Служба в честь преподобныя Ангелины, деспотицы Сербския
НА МА́ЛОЙ ВЕЧЕ́РНИ
На Го́споди, воззва́х: стихи́ры, глас 1.
Подо́бен: Небе́сных чино́в:
Небе́сныя сла́вы взыска́вши,/ ни́жнюю сла́ву и бога́тство тле́нное презре́вши,/ но к пребыва́ющей во ве́ки устреми́лася еси́,/ доброде́тельным взо́ром к Небе́сным ум упра́вльши,/ в Небе́сных се́лех водвори́лася еси́/ и наслажда́ешися сла́вы и све́тлости неизрече́нныя,/ отону́дуже и нас назира́еши,/ я́ко ма́ти при́сная, ча́да своя́.
Воздержа́нием мудрова́ние плотско́е обузда́ла еси́,/ грехо́вныя мглы избе́гши соверше́нным умо́м,/ Вы́шнюю митропо́лию дости́гла еси́/ и по сме́рти я́ко жи́ва показа́лася еси́,/ смерть бо пра́ведным я́ко сень вмени́ся./ Те́мже твое́ успе́ние почита́ем.
Дом твой ни́щим отве́рзла еси́/ и в темни́цы всажде́нныя посеща́еши,/ а́лчущия препита́ла еси́,/ пра́вдою облече́на, ми́лостынями укра́шена./ Сего́ ра́ди на Небесе́х ра́дуешися/ и, я́ко ма́ти чадолюби́вая,/ нас освяща́еши.
Сла́ва, глас 2:
Моще́й твои́х ра́ка, всехва́льная,/ источа́ет исцеле́ние ве́рою приступа́ющим к ней,/ и блаже́нная твоя́ душа́, со А́нгелы совоку́пльшися,/ непреста́нно ра́дуется./ Но, я́ко иму́щи дерзнове́ние ко Христу́, преподо́бная,/ и со свяще́нными твои́ми ча́ды,/ моли́ спасти́ся душа́м на́шим.
И ны́не, Богоро́дичен:
Спаси́ от бед рабы́ Твоя́, Богоро́дице,/ я́ко вси по Бо́зе к Тебе́ прибега́ем,/ я́ко неруши́мей стене́ и предста́тельству.
На стихо́вне стихи́ры, глас 2.
Подо́бен: До́ме Евфра́фов:
От усе́рдия песнь/ воспева́ем, сла́вная,/ и восхваля́ем па́мять твою́ немо́лчно,/ Ангели́но преподо́бная,/ блаже́нную вои́стинну и светоно́сную.
Стих: Честна́ пред Го́сподем/ смерть преподо́бных Его́.
Ра́ка моще́й твои́х,/ я́ко сокро́вище многоце́нно,/ дарова́ся нам,/ ю́же мы обстоя́ще со усе́рдием,/ согреше́ний про́сим разреше́ние.
Стих: Ди́вен Бог во святы́х Свои́х,/ Бог Изра́илев.
Осиява́ют нас мы́сленно/ светоза́рныя твоя́ мо́щи/ в светоно́сный день светле́йшими блиста́нии,/ воньже ны́не моли́ спасти́ся нам,/ пою́щим тя.
Сла́ва, глас то́йже:
Се ра́ка спасе́ния,/ се исто́чник исцеле́ния,/ святы́я яви́шася твоя́ мо́щи,/ те́мже прииди́те, окре́стныя страны́,/ усе́рдно ны́не почерпе́м неду́гующим здра́вие/ и весе́лие су́щим в ско́рбех./ Го́споди, моли́твами ея́/ оби́тель сию́ сохрани́ неруши́му.
И ны́не, Богоро́дичен:
Все упова́ние мое́ на Тя возлага́ю,/ Ма́ти Бо́жия,/ сохрани́ мя под кро́вом Твои́м.
Тропа́рь пи́сан на вели́цей вече́рни. Сла́ва, и ны́не, Богоро́дичен: И́же нас ра́ди:
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8, глас 6.
Подо́бен: Все отло́жше:
Всю возложи́ла еси́ себе́ Бо́гови,/ страстну́ю мглу отгна́ла еси́/ и, озари́вшися све́том богоразу́мия,/ пре́лесть вра́жию низве́ргла еси́,/ ловле́ния избе́гши лю́таго мироде́ржца,/ доброде́телию ду́шу впери́вши, Ангели́но преподо́бная,/ со дерзнове́нием моли́ся о душа́х на́ших.
От ко́рене блага́го прозябла́ еси́/ и ве́тви благора́сленныя возраща́еши,/ обре́тшися я́ко дре́во, насажде́нное при исхо́дищих вод,/ я́же плод твой Бо́гови принесла́ еси́,/ и ли́ствие твое́ бесо́вскими ве́тры не поколеба́ся,/ нас, под се́нию ветве́й твои́х совоку́пльши,/ от ва́ра грехо́внаго прохлажда́еши./ Те́мже твое́ свято́е успе́ние почита́ем.
Все упова́ние твое́ возложи́вши на Го́спода,/ и Тому́ до конца́ после́довала еси́,/ крест твой на ра́мо взе́мши,/ бесо́вская кова́рства, я́ко паучи́нная, истни́ла еси́/ и тех горды́ню и пре́лесть на зе́млю низве́ргла еси́,/ себе́ от сих неврежде́ну сохрани́вши./ Те́мже тя Христо́с в ве́чных оби́телех упоко́и,/ Ангели́но треблаже́нная,/ со дерзнове́нием моли́ся о душа́х на́ших.
Ма́ти преподо́бная, Ангели́но сла́вная,/ су́щаго живота́ возжеле́вши,/ того́ жела́ющи, ше́ствовала еси́ стезю́;/ бога́тство бо измени́вши на нищету́ мно́гую,/ земны́я обрела́ еси́ бу́дущая во ве́ки;/ пи́щею тле́ющи воздержа́ния,/ поко́й боле́зни, и́же в по́двизех,/ преми́рный живо́т, па́че мирска́го, насле́довала еси́;/ его́же и восприя́ла еси́ с му́дрыми де́вами,/ сохрани́вши свети́льник твой неуга́шен,/ и две́ри тебе́ отверзо́шася,/ и со Женихо́м возшла́ еси́ в черто́г Небе́сный.
Сла́ва, глас 3:
Прииди́те, весь но́вый Изра́иль/ и вся окре́стныя страны́ и гра́ди,/ вку́пе лик соста́вльше,/ в па́мять преподо́бныя ма́тере на́шея Ангели́ны,/ ра́достною душе́ю и се́рдцем/ Боже́ственную ра́ку ея́ обы́мем,/ благода́ть исцеле́ний прие́млюще/ от живу́щия в ней благода́ти;/ неоску́дно бо подава́ет ве́рою к ней приходя́щим/ и к весе́лию созыва́ет вся земноро́дныя/ пра́здновати всечестну́ю па́мять ея́,/ такова́я к ней веща́юще:/ Ангели́но преподо́бная, Стефа́не, Макси́ме освяще́нне и Иоа́нне пра́ведне,/ ста́до ва́ше, е́же собра́ли есте́,/ и це́рковь, ю́же возлюби́сте,/ сохраня́йте от иноплеме́нных наси́лования/ и моли́теся о душа́х на́ших.
И ны́не, Богоро́дичен: Ка́ко не диви́мся:
Вход. Проки́мен дне. И чте́ния три преподо́бническая.
Прему́дрости Соломо́новы чте́ние (главы́ 5 и 6):
Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я́ и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, яко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́,/ внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́новы чте́ние (глава 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник, преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На лити́и стихи́ры самогла́сны, глас 2:
Я́ко свети́льник пресве́тлый/ яви́лася еси́ в после́дния ро́ды сия́нием чуде́с твои́х./ Нас просвеща́еши всегда́, Ангели́но всехва́льная,/ и тьму бесо́вскую отго́ниши моли́твами твои́ми,/ отжени́ неду́ги от душ на́ших,/ и́же тя при́сно ублажа́ющих.
От за́пада, я́ко звезда́, возсия́ла еси́,/ и, на полу́нощие зари́ испуща́ющи,/ просвеща́еши во тьме неве́рия держи́мыя,/ и повсю́ду ве́рных озаря́еши,/ и приво́диши гре́шныя к покая́нию,/ всех сердца́ в страх Бо́жий удивля́еши,/ мощьми́ твои́ми ду́хи лука́выя от челове́к отго́ниши,/ здра́вие боля́щим о Бо́зе подава́ющи,/ па́мятию же твое́ю нас собира́еши/ воспе́ти Спа́са, тебе́ просла́вльшаго.
У всех Царя́ сла́вы взыска́вши,/ земну́ю то́щно оста́вила еси́,/ крест взе́мши, Христу́ после́довала еси́./ Те́мже и Небе́сная блага́я получи́ла еси́,/ кри́ла впери́вши, возлете́ла еси́ в Вы́шнее Ца́рство,/ иде́же есть всех веселя́щихся жили́ще, преподо́бных и пра́ведных./ С ни́миже лику́еши в непроходи́мыя ве́ки,/ с супру́гом честны́м и ча́ды,/ вку́пе Христа́ велича́юще.
Сла́ва, глас 8:
Гряди́те вси, Богому́дрии, от земли́ да́льныя,/ к ра́це прикосну́вшеся преподо́бныя/ и проше́ния своя́ от души́ принося́ще:/ ов у́бо здра́вие от страсте́й разли́чных,/ други́й же грехо́в проще́ние,/ я́же от Бо́га, приобре́тения ми́лости,/ вся́кия ве́щи, на по́льзу на́шему проше́нию.
И ны́не Богоро́дичен:
Небе́сная пою́т Тя, Обра́дованная Ма́ти Безневе́стная,/ и мы славосло́вим неизсле́дованное Твое́ рождество́, Богоро́дице,/ моли́ спасти́ся душа́м на́шим.
На стихо́вне стихи́ры, глас 4.
Подо́бен: Зва́нный свы́ше:
От за́пада возсия́ла еси́, я́коже друго́е со́лнце,/ преподо́бная Ангели́но,/ заря́ми сия́ющи твои́х доброде́тельных дея́ний, всехва́льная,/ и плоди́ утро́бы твоея́,/ я́ко арома́ти благово́ннейшии, Бо́гови принесо́шася,/ освети́ла еси́ ве́рных сердца́ сия́нием чуде́с твои́х,/ и, я́ко трапе́зу многоце́нну, предложи́ла еси́ нам твоя́ мо́щи,/ те́мже тя при́сно ублажа́ем/ и твою́ па́мять почита́ем,/ Христа́ велича́юще,/ вельми́ тя просла́вльшаго.
Стих: Честна́ пред Го́сподем/ смерть преподо́бных Его́.
Уязви́вшися жела́нием Христо́вы любве́,/ житие́ а́нгельское в земне́м показа́ла еси́ телеси́,/ о Ангели́но пребога́тая,/ от ца́рства земна́го избе́гши,/ притекла́ еси́ ко Христу́/ и Тому́ после́довала еси́,/ отве́ргшися земны́я сла́вы,/ пра́ведных жизнь стяжа́ла еси́, су́щи на земли́./ Те́мже тя всели́ в черто́г пресве́тлый/ Иису́с Человеколю́бец и Спас душ на́ших.
Стих: Ди́вен Бог во святы́х Свои́х,/ Бог Изра́илев.
А́нгельское житие́ возжеле́вши, А́нгелов тезоимени́тая,/ душе́вное жела́ние явля́ющи,/ презре́ти повину́лася еси́ ви́димая,/ жела́ющи восприя́ти бу́дущая,/ вменя́ющи та́я я́ко тьму,/ су́щая сматря́ющи, воздержа́нием упражня́ющися/ и стопа́м после́дующи мы́слию, бде́нием, низулега́нием и чистото́ю,/ Его́же возлюби́ла еси́ от ю́ности,/ проро́ческое сло́во исполня́ющи,/ бога́тство твое́ расточи́вши, дала́ еси́ убо́гим,/ Боже́ственным виде́нием и дея́нием/ твою́ ду́шу просвеща́ющи.
Сла́ва, глас то́йже:
Преве́чный Бог, творя́й чудеса́ пресла́вная,/ прославля́яй всех, и́же Того́ просла́вльших,/ вои́стинну и по сме́рти прославля́ет;/ прииди́те, ве́рнии, уви́дим чу́до ди́вное:/ оте́ц с сы́ны, ма́ти с ча́ды,/ вку́пе в киво́тех, я́ко шипцы́ благово́ннии, нас облагоуха́ют/ и церко́вный возду́х освяща́ют;/ соста́вим у́бо торже́ственная, принесе́м и похва́льная,/ лику́им духо́вне, я́ко Дави́д пред киво́том,/ пе́ния взе́мше, разли́чными гла́сы сих ублажи́м,/ пою́ще и вопию́ще к ним:/ при́снии раби́ Христо́ви,/ ста́ду ва́шему мир испроси́те/ и душа́м на́шим ве́лию ми́лость.
И ны́не, Богоро́дичен:
Иму́ще Тя, Богоро́дице, упова́ние и предста́тельство,/ вра́жиих наве́т не убои́мся,/ я́ко спаса́еши ду́ши на́ша.
На благослове́нии хле́бов тропа́рь святы́я, дважды, и Богоро́дице, Де́во: единожды.
Тропа́рь святы́я, глас 8:
В тебе́, ма́ти, изве́стно спасе́ся, е́же по о́бразу,/ прии́мши бо крест, после́довала еси́ Христу́/ и, де́ющи, учи́ла еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней./ Те́мже и со А́нгелы сра́дуется, преподо́бная Ангели́но, дух твой.
НА У́ТРЕНИ
На Бог Госпо́дь: тропа́рь святы́я, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 3.
Подо́бен: Красоте́ де́вства:
Боже́ственныя благода́ти испо́лнившися, бога́тство и земну́ю сла́ву оста́вила еси́/ и духо́внаго раче́ния за́поведи испо́лнила еси́,/ багряни́цу ца́рствия худы́ми ру́бы измени́вши и крест взе́мши,/ Христу́ после́довала еси́,/ поще́нием, и бде́нием, и моли́твами бога́тство Небе́сное восприя́ла еси́./ Те́мже тя Христо́с оде́я во оде́жду боготка́нну,/ и венце́м украси́ тя Ца́рствия Своего́,/ и в черто́г введе́ с му́дрыми де́вами,/ Ангели́но пребога́тая, моли́твеннице о душа́х на́ших.
Сла́ва, и ны́не, Богоро́дичен:
Красоте́ де́вства Твоего́ и пресве́тлей чистоте́ Твое́й/ Гаврии́л удиви́вся, вопия́ше Ти, Богоро́дице:/ ку́ю Ти похвалу́ принесу́ досто́йную?/ Что же возымену́ю Тя? Недоумева́ю и ужаса́юся./ Те́мже, я́ко повеле́н бых, вопию́ Ти:/ ра́дуйся, Благода́тная.
По 2-м стихосло́вии седа́лен, глас 4.
Подо́бен: Удиви́ся Ио́сиф:
Яви́лася еси́ я́ко ко́рень благопло́ден,/ израсти́вши нам новора́сли ма́слинныя, Макси́ма свяще́ннаго и Иоа́нна пра́веднаго,/ и сих воздои́ла еси́ млеко́м благоче́стия,/ и насажде́ни бы́ша в виногра́де Спа́сове,/ плоды́ принося́ще в церко́вное служе́ние, просвеща́ти служа́щия в Це́ркви,/ сего́ ра́ди тя Христо́с всели́, иде́же ра́дость пра́ведных, иде́же есть дре́во живо́тное,/ о нас непреста́нно моли́, помина́ющих Боже́ственную твою́ па́мять,/ соверша́ющих и пою́щих твое́ успе́ние.
Сла́ва, и ны́не, Богоро́дичен:
Удиви́ся Ио́сиф, е́же па́че естества́ зря, и внима́ше мы́слию и́же на руно́ дождь/ в безсе́меннем зача́тии Твое́м, Богоро́дице,/ купину́, огне́м неопали́мую, жезл Ааро́нов прозя́бший,/ и, свиде́тельствуя, обру́чник Твой и храни́тель свяще́нником взыва́ше:/ Де́ва ражда́ет и по рождестве́ па́ки Де́вою пребыва́ет.
По полиеле́и седа́лен, глас 8.
Подо́бен: Повеле́нное та́йно:
Возбра́ннице и благи́я ве́ры засту́пнице,/ благода́рственную песнь и моле́бную ны́не прино́сит ти град твой, преблаже́нная;/ но, я́ко иму́щи от Бо́га кре́пость непобеди́мую,/ от всех искуше́ний изба́ви нас, да зове́м ти:/ ра́дуйся, ма́ти прехва́льная.
Сла́ва, и ны́не, Богоро́дичен:
Повеле́нное та́йно прие́м в ра́зуме,/ в кро́ве Ио́сифове тща́нием предста́ Безпло́тный, глаго́ля Неискусобра́чней:/ Приклони́вый схожде́нием Небеса́ вмеща́ется неизме́нно весь в Тя,/ Его́же и ви́дя, в ложесна́х Твои́х прие́мша ра́бий зрак, ужаса́юся зва́ти Тебе́:/ ра́дуйся, Неве́сто Неневе́стная.
Степе́нна, 1-й антифо́н 4-го гла́са. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Вся́кое дыха́ние: Ева́нгелие от Луки́, зача́ло 33.
По 50-м псалме́ стихи́ра, глас 6:
Свы́ше зарю́ прие́мши Свята́го Ду́ха,/ ма́ти преподо́бная,/ житие́ земно́е измени́ла еси́ Небе́сным,/ и́ноческое возлю́бльши/ и в нем Бо́гу угожда́ющи./ Ему́же ны́не неве́ста предстои́ши,/ проси́ нам, мо́лимся, ве́лию ми́лость.
Кано́н Богоро́дицы на 6, глас 2: Нетре́ну необы́чну: и святы́я на 8, глас 8.
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Во свет невеще́ственный и мы́сленный от помраче́ния ве́чнаго восте́кши, преподо́бная,/ моли́твами твои́ми к Бо́гу просвети́ мя.
От ю́ности возлюби́ла еси́ доброде́тель, воздержа́ния труды́,/ и стезе́ю по́стничества во гра́де обита́еши Го́рнем,/ духо́вно лику́ющи.
Страсте́й глубину́ преше́дши и потопле́ния бесо́в избе́гши,/ в приста́нище устреми́лася еси́ необурева́емое,/ Боже́ственная ма́ти преподо́бная.
Мо́ря грехо́внаго треволне́ния избе́гши, преподо́бная,/ к ти́хому приста́нищу душе́вный кора́бль окорми́ла еси́/ и кро́тких зе́млю насле́довала еси́, я́коже дре́вле изра́ильтяне обетова́нную.
Богоро́дичен: Сло́во без ма́тере из Отца́,/ Сего́ напосле́док богому́жно родила́ еси́, еди́на Богома́ти,/ я́ко превы́шши всея́ тва́ри.
Песнь 3
Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.
Попали́ла еси́ у́глем по́стничества, преподо́бная, страсте́й те́рние/ и прохлажда́еши ве́рных мудрова́ния.
Стре́лами изощре́нными, доброде́тельми, преподо́бная,/ я́ко си́льная, уязви́ла еси́ се́рдце лю́таго ратобо́рца.
Ору́жием воздержа́ния и моли́тв мно́жеством, всехва́льная, вооружи́вшися,/ враги́ неви́димыя победи́ла еси́.
Яви́лася еси́ я́ко земля́ добропло́дная, возрасти́вшая кла́сы стори́чествующия,/ и сих совокупи́ла еси́ в жи́тницах Небе́сных.
Богоро́дичен: Всего́ мя лежа́ща в сласте́х, Влады́чице Чи́стая, и в скве́рных де́лех,/ от нераде́ния моего́, Богоро́дице, исхити́вши, спаси́ мя.
Седа́лен, глас 4.
Подо́бен: Вознесы́йся:
Возше́дши на высоту́ доброде́телей, Ангели́но великоимени́тая,/ враго́в у́бо низложи́ла еси́ стремле́ния,/ нам с Богоро́дицею проси́ смире́ние и ве́лию ми́лость.
Сла́ва, и ны́не, Богоро́дичен:
На Престо́ле херуви́мстем седя́й и в не́дрех О́тчих водворя́яся,/ я́ко на престо́ле святе́м седи́т Свое́м, Влады́чице, в не́дрех Твои́х./ Вопло́щся бо Бог вои́стинну воцари́ся над все́ми язы́ки, и разу́мно ны́не пои́м Ему́./ Его́же умоли́ спасти́ся рабо́м Твои́м.
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Наса́ждьшися при вода́х воздержа́ния, ма́ти блага́я,/ лоза́ яви́лася еси́ благоцвету́щая,/ благоче́стия гро́здие износя́щи.
Вся изумле́на бы́вши и духоно́сна вся изступи́вши к Бо́гу,/ Ангели́но преподо́бная и треблаже́нная,/ те́мже со А́нгелы ликовству́еши всегда́, вопию́щи:/ сла́ва си́ле Твое́й, Го́споди.
Возлете́ла еси́ на Небеса́, я́ко голуби́ца чадолюби́ва, кри́ла облегча́ющи воздержа́нием,/ и, со птенцы́ твои́ми возвы́сившися,/ дости́гла еси́, иде́же пти́цы Небе́сныя превита́ют.
Боже́ственным Ду́хом освяще́на бы́вши вся, о Ангели́но,/ и в Боже́ственных дея́ниих нечести́вых де́йство и лю́тых бесо́в отгна́ла еси́.
Богоро́дичен: Херуви́мов превы́шшую Тя и Серафи́мов воспева́ем, Пречи́стая,/ Его́же бо трепе́щут о́нии,/ понесла́ еси́, Де́во Ма́ти, на руку́ Твое́ю.
Песнь 5
Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не зна́ем.
О́чи серде́чнеи неусы́пнеи/ в Боже́ственных за́поведех соблюла́ еси́ незазо́рно, присноблаже́нная.
Боже́ственный твой ковче́г, всечестна́я, исцеле́ния всем подава́я,/ кре́пость бесо́вскую отго́нит.
Го́рняго Сио́на зда́ния сматря́еши,/ земны́я гра́ды и бога́тство оста́вила еси́,/ багряни́цу твою́ ру́бы измени́вши и крест взе́мши, Христу́ после́довала еси́/ и, обогати́вшися чуде́с благода́тию, исцеле́ния подае́ши припа́дающим к тебе́ ве́рою.
Ми́лостыню расточи́ла еси́ ни́щим,/ от се́рдца всех уте́шивши, Ангели́но присноблаже́нная.
Богоро́дичен: Сло́ва ковче́г Тя показа́, Богоро́дице, зако́на Госпо́дь,/ во́ньже несказа́нно всели́ся.
Песнь 6
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Бесо́вская стремле́ния и тех полки́, Богодухнове́нная,/ безору́жным сплете́нием ве́рно попра́ла еси́/ и, сих низложи́вши, стра́шная ору́жия велехва́лящихся сокруши́ла еси́.
Духо́вная благода́ть в се́рдце твое́м всели́ся и светоза́рну тя показа́,/ и огнь Боже́ственныя любве́ в души́ твое́й распали́ла еси́, и́скры слове́сныя испуща́ющи,/ и́миже грехо́вное те́рние попали́.
О́бщим сою́зом любве́, ю́же и́мате ко Христу́,/ нам, ны́не почита́ющим вас любо́вию и моле́бную соверша́ющим па́мять ва́шу,/ Ангели́но преподо́бная, с пожи́вшими по Бо́зе с тобо́ю и с ча́ды,/ моли́теся вку́пе Творцу́ и Соде́телю своему́ прича́стником бы́ти сла́вы Его́.
Ангели́но преблаже́нная и до́брая, вели́кая сла́во ве́ры и жи́зни на́шея,/ и́стинный вене́ц и пра́ведный прия́ла еси́ от руки́ Законополо́жника Христа́.
Богоро́дичен: Зачала́ еси́ вои́стинну Бо́жие Сло́во во утро́бе Твое́й/ и Сего́ па́че естества́, Всенепоро́чная, родила́ еси́./ Его́же моли́твами умоли́ о и́же вои́стинну Богоро́дицу воспева́ющих Тя.
Конда́к, глас 8.
Подо́бен: Взбра́нной Воево́де:
Вы́шняго живота́ жела́ющи сподо́битися,/ ни́жнюю пи́щу тща́тельно оста́вила еси́,/ и бога́тство твое́ расточи́ла еси́ ни́щим,/ и Небе́сное бога́тство прия́ла еси́,/ и по сме́рти нас освяща́еши,/ и чудеса́ твоя́, всехва́льная Ангели́но, источа́еши./ Те́мже твое́ успе́ние свято́е почита́ем, взыва́юще:/ ра́дуйся, ма́ти прехва́льная.
И́кос:
Свята́я благода́ть и сла́ва с Небесе́ посла́ся тебе́, Ангели́но преподо́бная,/ и́бо Небесе́ и земли́ Творе́ц, прославля́яй всех, и́же Того́ просла́вльших,/ наста́ви нас на ра́зум, е́же взыва́ти сия́:/ ра́дуйся, покая́ния наста́внице;/ ра́дуйся, сла́во и́ночествующих./ Ра́дуйся, преподо́бных единонра́вное стоя́ние;/ ра́дуйся, я́ко со А́нгелы лику́еши невеще́ственными./ Ра́дуйся, я́ко наставля́еши су́щих во и́ночестве до́бре;/ ра́дуйся, я́ко ты отгна́ла еси́ ополче́ние враго́в./ Ра́дуйся, я́ко храни́ши твою́ оби́тель;/ ра́дуйся, я́ко сла́виши почита́ющих тя ве́рою./ Ра́дуйся, честны́х де́спот сла́во;/ ра́дуйся, я́ко ве́рных Го́сподеви приво́диши./ Ра́дуйся, я́ко све́тло Го́сподеви предстои́ши, Созда́телю;/ ра́дуйся, я́ко про́сиши спасе́ние ми́ру./ Ра́дуйся, ма́ти прехва́льная.
Песнь 7
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.
В вы́шнем гра́де Небе́снаго Ца́рствия сподо́билася еси́, Ангели́но, жи́ти/ и бе́сы отго́ниши от челове́к, взыва́ющих всегда́:/ оте́ц на́ших Бо́же, благослове́н еси́.
Чуде́с лучи́ испуща́еши, и отъе́млеши неду́гующим боле́зни,/ и здра́вие о Бо́зе подава́еши,/ от ковче́га моще́й твои́х благода́ть источа́ющи вопию́щим:/ оте́ц на́ших Бо́же, благослове́н еси́.
Кре́пость тебе́ от Бо́га дарова́ся/ исцеле́ние неду́гующим от духо́в нечи́стых подава́ти и прогони́ти ду́хи лука́выя,/ Бо́жиим бо ополче́нием вооружи́вшися, побе́ду на них воздви́гла еси́/ и те́мнаго кня́зя попра́ла еси́, помога́ющи вопию́щим:/ оте́ц на́ших Бо́же, благослове́н еси́.
В Вы́шнее вошла́ еси́ черто́жное весе́лие Царя́ Христа́,/ во оде́жду оде́яна, досто́йную Зва́вшему о́наго бра́ка,/ в не́мже возлежи́ши, зову́щи:/ оте́ц на́ших Бо́же, благослове́н еси́.
Богоро́дичен: Па́че естества́ и сло́ва Влады́ку всех понесла́ еси́/ и пита́ла еси́ от сосе́ц Твои́х,/ И́же всем благовре́менную гото́вяща трапе́зу,/ отце́в Бо́га препросла́вленнаго.
Песнь 8
Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Очи́стила еси́ пото́ком слез твои́х страстна́я стремле́ния,/ и неодержи́мыя по́мыслы затвори́ла еси́,/ и пучи́на была́ еси́ долготерпе́ния, Ангели́но преподо́бная,/ к покая́нию водя́щи боголе́пно взыва́ющия:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Воздержа́нием, преподо́бная Ангели́но, и удруче́нии/ теле́сныя стра́сти порабо́тила еси́ ду́ху, испо́лнивши душе́вное де́йство,/ и к безстра́стия стезя́м дости́гла еси́, зову́щи:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Я́ко от исто́чника неисчерпа́емаго и в чудесе́х вели́ка,/ твоя́ исцеле́ния благоприбы́тно почерпа́ем, и любо́вию мо́лим тя, и от души́ взыва́ем:/ изба́ви от страсте́й приключа́ющихся, преподо́бная, нас, взыва́ющих:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Зако́ну Боже́ственному повину́ющися,/ бога́тство твое́ расточи́, даде́ убо́гим,/ и пра́вда твоя́ пребыва́ет во ве́ки,/ зако́нным бо сном усну́ла еси́ и по сме́рти нас освяща́еши и обстоя́щих ра́ку моще́й твои́х,/ я́коже дре́вле свяще́нницы Изра́илевы киво́т заве́та Госпо́дня.
Богоро́дичен: Под кров, Влады́чице, крил Твои́х, озло́бленнии, прибега́ем вси,/ бед и озлобле́ний, скорбе́й и искуше́ний избавля́емся,/ Тебе́ бо Предста́тельницу стяжа́вше, Го́сподеви зове́м:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Песнь 9
Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют.
Исто́чник тя чуде́с я́ко вои́стинну Христо́с показа́, пресла́вная,/ страсте́й нечистоты́ и труды́ загражда́ющи и боле́зненныя скве́рны очища́ющи, прему́драя Ангели́но,/ те́мже тя ре́ку, душа́м очисти́тельну, нарица́ем вси, преподо́бная.
Процвето́ша труди́ воздержа́ния твоего́, блаже́нная,/ я́ко фи́никс, духо́вне в дому́ Госпо́дни плодонося́ще,/ и я́коже сла́дости, в ни́хже ду́ши, преподо́бная, услажда́еши ста́да твоего́ слове́снаго,/ те́мже тя и венцы́ сла́вы о́ныя Христо́с укра́си.
Соверши́ла еси́ тече́ние, Ангели́но, и ве́ру соблюла́ еси́ ду́хом,/ сугу́би же ны́не венцы́ исплето́шася тебе́ вои́стинну;/ и́хже благочести́вно прия́ла еси́ с пожи́вши́ми по Бо́зе зако́нно/ и в Вы́шнем поко́и наслажда́ешися со а́нгельскими ли́ки.
Па́мять твою́, преподо́бная Ангели́но, соверша́юще, мо́лимся/ вся́каго треволне́ния изба́витися свяще́нному ва́шему ста́ду;/ моли́ся у́бо ку́пно со свяще́нными твои́ми ча́ды хода́тайством дерзнове́ния ва́шего,/ е́же прия́ли есте́ от Бо́га.
Богоро́дичен: Тя ору́жие в беда́х и искуше́ниих,/ и приста́нище и сте́ну в печа́лех и́мамы, смире́ннии,/ и вели́кое очище́ние в лю́тых согреше́ниих, находя́щих на ны;/ те́мже Тя, Богоро́дице, я́ко всех спасе́ние, достодо́лжно велича́ем.
Свети́лен.
Подо́бен: Жены́, услы́шите:
Вы́шняго Иерусали́ма жела́ющи,/ вся умо́м изступи́вши к Небе́сным,/ и бога́тство твое́ расточи́ла еси́ ни́щим, Христу́ после́дствующи./ Те́мже Го́рняго Сио́на красоты́ наслажда́ешися,/ отону́дуже и нас назира́еши при́сно.
Сла́ва.
Подо́бен: Апо́столи от коне́ц:
Ангели́ну святу́ю в пе́снех восхва́лим любо́вию,/ я́ко низложи́ по́стничеством злоде́йствия вра́жия/ и, сла́ву свы́ше прие́мши, спаса́ет, и́же ту́ю чту́щия ве́рно.
И ны́не, Богоро́дичен:
Светови́днейшая Отрокови́це и златоза́рный све́щниче,/ кади́льнице Боже́ственная, Благослове́нная Мари́е,/ изба́ви от бед, Деви́це, восхваля́ющих Тя ве́рно.
На хвали́тех стихи́ры на 4, глас 1.
Подо́бен: Небе́сных чино́в:
Днесь А́нгелов ликостоя́ния на Небеси́/ и челове́ков совокупле́ния на земли́/ в па́мяти твое́й, ма́ти, све́тло торжеству́ют,/ они бо иму́ще тя слико́вственницу,/ мы же к Бо́гу хода́таицу моли́твенну./ Те́мже не преста́й моли́тися/ о и́же ко святе́й ра́це твое́й приходя́щих ве́рою несумне́нною.
Благода́ть моще́й твои́х ковче́г,/ чудеса́ источа́ет оби́льно приходя́щим,/ и прого́нит бе́сы Христо́вою благода́тию,/ и всем ве́рным здра́вие о Бо́зе подава́ет,/ Ангели́но пребога́тая./ Те́мже тя, су́щии зде в разли́чных боле́знех,/ я́ко целе́бницу ны́не ве́рою обре́тше,/ мо́лим твои́ми моли́твами изба́витися.
В же́нстем естестве́ му́жески пожи́вшую,/ восхва́лим Ангели́ну достоблаже́нну./ Сия́ бо, во всей жи́зни свое́й впери́вшися умы́ мы́сленными/ и нетле́нными ко Христу́ наде́ждами,/ си́ми состреля́ ро́да на́шего ра́тника/ и благода́ть прия́т исцеле́ний,/ я́ко иму́щи к Нему́ дерзнове́ние.
Прииди́те вси, празднолю́бцы,/ днесь преподо́бную ма́терь с му́ченики почти́м;/ о́ни бо к колесе́м желе́зным и ногте́м,/ к сим воде́ и огню́, звере́м и мучи́телем/ по Христе́ Спа́се подвиза́шася,/ сия́ же, во пло́ти брань творя́щи,/ себе́ порабо́ти Христу́,/ бы́вши Свята́го Ду́ха жили́ще.
Сла́ва, глас 8:
Возсия́ пра́здник а́нгельскаго торжества́/ и вои́стинну пра́здник спасе́ния,/ Ангели́ны, преблаже́нныя ма́тере, подвиго́в воспомина́ния./ Те́мже, о преподо́бная,/ твоего́ жития́ рачи́телие, соше́дшеся,/ твоя́ похваля́ют по́двиги,/ поревнова́ла бо еси́ терпе́нию,/ не поми́ловавши ю́ность, тле́ния хода́тайственну,/ ниже́ красоту́ пло́ти, по ма́ле гро́бу предае́му;/ но, ко Влады́це всем умо́м восте́кши,/ Того́ от ви́димых Жениха́ стяжа́ла еси́ сладча́йша/ и с му́дрыми де́вами ны́не предстои́ши Ему́,/ проси́ нам от Него́ ве́лию ми́лость.
И ны́не, Богоро́дичен:
Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.
Славосло́вие вели́кое. И отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Апо́стол к Гала́том, зача́ло 208. Аллилу́ия: Ч естна́ пред Го́сподем смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 104. Прича́стен: В па́мять ве́чную:
