Служба в честь преподобныя матере нашея Макрины, сестры святителя Великаго Василия, и преподобнаго отца нашего Дия

НА ВЕЧЕ́РНИ

На Го́споди, воззва́х: стихи́ры святы́я, глас 4.

Подо́бен: Дал еси́ зна́мение:

Нетле́нно соблюла́ еси́ де́вство и нескве́рно,/ чи́сто пожи́вши,/ и бога́тство раздала́ еси́,/ Христо́во испо́лнивши законоположе́ние,/ Ему́же после́довала еси́,/ зе́млю оста́вльши и я́же на земли́./ Те́мже тебе́ Небе́сная и Не́бо/ дарова́ Иису́с Человеколю́бец/ и Спас душ на́ших.

Любому́дренно душе́вное/ самодви́жимо и безсме́ртно показа́ла еси́./ Те́мже и потща́лася еси́ не примеси́тися скве́рне грехо́вней/ и чиста́ от вся́каго ка́ла/ премени́тися соу́з теле́сных,/ ни еди́ны скве́рны иму́щи,/ ни вра́ски, Богоприя́тная,/ но чиста́ и всенепоро́чна Жениху́ твоему́ предста́ти.

Заре́ю просвети́ся светови́дное твое́ лице́,/ и уме́рши, прехва́льная,/ Христу́ тя просла́вльшу, я́ко Свою́ де́ву богови́дну,/ я́ко ми́лостиву и я́сну,/ я́ко сострада́тельну же и богоглаго́ливу:/ жизнь бо равноа́нгельну на земли́ пожи́вши,/ Бо́гу угоди́ла еси́ жития́ све́тлостию.

И́ны стихи́ры преподо́бнаго, глас то́йже.

Подо́бен: Яко до́бля:

Я́ко звезду́ всеми́рну,/ мы́сленно возсия́вша на церко́вней тве́рди/ восхваля́ем тя, блаже́нне,/ Боже́ственными твои́ми сия́нии просвеща́еми при́сно,/ и душе́ю и умо́м/ чту́щии твой светоно́сный день моле́бно,/ свяще́нне чудоно́сне,/ мона́шествующих удобре́ние.

Я́коже вторы́й Ааро́н, жезла́ прозябе́нием/ Боже́ственно освяще́ние, о́тче, был еси́,/ я́коже Моисе́й, во́ду, преподо́бне,/ из ка́мене изве́л еси́,/ я́коже Илия́, мертвеца́ моли́твою твое́ю воздви́гл еси́,/ удивля́емь вели́кими чудесы́/ и Боже́ственными просвеща́емь благозва́нии,/ Ди́е Богому́дре пребога́те.

Духо́вное сия́ние проявле́нно прие́м,/ лука́вствия ду́хи отгна́л еси́/ и свяще́нно попече́ние душа́м устро́ил еси́,/ в не́мже спаса́ются мно́жества всегда́,/ чту́щия твою́ па́мять, му́жеския по́двиги/ и чуде́с пресла́вная ве́рою,/ Ди́е, отце́в похвало́.

Сла́ва, и ны́не, Богоро́дичен,

глас и подо́бен то́йже:

Я́же Бо́га Невмести́маго во чре́ве Твое́м вмести́вшая,/ человеколю́бно Челове́ка бы́вша,/ и на́ше смеше́ние из Тебе́ прии́мша,/ и обожи́вша я́ве,/ не пре́зри мене́, Всечи́стая, ны́не скорбя́ща,/ но уще́дри ско́ро/ и разли́чныя вражды́ же и вре́да лука́ваго свободи́.

Крестобогоро́дичен, подо́бен то́йже:

А́гнца и Па́стыря Тя на дре́ве я́ко ви́де,/ А́гница ро́ждшая рыда́ше/ и ма́терски Ти веща́ше:/ Сы́не возжеле́нне,/ ка́ко на Дре́ве Кре́стнем пове́шен еси́, Долготерпели́ве?/ Ка́ко ру́це и но́зе Твои́, Сло́ве,/ пригвозди́шася от беззако́нных/ и кро́вь Твою́ излия́л еси́, Влады́ко?

Тропа́рь преподо́бныя, глас 2:

Жениха́ твоего́ смерть ви́девши,/ разсмотре́ла еси́ тле́нную жизнь и су́етие ми́ра,/ отвсю́ду вину́ прии́мши,/ Нетле́нному Обру́чнику уневе́стилася еси́,/ посто́м и смире́нием любо́вь Того́ постига́ющи./ Тем ны́не ра́дуется со А́нгелы,/ преподо́бная Макри́но, дух твой.

Ин тропа́рь преподо́бныя, глас 8:

В тебе́, ма́ти, изве́стно спасе́ся, е́же по о́бразу:/ прии́мши бо Крест, после́довала еси́ Христу́/ и, де́ющи, учи́ла еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней./ Те́мже и со А́нгелы сра́дуется, преподо́бная Макри́но, дух твой.

Тропа́рь преподо́бнаго, глас 1:

Пусты́нный жи́тель, и в телеси́ А́нгел,/ и чудотво́рец яви́лся еси́, Богоно́се о́тче наш Ди́е:/ посто́м, бде́нием, моли́твою Небе́сная дарова́ния прии́м,/ исцеля́еши неду́жныя и ду́ши ве́рою притека́ющих ти./ Сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

НА У́ТРЕНИ

Кано́н преподо́бныя, его́же краегране́сие: Неве́сту чи́сту тя Христу́, Макри́но, венча́ю. Глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Жениха́ пречи́стаго, душ красоту́, Макри́но всесла́вная,/ Его́же возжела́вши, возлюби́ла еси́ от всего́ се́рдца твоего́,/ просвети́ти моли́ пою́щия тя.

Сый бе́здна па́че ума́ бла́гости, Христе́,/ Твою́ нескве́рную неве́сту просла́вил еси́,/ жела́нием Твои́м пригвожде́ную, Макри́ну непоро́чную и пресла́вную.

Макри́но Богому́драя, де́вства похвало́,/ те́пле соблюла́ еси́ невре́дно воздержа́нием твое́ житие́,/ плоть ду́ху покори́вши.

Богоро́дичен: Светоно́сно возсия́ в сердца́х, Пренепоро́чная, ве́рою чту́щих Тя, Бо́жию Ма́терь,/ и озари́ день светоно́сный Христо́с,/ из утро́бы Твоея́ возсия́вый, Богоневе́сто.

Ин кано́н преподо́бнаго, творе́ние Ио́сифово, глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Вы́ну к Бо́гу манове́ньми удобря́емь,/ твой Крест восприя́л еси́ и Христу́ после́довал еси́,/ пло́ти твоея́ мудрова́ние, Ди́е, умертви́в воздержа́нием.

У́треневал еси́ к сла́ве незаходи́маго Со́лнца, преподо́бне,/ всесве́тла был еси́ звезда́ и ве́рныя просвети́л еси́,/ доброде́телей, блаже́нне, и чуде́с твои́х све́тлостию.

Устрани́л еси́ по́мысл твой, прему́дре, су́щих в ми́ре кра́сных,/ преми́рныя сла́вы рачи́тель и́стинен был еси́,/ с пло́тию безпло́тнаго победи́в Боже́ственною благода́тию.

Богоро́дичен: Со́лнца мы́сленнаго, Всенепоро́чная, селе́ние была́ еси́,/ Боже́ственными светлостьми́ нас благоче́стно озари́вшаго/ и мглу отгна́вша неразу́мия, Присноде́во.

Песнь 3

Ирмо́с: Не му́дростию, и си́лою,/ и бога́тством хва́лимся,/ но Тобо́ю, О́тчею Ипоста́сною Му́дростию, Христе́,/ несть бо свят, па́че Тебе́,/ Человеколю́бче.

Укра́шена добро́тою богода́нною и благода́тию, и му́ченик благосла́вие,/ изводи́ма ро́да че́стна, нра́ву поревнова́ла еси́ сих Боже́ственному.

3ако́ну Боже́ственному повину́ющися, де́во,/ оста́вила еси́ жития́ мяте́ж и молвы́ убежа́ла еси́,/ поще́нием и моли́твами, жела́нием упражня́ющися.

Свяще́ние от мя́гких ногте́й возлюби́ла еси́,/ очи́ма же ма́тернима блюдо́ма,/ пребыла́ еси́, Макри́но, нетле́нна и непоро́чна.

Богоро́дичен: Зе́млю Тя, Де́во, Всенепоро́чная Отрокови́це, ве́мы,/ я́ко клас жи́зни нам безсе́менно прозя́бшую,/ И́мже утвержда́еми, Тя ублажа́ем.

Ин

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Боже́ственными блиста́яся сия́нии, свети́льник был еси́,/ наставля́я ве́рою к тебе́ приходя́щия, блаже́нне.

Наста́вил еси́ к жи́зни после́дующия до́бре, преподо́бне,/ плотски́я бо стра́сти Боже́ственною си́лою умертви́л еси́.

Совокупи́лся еси́ боголе́пно с Небе́сными,/ на земли́ бо житие́ а́нгельское пожи́л еси́,/ Ди́е Богоно́се, о́тче наш.

Богоро́дичен: Всели́ся в Тя Живы́й на Небесе́х, Чи́стая,/ Его́же приле́жно моли́ спасти́ ду́ши пою́щих Тя.

Конда́к преподо́бнаго, глас 2.

Подо́бен: Тве́рдыя:

Чистото́ю души́ боже́ственне вооружи́вся,/ непреста́нную моли́тву, я́ко копие́, прии́м держа́вно,/ разсе́кл еси́ де́монов полки́,/ чудотво́рче, о́тче наш Ди́е,/ моли́ непреста́нно о всех нас.

Седа́лен святы́я, глас 4.

Подо́бен: Ско́ро предвари́:

Боже́ственная па́мять твоя́, Макри́но, днесь возсия́вши,/ яви́ся ми́рови, я́ко со́лнце, сказу́ющи житие́ твое́:/ ты бо, воздержа́нием плотска́я движе́ния разо́рши,/ уневе́стилася еси́ Христу́ от младе́нства./ Те́мже хва́лящия тя изба́ви от вся́ких зол.

Сла́ва, преподо́бнаго, глас 8.

Подо́бен: Прему́дрости:

Бо́гу от младе́нства возложе́н быв/ и Тому́ да́же до конца́ благоугожда́я, о́тче наш преподо́бне, дарова́ния улучи́л еси́/ и де́монов мно́жество отгна́л еси́ благода́тию,/ в Госпо́дню похвалу́ оби́тель созда́л еси́./ Те́мже пресла́вно и ме́ртвыя сподо́бился еси́ воздви́гнути, прехва́льне,/ несумне́нною моли́твою твое́ю./ Сего́ ра́ди вопие́м ти:/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.

И ны́не, Богоро́дичен:

Небе́сную дверь и киво́т, пресвяту́ю го́ру, све́тлый о́блак воспои́м,/ неопали́мую купину́, слове́сный рай, Е́вы воззва́ние,/ вселе́нныя всея́ вели́кое сокро́вище,/ я́ко спасе́ние в Ней соде́лася ми́рови и оставле́ние дре́вних согреше́ний./ Сего́ ра́ди вопие́м Ей:/ моли́ся Сы́ну Твоему́ прегреше́ний оставле́ние дарова́ти/ благоче́стно покланя́ющимся всесвято́му рождеству́ Твоему́.

Крестобогоро́дичен:

А́гнца, и Па́стыря, и Изба́вителя А́гница зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ мир у́бо ра́дуется, прие́мля Тобо́ю избавле́ние,/ утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.

Песнь 4

Ирмо́с: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Умертви́вшися ми́ру и мирски́м ве́щем,/ Бо́гу жи́ти еди́ному жела́нием Боже́ственным испра́вила еси́,/ твоего́ Жениха́ жела́ющи добро́ты, спаса́ющаго нетле́нну и чи́сту, всечестна́я.

Поревнова́вши Фе́кле честне́й, первому́ченице,/ и Боже́ственному тоя́ житию́ вои́стинну подо́бящися,/ от вдохнове́ния Боже́ственнаго свы́ше и и́мя обра́зно прия́т.

Невестоводя́щи, де́вы ты, Макри́но, привела́ еси́ де́вственному Сло́ву,/ от Де́вы возсия́вшему,/ безстра́стным у́бо присвое́нием и подо́бием безстра́стие я́ве пока́зовала еси́.

Богоро́дичен: Дарова́ний Боже́ственныя струи́ и исто́чницы исцеле́ний,/ Боже́ственнаго бога́тства раздая́ния даю́тся живонача́льною дла́нию, Богоневе́стная,/ ро́ждшагося от Твоея́ утро́бы Вседержи́теля.

Ин

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Ду́ха невеще́ственною свеще́ю ум твой просвеща́я,/ плотску́ю пре́лесть сон вмени́л еси́,/ Вы́шняго тя ча́юща гра́да, Богоно́се, смотря́я.

Я́ко о́блак, дождь нося́щий, Ца́рскому гра́ду я́влься,/ напои́л еси́ сего́ напое́нии Свята́го Ду́ха,/ душа́м попече́ние воздви́гл еси́ прекра́сно.

Умертви́вся греху́ воздержа́нием, ме́ртвым живо́т дарова́л еси́ Боже́ственным посо́бием,/ во́ду же источи́л еси́ нам умиле́ния, преподо́бне,/ творя́щим па́мять твою́.

Богоро́дичен: Светоно́сен Тя све́щник,/ Боже́ственное сия́ние во утро́бе носи́вшую, позна́хом, Де́во./ Те́мже мо́лимся Тебе́:/ Све́том Твои́м озари́ всех ду́ши, пою́щих Тя.

Песнь 5

Ирмо́с: Нечести́вии не у́зрят сла́вы Твоея́, Христе́,/ но мы Тя, Единоро́дне,/ Оте́ческия Сла́вы Сия́ние Божества́,/ от но́щи у́тренююще,/ воспева́ем Тя, Человеколю́бче.

Оскверни́тися страстьми́ добро́те кра́сней, душе́вней и богови́дней/ не стерпе́ла еси́, всему́драя,/ добро́ту несказа́нную честна́го Жениха́ твоего́ поразуме́вши, до́брая де́во.

Кре́пким утеше́нием обогати́вшися Христа́,/ тве́рдо же и незы́блемо страсте́й умертви́ла еси́ мно́гий мяте́ж,/ от но́щи у́треневавши и сла́вящи Го́спода.

Тверд соблюла́ еси́ ра́зум Христу́,/ Тому́ бо от утро́бы приве́рглася еси́, непоро́чная,/ Ему́же и возложи́ла еси́ ду́шу и те́ло твое́, от ю́ности пости́вшися.

Богоро́дичен: Христа́ родила́ еси́, Изба́вителя вся́ческих,/ нас, к тле́нию во́лею па́дшихся, вообрази́вша/ и к сла́ве несказа́нней, Богома́ти, возне́сша.

Ин

Ирмо́с: Ты, Го́споди, мой Свет,/ в мир прише́л еси́,/ Свет святы́й, обраща́яй из мра́чна неве́дения/ ве́рою воспева́ющия Тя.

На горе́ свяще́нней жития́ стоя́,/ восхожде́нием се́рдца разори́л еси́ стра́сти/ и Бо́гу прибли́жился еси́.

Жезл я́коже Ааро́нов, странноле́пным прозябе́нием был еси́, Богоно́се,/ чи́сто Влады́це и Боже́ственно свяще́ние.

О, Боже́ственных даро́в, от Бо́га дарова́нных тебе́!/ Моты́кою76 бо моли́тв твои́х во́ду жи́ву от боко́в землены́х, о́тче, изве́л еси́.

Богоро́дичен: Ни а́нгельский ум, ни челове́ческий мо́жет, Всенепоро́чная,/ сказа́ти стра́шнаго рождества́ глубину́ недове́домую.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Жела́ние Христо́во возраста́я явле́ннее,/ ум твой весь доброде́тель сво́йственну нося́ше,/ насади́ и благоче́стна Боже́ственная уче́ния.

Пою́щи Христа́ непреста́нными моли́твами,/ тве́рдую извлекла́ еси́ от Него́, де́во, по́мощь/ и Боже́ственную де́вства благода́ть соблюла́ еси́.

Венце́м дарова́ний Христо́с венча́ тя,/ я́ко чи́стую де́ву и ли́ку де́вственному наста́вницу,/ и в черто́зех Небе́сных, Богому́драя, всели́ тя.

Богоро́дичен: Едине́нием я́же пе́рвее разстоя́щаяся совокупи́,/ два бо естества́ совокупле́на родила́ еси́ неизрече́нно Бо́га Сло́ва,/ вои́стинну воплоще́нна, Всенепоро́чная.

Ин, ирмо́с то́йже.

Возвы́сил еси́ к Бо́гу серде́чное жела́ние, и смири́л еси́ стра́сти,/ и свире́пство де́монов низложи́л еси́, Богоно́се,/ мона́шествующих недви́жимое основа́ние.

Ура́нил еси́ воздержа́нием ра́нами, о́тче, Еги́пет,/ страстны́я свободи́л еси́ его́ рабо́ты,/ мно́жество неспряже́ных и супру́жных, благоче́стно после́дующих ти, преподо́бне.

Бога́т доброде́тельми и чуде́с све́тлостию быв испо́лнен,/ преста́вился еси́ к Вы́шнему гра́ду, Ди́е Богому́дре,/ и мо́лишися изба́витися от бед ста́ду твоему́.

Богоро́дичен: Умертви́ души́ моея стра́сти, Всенепоро́чная,/ Жизнь всех неизрече́нным сло́вом ро́ждши,/ и ум мой смуща́емый, Отрокови́це, умири́.

Конда́к святы́я, глас 4.

Подо́бен: Яви́лся еси́:

Бо́га Блага́го всем се́рдцем возлюби́ла еси́,/ Макри́но преподо́бная,/ и, Сего́ Крест Честны́й на ра́мо прие́мши,/ усе́рдно после́довала еси́ Ему́,/ отону́дуже согреше́ний обрела́ еси́ проще́ние.

Песнь 7

Ирмо́с: Спасы́й во огни́ авраа́мския Твои́ о́троки/ и халде́и уби́в,/ я́же Пра́вда пра́ведно уловля́ше,/ Препе́тый Го́споди,/ Бо́же оте́ц на́ших, благослове́н еси́.

Еди́наго жела́ющи Христа́ и соверше́нною любо́вию я́ко уя́звена я́ве, вопия́ше:/ теку́ в след Тебе́,/ препе́тый Го́споди, Бо́же оте́ц на́ших, благослове́н еси́.

Отри́нувши стра́сти и многомяте́жная движе́ния,/ в безстра́стия све́тлую облече́ся ри́зу, зову́щи:/ препе́тый Го́споди, Бо́же оте́ц на́ших, благослове́н еси́.

Низложи́вши шата́ние зверови́дное вознесе́нное злонача́льнаго врага́,/ и по́честь побе́ды прия́ла еси́, достохва́льная, пою́щи:/ Го́споди, Бо́же оте́ц на́ших, благослове́н еси́.

Богоро́дичен: Расто́ргни согреше́ний плени́цы Твои́м ма́терним дерзнове́нием/ благоче́стно и ве́рно пою́щих, Де́во, Рождество́ Твое́.

Ин

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Оби́тель Тро́ице твое́ се́рдце сотвори́л еси́,/ те́мже мона́шествующим воздви́гл еси́ благопотре́бно, Богоно́се, попече́ние,/ благослове́н еси́,– зовы́й,– в хра́ме сла́вы Твоея́, Го́споди.

Обыстри́в твой исто́чник чуде́сный, о́тче Богому́дре,/ во́ду спасе́ния источи́л еси́ ве́рно творя́щим твое́ успе́ние, Ди́е чу́дне,/ мона́шествующих свети́ло пресве́тлое.

Украси́в доброде́тельми твое́ житие́,/ был еси́ весь светоза́рен и столп светови́ден, пою́щим наста́вник:/ благослове́н еси́ в хра́ме сла́вы Твоея́, Го́споди.

Богоро́дичен: Святе́йшу Тя Херуви́м соде́ла, Отрокови́це,/ Бог Святы́й я́ве, освяща́я пою́щия:/ благослове́нна Ты в жена́х, Пренепоро́чная Влады́чице.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Священноле́пно ты житие́ и жизнь чи́сту препроводи́ла еси́,/ некра́домо возложе́ние, добро́та же сокрове́нна,/ Богови́дно украше́ние яви́лася еси́, Богодохнове́нная, зову́щи:/ Го́спода по́йте, дела́, и превозноси́те Его́ во вся ве́ки.

Умерщвле́нием стра́сти оде́янна, к Боже́ственному безсме́ртию премину́ла еси́,/ изря́дная научи́вши и любому́дреная души́ безсме́ртней и самодви́жней,/ Го́спода по́йте,– вопию́щи,– и превозноси́те Его́ во вся ве́ки.

Заре́ю трисия́ннаго светоли́тия ум просве́щши и лице́,/ усну́ла еси́, пребога́тая, успе́нием блаже́нным, с весе́лием ви́дящи тебе́ жела́емаго,/ Го́спода по́йте,– вопию́щи,– и превозноси́те Его́ во вся ве́ки.

Богоро́дичен: Тя, ковче́г пресвяты́й, осеня́емый Боже́ственным Ду́хом,/ Преве́чное Сло́во и присносу́щное, за милосе́рдие неизрече́нное вочелове́чшееся, ро́ждшую Богома́терь пое́м/ и превозно́сим во вся ве́ки.

Ин

Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.

Жезла́ твоего́ прозябе́нием Бог твою́ плодоно́сну ду́шу явля́ше, прему́дре,/ насажда́ющую плодови́ты и слове́сны сады́ Боже́ственным манове́нием,/ в раи́ пи́щи мона́хов мно́жество, вопию́щих:/ вся дела́, благослови́те, Госпо́дня, Го́спода.

Ум твой, Боже́ственными добро́тами облиста́емь, красе́н пребы́сть./ И ны́не после́днее дости́гл еси́ до́брых, я́ко чист, прича́стием обожа́емь при́сно и поя́:/ благослови́те, вся дела́ Госпо́дня, Го́спода.

Да тя гла́сы ра́достными, торжеству́юще, Ди́е, почита́ем,/ спаса́й ста́до твое́ всегда́, твою́ па́мять пра́зднующее,/ и наста́ви к жи́зненным вхо́дом пою́щия:/ благослови́те, вся дела́ Госпо́дня, Го́спода.

Богоро́дичен: Яви́лася еси́ ши́рши небе́с, Бо́га вме́щши, Мари́е Пречи́стая,/ Его́же моли́ спасти́ мя от страсте́й содержа́щих/ и бу́дущаго стра́шнаго осужде́ния изба́вити мя, вопию́щаго:/ благослови́те, вся дела́ Госпо́дня, Го́спода.

Песнь 9

Ирмо́с: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови Благослове́ние процвела́ еси́./ Тем Тя вси велича́ем.

Ми́лости вои́стинну Бо́жией бога́тей подо́бящися,/ сконча́ла еси́, пита́ющи вся, нището́ю снеда́емыя, прехва́льная,/ отсю́ду Ми́лостивый просла́ви тя, я́вльшуюся ми́лостиву.

Пред лице́м ста́ла еси́ Божиим, всехва́льная,/ светоно́сна бо была́ еси́, житие́м и сло́вом укра́шенна и вся́ческими хвала́ми/ и ро́да благосла́вием сия́ющи, превысо́кими восхожде́нии.

В пресве́тел всели́лася еси́ черто́г и во храм, о Макри́но, Небе́сный,/ иде́же, де́во, пребыва́еши со святи́тели, сро́дники твои́ми./ Моли́ со дерзнове́нием Го́спода вся спасти́, пою́щия тя.

Богоро́дичен: Красе́н добро́тою Плод и све́тел па́че всех чре́ва Твоего́:/ Ты бо, Де́во Богоро́дице, Бо́га воплоще́нна родила́ еси́, я́вльшася,/ за е́же спасти́ челове́ка./ Те́мже Тя вси велича́ем.

Ин

Ирмо́с: Ка́мень нерукосе́чный, от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Тя доброде́телей благозра́чием, о́тче, я́ко А́нгела, я́вльшася/ и к Небесе́м возлете́вша, позлаще́нне иму́ща криле́,/ ра́достно почита́ем и благоче́стно похваля́ем.

Я́коже со́лнце многосве́тло, от восто́ка возсия́в, Ди́е,/ всю́ду зарю́ доброде́телей и чуде́с твои́х бога́тно просте́рл еси́,/ просвеща́я ми́ра концы́.

К Све́ту незаходи́мому, о́тче, светови́ден быв/ доброде́телей светозаре́нием, преше́л еси́, ра́дуяся,/ и всели́лся еси́, иде́же преподо́бных ду́си./ О ста́де твое́м моли́ся.

Богоро́дичен: Пощади́ мя, Христе́, егда́ прии́деши суди́ти ми́ру со сла́вою,/ име́я моля́щую Тя, Сло́ве, Богоро́дицу Присноде́ву, и А́нгельския чи́ны,/ и преподо́бных совокупле́ния.