Поиск проповеди

Проповеди на праздники:

Служба в честь прославления преподобнаго и Богоноснаго отца нашего Серафима, Саровскаго и всея России чудотворца

В сей день соединя́ем Слу́жбы Пресвяте́й Богоро́дице ра́ди ико́ны Ея́, имену́емыя «Умиле́ние» или́ «Ра́дость всех ра́достей» , и преподо́бному Серафи́му (зри ниже). Уста́в зри ниже.

Слу́жба Пресвяте́й Богоро́дице, ра́ди ико́ны Ея́, имену́емыя «Умиле́ние» или́ «Ра́дость всех ра́достей»

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 2:

Злата́я кади́льнице,/ ру́чко и же́зле,/ и свети́льниче светоза́рный,/ сви́тче Боже́ственный,/ в не́мже пе́рстом Бо́жиим написа́ся Сло́во,/ спаси́ нас, Тебе́ велича́ющих.

Да́руй нам по́мощь, Богоро́дице,/ на Тя наде́ющимся,/ ве́рных прибе́жище,/ изба́ви от бед рабы́ Твоя́, Де́во.

Ра́достно, Чи́стая,/ ны́не наста́вшее хвале́ние приноша́ю:/ ра́дуйся, и ти́хим гла́сом уми́льно вопию́ Ти:/ ра́дуйся, всех ра́достей Ра́досте.

Ра́дости вся испо́лнила еси́,/ Вы́шния и ни́жния Ты совокупи́ла еси́, Богоро́дице,/ те́мже ра́достно и согла́сно ны́не/ Не́бо и земля́ зове́т Ти:/ ра́дуйся, всех ра́достей Ра́досте.

Сла́ва, и ны́не, глас 3:

Зла́та вся́каго блиста́ема/ и у́тра со́лнечнаго светле́йши,/ жили́ще Христо́во,/ ра́дуйся, всех ра́достей Ра́досте;/ ра́дуйся, Деви́це;/ ра́дуйся, Неве́сто Неневе́стная.

На стихо́вне стихи́ры, глас 3:

Лику́ют вси челове́цы и А́нгели,/ всегда́ согла́сно вопию́ще на Небеси́ и на земли́:/ ра́дуйся, всех ра́достей Ра́досте;/ ра́дуйся, умиле́ния и ра́дости вся́ческая испо́лнила еси́.

Стих: Помяну́ и́мя Твое́/ во вся́ком ро́де и ро́де.

Благосты́ни бе́здна и щедро́там еси́,/ ра́дуйся, Умиле́ние, Деви́це;/ ра́дуйся, всем ра́дость творя́щи ве́рным,/ о, ра́дуйся, су́щим в беда́х и скорбя́щим/ Пребы́страя Засту́пнице.

Стих: Слы́ши, Дщи, и виждь,/ и приклони́ у́хо Твое́.

Иде́же прославля́ется свято́е и́мя Обра́дованныя Богоро́дицы,/ та́мо вся́ческих благи́х исто́чницы пролива́ются:/ прииди́те в чистоте́, челове́цы,/ се бо явле́ние Боже́ственныя Де́вы ико́ны Умиле́ния/ сказу́ет Цари́цы прише́ствие/ во спасе́ние всех ве́рных.

Сла́ва, и ны́не, глас то́йже:

Арха́нгельскую песнь, е́же ра́дуйся, Тебе́ зове́м, Богоневе́сто,/ Госпо́дь с Тобо́ю,/ ра́дуйся, ра́досте А́нгелов и всех челове́ков,/ сла́вящих Тя вои́стинну весе́лие;/ спаси́ ду́ши пою́щих Тя,/ Богоро́дице Чи́стая, Умиле́ние.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 5:

Ра́дуйся, Богома́ти Пречи́стая;/ ра́дуйся, ве́рных наде́ждо;/ ра́дуйся, оби́тель на́шу избавля́ющая вся́ких скорбе́й;/ ра́дуйся, покрыва́ющая рабы́ Твоя́;/ ра́дуйся, Неве́сто Неневе́стная,/ ра́дуйся, всех ра́достей Ра́досте.

Всем се́рдцем прославля́ем и почита́ем/ и́мя Твое́ и ме́сто оби́тели Твоея́/ и святу́ю ико́ну Твою́,/ ра́достно пое́м Тебе́:/ ра́дуйся, Неве́сто Неневе́стная,/ не оста́ви нас, си́рых и беззащи́тных,/ во обстоя́ниих лю́тых,/ изба́ви нас ве́чнаго муче́ния/ и сподо́би Ца́рствия Сы́на Твоего́ и Бо́га на́шего,/ всех ра́достей Ра́досте.

Ты А́нгелов ра́дость, Влады́чице Всепе́тая,/ Ты еси́ Предста́тельница на́ша,/ к Тебе́ прибега́ем во вся́кой ну́жди и ско́рби,/ покры́й оби́тель Твою́ и спаси́ рабы́ Твоя́, пою́щия Ти:/ ра́дуйся, всех ра́достей Ра́досте.

Вси чи́стою со́вестию Богоро́дице припаде́м,/ вопию́ще Ей непреста́нно:/ ра́дуйся, всех ра́достей Ра́досте,/ ра́дуйся, Засту́пнице де́вствующих,/ спаси́ оби́тель, Тебе́ посвяще́нную,/ покры́й от бед и ну́жды вся́кия,/ Тебе́ бо вси стяжа́хом Ма́терь/ и утвержде́ние и о́браз де́вства,/ под кро́вом Твои́м сохраня́еми,/ ра́достно зову́ще Ти:/ ра́дуйся, Де́во,/ ра́дуйся, всех ра́достей Ра́досте.

Ра́дуйся, Непосты́дная Предста́тельнице;/ ра́дуйся, Преблага́я Богоро́дице;/ ра́дуйся, Засту́пнице обурева́емым;/ ра́дуйся, Я́же всем помога́ющая, су́щим в ну́ждах,/ Ты у́бо сохрани́ и мене́, Де́во,/ всех ра́достей Ра́досте.

Глас 2:

Вельми́ добро́тою украси́ Тя Бог,/ я́ко челове́ком Свет даде́ на руку́ Твое́ю,/ Ты же, в сия́нии Его́ су́щи,/ упова́ние христиа́ном,/ Помо́щница им в ну́ждах и ско́рбех,/ всех ра́достей Ра́досте и приста́нище тружда́ющимся,/ моли́ изба́витися оби́тели от напа́стей,/ любо́вию пою́щим Тя/ и моля́щимся всечестно́му о́бразу Твоему́, Умиле́ние.

Еди́на еси́ всех Предста́тельница христиа́н,/ Богома́ти Пречи́стая,/ услы́ши на́ше моле́ние,/ воззри́ на ны, Всепе́тая,/ спаси́ град весь и оби́тель Твою́/ и озари́ ста́до Твое́/ благода́тию Твоего́ заступле́ния, Умиле́ние.

Да лику́ет све́тло избра́нная Тобо́ю оби́тель,/ иму́щи чудотво́рную ико́ну Умиле́ния Бо́жия Ма́тере,/ Ю́же ублажа́ем Боже́ственными пе́сньми:/ ра́дуйся, ве́рных спасе́ние;/ ра́дуйся, всех ра́достей Ра́досте;/ ра́дуйся, Неве́сто Неневе́стная.

Сла́ва, и ны́не, глас 8:

Богоро́дицу Мари́ю вси воспои́м:/ ра́дуйся, Ма́ти Бо́жия;/ ра́дуйся, ле́ствице одушевле́нная;/ ра́дуйся, купино́ неопали́мая;/ ра́дуйся, ста́мно всезлата́я;/ ра́дуйся, цве́те ве́ры;/ ра́дуйся, же́зле прозябы́й;/ ра́дуйся, злата́я кади́льнице;/ ра́дуйся, горо́ Бо́жия присе́нная73, Де́во;/ ра́дуйся, разреше́ние кля́твы пе́рвыя Е́вы;/ ра́дуйся, Престо́ле Госпо́день;/ ра́дуйся, многомоли́твенная красото́;/ ра́дуйся, Влады́чице, всех ра́достей Ра́досте.

Вход. Проки́мен дне. И чтения 3 Богоро́дичная (зри день12-й).

Бытия́ чте́ние (глава́ 28):

Изы́де Иа́ков от студенца́ кля́твеннаго и и́де в Харра́нь./ И обре́те ме́сто, и спа та́мо, за́йде бо со́лнце,/ и взят от ка́мения ме́ста того́, и положи́ возгла́вие себе́,/ и спа на ме́сте о́ном, и сон ви́де:/ и се ле́ствица утвержде́на на земли́,/ ея́же глава́ досяза́ше до Небе́с,/ и А́нгели Бо́жии восхожда́ху и низхожда́ху по ней,/ Госпо́дь же утвержда́шеся на ней и рече́:/ Аз Бог Авраа́мов, отца́ твоего́,/ и Бог Исаа́ков, не бо́йся:/ земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́, а́може а́ще по́йдеши./ И возвращу́ тя в зе́млю сию́,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́ и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но дом Бо́жий, и сия́ врата́ Небе́сная.

Проро́чества Иезеки́илева чте́ние (главы́ 43 и 44):

Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы, глаго́лет Адонаи́ Госпо́дь./ И обрати́ мя на путь врат святы́х вне́шних,/ зря́щих на восто́ки, и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же пре́йдет сквозе́ их,/ я́ко Госпо́дь, Бог Изра́илев, про́йдет и́ми и бу́дут затворе́на,/ я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х,/ су́щих к се́веру, пря́мо хра́му, и ви́дех,/ и се испо́лнь сла́вы храм Госпо́день.

При́тчей чте́ние (глава́ 9):

Прему́дрость созда́ Себе́ дом/ и утверди́ столпо́в седмь./ Закла́ Своя́ же́ртвенная, и раствори́ в ча́ши Свое́й вино́,/ и угото́ва Свою́ трапе́зу./ Посла́ Своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко Мне,/ и тре́бующим ума́ рече́:/ прииди́те, яди́те Мой хлеб, и пи́йте вино́: е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́яй же нечести́ваго опоро́чит себе́,/ обличе́ние бо нечести́вому – ра́ны ему́./ Не облича́й злых, да не возненави́дят тебе́,/ облича́й прему́дра, и возлю́бит тя./ Даждь прему́дрому вину́, и прему́дрший бу́дет,/ сказу́й пра́ведному, и приложи́т приима́ти./ Нача́ло прему́дрости – страх Госпо́день, и сове́т святы́х – ра́зум:/ разуме́ти бо зако́н, по́мысла есть блага́го./ Сим бо о́бразом мно́гое поживе́ши вре́мя,/ и приложа́тся тебе́ ле́та живота́.

На лити́и стихи́ры, глас 3:

Прииди́те, вси концы́ земли́,/ честно́му о́бразу Бо́жия Ма́тере, Умиле́нию, поклони́мся:/ Та бо непреста́нно мо́лится о нас/ и Тоя́ святы́м о́бразом на́ше ме́сто оживле́но бысть,/ мы же, псалмы́ и пе́сньми духо́вными пою́ще Ей,/ со все́ми святы́ми пра́зднуем све́тло.

Сла́ва, и ны́не, глас 8:

О, пресла́внаго чудесе́:/ во всех страна́х Тебе́ ра́ди/ прославля́емо ме́сто свято́е сие́, Богоневе́сто,/ я́ко и́мать в себе́ чудотво́рную Твою́ ико́ну,/ от нея́же неизрече́нныя цельбы́ прие́млюще,/ благода́рственно вопие́м Тебе́ и уми́льно мо́лим Тя:/ Пресвята́я Де́во, спаси́ ду́ши на́ша,/ всех ра́достей Ра́досте.

На стихо́вне стихи́ры, глас 8:

В пра́здник вели́кий Богоро́дицы собра́вшеся,/ в торжестве́ духо́внем веселя́щеся,/ пред чудотво́рною Ея́ ико́ною Умиле́ния воспои́м Преблагослове́нней:/ ра́дуйся, неувяда́емый цве́те чистоты́;/ ра́дуйся, огражде́ние Тобо́ю избра́нныя оби́тели,/ е́йже благоволи́ла еси́ причте́нной бы́ти ко жре́бием Твои́м на земли́;/ ра́дуйся, похвало́ де́вствующих;/ ра́дуйся, всех ра́достей Ра́досте.

Стих: Помяну́ и́мя Твое́/ во вся́ком ро́де и ро́де.

Ра́дуйся, Яже Ра́дость ро́ждшая, Пречи́стая,/ су́щим на земли́ вои́стинну;/ ра́дуйся, спаси́тельное приста́нище и покро́ве притека́ющих к Тебе́;/ ра́дуйся, ле́ствице чи́стая, возвы́сившая па́дших;/ ра́дуйся, всечестно́е Умиле́ние,/ Богоро́дице, упова́ние душа́м на́шим.

Стих: Слы́ши, Дщи, и виждь,/ и приклони́ у́хо Твое́.

Се покрови́тельствуемая Тобо́ю, Де́во,/ избра́нная оби́тель Твоя́/ ра́достно взыва́ет Тебе́:/ прииди́ к нам, Богоневе́сто, неви́димо ста́ни с на́ми,/ вложи́ пе́ние во уста́ на́ша/ и о́ным предначни́ торжество́ ра́достно пою́щих Ти:/ ра́дуйся, всех ра́достей Ра́досте.

Сла́ва, и ны́не, глас 4:

Ра́дуйся, Све́та о́блаче;/ ра́дуйся, све́щниче све́тлый;/ ра́дуйся, ру́чко, в не́йже Ма́нна;/ ра́дуйся, же́зле Ааро́нов;/ ра́дуйся, купино́ неопали́мая;/ ра́дуйся, черто́же; ра́дуйся, Престо́ле;/ ра́дуйся, горо́ свята́я;/ ра́дуйся, прибе́жище; ра́дуйся, Боже́ственная трапе́зо;/ ра́дуйся, две́ре та́йная;/ ра́дуйся, всех ра́достей Ра́досте.

Тропа́рь, глас 4:

К Богоро́дице со умиле́нием припаде́м,/ вси, грехми́ обремене́ннии,/ чудотво́рную Ея́ ико́ну Умиле́ния облобыза́юще/ и вопию́ще со слеза́ми:/ Влады́чице, приими́ моле́ние недосто́йных раб Твои́х/ и пода́ждь нам, прося́щим,/ ве́лию Твою́ ми́лость.

НА У́ТРЕНИ

На Бог Госпо́дь: тропа́рь Богоро́дице, трижды.

По 1-м стихосло́вии седа́лен, глас 5:

Пречи́стая Де́во Богоро́дице,/ поми́луй нас, прибега́ющих с ве́рою к Тебе́, Милосе́рдой,/ и прося́щих те́плаго заступле́ния Твоего́./ Мо́жеши бо, я́ко Блага́я, всех спасти́/ и я́ко Ма́ти Бо́га Вы́шняго Ма́терними Твои́ми моли́твами/ всегда́ избавля́еши чту́щих Тя от всех бед, Умиле́ние.

Сла́ва, и ны́не, то́йже.

По 2-м стихосло́вии седа́лен, глас 1:

Ма́терь Тя Бо́жию мо́лим вси вои́стинну/ и к щедро́там Твои́м вопие́м, любо́вию прибега́юще к Твое́й ико́не:/ Тя бо и́мамы, гре́шнии, Засту́пницу, Умиле́ние,/ и Тебе́ стяжа́хом в напа́стех спасе́ние, Еди́ну Пречи́стую.

Сла́ва, и ны́не, то́йже.

По полиеле́и седа́лен, глас 1:

Стена́ необори́мая нам, христиа́ном, еси́, Богоро́дице Де́во:/ к Тебе́ бо прибега́юще, невреди́мы пребыва́ем/ и, па́ки согреша́юще, и́мамы Тя Моли́твенницу, Умиле́ние;/ тем, благодаря́ще, вопие́м Ти:/ ра́дуйся, всех ра́достей Ра́досте.

Сла́ва, и ны́не, то́йже.

Та́же степе́нна, 1-й антифо́н 4-го гла́са. Проки́мен, глас 4: Помяну́ и́мя Твое́/ во вся́ком ро́де и ро́де. Стих: Отры́гну се́рдце мое́ сло́во бла́го, глаго́лю аз дела́ моя́ Царе́ви. Вся́кое дыха́ние: Ева́нгелие от Луки́, зача́ло 4.

По 50-м псалме́ стихи́ра, глас 6:

Не вве́ри мя челове́ческому предста́тельству,/ Пресвята́я Влады́чице,/ но приими́ моле́ние раба́ Твоего́,/ скорбь бо обдержи́т мя,/ терпе́ти не могу́ де́монскаго стреля́ния,/ покро́ва не и́мам,/ ниже́ где прибе́гну, окая́нный,/ всегда́ побежда́емь,/ и утеше́ния не и́мам, ра́зве Тебе́, Влады́чице ми́ра,/ упова́ние и предста́тельство ве́рных,/ не пре́зри моле́ние мое́,/ поле́зно сотвори́.

Кано́н, глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Умили́ся, уми́лостивися, умилосе́рдися, Влады́чице,/ на мя, гре́шнаго и недосто́йнаго раба́ Твоего́,/ дерза́ющаго воспе́ти Твоя́ чудеса́.

Ма́ти Бо́жия Пречи́стая,/ не отри́ни мене́, окая́ннаго и нечи́стаго,/ дерза́ющаго пе́ти Твоя́ чудеса́, Умиле́ние.

Ина́го прибе́жища и те́плаго предста́тельства/ к Сы́ну Твоему́ и Бо́гу на́шему не и́мам, Всепе́тая,/ те́мже сподо́би мя, многогре́шнаго, восхвали́ти Твоя́ чудеса́.

Ле́ностию одержи́мь и страстьми́ обурева́емь есмь аз,/ неключи́мый раб Твой, Влады́чице,/ недоуме́ю по достоя́нию восхвали́ти и просла́вити Твоя́ чудеса́.

Песнь 3

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Еди́н аз, окая́нный, житие́м согреши́х па́че всех челове́к, Пречи́стая,/ но, на щедро́ты Твоя́ упова́я, зову́:/ душе́внаго мя умиле́ния сподо́би.

Никто́же, прибега́яй с ве́рою под Боже́ственный Покро́в Твой, Влады́чице,/ тощь от Тебе́ исхо́дит,/ те́мже и аз, многогре́шный, дерза́я, зову́:/ Боже́ственнаго мя умиле́ния сподо́би.

Иа́ков, ле́ствицу Боже́ственную ви́дев, рече́:/ степе́нь Бо́жия сия́, Я́же еси́ Ты, Препе́тая;/ те́мже молю́ Тя:/ блага́го восхожде́ния к доброде́тели и мене́, лю́те недосто́йнаго, сподо́би.

Ю́же всем благопослу́шную в ско́рбех и обстоя́ниих душе́вных и теле́сных/ яви́ Тя Госпо́дь, Богоро́дице Блага́я,/ та́ко и мне, лю́те обурева́емому страстьми́ безме́стными, сле́зы умиле́ния пода́ждь/ и Твоего́, Де́во, Ма́терняго заступле́ния сподо́би.

Седа́лен, глас 5:

Превзыдо́ша главу́ мою́ греси́ мои́, Влады́чице,/ оскверне́н и́ми есмь, и несть исцеле́ния в пло́ти мое́й,/ но Ты, Многоблагоутро́бная, да́руй души́ мое́й сле́зы покая́ния на очище́ние скверн грехо́вных/ и теле́сныя неду́ги уврачу́й, Врача́ вся́ческих и Го́спода ро́ждшая.

Сла́ва, и ны́не:

Ра́ны душе́вныя привлеко́ша на мя и боле́зни теле́сныя, Влады́чице,/ но Ты, я́ко Преми́лостивая, обоя́ исцели́, подава́ющи мне неоску́дный дар духо́внаго умиле́ния,/ и да непреста́нно сла́влю Твое́ всемо́щное заступле́ние.

Песнь 4

Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Иде́же осени́т благода́ть Твоя́, Влады́чице,/ та́мо вся́кая скорбь потребля́ется, весе́лие же водворя́ется,/ ея́же и мене́, недосто́йнаго, сподо́би, вопию́ща:/ ра́дуйся, Богоро́дице, всех ра́достей Ра́досте.

Слез не и́мам, окая́нный аз, ниже́ душе́внаго умиле́ния,/ но Сама́, я́ко Милосе́рдая, сия́ ми пода́ти благоволи́, да взыва́ю:/ ра́дуйся, Де́во Пречи́стая, всех ра́достей Ра́досте.

Не́мощна мя су́ща и окая́нна стру́пы грехо́вными,/ уврачу́й, Пречи́стая, милосе́рдия Твоего́ еле́й излива́ющи,/ и воздви́гни пе́ти Тебе́:/ ра́дуйся, Влады́чице, всех ра́достей Ра́досте.

Омрачи́хся умо́м в жите́йских сласте́х,/ но Ты, Влады́чице, све́те помраче́нныя души́ моея́, разгони́ тьму страсте́й мои́х,/ да просве́щся Тобо́ю, вопию́:/ ра́дуйся, Неве́сто Неневе́стная.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й,/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Доко́ле поно́сит враг и низлага́ет до́лу мя, немощна́го и разсла́бленнаго лю́те душе́ю и те́лом:/ умили́ся, Влады́чице, и низложи́ борю́щих мя враго́в, Всепе́тая,/ души́ мое́й мир подава́ющи.

Вы́шши всех А́нгел и Арха́нгел яви́лася еси́, Чи́стая Богоотрокови́це,/ те́мже молю́ Тя, стре́лы вра́жия, на мя изощре́нныя, сокруши́ти,/ души́ мир подава́ющи.

Доко́ле, душе́ моя́, пребыва́еши в прегреше́ниих, конца́ не иму́щи грехо́вному обы́чаю,/ возни́кни из глубины́ зол, взира́ющи держа́вному заступле́нию Пречи́стыя, всегда́ на по́мощь тебе́ ско́рыя/ и благода́тию Свое́ю мир души́ и те́лу подава́ющия.

Ра́дость, и весе́лие, и ра́дование Боже́ственное,/ Де́во Неискусому́жная, нам умно́жися Бо́жие:/ се бо, пла́чущиися лю́те, ра́дуемся моли́твами Твои́ми.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Ра́дости Боже́ственнаго вели́чия, я́ко от нача́ла нам весе́лия,/ благодаре́ния гла́сы прино́сим,/ приле́жно почита́юще Ю́, я́ко Предста́тельницу на́шу.

Досто́йно Ти песнь ра́дования, Чи́стая Де́во, веселя́щеся, прино́сим,/ изба́вльшеся от бед Твои́ми моли́твами.

А́нгельстии язы́цы досто́йно Твоя́ хвалы́ воспе́ти не мо́гут, Чи́стая,/ мы же ны́не, ра́бски взе́мшеся,/ ра́дование Гаврии́лово прино́сим Ти.

Я́ко Боже́ственное прибе́жище, мы покро́в Твой вси стяжа́вше к Бо́гу,/ в напа́стех, и в гоне́ниих, и гресе́х к Тебе́ прибега́ем/ и Тобо́ю измене́ние прие́млем, Пречи́стая.

Конда́к, глас 3:

Ю́же подража́я непло́дную смоко́вницу,/ аз, окая́нный, умиле́ния плода́ отню́д не приношу́ и посече́ния страшу́ся,/ но, взира́я к чудотво́рней ико́не Твое́й Умиле́ния, Влады́чице,/ стеню́ от се́рдца и вопию́:/ умили́ся, Благосе́рдая,/ и мне, окамене́нному се́рдцем,/ благоволи́ пода́ти душе́вное и серде́чное умиле́ние.

И́кос:

Превзыдо́х грехи́ мои́ми блудни́цу, и блу́днаго, и мытаря́,/ и разбо́йника, и ниневи́тяны, аз еди́н, окая́нный па́че всех челове́к,/ и, лиши́вся благода́ти и дерзнове́ния ко Го́споду, стеню́ от се́рдца и вопию́:/ Тя Хода́таицу и Спору́чницу спасе́ния многогре́шней души́ мое́й благосотвори́,/ подаю́щи ми душе́вное и серде́чное умиле́ние.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Ре́ку неисчерпа́емую ми́лости Твоея́/ к гре́шным всем, Влады́чице, излива́еши, те́мже молю́:/ напои́ мою́ жа́ждущую ду́шу и изсо́хшее грехи́ се́рдце мое́ ороси́, да, благословя́, воспою́:/ препе́тый отце́в Госпо́дь и Бог, благослове́н еси́.

Я́же всем благопослу́шная в ско́рбех и обстоя́ниих душе́вных и теле́сных, Влады́чице,/ не отве́ржи и мене́, недосто́йнаго, но сподо́би пе́ти:/ отце́в Госпо́дь и Бог, благослове́н еси́.

Не отри́ни, Богоро́дице, мене́, уязвле́ннаго сове́том змии́ным,/ не возгнуша́йся мене́, смра́днаго грехи́ мно́гими,/ но сподо́би всегда́ пе́ти:/ отце́в Госпо́дь и Бог, благослове́н еси́.

Егда́ престо́ли на Суд поста́вятся и Суди́щу Христо́ву предста́нут вси земноро́днии,/ тогда́ яви́ мне, Влады́чице, Ма́тернее Твое́ заступле́ние, неоску́дную по́мощь, вопию́щу:/ отце́в Госпо́дь и Бог, благослове́н еси́.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Стра́ха мя изба́ви, о Влады́чице, зло́бы и возду́шных мыта́рств./ Покажи́ на мне, недосто́йнем, ве́лию ми́лость Твою́, воспева́ющем:/ Го́спода по́йте, дела́, и превозноси́те Его́ во вся ве́ки.

Изба́ви мя, Пренепоро́чная, озлобле́ния злых челове́ков и лука́вых бесо́в,/ трепе́щут бо и́мене Твоего́ вели́каго, я́ко дым исчеза́ют;/ мене́ же во умиле́нии се́рдца сподо́би пе́ти:/ Го́спода по́йте, дела́, и превозноси́те Его́ во вся ве́ки.

Те́мныя вла́сти кня́зя, всегда́ борю́щаго мя, немощна́го и уны́лаго, разжже́нныя стре́лы угаси́, Всепе́тая,/ и сподо́би мя благода́рственно воспева́ти:/ Го́спода по́йте, дела́, и превозноси́те Его́ во ве́ки.

Пе́ние мое́ приими́ убо́гое, Всеми́лостивая Госпоже́ Де́во, Влады́чице Богоро́дице,/ Ма́терним Твои́м милосе́рдием покрыва́ющи пою́щия:/ Го́спода по́йте, дела́, и превозноси́те Его́ во вся ве́ки.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Егда́ изнемога́ти кре́пости мое́й/ во исхо́де души́ мое́й гре́шней от окая́ннаго и скве́рнаго сего́ телесе́,/ тогда́ наипа́че яви́ на мне, недосто́йнем, кре́пкую мы́шцу Твою́, Всеблага́я,/ даждь в час сме́рти моея́ ра́достно взыва́ти Тебе́:/ ра́дуйся, Всеблаже́нная Богоро́дице, Чи́стая Присноде́во.

Нищ и убо́г есмь от дел благи́х, не имы́й умиле́ния душе́внаго, Преми́лостивая,/ Ты Сама́ да́рствуй ми, да благода́рственно вопию́:/ ра́дуйся, Всеблаже́нная Богоро́дице, Чи́стая Присноде́во.

Иссо́пом милосе́рдия Твоего́ окропи́ мя, Пречи́стая,/ да очи́щуся от тя́жких и лю́тых беззако́ний мои́х и во умиле́нии души́ да взыва́ю от се́рдца:/ ра́дуйся, Всеблаже́нная, Чи́стая Присноде́во.

Е́же помы́слих в души́ мое́й, по си́ле принесо́х пе́ние Тебе́, Влады́чице,/ не отри́ни у́бо обы́чным Твои́м милосе́рдием/ и не омерзи́74 мно́ю, многогре́шным и нечи́стым,/ но сподо́би всегда́ во умиле́нии пе́ти Тебе́:/ ра́дуйся, Всеблаже́нная Богоро́дице, Чи́стая Присноде́во.

Свети́лен.

Подо́бен: Посети́л ны есть:

Те́плое заступле́ние в беда́х, и Помо́щницу, и к Бо́гу примире́ние,/ Е́юже тли изба́вихомся,/ Богоро́дицу, ве́рнии, ублажи́м.

Сла́ва, и ны́не:

Тя Предста́тельницу и́мамы, гре́шнии, о Пречи́стая Де́во,/ Ты благопремене́нна сотвори́ Сы́на Твоего́ и Бо́га на́шего/ Ма́терними Твои́ми моли́твами.

На хвали́тех стихи́ры на 4, глас 6:

Велича́ем Тя, Всенепоро́чная Ма́ти Христа́ Бо́га на́шего,/ Я́же пре́жде рождества́ Де́ва,/ и в рождестве́ Де́ва,/ и по рождестве́ па́ки пребыва́еши Де́ва.

Преблагослове́нна и препросла́вленна еси́, Богоро́дице Де́во,/ я́ко родила́ еси́ всех Творца́, Ма́ти су́щи Живота́;/ Тобо́ю прия́хом мы, гре́шнии,/ паде́ния на́шего возста́ние,/ Еди́на Благослове́нная.

Блажи́м Тя, вси ро́ди, Богоро́дице,/ я́ко ра́дости вся ны испо́лнила еси́,/ дарова́нием нам честна́го о́браза Твоего́, Пречи́стая,/ ему́же днесь поклоня́ющеся,/ уми́льно мо́лим Тя:/ сподо́би, Влады́чице, Твоя́ рабы́/ в бу́дущем ве́це избра́нных ра́дости.

Сла́ва, и ны́не, глас 8:

На Литурги́и слу́жба вся Богоро́дицы.

Слу́жба сия́ соверша́лась в Серафи́мо-Диве́евском монастыре́ в день пра́зднования ико́ны Бо́жией Ма́тери «Умиле́ния» или́ «Ра́дость всех ра́достей», 28 ию́ля, а та́кже 9 декабря́, в день основа́ния преподо́бным Серафи́мом Деви́ческой Ме́льничной общи́ны. 9 декабря́ слу́жба э́та совмеща́лась со слу́жбами Зача́тия пра́ведной Анны и преподо́бному Серафи́му Саро́вскому, чудотво́рцу. Вме́сто 2-й кафи́змы в э́тот день чита́лся ака́фист попола́м: 1-я полови́на Благове́щению Пресвято́й Богоро́дицы и 2-я полови́на преподо́бному Серафи́му Саро́вскому. По́сле Литурги́и 28 ию́ля и 9 декабря́ бы́ло устано́влено соверше́ние кре́стного хо́да по кана́вке с пе́нием Пара́клисиса.

Моли́тва

О Пресвята́я Госпоже́ Влады́чице, Богоро́дице Де́во! Приими́ недосто́йныя моли́твы на́ша, сохрани́ нас от наве́тов злых челове́к и от напра́сныя сме́рти, пода́ждь нам пре́жде конца́ покая́ние, на моле́ния на́ша умилосе́рдися и ра́дость в печа́ли ме́сто да́руй. И изба́ви нас, о Госпоже́ Влады́чице Богоро́дице, от вся́кия беды́, напа́сти, ско́рби, боле́зни и вся́каго зла, и сподо́би нас, гре́шных рабо́в Твои́х, одесну́ю ста́ти во второ́м прише́ствии Сы́на Твоего́, Христа́ Бо́га на́шего, и насле́дники нас бы́ти сподо́би Ца́рствия Небе́снаго и жи́зни ве́чныя со все́ми святы́ми в безконе́чныя ве́ки. Ами́нь.

* * *

А́ще 28 июля (по ст. ст.) соверша́ется пра́зднование Пресвято́й Богоро́дице по́лностью по Слу́жбе Смоле́нской ико́не, то Слу́жба ико́не «Умиле́ние» или́ «Ра́дость всех радостей» перено́сится на 19 ию́ля (по ст. ст.) и тогда́ соверша́ется совме́стное пра́зднование Пресвято́й Богоро́дице и преподо́бному Серафи́му по сле́дующему уста́ву:

На вели́цей вече́рни: На Го́споди, воззва́х: стихи́ры на 8: Богоро́дицы 4 и преподо́бнаго 4. Сла́ва: преподо́бнаго. И ны́не: Богоро́дицы. Вход. Проки́мен дне. И чте́ние: два Богоро́дицы и еди́но преподо́бнаго. На лити́и стихи́ры Богоро́дицы и преподо́бнаго. Сла́ва: преподо́бнаго. И ны́не: Богоро́дицы. На стихо́вне стихи́ры Богоро́дицы со стихи́ их. Сла́ва: преподо́бнаго. И ны́не: Богоро́дицы. На благослове́ние хле́бов тропа́рь Богоро́дицы, два́жды, и преподо́бнаго Серафи́ма, еди́ножды.

На у́трени: На Бог Госпо́дь: тропа́рь Богоро́дицы, два́жды. Сла́ва: преподо́бнаго. И ны́не: Богоро́дицы. По 1-м стихосло́вии седа́лен Богоро́дицы. Слава, и ны́не, то́йже. По 2-м стихосло́вии седа́льны о́ба преподо́бнаго. Слава, и ны́не, Богоро́дицы. Велича́ния два: Богоро́дицы и преподо́бнаго. По полиеле́и седа́лен преподо́бнаго. Степе́нна, 1-й антифо́н 4-го гла́са. Проки́мен, глас 4: Помяну́ и́мя Твое́/ во вся́ком ро́де и ро́де. Стих: Отры́гну се́рдце Мое́ сло́во бла́го, глаго́лю А́з дела́ Моя́ Царе́ви. Вся́кое дыха́ние. Ева́нгелие Богоро́дицы, от Луки́, зача́ло 4. По 50-м псалме́, Сла́ва: М оли́твами преподо́бнаго: И ны́не: Моли́твами Богоро́дицы: Стихи́ра Богоро́дицы, глас 6: Не вве́ри мя: Кано́ны богоро́дицы со ирмосо́м на 8 и преподо́бнаго на 6. По 3-й пе́сни конда́к, и́кос и седа́лен преподо́бнаго. Слава, и ны́не, Богоро́дицы. По 6-й пе́сни конда́к и и́кос Богоро́дицы. Свети́лен Богоро́дицы и преподо́бнаго. Слава, и ны́не, Богоро́дицы. На хвали́тех стихи́ры на 6: Богоро́дицы 3 и преподо́бнаго 3. Сла́ва: преподо́бнаго. И ны́не: Богоро́дицы. По вели́цем славосло́вии тропа́рь преподо́бнаго. Слава, и ны́не, Богоро́дицы. На часе́х тропа́рь Богоро́дицы. Сла́ва: преподо́бнаго. И ны́не: Богоро́дичен ча́са. Конда́ки же пременя́юще.

На Литурги́и Слу́жба Богоро́дицы и преподо́бнаго.

* * *

А́ще пра́зднование Пресвято́й Богоро́дице ра́ди ико́ны Ея́, имену́емыя «Умиле́ние» или́ «Ра́дость всех ра́достей», соверша́ется 28 ию́ля (по ст. ст.), совме́стно со Смоле́нской ико́ной, то к Слу́жбе преподо́бному Серафи́му 19 ию́ля добавля́ются из Слу́жбы ико́не «Умиле́ние» Богоро́дичны (на стихи́рах, по́сле тропаря́, седа́льнов и свети́льна) и кано́н.

Слу́жба преподо́бному Серафи́му Саро́вскому

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, самогла́сны, глас 4:

Соше́дшеся днесь, христоимени́тии лю́дие,/ похва́льными пе́сньми венча́им/ земна́го А́нгела и небе́снаго челове́ка/ и к нему́ те́пле возопии́м:/ о блаже́нне о́тче Серафи́ме,/ по́стников пресла́вная похвало́,/ о нас моли́ся ко Го́споду/ поми́ловатися душа́м на́шим.

Целому́дрие и кро́тость/ от ю́ности возлюби́в, о́тче Серафи́ме,/ чистото́ю ума́ и се́рдца/ любо́вь Христо́ву стяжа́л еси́,/ е́юже Бо́гови прибли́зился еси́./ Того́ у́бо ны́не моли́/ от бед изба́вити ве́рою творя́щия честну́ю па́мять твою́.

Днесь соше́дшеся христоимени́тых люде́й мно́жества/ в прославле́ние честны́х моще́й твои́х,/ преподо́бне о́тче Серафи́ме,/ ра́дости и весе́лия вси испо́лнишася:/ яви́л бо ся еси́ боля́щим исцеле́ние/ и хромы́м хожде́ние,/ с ве́рою притека́ющим к ра́це моще́й твои́х.

Сла́ва, глас 6:

Весели́ся и ра́дуйся о Го́споде,/ оби́тель Саро́вская:/ в тебе́ бо возсия́ свети́льник но́вый Росси́йския земли́./ Красу́йся и лику́й, Це́рковь Бо́жия,/ и и́ноков мно́жества, сора́дуйтеся./ Празднолю́бцев собо́ри, взыгра́йте/ и, вене́ц от духо́вных цве́тов спле́тше,/ с Дави́дом воспо́йте:/ честна́ пред Го́сподем смерть преподо́бных Его́./ Сия́ бо преподо́бному Серафи́му нача́ло сла́вы полага́ет,/ ея́же о́бщники и нас сотвори́/ твои́ми моли́твами, блаже́нне.

И ны́не, Богоро́дичен.

На стихо́вне стихи́ры, глас 2:

Изше́д от оте́чествия твоего́,/ преподо́бне о́тче Серафи́ме,/ и гра́да Ки́ева доше́д,/ та́мо у моще́й чудотво́рец/ на путь спаси́тельнаго по́двига благослове́ние прия́л еси́,/ сие́ у́бо и нам низпосли́,/ творя́щим всесвяту́ю и пречестну́ю па́мять твою́.

Стих: Честна́ пред Го́сподем/ смерть преподо́бных Его́.

Ве́лий иску́с в послуша́нии и́ноческих по́двигов,/ преподо́бне о́тче Серафи́ме,/ с любо́вию прия́л еси́/ и бра́тию твои́м терпе́нием и любо́вию удиви́л еси́./ Моли́ спасти́ся душа́м на́шим.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Наставле́нии игу́мена укрепля́емь,/ в пусты́нное ме́сто Саро́ва всели́лся еси́, о́тче,/ и та́мо моли́твенному по́двигу кре́пко прилежа́ти потщи́лся еси́,/ и яви́лся еси́ дом Пресвята́го Ду́ха./ Моли́ Христа́ Бо́га о всех нас.

Сла́ва: и па́ки та́яжде стихи́ра: Наставле́нии игу́мена:

И ны́не, Богоро́дичен.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 1.

Подо́бен: О, ди́вное чу́до:

О, пресла́вное чу́до,/ подви́жник благоче́стия в Саро́ве явля́ется/ и моли́твенник к Бо́гу те́плый/ Серафи́м пречу́дный нам быва́ет;/ весели́ся, оби́тель Саро́вская,/ иму́щи в себе́ мо́щи преподо́бнаго;/ взыгра́йте, правосла́вных мно́жества,/ преди́внаго Серафи́ма иму́ще в беда́х засту́пника и вопию́ще к нему́:/ ра́дуйся, свети́льниче Росси́йския земли́,/ тьмы сопроти́вных дале́че отрева́й/ и Го́сподеви моли́ся/ дарова́ти душа́м на́шим мир и ве́лию ми́лость.

О, ди́вное чу́до,/ се бо вои́стинну во оби́тели Саро́встей/ благоче́стия столп непоколеби́мый –/ Серафи́м блаже́нный явля́ется нам,/ те́мже, Богому́дрых собо́ри,/ на высоту́ ду́хом возноси́теся,/ к преподо́бному вопию́ще:/ преподо́бне о́тче Серафи́ме,/ Го́сподеви моли́ся/ дарова́ти душа́м на́шим мир и ве́лию ми́лость.

Ди́вны Твоя́ та́йны, Христе́ Бо́же,/ я́ко дарова́л еси́ нам свети́льника, преподо́бнаго Серафи́ма,/ ве́рным лю́дем на сопроти́вныя кре́пкаго побо́рника,/ и́ноком и всем правосла́вным христиа́ном моли́твенника,/ святе́й оби́тели похвалу́ и утвержде́ние;/ той и ны́не мо́лит Тя, Го́споди,/ дарова́ти душа́м на́шим мир и ве́лию ми́лость.

Егда́ вшел еси́, преподо́бне, в пусты́ню Саро́вскую,/ тогда́, своея́ во́ли до конца́ совле́кся,/ тве́рдое ко всем послуша́ние показа́л еси́:/ доса́ды бо и безче́стия претерпе́л еси́, ра́дуяся,/ ударе́ния и ра́ны от злых челове́к прия́л еси́,/ о ни́хже и моли́лся еси́, преподо́бне./ Мы же, прославля́юще пречестну́ю па́мять твою́,/ мо́лим ти ся, преподо́бне:/ Го́сподеви моли́ся/ мир ми́рови дарова́ти/ и душа́м на́шим ве́лию ми́лость.

Блаже́нна оби́тель Саро́вская,/ иму́щи тебе́, преподо́бне о́тче Серафи́ме,/ доброде́телей сокро́вище, сосу́д чистоты́,/ целому́дрия храни́теля, прия́телище благода́ти,/ исто́чник исцеле́ний, боля́щим врача́ безме́здна,/ по́стника и́стинна, в ско́рбех уте́шителя,/ жите́йскими страстьми́ обурева́емым ти́хое приста́нище;/ нам же, творя́щим честну́ю па́мять твою́,/ моли́, преподо́бне о́тче Серафи́ме,/ дарова́ти мир и ве́лию ми́лость.

Днесь лику́ют собо́ри ве́рных/ в па́мять твою́, преподо́бне Серафи́ме,/ и велегла́сно вопию́т:/ ты, любве́ ра́ди Христо́вы/ вся кра́сная ми́ра оста́вив/ и в пусты́ню Саро́вскую всели́вся,/ ника́коже устраши́лся еси́ неви́димых враг боре́ния,/ но сия́ моли́твами твои́ми, я́ко прах, отмета́л еси́;/ те́мже Го́сподеви моли́ся/ дарова́ти душа́м на́шим мир и ве́лию ми́лость.

Сла́ва, глас 8:

Прииди́те, ве́рных собо́ри,/ похва́льными пе́сньми днесь пречу́днаго отца́ просла́вим/ и си́це ему́ возопии́м:/ преподо́бне о́тче Серафи́ме,/ вои́стинну сподо́бился еси́ Боже́ственныя жи́зни,/ прии́м от Бо́га вене́ц нетле́нныя сла́вы,/ сего́ ра́ди оби́тель Саро́вская тобо́ю хва́лится,/ лю́дие же, чту́ще честны́я мо́щи твоя́ и зря́ще чудеса́ быва́емая,/ сла́вят прославля́ющаго тя Го́спода,/ Ему́же моли́ся, преподо́бне,/ дарова́ти душа́м на́шим мир и ве́лию ми́лость.

И ны́не, Богоро́дичен.

Вход. Проки́мен дне. И чте́ния 3.

Прему́дрости Соломо́новы чте́ние (главы́ 5 и 6):

Пра́ведницы во ве́ки живу́т, и в Го́споде мзда́ их,/ и попече́ние их у Вы́шняго./ Сего́ ра́ди прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я́ и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т,/ и от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я́ на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 1:

Ки́ими похва́льными венцы́/ венча́им подви́жника вели́каго,/ преподо́бнаго Серафи́ма?/ Той бо, я́ко наста́вник до́брый,/ в тве́рдости ве́ры и доброде́тели яви́ся,/ Богодухнове́нными уче́нии и равноа́нгельным житие́м/ приходя́щия к нему́ науча́я./ Те́мже вопие́м ему́:/ моли́ся, преподо́бне, Христу́ Бо́гу/ Правосла́вную ве́ру утверди́ти/ и душа́м на́шим спасти́ся.

Прииди́те, и́нок мно́жества,/ днесь преподо́бнаго благоче́стно восхва́лим,/ и́стиннаго ученика́ Спа́сова,/ мирску́ю пре́лесть попра́вшаго,/ яре́м Христо́в на ра́мо взе́мшаго/ и полки́ бесо́в посрами́вшаго./ К нему́же возопии́м си́це:/ не забу́ди нас, о́тче Серафи́ме,/ восхваля́ющих и чту́щих святу́ю па́мять твою́.

Све́тлая и Боже́ственная па́мять твоя́,/ преподо́бне Серафи́ме, удиви́ всех,/ а́ки безпло́тен бо, во пло́ти враги́ неви́димыя посрами́л еси́,/ вся же страна́ Тамбо́вская/ и свята́я оби́тель Саро́вская,/ иму́щи твоя́ святы́я мо́щи, хва́лится,/ си́ми бо здра́вие/ всем, с ве́рою притека́ющим, подае́тся./ Те́мже, просвети́вшеся тобо́ю,/ вопие́м ти, преподо́бне:/ моли́ спасти́ся душа́м на́шим.

Сла́ва, глас 5:

Ра́дуйся днесь, вся Росси́йская земле́,/ и свята́я оби́тель Саро́вская, весели́ся./ Ве́рных же мно́жества, сте́кшеся днесь,/ просла́вим преподо́бнаго отца́,/ па́стыря и учи́теля,/ Богому́драго наста́вника заблу́ждшим,/ ско́раго всех боля́щих цели́теля,/ Росси́йския земли́ вели́кое украше́ние,/ его́же похваля́юще, си́це рцем:/ преподо́бне Серафи́ме,/ спаси́ нас моли́твами твои́ми.

И ны́не, Богоро́дичен.

На стихо́вне стихи́ры, глас 5.

Подо́бен: Ра́дуйся, Живоно́сный Кре́сте:

Ра́дуйся, А́нгелом собесе́дниче,/ преподо́бне Серафи́ме,/ благоче́стно бо на земли́ пожи́в,/ мно́ги, приходя́щия к тебе́, стра́ху Госпо́дню поуча́л еси́;/ благода́тию Пресвята́го Ду́ха озаря́емь,/ зрел еси́ бу́дущая, я́ко настоя́щая,/ и умиле́ния и ра́дости мно́ги скорбя́щия душе́ю исполня́л еси́./ Те́мже мо́лим ти ся:/ моли́ся Го́сподеви о чту́щих тя.

Стих: Честна́ пред Го́сподем/ смерть преподо́бных Его́.

Ра́дуйся, заблу́ждших учи́телю преди́вный,/ Христа́ Го́спода во хра́ме со Арха́нгелы и А́нгелы ви́дети сподо́бивыйся./ И ны́не, преподо́бне,/ на Небесе́х Того́ зре́ния вы́ну наслажда́яся,/ моли́ся о нас,/ ве́рою творя́щих па́мять твою́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ра́дуйся, преподо́бне Серафи́ме,/ всем бо храни́ти и́стинную ве́ру Христо́ву запове́дал еси́,/ и, Вы́шняго жития́ вожделе́в,/ бога́тство возненави́дел еси́:/ ны́не же неизрече́нную красоту́ Небе́сную зри́ши/ и сла́дкаго пе́ния А́нгельскаго наслажда́ешися./ Те́мже моли́ся Го́сподеви/ дарова́ти нам мир и ве́лию ми́лость.

Сла́ва, глас 6:

Преподо́бне о́тче Серафи́ме,/ кто испове́сть труды́ твоя́ и боле́зни?/ Или́ кий язы́к изрече́т жесто́кое пусты́нное твое́ житие́,/ бде́ние же и поще́ние,/ еще́ же в затво́ре пребыва́ние,/ усте́н безмо́лвие и моле́ние непреста́нное?/ Вои́стинну яви́лся еси́ по́стником украше́ние,/ моли́твенник к Бо́гу непосты́дный./ Те́мже к тебе́ вопие́м:/ ра́дуйся, и́ноческаго жития́ пра́вило;/ ра́дуйся, в беда́х и ско́рбех вели́кое утеше́ние/ и те́плый всем предста́телю./ Моли́ся, преподо́бне, спасти́ся душа́м на́шим.

И ны́не, Богоро́дичен.

На благослове́нии хле́бов тропа́рь преподо́бному, дважды, и «Умиле́нию»: К Богоро́дице, со умиле́нием: единожды.

Тропа́рь на прославле́ние преподо́бнаго Серафи́ма, глас 4:

От ю́ности Христа́ возлюби́л еси́, преподо́бне,/ и Тому́ Еди́ному порабо́тати пла́менне вожделе́л еси́,/ в пусты́ннем житии́ твое́м непреста́нною моли́твою и трудо́м подвиза́лся еси́,/ умиле́нным се́рдцем любо́вь Христо́ву стяжа́в,/ Небе́сным Серафи́мом в песносло́вии спобо́рниче,/ в любви́ притека́ющим к тебе́ Христу́ подража́телю,/ те́мже избра́нник возлю́блен Бо́жия Ма́тере яви́лся еси́,/ сего́ ра́ди вопие́м ти:/ спаса́й нас моли́твами твои́ми, ра́досте на́ша,/ те́плый пред Бо́гом засту́пниче,/ Серафи́ме блаже́нне.

Ин тропа́рь, на преставле́ние преподо́бнаго Серафи́ма, глас то́йже:

От ю́ности Христа́ возлюби́л еси́, блаже́нне,/ и, Тому́ Еди́ному рабо́тати пла́менне вожделе́в,/ непреста́нною моли́твою и трудо́м в пусты́ни подвиза́лся еси́,/ умиле́нным же се́рдцем любо́вь Христо́ву стяжа́в,/ избра́нник возлю́блен Бо́жия Ма́тере яви́лся еси́./ Сего́ ра́ди вопие́м ти:/ спаса́й нас моли́твами твои́ми, Серафи́ме, преподо́бне о́тче наш.

Тропа́рь Богоро́дицы, глас 4:

НА У́ТРЕНИ

На Бог Госпо́дь: тропа́рь свята́го, дважды. Сла́ва, и ны́не: К Богоро́дице со умиле́нием:

По 1-м стихосло́вии седа́лен, глас 4.

Зна́мением кре́стным и моли́твою вра́жия искуше́ния победи́в,/ посто́м и воздержа́нием Го́сподеви благоугоди́л еси́:/ те́мже чуде́с прия́л еси́ дар, всем исцеле́ния подава́я,/ ве́рою притека́ющим к моще́м твои́м, Серафи́ме преподо́бне,/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

По 2-м стихосло́вии седа́лен, глас 1:

Во глубине́ пусты́ни Саро́вския коле́на преклоня́л еси́ на ка́мени,/ воздева́я преподо́бнеи твои́ ру́це ко Го́споду,/ те́мже от Спа́са благода́ть Свята́го Ду́ха прия́л еси́/ стра́ждущия телесы́ исцеля́ти и ду́ши ве́рных просвеща́ти./ Сего́ ра́ди вопие́м ти:/ моли́, преподо́бне, Христа́ Бо́га спасти́ся нам,/ пра́зднующим святу́ю па́мять твою́.

Сла́ва, и ны́не, Богоро́дичен:

По полиеле́и седа́лен, глас 7:

Просия́ доброде́тельное житие́ твое́, преподо́бне, ны́не в Росси́йстей земли́,/ и от всех пе́сньми похва́льными сла́вишися:/ ты бо, я́ко Илия́, на колесни́цу доброде́телей вшед,/ на Небеса́ душе́ю возлете́л еси́/ и та́мо пра́ведно пресве́тлым венце́м венча́лся еси́./ Те́мже, благодаря́ще, вопие́м ти, блаже́нне Серафи́ме:/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.

По 50-м псалме́ стихи́ра, глас 6:

Днесь, ве́рнии, духо́вно торжеству́юще/ в наро́читем пра́зднице преподо́бнаго отца́/ и благоче́стно ра́дующеся,/ тому́ те́пле возопии́м:/ ра́дуйся, Серафи́ме блаже́нне;/ ра́дуйся, Небе́сный челове́че и земны́й А́нгеле;/ ра́дуйся, мно́гих на путь спасе́ния наста́вивый;/ ра́дуйся, ве́рным похвало́ и Росси́йстей земли́ утвержде́ние./ Моли́ся о душа́х на́ших.

Кано́н преподо́бнаго Серафи́ма, глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь пои́м, вопия́ше.

Го́споди, отве́рзи мои́ недосто́йнеи устне́ и даждь ми сло́во ра́зума/ воспе́ти досто́йно па́мять блаже́ннаго Серафи́ма,/ ны́не со А́нгелы моля́щагося Тебе́/ изба́вити нас от вся́каго лю́таго обстоя́ния.

К Богоро́дице вели́кий моли́твенник был еси́, преподо́бне,/ Ю́же ви́дети со апо́столы сподо́бился еси́,/ и ны́не не преста́й моли́твами твои́ми посеща́ти чад твои́х.

От ю́ности твоея́, преподо́бне, преда́лся еси́ умо́м Бо́гови/ и, стра́сти теле́сныя кре́пким воздержа́нием укроти́в,/ вся́кими доброде́тельми украси́лся еси́, прему́дре.

Богоро́дичен: Всеблага́я Влады́чице,/ Я́же Преблага́го Бо́га пло́тию ро́ждши,/ озло́бленное страстьми́ мое́ се́рдце очи́сти,/ да ве́рою и любо́вию велича́ю Тя.

Ин кано́н преподо́бнаго, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

По за́поведи Влады́ки Христа́ у́зким и те́сным путе́м вшел еси́, преподо́бне, в Ца́рство Небе́сное,/ широ́кий и простра́нный путь возненави́дев,/ и ны́не моли́ся о нас, творя́щих пресве́тлую па́мять твою́.

От ю́ности на безстра́стия го́ру возше́д и крест свой взем,/ невозвра́тно Христу́ после́довал еси́/ и, духо́вную му́дрость стяжа́в, Го́рняго Иерусали́ма дости́гл еси́, преподо́бне,/ моли́ о нас Еди́наго Человеколю́бца.

Ны́не предстоя́, преподо́бне, Престо́лу Бо́жию,/ моли́ся о стране́ на́шей, изба́витися от наше́ствия иноплеме́нных,/ и христолюби́вым лю́дем земли́ Росси́йския спасе́ние испроси́ моли́твами твои́ми, преподо́бне.

Богоро́дичен: С ве́рою и любо́вию притека́ющих к Тебе́/ и со стра́хом пою́щих Тя/ моли́твенный глас услы́ши, Влады́чице.

Катава́сия по уста́ву.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Моли́твами твои́ми, преподо́бне, предстоя́ Бо́гу со А́нгелы,/ за весь мир моли́ся,/ бра́ни вра́жия потреби́ти и побе́ду на супоста́ты дарова́ти.

От ю́ности ве́рою и любо́вию прилепи́лся еси́ Влады́це Вы́шних сил, преподо́бне Серафи́ме,/ и, возсия́в в пусты́ни Саро́встей, я́ко со́лнце,/ в ско́рбех приходя́щим к тебе́ уте́шитель был еси́;/ моли́ спасти́ся нам.

Яви́лся еси́, преподо́бне, моля́щимся тебе́ столп непоколеби́м/ и прибе́жище всем притека́ющим во оби́тель Саро́вскую/ и прие́млющим исцеле́ния благода́ть неоску́дную.

Богоро́дичен: Услы́ша Е́ва прама́терь:/ в печа́лех роди́ши ча́да./ Ты же, Чи́стая Де́во, услы́шавши:/ Госпо́дь с Тобо́ю, ра́дуйся,–/ ра́дованным гла́сом печа́ль прама́тере потреби́ла еси́.

Ин

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Моли́ся, блаже́нне, Христу́ Бо́гу/ изба́витися нам от гла́да и па́губы,/ от напра́сныя сме́рти, от та́йных прегреше́ний и помышле́ний лука́вых,/ да чи́стым се́рдцем Христу́ возопии́м:/ моли́твами преподо́бнаго спаси́ нас, Го́споди.

Кро́тостию и смире́нием после́дуя Влады́це Христу́,/ всем вся вои́стинну был еси́,/ бога́тых же и убо́гих неосла́бно благоче́стию поуча́я,/ бу́дущая, я́ко настоя́щая, прови́дел еси́./ Моли́ Христа́ Бо́га, преподо́бне, согреше́ний на́ших оставле́ние дарова́ти.

Изба́ви оби́тель твою́, преподо́бне, от вся́каго наве́та вра́жия/ и испо́лни ю́ любве́ и благода́ти, е́же не помышля́ти о жите́йских,/ но душеспаси́тельныя дости́гнути добро́ты моли́твами твои́ми.

Богоро́дичен: Упова́ние и наде́жда на́ша Ты еси́, Пречи́стая Влады́чице,/ спаси́ страну́ и лю́ди Твоя́,/ моля́щияся и и́мя Твое́ призыва́ющия.

Седа́лен, глас 4:

Жите́йское мо́ре страсте́й воздержа́нием препобеди́в/ и в приста́нище безстра́стия прите́к,/ сосу́д воздержа́ния яви́лся еси́, преподо́бне Серафи́ме,/ моли́ Христа́ Бо́га дарова́ти нам ве́лию милость.

Сла́ва, и ны́не, Богоро́дичен:

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Днесь све́тло пра́зднует Саро́вская оби́тель па́мять твою́, преподо́бне, и мо́лит тя:/ испроси́ у Го́спода вселе́нней мир/ и душа́м на́шим ве́лию милость.

Вели́кими по́двиги твои́ми, преподо́бне,/ я́ко фи́никс, процве́л еси́,/ словесы́ благопло́дными и непоро́чным житие́м сердца́ притека́ющих к тебе́ услажда́я,/ и ны́не у́бо моли́ся, да обря́щем ми́лость от Христа́, Спа́са на́шего.

Твои́ми моли́твами о нас умоли́ Бо́га, преподо́бне Серафи́ме,/ и грехо́вный мрак печа́ли на́шея разори́,/ безстра́стием, ве́рою и любо́вию украси́ всех,/ пресла́вную па́мять твою́ чту́щих.

Богоро́дичен: Ра́дуйся, Влады́чице Де́во,/ Це́рквам красото́, благочести́вым лю́дем держа́во и похвало́,/ непреста́нно моли́ся Христу́ Бо́гу,/ да сохрани́т нас от бед моли́твами Твои́ми.

Ин

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Не то́кмо свята́я оби́тель Саро́вская,/ но и вся Росси́йская земля́ име́ет тя, блаже́нне, моли́твенника те́плаго и ско́раго помо́щника,/ кре́пкаго и непобеди́маго засту́пника и хода́тая о душа́х на́ших.

Бу́ди о нас моле́бник и хода́тай ко Пресвяте́й Тро́ице/ и подви́гни на моли́тву с тобо́ю ли́ки святы́х,/ и́хже житию́ поревнова́л еси́, преподо́бне,/ с ни́миже ку́пно моли́ся о ми́ре и устрое́нии всего́ ми́ра,/ да ти́хое и безмо́лвное житие́ поживе́м в ве́це сем/ и в бу́дущем жизнь ве́чную насле́дуем.

В по́стницех вели́к быв, преподо́бне,/ те́сное и́ноческое в пусты́ни житие́ проходи́л еси́/ и сие́ во умиле́нней моли́тве сконча́л еси́./ Моли́ спасти́ся нам.

Богоро́дичен: Ты еси́, Пречи́стая Богоро́дице, прибе́жище на́ше и утвержде́ние,/ моли́ Сы́на Твоего́ и Бо́га на́шего/ пода́ти нам спасе́ние и грехо́в оставле́ние.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Всем приходя́щим к тебе́ был еси́ учи́тель и́стинный/ и к Богоро́дице вели́кий моли́твенник,/ и ны́не, преподо́бне, не преста́й моля́ся о ча́дех твои́х,/ я́ко и́маши дерзнове́ние ве́лие.

Да вни́дут ны́не христоимени́тии лю́дие во храм оби́тели Саро́вския,/ к честны́м моще́м твои́м, преподо́бне Серафи́ме, припа́дающе,/ и да про́сят от Тебе́ исцеле́ния, здра́вия и спасе́ния, Христа́ велича́юще.

В нощи́ моля́щу ти ся Бо́гу, преподо́бне,/ враг неви́димый хотя́ше устраши́ти тя,/ но, моли́твою твое́ю посра́млен, исчезе́ вселука́вый.

Богоро́дичен: Бо́га, Его́же родила́ еси́, Пречи́стая Мари́е,/ моли́ рабо́м Твои́м пода́ти прегреше́ний оставле́ние.

Ин

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.

Посто́м и непреста́нною моли́твою просла́вил еси́, преподо́бне, оби́тель Саро́вскую,/ еле́ем от ико́ны Влады́чицы помазу́я неду́жныя/ и тем исцеле́ние неоску́дно подава́я,/ и ны́не моли́ся спасти́ся душа́м на́шим.

Святи́телие и свяще́нницы, сора́дуйтеся и́ноком Саро́вским,/ и прости́и лю́дие, вку́пе воспо́йте блаже́ннаго отца́,/ обурева́емых скорбьми́ ти́хое приста́нище,/ врача́ душе́вным и теле́сным неду́гом ско́раго.

Принеси́ моли́твы твоя́, преподо́бне,/ я́ко же́ртву благоприя́тну и непоро́чну, ко Пресвяте́й Тро́ице,/ и не забу́ди нас, ны́не творя́щих па́мять твою́,/ ми́лость испроси́ ненави́дящим, оби́дящим и вражду́ющим на нас/ и изба́ви всех от вся́кия ско́рби.

Богоро́дичен: Упра́ви ум мой, Влады́чице, обурева́емый страстьми́ мно́гими,/ спаси́, Богоро́дице, к Тебе́ прибега́ющия,/ ины́я бо по́мощи, Чи́стая, ра́зве Тебе́, не зна́ем.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

Свята́я душа́ твоя́ оби́тель бысть Бо́гу,/ в не́йже Оте́ц, Сын и Святы́й Дух всели́ся,/ те́мже мо́лим тя, преподо́бне,/ наважде́ния вра́жия от чту́щих тя отжени́/ и ве́рным лю́дем мир и здра́вие да́руй.

Вели́кия твоя́ пусты́нныя по́двиги и труды́/ и сла́дость уче́ния твоего́ почита́ем, преподо́бне Серафи́ме,/ и́миже мно́гия приходя́щия к тебе́ просвети́л еси́ и научи́л еси́ воспева́ти Единосу́щную Тро́ицу.

Житие́м чи́стым после́довав Влады́це Христу́,/ тече́ние до́брое сконча́л еси́, преподо́бне,/ к ве́чным же оби́телем возше́д, блаже́нне,/ зри́ши та́мо, я́же А́нгели ви́дят./ Те́мже, чту́ще па́мять твою́, Христа́ велича́ем.

Богоро́дичен: Ны́не к Тебе́ прибега́ю, Пречи́стая,/ спаси́ мя моли́твами Твои́ми и соблюди́:/ ели́ка бо хо́щеши, мо́жеши, я́ко Ма́ти Всемогу́щаго.

Ин

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Грехо́в испо́лнени вси есмы́,/ твоя́ же моли́твы, преподо́бне Серафи́ме, я́ко кади́ло благово́нно, ко Го́сподеви восхо́дят./ Ны́не мо́лим тя:/ волну́ющееся в земли́ на́шей мо́ре зла́го неве́рия изсуши́/ и спасе́ние душа́м на́шим от Го́спода испроси́.

Блаже́н вои́стинну был еси́, преподо́бне Серафи́ме,/ нището́ю бога́тство и пла́чем ра́дость стяжа́в,/ ю́же приходя́щим оби́льно подава́л еси́,/ и ны́не лучи́ чуде́с источа́еши/ и исцеля́еши всех, с ве́рою к тебе́ притека́ющих.

В пусты́ни кладене́ц ископа́в твои́ма рука́ма, преподо́бне,/ приходя́щия жа́ждущия лю́ди напои́л еси́,/ и ны́не мно́гим неду́жным водо́ю кладенца́ сего́ боле́зни исцеля́еши;/ вои́стинну ди́внаго моли́твенника и чудотво́рца всем, преподо́бне, Влады́ка тя показа́.

Богоро́дичен: Вои́стинну Тя, Ма́терь Бо́жию, испове́дуем, и́стинную Богоро́дицу:/ Твои́м бо Рождество́м тле́ннаго осужде́ния изба́вихомся,/ милосе́рдия ра́ди Человеколю́бца Бо́га,/ и к жи́зни нетле́нней воззва́ни бы́хом.

Конда́к, глас 2:

Ми́ра красоту́ и я́же в нем тле́нная оста́вив, преподо́бне,/ в Саро́вскую оби́тель всели́лся еси́/ и, та́мо а́нгельски пожи́в,/ мно́гим путь был еси́ ко спасе́нию,/ сего́ ра́ди и Христо́с тебе́, о́тче Серафи́ме, просла́ви/ и да́ром исцеле́ний и чуде́с обогати́./ Те́мже вопие́м ти:/ ра́дуйся, Серафи́ме, преподо́бне о́тче наш!

И́кос:

Оста́вив род и дру́ги,/ бога́тство, я́ко прах, вмени́в,/ в пусты́ни Саро́встей водвори́лся еси́/ и, на стра́сти, я́ко безпло́тен, подвиза́вся, А́нгелов ликостоя́ния сподо́бился еси́./ Те́мже духо́вная разуме́ния прии́м,/ пода́ждь и нам, преподо́бне, разу́мно пе́сньми воспе́ти тя, си́це глаго́лющим:/ ра́дуйся, Серафи́ме блаже́нне, Небе́сный челове́че и земны́й А́нгеле;/ ра́дуйся, в любви́ Христу́ подража́телю;/ ра́дуйся, Свята́го Ду́ха оби́тель;/ ра́дуйся, уныва́ющим ве́лие ра́дование;/ ра́дуйся, исто́чниче исцеле́ний;/ ра́дуйся, скорбя́щим душа́м сла́дкое утеше́ние;/ ра́дуйся, и́ноком ти́хое приста́нище и учи́телю прему́дрый;/ ра́дуйся, похвало́ земли́ Росси́йския;/ ра́дуйся, Серафи́ме, преподо́бне о́тче наш.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Чу́дно житие́ твое́ яви́ся, преподо́бне,/ благода́тию Боже́ственнаго Ду́ха испо́лнено,/ блаже́нну вои́стинну кончи́ну преподо́бных прия́л еси́, о Христе́ ра́дуяся./ Мы же к просла́вльшему тя взыва́ем:/ оте́ц на́ших Бо́же, благослове́н еси́.

Мно́жество люде́й, во святу́ю оби́тель соше́дшеся днесь, преподо́бне Серафи́ме,/ честны́м моще́м твои́м покланя́ется,/ от ни́хже исцеле́ния вси почерпа́ем, непреста́нно зову́ще:/ оте́ц на́ших Бо́же, благослове́н еси́.

Во всю зе́млю изы́де веща́ние сие́,/ я́ко в Саро́ве чудотво́рец пресла́вен яви́ся,/ исцеле́ний мно́жество источа́я всем, с ве́рою приходя́щим и вопию́щим:/ оте́ц на́ших Бо́же, благослове́н еси́.

Богоро́дичен: Богоро́дице Де́во,/ ро́ждшая Сло́во па́че сло́ва, Зижди́теля Твоего́,/ Того́ моли́ с преподо́бным Серафи́мом поми́ловати ду́ши на́ша.

Ин

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

Поми́луй нас, Го́споди,/ и от вся́каго зла душетле́ннаго сохрани́ моли́твами уго́дника Твоего́, преподо́бнаго Серафи́ма,/ да вси уми́льно вопие́м Ти:/ оте́ц на́ших Бо́же, благослове́н еси́.

Кто не почуди́тся, кто не просла́вит неизсле́димую глубину́ милосе́рдия Твоего́, Го́споди,/ я́ко яви́л еси́ всему́ ми́ру уго́дника Твоего́, преподо́бнаго Серафи́ма,/ моли́твенника те́плаго о нас, вопию́щих Тебе́:/ оте́ц на́ших Бо́же, благослове́н еси́.

Благода́рное сие́ пе́ние, от нас приноси́мое тебе́, преподо́бне Серафи́ме, приими́/ и всем нам, пра́зднующим святу́ю па́мять твою́/ и покланя́ющимся моще́м твои́м, исцеле́ние да́руй, вопию́щим:/ оте́ц на́ших Бо́же, благослове́н еси́.

Богоро́дичен: Ты еси́, Пресвята́я Богоро́дице, прибе́жище на́ше и утвержде́ние,/ моли́ Сы́на Твоего́ и Бо́га на́шего/ пода́ти нам спасе́ние и грехо́в оставле́ние.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти/ Тя превозно́сим во вся ве́ки.

Плотски́я стра́сти укроти́в и ми́рови умертви́вся,/ глаго́лы жи́зни ве́чныя се́рдцем твои́м, блаже́нне, прия́л еси́,/ науча́я всех, к тебе́ притека́вших, взыва́ти:/ Го́спода по́йте, дела́, и превозноси́те Его́ во ве́ки.

В прославле́нии честны́х моще́й твои́х, преподо́бне,/ оби́тель Саро́вская ра́дости испо́лнися./ Лю́дие же вси ди́вному во святы́х Свои́х Бо́гу взыва́ху:/ Го́спода по́йте, дела́, и превозноси́те Его́ во ве́ки.

Благода́тию Боже́ственнаго Ду́ха испо́лнен сый, преподо́бне Серафи́ме,/ ве́рным лю́дем, творя́щим святу́ю па́мять твою́,/ моли́твами твои́ми испроси́ грехо́в проще́ние, вопию́щим:/ де́ти, благослови́те, свяще́нницы, воспо́йте,/ лю́дие, превозноси́те Го́спода во ве́ки.

Богоро́дичен: Спасе́ния Хода́таица нам яви́лася еси́, Богоро́дице,/ ро́ждшая Спа́са и Влады́ку всех,/ те́мже мо́лим Тя:/ спасе́ния сподо́би всех, песносло́вящих Тя ве́рно во вся ве́ки.

Ин

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

Доброде́тельному житию́ твоему́, преподо́бне, позави́дев, враг вселука́вый/ восхоте́ запя́тие тебе́ сотвори́ти,/ ты же, благода́тию Бо́жиею и моли́твами Влады́чицы посрами́в того́,/ Бо́га просла́вил еси́, песносло́вя:/ Го́спода по́йте, дела́, и превозноси́те Его́ во ве́ки.

Я́ко мо́лния, блиста́ющися, све́тится на поднебе́сней,/ та́ко и веща́ния о твои́х, преподо́бне, чудесе́х во всю зе́млю изыдо́ша./ Мы же, дивя́щеся сла́ве твое́й, вопие́м:/ де́ти, благослови́те, свяще́нницы, воспо́йте,/ лю́дие, превозноси́те Го́спода во ве́ки.

Су́етными и стра́стными помышле́нии мяту́щийся ум наш исцели́, преподо́бне,/ во́лны зла́го нече́стия укроти́,/ разсла́бленная жите́йскими попече́нии сердца́ на́ша укрепи́,/ да сла́вим Христа́ Соде́теля во вся ве́ки.

Богоро́дичен: Ра́дуйся, престо́ле Госпо́день огнезра́чный;/ ра́дуйся, заре́ невеще́ственнаго блиста́ния;/ ра́дуйся, о́блаче возсия́вшаго Со́лнца преди́внаго, Христа́ Спа́са на́шего,/ Его́же превозно́сим во вся ве́ки.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти,/ Тобо́ю же, Всечи́стая, яви́ся челове́ком/ Сло́во воплоще́нно, Его́же велича́юще,/ с Небе́сными во́и Тя ублажа́ем.

Недосто́йными усты́ воспева́емое тебе́ ма́лое хвале́ние на́ше,/ преподо́бне, не пре́зри, но приими́/ и всех, прославля́ющих тя, освяти́,/ бед, и напа́стей, и ве́чнаго муче́ния изба́ви,/ да тя при́сно воспева́ем.

Мраз нощны́й и вар дневны́й во уедине́нии пусты́ннем до́блественне претерпе́в,/ дом Прему́дрости Бо́жия был еси́/ и к сия́нию невече́рнему восте́кл еси́./ Моли́ спасти́ся нам.

Сла́вится днесь оби́тель,/ в не́йже яре́м Христо́в прия́ти изво́лил еси́:/ та́мо бо, в пусты́ни, дни твоя́ пребы́л еси́/ и, твои́ми уче́ньми мно́ги приходя́щия к тебе́ вразуми́в,/ научи́л еси́ бы́ти ча́да Це́ркве Христо́вы.

Богоро́дичен: Ты еси́ кре́пость на́ша,/ Ты еси́ похвала́ и ра́дование,/ Храни́тельница на́ша, заступле́ние,/ прибе́жище и Предста́тельница непобеди́мая,/ Пречи́стая Богоро́дице, спаси́ рабы́ Твоя́.

Ин

Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Вели́ким отце́м, дре́вле в посте́ и по́двизех просия́вшим, поревнова́в, преподо́бне,/ чрез вся дни живота́ твоего́ в моли́тве, слеза́х и труде́х пребы́л еси́,/ до́ндеже дости́гл еси́ Небе́сныя оби́тели,/ те́мже тя досто́йно ублажа́ем.

Кре́пкою си́лою Христо́с Бог тя препоя́са и укрепи́ побежда́ти ко́зни де́монския, преподо́бне./ Те́мже ны́не мо́лим тя:/ моли́ Человеколю́бца Бо́га,/ да изба́вит всех нас от вра́жиих нахожде́ний и искуше́ний и спасе́т ду́ши на́ша.

В боле́знех и ско́рбех на́ших к тебе́, преподо́бне, прибега́ем/ и из глубины́ душе́вныя вопие́м:/ бу́ди нам небу́рное приста́нище и боле́знем ско́рый цели́тель/ и изба́ви нас от вся́каго неду́га и ну́жды,/ да тя непреста́нно велича́ем.

Богоро́дичен: Еди́наго от Святы́я Тро́ицы, Сло́ва и Сы́на родила́ еси́, Де́во Пречи́стая,/ Его́же с преподо́бными и пра́ведными моли́ о рабе́х Твои́х,/ ве́рою прося́щих грехо́в проще́ния.

Свети́лен.

Подо́бен: Жены́, услы́шите:

Прииди́те, вси ве́рнии,/ свяще́нными пе́сньми восхва́лим ди́внаго в чудесе́х преподо́бнаго Серафи́ма,/ но́ваго свети́льника Росси́йския земли́,/ А́нгелом собесе́дника и те́плаго моли́твенника к Бо́гу/ о чту́щих святу́ю па́мять его́.

Сла́ва, и ны́не, Богоро́дичен.

На хвали́тех стихи́ры на 4, глас 8:

Приспе́ всечестны́й пра́здник оби́тели Саро́вския,/ па́мять преподо́бнаго Серафи́ма,/ ему́же ны́не си́це возопии́м:/ ра́дуйся, по́стником свети́ло и утвержде́ние,/ и́ноком звездо́, я́коже волхво́м,/ показу́ющая путь в Небе́сныя оби́тели,/ свяще́нником похвало́ пресла́вная,/ любве́ и целому́дрия исто́чниче неизсяка́емый,/ свети́льниче пресве́тлый духо́внаго разсужде́ния;/ ра́дуйся, пра́вило доброде́телем вели́кое.

Блаже́нне о́тче Серафи́ме,/ Христо́ви вои́стинну после́довал еси́,/ братолю́бием и незло́бием всех к себе́ привлека́я,/ кро́тостию же и смире́нием/ мно́ги доброде́тельному пути́ науча́я./ Те́мже любо́вию па́мять твою́,/ преподо́бне Серафи́ме, ублажа́ем.

В пусты́ню всели́лся еси́, преподо́бне,/ и, та́мо испо́лнився духо́вныя прему́дрости,/ на высоту́ доброде́тели возше́л еси́./ Те́мже вопие́м ти:/ ра́дуйся, церко́вное украше́ние,/ свяще́нником до́брое утеше́ние,/ и́ноком благоле́пие и похвало́,/ Серафи́ме блаже́нне,/ моли́ Христа́ Бо́га мир вселе́нней дарова́ти/ и душа́м на́шим ве́лию ми́лость.

Сла́ва, глас 6:

Прииди́те, и́ноков собо́ри и по́стников сосло́вие,/ прииди́те, христоимени́тых люде́й мно́жества,/ пе́сньми и́стиннаго по́стника почти́м, вопию́ще:/ ра́дуйся, по стопа́м Влады́ки Христа́ у́зким путе́м управля́емый,/ и притека́ющим к тебе́ в беда́х и ско́рбех ско́рый помо́щниче,/ и спасе́ния хода́таю преди́вный./ Ра́дуйся, да́ром проро́чества укра́шенный,/ прорица́яй, я́ко настоя́щая, гряду́щая,/ моли́ся, преподо́бне Серафи́ме,/ о чту́щих ве́рою и любо́вию святу́ю па́мять твою́.

И ны́не, Богоро́дичен.

Славосло́вие вели́кое и отпу́ст.

НА ЛИТУРГИ́И

Блаже́нны от кано́на пе́рваго песнь 3-я и втора́го кано́на песнь 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Ева́нгелие от Луки́, зача́ло 24, или́ от Матфе́я, зача́ло 10. Прича́стен: В па́мять ве́чную:

Моли́тва

О пречу́дный о́тче Серафи́ме, вели́кий Саро́вский чудотво́рче, всем прибега́ющим к тебе́ скоропослу́шный помо́щниче! Во дни земна́го жития́ твоего́ никто́же от Тебе́ тощ и неуте́шен оты́де, но всем в сла́дость бысть виде́ние ли́ка твоего́ и благоуве́тливый глас слове́с твои́х. К сим же и дар исцеле́ний, дар прозре́ния, дар немощны́х душ врачева́ния оби́лен в тебе́ яви́ся. Егда́ же призва́ тя Бог от земны́х трудо́в к Небе́сному упокое́нию, николи́же любы́ твоя́ преста́ от нас, и невозмо́жно есть исчи́слити чудеса́ твоя́, умно́жившаяся, я́ко зве́зды небе́сныя: се бо по всем конце́м земли́ на́шея лю́дем Бо́жиим явля́ешися и да́руеши им исцеле́ния. Те́мже и мы вопие́м ти: о прети́хий и кро́ткий уго́дниче Бо́жий, дерзнове́нный к Нему́ моли́твенниче, николи́же призыва́ющия тя отрева́яй! Вознеси́ о нас благомо́щную твою́ моли́тву ко Го́споду сил, да да́рует нам вся благопотре́бная в жи́зни сей и вся к душе́вному спасе́нию поле́зная, да огради́т нас от паде́ний грехо́вных и и́стинному покая́нию да научи́т нас, во е́же безпреткнове́нно вни́ти нам в ве́чное Небе́сное Ца́рство, иде́же ты ны́не в незаходи́мей сия́еши сла́ве, и та́мо воспева́ти со все́ми святы́ми Живонача́льную Тро́ицу во ве́ки веко́в. Ами́нь.

И́на моли́тва

О вели́кий уго́дниче Бо́жий, преподо́бне и Богоно́сне о́тче наш Серафи́ме! При́зри от Го́рния сла́вы на нас, смире́нных и немощны́х, обремене́нных грехми́ мно́гими, твоея́ по́мощи и утеше́ния прося́щих. Прини́кни к нам благосе́рдием твои́м и помози́ нам за́поведи Госпо́дни непоро́чно сохраня́ти, ве́ру Правосла́вную кре́пко содержа́ти, покая́ние во гресе́х на́ших усе́рдно Бо́гу приноси́ти, во благоче́стии христиа́нстем благода́тно преуспева́ти и досто́йным бы́ти твоего́ о нас моли́твеннаго к Бо́гу предста́тельства. Ей, свя́тче Бо́жий, услы́ши нас, моля́щихся тебе́ с ве́рою и любо́вию, и не пре́зри нас, тре́бующих твоего́ заступле́ния; ны́не и в час кончи́ны на́шея помози́ на́м и заступи́ нас моли́твами твои́ми от зло́бных наве́тов диа́вольских, да не облада́ет на́ми тех си́ла, но да сподо́бимся по́мощию твое́ю насле́довати блаже́нство оби́тели ра́йския. На тя бо упова́ние на́ше ны́не возлага́ем, о́тче благосе́рдый, бу́ди нам вои́стинну ко спасе́нию путево́ждь и приведи́ нас к невече́рнему све́ту жи́зни ве́чныя богоприя́тным предста́тельством твои́м у Престо́ла Пресвяты́я Тро́ицы, да сла́вим и пое́м со все́ми святы́ми достопокланя́емое И́мя Отца́ и Сы́на и Свята́го Ду́ха во ве́ки веко́в. Ами́нь.

Печать страницы