Служба в честь святаго благовернаго великаго князя Андрея Боголюбскаго, Владимирскаго чудотворца
НА МА́ЛОЙ ВЕЧЕ́РНИ
На Го́споди, воззва́х: стихи́ры, глас 4.
Подо́бен: Дал еси́ зна́мение:
Дал еси́ свети́льника Це́ркви Твое́й, Го́споди,/ благове́рнаго кня́зя и страстоте́рпца Андре́я,/ му́ченически пострада́вшаго/ и кровь свою́, я́ко во́ду, пролия́вшаго:/ Тебе́ бо те́пле возлюби́в/ чи́стым се́рдцем и душе́ю сокруше́нною,/ побо́рник ве́ры и исто́чник чуде́с соде́лася/ и ны́не мо́лится о душа́х на́ших.
От благочести́ваго ко́рене изра́сл еси́,/ розго́ благопло́дная, Андре́е,/ измла́да бо крест, я́ко ору́жие, на ра́мо твое́ прия́л еси́,/ ве́ру, я́ко щит, наде́жду, я́ко броню́,/ кро́тость и незло́бие, я́ко шлем./ Сего́ ра́ди лику́я ны́не со А́нгелы,/ непреста́нно моли́ о душа́х на́ших.
Я́ко звезда́ пресве́тлая,/ просвеща́ющая ду́ши ве́рных чуде́сными сия́нии,/ страстоте́рпче Госпо́день, благове́рный Андре́е,/ мрак страсте́й и боле́зней на́ших отгоня́еши,/ здра́вие же да́руеши че́стне почита́ющим многострада́льныя твоя́ мо́щи,/ моли́твенниче о душа́х на́ших.
Сла́ва, глас 6: Росси́и столпа́ непоколеби́маго: зри на стихо́вне.
И ны́не, Богоро́дичен.
На стихо́вне стихи́ры, глас 2.
Подо́бен: До́ме Евфра́фов:
В Росси́йстей земли́,/ я́коже со́лнце,/ возсия́л еси́ чистото́ю твое́ю,/ всех привлека́я сердца́ и помышле́ния/ к твои́м чудесе́м, пресла́вне.
Стих: Пра́ведник, я́ко фи́никс, процвете́т/ и, я́ко кедр, и́же в Лива́не, умно́жится.
Росси́йская племена́ вся,/ благоче́стия рачи́телие,/ духо́вне ликовству́йте,/ пе́сньми сла́вяще страстоте́рпца,/ вели́каго кня́зя Андре́я пресла́внаго.
Стих: Насажде́ни в дому́ Госпо́дни/ во дво́рех Бо́га на́шего процвету́т.
Пе́ния сла́дкая,/ страда́ний твои́х похвале́ния,/ благодея́ний славосло́вие,/ блаже́нне, приими́,/ Андре́е страстоте́рпче.
Сла́ва, и ны́не, Богоро́дичен:
Вы́шнии Тя ли́цы,/ Богоро́дице Де́во,/ пою́т с ни́жними,/ сла́вяще непреста́нно/ Рождество́ Твое́ пресвято́е.
Тропа́рь пи́сан на вели́цей вече́рни.
Сла́ва, и ны́не, Богоро́дичен.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8, глас 2:
Ки́ими похва́льными венцы́/ почти́м блаже́ннаго страстоте́рпца и чудотво́рца,/ вели́каго кня́зя Андре́я?/ Ве́рою и любо́вию возопии́м к нему́:/ ра́дуйся, ве́рным лю́дем те́плый засту́пниче/ и земли́ Росси́йстей удобре́ние,/ его́же венцы́ венча́ет Христо́с Бог наш,/ име́яй ве́лию ми́лость.
Ки́ими похва́льными пе́сньми/ ны́не соста́вим ликова́ние/ в честне́м пра́зднице твоея́ па́мяти,/ страстоте́рпче Христо́в, вели́кий кня́же Андре́е,/ недоуме́нием одержи́ми?/ Оба́че, Небе́сней сла́ве твое́й ра́дующеся,/ смире́нно мо́лим ти ся:/ моли́ Бо́га ве́рным лю́дем побе́ды на враги́ дарова́ти,/ тебе́ бо те́плаго моли́твенника ко Влады́це стяжа́хом,/ подаю́щему ми́рови ве́лию ми́лость.
Ки́ими похвала́ми досто́йно просла́вим/ блаже́ннаго Андре́я, кня́зя и страстоте́рпца?/ Ве́лию бо благода́ть от Христа́ Бо́га прия́л есть,/ всем подае́т неоску́дная исцеле́ния/ и мо́лится о душа́х на́ших.
И́ны стихи́ры, глас 1:
Све́тлый торжеству́ет пра́здник днесь/ в свяще́ннем хра́ме честна́го Рождества́ Богома́тере,/ ра́дующися, оби́тель вели́каго кня́зя Андре́я Боголю́бская,/ иму́щи того́ кти́тора,/ к Бо́гу хода́тая усе́рдна,/ всему́ наро́ду Росси́йскому засту́пника и побо́рника./ Те́мже усе́рдно мо́лимся ему́,/ прося́ще ми́ра и спасе́ния душ на́ших.
Днесь ликовству́ет сла́вный град Влади́мир/ о всесвяте́й па́мяти свята́го вели́каго кня́зя Андре́я Боголюби́ваго,/ днесь све́тло красу́ется вели́кий Богоро́дичный храм его́,/ в нем бо почи́ нетле́нным те́лом уго́дник Бо́жий,/ святы́й созда́тель его́,/ моля́щийся о душа́х на́ших.
Рачи́тель быв Небе́снаго жития́/ и подража́тель святы́х, Андре́е пресла́вне,/ оби́тели своея́ свети́льниче,/ росси́йское утвержде́ние,/ князе́м и царе́м о́бразе и похвало́,/ прииди́ ны́не к нам, пра́зднующим пресве́тлую па́мять твою́,/ приими́ ма́лое на́ше моле́ние/ и испроси́ нам у Христа́ мир и ве́лию ми́лость.
Ко́рень правове́рия,/ напое́нный благода́тию Ду́ха Пресвята́го, был еси́,/ вели́кий кня́же Андре́е,/ возрасти́в нам ветвь Богонасажде́нную,/ цвет благоуха́ния израсти́вший, Гле́ба чу́днаго,/ точа́щаго всем ве́рным чудеса́./ С ни́мже предстоя́ Христу́ Бо́гу,/ моли́ спасти́ и просвети́ти ду́ши на́ша.
Сла́ва, глас 8:
Прииди́те, лю́дие, всяк род и во́зраст,/ и ви́дите зде незло́биваго а́гнца,/ от свои́х домоча́дцев закла́ннаго непови́нно,/ вели́каго кня́зя Андре́я Боголюби́ваго:/ те́лом у́бо во гро́бе погребе́н бысть, я́ко мертв,/ душе́ю же на Небесе́х со А́нгелы и с му́ченики ликовству́ет, я́ко жив,/ подава́яй ве́рным чудеса́./ Те́мже усе́рдно возопие́м:/ страстоно́сче Христо́в Андре́е,/ моли́ся Пресвяте́й Тро́ице дарова́ти ве́рно чту́щим тя здра́вие/ и спасти́ ду́ши на́ша.
И ны́не, Богоро́дичен: Царь Небе́сный:
Вход. Проки́мен дне. И чте́ния три преподо́бническая.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (глава́ 5):
Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их, и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́новы чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На лити́и стихи́ры, глас 1:
Днесь всечестна́я па́мять пра́зднуется/ вели́каго кня́зя и му́ченика Андре́я Боголюби́ваго,/ на́шего засту́пника и помо́щника в ско́рбех,/ боля́щим врача́ предо́бра,/ на бра́нех посо́бника непобори́ма./ Сего́ ра́ди досто́йно ублажи́м его́/ и све́тло па́мять его́ да торжеству́ем:/ мо́лится бо Го́сподеви спасти́ся душа́м на́шим.
Прииди́те, росси́йстии лю́дие,/ Андре́я Боголюби́ваго све́тло псалмы́ и пе́сньми возвели́чим:/ созыва́ет бо нас духо́вне день страда́ния его́ торжествова́ти,/ в о́ньже восхо́дит от земли́ к Небе́сным/ и хвала́ми от Ангел венча́ется,/ предстои́т же Престо́лу Христо́ву,/ моля́ся дарова́ти нам мир и ве́лию ми́лость.
Наста́ днесь све́тлое торжество́,/ па́мять сла́вная страстоно́сца Христо́ва,/ сия́юща чуде́с заря́ми./ Вели́кий кня́же Андре́е приснопа́мятне,/ испроси́ у Христа́ Бо́га моли́твами твои́ми/ благода́ть душа́м на́шим и ве́лию ми́лость.
Сла́ва, глас 8:
Прииди́те, празднолю́бцы, лик соста́вим,/ прииди́те, воспое́м пра́зднственная,/ восхва́лим преимени́таго сего́, тве́рдаго побо́рника,/ страстоте́рпца, кня́зя Андре́я:/ непреста́нно бо мо́лит о нас Христа́ Бо́га на́шего/ пода́ти нам отпуще́ние грехо́в и спасе́ние.
И ны́не, Богоро́дичен: Безневе́стная Де́во:
На стихо́вне стихи́ры, глас 1.
Подо́бен: Небе́сных чино́в:
Благоче́стие положи́вый в нача́ло дел твои́х,/ иму́щее обетова́ние живо́та ны́нешняго и гряду́щаго,/ благове́рный кня́же Андре́е,/ сие́ му́дрствовати наставля́й всех,/ и́же во вла́сти суть,/ ку́пно же и владо́мых.
Стих: Пра́ведник, я́ко фи́никс, процвете́т/ и, я́ко кедр, и́же в Лива́не, умно́жится.
Ка́плями кро́ве святы́я/ очервлени́в ри́зы твоя́, свя́те Андре́е,/ сла́вный вене́ц му́ченический от Бо́га прия́л еси́,/ те́мже ра́достне па́мять твою́ пра́зднующе, мо́лимся усе́рдно:/ моли́ся о душа́х на́ших.
Стих: Насажде́ни в дому́ Госпо́дни/ во дво́рех Бо́га на́шего процвету́т.
Я́ко звезда́ пресве́тлая,/ мир просвеща́еши, страстоте́рпче Андре́е,/ мрак грехо́вный отгоня́я,/ те́мже воспева́ем тя ра́достно,/ ублажа́юще па́мять твою́.
Сла́ва, глас 6:
Росси́и столпа́ непоколеби́маго,/ непови́ннаго страстоте́рпца, вели́каго кня́зя Андре́я,/ соше́дшеся, празднолю́бцы, хвала́ми и пе́сньми духо́вными возвели́чим/ и согла́сно возопии́м ему́:/ о всеблаже́нне страстоте́рпче, вели́кий кня́же Андре́е,/ я́ко име́я дерзнове́ние ко Пресвяте́й Тро́ице,/ моли́ в ми́ре сохрани́ти оте́чество твое́/ и спасти́ ду́ши на́ша.
И ны́не, Богоро́дичен.
Тропа́рь свята́го, глас 8:
Я́ко благове́рен и пра́веден,/ за любо́вь Христа́ Бо́га от свои́х смерть прия́л еси́,/ кровь свою́ пролия́в,/ я́коже пре́жде сро́дницы твои́ и страстоте́рпцы Бори́с и Глеб,/ и́хже кро́вем совопие́т и твоя́ кровь, свя́те, к Бо́гу,/ я́коже А́веля и Заха́рии пра́ведных,/ благове́рный страстоте́рпче, вели́кий кня́же Андре́е,/ с ни́миже Христа́ Бо́га моли́ о стране́ на́шей, е́же Богоуго́дней бы́ти/ и сыново́м росси́йским спасти́ся.
Ин тропа́рь, глас 3:
Е́же во пло́ти житию́ твоему́ удиви́шася а́нгельстии чи́ни:/ ка́ко с те́лом к неви́димым сплете́нием изше́л еси́, пресла́вне,/ и уязви́л еси́ де́монския полки́./ Отону́дуже, Андре́е, Христо́с тебе́ воздаде́ бога́тыми дарова́ньми:/ сего́ ра́ди, о́тче, моли́ спасти́ся душа́м на́шим.
НА У́ТРЕНИ
На Бог Госпо́дь: тропа́рь свята́го два́жды. Сла́ва, и ны́не, Богоро́дичен.
По 1-м стихосло́вии седа́лен, глас 1:
Андре́я страстоте́рпца и вели́каго кня́зя пра́здник соверша́ем богому́дренно,/ непреста́нно бо мо́лит Христа́ да́ти душа́м на́шим ве́лию ми́лость.
Сла́ва, глас то́йже:
Па́мять твоя́ во век пребыва́ет, вели́кий кня́же Андре́е:/ а́ще бо и преста́вился еси́ от нас, па́стырю до́брый,/ но не отступа́еши от нас ду́хом любве́ твоея́,/ Бо́жию Престо́лу предстоя́ и со А́нгелы лику́я на Небесе́х,/ с ни́миже моли́ спасти́ся душа́м на́шим.
И ны́не, Богоро́дичен:
Ум челове́ческий по достоя́нию пе́ти Тя, Влады́чице Пречи́стая Богоро́дице, недоуме́ет,/ но мы зове́м Ти, я́коже Арха́нгел Гаврии́л:/ ра́дуйся, Ада́мово свобожде́ние;/ ра́дуйся, прама́тере Е́вы оправда́ние;/ ра́дуйся, ми́ра спасе́ние;/ ра́дуйся, Ма́ти Христа́ Бо́га.
По 2-м стихосло́вии седа́лен, глас 8:
Соше́дшеся, ве́рнии, па́мять вели́каго кня́зя Андре́я духо́вно торжеству́ем,/ благодаря́ще Христа́ Бо́га на́шего, просла́вльшаго Своего́ уго́дника и да́ром чуде́с обогати́вшаго;/ притеце́м ве́рно к ра́це моще́й его́,/ прие́млюще телесе́м здра́вие и душа́м ве́лию ми́лость.
Сла́ва, глас то́йже:
Па́мять твоя́, сла́вне му́чениче Андре́е и вели́кий кня́же,/ украша́ет днесь Це́рковь Христо́ву,/ призыва́ющи нас пе́сньми по достоя́нию восхвали́ти тя, Богому́дре,/ я́ко вои́стинну во́ина Христо́ва и де́монов низложи́теля,/ те́мже мольба́ми твои́ми изба́ви нас от бед и лю́тых обстоя́ний.
И ны́не, Богоро́дичен:
К Тебе́, Взбра́нной Воево́де и Засту́пнице на́шей, прибега́ем, Пречи́стая Богоро́дице:/ побори́, Чи́стая, борю́щаго ны диа́вола,/ и припа́даем к Твоему́ пречи́стому о́бразу,/ прося́ще изба́витися вся́кия му́ки и огня́ ве́чнаго, да зове́м Ти:/ ра́дуйся, Неве́сто Неискусобра́чная.
По полиеле́и седа́лен, глас 5:
Сия́нии чуде́с облиста́еши, я́ко звезда́ пресве́тлая,/ ду́ши весели́ши и неду́ги отго́ниши,/ те́мже тя, блаже́нне, восхваля́ем, любо́вию чту́ще всечестну́ю па́мять твою́.
Сла́ва: Моще́й твои́х ра́ка, вели́кий кня́же всехва́льне Андре́е, источа́ет исцеле́ния,/ и свята́я твоя́ душа́ с ли́ки а́нгельскими досто́йно ра́дуется,/ с ни́миже моли́ спасти́ся душа́м на́шим.
И ны́не, Богоро́дичен:
К Богоро́дице возопии́м любо́вию:/ ра́дуйся, горо́ Бо́жия приосене́нная;/ ра́дуйся, огнено́сный престо́ле./ Ра́дуйся, ле́ствице и две́ре Небе́сная;/ ра́дуйся, же́зле, невла́жно прозя́бший./ Ра́дуйся, всех спаса́ющая от бед и скорбе́й;/ ра́дуйся, Влады́чице, ми́ра спасе́ние.
Степе́нна, 1-й антифо́н 4-го гла́са. Проки́мен, глас 4: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́тимися к Тебе́. Вся́кое дыха́ние: Ева́нгелие от Матфе́я, зача́ло 36.
По 50-м псалме́ стихи́ра, глас 6:
Прииди́те, вси ве́рнии,/ согла́сно воспои́м вели́каго кня́зя Андре́я Боголюби́ваго,/ благоче́стия свети́льника,/ чистоты́ ревни́теля,/ и́стинныя любве́ де́лателя,/ и́же ны́не Христу́ предстои́т,/ моля́ спасти́ся нам.
Кано́н Богоро́дице на 6 и свята́го два кано́на на 8. Кано́н пе́рвый, глас 8, имы́й вме́сто краегране́сия стихосло́вное перворе́чие.
Песнь 1
Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.
Сла́внейшаго Тебе́ Царя́ и Влады́ку Небе́сных сил и вся́каго созда́ния,/ Творца́ же и Го́спода, Триипоста́снаго и Единосу́щнаго Бо́га молю́:/ отве́рзи уста́ моя́ недосто́йная пе́ти раба́ Твоего́,/ вели́каго кня́зя и чудотво́рца Андре́я.
Богоспаса́емаго земна́го оте́чества быв сла́ва и глава́,/ Небе́снаго оте́чества насле́дник показа́лся еси́, благове́рный кня́же Андре́е,/ проли́тием кро́ве твоея́ непови́нныя,/ в не́мже лику́я со Ангелы, пое́ши Еди́но Божество́ Святы́я Тро́ицы.
Гра́да Вы́шняго Сио́на в кро́вех водворя́яся,/ трисо́лнечнаго Божества́ сла́вы бога́тно наслажда́ешися,/ ея́же и нас прича́стники сотвори́ непреста́нными твои́ми ко Го́споду предста́тельствы,/ пою́щих тя, блаже́нне кня́же Андре́е.
Богоро́дичен: Влади́мира гра́да Росси́йския держа́вы благочести́вый наро́д просвети́ла еси́,/ о Преблагослове́нная Богоро́дице Мари́е,/ Андре́евым принесе́нием чудотво́рнаго Твоего́ о́браза,/ его́же списа́ Богогла́сный евангели́ст Лука́.
Други́й кано́н свята́го, глас 6.
Песнь 1
Ирмо́с: Волно́ю морско́ю/ Скры́вшаго дре́вле/ гони́теля мучи́теля –/ под земле́ю скры́ша спасе́нных о́троцы;/ но мы, я́ко отрокови́цы,/ Го́сподеви пои́м,/ сла́вно бо просла́вися.
О Бо́жий Сло́ве, Ми́лостиве Христе́ Царю́!/ Пре́зри моя́ мно́гая прегреше́ния,/ отве́рзи ми уста́ и даждь ми сло́во ра́зума,/ да воспою́ Твоего́ уго́дника, вели́каго кня́зя Андре́я.
Измла́да Христа́ возлюби́л еси́, всеблаже́нне вели́кий кня́же Андре́е, и Пречи́стую Его́ Ма́терь./ Те́мже и просла́вился еси́ в житии́ твое́м,/ па́че же по страда́льчестей кончи́не твое́й.
Ны́не, вели́кий кня́же, преблаже́нне Андре́е,/ душа́ твоя́ водворя́ется со Христо́м во Ца́рствии Небе́снем,/ зде же честны́я твоя́ мо́щи источа́ют исцеле́ния с ве́рою приходя́щим.
Богоро́дичен: К Тебе́, Богоро́дице Всепе́тая, прибега́я и припа́дая, молю́ся:/ Твои́м хода́тайством, Влады́чице, и моли́твами Твоего́ уго́дника, вели́каго кня́зя Андре́я,/ ми́лостива мне сотвори́ Сы́на Твоего́, Христа́ Бо́га на́шего.
Катава́сия: Отве́рзу уста́ моя́:
Песнь 3
Ирмо́с: Утвержде́ние мое́, Спа́се, еси́,/ прибе́жище мое́ и си́ла,/ поколеба́вшееся се́рдце мое́ утверди́ в стра́се Твое́м,/ я́ко несть свят, я́коже Ты, Бог наш.
Святы́я Богоро́дицы чудотво́рный о́браз/ я́ко непобеди́мое ору́жие на враги́ и покро́в тверде́йший во бра́нех име́л еси́, досточу́дне Андре́е,/ всю свою́ наде́жду на Первообра́зную полага́я,/ ве́дый Тоя́ всеси́льное заступле́ние.
Собо́рныя це́ркве Влади́мирския основа́тель и украси́тель был еси́, преблаже́нне,/ храм светоза́рен Го́сподеви име́я се́рдце твое́;/ хра́мы и нас соде́лай Ду́ху Свято́му/ непреста́нными твои́ми и богоприя́тными моли́твами, всече́стне.
Апо́стольския про́поведи о Христе́ и оте́ческая уче́ния тве́рдо в се́рдце твое́м печатле́я,/ благоче́стием и ве́рою просия́л еси́, пресла́вне, па́че со́лнца,/ в те́хже моли́ и нам сохране́нным бы́ти до конца́ Того́ благода́тию.
Богоро́дичен: Вели́кия та́йны чу́до на Тебе́ устро́ися, Богоизбра́нная Отрокови́це:/ Безнача́льнаго бо Отца́ Единосу́щное Сло́во де́йством Свята́го Ду́ха из Тебе́ воплоти́ся/ во спасе́ние на́ше и обновле́ние, Благода́тная.
Ин
Ирмо́с: Тобо́ю, Христе́, Небеса́ утвержда́ема вся,/ Сло́во Бо́жие и Си́ла,/ испове́дуют сла́ву неизрече́нну/ и вседе́тельныя руки́ Твоея́ сотворе́ния,/ несть бо пресвя́т, ра́зве Тебе́, Го́споди.
Предводи́мый чудотво́рным о́бразом Богома́тере,/ из Ки́евския страны́, Андре́е, прише́л еси́ во град Влади́мир,/ его́же во сла́ву гра́да первопресто́льна возве́л еси́,/ ве́ру же Христо́ву та́мо утверди́л еси́.
Ми́лость и и́стину сочета́л еси́,/ быв вели́кий князь и судия́ Росси́йстей земли́, благове́рный кня́же Андре́е,/ суд, и ми́лость, и ве́ру храни́ти наста́ви и ны́не судя́щих земли́.
От младе́нства, вели́кий кня́же Андре́е, позна́н был еси́ Бо́гом/ и все упова́ние твое́ на Го́спода возложи́л еси́, храня́ спаси́тельная Его́ повеле́ния,/ Ему́же ны́не предстоя́ со дерзнове́нием, о нас моли́ся.
Богоро́дичен: Ра́дуйся, Влады́чице Де́во,/ Це́ркви красото́, благове́рных люде́й держа́во и похвало́./ Непреста́нно моли́ся Христу́ Бо́гу,/ да сохрани́т оби́тель на́шу моли́твами Твои́ми.
Седа́лен, глас 5:
Па́мять блаже́ннаго и пра́веднаго страстоте́рпца,/ вели́каго кня́зя Андре́я Боголюби́ваго, похва́льными пе́сньми возвели́чим:/ днесь бо предстои́т у Престо́ла всех Царя́, Христа́ Бо́га,/ и мо́лится непреста́нно Го́сподеви грехо́в оставле́ние и жития́ исправле́ние дарова́ти/ пра́зднующим духо́вно святу́ю его́ па́мять/ и ве́рно покланя́ющимся чудотво́рней ра́це моще́й его́.
Сла́ва: Чу́вства вся пло́ти обузда́в и стезе́ю за́поведей Боже́ственных ходи́в,/ отту́ду просла́вился еси́ сла́вою/ и от сла́вы в сла́ву преше́л еси́, вели́кий кня́же Андре́е:/ чудеса́ бо ди́вно соде́лал еси́, си́лою Креста́ укрепи́вся,/ полки́ сопроти́вных одоле́л еси́ и челове́ки я́сно научи́л еси́ служи́ти Еди́ному в Тро́ице Бо́гу,/ Его́же моли́ спасти́ся нам.
И ны́не, Богоро́дичен:
Предста́тельство на́ше кре́пкое, и покро́в,/ и сте́ну непребори́мую воспои́м, Мари́ю Де́ву Всенепоро́чную:/ при́сно бо предстоя́щи/ Престо́лу Сы́на Своего́ и Бо́га,/ мо́лит Того́ дарова́ти благовре́менну по́мощь и спасе́ние всем, усе́рдно призыва́ющим Ю/ и ве́рно покланя́ющимся свято́му Ея́ о́бразу.
Песнь 4
Ирмо́с: Услы́шах, Го́споди, слух Твой и убоя́хся,/ я́ко неизрече́нным Сове́том,/ Бог Сый Присносу́щный,/ от Де́вы проше́л еси́, вопло́щся./ Сла́ва снизхожде́нию Твоему́, Христе́,/ сла́ва си́ле Твое́й.
Це́ркви мно́гия созда́л еси́ во сла́ву Иису́са Христа́/ и Пречи́стыя Его́ Ма́тере, всеблаже́нне Андре́е,/ и в них непреста́нное славосло́вие приноси́л еси́, вопия́:/ сла́ва снизхожде́нию Твоему́, Христе́, сла́ва си́ле Твое́й.
Пе́рваго своего́ гражда́нства, су́щаго на Небесе́х,/ любе́зно возжела́л еси́, боголюби́вый кня́же Андре́е,/ сего́ ра́ди стра́хом Госпо́дним па́че ца́рскаго порфироно́сия оде́явся,/ земно́е жи́тельство проходи́л еси́.
Иере́я дре́вле Вы́шегра́дскаго напра́вил еси́, преблаже́нне, спутеше́ствовати тебе́,/ па́че же чудотво́рному Богома́тере о́бразу;/ упра́ви и мене́, свя́те, ше́ствовати путе́м за́поведей Бо́жиих,/ по нему́же сам усе́рдно ходи́л еси́.
Богоро́дичен: Све́том Боже́ственным испо́лни се́рдце мое́, Богоро́дице Де́во,/ е́же злых при́сно ми отвраща́тися,/ благи́х же неукло́нно держа́тися те́плыми Твои́ми к Бо́гу о нас моли́твами.
Ин
Ирмо́с: На Кресте́ Твое́ Боже́ственное истоща́ние прови́дя,/ Авваку́м, ужа́сся, вопия́ше:/ Ты си́льных пресе́кл еси́ держа́ву, Бла́же,/ приобща́яся су́щим во а́де,/ я́ко Всеси́лен.
Я́коже дре́вле Ио́сифу бра́тия зави́дяще, сове́т лука́в умы́слиша,/ та́ко и на тя, вели́кий кня́же, бли́жнии твои́ зло́е совеща́вшеся, уби́ша тя,/ ты же, благода́тию Христо́вою озаря́емь,/ непреста́нно моли́ся о нас ко Го́споду.
Христу́, Царю́ Небе́сному, моля́ся и Пречи́стей Богоро́дице,/ изше́л еси́, вели́кий кня́же, от Вышегра́да на ме́сто,/ иде́же пусты́ню насели́л еси́/ и Пречи́стую Влады́чицу, в неизрече́ннем све́те сия́ющую, узре́ти сподо́бился еси, Богоблаже́нне.
Исцеле́ния подаю́тся в честне́м хра́ме твое́м, вели́кий кня́же Андре́е:/ ту бо почи́ благода́ть Христа́ Бо́га на́шего и Пречи́стыя Его́ Ма́тере.
Богоро́дичен: От Пречи́стаго Твоего́ о́браза, Богома́ти,/ неоску́дно источа́ется благода́ть на омове́ние скверн,/ на здра́вие теле́с, на прогна́ние лука́ваго,/ те́мже Тя, Чи́стая, восхваля́ем.
Песнь 5
Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.
Тезоимени́таго Тя ве́дуще первозва́нному ученику́ Христо́ву,/ сообра́зна тому́ ви́дим тя и в кончи́не твое́й, христолюби́вый кня́же:/ за пра́вду бо кровь свою́ излия́л еси́, я́ко а́гнец незло́бивый, закала́емь от тех,/ и́мже свой и благоде́тель был еси́.
Тща́нием кре́пким правосу́дию прилежа́л еси́, богорачи́тельный кня́же,/ не познава́я лица́ на суде́, ниже́ си́льнаго боя́ся,/ сего́ ра́ди от злоде́йственных ненави́стников, от ножа́ скончава́ешися.
Написа́ся твое́ и́мя в кни́гах живота́ ве́чнаго на Небесе́х, чу́дный страда́льче,/ и нас та́мо впи́санных бы́ти хода́тайствуй,/ сла́вящих Христа́ в честне́м страда́льчестве твое́м.
Богоро́дичен: Сие́ и мы прино́сим, Благода́тная Богоро́дице Де́во,/ е́же дре́вле Гаврии́л Арха́нгел принесе́ Ти, благода́рственно воспева́юще:/ ра́дуйся, Обра́дованная, Госпо́дь с Тобо́ю,/ благослове́н Пречи́стый Плод свята́го чре́ва Твоего́.
Ин
Ирмо́с: Мир мног лю́бящим Тя, Христе́,/ и нощь просвеще́ния в пи́щи слове́с Твои́х,/ сего́ ра́ди, от но́щи у́тренююще,/ про́сим ми́лости от Тебе́, Человеколю́бче.
Благоимени́ту Бо́жия Ма́тере оби́тель созда́л еси́/ и мона́шествующих в ней собра́л еси́,/ из нея́же и в Го́рнее оте́чество му́ченически пресели́лся еси́,/ да мо́лишися со дерзнове́нием Христу́ Бо́гу за ны, рабы́ твоя́.
Зело́ ми́лостива и странноприи́мца показа́ тя Спас наш ми́ру, вели́кий кня́же,/ врача́ боля́щим безме́здна,/ сирота́м же и убо́гим засту́пника те́пла и ми́лостива.
Мно́ги це́ркви в сла́ву Бо́жию воздви́г,/ показа́лся еси́ сам храм Бо́гу соверше́н, чист душе́ю и те́лом, прему́дре,/ те́мже и нас сотвори́ хра́мы Ду́ха Всесвята́го, преблаже́нне и всече́стне Андре́е.
Богоро́дичен: Совокупи́, Пречи́стая, вся челове́ки воеди́но,/ да бу́дем вси еди́но ста́до Еди́наго Па́стыря Христа́, Сы́на Твоего́,/ сопроти́вныя же си́лы, е́реси и раздо́ры дале́че отжени́ от нас Твое́ю си́лою, Всецари́це.
Песнь 6
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Все житие́ свое́ до́бре украша́л еси́, страстоте́рпче Андре́е,/ приле́жными моли́твами, посто́м и чистото́ю, правосу́дием и милосе́рдием,/ благоче́стно Го́сподеви служа́ день и нощь.
Свято́му Ду́ху дом бысть незло́бивое се́рдце твое́, Богоблаже́нне, чистото́ю крася́щееся,/ ея́же ра́ди ны́не зри́ши чи́сте Святу́ю Тро́ицу,/ озаря́я нас чуде́с луча́ми и исцеле́ний блиста́ньми.
Благове́рному и боголюби́вому нра́ву прилежа́,/ Христа́ всели́л еси́ во благоразу́мную ду́шу твою́, досточу́дне,/ те́мже и нас боголюби́вому и благочести́вому житию́ ревни́тели покажи́/ и Небе́снаго Ца́рствия насле́дники, воспева́ющих тя.
Богоро́дичен: Вели́кому милосе́рдию Сы́на Твоего́/ прича́стники сотвори́ нас, Богороди́тельнице,/ в день вели́каго и пра́веднаго Суда́ Его́,/ егда́ второ́е на зе́млю прии́дет со сла́вою стра́шною.
Ин
Ирмо́с: Бе́здна после́дняя грехо́в обы́де мя,/ и, волне́ния не ктому́ терпя́,/ я́ко Ио́на Влады́це, вопию́ Ти:/ от тли мя возведи́.
Удиви́л еси́ мир чудесы́ твои́ми, блаже́нне прему́дре Андре́е,/ и восприя́л еси́ от Христа́ вене́ц Небе́сный,/ его́же улучи́ти сподо́би и нас твои́ми моли́твами, всече́стне.
Лук си́льных сокруши́л еси́,/ во бра́нех же сла́вный победи́тель яви́лся еси́, вели́кий кня́же Андре́е,/ и ны́не не преста́й победоно́сно спобо́рствовати на враги́ во́инству ру́сскому.
Всеблаже́нне вели́кий кня́же Андре́е, страстоте́рпче и уго́дниче Христо́в,/ на Небесе́х предстои́ши Христу́, моля́ся о нас,/ зде́ же честны́я и святы́я мо́щи твоя́ боля́щих исцеля́ют/ и от скорбе́й свобожда́ют.
Богоро́дичен: Тобо́ю, Пречи́стая Богоро́дице, от вся́кия напа́сти избавля́емся,/ изба́ви ны, Ма́ти Бо́жия, ве́чнаго осужде́ния, да зове́м Ти немо́лчно:/ ра́дуйся, купино́ неопали́мая;/ ра́дуйся, запеча́танный исто́чниче;/ ра́дуйся, Де́во Чи́стая, Госпо́дь с Тобо́ю.
Конда́к, глас 8:
В ми́ре сем благоче́стно и пра́ведно пожи́в,/ моли́твою, ми́лостынею и благострада́нием Бо́гу угоди́л еси́,/ сего́ ра́ди и Бог по убие́нии твое́м просла́ви тя нетле́нием и чудесы́,/ Его́же, свя́те Андре́е, моли́ сохрани́ти оте́чество твое́/ и всех люде́й, благоче́стно тебе́ почита́ющих.
И́кос:
Ве́рою и любо́вию послужи́л еси́ Христу́ Бо́гу во днех живота́ твоего́, сла́вне Андре́е,/ по страда́льчестей же кончи́не твое́й со святы́ми всели́лся е́си,/ нетле́нием же телесе́ и да́ром чудотворе́ний почте́н еси́ от Мздовоздая́теля./ Те́мже с любо́вию вопие́м ти:/ ра́дуйся, благопло́дная о́трасле от держа́внаго и свята́го ко́рене./ Ра́дуйся, благове́рия любе́зный рачи́телю;/ ра́дуйся, злоче́стия ре́вностный искорени́телю./ Ра́дуйся, любому́дрия приле́жный сниска́телю;/ ра́дуйся, целому́дрия непоро́чный храни́телю./ Ра́дуйся, милосе́рдия оби́льный раздая́телю;/ ра́дуйся, лука́вых духо́в прогони́телю./ Ра́дуйся, злостра́ждущих ско́рый исцели́телю;/ ра́дуйся, всеросси́йскаго ро́да предста́телю./ Ра́дуйся, христолюби́ваго во́инства побо́рниче;/ ра́дуйся, моле́бниче те́плый Христа́ о всех, благоче́стно тебе́ почита́ющих.
Песнь 7
Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.
Кня́зю боголюби́вому Андре́ю духо́вныя пе́сни принесе́м,/ соше́дшеся к цельбоно́сней ра́це нетле́нных моще́й его́,/ прося́ще грехо́в разреше́ния и ми́рнаго жития́/ у Христа́, Благослове́ннаго отце́в Бо́га.
Андре́ю, чудотво́рцу и му́ченику, усе́рдно возопии́м:/ моли́ о нас Человеколю́бца Бо́га, всеблаже́нне,/ торжеству́ющих па́мять страда́льчества твоего́ пресла́внаго и Христу́ пою́щих о́трочески:/ благослове́н еси́, Бо́же отце́в на́ших.
Боголю́бовскому ме́сту любе́зно прилежа́,/ ча́сто та́мо водворя́лся еси́, Андре́е Богому́дре,/ иде́же сро́дницы твои́ и слу́ги люби́мии,/ му́жественное и свято́е твое́ те́ло изра́нивше, уби́ша,/ ты же сла́вил еси́ Благослове́ннаго Бо́га отце́в на́ших.
Богоро́дичен: Сла́вному Влады́чню Престо́лу предстоя́щи, Сла́вная Влады́чице Богоро́дице Де́во,/ со блаже́нным Андре́ем моли́ Сы́на Твоего́ и Бо́га всем ве́чное спасе́ние дарова́ти,/ покланя́ющимся свято́му о́бразу Твоему́ и Христа́ пою́щим о́трочески:/ Бо́же, благослове́н еси́.
Ин
Ирмо́с: О́троцы в Вавило́не/ пе́щнаго пла́мене не убоя́шася,/ но, посреде́ пла́мене вве́ржени, ороша́еми, поя́ху:/ благослове́н еси́, Го́споди, Бо́же оте́ц на́ших.
Блаже́нно житие́ твое́ и кончи́на му́ченическа, вели́кий кня́же Андре́е,/ сего́ ра́ди тя Христо́с свы́ше укра́си венце́м нетле́ния и чудесы́, всечу́дне.
Яви́лся еси́ ны́не гра́да Влади́мира, Андре́е Богоблаже́нне,/ столп непоколеби́м и стена́ неруши́ма,/ всем, притека́ющим к тебе́ с ве́рою, подава́я благода́ть неоску́дную.
Прииди́те, лю́дие, пе́сньми похва́льными просла́вим на́ших засту́пников,/ вели́ких князе́й Андре́я и Гле́ба, благоче́стно пою́ще:/ отце́в на́ших Бо́же, благослове́н еси́.
Богоро́дичен: К Тебе́, Де́во Чи́стая, прибега́ю аз, окая́нный,/ да обря́щу Тобо́ю спасе́ние:/ вем бо, Пречи́стая Влады́чице, я́ко мо́жеши, ели́ка хо́щеши./ Те́мже Христа́, Его́же родила́ еси́, Пречи́стая, моли́,/ да бу́дет нам ми́лостив в День су́дный, пою́щим:/ благослове́н еси́, Го́споди, Бо́же оте́ц на́ших.
Песнь 8
Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Чудотво́рцу и му́ченику кня́зю Рома́ну/ и бра́ту его́ Дави́ду сро́дник и подража́тель был еси́, Андре́е прехва́льне,/ вси бо вы му́ченическою стезе́ю востеко́сте в Небе́сныя оби́тели ко Христу́ Бо́гу,/ Его́же моли́те сохрани́ти нас от вся́кия напа́сти, покланя́ющихся Ему́ во ве́ки.
Влади́мирскому преде́лу самоде́ржец благочести́в яви́лся еси́, пра́ведниче, во пло́ти живы́й;/ ны́не в Небе́снем Ца́рствии со А́нгелы лику́я,/ посеща́й оте́чество твое́, чудеса́ от ра́ки и цельбы́ подая́ вопию́щим:/ вся дела́ Госпо́дня, Го́спода по́йте/ и превозноси́те во вся ве́ки.
Трудолю́бием плоть свою́ изнури́л еси́, всече́стне,/ и безстра́стием боголюби́вую ду́шу твою́ возрасти́л еси́,/ в ня́же благода́ть Пресвяты́я Тро́ицы все́льшися,/ всего́ тя светоно́сна соде́ла, непреста́нно вопию́ща:/ о́троцы, благослови́те, свяще́нницы, воспо́йте,/ лю́дие, превозноси́те Го́спода во ве́ки.
Богоро́дичен: Многогре́шнаго мя, Пресвята́я Богоро́дице, поми́луй,/ стрел лука́ваго избавля́ющи,/ и огнь страсте́й мои́х погаси́,/ и сподо́би мя при́сно име́ти житие́ ми́рное и безмяте́жное/ и Тебе́ со Единоро́дным Твои́м Сы́ном и Бо́гом пе́ти и превозноси́ти непреста́нно во вся ве́ки.
Ин
Ирмо́с: Ужасни́ся, боя́йся, Не́бо,/ и да подви́жатся основа́ния земли́:/ се бо в мертвеце́х вменя́ется в Вы́шних Живы́й/ и во Гроб мал странноприе́млется./ Его́же, о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Лику́ют на Небесе́х чи́ни а́нгельстии, вели́кий кня́же Андре́е,/ и ве́рных собо́ри на земли́, па́мять твою́ похваля́юще, вопию́т:/ Го́спода воспева́йте, дела́,/ и превозноси́те Его́ во ве́ки.
Христу́ Бо́гу моли́ся, вели́кий кня́же Андре́е прехва́льне,/ о приходя́щих к тебе́ с ве́рою и те́пле вопию́щих:/ Го́спода воспева́йте, дела́,/ и превозноси́те Его́ во ве́ки.
С безтеле́сными си́лами, вели́кий кня́же и страстоте́рпче Андре́е, Христу́ предстоя́,/ моли́твами твои́ми душе́вныя на́ша боле́зни исцели́/ и от безчи́сленных зол изба́ви нас, вопию́щих:/ Го́спода воспева́йте, дела́,/ и превозноси́те Его́ во ве́ки.
Богоро́дичен: Ра́зве Тебе́, о Пресвята́я Влады́чице Богоро́дице, не и́мамы ины́я по́мощи;/ моли́ся у́бо Сы́ну Твоему́ и Бо́гу на́шему, с вели́ким кня́зем Андре́ем,/ да спасе́т ны, ве́рою и любо́вию Тя велича́ющия и вопию́щия:/ Го́спода воспева́йте, дела́, во вся ве́ки.
Песнь 9
Ирмо́с: Ужасе́ся о сем Не́бо/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ Ангелов и челове́к чинонача́лия велича́ют.
Иоа́нна Крести́теля воздержа́нию после́дуя,/ Иоа́нна же напе́рсника целому́дрию подража́я,/ Дави́довою кро́тостию оде́явся/ и Соломо́новою му́дростию облиста́вся,/ Илиину́ ре́вность и Петро́во испове́дание благоче́стием свои́м и правосла́вием стяжа́л еси́/ и Христу́ му́ченически спострада́л еси́, пребога́те.
Влади́мира гра́да и всея́ земли́ Росси́йския лю́ди/ сохраня́й, боголюби́вый и всесла́вный кня́же Андре́е, от бед и печа́лей,/ во правосла́вии и благоче́стии моли́твами твои́ми соблюда́я всех нас,/ пе́сньми тебе́ велича́ющих.
Жи́теля мя су́ща земна́го,/ жи́теля сотвори́ и Небе́сна предста́тельством твои́м ко Го́споду, преблаже́нне,/ прие́мля убо́гое сие́ тебе́ песносло́вие,/ да тя, я́ко благоде́теля моего́, при́сно велича́ю.
Богоро́дичен: Ни́ща и убо́га мя доброде́тельми, о Всечи́стая и Присноде́вствующая Богоро́дице, поми́луй,/ мрак печа́лей, уны́ния и отча́яния разгоня́ющи/ и доброде́тельное ми бога́тство подава́ющи,/ и ми́лостию Твое́ю спаси́ мя и всех, велича́ющих пресвято́е и́мя Твое́.
Ин
Ирмо́с: Не рыда́й Мене́, Ма́ти,/ зря́щи во Гро́бе,/ Его́же во чре́ве без се́мене зачала́ еси́, Сы́на:/ воста́ну бо, и просла́влюся,/ и вознесу́ со сла́вою непреста́нно, я́ко Бог,/ ве́рою и любо́вию Тя велича́ющия.
Ди́вна, вели́кий кня́же, да́нная тебе́ благода́ть,/ чудесы́ сия́ющи, я́коже со́лнце, и злы́я боле́зни исцеля́ющи./ Те́мже на́ша стра́сти уврачу́й, мо́лимся тебе́,/ и просвети́ ны твои́ми моли́твами,/ да тя вси велича́ем.
Непреста́нно моли́теся ко Христу́ Бо́гу, всечу́дне Андре́е и Гле́бе преблаже́нне,/ да честны́я мо́щи ва́ша неоску́дно источа́ют исцеле́ния и утеше́ния/ всем, с ве́рою притека́ющим.
Ма́лое сие́ и смире́нное хвале́ние/ приими́ от недосто́йных усте́н и серде́ц на́ших/ и моли́ся пода́ти оставле́ние грехо́в ве́рою тя чту́щим,/ всеблаже́нне вели́кий кня́же Андре́е.
Богоро́дичен: Христа́, Сы́на Твоего́ и Бо́га на́шего, Пресвята́я Де́во Богоро́дице Мари́е,/ со А́нгелы и Арха́нгелы, и со все́ми Небе́сными си́лами,/ и с ли́ки преподо́бных отце́в и свяще́нных му́ченик,/ и со вели́ким кня́зем Андре́ем моли́,/ да изба́вит ны от бед и скорбе́й, Тя велича́ющия.
Свети́лен:
Я́коже со́лнце, блиста́я, просвеща́еши всех сердца́,/ твою́ сла́вную па́мять творя́щих ве́рно, преблаже́нне Андре́е,/ и спаса́еши от бед и бу́дущаго гне́ва.
Сла́ва: Све́ту невече́рнему предстоя́, страстоте́рпче, с му́ченическими ли́ки,/ не оста́ви си́ры воспева́ющия тя, засту́пниче наш,/ но от искуше́ний сохрани́ моли́твами твои́ми.
И ны́не, Богоро́дичен:
Незаходи́маго Све́та Носи́тельнице, Присноде́во,/ просвети́вшаго седя́щих во тьме неведения,/ озари́ и нас, гре́шных, све́том Сы́на Твоего́.
На хвали́тех стихи́ры, глас 1.
Подо́бен: Небе́сных чино́в:
Прича́стник быв сла́вы Боже́ственныя,/ моли́ за ны Пресвяту́ю Тро́ицу,/ ми́лость пода́ти нам/ и житие́ ми́рно и безгре́шно,/ Андре́е кня́же всехва́льне.
Милосе́рдия ра́ди твоего́,/ исто́чник нам да́руй благода́ти вско́ре,/ источа́ющ утеше́ние/ су́щим в печа́лех,/ моля́ Христа́, всесла́вне,/ спасти́ся душа́м на́шим.
В ра́дость Го́спода твоего́ вшед,/ благода́ть ра́дования и нам да́ти моли́/ и спасти́ рабы́ твоя́:/ мо́жеши бо, вели́кий кня́же Андре́е,/ призыва́ющия тя от бед свобожда́ти/ и цели́ти боля́щия.
Сла́ва, глас 8:
От свята́го ко́рене прозя́б/ и благоче́стия вода́ми напое́н,/ Андре́е страстоте́рпче,/ я́ко благово́нный крин, процве́л еси́ в житии́ твое́м,/ но и по пресажде́нии твое́м в рай Небе́сный/ не преста́й облагоуха́ти нас/ и от смра́да страсте́й грехо́вных избавля́ти.
И ны́не, Богоро́дичен:
Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.
Славосло́вие вели́кое. И отпу́ст.
НА ЛИТУРГИ́И
Блаже́нны свято́му 1-го кано́на песнь 3-я и 2-го песнь 6-я, на 8. Проки́мен, глас 7: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́тимися к Тебе́. Апо́стол к Ри́мляном, зача́ло 99. Аллилу́ия, глас 4: Пра́ведник, я́ко фи́никс, процвете́т и, я́ко кедр, и́же в Лива́не, умно́жится. Стих: Насажде́ни в дому́ Госпо́дни во дво́рех Бо́га на́шего процвету́т. Ева́нгелие от Иоа́нна, зача́ло 52. Прича́стен: В па́мять ве́чную:
