита́еши во блаже́нней ве́чности. Ра́дуйся, я́ко насыща́ешися благи́ми, и́хже о́ко не ви́де, и у́хо не слы́ша, и на се́рдце челове́ку не взыдо́ша, я́же угото́ва Бог та́ко возлюби́вшему Его́, поспешеству́й у́бо моли́твами твои́ми, избра́нниче Бо́жий, да и мы на земли́, совоку́плени крепча́йшим любве́ Бо́жия сою́зом, великоду́шно понесе́м благо́е Ева́нгелия и́го и благода́тию Свята́го Ду́ха да сподо́бимся вкуси́ти и насыща́тися ве́чно с тобо́ю Небе́сных немерца́емых благ. Ами́нь.

И́ну моли́тву зри день сей ни́же.

И́на слу́жба свята́го блаже́ннаго Васи́лия, Христа́ ра́ди юро́диваго, Моско́вскаго чудотво́рца

НА ВЕЧЕ́РНИ

На Го́споди, воззва́х: стихи́ры, глас 5.

Подо́бен: Преподо́бне о́тче:

Прему́дрый юро́де, богоблаже́нне Васи́лие,/ вельми́ подвиза́ся во вре́менней жи́зни/ зимо́ю, и зно́ем, и мра́зом,/ о́браз быв терпе́ния ви́дящим тя,/ ны́не у́бо лику́еши с безпло́тными си́лами,/ Христа́ безпреста́ни славосло́вя,/ И́же от Отца́ пре́жде век рожде́нна/ и нас ра́ди от Де́вы по́слежде воплоще́нна./ Того́ у́бо моли́, Тому́ помоли́ся, свя́тче,/ дарова́ти Це́ркви на́шей утвержде́ние/ и лю́дем ея́ единомы́слие.

Терпели́ве свя́те, богому́дре Васи́лие,/ вельми́ потруди́ся во днех зде́шния жи́зни/ нагото́ю, и а́лчбою, и жа́ждею,/ прописа́ние быв хотя́щим о мирски́х небрещи́,/ ны́не у́бо весели́шися со святы́ми А́нгелы,/ Христа́ непреста́нно славосло́вя,/ И́же на Кресте́ нас ра́ди распе́ншагося/ и от ме́ртвых тридне́вно воскре́сшаго./ Того́ у́бо моли́, Тому́ помоли́ся, блаже́нне,/ дарова́ти Це́ркви единомышле́ние/ и душа́м на́шим ве́лию ми́лость.

Тве́рдый адама́нте, непрекло́нный сто́лпе,/ кто дово́лен е́же во пло́ти твое́ жи́тельство сказа́ти?/ Пра́вило бо был еси́ всем хотя́щим не люби́ти ми́ра./ Ны́не у́бо, ра́дуяся со все́ми святы́ми,/ Христа́ вы́ну песносло́вя,/ хотя́щаго приити́ со сла́вою суди́ти вселе́нней в пра́вду,/ Того́ у́бо моли́, Тому́ помоли́ся, чу́дне,/ дарова́ти земли́ гобзова́ние плодо́в/ и живу́щим на ней в Правосла́вии утвержде́ние.

Сла́ва, глас 6. Самогла́сен:

Прииди́те, моско́встии наро́ди,/ стецы́теся, все росси́йское Правосла́вие,/ приступи́те, вся́ко достоя́ние и во́зраст весь,/ ко гро́бу чудотво́рца прему́драго, юро́да Васи́лия,/ и почерпи́те, неду́жнии, здра́вие, и боля́щии – исцеле́ние,/ в ско́рбех су́щии – утеше́ние,/ оби́льно бо источа́ет всем тре́бующим поле́зная/ и дару́ет ми́рови мир/ и душа́м на́шим ве́лию ми́лость.

И ны́не, Богоро́дичен.

Вход. Проки́мен дне. И чте́ния 3 преподо́бническая.

Прему́дрости Соломо́ни чте́ние (главы́ 5 и 6):

Прему́дрости Соломо́ни чте́ние (глава́ 3):

Прему́дрости Соломо́ни чте́ние (глава́ 4):

На стихо́вне стихи́ры, глас 1.

Подо́бен: Прехва́льнии му́ченицы:

Пресла́вне Васи́лие,/ тебе́ ничто́же от земны́х возлюби́вшу,/ но к Небе́сным все тща́ние име́л еси́,/ и́хже и о́б́щник быв,/ со все́ми угоди́вшими Бо́гу весели́шися,/ моли́ спасти́ся душа́м на́шим.

Стих: Честна́ пред Го́сподем/ смерть преподо́бных Его́.

Пречу́дне Васи́лие,/ тебе́ ничто́же от до́льних вожде́левшу,/ но к Го́рним всегда́ теку́щу/ и лу́чших раче́ние иму́щу,/ и́хже и получи́в, неизрече́нных благ наслажда́ешися,/ Христа́ моли́ спасти́ ду́ши на́ша.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Прему́дре Васи́лие,/ тебе́ ничто́же от тле́емых предпоче́тшу,/ но к нетле́нным впери́вшуся/ и немимотеку́щими обогати́вшуся,/ нестаре́емых благи́х насыща́ешися,/ Христа́ моли́ спасти́ ду́ши на́ша.

Сла́ва, глас 6:

Челове́че Бо́жий, прему́дрый юро́де,/ тве́рдый в ско́рбных, жесто́кий в боле́зненных,/ сосу́де избра́нный, вмести́лище Пресвято́му Ду́ху,/ обе́щанных святы́м насле́дниче,/ не преста́й моля́ о нас ко Го́споду.

И ны́не, Богоро́дичен.

Тропа́рь, глас 1.

Плоть удручи́вшу ти злострада́нием,/ ду́шу же просвети́вшу чистото́ю се́рдца,/ обогати́лся еси́ благода́тию Пресвята́го Ду́ха, Васи́лие,/ дарова́ти тре́бующим поле́зная./ Сего́ ра́ди неду́жнии, притека́юще к цельбопода́тельному твоему́ гро́бу, премудроюро́де,/ незави́стно приемлю́т боле́зней отложе́ние/ и благода́рственно воспева́ют просла́вльшаго тя,/ Еди́наго Человеколю́бца.

НА У́ТРЕНИ

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 1.

Подо́бен: Гроб Твой, Спа́се:

Гроб твой, свя́те, Боже́ственною благода́тию обогаще́н,/ неду́жным цельбода́тен изоби́льне быва́ет и печа́льным утеше́ние неоску́дно,/ твое́ проявля́ет к Бо́гу присвое́ние,/ твое́ сказу́ет зде́шних трудо́в мздовосприя́тие от Еди́наго Богатовозда́вца.

Сла́ва, и ны́не, Богоро́дичен:

Ма́терь Бо́жию Тя мо́лим вси,/ любо́вию прибега́юще под Боже́ственный Твой покро́в, Богоро́дице Присноде́во,/ Тебе́ бо и́мамы, гре́шнии, оправда́ние,/ Тебе́ стяжа́хом, злостра́ждущии, от лют избавле́ние, еди́ную у́бо Богоблагода́тную.

По 2-м стихосло́вии седа́лен, глас 8.

Подо́бен: Челове́цы, Спа́се:

Неду́жным, свя́тче, к моще́м твои́м теку́щим,/ благода́ть, от Бо́га да́нная тебе́, исце́ление тем излива́ет./ Наро́ди же, зря́ще чудоде́йствием неизчте́ние, вопию́т к Одарова́вшему тя таковы́ми:/ ди́вен еси́ во святы́х Свои́х,/ имея́й ве́лию ми́лость.

Сла́ва, и ны́не, Богоро́дичен:

Скорбя́щим утеше́ние, Богообра́дованная, и неду́жным исце́ление незави́стное,/ гре́шником же Моли́твеннице непосты́дная, Богоро́дице, всем Влады́чице,/ к Тебе́ прибега́ем, ве́рно вопию́ще Ти:/ изба́ви ны от вся́ческих зол, еди́ная на Тя упова́ющим Засту́пнице.

По полиеле́и седа́лен, глас 5.

Подо́бен: Собезнача́льное Сло́во:

Премудри́вшаго юро́дством свои́м ми́ра и мироде́ржца,/ и́же посреде́ гра́дских мяте́жей ум несмуще́н име́вшаго,/ воспои́м, ве́рнии, и просла́вим,/ я́ко подае́т ве́рно прося́щим я́же на по́льзу проше́ния/ и да́рует ми́рови мир и спасе́ние чту́щим святу́ю па́мять его́.

Сла́ва, и ны́не, Богоро́дичен:

Ужа́сно чу́до зача́тия и несказа́нен о́браз рождества́ в Тебе́ позна́ся, Чи́стая Присноде́во,/ ужаса́ет мой ум и удивля́ет по́мысл;/ Сла́ва Твоя́, Богоро́дице, всем простре́ся во спасе́ние душ на́ших.

Та́же степе́нна, 1-й антифо́н 4-го гла́са. Проки́мен, глас 4: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́тимися к Тебе́. Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6: Прии́дите, моско́встии наро́ди: зри Сла́вник на Го́споди, воззва́х:

Кано́н, глас 8, его́же краегране́сие: Христа́ ра́ди юро́диваго хвалю́. В Богоро́дичнах же: Богоро́дица.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йскии жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Храм се́рдце свое́ Пресвято́му Ду́ху сотвори́ти хотя́,/ хра́мы Боже́ственныя обходя́, у́мныя моли́твы к Бо́гу вознося́,/ житие́ свое́ в жесто́це пребыва́нии препроводи́л еси́, богому́дре Васи́лие.

Риз тле́нных одея́ния не тре́бовал еси́,/ во Христа́ е́же в Креще́нии облече́ние нерастле́нно снабде́в, Богоно́се,/ врага́ супоста́та в студ обле́кл еси́, я́ко су́ща не́мощна.

Изы́ти отсю́ду я́ко разуме́,/ пре́жде отше́ствия, е́же от зде, обнажи́лся еси́, богому́дрый юро́де Васи́лие,/ да нетле́нно одея́ние в бу́дущем прии́меши, е́же и не погреши́л еси́.

Богоро́дичен: Боле́зней кроме́ родила́ еси́ боле́зней мя измени́вшаго, Де́во Ма́ти Богоро́дительнице Мари́е,/ и здра́ва мя устро́ившаго Христа́,/ дре́вле же уя́звившаго мя оступи́вшаго5 неисце́льно злоко́зненнаго человекогу́бца.

Песнь 3

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.

Сла́вы маловре́менныя вся́ческих не хотя́,/ сла́вы присносу́щныя рачи́тель сый и́стинен,/ ю́же и получи́в, со все́ми угоди́вшими Бо́гу ра́дуешися, я́ко подо́бник тем нело́жен.

Ти́ны стра́стныя, я́ко смы́слен, огреба́яся,/ све́тлости же чисто́тней пристоя́,/ нагото́ю теле́сною ду́шу па́че со́лнца просвети́л еси́,/ я́ко той мир весь несть то́чен6.

Адама́нт в ско́рбных терпе́нием был еси́,/ и, безпло́тным, в те́ле сый, подо́бяся,/ зи́му и зной му́жественне терпя́,/ те́мже ны́не со А́нгелы водворя́ешися, блаже́нне.

Богоро́дичен: Ору́жие непобеди́мо нам, ве́рным, и стена́ необори́ма еси́, Богоро́дице,/ Тобо́ю огражда́еми, враги́ низлага́ем,/ я́ко несть непоро́чны, па́че Тебе́, Влады́чице всех.

Седа́лен, глас 4.

Подо́бен: Удиви́ся Ио́сиф:

Удиви́ся моско́вский наро́д, чуде́с мно́жество зря,/ и внима́ше в ра́зуме от Бо́га да́нную тебе́ благода́ть, Васи́лие,/ и мздовоздая́ние ско́рбем е́же во пло́ти жития́ твоего́,/ нагохожде́нию, а́лчбе же и жа́жди/ и та́йным се́рдца твоего́ к Бо́гу моли́твам,/ и свиде́тельствует, я́ко ве́рен сый благоразсу́ден, к Трудополо́жнику твоему́ вопи́я:/ нело́жен еси́, Реки́й: сла́вящия Мя возпросла́влю.

Сла́ва, и ны́не, Богоро́дичен:

Удиви́ся Ио́сиф, е́же па́че естества́ зря, и внима́ше мы́слию/ и́же на руно́ дождь в безсе́меннем зача́тии Твое́м, Богоро́дице,/ купину́, огне́м неопали́мую,/ жезл Ааро́нов прозя́бший,/ и, свиде́тельствуя, обру́чник Твой и храни́тель свяще́нником взыва́ше:/ Де́ва ражда́ет и по рождестве́ па́ки Де́вою пребыва́ет.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты Мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Руга́яся маловре́менная стяжа́вшим, жела́я же безконе́чная блага́я,/ наг ходи́л еси́, ни во что тле́нных оде́ян, непобеди́м теле́сными ну́ждами,/ но, я́ко безпло́тен, вы́ше потре́б плотски́х пребыва́я./ Тем Христу́, укрепи́вшему тя, взыва́ем:/ си́ле Твое́й сла́ва, Человеколю́бче.

А́нгел земны́и был еси́, челове́к Небе́сный показа́лся еси́,/ о всех жите́йских небре́гл еси́, да в о́ном ми́ре обогати́шися,/ не стяжа́в зде оби́тели, но Небе́сная селе́ния по преставле́нии твое́м восприя́л еси́./ Тем чудесы́ одари́вшему тя Бо́гу вопие́м:/ си́ле Твое́й сла́ва, Человеколю́бче.

Ду́хом по апо́столу ходи́в, по́хотей плотски́х не творя́,/ нагото́ю те́ла не стыдя́ся, не возду́шными ну́ждами победи́вся,/ не повину́в лу́чшее ху́ждшему, но над страстьми́ ум влады́ку име́л еси́./ Тем Спа́су, облагодати́вшему тя, взыва́ем:/ си́ле Твое́й сла́ва, Человеколю́бче.

Богоро́дичен: Гора́, ю́же ви́де Авваку́м,/ гора́ чи́ста, гора́ усыре́на,/ гора́, ю́же благоволи́ Бог жи́ти в ней, Ты еси́, Де́во Богоро́дице,/ от Тебе́ бо без се́мене воплоти́ся,/ Ему́же, с проро́ком веселя́щеся, зове́м:/ си́ле Твое́й сла́ва, Человеколю́бче.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

И́стинный учени́к Вопию́щему был еси́, блаже́нне:/ не люби́те ми́ра и я́же суть в ми́ре,/ ничто́же бо мирски́х веще́й име́в,/ невеще́ственными в преми́рных обогати́лся еси́.

У́зкий и приско́рбный путь в житии́ проше́д,/ простра́нствы Небе́сными по успе́нии Твое́м одаре́н,/ и́хже пою́щим тя и па́мять твою́ почита́ющим не лиши́тися помоли́ся.

Рог ве́рным лю́дем моли́твами твои́ми возвыша́й/ и земли́ благопло́дие у Соде́теля испроша́й,/ да в благоду́шии тебе́ воспева́ем, я́ко таковы́м благи́м хода́тая.

Богоро́дичен: Отрокови́це Богоизбра́нная, Неве́сто Творцу́ Всенепоро́чная,/ изми́ нас от страсте́й на́ших и свободи́ от рабо́ты вра́жия,/ Ты бо еси́ упова́ние на́ше, Всепе́тая.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Очи́сти ны от скве́рны, вельми́ бо окаля́хомся,/ из глубины́ зол возведи́ ны, мо́лимся,/ тебе́ бо моли́твенника стяжа́хом к Бо́гу спасе́ния на́шего.

Ди́вен быв в терпе́нии, наг бо всегда́ ходи́л еси́,/ те́мже нетле́нными оде́ждами украси́ тя/ е́же от зде́шних по преставле́нии твое́м Бог спасе́ния моего́.

Изба́ви ны от злых, вельми́ бо стужа́еми есмы́,/ во глубину́ лю́тых заше́дше от невнима́ния,/ приле́жно помоли́вся, я́ко уго́дник Бо́гу спасе́ния на́шего.

Богоро́дичен: Ро́ди родо́в блажа́т Тя, я́коже прорекла́ еси́, Присноблаже́нная,/ блаже́ны бо устро́ила еси́ окая́нны пре́жде бы́вшия,/ Ма́ти Спа́са на́шего.

Конда́к, глас 4.

Подо́бен: Яви́лся еси́ днесь:

Яви́л тя есть Госпо́дь ны́нешнему ро́ду/ исцели́теля боле́знем и прогони́теля неду́гом/ любо́вию, Васи́лие, притека́ющим к тебе́/ и призыва́ющим ве́рою моли́твы твоя́.

И́кос:

Слове́нску язы́ку, росси́йстей стране́, моско́встей о́бласти,/ я́коже благоволи́ Госпо́дь, чудотво́рец вели́к яви́лся еси́, Васи́лие,/ неду́гующим подая́ цельбы́ от мног бо време́н по преставле́нии твое́м,/ па́че же, по е́же к Бо́гу твоему́ отше́ствии, благода́ть незави́стна излива́ется./ Те́мже и́же в лю́тых злостра́ждущии, притека́юще ко гро́бу твоему́, исцеле́ний наслажда́ются,/ усе́рдно припада́юще о́бразу подо́бия твоего́ и призыва́юще ве́рою моли́твы твоя́.

Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Васи́лиеву житию́, е́же в ми́ре сем поживе́, А́нгели удиви́шася,/ сего́ ра́ди и в преставле́нии, того́ в Небе́сная провожда́юще, я́ко повеле́ни,/ ликова́ху, пою́ще благослове́ннаго отце́в Бо́га.

Авраа́мстии о́троцы огнь попра́ша в Вавило́не дре́вле,/ сего́ ра́ди, Васи́лие, зной и зи́му, я́ко безпло́тен, ни во что́же вменя́я, поя́ше:/ благослове́н Бог оте́ц на́ших.

Го́рняя блага́я, я́ко лу́чших сый рачи́тель, жела́я,/ сего́ ра́ди до́льняя наслажде́ния, я́ко ско́ро мину́юща, отве́рг, поя́ше:/ благослове́н Бог оте́ц на́ших.

Богоро́дичен: Огнь вавило́нския пещи́ о́троки не опаля́ше, вве́рженныя в ню дре́вле,/ та́коже и Боже́ственный Огнь, деви́ческия утро́бы не вреди́в, воплоти́ся, спаса́я пою́щих:/ благослове́н Бог оте́ц на́ших.

Песнь 8

Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Отроко́м, за благоче́стие в пещь от халде́йскаго мучи́теля вве́рженным иногда́,/ неопа́льно же изше́дшим, подо́бяся, Васи́лие,/ огнь злострада́ния попира́ше, поя́:/ де́ти, благослови́те, свяще́нницы, воспо́йте,/ лю́дие, превозноси́те Его́ во ве́ки.

Хожда́ху о́троцы в пещи́ халде́йстей неопа́льни иногда́,/ прему́дрый же юро́д, Васи́лие, в злострада́нии благоду́шествуя,/ веселя́шеся бу́дущих наде́ждами, духо́вных трудо́в Мздовозда́телю вопия́ше:/ де́ти, благослови́те, свяще́нницы, воспо́йте,/ лю́дие, превозноси́те Его́ во ве́ки.

Воева́ти на ны устремля́ющимся, свя́те,/ благоприя́тными твои́ми к Бо́гу моли́твами возбрани́, мо́лим тя,/ да, спасе́ни твои́м предста́тельством, Творцу́ и Изба́вителю вопие́м:/ де́ти, благослови́те, свяще́нницы, воспо́йте,/ лю́дие, превозноси́те Его́ во ве́ки.

Богоро́дичен: Ди́вно чу́до зача́тия на Тебе́ еди́ней от ве́ка показа́ся, Де́во Богоро́дице,/ си́ле бо Свята́го Ду́ха осени́вшей Тя, Творца́ всей тва́ри родила́ еси́,/ Его́же благословя́т вся́ческая, пою́т и превозно́сят во ве́ки.

Песнь 9

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бы́сть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия величают.

А́ще и не по ле́поте святы́ни твое́й убо́гое сие́ прино́сится песносло́вие,/ зане́ от ни́ща ума́ су́ще сокро́вища,/ но приими́ сие́, я́ко от усе́рдия есть, и блага́ми нам воздари́,/ да тя, я́ко Бо́жия уго́дника, веселя́щеся, велича́ем.

Ли́ку святы́х сочета́лся еси́, и пе́рвенец Це́рковь прия́т тя,/ я́ко богоуго́дно в ми́ре пожи́л еси́ и непреткнове́нно на Небе́са восте́кл еси́./ Тем тя, богому́дре, со свяще́нными, ве́рнии, велича́ем.

Юро́д ми́ру Христа́ ра́ди был еси́, прему́др сый в духо́вных Бо́гови,/ нищ и убо́г в теле́сных ходи́в, душе́вное бога́тство собра́л еси́,/ те́мже тя, богоблаже́нне, я́ко Христо́ва раба́ и́стиннаго, пе́сньми и похвала́ми, ве́рнии, велича́ем.

Богоро́дичен: Изба́ви нас от бед, Богоро́дице Чи́стая,/ ве́чное ро́ждшая Избавле́ние,/ я́ко на Тя упова́ние с Бо́гом, Богоотрокови́це, и́мамы,/ и Твои́м предста́тельством огражда́емся,/ и Тебе́, я́ко всех благи́х вино́вну су́щу,/ с Небе́сными во́инствы велича́ем.

Свети́лен.

Подо́бен: Жены́, услы́шите:

Неду́жнии, приступи́те гро́бу чудотво́рца,/ источа́ет бо изоби́льно исцеле́ний дарова́ния,/ и Бо́га хвали́те, просла́вившаго Своего́ уго́дника/ и чуде́с благода́тию обогати́вшаго того́ неоску́дно:/ Милосе́рд бо еси́, Всеси́льне.

Сла́ва, и ны́не, Богоро́дичен:

Цари́це и Влады́чице всей тва́ри, Царя́ и Влады́ку ро́ждшая несказа́нно,/ свободи́вшаго нас от рабо́ты диа́воли и тли сме́ртныя,/ Того́ ны́не приле́жно моли́, мо́лим Тя,/ прости́ти нам грехопаде́ния на́ша и спасти́ ны от вся́ческих зол.

На хвали́тех стихи́ры, глас 6.

Подо́бен: А́нгельския предыди́те си́лы:

Правове́рных мно́жества,/ ликовству́йте в па́мять прему́драго юро́да и чудотво́рца,/ и всех благи́х Пода́теля, Христа́ Бо́га, песносло́вите,/ и Того́ угодника, блаже́ннаго Василия, почита́йте,/ да моли́твами его́ прии́мем ве́лию ми́лость.

Празднолю́бных сосло́вие, торжеству́йте,/ бога́тии и ни́щии, сопра́зднствуйте,/ чудотво́рца Васи́лия па́мять почита́юще,/ и чуде́с благода́тию Одари́вшаго того́ воспева́йте,/ да моли́твами уго́дника Своего́ спасе́т нас.

А́нгельскому житию́ подража́телю,/ о телеси́ неради́вый, я́ко безпло́тен,/ посреде́ ми́ра немиролю́бне ходи́вый/ и юро́дственне зло́бы мудреца́ низложи́вый,/ всемогу́щаго Христа́ си́лою и благода́тию,/ Того́ моли́, блаже́нне, да спасе́т ны.

Сла́ва, глас 8:

Преблаже́нне Васи́лие,/ равноа́нгельный нестяжа́телю,/ богому́дре Христо́в ра́бе,/ ева́нгельски ми́ра и су́щих в нем нерачи́телю,/ моли́твами твои́ми страну́ на́шу утвержда́й,/ и Це́ркве единомышле́ние укрепля́й,/ и мир ми́рови проси́/ и душа́м на́шим ве́лию ми́лость.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

На литурги́и уста́в зри день сей выше.

Моли́тва ко Го́споду

О Влады́ко Христе́, Сы́не Бо́жий, Исто́чниче жи́зни и просвеще́нию, Долготерпели́вый и Многоми́лостивый, пода́ждь нам сла́вити пресвято́е и пресла́вное Твое́ И́мя бо́дренно во испове́дании серде́чнем во вся дни живота́ на́шего, до после́дняго часа́. Ели́ко хо́щеши, мо́жеши, вели́ка бо есть сла́ва премно́гаго Твоего́ милосе́рдия и непостижи́ма всему́ рожде́нному естеству́. Ка́ко претерпи́т язык наш, таковы́я бо ра́дости и весе́лия испо́лни нас, теле́снаго и духо́внаго? И́ли ка́ко воспое́м благода́ть Твою́ неизрече́нную? И́стинным жела́нием усе́рдно велича́ем и славосло́вим милосе́рдие Твое́, я́ко дарова́ нам Своего́ уго́дника, блаже́ннаго Васи́лия? Толи́ко ду́хом к Тебе́ зове́м: о Го́споди, Живы́й, Непристу́пный, Стра́шный, Ми́лостивый и Ще́дрый, Ви́димый и Невиди́мый, поми́луй нас, всегда́ Тебе́ со слеза́ми зову́щих, и просвеща́й нас, Своего́ ра́ди уго́дника, пресве́тло ми́лостивыми чудесы́. О благи́й Царю́ всея́ тва́ри! Поми́луй боже́ственным Твои́м пресветломи́лостивым изволе́нием хоте́ния Своего́ и похвалу́ сла́вы благода́ти Своея́ приими́ по премно́гому милосе́рдию Своему́, вели́чествия ра́ди прехва́льнаго Твоего́ И́мене, и Пречи́стыя Твоея́ Ма́тере, Пресла́вныя, Преблагослове́нныя и Пренепоро́чныя Присноде́вы Марии, и святы́х сла́вных и всехва́льных апо́стол, и проро́к, и му́ченик, преподо́бных и пра́ведных ра́ди, и свята́го богому́драго юро́да Твоего́, преблаже́ннаго Васи́лия, и всех святы́х ра́ди Свои́х уго́дник, возвели́чи, Го́споди, Русь Правосла́вную пред лати́ны и басурма́ны и про́чими язы́ки, враги́ ея́ и супоста́ты побори́, Го́споди, во́и же ея́ хра́бры сотвори́ и огради́ я а́нгелы святы́ми Свои́ми, и всем правосла́вным христиа́ном в целому́дрии, и в мире, и в благоде́нствии пребыва́ти соблаговоли́, и облако́м Небе́сным повели́ да́ти дождя́ благода́рственно земли́ во благопотре́бно вре́мя, я́же бо во препита́ние лю́дем Твои́м и траву́ ското́м, испо́лни я́ вся́кия благода́ти в род и род во ве́ки веко́в. Я́ко Ты еси́ Бог ми́ру и Спаси́тель душа́м на́шим, Твое́ бо есть, е́же ми́ловати и Спа́сати, Свят еси́ Ты, Го́споди Бо́же наш, и Тебе́ сла́ву возсыла́ем, со Отце́м и Святы́м Ду́хом, всегда́, ны́не, и при́сно, и во ве́ки веко́в. Ами́нь.

Печать страницы