Служба в честь Собора Радонежских святых

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры, глас 8.

Подо́бен: О, пресла́внаго чудесе́:

Ны́не возсия́ многосве́тлая па́мять/ святы́х Ра́донежских чудотво́рцев,/ венцы́ сла́вы Небе́сныя/ укра́шенных от Подвигополо́жника Христа́ Бо́га./ Те́мже, благове́рнии лю́дие,/ восхва́лим богоуго́дное их житие́/ и вси согла́сно возопии́м:/ моли́теся ко Го́споду, святи́и отцы́,/ о спасе́нии душ на́ших.

Преподо́бнии и Богоно́снии отцы́ на́ши/ Се́ргие, Ни́коне и Михе́е/ и вси Ра́донежстии святи́и,/ ны́не Це́рковь досто́йно восхваля́ет вас,/ вы бо, доброде́тельное житие́ на земли́ сконча́вше,/ на Небесе́х ны́не пребыва́ете,/ зря́ще сла́ву Триипоста́снаго Бо́га,/ не оста́вите нас, в пути́ земне́м су́щих,/ с ве́рою ча́ющих жи́зни бу́дущаго ве́ка.

Я́ко многопло́дный вертогра́д/ яви́ся на земли́ Ра́донежстей/ оби́тель Тро́ицы Живонача́льныя,/ от нея́же произы́де мона́хов пречестны́х мно́жество,/ и ти́и, я́ко о́трасли благоуха́нныя,/ насади́шася да́же до кра́я Руси́,/ тех у́бо ны́не пра́зднующе па́мять,/ притеце́м, ве́рнии челове́цы, и воспое́м:/ ра́дуйтеся, пресла́внии чудотво́рцы земли́ Ра́донежския.

Весели́теся и торжеству́йте,/ христоимени́тии лю́дие,/ прише́дшии поклони́тися до́му Животворя́щия Тро́ицы,/ се бо лик Ра́донежских уго́дников Бо́жиих,/ я́ко луча́ми светоза́рными блиста́я,/ просвеща́ет страну́ Росси́йскую/ и, име́я дерзнове́ние ко Го́поду,/ на Небесе́х мо́лится приле́жно/ о спасе́нии душ ве́рных христиа́н.

Сла́ва, глас 6:

Богоблаже́ннии отцы́ на́ши/ Се́ргие, Ни́коне, Михе́е/ и вси Ра́донежстии чудотво́рцы,/ суету́ и пре́лесть жите́йскую/ му́жественне отложи́вше/ и вся концы́ земли́ на́шея/ по́двиги благоче́стия просвети́вше,/ ца́рство ве́чныя сла́вы/ вои́стинну насле́довали есте́,/ приими́те моле́ние ве́рных чад свои́х,/ да изба́вимся от сете́й вра́жиих,/ злых напа́стей и лю́тых неду́гов,/ вас бо те́плых пред Бо́гом хода́таев стяжа́хом.

И ны́не, Богоро́дичен: Кто Тебе́ не ублажи́т:

Вход. Проки́мен дне. И чте́ния преподо́бническая.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 5):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их, и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 8:

Се внеза́пу глас бысть:/ Се́ргие, Се́ргие!/ Мо́лишися о свои́х ча́дех,/ и Бог моле́ние твое́ испо́лни,/ смотри́ же я́сно и́нок мно́жества,/ на твое́ и́мя соше́дшихся./ Святы́й же, воззре́в, ви́дит мно́жества птиц красных./ И па́ки глас Боже́ственный бысть:/ и́мже о́бразом ви́дел еси́ пти́цы крыла́тыя,/ мно́жество их безчи́сленное,/ та́ко умно́жится ста́до и́нок твои́х,/ и по тебе́ не оскуде́ют,/ а́ще восхотя́т стопа́м твои́м после́довати.

Глас 6:

Прииди́те, возра́дуемся, мона́хов сосло́вие,/ воздади́м хвалу́ и честь ве́лию/ ди́вному собо́ру Ра́донежских святы́х,/ Се́ргию, Ни́кону, Михе́ю/ и всем отце́м пра́ведным,/ в ве́ре и любви́ Христо́вей подвиза́вшимся,/ посто́м, бде́нием и моли́твою/ стра́сти умертви́вшим,/ де́монския полки́ победи́вшим/ и спаси́тельную благода́ть Бо́жию обре́тшим.

Сла́ва, и ны́не, глас 6:

Воспои́м, бра́тие, песнь хвале́бную/ Де́ве Богоро́дице,/ Та бо Свои́м всемо́щным покро́вом,/ по сло́ву нело́жнаго обетова́ния,/ защища́ет от мно́жества искуше́ний и зол/ благослове́нную оби́тель, ю́же всеблаже́нный Се́ргий основа́/ и устро́и, я́ко град Бо́га Жива́го.

И́на стихи́ра на Сла́ва, и ны́не, глас то́йже:

Пречи́стая Ма́ти Христа́ моего́,/ Хода́таице, и Засту́пнице,/ и кре́пкая Помо́щнице ро́ду челове́ческому,/ бу́ди и нам Хода́таица и Моли́твенница/ к Сы́ну Своему́ и Бо́гу на́шему,/ я́ко да при́зрит на свято́е ме́сто сие́,/ е́же и возложе́но есть/ в похвалу́ и честь/ Трисвята́го Его́ И́мене./ Тебе́ же, Ма́ти сла́дкаго моего́ Христа́,/ Хода́таицу предлага́ем, раби́ Твои́./ Ты бо еси́ всем спаси́тельное упокое́ние, и очисти́лище,/ и благоути́шное приста́нище обурева́емым во гресе́х.

На стихо́вне стихи́ры, глас 2:

Вни́дем, бра́тие, днесь в ра́дость/ ве́лия духо́внаго торжества́,/ се бо Це́рковь Росси́йская прославля́ет/ всехва́льный собо́р Ра́донежских чудотво́рцев,/ поуча́ющи нас благоче́стно ева́нгельскому их житию́.

Стих: Честна́ пред Го́сподем/ смерть преподо́бных Его́.

Во умиле́нии се́рдца воспои́м, ве́рнии лю́дие,/ по́двиги преподо́бных отце́в:/ Богоно́снаго а́ввы Се́ргия/ и его́ единоревни́теля Ни́кона,/ пе́рвенца прише́льца Васи́лия Суха́го,/ послушли́ваго Иа́кова,/ дво́ицу диа́конов: сы́на и отца́, Елиссе́я и Они́сима,/ Си́мона, архимандри́та Смоле́нскаго,/ Исаа́ка Молча́льника и Мака́рия,/ зри́телей чу́да сослуже́ния а́нгельскаго,/ и друга́го Си́мона, и́же ви́де огнь, в поти́р вше́дший,/ Се́ргию причаща́ющуся.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Еди́неми усты́ восхва́лим до́бре, бра́тие,/ светоно́сный лик Ра́донежских святы́х:/ игу́мена Митрофа́на, духо́внаго отца́ Се́ргиева,/ и самови́дца явле́ния Богоро́дицы Михе́я,/ преподо́бных Се́ргия и Па́вла Обно́рских,/ Са́ввы Стороже́вскаго и Андрони́ка Моско́вскаго,/ Варфоломе́я и Нау́ма, ста́рцев до́блестных,/ Афана́сия Серпуховска́го и Рома́на Киржа́чскаго/ и всех с ни́ми приле́жно подвиза́вшихся,/ и́хже житие́м просла́вися великоле́пое И́мя Жизнода́вца Христа́.

Сла́ва, глас 3:

Богоно́сных отце́в Ра́донежских/ всечестну́ю па́мять ны́не пра́зднующе,/ научи́мся, бра́тие, их ве́ре и житию́,/ и́стинному поклоне́нию/ и служе́нию Пресвяте́й Тро́ице,/ и́хже дерзнове́нным предстоя́нием да сподо́бимся/ восприя́ти бога́тыя Ея́ ми́лости и щедро́ты.

И ны́не, глас то́йже:

Яви́лася еси́, Де́во Богоро́дице,/ со двема́ апо́столома – Петро́м и Иоа́нном,/ преподо́бному отцу́ Се́ргию,/ ему́же соприча́стник в зре́нии чу́да бысть/ достоблаже́нный учени́к Михе́й,/ и изрекла́ еси́ обетова́ние:/ не оста́влю оби́тель сию́, избра́нниче Мой,/ Свои́м покро́вом и любо́вию./ Мы же, ра́дующеся, зове́м Ти:/ при́сно спаса́й нас, Влады́чице,/ от мглы грехо́в, злых обстоя́ний и бед.

И́на стихи́ра на Слава, и ны́не, глас 2:

О, сла́дкаго Твоего́ гла́са,/ Ма́ти Христа́ Моего́!/ О, чу́дныя любве́ и Твоего́ посеще́ния, Влады́чице!/ О, неизрече́ннаго Твоего́ обеща́ния,/ е́же с на́ми пребыва́ния.

Тропа́рь, глас 4:

Днесь све́тло пра́зднуем, ве́рнии лю́дие,/ пресла́вныя Тро́ицкия оби́тели торжество́:/ се бо ве́лий собо́р святы́х чудотво́рцев Ра́донежских,/ я́ко ди́вныя пти́цы небе́сныя,/ явля́ет нам Це́рковь Росси́йская,/ стезя́ми честна́го их жития́ ше́ствовати всех призыва́ющи,/ к ни́мже, с ве́рою и любо́вию притека́юще, воззове́м:/ моли́теся о нас ко Пресвяте́й Тро́ице,/ преподо́бнии отцы́ на́ши с Богоно́сным а́ввою Се́ргием,/ мир ми́рови дарова́ти/ и душа́м на́шим ве́лия ми́лости.

Ин тропа́рь, глас 2:

Плоды́ доброде́телей на земли́ прине́сше,/ преподо́бнии отцы́,/ в Небе́сных черто́зех ны́не благоуха́ете, я́ко ра́йстии цве́ти,/ и лице́м к лицу́ зри́те Пресвяту́ю Тро́ицу,/ Ю́же дерзнове́нно моли́те,/ спасти́ся душа́м на́шим.

НА У́ТРЕНИ

На Бог Госпо́дь: тропа́рь преподо́бнаго Се́ргия, глас 8: От ю́ности восприя́л еси́ Христа́ в души́ твое́й, преподо́бне: (зри день 5-й) еди́ножды и Днесь све́тло пра́зднуем: еди́ножды. Сла́ва: Плоды́ доброде́телей: И ны́не, Богоро́дичен.

По 1-м стихосло́вии седа́лен, глас 5:

Я́ко све́щницы на престо́ле, возсия́ли есте́, святи́и чудотво́рцы земли́ Ра́донежския,/ и, я́ко многоцве́тие благово́нное, израсли́ есте́,/ те́мже неоску́дно пото́цы люде́й правосла́вных притека́ют к ра́це ва́ших святы́х моще́й,/ прося́ще ми́рови вы́шний мир и ве́лия ми́лости.

Сла́ва, и ны́не, Богоро́дичен:

Богоро́дице, Де́во Чи́стая, моли́ся Го́сподеви,/ я́ко да Твои́м предста́тельством пода́ст душа́м на́шим грехо́в оставле́ние,/ мир и ра́дость в наде́жди спасе́ния ве́чнаго.

По 2-м стихосло́вии седа́лен, глас 4:

Приими́те на́шу песнь церко́вную, святи́и чудотво́рцы Ра́донежстии,/ вы бо до́блественне подвиза́лися есте́ на земли́,/ со стра́хом и тре́петом спасе́ние свое́ соде́лавше,/ и ны́не торжеству́ете в Ве́чнем Ца́рстве Небе́снаго Влады́ки.

Сла́ва, и ны́не, Богоро́дичен:

Де́во Богоро́дице, с ве́рою и любо́вию под кров Твой прибега́ем,/ ве́мы, я́ко недосто́йнии раби́ Твои есмы́,/ но, моля́щеся, обря́щем Тобо́ю спасе́ние.

Велича́ние:

Велича́ем вас,/ вси святи́и земли́ Ра́донежския,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Псало́м избра́нный: Терпя́, потерпе́х Го́спода:

По полиеле́и седа́лен, глас 8:

Богому́дрии отцы́ на́ши Се́ргие, Ни́коне и вси Ра́донежстии преподо́бнии,/ вку́пе и во уедине́нии подвиза́вшиися душеспаси́тельным доброде́ланием,/ не забу́дите в моли́твах ва́ших на Небесе́х о ве́рных ча́дех свои́х,/ ча́ющих мно́гия ми́лости.

Сла́ва, и ны́не, Богоро́дичен:

Де́во Всенепоро́чная, Всеще́драго Бо́га ро́ждшая,/ непреста́нно То́го моли́ о спасе́нии душ на́ших,/ Тя бо тве́рдую Предста́тельницу и́мамы.

Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 10.

Сла́ва: Моли́твами преподо́бных и Богоно́сных отце́в Ра́донежских,/ Ми́лостиве, очи́сти/ мно́жество согреше́ний на́ших.

И ны́не: Моли́твами Богоро́дицы:

По 50-м псалме́ стихи́ра, глас 6:

Взе́мше на ра́мена благо́е и́го Христо́во,/ подвиза́стеся идти́ те́сным путе́м/ в Ца́рство ве́чныя жи́зни,/ я́коже рече́ Госпо́дь наш./ И ны́не во Све́те невече́рнем/ лику́ете со а́нгельскими си́лами,/ зря́ще неизрече́нную сла́ву Триипоста́снаго Божества́,/ не оста́вите нас любо́вию свое́ю,/ святи́и отцы́, Ра́донежстии чудотво́рцы,/ подаю́ще нам вели́кия и бога́тыя ми́лости.

Кано́н Богоро́дицы и преподо́бным, глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Припе́в: Вси святи́и земли́ Ра́донежския, моли́те Бо́га о нас.

Ка́ко восхва́лим вас, преподо́бнии Се́ргие, Ни́коне/ и вси чудотво́рцы, во оби́тели Тро́ицы Пресвяты́я подвиза́вшиися/ и мир весь житие́м свои́м равноа́нгельным удиви́вшии?

Сам сый до́брая о́трасль от блага́го ко́рене роди́телей твои́х, блаже́нных Кири́лла и Мари́и,/ во святе́й схи́ме сконча́вшихся, Богому́дре Се́ргие,/ восприя́л еси́ на ра́мо многоско́рбный Крест мона́шескаго жития́,/ не обину́яся после́дова Христу́.

Пусты́нное житие́ избра́в,/ насади́л еси́ духо́вный вертогра́д, Богоно́се о́тче Се́ргие,/ и воспита́л еси́ мно́жество и́ноков добронра́вных,/ и́миже просла́вися вели́кое Имя Святы́я Тро́ицы.

Процвете́, я́ко фи́никс, оби́тель Живонача́льныя Тро́ицы/ мно́гими труды́ твои́ми, преблаже́нне о́тче Се́ргие,/ да спаса́ются зде ре́вностно ученицы́ твои́.

Богоро́дичен: Ма́ти Бо́га Истиннаго,/ приими́ мольбы́ рабо́в Твои́х, и́щущих Твоего́ заступле́ния,/ Ты бо еси́ приста́нище необурева́емое правосла́вных христиа́н.

Песнь 3

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.

В час нощны́я моли́твы твоея́, Богохва́льне о́тче наш Се́ргие,/ бысть чу́дное явле́ние с Небесе́,/ зна́менующе бу́дущая о мно́жестве учени́к твои́х.

Ди́вныя пти́цы ра́йския, излете́вшия в луча́х све́та Небе́снаго,/ ви́дел еси́ в той час, преподо́бне о́тче Се́ргие,/ и слы́шал еси́ глас, свы́ше глаго́лющ тебе́ гряду́щая о ученице́х твои́х.

Я́ко кедр, и́же в Лива́не, умно́жишася сподви́жницы и ученицы́ твои́/ и просла́вишася в доброде́телех, Се́ргие Богоблаже́нне,/ подража́юще твоему́ житию́.

Восприи́м ре́вность духо́вную, мно́ги по́двиги соверши́л еси́/ и те́ми Пресвяту́ю Тро́ицу просла́вил еси́,/ те́мже ны́не наслажда́ешися на Небеси́,/ зря Тоя́ добро́ту неизрече́нную, Се́ргие вели́кий.

Богоро́дичен: Бо́га, воплоща́ема из Тебе́, зря́ще, Де́во,/ ужаса́хуся стра́хом и тре́петом Го́рния си́лы/ и я́ко су́щую Богоро́дицу Тя непреста́нно велича́ют.

Седа́лен, глас 4:

Приидо́сте в дом Животворя́щия Тро́ицы, преподо́бнии отцы́,/ и обрето́сте безце́нный би́сер, Христа́,/ в пе́ниих, бде́ниих и поще́ниих мона́шескаго жития́ стяжа́вше благода́ть Его́,/ непреста́нно моли́те Всеми́лостиваго Спа́са о душа́х на́ших.

Сла́ва, и ны́не, Богоро́дичен:

Тебе́, Ма́ти Бо́жия, ро́ди родо́в пою́т, сла́вят и поклоня́ются,/ изба́ви нас от вся́ких злых преткнове́ний вра́жиих,/ Твои́ бо есмы́ раби́, да не постыди́мся.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Оста́вивше суету́ мирску́ю, возлюби́ли есте́ житие́ мона́шеское/ и до конца́ пре́дали есте́ себе́, я́ко о́вцы, послуша́нию и смире́нию,/ во о́браз Сладча́йшаго Христа́, Ни́коне и Михе́е Богоно́снии.

Ми́ра красоту́ презре́ли есте́/ и всели́лися есте́ во оби́тель Ра́донежскую,/ процве́тшую, я́ко сад ди́вный, многообра́зными ва́шими доброде́тельми,/ Васи́лие и Иа́кове, отцы́ всеблаже́ннии.

Воздержа́нием, коленопреклоне́нием и слеза́ми/ угаси́ли есте́ душепа́губныя стра́сти в себе́, отцы́ пресла́внии Они́симе и Елиссе́е,/ и просла́вили есте́ Христа́ в душа́х и телесе́х ва́ших.

Земны́я пре́лести отве́ргше,/ благода́тию Бо́жиею стори́цею преумно́женный плод духо́вный обрели́ есте́,/ научи́те у́бо и нас пра́вилам ве́ры и о́бразу и́стиннаго жития́,/ преподо́бнии Си́моне архимандри́те и игу́мене Митрофа́не.

Богоро́дичен: Еди́н от Святы́я Тро́ицы воплоти́ся от Тебе́, Пречи́стая,/ да спасе́т весь род челове́ческий от рабо́ты вра́жия и ве́чнаго осужде́ния.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Мно́гими боле́зньми, непреста́нными моли́твами/ и духо́вным трезве́нием тьму бесо́вскую отгна́вше,/ собесе́дники А́нгелов яви́лися есте́,/ Исаа́кие и Мака́рие, отцы́ прехва́льнии.

Вои́стинну христоподража́тельне пожи́ли есте́, преподо́бнии отцы́ Си́моне и Илие́,/ плоть свою́ со страстьми́ и похотьми́ распя́вше,/ те́мже помози́те нам, немощны́м, преодоле́ти сопроти́вныя си́лы лука́вых духо́в.

Возде́вше ру́ки горе́,/ сотвори́те усе́рдное моле́ние и хода́тайство пред Всеми́лостивым Спа́сом/ о всех чту́щих ва́шу всечестну́ю па́мять,/ преподо́бнии Сильве́стре, Се́ргие и Па́вле,/ на реце́ Обно́ре подвиза́вшиися.

Те́плое предста́тельство ко Святе́й Тро́ице иму́ще,/ не забу́дите убо́гих рабо́в, с ве́рою призыва́ющих вас в час лю́тыя напа́сти,/ святи́и Фео́доре и Па́вле Росто́встии/ и сро́дниче по пло́ти Се́ргиев, святи́телю о́тче Фео́доре.

Богоро́дичен: Все на́ше упова́ние на Тя возложи́хом, Де́во Мари́е,/ при́зри на ны, лю́ди согреши́вшия,/ с ве́рою ча́ющия от Тебе́ заступле́ния и спасе́ния.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Прии́мше Госпо́дне благослове́ние и благода́тию Ду́ха Всесвята́го укрепля́емии,/ преподо́бнии отцы́ Иа́кове Железнобо́ровский и Григо́рие Голу́твинский,/ насади́ли есте́ оби́тели, я́ко духо́вныя исто́чники, на земли́ Росси́йстей.

Просла́влени бы́ша ва́шими по́двиги, отцы́ досточу́днии,/ Авраа́мие Га́лицкий и Мефо́дие Пе́шношский, пусты́ни непроходи́мыя,/ процве́тшия, я́ко кри́ни се́льнии, и источи́вшия ре́ки чуде́с.

Слеза́ми, посто́м и моли́твою созда́вше оби́тели святы́я на земли́,/ ны́не ве́чно ра́дуетеся во оби́телех Отца́ Небе́снаго,/ святи́и Са́вво Стромы́нский и Лео́нтие Ду́бенский, му́жие добропобе́днии.

Обогати́ли есте́ духо́вным сокро́вищем селе́ния своя́,/ и просла́вишася ва́шими доброде́тельми зе́мли Росто́вская и Обно́рская,/ Киржа́чская и Стромы́нская, Стороже́вская и Коло́менская/ и ины́я от преде́л мно́гих.

Богоро́дичен: Влады́чице Богоро́дице, отве́рзи нам две́ри милосе́рдия Твоего́,/ Ты бо еси́ спасе́ние ро́да христиа́нскаго.

Конда́к, глас 8:

Прииди́те, вси концы́ оте́чества на́шего,/ просла́вим святы́й лик уго́дников Ра́донежских,/ я́ко зве́зды, украси́вших не́бо церко́вное по́двиги земна́го жи́тельства,/ тех бо предста́тельством те́плым ко Го́споду/ мно́гия нам ми́лости Его́ низпосыла́ются,/ бе́дствия отгоня́ются и злы́я стра́сти укроща́ются./ И́хже всесвяту́ю па́мять ны́не пра́зднующе, та́ко возопии́м:/ ра́дуйтеся, Се́ргие и Ни́коне и вси Ра́донежстии чудотво́рцы,/ усе́рднии служи́телие Живонача́льныя Тро́ицы.

И́кос:

Мирску́ю честь и сла́ву презре́вше,/ еди́ному Христу́ вожделе́ли есте́ порабо́тати,/ преподо́бнии отцы́ на́ши Се́ргие, Ни́коне и вси святи́и,/ в земли́ Ра́донежстей и о́крест ея́ просия́вшии,/ зде досто́йно и пра́ведно Живонача́льней Тро́ице послужи́ли есте́./ Те́мже и всели́ся в вас Дух Пресвяты́й и умудри́ позна́нием пачеесте́ственным,/ наста́вите у́бо нас и́стинней ве́ре и житию́,/ да сподо́бимся неосужде́нно призыва́ти Тро́ицу Единосу́щную и Неразде́льную./ Те́мже, ублажа́юще ны́не ва́шу честну́ю па́мять, непреста́нно зове́м:/ ра́дуйтеся, отцы́ пресла́внии,/ учи́телие на́ши и служи́телие неотсту́пнии Святы́я Тро́ицы.

Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Дости́гше Го́рних черто́гов,/ та́мо со А́нгелы славосло́вите Го́спода Вседержи́теля, пою́ще:/ отце́в Бо́же, благослове́н еси́.

Моли́теся непреста́нно за ны,/ де́ти ва́ша духо́вная, с ве́рою пою́щая:/ отце́в Бо́же, благослове́н еси́.

Зря́ще с Небесе́ на призыва́ющия вас в ско́рбех христиа́ны,/ возниспосли́те по́мощь пою́щим:/ отце́в Бо́же, благослове́н еси́.

Со Христо́м ца́рствуете несконча́емо,/ те́мже умоли́те Го́спода сил спасти́ ны, пою́щия:/ отце́в Бо́же, благослове́н еси́.

Богоро́дичен: Простри́ ру́це Твои́, Преблагослове́нная Де́во, к Сы́ну Твоему́, Христу́ Бо́гу на́шему, моля́щи усе́рдно,/ да поми́лует нас, гре́шных, по вели́цей Свое́й ми́лости.

Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Досто́йно и пра́ведно на земли́ житие́ сконча́вше,/ Ца́рству нетле́нных благ приобщи́лися есте́, пою́ще:/ да благослови́т тварь вся Го́спода/ и превозно́сит во вся ве́ки.

Вельми́ прославля́ет ны́не ва́ше равноа́нгельное житие́/ Це́рковь Христо́ва, воспева́ющи:/ да благослови́т тварь вся Го́спода/ и превозно́сит во вся ве́ки.

До́брии и ве́рнии предста́ли есте́ на Небесе́х раби́ Христо́ви,/ я́ко умно́жили есте́ вруче́нныя вам тала́нты духо́вныя,/ те́мже благода́рне воспева́ете:/ да благослови́т тварь вся Го́спода/ и превозно́сит во вся ве́ки.

Насле́довавше блаже́нство неопи́санное,/ научи́те нас досто́йно жи́ти во вся́ком благоче́стии и чистоте́, пою́щих:/ да благослови́т тварь вся Го́спода/ и превозно́сит во вся ве́ки.

Богоро́дичен: Неусыпа́емую в моли́твах Засту́пницу/ обре́те Тя, Непоро́чная Де́во, челове́ческий род./ Те́мже, ра́дующеся, пое́м:/ да благослови́т тварь вся Го́спода/ и превозно́сит во вся ве́ки.

Песнь 9

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Я́ко иму́щии дерзнове́ние ко Святе́й Тро́ице, Богоно́снии отцы́,/ ско́ро предвари́те ми́лостию свое́ю всех чту́щих всечестну́ю па́мять ва́шу.

Услы́шите покая́нный глас моле́ния на́шего,/ да изба́вимся ва́шим кре́пким заступле́нием от мно́жества зол и прегреше́ний.

Исцели́те на́ша неду́ги и я́звы грехо́вныя, отцы́ Богохва́льнии,/ вам бо свы́ше даде́ся благода́ть врачева́ти боле́зни душе́вныя и теле́сныя.

Земля́ Росси́йская ны́не ликовству́ет,/ ублажа́ющи ва́шу пречестну́ю па́мять, отцы́ всесла́внии,/ те́мже приими́те на́шу песнь хвале́бную.

Богоро́дичен: Родила́ еси́ Безле́тнаго Сы́на, Пречи́стая, плоть на́шу прие́мшаго,/ кро́вию Свое́ю на Кресте́ омы́вшаго от грехо́в па́дшаго Ада́ма,/ умоли́ у́бо Спа́са на́шего изба́вити нас от ве́чныя сме́рти.

Свети́лен:

Никто́же мо́жет из земноро́дных изрещи́ подвиго́в ва́ших тяготу́/ и уразуме́ти си́лу да́нныя вам от Бо́га благода́ти,/ те́мже при́зрите с высоты́ Небе́сныя, преподо́бнии отцы́, на нас,/ и́щущих ва́шея благосе́рдныя по́мощи.

Сла́ва, и ны́не, Богоро́дичен:

Немо́лчно воспева́ем Тя, Мари́е Богоневе́стная,/ а́нгельскими глаго́лы велича́юще:/ ра́дуйся, Благода́тная, Госпо́дь с Тобо́ю.

На хвали́тех стихи́ры на 4, глас 4:

Восхва́лим, ве́рнии лю́дие,/ благоле́пный лик Ра́донежских чудотво́рцев,/ до́бре и му́жественне подвиза́вшихся на земли́,/ и просия́вших, я́ко со́лнце,/ в Ца́рстве Отца́ Небе́снаго,/ и восприя́вших благода́ть при́сно моли́тися за нас.

Приими́те проше́ние на́ше,/ Богоблаже́ннии отцы́,/ умири́те вражду́ вся́ку в лю́дех,/ в озлобле́нии су́щих,/ огради́те нас от злых ко́зней диа́вольских,/ насади́те благу́ю любо́вь и страх Бо́жий/ в ду́ши правосла́вных христиа́н.

Святи́и отцы́ Богосла́внии,/ насажде́ни в дому́ Госпо́дни,/ во дво́рех Бо́га на́шего процвели́ есте́,/ и еще́ умно́жися в ста́рости масти́те/ доброде́телей ва́ших многотеку́щая река́./ Те́мже пе́сньми свяще́нными/ вас непреста́нно ублажа́ем.

Воспо́йте, лю́дие, Го́сподеви песнь но́ву,/ воспо́йте Го́сподеви, вся земля́,/ я́ко боголе́пно Жизнода́вец Христо́с/ просла́вися в душа́х пра́ведных отце́в,/ взе́мших на себе́ благо́е бре́мя Его́/ и прия́вших венцы́ нетле́нныя ве́чнаго блаже́нства.

Сла́ва, глас 8:

О Богоно́снии отцы́ и чудотво́рцы,/ Ра́донежския земли́ ди́вное сия́ние!/ Све́том любве́ ва́шея озари́те/ ду́ши правосла́вных христиа́н,/ благоче́стно пра́зднующих ва́шу па́мять,/ предста́тельствуйте со тща́нием ко Святе́й Тро́ице/ о ми́ре всего́ ми́ра/ и спасе́нии душ на́ших.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое и отпу́ст.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Кори́нфяном, зача́ло 176. Аллилуия, глас 6: Блаже́н муж, боя́йся Го́спода,/ в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Матфе́я, зача́ло 43. Прича́стен: Ра́дуйтеся, пра́веднии, о Го́споде:

Моли́тва

О преподо́бнии и Богоно́снии отцы́ на́ши Се́ргие, Ни́коне и вси Ра́донежстии святи́и, во оби́тели Животворя́щия Тро́ицы благоле́пно процве́тшии и в земли́ Росси́йстей пресла́вно возсия́вшии! Я́ко лучи́ многосве́тлыя Со́лнца пра́вды, Христа́ Жизнода́вца, во оте́честве на́шем вы у́бо яви́стеся, све́том благода́ти Боже́ственныя чуде́сне ду́ши правосла́вных озари́вше, наста́вите у́бо и вразуми́те нас, в ле́ности су́щих, на путь пра́вды жи́зни ве́чныя. Внемли́те гла́су моле́ния на́шего, да испо́лним, я́ко раби́ благоразу́мнии, вся повеле́нная нам Го́сподем на́шим Иису́сом Христо́м. И ны́не, в день всесвяты́я па́мяти ва́шея и прославле́ния во оби́тели сей, мо́лим вас приле́жно, святи́и уго́дницы Бо́жии, на́ши те́плии предста́телие пред Престо́лом Святы́я Тро́ицы и хода́таи усе́рднии, да испросите нам, гре́шным и недосто́йным рабо́м, вели́кия и бога́тыя ми́лости Бо́жия, да прии́дем вси в позна́ние и́стины, принося́ще плоды́ досто́йныя покая́ния, и́мже обря́щем благода́ть Всесвята́го Ду́ха.

О до́брии наста́вницы на́ши и моли́твенницы ко Го́споду! Неусы́пно предста́тельствуйте о Це́ркви на́шей, да пребыва́ет при́сно в чистоте́ Правосла́вия и да свиде́тельствует непрело́жно в ми́ре сем о ве́чней и Боже́ственней Христо́вей и́стине, ю́же апо́столи святи́и утверди́ша и отцы́ Це́ркве невреди́му соблюдо́ша. Я́ко иму́ще дерзнове́ние ко Святе́й Тро́ице, неосла́бно бди́те в Небе́сных моли́твах ва́ших о правосла́внем оте́честве на́шем, о тишине́ и благостоя́нии всего́ ми́ра, да вси, преуспева́юще в ве́ре, благоче́стно поживе́м и сподо́бимся неосужде́нно ста́ти одесну́ю Всеще́драго Бо́га, иде́же вы ра́дуетеся и весели́теся со все́ми, от ве́ка Ему́ угоди́вшими. Ами́нь.

Моли́тва преподо́бным схимона́хом Кири́ллу и Мари́и, роди́телем преподо́бнаго Се́ргия

О раби́ Бо́жии, схимона́ше Кири́лле, схимона́хине Мари́е! Аще и сконча́ли есте́ вре́менную жизнь свою́ те́лом, но ду́хом не отступа́ете от нас, руково́дствуете же ны ко Христу́ Бо́гу, наставля́ете ше́ствовати по за́поведем Госпо́дним и носи́ти крест свой и после́довати Влады́це на́шему. Вы, преподо́бнии, вку́пе с преподо́бным и Богоно́сным отце́м на́шим Се́ргием, ва́шим возлю́бленным сы́ном, име́ете дерзнове́ние ко Христу́ Бо́гу на́шему и ко Святе́й Его́ Богома́тери. Бу́дите моли́твенницы и хода́таи о нас, недосто́йных, жи́тельствующих во святе́й оби́тели ва́шей, ей же вы и нача́льницы. Бу́дите помо́щницы и засту́пницы Бо́гом со́бранней дружи́не сей, да жи́тельствующии на ме́сте сем и приходя́щии с ве́рою, ва́шими моли́твами сохраня́еми, невреди́ми от бесо́в и от челове́к злых пребу́дем, сла́вяще Святу́ю Тро́ицу, Отца́ и Сы́на и Свята́го Ду́ха, ны́не, и при́сно, и во ве́ки веко́в. Ами́нь.