Служба в честь преподобныя Анастасии, матере святителя Саввы, перваго архиепископа и учителя Сербскаго
НА МА́ЛОЙ ВЕЧЕ́РНИ
На Го́споди, воззва́х: стихи́ры, глас 1:
Богому́дренно на земли́ пожи́вши,/ Боже́ственным раче́нием распала́ема,/ родила́ еси́ свети́льника и забра́ло ро́ду се́рбскому,/ я́ко втора́го Крести́теля,/ го́ры же Афо́на кра́сное воспита́ние.
Из утро́бы твоея́ прече́стен плод/ Влады́це Христу́ принесла́ еси́,/ же́ртву благоприя́тну и присноживо́тну,/ и́же бы́сть ве́рным стена́ и утвержде́ние.
Му́дрыми словесы́ и те́плою любо́вию/ сы́на своего́ Ра́стка зако́ну Христо́ву научи́ла еси́,/ я́ко подоба́ет па́че всех Христа́ люби́ти/ и любо́вию Ему́ служи́ти./ Он же, послу́шав сове́ты твоя́,/ до конца́ вся испо́лни.
Па́мять твою́ чту́ще,/ Богому́драя ма́ти Анастаси́е,/ духо́вно весели́мся,/ ты бо вы́ну мо́лишися ко Христу́,/ со Симео́ном преподо́бным и Са́ввою преосвяще́нным,/ изба́витися нам от бед и печа́ли.
Сла́ва, глас 2:
Егда́ во благослове́ннем бра́це,/ по рожде́нии же мно́гих сыно́в и дще́рей,/ заключи́ся утроба́ твоя́,/ ты, вку́пе с супру́гом твои́м,/ со слеза́ми взыва́ла еси́ к Бо́гу,/ о е́же дарова́ти вам еще́ ча́до му́жескаго по́ла,/ е́же бу́дет вам уте́ха и жезл в ста́рости./ Госпо́дь же Благи́й услы́ша моли́тву ва́шу/ и благослови́ вас рожде́нием сы́на,/ и́же бы́сть свети́ло ро́ду се́рбскому.
И ны́не, Богоро́дичен, глас то́йже:
Не умолчи́м никогда́, Богоро́дице,/ псалмы́ и пе́сньми воспева́ти вели́чия Твоя́:/ Бо́га бо, вои́стинну воплоти́вшагося, родила́ еси́/ во всеми́рное спасе́ние и избавле́ние.
На стихо́вне стихи́ры, глас 1:
Хвале́ний вся́ких досто́йна еси́,/ преподо́бная ма́ти Анастаси́е,/ в за́поведех Госпо́дних ходи́вшая,/ Бо́жиею ми́лостию подвиза́ема.
Стих: Блаже́ни вси, боя́щиися Го́спода,/ ходя́щии в путе́х Его́.
Чи́стую любо́вь к Бо́гу име́ла еси́,/ нелицеме́рную любо́вь ко всем показа́ла еси́,/ тем, торжеству́юще, ублажа́ем тя.
Стих: Умно́жил еси́ на мне вели́чествие Твое́/ и, обра́щся, уте́шил мя еси́.
Уже́ заключе́нней утро́бе твое́й,/ плод чре́ва дарова́ся тебе́ от Всеще́драго Бо́га,/ сего́ ра́ди тя ублажа́юще,/ всеси́льную ми́лость Бо́жию велича́ем.
Сла́ва, глас то́йже, самогла́сен:
Неизрече́нное человеколю́бие Свое́,/ е́же Всеблаги́й Бог к земноро́дным и́мать,/ на тебе́, Анастаси́е, показа́,/ я́ко пра́ведну ти бы́ти со Симео́ном/ по ве́лией бла́гости Свое́й изво́ли,/ и, моли́тву ва́шу услы́шав,/ дарова́ вам ча́до,/ и́же бы́сть вели́кое свети́ло ро́да се́рбскаго.
И ны́не, Богоро́дичен, глас то́йже:
Ра́дости вся испо́лнила еси́,/ Вы́шняя и ни́жняя Ты совокупи́ла еси́, Богоро́дице./ Те́мже ра́достно и согла́сно ны́не/ Не́бо и вся земля́ воспева́ет Тя.
Тропа́рь пи́сан на вели́цей вече́рни. Сла́ва, и ны́не, Богоро́дичен.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8, глас 6, самогла́сны:
Ты на́ша похвала́ еси́,/ Богому́драя ма́ти Анастаси́е,/ родила́ бо еси́ просвети́теля ро́да се́рбскаго,/ науче́нная му́дростию свы́ше,/ воспита́ла еси́ кро́тостию и смире́нием,/ Христа́ пе́ти и сла́вити.
Почита́юще кро́тость и смире́ние твое́,/ воспева́ем дне́сь Благоде́теля всех Бо́га,/ присносла́вная ма́ти Анастаси́е,/ просла́вльшаго тя и в пи́щи ра́йстей вогнезди́вшаго тя,/ Его́же моли́ вы́ну/ спасти́ и просвети́ти ду́ши на́ша.
Све́тлость Ду́ха Свята́го в се́рдцы нося́щи,/ ча́до све́та родила́ еси́,/ род же се́рбский обогати́ла еси́,/ и ны́не на Небесе́х во святы́х лику́еши,/ не забу́ди и нас,/ но моли́ся вы́ну ко Го́споду/ дарова́ти отпуще́ние грехо́в всем нам,/ при́сно тя прославля́ющим.
Похва́льныя пе́сни,/ а́ки ца́рский вене́ц,/ богому́дрей главе́ твое́й прино́сим,/ достосла́вная ма́ти Анастаси́е,/ и́бо Христо́с тя нетле́нием венча́/ и Ца́рствия Небе́снаго сподо́би,/ те́мже вопие́м ти:/ моли́ся за ста́до твое́ Бо́гу,/ изба́витися от вся́каго зла/ и Бо́жия сла́вы улучи́ти.
И́ны стихи́ры, глас 8:
Преста́вилася еси́, Анастаси́е,/ к жи́зни вои́стинну нетле́нней/ и ны́не с ли́ки пра́ведных совокупля́ешися,/ и́бо и́стиннаго просвети́теля ро́да се́рбскаго родила́ еси́,/ те́мже твое́ преставле́ние соверша́ем/ и, почита́юще, ве́рно вопие́м ти:/ не забу́ди нас, ве́рныя рабы́ твоя́,/ но при́сно моли́ся о душа́х на́ших.
Дне́сь све́тло пра́зднуем честно́е успе́ние твое́,/ почита́юще тя всеблагогове́йно,/ достохва́льная ма́ти Анастаси́е,/ из тебе́ бо произы́де велича́йший учи́тель Богове́дения,/ разоря́яй мрак неве́дения./ Моли́ о нас, ма́ти преподо́бная,/ и испроси́ душа́м на́шим мир и единомы́слие/ и всем ве́рным ве́лию ми́лость.
Преподо́бно и пра́ведно пожи́вши,/ к присножи́зненней жи́зни дне́сь преста́вилася еси́,/ ра́дости неизглаго́ланныя наслажда́ющися/ и Све́та невече́рняго,/ и ны́не в ли́це пра́ведных водворя́ешися/ и мо́лишися о душа́х на́ших.
Ду́шу свою́ с те́лом/ к Небе́сней впери́ла еси́ высоте́,/ му́дрым же де́вам единожи́тельница была́ еси́,/ преподо́бная ма́ти Анастаси́е,/ притека́ющим к Бо́гу яви́лася еси́ Боже́ственное изображе́ние/ и ны́не на Небеси́ лику́еши,/ те́мже светоно́сную па́мять твою́ соверша́юще,/ Боже́ственными пе́сньми восхваля́ем тя.
Сла́ва, глас 6:
Ты похвала́ на́ша еси́ и вели́чие,/ и́бо из утро́бы твоея́,/ прече́стен плод Влады́це прине́сши,/ ро́ду твоему́ свети́льника всеми́рнаго дарова́ла еси́,/ последи́ же себе́ саму́, я́ко же́ртву соверше́нну,/ воздержа́ния огне́м Бо́гу принесла́ еси́/ и а́нгельское житие́ боже́ственне пожила́ еси́,/ те́мже па́мять твою́ хва́лим и велича́ем.
И ны́не, Богоро́дичен: Кто Тебе́ не ублажи́т:
Вход. Проки́мен дне и чте́ния три преподо́бническая.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очеса́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же суть в ми́ре./ Ибо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (главы 5 и 6):
Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́,/ внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
На лити́и стихи́ра хра́ма и преподо́бныя, глас 4, самогла́сны:
Вожделе́вши от души́ Христу́ послужи́ти,/ украси́ла еси́ себе́ саму́ смире́нием и чистото́ю,/ любо́вь же тле́нных и жела́ния отри́нула еси́,/ житие́ свое́ све́тлостию дел просвети́ла еси́,/ те́мже и све́тлость святы́х узре́ла еси́,/ сего́ ра́ди и мы хва́лим тя,/ Анастаси́е Богоблаже́нная.
Посто́м, слеза́ми и ве́рою моля́щися,/ вку́пе со супру́гом свои́м преблаже́нным Симео́ном/ испроси́ли есте́ отроча́,/ с ни́мже ны́не моли́теся/ спасти́ся от бед всем, любо́вию чту́щим вас.
А́нгельския си́лы дивя́тся/ смире́нию и му́дрости твое́й, блаже́нная,/ род же се́рбский пое́т и благослови́т вся́ческих Творца́,/ благослови́вшаго и просла́вльшаго тя,/ преподо́бная ма́ти Анастаси́е.
Сла́ва, глас 5:
Житие́ свое́ доброде́телию упра́вила еси́,/ ма́ти преподо́бная,/ смире́нием и кро́тостию богому́жно пожи́вши,/ родила́ еси́ свети́льника ве́рным,/ ро́ду се́рбскому втора́го Крести́теля,/ Афо́нстей пусты́ни кра́сное воспита́ние,/ последи́ же, вне́млющи гла́су его́,/ себе́ саму́ Христу́ Бо́гу принесла́ еси́,/ я́ко же́ртву благоприя́тну,/ сего́ ра́ди Всеще́дрый Бог,/ ве́дый твое́ се́рдце и смире́ние,/ увязе́ тя венце́м благоле́пия.
И ны́не, Богоро́дичен, глас то́йже:
Прииди́те в чистоте́, челове́цы,/ прииди́те, лик соста́вим/ и воскли́кнем Преблагослове́нней:/ Ты еси́ упова́ние на́ше и Помо́щница по Бо́зе,/ на Тя наде́жду спасе́ния на́шего возлага́ем вси,/ Тебе́ мо́лимся, я́ко Бо́жий Ма́тери:/ озари́ сердца́ на́ша/ и одожди́ нам, гре́шным рабо́м Твои́м,/ бога́тыя Твоя́ душеспаси́тельныя ми́лости.
На стихо́вне стихи́ры, глас 2, самогла́сны:
Поработи́вшися Христу́ от души́,/ чистото́ю, я́ко со́лнце, просия́ла еси́,/ житие́м же свои́м, е́же в ми́ре сем,/ благоче́стия о́браз была́ еси́ всем,/ сего́ ра́ди многокра́тное воздая́ние от руку́ Вседержи́теля прия́ла еси́,/ Богоблаже́нная Анастаси́е,/ те́мже тя вси ублажа́ем.
Стих: Блаже́ни вси, боя́щиися Го́спода,/ ходя́щии в путе́х Его́.
Пресла́вная па́мять твоя́, Богому́драя Анастаси́е,/ озаря́ет всю страну́ Се́рбскую/ и вся ве́рныя просвеща́ет, благоче́стно почита́ющия тя/ и ве́рою и любо́вию воспева́ющия тя.
Стих: Умно́жил еси́ на Мне вели́чествие Твое́/ и, обра́щся, уте́шил Мя еси́.
Восприи́мши ле́гкое и́го Христо́во,/ Боже́ственным же стра́хом составля́ема,/ чистоты́ и целому́дрия вина́ была́ еси́,/ и преде́л воздержа́ния,/ и любве́ о́браз, Анастаси́е.
Сла́ва, глас то́йже:
Прииди́те, лю́дие, лик соста́вим/ и стеце́мся ве́рно вси,/ возвели́чим честну́ю па́мять ма́тере се́рбстей/ и наста́вницы на́шей Анастаси́и,/ сия́ бо от ю́ности возлюби́ возлю́бльшаго ю Христа́,/ к Нему́же и взы́де, ра́дуяся,/ со супру́гом Симео́ном,/ тем и мы любе́зно пра́зднуем, взыва́юще ей:/ моли́ся о нас ко Го́споду,/ умири́ти мир и спасти́ ду́ши на́ша.
И ны́не, Богоро́дичен, глас то́йже:
Богороди́тельнице Чи́стая,/ Щедролюби́ваго Бо́гa пло́тию ро́ждшая,/ мольбы́ раб Твои́х не пре́зри,/ но моли́твами Твои́ми спаси́ нас/ от вся́ких бед и скорбе́й.
На благослове́нии хле́бов тропа́рь святы́я, два́жды, и Богоро́дице, Де́во: еди́ножды.
Тропа́рь святы́я, глас 4:
Доброде́тельми бога́тая,/ кро́тостию и благоче́стием укра́шенная,/ возсия́ла еси́ чистото́ю жития́ твоего́,/ сего́ ра́ди Благи́й Бог благослови́ тя/ бы́ти ма́терию свети́льника ро́да се́рбскаго,/ те́мже вопие́м ти:/ ра́дуйся, преподо́бная ма́ти Анастаси́е.
НА У́ТРЕНИ
На Бог Господь: тропа́рь святы́я, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 4:
Не́бо иногда́ ма́нною обременив, Бог/ о́ную лю́дем в пусты́ни низпусти́;/ та́ко от блаже́нныя Анастаси́и Са́вву нам просвети́теля дарова́,/ те́мже, благодаря́ще, взыва́ем:/ ве́лия Твоя́ ми́лость к нам, Бо́же наш Всеще́дрый.
Сла́ва, и ны́не, Богоро́дичен, глас то́йже:
Ты Бо́га еди́на родила́ еси́, Де́во, пресла́вно,/Ты естество́ обнови́ла еси́ рождество́м Твои́м,/ Ты Е́ву разреши́ла еси́ перворо́дныя кля́твы,/ те́мже, благодаря́ще, взыва́ем:/ ве́лия Твоя́ ми́лость к челове́ком, Богоро́дице Всепе́тая.
По 2-м стихосло́вии седа́лен, глас 3:
В Бо́жиих селе́ниих процвета́юще с преблаже́нным Симео́ном,/ подвиза́ема руко́ю Бо́жиею, достосла́вная Анастаси́е,/ моли́ Преблага́го Влады́ку, да и мы, гре́шнии, прино́сим добр плод живы́я ве́ры.
По полиеле́и седа́лен, глас 8:
Яви́лася еси́ в Се́рбии но́вая учени́ца Христо́ва,/ житие́м уча́щи вся Еди́ному Бо́гу покланя́тися, Богоблаже́нная Анастаси́е,/ и ны́не моли́ся Христу́ за ча́да твоя́/ и испроси́ всем отпуще́ние грехо́в, при́сно тя прославля́ющим.
Сла́ва, и ны́не, Богоро́дичен, глас то́йже:
Ве́дуще Тя Ма́терь и Де́ву, Пресвята́я,/ согла́сно почита́ем и благоче́стно вопие́м Ти:/ ра́дуйся, Благослове́нная Богоро́дице, упова́ние душ на́ших.
Степе́нна, 1-й антифо́н 4-го гла́са. Проки́мен, глас 4: Сохрани́ душа́ моя́ свиде́ния Твоя́/ и возлюби́ я зело́. Стих: Сохрани́х за́поведи Твоя́ и свиде́ния Твоя́, я́ко вси путие́ мои́ пред Тобо́ю, Го́споди. Вся́кое дыха́ние: Ева́нгелие от Матфе́я, зача́ло 104.
По 50-м псалме́ стихи́ра, глас 6:
Недоумева́ем, ка́ко тя нарече́м,/ преподо́бная ма́ти?/ Лива́нскую ли го́ру,/ роса́ бо Небе́сная сни́де на тя,/ реку́ ли Фисо́н,/ добре́йший сапфи́р, ка́мень честны́й,/ Са́вву иму́щую, и́мже просвети́ся вся земля́ Се́рбская./ Но моли́ся Христу́ Бо́гу/ со Симео́ном преподо́бным и Са́ввою преосвяще́нным/ от вся́каго озлобле́ния изба́витися/ всему́ правосла́вному ро́ду се́рбскому.
Кано́н Богоро́дицы со ирмосо́м на 6 и преподо́бныя на 8, глас 5, его́же краегране́сие: Ма́терь Анастаси́ю любо́вию пою́.
Песнь 1
Ирмо́с: Христо́с яви́ся на земли́,/ изба́вивый род наш от идолонеи́стовства,/ Тому́ Еди́ному пои́м,/ я́ко просла́вися.
Мо́лниями Ду́ха осия́емая,/ те́мныя о́блаки души́ моея́ разреши́,/ ум же мой озари́/ и устне́ к пе́нию тебе́ хвали́ти отве́рзи.
А́нгела ро́ду се́рбскому родила́ еси́,/ и́бо и́стинную любо́вь к Бо́гу име́ла еси́, благолюби́вая Анастаси́е,/ те́мже и ублажа́ем тя с любо́вию.
Той и́стинно лю́бит Бо́га, и́же за́поведи Его́ соблюда́ет;/ ты же се испо́лнила еси́,/ сего́ ра́ди Боголюби́вую тя хва́лим и велича́ем.
Богоро́дичен: Предста́тельство и покро́в жи́зни моея́ бу́ди ми, Богороди́тельнице Чи́стая,/ вся бо мо́жеши, я́ко си́льнаго в кре́пости Христа́ ро́ждши, Богоблаже́нная.
Песнь 3
Ирмо́с: Утверди́ ны, Бо́же,/ Твое́ю си́лою,/ и низложи́ ерети́ческая шата́ния,/ и вознеси́ рог наш.
Егда́ заключи́ся утро́ба твоя́, я́коже иногда́ Ли́и,/ возскорбе́ла еси́ и к Бо́гу взыва́ла еси́,/ прося́щи еще́ ча́до му́жескаго по́ла.
Ро́ждшееся от Тебе́ ве́лию сла́ву принесе́ тебе́,/ преподо́бная ма́ти Анастаси́е,/ сего́ ра́ди сла́вим тя и велича́ем.
А́ще и жена́ Симео́нова была́ еси́,/ но во всех за́поведех без поро́ка ходи́ла еси́,/ те́мже и уподо́билася еси́ му́дрым де́вам.
Богоро́дичен: Ро́ждши Благоде́теля всех, до́брых Вино́внаго,/ прегреше́ний мои́х мглу разреши́/ и здра́вие моли́твами Твои́ми пода́ждь ми.
Седа́лен, глас 4:
О́браз была́ еси́ смире́ния, чистоты́ и целому́дрия вина́,/ украша́ема му́дростию и смире́нием,/ ра́зумом и разсужде́нием и ине́ми кра́сными дарова́нии,/ те́мже мо́лим тя:/ моли́ Христа́ Бо́га, да украси́т и нас си́ми доброде́тельми.
Сла́ва, и ны́не, Богоро́дичен, глас то́йже:
Твое́ пое́м благоутро́бие, Всенепоро́чная,/ Тобо́ю бо позна́хом неопи́санное Сло́во Бо́жие,/ Единоро́днаго Сы́на Вседержи́телева,/ и вопие́м Ти, Чи́стая:/ ра́дуйся, Благослове́нная Богоро́дице, упова́ние душ на́ших.
Песнь 4
Ирмо́с: Услы́шах, Го́споди,/ слух Твой и убоя́хся,/ разуме́х смотре́ние Твое́/ и просла́вих Тя, Еди́не Человеколю́бче.
Науче́на Бо́гом,/ ты была́ еси́ лу́чшая учи́тельница сы́ну твоему́,/ и́же, науче́н тобо́ю, бы́сть и́стинный учи́тель ро́да своего́.
Анастаси́е преподо́бная, моли́ Христа́ Бо́га на́шего,/ да вси, наде́ющиися На́нь, полу́чим живо́т ве́чный.
Сра́дуются дне́сь нам вся преподо́бныя и пра́ведныя,/ де́вы же и же́ны до́блествовавшия,/ воспева́юще с на́ми честно́е твое́ преставле́ние.
Богоро́дичен: А́нгельстии чи́ни пою́т Тя непреста́нно, Богоро́дице Де́во,/ ро́ждшую без отца́ Собезнача́льное Сло́во О́тчее,/ о чу́до! осене́нием Свята́го Ду́ха.
Песнь 5
Ирмо́с: Све́те И́стинный,/ Христе́ Бо́же,/ к Тебе́ у́тренюет дух мой от но́щи,/ яви́ на мя лице́ Твое́.
Ты Бо́гом возлю́блена еси́, ма́ти Анастаси́е,/ Его́же моли́ о нас:/ да и мы возлю́бим Бо́га и возлю́блены бу́дем от Него́.
А́гница Христо́ва житие́м была́ еси́,/ кро́тостию и смире́нием ду́шу твою́ украси́вши,/ те́мже тя Христо́с в нетле́нныя черто́ги прия́т.
Саму́ю себе́ устро́ивши,/ я́ко чи́стое зерца́ло Боже́ственных разуме́ний,/ проявля́ла еси́ благонра́вие, кро́тость и смире́ние.
Богоро́дичен: Милосе́рдия Твоего́ бе́здну пода́ждь ми призыва́ющу,/ я́же Благосе́рдаго ро́ждши,/ и спаси́ всех, пою́щих Тя.
Песнь 6
Ирмо́с: От ки́та проро́ка изба́вил еси́,/ мене́ же из глубины́ грехо́в/ возведи́, Го́споди,/ и спаси́ мя.
Иису́с Человеколю́бец, ви́дя твое́ благослове́нное души́ мудрова́ние,/ венце́м сла́вы увязе́ тя.
Юне́йший сын твой, любо́вию твое́ю води́мый,/ Влады́чнею же си́лою утвержда́емь,/ прия́телище Трисо́лнечнаго све́та показа́ся.
Лю́дие, ве́дяще тя в за́поведех Госпо́дних ходи́вшую/ и благода́тию Его́ оправда́нную, достоблаже́нная Анастаси́е,/ досто́йно сла́вят па́мять твою́.
Богоро́дичен: Из чре́ва Твоего́, Чи́стая, про́йде Плотоно́сец,/ обле́кся, Всенепоро́чный, кроме́ греха́ во всего́ челове́ка,/ Его́же моли́ ве́рою Тя чту́щия спасти́.
Конда́к, глас 4:
Во благослове́ннем бра́це пожи́вши,/ нескве́рно удержа́ла еси́ зако́нно целому́дрие,/ ча́да же твоя́ кро́тко учи́ла еси́/ па́че всех Христа́ люби́ти,/ Ему́же ны́не предстоя́щи и моля́щися,/ помяни́ и нас, вопию́щих ти:/ ра́дуйся, преподо́бная ма́ти Анастаси́е.
И́кос:
Егда́ утро́ба твоя́ заключи́ся, я́коже Ли́и иногда́,/ возскорбе́ли есте́ о́ба супру́га/ и, возжеле́вше еще́ еди́ное благослове́нное ча́до,/ в нощне́й моли́тве наедине́ со слеза́ми взыва́ли есте́ к Бо́гу си́це:/ Влады́ко, Бо́же Вседержи́телю,/ послу́шавый дре́вле Авраа́ма и Са́рру и про́чих пра́ведников, моли́вшихся Тебе́ о ча́дех,/ услы́ши и нас, гре́шных рабо́в Твои́х,/ да́руй нам по Твое́й бла́гости име́ти еще́ ча́до му́жескаго по́ла,/ е́же бу́дет нам уте́ха и жезл в ста́рости на́шей,/ и се ны́не полага́ем обе́т/ по детозача́тии сем отлучи́тися от бра́чнаго обще́ния/ и до конца́ жи́зни в чистоте́ теле́сней сохрани́тся./ Уви́дев Госпо́дь серде́ц ва́ших чистоту́/ и по моли́тве ва́шей дарова́ вам сы́на,/ его́же вы нареко́сте Ра́стко, во и́ноцех же Са́вва,/ и́же бы́сть пе́рвый просвети́тель ро́да се́рбскаго./ Те́мже вопие́м ти:/ ра́дуйся, преподо́бная ма́ти Анастаси́е.
Песнь 7
Ирмо́с: Благослове́н еси́, Бо́же,/ ви́дяй бе́здны/ и на Престо́ле сла́вы седя́й,/ препе́тый и пресла́вный.
Ю́ность свою́ чи́сту сын твой дарова́ Христу́,/ сле́дуя твои́м богому́дрым увеща́ниим,/ и нас научи́ пе́ти:/ благослове́н еси́, Бо́же, препе́тый и пресла́вный.
Благодари́ти Бо́га научи́ нас, Богому́драя ма́ти Анастаси́е,/ да вси со умиле́нием взыва́ем:/ благослове́н еси́, Бо́же, препе́тый и пресла́вный.
Ору́жием честна́го креста́ вооружи́вшися,/ оста́вила еси́ жития́ мяте́ж/ и молвы́ убежа́ла еси́, моли́твами и поще́нием,/ жела́нием упражня́ющися и пою́щи:/ благослове́н еси́, Бо́же, препе́тый и пресла́вный.
Богоро́дичен: Разуме́вше прозорли́выма очи́ма,/ проро́цы Тя я́ве провозве́стница,/ хотя́щу бы́ти Ма́терь Вседе́теля и всех Влады́ки,/ те́мже Тя, Всепе́тая, Богоро́дицу испове́дуем.
Песнь 8
Ирмо́с: Творца́ тва́ри,/ Его́же ужаса́ются А́нгели,/ по́йте, лю́дие,/ и превозноси́те во вся ве́ки.
Ве́рных мы́сли озаря́ет све́тлый де́нь пра́здника твоего́,/ и просвеща́ет всю зе́млю, и науча́ет пе́ти:/ Творца́ тва́ри по́йте и превозноси́те во вся ве́ки.
Иису́су Го́споду принесла́ еси́ же́ртву благоприя́тну,/ прозя́бшаго из ложе́сн твои́х свети́льника ве́рным, усе́рдно взыва́ющи:/ Творца́ тва́ри по́йте и превозноси́те во вся ве́ки.
Ю́же сла́ву приобрела́ еси́, Анастаси́е,/ моли́ и о нас улучи́ти ю, ве́рою вопию́щим с тобо́ю:/ Творца́ тва́ри по́йте и превозноси́те во вся ве́ки.
Богоро́дичен: Красе́н добро́тою па́че всех Плод чре́ва Твоего́, Богоро́дице Де́во,/ Ты бо родила́ еси́ Бо́га воплоще́нна,/ я́вльшася за е́же спасти́ челове́ка,/ те́мже Тя вси велича́ем.
Песнь 9
Ирмо́с: Тя, Блаже́нную в жена́х/ и Благослове́нную Бо́гом,/ челове́ческий род,/ пе́сньми велича́ем.
Прозябе́ние твое́ бы́сть нам столп о́гненный, честна́я ма́ти Анастаси́е,/ просвеща́я нас и очища́я от вся́каго те́мнаго неразу́мия,/ тем тя вси пе́сньми велича́ем.
Юне́йшаго сы́на глас послу́шавши,/ совлекла́ еси́ стра́стную ри́зу,/ в безстра́стную же оде́жду оде́ялася еси́/ и Жениху́ Христу́ чи́сто обручи́лася еси́./ Тем тя ве́сь се́рбский род пе́сньми велича́ет.
Богоро́дичен: О́блак Сло́ва Ты еси́, Всечи́стая,/ и свеща́ со́лнечная, колесни́ца многоце́нная,/ деви́ческое возвыше́ние, гора́ ту́чная и усыре́нная,/ Пресвята́я Де́во Господоимени́тая.
Свети́лен:
Све́том Христо́вым озаря́ема,/ свяще́нное отроча́ породила́ еси́,/ е́же бы́сть свети́льник ро́ду се́рбскому,/ с ни́мже при́сно моли́ о спасе́нии ро́да на́шего.
Сла́ва, и ны́не, Богоро́дичен:
Све́тлое проро́ческое сбытие́,/ апо́стольская похвало́, всего́ ми́ра вожделе́нная Помо́щнице,/ просвети́ нас, рабы́ Твоя́, Небе́сным сия́нием.
На хвали́тех стихи́ры на 4, глас 4:
Похва́льными пе́сньми па́мять твою́ прославля́ем дне́сь/ и хвалу́, а́ки ца́рский вене́ц,/ богому́дрей главе́ твое́й прино́сим,/ ю́же Христо́с благода́тию венча́,/ достосла́вная ма́ти Анастаси́е;/ те́мже мо́лим тя:/ моли́ся Христу́ Бо́гу за ста́до твое́ правосла́вное,/ о е́же изба́витися нам от вся́каго зла.
Прославля́юще ра́достно де́нь свята́го твоего́ преставле́ния,/ и хвале́бную пе́снь возсыла́юще Христу́ Бо́гу,/ нетле́нным венце́м венча́вшему тя, Анастаси́е Богому́драя,/ приле́жно мо́лим тя:/ проси́ нам оставле́ние грехо́в,/ сла́вящим тя ве́рно.
При́зри, Го́споди, на ны, недосто́йныя,/ и умилосе́рдися на гре́шныя лю́ди Твоя́,/ не преда́ждь нас до конца́ в ру́ки пога́ных/ за мно́жество беззако́ний на́ших,/ но моли́твами преподо́бныя ма́тере на́шея Анастаси́и/ изба́ви ны от вся́кия напа́сти.
О тебе́ ца́рь Соломо́н рече́ пре́жде:/ жена́ разу́мная благослове́на е́сть,/ страх же Госпо́день сия́ да хва́лит./ Ты же, преподо́бная, саме́ми де́лы сло́во испо́лнила еси́,/ страх Бо́жий и благоче́стие в до́ме свое́м/ и по всей Се́рбии утверди́ла еси́,/ творя́щи плод покая́ния,/ о не́мже Небеса́ веселя́тся и Христо́с ра́дуется.
Сла́ва, глас 8:
Му́дрости твое́й и смире́нию А́нгели удиви́шася,/ мы же, пою́ще вся́ческих Творца́,/ тя просла́вльшаго, мо́лим тя:/ бу́ди нам предгра́дие и стена́,/ чи́стою любо́вию тя чту́щим/ и святу́ю па́мять твою́ творя́щим, Богоблаже́нная,/ ве́рных помо́щнице.
И ны́не, Богоро́дичен, глас то́йже:
Рождество́м Твои́м, Богороди́тельнице Всепе́тая,/ возсия́ нам свет благода́ти,/ и всю подсо́лнечную просвети́,/ и предста́теля тьмы́ погуби́,/ А́нгелов похвало́ и всех челове́ков спасе́ние,/ Еди́на Предста́тельнице ве́рных.
НА ЛИТУРГИ́И
Блаже́нны, от кано́на преподо́бныя, пе́сни 3-я и 6-я. Проки́мен, глас 7: Сохрани́ душа́ моя́ свиде́ния Твоя́/ и возлюби́ я зело́. Стих: Сохрани́х за́поведи Твоя́ и свиде́ния Твоя́, я́ко вси путие́ мои́ пред Тобо́ю, Го́споди. Апо́стол к Гала́том, зача́ло 208. Аллилу́ия, глас 6: Наста́ви мя, Го́споди, на пу́ть Твой, и пойду́ вр и́стине Твое́й. Стих: Да возвесели́тся се́рдце мое́ боя́тися И́мене Твоего́. Ева́нгелие от Матфе́я, зача́ло 104. Прича́стен: Ра́дуйтеся, пра́веднии, о Го́споде, пра́вым подоба́ет похвала́.
