Служба в честь Собора Сибирских святых
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4, глас 8:
Прииди́те, правосла́вных собо́ри,/ воспои́м святы́я, в земли́ Сиби́рстей просия́вшия,/ уче́нием к Богоразу́мию нас наста́вльшия,/ исто́чники чуде́с преди́вныя,/ Це́ркве свети́льники пресве́тлыя/ и всея́ Росси́и удобре́ние./ Ти́и бо избавля́ют нас от вся́ких злых искуше́ний и бед/ и мо́лятся о душа́х на́ших.
Сиби́рския земли́ иера́рхов пе́сньми воспои́м:/ от ни́хже Дими́трия, Иоа́нна, Филофе́я, Па́вла – Тобо́льских,/ Инноке́нтия, Софро́ния и Меле́тия – Ирку́тских,/ апо́стола Сиби́ри Инноке́нтия Моско́вскаго,/ и все па́стырское сосло́вие приво́дим в моли́тву,/ и́хже ра́ди спаси́, Христе́, ду́ши на́ша.
До́брии раби́, блази́и и ве́рнии,/ и до́брии де́лателие виногра́да Христо́ва,/ вы тяготу́ дневну́ю понесли́ есте́/ и да́нный вам тала́нт возрасти́ли есте́,/ те́мже и две́рь Небе́сная вам отве́рзеся,/ вни́дите в ра́дость Влады́ки Христа́,/ моля́щеся о нас, святи́и на́ши учи́телие.
Сла́ва, глас 6:
Челове́цы Бо́жии и ве́рнии раби́,/ служи́телие Госпо́дни, му́жие жела́ния,/ сосу́ди избра́ннии,/ столпи́ и утвержде́ние Це́ркве,/ Ца́рствия насле́дницы,/ не премолчи́те, е́же о нас вопи́ти ко Го́споду.
И ны́не, Богоро́дичен, глас то́йже:
С пресла́вными чи́нми А́нгельскими/ дне́сь, ве́рнии, духо́вно весели́мся,/ све́тло пра́зднующе пресве́тлое торжество́ Богома́тере,/ Ю́же пречи́стый Ея́ о́браз,/ я́ко исто́чник приснотеку́щий, яви́ся,/ исцеле́ния незави́стныя дары́ при́сно источа́ющ.
На стихо́вне стихи́ры, глас 2.
Подо́бен: До́ме Евфра́фов:
Дом и жили́ще/ Ду́ха Пресвята́го/ святи́и вси, в Сиби́ри просия́вшии, бы́ли есте́,/ те́мже и нас дом Того́ соде́лайте,/ святу́ю ва́шу па́мять почита́ющих.
Стих: Честна́ пред Го́сподем/ сме́рть преподо́бных Его́.
Гра́де Тобо́льск,/ земле́ Сиби́рская,/ красу́йся и лику́й/ собо́ром Сиби́рских святы́х,/ ны́не благоче́стно на́ми прославля́емых.
Стих: Уста́ пра́веднаго поуча́тся прему́дрости,/ и язы́к его́ возглаго́лет суд.
Святи́и вси земли́ Сиби́рския,/ моли́те Человеколю́бца Бо́га,/ да изба́вит нас/ от вся́ких бед и напа́стей/ и да́рует нам живо́т ве́чный.
Сла́ва, глас и подо́бен то́йже:
Святи́телем похвала́ и свяще́нником сла́ва,/ пра́вило мона́шествующим, му́чеников весе́лие/ и пра́ведных ра́дование вы есте́,/ святи́и вси, в земли́ Сиби́рстей просия́вшии./ Моли́теся ко Го́споду спасти́ся душа́м на́шим.
И ны́не, глас то́йже:
О Всепе́тая Ма́ти,/ умилосе́рдися на моле́ние на́ше,/ Твое́ бо есмы́ достоя́ние,/ всех спаси́ и поми́луй,/ да Тя, вси ро́ди, непреста́нно велича́ем.
Тропа́рь, глас 3, зри на вели́цей вече́рни.
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры на 8, глас 8:
Да возвесели́тся дне́сь земля́ Сиби́рская,/ наста́ бо пресве́тлый де́нь па́мяти святи́теля и чудотво́рца Иоа́нна/ и всех святы́х, в ней просия́вших./ Да ра́дуются насе́льницы сея́ страны́,/ име́юще святы́я и многоцеле́бныя мо́щи/ сла́внаго уго́дника Бо́жия./ Да возра́дуются го́ры и хо́лми, пусты́ни и доли́ны сиби́рския,/ восхваля́ющи Го́спода, да́вшаго нам святы́х покрови́телей,/ непреста́нно моля́щихся о спасе́нии душ на́ших.
Дне́сь све́тло красу́ется сла́вный град Тобо́льск/ Боже́ственным сокро́вищем моще́й твои́х, святи́телю Иоа́нне,/ и па́ства твоя́, ликовству́ющи, ра́дуется,/ и правосла́внии твои́м просвеще́нием, блаже́нне, хва́лятся./ Ты же, о́тче наш Иоа́нне, с собо́ром сиби́рских святы́х/ моли́ Человеколю́бца, Христа́ Бо́га на́шего,/ лю́дем правосла́вным тишину́ дарова́ти,/ и земли́ плодоро́дие, и ве́лию ми́лость.
Глас 1: Прииди́те, правосла́вных собо́ри,/ воспои́м святи́теля Дими́трия, архипа́стыря Сиби́ри,/ уче́нием к Богоразу́мию нас наста́вльшаго,/ исто́чника чуде́с преди́внаго,/ це́ркве свети́льника пресве́тлаго/ и всея́ Росси́и прекра́сное удобре́ние,/ учи́теля Росто́ву прему́драго./ Той бо избавля́ет нас от вся́ких искуше́ний и бед,/ со святи́телем Иоа́нном и все́ми святы́ми, в Сиби́ри просия́вшими,/ мо́лится о душа́х на́ших.
Глас 2: Пе́сньми свяще́нными восхва́лим святи́тели Христо́вы:/ Иоа́нна, Филофе́я и Па́вла,/ от Ки́евския Ла́вры благослове́ние земли́ Сиби́рстей прине́сших/ и све́том Ева́нгелия Христо́ва просвети́вших ю,/ ти́и бо со все́ми святы́ми, в ней просия́вшими,/ мо́лятся Го́споду спасти́ся душа́м на́шим.
Глас 3: Вы есте́ сла́ва гра́да Ирку́тска,/ святи́телие Христо́вы Инноке́нтие, Софро́ние и Меле́тие,/ вы есте́ украше́ние Сиби́рския земли́,/ похвала́ Це́ркве Правосла́вныя,/ в не́йже процвели́ есте́, я́ко кри́ни благода́тнии,/ и возсия́ли, я́ко свети́льницы пресве́тлии,/ со святи́телем Иоа́нном и со все́ми святы́ми, в Сиби́ри просия́вшими,/ моли́теся ко Го́споду спасти́ся душа́м на́шим.
Глас 4: Дне́сь лику́ют собо́ри ве́рных/ в па́мять твою́, святи́телю Инноке́нтие, и велегла́сно вопию́т:/ ты, любве́ ра́ди Христо́вы, страну́ свою́ оста́вив,/ всели́лся еси́ на морски́х острове́х,/ да просвети́ши све́том Ева́нгелия неве́дущих Христа́,/ иде́же апо́стольски труди́лся еси́./ Язы́ческая племена́ крести́в,/ доброде́ланию их научи́л еси́,/ челове́ческия обы́чаи украси́л еси́, вопию́щих ти:/ ра́дуйся, просвети́телю наш,/ со все́ми святы́ми, в Сиби́ри просия́вшими,/ Го́сподеви моли́ся дарова́ти душа́м на́шим/ мир и ве́лию ми́лость.
Глас 5: Да весели́тся Сиби́рская страна́,/ в не́йже Госпо́дь яви́ уго́дника Своего́, пра́веднаго Симео́на,/ близ гра́да Верхоту́рья по́двигом юро́дства Христа́ ра́ди подвиза́вшагося,/ защи́тника Правосла́вия и проти́вников святы́я Це́ркве посрами́теля,/ ско́раго помо́щника в напа́стех и ско́рбех,/ цели́теля ве́рных и неве́рных./ Ты же, блаже́нне Симео́не,/ со все́ми святы́ми, в Сиби́ри просия́вшими,/ моли́ся о нас ко Го́споду,/ дарова́ти душа́м на́шим мир и ве́лию ми́лость.
Глас 6: Бо́жиим смотре́нием от гра́да Яросла́вля в Мангазе́ю прише́дшаго/ и за целому́дрие от господи́на своего́ пострада́вшаго,/ Васи́лия страстоте́рпца, пе́рваго му́ченика земли́ Сиби́рския почти́м./ Той бо Престо́лу Бо́жию с собо́ром святы́х, в Сиби́ри просия́вших, предстои́т/ и мо́лится о спасе́нии душ на́ших.
Сла́ва, глас 8:
Святи́телю Христо́в Иоа́нне,/ хла́дныя Сиби́ри моли́твенниче,/ гра́да Тобо́льска стено́ необори́мая,/ Росси́йския страны́ стра́же благода́тный,/ преподо́бных и пра́ведных соприча́стниче, святи́телей похвало́,/ не забу́ди чад твои́х и со все́ми святы́ми, в Сиби́ри просия́вшими,/ моли́ся Го́сподеви дарова́ти душа́м на́шим ве́лию ми́лость.
И ны́не, глас то́йже: Ца́рь Небе́сный:
Вход. Проки́мен дне и чте́ния три.
Проро́чества Иса́иина чте́ние (глава́ 35):
Ра́дуйся, пусты́ня жа́ждущая,/ да весели́тся пусты́ня и да цвете́т, я́ко крин./ И процвете́т и возвесели́тся пусты́ня Иорда́нова,/ и сла́ва Лива́нова даде́ся ей и че́сть Карми́лова,/ и у́зрят лю́дие Мои́ сла́ву Госпо́дню и высоту́ Бо́жию./ Укрепи́теся, ру́це осла́бленныя и коле́на разсла́бленная,/ уте́шитеся, малоду́шнии умо́м, укрепи́теся, не бо́йтеся:/ се Бог наш суд воздае́т и возда́ст,/ Той прии́дет и спасе́т нас./ Тогда́ отве́рзутся о́чи слепы́х и у́ши глухи́х услы́шат./ Тогда́ ско́чит хромы́й, я́ко еле́нь,/ и я́сен бу́дет язы́к гугни́вых,/ я́ко прото́ржеся вода́ в пусты́ни и де́брь в земли́ жа́ждущей./ И безво́дная бу́дет во езе́ра,/ и на жа́ждущей земли́ исто́чник водны́й бу́дет:/ та́мо бу́дет весе́лие пти́цам, и сели́тва тро́сти, и лу́зи./ И та́мо бу́дет пу́ть чист, и пу́ть свят нарече́тся;/ и не пре́йдет та́мо нечи́стый,/ ниже́ бу́дет та́мо пу́ть нечи́ст,/ рассе́яннии же по́йдут по нему́ и не заблу́дят./ И не бу́дет та́мо льва́, ни от звере́й злых не взы́дет на́нь, ниже́ обря́щется та́мо,/ но по́йдут по нему́ изба́вленнии./ И со́браннии Го́сподем обратя́тся и прии́дут в Сио́н с ра́достию,/ и ра́дость ве́чная над главо́ю их./ Над главо́ю бо их хвала́ и весе́лие, и ра́дость прии́мет я:/ отбеже́ боле́знь, и печа́ль, и воздыха́ние.
Прему́дрости Соломо́новы чте́ние (гла́вы 5 и 6):
Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́,/ и вооружи́т тва́рь в ме́сть враго́м./ Облече́тся в броня́ пра́вды,/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те держа́щии мно́жества и гордя́щиися о наро́дех язы́к,/ я́ко дана́ е́сть от Го́спода держа́ва вам/ и си́ла от Вы́шняго.
Прему́дрости Соломо́новы чте́ние (гла́вы 4, 6, 7 и 2):
Похваля́ему пра́веднику, возвеселя́тся лю́дие./ Безсме́ртие бо е́сть па́мять его́,/ я́ко от Го́спода познава́ется и от челове́к./ И уго́дна Го́сподеви душа́ его́./ Возлюби́те у́бо, о му́жие, му́дрость и поживете́;/ восхощи́те ея́ и нака́зани бу́дете./ Нача́ло бо ея́ – любы́ и соблюде́ние зако́на./ Почти́те прему́дрость, да во ве́ки ца́рствуете./ Возвещу́ вам и не скры́ю от вас та́ин Бо́жиих,/ я́ко Той му́дрости Наста́вник е́сть,/ и му́дрых Испра́витель, и вся́кому смы́слу и де́лу Хитре́ц./ И всем смы́слом научи́т му́дрость./ Е́сть бо в ней Дух разу́мен и Свят,/ и сия́ние Све́та Присносу́щнаго,/ и о́браз бла́гости Бо́жия./ Та дру́ги Бо́жия и проро́ки устроя́ет./ Благоле́пнейши же е́сть со́лнца и па́че вся́каго сотворе́ния звезд,/ све́ту сосужда́ема, обрета́ется пе́рвейши./ Та угожда́ющия ей от боле́зни изба́ви/ и наста́ви на стези́ пра́выя./ Даде́ им ра́зум име́ти свят, и сохрани́ я от ловя́щих,/ и по́двиг кре́пок подаде́ им./ Да разуме́ют все, я́ко си́льнейши всего́ е́сть благоче́стие/ и никогда́же премо́жет зло́ба му́дрости,/ ниже́ пре́йдет злы́я, облича́ющи суд./ Реко́ша же в себе́, помы́сливше непра́ведно:/ наси́льствуем пра́ведному и не пощади́м преподо́бства его́,/ ни усрами́мся седи́н ста́рости многоле́тны./ Бу́дет бо нам кре́пость зако́н,/ и улови́м пра́веднаго, я́ко неуго́ден нам е́сть:/ и проти́вится дело́м на́шим, и поно́сит нам отпаде́ние зако́на,/ и облича́ет нам согреше́ния наказа́ния на́шего./ Возвеща́ет нам ра́зум име́ти Бо́жий/ и о́трока Госпо́дня себе́ имену́ет./ Бы́сть нам на обличе́ние помышле́нием на́шим/ и тя́жек нам е́сть и ви́димь,/ я́ко неподо́бно ины́м житие́ Его́ и измене́ны стези́ Его́:/ в поруга́ние вмени́хомся Ему́,/ и удаля́ется от путе́й на́ших, я́ко от нечисто́т,/ и блажи́т после́дняя пра́ведных./ Уви́дим у́бо, а́ще словеса́ Его́ и́стинна су́ть:/ иску́сим, я́же сбыва́ются Ему́./ Руга́нием и му́кою истя́жем Его́,/ да разуме́ем кро́тость Его́ и иску́сим беззло́бство Его́:/ сме́ртию безобра́зною осу́дим Его́,/ бу́дет бо посеще́ние от слове́с Его́./ Сия́ помы́слиша и прельсти́шася:/ ослепи́ бо я зло́ба их, и не разуме́ша та́ин Бо́жиих,/ и не разсуди́ша, я́ко Ты еси́ Бог еди́н, живота́ име́яй и сме́рти вла́сть,/ и спаса́яй во вре́мя ско́рби, и избавля́яй от вся́каго зла./ Щедр, и Ми́лостив, и дая́ преподо́бным Свои́м благода́ть,/ и Свое́ю мы́шцею го́рдым противля́яся.
На лити́и стихи́ра, глас 6:
Прииди́те, христолюби́вии лю́дие,/ су́щия в земли́ Сиби́рстей святы́я восхва́лим:/ святи́телей Тобо́льских и всея́ Сиби́ри/ Дими́трия, Иоа́нна, Филофе́я и Па́вла,/ Ирку́тских иера́рхов Инноке́нтия, Софро́ния и Меле́тия,/ апо́стола Сиби́ри святи́теля Инноке́нтия Моско́вскаго,/ свята́го пра́веднаго Симео́на Верхоту́рскаго и му́ченика Васи́лия Мангазе́йскаго/ и вку́пе имену́емыя и неимену́емыя,/ сии́ бо вои́стинну де́лы и словесы́ и многови́дным житие́м соде́лашася свя́ти,/ и́хже Бог чудесы́ просла́ви,/ и ны́не, просла́вльшему их Христу́ предстоя́ще,/ мо́лятся приле́жно о нас,/ соверша́ющих све́тлое их торжество́.
Сла́ва, глас 8:
Дне́сь наста́ со́лнца светле́йший пра́здник/ собо́ра Сиби́рских святы́х,/ ве́рныя к весе́лию созыва́ет/ и луча́ми ра́дости всех просвеща́ет./ В них бо яви́ся сла́ва Христо́ва,/ сла́ва Це́ркве Правосла́вныя,/ ди́вными сия́ющи чудесы́,/ те́мже, ве́рнии, любо́вию вопие́м:/ моли́теся о нас, святи́и вси, в Сиби́ри просия́вшии.
И ны́не, глас то́йже:
Да ра́дуются ра́достию Боже́ственною/ насе́льницы Сиби́рския земли́,/ зря́ще те́плую Засту́пницу,/ ди́вную побе́ду да́рующу на проти́вныя,/ и да пою́т Боже́ственными пе́сньми.
На стихо́вне стихи́ры, глас 5.
Подо́бен: Ра́дуйся:
Ра́дуйтеся, святи́телие Христо́вы,/ Сиби́рския страны́ храни́телие,/ моля́щимся кре́пкое упова́ние,/ боля́щих безме́зднии цели́телие,/ ни́щих пита́телие/ и всем христиа́ном му́дрии наста́вницы./ Бу́дите всем нам засту́пницы необори́мии/ и о всем ми́ре моли́твенницы.
Стих: Честна́ пред Го́сподем/ сме́рть преподо́бных Его́.
Ра́дуйся, гра́де Тобо́льск,/ такова́го сподо́бивыйся име́ти в себе́ святи́теля,/ и́же я́ко дар свы́ше от Бо́га дарова́ся тебе́,/ и я́ко бога́тство неоску́дное посла́ся тебе́,/ и я́ко дража́йшее сокро́вище вве́рися ти,/ нетле́нныя цельбопода́тельныя мо́щи святи́теля Иоа́нна,/ апо́стольски в стране́ Сиби́рстей потруди́вшагося,/ тьму́ нече́стия от Тебе́ отгна́вшаго,/ защи́тника и засту́пника твоего́,/ стено́ю моли́тв свои́х кре́пко тя огражда́ющаго,/ Бо́гу о тебе́ предста́тельствующаго/ и моля́щагося вы́ну,/ да прие́млеши всегда́ ве́лию ми́лость.
Стих: Свяще́нницы Твои́ облеку́тся в пра́вду,/ и преподо́бнии Твои́ ра́достию возра́дуются.
Ра́дуйся, мона́шескаго жития́ све́тлый о́бразе,/ моли́твенное пра́вило, о́ко недре́млющее,/ собесе́дниче А́нгелов, па́стырю учи́тельный,/ на ста́до свое́ с Небесе́ взира́ющий,/ святи́телю Иоа́нне,/ с собо́ром Сиби́рских святы́х моли́ся Го́сподеви/ поми́ловатися душа́м на́шим.
Сла́ва, глас 8:
Дне́сь све́тло красу́ется сла́вный град Тобо́льск/ и ча́да Це́ркве Христо́вы ра́дуются,/ прославля́юще собо́р Сиби́рских святы́х,/ и ре́вностию ко спасе́нию просвеща́ются, взыва́юще:/ моли́твами, Го́споди, всех святы́х, в Сиби́ри просия́вших,/ спаси́ ду́ши на́ша.
И ны́не, Богоро́дичен: Безневе́стная Де́во:
Тропа́рь Собо́ра Сиби́рских святы́х, глас 3:
Це́ркве Христо́вы свети́льницы,/ всея́ Росси́и украше́ние,/ святи́и вси, в земли́ Сиби́рстей просия́вши,/ Влады́ку всех моли́те/ мир вселе́нней дарова́ти/ и душа́м на́шим ве́лию ми́лость.
Ин тропа́рь, глас 4:
Це́ркве Христо́вы свети́льницы,/ всея́ Росси́и украше́ние,/ страны́ Сиби́рския просвети́телие,/ от тьмы́ дре́вняго неве́рия и пре́лести и́дольския лю́ди изба́вльшии,/ наста́вницы благоче́стия, святи́телие Христо́вы:/ Дими́трие, Инноке́нтие, Иоа́нне,/ Софро́ние, Па́вле, Меле́тие/ и апо́столе Инноке́нтие/ с пра́ведными Васи́лием страстоте́рпцем и Симео́ном Верхоту́рским,/ Престо́лу Го́спода Вседержи́теля предстоя́ще,/ Влады́ку всех моли́те/ мир вселе́нней дарова́ти/ и душа́м на́шим ве́лию ми́лость.
Сла́ва, и ны́не, Богоро́дичен.
НА У́ТРЕНИ
На Бог Госпо́дь: тропа́рь Собо́ра Сиби́рских святы́х, два́жды.
Сла́ва, тропа́рь святи́теля Иоа́нна, глас 8:
Наста́вниче благоче́стия,/ сиро́тствующих пита́телю,/ скорбя́щих уте́шителю,/ неду́гующих врачу́ безме́здный,/ душе́ю стра́ждущих ско́рый помо́щниче,/ те́плый моли́твенниче о всех ко Го́споду,/ святи́телю о́тче наш Иоа́нне,/ моли́ Христа́ Бо́га спасти́ся душа́м на́шим.
И ны́не, Богоро́дичен, глас то́йже: И́же нас ра́ди:
По 1-м стихосло́вии седа́лен, глас 6:
В па́мяти святы́х, в земли́ Сиби́рстей просия́вших, ве́рнии лю́дие пра́зднуют,/ Небеса́ ра́дуются и земли́ на́шея концы́ веселя́тся./ Тех моли́твами да́руй, Го́споди, душа́м на́шим ве́лию ми́лость.
Сла́ва, и ны́не, Богоро́дичен:
Сла́ва на Небеси́ и на земли́ торжество́,/ я́ко Богоро́дица со святы́ми, в земли́ Сиби́рстей просия́вшими,/ мо́лится за вся ны к Сы́ну Своему́ и Бо́гу на́шему.
По 2-м стихосло́вии седа́лен, глас 2:
Равноа́нгельно пожи́л еси́, святи́телю Иоа́нне, на земли́,/ ра́вное стоя́ние и́маши со А́нгелы на Небеси́./ Те́мже тя, я́ко челове́ка Бо́жия, ублажа́юще,/ па́мять твою́ и всех святы́х, в Сиби́ри просия́вших, соверша́ем ра́достно,/ ча́юще от Христа́ Бо́га на́шего улучи́ти мир и ве́лию ми́лость.
Сла́ва, и ны́не, Богоро́дичен:
Се храм пресве́тел и ме́сто свяще́ния, иде́же честна́я ико́на Ма́тере Бо́жия Сло́ва,/ приступи́те, челове́цы, и исцеле́ние почерпи́те,/ я́ко спасе́ние Той ра́ди дарова́ся ро́ду челове́ческому.
По полиеле́и велича́ние:
Велича́ем вас,/ святи́и вси, в земли́ Сиби́рстей просия́вшии,/ и чтим святу́ю па́мять ва́шу,/ вы бо моли́те о нас/ Христа́ Бо́га на́шего.
Стих: Прииди́те, ча́да, послу́шайте мене́,/ стра́ху Госпо́дню научу́ вас.
Велича́ем тя,/ святи́телю о́тче наш Иоа́нне,/ и чтим святу́ю па́мять твою́,/ ты бо мо́лиши о нас/ Христа́ Бо́га на́шего.
Стих: Воззва́ша пра́веднии/ и Госпо́дь услы́ша их.
Велича́ем вас,/ святи́телю о́тче наш Иоа́нне/ и вси святи́и, в земли́ Сиби́рстей просия́вшии,/ и чтим святу́ю па́мять ва́шу,/ вы бо моли́те о нас/ Христа́ Бо́га на́шего.
По полиеле́и седа́лен, глас 4:
Земля́ весели́тся и Не́бо ра́дуется, отцы́ преподо́бнии,/ восхваля́юще по́двиги и труды́ ва́ша, душе́вное благомо́щие и ума́ чистоту́,/ зако́ном бо естества́ не победи́стеся, о собо́ре святы́й и по́лче Боже́ственный.
Сла́ва, и ны́не, Богоро́дичен:
Ра́дуйся, Богоро́дице Де́во,/ ра́дуйся, похвало́ всей вселе́нней,/ ра́дуйся, Чи́стая Ма́ти, Бо́гу благослове́нная.
Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Иоа́нна, зача́ло 36.
По 50-м псалме́ стихи́ра, глас 6:
Егда́ святы́я мо́щи твоя́/ в собо́рную це́рковь Богома́тере гра́да Тобо́льска приноси́ми бя́ху,/ иера́рси, свяще́нницы, и́ноцы и вси лю́дие, лику́юще, возра́довашася./ И о́ви у́бо, окружа́юще ра́ку твою́, удивля́хуся нетле́нию твоему́./ О́вии же чудя́хуся благоуха́нию твоему́, от моще́й твои́х исходя́щему./ Ини́и же чуде́сная от Тебе́ быва́емая прославля́ху./ Митрополи́т же Варфоломе́й со слеза́ми вопия́ше ти:/ о вели́кий уго́дниче Бо́жий, о́тче наш Иоа́нне!/ Ви́жду я́сно ми́лость Бо́жию, тобо́ю явле́нную, и вопию́:/ сла́ва Го́споду благоизво́лившему дарова́ти Сиби́ри таково́е утеше́ние./ Ты же, о святи́телю чу́дный,/ со всем Собо́ром Сиби́рских святы́х,/ моли́ся приле́жно Христу́ Бо́гу/ спасти́ся па́стве твое́й и стране́ на́шей невреди́мой бы́ти.
Кано́н всем святы́м, в Сиби́ри просия́вшим, его́же краегране́сие: Собо́р Сиби́рских святы́х любо́вию благоче́стно восхваля́ем. Глас 1.
Песнь 1
Ирмо́с: Пе́снь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.
Припе́в: Вси святи́и земли́ Сиби́рския, моли́те Бо́га о нас.
Сло́ве Бо́жий, помози́ нам досто́йно воспе́ти Собо́р Сиби́рских святы́х,/ све́том Ева́нгелия Христо́ва зе́млю Сиби́рскую просвети́вших/ и всех научи́вших пе́ти Тебе́ побе́дную пе́снь, я́ко просла́вися.
О́трасль честна́я роди́телей твои́х благочести́вых Макси́ма и Евфроси́нии был еси́, о́тче Иоа́нне,/ кни́жному науче́нию во гра́де Ки́еве и́ми определе́н/ и, преуспева́я му́дростию, уразуме́л еси́ глаго́лы жи́зни ве́чныя,/ учи́телем и наста́вником подвиза́яся, поуча́л еси́ всех воспева́ти Го́сподеви пе́снь, я́ко просла́вися.
Бла́го е́сть му́жу, егда́ во́змет яре́м в ю́ности свое́й, глаго́лет Свято́е Писа́ние./ Сему́ после́дуя, с ра́достию и́го Госпо́дне от ю́ности восприя́л еси́, блаже́нне Иоа́нне,/ роди́тели, и вся, я́же в ми́ре, оста́вил еси́,/ в Ки́ево-Пече́рскую Ла́вру прише́д, а́нгельский о́браз восприи́м,/ по́двигом до́брым подвиза́лся еси́, ку́пно со и́ноки воспева́я пе́снь Бо́гу, я́ко просла́вися.
О́трок сый от гра́да Яросла́вля в зе́млю Сиби́рскую, в преде́лы Мангазе́и прише́д,/ иде́же за целому́дрие и благоче́стие от господи́на своего́ пострада́в,/ венце́м му́ченическим от Бо́га венча́лся еси́,/ на земли́ нетле́нием просла́вился еси́ и чудесы́./ Престо́лу Госпо́дню с Собо́ром Сиби́рских святы́х предстоя́, первому́чениче Сиби́рския страны́, свя́те Васи́лие,/ моли́ся о нас, да вси воспое́м пе́снь побе́дную Христу́ Бо́гу на́шему, я́ко просла́вися.
Ро́да зна́тнаго и оте́чества твоего́ устрани́лся еси́, блаже́нне Симео́не,/ и ма́нием Бо́жиим возведе́н был еси́ в страну́ Сиби́рскую,/ иде́же близ гра́да Верхоту́рья подвиза́яся, в шве́нии оде́жд труди́лся еси́ во бла́го неиму́щим,/ помышля́я одея́ние души́ твоея́, в не́мже да вни́деши в черто́г Спа́сов,/ Ему́же со все́ми святы́ми, в Сиби́ри просия́вшими, побе́дную пе́снь пое́ши, я́ко просла́вися.
Богоро́дичен: Се вре́мя благоприя́тно, и де́нь спасе́ния,/ в не́мже зна́мение ико́ны Твоея́, Пречи́стая, показа́ся,/ е́же пра́зднующе, све́тло духо́вне торжество́ соверша́ем.
Катава́сия: Отве́рзу уста́ моя́:
Песнь 3
Ирмо́с: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми не́бо утвержде́й второ́е/ и основа́вый на вода́х зе́млю, Всеси́льне.
Иера́рси Христо́вы, Сиби́рския страны́ просвети́телие,/ со все́ми святы́ми, в ней просия́вшими, моли́теся за ны ко Го́споду,/ да утвердя́тся сердца́ на́ша в во́ли Его́, во е́же по́двигом до́брым подвиза́тися,/ ве́ру соблюсти́ и насле́довати Ца́рствие Небе́сное.
Бра́тию Ла́вры умиля́л еси́ по́двиги твои́ми, о́тче Иоа́нне,/ непреста́нно пропове́дуя сло́во Бо́жие, и́мже всех приходя́щих поуча́л еси́,/ да в Го́споде утвердя́тся сердца́ их,/ во е́же благоугожда́ти Христу́ Бо́гу и твори́ти святу́ю во́лю Его́.
Иоа́нне Богому́дре, ты, име́я любо́вь ко оте́честву и Ла́вре,/ я́ко муж свят, доброде́телию и му́жеством укра́шен,/ а́ще и юн лета́ми, в Вели́кую Росси́ю по́слан был еси́ защи́ты от наше́ствия ту́рок проси́ти,/ и не то́кмо по́мощь оте́честву твоему́ в бе́дственное, во́инских бра́ней вре́мя,/ но и приста́нище и́ноком Ки́ево-Пече́рския Ла́вры получи́л еси́,/ да в нем новопече́рскую Све́нскую оби́тель устро́иши/ и научи́ши всех непреста́нно сла́вити Христа́, Спа́са душ на́ших.
Росси́йский Златоу́сте, ри́торе изя́щнейший, правосла́вных архиере́ев удобре́ние,/ Це́ркве Тобо́льския и Росто́вския украше́ние,/ благоче́стия свети́льниче пресве́тлый, святи́телю о́тче Дими́трие,/ ты отгоня́л еси́ душевре́дных во́лков от Христо́вы огра́ды твои́ми богодухнове́нными уче́нии,/ назира́й и ны́не, да не ка́ко суему́дрия возмутя́т тишину́ церко́вную,/ но па́че моли́ Человеколю́бца Бо́га, да еди́ными усты́ и еди́ным се́рдцем восхва́лим Его́ благоутро́бие.
Сохрани́, святи́телю Дими́трие, оте́чество твое́ ненаве́тно от враго́в/ и да́руй на сопроти́вных побе́ду и одоле́ние,/ да тя со всем Собо́ром Сиби́рских святы́х пе́сньми прославля́ем.
Богоро́дичен: Ку́ю Ти досто́йную похвалу́ на́ше принесе́т коне́чное неможе́ние,/ я́ко явле́нием пречи́стыя Твоея́ Боже́ственныя ико́ны/ незави́стныя исто́чники целе́бныя источа́еши ве́рно прибега́ющим к Тебе́ рабо́м Твои́м.
Конда́к святи́теля Иоа́нна, глас 2:
Яви́лся еси́ во тьме́ неве́дения пребыва́ющим просвети́тель,/ вдов и сиро́т уте́шитель,/ ди́вный врач немощству́ющих,/ младе́нцев и отроко́в наста́вник,/ роди́телем же пресве́тлое ра́дование,/ святи́телю о́тче Иоа́нне,/ моли́ Христа́ Бо́га пода́ти стране́ на́шей в ве́ре утвержде́ние,/ во́инству на́шему на враги́ побе́ду и одоле́ние,/ лю́дем же свои́м ве́лию ми́лость.
Сла́ва, седа́лен Собо́ра Сиби́рских святы́х, глас 4:
О всех сла́вных, Це́ркви Святе́й благода́тию Бо́жиею от вас быва́емых,/ благода́рственная Бо́гу воздаю́ще/ и Того́ боголе́пное снизхожде́ние сла́вяще,/ мо́лим вас, святи́и вси, в Сиби́ри просия́вшии,/ помози́те и нам обрести́ благода́ть и ми́лость в Де́нь Су́дный.
И ны́не, Богоро́дичен:
Под кров Твой, Влады́чице, вси земноро́днии прибега́юще,/ вопие́м Ти, Богоро́дице, упова́ние на́ше:/ изба́ви ны от безме́рных прегреше́ний и спаси́ ду́ши на́ша.
Песнь 4
Ирмо́с: Ду́хом прови́дя, проро́че Авваку́ме, Словесе́ воплоще́ние,/ пропове́дал еси́, вопия́:/ внегда́ прибли́житися ле́том – позна́ешися,/ внегда́ приити́ вре́мени – пока́жешися./ Сла́ва си́ле Твое́й, Го́споди.
И́стиннии храни́телие апо́стольских преда́ний, Ду́ха облиста́ющии зари́,/ зе́млю на́шу освети́вшии сия́нием до́брых дел ва́ших,/ святи́и вси, в Сиби́ри просия́вшии, и нас научи́те пе́ти:/ сла́ва си́ле Твое́й, Го́споди.
Храм Ду́ха Свята́го был еси́, всеблаже́нне Иоа́нне,/ рука́ма свои́ма прия́л еси́ у́зды правле́ния оби́тели Све́нския/ и ко спасе́нию подвиза́ющихся в ней призыва́л еси́, помышля́я:/ я́ко вене́ц без побе́ды, побе́да без по́двига,/ по́двиг без бра́ни, бра́нь без враго́в не быва́ет./ И та́ко во оби́тели четырена́десять лет подвиза́яся, научи́л еси́ всех пе́ти:/ сла́ва си́ле Твое́й, Го́споди.
Све́нстей новопече́рстей оби́тели ре́вностно служа́,/ Ки́ево-Пече́рстей Ла́вре утвержде́ние был еси́, преподо́бне Иоа́нне,/ егда́ пе́рвую благослове́нную гра́моту наме́стнику ея́ прине́сл еси́,/ ю́же Патриа́рх Моско́вский тебе́ вручи́./ Отсе́ле и бы́сть нача́ло присоедине́ния митропо́лии Ки́евския к Москве́,/ на ра́дость Це́ркве Христо́вы, да вси, ча́да ея́, еди́ными усты́ пою́т:/ сла́ва си́ле Твое́й, Го́споди.
Ве́лия ра́дости исполня́ются дне́сь лю́дие Сиби́рстии,/ ви́дяще, я́ко зве́зды, сия́ющия святы́я своя́, в ни́хже и святи́тель Филофе́й, в схи́ме Фео́дор, прославля́ется;/ благода́тию Бо́жиею храни́мый в опа́сности сме́ртней,/ язы́ческая куми́рни со и́долы их сокруши́ и научи́ всех пе́ти:/ сла́ва си́ле Твое́й, Го́споди.
Я́ко ко́нь храбре́йший, подо́бяся Па́влу апо́столу,/ спаси́тельное ежде́ние и богопропове́дничество в суро́вем се́вере Сиби́ри соверша́л еси́, Богопросвеще́нне Филофе́е,/ прее́мнику твоему́ святи́телю Иоа́нну в труде́х сподви́жник был еси́/ и, по преставле́нии его́ Тобо́льскую митропо́лию па́ки восприи́м,/ хра́мы, шко́лы просвеще́ния и оби́тели и́ноческия созида́я, тече́ние свое́ соверши́л еси́./ Во оби́тели Святы́я Тро́ицы гра́да Тюме́ни те́лом почи́л еси́, на небеси́ воспева́еши Бо́гу:/ сла́ва си́ле Твое́й, Го́споди.
Богоро́дичен: Те́плая Засту́пнице к Тебе́ прибега́ющих и ненаде́ющихся наде́ждо,/ ви́ждь ско́рбь люде́й Твои́х/ и пода́ждь по́мощь, в зна́мении Твое́м, Пречи́стая.
Песнь 5
Ирмо́с: Све́тлый нам возсия́й Свет Присносу́щный,/ у́тренюющим о судьба́х за́поведей Твои́х,/ Влады́ко Человеколю́бче, Христе́ Бо́же наш.
Исцеле́ния всем подае́те, творя́щим па́мять ва́шу,/ святи́и вси, в земли́ Сиби́рстей просия́вшии./ Моли́теся за ны ко Го́споду, да возсия́ет и нам свет Свой присносу́щный, я́ко Человеколю́бец.
Христо́с Госпо́дь чрез святи́теля Феодо́сия в Черни́гов тя призыва́ет, блаже́нне Иоа́нне,/ и архимандри́том Еле́цкия оби́тели поставля́ет,/ та́же по кончи́не его́ и на высоту́ святи́тельства возво́дит,/ да па́ству черни́говскую упасе́ши и уче́нием богосло́вия обогати́ши ю,/ во е́же непреста́нно славосло́вити Го́спода Человеколю́бца.
Любо́вь Бо́жию тебе́, святи́телю о́тче Иоа́нне, на одре́ сме́ртнем лежа́щу,/ святи́тель Феодо́сий явля́ет и в чу́дном виде́нии ра́достно веща́ет:/ не скорби́, бра́те! Госпо́дь услы́ша моли́тву твою́ и ты бу́деши здрав,/ возста́ни от одра́, гото́в бу́ди служи́ти Литурги́ю Боже́ственную, се зна́мение тебе́./ И бы́сть та́ко, да вси прославля́ют Го́спода, посети́вшаго тя человеколю́бием Свои́м.
Ю́же от обурева́ний Це́рковь Христо́ву/ благовествова́нием и́стин Ева́нгельских и святооте́ческих преда́ний ре́вностно огражда́я/ и па́ству Сиби́рскую му́дре управля́я,/ вся находя́щия ти ско́рби сла́дце терпе́л еси́, святи́телю Па́вле,/ рассужда́я рече́нное, я́ко недосто́йни су́ть стра́сти ве́ка сего́ к хотя́щей яви́тися в нас сла́ве.
Боже́ственным жела́нием о благоле́пии до́му Бо́жия горя́,/ всеусе́рдное попече́ние о просвеще́нии па́ствы твоея́ име́л еси́,/ Богому́дре святи́телю Па́вле;/ обре́тению моще́й пе́рваго архипа́стыря Ирку́тскаго споспешеству́я, ра́довался еси́./ Столе́тие митропо́лии Тобо́льския заверши́в,/ в Ки́ево-Пече́рскую Ла́вру, на ме́сто пе́рвых по́двигов твои́х, пресели́лся еси́,/ иде́же те́лом нетле́нно почива́я, от но́щи неве́дения всех богове́дением просвеща́еши.
Богоро́дичен: О Всенепоро́чная Де́во, что Ти благодаре́ние принесе́м?/ Я́ко светоза́рным явле́нием пречи́стыя Твоея́ ико́ны и Преве́чнаго Младе́нца,/ всех от неве́дения к све́ту богоразу́мия возвела́ еси́.
Песнь 6
Ирмо́с: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.
Вси в пе́снех духо́вных воспои́м согла́сно в благоче́стии просия́вшия, отцы́ на́ша,/ я́же изнесе́ Сиби́рская страна́ и я́же Це́рковь воспита́./ К ни́мже, могу́щим моли́твами свои́ми к Бо́гу из глубины́ грехо́вныя спасти́ нас, взыва́ем:/ моли́те Человеколю́бца Бо́га, да возведе́т от тли живо́т наш.
И́стинен и ве́рен страж Черни́говския Це́ркве четырена́десять лет был еси́, святи́телю Иоа́нне, попече́ние о всех име́я./ Об оте́честве твое́м ко Го́споду из глубины́ души́ моли́лся еси́/ и прозорли́во Петру́ Пе́рвому на шве́ды побе́ду предре́к:/ преда́ст бо Госпо́дь Бог враги́ твоя́, сопротивля́ющияся тебе́, сокруше́ны пред лице́м твои́м./ Я́ко сын оте́чествия своего́, возсоедине́нию Ма́лой Росси́и с Вели́кою труды́ твои́ прилага́л еси́,/ благода́рно воспева́я Го́спода Человеколю́бца.
Ю́жный Росси́йския земли́ преде́л оста́вив, во́ле Бо́жией повину́яся,/ в хла́дную Сиби́рь прише́л еси́, святи́телю Иоа́нне,/ я́ко муж просвеще́н и благочести́в, во бла́го Це́ркве Христо́вы на ве́лия тяготы́ и же́ртвы себе́ вдал еси́,/ да просвети́ши све́том Христо́вым лю́ди иноро́дныя,/ и́мже благослове́ние Ла́вры – ико́ну Богома́тере прине́сл еси́,/ пред не́юже за па́ству свою́ и ве́сь мир моли́лся еси́ Спа́су ми́ра, взыва́я: сла́ва Тебе́.
Благода́ть Боже́ственная в тя всели́ся, святи́телю Инноке́нтие,/ апо́стол язы́ков был еси́, я́коже и Па́вел./ Те́мже восхище́н был еси́ на высоту́ Боже́ственнаго лицезре́ния, иде́же мо́лишися,/ да Бог возрасти́т, е́же твое́ю руко́ю му́дре насади́ и напои́ во гра́де Ирку́тске и в Сиби́рстей земли́.
Любы́ николи́же отпа́дает, глаго́лет Боже́ственный Дух./ И́стина сия́ в чудесе́х любве́ твоея́ извести́ся, святи́телю Христо́в Инноке́нтие,/ я́ко боля́щим исцеле́ния и скорбя́щим утеше́ние источа́еши./ Па́ствы ирку́тския украше́ние и земли́ Сиби́рския храни́телю, монго́льских язы́ков просвети́телю,/ моли́ся ко Го́споду, да спасе́т всех, я́ко Человеколю́бец.
Богоро́дичен: Абала́тстей ве́си многобога́тный дар и неистощи́мое сокро́вище дарова́л еси́,/ зна́мение Ма́тере Твоея́, Сло́ве,/ и Сия́ по́мощию и предста́тельством святи́теля Никола́я и преподо́бныя ма́тере Мари́и Еги́петския/ проти́вныя низлага́ем.
Конда́к, глас 3.
Подо́бен: Де́ва дне́сь:
Дне́сь Собо́р Сиби́рских святы́х предстои́т в Це́ркви/ и неви́димо за ны мо́лится Бо́гу./ А́нгели со архиере́и славосло́вят,/ апо́столи же с му́ченики ликовству́ют,/ святи́и вси Це́ркве Христо́вы ра́дуются/ и па́ства Сиби́рская весели́тся:/ вси бо ку́пно мо́лят Преве́чнаго Бо́га.
И́кос:
А́нгельски на земли́ пожи́вших и со а́нгельскими чи́нми на Небеси́ ны́не све́тло лику́ющих/ святы́х, в земли́ Сиби́рстей просия́вших, пе́сньми почти́м:/ ра́дуйтеся, святи́телие Некта́рие, Дими́трие, Иоа́нне, Филофе́е, Анто́ние, Па́вле, Варлаа́ме и Филаре́те,/ гра́да Тобо́льска и всея́ Сиби́ри просвети́телие./ Ра́дуйтеся, архипа́стыри Ирку́тстии Инноке́нтие, Меле́тие, Софро́ние и Меле́тие,/ земли́ Сиби́рския сла́ва и украше́ние./ Ра́дуйся, Инноке́нтие, Сиби́ри и полу́нощных стран апо́столе,/ указа́ние пути́ в Ца́рство Небе́сное, я́ко завеща́ние, всем нам оста́вивый./ Ра́дуйся, Симео́не, Тобо́льское прозябе́ние и па́ствы Смоле́нския святи́телю./ Ра́дуйся, Гера́симе, из Ирку́тска в А́страхань на святи́тельство при́званный./ Ра́дуйся, Васи́лие, великому́чениче Мангазе́йский, цве́те целому́дрия и чистоты́,/ зе́млю Сиби́рскую кро́вию свое́ю освяти́вый./ Ра́дуйтеся, преподо́бнии отцы́ Богоно́снии Ге́рмане, Сине́сие, Мака́рие, Аре́фо, Варлаа́ме, Андре́е и Мисаи́ле,/ по́двиги и моли́твами ва́шими, я́ко зве́зды, тьму́ полу́нощных стран озари́вшии./ Ра́дуйтеся, пра́веднии Симео́не, Дании́ле, Стефа́не, Пе́тре и Фео́доре,/ ма́нием Бо́жиим в Сиби́рь прише́дшии и свя́тостию жития́ ва́шего ю просвети́вшии./ Ра́дуйтеся, Христа́ ра́ди юро́дивии Иоа́нне, Космо́ и блаже́нная ма́ти До́мно,/ в Сиби́ри подвиза́вшиися и Бо́гу угоди́вшии./ Ра́дуйтеся, уго́дницы Бо́жии, явле́ннии вси и неявле́ннии,/ ве́рою свое́ю Бо́га просла́вившии и страда́нии свои́ми ми́лость Его́ обре́тшии:/ вси бо вы моли́те о нас Преве́чнаго Бо́га.
Песнь 7
Ирмо́с: Пе́щь, Спа́се, ороша́шеся,/ о́троцы же, лику́юще, поя́ху:/ отце́в Бо́же, благослове́н еси́.
Глас Ева́нгельский услы́шавше,/ апо́стольскою ре́вностию к науче́нию неве́рных язы́ков устреми́шася,/ святи́и вси, в Сиби́ри просия́вшии,/ зе́млю сию́ по́двиги свои́ми освяти́вшии, научи́те пе́ти всех: Бо́же, благослове́н еси́.
Оте́ц сиро́т и вдов защи́тник, бога́тство ни́щих и боля́щих врач безме́здный,/ ста́рости жезл и науче́ние ю́ности,/ мона́шествующим доброде́телей пра́вило яви́лся еси́, святи́телю Иоа́нне,/ о па́стве свое́й попече́ние всеусе́рдное име́я, поуча́л еси́ всех ве́рных пе́ти:/ благослове́н еси́, Бо́же оте́ц на́ших.
Четы́ре ле́та оте́чески па́ству Сиби́рскую окормля́я, всем был еси́ вся, святи́телю Иоа́нне,/ святоле́пно пожи́в, от Го́спода сподо́блен да́ра прозре́ния,/ вре́мя кончи́ны своея́ прови́дя, Го́сподеви предугото́вал еси́ себе́/ и пред о́бразом Пречи́стыя Де́вы коленопреклоне́ние преста́вися,/ восприя́л еси́ поко́й Бо́га благослове́ннаго.
Еди́нством ве́ры, наде́жды и любве́ сою́зом,/ от ю́ности твоея́ в духо́вном просвеще́нии ду́шу твою́ утверди́л еси́, святи́телю Софро́ние,/ глас свы́ше в Золотоно́шестей оби́тели Богома́тере бы́сть тебе́:/ егда́ бу́деши епи́скоп, сози́жди храм во и́мя всех святы́х./ Е́же и испо́лни, внегда́ про́мыслом Бо́жиим Ирку́тстей па́стве апо́стольски служи́л еси́,/ да и на ме́сте пе́рвых по́двигов твои́х и в Сиби́рстей земле́ ве́рныя прославля́я тя, вопию́т:/ отце́в Бо́же, благослове́н еси́.
Стра́хом Госпо́дним утвержда́емь, терпе́нием стяжа́л еси́ ду́шу твою́, святи́телю Софро́ние,/ путе́м те́сным, еди́ным веду́щим в жи́знь ве́чную, с Сине́сием преподо́бным, сподви́жником твои́м, ше́ствовал еси́,/ взира́я на кре́стный пу́ть Подвигополо́жника Христа́./ Научи́ и нас стра́ху Госпо́дню,/ да, благоче́стно пожи́в на земли́, сподо́бимся воспева́ти и на Небеси́:/ благослове́н еси́, Бо́же оте́ц на́ших.
Богоро́дичен: Та́йна глубины́ рождества́ Твоего́ ум а́нгельский ужаса́ет, Де́во,/ и пречи́стая Твоя́ ико́на Каза́нская в Тобо́льске де́моны прого́нит,/ и ли́ца нечести́вых омрача́ет, и в студ порева́ет25:/ не терпя́т бо взира́ти на си́лу ея́, бе́гают же и исчеза́ют./ Мы же любе́зно покланя́емся и Тя, Богоро́дицу, велича́ем.
Песнь 8
Ирмо́с: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки.
Ны́не вре́мя торжества́, ны́не ра́дость духо́вная яви́ся,/ возвесели́мся у́бо, христоимени́тии лю́дие, и Христу́ ра́достно воспое́м:/ Твой мир да́ждь нам, да Тя, Безнача́льнаго Царя́ сла́вы,/ хва́лим и превозно́сим во вся ве́ки.
О часе́ преставле́ния твоего́, святи́телю Иоа́нне,/ извести́ Госпо́дь и сподви́жника твоего́ блаже́ннаго Филофе́я,/ в да́льнем Ко́ндинстем кра́е апо́стольское служе́ние соверша́вшаго./ Той бо, Бо́жиим Ду́хом води́м, спу́тником свои́м возвести́:/ брат наш Иоа́нн у́спе, пре́йдем отсю́ду./ И та́ко по шести́ ме́сяцех пути́ возврати́ся во град Тобо́льск и те́ло твое́ погребе́нию предаде́./ Ви́дя же его́ нетле́нным взыва́ше:/ лю́дие, Безнача́льнаго Царя́ сла́вы Христа́ Бо́га/ по́йте и превозноси́те во вся ве́ки.
О́тче всеблаже́нне Меле́тие, апо́стольских уче́ний ве́рный подража́телю/ и Ева́нгельския и́стины в Сиби́рстей земли́ вку́пе с преподо́бным Варлаа́мом Чико́йским всеусе́рднейший глаша́таю,/ Пастыренача́льника Го́спода на́шего Иису́са Христа́ ве́рный служи́телю,/ моли́ Его́ дарова́ти душа́м на́шим мир и ве́лию ми́лость.
Смире́ние – охрани́тельный меч,/ с ним безопа́сно про́йдеши зе́млю и ад и Не́ба дости́гнеши,–/ поуча́л еси́ спаса́ющихся, святи́телю Меле́тие, явля́я о́браз кро́тости житие́м свои́м./ Апо́стольски в стране́ Сиби́рстей подвиза́лся еси́,/ от Ирку́тска до Охо́тска, на Кури́льских и Алеу́тских острове́х язы́чники просвеща́я./ Коне́ц же земна́го жития́ твоего́ па́стве Ха́рьковстей прине́сл еси́,/ воспева́я Безнача́льнаго Царя́ сла́вы во вся ве́ки.
Богоро́дичен: Храм Тя Бо́жий, Влады́чице, ве́дуще,/ во святе́м хра́ме Твое́м ру́ки на́ша возно́сим на моли́тву:/ ви́ждь озлобле́ние на́ше и пода́ждь нам по́мощь.
Песнь 9
Ирмо́с: Живоприе́мный исто́чник приснотеку́щий,/ светоно́сный свети́льник благода́ти,/ храм одушевле́нный, се́нь пречи́стую,/ Небесе́ и земли́ простра́ннейшую,/ Богоро́дицу, ве́рнии, велича́ем.
Вои́стинну а́нгел храни́тель яви́лся еси́ па́стве твое́й Сиби́рстей, любобоже́ственне Иоа́нне,/ в годи́ну бе́дствий и во вся дни оте́чески посеща́я ю./ В зало́г любве́ твоея́, я́ко ми́лость Бо́жию, святы́я мо́щи твоя́ ве́рным лю́дем оста́вил еси́,/ да вси, покланя́ющеся им, велича́ют Христа́ Бо́га и Пренепоро́чную Ма́терь Его́.
А́ще и на Небеси́ пребыва́еши, оба́че и земны́х не оставля́еши, святи́телю Иоа́нне,/ мы же, ча́да твоя́, любо́вию дви́жимии, вене́ц похвалы́ тебе́ прино́сим/ и с благослове́ния Первосвяти́теля Росси́йския Це́ркве в де́нь па́мяти твоея́ собо́р Сиби́рских святы́х прославля́ем,/ Христа́ Бо́га и Пренепоро́чную Ма́терь Его́ велича́юще.
Любосмире́нне Инноке́нтие, прозябе́ние гра́да Ирку́тска,/ ты и в по́двиге твое́м соиме́нне апо́столу Сиби́ри, чудотво́рцу Ирку́тскому был еси́,/ во сла́ву Це́ркве и оте́чества твоего́ в просвеще́нии Сиби́ри и полу́нощных стран,/ я́коже и преподо́бный Ге́рман Аля́скинский, труди́лся еси́,/ поуча́я всех воспева́ти Христа́ и Пречи́стую Ма́терь Его́.
Явле́ние свя́тости твоея́, я́ко луч Боже́ственный, возсия́ Це́ркви Христо́вей в на́ши дни,/ и сло́во наставле́ния твоего́ о указа́нии пути́ в Ца́рство Небе́сное/ подвиза́ет ду́ши на́ша ко спасе́нию, святи́телю Инноке́нтие,/ в до́ме Живонача́льныя Тро́ицы, оби́тели преподо́бнаго Се́ргия, те́лом почива́я,/ ты све́тиши и Сиби́рстей земли́, иде́же со все́ми святы́ми, в ней просия́вшими, апо́стольски труди́лся еси́,/ ны́не же на Небеси́ восхваля́еши Го́спода и Пресвяту́ю Ма́терь Его́.
Его́же возлюби́ли есте́, Его́же возжела́ли есте́, Его́же ра́ди подвиза́лися есте́,/ святи́и вси, в земли́ Сиби́рстей просия́вшии, моли́те Христа́ Бо́га,/ да ми́рное даст стоя́ние Це́ркви Святе́й, оте́честву на́шему и всем лю́дем земли́/ и проба́вит ми́лость Свою́ почита́ющим па́мять ва́шу.
Богоро́дичен: Ма́ти Всепе́тая, Влады́чице ми́ра, умилосе́рдися на моле́ние на́ше,/ Твое́ бо есмы́ достоя́ние./ Всех спаси́ и поми́луй, да Тя, вси ро́ди, непреста́нно велича́ем.
Свети́лен.
Подо́бен: Пло́тию усну́в:
Пло́тию а́ще и почи́ли есте́, святи́и вси, в земли́ Сиби́рстей просия́вшии,/ но ду́хом жи́ви есте́, в Ца́рствии Небе́снем со Христо́м ца́рствуете/ и моли́теся Ему́ о почита́ющих ве́рою и любо́вию па́мять ва́шу.
Сла́ва, свети́лен святи́телю Иоа́нну:
Святи́тель Тобо́льский и моли́твенник всея́ страны́ Сиби́рския/ дне́сь Це́рковию прославля́ется,/ я́ко му́дрый упра́витель церко́вный, я́ко милосе́рдия о́браз, я́ко святи́телей украше́ние.
И ны́не, Богоро́дичен:
Умири́ мир, Христе́, мольба́ми Чи́стыя Богоотрокови́цы/ и низложи́ вра́жия си́лы,/ и тишину́ неизглаго́ланную устро́й и во ве́ки сохрани́.
На хвали́тех стихи́ры на 4, глас 8.
Подо́бен: О, пресла́внаго чудесе́:
Вси помо́лимся Христу́,/ творя́ще па́мять дне́сь святи́теля Иоа́нна,/ и с ним вку́пе воспои́м/ Собо́р Сиби́рских святы́х./ О ко́ль вели́ка Твоя́ ми́лость к нам,/ в Тро́ице хва́лимый Бо́же!/ приими́, Го́споди, моли́твы всех святы́х, в Сиби́ри просия́вших,/ и пода́ждь нам мир и ве́лию ми́лость.
О, пресла́внаго чудесе́!/ Пречестны́й храм Богома́тере/ гра́да Тобо́льска,/ я́коже драгоце́нною у́тварию неве́ста,/ украси́ся моща́ми святи́теля Иоа́нна./ О каково́ дарова́ние,/ Христе́ Бо́же, дарова́л еси́ нам,/ я́ко еди́н Милосе́рд.
О, пресла́внаго чудесе́!/ Светоно́сный и ра́достный пра́здник/ Собо́ра Сиби́рских святы́х/ ны́не нам возсия́:/ прииди́те, ве́рнии,/ в па́мяти их, веселя́щеся, возопии́м:/ святи́и вси, моли́теся за ны ко Го́споду,/ да спасе́т ду́ши на́ша, я́ко Милосе́рд.
О, пресла́внаго чудесе́!/ Святи́тель Иоа́нн с Собо́ром Сиби́рских святы́х/ прославля́ется Го́сподем,/ Це́рковь Христо́ва торжеству́ет/ и вси единоду́шно вопию́т:/ о Сиби́рския земли́ просвети́телие,/ сохрани́те страну́ на́шу/ и всех нас от вся́кия ну́жды и печа́ли.
Сла́ва, глас 8:
Красу́йся и весели́ся, гра́де Тобо́льск./ Ра́дуйся и све́тло торжеству́й, Це́рковь Бо́жия;/ се бо в тебе́ сокро́вище Боже́ственных даро́в неоску́дное яви́ся–/ нетле́нныя мо́щи святи́теля Иоа́нна,/ от ни́хже истека́ют исцеле́ния и подае́тся благода́ть/ всем, с ве́рою приходя́щим и чту́щим любо́вию святу́ю па́мять его́.
И ны́не, Богоро́дичен, глас то́йже:
Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.
Славосло́вие вели́кое. И отпу́ст.
НА ЛИТУРГИ́И
Блаже́нны, пе́сни 3-я и 6-я. По вхо́де: тропари́ Собо́ру Сиби́рских святы́х, глас 3, и святи́телю Иоа́нну, глас 8. Сла́ва, конда́к Собо́ру Сиби́рских святы́х: Дне́сь Собо́р: И ны́не, конда́к Богоро́дице ра́ди Ея́ ико́ны, имену́емый Зна́мение-Абала́цкая.
Конда́к, глас 4:
Честна́го о́браза Твоего́ зна́мение пра́зднующе лю́дие Твои́, Богороди́тельнице,/ и́мже ди́вную побе́ду на сопроти́вныя гра́ду Твоему́ дарова́ла еси́./ Те́мже Тебе́ ве́рою взыва́ем:/ ра́дуйся, Де́во,/ христиа́н похвало́.
Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Апо́стол ко Евре́ем, зача́ло 335. Аллилу́ия: Терпя́ потерпе́х Го́спода и внят ми/ и услы́ша моли́тву мою́. Стих: Мно́ги ско́рби пра́ведным/ и от всех их изба́вит я Госпо́дь. Ева́нгелие от Луки́, зача́ло 24. Прича́стен: Ра́дуйтеся, пра́веднии.
