Служба в честь преподобномученика Афанасия, игумена Брестскаго

Тропа́рь, глас 2:

Блаже́н еси, о́тче наш Афана́сие,/ я́ко ве́рно пожи́л еси́, стоя́ бо́дренно за святу́ю Правосла́вную ве́ру,/ со умиле́нием при́сно поя́ неседа́льное Пречи́стей,/ запове́дуя никому́же наруша́ти Правосла́вныя ве́ры святы́я,/ пострада́в за свиде́тельство и́стины да́же до сме́рти./ Мы же, чту́ще святы́ню твою́,/ со дерзнове́нием взыва́ем ти:/ о́тче наш, преподобному́чениче Афана́сие,/ похвало́ и украше́ние на́ше.

Конда́к, глас то́йже:

Я́ко по́стника благоче́стна и иску́сна,/ и страда́льца произволе́нием че́стна,/ и пусты́ни жи́теля сообра́зна,/ в пе́снех досто́йно хва́лим Афана́сия приснохва́льнаго,/ той бо зми́я попра́л есть.

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 6.

Преподо́бне о́тче Афана́сие,/ воздержа́нием и моли́твою Бо́гу прилепля́яся,/ стра́сти и невоздержа́ния пло́ти твоея умертви́л еси́/ и раб яви́лся еси́ Спа́са Вседержи́теля./ Те́мже почита́ем па́мять твою́ всечестну́ю.

Пе́рвее по́двигом твои́м/ в житии́ земно́м Бо́гови угожда́я,/ страда́нием второ́е му́ченически житие́ твое́ сконча́л еси́./ Тем тя венча́ за сугу́быя по́двиги/ Христо́с Человеколю́бец/ и Спас душ на́ших.

Сла́ва, глас 6:

Восхва́лим днесь пе́сньми страда́льца,/ земли́ на́шея преподобному́ченика Афана́сия./ Сей бо, измла́да Христа́ возлюби́в,/ неле́ностно веле́нием Его́ угожда́я,/ во утвержде́ние ве́ры Правосла́вныя стране́ на́шей послужи́./ Ны́не же, во оби́тели Небе́сныя прия́тый,/ мо́лит Христа́ Бо́га// поми́ловати ду́ши на́ша.

И ны́не, Богоро́дичен, глас то́йже:

Ра́дуйся, звезде́ светоза́рная,/ Свет, пре́жде де́нницы от Отца́ возсия́вший, неизрече́нно ро́ждшая,/ Того́ сия́нием озари́ ду́ши на́ша,// спя́щия во тьме и се́ни сме́ртней.

На стихо́вне стихи́ры, глас 4.

Про́мыслом Бо́жиим/ и челове́ческим избра́нием/ во игу́мена оби́тели Бересте́йския/ поста́влен был еси́, преподобному́чениче,/ и, я́ко па́стырь преизря́дный,/ вруче́нное ти Бо́гом ста́до во и́стине наста́вил еси́./ Наста́ви и нас, ве́рно чту́щих па́мять твою́,// ка́ко в ве́ре и́стинней утверди́тися.

Стих: Честна́ пред Го́сподем// смерть преподо́бных Его́.

Земна́я отри́нув,/ Небе́сная себе́ уготовля́я,/ я́ко страда́лец за и́стину, Небе́сныя сла́дости вкуси́л еси́, страстоте́рпче./ Сея́ сла́дости испроси́ и нам у Христа́, Спа́са на́шего,// я́ко моли́твенник о душа́х на́ших.

Стих: Блаже́н муж, боя́йся Го́спода,// в за́поведех Его́ восхо́щет зело́.

Днесь соше́дшеся ве́рнии твои́/ в прославле́ние па́мяти твоей, преподобному́чениче,/ ра́дости и весе́лия испо́лнишася./ Житие́м бо твои́м пра́ведным/ и в ве́ре Правосла́вней тве́рдым стоя́нием/ не то́кмо и́стинный нам путь к Небеси́ указу́еши,/ но и ны́не, я́ко предста́тель наш пред Го́сподем,// мо́лишися о спасе́нии душ на́ших.

Сла́ва, и ны́не, Богоро́дичен, глас то́йже.

К покро́ву Твоему́ прибега́ем,/ Де́во Богоро́дице,/ и мо́лим Тя: ско́ро на по́мощь нам,/ ве́рно чту́щим Тя, предвари́/ и от враг ви́димых и неви́димых изба́ви,/ Ты бо еси́ заступле́ние на́ше.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 8:

Ду́шу твою́ и те́ло от страсте́й очи́стив,/ Ду́ха Святаго жили́ще был еси́/ и, кра́сная ми́ра от ю́ности твоея́ презре́в,/ ра́дуяся после́довал еси́ Христу́./ Сего́ ра́ди сла́ву ве́чную восприя́в,/ Тому́, я́ко предста́тель наш, моли́ся/ дарова́ти мир ми́ру// и душа́м на́шим ве́лию ми́лость.

Мно́гим по́двигом плоть твою́ умерщвля́я,/ украше́ние и́ноков яви́лся еси́,/ преподобному́чениче,/ до́бре сих к Небеси́ наставля́я./ Те́мже ны́не, во тьме грехо́вней су́щия, ны просвети́/ и, я́ко дерзнове́ние име́яй ко Го́споду, Спа́су на́шему,// Того́ моли́ спасти́ся душа́м на́шим.

Столп непоколеби́мый ве́ры Христо́вы/ и и́стинный ревни́тель оте́ческих преда́ний был еси́ в житии́ твое́м,/ преподобному́чениче,/ бо́дренно стоя́ за святу́ю Правосла́вную ве́ру./ Ра́зум наш просвети́/ и нас, ве́рно чту́щих па́мять твою́, в ве́ре утверди́// ко спасе́нию душ на́ших.

В же́ртву Бо́гу себе́ сама́го принося́,/ в се́рдце твое́м храни́л еси́ о́браз Христа́, Агнца непоро́чна,/ вда́вшаго Себе́ на закла́ние за грехи́ ми́ра,/ и, Тому́ подража́я,/ сла́дце преда́л еси́ ду́шу твою́ в ру́це Бо́жии./ Христо́вых страда́ний о́бщниче,// Того́ моли́ спасти́ся душа́м на́шим.

Сла́ва, глас 8:

Ева́нгельски Го́спода Бо́га возлюби́в,/ украси́л еси́ ду́шу твою́ доброде́тельми духо́вными,/ о́браз подража́телен быв ве́рному ста́ду твоему́,/ и, я́ко свети́льник, стоя́й на све́щнице,/ мно́гия благоразу́мием обогати́л еси́,/ пострада́в же за и́стину Христо́ву да́же до кро́ве,/ благода́ти чудотворе́ния сподо́бился еси́./ Не забу́ди и нас, убо́гих, во благода́ти твое́й,/ да прославля́юще Го́спода,/ дарова́вшаго тебе́ такова́я,// спасе́м ду́ши на́ша.

И ны́не, Богоро́дичен, глас то́йже: Царь Небе́сный:

Вход, проки́мен. Чте́ния три му́ченическая.

Проро́чества Иса́иина чте́ние (глава́ 43):

Та́ко глаго́лет Госпо́дь:/ вси язы́цы собра́шася вку́пе, и соберу́тся кня́зи от них./ Кто возвести́т сия́ в них?/ Или́ я́же от нача́ла, кто слы́шана сотвори́т вам?/ Да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели, и Аз Свиде́тель, глаго́лет Госпо́дь Бог,/ и О́трок, Его́же избра́х./ Да позна́ете, и ве́руете Ми, и разуме́ете, я́ко Аз есмь,/ пре́жде Мене́ не бысть ин бог и по Мне не бу́дет./ Аз есмь Бог, и несть ра́зве Мене́ спаса́яй./ Аз возвести́х и спасо́х; уничижи́х, и не бе в вас чу́ждий./ Вы Мне свиде́тели, и Аз Госпо́дь Бог,/ и еще́ от нача́ла Аз есмь, и несть от рук Мои́х избавля́яй./ Сотворю́, и кто отврати́т то?/ Си́це глаго́лет Госпо́дь Бог, избавля́яй вас, Святы́й Изра́илев.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исхо́д их./ И е́же от нас ше́ствие сокруше́ние, они́ же суть в ми́ре./ Ибо пред лице́м челове́ческим а́ще и му́ку прии́мут, упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их и, я́ко всепло́дие же́ртвенное, прия́т я./ И во вре́мя посеще́ния их возсия́ют и, я́ко и́скры по сте́блию, потеку́т./ Су́дят язы́ком и облада́ют людьми́, и воцари́тся Госпо́дь в них во ве́ки./ Наде́ющийся Нань разуме́ют и́стину, и ве́рнии в любви́ пребу́дут Ему́./ Яко благода́ть и ми́лость в преподо́бных Его́, и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости житие́ нескве́рное./ Благоуго́ден Бо́гови быв, возлю́блен бысть, и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́, или́ лесть прельсти́т ду́шу его́./ Раче́ние бо зло́бы помрача́ет до́брая, и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга. Уго́дна бо бе Го́сподеви душа́ его́, сего́ ра́ди потща́ся от среды́ лука́вствия./ Лю́дие же ви́девше и не разуме́вше, ниже́ поло́жше в помышле́нии таково́е./ Яко благода́ть и ми́лость в преподо́бных Его́, и посеще́ние во избра́нных Его́.

На лити́и стихи́ры, глас 2:

Прииди́те, ве́рнии,/ па́мять преподобному́ченика Афана́сия почти́м,/ я́ко многоце́нный би́сер духо́вный,/ украси́вший сия́нием ве́ры и благоче́стия страну́ на́шу./ Моли́твенно притеце́м к страстоте́рпцу за ве́ру Правосла́вную святу́ю,/ учи́телю воздержа́ния, исто́чнику умиле́ния,/ челове́ку Небе́сному и А́нгелу земно́му,/ печа́льнику земли́ на́шея,/ и сле́зно тому́ возопие́м:/ наста́ви нас ве́рою правове́рною восхваля́ти Го́спода// ко спасе́нию душ на́ших.

Мо́щи твоя́, преподобному́чениче, по успе́нии твое́м/ исто́чник исцеле́ний притека́ющих к тебе́ явля́юще,/ немо́лчно свиде́тельствуют о сла́ве твое́й,/ наставля́юще нас на путь,/ и́же есть к животу́ и благоче́стию,/ и веща́юще:/ возлюби́те Го́спода и обря́щете сла́ву ве́чную/ и поко́й со избра́нными,/ его́же да улучи́м твои́ми моли́твами,// свя́те Афана́сие.

Сла́ва, глас 2:

Ревну́я о ве́ре Правосла́вней,/ возскорбе́л еси́ печа́лию ве́лиею,/ я́ко ве́ра сия́ от неправове́рных попира́ется,/ и, во дни ско́рби твоея́ моля́ся пред ико́ною Пречи́стыя Влады́чицы,/ все упова́ние возложи́л еси́ на заступле́ние Ея́./ В час же те́плых моли́тв твои́х,/ услы́шав глас Влады́чицы, от святы́я ико́ны исходя́щ,/ и внима́я веле́ниям его́,/ не то́кмо все житие́ твое́ земно́е пре́дал еси́ на защище́ние ве́ры праоте́ческия,/ но и гоне́ния мно́гия претерпе́л еси́ за ню,/ непреста́нно по́мощию Влады́чицы укрепля́емь./ Вознеси́, свя́тче, моли́твы твоя́// ко Пресвяте́й Влады́чице.

И ны́не, Богоро́дичен, глас 6:

Защище́ние и покро́в еси́ христиа́ном,/ Влады́чице Богоро́дице,/ осени́ и нас покро́вом Твои́м, лю́те стра́ждущих,// да непреста́нно славосло́вим милосе́рдие Твое́.

На стихо́вне стихи́ры, глас 4:

Ра́дуйся, преподобному́чениче Афана́сие,/ сосу́де Бо́жий избра́нный,/ от ю́ности бо Христа́ возлюби́в,/ гла́сом веле́ния Его́/ Це́ркви Правосла́вней служи́ти призва́н был еси́/ и, Тому́ порабо́тав в по́те лица́ твоего́,/ све́том и́стинныя ве́ры лю́ди наста́вил еси́./ Те́мже и ны́не моли́твами твои́ми/ испроси́ у Светода́теля Христа́/ ми́ра и утвержде́ния Це́ркве на́шея/ и просвеще́ния душ на́ших.

Стих: Честна́ пред Го́сподем/ смерть преподо́бных Его́.

Ра́дуйся, нача́льниче мона́хов,/ Про́мыслом Бо́жиим к сему́ предука́занный,/ жре́бием бо Боже́ственным/ поста́влен был еси́ во игу́мена оби́тели Бересте́йския,/ да возвели́чиши люде́й правосла́вных/ достохва́льным житие́м в правове́рии/ и сла́вным стоя́нием во Правосла́вии святе́м./ Ты же, прия́в жезл игу́менства,/ сотворя́л еси́ во́лю Посла́вшаго тя на по́двиг сей./ Сего́ ра́ди и мы к тебе́ возопие́м:/ о́тче наш Афана́сие,// благоустро́й на́ша дома́шния оби́тели моли́твами твои́ми.

Стих: Блаже́н муж, боя́йся Го́спода,// в за́поведех Его́ восхо́щет зело́.

Блажи́м тя, преподобному́чениче Афана́сие,/ зане́ све́том Небе́снаго ра́зума просветле́н был еси́/ в дея́ниих па́стырства твоего́ и защище́ния и́стины,/ виде́ние бо чу́дно узре́л еси́,/ ви́дев полки́ во́инства Небе́снаго,/ побежда́ющий гони́тели Це́ркве и́стинныя Христо́вы,/ и, я́ко муж богобоя́зливый, упова́нием на Бо́га себе́ ополчи́в,/ возста́л еси́ проти́ву враго́в ве́ры Правосла́вныя,/ не устраши́вся ни темни́цею, ни у́зами,/ ни муче́ниями, ни сме́ртию,/ но вся сия́ претерпе́в,/ вене́ц побе́дный от Бо́га восприя́л еси́./ Сего́ ра́ди мо́лим тя:/ моля́ Христа́ Бо́га/ огради́ти Це́рковь на́шу от наве́тов вра́жиих.

Сла́ва, глас 4:

Отче Афана́сие,/ пострада́в за испове́дание ве́ры,/ ра́дость пресве́тлую и пречестну́ю сла́ву насле́довал еси́/ и Вы́шняго гра́да Иерусали́ма и ве́чных благ сонасле́дник яви́лся еси́./ Страсте́й победи́телю,/ во́ине за ве́ру вели́кий, страстоте́рпче Христо́в,/ свети́льниче многосве́тлый страны́ на́шея,/ всех нас, соверша́ющих свяще́нную па́мять твою́,/ помина́й моли́твами твои́ми,/ да просла́вим Спа́са на́шего,/ тебе́ просла́вившаго,/ Еди́наго во святы́х Свои́х Бо́га на́шего.

И ны́не, Богоро́дичен, глас то́йже: При́зри на моле́ния Твои́х раб, Всенепоро́чная:

Тропа́рь, глас 2:

Блаже́н еси́, о́тче наш Афана́сие,/ я́ко ве́рно пожи́л еси́,/ стоя́ бо́дренно за святу́ю Правосла́вную ве́ру,/ со умиле́нием при́сно поя́ неседа́льное Пречи́стей,/ запове́дуя никому́же наруша́ти Правосла́вныя ве́ры святы́я,/ пострада́в за свиде́тельство и́стины да́же до сме́рти./ Мы же, чту́ще святы́ню твою́,/ со дерзнове́нием взыва́ем ти:/ о́тче наш, преподобному́чениче Афана́сие,// похвало́ и украше́ние на́ше.

НА У́ТРЕНИ

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 6:

Житие́м твои́м земны́м А́нгелом безпло́тным уподо́бился еси́, преподобному́чениче,/ врага́ бо прего́рдаго смири́в, крестоноше́ние Бо́гови уго́дно соверши́л еси́./ Те́мже днесь, почита́юще па́мять твою́, мо́лимся:/ моли́ спасти́ся душа́м на́шим.

Сла́ва, и ны́не, Богоро́дичен:

Бо́га Сло́ва породила́ еси́,/ заче́нши во чре́ве безсе́менно, неискусобра́чная Де́во,/ Того́ моли́ о душа́х на́ших.

По 2-м стихосло́вии седа́лен, глас 6:

Грозд духо́вный на олта́рь Боже́ственный прине́сл еси́ себе́, преподобному́чениче,/ тве́рдым стоя́нием за ве́ру Правосла́вную и безстра́стным испове́данием ея́./ Те́мже па́мять твою́ при́сно пе́сньми восхваля́ем ве́рно.

Сла́ва, и ны́не, Богоро́дичен:

Ка́ко не диви́мся богому́жному Рождеству́ Твоему́, Пречестна́я?/ Ужа́сно бо чу́до зача́тия и несказа́нен о́браз Рождества́ в Тебе́ показа́ся./ Рожде́ннаго Тобо́ю моли́ прости́ти прегреше́ния на́ша.

Велича́ние:

Ублажа́ем тя,/ преподобному́чениче Афана́сие,/ и чтим святу́ю па́мять твою́,/ наста́вниче мона́хов// и собесе́дниче А́нгелов.

Псало́м избра́нный: Услы́шите сия́, вси язы́цы:

По полиеле́и седа́лен, глас 4.

Подо́бен: Яви́лся еси́:

В поще́нии иску́сен быв, во страда́нии просия́л еси́/ и просвети́л еси́ ве́рныя твои́ми по́двиги, блаже́нне Афана́сие,/ те́мже тя вси согла́сно велича́ем.

Сла́ва, и ны́не, Богоро́дичен:

Наде́ждо непосты́дная наде́ющихся на Тя,/ еди́на ро́ждшая па́че естества́ пло́тию Христа́ Бо́га на́шего,/ Того́ со святы́ми преподобному́ченики моли́ пода́ти вселе́нней очище́ние прегреше́ний/ и всем нам пре́жде конца́ жития́ исправле́ние.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем,/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Возлю́блен быв Бо́гом от чре́ва ма́терня,/ я́ко пе́стун гра́да Небе́снаго,/ взыска́н был еси́ Им/ и, Тому́ житие́м твои́м сла́вным угоди́в,/ всем тре́бующим по́мощи твоея́/ чудотво́рный пода́тель яви́лся еси́./ Спаса́й нас, я́ко предста́тель наш,// чудотво́рче Афана́сие.

Кано́н, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.

Моисе́й иногда́, кре́стным зна́мением во́ды раздели́в,/ проше́д со изра́ильтяны сквозе́ Чермно́е мо́ре и земна́го обетова́ния дости́же,/ ты же, преподобному́чениче, крестоноше́нием плоть твою́ умертви́в,/ земли́ обетова́ния дости́гл еси́, в не́йже пра́вда живе́т.

Изба́вителю и Бо́гу на́шему воспева́еши ны́не песнь побе́дную,/ просвеще́н сый Боже́ственнаго и светоза́рнаго Спа́са благода́тию,/ омраче́нную ду́шу мою́ моли́твами твои́ми, свя́те Афана́сие, озари́,/ да пою́ Бо́гу моему́ сла́вно.

Я́ко свяще́нника, и я́ко испове́дника, и я́ко страда́льца за ве́ру Христо́ву украше́ннаго,/ чту́ще па́мять твою́, прехва́льне, пои́м Го́сподеви:/ сла́вно бо просла́вися во святы́х Свои́х.

Богоро́дичен: От ви́димых и неви́димых враго́в изба́ви мя, Ро́ждшая всех Влады́ку,/ и бу́рю страсте́й мои́х ути́ши, да пою́ Бо́гу моему́:/ сла́вно бо просла́вися.

Песнь 3

Ирмо́с: Небеснаго кру́га/ Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний Кра́ю, ве́рных Утвержде́ние, // Еди́не Человеколю́бче.

В Боже́ственней любви́ благода́тию Ду́ха Святаго утвержде́н,/ благоче́стно пожи́л еси́, утвержда́я слове́сное ста́до твое́ на па́житех живоно́сных/ и в Небе́сную огра́ду мно́гия ввел еси́.

На ка́мени ве́ры но́ги ве́рных твои́х водрузи́в,/ поколеба́л еси́ основа́ние сопроти́вных/ и спасл еси́ лю́ди твоя́ от порабоще́ния вра́жия.

Тверды́нею ве́ры себе́ украша́я,/ жела́ний кра́я дости́гл еси́/ и Це́ркве Зижди́телю благоприя́тен яви́лся еси́.

Богоро́дичен: Недоуме́ют вси язы́цы, ка́ко Небе́снаго кру́га Верхотво́рец,/ в творе́ниих невмести́мый, в ложесна́ Твоя́ воплощаемь всели́ся, Всенепоро́чная,/ на спасе́ние нас, ве́рно воспева́ющих Тя.

Седа́лен,глас 6:

Му́ки му́жественно претерпе́в, к неболе́зненней жи́зни себе́ уготовля́я,/ научи́л еси́ нас терпе́нием стяжа́ти ду́ши на́ша./ Те́мже днесь Христо́ва Це́рковь, пра́зднующи святу́ю па́мять твою́, све́тло ра́дуется.

Сла́ва, и ны́не, Богоро́дичен:

Преукраше́нная Боже́ственною сла́вою,/ Херуви́мов и Серафи́мов превышши еси́, Пренепоро́чная,/ те́мже Тя по до́лгу вси ро́ди ублажа́ют.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче.

Весели́ся, пра́ведниче, о Го́споде,/ побе́ду ти на враги́ безпло́тныя дарова́вшем,/ Тому́ со дерзнове́нием вопие́ши:/ Ты моя́ кре́пость, Го́споди,/ Ты моя́ и си́ла,/ не оста́ви милосе́рдием Твои́м, Ще́дре, притека́ющих к Тебе́.

Споспешеству́ющу ти Владыце,/ прия́л еси́ от Него́ за по́двиги твоя́ дар неду́ги теле́сныя исцеля́ти/ и многоболе́зненныя стра́сти врачева́ти зову́щих Христу́ Бо́гу:/ си́ле Твое́й сла́ва, Человеколю́бче.

Рачи́тель Госпо́день измла́да был еси́,/ ору́жие бо кре́стное на ра́мена взем, неукло́нно ше́ствовал еси́,/ путь спасе́ния себе́ тем уготовля́я./ Се́го ра́ди ми́ра моли́твенник яви́лся еси́ пресве́тел,/ Богу́ поя́ песнь побе́дную.

Богоро́дичен: Песносло́вим Тя, Влады́чице, Ра́дость всему́ ми́ру ро́ждшая,/ Того́, я́ко Бла́га, моли́, Всенепоро́чная, пре́зрети беззако́ния досто́йно Ему́ вопию́щих:/ си́ле Твое́й сла́ва, Человеколю́бче.

Песнь 5

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,// ра́зве Тебе́, ино́го не ве́мы.

Не дал еси́ очесе́м твои́м сна и ве́ждом дрема́ния, у́тренююще взыва́я:/ Го́споди, посети́ Твои́ми щедро́тами Це́рковь Твою́,/ ю́же стяжа́л еси́ честно́ю Твое́ю Кро́вию.

Словесы́ твои́ми, му́дре, заблу́ждших облича́я,/ сою́зом ве́ры связа́л еси́ вруче́нное ти ста́до слове́сное/ и ны́не охраня́еши нас от ве́тров тлетво́рных уче́ний, науча́я воспева́ти Го́сподеви:/ спаси́ ны, Ты бо еси́ Бог наш, ра́зве Тебе́, ино́го не ве́мы.

Блаже́нно житие́ твое́ на земли́ и кончи́на безсме́ртна,/ сего́ ра́ди нетле́нная бога́тства стяжа́л еси́, преподо́бне о́тче,/ и просвеща́еши притека́ющих к тебе́ чудесы́.

Богоро́дичен: Я́ко одушевле́нный черто́г, восприя́вший Царя́ ца́рствующих,/ и я́ко престо́л Влады́чень, Мари́ю Пренепоро́чную в пе́снех возвели́чим.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:// от тли, Бо́же, возведи́ мя.

Печа́ль ве́лия обдержи́т мя, поне́же лю́те окаля́х ду́шу грехми́ и оде́жду нетле́ния разори́х,/ ты же, свя́тче, наста́ви мя, ка́ко умоли́ти Го́спода,/ да очи́стит мя от тли страсте́й мои́х.

Укрепле́н быв ра́зумом Боже́ственным,/ облича́л еси́ отмета́ющихся и́стинныя ве́ры Христо́вы, я́ко пребезу́мных./ Те́мже Небе́сныя две́ри тебе́ отверзо́шася, блаже́нне,/ воспева́ющу Христа́ во вся ве́ки.

Сла́дости Небе́сныя и пресве́тлыя ра́дости испо́лнен еси́,/ предстоя́ Тро́ице Святе́й, Ду́хом очище́нный./ Су́щия ны во тьме и со́ни сме́ртней моли́твами твои́ми не попусти́ а́ду прибли́зитися.

Богоро́дичен: Ма́ти Всепе́тая, ми́ру всему́ Искупле́ние от кля́твы законныя роди́вшая,/ ны́не на́ша моле́ния прие́млющи, моли́ спасти́ся всем нам.

Конда́к, глас 4:

Мона́шескаго жития́ украше́ние и му́чеников красоту́/ яви́л себе́ житие́м твои́м, Афана́сие,/ и, я́ко со́лнце пресве́тлое,/ лю́дем правосла́вным возсия́л еси́./ Те́мже и Христо́с да́ром чуде́с обогати́ тя,/ да чту́ще пресве́тлую па́мять твою́, зове́м ти:// помина́й ста́до твое́ моли́твами твои́ми, преподо́бне.

И́кос:

Я́ко во́лнами вод мно́гих, обурева́ется Це́рковь Правосла́вная,/ коле́блема ло́жными уче́нии и кова́рными ухищре́нии враг ея́./ Ве́руем и упова́ем ку́пно с тобо́ю, преподобному́чениче,/ я́ко врата́ а́дова не одоле́ют ей, и мо́лим тя:/ испроси́ у Го́спода вели́кия ми́лости,/ да низпо́слет нам в дни испыта́ний на́ших кре́пость ду́ха и тве́рдое стоя́ние во и́стине Правосла́вия,/ да не яви́тся кто из бра́тии на́шея сын поги́бели.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.

Муче́ния терпя́, опаля́емь веще́ственным огне́м,/ ду́шу твою́ огне́м невеще́ственным ороси́л еси́,/ я́коже трие́ о́троцы, посреде́ пла́мене взыва́я:/ отце́в Бо́же, благослове́н еси́.

Я́ко росо́ю живоно́сною, смире́нием твои́м и безстра́стием/ пещь я́рости беззако́ннующих мучи́телей твои́х угаси́л еси́, преподобному́чениче:/ чудя́хуся бо, зря́ще тя посреде́ муче́ний моля́щася за враги́ твоя́.

Мужеством му́ченическим чре́сла твоя́ препоя́сав/ и житие́м твои́м подви́жническим, я́ко ри́зою светоза́рною, себе́ украси́в,/ восте́кл еси́ на трапе́зу Госпо́дню, я́коже избра́нный, поя́:/ благослове́н еси́, Бо́же оте́ц на́ших.

Богоро́дичен: Я́коже бо купина́, ю́же ви́де Моисе́й, не сгара́ше опаля́ема,/ та́ко Де́ва неопа́льно пребыла́ еси́, Пра́вды Со́лнце во чре́ве заче́ншая./ Того́ моли́ спасти́ся душа́м на́шим.

Песнь 8

Ирмо́с: Царя́ Небеснаго,/ Его́же пою́т во́и Ангельстии,// хвали́те и превозноси́те во вся ве́ки.

Неусы́пна тя и́мамы моли́твенника, во́лны страсте́й утиша́юща,/ печа́ли утоля́юща и лю́тых вся́ческих нас избавля́юща, вопию́щих:/ благослови́те, вся дела́ Госпо́дня,Го́спода.

Мудрова́ния врага́ прего́рдаго в себе́ уби́в,/ уму́ Боже́ственному приобщи́лся еси́/ житие́м твои́м чи́стым и ума́ све́тлостию, зовы́й непреста́нно:/ благослови́те, вся дела́ Госпо́дня, Го́спода.

Изря́днаго уго́дника Христо́ва пе́сньми благохва́льными почти́м,/ я́ко испо́лнена я́ве благода́ти и Боже́ственными сия́ньми преукра́шена,/ Изба́вителю Бо́гу вопию́ща:/ де́ти, благослови́те, свяще́нницы, воспо́йте, лю́дие, превозноси́те во вся ве́ки.

Богоро́дичен: Ра́дуйся, Благода́тная, Госпо́дь с Тобо́ю, веща́ Ти Арха́нгел Гаврии́л:/ из Тебе́ бо произы́де Отроча́ Предве́чно,/ за милосе́рдие неизрече́нное превозноси́мый отце́в Бог благослове́нный.

Песнь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к.// Те́мже Пречи́стую Богоро́дицу, ве́рнии, велича́ем.

Коленопреклоне́нно непреста́нно поя́ неседа́льное Пречи́стей, взыва́л еси́:/ ра́дуйся, ми́ру Путеводи́тельнице, па́че А́нгел Небе́сных украше́нная,/ украси́ мя красото́ю Твое́ю, да несра́млен явлю́ся пред Го́сподем мои́м.

Дивя́ся твоему́ снизхожде́нию во дни ю́ности моея́,/ молю́ тя, не оста́ви мене́, преподобному́чениче, во дни ста́рости моея́/ и по сме́рти мое́й взыщи́ мене́, да моли́твами твои́ми очище́н,/ очесы́ духо́вными узрю́ черто́г Небе́сный в день стра́шнаго суда́ Госпо́дня.

Помяни́ ны́не, свя́тче Бо́жий, и всех ве́рою к тебе́ притека́ющих,/ и, от душе́вных страсте́й избавля́я, защити́ ны от бед и обстоя́ний,/ и спасе́ния Боже́ственнаго бу́ди нам хода́тай.

Богоро́дичен: Стра́нное и пресла́вное чу́до ви́дим о Тебе́, Богоизбра́нная Влады́чице,/ я́ко ми́ра Вседержи́тель, Себе́ ума́лив, плоть от Тебе́ прие́млет/ и, пита́я Пло́тию Свое́ю пречи́стою, к животу́ ве́чному приво́дит лю́ди Своя́.

Свети́лен.

Подо́бен: Жены́, услы́шите:

Страда́нием пе́рвое до́бре искуси́вся,/ второ́е же посто́м тече́ние боже́ственное соверша́в, на Небеса́ возше́л еси́,/ Христу́ предстои́ши, Афана́сие, о́тче преподо́бне,/ за нас моли́ся те́пле, пою́щих тя.

Богоро́дичен: Ра́дость неизрече́нную ро́ждши, Го́спода,/ ра́дости нас Небе́сныя прича́стники сотвори́,/ всех Тебе́ почита́ющих, Пречи́стая, благода́ть и́стинну,/ от души́ вопию́щих Ти:/ не забу́ди Твоя́ рабы́, Благослове́нная Мари́е.

На хвали́тех стихи́ры, глас 6:

Преподо́бне о́тче,/ хотя́ всем се́рдцем Бо́гу благоугожда́ти,/ по́двигом до́брым до конца́ подвиза́лся еси́/ и я́ко зла́то, в горни́ле очище́но, яви́лся еси́,/ сия́яй красото́ю духо́вною ча́дом твои́м,/ и́хже житие́м твои́м, я́ко не́кою небовосхо́дною ле́стницею,/ на высоту́ доброде́телей возводя́,/ велеле́пно восхваля́ти Го́спода научи́л еси́./ Помина́й нас, о́тче Афана́сие, в моли́твах твои́х,/ да и мы не то́кмо в житии́ сем,/ но и ку́пно с тобо́ю на Небесе́х/ восхва́лим просла́вльшаго тя Го́спода.

Недоуме́ет ум наш,/ ки́ими похва́льными словесы́ возвели́чим Творца́,/ дарова́вшаго нам в тебе́ исто́чник исцеле́ний,/ пресве́тлую ра́дость,/ ору́жие от наве́тов вра́жиих,/ неусы́пнаго стра́жа страны́ на́шея/ и моли́твенника к Бо́гу о душа́х на́ших./ До́блестне воспева́я со ли́ки Небе́сными хвалу́ Бо́гу,/ научи́ и нас пе́ти и превозноси́ти Его́// во вся ве́ки.

Преподо́бне о́тче Афана́сие,/ я́ко дре́во светлоплодови́тое,/ ве́лий плод духо́вный прине́сл еси́/ Це́ркви Святе́й Правосла́вней,/ ве́рное ста́до твое́ в и́стине укрепля́я,/ отпа́дшия вразумля́я и коле́блющияся утвержда́я;/ зане́ ны́не от плода́ Небе́снаго пита́ешися,/ утверди́ и нас в ве́ре и и́стине,/ да и мы в чистоте́ духо́вней и во благоче́стии поживе́м,// непреста́нно славосло́вяще Спа́са на́шего.

Сла́ва, глас 6:

Любве́ ра́ди Христо́вы,/ преподобному́чениче Афана́сие,/ ве́лия труды́ и злострада́ния претерпе́л еси́/ во благоустрое́ние Це́ркве Его́ Святы́я./ Я́ко адама́нт бо тве́рдый,/ не то́кмо тве́рдо стоя́л еси́ за и́стину,/ но, я́ко испове́дник,/ неуста́нно облича́я хули́тели Правосла́вныя ве́ры/ и предрека́я им гнев Бо́жий,/ претерпе́л еси́ за сие́ злострада́ния,/ темни́цу, поруга́ния и му́ченическую кончи́ну./ Сего́ ра́ди вшел еси́ в ра́дость Го́спода твоего́/ и ны́не, в селе́ниих Небе́сных водвори́лся,/ воспева́еши со А́нгелы Го́сподеви песнь хвале́бную./ Испроси́ нам у Го́спода ве́лия ми́лости,/ да и мы в бу́дущем ве́це// воспое́м ку́пно с тобо́ю хвалу́ Бо́гу.

И ны́не, Богоро́дичен, глас то́йже:

Богоро́дице, Ты еси́ лоза́ и́стинная,/ возрасти́вшая нам Плод Живота́,/ Тебе́ мо́лимся:/ моли́ся, Влады́чице, со святы́ми апо́столы,/ поми́ловати ду́ши на́ша.

НА ЛИТУРГИ́И слу́жба преподобному́ченическая.

Моли́тва

О вели́кий уго́дниче Христо́в, святы́й преподобному́чениче Афана́сие! К тебе́ мы, гре́шнии и смире́ннии, я́ко к те́плому на́шему засту́пнику и ско́рому помо́щнику, моли́твенно прибега́ем и из глубины́ се́рдца взыва́ем: при́зри на ны ско́ро и умоли́ Человеколю́бца Бо́га, да не осу́дит нас, гре́шных, по беззако́нием на́шим, но да сотвори́т с на́ми по вели́кой Свое́й ми́лости. Охрани́ нас свои́м заступле́нием от облежа́щаго ны суему́дрия и неправове́рия и, я́ко па́стырь до́брый, упаси́ заблу́ждшия о́вцы ста́да Христо́ва и во дворы́ Госпо́дни сия́ всели́. Огради́ нас от собла́знов, ересе́й и раско́лов и наста́ви тве́рдо в ве́ре Правосла́вней подвиза́тися. Потщи́ся, ско́рый о нас предста́телю, благоприя́тным твои́м хода́тайством умоли́ти Го́спода, да низпо́слет нам ти́хое и богоуго́дное житие́, уврачу́ет Свое́ю благода́тию на́ша боле́зни, душе́вныя и теле́сныя, согре́ет на́ша сердца́ любо́вию друг ко дру́гу и сотвори́т ны братолю́бны и единомы́сленны. Испроси́ та́кожде у Го́спода и всего́ потре́бнаго для жития́ на́шего теле́снаго: земли́ плодоро́дие, благорастворе́ние возду́хов и ми́рное устрое́ние. Страну́ на́шу, ве́си и гра́ды охрани́ моли́твами твои́ми от огня́, пото́па, тру́са, вра́жескаго наше́ствия и вну́тренних нестрое́ний. Утверди́ в нас па́мять сме́ртную, да и мы, во и́стиннем покая́нии и чи́стем све́дении со́вести на́шея предста́вше ко Го́споду, сподо́бимся десна́го стоя́ния и со все́ми святы́ми воспое́м сла́ву Отцу́ и Сы́ну и Свято́му Ду́ху во ве́ки веко́в. Ами́нь.