Служба в честь святаго благовернаго князя Глеба, Владимирскаго чудотворца
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4, глас 4.
Подо́бен: Дал еси́ зна́мение:
От благочести́ваго ко́рене прозя́бл еси́ о́трасль благове́рия,/ благове́рный кня́же Гле́бе,/ измла́да бо крест Христо́в,/ я́ко ору́жие, на ра́мо твое́ прия́л еси́,/ ве́ру, я́ко щит, наде́жду, я́ко броню́,/ кро́тость и незло́бие, я́ко шлем,/ во е́же победи́ти враги́/ и бесо́вския ополче́ния и тех прило́ги,/ сего́ ра́ди, лику́я ны́не со А́нгелы,/ непреста́нно моли́ о душа́х на́ших.
Я́ко звезда́ пресве́тлая,/ просвеща́ющая ду́ши ве́рных чуде́сными сия́нии,/ уго́дниче Госпо́день, благове́рный кня́же Гле́бе,/ мрак страсте́й и боле́зней на́ших отгоня́еши,/ здра́вие же всем да́руеши,/ многоцеле́бныя твоя́ мо́щи почита́ющим,/ моли́твенниче о душа́х на́ших.
Пра́веден и незло́бив,/ и́стинен же и ве́рен,/ уклоня́яся от вся́кия злы́я ве́щи,/ показа́лся еси́, кня́же Гле́бе,/ просвеще́н доброде́тельми и благоче́стием сия́я,/ тем тя ублажа́ем/ и свято́е твое́ и честно́е преставле́ние/ дне́сь пра́зднуем, ра́дующеся, Богому́дре.
Сла́ва, глас 5:
Прииди́те, лю́дие сла́внаго гра́да Влади́мира/ и всея́ Росси́йския земли́,/ блаже́ннаго кня́зя Гле́ба торже́ственно просла́вим/ и све́тло тому́ пра́зднуем, духо́вне ликовству́юще,/ созыва́ет бо нас торжествова́ти де́нь преставле́ния своего́,/ в о́ньже возше́д от земли́ к Небе́сным,/ предстои́т Престо́лу Христо́ву/ и мо́лит дарова́ти нам мир и ве́лию ми́лость.
И ны́не, Богоро́дичен:
Блажи́м Тя, Богоро́дице Де́во,/ и сла́вим Тя, ве́рнии, по до́лгу,/ град непоколеби́мый, сте́ну необори́мую,/ тве́рдую Предста́тельницу/ и прибе́жище душ на́ших.
На стихо́вне стихи́ры, глас 2:
Сла́ву ми́ра сего́/ и вся кра́сная нивочто́же вмени́вый,/ блаже́нне кня́же Гле́бе,/ сла́вы Небе́сныя прича́стника мя покажи́/ моли́твами твои́ми.
Стих: Возвесели́тся пра́ведник о Го́споде/ и упова́ет на Него́.
Криле́ голуби́не/ от Бо́га прие́м,/ блаже́нне кня́же Гле́бе,/ возлете́л еси́ ду́хом/ в оби́тели Небе́сныя.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Предвари́, ра́бе Бо́жий,/ пре́жде да́же не поглоти́т мя до конца́ всегуби́тель,/ и изба́ви вско́ре ду́шу мою́/ от лю́тых страсте́й,/ и мир вожделе́нный пода́ждь ми.
Сла́ва, глас то́йже:
Христолюби́вый гра́де Влади́мире,/ в Бо́зе лику́й, веселя́ся,/ я́ко многоце́нное сокро́вище,/ содержа́й в себе́ мо́щи/ свята́го кня́зя Гле́ба пресла́внаго.
И ны́не, Богоро́дичен:
Вы́шнии Тя ли́цы,/ Богоро́дице Де́во,/ пою́т с ни́жними,/ сла́вяще непреста́нно/ рождество́ Твое́ пречи́стое.
Тропа́рь пи́сан на вели́цей вече́рни.
Сла́ва, и ны́не, Богоро́дичен.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8, глас 4:
От благочести́ваго ко́рене/ о́трасль благове́рия прозя́бл еси́/ и восте́кл еси́ на па́жить зако́на живоно́снаго,/ благоче́стием же просия́л еси́,/ блаже́нне Богому́дре кня́же Гле́бе,/ и тем Благода́телю всех Бо́гу благоугоди́л еси́.
Пожи́л еси́ во гра́де Влади́мире,/ Богому́дре кня́же Гле́бе,/ и, ду́шу твою́ очи́стив, я́ко зла́то в горни́ле,/ Влады́це Христу́ преда́л еси́ ю,/ честно́е же те́ло твое́ положи́ся во хра́ме Богома́тере,/ Ю́же, свя́те, моли́/ сохрани́ти град твой Влади́мир/ и вся гра́ды страны́ Росси́йския непоколеби́мы.
В чу́днем хра́ме Пресвяты́я Богоро́дицы,/ иде́же лежи́т ны́не/ ди́вным нетле́нием просла́вленное/ те́ло твое́, всеблаже́нне,/ исцеле́ния подаю́тся всем челове́ком,/ с ве́рою притека́ющим к свяще́нной ра́це твое́й,/ Богому́дре кня́же Гле́бе,/ те́мже и мы мо́лим тя:/ моли́ спасти́ся душа́м на́шим.
Измла́да возлюби́в храни́ти Госпо́дни за́поведи,/ просия́л еси́ пресла́вно Боже́ственными доброде́тельми,/ те́лом положи́вся во хра́ме Богома́тере,/ ду́хом лику́еши в Небе́сных черто́зех со А́нгелы,/ с ни́миже моли́ся Христу́ Бо́гу,/ Гле́бе Богому́дре и всеблаже́нне,/ о творя́щих честну́ю па́мять твою́.
И́ны стихи́ры, глас 2.
Подо́бен: Ки́ими похва́льными:
Ки́ими духо́вными похвала́ми/ восхва́лим кня́зя Гле́ба пресла́внаго?/ В настоя́щее сие́ торжество́/ ве́рою и любо́вию воспои́м ему́:/ ра́дуйся, ве́рным лю́дем ско́рый помо́щниче,/ и страны́ Влади́мирския украше́ние,/ и земли́ Росси́йския те́плый засту́пниче,/ его́же венцы́ венча́ет Христо́с Бог наш,/ име́яй ве́лию ми́лость.
Ки́ими похва́льными пе́сньми/ ны́не соста́вим ликова́ние?/ В честне́м пра́зднице твоея́ па́мяти,/ блаже́нне кня́же Гле́бе,/ духо́вне пра́зднующе, мо́лимся:/ моли́ побе́ды на враги́ дарова́ти стране́ на́шей,/ тебе́ бо те́пла засту́пника и моли́твенника ко Спа́су стяжа́хом,/ подаю́щему ми́рови ве́лию ми́лость.
Ки́ими похвала́ми досто́йно/ просла́вим блаже́ннаго кня́зя Гле́ба?/ Ве́лию бо благода́ть от Христа́ прия́л е́сть,/ и всем подае́т неоску́дная исцеле́ния,/ и мо́лится ко Го́споду,/ во е́же спасти́ся нам,/ того́ па́мять ве́рою почита́ющим,/ его́же чудесы́ просла́ви Христо́с Бог наш,/ име́яй ве́лию ми́лость.
Сла́ва, глас 4:
Прииди́те, лю́дие сла́внаго гра́да Влади́мира/ и всея́ Росси́йския земли́,/ на́шего засту́пника хвала́ми и пе́сньми ублажи́м:/ ми́лостынею бо, и посто́м, и до́брыми де́лы Бо́гу угоди́/ и, ду́шу свою́ Ему́ преда́в,/ нам честны́я своя́ мо́щи оста́ви,/ точа́щия неоску́дно исцеле́ния/ всем, приходя́щим к нему́ с ве́рою./ И мы приле́жно мо́лимся:/ о всеблаже́нне кня́же Гле́бе,/ моли́ся Святе́й Тро́ице о душа́х на́ших.
И ны́не, Богоро́дичен.
Вход. Проки́мен дне, и чте́ния 3 преподо́бническая.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очеса́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же суть в ми́ре./ Ибо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (главы 5 и 6):
Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́,/ внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
На лити́и стихи́ры, глас 1:
Наста́ дне́сь всечестна́я па́мять/ благове́рнаго кня́зя Гле́ба,/ на́шего засту́пника и помо́щника в ско́рбех,/ и боля́щим врача́ предо́бра,/ и во бране́х посо́бника непобори́ма,/ его́же досто́йно да ублажи́м/ и све́тло па́мять его́ да торжеству́ем,/ мо́лится бо Го́сподеви спасти́ся душа́м на́шим.
Житие́ твое́ по Бо́зе пожи́в,/ блаже́нне кня́же Гле́бе,/ в моли́тве и посте́ пребыва́л еси́,/ вдови́цы и оби́димыя, заступа́я, ми́ловал еси́./ Те́мже моли́ся Спа́су всех/ за град твой Влади́мир и за страну́ Росси́йскую/ и нам испроси́ от Го́спода ми́лость в Де́нь су́дный.
Глас 3: От земли́ Воззва́вый тя в ю́ности к Небе́сным селе́нием,/ соблюда́ет и по сме́рти невреди́мо те́ло твое́,/ свя́те кня́же Гле́бе,/ ты бо в целому́дрии и чистоте́, блаже́нне, жи́тельствовал еси́,/ не оскверни́в пло́ти твоея́./ Те́мже со дерзнове́нием моли́/ спасти́ся душа́м на́шим.
Сла́ва, глас 4:
Благоче́стия столпа́ непоколеби́ма,/ пра́веднаго кня́зя Гле́ба/ хвала́ми и пе́сньми духо́вными возвели́чим/ и согла́сно ему́ возопии́м:/ о всеблаже́нне и Богому́дре кня́же Гле́бе,/ я́ко име́яй дерзнове́ние ко Святе́й Тро́ице,/ моли́ побе́ды дарова́ти стране́ на́шей/ и от наше́ствия супоста́т/ град твой Влади́мир/ и вся гра́ды страны́ Росси́йския сохрани́ти/ и спасти́ ду́ши на́ша.
И ны́не, Богоро́дичен:
При́зри на моле́ния Твои́х раб, Всенепоро́чная,/ утоля́ющи лю́тая на ны воста́ния,/ вся́кия ско́рби нас изменя́ющи/ Тя бо Еди́ну тве́рдое и изве́стное утвержде́ние и́мамы/ и Твое́ предста́тельство стяжа́хом,/ да не постыди́мся, Влады́чице, Тя призыва́ющии,/ потщи́ся на умоле́ние Тебе́ ве́рно вопию́щих:/ ра́дуйся, Влады́чице, всех по́моще,/ ра́досте, и покро́ве,/ и спасе́ние душ на́ших.
На стихо́вне стихи́ры, глас 2.
Подо́бен: До́ме Евфра́фов:
В Росси́йстей земли́,/ я́коже со́лнце,/ возсия́л еси́ чистото́ю твое́ю,/ всех возвеселя́я сердца́ и помышле́ния/ чудесы́ твои́ми, пресла́вне.
Стих: Возвесели́тся пра́ведник о Го́споде/ и упова́ет на Него́.
Росси́йская племена́ вся,/ духо́вне ликовству́йте,/ пе́сньми ублажа́юще/ кня́зя Гле́ба/ пресла́внаго.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Пе́ния похва́льная,/ я́ко за благодея́ния/ твоя́ благодаре́ния,/ от нас приими́,/ кня́же Гле́бе пресла́вне.
Сла́ва, глас 6:
Христолюби́вых люде́й Росси́йских ты вели́кий хода́тай/ и во бране́х посо́бник еси́./ Те́мже мы, я́ко жи́ву ти су́щу, глаго́лем:/ преблаже́нне кня́же Гле́бе,/ непреста́нно моли́ся,/ е́же изба́витися стране́ Росси́йстей от нахожде́ния вра́жия/ и христолюби́вым лю́дем от вся́каго зла/ и спасти́ся душа́м на́шим.
И ны́не, Богоро́дичен.
На благослове́нии хле́бов тропа́рь свята́го, два́жды, и Богоро́дице Де́во: еди́ножды.
Тропа́рь свята́го, глас 4:
Дне́сь све́тло красу́ется сла́внейший град Влади́мир,/ име́я в себе́ пребога́тое сокро́вище–/ чудоточа́щия честны́я мо́щи благове́рнаго кня́зя Гле́ба,/ и́миже украша́яся и хваля́ся,/ вселе́нную всю созыва́ет к весе́лию/ и велегла́сно вопие́т:/ о Влады́ко Христе́,/ дарова́вый такову́ю благода́ть уго́днику Твоему́,/ его́ моли́твами поми́луй нас.
НА У́ТРЕНИ
На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 1:
Пра́зднует дне́сь вся Це́рковь Росси́йская/ преставле́ние благове́рнаго кня́зя Гле́ба, уго́дника Христо́ва,/ того́ приле́жно моля́щи исцели́ти неду́ги и боле́зни на́ша/ и вся́ких искуше́ний изба́вити ве́рою восхваля́ющих его́.
Сла́ва, и ны́не, Богоро́дичен:
Чу́до чуде́с, Благода́тная, в Тебе́ зря́ще, тва́рь ра́дуется:/ зачала́ бо еси́ безсе́менно и родила́ неизрече́нно,/ Его́же чинонача́лия А́нгелов ви́дети не мо́гут,/ Того́ моли́ о душа́х на́ших.
По 2-м стихосло́вии седа́лен, глас 5:
Тве́рдаго адама́нта и столпа́, непоколеби́ма вра́жиими прило́ги,/ благове́рнаго кня́зя Гле́ба пе́сньми почти́м,/ и́же, нивочто́же вмени́в вся кра́сная ми́ра сего́,/ кро́тостию и смире́нием посрами́ проти́внаго врага́/ и ны́не мо́лит о спасе́нии душ на́ших.
Сла́ва, и ны́не, Богоро́дичен:
Ужа́сно чу́до зача́тия и несказа́нен о́браз рождества́/ в Тебе́ позна́ся, Де́во Чи́стая,/ ужаса́ет мой ум и удивля́ет по́мысл./ Сла́ва Твоя́, Богоро́дице, всем простре́ся ко спасе́нию душ на́ших.
Велича́ние:
Велича́ем тя,/ святы́й благове́рный кня́же Гле́бе,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.
Псало́м избра́нный: Блаже́н муж, боя́йся Го́спода:
По полиеле́и седа́лен, глас 8:
Благоче́стно на земли́ в зако́не Госпо́дни пожи́в,/ ве́ру непоро́чну соблю́л еси́ в се́рдцы твое́м, сконча́в до́брый по́двиг,/ се́мена доброде́телей се́яв, пожа́л еси́ плоды́ трудо́в твои́х/ и вене́ц сугу́б от руки́ Вседержи́теля прия́л еси́, блаже́нне кня́же Гле́бе,/ и Того́ сла́вы сподо́бился еси́./ Те́мже, предстоя́ Святе́й Тро́ице, моли́ спасти́ град и лю́ди,/ чту́щия любо́вию святу́ю па́мять твою́.
Сла́ва, и ны́не, Богоро́дичен:
Воплоще́ннаго Бо́га от Твоея́ утро́бы ро́ждши, Пречи́стая,/ мене́, растле́ннаго греха́ми от прило́г лука́ваго, укрепи́, Ма́ти Бо́жия,/ и се́рдце мое́ очи́сти, Богоблагода́тная, ма́терними Твои́ми моли́твами,/ да и аз зову́ Ти:/ моли́ Христа́ Бо́га, Сы́на Твоего́, Мари́е Богоро́дице,/ поми́ловати ста́до Твое́, е́же стяжа́ла еси́, Всенепоро́чная.
Степе́нна, 1-й антифо́н 4-го гла́са. Проки́мен, глас 4: Пра́ведник, я́ко фи́никс процвете́т/ и, я́ко кедр, и́же в Лива́не, умно́жится. Стих: Насажде́ни в дому́ Госпо́дни во дво́рех Бо́га на́шего процвету́т. Ева́нгелие от Луки́, зача́ло 35.
По 50-м псалме́ стихи́ра, глас 6:
Блаже́нне Богому́дре кня́же Гле́бе,/ ты, я́ко земля́ до́брая,/ восприя́в Боже́ственная се́мена сло́ва Бо́жия,/ до́брым се́рдцем и благи́м соблю́л еси́ сия́/ и плод стори́чный прине́сл еси́,/ сего́ ра́ди и Госпо́дь тя возлюби́/ и, ю́на су́ща, преста́ви в Небе́сныя оби́тели,/ иде́же ны́не предстоя́ Ему́,/ моли́ся о чту́щих па́мять твою́.
Кано́н Богоро́дице со ирмосо́м на 6 и свята́го на 8, глас 2.
Песнь 1
Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло е́сть:/ препросла́вленный Госпо́дь сла́вно бо просла́вися.
Высоко́ житие́ име́яй и Боже́ственными восхожде́нии ве́сь све́тел быв,/ просвеще́ние ми испроси́, восхваля́ющему честны́я твоя́ по́двиги,/ и́миже до́бре пожи́в, получи́л еси́, кня́же Гле́бе, и́хже наде́ялся еси́.
Боже́ственная любя́ уче́ния и во чте́нии свяще́нных Писа́ний упражня́яся,/ сласте́й уклони́лся еси́, блаже́нне, смра́дных и безче́стных,/ и украси́лся еси́ благода́тными дарова́нии.
Дрема́ние о́чию от души́, блаже́нне, отгна́л еси́,/ во бде́ниях пребыва́я и всено́щными стоя́нии Бо́гу приобща́яся,/ те́мже ко дню невече́рнему дости́гл еси́.
Богоро́дичен: Я́ко черто́г одушевле́н Бо́жий/ и кади́льницу мы́сленнаго и светоно́снаго у́гля,/ Присноблагода́тную Богоро́дицу ублажа́ем, зову́ще:/ ра́дуйся, Хода́таице спасе́ния на́шего.
Песнь 3
Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ не́сть свят, я́коже Бог наш,/ и не́сть пра́веден, па́че Тебе́, Го́споди.
Глаго́лом жи́зни внима́я, испи́л еси́ во́ду спасе́ния,/ возгнуша́вся го́рькаго греха́,/ и, поя́, глаго́лал еси́ Бо́гу, блаже́нне Гле́бе:/ не́сть свят, па́че Тебе́, Го́споди.
Милосе́рдием подража́л еси́ Христу́,/ разда́л еси́ бога́тство тре́бующим,/ Небе́сное же бога́тство получи́л еси́, сла́вне Гле́бе, вопия́:/ не́сть свят, па́че Тебе́, Го́споди.
Прилепи́вся Зижди́телю любо́вию Боже́ственною,/ прия́л еси́ Небе́сное насле́дие/ и дре́ва животво́рнаго прича́стник бы́ти сподо́бился еси́, блаже́нне, поя́:/ не́сть свят, па́че Тебе́, Го́споди.
Богоро́дичен: А́нгелов Честне́йшая,/ Зижди́теля А́нгелов во утро́бе носи́ла еси́/ и родила́ еси́ неизрече́нно на избавле́ние челове́ком, пою́щим:/ не́сть, Пречи́стая, ра́зве Тебе́, Влады́чице.
Седа́лен, глас 4:
Бога́т сый, благи́ми дея́нии/ искуси́лся еси́, я́ко зла́то в пещи́, многотру́дными по́двиги, сла́вне Гле́бе,/ те́мже и по сме́рти источа́еши бога́тно чудеса́, я́ко во́ды, и неду́ги исцеля́еши,/ о нас при́сно моля́ся,/ да согреше́ний проще́ние прии́мем.
Сла́ва, и ны́не, Богоро́дичен:
Чи́стая, Всенепоро́чная и Неискусому́жная,/ я́же Еди́на Безле́тнаго Сы́на и Сло́ва Бо́жия в ле́то ро́ждши,/ Сего́ моли́ со святы́ми апо́столы и блаже́нным князе́м Гле́бом/ дарова́ти нам очище́ние и ве́лию ми́лость.
Песнь 4
Ирмо́с: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка,/ тем зову́ Ти: сла́ва си́ле Твое́й, Го́споди.
Уче́ния оте́ческая храня́ невреди́мо,/ правосла́вно мудрова́ние ты от младе́нства име́л еси́ и житие́ чи́стое/ и милосе́рд был еси́, досточу́дне.
Ни молва́ мирска́я, ни сла́ва кня́жеская, ни бога́тство вре́менное,/ твоего́ к Бо́гу устремле́ния угаси́, кня́же Гле́бе,/ но возлюби́л еси́ кре́пко богоуго́дныя по́двиги.
Возвыша́емь всегда́ Боже́ственными поуче́нии, врага́ смири́л еси́/ и исцеле́ний благода́ть прия́л еси́ от Го́спода, блаже́нне Гле́бе.
Богоро́дичен: Всепе́тая,/ во́инствы Го́рними пева́емаго Бо́га родила́ еси́,/ Челове́ка вои́стинну бы́вша,/ Его́же о рабе́х Твои́х моля́щи не преста́й, Присноде́во.
Песнь 5
Ирмо́с: Просвеще́ние во тьме́ лежа́щих, спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю.
Ра́ка моще́й твои́х, иска́пающи сла́дость бога́тных исцеле́ний,/ от ве́рою чту́щих тя, блаже́нне Гле́бе, стра́сти отгоня́ет/ и попаля́ет бесо́в вся полки́.
Ны́не на тебе́ чу́до ве́лие зри́тся и у́жаса испо́лнено:/ ка́ко по погребе́нии те́ло твое́, блаже́нне, мно́го лет во гро́бе лежа́щее,/ нетле́нно соблюде́ся промышле́нием Боже́ственным.
Сла́ва твоему́ к Бо́гу дерзнове́нию,/ сла́ва устремле́нию, е́же в се́рдцы твое́м к Нему́ име́л еси́:/ бла́го пожи́в, блаже́нне Гле́бе, просия́л еси́ пресла́вно Боже́ственными светлостьми́/ и возвесели́л еси́ ве́рных собо́ры.
Богоро́дичен: Нас ра́ди из Тебе́ Вопло́щшагося, Де́во Ма́ти, всегда́ моли́,/ благоче́стно Тя блажа́щим изба́витися бед, и душетле́нных страсте́й,/ и печа́лей, и ве́чнаго пла́мени муче́ния.
Песнь 6
Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.
По́двиги твоя́, блаже́нне, источа́ют чту́щим тя утеше́ние, и ра́дование,/ и исцеле́ния во хвалу́ Христа́ Бо́га на́шего.
В дому́ Бо́жии процве́л еси́/ и, я́ко виногра́д многопло́ден, доброде́телей гро́здие Домовлады́це прине́сл еси́.
Ца́рства Бо́жия возжеле́л еси́/ и, над страстьми́ воцари́вся, сла́вне Гле́бе,/ ра́дость пра́ведных получи́л еси́.
Богоро́дичен: Избра́нна Бо́гу бы́вши, я́ко прекра́сна,/ село́ простра́нное Сему́, Де́во, была́ еси́,/ и черто́г, и све́щник, и трапе́за.
Конда́к, глас 8:
Взбра́нному и кре́пкому в пра́ведницех,/ правосла́вною му́дростию сия́ющему вели́кому чудотво́рцу,/ благода́рственная воспису́ем ти, благове́рный кня́же Гле́бе:/ я́ко име́я дерзнове́ние у Престо́ла Христо́ва,/ ве́рою чту́щих тя, град и лю́ди сохраня́й моли́твами твои́ми:/ ты бо еси́ земли́ Росси́йския похвала́ и утвержде́ние.
И́кос:
Всечестну́ю па́мять почти́м уго́дника Христо́ва, благове́рнаго кня́зя Гле́ба,/ оте́ческою диади́мою от ю́ности укра́шена,/ и ра́достныя глаго́лы от се́рдца воззове́м к нему́, си́це вопию́ще:/ ра́дуйся, от ю́ности Бо́га возлюби́вый;/ ра́дуйся, благоче́стия столпе́, вра́жиими прило́ги непоколеби́мый./ Ра́дуйся, за́поведей Госпо́дних испо́лнителю усе́рдный;/ ра́дуйся, преда́ний оте́ческих храни́телю неосла́бный./ Ра́дуйся, сугу́бую сла́ву Небе́сную от Бо́га получи́вый:/ ра́дуйся, благода́ть исцеле́ний от Него́ прия́вый./ Ра́дуйся, ни́щих и си́рых пита́телю;/ ра́дуйся, лю́те боля́щих цели́телю./ Ра́дуйся, во́инству правосла́вному спобо́рниче;/ ра́дуйся, правосла́вных люде́й защи́тниче./ Ра́дуйся, Це́ркве Бо́жия сла́во;/ ра́дуйся, гра́да Влади́мира красото́./ Ра́дуйся, земли́ Росси́йския похвало́ и утвержде́ние.
Песнь 7
Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ е́сть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.
Си́лою Бо́жиею укрепле́н,/ пло́ти удержа́л еси́ стремле́ния/ и ум напра́вил еси́ к Небе́сным, поя́ в кре́пости:/ благослове́н еси́, Бо́же оте́ц на́ших.
Богоуго́дны нра́вы стяжа́л еси́, кня́же Гле́бе,/ в поуче́нии Богодухнове́нных писа́ний упражня́яся,/ еди́наго Го́спода все́ю душе́ю твое́ю возлюби́л еси́, блаже́нне.
Го́рняго Ца́рства, Вы́шняго гра́да, Бо́жия рая́,/ пра́ведных наслажде́ния, пи́щи нетле́нныя, бога́тства некра́домаго,/ Све́та невече́рняго сподо́бился еси́, блаже́нне Гле́бе.
Богоро́дичен: Его́же родила́ еси́, Влады́чице, при́сно моли́/ от рабо́ты страсте́м изба́вити мя, и от осужде́ния,/ и от стужа́ющаго ми лю́таго окамене́ния, Чи́стая Богора́дованная.
Песнь 8
Ирмо́с: Пе́щь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.
Па́мятуя при́сно Суд стра́шный,/ во умиле́нии се́рдца излива́л еси́ пото́ки слез,/ погаша́я те́ми пла́мень страсте́й, Гле́бе Богому́дре.
Душе́ю твое́ю возлюби́л еси́ Го́спода, му́дре Гле́бе,/ и Тому́ прилепи́лся еси́, вопия́:/ Христе́ мой, Ты мя изба́ви от смертоно́сных страсте́й во ве́ки.
Ра́зум име́я, Бо́гом просвеща́емый,/ испо́лнитель Влады́чных слове́с яви́лся еси́,/ десны́я возлюби́в стези́, шу́иих же уклоня́яся, я́ко мудр,/ те́мже тя почита́ем, Богому́дре, во ве́ки.
Богоро́дичен: Всех Соде́тель от крове́й Твои́х чи́стых зи́ждется/ и млеко́м пита́ется, пита́яй вся́кое дыха́ние, Де́во Богоро́дице,/ те́мже я́ко Бо́жию Ма́терь Тя велича́ем.
Песнь 9
Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.
Ви́дети вожделе́в сла́ву Бо́га на́шего,/ доброде́тельми себе́ украси́л еси́/ и, в Небе́сный черто́г вшед, со А́нгелы живе́ши/ и ясне́е наслажда́ешися Боговиде́ния.
Му́дростию и ра́зумом просвеща́емь,/ смире́нием се́рдца укра́шен и высото́ю жития́ сия́я,/ к Небе́сным прише́л еси́ оби́телем,/ иде́же нас помя́ни, почита́ющих тя, кня́же Гле́бе.
Па́мять пра́зднственную и благ всех хода́тайственную соверша́ем/ честна́го Твоего́ от земли́ преставле́ния:/ ты бо уго́дник Госпо́день и за́поведей Того́ де́латель/ яви́лся еси́ непосты́ден, досточу́дне Гле́бе.
Богоро́дичен: Ма́ти све́та яви́лася еси́, Влады́чице,/ те́мже молю́ Тя, Богоневе́сто:/ ду́шу мою́ све́том Сы́на Твоего́ озари́/ мольба́ми Гле́ба Богому́драго.
Свети́лен:
Боже́ственною благода́тию просвети́вся,/ и по сме́рти показа́л еси́ све́тлость жития́ твоего́,/ источа́еши бо всем благода́ть, притека́ющим к тебе́, всеблаже́нне Гле́бе,/ и мо́лиши спасти́ся чту́щим тя.
Сла́ва, и ны́не, Богоро́дичен:
В Тя всели́ся, Присноде́во Богоро́дице, Соде́тель и Госпо́дь всех/ и Еди́ному Триипоста́сному Божеству́ покланя́тися/ благочести́выми князьми́ в Росси́йстей земли́ лю́ди научи́ и просвети́.
На хвали́тех стихи́ры на 4, глас 8.
Подо́бен: О, пресла́внаго чудесе́:
Блаже́нне Богому́дре Гле́бе,/ чи́стая твоя́ душа́/ правове́рною му́дростию сия́ющи,/ блиста́ет доброде́телей све́тлостию,/ и озаря́ет ве́рных собра́ние,/ и бесо́вскую тьму́ отгоня́ет,/ те́мже я́ко насле́дника тя Небе́сныя сла́вы/ благоче́стно вси почита́ем, досточу́дне.
Име́я ду́шу ми́лостиву/ и се́рдце чи́стое,/ ве́ру небла́зненну и любо́вь нелицеме́рную,/ от земли́ преста́вился еси́ к Небе́сным/ и с ли́ки пра́ведных водворя́ешися,/ те́мже тя почита́ем свяще́нными пе́сньми/ и благоче́стно вси сла́вим,/ блаже́нне Гле́бе.
Боже́ственными уче́нии укрепля́яся,/ стра́сти плотски́я от души́ отгна́л еси́/ и Святы́я Тро́ицы селе́ние чи́сто был еси́,/ те́мже к Боже́ственному наслажде́нию отше́л еси́,/ честно́е же те́ло твое́ чуде́сне соблюде́ся/ Боже́ственным промышле́нием/ Прославля́ющаго тя,/ блаже́нне Гле́бе.
Сла́ва, глас то́йже:
Ра́дуйся, блаже́нне Гле́бе,/ гра́ду Влади́миру похвало́;/ ра́дуйся, земли́ Росси́йския засту́пниче./ Ра́дуйся, ве́рных огражде́ние;/ ра́дуйся, Це́ркве Бо́жия украше́ние./ Ра́дуйся, пра́вило ве́ры и благоче́стия;/ ра́дуйся, оби́тель Святы́я Тро́ицы,/ Ю́же моли́ о почита́ющих святу́ю па́мять твою́.
И ны́не, Богоро́дичен:
Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́ти ми ся к Тебе́. Апо́стол ко Евре́ем, зача́ло 326. Аллилу́ия, глас 4: Пра́ведник, я́ко финикс, процвете́т и, я́ко кедр, и́же в Лива́не, умно́жится. Стих: Насажде́ни в дому́ Госпо́дни во дво́рех Бо́га на́шего процвету́т. Ева́нгелие от Луки́, зача́ло 67. Прича́стен: В па́мять ве́чную:
