Служба в честь преподобнаго Стефана, игумена Махрищскаго
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4, глас 1.
Подо́бен: Небе́сных чино́в:
Наста́, Богоно́се, со́лнца светле́йший твой пра́здник,/ озаря́ет приходя́щия к тебе́ ве́рою,/ и безсме́ртием облагоуха́ет,/ и душа́м источа́ет исцеле́ния,/ Стефа́не преподо́бне,/ моли́твенниче о душа́х на́ших.
Крест Госпо́день взем, преподо́бне Стефа́не,/ и́стинно после́довал еси́ Христу́,/ нас ра́ди на Кресте́ распе́ншемуся,/ и Его́ ра́ди любве́ вся оста́вил еси́,/ и Того́ еди́наго возлюби́л еси́,/ Его́же моли́ спасти́ся нам.
Чу́вственныя стра́сти теле́сныя/ победи́в воздержа́ния бразда́ми,/ чудоде́йственниче Стефа́не,/ и ре́вности безпло́тных на земли́ показа́в,/ вся плотска́я жела́ния ду́ху повину́л еси́,/ тем ны́не в Небе́сных селе́ниих водворя́яся,/ моли́ о душа́х на́ших.
Блаже́нне Стефа́не,/ основа́ние положи́в доброде́тели,/ дре́вняго челове́ка совле́клся еси́ с похотьми́/ и во Христа́ обле́клся вои́стинну,/ тем и обличи́л еси́, преподо́бне, мно́гая вра́жия ополче́ния,/ наста́вник мона́хов быв./ Моли́ спасти́ся душа́м на́шим.
Сла́ва, глас 6:
Све́тлый днесь возсия́ нам и всепра́зднственный день,/ я́коже второ́е со́лнце,/ просвеща́я, и наставля́я, и отгоня́я тьму помраче́ния на́шего,/ ве́рных созыва́ет любо́вию/ к честне́й ра́це припа́дати и облобыза́ти ю./ Моли́, мо́лимся, о́тче Стефа́не,/ да́ти ми́ру мир/ и душа́м на́шим ве́лию ми́лость.
И ны́не, Богоро́дичен: Богоро́дице, Ты еси́ лоза́ и́стинная:
На стихо́вне стихи́ры, глас 2.
Подо́бен: До́ме Евфра́фов:
Дом Ду́ха Свята́го/ был еси́, преподо́бне,/ просвеща́я и наставля́я/ ве́рою и любо́вию/ притека́ющих к тебе́.
Стих: Честна́ пред Го́сподем/ смерть преподо́бных Его́.
Блаже́н вои́стинну/ и преблаже́н яви́лся еси́,/ преподо́бне Стефа́не,/ мона́шествующих наста́вниче/ и благоче́стия побо́рниче.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Прииди́те, ублажи́м/ преподо́бнаго Стефа́на,/ по́стника и возде́ржника/ и мона́хов нача́льника,/ Пресвяте́й Тро́ице уго́дника.
Сла́ва, глас то́йже:
Прииди́те днесь, ли́цы мона́шестии,/ притеце́м ко гро́бу преподо́бнаго Стефа́на,/ моля́щеся Христу́ Бо́гу на́шему,/ прося́ще грехо́в проще́ние,/ и наро́ду на́шему на враги́ побе́ды,/ и плене́нным свобожде́ния, и ми́ру устрое́ния,/ и Це́рквам соедине́ния,/ и душа́м на́шим ве́лия ми́лости.
И ны́не, Богоро́дичен: Все упова́ние мое́:
Тропа́рь пи́сан на вели́цей вече́рни.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8, глас 2.
Подо́бен: Егда́ от Дре́ва:
Боже́ственный глас Ева́нгелия Христо́ва услы́шав,/ ми́ра оста́вил еси́ бога́тство и сла́ву,/ и, крест свой на ра́мо взем,/ Христо́ви после́довал еси́ невозвра́тным по́мыслом,/ и те́сный путь по́стничества проше́л еси́, ра́дуяся,/ и а́нгельским лико́м прича́стник показа́лся еси́,/ Богому́дре Стефа́не преподо́бне,/ с ни́ми же моли́ся о чту́щих честну́ю па́мять твою́.
Егда́ Боже́ственное раче́ние на́йде на тя, Стефа́не прему́дре,/ тогда́ оте́чество оста́вил еси́,/ в пусты́ню, я́ко во град, всели́лся еси́,/ и та́мо мона́хов сонм собра́л еси́,/ с ни́ми же порабо́тал еси́ Христу́,/ Его́же ра́ди распя́лся еси́ ми́рови,/ и с ми́ром к преми́рному, ра́дуяся, возше́л еси́,/ иде́же а́нгельская во́инства веселя́тся,/ с ни́ми же моли́ся о чту́щих честну́ю па́мять твою́.
Егда́ благода́ть Свята́го Ду́ха се́рдце твое́ просвети́, Стефа́не,/ тогда́ Тро́ицы прекра́сное селе́ние яви́лся еси́,/ Е́юже наставля́емь, святы́я хра́мы созда́л еси́, блаже́нне,/ и оби́тели на спасе́ние мона́хов,/ и́хже на зла́це воздержа́ния упа́сл еси́/ и твои́ми уче́нии по Небе́сней стези́ ше́ствовати наста́вил еси́,/ с ни́ми же почита́ем твою́ честну́ю па́мять.
Сла́ва, глас 6:
Е́же по о́бразу соблю́д невреди́мо,/ ум влады́ку на стра́сти па́губныя по́стнически поста́вив,/ и на подо́бие, я́коже мо́щно, возше́л еси́:/ му́жески бо естество́ пону́див,/ потща́лся еси ху́ждшее покори́ти лу́чшему/ и плоть порабо́тити ду́ху,/ те́мже мона́шествующих яви́лся еси́ вождь,/ жи́тель пусты́нный, благотеку́щих обучи́тель,/ пра́вило доброде́тели изве́стнейшее,/ и ны́не на Небесе́х, о́тче наш Стефа́не,/ чи́сте зри́ши Святу́ю Тро́ицу,/ моля́ся о и́же ве́рою и любо́вию чту́щих тя.
И ны́не, Богоро́дичен: Кто Тебе́ не ублажи́т:
Вход. Проки́мен дне. И чте́ния 3 преподо́бническая.
Прему́дрости Соломо́новы чте́ние (главы́ 5 и 6):
Пра́ведницы во ве́ки живу́т, и в Го́споде мзда́ их,/ и попече́ние их у Вы́шняго./ Сего́ ра́ди прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я́ и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т,/ и от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я́ на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На лити́и стихи́ры, глас 6:
И́же на земли́ а́нгела/ и на Небеси́ челове́ка Бо́жия,/ ми́ру благо́е украше́ние,/ о́браз доброде́телей,/ по́стников похвалу́,/ Стефа́на вели́каго почти́м:/ насажде́н бо в дому́ Госпо́дни/ и процвете́ пра́ведно, я́ко кедр в пусты́ни,/ умно́жив ста́до Христо́во слове́сных ове́ц/ в преподо́бии и пра́вде.
Кий ра́зум челове́ческий или́ язы́к/ возмо́жет изрещи́ или́ похвали́ти по досто́инству житие́ твое́?/ И са́ми А́нгели житию́ твоему́, е́же на земли́ в телеси́, удиви́шася/ и похвали́ша Христа́,/ толи́кую побе́ду, преподо́бне, тебе́ на стра́сти дарова́вшаго,/ Его́же моли́, прехва́льне, спасти́ся нам.
Блаже́нна оби́тель,/ иму́щая в себе́ честны́я мо́щи твоя́, преподо́бне,/ от ни́хже истека́ют ве́рным исцеле́ния;/ блаже́нни же ученицы́ твои́,/ такова́го учи́теля себе́ стяжа́вше/ и такова́ отца́ ча́да наре́кшеся,/ Стефа́не пречу́дне, моли́твенниче о душа́х на́ших.
Глас 4:
Пресве́тлый и светоно́сный, Богому́дре Стефа́не,/ твой приспе́ пра́здник,/ созыва́ющий мона́хов мно́жества/ просла́вити и пе́ти твое́ честно́е успе́ние,/ прося́щих от Христа́ хода́тайством твои́м/ прия́ти ве́лию ми́лость.
Сла́ва, глас 2:
Пусты́ня, пре́жде непло́дствующи,/ ны́не весели́тся,/ зря́щи в себе́ лик мона́хов,/ обстоя́щих всечестны́й гроб пречу́днаго отца́ своего́/ и духо́вно веселя́щихся,/ и́же пра́зднственная торжеству́ют, глаго́люще:/ ра́дуйся, свети́льниче пресве́тлый,/ и́же чудесы́ сия́я, озаря́еши ду́ши ве́рных;/ ра́дуйся, о́тче всеблаги́й,/ умно́живый ча́да духо́вная в пусты́ни безмо́лвней,/ о ни́хже труды́ и по́ты полага́я,/ ду́шу твою́ пре́дал еси́ Бо́гу,/ Ему́же моли́ся, свя́те Стефа́не, о нас, ча́дех твои́х,/ благоче́стне па́мять твою́ пра́зднующих,/ изба́вити от наве́т вра́жиих,/ я́ко да, до́бре сконча́вше жизнь свою́,/ дерзнове́ние получи́м в день стра́шнаго испыта́ния.
И ны́не, Богоро́дичен:
Все упова́ние мое́/ на Тя возлага́ю, Ма́ти Бо́жия,/ сохрани́ мя под кро́вом Твои́м.
На стихо́вне стихи́ры, глас 1.
Подо́бен: Прехва́льнии му́ченицы:
Стефа́не пребога́те,/ душе́вныя стра́сти от ко́рене исто́ргл еси́/ и теле́сная чу́вства поработи́л еси́ добро́тами твоего́ жития́,/ и, чуде́с благода́ти сподо́бився,/ Христо́ви моли́ся дарова́ти душа́м на́шим/ мир и ве́лию ми́лость.
Стих: Честна́ пред Го́сподем/ смерть преподо́бных Его́.
Стефа́не преподо́бне,/ твои́м кре́пким воздержа́нием и непреста́нною моли́твою/ стра́сти теле́сныя умертви́в,/ бесо́вския полки́ посрами́л еси́/ и А́нгелы возвесели́л еси́,/ с ни́ми же Христо́ви моли́ся дарова́ти душа́м на́шим/ мир и ве́лию ми́лость.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Стефа́не преподо́бне,/ в пусты́нях и гора́х ты, бе́гая, удали́лся еси́,/ сла́ву вре́менную пренебре́гл еси́/ и Небе́сней сла́ве насле́дник был еси/ и А́нгелом собесе́дник,/ с ни́ми же Престо́лу Царя́ Христа́ Бо́га предстоя́,/ моли́ся дарова́ти душа́м на́шим/ мир и ве́лию ми́лость.
Сла́ва, глас 8:
Мона́хов мно́жества,/ наста́вника тя чтим, о́тче наш Стефа́не,/ тобо́ю бо путь пра́вый ходи́ти позна́хом:/ блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелом собесе́дниче и вели́кому Се́ргию соприча́стниче,/ с ни́ми же моли́ся Го́сподеви/ поми́ловатися душа́м на́шим.
И ны́не, Богоро́дичен: Безневе́стная Де́во,/ я́же Бо́га неизрече́нно заче́нши пло́тию:
Тропа́рь, глас 8:
Правосла́вия ревни́телю,/ благоче́стия наста́вниче и чистоты́,/ и́щущим спасе́ния путеводи́тельный свети́льниче,/ мона́шествующих Богодухнове́нное удобре́ние,/ преподо́бнаго Се́ргия духо́вный собесе́дниче,/ Стефа́не прему́дре,/ уче́ньми и добродея́ньми твои́ми ду́ши просвети́л еси́/ и пусты́ни насели́л еси́,/ моли́ Христа́ Бо́га спасти́ся душа́м на́шим.
НА У́ТРЕНИ
На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 1.
Подо́бен: Вознесы́йся на Крест:
От ю́ности, блаже́нне, от всея́ души́ Христа́ возлюби́л еси́,/ и, Того́ си́лою укрепля́емь,/ непреста́нною моли́твою, я́коже копие́м, низложи́л еси́ враги́ неви́димыя,/ и сла́вно венце́м побе́ды венча́лся еси́ от руки́ всех Христа́ Бо́га,/ те́мже почита́ем честну́ю твою́ па́мять, преподо́бне.
Сла́ва, и ны́не, Богоро́дичен:
Нечи́стых помышле́ний мои́х мно́жество/ и безме́рных мы́слей обурева́ние кто изрещи́ мо́жет, Всенепоро́чная?/ Настоя́ние безпло́тных враго́в мои́х кто испове́сть и е́же от них озлобле́ние?/ Но Твое́ю моли́твою, Блага́я, сих ми всех избавле́ние да́руй.
По 2-м стихосло́вии седа́лен, глас 1.
Подо́бен: Гроб Твой, Спа́се:
А́нгельски пожи́л еси́ на земли́, преподо́бне,/ во бде́ниих же и злострада́ниих плоть свою́ удручи́в,/ те́мже и А́нгелы житие́м свои́м удиви́л еси́, и бе́сы посрами́л еси́,/ и и́ноческая сосло́вия в па́мять твою́ торжествова́ти собра́л еси́, Стефа́не.
Сла́ва, и ны́не, Богоро́дичен:
Упова́ние христиа́н, Пресвята́я Де́во,/ Его́же родила́ еси́, Бо́га, па́че ума́ же и сло́ва,/ непреста́нно моли́ с Вы́шними си́лами/ да́ти оставле́ние грехо́в всем нам и исправле́ние жития́,/ ве́рою и любо́вию при́сно Тя чту́щим.
По полиеле́и седа́лен, глас 3.
Подо́бен: Красоте́ де́вства:
Стопа́м после́дуя Влады́ки своего́, Стефа́не,/ от ю́ности горды́ню возненави́дев и сла́ву ми́ра, я́ко мимоходя́щу,/ смире́ние же и нищету́ возлюби́в,/ те́мже и па́стыря тя ста́ду твоему́ поставля́ет Христо́с Бог,/ Ему́же моли́ся о нас, преподо́бне.
Сла́ва, и ны́не, Богоро́дичен:
Я́ко невозде́ланен, Де́во, виногра́д, прекра́сный Грозд израсти́ла еси́,/ источа́ющий нам вино́ спасе́ния, веселя́щее ду́ши на́ша;/ те́мже, я́ко вино́вну Тя до́брых ублажа́юще,/ при́сно со А́нгелом вопие́м Ти:/ ра́дуйся, Благода́тная.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.
По 50-м псалме́ стихи́ра, глас 6:
Всечестно́е торжество́ наста́вника мона́хом Стефа́на Богому́драго,/ сше́дшеся днесь, пра́зднуем/ и, к честне́й его́ ра́це с ве́рою притека́юще,/ любе́зно целу́ем святы́я его́ мо́щи:/ сей бо па́че зла́та чудесы́ облиста́,/ и́же ма́лыми хле́бы иногда́ мног наро́д напита́,/ и разли́чныя неду́ги исцели́,/ и мно́га чудеса́ сотвори́,/ и ны́не мо́лится Христо́ви/ дарова́ти ми́рови ве́лию ми́лость.
Кано́н преподо́бнаго Стефа́на, глас 4.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Сло́во ми пода́ждь, Сло́ве Бо́жий, во отверзе́ние недосто́йных уст мои́х,/ и очи́сти се́рдце мое́,/ я́ко да возмогу́ по достоя́нию воспе́ти преподо́бнаго Твоего́.
Его́же Сам просла́вил еси́, Христе́ Спа́се мой,/ просла́вити да́руй ми честно́е торжество́ Стефа́на преподо́бнаго, Твоего́ уго́дника,/ нача́льника мона́хов и оби́тели утвержде́ние.
Триипоста́сным Све́том Божества́ просвети́л еси́ се́рдце, преподо́бне,/ от ю́ности мирска́го пристра́стия возгнуша́вся,/ и Небе́сная восприя́л еси́ наслажде́ния.
Богоро́дичен: Без се́мене О́тчею во́лею от Боже́ственнаго Ду́ха Бо́жия Ты зача́т Сы́на,/ пло́тию родила́ еси́ на́шего ра́ди спасе́ния.
Песнь 3
Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.
Возмуще́ния мо́ря жите́йскаго избе́г, преподо́бне Стефа́не,/ в пусты́ню безмо́лвия по́стническаго пребыва́ния/ всели́лся еси́, ра́дуяся, блаже́нне.
Воздержа́нием плоть свою́ и бде́нии ча́стыми удручи́л еси́, преподо́бне,/ и, пусты́нная претерпе́в озлобле́ния,/ стремле́ния лю́тых страсте́й уста́вил еси́, Стефа́не.
На па́житех живо́тных слове́сное ста́до ученико́в твои́х му́дре упа́сл еси́/ и на зла́це воздержа́ния, Стефа́не,/ от волко́в мы́сленных невреди́мо сохрани́л еси́.
Богоро́дичен: Ве́дуще, благоче́стно пропове́дуем Тя/ и́стинную Ма́терь Бо́жию, Пренепоро́чная:/ Тобо́ю бо к нам Зижди́тель прибли́жися.
Седа́лен, глас 8.
Подо́бен: Прему́дрости наста́вниче:
Оте́чество свое́ оста́вил еси́, преподо́бне,/ я́коже Авраа́м други́й, пресе́льник быв,/ и в пусты́ню всели́лся еси́, крест свой взем,/ Христу́ после́довав, плоть свою́ воздержа́нием, и труды́, и пусты́нными озлобле́нии умертви́л еси́,/ и ста́до мона́хов собра́л еси́,/ и по сме́рти от Бо́га благода́ть прия́л еси́ неду́ги исцеля́ти/ с ве́рою приходя́щим к честне́й твое́й ра́це, Стефа́не преподо́бне,/ моли́ Христа́ Бо́га согреше́нием оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Во искуше́ния многоплете́нная впад от враг ви́димых и неви́димых,/ бу́рею одержу́ся безчи́сленных мои́х прегреше́ний/ и я́ко к те́плому заступле́нию и покро́ву моему́, Чи́стая, притека́ю./ Тем, Пресвята́я, из Тебе́ Вопло́щшагося без се́мене моли́/ о всех рабе́х Твои́х, непреста́нно пою́щих Тя,/ согреше́ний оставле́ние им дарова́ти.
Песнь 4
Ирмо́с: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.
Оте́чество свое́, я́коже иногда́ Авраа́м, оста́вил еси́, преподо́бне Стефа́не,/ и, на землю обетова́нную пресели́вся,/ Го́рняго Иерусали́ма насле́дник изря́ден показа́лся еси́, Богому́дре.
Страннолю́бие, я́коже Авраа́м пра́отец дре́вле, стяжа́л еси́,/ и, я́коже он, служи́тель и друг Бо́гу нарече́ся,/ и Сего́ ты в се́рдце твое́м чистоты́ ра́ди жития́ твоего́ всели́л еси́, Стефа́не.
Заря́ми чуде́с облиста́лся еси́, Стефа́не Богоприя́тне,/ грехми́ отемне́нное се́рдце мое́ све́том твои́х моли́тв просвети́,/ я́ко да и аз благода́рственно воспою́ па́мять твою́.
Богоро́дичен: Сни́де, я́ко дождь на руно́, во утро́бу Твою́ Госпо́дь,/ я́коже рече́ дре́вле проро́к, Всенепоро́чная, Ему́же взыва́ем:/ сла́ва си́ле Твое́й, Го́споди.
Песнь 5
Ирмо́с: Нечести́вии не у́зрят Сла́вы Твоея́, Христе́,/ но мы Тя, Единоро́дне,/ Оте́ческия Сла́вы Сия́ние Божества́,/ от но́щи у́тренююще,/ воспева́ем Тя, Человеколю́бче.
Влады́це своему́ Христу́ подо́бяся, во́льную страсть претерпе́вшему,/ распя́лся еси́ ми́рови и страсте́м, Стефа́не Богоприя́тне,/ и ны́не све́тло прославля́ешися, лику́я во Ца́рствии Его́.
Исто́чник исцеле́ний показа́ся ра́ка моще́й твои́х, Стефа́не,/ к не́йже вси с ве́рою притека́ющии разли́чных неду́г и страсте́й избавля́ются/ богоприя́тными твои́ми моли́твами.
Во пло́ти ме́ртвенней безпло́тным подо́бяся,/ жития́ чистото́ю, Богому́дре,/ безпло́тных враг мы́сленная ополче́ния, Стефа́не, до конца́ низложи́л еси́.
Богоро́дичен: Тя ору́жие непобеди́мое на враги́ предлага́ем,/ Тя держа́ву и наде́жду на́шему спасе́нию, Богома́ти, стяжа́хом.
Песнь 6
Ирмо́с: Приидо́х во глубины́ морски́я,/ и потопи́ла мя есть бу́ря мно́гих грехо́в,/ но, я́ко Бог, из глубины́ возведи́ живо́т мой, Многоми́лостиве.
В пусты́нях всели́лся еси́, бе́гая сла́вы су́етныя, я́коже дре́вле вели́кий Анто́ний,/ те́мже обре́те Боже́ственную кончи́ну/ и по сме́рти сия́еши чудесы́, преподо́бне.
Кто изрещи́ возмо́жет труды́ твоя и бде́ния, Богому́дре Стефа́не,/ и́хже ра́ди возме́здие от Бо́га по достоя́нию восприя́л еси́,/ по свое́й сме́рти разли́чныя неду́ги исцеля́ти.
Те́ло свое́ моли́твами и посто́м удручи́л еси́,/ ду́шу же свою́ благодея́нии просвети́л еси́/ и се́рдце свое́ от скверн плотски́х очи́стил еси́,/ те́мже прия́телище Ду́ху Пресвято́му, Стефа́не, показа́ся.
Богоро́дичен: О чу́до, всех чуде́с превы́шшее:/ я́ко Де́ва, во чре́ве вся́ческая Содержа́щаго сло́вом неискусому́жно прии́мши,/ без истле́ния родила́ еси́.
Конда́к, глас 8.
Подо́бен: Взбра́нной Воево́де:
Чистото́ю душе́вною боже́ственно вооружи́вся,/ блаже́нную жизнь соверши́л еси́,/ в пусты́ню, я́ко во град, всели́вся,/ благода́ть прия́л еси́ от Бо́га/ исцеля́ти неду́ги приходя́щим к честне́й твое́й ра́це/ и всех возвыша́ти к Боже́ственней высоте́,/ те́мже, име́я дерзнове́ние ко Святе́й Тро́ице,/ помина́й нас, чту́щих па́мять твою́, да зове́м ти:/ ра́дуйся, преподо́бне Стефа́не, по́стником удобре́ние.
И́кос:
Разу́мнаго свети́льника, вся озаря́юща чудесы́ исцеле́ний,/ во смире́нии и кро́тости Влады́ки всех Христа́ подража́теля и столпа́ утвержде́ния,/ и́ноком наста́вника, равноа́нгельно на земли́ пожи́вша,/ неви́димыя враги́ си́лою кре́стною до́бльственне низложи́вша/ и плотска́я мудрова́ния ду́хови повину́вша,/ в страннолю́бии же и в ми́лостыни неоску́днаго и в благодея́ниих прекра́снаго,/ преподо́бнаго Се́ргия спо́стника же и собесе́дника,/ Боже́ственнаго кри́на, в пусты́нных удо́лиих процве́тшаго, восхва́лим, зову́ще:/ ра́дуйся, преподо́бне Стефа́не, по́стником основа́ние.
Песнь 7
Ирмо́с: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди,/ Бо́же оте́ц на́ших.
Я́коже Лот Содо́ма дре́вле, латы́нскаго злове́рия избежа́в,/ а́ки в Сиго́р, в Моско́вскую зе́млю, кре́пко соблюда́ющую и́стинное правове́рие, прише́л еси́, Стефа́не, вопия́:/ благослове́н еси́, Го́споди, Бо́же оте́ц на́ших.
Си́лою Христо́вою вооружи́вся, преподо́бне, стра́шен яви́лся еси́ бесо́м/ и над страстьми́ воцари́лся еси́, взем крест свой, после́дуя Христо́ви и вопия́:/ благослове́н еси́, Го́споди, Бо́же оте́ц на́ших.
Собра́нное тобо́ю слове́сное ста́до весели́тся днесь в па́мять твою́, Стефа́не Богому́дре,/ посреде́ иму́ще честны́я твоя́ мо́щи, источа́ющия струи́ исцеле́ний, преподо́бне, зову́щим:/ благослове́н еси́, Го́споди, Бо́же оте́ц на́ших.
Богоро́дичен: Благослове́н Плод благослове́ннаго чре́ва Твоего́,/ Его́же благословя́т Небе́сныя си́лы и преподо́бных собо́ри,/ нас изба́вльшаго кля́твы дре́вния, Благослове́нная.
Песнь 8
Ирмо́с: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.
Оби́лием благода́ти и одожде́нием слове́с твои́х/ серде́чныя бразды́ учени́к твои́х напои́л еси́, Стефа́не,/ и в сих мног плод Влады́це Христу́ возрасти́л еси́, Богому́дре.
Ме́ртвость твоя́ живоно́сною яви́ся, преподо́бне Стефа́не, Христа́ ра́ди,/ Его́же Престо́лу со дерзнове́нием предстоя́,/ моли́ся о чту́щих честну́ю па́мять твою́.
Я́ко незави́стну благода́ть имы́й от Бо́га, преподо́бне,/ пресла́вная чудеса́ источа́еши/ с ве́рою притека́ющим к ра́це честны́х моще́й твои́х.
Богоро́дичен: Вода́ еси́ неисчерпа́емая, Де́во,/ от нея́же вси, пию́ще, благода́ти исполня́емся,/ душе́ю и те́лом освяща́еми.
Песнь 9
Ирмо́с: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови Благослове́ние процвела́ еси́./ Тем Тя вси велича́ем.
Побе́дное одоле́ние оте́честву на́шему/ на проти́вныя да́руй моли́твами твои́ми, Стефа́не преподо́бне,/ и Це́рквам единомы́слие устро́й,/ да непреста́нно в пе́снех па́мять твою́ почита́ем.
О чту́щих честну́ю па́мять твою́ любо́вию моли́ся, Стефа́не преподо́бне,/ изба́витися враг мы́сленных и ви́димых,/ да ктому́ мно́жае тя в пе́снех непреста́нно велича́ем.
От недосто́йных мои́х усте́н/ приноси́мое ти ма́лое от усе́рдия хвале́ние приими́, Богоблаже́нне,/ и огня́ ве́чнаго изба́витися моли́ся,/ да непреста́нно честну́ю твою́ па́мять почита́ю.
Богоро́дичен: Ра́дуйся и весели́ся, Неве́сто Царя́ Вели́каго,/ созерца́ющая све́тло Твоего́ Жениха́ красоты́, па́че зла́та сия́юща,/ Его́же пою́ще, велича́ем.
Свети́лен.
Подо́бен: Не́бо звезда́ми:
Ты яви́лся еси́, Богому́дре о́тче, столп доброде́телей/ и преподо́бным сла́ва и украше́ние,/ те́мже помина́й чту́щих честну́ю твою́ па́мять.
Сла́ва, и ны́не, Богоро́дичен:
Тя Предста́тельницу вси иму́ще, гре́шнии, о Пресвята́я Де́во!/ Моли́ся благопремени́тельна сотвори́ти нам Сы́на Твоего́/ ма́терними Твои́ми моли́твами.
На хвали́тех стихи́ры на 4, глас 8.
Подо́бен: О, пресла́внаго чудесе́:
О́тче преподо́бне Стефа́не,/ от младе́нства Бо́гови прилежа́,/ мирска́я пристра́стия оста́вил еси́/ и, пло́ти взыгра́ния воздержа́нием обузда́в/ и се́рдце свое́ от скве́рны очи́стив,/ сосу́д избра́н Ду́ху Свято́му был еси́/ и столп утвержде́ния и́ноком,/ те́мже мо́лим тя:/ моли́ Христа́ Бо́га, да спасе́т ду́ши на́ша, я́ко Милосе́рд.
О́тче Богому́дре Стефа́не,/ глас Ева́нгелия Христо́ва услы́шав/ и крест свой на ра́мо взем,/ после́довал еси́ Христу́ невозвра́тным по́мыслом,/ вожделе́ния плотска́я умертви́в,/ тем и по сме́рти сия́еши чудесы́,/ Бо́гу прославля́ющу тя,/ Его́же моли́, да спасе́т ду́ши на́ша, я́ко Милосе́рд.
О́тче Стефа́не Богоприя́тне,/ лоза́ виногра́да Христо́ва был еси́/ и сади́тель чистоты́,/ сле́зными исто́чники пусты́ни безпло́дное возде́лал еси́/ и, ко́рение страсте́й увяди́в,/ цвет свяще́ния был еси́./ Моли́ Христа́ Бо́га, да спасе́т ду́ши на́ша, я́ко Милосе́рд.
Сла́ва, глас 6:
Днесь и́ночестии собо́ри,/ сше́дшеся в па́мять Богоно́снаго отца́,/ слове́сныя плету́ще венцы́,/ увенча́им наста́вника и́ноком,/ Стефа́на Богому́драго,/ неви́димых враг ополче́ния/ терпе́нием и смире́нием му́жески победи́вшаго/ и благода́ть чуде́с от Христа́ Бо́га прии́мшаго/ исцеля́ти разли́чныя неду́ги/ и прогоня́ти ду́хи лука́выя/ от всех, с ве́рою притека́ющих к честне́й его ра́це,/ те́мже возопии́м:/ мона́хов наста́вниче, и А́нгелом собесе́дниче,/ и преподо́бным украше́ние,/ моли́ дарова́ти мир ми́рови/ и душа́м на́шим ве́лию ми́лость.
И ны́не, Богоро́дичен:
Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы,/ поми́ловати ду́ши на́ша.
Славосло́вие вели́кое. И отпу́ст.
На Литурги́и слу́жба преподо́бническая.
Моли́тва
Всеблаже́нне и преподо́бне о́тче Стефа́не, просла́вленный уго́дниче Пресвяты́я Тро́ицы, Престо́лу Ея́ предстоя́ с ли́ки святы́х А́нгел и всех святы́х, помяни́ нас, в беда́х и ско́рбех припа́дающих к цельбоно́сному твоему́ гро́бу и моля́щихся тебе́, услы́ши моли́твы на́ша и принеси́ к Престо́лу Триипоста́снаго Бо́га, прося́ у Него́ нам бога́тыя ми́лости, здра́вия душа́м и телесе́м на́шим, наипа́че же отпуще́ния грехо́в, благода́ти и спасе́ния. Ты бо, име́я дерзнове́ние к Нему́, мо́жеши умоли́ти Его́, да пода́ст нам в житии́ на́шем блага́я и вся, я́же на по́льзу на́шу и во уготовле́ние к ве́чному животу́. О благи́й и ве́рный ра́бе Бо́жий, и́стинный учениче́ Христа́, избра́нный сосу́де Свята́го Ду́ха, чудотво́рче Стефа́не! Мо́лим тя усе́рдно: сотвори́ нас, гре́шных, прича́стники бы́ти благода́тных дарова́ний, и́миже Бог тя обогати́, и бу́ди нам по Бо́зе наста́вник к богоуго́дному житию́, утиши́тель бу́ри страсте́й, помо́щник в ско́рбех и беда́х и засту́пник от враг ви́димых и неви́димых, да и мы, богоуго́дно преше́дше по́прище сея́ жи́зни, твои́м предста́тельством и богоприя́тными твои́ми моли́твами бу́дем насле́дницы Ца́рствия Бо́жия и сподо́бимся вку́пе с тобо́ю предстоя́ти Престо́лу Царя́ сла́вы, Ему́же подоба́ет вся́кая сла́ва, честь и держа́ва во ве́ки веко́в. Ами́нь.
