Служба в честь святаго благовернаго князя Романа, Рязанскаго
НА МА́ЛОЙ ВЕЧЕ́РНИ
На Го́споди, воззва́х: стихи́ры, глас 8:
От блага́го ко́рене христоимени́тых князе́й провозни́кл еси́,/ я́ко пречу́дная ветвь, блаже́нне кня́же Рома́не,/ и от младе́нчества твоего́ в си́ле и ра́зуме в сла́ву Бо́жию возраста́л еси́,/ воспита́н быв от благочести́выя твоея́ ма́тере/ в наказа́нии и уче́нии Госпо́дни,/ напая́емь струя́ми слове́с Боже́ственных/ и благода́тию Свята́го Ду́ха.
От ю́ности твоея́ возлюби́л еси́ Го́спода,/ вся, я́же су́етная, пренебре́гл еси́,/ уклоня́яся от и́грищ и увеселе́ний све́рстник твои́х,/ уче́нию же ве́ры Правосла́вныя прилежа́л еси́.
Сла́ва, глас то́йже:
Ты и кро́ток, и смире́н, и незло́бив, кня́же, был еси́,/ благопоко́рлив же роди́телем и наста́вником твои́м,/ сего́ ра́ди от всех возлю́блен был еси́.
И ны́не, Богоро́дичен:
Безсе́менно ро́ждши вопло́щшагося от Тебе́ Сы́на Бо́жия,/ воспита́ла еси́ Его́, младе́нчествующа, я́ко челове́ка./ Помози́ нам, Пречи́стая,/ воспитова́ти чад на́ших в стра́се Бо́жии и благоче́стии.
На стихо́вне стихи́ры, глас 8:
Возлюби́в селе́ние Сла́вы Бо́жия,/ усе́рдно посеща́л еси́ храм Госпо́день,/ иде́же всегда́ предстоя́ с благогове́нием,/ приле́жно внима́л еси́ псалмо́м и пе́нием духо́вным/ и те́ми ду́шу твою́ услажда́л еси́.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Просвеща́я ум твой Боже́ственными словесы́/ и душеполе́зными писа́нии святы́х оте́ц,/ исполня́л еси́ ду́шу твою́ богомы́слием и благи́ми чу́вствовании,/ во е́же рабо́тати Го́сподеви,/ те́мже, прехва́льне кня́же, с любо́вию сла́вим тя.
Стих: Си́льно на земли́ бу́дет се́мя его́,/ сла́ва и бога́тство в дому́ его.
Уклоня́яся от вся́каго мирска́го разсе́яния,/ всегда́ стреми́лся еси́ к исполне́нию за́поведей Бо́жиих/ и уста́вы Це́ркве Правосла́вныя усе́рдно храни́л еси́,/ те́мже возлюби́ тя Всевы́шний Госпо́дь/ и зело́ просла́ви тя.
Сла́ва, глас то́йже:
Просвеще́н от Бо́га,/ ве́лию му́дрость и благоразсужде́ние/ во всех де́лех твои́х явля́л еси́,/ кро́тость же и кре́пкую любо́вь ко всем,/ и вси лю́дие кня́жества Ряза́нскаго/ ве́лию любо́вь и почте́ние име́яху к тебе́./ Те́мже и мы, чту́ще ны́не па́мять твою́,/ с благогове́нием восхваля́ем тя.
И ны́не, Богоро́дичен:
Всепе́тая Ма́ти,/ ро́ждшая всех святы́х Святе́йшее Сло́во,/ изба́вила еси́ Им род челове́ч от кля́твы Ада́мовы/ и благослове́ние ми́ру принесла́ еси́,/ те́мже по до́лгу сла́вим Тя.
Тропа́рь пи́сан на вели́цей вече́рни
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры, глас 4:
От юности твоея́/ Крест Христо́в на ра́мо твое́ восприя́л еси́,/ ве́лия и многообра́зныя ско́рби и страда́ния/ в житии́ твое́м претерпе́л еси́/ и яви́лся еси́ до́блий во́ин Христо́в,/ те́мже ве́чныя сла́вы дости́гл еси́.
Измла́да возлюби́л еси́ зако́н Госпо́день/ и ходи́л еси́ в за́поведех и оправда́ниих Его́ безпоро́чно,/ сего́ ра́ди и Госпо́дь возлюби́ тя/ и укрепля́ше тя во вся́ком де́ле бла́зе/ и яви́ тя лю́дем о́браз ве́ры и благоче́стия.
Ве́лий гнев Бо́жий пости́же иногда́/ зе́млю Ру́сскую и страну́ Ряза́нскую,/ егда́ многочи́сленная по́лчища/ кровожа́днаго царя́ монго́льскаго Баты́я нападо́ша на ня,/ опустоша́юще гра́ды и ве́си/ и неща́дно умерщвля́юще живу́щия в них.
Наше́дшу Баты́ю царю́ на зе́млю Ру́сскую,/ мно́зи кня́зие Росси́йстии/ и оте́ц твой, князь Ряза́нский Оле́г,/ изыдо́ша проти́ву его́ с во́и свои́ми,/ оба́че не возмого́ша противуста́ти ему́/ и, побежде́ни бы́вше, падо́ша от меча́,/ оте́ц же твой в плене́ние отведе́н бысть.
Обурева́емей волне́нии мно́гих лю́тых/ и неудобоноси́мых скорбе́й,/ стра́ждущей под и́гом неве́рных/ и безчелове́чных ва́рвар стране́ Ряза́нстей,/ ты всегда́ прибега́л еси́, кня́же,/ я́ко к ти́хому приста́нищу,/ в те́плей моли́тве к Царю́ Небе́сному,/ от Него́же по́мощь и утеше́ние восприима́л еси́.
Сла́ва, глас то́йже:
Возложи́в все упова́ние твое́ на Го́спода,/ всегда́ име́л еси́, блаже́нне кня́же,/ попече́ние о лю́дех кня́жества Ряза́нскаго,/ ободря́я стра́ждущих, утеша́я скорбя́щих,/ благотворя́ бе́дствующим/ и вознося́ о них усе́рдно моли́твы ко Го́споду.
И ны́не, Богоро́дичен: И́же Тебе́ ра́ди:
Вход. Проки́мен дне. И чте́ния му́ченическая.
Проро́чества Иса́иина чте́ние (глава́ 43):
Та́ко глаго́лет Госпо́дь:/ вси язы́цы собра́шася вку́пе, и соберу́тся кня́зи от них./ Кто возвести́т сия́ в них?/ Или́, я́же от нача́ла, кто слы́шана сотвори́т вам?/ Да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели,/ и Аз Свиде́тель, глаго́лет Госпо́дь Бог,/ и о́трок, его́же избра́х./ Да позна́ете и ве́руете Ми/ и разуме́ете, я́ко Аз есмь,/ пре́жде Мене́ не бысть ин бог, и по Мне не бу́дет./ Аз есмь Бог,/ и несть, ра́зве Мене́, спаса́яй./ Аз возвести́х и спасо́х,/ уничижи́х и не бе в вас чу́ждий./ Вы Мне свиде́тели, и Аз Госпо́дь Бог,/ и еще́ от нача́ла Аз есмь,/ и несть от рук Мои́х избавля́яй./ Сотворю́, и кто отврати́т то?/ Си́це глаго́лет Госпо́дь Бог,/ избавля́яй вас Святы́й Изра́илев.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань, разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (главы́ 5 и 6):
Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я́ и мы́шцею защити́т их./ Прии́мет всеору́жие – рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие./ Поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я́ на́гло./ Сопроти́в стя́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к./ Я́ко дана́ есть от Го́спода держа́ва вам/ и си́ла от Вы́шняго.
На лити́и стихи́ры, глас 2:
Вели́к вои́стинну и пресве́тел свети́льник/ возсия́л еси́ в земли́ Росси́йстей и кня́жестве Ряза́нстем,/ благове́рный кня́же Рома́не,/ вели́ким бо благоче́стием и благода́тию Бо́жиею просвеща́емь,/ озари́л еси́ страну́ Ряза́нскую/ све́том твои́х пресла́вных доброде́телей.
Вели́к и благосе́рд народоправи́тель был еси́,/ благове́рный кня́же Рома́не,/ разоре́ну бо бы́вшу и опустоше́ну кня́жеству Ряза́нскому от кровожа́дных монго́л,/ ты, кня́же, благоустроя́л еси́ град Ряза́нь и в нем хра́мы Бо́жии/ и явля́л еси́ коему́ждо от подвла́стных тебе́ по́мощь твою́.
Вели́к и непоколеби́м столп ве́ры Христо́вы показа́лся еси́,/ благове́рный кня́же Рома́не,/ многови́дными бо обольще́нии от сано́вника царя́ монго́льскаго приклоня́емь,/ па́че же от сама́го злове́рнаго царя́ принужда́емь/ к отрече́нию от еди́ныя и́стинныя ве́ры Правосла́вныя,/ непрекло́нен был еси́/ и странноужа́сная люте́йшая муче́ния/ му́жественно Христа́ ра́ди претерпе́л еси́.
Вели́к вои́стинну и многомо́щен/ хода́тай пред Царе́м Небе́сным о наро́де ру́сстем яви́лся еси́,/ благове́рный кня́же Рома́не,/ твои́х бо ра́ди де́йственных моли́тв,/ в день многострада́льныя кончи́ны твоея́,/ пе́рвую сла́вную побе́ду на га́ллы христолюби́вому во́инству Госпо́дь подаде́,/ я́же ободри́ во́инство/ и уте́ши страну́ Ру́сскую.
Сла́ва, глас 6:
Име́я ве́лие дерзнове́ние пред Бо́гом/ и предстоя́ Престо́лу Его́ с пресла́вными уго́дники Его́,/ засту́пники земли́ Ру́сския и моли́твенники твои́ми святы́ми,/ благове́рными кня́зи Влади́миром, Бори́сом и Гле́бом, Алекса́ндром и Михаи́лом,/ моли́ Его́, любвеоби́льне кня́же,/ о правосла́вных лю́дех и о всем оте́честве на́шем.
И ны́не, Богоро́дичен:
Пресвята́я Влады́чице, Цари́це Богоро́дице,/ кре́пкая Наде́ждо и Засту́пнице всех,/ с ве́рою притека́ющих к Тебе́,/ сохрани́ и спаси́ Твои́ми моли́твами к Сы́ну Твоему́ и Бо́гу на́шему/ страну́ Ру́сскую от всех наве́т вра́жиих,/ низпосли́ ей мир и благоде́нствие/ и нас, гре́шных, заступи́/ и изба́ви от тя́жких бед и скорбе́й.
На стихо́вне, глас 5:
Просвеща́емь уче́нием Христо́ва Ева́нгелия,/ стяжа́л еси́, кня́же Рома́не, ве́лию му́дрость духо́вную,/ испо́лнил еси́ се́рдце твое́ благи́ми чу́вствии,/ укрепи́л еси́ во́лю твою́ во вся́ком де́ле бла́зе/ и на ка́мени ве́ры Правосла́вныя утверди́лся еси́.
Стих: Честна́ пред Го́сподем/ смерть преподо́бных Его́.
Покаря́яся во́ле Царя́ Небе́снаго,/ преда́вшаго мно́ги страны́ земли́ Ру́сския,/ грех ра́ди живу́щих в них челове́к,/ тя́жкому и́гу неве́рных монго́л,/ ты, прему́дрый кня́же, сохраня́л еси́ терпе́ние и кро́тость ду́ха,/ повину́яся царю́ монго́льскому во всем,/ я́же не проти́ву суть зако́ну Бо́жию,/ да не па́че противле́нием воздви́гнется гнев его́/ и да не паду́т на кня́жество Ряза́нское/ но́выя бе́ды и ско́рби.
Стих: Си́льно на земли́ бу́дет се́мя его́,/ сла́ва и бога́тство в дому́ его́.
До́бре и му́дре управля́л еси́/ су́щими под вла́стию твое́ю челове́ки,/ вразумля́я их с терпе́нием и благоду́шием/ нести́ тя́жкое и́го монго́льское/ и полага́ти все упова́ние на милосе́рдие Отца́ Небе́снаго,/ руководя́ся в сем благи́м приме́ром му́драго кня́зя Алекса́ндра,/ па́че же непреста́нно моли́л еси́ Го́спода/ умягчи́ти лю́тость враго́в/ и укрепи́ти лю́ди твоя́.
Сла́ва, глас то́йже:
Су́ще пе́рвее идолопокло́нницы монго́ли,/ прии́мше злочести́вую ве́ру лжепроро́ка Магоме́та,/ нача́ша ну́дити подвла́стныя тебе́ лю́ди/ к прия́тию своего́ злове́рия./ Егда́ же сано́вник царя́ монго́льскаго/ нача́т и тебе́, кня́же, убежда́ти/ к прия́тию тоя́ злочести́выя ве́ры,/ ты дерзнове́нно отве́ргл еси́ ю.
И ны́не, Богоро́дичен:
Пресвята́я Де́во,/ родила́ еси́ по пло́ти Сы́на Бо́жия,/ распе́ншагося и пострада́вшаго грех ра́ди на́ших,/ мы же, окая́ннии, па́ки распина́ем Его́ нече́стием и беззако́нии на́шими./ Но возбуди́ в нас, Влады́чице,/ дух и́стиннаго покая́ния/ и обрати́ сердца́ на́ша ко Го́споду.
Тропа́рь, глас 1:
Муче́ньми странноужа́сными/ и до́блестию терпе́ния/ всех преудиви́л еси́, кня́же Рома́не:/ честны́х бо чле́нов твои́х по соста́вом ре́зание/ и всего́ телесе́ твоего́ раздробле́ние/ претерпе́л еси́ за ве́ру Христо́ву./ Те́мже и возше́л еси́ к Престо́лу Царя́ Христа́ Бо́га/ и яви́лся еси́ но́вый предста́тель Це́ркве Ряза́нския./ Моли́ся у́бо ко Го́споду,/ да мир и благоде́нствие да́рует гра́ду на́шему,/ и испроси́ у Него́ ми́лость и спасе́ние/ чту́щим свяще́нную па́мять твою́, многострада́льне.
НА У́ТРЕНИ
На Бог Госпо́дь: тропа́рь свята́го дважды. Сла́ва, и ны́не, Богоро́дичен.
По 1-м стихосло́вии седа́лен, глас 1:
Возлюби́л еси́, кня́же Рома́не, Творца́ и Го́спода все́ю душе́ю твое́ю,/ все́ю кре́постию твое́ю и всем помышле́нием твои́м/ и тща́лся еси́ во всем житии́ твое́м уго́дное Ему́ твори́ти,/ сего́ ра́ди и сам возлю́блен был еси́ Им./ Возбуди́, Боголю́бче кня́же, святы́ми твои́ми моли́твами сию́ любо́вь к Бо́гу/ и в на́ших хла́дных сердца́х.
Сла́ва, и ны́не, Богоро́дичен:
А́ще носи́ла еси́, Пресвята́я Де́во, во утро́бе Твое́й Царя́ и Влады́ку вся́ческих,/ оба́че, повину́ющися веле́нием царя́ Иуде́йскаго/ написа́тися всем лю́дем ца́рствия его́ во свои́х гра́дех,/ подъя́ла еси́ зело́ тру́дный путь во град Вифлее́м./ Внуши́ и нам, Пречи́стая, исполня́ти зако́нная веле́ния.
По 2-м стихосло́вии седа́лен, глас 2:
Странноужа́сными страда́ньми твои́ми от зверонра́вных слуг злочести́ваго царя́ монго́льскаго/ вене́ц сла́вы от Царя́ Небе́снаго стяжа́л еси́/ и к ли́ку пресла́вных и добропобе́дных му́ченик сопричте́н еси́./ Моли́, кня́же, Его́, Всеблага́го, да поми́лует нас, недосто́йных, по вели́цей Свое́й ми́лости/ и спасе́т нас, и́миже весть судьба́ми.
Сла́ва, и ны́не, Богоро́дичен:
Ма́ти су́щи Царя́ Небеси́ и земли́,/ все житие́ Твое́ протекла́ еси́ в безве́стности, я́ко еди́на от убо́гих жен,/ вразуми́ и нас, Пречи́стая, избега́ти па́губныя расточи́тельности в я́стии и питии́,/ во оде́ждах и жили́щих на́ших.
По полиеле́и седа́лен, глас 8:
В ю́ных сый ле́тех, лиши́вся твоея́ ма́тере,/ роди́телю же твоему́ бы́вшу во многоле́тнем плене́нии,/ терпе́л еси́ тяготу́ сиротства́,/ прише́д же в во́зраст, всегда́ сострада́л еси́ и явля́л еси́ потре́бную по́мощь си́рым,/ ча́дом умерщвле́нных от монго́л обита́телей разоре́ннаго и́ми кня́жества Ряза́нскаго.
Сла́ва, и ны́не, Богоро́дичен:
Пренепоро́чная Де́во, Вы́шшая Небе́с и Чи́стшая све́тлостей со́лнечных,/ иму́щая ве́лие благоволе́ние к рабо́м Бо́жиим, преуспева́ющим во благоче́стии,/ возбуди́ и в нас, погряза́ющих в бесчи́сленных гресе́х и нече́стии, дух и́стиннаго покая́ния,/ всели́ в сердца́ на́ша страх Бо́жий и напра́ви на путь за́поведей Госпо́дних.
Та́же степе́нна, 1-й антифо́н 4-го гла́са. Проки́мен, глас 4: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́тимися к Тебе́. Вся́кое дыха́ние: Ева́нгелие от Луки́, зача́ло 106, до чте́ния среде́.
По 50-м псалме́ стихи́ра, глас 6: Име́я ве́лие дерзнове́ние пред Бо́гом: зри сла́вник на лити́и.
Кано́н свята́го, глас 6.
Песнь 1
Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ видя потопля́ема,/ Бо́гу побе́дную песнь пои́м, вопия́ше.
Я́ко по су́ху, прете́кл еси́, пресла́вне кня́же,/ волну́ющееся бу́рею бед и скорбе́й мо́ре жития́ сего́,/ окормля́емь благода́тию Пресвята́го Ду́ха,/ и к ти́хому приста́нищу жи́зни ве́чныя дости́гл еси́.
Су́щу ти еще́ во младе́нчестве,/ егда́ нача́л еси́ познава́ти ве́щи, о́крест тебе́ су́щия,/ ум твой явля́ше смысл здра́вый, се́рдце же блага́я чу́вствия/ на утеше́ние роди́телей и сро́дников твои́х.
Наставля́емый от благочести́выя твоея́ ма́тере/ в позна́нии уче́ния ве́ры и благоче́стия христиа́нскаго,/ всеусе́рдно тому́ внима́л еси́,/ в уме́ же и се́рдце твое́м то написова́л еси́/ и в житии́ твое́м то исполня́ти тща́лся еси́.
Богоро́дичен: Пронарече́нная от ве́ка и родо́в Творцо́м вся́ческих в Ма́терь по пло́ти Бо́га Сло́ва,/ моли́ Того́, Всеблага́го, да просвети́т нас, омраче́нных грехи́ мно́гими,/ да упра́вит нас к ве́чней жи́зни и спасе́нию.
Ин кано́н, глас 8.
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Красе́н те́лом, па́че же красе́н ду́хом, блаже́нне кня́же, был еси́,/ украша́яся благи́м нра́вом и благоче́стным житие́м;/ те́мже, с любо́вию пра́зднующе па́мять твою́, восхваля́ем тя.
Непреста́нно упражня́лся еси́ в чте́нии сло́ва Бо́жия,/ писа́ний святы́х оте́ц и ины́х душеполе́зных книг;/ возбуди́ и в нас, кня́же, любо́вь к Боже́ственному Писа́нию и песнопе́нием духо́вным.
От ю́ности твоея́ уклоня́лся еси́ су́етных уте́х и весе́лия мирска́го;/ вразуми́ и нас, пресла́вне, избега́ти грехо́вных уте́х и наслажде́ний.
Богоро́дичен: Пресвята́я Де́во, Богоизбра́нный сосу́де чистоты́ и непоро́чности,/ Ты яви́лася еси́ преукра́шенная пала́та Творца́ Го́спода,/ те́мже вси ро́ди челове́честии Тя ублажа́ют.
Песнь 3
Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.
Несть ин бог, ра́зве Творца́ не́бу и земли́,/ в Его́же пресвято́е И́мя крести́лся еси́,/ Его́же позна́л еси́, блаже́нне, приходя́ в во́зраст о́троческий,/ в Него́же и пра́во ве́ровал еси́ и Ему́же благоче́стно покланя́лся еси́.
От ю́ности твоея́ посвяще́н быв Бо́гу,/ Того́ благода́тию просвеща́емь и укрепля́емь был еси́/ и ми́лостию Его́ от напра́сныя сме́рти сохране́н был еси́.
Обогаща́я ум твой позна́нием и́стины/ и напоева́я се́рдце твое́ благи́ми чу́вствовании и жела́нии,/ непреста́нно устремля́лся еси́ к исполне́нию за́поведей и оправда́ний Госпо́дних.
Богоро́дичен: Воспита́вшися в хра́ме Госпо́днем, Пресвята́я Де́во Богоро́дице,/ возбуди́ в нас, гре́шных, любо́вь к усе́рдному посеще́нию хра́мов Бо́жиих,/ ко псалмо́м и пе́снем духо́вным.
Ин
Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
Просвеще́н быв наказа́нием и уче́нием Госпо́дним от пречестны́я твоея́ ма́тере,/ до́бре позна́л еси́ уче́ние ве́ры Правосла́вныя;/ моли́, кня́же, Го́спода, да пода́ст и́стинное просвеще́ние ча́дом и сро́дником на́шим.
Измла́да храм Бо́жий посеща́л еси́/ и усе́рдно чте́нию и пе́нию святы́х пе́сней внима́л еси́;/ возбуди́, святы́й кня́же, сию́ любо́вь и усе́рдие в нас,/ хла́дных ко хра́му Бо́жию и слу́шанию псалмо́в и пе́сней духо́вных.
Усе́рдно почита́л еси́ Це́рковь Правосла́вную/ и всегда́ исполня́л еси́ святы́я уста́вы и пра́вила ея́,/ чтил же еси́ духо́вный и и́ноческий чин;/ вразуми́ нас, кня́же, не увлека́тися злы́ми обы́чаи и пра́вилы ми́ра сего́,/ соблюда́ти же уста́вы Святы́я Це́ркве и почита́ти па́стыри ея́.
Богоро́дичен: Пресвята́я Де́во, ро́ждшая Наста́вника заблу́ждших и Просвети́теля душ на́ших,/ искорени́ в нас душевнопа́губная лжеуче́ния,/ посева́емая враги́ сло́ва Бо́жия и ве́ры Правосла́вныя,/ и вразуми́ заблужда́ющияся.
Седа́лен, глас 4:
Тече́ние соверши́в и́стинное, мучи́телей всю кре́пость победи́л еси́,/ и прия́л еси́ вене́ц от руки́ Вседержи́теля, Рома́не, кня́же всече́стне,/ и соде́лался еси́ а́нгелов соприча́стник.
Сла́ва, и ны́не, Богоро́дичен:
Сло́во О́тчее, Христа́ Бо́га на́шего,/ от Тебе́ воплоти́вшагося, позна́хом, Богоро́дице Де́во,/ Еди́на Чи́стая, Еди́на Благослове́нная./ Тем непреста́нно Тя, воспева́юще, велича́ем.
Песнь 4
Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста, о Го́споде пра́зднующи.
Христо́с моя́ си́ла, кре́пость и утвержде́ние,– взыва́л еси́, Боголюби́вый кня́же,/ и сего́ ра́ди всегда́ устремля́л еси́ ум твой и се́рдце к Нему́,/ в ско́рбех же и беда́х всегда́ прибега́л еси́ к Нему́.
Возлюби́в все́ю душе́ю твое́ю и все́ю кре́постию твое́ю Го́спода Иису́са,/ воспламеня́л еси́ себе́ жела́нием всегда́ твори́ти уго́дное Ему́/ и не прогневля́ти Его́ де́лы и словесы́ неподо́бными.
Ходя́ во всех за́поведех Бо́жиих непоро́чно,/ неукло́нно и всеусе́рдно соблюда́л еси́ пра́вила святы́х апо́стол и отце́в Це́ркве/ и явля́л еси́ в себе́ достоподража́тельный о́браз жития́ благоче́стнаго.
Богоро́дичен: Удиви́ла еси́, Богоневе́сто, чистото́ю души́ Твоея́/ и свя́тостию жития́ Твоего́ чи́ны а́нгельския/ и соде́лалася еси́ благоприя́тное вмести́лище Невмести́маго;/ те́мже вси ро́ди челове́честии и вся си́лы Небе́сныя непреста́нно прославля́ют Тя.
Ин
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Ви́дя опустоше́ну страну́ Ряза́нскую,/ обременя́ему и притесня́ему от зверонра́вных монго́л,/ ве́ровал еси́, кня́же,/ я́ко стра́шная годи́на сия́ пости́же люде́й за нече́стие их.
Я́коже обита́телие кня́жества Ряза́нскаго во все вре́мя жития́ твоего́/ претерпева́ху от лю́тых ва́рвар мно́гия и тя́жкия оби́ды и ско́рби,/ и ты, благосе́рде кня́же, ве́лия ско́рби носи́л еси́ в се́рдце твое́м,/ то́чию тве́рдое упова́ние на Го́спода укрепля́ше тя.
Ве́лий засту́пник и оте́ц си́рых и стра́ждущих/ по наше́ствии монго́л на страну́ Ряза́нскую, кня́же, был еси́./ Ны́не же предстоя́ пред Бо́гом, моли́ Его́,/ да изба́вит нас от наше́ствия иноплеме́нных.
Богоро́дичен: Всеблага́го Царя́ Небе́снаго Премилосе́рдная Ма́ти,/ вы́ну пеку́щаяся о бе́дствующих и стра́ждущих челове́цех,/ не оста́ви ми́лостию Твое́ю и нас, недосто́йных раб Твои́х,/ в многообра́зных беда́х, ско́рбех и напа́стех и спаси́ нас.
Песнь 5
Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.
Боже́ственным све́том озаре́н быв, благоче́стне кня́же,/ мрак грехо́вный от себе́ отгна́л еси́ и в млады́х еще́ ле́тех суету́ благ ми́ра сего́ узре́л еси́,/ всегда́ же к Го́рнему Ца́рствию умо́м твои́м взира́л еси́/ и се́рдцем устремля́лся еси́.
Устремля́я непреста́нно дух твой ко Го́споду и горя́ любо́вию к Нему́,/ возлюби́л еси́ все́ю душе́ю и бли́жния твоя́, я́ко себе́,/ я́коже запове́да Госпо́дь.
Имы́й нелицеме́рную и кре́пкую любо́вь к бли́жним,/ явля́л еси́ им, благосе́рде кня́же, всегда́ сострада́ние и по́мощь,/ утеша́я печа́льныя и ободря́я стра́ждущия.
Богоро́дичен: Презе́льную любо́вь иму́щи ко Го́споду/ и ве́лие милосе́рдие к ро́ду челове́ческому, Пресвята́я Влады́чице,/ моли́ Того́, Всеблага́го,/ да поми́лует и спасе́т нас по вели́цей ми́лости Свое́й.
Ин
Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.
Озаре́н быв благода́тию Пресвята́го Ду́ха,/ просвеще́нна очеса́ у́мная се́рдца, блаже́нне, всегда́ име́л еси́/ и су́етность земны́х благ я́сно узре́л еси́;/ умоли́, кня́же, Го́спода,/ да не лиши́т и нас, многогре́шных, Пресвята́го Ду́ха, просвеща́юща ду́ши на́ша.
Обурева́емый всегда́ скорбьми́ жите́йскими,/ сохраня́л еси́, кня́же, мир в се́рдце твое́м кре́пким упова́нием на Го́спода/ и всеце́лым преда́нием себе́ святе́й во́ли Его́;/ моли́ Его́, свя́те, да укрепи́т нас, немощны́х, в тве́рдей наде́жди на Него́/ и водвори́т благода́тный мир в душа́х на́ших,/ мяту́щихся сомне́нии, малоду́шием и малове́рием.
Богоро́дичен: Пречи́стая Влады́чице,/ Бо́га с челове́ки Боже́ственным Сы́ном Твои́м примири́вшая,/ возбуди́ в нас дух и́стиннаго покая́ния и исправле́ния жи́зни/ и помози́ нам примири́тися с Ним.
Песнь 6
Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.
Жите́йское мо́ре страны́ Ряза́нския/ зело́ волнова́шеся бу́рею нападе́ний на ню злочести́вых супоста́т с огне́м и мече́м,/ ты же, Боголюби́вый кня́же, сохране́н быв от зло́бы враго́в Десни́цею Всевы́шняго,/ пре́дал еси́ себе́ святе́й во́ли Его́.
Кровожа́днии монго́ли, наше́дше на зе́млю Ру́сскую, проли́ша пото́ки кро́ве христиа́нския,/ опустоши́ша гра́ды и ве́си Ряза́нския,/ ты же усе́рдно моли́л еси́ Го́спода,/ да укрепи́т страда́ющия лю́ди Своя́.
Имы́й любвеоби́льное се́рдце,/ ты, благосе́рде кня́же, явля́л еси́ си́рым и вдови́цам и про́чим бе́дствующим лю́дем,/ ели́ко мо́щно бя́ше, потре́бную по́мощь.
Богоро́дичен: Премилосе́рдая Влады́чице, Защи́тнице и Утеше́ние непра́ведно гони́мых,/ защити́ и уте́ши рабы́ Твоя́, озлобля́емыя от нечести́вых челове́к,/ те́плыми Твои́ми к Бо́гу моли́твами.
Ин
Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.
Те́плую моли́тву возсыла́л еси́, благосе́рде кня́же, ко Го́споду,/ егда́ зрел еси́ ве́лия страда́ния обита́телей страны́ Ряза́нския,/ разоре́нных от корыстолюби́вых и кровожа́дных ва́рвар.
Ди́вное му́жество и кре́пость ду́ха яви́л еси́, достоблаже́нне кня́же,/ егда́ сано́вник царя́ монго́льскаго убежда́ше тя отступи́ти от святы́я ве́ры Правосла́вныя,/ прия́ти же сту́дную ве́ру лжепроро́ка Магоме́та.
Пла́менную моли́тву пред Бо́гом излива́л еси́,/ егда́ злове́рный царь монго́льский повеле́ тебе́ ско́ро яви́тися к нему́:/ да укрепи́т тя Госпо́дь в иму́щих бы́ти злоключе́ниих,/ супру́гу и чад в разлуче́нии с тобо́ю.
Богоро́дичен: Мно́ги и лю́ты ско́рби претерпе́ла еси́, Пренепоро́чная,/ ра́ди Возлю́бленнаго Сы́на Твоего́,/ па́че же егда́ зре́ла еси́ Его́ на Кресте́;/ утоли́, Влады́чице, ско́рби рабо́в Бо́жиих,/ неви́нно гони́мых и озлобля́емых.
Конда́к, глас 2:
Оклеве́танный пред ха́ном в хуле́нии злове́рия его́,/ дерзнове́нно предста́л еси́ суди́щу нечести́вому;/ убоя́вся же Стра́шнаго Суда́ Христо́ва,/ ха́нское повеле́ние и страх поплева́л еси́, святы́й Рома́не./ Те́лом, я́ко розга́, ре́жемый,/ в страда́ниих уподо́бился еси́ Иа́кову Пе́рсянину/ и яви́лся еси́ великому́ченик изря́дный,/ столп и утвержде́ние Це́ркви Ряза́нстей,/ засту́пник и воево́да Росси́йский пресла́вный.
И́кос:
От ю́ности твоея́ вседуше́вно возлюби́в Го́спода,/ всеусе́рдно исполня́л еси́ Его́ святы́я за́поведи,/ ку́пно же име́л еси́ вели́кую любо́вь к бли́жним,/ благотворя́ бе́дствующим, состра́жда стра́ждущим./ Егда́ же прельща́емь и ну́дим был еси́ к отступле́нию от ве́ры Христо́вы/ и прия́тию злове́рия сту́днаго лжепроро́ка Магоме́та,/ яви́л еси́ непоколеби́мую тве́рдость и ди́вное му́жество в самолюте́йших муче́ниих за Христа́/ и яви́лся еси́ великому́ченик изря́дный, столп и утвержде́ние Це́ркви Ряза́нстей,/ засту́пник и воево́да Росси́йский пресла́вный.
Песнь 7
Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.
Я́коже благочести́вии трие́ евре́йстии о́троцы/ ну́дими бя́ху от злочести́ваго царя́ вавило́нскаго к поклоне́нию безду́шному истука́ну,/ та́ко и тя, благоче́стне кня́же, сано́вник царя́ монго́льскаго/ преклоня́ше к прия́тию сту́дныя ве́ры магомета́нския.
Я́коже о́нии трие́ о́троцы не повину́шася безбо́жному веле́нию царя́,/ та́ко и ты, кня́же, отве́ргл еси́ сове́ты злове́рнаго сано́вника монго́льскаго, глаго́ля:/ христиани́н есмь, и ве́ра Правосла́вная и́стинна есть.
Ви́дя тя, доблему́дре кня́же, непрекло́нна своему́ сове́ту,/ надме́нный вла́стию свое́ю сано́вник воскипе́ на тя гне́вом и зло́бою/ и посла́ лжи́вое и клеветно́е писа́ние царю́ своему́,/ я́ко ты зело́ поно́сиши его́ и богоху́льствуеши.
Богоро́дичен: Не опали́лася еси́, Пренепоро́чная Де́во, все́льшимся в Тя Огне́м Божества́,/ но я́коже огнеопа́льная пещь вавило́нская яви́лася еси́/ и источа́еши усе́рдно чту́щим Тя ро́су Боже́ственныя благода́ти.
Ин
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.
Вседуше́вно почита́я и́стинную Правосла́вную ве́ру,/ дерзнове́нно испове́дал еси́ ю пред царе́м злове́рным и ника́коже восхоте́л еси́ отрещи́ся ея́;/ моли́, кня́же, Го́спода,/ да пода́ст и нам ре́вность пропове́дати сию́ Боже́ственную ве́ру.
Отроко́м евре́йским, безу́мному веле́нию царя́ вавило́нскаго поклони́тися безду́шному истука́ну неповину́вшимся,/ уподо́бился еси́, прехва́льне кня́же,/ егда́ не повину́лся еси́ повеле́нию царя́ монго́льскаго прия́ти его́ ве́ру сту́дную,/ отрещи́ся же ве́ры Правосла́вныя.
Непоколеби́мое му́жество яви́л еси́, кня́же,/ егда́ безчелове́чный царь, а́ки ди́кий зверь,/ озло́блен быв тве́рдостию твое́ю в ве́ре Правосла́вней и презре́нием его́ злове́рия,/ осуди́ тебе́ на смерть и предаде́ тя люте́йшим мучи́телем.
Богоро́дичен: Ве́лию любо́вь и почте́ние име́л еси́, кня́же, ко Пресвяте́й Богоро́дице/ и кре́пкое упова́ние на Ню по Бо́зе возлага́л еси́ во вре́менней жи́зни,/ ны́не же, предстоя́ Престо́лу Бо́жию, прославля́еши Ю с чи́нми а́нгельскими/ и мо́лиши о спасе́нии земли́ Росси́йския.
Песнь 8
Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.
Егда́ злове́рный царь Теми́р получи́ клеветно́е писа́ние своего́ сано́вника,/ зело́ воскипе́ гне́вом/ и, егда́ по повеле́нию его́ яви́лся еси́ к нему́,/ именова́ тя оскорби́теля его́ че́сти и богоху́льника.
Непови́нен сый в клевете́, егда́ возвеща́л еси́ царю́ и́стину,/ но яви́шася лжесвиде́телие, а́ки бы слы́шавшии твое́ злохуле́ние,/ и а́ще свиде́тельствовал еси́ Бо́гом Всеве́дущим твою́ непови́нность,/ злочести́вый царь не хотя́ше ве́ровати словесе́м твои́м.
Ослепле́н сый свои́м злове́рием,/ царь Теми́р повеле́ тебе́, кня́же, отрещи́ся еди́ныя и́стинныя ве́ры Правосла́вныя,/ прия́ти же сту́дную ве́ру лжепроро́ка Магоме́та,/ ты же, пресла́вне, непоколеби́м пребы́л еси́ и сту́дную ве́ру лжепроро́ка отве́ргл еси́.
Богоро́дичен: Пресвята́я Влады́чице Богоро́дице,/ тве́рдая и ско́рая Помо́щнице борю́щихся со страстьми́ и прило́ги вра́жиими,/ утверди́ Твое́ю благода́тною по́мощию нас, немощны́х,/ в борьбе́ с лю́тыми и злокова́рными враги́ душ на́ших.
Ин
Ирмо́с: Царя́ Небе́снаго,/ Его́же пою́т во́и а́нгельстии,/ хвали́те и превозноси́те во вся ве́ки.
Прия́в от Го́спода му́жество и си́лу и возложи́в все упова́ние на Него́,/ тверд и непрекло́нен был еси́ проти́ву преще́ний царя́ злове́рнаго;/ испроси́, кня́же, у Го́спода кре́пость во искуше́ниих гони́мым за пра́вду рабо́м Бо́жиим.
Пачеесте́ственное терпе́ние и му́жество яви́л еси́, пречу́дне кня́же,/ в странноужа́сных страда́ниих твои́х за ве́ру Правосла́вную./ Моли́, свя́те, Го́спода, да укрепи́т нас в испове́дании сея́ Боже́ственныя ве́ры и и́стиннем благоче́стии.
Пречестно́ю твое́ю кро́вию, кня́же страстоте́рпче,/ в люте́йших муче́ниих из телесе́ твоего́ излива́емою,/ обагри́ся и напои́ся земля́,/ и прозябе́ в предуста́вленная Бо́гом ле́та в стране́ злове́рных ве́ра Правосла́вная.
Богоро́дичен: Удиви́ла еси́, Пречи́стая, чи́ны а́нгельския/ чистото́ю и непоро́чностию души́ Твоея́ и преди́вным смире́нием,/ и сего́ ра́ди сподо́билася еси́ бы́ти Ма́ти во пло́ти Сы́на Бо́жия./ Помози́ нам, Влады́чице, очи́ститися от скверн грехо́вных,/ стяжа́ти же чистоту́ духо́вную/ и всади́ боголюбе́зное смире́ние в сердца́ на́ша, одержи́мая го́рдостию и тщесла́вием.
Песнь 9
Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни а́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.
Ви́дев тя, пресла́вне кня́же, непрекло́нна в исполне́нии ве́ры Христо́вы,/ злове́рный царь зело́ разгне́вася и угрожа́ше лиши́ти тя престо́ла кня́жескаго,/ заключи́ в темни́цу, осуди́ на изгна́ние и предаде́ му́кам и сме́рти.
Услы́шав таковы́я неи́стовыя глаго́лы царя́, кня́же,/ дерзнове́нно рекл еси́ ему́, я́ко ника́коже страши́шися сих угроже́ний./ Тогда́ злове́рный царь разсвирепе́, а́ки разъяре́нный зверь,/ и повеле́ преда́ти тя лю́тым муче́нием и сме́рти.
Егда́, по темни́чнем заключе́нии, приведе́н быв на ме́сто ка́зни, облича́л еси́ злове́рие монго́л,/ тогда́ слузи́ ца́рстии, не терпя́ще обличе́ния, отре́заша язы́к твой,/ та́же избодо́ша очеса́ твоя́ и отъя́ша еди́н по еди́ному уста́ и ушеса́, персты́ рук твои́х,/ та́же ру́це и но́зе, последи́ же, сне́мше ко́жу с главы́ твоея́,/ усеко́ша ю и вонзо́ша на ко́пия на позо́рище лю́дем.
Богоро́дичен: Омраче́ннии мгло́ю мирски́я суеты́/ и боговре́дных обы́чаев ми́ра и плотски́х наслажде́ний,/ блужда́ем, окая́ннии, во тьме нече́стия и заблужде́ний,/ но просвети́, Ма́ти Бо́жия, о́чи ума́ на́шего/ и наста́ви нас на стезю́ спасе́ния.
Ин
Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.
О коль чу́дна и крепка́ ве́ра твоя́ в Триеди́наго Бо́га Творца́, пречу́дне кня́же,/ я́ко в немощне́м телеси́ терпе́л еси́ толь лю́тая страда́ния,/ о них же то́чию вспомина́юще, ве́рнии ужаса́ются/ и, благодаря́ще укрепля́вшаго тя Го́спода, тя прославля́ют.
Презе́льную любо́вь име́л еси́ ко Го́споду,/ ея́же ра́ди не пощаде́л еси́ живота́ твоего́/ и пре́дал еси́ те́ло твое́ странноужа́сным муче́нием./ Умоли́, благосе́рде кня́же, Го́спода,/ да согре́ет Свое́ю благода́тию на́ша хла́дная сердца́/ и пода́ст кре́пкую любо́вь к Нему́.
Мольбы́ усе́рдныя вознеси́, многострада́льне кня́же, к Царю́ Небе́сному/ сохрани́тися гра́ду, стране́ Ряза́нстей и всему́ наро́ду ру́сскому/ от лю́тых враг, вне́шних и вну́тренних,/ и нам всем изба́витися от лю́тых зол и обстоя́ний.
Богоро́дичен: Пресвята́я Де́во, кре́пость и похвало́ му́чеников,/ защи́то и утеше́ние неви́нно гони́мых и озло́бленных,/ заступи́ и спаси́, Премилосе́рдная, в лю́тых озлобле́ниих раб Твои́х,/ усе́рдно к Тебе́ прибега́ющих и на Тя упова́ющих.
Свети́лен:
Просвеще́н быв, кня́же, благода́тию Пресвята́го Ду́ха,/ соде́лался еси́ благоприя́тная оби́тель Е́го́/ и в све́те за́поведей Боже́ственных всегда́ ходи́л еси́;/ те́мже ны́не в све́тлостех святы́х предстои́ши лицу́ Бо́жию/ и непреста́нно славосло́виши Его́.
Сла́ва, и ны́не, Богоро́дичен:
Пресвята́я Де́во, ро́ждшая Преве́чный Свет, просвеща́ющий вся́каго гряду́щаго в мир челове́ка,/ Того́ моли́, Преблага́я, да просвети́т ду́ши на́ша,/ омраче́нныя сту́дными страстьми́ и похотьми́ на́шими.
На хвали́тех стихи́ры, глас 8:
Ки́ими похвала́ми ублажи́м тя, пресла́вне кня́же Рома́не?/ Я́ко процве́л еси́, а́ки плодоно́сное дре́во от пра́ведна ко́рене,/ и возрасти́л еси́ в себе́ плоды́ духо́вныя чистоты́,/ кро́тости же и смире́ния/ и всех христиа́нских доброде́телей./ Те́мже мо́лим тя:/ моли́ о нас Милосе́рдаго Го́спода,/ да утверди́т нас в спаси́тельнем стра́се Свое́м и благоче́стии.
Кто не восхва́лит, кня́же,/ твою́ ве́лию любо́вь и сострада́ние к бли́жним,/ я́же явля́л еси́ разоре́нным от ва́рвар лю́дем кня́жества Ряза́нскаго?/ Кто не просла́вит твое́ великоду́шие/ и кре́пкую наде́жду на ми́лость Бо́жию в ско́рбех и искуше́ниих?/ Внуши́ и нам, свя́те, твои́ми моли́твами/ и́стинную любо́вь к бли́жним/ и тве́рдое упова́ние на на́шего Творца́ и Го́спода.
Кто не удиви́тся, прехва́льне кня́же,/ твое́й му́дрости, му́жеству и кре́пости ду́ха,/ егда́ обличи́л еси́ злове́рие сано́вника царя́ монго́льскаго,/ па́че же егда́ царь Теми́р ну́дяше тя к отрече́нию от ве́ры Правосла́вныя/ и прия́тию ве́ры пога́нския?/ Утверди́ нас, блаже́нне, моли́твами твои́ми/ в испове́дании еди́ныя и́стинныя ве́ры Правосла́вныя/ и обличе́нии богопроти́вных уче́ний.
Кто не обы́мется удивле́нием и у́жасом,/ вспомина́я твое́ непоколеби́мое терпе́ние/ в бие́ниих и поноше́ниих от кровожа́дных монго́л,/ па́че же кто изобрази́т твоя́ люте́йшая страда́ния,/ я́же за ве́ру Христо́ву претерпе́л еси́?/ Языка́ отъя́тие, оче́с избоде́ние,/ перст на руку́ и ногу́/ и по́слежде самы́х руку́ и ногу́ ме́дленное отсече́ние,/ с главы́ твоея́ ко́жи совлече́ние/ и тоя́ ме́чное усече́ние./ Моли́ о нас, многострада́льне, Го́спода,/ да пода́ст нам кре́пость ду́ха во многоразли́чных беда́х и напа́стех.
Сла́ва, глас то́йже:
Прииди́те, лю́дие,/ восхва́лим вели́каго и пресла́внаго уго́дника Бо́жия,/ благове́рнаго кня́зя Рома́на,/ и́же на земли́ просия́ чи́стым и непоро́чным житие́м/ и все́ми боголюбе́зными доброде́тельми,/ па́че же преди́вною тве́рдостию в безмернолю́тых муче́ниих./ Ны́не же, предстоя́ Престо́лу Царя́ сла́вы/ с преди́вными засту́пники земли́ Росси́йския,/ моли́ Его́, кня́же,/ да спасе́т ю от всех зол и наве́т вра́жиих.
И ны́не, Богоро́дичен:
Безневе́стная Де́во,/ Ма́ти Христа́ Бо́га на́шего,/ Премилосе́рдная Влады́чице,/ моли́ Его́, Всеблага́го,/ да пода́ст стране́ Ряза́нстей и всему́ наро́ду ру́сскому/ мир и безмяте́жие,/ правосла́вным же лю́дем здра́вие и долгоде́нствие/ и во всем благо́е поспеше́ние.
НА ЛИТУРГИ́И
Блаже́нны от пе́рваго кано́на, песнь 3-я, и втора́го кано́на, песнь 6-я. Проки́мен, глас 4: Святы́м, и́же суть на земли́ Его́,/ удиви́ Госпо́дь вся хоте́ния Своя́ в них. Стих: Предзре́х Го́спода предо мно́ю вы́ну, я́ко одесну́ю мене́ есть, да не подви́жуся. Апо́стол к Ри́мляном, зача́ло 99. Аллилу́ия, глас 4: Воззва́ша пра́веднии, и Госпо́дь услы́ша их. Стих: Мно́ги ско́рби пра́ведным, и от всех их изба́вит я́ Госпо́дь. Ева́нгелие от Матфе́я, зача́ло 36. Прича́стен: Ра́дуйтеся, пра́веднии:
Моли́тва
Святы́й сла́вный великому́чениче, благове́рный кня́же Рома́не, покрови́телю и засту́пниче о́бласти Ряза́нския! Ве́руем и упова́ем, я́ко страда́нии и богоуго́дною жи́знию твое́ю стяжа́л еси́ ве́лию ми́лость и дерзнове́ние у Го́спода Бо́га и не забы́л еси́ достоя́ния твоего́ земна́го, оте́чества на́шего, в не́мже обурева́еми мы, раби́ твои́, мно́гими напа́стьми вра́жиими и страстьми́ жите́йскими. Те́мже мо́лим тя: моли́твами и предста́тельством твои́м умоли́ Го́спода Бо́га, да изба́вит нас от вся́ких бед и злых обстоя́ний, от вся́ких неду́гов и боле́зней и от всех враго́в, ви́димых и неви́димых. О вели́кий уго́дниче Бо́жий! Воздохни́ о нас, гре́шных, ко Го́споду Бо́гу, да прости́т нам вся согреше́ния на́ша, да низпо́слет нам благода́ть Всесвята́го Ду́ха, да преста́нем от вся́каго скверноде́йства и про́чее вре́мя живота́ на́шего во вся́ком благоче́стии и чистоте́ поживе́м и, та́ко благоугоди́вше Го́споду, сподо́бимся жи́зни вечноблаже́нныя, пою́ще и воспева́юще превели́кое милосе́рдие Бо́жие и твое́ ми́лостивое предста́тельство за нас у Престо́ла Бо́жия во ве́ки веко́в. Ами́нь.
И́на моли́тва
О пресла́вный страстоте́рпче, вели́кий уго́дниче Бо́жий, принеси́ на́шу сле́зную моли́тву Го́споду Бо́гу на́шему, уми́лостиви Его́ к нам, гре́шным, да оты́мет от нас гнев Свой пра́ведный, да умири́т страну́ на́шу многострада́льную, да утверди́т мир и тишину́, да низпо́слет нам изоби́лие плодо́в земны́х и да возбрани́т враго́м на́шим оби́ду твори́ти си́рым и безпомо́щным. Припа́дающе к ико́не твое́й, воспомина́ем с ве́рою страда́ния твоя́, за Христа́ претерпе́нная, и мо́лим тя: не оста́ви нас и испроси́ нам у Го́спода блага́я вре́менная и ве́чная, да сла́вим просла́вившаго тебе́ Бо́га во ве́ки. Ами́нь.
