Служба в честь собора святых славных и всехвальных апостол 12
На Го́споди, воззва́х: стихи́ры на 6, Петра́ и Па́вла 3, глас 2.
Самоподо́бен: Ки́ими похва́льными:
Ки́ими похва́льными венцы́/ увязе́м Петра́ и Па́вла,/ разделе́нныя телесы́/ и совоку́пленныя ду́хом,/ Богопропове́дников первостоя́тели?/ О́ваго у́бо я́ко апо́столов преднача́льника,/ о́ваго же я́ко па́че ине́х труди́вшася,/ сих бо вои́стинну досто́йно,/ безсме́ртныя сла́вы венцы́ венча́ет Христо́с Бог наш,/ име́яй ве́лию ми́лость.
Ки́ими пе́сненными добро́тами/ воспое́м Петра́ и Па́вла?/ Богоразу́мия криле́,/ прелете́вшия концы́/ и к Небеси́ возне́сшияся,/ ру́це Ева́нгелия благода́ти,/ но́зе и́стиннаго пропове́дания,/ ре́ки прему́дрости,/ кре́стныя ро́ги,/ и́миже де́монов бровь Христо́с низложи́,/ име́яй ве́лию ми́лость.
Ки́ими духо́вными пе́сньми/ похва́лим Петра́ и Па́вла?/ Безбо́жия закла́вшия незатыка́емая уста́,/ стра́шныя Ду́ха мечи́,/ Ри́ма све́тлая удобре́ния,/ всея́ вселе́нныя пита́тели,/ Но́ваго Заве́та Богопи́санная скрижа́ли мы́сленныя,/ я́же в Сио́не Христо́с возгласи́,/ име́яй ве́лию ми́лость.
И́ны стихи́ры двана́десятих апо́стол, глас 4.
Подо́бен: Я́ко до́бля:
Я́ко самови́дцы и свиде́телие Сло́ва воплоще́ния,/ ученицы́ пребога́тии, ублажа́етеся:/ я́ко мо́лния бо, сия́ющии ми́ру яви́стеся/ и, я́ко го́ры мы́сленныя, сла́дость иска́паете,/ я́ко приснотеку́щия ре́ки ра́йския, раздели́вшеся,/ язы́ческия це́ркви Боже́ственными напая́ете вода́ми.
Яко лучи́, блиста́ющии заря́ми духо́вными,/ в мир весь по́слани бы́сте,/ чуде́с де́йство незави́стно подаю́ще,/ служи́телие Христо́вых та́ин бы́вше/ и Богопи́санныя скрижа́ли, Бо́жия благода́ти напи́санныя/ Богонауче́ннаго зако́на,/ священнотаи́нницы пребога́тии.
Ры́барская трость любому́дрых шата́ние/ и вити́йския струи́ пречерта́,/ Богому́драя уче́ния, изображе́ний догма́ты/ и та́ин благи́х я́сно изложи́вше Ева́нгелие,/ и пи́щи присносу́щныя прича́стие,/ и а́нгельское наслажде́ние,/ и пребыва́ющую сла́ву.
Сла́ва, глас 6:
Всечестны́й апо́столов приспе́ пра́здник Це́ркви Христо́ве,/ хода́тайствующий спасе́ние всем нам./ Та́йно у́бо восплеска́вше, к сим рцем:/ ра́дуйтеся, свети́льницы су́щим во тьме,/ мы́сленнаго Со́лнца зари́ облиста́ющии./ Ра́дуйтеся, Пе́тре и Па́вле,/ уче́ний Боже́ственных основа́ния незы́блема,/ дру́зи Христо́вы, сосу́ди честни́и,/ прииди́те посреди́ нас неви́димо,/ сподобля́юще даро́в невеще́ственных/ ваш пра́здник восхваля́ющих пе́сньми.
И ны́не: Кто́ Тебе́ не ублажи́т:
На стихо́вне стихи́ры, глас 4.
Подо́бен: Дал еси зна́мение:
Дал еси́ хвале́ние Це́ркви Твое́й, Го́споди,/ честны́я апо́столы Твоя́,/ в не́йже просиява́ют мы́сленнии свети́льницы,/ Петр же и Па́вел,/ я́коже зве́зды слове́сныя,/ вселе́нную озаря́юще,/ и́миже просвети́л еси́ за́падный мрак,/ Иису́се Всеси́льне,/ Спа́се душ на́ших.
Стих: Во всю зе́млю изы́де веща́ние их/ и в концы́ вселе́нныя глаго́лы их.
Дал еси́ утвержде́ние Це́ркви Твое́й, Го́споди,/ Петро́ву тве́рдость и Па́влов ра́зум,/ и све́тлую му́дрость, и обои́х богогла́сие и́стинное,/ е́ллинскую пре́лесть отгоня́щее./ Те́мже, тайноводи́ми от обои́х,/ пое́м Тя, Иису́се Всеси́льне,/ Спа́се душ на́ших.
Стих: Небеса́ пове́дают сла́ву Бо́жию,/ творе́ние же руку́ Его́ возвеща́ет твердь.
Дал еси́ о́браз обраще́ния согреша́ющим,/ о́ба апо́столы Твоя́:/ о́ваго у́бо отве́ргшагося Тебе́ во вре́мя стра́сти и пока́явшася,/ о́ваго же про́поведи Твое́й сопротивля́ющася и ве́ровавша,/ и обою́ собо́ру первостоя́тельствующих, друго́в Твои́х,/ Иису́се Всеси́льне,/ Спа́се душ на́ших.
Сла́ва, глас 6:
Пра́здник ра́достен возсия́ конце́м днесь:/ всечестна́я па́мять прему́дрых апо́стол/ и верхо́вных Петра́ и Па́вла./ Те́мже и Рим сра́дуется, ликовству́я в пе́снех и пе́ниих./ Пра́зднуем и мы, бра́тие,/ всечестны́й сий день соверши́вше./ Ра́дуйся, Пе́тре апо́столе,/ и́скренний дру́же твоего́ Учи́теля,/ Христа́ Бо́га на́шего./ Ра́дуйся, Па́вле вселюбе́знейший,/ и пропове́дниче ве́ры, и учи́телю вселе́нныя./ Я́ко име́я дерзнове́ние,/ супру́же святоизбра́нный,/ Христа́ Бо́га на́шего моли́те/ спасти́ся душа́м на́шим.
И ны́не: Богоро́дице, Ты еси́ лоза́ и́стинная:
Тропа́рь, глас 4:
Апо́столов первопресто́льницы/ и вселе́нныя учи́телие,/ Влады́ку всех моли́те/ мир вселе́нней дарова́ти/ и душа́м на́шим ве́лию ми́лость.
НА У́ТРЕНИ
По 1-й кафи́зме, седа́лен, глас 1.
Подо́бен: Гроб Твой, Спа́се:
Лик духо́вный апо́стольский ми́ру посла́ся та́йно от Бо́га Вы́шняго,/ и нево́лею стра́ждущим вра́чеве яви́шася:/ Триипоста́снаго еди́нственне призыва́юще,/ Боже́ственное воплоще́ние Емману́ила Го́спода му́дре написа́ша.
Сла́ва, и ны́не, Богоро́дичен:
Купину́, ю́же Моисе́й неопали́мую ви́де,/ го́ру Бо́жию, святы́й о́блак, сень нескве́рную, Богоприя́тную трапе́зу,/ пала́ту высо́каго Царя́, всесве́тлую и непроходи́мую дверь,/ Де́во, пое́м Тя.
По 2-й кафи́зме седа́лен, глас 3.
Подо́бен: Боже́ственныя ве́ры:
Боже́ственныя трубы́ Уте́шителя, возглаша́юще дыха́ние слове́с спасе́ния, ми́ру возгласи́те/ и и́же во мра́це пре́лести спя́щия к све́ту Богоразу́мия возста́вивше, приведи́те,/ Боже́ственнаго Све́та апо́столи, моля́ще Христа́ Бо́га спасти́ся душа́м на́шим.
Сла́ва, и ны́не, Богоро́дичен:
Боже́ственнаго естества́ не отлу́чся, плоть быв во чре́ве Твое́м,/ но Бог вочелове́чся и пребы́сть, И́же по рождестве́ Ма́терь Тя Де́ву,/ я́ко пре́жде рождества́, сохрани́в Всенепоро́чну, еди́н Госпо́дь,/ Того́ приле́жно моли́ дарова́ти нам ве́лию ми́лость.
Кано́н Петра́ и Па́вла, со ирмосо́м на 8, его́же краегране́сие: Петра́ почита́ю, Па́вла пою́ разу́мно. Глас 4.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся све́тло торжеству́я,/ и воспою́, ра́дуяся, Тоя́ чудеса́.
Пода́ждь ми, Го́споди, Пресвята́го Твоего́ Ду́ха ка́пли дарова́ний, сло́во наро́чито,/ и возвеселю́ся, ве́рно похваля́я пе́рвых апо́стол Твои́х исправле́ния.
Оста́вил еси́, прехва́льне Пе́тре, усе́рдно вре́менная/ и Христо́вым стопа́м после́довал еси́,/ неве́рство же оста́вив, Па́вле, и Призва́вшему тя после́довал еси́.
Благода́ть, апо́столи, суще́ственне наше́дшую вам, прие́мше Боже́ственнаго Ду́ха,/ проидо́сте зе́млю всю, Пе́тре и Па́вле, уча́ще концы́.
Богоро́дичен: Вити́йстии многовеща́ннии и мусики́йстии велегла́снии язы́цы/ Тя не мо́гут чти́ти или́ пе́ти, Чи́стая:/ па́че бо челове́ка соде́яшася в Тебе́ еди́ней Боже́ственная та́инства.
Ин кано́н 12-ти апо́столом, на 6, его́же краегране́сие: Христо́вы почита́ю му́дрыя апо́столы. Феофа́ново, глас то́йже.
Песнь 1
Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пустыни победи́л есть.
Лик апо́стольский пе́ти ми жела́ющу, Христе́,/ моли́твами их, я́ко Бог, зарю́ Пресвята́го Ду́ха да́руй ми/ и свет прему́дрости Твоея́.
Укре́пльшеся си́лою Твое́ю и благода́тию, Христе́,/ си́лу проти́вных враг разруши́ша честни́и Твои́ апо́столи,/ Богови́дцы бы́вше неоску́дным к Тебе́ манове́нием.
Исцеле́ния творя́ще, Влады́ко, Твои́м И́менем,/ язы́ческая совокупле́ния Твои́м позна́нием улови́ша сла́внии апо́столи/ и све́том Твои́м просвети́ша.
Прему́дрости Небе́сныя научи́вшеся, пресла́внии Христо́вы апо́столи,/ я́вственно, прему́дрии, обуи́сте многосло́вия нечести́вых/ поспеше́нием пропове́дания.
Богоро́дичен: От Тро́ицы Пребоже́ственныя Еди́наго, Пречи́стая, родила́ еси́,/ из Тебе́ пло́тию я́вльшагося по нам, благоволе́нием ро́ждшаго И/ и де́йством Ду́ха Пресвята́го, Де́во Ма́ти.
Катава́сия: Отве́рзу уста́ моя́:
Песнь 3
Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.
Сро́дник, Пе́тре, тебе́ Андре́й проявля́ет Месси́ю Христа́, к Нему́же ве́рою приступи́л еси́;/ и ты, Па́вле чу́дный, богоде́тельным Креще́нием от Ана́нии просвети́лся еси́.
Ле́стно и́же писа́нием зако́на па́дающий род Изра́илев/ просвеще́нием благода́ти Петр приве́д,/ язы́к же стада́ Па́вел от пре́лести изба́ви.
На́ги и про́сты во язы́ки посла́л еси́ Твоя́ ученики́,/ вме́сто ору́жия Твое́ И́мя нося́ще свято́е,/ и ле́стную брань, Христе́, ве́рою разруши́ша.
Богоро́дичен: Испо́лнися, апо́столи, позна́ти Го́спода вся земля́, от Де́вы возсия́вшаго/ и мир обно́вльша Боже́ственным ва́шим пропове́данием,/ Пе́тре и Па́вле прехва́льнии.
Ин
Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.
Небе́сная и честна́я боговеща́юще на земли́ уче́ния,/ язы́ки о́гненными известву́юще,/ пропове́дницы Христо́вы, пре́дали есте́.
Показа́л еси́ небеса́ слове́сная – ученики́ Твоя́, Влады́ко,/ сла́ву Твою́ пове́дающия всем конце́м.
Напи́сани бы́вше на Небесе́х и я́вльшеся Христу́ ссе́льницы,/ чту́щих вас любо́вию ны́не, прему́дрии, сохрани́те.
Богоро́дичен: Всели́выйся в нас, И́же в Вы́шних живы́й, Пречи́стая,/ плоть бо прии́м от Тебе́ без се́мене, яви́ся.
Седа́лен, глас 4.
Подо́бен: Вознесы́йся:
Всели́вшеся во Све́те Непристу́пнем, я́ко жили́ще Све́та су́щии,/ храм ваш святы́й просвеща́ете при́сно Боже́ственными пропове́дании./ Те́мже ве́рою вопие́м:/ тьмы нас избавля́йте, и вся́ческих бед, и лю́таго язы́ческаго наше́ствия,/ умоля́юще Зижди́теля, апо́столи.
Сла́ва, глас 8.
Подо́бен: Прему́дрости:
Вели́кия свети́льники и све́тлыя, верхо́вники я́вльшияся ученико́в,/ Петра́ восхва́лим и прему́драго Па́вла,/ и́бо, огне́м Боже́ственнаго возсия́вше Ду́ха, мглу́ пре́лести попали́ша всю./ Те́мже и Вы́шняго Ца́рствия гра́ждане досто́йно яви́шася/ и благода́ти сопресто́льни./ Сего́ ра́ди вопие́м им:/ моли́те Христа́ Бо́га согреше́ний оставле́ние дарова́ти/ пра́зднующим любо́вию святу́ю па́мять ва́шу.
И ны́не, Богоро́дичен:
Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии,/ Огнь бо всели́ся в Тя Божества́/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.
Песнь 4
Ирмо́с: Неизсле́дный Бо́жий Сове́т,/ е́же от Де́вы воплоще́ния/ Тебе́, Вы́шняго,/ проро́к Авваку́м усмотря́я, зовя́ше:/ сла́ва си́ле Твое́й, Го́споди.
С кре́пкими у́бо немощни́и,/ с вити́ями же неве́жди спле́тшеся благоче́стно, Петр и Па́вел,/ взе́мше побе́ду, Христо́вы апо́столи.
Отсту́пника Си́мона, волхва́ лю́таго, я́ко златолю́бца обличи́ Боже́ственный Петр,/ и ны́не Па́вел му́дрый стези́ развраща́ющаго Христо́вы Ели́ма ослепи́л есть.
Неве́жественно ры́барь и усма́рь69 сло́во иму́ще,/ но растворе́нно Боже́ственною со́лию, ду́ши любому́дрых услади́ша/ и Христу́ ве́рою приведо́ша.
Богоро́дичен: Ре́чию Богодохнове́нною пре́жде Авваку́м/ го́ру Тя чи́сту и присе́нну Боже́ственный рече́,/ приходя́щаго от ю́га и Тобо́ю воплоща́ема, Влады́чице, возвеща́я явле́нно.
Ин
Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.
Глаго́лов Боже́ственных апо́стол веща́ние огнеобра́зно про́йде вселе́нную всю,/ ле́сти у́бо вещь попаля́ющее и просвеща́ющее благода́тию благочести́вых совокупле́ния.
Почерне́вший мра́ком безбо́жия мир Богозра́чная свети́ла просвети́ша заря́ми благода́ти,/ ученицы́ Госпо́дни, я́вльшеся сия́нием пропове́дания.
Свяще́нными заря́ми просвеще́ни мы́сленнаго Со́лнца,/ я́ко со́лнце, в ми́ре сия́ете, прехва́льнии,/ све́том Боже́ственным пре́лести мглу отгоня́юще.
Жезл си́лы иму́ще, Крест Твой,/ сла́ное жития́ самови́дцы Твои́, Сло́ве, мо́ре пресеко́ша,/ я́ко ко́ни, смуща́юще многобо́жия во́ды.
Богоро́дичен: Укра́шена разли́чным светоли́тием,/ Не́бо одушевле́нное Тебе́, Царя́ ца́рствующих, Христе́,/ Деви́ца Пречи́стая, ны́не я́ко Богоро́дица сла́вима есть.
Песнь 5
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.
Яко су́ща тве́рда, Христо́с тя ка́мень нарече́, Пе́тре,/ и на тебе́ Це́рковь, ея́же а́довы врата́ не одоле́ют,/ тебе́ же, Па́вле, сосу́д избра́н рече́,/ Сего́ пронести́ пред язы́ки И́мя.
Петр, отве́ргся Учи́теля три́жды, три́жды же люби́ти приглаше́нием присво́ися./ Па́вел, и́же пе́рвее ху́льник сый, тя́жко же оскорбля́я ве́рныя,/ по́слежде пропове́даше, Его́же гоня́ше пе́рвее.
Нетле́нно зва́ние и сла́ву присносу́щну Петр от Христа́ обре́те с Па́влом:/ ов у́бо ключи́ Небе́сныя прия́т,/ сей же в рай восхи́щся, глаго́лы неизрече́нныя навы́к па́че челове́ка.
Богоро́дичен: От Боже́ственнаго Ду́ха Иса́ия испо́лнь,/ рождество́ без отца́ прорече́ из Тебе́, Де́во, ро́ждшагося Емману́ила,/ И́же есть с на́ми Бог, Его́же, Чи́стая, родила́ еси́,/ те́мже вси пое́м Тя.
Ин
Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.
Боже́ственныя Твоя́ и прему́дрыя служи́тели/ свет показа́л еси́ в ми́ре,/ Тебе́, Незаходи́маго Све́та, всем возвеща́ющия.
И́же вся́ку доброде́тель я́вственно проше́дше, апо́столи,/ разли́чныя бесо́вския зло́бы сплете́ния разруши́сте.
Яви́ша нам Тро́йческое сия́ние во еди́нстве Божества́,/ о́гненными язы́ки веща́юще апо́столи.
Богоро́дичен: Тя ору́жие непобеди́мое на враги́ предлага́ем,/ Тя утвержде́ние и наде́жду на́шего спасе́ния, Богоневе́сто, стяжа́хом.
Песнь 6
Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
Светла́ Петро́ва чудеса́,/ че́стна же и Па́влова зна́мения:/ и́бо ри́зы и се́ни их неду́ги боля́щих исцелева́ют, прилага́емии.
Петр вои́стинну сла́вный и Па́вел пои́стине чу́дный,/ дво́ица Боже́ственная и честне́йша жили́ща Живонача́льныя Тро́ицы/ все́ми помина́ется.
Боля́щих ду́ши и телеса́, я́ко Боже́ственный врач изря́ден, Петр исцели́,/ Па́вел язы́ки озари́/ и све́том Госпо́дним назна́мена.
Богоро́дичен: Пе́ти Тя до́лжни есмы́, но вои́стинну по достоя́нию не мо́жем./ Те́мже пое́м Тя молча́нием,/ чту́ще несказа́нное, е́же на Тебе́, Де́во, соде́янное та́инство.
Ин
Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.
Утверди́в ученики́ Твоя́, Спа́се, прему́дростию и чудесы́,/ си́льнейшия соде́лал еси́ е́ллинскаго буесло́вия,/ и сих преле́стная разруши́ша веле́ния.
Боже́ственныя ре́ки прему́дрости/ напо́лниша спаси́тельных вод удо́лия вся церко́вная,/ от исто́чник спаси́тельных струя́ми обога́щше.
Я́вльшеся живо́тныя зве́зды, прехва́льнии,/ разори́сте всю мра́чную пре́лесть светоза́рными сия́нии/ и Богоразу́мия свет возсия́вше.
Богоро́дичен: Всю Тя, Голуби́цу соверше́нну и предо́бру,/ све́тлый обре́т крин и удо́льный цвет, о Богома́ти,/ Жени́х мы́сленный в Тя всели́ся.
Конда́к, глас 2.
Подо́бен: Вы́шних ища́:
Ка́мень Христо́с ка́меня ве́ры прославля́ет све́тло,/ ученико́в преизря́дна,/ и с Па́влом весь дванадесяточи́сленный собо́р днесь;/ и́хже па́мять соверша́юще ве́рно,/ сих Просла́вльшаго прославля́ем.
И́кос:
Всечестну́ю и преблаже́нную па́мять ва́шу творя́щии ны́не,/ в пе́снех приле́жно вопие́м к вам:/ пресве́тлая и Богозра́чная свети́ла ми́ра,/ возлю́бленнии ученицы́ Христо́вы двана́десяте,/ я́ко иму́ще к Нему́ дерзнове́ние, моли́теся за ны,/ вам бо дана́ есть благода́ть исцеле́ний и грехо́в проще́ния,/ приле́жно у́бо Его́ моли́те грехо́в и напа́стей изба́витися нам,/ да еди́наго Человеколю́бца, вас просла́вльшаго, прославля́ем.
Песнь 7
Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́нне му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Ублажи́ся Петр от Христа́, я́ко сему́ ре́кшу Сы́на Бо́га Жива́го,/ и Па́вел почте́ся, я́ко сосу́д благопотре́бен, и взыва́ху:/ отце́в Госпо́дь и Бог, благослове́н еси́.
Законослуже́бники у́бо Петр умудря́ше, я́коже завеща́ся ему́,/ Па́вел же – язы́чники;/ о́ба же благода́тию Христу́ привожда́ху и взыва́ху:/ оте́ц на́ших Бо́же, благослове́н еси́.
Я́ко преизря́ден Петр Христо́в па́стырь ста́до прия́т,/ Це́ркви же Па́вел учи́тель Боже́ствен бысть, взыва́юще:/ оте́ц на́ших Бо́же, благослове́н еси́.
Богоро́дичен: Всенепоро́чная Марие́ и изря́дная свя́тостию,/ Я́же Бо́га пло́тию, Де́во, ро́ждши, Неискусобра́чная Чи́стая,/ Того́ моли́ от вся́каго нас изба́вити наведе́ния и греха́.
Ин
Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.
Сы́ны сотвори́в ученики́ Твоя́, И́же пре́жде естество́м Бог,/ любо́вию насле́дники показа́л еси́ оте́ческаго насле́дия, Преблаги́й,/ и ходи́ти с Тобо́ю, я́ко с Бо́гом и Влады́кою, изво́лил еси́.
Прему́дрости изли́тие, серде́чную широту́,/ язы́к доброглаго́лив, Сло́ве, пода́в Боже́ственным ученико́м Твои́м,/ посла́л еси́ пропове́дати Ева́нгелие Ца́рствия всем конце́м.
Я́вльшеся, я́ко о́блацы Бо́жия све́та, апо́столи/ всем одождева́ют во́ду животворя́щую, зову́ще:/ благослове́н еси́ в хра́ме сла́вы Твоея́, Го́споди.
Богоро́дичен: Преукраше́нна Бо́жиею сла́вою яви́лася еси́, Пречи́стая,/ еди́на от ве́ка Сло́во Бо́жие заче́ншая, Ма́ти Де́во:/ благослове́нна Ты в жена́х, Всенепоро́чная Влады́чице.
Песнь 8
Ирмо́с: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.
Си́лою укре́плься Петр Боже́ственною, уме́ршую Тави́фу воскреси́,/ Па́вел же Евти́ха, с высоты́ па́дша и умерщвле́на, возста́ви,/ о́ба взыва́юща:/ Го́спода воспева́йте, дела́, и превозноси́те Его́ во вся ве́ки.
Виде́нием ужа́сным и чу́дным Корни́лия у́бо Петр просвети́,/ Па́вел же Га́ия, Кри́спа, и Пане́стия, и Стефани́на крести́,/ о́ба зову́ща:/ Го́спода воспева́йте, дела́, и превозноси́те Его́ во вся ве́ки.
Блюдо́ма Петра́ свя́зана Христо́с у́бо А́нгелом но́щию разреши́,/ Па́вла же и Си́лу, а́бие моля́щимся,/ в кла́де но́ги тве́рдо стя́гнуты, изведе́ и темни́цу потря́с;/ те́мже воспое́м Христа́ во ве́ки.
Богоро́дичен: Изба́ви страсте́й всепа́губных,/ плени́цы же согреше́ний ны́не расто́ргни, и́миже ко́ждо стя́жется:/ вси бо согреши́хом и очище́ния про́сим, су́ще пови́ннии./ Е́же пода́ждь, Богоро́дице, мольба́ми Твои́ми превознося́щим Христа́ во ве́ки.
Ин
Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.
Боже́ственный прему́дрый лик апо́стол Христо́вых/ огне́м Ду́ха, я́коже пле́велы, попали́ша многоразли́чная бесо́вская чти́лища/ и ве́рных сердца́ просвети́ша, вопию́ще:/ благослови́те, вся дела́ Госпо́дня, Го́спода.
Согла́сно Боже́ственныя ученики́, Христо́вы апо́столы,/ и́же возгреме́вшия нам Боже́ственная веле́ния,/ приста́нища ве́рных, благода́тели о́бщия челове́честву,/ Спа́су служи́тели почти́м.
Всечестны́я и вмести́тельныя сосу́ды доброде́телей,/ челове́ческия нача́тки, пропове́дания трубы́, пото́ки нетле́нныя жи́зни,/ богоно́сныя мо́лнии, исцеле́ний исто́чники,/ кра́сныя но́ги Ева́нгелия почти́м.
Богоро́дичен: По́лный Сый смиря́ется нас ра́ди, да исполне́ния Его́ причасти́мся:/ в пречи́стое бо чре́во Твое́ вшед Необыме́нный,/ от Оте́ческих недр не отсту́пль, воплоти́ся./ Тем Тя вси благослови́м, Мари́е Богоневе́стная.
Песнь 9
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.
Весь всю́ду мир проидо́сте, я́коже крила́ти,/ и Ева́нгелие коле́ном всем, язы́ком и страна́м Христо́во пропове́давше,/ вся привлеко́сте к ве́ре, Пе́тре преблаже́нный и чу́дный Па́вле апо́столе.
Прини́к во глубо́кую ста́рость и естества́ долг, Пе́тре, исполня́я,/ Учи́теля твоего́ Христа́ подо́бием крест претерпе́л еси́;/ ты же во главу́ твою́, Па́вле, усе́чен быв, о чу́до стра́шно!/ вме́сто кро́ве млека́ источи́л еси́ пото́ки и неве́рныя обрати́л еси́.
О Боже́ственная дво́ице, му́дре вручи́вшаяся всего́ ми́ра душа́м,/ и ко благоче́стию от нече́стия претво́рше,/ и по сме́рти спаса́юще еще́ ве́рных ду́ши,/ и ны́не нас помяни́те и предста́вите Христу́, верхо́внии апо́столи.
Богоро́дичен: Спа́се Благи́й, И́же естество́м Человеколю́бец и Многомилосе́рд,/ Препе́тыя Твоея́ Ма́тере Де́вы Боже́ственными мольба́ми,/ Петра́ моли́твами и Па́вла, апо́стол Твои́х,/ ми́лость Твою́ и по́мощь с Небесе́ нам посли́.
Ин
Ирмо́с: Ка́мень нерукосе́чный/ от несеко́мыя горы́ Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.
Реши́ти плени́цы прегреше́ний власть прие́мше от Влады́ки, Богови́дцы,/ воспева́ющих вас ми́лостивно грехи́ очи́стите и спасе́ния сподо́бите.
Вседухо́вную зарю́, су́щественно вам я́вльшуюся, вси восприя́сте, апо́столи сла́внии,/ в го́рнице научи́вшеся высо́ким пропове́данием и уче́нием,/ и ны́не досто́йно блажи́ми есте́.
Вам Христо́с ны́не, друго́м Свои́м почи́вшим, венцы́ подае́т неувяда́емыя/ и виде́ния Боже́ственнаго исполня́ет,/ Ему́же ны́не моли́теся Це́ркви вся спасти́.
Богоро́дичен: Пло́тию приити́ восхоте́в, украси́вый сло́вом вся́ческая в Тя всели́ся,/ еди́ну Святе́йшую всех обре́т и Богоро́дицу показа́ и́стинную, Ма́ти Де́во.
Свети́лен.
Подо́бен: Ученико́м:
Ученико́в всечестну́ю двоенадеся́тицу ра́достно восхвали́ти стеце́мся,/ ра́дуйтеся, и́же всю подсо́лнечную обше́дше и язы́ков уло́вльше злове́рныя чреды́,/ научи́вшеся Боже́ственным.
Сла́ва: Двоенадесяточи́сленный лик днесь восхва́лим, вси ве́рнии,/ я́ко утверди́вшеся от них,/ и Христу́ возопие́м:/ моли́твами их, Спа́се, мир Твой умири́.
И ны́не, Богоро́дичен:
Мы о Тебе́ хва́лимся, Богоро́дице, и к Бо́гу Тя и́мамы предста́тельство:/ простри́ ру́ку Твою́ святу́ю и сокруши́ враги́ на́ша,/ Твои́м низпосли́ рабо́м по́мощь от Свята́го.
На хвали́тех стихи́ры на 4, глас 4.
Подо́бен: Зва́нный свы́ше:
Верхо́вное основа́ние апо́столов,/ ты вся оста́вив/ и после́довал еси́ Учи́телю, вопия́ Ему́:/ с Тобо́ю умру́, да и живу́ блаже́нную жизнь./ Ри́ма же ты был еси́ пе́рвый епи́скоп,/ превели́каго градо́в сла́ва и похвала́/ и Це́ркве, Пе́тре, утвержде́ние,/ и врата́ а́дова не одоле́ют вои́стинну ея́,/ я́коже Христо́с предрече́./ Его́же моли́ спасти́ и просвети́ти ду́ши на́ша.
И́же из чре́ва ма́терия отлуче́н,/ ве́щнаго велича́ния тя́жести вся́кия избе́гл еси́,/ впери́вся раче́нием вои́стинну Боже́ственныя, Па́вле, любве́/ к высоте́ Боже́ственней,/ иде́же в пресве́тлый мрак Боже́ственнаго све́та возше́дый,/ я́ко не́кий безпло́тный,/ неизрече́нных глаго́л обогати́вся уче́нии,/ и посла́лся еси́ су́щим во тьме,/ свет пропове́дуяй Христа́ Бо́га на́шего./ Его́же моли́ спасти́ и просвети́ти ду́ши на́ша.
И́же Свет, Сый пре́жде всех век,/ егда́ изво́лил еси́ ко мне, челове́ку, приити́/ неизрече́ннаго ра́ди человеколю́бия/ и плоть бы́ти за благосты́ню,/ тогда́ све́ты вторы́я Твоея́ све́тлости/ и мо́лния блеща́щая,/ апо́столы и ученики́ Твоя́, Спа́се, показа́л еси́,/ и́же и, по́слани бы́вше,/ тварь всю Боже́ственным све́том Твои́м озари́ша,/ моля́ще Тя спасти́ и просвети́ти ду́ши на́ша.
Пе́тре и Па́вле, Сло́ва де́лателие,/ Андре́е, Иа́кове и Иоа́нне прему́дре,/ Варфоломе́е и Фили́ппе, Фомо́ и Матфе́е,/ Си́моне, Иу́до, Боже́ственне Иа́кове,/ всеми́рная всечестна́я ученико́в двоенадеся́тице,/ и́же в ми́ре пропове́давшии Всесвяту́ю Тро́ицу,/ естество́м Бо́га присносу́щнаго,/ Це́ркве неразори́мыя вои́стинну сте́ны/ и непоколеби́мии столпи́,/ Влады́це всех моли́теся спасти́ся нам.
Сла́ва, глас 8. Космы́ мона́ха:
Ю́же проидо́сте, тварь/ просве́щше, Спа́совы ученицы́,/ лесть и́дольскую, я́ко хвра́стие70, попали́вше уче́нии ва́шими,/ язы́ки от неразу́мия глубины́ к Боже́ственному ра́зуму улови́вше, спасо́сте,/ и ны́не моли́теся Христу́,/ я́ко да ми́лостив нам бу́дет в День су́дный.
И ны́не, Богоро́дичен: Влады́чице, приими́:
Славосло́вие вели́кое. И отпу́ст.
НА ЛИТУРГИ́И
Блаже́нны от кано́на 12-ти апо́столов, пе́сни 3-я и 6-я. Проки́мен, глас 8: Во всю зе́млю: Стих: Небеса́ пове́дают сла́ву Бо́жию: Апо́стол к Кори́нфяном, зача́ло 131. Аллилу́ия, глас 1: Испове́дят Небеса́ чудеса́ Твоя́, Го́споди. Ева́нгелие от Ма́рка, зача́ло 12. Прича́стен: Во всю зе́млю:
Ина слу́жба собо́ра святы́х сла́вных и всехва́льных двуна́десяти апо́столов
НА МА́ЛОЙ ВЕЧЕ́РНИ
На Го́споди, воззва́х: стихи́ры, глас 1:
Прииди́те, ве́рнии,/ всехва́льный собо́р двуна́десяти апо́столов Христо́вых/ сла́вно восхва́лим:/ Петра́, ка́меня ве́ры,/ Па́вла, учи́теля язы́к,/ напе́рсника Христо́ва Иоа́нна Богосло́ва/ и бра́та его́ Иа́кова,/ Андре́я Богому́драго,/ Фили́ппа и Варфоломе́я,/ Матфе́я, списа́вшаго Благове́стие,/ ди́внаго Фому́, Си́мона Зило́та,/ Иу́ду, сро́дника Госпо́дня,/ с Иа́ковом пресла́вным.
Апо́столи сла́внии,/ Христо́вы ученицы́ Богозва́ннии,/ вселе́нныя учи́телие,/ обре́тше Го́спода Бо́га/ и челове́ков Хода́тая су́ща,/ Тому́ боголе́пне прилепи́стеся/ и я́ко Бо́га Того́ и я́ко Челове́ка всесоверше́нна/ в ми́ре я́ве пропове́дасте.
Егда́ на престо́лех обоюна́десятих/ ся́дете со всех Судие́ю/ суди́ти вся́кой тва́ри,/ неосужде́нны ны покажи́те/ и тьмы и вся́каго муче́ния изба́вите,/ Боже́ственнии апо́столи.
Сла́ва, и ны́не, Богоро́дичен:
Апо́столов удобре́ние, Богообра́дованная, су́щи,/ омраче́на мя сластьми́ жите́йскими/ покая́ния просвети́ заря́ми,/ я́ко да велича́ю Тя.
На стихо́вне стихи́ры, глас 8:
Апо́столи прему́дрии,/ Христо́вы ученицы́ Богозва́ннии,/ вселе́нныя учи́телие/ ва́шими моли́твами/ Боже́ственным уче́нием внима́ти укрепи́те мя/ и стезе́ю те́сною помога́йте ходи́ти ми всегда́,/ я́ко да доспе́ю/ в пребыва́ние ра́йское простра́ннейшее.
Стих: Во всю зе́млю изы́де веща́ние их/ и в концы́ вселе́нныя глаго́лы их.
Ученико́в Твои́х лик вселе́нную просвети́:/ бы́вше бо иногда́ рыб ловцы́,/ ны́не челове́ков бы́ша,/ тех ра́ди, Бо́же, поми́луй нас.
Стих: Небеса́ пове́дают сла́ву Бо́жию,/ творе́ние же руку́ Его́ возвеща́ет твердь.
Апо́стольский лик Ду́хом Святы́м просвети́л еси́, Христе́,/ и на́шу скве́рну грехо́вную тех ра́ди омы́й, Бо́же,/ и поми́луй нас.
Сла́ва, глас то́йже:
Христо́вы ученицы́,/ егда́ с Ним суди́ти ся́дете суду́ пови́нных,/ неосужде́нну мою́ ду́шу соблюди́те,/ оскверне́нную безме́стными де́лы,/ я́ко блази́и мои́ предста́телие/ и я́ко ми́ра засту́пницы.
И ны́не, Богоро́дичен:
Апо́столов ра́досте/ и страстоте́рпец вене́ц неувяда́емый,/ вои́стинну еси́ Богороди́тельница, Всенепоро́чная Отрокови́це,/ с ни́миже испроси́ нам, Влады́чице,/ прегреше́ний избавле́ние и житию́ исправле́ние,/ ве́рою прося́щим Тя и вопию́щим Ти:/ ра́дуйся, всеи́стинне благи́х сокро́вище.
Тропа́рь пи́сан на вели́цей вече́рни.
На ма́лом повече́рии кано́н апо́столом Петру́ и Па́влу, глас 4 (зри пе́рвый кано́н в предваря́ющей слу́жбе).
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8, глас 2:
Да восхва́лится днесь двоена́десятица Богоизбра́нная,/ апо́стольская и всечестна́я:/ Петр и Па́вел всехва́льнии,/ Иа́ков и Иоа́нн, сы́ны гро́мовы,/ Андре́й Первозва́нный, Богому́дрый Фили́пп с Варфоломе́ем,/ Богоглаго́ливый Матфе́й,/ сла́вный Фома́ с Боже́ственным Иу́дою и други́м Иа́ковом/ и Си́мон Зило́т.
Ки́ими похва́льными венцы́/ увязе́м Петра́ и Па́вла,/ разделе́нныя телесы́ и совоку́пленныя ду́хом,/ Богопропове́дников первостоя́тели?/ О́ваго у́бо я́ко апо́столов преднача́льника,/ о́ваго же па́че ине́х труди́вшася./ Сих бо вои́стинну досто́йно/ безсме́ртныя сла́вы венцы́ венча́ет Христо́с Бог наш,/ име́яй ве́лию ми́лость.
И́же все́дый со Христо́м на вода́х,/ егда́ основа́ние имя́ше несумне́нно в се́рдцы, блаже́нне,/ но воде́, неиму́щей сле́да,/ пути́ с Ним приобщи́лся еси́./ Егда́ же я́ко челове́к,/ я́же вы́ше челове́ка помы́слив, ужасе́ся/ у́мным преклоне́нием,/ волна́ми бу́рею поползе́ся,/ разуме́в же еди́наго Ко́рмчия, Бо́га и Спа́са,/ про́сиши спасти́ тя,/ Его́же моли́ спасти́ и просвети́ти ду́ши на́ша.
Прииди́те, прему́дрости глубину́/ и правосла́вных догма́т списа́теля,/ ве́рнии, пе́сньми Боже́ственными днесь венча́ем,/ Иоа́нна сла́внаго и возлю́бленнаго:/ сей бо возгреме́, е́же в нача́ле бе Сло́во./ Отону́дуже громогла́сен показа́ся,/ яко благове́стник ми́рови,/ просия́в многому́дренне всехва́льный.
Глас 8: Пропове́дника ве́ры и слугу́ Сло́ва,/ Андре́я восхва́лим:/ той бо из глубины́ челове́ки уловля́ет,/ вме́сто тро́сти крест в рука́х держа́,/ и, я́ко у́же ниспуща́я си́лу,/ возво́дит ду́ши от ле́сти вра́жия,/ и прино́сит Бо́гу дар благоприя́тен при́сно./ Того́, ве́рнии, в ли́це учени́к Христо́вых восхва́лим,/ да мо́лится с ни́ми:/ я́ко да ми́лостив нам бу́дет в День Су́дный.
Иа́кова воспое́м Зеведе́ова вси:/ со Христо́м бо взы́де на го́ру Фаво́рскую,/ и зри́тель бысть Боже́ственнаго Преображе́ния,/ и, соше́д, пропове́даше во вселе́нную всю/ с Петро́м и Иоа́нном.
Я́ко свети́льника Све́та и ученика́,/ я́ко самови́дца Сло́ва Боже́ственнаго,/ вси хва́лим тя, Госпо́день апо́столе,/ и́бо, благода́тныя твоя́ мре́жи простира́я,/ слове́сныя ры́бы уловля́еши повеле́нием./ Те́мже и язы́цы уловля́хуся,/ си́лою Ду́ха наставля́еми ве́рою,/ всехва́льне евангели́сте Матфе́е,/ моли́ Христа́ Бо́га/ грехо́в оставле́ние дарова́ти/ чту́щим любо́вию святу́ю па́мять твою́.
Верхо́вныя я́вльшияся от учени́к,/ вели́кия свети́льники и све́тлыя апо́столы Христо́вы восхва́лим:/ огне́м бо Боже́ственнаго Ду́ха/ мглу пре́лести попали́ша всю,/ те́мже и Вы́шняго Ца́рствия ору́жницы досто́йне показа́шася/ и благода́ти сопресто́льницы./ Сего́ ра́ди вопие́м:/ апо́столи Христа́ Бо́га,/ прегреше́ний оставле́ние испроси́те/ пра́зднующим любо́вию святу́ю па́мять ва́шу.
Сла́ва, глас 1:
Двоена́десятице апо́стол, Го́споди,/ двоедесятолу́чшая я́ко со́лнце, яви́ся земли́:/ тех бо ра́ди увяди́л еси́ пре́лести лука́ваго/ и тех бо ра́ди озаря́еши ду́ши Твои́х рабо́в,/ и нас, рабо́в Твои́х, спаса́й их моли́твами,/ я́ко Еди́н Человеколю́бец.
И ны́не, Богоро́дичен, глас то́йже: Всеми́рную сла́ву:
Вход. Проки́мен дне и чте́ния.
Исхо́да чте́ние (глава́ 15):
Приидо́ша сы́нове Изра́илевы в Ме́рру,/ и не можа́ху пи́ти воды́ от Ме́рры: горька́ бо бе./ Сего́ ра́ди нарече́ся и́мя ме́сту тому́ Го́ресть./ И ропта́ху лю́дие на Моисе́я, глаго́люще:/ что́ пие́м?/ Возопи́ же Моисе́й ко Го́споду,/ и показа́ ему́ Госпо́дь дре́во,/ и вложи́ е в во́ду, и услади́ся вода́./ Та́мо положи́ ему́ оправда́ния и судьбы́,/ и та́мо его́ искуси́, и рече́:/ а́ще слу́хом услы́шиши глас Го́спода Бо́га твоего́,/ и уго́дная пред Ним сотвори́ши,/ и внуши́ши за́поведем Его́,/ и сохрани́ши вся оправда́ния Его́ –,/ вся́ку боле́знь, ю́же наведо́х еги́птяном, не наведу́ на тя:/ Аз бо есмь Госпо́дь Бог твой, исцеля́яй тя./ И приидо́ша во Ели́м,/ и бя́ху та́мо двана́десять исто́чников вод/ и се́дмьдесят сте́блий фи́никовых,/ и ополчи́шася та́мо при вода́х.
Иису́са Нави́на чте́ние (глава́ 4):
Рече́ Госпо́дь ко Иису́су, глаго́ля:/ поими́ двана́десять муже́й от люди́й,/ му́жа еди́наго от коего́ждо пле́мене,/ повели́ им, глаго́ля:/ возми́те от среды́ Иорда́на, иде́же стоя́ша но́зи жре́честии,/ гото́вых двана́десять ка́меней/ и, изне́сше я с собо́ю, положи́те в полце́ ва́шем,/ иде́же ста́нете та́мо в нощи́. И призва́в Иису́с двана́десять муже́й сла́вных от сыно́в Изра́илевых,/ еди́наго от коего́ждо пле́мене, рече́ им:/ иди́те предо мно́ю пред лице́м Госпо́дним в среди́ну Иорда́на,/ и, взем отту́ду ки́йждо ка́мень еди́н, да возложи́т на ра́мена своя́,/ по числу́ племе́н (сыно́в) Изра́илевых./ Да бу́дут вам си́и в зна́мение, посреде́ вас лежа́ще всегда́,/ да егда́ вопро́сит тебе́ у́тро сын твой, глаго́ля:/ что́ суть ка́мение сие́ вам?/ И ты возвести́ши сы́ну твоему́, глаго́ля:/ яко оскуде́ Иорда́н река́ от лица́ киво́та заве́та Го́спода всея́ земли́,/ егда́ прехожда́ше его́, и изся́че вода́ Иорда́нова,/ и бу́дут вам ка́мение сие́ в па́мять сыно́в Изра́илевых да́же до ве́ка./ И сотвори́ша та́ко сы́нове Изра́илевы,/ я́коже запове́да Госпо́дь Иису́су./ И взе́мше двана́десять ка́меней от среды́ Иорда́на,/ я́коже запове́да Госпо́дь Иису́су в сконча́нии прехожде́ния сыно́в Изра́илевых,/ и принесо́ша их с собо́ю в полк, и положи́ша их та́мо./ Поста́ви же Иису́с и друга́я двана́десять ка́меней в саме́м Иорда́не на ме́сте,/ иде́же стоя́ху но́зи жреце́в, воздвиза́ющих киво́т заве́та Госпо́дня,/ во Иорда́не,/ до́ндеже сконча́ Иису́с вся,/ ели́ка запове́да Госпо́дь Иису́су пове́дати лю́дем,/ по всем, ели́ка запове́да Моисе́й И́ису́су,/ и потща́шася лю́дие, и преидо́ша./ И бысть, егда́ сконча́ша вси лю́дие преходи́ти (Иорда́н),/ пре́йде и киво́т заве́та Госпо́дня и жрецы́ пред ни́ми.
Проро́чества Иои́лева чте́ние (глава́ 2):
Воструби́те трубо́ю в Сио́не,/ пропове́дите в горе́ Мое́й святе́й,/ и да смяту́тся вси, живу́щии на земли́,/ я́ко предстои́т день Госпо́день./ Я́коже у́тро, разлию́тся по гора́м лю́дие мно́зи и кре́пцы,/ подо́бни им не бы́ша от ве́ка/ и по них не приложи́тся до лет в род и род./ Я́коже вид ко́нский – вид их,/ и, я́коже ко́нницы, та́ко прожену́т,/ я́коже глас колесни́ц на верхи́ гор востеку́т,/ и я́ко глас пла́мене о́гненна, попаля́юща тро́стие,/ и я́ко лю́дие мно́зи и кре́пцы, воополча́ющиися на брань./ От лица́ их сокруша́тся лю́дие,/ вся́кое лице́, а́ки опале́ние горнца́./ Я́коже борцы́ потеку́т,/ и я́коже му́жие хра́бри взы́дут на огра́ды,/ и ки́йждо в путь свой по́йдет,/ и не совратя́т пути́й свои́х./ И бу́дет по сих,/ и излию́ от Ду́ха Моего́ на вся́ку плоть,/ и прореку́т сы́нове ва́ши и дще́ри ва́ша,/ и ста́рцы ва́ши со́ния у́зрят,/ и ю́ноты ва́ши виде́ния уви́дят,/ и́бо на рабы́ Моя́ и на рабы́ни Моя́ во дни о́ны излию́ от Ду́ха Моего́./ И дам чудеса́ на Небеси́ и на земли́:/ кровь, и огнь, и куре́ние ды́ма./ Со́лнце обрати́тся во тьму, и луна́ – в кровь,/ пре́жде не́же приити́ дню Госпо́дню, вели́кому и просвеще́нному./ И бу́дет: всяк, и́же призове́т И́мя Госпо́дне, спасе́тся,/ я́ко в горе́ Сио́не и во Иерусали́ме бу́дет спаса́емый,/ я́коже рече́ Госпо́дь, и благовеству́емии, и́хже Госпо́дь призва́.
На лити́и стихи́ры, глас 4:
Пе́тре и Па́вле, Сло́ва де́лателие,/ Андре́е, Иа́кове и Иоа́нне прему́дре,/ Варфоломе́е и Фили́ппе, Фомо́ и Матфе́е,/ Си́моне, Иу́до, Боже́ственне Иа́кове и Матфи́е,/ всеми́рная, всечестна́я ученико́в двоенадеся́тица,/ и́же в ми́ре пропове́давшии Всесвяту́ю Тро́ицу,/ естество́м Бо́га присносу́щнаго,/ Це́ркве неразори́мыя вои́стинну сте́ны/ и непоколеби́мии столпи́,/ Влады́це всех моли́теся спасти́ся нам.
Петра́ и Па́вла, и Иа́кова, Андре́я,/ Фили́ппа сла́внаго, Варфоломе́я, Фому́,/ Иоа́нна, и Иа́кова Алфе́ева/ и с Матфе́ем Богопропове́дником,/ и Иу́ду всему́драго, и Си́мона Зило́та,/ и Матфе́я почти́м,/ апо́столы и Влады́це дру́ги су́щия,/ и́миже сия́ние позна́хом Тро́йческое/ и тьмы изба́вихомся неве́дения,/ и́же сих ве́ровавшии уче́нием.
Бога́тство некра́домо Це́ркви,/ столп непоколеби́м благоче́стия,/ Варфоломе́е, показа́лся еси́, апо́столе,/ в мо́ри же стезю́ творя́,/ пучи́ну Боже́ственных источа́еши исцеле́ний, достосла́вне,/ Христа́ Бо́га моли́/ дарова́ти нам ве́лию ми́лость.
Глас 3: Благоукраша́ется вселе́нная,/ Ефио́пия ликовству́ет,/ я́ко венце́м, красу́ема тобо́ю, просвети́вшися све́тло,/ торжеству́ет па́мять твою́, Богоглаго́ливе Фили́ппе,/ вся бо ве́ровати Христу́ научи́л еси́/ и тече́ние соверши́л досто́йно Ева́нгелия./ Тем дерзнове́нно Ефио́пия вопие́т Бо́гу,/ Его́же моли́ дарова́ти нам ве́лию ми́лость.
Глас 5: Ве́рно торжеству́ем пречестну́ю па́мять твою́,/ Иа́кове сла́вне,/ не я́ко Алфе́ева тя сына,/ но я́ко апо́стола Христо́ва почита́юще/ и пропове́дника Того́ неизрече́ннаго воплоще́ния./ Тем Влады́чню Престо́лу со Безплотными всегда́ предстоя́/ и апо́стол и му́ченик ли́ки,/ приле́жно моли́ся спасти́ ны Спаси́телю и Бо́гу на́шему.
Глас 1: Иу́до всехва́льне,/ твое́ веща́ние изы́де,/ я́коже мо́лния, в концы́ всея́ земли́, му́дре,/ помраче́нныя ле́стью безбо́жия/ к Све́ту наставля́я невече́рнему,/ И́мже ны́не сия́я,/ испроси́ душа́м на́шим ве́лию ми́лость.
Глас 4: Си́мон, апо́стол всесве́тлый и пречу́дный,/ язы́ков учи́тель,/ мре́жа Боже́ственная,/ из глубины́ поги́бельныя нас улови́вшая Богосло́вием высо́ким,/ и́стинный пропове́дник,/ вся ко Христо́ву позна́нию ны́не му́дре приведе́./ Те́мже, в Вы́шних сый,/ с Вы́шними ли́ки вселя́емь,/ моли́ся, Богови́дче, Сло́ву, Христу́ Бо́гу на́шему,/ дарова́ти нам ве́лию ми́лость.
Сла́ва, глас 6:
Всечестны́й апо́столов приспе́ пра́здник Це́ркви Христо́ве,/ хода́тайствующий спасе́ние всем нам./ Та́йно у́бо восплеска́вше, к сим рцем:/ ра́дуйтеся, свети́льницы су́щим во тьме,/ мы́сленнаго Со́лнца зари́ облиста́ющии;/ ра́дуйтеся, апо́столи святи́и,/ уче́ний Боже́ственных основа́ния незы́блема,/ дру́зи Христо́вы, сосу́ди честни́и,/ прииди́те посреди́ нас неви́димо,/ сподобля́юще даро́в невеще́ственных/ ваш пра́здник восхваля́ющих пе́сньми.
И ны́не, Богоро́дичен:
Блажи́м Тя, Пречи́стая,/ я́коже прорекла́ еси́,/ Бо́га бо во пло́ти родила́ еси́,/ Его́же пропове́да лик апо́стольский,/ с ни́миже испроси́ нам/ прегреше́ний разреше́ние, Всесвята́я.
На стихо́вне стихи́ры, глас 6.
Подо́бен: Тридне́вен воскре́сл:
Вели́ким та́йнам Бо́жиим служи́тели бы́сте,/ Богосло́вцы и Богови́дцы ученицы́,/ и благода́ть исцеле́ний прия́сте,/ и всех челове́к боле́зни исцеля́ете.
Стих: Во всю зе́млю изы́де веща́ние их/ и в концы́ вселе́нныя глаго́лы их.
Вели́кое прибе́жище и покро́в душа́м на́шим,/ духово́м лю́тым прогна́ние вы есте́,/ Богови́дцы апо́столи Госпо́дни,/ те́мже вас приле́жно почита́ем.
Стих: Небеса́ пове́дают сла́ву Бо́жию,/ творе́ние же руку́ Его́ возвеща́ет тве́рдь.
От вся́каго обстоя́ния,/ и врежде́ния бесо́вскаго,/ и прегреше́ния, и зла́го плене́ния изба́вите/ и́же ве́рою вас восхваля́ющих,/ Боже́ственнии апо́столи блаже́ннии.
Сла́ва, глас то́йже:
Ры́барская тро́сть любому́дрых шата́ния/ и вити́йския струи́ пречерта́,/ Богому́дренная уче́ния и та́ин благи́х я́сно изложи́вше Ева́нгелие,/ и пи́щи присносу́щныя прича́стие,/ и А́нгельское наслажде́ние, и пребыва́ющую сла́ву.
И ны́не, Богоро́дичен:
Проро́цы пропове́даша,/ апо́столи научи́ша,/ му́ченицы испове́даша,/ и мы ве́ровахом Богоро́дицу Тя вои́стинну су́щую,/ тем и велича́ем рождество́ Твое́ неизрече́нное.
На благослове́нии хле́бов тропа́рь апо́столов, два́жды, и Богоро́дице Де́во: еди́ножды.
Тропа́рь апо́столов, глас 4:
Апо́столов первопресто́льницы/ и вселе́нныя учи́телие,/ Влады́ку всех моли́те/ мир вселе́нней дарова́ти/ и душа́м на́шим ве́лию ми́лость.
НА У́ТРЕНИ
На Бог Госпо́дь: тропа́рь апо́столов, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 1.
Подо́бен: Гроб Твой, Спа́се:
Лик духо́вный апо́стольский ми́ру посла́ся та́йно от Бо́га Вы́шняго,/ и нево́лею стра́ждущим вра́чеве яви́шася:/ Триипоста́снаго еди́нственне призыва́юще,/ Боже́ственное воплоще́ние Емману́ила Го́спода му́дре написа́ша.
Сла́ва: Моли́твами честны́х и Боже́ственных апо́стол Твои́х,/ Человеколю́бче Ще́дрый, еди́не Ми́лостиве,/ смире́ние пода́ждь рабо́м Твои́м/ и спаси́ от бед воспева́ющих Тя и ве́рою покланя́ющихся.
И ны́не, Богоро́дичен:
Купину́, ю́же Моисе́й неопали́му ви́де, го́ру Бо́жию,/ святы́й о́блак, се́нь нескве́рную, Богоприя́тную трапе́зу,/ пала́ту Высо́каго Царя́ всесве́тлую и непроходи́мую,/ Де́во, пое́м Тя.
По 1-м стихосло́вии чте́ние из Четии́-Мине́и святи́теля Дими́трия, митрополи́та Росто́вскаго, его́же нача́ло: По избра́нии двана́десяти апо́столов, Христо́с Госпо́дь избра́: зри июня в 30-й день.
По 2-м стихосло́вии седа́лен, глас 3.
Подо́бен: Боже́ственныя ве́ры:
Боже́ственныя трубы́ Уте́шителя,/ возглаша́юще дыха́ние слове́с спасе́ния, ми́ру возгласи́те/ и и́же во мра́це пре́лести спя́щия к све́ту Богоразу́мия, возста́вивше, приведи́те,/ Боже́ственнаго Све́та апо́столи,/ моля́ще Христа́ Бо́га спасти́ся душа́м на́шим.
Сла́ва: Я́ко лучи́, блиста́ющии заря́ми духо́вными,/ в мир ве́сь по́слани бы́сте,/ чуде́с де́йство незави́стно подаю́ще,/ служи́телие Христо́вых та́ин бы́вше/ и Богопи́санныя скрижа́ли Бо́жия благода́ти напи́санныя Богонауче́ннаго зако́на,/ священнотаи́нницы пребога́тии.
И ны́не, Богоро́дичен:
Боже́ственнаго естества́ не отлу́чся, пло́ть быв во чре́ве Твое́м,/ но Бог вочелове́чся и пребы́сть,/ И́же по рождестве́ Ма́терь Тя Де́ву, я́ко пре́жде рождества́, сохрани́в Всенепоро́чну, еди́н Госпо́дь,/ Того́ приле́жно моли́ дарова́ти нам ве́лию ми́лость.
По полиеле́и седа́лен, глас 8:
Ю́же проидо́сте, тва́рь просве́щше, Спа́совы ученицы́,/ ле́сть и́дольскую, я́ко хвра́стие, попали́вше уче́нии ва́шими,/ язы́ки, от неразу́мия глубины́ к Боже́ственному ра́зуму улови́вше, спасо́сте,/ и ны́не моли́теся Христу́, я́ко да ми́лостив нам бу́дет в Де́нь Су́дный.
Сла́ва, и ны́не, Богоро́дичен:
Те́плое заступле́ние су́щим в беда́х,/ и Помо́щницу на́шу, и к Бо́гу премене́ние,/ Е́юже тли изба́вихомся, Богоро́дицу, ве́рнии, ублажа́ем.
Степе́нна, 1-й антифо́н 4-го гла́са. Проки́мен, глас 4: Во всю зе́млю изы́де веща́ние их/ и в концы́ вселе́нныя глаго́лы их. Стих: Небеса́ пове́дают сла́ву Бо́жию,/ творе́ние же руку́ Его́ возвеща́ет тве́рдь. Вся́кое дыха́ние: Ева́нгелие от Матфе́я: зача́ло 34.
По 50-м псалме́ стихи́ра, глас 6: Благоче́стия и́стинныя пропове́дники: (зри 29 июня).
Кано́нов святы́м двуна́десяти апо́столом два. Пе́рвый, глас 4, со ирмосо́м на 6, его́же краегране́сие: Христо́вы почита́ю му́дрыя апо́столы, зри в предваря́ющей слу́жбе.
Ин кано́н со ирмосо́м на 8, глас 4.
Песнь 1
Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав, Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л е́сть.
Верхо́внейшаго апо́столов дне́сь, Петра́,/ я́ко предстоя́теля Христо́вы Це́ркве и первопресто́льника,/ Богодухнове́нными пе́сньми досто́йно воспои́м.
На ка́мени твоего́ Богосло́вия/ водрузи́ Влады́ка Иису́с Це́рковь непрекло́нну,/ в не́йже тя, апо́столе Пе́тре, сла́вим.
Я́коже дре́вле, Христе́, десни́цею Твое́ю по воде́ пе́ша ходя́ща Петра́ спасл еси́,/ и мене́, потопля́ема бу́рею лю́тых напа́стей,/ спаси́, я́ко Милосе́рд.
Егда́ Свет узре́л еси́, возсия́вший на Фаво́ре, со́лнечныя покрыва́ющий лучи́,/ све́том, су́щим от Све́та, озари́лся еси́, Пе́тре,/ и ве́рныя просвети́л еси́.
Три́жды отве́рглся еси́ Христа́,/ те́мже вопроше́нием трикра́тным исцеля́ет твое́ согреше́ние, Пе́тре пресла́вне,/ и утвержде́ние показу́ет мно́гих коле́блющихся.
Богоро́дичен: Ты, Пресвята́я Богома́ти, похвала́ Христо́вых апо́столов была́ еси́,/ му́чеников же сла́ва и проро́ков основа́ние,/ те́мже, ве́рнии, Тя вси достодо́лжно велича́ем.
Катава́сия: Отве́рзу уста́ моя́:
Песнь 3
Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.
Воспои́м, ве́рнии, Петро́ва сро́дника, Андре́я, Христо́ва ученика́:/ Той бо, мо́ре мре́жами испыта́в иногда́, ры́бы улови́,/ ны́не же вселе́нную тро́стию ло́вит креста́,/ и язы́ки от пре́лести обраща́ет ко Креще́нию,/ и, Христу́ предстоя́, про́сит ми́ра ми́ру/ и душа́м на́шим ве́лию ми́лость.
Я́ко Боже́ственнаго ученика́ и первозва́ннаго всех Христо́вых ученико́в/ похваля́ем тя любо́вию, Андре́е апо́столе, и ве́рно вопие́м ти:/ изба́ви па́ству твою́, е́йже от Бо́га вве́рился еси́,/ вся́кия ско́рби, и нужд, и вся́каго озлобле́ния.
Первозва́ннаго апо́стола Христо́ва, Ева́нгелия свята́го пропове́дника,/ Росси́йския страны́ Богодухнове́ннаго просвети́теля,/ Андре́я пресла́внаго пе́сньми восхва́лим.
Неизрече́нную Твою́ добро́ту Андре́й предуве́дев, Иису́се,/ сро́дника призва́ све́тле:/ Пе́тре единокро́вне, обрето́хом Месси́ю, в зако́не и проро́цех пропове́даннаго,/ гряди́, прилепи́мся и́стинно жи́зни.
Вожделе́вый креста́, Христо́в учениче́ Андре́е,/ получи́л еси́ кресто́м твои́м нетле́нное Ца́рство,/ к нему́же вся привле́кл еси́ кресто́м Боготаи́нники,/ насле́дство подая́й Богосло́вом Того́.
Богоро́дичен: Бо́га, Его́же родила́ еси́, Де́во Всенепоро́чная,/ моли́ о всех, благоче́стно Тя чту́щих, с первозва́нным Андре́ем,/ улучи́ти Боже́ственнаго осия́ния Твоего́ Сы́на/ и стоя́ния избра́нных и святы́х,/ и́бо мо́жеши, я́ко хо́щеши.
Ин конда́к, глас 2.
Подо́бен: Вы́шних ища́:
Петра́, ве́рнии, ка́меня ве́ры, похва́лим/ и Па́вла Богому́драго,/ созыва́ют бо всех пра́здновати ве́рою,/ собо́рне вку́пе вся двана́десяте, я́ко пропове́дники ве́ре,/ прося́ща грехо́в оставле́ния.
Седа́лен, глас 4:
Свети́ла в конце́х, ученики́ Твоя́, Христе́, яви́л еси́,/ сия́ющия душа́м, су́щим во тьме́, ра́зум Твой, Влады́ко,/ и, ле́сть и́дольскую тех ра́ди омрачи́в,/ уче́ньми благоче́стия просвети́л еси́ мир./ Тех мольба́ми спаси́ ду́ши на́ша.
Сла́ва: Всельшеся во Све́те непристу́пнем, я́ко жили́ще све́та су́щии,/ храм ваш святы́й просвеща́ете при́сно Боже́ственными пропове́дании./ Те́мже ве́рою вопие́м:/ тьмы́ нас избавля́йте, и вся́ческих бед, и лю́таго язы́ческаго наше́ствия,/ умоля́юще Зижди́теля, апо́столи.
И ны́не, Богоро́дичен:
Я́ко Де́ву и еди́ну в жена́х, Тя без се́мене ро́ждшую Бо́га пло́тию,/ вси ублажа́ем ро́ди челове́честии,/ О́гнь бо всели́ся в Тя Божества́/ и я́ко Младе́нца млеко́м пита́еши Зижди́теля и Го́спода./ Тем, а́нгельский и челове́ческий род, досто́йно сла́вим пресвято́е рождество́ Твое́ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.
Песнь 4
Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.
Апо́стол Христо́в был еси́ избра́нный/ и Богосло́ву возлю́бленному брат единоро́дный, всехва́льне Иа́кове,/ испроси́ душа́м на́шим грехо́в оставле́ние.
Пропове́дник Христо́в быв, Боже́ственный Иа́кове,/ ты, зван у́бо, ско́ро после́довал еси́,/ оте́ческую любо́вь презре́в и ве́чная измени́в теку́щими,/ те́мже неизрече́ннаго Небе́снаго насле́дия сподо́бился еси́, блаже́нне приснопа́мятне.
Све́тел тя о́блак Сло́ва, облиста́юща сла́вою обоже́на,/ на Фаво́рстей горе́ осени́, блаже́нне Иа́кове,/ и глас слы́шати Оте́ческий сподо́бился еси́,/ известву́яй Того́ Сыновство́.
Ве́рно торжеству́ем пречестну́ю па́мять твою́, Иа́кове сла́вне,/ не Алфе́ева тя сы́на,/ но я́ко апо́стола Христо́ва почита́юще./ Те́мже, Влады́чню Престо́лу предстоя́, приле́жно моли́ся спасти́ся нам.
Приими́, Богогла́се апо́столе Иа́кове, моле́бную пе́снь,/ ю́же ти прино́сим, твою́ пра́зднующе пречестну́ю и пресве́тлую па́мять:/ изба́ви от грехо́в рабы́ твоя́, верхо́вный Христо́в апо́столе.
Богоро́дичен: Сове́та Вели́каго А́нгел, от Де́вы Ма́тере я́влься ми́ру,/ пло́ть прие́м, я́ко доброде́тельми укра́шена/ ученика́ тя показу́ет и Богогла́сника, Иа́кове,/ словеса́ Его́ вети́йствующа.
Песнь 5
Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.
От ры́барей лове́ц челове́ков и Богосло́в был еси́, му́дре Иоа́нне,/ пренебре́г оте́ческую и мирску́ю любо́вь,/ Влады́це Сло́ву жела́нием Боже́ственных возсле́дуя.
Небе́сных ра́зум прии́м Богослове́снейше,/ Бо́га Сло́ва пропове́дал еси́:/ в нача́ле бе Сло́во, и Сло́во бе к Бо́гу, и Бог бе Сло́во–/ благовеству́я, науча́л еси́.
Я́коже мо́лния све́тлая, проходя́щи, вселе́нней, блаже́нне Иоа́нне, яви́лся еси́,/ чистоты́ све́тлостию, де́вства же блиста́нием/ и благоче́стия догма́ты мир просвеща́я,/ возлю́бленне Христу́ Бо́гу.
Гро́мов сын быв, челове́ком богосло́вил еси́,/ е́же в нача́ле бе Сло́во, апо́столе Иоа́нне,/ возлеги́й бо на пе́рси Влады́ки твоего́/ и отту́ду поче́рп Богосло́вия струи́,/ тва́рь всю напая́еши.
Благове́стниче Иоа́нне, равноа́нгельне,/ де́вственниче, Богосло́ве, Богонауче́нне,/ правосла́вно ми́ру пречи́стое ребро́, кро́вь и во́ду источи́вшее, пропове́дал еси́,/ и́мже ве́чную жи́знь обрета́ем душа́м на́шим.
Богоро́дичен: Егда́ предста́ла еси́ с возлю́бленным ученико́м у Креста́ Сы́на Твоего́,/ услы́шала еси́ от Него́: се сын Твой./ С ни́мже Тя вси пое́м, Богороди́тельнице Де́во.
Песнь 6
Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.
О́тчую тебе́ сла́ву Собо́ю показа́вый, Фили́ппе,/ ли́ку ученико́в тя Христо́с вчини́,/ твою́ прове́дый доброде́тель, Богоблаже́нне.
Тече́ние кра́сных твои́х ног, Фили́ппе, возврати́в к ше́ствию Небе́сному,/ возше́л еси́, ра́дуяся,/ и, Тро́ице предста́в, во Отце́ ви́диши Сы́на и Ду́ха Боже́ственнаго,/ сего́ ра́ди ве́рою всесвяще́нную твою́ и Боже́ственную пра́зднуем па́мять.
Со апо́столы все́ми честны́ми, и проро́ки, и страстоте́рпцы, Фили́ппе,/ преподо́бными, иера́рхи и пра́ведными, с Богоро́дицею моли́/ разреше́ние грехо́в мно́гих и прегреше́ний да́ти очище́ние/ ве́рою светоно́сную и Боже́ственную па́мять твою́ соверша́ющим.
Прече́стна тя ка́меня живота́ Ка́мень показа́,/ на не́мже созда́ Це́рковь Свою́, Варфоломе́е, апо́столе Госпо́день./ Те́мже тя чтим и ублажа́ем.
Кресто́м блаже́нную кончи́ну, сла́вне Варфоломе́е, прие́м,/ сообра́зен был еси́ страсте́м Учи́теля твоего́/ и прича́стник све́тлости, Боже́ственныя сла́вы,/ при́сно со А́нгелы Тому́ предстоя́/ и неизрече́ннаго све́та сподобля́емь.
Богоро́дичен: Из Тебе́ па́че сло́ва/ Бог Сло́во роди́тися благоизво́ли пло́тию, Де́во, Ма́ти Чи́стая,/ ученика́ избра́в и служи́теля при́снаго, Варфоломе́я сла́внаго.
Конда́к, глас 2.
Подо́бен: Вы́шних ища́:
Ка́мень Христо́с ка́меня ве́ры прославля́ет све́тло,/ ученико́в преизря́дна,/ и с Па́влом ве́сь дванадесяточи́сленный собо́р дне́сь,/ и́хже па́мять соверша́юще ве́рно,/ сих Просла́вльшаго прославля́ем.
И́кос:
Всечестну́ю и преблаже́нную па́мять ва́шу творя́щии ны́не,/ в пе́снех приле́жно вопие́м к вам:/ пресве́тлая и Богозра́чная свети́ла ми́ра,/ возлю́бленнии ученицы́ Христо́вы двана́десяте,/ я́ко иму́ще к Нему́ дерзнове́ние моли́тися за ны,/ вам бо дана́ е́сть благода́ть исцеле́ний и грехо́в проще́ния,/ приле́жно у́бо Его́ моли́те грехо́в и напа́стей изба́витися нам,/ да еди́наго Человеколю́бца, вас просла́вльшаго, прославля́ем.
Песнь 7
Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.
Руко́ю любопы́тною Боже́ственная ре́бра испыта́в/ и гвозде́й я́звы, я́же Безсме́ртный нас ра́ди подъя́т,/ и неве́рие преложи́в ра́достне во благове́рие, Фомо́, возопи́л еси́:/ Ты еси́ Бог мой и Госпо́дь.
Осия́н, апо́столе Фомо́, сла́вою Христо́вою,/ и, ребро́ животво́рное осяза́в,/ поче́рпл еси́ неизсле́димую Богосло́вия пучи́ну,/ и мир обогати́л еси́.
Христо́с, Вели́кое Со́лнце, лучу́ тя многосве́тлую во И́ндию посыла́ет,/ мра́чную ле́сть, таи́нниче, вско́ре разгоня́юща,/ Фомо́, прему́дре апо́столе,/ и лю́ди просвеща́юща/ Тро́ицу почита́ти Боже́ственную, Е́юже вси сохраня́емся.
Пе́рвый Христо́во Ева́нгелие написа́в/ и всю просвети́в подсо́лнечную тва́рь,/ Матфе́й, зело́ прему́дрейший и Христо́в таи́нник изя́щный,/ ны́не почита́емь свяще́нными пе́сньми,/ всем отпуще́ния грехо́в про́сит, любо́вию чту́щим Того́.
Евангели́ст от мыта́рства, я́ко после́дова Тебе́, Христе́,/ претвори́ся Богоглаго́ливый/ всеси́льною Твое́ю кре́постию, Матфе́й всеизря́днейший.
Богоро́дичен: Всепе́тую Де́ву написа́л еси́ Боже́ственными твои́ми словесы́,/ Творца́ всех ро́ждшую, апо́столе Матфе́е,/ Ему́же вси пое́м:/ препе́тый отце́в Госпо́дь и Бог, благослове́н еси́.
Песнь 8
Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.
Иу́до, бра́тия твоя́ тя похваля́ют, бра́та я́вльшася,/ и непщу́ема я́вльшагося пло́тию/ Сло́ва преве́чнаго, от Присносу́щнаго возсия́вшаго, от Нерожде́нна Роди́теля.
Апо́столе Иу́до, посыла́еши всем челове́ком/ све́тлое и уче́ния ду́ха испо́лненно посла́ние, священноявле́нне, пречу́дне.
Иу́до, апо́столе Христо́в,/ учени́к быв вопло́щшагося Бо́га на́шего,/ от Него́же, я́ко овча́ посреде́ волко́в, вои́стинну посла́лся еси́,/ сло́вом твои́м сих претворя́я злоче́стие ко благоче́стию/ и Боже́ственному разуме́нию Святы́я Троицы./ Те́мже восхваля́ем тя.
Ре́вности тезоимени́т нарече́нный, Си́моне досточу́дне,/ ре́вностию поревнова́л еси́ по Го́споде Бо́зе Вседержи́тели.
Я́ко красны́, Си́моне, твои́ но́ги,/ благоле́пен е́сть и язы́к, глаго́лющ сла́ву Христо́ву, и научи́ зва́ти:/ Го́спода по́йте и превозноси́те во вся ве́ки.
Богоро́дичен: Вся А́нгелов во́инства, Предте́че Госпо́день,/ апо́столов двоенадеся́тице, святи́и вси с Богоро́дицею,/ сотвори́те моли́тву, во е́же спасти́ся нам.
Песнь 9
Ирмо́с: Тя Пресла́вную Неве́сту и Всесвяту́ю Богоро́дицу,/ Зижди́теля ро́ждшую неви́димых же и всех ви́димых,/ пе́сньми велича́ем.
Ученико́в двоенадеся́тых яви́лся еси́, исполня́я лик блаже́нный,/ из него́же преда́тель себе́ отве́рг, приобре́те го́рькое удавле́ние,/ на Христа́ воздви́г пя́ту,/ тайновеща́телю Матфи́е чу́дне.
Светоза́рное, я́ко со́лнце, во ве́сь мир изше́дшее, веща́ние твое́/ просвеща́ет язы́ческую Це́рковь благода́тию,/ чудоно́сче Матфи́е апо́столе.
Излия́ся благода́ть во устна́х твои́х, сла́вне апо́столе Матфи́е,/ и был еси́ свети́льник Це́ркве Христо́вы,/ уча́ слове́сныя о́вцы ве́ровати в Τрόицу Единосу́щную и во Еди́но Божество́.
Досади́тель и гони́тель Це́ркве был еси́, Па́вле, всеблаже́нне,/ с Небесе́ же зван быв, защити́л еси́ сию́ пресла́вно,/ е́йже ны́не моли́ изба́витися от бед и спасти́ся душа́м на́шим.
Па́вле, уста́ Госпо́дня, основа́ние уче́ний,/ иногда́ у́бо гони́тель Иису́са Спа́са,/ ны́не же и первопресто́льник апо́столов быв, блаже́нне./ Те́мже неизглаго́ланная ви́дел еси́, му́дре,/ да́же до тре́тияго Небесе́ возше́д, и взыва́л еси́:/ прииди́те со мно́ю, и благи́х не лиши́мся.
Богоро́дичен: Со святы́ми А́нгелы, с Боже́ственными апо́столы, со сла́вными му́ченики Твоего́ моли́ Сы́на и Бо́га, Богороди́тельнице Пречи́стая,/ от бед изба́вити ду́ши на́ша.
Свети́лен.
Подо́бен: Ученико́м:
Ученико́в всечестну́ю двоенадеся́тицу ра́достно восхвали́ти стеце́мся:/ ра́дуйтеся, и́же всю подсо́лнечную обше́дше/ и язы́ков уло́вльше злове́рныя чреды́,/ научи́вшеся Боже́ственным.
Сла́ва: Двоенадесяточи́сленный лик дне́сь восхва́лим, вси ве́рнии,/ я́ко утверди́вшеся от них, и Христу́ возопие́м:/ моли́твами их, Спа́се, мир Твой умири́.
И ны́не, Богоро́дичен:
Мы о Тебе́ хва́лимся, Богоро́дице,/ и к Бо́гу Тя и́мамы предста́тельство,/ простри́ ру́ку Твою́ святу́ю и сокруши́ враги́ на́ша,/ Твои́м низпосли́ рабо́м по́мощь от Свята́го.
На хвали́тех стихи́ры, глас 2:
Гряди́те, собо́ри дне́сь ве́рных:/ благохва́льное и кра́сное собра́ние,/ благода́ти избра́нныя сосу́ды,/ апо́столы Христо́вы духо́вными пе́сньми просла́вим,/ я́ко незави́стно всем сло́во все́явше,/ с си́ми и благода́ть Ду́ха обогати́ша/ и, И́стиннаго Виногра́да су́ще ло́зие,/ грозд зрел нам возде́лаша, веселя́щ сердца́ на́ша./ К ним же открове́нным лице́м и чи́стою со́вестию возопие́м, глаго́люще:/ ра́дуйтеся, разори́тели безслове́сных и служи́тели слове́сных;/ ра́дуйтеся, всех Творца́ и Строи́теля избра́ния кра́сная;/ ра́дуйтеся, хода́таи благи́х и отгони́телие ле́стных,/ и́хже да умо́лим:/ моли́теся при́сно к Зижди́телю и Учи́телю,/ мир крепкостоя́телен ми́ру дарова́ти/ и душа́м на́шим ве́лию ми́лость.
Апо́стола вси и ученика́ Христо́ва восхва́лим пе́сньми,/ неве́рствием бо Христо́во воскресе́ние возвести́в/ и Того́ пречи́стую стра́сть осяза́нием уве́рив,/ и ны́не нам, всехва́льне Фомо́,/ проси́ ми́ра и ве́лия ми́лости.
Матфи́е апо́столе,/ лик Боже́ственный напо́лнил еси́,/ из него́же Иу́да испаде́,/ и Боже́ственными блиста́нии му́дрых твои́х слове́с/ тьму́ отгна́л еси́ идолонеи́стовства Бо́жиею благода́тию,/ и ны́не моли́ся/ дарова́ти нам мир и ве́лию ми́лость.
Ка́я темни́ца не име́ тебе́ ю́зника?/ Ка́я же Це́рковь не и́мать тя вити́ю?/ Дама́ск великому́дрствует о тебе́, Па́вле,/ веде́ бо тя запя́та све́том,/ Рим, твою́ кро́вь прие́мый, и той хва́лится,/ но и Тарс мно́жае ра́дуется/ и лю́бит, почита́я твоя́ пелены́,/ Па́вле, похвало́ вселе́нныя,/ от Ри́ма прише́дши, утверди́ нас.
Сла́ва, глас 4:
Крестообра́зно распросте́рши мре́жу ве́ры,/ двоенадеся́тица Боже́ственных апо́стол Твои́х/ вся язы́ки улови́ла е́сть к Твоему́ позна́нию, Христе́,/ и мо́ре сла́ное страсте́й изсуши́./ Сего́ ра́ди мо́лим Тя:/ из глубины́ прегреше́ний воззови́ ны/ тех всеблагоприя́тными мольба́ми.
И ны́не, Богоро́дичен.
НА ЛИТУРГИ́И
Блаже́нны от 1-го кано́на 12-ти апо́столов, пе́сни 3-я и 6-я. Прокимен, глас 8: Во всю зе́млю изы́де веща́ние их/ и в концы́ вселе́нныя глаго́лы их. Стих: Небеса́ пове́дают сла́ву Бо́жию, творе́ние же руку́ Его́ возвеща́ет тве́рдь. Апо́стол Дея́ний апо́стольских, зача́ло 2. Аллилу́ия, глас 1: Испове́дят небеса́ чудеса́ Твоя́, Го́споди. Стих: Бог прославля́емь в сове́те святы́х. Ева́нгелие от Ма́рка, зача́ло 12. Прича́стен: Во всю зе́млю:
Моли́тва
Влады́ко Всемогу́щий, Го́споди Бо́же наш, избра́вый возлю́бленныя Своя́ ученики́ и апо́столы на про́поведь спасе́ния всему́ ми́ру, да́вый им вла́сть отпуща́ти грехи́, приими́ хода́тайства их о ро́де челове́ческом, его́же и суди́ти с ни́ми и́маши, тех са́мых, я́ко друго́в Твои́х, нам зело́ че́стных, дерза́ем, недосто́йнии, в предста́тельство к Тебе́, многопоспешеству́ющее ко спасе́нию душ на́ших приводи́ти, моля́щи их усе́рдно.
Святи́и первоверхо́внии апо́столи Пе́тре и Па́вле, евангели́сти Христо́вы Иоа́нне Богосло́ве и Матфе́е, первозва́нный учениче́ Андре́е, водруже́нием креста́ Росси́ю благослови́вый, апо́столи святи́и Иа́кове, бра́те Госпо́день, со други́м Иа́ковом, Фили́ппе, Варфоломе́е, Фомо́, Си́моне, Иу́до и Матфи́е.
Вси святи́и Богоизбра́ннии апо́столи, изря́днейшии уго́дницы Христо́вы, безбо́жия искорени́телие и ве́ры и́стинныя насади́тели, помози́те нам мо́щным ва́шим пред Го́сподом хода́тайством изба́витися от вся́каго зла и вра́жия ле́сти, тве́рдо сохраня́ти пре́данную ва́ми ве́ру Правосла́вную, в не́йже ва́шим предста́тельством ни ра́нами, ни преще́нием, ни мо́ром, ни ко́им гне́вом от Созда́теля своего́ ума́лени бу́дем, но ми́рное зде поживе́м житие́ и сподо́бимся ви́дети блага́я на земли́ живы́х, сла́вяще Отца́, и Сы́на, и Свята́го Ду́ха, Еди́наго в Тро́ице сла́вимаго и покланя́емаго Бо́га, ны́не, и при́сно, и во ве́ки веко́в. Ами́нь
