Служба в честь преподобнаго Тихона Лухскаго, Костромскаго чудотворца

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 1.

Подо́бен: Наста́, Богоно́се:

Во́инствование царю́ земно́му/ на слу́жбу Царю́ Небе́сному премени́л еси́,/ Ти́хоне Богому́дре,/ те́мже и сугу́бым венце́м венча́лся еси́,/ я́ко до́брый во́ин, и подви́жник,/ и победоно́сец соверше́нный/ на враго́в ви́димых и неви́димых.

Се что добро́, или́ что́ красно́,/ но е́же жи́ти бра́тии вку́пе,/ воспева́л еси́ дави́дски, Ти́хоне преподо́бне,/ сего́ ра́ди вожделе́в любодру́жное благо́е еди́нство,/ духо́вное бра́тство в пусты́ни сей совокупи́л еси́,/ е́же и назира́й непреста́нно, мо́лим тя,/ пася́ и посеща́я духо́вных чад твои́х/ ко Го́споду моли́твами твои́ми.

Возлюби́те, бра́тие, Бо́га/ и ничто́же предпочти́те па́че любве́ Его́,–/ глаго́лал еси́ ученико́м твои́м,/ уча́ их сло́вом и де́лом, Ти́хоне преподо́бне.–/ Да, егда́ Христо́с яви́тся, Живо́т ваш,/ тогда́ и вы с Ним яви́теся во сла́ве/ и прии́мете че́сть от Него́ со все́ми святы́ми,/ от ве́ка Бо́гу угоди́вшими.

Весели́ся дне́сь и ра́дуйся, пусты́ня Лу́ховская,/ и процвета́й, я́ко крин се́льный,/ се бо умно́жи тебе́ ча́да/ преподо́бный оте́ц наш Ти́хон,/ муж жела́ний духо́вных,/ приводя́ сия́ Христо́ви Пастыренача́льнику/ и моля́ непреста́нно о всех нас.

Сла́ва, глас 6:

Е́же по о́бразу соблю́д невреди́мо,/ во е́же по подо́бию, ели́ко мо́щно, дости́гл еси́, преподо́бне,/ му́жески бо естество́ пону́див,/ потща́лся еси́ ху́дшее покори́ти лу́чшему/ и пло́ть порабо́тити ду́ху./ Те́мже мона́шествующих яви́лся еси́ цвет,/ но́вый пусты́ни жи́тель,/ благотеку́щих обучи́тель,/ зерца́ло соверше́нства духо́внаго/ и пра́вило доброде́телей изве́стное./ Кто изочте́т вся по́двиги и труды́ твоя́?/ Или́ кий язы́к изрече́т жесто́кое твое́ житие́,/ твое́ безме́рное терпе́ние,/ твою́ нищету́ и смире́ние?/ Богоно́се преподо́бне, Богому́дре преблаже́нне, о́тче наш Ти́хоне!/ Предстоя́ ны́не Престо́лу Царя́ сла́вы,/ непреста́нно моли́ся о нас,/ ве́рою и любо́вию чту́щих тя/ и торже́ственно пра́зднующих/ при́сно ра́достную и всепра́зднственную па́мять твою́.

И ны́не, Богоро́дичен по гла́су.

На стихо́вне стихи́ры, глас 4:

Восхожде́ния в се́рдцы твое́м полага́я,/ ум твой помышле́нии о Бо́зе,/ те́ло же твое́ трудолю́бием упражня́я,/ ве́сь освяще́н и Богоно́сен показа́лся еси́,/ Ти́хоне преподо́бне, о́тче наш,/ те́мже и неблагообра́зныя ви́ды пусты́ни/ ве́лие благообра́зие души́ твое́й приплоди́ша,/ моли́ о душа́х на́ших.

Стих: Честна́ пред Го́сподем/ сме́рть преподо́бных Его́.

Не бо́йся, ма́лое ста́до,–/ веща́л еси́ духо́вней па́стве твое́й, о́тче,–/ я́ко благоизво́ли Оте́ц ваш Небе́сный да́ти вам Ца́рство./ Его́же Ца́рствия и нас, духо́вных чад твои́х, сподо́би/ твои́ми к Бо́гу моли́твами.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Ре́вность не по ра́зуму и дерзнове́ние не по Бо́зе/ игу́мена Константи́на слепото́ю теле́сною/ вма́ле наказа́л еси́, о́тче,/ и па́ки прозре́ти ему́ моли́твами твои́ми дарова́л еси́./ Те́мже и на́шу душе́вную слепоту́ просвети́, мо́лим тя,/ све́та живо́тнаго наслажда́яся/ при́сно во Ца́рствии Христа́ и Бо́га.

Стих: Насажде́ни в дому́ Госпо́дни,/ во дво́рех Бо́га на́шего процвету́т.

Пусты́нный жи́тель, и в телеси́ А́нгел,/ и чудотво́рец ди́вен яви́лся еси́ в стране́ сей,/ преподо́бне о́тче наш Ти́хоне приснопа́мятне,/ и, прии́м дар чуде́с от Бо́га,/ исцеля́еши неду́жныя/ и освеща́еши ду́ши ве́рою притека́ющих к тебе́./ Сего́ ра́ди и мы, в честне́й па́мяти твое́й веселя́щеся,/ любо́вию вопие́м ти:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Сла́ва, глас 8:

Ми́ра су́етнаго пре́лесть/ и многомяте́жную молву́, преподо́бне,/ оста́вив любве́ ра́ди Христо́вы,/ в пусты́ню безпло́дную всели́лся еси́/ и Безпло́тных жи́тельству в ней подража́л еси́,/ ты бо ча́да послуша́ния в ней,/ плоды́ терпе́ния твоего́, возрасти́л еси́,/ и, безпло́дное пусты́ни ра́лом смире́ния возде́лав,/ ве́рою насади́в и благоче́стием напои́в,/ во сто́ труды́ и по́двиги твои́ми уплодоноси́л еси́,/ и был еси́ свети́льник све́тлый стране́ сей./ Моли́ непреста́нно спасти́ся душа́м на́шим.

И ны́не, Богоро́дичен.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 5.

Подо́бен: Ра́дуйся:

Ра́дуйся, преподо́бне о́тче Ти́хоне,/ А́нгелов собесе́дниче и преподо́бных соприча́стниче,/ с ни́миже лику́я в Небе́сных оби́телех/ и ра́дуяся, предстои́ши у Престо́ла Влады́ки Христа́ Бо́га,/ Ему́же приле́жно моли́ся,/ стране́ на́шей невре́дне сохране́ной бы́ти,/ умири́ти мир и спасти́ ду́ши на́ша.

Ра́дуйся и весели́ся, пусты́нный жи́телю,/ и́ноком удобре́ние, Ти́хоне треблаже́нне,/ ты бо труды́ и бде́нием, посто́м и моли́твами,/ воздержа́нием и всено́щным стоя́нием/ Христа́ себе́ приобре́л еси́,/ от Него́ же прии́м дар благосты́ни,/ раздава́еши и бога́тно всем,/ притека́ющим к ра́це моще́й твои́х,/ одержи́мым разли́чными неду́ги да́руеши исцеле́ние:/ слепы́м – прозре́ние,/ хромы́м – хожде́ние,/ разсла́бленным – исправле́ние/ и бесны́м, изступи́вшим ума́,– ра́зум и благомы́слие./ Тем мо́лим тя, преподо́бне:/ моли́ся Христу́ Бо́гу/ умири́ти мир и спасти́ ду́ши на́ша.

Ра́дуйся, преподо́бне о́тче Ти́хоне,/ Небе́сный челове́че и земны́й А́нгеле,/ ты бо во пло́ти, я́ко безпло́тен, пожи́л еси́:/ не дал бо еси́ сна твои́ма очи́ма,/ ни ве́ждома дрема́ния,/ до́ндеже сном сме́рти усну́л еси́,/ и Безпло́тных ли́ки дости́гл еси́,/ те́мже и на Небеси́ со А́нгелы ликовству́еши/ и за равноа́нгельное житие́ твое́/ вели́кое воздая́ние восприя́л еси́/ от всех Царя́ Христа́ Бо́га,/ Ему́же приле́жно моли́ся/ умири́ти мир и спасти́ ду́ши на́ша.

Ра́дуйся и весели́ся, Це́рковь Бо́жия,/ красу́йся и лику́й,/ ты бо вои́стинну яви́лася еси́ преукраше́нна,/ сицево́е в себе́ име́ющи сокро́вище,/ благосты́ни исто́чник неоскудева́емый,/ честны́я и многоцеле́бныя мо́щи преди́внаго чудотво́рца Ти́хона,/ его́же моли́твами, о Христе́, всех Царю́,/ стране́ на́шей да́руй на враги́ побе́ду и одоле́ние,/ умири́ мир и спаси́ ду́ши на́ша.

Сла́ва, глас 8:

Прииди́те, мона́шествующих мно́жество,/ прииди́те, христоимени́тии лю́дие,/ прииди́те, вся страны́ Росси́йския земли́,/ смысл и ум от скве́рны очи́стивше,/ и единомы́сленно совоку́пльшеся,/ и к еди́ному Бо́гу взира́юще,/ со стра́хом и богобоя́зненным се́рдцем вни́дем в це́рковь Го́спода/ и ви́дим ико́ну чудотво́рца Ти́хона,/ ю́же, благогове́йне обстоя́ще́, целу́им/ и благода́рными гла́сы Христу́ Бо́гу возопии́м, глаго́люще:/ сла́ва милосе́рдию Твоему́, Христе́ Бо́же,/ сла́ва человеколю́бию Твоему́, Го́споди,/ сла́ва мно́жеству щедро́т Твои́х, Преблаги́й Влады́ка,/ И́же не оста́ви нас, смире́нных раб Твои́х,/ но призре́ на ны с высоты́ жили́ща Твоего́,/ дарова́ нам сицева́го свети́льника,/ преди́внаго чудотво́рца Ти́хона,/ его́же моли́твами, Го́споди,/ стране́ на́шей посо́бствуй на враги́/ и належа́щих нас бед свобо́ди,/ я́ко Человеколю́бец.

И ны́не, Богоро́дичен: Ца́рь Небе́сный:

Проки́мен дне и чте́ния три преподо́бническая.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очеса́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же суть в ми́ре./ Ибо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (главы 5 и 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́,/ внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

На лити́и стихи́ры, глас 1:

О́тче преподо́бне Ти́хоне,/ ты плотска́я стремле́ния всено́щным стоя́нием увяди́л еси́,/ ум и се́рдце твое́ очища́я/ непреста́нными к Бо́гу моли́твами,/ и боля́щим врач изря́дный от Го́спода Бо́га показа́лся еси́,/ и ны́не, преподо́бне, моли́ся/ дарова́ти душа́м на́шим/ мир и ве́лию ми́лость.

О́тче Богому́дре Ти́хоне,/ труды́ твои́ми и воздержа́нием/ в лик по́стников сподо́бился еси́ вчине́н бы́ти/ и, безстра́стием укра́шен,/ всели́лся еси́ во оби́тель преподо́бных и пра́ведных,/ иде́же Свет незаходи́мый и дре́во жи́зни./ И ны́не моли́ся дарова́ти душа́м на́шим/ мир и ве́лию ми́лость.

Сла́ва, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ те́мже на Небеси́ обре́л еси́ мзду трудо́м, твои́м:/ де́монская прогна́л еси́ по́лчища/ и А́нгельския дости́гл еси́ чи́ны,/ и́хже житию́ непоро́чно поревнова́л еси́;/ дерзнове́ние име́я ко Христу́ Бо́гу,/ мир испроси́ душа́м на́шим.

И ны́не: Богоро́дице, Ты еси́ лоза́ и́стинная:

На стихо́вне стихи́ры, глас 4:

Житие́ непоро́чное,/ терпе́ние, и кро́тость, и любо́вь нелицеме́рну,/ воздержа́ние безме́рно,/ всено́щное стоя́ние,/ умиле́ние боже́ственно,/ ве́ру и наде́жду и́стинну,/ ми́лование к скорбя́щим, о́тче, стяжа́в,/ я́ко А́нгел, пожи́л еси́ на земли́ с те́лом,/ Ти́хоне блаже́нне,/ моли́твенниче о душа́х на́ших.

Стих: Честна́ пред Го́сподем/ сме́рть преподо́бных Его́.

Земны́й А́нгел и Небе́сный челове́к/ яви́лся еси́, преподо́бне,/ исто́чник умиле́ния,/ исцеле́ний струя́, пучи́на чуде́с,/ гре́шников моли́твенниче,/ ма́слина Бо́жия вои́стинну плодови́та,/ еле́ем трудо́в твои́х возвесели́ сердца́,/ Ти́хоне чу́дне,/ ве́рно восхваля́ющих тя/ и моли́ Человеколю́бца Бо́га от бед изба́вити/ любо́вию чту́щим честну́ю па́мять твою́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Посто́м и воздержа́нием/ умертви́в мудрова́ние теле́сных страсте́й/ и превы́ше быв смеше́ния до́льних,/ нося́ в себе́ начерта́ние невре́дно,/ первообра́знаго о́браза Боже́ственную добро́ту,/ и познава́ем ве́сь светови́ден,/ де́йством Ду́ха Свята́го, Ти́хоне о́тче наш,/ яви́лся еси́ мона́шествующих удобре́ние.

Сла́ва, глас 8:

Мона́хов мно́жества,/ наста́вника тя почита́ем, о́тче наш Ти́хоне,/ твое́ю бо стезе́ю вои́стинну пра́во ходи́ти позна́хом,/ блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́миже моли́ся Го́сподеви,/ поми́ловатися душа́м на́шим.

И ны́не, Богоро́дичен: Безневе́стная Де́во:

Тропа́рь, глас 4:

Жела́нием духо́вным в пусты́ню всели́лся еси́/ и, та́мо невозвра́тно ше́ствовав Боже́ственными стезя́ми,/ дости́гл еси́ в Небе́сныя оби́тели,/ и ны́не со А́нгелы предстои́ши/ у Престо́ла всех Царя́ Христа́ Бо́га,/ Ему́же приле́жно моли́ся/ поми́ловати град сей и лю́ди,/ ве́рою пра́зднующия пречестну́ю па́мять твою́,/ Ти́хоне преподо́бне, о́тче наш.

Сла́ва, и ны́не: Е́же от ве́ка утае́ное:

НА У́ТРЕНИ

На Бог Госпо́дь: тропа́рь свята́го два́жды. Сла́ва, и ны́не, Богоро́дичен.

По 1-м стихосло́вии седа́лен, глас 1:

О́тче Ти́хоне,/ ты плотска́я стремле́ния всено́щным стоя́нием увяди́л еси́,/ ду́шу же просвети́л еси́/ и на Небесе́х от Христа́ вели́кое возме́здие восприя́л еси́./ Тем благоугоди́л еси́ Бо́гу,/ Ему́же моли́ся дарова́ти душа́м на́шим мир и ве́лию ми́лость.

Сла́ва, и ны́не, Богоро́дичен:

Моли́твы Твои́х раб приими́, Богоро́дице,/ и изба́ви нас от вся́кия беды́,/ я́ко ро́ждшая Христа́ Бо́га, Изба́вителя душ на́ших.

По 2-м стихосло́вии седа́лен, глас 2:

О́тче Богому́дре Ти́хоне,/ ты подо́бник был еси́ по́стником,/ безстра́стием укра́шен, всели́лся еси́ во оби́тель преподо́бных и пра́ведных,/ иде́же Свет незаходи́мый и дре́во жи́зни,/ и ны́не моли́ся дарова́ти душа́м на́шим мир и ве́лию ми́лость.

Сла́ва, и ны́не, Богоро́дичен:

Бо́жию естеству́ бы́хом о́бщницы Тобо́ю, Богоро́дице Присноде́во:/ Бо́га бо нам воплоще́нна родила́ еси́./ Те́мже по до́лгу Тя вси благоче́стно велича́ем.

По полиеле́и седа́лен, глас 4:

О́тче Богому́дре Ти́хоне,/ ты свети́льник был еси́,/ просвеща́я Росси́йскую зе́млю чуде́сными сия́нии,/ и душетле́нных неду́г тьму́ отгоня́я,/ и благоче́стно пра́зднующим па́мять твою́/ подая́ свы́ше спаси́тельное избавле́ние от бед и скорбе́й./ И ны́не моли́ся дарова́ти душа́м на́шим мир и ве́лию ми́лость.

Сла́ва, и ны́не, Богоро́дичен:

Стена́ непобеди́мая христиа́ном еси́, Богоро́дице Де́во,/ к Тебе́ бо прибега́юще, невреди́ми пребыва́ем/ и, па́ки согреша́юще, и́мамы Тя Моли́твенницу./ Тем, благодаря́ще, вопие́м Ти:/ ра́дуйся, Обра́дованная, Госпо́дь с Тобо́ю.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне и преблаже́нне о́тче Ти́хоне,/ ты вои́стинну сподо́бился еси́ блаже́нныя жи́зни,/ посто́м бо и бде́нием изнуря́я те́ло свое́,/ о́браз был еси́ и́ноком,/ и а́ще теле́сный ти язы́к умолче́,/ но чудеса́ свиде́тельствуют:/ пусты́ня, пропове́дуя, ра́дуется,/ име́я в себе́ неистощи́мое сокро́вище,/ лю́дие же, зря́ще честны́й гроб моще́й твои́х/ и чудеса́, тобо́ю соверша́емая,/ прославля́ют просла́вльшаго тя Го́спода,/ Ему́же моли́ся непреста́нно,/ дарова́ти стране́ на́шей на враги́ побе́ду и одоле́ние/ и вселе́нней мир и ве́лию ми́лость.

Кано́н, глас 8.

Песнь 1

Ирмо́с: Посе́ченный несеко́маго пресече́,/ и ви́де со́лнце зе́млю, ю́же не ви́де,/ лю́таго врага́ вода́ потопи́,/ и непроходи́мое про́йде Изра́иль./ Пе́снь же воспева́шеся:/ Го́сподеви пои́м, сла́вно бо просла́вися.

Разреши́ мглу мои́х согреше́ний, Христе́ Спа́се,/ и не помяни́ мои́х грехо́в мно́жества,/ но Твои́м мя све́том просвети́, Влады́ко,/ и отве́рзи ми недосто́йнии устне́,/ я́ко да возмогу́ воспева́ти уго́дника Твоего́, преблаже́ннаго Ти́хона,/ и́же Тебе́ ра́ди, я́ко безпло́тен, подвиза́ся.

Посто́м, и моли́твами, и сле́зными пото́ки дом Пресвято́му Ду́ху себе́ угото́вал еси́,/ Его́же сия́ньми, я́ко звезда́ светоно́сная, яви́лся еси́,/ и́миже просвети́, молю́ тя, души́ моея́ зе́ницы,/ и све́том покая́ния озари́ мя,/ и облецы́ мя во ору́жие све́та,/ я́ко да возмогу́ воспе́ти по́двиги твоя́, преподо́бне о́тче.

Све́том Трисо́лнечнаго Божества́ озари́вся, преподо́бне,/ неви́димых враг шата́ния и ко́зни низложи́в, попра́л еси́,/ и от Христа́ Бо́га сугу́б вене́ц прия́л еси́,/ и весе́лие, и ра́дость, и сла́ву ве́чную насле́довал еси́,/ ея́же нам сподо́битися моли́твами твои́ми моли́ Ми́лостиваго Бо́га,/ преблаже́нне о́тче наш Ти́хоне.

Богоро́дичен: Просвети́, Чи́стая, ду́шу мою́, омраче́нную грехо́вными страстьми́,/ и ве́чнаго мя пла́мене и тьмы́ изба́ви хода́тайством Твои́м, Влады́чице,/ я́ко да, ра́дуяся, воспою́ пресвято́е рождество́ Твое́, Де́во Ма́ти Чи́стая.

Песнь 3

Ирмо́с: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,/ возвесели́хся о спасе́нии Твое́м.

Разреши́вся от теле́сных уз, блаже́нне,/ и к высоте́ Небе́сней, ра́дуяся, возше́л еси́,/ и в пребыва́лища присноживу́щая всели́лся еси́,/ иде́же в ли́це преподо́бных и пра́ведных вели́кое возме́здие от Христа́ Бо́га восприя́л еси́,/ досточу́дне о́тче наш Ти́хоне.

Жела́нием духо́вным в пусты́ню дости́гл еси́,/ и в ней трудолю́бно подвиза́лся еси́,/ непреста́нными моли́твами к Бо́гу, приближа́яся,/ и превознося́щагося врага́ до конца́ смири́л еси́,/ те́мже ны́не с невеще́ственными ли́ки, блаже́нне, водворя́ешися.

Дарова́ние чуде́с от Христа́ Бо́га сподо́бился еси́ восприя́ти,/ и, я́коже со́лнце, сия́еши всю́ду исцеле́ния,/ и, я́ко лучу́, испуща́еши благодея́ния твоя́ всем, ве́рою притека́ющим к моще́м твои́м/ и све́тло пра́зднующим па́мять твою́, досточу́дне о́тче наш, Ти́хоне преподо́бне.

Богоро́дичен: Пренепоро́чная Влады́чице,/ моли́ Сы́на Твоего́, Христа́ Бо́га на́шего,/ Его́же родила́ еси́, Неискусобра́чная Де́во,/ и млеко́м пита́ла еси́, Пита́теля вся́ческих,/ я́ко да ми́лостив бу́дет нам в Де́нь стра́шнаго прише́ствия Его́.

Седа́лен, глас 4:

Стра́стное покори́л еси́ плотско́е мудрова́ние/ и го́ршая порабо́тил еси́ лу́чшему, о́тче наш Ти́хоне пресла́вне,/ сокруши́в бесо́вския ко́зни посто́м,/ сия́нии твои́х доброде́телей возсия́л еси́ в ми́ре, я́ко луча́ со́лнечная,/ сего́ ра́ди тя воспева́ем.

Сла́ва, и ны́не, Богоро́дичен:

Стена́ непобеди́мая нам, христиа́ном, еси́, Богоро́дице Де́во,/ к Тебе́ бо прибега́юще, и́мамы Тя Моли́твенницу,/ тем, благодаря́ще, вопие́м Ти:/ ра́дуйся, Обра́дованная, Госпо́дь с Тобо́ю.

Песнь 4

Ирмо́с: Проро́к Авваку́м у́мныма очи́ма/ прови́де Го́споди, прише́ствие Твое́,/ тем и вопия́ше:/ от ю́га прии́дет Бог./ Сла́ва си́ле Твое́й, сла́ва снизхожде́нию Твоему́.

Посто́м и моли́твами, бде́нием и воздержа́нием,/ я́ко огне́м, хвра́стие бесо́вское попали́л еси́/ и, Небе́сных врат дости́г невозбра́нно, преподо́бне о́тче Ти́хоне,/ обре́л еси́ е́же вну́трь вхожде́ние,/ иде́же зри́ши жела́емаго ти Христа́, от А́нгел сла́вима.

Сия́нием чуде́с, я́ко луча́ со́лнечна, облиста́еши,/ я́ко звезда́ пресве́тлая, озаря́еши всю́ду/ и, я́ко крин, дави́дски в пусты́ни све́тло процве́л еси́,/ ве́рных сердца́ просвеща́еши/ и телесе́м здра́вие неоску́дно да́руеши/ всем, ве́рою притека́ющим к моще́м твои́м,/ преподо́бне о́тче наш Ти́хоне.

Доброде́тельми, я́ко во броня́, обо́лкся еси́, преподо́бне, от Христа́ Вседержи́теля,/ и вся лука́ваго кова́рства и бра́ни до́бльственне претерпе́в,/ победи́л еси́ бесо́вския полки́,/ тем ны́не со А́нгелы лику́еши,/ с ни́миже Христу́ Бо́гу моли́ся спасти́ вся, почита́ющия тя, о́тче наш Ти́хоне.

Богоро́дичен: И́же всех Творца́ и Го́спода ро́ждшая, Пречи́стая Де́во,/ изба́ви нас му́ки и ве́чнаго осужде́ния,/ Тя воспева́ющих Богороди́тельнице Чи́стая.

Песнь 5

Ирмо́с: Мрак души́ моея́ разжени́, Светода́вче Христе́ Бо́же,/ началоро́дную тьму́ изгна́в бе́здны,/ и да́руй ми свет повеле́ний Твои́х, Сло́ве,/ да, у́тренюя, сла́влю Тя.

Посто́м и воздержа́нием, я́ко живото́чным исто́чником, напая́я себе́,/ клас Боже́ственный возрасти́л еси́,/ и́мже пита́еши неоску́дно всех, ве́рою притека́ющих к моще́м твои́м,/ преподо́бне о́тче Ти́хоне.

Ве́ру и́стинную и любо́вь стяжа́л еси́ к Триеди́ному Бо́гу,/ сего́ ра́ди устрани́вся ми́ра, в пусты́ню всели́лся еси́,/ иде́же мно́гими труды́ и боле́зньми те́ло свое́ изнури́л еси́,/ и ны́не, ра́дуяся, зри́ши жела́емаго Христа́,/ к Нему́ же воздви́гни ру́це свои, преподо́бне,/ и от собла́зн вра́жиих пою́щия тя сохрани́,/ Ти́хоне, о́тче наш.

Я́ко свети́ло вели́кое яви́лся еси́, преподо́бне,/ богодарова́нными ти чудесы́ ве́сь мир просвеща́я,/ и, я́ко от исто́чника неистоща́емаго, струи́ испуща́еши исцеле́ния/ всем, ве́рою притека́ющим и облобыза́ющим ра́ку моще́й твои́х,/ да́руя здра́вие неоску́дно.

Богоро́дичен: Изба́ви град и лю́ди, прибега́ющая к Тебе́,/ Богороди́тельнице Чи́стая, роди́вшая Христа́ Бо́га,/ Его́же пое́т вся тва́рь и трепе́щут Го́рнии Престо́ли./ Того́ моли́, Всепе́тая, спасти́ ду́ши на́ша.

Песнь 6

Ирмо́с: Я́ко во́ды морски́я, Человеколю́бче,/ волна́ми жите́йскими обурева́юся./ Те́мже, я́ко Ио́на, та́ко вопию́ Ти:/ возведи́ от тли живо́т мой, Благоутро́бне Го́споди.

Дне́сь возсия́ па́мять твоя́, преподо́бне, я́ко звезда́ пресве́тлая,/ чуде́сными блиста́ньми просвеща́еши,/ и мрак грехо́вный отгоня́еши,/ и телесе́м здра́вие неоску́дно да́руеши,/ слепы́я просвеща́я, разсла́бленныя укрепля́я и бе́сы прогоня́я.

Боле́зньми, и труды́, и зе́льным воздержа́нием/ душетле́нныя стра́сти умертви́л еси́,/ я́ко безпло́тен, во пло́ти пожи́л еси́,/ светлообра́зен всегда́ явля́яся,/ и дарова́ния чуде́с сподо́бился еси́ от Христа́ Бо́га,/ больны́я и прокаже́нныя исцеля́я/ и стра́ждущим от духо́в нечи́стых проще́ние да́руя.

Красоты́ мирски́я возненави́дев,/ сла́ву же мимотеку́щую и бога́тство нивочто́же вмени́в,/ еди́наго Христа́ возлюби́л еси́,/ и Тому́ все́ю душе́ю прилепи́лся еси́,/ и от Него́ прия́л еси́ Небе́сное бога́тство и сла́ву ве́чную.

Богоро́дичен: Ра́дуйся, пресве́тлый Свети́льниче,/ Нескве́рная А́гнице, Пречи́стая Влады́чице,/ ра́дуйся ро́ждшая от пречи́стую боку́ Твое́ю А́гнца и Па́стыря, Христа́ Бо́га на́шего,/ Его́же моли́ спасти́ Тя воспева́ющих.

Конда́к, глас 8:

Христо́вою любо́вию уязви́вся, преподо́бне,/ во след Его́ невозвра́тно ше́ствовал еси́,/ посто́м и воздержа́нием плотски́я стра́сти умертви́л еси́,/ бде́нием же и моли́твами вселука́ваго врага́ до конца́ низложи́л еси́/ и слеза́ми, я́ко еле́ем, свещу́ све́тлу себе́ угото́вал еси́;/ те́мже в Небе́сныя оби́тели невозбра́нно вшел еси́,/ иде́же, ра́дуяся, Го́сподеви предстои́ши,/ Ему́же приле́жно моли́ся, мо́лим тя,/ я́ко да ми́лостив нам бу́дет в Де́нь стра́шнаго Его́ прише́ствия,/ и да не пребу́дем и мы вне черто́га Христо́ва,/ но да сподо́бит ны одесну́ю Себе́ ста́ти/ моли́твами твои́ми, преподо́бне, да зове́м ти:/ ра́дуйся, Богому́дре о́тче наш Ти́хоне.

Песнь 7

Ирмо́с: Халде́йская пе́щь, огне́м распаля́емая,/ ороша́шеся Ду́хом, Бо́жиим предстоя́нием,/ о́троцы поя́ху:/ благослове́н еси́, Бо́же оте́ц на́ших.

Отлучи́вся мирска́го пристра́стия,/ бо́дренными моли́твами и всено́щным стоя́нием жи́знь свою́ препроводи́л еси́/ и Ду́ху Пресвято́му храм себе́ соде́лал еси́,/ Его́же де́йством бесо́вския полки́ победи́л еси́/ и без ве́сти сих сотвори́л еси́.

Любве́ ра́ди Христо́вы, Ти́хоне преподо́бне, в пусты́нях и гора́х живы́й,/ плотско́е мудрова́ние до конца́ умертви́л еси́,/ кре́пким поще́нием и жесто́ким воздержа́нием жи́знь свою́ соверши́л еси́,/ и на Небеси́ житие́ себе́ стяжа́л еси́,/ иде́же святы́х ду́хи ра́дуются и ликовству́ют.

Влады́чнему смире́нию подража́л еси́, преподо́бне,/ те́сный и приско́рбный пу́ть во́лею ше́ствовав:/ не пощаде́л бо еси́ пло́ти своея́,/ но преда́л еси́ ю на по́двиги и труды́,/ сего́ ра́ди от Вседержи́тельныя руки́ прия́л еси́ неувяда́емый вене́ц.

Богоро́дичен: И́же пре́жде всех век Бог Сый/ в Твою́ пречи́стую утро́бу воплоти́ся неизрече́нным соше́ствием,/ Богоотрокови́це Чи́стая и Неискусобра́чная Де́во,/ Ты бо во всех ро́дех избра́ся бы́ти жили́ще Христу́ Бо́гу,/ Его́же моли́, Всепе́тая, спасти́ ду́ши, воспева́ющия Сы́ну Твоему́:/ оте́ц на́ших Бо́же, благослове́н еси́.

Песнь 8

Ирмо́с: На горе́ святе́й просла́вльшася/ и в купине́ огне́м Присноде́вы Моисе́ови та́йну я́вльшаго,/ Го́спода по́йте/ и превозноси́те во вся ве́ки.

То́ки сле́зными страсте́й пучи́ну изсуши́л еси́,/ и вся лука́ваго кова́рства кре́пким воздержа́нием, я́ко се́ть, разто́ргнул еси́,/ сего́ ра́ди дости́гл еси́ в Го́рний Иерусали́м/ и та́мо со А́нгелы сла́виши Еди́наго Триипоста́снаго Бо́га,/ Ему́же не преста́й моля́ся, изба́витися нам бед и скорбе́й,/ от вся́кия ну́жды и печа́ли моли́твами твои́ми, преподо́бне о́тче наш Ти́хоне.

Гроб моще́й твои́х, преподо́бне,/ я́ко ма́слина плодови́та, яви́ся в це́ркви Животворя́щаго Креста́ Госпо́дня,/ от него́же, я́ко плоды́, боля́щим разли́чными неду́ги подаю́тся исцеле́ния,/ бесо́вския полки́, я́коже с высоты́ мо́лниею, посека́ются и попаля́ются,/ ве́рных же сердца́ к Боже́ственному ра́зуму наставля́ются.

Воздержа́нием и чистото́ю, я́коже крило́ма, впери́вся,/ от земны́х к Вы́шним све́тлостем пресла́вно восте́кл еси́/ и, Трисо́лнечнаго Божества́ заре́ю просвети́вся,/ всю́ду сия́еши, я́коже свети́ло./ Те́мже мо́лим тя, преподо́бне:/ моли́ Милосе́рдаго Бо́га просвети́ти ду́ши на́ша/ и телеса́ очи́стити нам,/ ве́рою творя́щим святу́ю па́мять твою́, досточу́дне о́тче наш Ти́хоне.

Богоро́дичен: Чи́стая и Всенепоро́чная Де́во,/ Я́же во святы́х Свята́го почива́ющаго родила́ еси́, Бо́га Сло́ва,/ Его́же моли́, Влады́чице, изба́вите нас напа́стей, и бед,/ и лю́таго ве́чнаго осужде́ния,/ Тебе́ бо Предста́тельницу вси, су́щии в печа́лех, стяжа́хом,/ я́ко ро́ждшую спасе́ние на́ше, Ему́же пое́м:/ благослови́те Го́спода, по́йте и превозноси́те Его́ во ве́ки.

Песнь 9

Ирмо́с: Благослове́н Госпо́дь, Бог Изра́илев,/ воздви́гнувый рог спасе́ния нам/ в дому́ Дави́дове, о́трока Своего́,/ в ни́хже посети́ нас Восто́к с высоты́/ и напра́вил ны е́сть на пу́ть ми́ра.

Ми́ра преоби́дев, бога́тство же и сла́ву, я́ко прах, вмени́в,/ Христа́ еди́наго возлюби́л еси́/ и, к Тому́ потща́вся усе́рдно приити́, всели́лся еси́ в пусты́ню,/ в не́йже обре́л еси́ пра́вый пу́ть,/ и́мже небла́зненно преше́л еси́ к жела́емому ти Влады́це Христу́,/ посто́м, и моли́твами, и всено́щным стоя́нием.

Христо́вым раче́нием па́че огня́ распала́емь,/ настоя́щая же и мимотеку́щая, я́ко уме́ты, вмени́в,/ стра́сти теле́сныя, я́ко пле́нника вери́гами, посто́м связа́л еси́/ и ду́хови повину́лся еси́,/ сего́ ра́ди стра́шен враго́м яви́лся еси́/ и сла́вен челове́ком, Ти́хоне преподо́бне.

Очи́стив ум свой, преподо́бне,/ и в пусты́ни, я́ко в ца́рских черто́зех, со мно́гим весе́лием живы́й,/ душетле́нныя стра́сти воздержа́нием умертви́л еси́,/ и сле́зными пото́ки лука́ваго зми́я, я́ко в мо́ри, погрузи́л еси́,/ и, я́ко прах, того́ без ве́сти сотвори́л еси́,/ досточу́дне о́тче наш Ти́хоне.

Богоро́дичен: Ты еси́, Пречи́стая, всему́ ми́ру прибе́жище, Богороди́тельнице Мари́е,/ мирски́х мя собла́зн и страсте́й теле́сных свободи́,/ и ве́чнующия му́ки и гее́нны изба́ви,/ и прича́стника мя сотвори́ Небе́сному Ца́рствию хода́тайством Твои́м, Влады́чице.

Свети́лен, глас 8.

Подо́бен: Жены́, услы́шите:

Процве́л еси́, я́ко фи́никс, дави́дски, о́тче,/ и оби́тель яви́лся еси́ Ду́ха Пречи́стаго,/ И́же сла́вна тя вселе́нней показа́./ О нас непреста́нно моли́,/ почита́ющих ве́рою пречестну́ю па́мять твою́,/ преподо́бне о́тче наш Ти́хоне.

Сла́ва, и ны́не, Богоро́дичен:

Тя пе́сньми немо́лчными ублажа́ем, Де́во,/ я́ко от Тро́ицы Еди́наго родила́ еси́, Богоро́дице,/ и но́сиши на Боже́ственную руку́ Пребога́тое Сло́во,/ Е́же непреме́нно и неизме́нно.

На хвали́тех стихи́ры, глас 8.

Подо́бен: Му́ченицы Госпо́дни:

Преподо́бен и че́стен, свети́льник Боже́ственный и светоно́сный/ под спу́дом жите́йския толстоты́ никогда́же скрыва́ется,/ но на версе́ полага́ет его́ высо́ких чуде́с Человеколю́бец,/ того́ моли́твами, Христе́,/ да́руй лю́дем Твои́м ве́лию ми́лость.

На ра́ло возложи́л еси́, всече́стне,/ де́лание руку́ твое́ю,/ де́лающу ти всегда́ Боже́ственныя,/ и не возврати́лся еси́ зря вспя́ть,/ те́мже был еси́ упра́влен/ во Ца́рствие Христа́, вопло́щшагося Бо́га,/ во спасе́ние душа́м на́шим.

В ладии́ теле́сней вози́м/ кро́ткими дыха́нии кро́ткаго Ду́ха,/ легко́ преше́л еси́ жите́йскую пучи́ну, му́дре,/ и на Би́сере многоце́ннем твоя́ име́ния прода́в,/ и обре́т Его́, в себе́ удержа́л еси́,/ блаже́н быв Боже́ственными добро́тами Его́.

Сла́ва, глас 5:

Преподо́бне о́тче,/ глас Ева́нгелия услы́шав,/ мир оста́вил еси́,/ бога́тство и сла́ву нивочто́же вмени́в,/ и всем, послу́шающим тя, вопия́л еси́:/ возлюби́те Бо́га, и обря́щете благода́ть ве́чную,/ и ничто́же предпочти́те, па́че любве́ Его́,/ егда́ да прии́дет во сла́ве Свое́й,/ тогда́ обря́щете благода́ть со все́ми святы́ми./ Тех моли́твами и уго́дника Твоего́, Влады́ко Христе́,/ сохрани́ и спаси́ ду́ши на́ша.

И ны́не, Богоро́дичен:

Блажи́м Тя, Богоро́дице Де́во,/ и сла́вим Тя, ве́рнии, по до́лгу,/ град непоколеби́мый, сте́ну необори́мую,/ тве́рдую Предста́тельницу/ и прибе́жище душ на́ших.

Та́же: Славосло́вие вели́кое. И отпу́ст.

НА ЛИТУРГИ́И

Блаже́нны, от кано́на пе́сни 3-я и 6-я. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную:

Моли́тва

О свяще́нная главо́, преподо́бне и достоблаже́нне о́тче наш Ти́хоне! Ты вои́стинну муж жела́ний духо́вных и вторы́й Дании́л показа́лся еси́. Я́коже бо о́ный дре́вний высо́кою доброде́телию и сто́йкостию жития́ своего́ Небе́сных виде́ний и ди́вных открове́ний сподо́бился, си́це и ты, преподо́бне, восхожде́ния в се́рдцы свое́м полага́я, преспева́л еси́ в доброде́телех, восходя́ от си́лы в си́лу и, я́ко до́брый и ве́рный раб, вшел еси́ в ра́дость Го́спода твоего́. Те́мже и мы, я́ко духо́вная ча́да твоя́, любо́вию побужда́еми, похва́льная песнопе́ния в честне́й па́мяти твое́й по ме́ре ве́ры на́шея тебе́ воспису́ем и моли́твенно на по́мощь на́шей не́мощи призыва́ем. Смире́нно мо́лим тя, преподо́бне и пресла́вне о́тче наш Ти́хоне: твои́ми благоприя́тными ко Го́споду моли́твами заступи́ возлю́бленную тобо́ю пусты́ню сию́, град же и ве́сь, и всех, ве́рою чту́щих святу́ю па́мять твою́, от вся́каго наве́та сопроти́внаго, от вся́ких бед и напа́стей и от вся́каго зла. Моли́ся, преподо́бне, о стране́ на́шей, умоли́ Ми́лостиваго Бо́га и о нас, смире́нных и недосто́йных, да отпу́стит нам вся прегреше́ния на́ша, да спасе́т нас благода́тию Свое́ю и сподо́бит ра́дости ве́чныя наслажда́тися в Го́рнем о́нем Иерусали́ме, и́же е́сть ма́ти всем нам, ку́пно с тобо́ю и со все́ми святы́ми, от ве́ка Ему́ благоугоди́вшими, в ни́хже в Тро́ице сла́вимый Бог благослове́н е́сть всегда́, ны́не, и при́сно, и во ве́ки веко́в. Ами́нь.