Служба в честь Собора Ростово-Ярославских святых
Краегране́сие слу́жбы си́це: Росто́ву Вели́кому, Ярославлю же сла́вному смире́нно дар Никоди́м прино́сит.
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры на 8, глас 4:
Росто́ва Вели́каго и Яросла́вля па́стырие свяще́ннии,/ храни́телие ста́да Христо́ва и де́лателие виногра́да церко́внаго,/ архиере́и Бо́га Вы́шняго/ и ра́внии А́нгелом в соверше́нстве душ ва́ших, преподо́бнии/ и вси пра́веднии, све́та Небе́снаго свети́льницы,/ ревни́телие Ева́нгелия Ца́рствия Бо́жия,/ просия́вшии во граде́х и ве́сех земли́ на́шея,/ о нас непреста́нно моли́теся Спа́су всех и Изба́вителю/ дарова́ти нам ми́лость, мир и спасе́ние.
О́блак иму́ще, облежа́щ нас, свиде́телей,/ ве́рою послу́шествованных и пожи́вших на земли́ любо́вию,/ благоугоди́вших Бо́гу в земли́ Росто́ва Вели́каго и Яросла́вля,/ святи́телей, и преподо́бных, и пра́ведных,/ терпе́нием да соверша́ем тече́ние по́двига на́шего, подража́я тем,/ подвиза́ющеся вся́кое зло низлага́ти,/ взира́юще на Первосвяще́нника Вели́каго,/ проше́дшаго Небеса́, Иису́са Го́спода,/ да́рующаго нам ми́лость, мир и спасе́ние.
Свяще́нства Христо́ва служи́телие ве́рнии,/ апо́столов Бо́га Сло́ва прее́мницы,/ учи́телие па́ствы богопросвеще́ннии,/ па́стырие до́брии наро́да Бо́жия,/ земли́ Росто́ва Вели́каго и Яросла́вля святи́телие,/ с преподо́бными и пра́ведными и все́ми святы́ми/ предстоя́ще ны́не Престо́лу Святы́я Тро́ицы,/ моли́теся дарова́ти нам ми́лость, мир и спасе́ние.
Твоя́ свяще́нная ни́ва,/ архиере́йский престо́ле Вели́каго Росто́ва и Яросла́вля,/ ны́не плод прино́сит изоби́льный Первосвяще́ннику Иису́су:/ иера́рхи бо богоизбра́ннии и де́лателие непосты́днии/ освяти́ша ева́нгельским благове́стием вся концы́ земли́ твоея́/ и Боже́ственною благода́тию соверши́ша во спасе́ние мно́гия лю́ди,/ пожи́вшия в преподо́бии и пра́вде./ Мы же, тем подража́ти хотя́ще,/ мо́лимся Христу́ Го́споду/ дарова́ти нам ми́лость, мир и спасе́ние.
Сла́ва, глас 2:
Освяще́ннии Боже́ственным Ду́хом,/ житие́ на земли́ сконча́ли есте́ благоче́стно,/ Христу́ себе́ преда́вше и послужи́вше лю́дем Бо́жиим,/ святи́телие и преподо́бнии,/ пра́веднии и вси, Бо́гу угоди́вшии,/ Росто́ву сла́ва и утвержде́ние Яросла́влю,/ У́гличу похвала́ и Пересла́влю ра́дование,/ Любимогра́ду и Обно́ре украше́ние/ и Пошехо́нскому кра́ю свет Христо́в облиста́вшии,/ Святе́й Тро́ице предстоя́ще,/ о земли́, иде́же подвиза́стеся, моли́теся,/ и о всех, любо́вию чту́щих па́мять ва́шу.
И ны́не, Богоро́дичен: Пре́йде се́нь зако́нная:
Вход. И чте́ния три преподо́бническая.
Прему́дрости Соломо́ни чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́ни чте́ние (главы́ 5 и 6):
Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ради прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т,/ и от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́ни чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоугоде́н Бо́гови быв, возлю́блен бысть/ и живы́й посреде́ гре́шных преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На лити́и стихи́ры, глас 3:
Веле́ние Спа́са ми́ра,/ е́же жи́ти свя́то и непоро́чно/ и е́же соверше́нным бы́ти во о́браз Небе́снаго Отца́,/ восприя́ли есте́, святи́и Бо́жии челове́цы,/ Небе́сныя на земли́ жа́ждуще пра́вды/ и а́лчуще гла́дом духо́вным,/ Христо́м, Небе́сным Хле́бом, утверди́стеся,/ ны́не предстоя́ Ему́/ и наслажда́яся Того́ ве́чных благ,/ моли́теся непреста́нно о всех нас.
Утвержде́ни благода́тию Небе́сною,/ Христо́в зако́н начерта́ли есте́ на скрижа́лех серде́ц свои́х/ и сотвори́ли есте́ и научи́ли есте́ ины́х та́кожде жи́ти,/ я́коже повеле́ Госпо́дь,/ и с вели́кими Ца́рствия Христо́ва сопричте́ни есте́,/ ны́не о нас моли́теся,/ да укрепи́т ны Спас ми́ра неви́димою свы́ше си́лою,/ е́же побежда́ти грех/ и благоугожда́ти бли́жним на́шим во благо́е к назида́нию.
Сла́ва, и ны́не, глас 5:
Весе́лия духо́внаго и ра́дости неземны́я/ исполня́ются ны́не преде́лы Росто́вския и Яросла́вския/ в благоче́стную па́мять сыно́в и дще́рей свои́х,/ предстоя́щих во сла́ве Небе́сней Христу́ Спа́су,/ и́хже утверди́ Сам си́лою Свое́ю ра́ди бла́гости,/ моли́твами Пречи́стыя Ма́тере,/ моля́щияся непреста́нно о ро́де христиа́нстем/ и нам милосе́рдствующия явле́нием на То́лге Своея́ святы́я ико́ны.
На стихо́вне стихи́ры, глас 2:
Ева́нгельское и́го и архиере́йское досто́инство/ восприя́ли есте́, Богоизбра́ннии святи́телие,/ ве́ры пра́вило и кро́тости духо́вныя о́браз,/ в земли́ на́шей ве́ру ева́нгельскую насади́вшии и возрасти́вшии./ Ты же архиере́йский престо́л утверди́л еси́ кро́вию твое́ю, святи́телю Лео́нтие,/ со Иса́иею, Игна́тием, Иа́ковом,/ Фео́дором и Дими́трием,/ моли́ся ны́не о ча́дех твои́х.
Стих: Го́споди, Госпо́дь наш,/ я́ко чу́дно И́мя Твое́ по всей земли́.
Лик А́нгел земны́х и челове́к соверше́нных,/ от земли́ на́шея возше́дый к Небе́сным оби́телем,/ наслажда́ется све́том незаходи́мым Триипоста́снаго Бо́га,/ в Не́мже ра́дость ве́чная и блаже́нство несконча́емое./ Све́тло у́бо весели́ся, Росто́ве,/ в тебе́ бо роди́ся пречу́дный Се́ргий, земли́ Ру́сския заступле́ние,/ тя освяти́ша моли́твы Авраа́мия и мно́жества святы́х./ Украша́йся, У́гличе, поще́нием и моли́твами Паи́сия с Кассиа́ном,/ Игна́тия же до́блим терпе́нием./ Пересла́влю – столп недви́жимый Ники́ты и Дании́ла предста́тельство./ Сильвестр же, на Обно́ре возсия́вый,/ и Генна́дий Любимогра́дский да ублажа́ются/ с Пошехо́нскими Севастиа́ном, и Адриа́ном,/ и Игна́тием Ло́мским.
Стих: Святы́м, и́же су́ть на земли́ Его́,/ удиви́ Госпо́дь вся хоте́ния Своя́ в них.
И́стиннии Го́рняго Иерусали́ма ны́не гра́ждане,/ в житии́ же ва́шем избра́ннии/ и сла́внии сы́ны оте́чества Росси́йскаго,/ благове́рнии подви́жницы за зе́млю оте́ц свои́х,/ прославля́ем вас от серде́ц на́ших:/ Бори́са целому́дреннаго и братолюби́ваго,/ Василька́ прекра́снаго, кро́вь свою́ проли́вшаго,/ Алекса́ндра, си́льнаго ду́хом, всея́ Росси́и утвержде́ние,/ Васи́лия и Константи́на, Яросла́вля сла́ву,/ Фео́дора со ча́ды возлю́бленными,/ и Рома́на, У́гличскую добро́ту,/ и всех, преда́вших с ва́ми ду́ши за дру́ги своя́,/ и́хже имена́ не явле́ны нам,/ оба́че в кни́зе живы́х запечатле́ни су́ть.
Сла́ва, глас то́йже:
Крест Христо́в на ра́мо взе́мшии,/ Бо́га Небе́снаго на земли́ служи́телие ве́рнии/ и Богоно́сцы вои́стинну бы́ли есте́,/ пра́ведницы, во ве́ки живу́щии,/ восприя́вшии от Небе́снаго Домовлады́ки ра́йское наслажде́ние:/ Иси́доре блаже́нне и Иоа́нне ми́лостиве,/ Ирина́рше затво́рниче и Пе́тре преподо́бне/ со Андре́ем, оста́вльшим черто́ги сла́дости земли́,/ и Анастаси́е с му́ченицами де́вами,/ дади́те нам от еле́я ва́шего,/ во е́же не себе́ люби́ти,/ но послужи́ти бли́жним на́шим.
И ны́не, Богоро́дичен.
Тропа́рь, глас 4:
О благоче́стный собо́ре,/ о лю́дие избра́ннии,/ святи́телие преподо́бнии и пра́веднии,/ и благове́рнии гра́ждане росси́йстии,/ я́ко зве́зды, на тве́рди церко́вней/ страны́ Росто́вския и Яросла́вския к Бо́гу предста́телие,/ велича́ем с любо́вию вас, по пло́ти на́ших сро́дников./ Вы же моли́теся дарова́ти мир стране́ и Це́ркви на́шей,/ благослове́ние и ми́лость Бо́жию всем лю́дем,/ всепроще́ние и спасе́ние,/ хода́таи бо есте́ при́снии о нас ко Святе́й Тро́ице.
Тропа́рь святи́телем Росто́вским, глас то́йже:
Святи́телие прему́дрии,/ па́ствы ва́шея учи́телие богопросвеще́ннии,/ ве́ру ева́нгельскую в лю́дех преумно́жившии,/ любве́ Небе́сныя на земли́ достоподража́тельнии о́брази,/ лю́ди страны́ Росто́вския и Яросла́вския приобща́вшии спасе́нию,/ служи́телие вои́стинну Бо́жии/ и соприча́стницы апо́столов досто́йнии яви́лися есте́,/ Лео́нтие священному́чениче, Иса́ие, Игна́тие, Иа́кове, Фео́доре/ и златослове́сниче Росси́йский Дими́трие,/ Христа́ Бо́га моли́те/ о архиере́ех, на престо́ле ва́шем прее́мницех,/ о лю́дех, благоче́стно вас почита́ющих,/ о стране́ на́шей правосла́вней/ и о всей Христо́вей Це́ркви.
НА У́ТРЕНИ
На Бог Госпо́дь: тропа́рь святы́м, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 1:
Му́дрость Бо́жию разуме́вше,/ я́ко пра́веден Госпо́дь и пра́вды возлюби́,/ Христо́вы пра́вды бы́ли есте́ служи́телие ве́рнии,/ де́лом сло́ву ева́нгельскому отвещава́я,/ испо́лнили есте́ за́поведи Спа́совы/ и нас научи́ти тем дово́льни есте́,/ и лице́ Вседержи́теля ви́де правоту́ ва́шу,/ Ему́же, во сла́ве Его́ предстоя́ще, моли́теся о всех нас.
Сла́ва, и ны́не, глас то́йже:
Ура́нила еси́ главу́ дре́вняго зми́я, Пречи́стая,/ и сокруши́ла еси́ того́ держа́ву, Пренепоро́чная,/ ро́ждши ми́ра Спаси́теля, Богочелове́ка Иису́са, Преблагослове́нная,/ и ны́не моли́ся о лю́дех,/ и́хже Сын Твой вручи́ заступле́нию Твоему́, о Ма́ти всех нас.
По 2-м стихосло́вии седа́лен, глас 5:
Яд зми́я дре́вняго, и́же е́сть грех,/ исто́ргли есте́ из серде́ц ва́ших,/ возлюби́вше Еди́наго Благоде́теля Бо́га и Тому́ служи́вше,/ святи́телие, преподо́бнии и вси пра́веднии,/ досто́йно во пло́ти пожи́ли есте́,/ нам к подража́нию о́браз при́сно явля́юще,/ моли́теся неотсту́пно о граде́х и ве́сех земли́ Росто́вския и Яросла́вския,/ иде́же житие́ соверши́сте.
Сла́ва, и ны́не, глас то́йже:
Ра́дуйся, исто́чниче ми́лости Небе́сныя,/ ра́дуйся, Вседержи́теля ро́ждшая, изба́вльшаго нас от вся́каго зла/ и подаю́щаго благода́тную си́лу низлага́ти грех,/ ра́дуйся, предстоя́щая при́сно Престо́лу Влады́чню,/ ра́дуйся, Ма́ти Бо́жия, восприя́вшая всыновле́ние Тебе́ всех христиа́н,/ моли́ся Сы́ну Твоему́ непреста́нно,/ да бу́дем достои́ни Его́ благосты́ни.
По полиеле́и седа́лен, глас 5:
О́гнь Боже́ственныя любве́ в се́рдце име́юще/ и чистоту́ стяжа́вше серде́чную,/ Христо́вы адама́нти ве́ры,/ на земли́ бы́ли есте́ служи́телие Боже́ственныя пра́вды,/ ду́шу и те́ло Христу́ преда́вше,/ оте́чества до́брии гра́ждане,/ лю́дем милосе́рдие явля́ли есте́,/ а́лчущия насыща́я и напоя́я жа́ждущия,/ одева́я наги́я и бе́дныя,/ боля́щия посеща́я и стра́ждущия,/ научи́те и нас подража́ти вам.
Степе́нна, 1-й антифо́н 4-го гла́са. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Ева́нгелие от Матфе́я, зача́ло 11.
По 50-м псалме́ стихи́ра, глас 6:
Сла́вы святы́я служи́телие,/ чистоты́ душе́вныя и теле́сныя храни́телие,/ послужи́вшии лю́дем многообра́зне,/ на земли́ пожи́ли есте́,/ и́стиннии Спа́совы ученицы́,/ Всесвяте́й Тро́ице на Небесе́х предстоя́ще,/ позна́ли есте́ сла́дость Боже́ственнаго прича́стия,/ его́же и нас на земли́ вкуси́ти отча́сти/ моли́те Бо́жию бла́гость,/ ве́чнаго же наслажде́ния сподо́битися по исхо́де от земны́х,/ ны́не же бы́ти нам со Христо́м и лю́дем служи́ти.
Кано́н, глас 4.
Песнь 1
Ирмо́с: Пое́м пе́снь побе́дную Еди́ному Бо́гу,/ сотво́ршему пресла́вная:/ дре́вле бо фарао́на/ со всево́инством в мо́ри погрузи́.
Припе́в: Вси святи́и земли́ Росто́вския и Яросла́вския,/ моли́те Бо́га о нас.
Лю́дие христоимени́тии земли́ Ру́сския,/ спра́зднуйте с на́ми торжество́ церко́вное, па́мять подража́телей Спа́су:/ святи́телей, преподо́бных и пра́ведных,/ и́хже просла́ви Бог в Росто́ве и Яросла́вле и всей о́бласти их,/ ре́вности же по Бо́зе тех подража́ти и мы да потщи́мся вси.
Апо́стольская про́поведь дости́же и стогн твои́х, Вели́кий Росто́ве,/ и озари́ тя све́том Христо́вым,/ и отгна́ оте́ческаго идолослуже́ния безу́мие во всех конце́х земли́ твоея́/ мно́гим по́двигом иера́рхов и ины́х святы́х твои́х,/ и́же, Христу́ предстоя́ще, мо́лятся о Це́ркви, ю́же утверди́ша.
Вели́каго Росто́ва первопастырь,/ от ю́га возсия́л еси́ в стране́ на́шей се́верней,/ я́ко свети́ло небе́сное, Лео́нтие чу́дне, архиере́ю сла́вне,/ запечатле́в кро́вию твое́ю свиде́тельство Сло́ва Бо́жия,/ ны́не, соприча́стниче апо́столов, моли́ся о па́стве твое́й/ и о седя́щих на престо́ле Твое́м прее́мницех.
Богоро́дичен: Лику́ют А́нгели Небе́снии,/ ви́дяще, Ма́ти ро́да христиа́нскаго, Пречи́стая Богоро́дице, о́браз Твой,/ сия́ющий на То́лге луча́ми благода́ти,/ его́же святи́тель Росто́ва Три́фон прие́мь, даде́ Яросла́влю/ я́ко утеше́ние в ско́рбех и ну́ждах и благослове́ние Небе́сное всем преде́лом его́.
Песнь 3
Ирмо́с: Вы́шний Спа́се сил,/ коле́блемую ду́шу мою́ утверди́ в во́ли Твое́й,/ да и аз сла́влю Твое́/ со Безпло́тными Боже́ственное благоле́пие.
Ю́ныя уцелому́дрил еси́, ста́рыя обнови́л еси́ Креще́ния вода́ми,/ и в земли́ Росто́встей поклоне́ние тва́ри упраздни́ся во дни твоя́, святи́телю Иса́ие,/ моли́ся о чту́щих тя благоче́стно,/ и да ве́рно Христу́ ста́до твое́ пребу́дет.
Житие́м непоро́чен, возсия́л еси́ благоче́стием твои́м, свя́те Игна́тие,/ и уве́девши па́ства твоя́, я́ко тако́в подоба́ше архиере́й, о́браз Христа́ нося́щ,/ внима́ше исходя́щим от уст твои́х глаго́лом жи́зни ве́чныя./ В Небе́сных оби́телех моли́ся о лю́дех твои́х,/ да в любви́ Бо́жией пребу́дут.
Естество́м челове́к, оба́че, я́ко безпло́тен, пожи́л еси́ на земли́, святи́телю Иа́кове,/ сия́я све́том Христо́вым лю́дем Бо́жиим,/ оба́че доса́ду и укори́зну, и клевету́ претерпе́в, победи́л еси́ во искуше́нии,/ Влады́це у́бо на Небеси́ предстоя́ и на́шим ско́рбем спострада́ти моги́й,/ моли́ся о всех нас.
Богоро́дичен: Сия́ющи па́че со́лнца чистото́ю, Де́во Пресвята́я,/ в Не́йже побежда́ются уста́вы естества́,/ Херуви́мов и Серафи́мов превы́ше вознесе́на еси́ от земны́х, Богороди́тельнице,/ предстоя́щи всегда́ Сыно́внему Престо́лу,/ моля́щися не преста́й о ча́дех Твои́х, Влады́чице,/ во успе́нии Твое́м нас не оставля́ющая.
Седа́лен, глас 7:
Любо́вь на́шу приими́те и почита́ние достодо́лжное,/ Бо́жии дру́зи, челове́цы Христо́вы,/ просия́вшии в земли́ Росто́встей и Яросла́встей,/ Ева́нгелие пропове́давшии сло́вом и жи́знию,/ святи́телие и преподо́бнии и вси, в Це́ркви просла́вленнии,/ нам, е́же бы́ти подо́бным вам, испроси́те Боже́ственную свы́ше по́мощь,/ ми́лость Спа́сову к согреша́ющим/ и всем лю́дем мир и благослове́ние Вседержи́теля.
Песнь 4
Ирмо́с: Небеса́ доброде́тель Твоя́ покры́ла е́сть,/ и земля́ испо́лнися сла́вы Твоея́, Христе́./ Те́мже ве́рно вопие́м:/ сла́ва си́ле Твое́й, Го́споди.
А́гнцу Бо́жию, Христу́ Го́споду, послужи́ти хотя́,/ прия́л еси́, о́трок сущ, о́браз а́нгельский от рук Богому́драго Се́ргия, твоего́ сро́дника,/ и, восходя́ от си́лы в си́лу ду́хом твои́м, святи́телю Фео́доре,/ Вели́кому Росто́ву был еси́ архиепи́скоп и оте́ц,/ наста́ви нас, Го́рняя му́дрствующе, жи́ти на земли́ ева́нгельски.
Всезлата́я уста́ Росси́йския земли́, свя́те Дими́трие,/ Росто́вския митропо́лии похвало́, му́дрый иера́рше и о́тче любвеоби́льне,/ возвеща́я ча́дом церко́вным Христа́, Ра́спятаго и Воскре́сшаго, Бо́жию Си́лу и Прему́дрость,/ Кро́вию Заве́та Его́ Но́ваго и Пречи́стым Его́ Те́лом приобща́л еси́ их жи́зни ве́чней/ и нам прича́стником ея́ бы́ти испроси́ моли́твами твои́ми.
Наш моли́твенниче неусы́пный, Живонача́льней Тро́ице предстоя́щий,/ наста́вниче и о́тче, Богоблаже́нне Се́ргие, всеросси́йский игу́мене,/ о Росто́ве твое́м, иде́же возгласи́л еси́ трикра́ты во чре́ве ма́терни,/ иде́же навы́кл еси́ от лет млады́х ду́шу и ум твой к Бо́гу возноси́ти,/ моли́ся и о всех нас, любо́вию тя почита́ющих.
Богоро́дичен: О предочи́щенная Ду́хом Святы́м Де́во Пречи́стая,/ Бо́га Сло́ва вмести́лище, голуби́це нескве́рная,/ к Тебе́ воздвиза́ем ру́це на́ша, к Тебе́ возно́сим моли́твы глас,/ услы́ши нас, недосто́йных чад Твои́х, Всеблага́я Ма́ти,/ и всепроще́ние испроси́ и ми́лость любо́вию Тя чту́щим и всем лю́дем.
Песнь 5
Ирмо́с: Просвеще́ние Твое́, Го́споди, низпосли́ нам/ и от мглы прегреше́ний разреши́ ны, Бла́же,/ Твой мир да́руяй.
Млеко́м ева́нгельския ве́ры напое́ни бы́сте измла́да,/ житие́м непоро́чно пред Бо́гом ходи́вшии,/ му́жественный Бори́се, чистоты́ и целому́дрия о́браз/ и прекра́сный зра́ком Василько́, ве́рности и кро́тости испо́лненный./ Еди́н, пред бра́том-враго́м смири́выйся, не восхоте́ междоусо́бныя бра́ни,/ други́й же, супоста́ту не покори́выйся и за оте́чество ду́шу преда́вый,/ кровьми́ обоя́ украси́стеся,/ предстоя́ще Спа́су, моли́теся о земли́ ва́шей и лю́дех,/ мир пода́ти им и всему́ ми́ру.
Утверди́л еси́ се́рдце твое́ си́лою Вседержи́теля/ и победи́л еси́ ве́тхаго в себе́ челове́ка, Авраа́мие, о́тче наш,/ животворя́щим Кресто́м низложи́вый и́дольскую ле́сть в Росто́ве,/ с Петро́м царе́вичем, с затво́рником Ирина́рхом и с про́чими преподо́бными отцы́ сотвори́ о нас моли́тву,/ да Бо́гови рабо́таем усе́рдно, земне́й суете́ не прилепля́ющеся.
Стра́сти душе́вныя исто́ргнувше, победи́ли есте́ не́мощи пло́ти/ и, си́лою Бо́жиею пожи́вше на земли́, я́ко безпло́тнии, в зра́це юро́дства,/ му́дрости Го́рней научи́ли есте́ челове́ки,/ ми́лостиве Иоа́нне и Иси́доре блаже́нне, моли́теся о нас,/ да до́бру со́весть и́мамы во всем/ и Ду́ха Свята́го дарова́ний досто́йни бу́дем.
Богоро́дичен: Ми́ру Ты Предста́тельница и христиа́н всех Ма́ти!/ Пресвята́я Богоневе́сто, к заступле́нию Твоему́ притека́ют концы́ земли́,/ источа́еши бо всем милосе́рдие, я́ко исто́чник живоно́сный и приснотеку́щий,/ ми́рови мир пода́ждь и всем лю́дем спасе́ние испроси́,/ в Росто́ве Умиле́ния о́браз просла́вльшая.
Песнь 6
Ирмо́с: Обурева́ему мне, Ще́дре,/ бу́рею во́ли мои́х,/ молю́ся: воззови́ мя и спаси́, Го́споди,/ я́ко Ио́ну от зве́ря у́мнаго.
Испове́дует Яросла́вская Це́рковь вели́чие Бо́жия да́ра,/ его́же Всевы́шний Влады́ка да́рует на́шему гра́ду да́же до ны́не:/ ве́ра Христо́ва зде утверди́ся,/ и изоби́лие благода́ти подае́т неоску́дно всем ве́рным Боже́ственный Дух,/ Ему́же моли́тву усе́рдно прино́сим:/ прииди́ и всели́ся в ны, Бла́же,/ и спаси́ ду́ши на́ша, я́ко Благ и Всеси́лен.
Ра́дуйтеся, лю́дие яросла́встии, Васи́лия и Константи́на, почита́юще/ и с ни́ми всех во́ев, поги́бших на бра́ни за зе́млю родну́ю,/ не ту́гою серде́чною, но в ве́чней ра́дости Воскре́сшаго Спа́са их ве́дяще, мо́лимся тем:/ благове́рнии Яросла́вля хода́таи,/ ча́да есмы́ с ва́ми наро́да еди́наго,/ предста́тельствуйте о нас и за всю зе́млю Ру́сскую.
Еле́й до́брых дел твои́х бы́сть пред Бо́гом, я́ко лампа́да чи́стая,/ огне́м святы́я ве́ры и Христо́вы любве́ горя́щая, преподо́бне Фео́доре,/ всем лю́дем яви́лся еси́, я́ко чадолюби́вый оте́ц,/ сподо́бился еси́ соприча́стия пра́ведным во Ца́рствии Бо́жии,/ со ча́ды твои́ми Дави́дом и Константи́ном моли́ся о Яросла́вле и о всех нас.
Богоро́дичен: Недосто́йными устна́ми и се́рдцем поро́чным велича́ем Тя,/ Чи́стая Де́во, Всепе́тая Ма́ти,/ и притека́ем ко изображе́нию лица́ Твоего́,/ я́ко дре́вле Изра́иль к киво́ту Заве́та,/ упова́юще на моли́твы Твоя́ к Сы́ну и Бо́гу,/ да пода́ст нам проще́ние и ми́лость,/ да обнови́т си́лою свы́ше и утверди́т в нас ве́рность Ему́,/ Тому́ бо Еди́ному согреша́ем, оба́че ино́го бо́га не ве́мы.
Конда́к, глас 4:
Но́ваго Заве́та Бо́га с челове́ки храни́телие,/ ева́нгельских за́поведей исполни́телие,/ в до́брых де́лех соверше́ннии,/ святи́телие му́дрии, преподо́бнии и пра́веднии Богоно́снии,/ зе́млю Росто́вскую и Ярославскую/ облагоуха́вшии моли́твами,/ имену́емии вси и неимену́емии,/ явле́ннии и сокрове́ннии,/ предстоя́ще Живонача́льней Тро́ице,/ не отступа́йте от нас ду́хом/ и Боже́ственное милосе́рдие преклони́те к нам,/ да с дерзнове́нием сла́ву в Вы́шних Бо́гу вси прино́сим,/ да пребу́дет на земли́ мир неруши́мый,/ любо́вь же и благоволе́ние/ посреде́ всех челове́к.
И́кос:
Отца́ Небе́снаго ча́да досто́йная,/ во́лю Его́ святу́ю сотвори́сте на земли́,/ искуше́ния же вся победи́вше и лука́ваго посрами́вше,/ восприя́ли есте́ оставле́ние согреше́ний,/ жи́зни несконча́емей прича́стницы яви́стеся,/ кро́тости и любве́ су́щим на земли́ учи́телие,/ во сла́ве Просла́вльшаго вас предстоя́ще,/ моли́теся, да с дерзнове́нием сла́ву в Вы́шних Бо́гу вси прино́сим,/ да пребу́дет на земли́ мир неруши́мый,/ любо́вь же и благоволе́ние посреде́ всех челове́к.
Песнь 7
Ирмо́с: Не преда́ждь нас до конца́ И́мене Твоего́ ра́ди,/ и не разори́ Заве́та Твоего́,/ и не отста́ви ми́лости Твоея́ от нас,/ Го́споди, Бо́же оте́ц на́ших,/ препе́тый во ве́ки.
Дре́вний У́глич на бре́зе Во́лги красу́ется ве́рою и моли́твами подви́жник свои́х,/ соде́явших пра́вду и обетова́ние прие́мших от Вседержи́тельныя десни́цы Спа́са Христа́,/ сего́ же ли́ка свяще́ннаго я́ко преднача́льника почита́ем царе́вича Дими́трия,/ его́же, кровьми́ обагре́на, Госпо́дь со святы́ми, прия́т,/ вне́млет моли́твам его́ о всех лю́дех.
А́нгельскому житию́ ревну́юще и Безпло́тным подо́бящеся,/ от ю́ности ше́ствовали есте́ те́сным путе́м, Богоно́сне Паи́сие и Кассиа́не подви́жниче,/ от Царегра́да к нам в зе́млю прише́дый, да Го́рний Иерусали́м приобря́щеши,/ и Игна́тие, терпе́ния о́бразе, вку́пе предстоя́ще,/ моли́теся Святе́й Тро́ице проще́ние нам дарова́ти/ и вся поле́зная к житию́ и благоче́стию.
Рома́на благове́рнаго, душе́ю чи́стаго, се́рдцем кро́ткаго, почита́ем во святы́х,/ позна́вшаго му́дрость Го́рнюю житие́м непоро́чным,/ и Анастаси́ю преподо́бную с се́страми, муче́ньми от земли́ восте́кших на Не́бо и предстоя́щих Престо́лу Влады́чню,/ о нас моля́щихся и зде на земли́ соверши́ти до́брая/ и по сме́рти неосужде́нно предста́ти Христу́ Спа́су.
Богоро́дичен: Наде́жды ины́я не ве́мы, Преблагослове́нная и Пренепоро́чная Ма́ти Де́во,/ при Кресте́ Сы́на Твоего́ усынови́вшая род христиа́нский,/ Тебе́ песносло́вят Небе́сныя си́лы и архиере́ев собо́ри,/ Тебе́ прино́сят гла́сы хвалы́ проро́ки со апо́столы,/ мы же Тебе́, я́ко ча́да немощны́я и гре́шныя, то́кмо моли́тву на́шу прино́сим:/ покры́й нас от вся́каго зла честны́м Твои́м омофо́ром.
Песнь 8
Ирмо́с: В пла́мень снизше́дшаго/ песносло́вцем Сио́нским, зра́ком а́нгельским,/ о́троцы, превозноси́те Христа́ Бо́га на́шего во ве́ки.
Иису́са, Спа́са всея́ тва́ри, све́том незаходи́мым просвети́вшаго мир,/ сла́вят христиа́не Пересла́вля Зале́сскаго,/ утвержде́нии ве́рою церко́вною,/ и благода́ть Ду́ха Свята́го неоску́дно прие́млют,/ о ни́хже мо́лится преподо́бный Се́ргий, прия́вший освяще́ние во гра́де сем, со ины́ми святы́ми,/ да поживу́т благоче́стно и сподо́бятся ве́чныя сла́вы.
Кре́пкий был еси́ муж и му́дрный, благоче́стием стяжа́вый Ду́ха Свята́го,/ Алекса́ндре чу́дне, Пересла́вля Зале́сскаго порожде́ние,/ просла́влен еси́ во всей земли́ на́шей,/ и почита́ем тя я́ко христиани́на вои́стинну, вои́теля до́бляго и миротво́рца,/ моли́ся об оте́чествии твое́м и наро́де,/ да пребу́дут во све́те Христо́ве и сла́ве пред все́ми язы́ки.
Обраще́ния ко Христу́ и возрожде́ния в покая́нии о́браз ви́дим тя, о́тче Ники́то,/ глуби́ны греха́ отри́нув, был еси́ терпе́ния столп и победи́л еси́ стра́сти./ С Дании́лом преподо́бным, ме́ртва себе́ бы́ти греху́ ми́ра вмени́вшим,/ и Андре́ем, нищету́ стяжа́вшим ко спасе́нию, моли́ся о всех лю́дех,/ да, избе́гнувше греха́, досто́йно поживу́т на земли́.
Богоро́дичен: Де́во Всесвята́я, Пречи́стая Ма́ти,/ Ро́ждшая на земли́ Преве́чнаго Бо́га, я́ко соверше́ннаго Челове́ка,/ ве́лие дерзнове́ние к Нему́ иму́щая,/ о гре́шных лю́дех моли́ся, е́же противоста́ти им греху́, е́же пребы́ти в любви́ и ве́ре,/ е́же бли́жним служи́ти, а не себе́ угожда́ти.
Песнь 9
Ирмо́с: Сотвори́ держа́ву мы́шцею Свое́ю,/ низложи́ бо си́льныя со престо́л/ и вознесе́ смире́нныя Бог Изра́илев./ В ни́хже посети́ нас Восто́к с высоты́/ и напра́вил ны е́сть на пу́ть ми́ра.
Исхода́тайствуйте всем, почита́ющим вас, спасе́ние и вся потре́бная к жи́зни вре́менней,/ Генна́дие преблаже́нне, Любимогра́ду предста́телю,/ и Сильве́стре преподо́бне, Обно́рския брега́ освяти́вый подвиго́в твои́х мно́жеством,/ моли́твы бо ва́ша, я́ко фимиа́м кади́льный, восхо́дят к Престо́лу А́гнца Христа́.
Му́ченики безкро́вныя имену́ем преподо́бныя отцы́ на́ша,/ и́же в боре́ниих и по́двизех мно́гих победи́ша не́мощи пло́ти и грех,/ возвы́сившеся же доброде́тельми, бы́ша наста́вницы и учи́телие лю́дем Бо́жиим./ Сего́ ра́ди ублажа́ем вас, Игна́тие Ло́мский и Адриа́не с Севастиа́ном,/ всельшихся в де́брех лесны́х Пошехо́нских,/ дерзнове́ние иму́ще, моли́теся о всех нас.
Па́мять ва́ша свяще́нна е́сть нам, дру́зи Бо́жии,/ Ду́ха Свята́го сосу́ди, подви́жницы ве́ры и благоче́стия,/ ева́нгельския любве́ исполни́телие, святи́телие, преподо́бнии и пра́веднии,/ подвиза́вшиися в Росто́ве и Яросла́вле, и во всей о́бласти их,/ просла́вленнии и непросла́вленнии, ве́домии и неве́домии,/ вси вку́пе, Спа́су предстоя́ще,/ моли́теся о почита́ющих вас любо́вию,/ да подража́телие вам яви́мся.
Богоро́дичен: Росси́йская страна́ до́мом Твои́м имену́ется, Ма́ти Бо́жия,/ Преблагослове́нная Неве́сто Неневе́стная,/ Росто́ва и Яросла́вля зе́мли не оста́вила еси́ заступле́нием,/ мно́жеством бо чу́дных ико́н Твои́х подае́ши ми́лости/ и слы́шиши всех, к Тебе́ прибега́ющих, призыва́ющих Тя в ну́ждах и посеще́ниих Бо́жиих,/ и простира́еши благода́ть утеше́ния гре́шным ко исправле́нию,/ не отступи́ от нас, Пречи́стая Де́во.
Свети́лен, глас 1:
Илия́ и Моисе́й предстоя́ху Тебе́ на Фаво́ре,/ егда́ показа́л еси́ в челове́честей пло́ти Твое́й сия́ние сла́вы Твоего́ Божества́, Спа́се наш,/ ны́не же предстоя́т Тебе́ ли́ки святы́х,/ све́том невече́рним Твои́м озаре́нныя,/ и́же сохрани́ша в житии́ но́вый Твой Заве́т с челове́ки,/ та́мо вку́пе со все́ми святи́и Росто́вския и Яросла́вския земли́ моли́твы творя́т,/ да возсия́ет и нам, гре́шным, денни́ца спасе́ния.
Сла́ва, и ны́не, глас то́йже:
Не оста́ви нас, си́рых,/ таи́нственнаго дне Спа́сова Свята́я Зарни́це,/ Благосе́рдая Засту́пнице всего́ ми́ра,/ Ро́ждшая Бо́га во пло́ти спасе́ния на́шего ра́ди,/ предстоя́щи во све́те Его́ непристу́пнем, моли́ся о Це́ркви Его́,/ моли́ся о всех нас, да озари́т нас свы́ше благода́тным сия́нием,/ да возсия́ет в сердца́х челове́ческих денни́ца спасе́ния.
На хвали́тех стихи́ры, глас 4:
Оби́льная жа́тва Госпо́дня/ плодоно́сит ле́та мно́га да́же до дне́сь:/ святи́телие бо от Росто́ва и Яросла́вля насади́ша ве́ру Христо́ву,/ все́яша Боже́ственное се́мя жи́зни ве́чныя повсю́ду,/ и возвеща́ется спасе́ние,/ и утвержда́ется Ца́рствие Бо́жие в сердца́х челове́ческих,/ и пропове́дуется сла́ва Распя́таго и Воскре́сшаго нас ра́ди,/ и науча́ются ве́рнии лю́дие пра́вым путе́м ходи́ти,/ е́же сла́вити Бо́га и лю́дем служи́ти.
Свет, не зри́мый о́ком челове́ческим,/ и́же просвеща́ет се́рдца и ра́зум возлюби́вших Бо́га,/ стяжа́ли есте́, преподо́бнии отцы́ на́ши,/ подвиза́вшиися в пусты́нных ме́стех земли́ Росто́вския и Яросла́вския,/ грех ми́ра отри́нувше,/ да со Христо́м бу́дете во ве́ки,/ и, ны́не Ему́ предстоя́ще,/ испроси́те нам блага́я и поле́зная,/ е́же жи́ти спаси́тельно,/ творя́ще любо́вь, и ми́лость, и пра́вду.
Из глубины́ серде́чныя взыва́ем к вам, святи́и,/ пожи́вшии во граде́х и ве́сех на́ших,/ возсия́вшии доброде́тельми, я́ко свети́ла небе́сная./ Ева́нгелием Христо́вым упра́вили есте́ пути́ жития́ своего́,/ и возлюби́ вас ми́ра Спаси́тель,/ и и́мате к Нему́ дерзнове́ние,/ о нас, любо́вию чтущих вас, моли́теся,/ да пребу́дет с на́ми, призыва́ющими И́мя Его́ свято́е,/ и да поживе́м в ве́ре, любви́ и благоче́стии.
Сла́ва, глас 6:
Твоя́ прославля́ем служи́тели, Го́споди,/ тве́рдыя в ве́ре, в благоче́стии неколеби́мыя,/ горя́щия ду́хом и кро́ткия се́рдцем,/ иера́рхи, возвести́вшия сло́во Жи́зни/ и освяти́вшия лю́ди благода́тию Ду́ха Свята́го,/ преподо́бныя отцы́ равноа́нгельныя,/ победи́вшия естество́ теле́сное воздержа́нием,/ и вся пра́ведныя и блаже́нныя,/ показа́вшия соверше́нство христиа́нскаго жи́тельства,/ сия́ ублажа́ем и почита́ем/ и подража́ти им жела́ем и тщи́мся,/ Ты же моли́твами их/ да́руй нам ми́лость Твою́, мир и спасе́ние.
И ны́не, глас то́йже: Богоро́дице, Ты еси́ лоза́ и́стинная:
Вели́кое славосло́вие. Ектении́ и отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 8: Весели́теся о Го́споде/ и ра́дуйтеся, пра́веднии. Стих: Блаже́ни, и́хже оста́вишася беззако́ния и и́хже прикры́шася греси́. Апо́стол к Гала́том, зача́ло 213. Аллилу́ия, глас 4: Воззва́ша пра́веднии, и Госпо́дь услы́ша их/ и от всех ско́рбен их изба́ви их. Стих: Мно́ги ско́рби пра́ведным, и от всех их изба́вит я Госпо́дь. Ева́нгелие от Матфе́я, зача́ло 38. Прича́стен: Ра́дуйтеся, пра́веднии.
