Служба в честь Собора Владимирских святых

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры на 8, глас 4:

Возсия́ дне́сь светле́е со́лнца всесла́вная па́мять ва́ша,/ Богоно́снии чудотво́рцы Влади́мирския земли́,/ дре́вним святы́м равностоя́телие/ и Це́ркве Росси́йския благоле́пное украше́ние,/ изря́днии в ско́рбех засту́пницы на́ши/ и спасе́ния те́плии хода́таи,/ я́ко дерзнове́ние иму́ще ко Спа́су всех и Го́споду,/ моли́теся о душа́х на́ших.

Пресла́вное житие́ ва́ше, доброде́тельми просвети́вшеся,/ чуде́с мно́гих просия́ светлостьми́/ и благосла́вны вас конце́м Росси́йския земли́ соде́ла,/ всеблаже́ннии первосвяти́телие Макси́ме, Пе́тре и Алекси́е,/ святы́х апо́столов единонра́внии,/ Богома́тере избра́ннаго гра́да святи́и иера́рси/ и чудотво́рцы достосла́внии.

Прииди́те, правосла́вных люде́й мно́жество,/ пе́сньми вдохнове́нными почти́м/ вели́кое созве́здие святы́х Росси́йских князе́й:/ Андре́я Боголю́бскаго, Гле́ба, Гео́ргия и Алекса́ндра Не́вскаго,/ усе́рдно к ним взыва́юще:/ ра́дуйтеся, страны́ на́шея ве́рное охране́ние,/ гра́да Влади́мира и хра́ма Пресвяты́я Богоро́дицы ди́вное украше́ние/ и всем христоимени́тым лю́дем ско́рое вспоможе́ние.

Су́здальския земли́ удобре́ние,/ Це́ркве Христо́вы сла́вное украше́ние,/ Богоно́сных иера́рхов Фео́дора, Иоа́нна, Диони́сия, Арсе́ния и Иларио́на,/ в чудесе́х велича́йших/ и просвети́вших во мра́це греха́ су́щая сердца́,/ благоче́стно, соше́дшеся, восхва́лим.

Ше́ствующе те́сным путе́м по́двига и́ноческаго жития́,/ преподо́бнии ученицы́ вели́каго а́ввы Се́ргия:/ Ни́коне, Стефа́не, Рома́не и Евфи́мие,/ ку́пно и Богоро́дицы изря́дный уго́дниче Космо́,/ равноа́нгельнаго жития́ дости́гли есте́./ Престо́лу предстоя́ще Живонача́льныя Тро́ицы,/ ми́лостива нам Влады́ку и Го́спода сотвори́те/ богоуго́дными ва́шими моли́твами.

Христоимени́тых люде́й мно́жество,/ ны́не сте́кшеся в па́мять ва́шу,/ те́плыя к вам обраща́ют моли́твы и сердца́,/ ча́юще предста́тельством ва́шим получи́ти грехо́в оставле́ние,/ вре́менное благоде́нствие и ве́чное спасе́ние,/ в доброде́тельном житии́ преспе́яние и благослове́ние,/ святи́и благове́рнии кня́зие Гле́бе, Константи́не, Михаи́ле и Фео́доре,/ Му́ромстии богоизбра́ннии просвети́телие и пресла́внии чудотво́рцы,/ дерзнове́ние иму́ще ко Го́споду сил,/ моли́теся, во е́же спасти́ся нам.

Прииди́те, де́вства и чистоты́ рачи́телие,/ согла́сно воспои́м дво́ицу преди́вных Су́здальских по́стниц:/ Евфроси́нию пресла́вную и Софи́ю Богому́друю,/ искуше́ния вселука́ваго о́наго дре́вняго зми́я му́жественно попра́вших,/ безсме́ртныя ду́ши своя́ доброде́телей еле́ем ума́стивших,/ а́нгельски на земли́ пожи́вших/ и в све́тлыя черто́ги Небе́снаго Жениха́ вше́дших.

Богому́дре святи́телю Си́моне,/ гра́да Влади́мира до́брый па́стырю,/ оби́тели преподо́бных Анто́ния и Феодо́сия вели́кий подви́жниче/ и списа́телю по́двигов Ки́ево-Пече́рских Богоно́сных отце́в,/ и ты, страстоте́рпче святы́й Авраа́мие,/ за ве́ру Христо́ву от единоплеме́нников тя́жкия му́ки прия́вый,/ вку́пе с преподо́бными Петро́м и Февро́ниею, князьми́ Му́ромскими,/ пра́ведною Иулиани́ею и блаже́нным Киприа́ном,/ всех нас помина́йте, творя́щих святу́ю па́мять ва́шу,/ и моли́те мно́гими чудесы́ просла́вльшаго вас Христа́ Бо́га/ пода́ти нам мир и спасти́ ду́ши на́ша.

Сла́ва, глас 6:

Воспои́м дне́сь всера́достное торжество́/ и благогла́сным язы́ком я́сно возопии́м:/ ра́дуйтеся, Влади́мирския земли́ светоза́рныя свети́ла;/ ра́дуйтеся, мона́хов преди́внии наста́вницы./ Ра́дуйтеся, мирски́х челове́к те́плии засту́пницы;/ ра́дуйтеся, заблу́ждших к све́ту богопозна́ния путево́ждие./ Ра́дуйтеся, земна́го оте́чества ва́шего све́тлое ра́дование.

И ны́не, Богоро́дичен: Кто Тебе́ не ублажи́т:

Вход и чте́ния три преподо́бническая.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очеса́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же суть в ми́ре./ Ибо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (главы 5 и 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́,/ внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

На лити́и стихи́ры, глас 3:

Влади́мирския земли́ свято́е прозябе́ние,/ просвеще́ннии благода́тию Единосу́щныя Тро́ицы/ и То́ю ду́ши на́ша просвети́вшии дне́сь,/ мно́гия грехи́ на́ша потреби́те,/ моля́щеся о спасе́нии душ на́ших.

Благи́ми и доброде́тельными нра́вы,/ а́ки на колесни́це, к Бо́гу, блаже́ннии, возше́дше/ и побе́дныя по́чести от Него́ прие́мше,/ и ны́не со Арха́нгелы и А́нгелы и все́ми святы́ми вчиня́етеся/ и благода́ть исцеле́ний всем источа́ете,/ те́мже вас блажи́м, прехва́льнии.

В Небе́сных селе́ниих водворя́ющеся,/ нас, земны́х, не оставля́ете/ и лучи́ благодея́ний ва́ших во вся концы́ простира́ете/ и ве́рных просвеща́ете благочести́вое собра́ние,/ помина́юще в моли́твах ва́ших вы́ну блажа́щих вас на земли́/ и ве́рою соверша́ющих святу́ю па́мять ва́шу.

Сла́ва, глас то́йже:

Све́тлостей духо́вных преиспо́лненнии,/ слепы́м подае́те свет и боля́щим исцеле́ния/ и всем, приходя́щим к вам с ве́рою, во благо́е вспомощству́ете./ За е́же вас любо́вию восхваля́юще,/ обрето́хом вы земли́ на́шея предста́тели и храни́тели.

И ны́не, Богоро́дичен:

Не умолчи́м никогда́, недосто́йнии мы, раби́ Твои́,/ Пресвята́я Богоро́дице,/ от време́н дре́вних явле́нныя в земли́ на́шей/ си́лы и чудеса́ Твоя́ воспева́ти./ А́ще бо не бы Ты, Блага́я, предстоя́ла,/ дерзнове́нно за ны Сы́на Твоего́ моля́щи,/ кто бы нас изба́вил от толи́ких бед и скорбе́й,/ кто же бы сохрани́л до ны́не свобо́дны?/ Не отсту́пим, Влады́чице, от Тебе́,/ с любо́вию песносло́вящих Тя спаса́еши при́сно от вся́ких лю́тых.

На стихо́вне стихи́ры, глас 4:

Блаже́н еси́, сла́вный гра́де Влади́мире,/ и свяще́нны вси преде́лы твоя́,/ стопа́ми Пресвяты́я Богоро́дицы освяще́нныя/ и по́двигами ве́ры Богоно́сных благоче́стия подви́жников издре́вле просла́вленныя./ И́хже всехва́льную па́мять соверша́юще,/ славосло́вим Христа́ Бо́га, ди́внаго во святы́х Свои́х,/ и мо́лимся спасти́ и просвети́ти ду́ши на́ша.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Весели́ся, святы́й до́ме Бо́жия Ма́тере,/ ра́дуйся, дре́вняя Влади́мирская земле́,/ име́ющи в себе́ сокро́вище многоце́нное,/ нетле́нныя и чудоточа́щия мо́щи/ святы́х, в по́двизех Правосла́вныя оте́ческия ве́ры зде просия́вших,/ и́же непреста́нно мо́лятся,/ во е́же спасти́ся душа́м на́шим.

Глас 2.

Стих: Пра́ведник, я́ко фи́никс, процвете́т/ и, я́ко кедр, и́же в Лива́не, умно́жится.

Ки́ими устна́ми возвели́чим/ богосве́тлый сонм чудотво́рцев и моли́твенников Влади́мирския земли́?/ В ми́ре сия́вших Ду́ха Бо́жия благода́тию,/ просвеща́юще вся концы́ оте́чества своего́,/ и по отше́ствии от земны́х непреста́нно моля́щих Христа́/ дарова́ти нам мир и ве́лию ми́лость.

Стих: Воззва́ша пра́веднии,/ и Госпо́дь услы́ша их.

Ки́ими словесы́ ублажи́м и воспои́м/ Богоно́снаго собо́ра Влади́мирских святы́х пресве́тлый лик,/ оста́вльших земна́я и после́довавших Христу́?/ И́же и увенча́ их венцы́ пресве́тлыми,/ име́яй ве́лию ми́лость.

Сла́ва, глас 6:

Боже́ственным исправле́нием после́дующе,/ земно́е по́прище ва́ше проше́дше,/ мо́лниями богоуго́днаго жития́ ва́шего/ всю зе́млю Влади́мирскую озари́ли есте́,/ благода́ти луча́ми тьмы́ нача́льника из нея́ дале́че отгна́в,/ и во мра́це греха́ су́щия ду́ши све́том ева́нгельским просвети́ли есте́./ Те́мже А́нгелом сожи́телие на ве́ки яви́лися есте́,/ Богоизбра́ннии моли́твенницы о душа́х на́ших.

И ны́не, Богоро́дичен: Творе́ц и Изба́витель мой, Пречи́стая:

Тропа́рь, глас 4:

Дне́сь све́тло красу́ется Пресвяты́я Богоро́дицы избра́нный град/ и с ним вси концы́ земли́ Влади́мирския торжеству́ют,/ па́мять соверша́юще богопросла́вленнаго вели́каго ли́ка святы́х,/ в по́двизех Правосла́вныя ве́ры издре́вле во уде́ле сем Бо́гу угоди́вших,/ и к ним с любо́вию вопию́т:/ о преди́внии Христу́ Бо́гу моли́твенницы,/ венцы́ пресве́тлыми от Него́ увенча́нныя,/ мир и благоде́нствие оте́честву ва́шему испроси́те/ и душа́м на́шим ве́лию ми́лость.

НА У́ТРЕНИ

На Бог Госпо́дь: тропа́рь пра́здника, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 2:

Ева́нгельскаго гла́са слу́шателие преизря́днии,/ взе́мше с любо́вию крест свой,/ неукло́нно после́довали есте́ Христу́ Бо́гу/ и, благода́тию Свята́го Ду́ха ум свой просвети́вше,/ многоразли́чными сия́ньми доброде́телей жития́ ва́шего земно́й уде́л ваш озари́ли есте́,/ вси святи́и Влади́мирския земли́,/ в пресве́тлых черто́зех Отца́ Небе́снаго со А́нгелы и дру́ги Бо́жиими ны́не водворя́етеся./ Тем в весе́лии духо́внем вопие́м:/ сла́ва Да́вшему вам кре́пость,/ сла́ва Венча́вшему вы,/ сла́ва Подаю́щему ва́ми всем исцеле́ния.

Сла́ва, и ны́не, Богоро́дичен:

Не и́мамы ины́я по́мощи и наде́жды,/ то́кмо Тебе́, Пречи́стая Ма́ти Бо́жия./ Ты бо Бо́га пло́тию породила́ еси́ челове́ком па́че сло́ва и ра́зума,/ И́мже спасе́ние ми́ру всему́ соде́яся/ и грехо́в дре́вних оставле́ние бы́сть./ Его́же моли́, Богоро́дице,/ со святы́ми, в земли́ Влади́мирстей просия́вшими,/ пода́ти нам мир и ве́лию ми́лость.

По 2-м стихосло́вии седа́лен, глас 5:

Возсия́ дне́сь светоно́сная па́мять ва́ша,/ пресла́внии Влади́мирския земли́ чудотво́рцы и покрови́телие,/ чуде́с луча́ми облиста́я с ве́рою к вам приходя́щих/ и те́плаго заступле́ния ва́шего усе́рдно прося́щих./ Те́мже, святы́я мо́щи и о́браз ваш благогове́йно лобыза́юще,/ просла́вльшаго вы Христа́ Бо́га на́шего ра́достно прославля́ем,/ прося́ще моли́твами ва́шими грехо́в оставле́ния и ве́лия ми́лости.

Сла́ва, и ны́не, Богоро́дичен:

Вели́чия Твоя́, Богоблагода́тная, кто испове́сть?/ Бо́га бо пло́тию родила́ еси́,/ ключи́ де́вства неруши́мы сохра́нши/ и чистото́ю богоприя́тнаго существа́ Твоего́ вся Небе́сныя си́лы превозше́дши./ Те́мже пе́сньми немо́лчными восхваля́ем Тя,/ Еди́на Благослове́нная.

По полиеле́и седа́лен, глас 1:

Я́ко пресве́тлыя лучи́ со́лнечныя,/ всю Влади́мирскую зе́млю осиява́ющия,/ показа́ вас, святи́и,/ Подвигополо́жник наш Христо́с Госпо́дь./ Те́мже, благода́тию Его́ поспешеству́еми,/ тьму́ страсте́й и бед отгоня́ете от приходя́щих к вам ве́рою и любо́вию вопию́щих:/ ра́дуйтеся, Влади́мирския земли́ удобре́ние/ и всем ве́рным ра́дование и утвержде́ние.

Степе́нна, 1-й антифо́н 4-го гла́са. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Ева́нгелие от Матфе́я, зача́ло 11.

По 50-м псалме́ стихи́ра, глас 6:

Прииди́те, христоимени́тых люде́й мно́жество,/ восхва́лим духоно́сный собо́р святы́х Влади́мирския земли́,/ ты́я бо, Тро́йческим све́том озаря́еми,/ огнезра́чному Престо́лу Бо́жию предстоя́т,/ по́честь прие́млюще трудо́м свои́м,/ и бла́гость Бо́жию со дерзнове́нием умоля́ют/ о всех, священноле́пно па́мять их творя́щих./ К ни́мже любо́вию возопии́м:/ ра́дуйтеся, ева́нгельских уче́ний изря́днии рачи́телие;/ ра́дуйтеся, Всесвята́го Ду́ха сосу́ди избра́ннии./ Ра́дуйтеся, Це́ркве на́шея ве́лие украше́ние;/ ра́дуйтеся, дерзнове́ннии о нас к Бо́гу моли́твенницы./ Ра́дуйтеся, Пресвяты́я Богоро́дицы усе́рднии служи́телие;/ ра́дуйтеся, А́нгелов собесе́дницы и челове́ков наста́вницы./ Ра́дуйтеся, не́мощей душе́вных и теле́сных благода́тнии целе́бницы;/ ра́дуйтеся, земна́го оте́чества ва́шего похвало́ и утвержде́ние.

Кано́н, глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ пе́снь Бо́гови воспева́юща.

Припе́в: Вси святи́и земли́ Влади́мирския, моли́те Бо́га о нас.

Я́ко Первозва́нный апо́стол Христо́в Андре́й/ Днепро́вския холмы́ при Ки́еве благослови́,/ прови́дя бу́дущую на них благода́ть и сла́ву Бо́жию,/ та́ко, тому́ подо́бяся/ и си́лою Бо́жиею преди́вный сонм вели́ких Правосла́вныя ве́ры свети́льников прови́дя,/ и ты, святы́м апо́столом равностоя́телю, на холме́х Кля́зьмы реки́ тезоимени́тый себе́ град заложи́л еси́,/ святы́й крести́телю Руси́, вели́кий кня́же Влади́мире.

Блаже́ннаго Макси́ма, первосвяти́теля Росси́йския земли́, досто́йно да восхва́лим,/ сей бо, повеле́нием Бо́жия Ма́тере, ему́ яви́вшейся, укрепи́вся,/ пребыва́ние Всеросси́йских Влады́к во град Влади́мир пренесе́./ В не́мже благоче́стно пожи́в/ и па́ству свою́ руко́ю кре́пкою и любвеоби́льною к ве́чному оте́честву упра́вив,/ на ве́ки в до́ме Пресвяты́я Богоро́дицы упоко́ися./ С Не́юже на Небесе́х ны́не светоза́рному Престо́лу Бо́жию предстоя́,/ усе́рдно мо́лит спасти́ и просвети́ти ду́ши на́ша.

Храм Ду́ха Всесвята́го яви́лся еси́, стопа́м после́дуя блаже́ннаго святи́теля Макси́ма,/ преди́вный первоиера́рше, о́тче наш Пе́тре,/ град Влади́мир непреста́нными моли́твами и священноде́йствиями твои́ми облагоуха́л еси́./ Те́мже и ны́не хода́тайством твои́м, свя́те,/ душе́вныя и теле́сныя боле́зни на́ша исцели́,/ град и храм сей до́бре сохрани́/ и всепроще́ние грехо́в на́ших у Бо́га испроси́.

Во епи́скопа гра́да Влади́мира поста́вленный и сия́нием доброде́телей христиа́нских всеукраше́нный,/ му́жественный защи́тник Це́ркве и земли́ Росси́йския яви́лся еси́, святи́телю о́тче наш Алекси́е./ Богоуго́дное житие́ твое́ во сто́льном гра́де Москве́ сконча́в,/ в со́нме святы́х Росси́йских Первосвяти́телей на Небесе́х от Бо́га просла́влен еси́,/ с ни́ми же моли́ся Христу́, всеблаже́нне, спасти́ся ве́рою и любо́вию чту́щим тя.

Богоро́дичен: Первопи́санный апо́столом Луко́ю о́браз Твой, Пречи́стая Богоро́дице,/ чрез мно́гия века́ во Влади́мир град предпосла́ла еси́,/ его́же оте́честву на́шему – в благослове́ние,/ Це́ркви Ру́сской – во утвержде́ние,/ святи́телем – в покро́в/ и всем лю́дем – во отра́ду и утеше́ние дарова́ла еси́./ Пред ни́мже коле́на се́рдца на́шего склоня́юще,/ Тебе́, я́ко живе́й с на́ми су́щей, взыва́ем:/ Его́же на руку́ Свое́ю носи́ла еси́ и млеко́м пита́ла еси́,/ непреста́нно моли́ сохрани́ти град и храм Твой невреди́мы, Богопросла́вленная.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Ра́дуйся, дне́сь Пресвяты́я Богоро́дицы сосу́д избра́н, всече́стне кня́же Андре́е!/ Повеле́нием Богома́тере град Влади́мир пресла́вне возвели́чивший/ и мно́гия хра́мы и оби́тели во сла́ву всесвята́го и́мене Пречи́стыя Де́вы/ в преде́лех Влади́мирских устро́ивый,/ за ве́лию любо́вь твою́ к Бо́гу и наро́ду правосла́вному/ Боголюби́вым от всех наименова́нный,/ сме́ртныя му́ки от рук бли́зких прия́вый,/ я́ко но́вый страстоте́рпец в ли́це святы́х бра́тий му́чеников Бори́са и Гле́ба у Престо́ла Бо́жия предста́вый./ С ни́ми же ку́пно моли́ся, благове́рне, оте́чество твое́ безвре́дно сохрани́ти,/ град и храм сей утверди́ти и спасти́ ду́ши на́ша.

Отроча́ еще́ сый во́зрастом,/ ве́тхаго совле́клся еси́ челове́ка,/ в но́ваго, по Бо́зе созда́ннаго, усе́рдно обле́клся еси́./ Мирску́ю красоту́ оста́вив, впери́лся еси́, я́ко орля́, в ве́чную жи́знь,/ победи́в пло́ть свою́ безстра́стием,/ пре́жде не́же жи́ва страсте́м бя́ше./ Те́мже во ю́ности во́зраста своего́ ко Го́споду отхо́диши/ и ди́вным нетле́нием мироточа́щаго телесе́ твоего́ от Него́ прославля́ешися./ Защи́тниче Влади́мирския земли́ и всем чту́щим тя изря́дный покрови́телю, святы́й благове́рный кня́же Гле́бе,/ моли́ Христа́ Бо́га, во е́же спасти́ся нам.

Правосла́вныя ве́ры пра́вило,/ доброде́телей христиа́нских зерца́ло,/ наро́да своего́ оте́ц чадолюби́вый,/ по глаго́лу ева́нгельскому ду́шу свою́ на по́ле бра́ни с нечести́выми тата́ры/ за лю́ди своя́ и оте́чество положи́л еси́,/ святы́й благове́рный вели́кий кня́же Гео́ргие!/ Зна́мением Бо́жиим, на тебе́ яви́вшимся, чуде́сно просла́вленный,/ я́ко усече́нная глава́ твоя́ по сме́рти прильпе́ к телеси́ твоему́,/ с ним же до дне́сь нетле́нно почива́ет, источа́я приходя́щим к ра́це твое́й то́ки чуде́с,/ те́мже, вси ве́рнии, любо́вию тя, свя́те, ублажа́ем.

Богоглаго́ливаго святи́теля Си́мона, гра́ду Влади́миру чадолюби́ваго архиере́я,/ свято́му кня́зю и страстоте́рпцу Гео́ргию, дру́гу Бо́жию, при́снаго дру́га и учи́теля,/ досто́йно да восхва́лим дне́сь, ве́рнии./ Той бо, я́ко со́лнце пресве́тлое, от Ки́ево-Пече́рския Ла́вры Пресвяты́я Богоро́дицы/ в се́верней столи́це возсия́л е́сть,/ благовеству́я по́двиги равноа́нгельных Богоно́сных отце́в./ И́хже житию́ усе́рдно подража́в,/ я́ко земны́й А́нгел и Небе́сный челове́к, па́ству свою́ словесы́ благопло́дными и житие́м непоро́чным услади́л е́сть./ Ны́не же душе́ю на Небесе́х ликовству́я,/ те́лом же нетле́нным с преподо́бными отцы́ в Ки́евских пеще́рах почива́я,/ мно́гая источа́ет чудеса́ и мо́лится Го́споду дарова́ти нам мир и ве́лию ми́лость.

Богоро́дичен: Ра́дуйся, Небе́сная Цари́це,/ а́нгельское непрестаю́щее удивле́ние и челове́ческаго ро́да неумолка́емая сла́во,/ зе́млю Влади́мирскую освяти́вшая пречи́стыми стопа́ми Твои́ми/ во явле́нии благове́рному боголюби́вому кня́зю Андре́ю./ О сем ны́не веселя́щеся и ра́дующеся, мо́лим Ти ся приле́жно:/ всемо́щным хода́тайством Твои́м у Сы́на и Бо́га Твоего́ мир ми́рови испроси́,/ земли́ плодо́в изоби́лие, па́стырем святы́ню/ и всему́ челове́чу ро́ду спасе́ние.

Седа́лен, глас 1:

Я́ко зве́зды многосве́тлыя Не́ба церко́внаго,/ вси вас почита́ем, святи́и вси Влади́мирския земли́,/ по́двигов добропобе́дных сия́нием и чуде́с заря́ми гра́ды и ве́си кра́я на́шего просвети́вшии./ Вы бо Боже́ственныя све́тлости яви́лися есте́ прича́стницы/ и блаже́нныя ве́чныя жи́зни показа́лися есте́ насле́дницы./ Те́мже всера́достную па́мять ва́шу соверша́юще, ве́рно вопие́м:/ Спа́су Христу́ усе́рдно моли́теся грехо́в оставле́ние пода́ти/ чту́щим вы, препросла́вленнии.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мое́ Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Я́ко светле́йшая звезда́ во тьме́ язы́ческаго злове́рия возсия́л еси́,/ святы́й добропобе́дный му́чениче Авраа́мие!/ Све́том и́стиннаго богопозна́ния озаря́я единоплеме́нный ти наро́д во́лжских булга́р,/ от ни́хже и усече́ние у́дов и главы́ твоея́, ра́дуяся, Христа́ ра́ди, претерпе́в,/ тече́нием кро́ве дре́вняго фарао́на – отца́ лжи, потопи́л еси́,/ честны́ми же мощми́ твои́ми, во град Влади́мир благове́рным кня́зем Гео́ргием принесе́нными,/ источа́еши исцеле́ния ве́рою к тебе́ приходя́щим/ и страда́льческия по́двиги твоя́ честву́ющим.

Всея́ Росси́и ве́лие украше́ние,/ Влади́мира гра́да всечестна́я похвало́ был еси́,/ препросла́вленне преподо́бне вели́кий кня́же Алекса́ндре!/ Ева́нгелия Христо́ва во всем житии́ твое́м яви́лся еси́ ре́вностный испо́лнителю:/ а́лчущим – корми́тель, стра́нным и прише́льцем – покрови́тель,/ боля́щим – скоропослу́шный врач, бе́дствующим – всеси́льный помо́щник,/ оте́честву твоему́ – богодарова́нный защи́тник,/ Це́ркве Ру́сския – изря́дный попечи́тель./ Земно́е житие́ свое́ во и́ночестве богоуго́дно сконча́в,/ пресла́вными чудесы́ от Подвигополо́жника Христа́ Бо́га просла́влен еси́./ Ему́же, со сро́дники твои́ми на Небесе́х ны́не предстоя́,/ непреста́нно моли́ ча́дом Це́ркве Ру́сския спасти́ся.

Во пресла́вном гра́де Влади́мире от свята́го ко́рене благове́рнаго Алекса́ндра,/ я́ко благопло́днейшая ве́твь, прозя́бл еси́, преподо́бне кня́же Дании́ле./ Доброде́тельному житию́ Бо́гом просла́вленнаго отца́ своего́ всеусе́рдно подража́я,/ яви́лся еси́ во гра́де Москве́ ни́щих пита́тель,/ вдов и безма́терних сиро́т засту́пник,/ скорбя́щим уте́шитель и всем христиа́ном ми́лостивый и ско́рый помо́щник./ Сего́ ра́ди избра́н сосу́д Ду́ха Всесвята́го в Це́ркви Христо́вой позна́лся еси́./ На Небесе́х с роди́телем твои́м Престо́лу Бо́жию предстоя́,/ испроси́ оте́честву на́шему мир и ве́лию ми́лость.

Из пресла́внаго о́тчаго Влади́мира гра́да во окре́стныя края́ пресели́вшиися,/ я́ко зве́зды пресве́тлыя, сия́ющия све́том Ева́нгельския благода́ти, ты́я озари́ли есте́:/ Михаи́ле кня́же, утвержде́ние и похвало́ Тверски́я страны́,/ и Пахо́мие преподо́бне, моли́твенниче и печа́льниче Волого́дския земли́./ Ны́не же со все́ми святы́ми оте́ческаго гра́да ва́шего Престо́лу Бо́жию предстоя́ще,/ сотвори́те моли́тву о всех, любо́вию чту́щих вас.

Богоро́дичен: К чудотво́рному о́бразу Твоему́, Боголюби́вая Ма́ти, усе́рдно притека́ем,/ Богоро́дицу вои́стинну и Присноде́ву правосла́вно испове́дующе Тя, Пречи́стая./ На всеси́льное предста́тельство Твое́ пред Сыно́м и Бо́гом упова́ем и любо́вию вопие́м Ти:/ ра́дуйся, Боголюби́вая Цари́це Богоро́дице, Наде́ждо и Прибе́жище на́ше!

Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя е́сть чужда́я тьма́, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Дре́вняго гра́да Су́здаля пе́рвый святи́телю был еси́, Богодарова́нне Фео́доре,/ се́мя сло́ва Ева́нгельскаго се́явый неуста́нно./ Благода́тию Христо́вою, в тебе́ оби́льно яви́вшеюся,/ пресла́вная чудеса́ во сла́ву Бо́жию соде́лал еси́./ По отше́ствии же твое́м в Го́рняя,/ я́ко сосу́д по́лный и преизлива́ющийся, нам мо́щи твоя́ святы́я оста́вил еси́./ От ни́хже врачевство́ и утеше́ние оби́льно че́рплюще, прославля́ем Просла́вльшаго Тя,/ Его́же моли́ спасти́ся душа́м на́шим.

Я́ко благода́ти Боже́ственнаго Ду́ха сосу́д красе́н,/ поста́влен был еси́ верху́ па́ствы сла́внаго Су́здаля гра́да, Богому́дре Иоа́нне святи́телю,/ немощны́м врач безме́здный и бе́дным защи́титель преизря́дный быв,/ А́нгельскаго сослуже́ния во святу́ю Литурги́ю сподо́бивыйся/ и Небе́сныя сла́вы насле́дник яви́выйся,/ моли́ся со А́нгелы и все́ми святы́ми спасти́ся нам, па́стырю наш предо́брый.

Ки́ево-Пече́рския Ла́вры о́трасль духоно́сная быв, преподо́бне о́тче святи́телю Диони́сие,/ но́вую Пече́рскую оби́тель на круты́х нижегоро́дских брега́х устро́ил еси́./ Из нея́же Су́здальскую ка́федру по́двигами поста́, моли́твы и оби́льныя ми́лостыни украси́л еси́./ За премно́гую любо́вь твою́ к Це́ркви Христо́вой/ избра́нием Вселе́нскаго Патриа́рха Ни́ла, Ду́ху Свято́му соде́йствующу,/ в Константинопо́ли гра́де Митрополи́том Всеросси́йским поста́влен был еси́./ Во оте́чествии же свое́м заточе́ние и поруга́ние Христа́ ра́ди сла́дце претерпе́в,/ по успе́нии твое́м во Анто́ниевой пеще́ре нетле́нными мощми́ почива́еши./ С ни́мже, преподо́бных отце́в нача́льником,/ моли́ся о ча́дех твои́х, святи́телю Диони́сие, преподо́бне чудотво́рче.

Благоче́стия столп непоколеби́мый яви́лся еси́, святи́телю о́тче наш Арсе́ние,/ све́том доброде́телей твои́х осия́вый Су́здальский уде́л./ Ны́не же в селе́ниих пра́ведных водворя́яся,/ я́ко но́вая звезда́, Не́бо церко́вное украша́я, просия́л еси́./ Моли́ся Го́сподеви сыново́м росси́йским спасти́ся,/ священноле́пно чту́щим святу́ю па́мять твою́.

Богоро́дичен: В досточу́дном явле́нии Твое́м, Пресвята́я Влады́чице Богоро́дице,/ святи́телю Всеросси́йскому блаже́нному Макси́му бы́вшему,/ град Влади́мир Свои́м Себе́ наименова́ла еси́./ Сего́ ра́ди все упова́ние и наде́жду на Тя, Пречи́стая, возложи́вше, мо́лим Ти ся приле́жно:/ моли́ся Преве́чному Архиере́ю, Сы́ну Твоему́,/ да непоколеби́му утверди́т Це́рковь Правосла́вную,/ град наш Влади́мир и всю о́бласть его́ в ми́ре сохрани́т/ и спасе́т ду́ши на́ша, я́ко Милосе́рд.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Пресвяты́я Богоро́дицы усе́рдный служи́телю/ и прети́хий собесе́дниче был еси́, досточу́дне Иларио́не святи́телю./ Име́я кре́пкую ве́ру к чудотво́рней Ея́ Влади́мирстей ико́не,/ во сла́ву Всесвяты́я Де́вы Богома́тере оби́тель ди́вную устро́ил еси́/ и во о́ную мно́жество и́ноков во спасе́ние собра́л еси́,/ по́мощию Богоро́дицы от разбо́йник, огне́м пали́вших тя, невреди́мо сохране́нный/ и по отше́ствии мно́гим чудоде́йствием от Бо́га просла́вленный./ Те́мже и нас Ма́терь Бо́жию досто́йно чти́ти научи́/ и Ца́рствие Небе́сное нам испроси́, Богому́дре.

Рачи́тель Госпо́день измла́да быв, Богоно́се о́тче Евфи́мие,/ руко́ю блаже́ннаго святи́теля Диони́сия во а́нгельский о́браз священноле́пно облече́н был еси́./ Ору́жие Креста́ Госпо́дня на ра́ме восприи́м,/ благоче́стно в ми́ре сем пожи́л еси́,/ утвержда́я де́лом, сло́вом назида́ния и моли́твою усе́рдною чад свои́х./ Научи́ и нас терпе́нием стяжа́ти ду́ши на́ша,/ Су́здальския земли́ похвало́ и преподо́бных отце́в удобре́ние.

Су́здаль град и вся Влади́мирская страна́ те́плыя к вам обраща́ют моли́твы и сердца́,/ ди́вная дво́ице Христо́вых благослове́нных неве́ст,/ преподо́бныя Евфроси́ние и Софи́е!/ Вме́сто бога́тства нищету́ и́ноческаго жития́ избра́ли есте́/ и вме́сто сласте́й всесоверше́нное воздержа́ние возлюби́ли есте́./ Теле́сную ле́поту по́стническими труды́ украси́в,/ в черто́ги Небе́снаго Жениха́ ра́достно всели́лися есте́,/ приле́жно Ему́ моля́щеся, дарова́ти нам грехо́в проще́ние и ве́лию ми́лость.

Юро́дствуяй Христа́ ра́ди, Киприа́не блаже́нне,/ а́ки безпло́тен, на земли́ пожи́л еси́,/ за оби́дящих тя усе́рдно Го́сподеви моля́ся./ Те́мже безсме́ртную ду́шу твою́ в блаже́нную ве́чность упра́вив,/ с Небе́сными си́лами ны́не водворя́ешися, вы́ну зря неизглаго́ланную сла́ву Бо́жию./ За ны моли́ся, свя́те, любо́вию творя́щих па́мять твою́.

Подвиго́м ве́ры и благоче́стия преподо́бныя су́здальския подви́жницы Евфроси́нии изде́тска подража́ющи,/ яви́лася еси́, благове́рная княги́не Евдоки́е, на Москве́,/ я́ко зерца́ло святы́я Правосла́вныя ве́ры оте́ческия./ Небе́сных челове́ков, при жи́зни твое́й подвиза́вшихся,/ святы́х Алекси́я митрополи́та, Се́ргия Ра́донежскаго и Дими́трия Прилу́цкаго,/ яви́лася еси́ при́сная собесе́дница и до́брая учени́ца./ Сего́ ра́ди да́ром чудотворе́ния и скорбе́й утеше́ния от Бо́га просла́вленная,/ я́ко чи́стая голуби́ца в и́ночестве к Престо́лу Его́ отлете́ла еси́,/ Ему́же, со дерзнове́нием предстоя́щи, моли́ся за ны,/ Су́здаля гра́да о́трасль благопло́дная/ и гра́да Москвы́ всесла́вное украше́ние,/ преподо́бная ма́ти Евфроси́ние-Евдоки́е!

Богоро́дичен: Во пречестне́м успе́нии Твое́м, Влады́чице, ми́ра до́льняго не оста́вила еси́./ Отше́дши те́лом в Небе́сная,/ пребыва́еши с на́ми мно́гими, от Тебе́ чуде́сно просла́вленными, ико́нами,/ от ни́хже благода́ть исцеле́ний и ми́лостей оби́льно че́рплюще,/ мо́лим Ти ся приле́жно:/ Небе́сныя жи́зни вся покажи́ прича́стники/ хода́тайством Твои́м, в моли́твах Неусыпа́ющая!

Конда́к, глас 4:

Я́ко зве́зды пресве́тлыя Це́ркве Росси́йския,/ испове́данием Правосла́вныя ве́ры в той возсия́вшии,/ вси святи́и земли́ Влади́мирския:/ Богому́дрии святи́телие и благове́рнии кня́зи,/ преподо́бнии отцы́ и ма́тери,/ страстоте́рпцы и пра́ведницы,/ Христу́ Бо́гу усе́рдно моли́теся,/ грехо́в оставле́ние дарова́ти/ любо́вию чту́щим святу́ю па́мять ва́шу.

И́кос:

Красне́йшее соцве́тие, святи́и,/ в до́му Бо́жии процвели́ есте́ по́двигами ве́ры и благоче́стия,/ изря́днейшия плоды́ принесли́ есте́ доброде́телей,/ и́миже украша́ющеся, мно́гими чудесы́ земно́е оте́чество ва́ше обогати́ли есте́./ Сего́ ра́ди любо́вию воспева́ем вам:/ ра́дуйтеся, Небе́снаго оте́чества святи́и гра́ждане;/ ра́дуйтеся, А́нгелов собесе́дницы и святы́м сожи́телие./ Ра́дуйтеся, ди́вныя зве́зды, Не́бо церко́вное украша́ющия;/ ра́дуйтеся, благослове́нных градо́в Влади́мира, Су́здаля и Му́рома свети́льницы многосве́тлии и сокро́вище благода́тное./ Ра́дуйтеся, предста́телие на́ши пред Бо́гом усе́рднии,/ хода́тайством свои́м проше́ния на́ша предваря́ющии;/ ра́дуйтеся, во всех обстоя́ниих на́ших ско́рии помо́щницы./ Ра́дуйтеся, вси святи́и Влади́мирския земли́,/ земна́го оте́чества ва́шего похвало́ и утвержде́ние!

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.

Благочести́ваго ко́рене равноапо́стольнаго Влади́мира прозябе́ние свято́е был еси́, Богому́дре кня́же Гле́бе./ Му́рому гра́ду, во тьме́ язы́чества пребыва́вшему,/ све́та ева́нгельскаго пе́рвый провозве́стниче яви́лся еси́,/ по страда́нии же твое́м наипа́че к Бо́гу прибли́зился еси́,/ Его́же моли́, страстоте́рпче святы́й, град твой в ми́ре сохрани́ти/ и спасти́ правосла́вно чту́щия тя.

Благове́рнаго Гле́ба сро́дницы богопросла́вленнии,/ святи́и кня́зи Константи́не, Михаи́ле и Фео́доре,/ ду́ху апо́стольства му́ченически пострада́вшаго сро́дника ва́шего возревнова́вши/ и по́мощию Небесе́ и земли́ Цари́цы/ му́ромских жи́телей ко свято́му Креще́нию приве́дшии,/ моли́твами ва́шими све́том Ева́нгелия просвети́те ду́ши на́ша/ и к любви́ Го́рней наста́вите нас,/ ве́рою почита́ющих вас, досточу́днии.

Му́рома гра́да изря́дный попечи́тель яви́лся еси́, ди́вный святи́телю о́тче Васи́лие!/ Непра́ведное изгна́ние му́жественно претерпева́я,/ незло́бием твои́м святы́м просвети́телем гра́да сего́–/ благове́рным Гле́бу, Константи́ну с Богому́дрыми ча́ды его́ Михаи́лом и Фео́дором, подража́л еси́./ Те́мже от чудотво́рныя ико́ны Богома́тере я́ве,/ я́ко непоро́чный а́гнец, пред безу́мно облича́вшими тя яви́лся еси́,/ проти́ву тече́ния вод на ма́нтии твое́й побе́дное ше́ствие со святы́м о́бразом Пречи́стыя Де́вы соверша́я./ С Не́юже усе́рдно моли́ся Христу́ грехо́в оставле́ние нам дарова́ти,/ ве́рою чту́щим тя, преблаже́нне.

Благода́тию свята́го Креще́ния просвеще́нный/ и благове́рие святы́х Му́ромских просвети́телей унасле́дивый,/ взыску́я по́стническаго и́ноческаго жития́,/ во святу́ю оби́тель Пресвяты́я Богоро́дицы ко преподо́бным Анто́нию и Феодо́сию прише́л еси́,/ Богоно́се о́тче Илие́, Му́ромская похвало́!/ И́хже спаси́тельная веле́ния исполня́я,/ дости́гл еси́ све́тлых оби́телей ра́йских,/ иде́же со А́нгелы и все́ми святы́ми Бо́гу предстоя́,/ моли́ся за град твой и правосла́вныя лю́ди,/ любо́вию чту́щия тя, приснопа́мятне.

Богоро́дичен: Се́рдцем сокруше́нным припа́даем, Всепе́тая Богопросла́вленная Ма́ти,/ ко пресла́вному изображе́нию ли́ка Твоего́,/ от вре́мене святы́х просвети́телей благове́рных Константи́на и чад его́ Михаи́ла и Фео́дора/ мно́гим чудоде́йствием в Му́роме гра́де от Тебе́ ди́вно просла́вленному./ И Тя, до́брую Помо́щницу ве́дуще, усе́рдно мо́лим:/ Его́же на рука́х Твои́х ма́терски носи́ла еси́,/ приле́жно моли́, да пода́ст нам проще́ние согреше́ний на́ших/ и све́тлыя две́ри ра́йския отве́рзет нам/ всемо́щным предста́тельством Твои́м, Богома́ти!

Песнь 8

Ирмо́с: Седмери́цею пе́щь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Благосла́внаго гра́да Му́рома архипа́стырю всеблагогове́йнейший, Богому́дре о́тче наш Ио́но,/ избра́нием Освяще́ннаго Собо́ра Всеросси́йскаго на высо́кий степе́нь первопресто́льников Правосла́вныя Руси́ возведе́нный,/ святи́телем украше́ние и всем христиа́ном те́плый к Бо́гу предста́тель яви́лся еси́./ Не преста́й моля́ся о па́стве твое́й,/ священноле́пно па́мять твою́, достохва́льне, соверша́ющей.

Ди́вная супру́гов дво́ица да просла́вится дне́сь:/ святи́и благове́рнии Петр и Февро́ния,/ Му́рома гра́да ве́лие украше́ние и всем христиа́ном ско́рии помо́щницы,/ неду́гов на́ших целе́бницы и скорбе́й уте́шители./ Сою́зом любве́ во о́браз Христа́ и Це́ркве Его́, по глаго́лу апо́стола, соедине́ннии,/ равноа́нгельно на земли́ пожи́ли есте́/ и, с Безпло́тными си́лами на Небесе́х ны́не пребыва́юще,/ мо́лятся о всех нас, благоче́стно святу́ю па́мять их соверша́ющих.

Му́ромскаго кра́я всесве́тлое украше́ние яви́лася еси́,/ свята́я пра́ведная Иулиани́е, Ла́заревская похвало́!/ В супру́жестве благоче́стно живу́щи,/ возлюби́ла еси́ поста́ воздержа́ние и ночны́х моли́тв бде́ние./ Си́рым была́ еси́ не́жная ма́терь,/ ни́щим – пита́тельница, в боле́знех су́щим – ско́рая помо́щница./ Сего́ ра́ди наставле́ния Богома́тере и посеще́ния святи́теля Никола́я удосто́ившаяся,/ к трудо́м воздержа́ния труды́ милосе́рдия усе́рдно прилага́ла еси́./ По отше́ствии же твое́м мно́гими чудесы́ от мироточа́щих моще́й твои́х от Бо́га прославля́ешися./ Те́мже, соше́дшеся дне́сь, благохва́лим тя, препросла́вленная.

Благоче́стия дре́вния Влади́мирския земли́ восприе́мниче,/ оби́тели Пресвяты́я Богоро́дицы на Яхроме́ реце́ Богому́дрый игу́мене/ и преподо́бнаго Космы́ смире́нный послу́шниче,/ на све́щнице высо́цем и превознесе́ннем в Це́ркви Христо́вой поста́влен был еси́, святи́телю о́тче Митрофа́не!/ Уче́ньми и ми́лостию твое́ю, я́ко второ́е со́лнце, па́стве Воро́нежстей возсия́л еси́./ Сего́ ра́ди Подвигополо́жник наш Христо́с Госпо́дь обогати́ тя мно́гими чудесы́,/ Ему́же усе́рдно моли́ся спасти́ся душа́м на́шим.

Богоро́дичен: Из Тебе́, Пречи́стая, Всесоверше́нный неизрече́нно младе́нствует/ и а́нгельския чи́ны и челове́ческий род подвиза́ет славосло́вити Тя,/ Честне́йшую Херуви́м и Сла́внейшую без сравне́ния Серафи́м./ Те́мже све́том рождества́ Твоего́, Богопросла́вленная,/ просвети́ ду́ши на́ша,/ святы́х Влади́мирския земли́ те́плыя моли́твы прие́млющи.

Песнь 9

Ирмо́с: Ужасе́ся о сем Не́бо/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бы́сть простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют.

Ю́рьева гра́да всехва́льное прозябе́ние был еси́, преподо́бне Ни́коне приснопа́мятне!/ От ю́ности Бо́га возлюби́вый и к Нему́ все жела́ние свое́ устреми́вый,/ прише́л еси́ во оби́тель Живонача́льныя Тро́ицы в послуша́ние к вели́кому Богоно́сному а́вве Се́ргию./ Его́же подвиго́м сотаи́нник и свиде́тель ближа́йший быв,/ насле́довал еси́ учи́телю своему́ на земли́ во игу́менстве и на Небеси́ во сла́ве,/ с ни́мже Триеди́ному Бо́гу в ли́це святы́х предстоя́,/ моли́ся и нам ра́дости сея́ сопричасти́тися.

Я́ко зла́то в горни́ле, искуси́лся еси́,/ в Ма́хрищской пусты́ни живя́, преподо́бне Стефа́не, равноа́нгельне!/ Богоно́сному Се́ргию, во изгна́нии от бра́тии су́щему,/ бра́тскую любо́вь и авраа́мово гостеприи́мство яви́вый,/ всем же, приходя́щим к тебе́, к Го́рнему Оте́честву до́брый и ве́рный путево́ждь бы́вый,/ дости́гл еси́ угото́ваннаго тебе́ Небе́снаго всеблаже́ннаго пребыва́ния,/ венце́м неувяда́емыя сла́вы оде́янный./ Ея́же и нас моли́твами твои́ми сподо́би, приле́жно мо́лим тя, преподо́бне.

Еди́наго Всеблага́го Бо́га во уме́ и се́рдце свое́м име́я, Рома́не преподо́бне,/ учени́к возлю́блен Богоблаже́ннаго а́ввы Се́ргия вели́каго был еси́./ Его́же избра́нием ра́ди мно́гих доброде́телей твои́х свяще́нства да́ра от рук Богому́драго святи́теля Алекси́я сподо́бився,/ па́стырем устро́енныя учи́телем твои́м на Киржаче́ реце́ оби́тели поста́влен был еси́./ В не́йже трудолю́бно пожи́в,/ во оби́тели Отца́ Небе́снаго всели́лся еси́,/ Его́же моли́, Рома́не преподо́бне, спасти́ся душа́м на́шим.

Повеле́нию Пресвяты́я Богоро́дицы/ от яви́вшейся тебе́ на Я́хроме реце́ светоза́рныя ико́ны благогове́йно вне́мля,/ в ю́ности во́зраста твоего́ уразуме́л еси́ глаго́лы жи́зни ве́чныя./ Сего́ ра́ди, на ме́сте явле́ния чудотво́рныя ико́ны Богома́тере/ богоуго́дное житие́ во а́нгельстем о́бразе смире́нно проводя́,/ по отше́ствии от земны́х ра́дости пра́ведных в наслажде́нии благ ве́чных сподо́бился еси́./ Дар неду́ги теле́сныя исцеля́ти и многоболе́зненныя стра́сти душе́вныя врачева́ти от Бо́га прия́в,/ исцели́ боле́зни на́ша, Космо́, преподо́бне о́тче наш.

Богоро́дичен: Исто́чник исцеле́ний и чудоде́йственныя благода́ти,/ о Преблага́я Влады́чице Богоро́дице,/ от светоза́рныя и цельбоно́сныя ико́ны Твоея́ преподо́бному Косме́ на Я́хроме реце́ яви́лася еси́,/ те́мже и нам, с ве́рою и любо́вию к той приходя́щим,/ теле́сное здра́вие и душ спасе́ние испроси́,/ разуме́ти глаго́лы жи́зни ве́чныя научи́/ и ра́дости святы́х в наслажде́нии благ ве́чных сподо́би./ Да Тобо́ю, о Всесвята́я Де́во, сохраня́еми,/ улучи́м у Христа́ Бо́га ве́лию ми́лость.

Свети́лен, глас 2:

Тро́ице Живонача́льней за ны, святи́и, сотвори́те моли́тву,/ да в де́нь воздая́ния Своего́ пра́веднаго/ десна́го стоя́ния сподо́бит нас/ и ве́чныя ра́дости избра́нных Свои́х прича́стники сотвори́т/ всех, любо́вию восхваля́ющих вас,/ Влади́мирския земли́ всехва́льное прозябе́ние.

Сла́ва, и ны́не, глас то́йже, Богоро́дичен:

Арха́нгельский глас любо́вию вопие́м Ти, Влады́чице Пречи́стая:/ ра́дуйся, Благода́тная;/ ра́дуйся, Препросла́вленная./ Ра́дуйся, Преблагослове́нная;/ ра́дуйся, я́ко Госпо́дь с Тобо́ю!

На хвали́тех стихи́ры, глас 4:

Ра́дуйся, богоизбра́нный ли́че Влади́мирския земли́ чудотво́рцев,/ Го́рняго Оте́чества святи́и гра́ждане,/ светоно́сныя зве́зды мы́сленныя тве́рди,/ Всеми́лостивому Влады́це и Бо́гу предстоя́щии,/ не пре́зрите гла́са моле́ний на́ших/ и испроси́те земно́му уде́лу ва́шему мир и благоде́нствие,/ нам же, творя́щим всечестну́ю па́мять ва́шу,/ улучи́ти грехо́в проще́ние и ми́лость в де́нь Су́дный.

Ду́ши и телеса́ ва́ша от страсте́й очи́стивше,/ Всесвята́го Уте́шителя Ду́ха оби́тели светоно́сныя яви́лися есте́,/ святи́и уго́дницы Влади́мирския земли́,/ собесе́дницы А́нгелов и сла́вы Госпо́дни насле́дницы/ и моли́твенницы изря́днии о чту́щих вас.

Ева́нгельский глас услы́шавше,/ бога́тство и сла́ву земну́ю нивочто́же вмени́вше,/ изря́днии де́лателие бы́вше за́поведей Госпо́дних,/ богоуго́дное житие́ яви́ли есте́/ и обрели́ сокро́вище ве́чныя жи́зни./ Те́мже, Боже́ственным све́том чи́сте сия́юще,/ просвети́те ду́ши на́ша.

Всепра́зднственная па́мять ва́ша, всеблаже́ннии,/ благода́тию многоразли́чных чуде́с украша́ется/ и ра́достию духо́вною напоя́ет сердца́ с ве́рою приходя́щих к вам./ Те́мже и нам, с любо́вию к святы́м моще́м ва́шим припа́дающим/ и в ну́ждах на́ших ско́раго заступле́ния прося́щим,/ грехо́в оставле́ние испроси́те/ и низпосли́те мир и ве́лию ми́лость.

Сла́ва, глас 8:

Красу́йся ны́не, Влади́мирская земле́,/ прине́сшая Христу́ Бо́гу благода́тию просия́вших в тебе́/ Богому́дрых святи́телей – иера́рхом украше́ние,/ благове́рных князе́й – оте́честву на́шему благода́тных защи́тников,/ страстоте́рпцев – му́чеником добро́ту,/ преподо́бных отце́в и ма́терей – А́нгелом сожи́телей,/ пра́ведных – незло́бивым цвет благоуха́нный./ И́хже моли́твами, Христе́ Бо́же, поми́луй нас.

И ны́не, Богоро́дичен, глас то́йже:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Вели́кое славосло́вие. Тропа́рь святы́м.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 4: Весели́теся о Го́споде/ и ра́дуйтеся, пра́веднии. Апо́стол к Гала́том, зача́ло 213. Ева́нгелие от Матфе́я, зача́ло 38. Прича́стен: Ра́дуйтеся, пра́веднии:

Моли́тва

О Небе́снаго Иерусали́ма гра́ждане, вси святи́и, по́двиги ве́ры и благоче́стия и мно́гими чудесы́ во Влади́мирстей земли́ просия́вшии! Воззри́те на нас ми́лостивно и к земли́ приве́рженных возведи́те к высоте́ Небе́сней. Вы горе́ на Небеси́ пребыва́ете, мы же на земли́ ни́зу, удале́ни су́ще от вас не толи́ко ме́стом, ели́ко грехми́ и беззако́нии на́шими, но к вам, я́ко нам сро́дным, прибега́ем и взыва́ем: наста́вите нас ходи́ти путе́м ва́шим, вразуми́те и руково́дствуйте на́ми, многогре́шными. Сво́йственно бо вам е́сть, святи́и, милосе́рдие и человеколю́бие: на земли́ живу́ще, не о свое́м то́кмо спасе́нии бы́сть вам попече́ние, но и о всех, к вам приходя́щих. Наставле́ния бо ва́ша бы́ша тро́сть кни́жника скоропи́сца, на сердца́х христоимени́тых люде́й глаго́лы жи́зни начертава́ющаго. Не теле́сныя то́кмо врачева́ли есте́ боле́зни, но па́че душе́вных врачи́ изя́щнейшии яви́лися есте́, и все житие́ ва́ше бы́сть зерца́ло вся́кия доброде́тели. Предстоя́ще дне́сь Престо́лу Све́та непристу́пнаго, в нем зри́те вся на́ша ну́жды и проше́ния. Вы вку́пе со святы́ми А́нгелы, о еди́ном гре́шнице ка́ющемся ра́дующимися, водворя́етеся и дерзнове́ние мно́гое к Человеколю́бцу Бо́гу и́мате, не преста́ните у́бо, о нас вопию́ще ко Го́споду, испроси́те предста́тельством ва́шим у Всеми́лостиваго Отца́ на́шего Небе́снаго мир Це́ркви Его́ Святе́й, под зна́мением Креста́ во́инствующей, согла́сие в ве́ре и единому́дрие, суему́дрия же и раско́лов истребле́ние, в де́лех благи́х утвержде́ние и благослове́ние, больны́м исцеле́ние, печа́льным утеше́ние, оби́женным заступле́ние, бе́дствующим по́мощь, не посрами́те нас, с ве́рою и любо́вию к вам притека́ющим. А́ще бо и недосто́йни есмы́ толи́каго достосла́внаго ли́ка хода́таев, но вы, подража́тели человеколю́бия Бо́жия бы́вше, сотвори́те нас досто́йны чрез обраще́ние от злых дел ко благо́му житию́. Вся Бо́гом просвеще́нная Росси́я, пресла́вными чудесы́ ва́шими испо́лненная и ми́лостьми облагоде́тельствованная, испове́дует вас бы́ти свои́х покрови́телей и засту́пников. Яви́те нам дре́вния ми́лости ва́ша, и́миже отце́м на́шим во благо́е вспомоществова́ли есте́, и не отри́ните нас, чад их, стопа́ми их к вам, святи́и, ше́ствующих. Ве́руем, я́ко ду́хом нам сопрису́тствуете, па́че же и нетле́нными мощми́ ва́шими с на́ми есте́. Сия́ бо, я́ко сокро́вище безце́нное, вручи́ нам И́же чуде́с Бог. Предстоя́ще им, вам, я́ко живы́м су́щим, припа́даем и мо́лимся: приими́те моле́ния на́ша и вознеси́те я на же́ртвенник милосе́рдия Бо́жия, да прии́мем ва́ми благода́ть и благовре́менную в ну́ждах на́ших по́мощь. Па́ству же ва́шу духо́вную не преста́ните управля́ти жезло́м духо́вныя му́дрости: подвиза́ющимся помози́те, разсла́бленныя возста́вите, споспеши́те нам и́го Христо́во нести́ во благоду́шии и терпе́нии, и всех нас упра́вите в ми́ре и покая́нии сконча́ти житие́ на́ше и пресели́тися со упова́нием во блаже́нная не́дра Авраа́мова, иде́же вы ра́достно по труде́х и по́двизех ны́не почива́ете, прославля́юще со все́ми святы́ми Бо́га, в Тро́ице сла́вимаго, Отца́, и Сы́на, и Свята́го Уте́шителя Ду́ха, ны́не и при́сно, и во ве́ки веко́в. Ами́нь