Служба в честь преподобных отец наших Фомы, иже в Малеи, и Акакия, иже в Лествице

ВЕ́ЧЕР

На Го́споди, воззва́х: стихи́ры, глас 1.

Подо́бен: Небе́сных чино́в:

Богосия́нна тя свети́льника, о́тче, позна́хом,/ мы́сленными заря́ми озаря́юща мир/ и тьму отгоня́ща/ лука́ваго де́монов смуще́ния./ Те́мже светоно́сную твою́ па́мять/ ве́рно пра́зднуем, блаже́нне.

Све́тел в житии́ дре́вле быв,/ бога́тством и си́лою,/ мона́шеским о́бразом, преподо́бне,/ оде́ялся еси́, о́тче Фомо́,/ нищете́ подо́бяся нас ра́ди Вопло́щшагося,/ те́мже мно́гими тя дарова́нии обогати́л есть.

Столпо́м о́гненным зри́тельно/ тя Бог наста́ви ко спасе́нию, о́тче,/ к ти́хому приста́нищу и к горе́ безстра́стия,/ во́ду же твое́ю моли́твою источи́л еси́/ и неви́дящим е́же ви́дети/ и хромы́м благотече́ние дарова́л еси́.

И́ны стихи́ры свята́го Ака́кия, глас 4.

Подо́бен: Я́ко до́бля:

Воздержа́нием му́дрость плотску́ю умертви́л еси́/ и ду́шу оживи́л еси́ посто́м/ и доброде́телей соверше́нием./ Отсю́дуже и яви́лся еси́, я́ко жив, по кончи́не вои́стинну:/ я́коже бо сон, вмени́ся тебе́ смерть,/ к Бо́гу преста́вльшуся/ и в ру́це ду́шу прело́жшу Ему́,/ Ака́кие сла́вне.

Страсте́й успи́л еси́ жела́ния, Ака́кие,/ бде́ние всено́щное я́ко стяжа́в,/ послуша́ние и смире́ние,/ поуче́ние же Боже́ственных писа́ний,/ и се́рдце чи́сто, и ум несмуще́н,/ те́мже был еси́ и прия́телище Ду́ха Свята́го,/ зари́ чуде́с возсия́в конце́м.

Мирска́го пристра́стия до конца́ возгнуша́вся,/ безстра́стия сосу́д был еси́,/ в любому́дрии же, сла́вне,/ де́тельным восхожде́нием возвы́сился еси́/ к самому́ жела́нию коне́чному/ и узре́л еси́ та́йным виде́нием/ неви́димых недомы́сленныя и Боже́ственныя добро́ты,/ Ака́кие всему́дре и блаже́нне.

Сла́ва, и ны́не, Богоро́дичен:

Я́же Бо́га Невмести́маго во чре́ве Твое́м вмести́вшая,/ человеколю́бно Челове́ка бы́вша,/ и на́ше смеше́ние из Тебе́ прии́мша,/ и обожи́вша я́ве,/ не пре́зри мене́, Всечи́стая, ны́не скорбя́ща,/ но уще́дри ско́ро/ и разли́чныя вражды́ же и вре́да лука́ваго свободи́.

Крестобогоро́дичен:

А́гнца и Па́стыря Тя на Дре́ве я́ко ви́де,/ А́гница ро́ждшая рыда́ше/ и ма́терски Ти веща́ше:/ Сы́не возжеле́нне,/ ка́ко на Дре́ве Кре́стнем пове́шен еси́, Долготерпели́ве?/ Ка́ко ру́це и но́зе Твои́, Сло́ве,/ пригвозди́шася от беззако́нных/ и кровь Твою́ излия́л еси́, Влады́ко?

Тропа́рь, глас 1:

Свети́ла богосия́нная ми́ру/ и и́ноков одушевле́нныя зари́,/ Фома́ чудесы́, Ака́кий же послуша́нием,/ возсия́сте све́тло;/ сих, я́ко иму́щих дерзнове́ние к Бо́гу,/ моли́твами во бра́нех посо́бствовати мо́лим,/ да про́сят от Христа́ Бо́га дарова́ти проще́ние согреше́ний/ чту́щим их святу́ю па́мять.

Ин тропа́рь, глас 4:

Бо́же оте́ц на́ших,/ творя́й при́сно с на́ми по Твое́й кро́тости,/ не отста́ви ми́лость Твою́ от нас,/ но моли́твами их/ в ми́ре упра́ви живо́т наш.

Кано́н преподо́бнаго Фомы́, глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Просвеще́ние Боже́ственныя благода́ти, сла́вне, в души́ прии́м,/ я́ко други́й Еги́пет, страсте́й мглу оста́вил еси́/ и житие́ прия́л еси́ Небе́сное.

Све́тел, о́тче, в житии́ быв,/ на иноплеме́нники воздви́гл еси́ неисче́тны побе́ды/ и, мона́шествовав преподо́бно, полки́ де́монов победи́л еси́.

Воздержа́тельно врагу́ спле́тся,/ посо́бием, преподо́бне, Боже́ственнаго Ду́ха/ смири́л еси́ сего́ и побе́ды с Небесе́ вене́ц прия́л еси́.

Богоро́дичен: Еди́на Бо́га, всех су́щаго невмести́ма,/ Тебе́ вме́стна бы́вша за бла́гость, породила́ еси́, Отрокови́це,/ Его́же моли́ спасти́ пою́щия Тя.

Ин кано́н преподо́бнаго Ака́кия, его́же краегране́сие: Ака́кия, изря́днаго послу́шника, пе́сньми пою́. Глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зными Моисе́овыма рука́ма/ Амали́кову си́лу в пусты́ни победи́л есть.

Незло́бным нра́вом обложи́вся,/ благообра́зную доброде́телей стяжа́л еси́ добро́ту,/ Христо́ву во́льному послуша́нию подо́бяся да́же до сме́рти, всеблаже́нне.

Зло́бы обрета́теля посрами́л еси́ беззло́бием твои́м,/ терпе́нием же, о́тче, искуше́ний того́ го́рдую и вознесе́нную вражду́/ к земли́, всеблаже́нне, смири́л еси́.

Воздержа́нием терпели́вным, преподо́бне, предъобуча́яся и страсте́й отсека́я нача́ла,/ безстра́стия оде́ждею украси́лся еси́ по́слежде,/ благода́тию Боже́ственною покрыва́емь.

Укре́пль душе́вное устрое́ние терпе́нием тве́рдым/ и до́блим, всеблаже́нне, по́мыслом,/ по вся дни терпе́в му́ченический по́двиг, и вене́чник показа́лся еси́.

Богоро́дичен: Кре́пость твори́тельная и пе́ние, Бог и Госпо́дь,/ И́же нас ра́ди из Тебе́ воплоще́йся и рожде́йся,/ проро́чески я́коже Иса́ия, Пречи́стая, благовести́.

Песнь 3

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя.

Твои́ми прекло́нься Бог мольба́ми, руко́ю тя проро́ка уз изба́ви/ и ше́ствовати благоизво́ли к боле́зненному труду́ воздержа́ния.

Жития́ го́рькое оста́вив треволне́ние,/ ко приста́нищу приступи́л еси́ воздержа́ния и тишине́ Боже́ственней, о́тче Фомо́,/ испо́лнився Ду́ха благода́тию.

Столпо́м Изра́иля иногда́ пусты́ню, всеблаже́нне, проходи́ти наста́вивый/ столпо́м тя о́гненным наставля́ше,/ прови́дяй души́ твоея́ благоро́дие.

Богоро́дичен: Злату́ю я́ко и́стинно кади́льницу, и ста́мну ма́нны, и Боже́ственную го́ру,/ и пала́ту красну́ Бо́жию Тя, Де́во, имену́ем.

Ин

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Всего́ тебе́ сама́го Творцу́ твоему́ и Бо́гу, преподо́бне, возложи́в,/ терпе́л еси́ томи́тельное уничиже́ние.

Зако́нно страда́льческое терпе́ние, возде́ржниче, показа́л еси́ на земли́,/ те́мже тебе́ Небе́сное весе́лие даде́ся.

Смире́ние и́стинно, долготерпе́ние опа́сно держа́л еси́,/ терпе́ние, воздержа́ние с послуша́нием, преблаже́нне.

Богоро́дичен: Всех Соде́тель зи́ждется, нас ра́ди, Пречи́стая, плоть прие́м одушевле́ну/ из Тебе́, Пресвята́я Богоневе́сто.

Конда́к Ака́кия, глас 2.

Подо́бен: Вы́шних ища́:

Мир оста́вль, Христу́ после́довал еси́ от младе́нства,/ прему́дре Ака́кие преподо́бне,/ Того́ подража́я во́льное смире́ние,/ низве́ргл еси́ го́рдостнаго мучи́теля,/ моли́ непреста́нно о всех нас.

Седа́лен, глас 4.

Подо́бен: Яви́лся еси́ днесь:

Яви́лся еси́, преподо́бне, благоугоди́в Боже́ственными дея́нии,/ и житие́м чи́стым насле́дия сподо́бился еси́ Безпло́тных,/ моли́ спасти́ся нам.

Сла́ва, Ака́кия, глас то́йже.

Подо́бен: Ско́ро предвари́:

Све́тлостию ве́ры и де́тельным све́том/ яви́лся еси́ равноа́нгелен на земли́ вои́стинну, Ака́кие всему́дре,/ показа́л еси́ му́жески кре́пкое ума́ твоего́,/ сокруши́л еси́ напа́дания страсте́й посто́м./ Те́мже и по кончи́не, я́ко жив, яви́лся еси́, непобеди́ме.

И ны́не, Богоро́дичен:

Обнови́ла еси́, Чи́стая, Боже́ственным Рождество́м Твои́м/ истле́вшее во страсте́х земноро́дных ме́ртвенное существо́/ и воздви́гла еси́ вся от сме́рти к животу́ нетле́ния./ Те́мже Тя по до́лгу блажи́м вси, Де́во Препросла́вленная,/ я́коже прорекла́ еси́.

Крестобогоро́дичен:

На Кресте́ Тя возвы́шена я́ко узре́ Пречи́стая Ма́ти Твоя́, Сло́ве Бо́жий,/ ма́терски рыда́ющи, веща́ше:/ что́ но́вое и стра́нное сие́ чу́до, Сы́не Мой?/ Ка́ко, Жизнь всех, вкуша́еши сме́рти,/ оживи́ти ме́ртвыя хотя́, я́ко Милосе́рд.

Песнь 4

Ирмо́с: Услы́шах, Го́споди,/ слух Твоего́ смотре́ния/ и просла́вих Тя,/ Еди́не Человеколю́бче.

Воздержа́ния поже́гл еси́ огне́м Боже́ственным те́рние грехо́вное/ и чуде́с заре́ю, о́тче, облиста́л еси́.

Души́ твоея́ о́чи от страстны́я ти́ны очи́стив,/ незря́щия зе́ницы, о́тче, отве́рзл еси́.

Сам отчужди́лся еси́ мирски́х мяте́жей, Богоно́се,/ и преми́рную тишину́ получи́л еси́.

Богоро́дичен: Неискусобра́чная Влады́чице, Яже Бо́га без се́мене заче́ншая,/ напа́стей и печа́лей всех изба́ви.

Ин

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Умертви́в, о́тче, му́дрость пло́ти твоея́, твою́ ду́шу оживил еси́/ и пра́вды вене́ц прия́л еси́, зовый, Ака́кие:/ сла́ва си́ле Твое́й, Го́споди.

По́двиги до́лги прие́мля,/ и́же по вся дни терпели́вное пока́зовал еси́ сопротивле́ние, о́тче./ Те́мже по сме́рти, я́ко жив, возопи́л еси́:/ сла́ва си́ле Твое́й, Го́споди.

Тве́рдым умо́м томле́ния за Христа́ претерпе́л еси́, Ака́кие блаже́нне,/ Сего́ помышля́я, на Кресте́ пригвожде́на за спасе́ние ро́да на́шего.

Богоро́дичен: Чисте́йши еси́ Небе́с и мы́сленных сил,/ я́ко сих Зижди́теля, Пречи́стая, ро́ждши./ Те́мже Ти зове́м:/ ра́дуйся, Богоро́дице Всепе́тая.

Песнь 5

Ирмо́с: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем.

Руководя́щаго тя к пусты́ням благоче́стно име́л еси́ Илию́, о́тче, Фесви́тянина,/ явля́ющася но́щию и тайноуча́ща Боже́ственным тя, преподо́бне.

Я́ко в други́й Карми́ль, в Мале́йскую го́ру, му́дре, всели́лся еси́,/ виде́ний Боже́ственных наслажда́яся/ и чудотворе́ний благода́ть пресла́вно, блаже́нне, прие́мля.

Простра́ннаго пути́ те́сный предпочита́я,/ дости́гл еси́ ра́достно широту́ рая́,/ и дре́ву жи́зненному, о́тче, невозбра́нно причаща́ешися, веселя́ся.

Богоро́дичен: Уязви́вшееся прило́ги вра́жиими, Чи́стая,/ я́ко ми́лостива, исцели́ се́рдце мое́,/ на Кресте́ пло́тию Пригвозди́вшагося неизрече́нно ро́ждшая.

Ин

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Ты, преподо́бне, я́звами му́жески ураня́емь/ и бие́нии по вся дни терпя́ кре́пко,/ преподо́бно почи́л еси́.

Тече́ние до́брое сконча́в, Ака́кие незло́бный,/ трудо́в свобо́дный и боле́зней восприя́л еси́ поко́й.

Ум твой, чи́стым по́мыслом окормля́емь, Ака́кие Богоно́се,/ к Вино́вному всех благополу́чно устреми́ся.

Богоро́дичен: Ни а́нгельский ум, ни челове́ч мо́жет рождества́ Твоего́ сказа́ти:/ превосхо́дит бо вся́ко постиже́ние ра́зума.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

В пусты́ни безво́дней всели́лся еси́/ и моли́тв одожде́нием твои́х, преподо́бне,/ во́ду всебога́тну Влады́ку источи́ти умоли́л еси́.

Я́коже Авраа́м дре́вле пра́ведный, во и́ну страну́ себе́ удали́л еси́,/ и Бо́гу прибли́жился, и в зе́млю кро́тких всели́лся еси́.

Мона́х и́стинен был еси́/ и по погребе́нии исцеле́ний дарова́ния, о́тче Фомо́,/ тре́бующим источа́еши си́лою духо́вною.

Богоро́дичен: Во́лею вся Соде́лавый, в ложесна́, восхоте́в, Неискусобра́чныя всели́ся,/ тле́нием неду́говавшия нетле́нием почести́ хотя́,/ я́ко Благосе́рд.

Ин

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Усну́л еси́ блаже́нным сном, блаже́нне,/ и по сме́рти яви́лся еси́, послу́шая, о́тче, вопроша́ющих,/ я́ко не умира́ет послуша́ние име́яй.

Сконча́в до́брыя по́двиги, тезоимени́те,/ нетле́ннаго, Богому́дре, сподо́бился еси́ вои́стинну безсме́ртия,/ иде́же, ра́дуяся, венцы́ побе́ды восприя́л еси́.

Боже́ственное, и до́брое, и богоуго́дное воздержа́ние жития́ твоего́, блаже́нне,/ мно́гия утвержда́ет Боже́ственным стра́хом/ и жела́нием благ бу́дущих, Ака́кие.

Богоро́дичен: Вои́стинну Богоро́дицу, Тя ве́рою сла́вим, я́ко Бо́га заче́ншую/ и ро́ждшую Сего́ неискусобра́чно,/ соеди́ншася из Тебе́, прия́тныя святы́м хра́мом.

Конда́к Фомы, глас 4.

Подо́бен: Вознесы́йся:

Ве́лию побе́ду му́жески показа́л еси́,/ отону́дуже Боже́ственною любо́вию разгоре́вся,/ царя́ тле́ннаго и вся кра́сная преоби́дел еси́,/ на горе́ Мале́йстей вселе́ние соверши́в,/ от нея́же в Небе́сная/ возше́л еси́ к Царю́ царе́й, Фомо́,/ моли́ непреста́нно о всех нас.

Песнь 7

Ирмо́с: Образу златому, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.

Огнь страсте́й воздержа́ния росо́ю, о́тче, погаси́л еси́/ и, просия́в, я́коже со́лнце, доброде́телей све́тлостию,/ всех вопию́щих просвеща́еши сердца́, блаже́нне:/ благослове́н еси́, Бо́же оте́ц на́ших.

Слепы́м е́же зре́ти и хромы́м, о́тче Фомо́, благотече́ние,/ ско́рбным избавле́ние и боля́щим исцеле́ние подая́ си́лою Христо́вою, взыва́л еси́:/ благослове́н еси́, Бо́же оте́ц на́ших.

Безмо́лвно твою́ соверши́л еси́ жизнь, о́тче блаже́нне,/ нестяжа́нием просвеща́яся и воздержа́нием украша́яся,/ поя́ умиле́нием се́рдца Влады́це, пребога́те:/ благослове́н еси́, Бо́же оте́ц на́ших.

Богоро́дичен: Де́во Чи́стая, Неискусобра́чная, благослове́нная,/ па́дающих исправле́ние, согреша́ющих избавле́ние, спаси́ мя, блу́днаго,/ спаси́ Сы́ну Твоему́ зову́ща:/ благослове́н еси́, Бо́же оте́ц на́ших.

Ин

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Всем жела́нием ко Влады́це иды́й,/ доса́ды, и безче́стия, преподо́бне, и я́звы терпя́, взыва́л еси́:/ благослове́н еси́ в хра́ме сла́вы Твоея́, Го́споди.

По́мысл твой Влады́чния помышля́я стра́сти и распя́тие/ и сме́рти поуча́яся, ураня́емь, поя́ше:/ благослове́н еси́ в хра́ме сла́вы Твоея́, Го́споди.

Мертв во гро́бе по зако́ну умира́ющих, лежа́ без дыха́ния,/ глаго́лющему веща́еши па́че естества́, я́ко не у́мерл есмь, и взыва́еши:/ благослове́н еси́ в хра́ме сла́вы Твоея́, Го́споди.

Богоро́дичен: Уме́ршия, и́мже, Де́во, держи́ми бе́хом зако́ном,/ Жизнь ро́ждши и́стинную, возста́вила еси́ зову́щия:/ благослове́на Ты в жена́х, Пренепоро́чная Влады́чице.

Песнь 8

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода,/ и превозноси́те во вся ве́ки.

Стра́сти неудержи́мыя души́ воздержа́ния уздо́ю покори́в,/ невеще́ственным А́нгелом уподо́бился еси́, вопия́:/ по́йте, дела́, я́ко Го́спода, и превозноси́те во вся ве́ки.

Фесви́тянина Илии́ после́дуя, преблаже́нне, свяще́нному житию́,/ на го́ру возше́л еси́ бесе́довати к Бо́гу, посто́м ум очища́я, поя́:/ благослови́те, вся дела́ Госпо́дня, Го́спода.

Кро́ток и незло́бив я́влься, на земли́ кро́тких живе́ши, Богому́дре,/ со все́ми преподо́бными и избра́нными поя́:/ благослови́те, вся дела́ Госпо́дня, Го́спода.

Богоро́дичен: Живы́й су́щий исто́чник, я́ко во́ду жи́зни ро́ждшая,/ ду́шу мою́, иста́явшую грехо́вным пла́менем, Де́во Богоро́дице, напо́й,/ да Тя сла́влю во вся ве́ки.

Ин

Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.

Кре́пким воздержа́нием Бо́гу тебе́ бысть смеси́тися, преподо́бне,/ уз те́ла разре́шшуся и плоть изнури́вшу,/ и виде́нием де́тельным, о́тче, зовы́й:/ благослови́те, вся дела́ Госпо́дня, Го́спода.

С му́ченики Христо́вы сочета́емь и вчиня́емь,/ непреста́нно, преподо́бне, поя́ Человеколю́бца/ и моля́ся о нас, восхваля́ющих тя и вопию́щих:/ благослови́те, вся дела́ Госпо́дня, Го́спода.

Пострада́в зако́нно на земли́, Небе́сный обре́л еси́ поко́й,/ ра́дуяся, преподо́бне, со святы́ми,/ и соприча́стник весе́лию и ра́дости их быв, и взыва́я:/ благослови́те, вся дела́ Госпо́дня, Го́спода.

Богоро́дичен: Воплоща́ется Безпло́тный пре́жде,/ Соде́тель зи́ждется из Тебе́, Всенепоро́чная,/ и́бо в пречи́стая ложесна́ Твоя́ заше́д непостижи́мый,/ описа́нием плотски́м хотя́ объя́тся./ Те́мже вси Тя благослови́м, Мари́е Богоневе́сто.

Песнь 9

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньни велича́ем.

Ду́хом, о́тче, обнища́в, Небе́сное Ца́рство восприя́л еси́ со все́ми избра́нными,/ сла́вы неизрече́нныя исполня́емь и боле́зней по́честь прие́мля, Фомо́, возда́ния./ Сего́ ра́ди тя ве́рою и любо́вию ублажа́ем.

Моще́й твои́х ра́ка ве́рно приступа́ющим источа́ет исцеле́ний ре́ки,/ стра́сти душ потопля́ющая и теле́с боле́зни отъе́млющая, блаже́нне Фомо́,/ моли́твенниче ве́рою при́сно блажа́щим тя.

Совокупля́яся с преподо́бных све́тлыми ли́ки/ и сия́нием невече́рним мы́сленно, о́тче Фомо́, озаря́емь,/ Боже́ственную твою́ па́мять творя́щия просвети́ ве́рно/ и улучи́ти спасе́ние моли́твами твои́ми сподо́би.

Богоро́дичен: Облиста́ющая всех чуде́с заря́ Твои́х, Богоблагода́тная Чи́стая,/ страсте́й и скорбе́й отъе́млет мглу и свет весе́лия мы́сленный простира́ет/ Ма́терь Бо́жию Тя велича́ющим.

Ин

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Ми́лостивно вмести́лся еси́, о́тче ко вся́ческих Благода́телю,/ незло́бия добро́тою украша́емь и красото́ю доброде́телей сия́я,/ те́мже тя вси ублажа́ем.

Зако́ну повину́яся Влады́чню,/ твою́ преклони́л еси́ вы́ю мона́шествующих боре́нию/ и, победоно́сец, о́тче, быв,/ к незло́бию дости́гл еси́ соверше́нному, всеблаже́нне.

Пе́ние Бо́гу возсыла́ти со Безпло́тными сподо́бился еси́,/ я́ко соблю́д о́нех житие́ и чистоту́,/ терпе́нием же дел му́ченик сла́ву прия́л еси́.

Приими́ от нас, Богоно́се, приноси́мое тебе́ пе́ние от чи́ста се́рдца/ и возда́ждь мольба́ми твои́ми/ согреше́ний оставле́ние и спасе́ние, всече́стне.

Богоро́дичен: Я́ко ко́рень су́щую вои́стинну нетле́ния,/ Тя, Де́во, вси ве́рнии, и утвержде́ния, хвала́ми почита́ем:/ Ты бо Ипоста́сное Безсме́ртие нам родила́ еси́.