Служба в честь преподобнаго Пимена Многоболезненнаго, в Ближних пещерах почивающаго

НА ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры, глас 1.

Подо́бен: Небе́сных чино́в:

И́же Предве́дый тя от утро́бы ма́тере в блаже́нство,/ смотре́нием Свои́м пода́л есть о́браз спасе́ния,/ И́овлю попусти́ на тя боле́знь,/ да то́ю искуси́шися, я́ко зла́то в горни́ле,/ те́ло твое́ уязви́в многоболе́зненне./ И ны́не в неболе́зненнем сый поко́и,/ помяни́ нас, душе́вными боле́знующих страстьми́,/ Пи́мене, о́тче всеблаже́нне.

И́же мир возненави́дев, преподо́бне,/ жизнь, наслажде́нием плотски́м до́лу влеку́щую,/ на многоле́тную боле́знь премени́ти/ себе́ у Го́спода проси́л еси́,/ в не́йже благоду́шествуя,/ Бо́гови благода́рственная вы́ну возсыла́л еси́,/ псало́мнически реки́й:/ прильпе́ по Тебе́ душа́ моя́,/ я́ко да прии́мет мя, Христе́, десни́ца Твоя́,/ наставля́ющая на путь прав и живо́т ве́чный.

Тебе́, преподо́бне о́тче Пи́мене,/ по мно́жеству боле́зненных искуше́ний,/ я́же те́лом все любе́зно подъя́л еси́,/ утеше́ния ны́не в Све́те непристу́пнем увеселя́ют ду́шу,/ предстои́ши бо со а́нгельскими чи́ны Престо́лу Влады́чню,/ иде́же и о нас помоли́ся/ улучи́ти свы́ше мир и от страсте́й свобожде́ние.

Сла́ва, глас 5:

Прииди́те, и́ночествующих ли́цы,/ восхва́лим Пи́мена преподо́бнаго,/ подо́бника бы́вша Вели́кому Анто́нию:/ я́коже бо той от А́нгела прия́т и́ноческое одея́ние,/ та́ко и сей от а́нгельския руки́ сподо́бися во и́ночество облещи́ся,/ с ни́миже ны́не нетле́нныя нося́ ри́зы,/ с пра́ведными весели́тся,/ с преподо́бными ликовству́ет/ и мо́лит с ни́ми Христа́ Бо́га о душа́х на́ших.

И ны́не, пра́здника.

Вход. Проки́мен дне. И чте́ния 3 преподо́бническая .

Прему́дрости Соломо́ни чте́ние (главы́ 5 и 6):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я́ и мы́шцею защити́т их./ Прии́мет всеору́жие – рве́ние свое́/ и вооружи́т тварь в месть враго́м./ Облече́тся в броня́ пра́вды и возложи́т шлем – суд нелицеме́рен./ Прии́мет щит непобеди́мый – преподо́бие./ Поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка, облако́в на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я́ на́гло./ Сопроти́в ста́нет им дух си́лы и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́ни чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние, они же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют,/ и, я́ко и́скры по сте́блию, потеку́т./ Су́дят язы́ком и облада́ют людьми́, и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шник преста́влен бысть,/ восхище́н бысть, да не зло́ба измени́т ра́зума его́/ или лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На стихо́вне стихи́ры, глас 1, самогла́сны:

Свеща́, тебе́ от А́нгелов да́нная,/ прообразова́ше све́тлость души́ твоея́, преподо́бне о́тче,/ тем и житие́ твое́ нескве́рно/ просвети́ся искуше́нием пред челове́ки./ Е́же мы, чту́ще, велича́ем/ и сла́вим Отца́ Небе́снаго,/ с Сы́ном и Святы́м Ду́хом.

Стих: Честна́ пред Го́сподем/ сме́рть преподо́бных Его́.

Жела́ние се́рдца твоего́/ и любо́вь, я́же к Го́рним, ви́дев, Царь Превы́шний/ посла́ А́нгелы Своя́ к тебе́, о́тче,/ облекти́ тя во и́ноческий о́браз/ и наслади́ти Вы́шняго пе́ния,/ я́ко да сла́дце терпе́нием боле́зненныя жи́зни сея́/ го́ресть наверши́ши/ и боле́зньми стя́жеши поко́й безболе́зненный.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ми́ра отверже́ние,/ нищета́ изво́льная и де́вство непоро́чное,/ безме́рное же терпе́ние и любо́вь соверше́нна к Бо́гу/ вои́стинну вели́кия суть доброде́тели,/ и́миже, а́ки скороше́ственною колесни́цею, восте́кл еси́ к Го́рним/ и предста́л Творцу́ всех и Бо́гу./ Ему́же и о нас моли́ся, преподо́бне,/ тече́ние нам без собла́зн соверши́ти/ и улучи́ти ми́лость в День су́дный.

Сла́ва, глас 8:

Мона́хов мно́жества,/ притека́ем к ра́це твое́й, о́тче,/ покланя́емся нетле́нным моще́м твои́м,/ почерпа́ем исцеле́ния боле́знем,/ прие́млем кре́пость на борю́щия ны враги́/ и обрета́ем на стра́сти побе́ду,/ получа́ем оставле́ние грехо́в/ и сподобля́емся ми́лости Госпо́дни моли́твами твои́ми.

И ны́не, пра́здника.

Тропа́рь, глас 5:

Богоно́снаго Анто́ния смиренному́дрием подража́я,/ терпе́нием И́ову подо́бяся,/ не исцеле́ния от боле́зни, но па́че протяже́ния тоя́/ жела́л еси́ себе́, терпеливоду́шне Пи́мене,/ да не ка́ко, здрав быв/ и от ме́ста сего́ роди́тельми исто́ржен,/ сожи́тия преподо́бных и чи́на их лиши́шися,/ тем па́че наде́жды от сами́х А́нгел постриже́н был еси́,/ с ни́миже моли́ Христа́ Бо́га/ спасти́ся душа́м на́шим.

Сла́ва, и ны́не, пра́здника.

НА У́ТРЕНИ

На Бог Госпо́дь: тропа́рь пра́здника, два́жды. Сла́ва, преподо́бнаго. И ны́не, пра́здника.

По 1-м стихосло́вии седа́лен, глас 5.

Подо́бен: Собезнача́льное Сло́во:

И́овле терпе́ние име́л еси́, о́тче,/ на одре́ бо боле́зни лежа́ дово́льна ле́та,/ стру́пы от главы́ до ног обложе́н,/ благодари́л еси́ Бо́га, изволя́я в жи́зни сей весь согни́ти,/ да в о́ной без истле́ния бу́деши,/ и смра́да обоня́ние терпе́ти, да благоуха́ние Христо́во яви́шися./ Сотвори́ у́бо и нас терпели́вы моли́твами твои́ми.

Сла́ва, и ны́не, пра́здника или́ Богоро́дичен:

Боле́зни а́довы обыдо́ша мя, и низлежу́ на ло́жи злых дея́ний мои́х,/ но, Я́же без боле́зни ро́ждшая, уврачу́й неду́ги моя́ и воздви́гни мя к доброде́телем,/ сотворя́ющи мя це́ла моли́твами Твои́ми.

По 2-м стихосло́вии седа́лен, глас 4.

Подо́бен: Ско́ро предвари́:

Ско́ро услы́ша тя Бог, моля́щася, блаже́нне, и испо́лни жела́ние се́рдца твоего́,/ посла́в А́нгелы Своя́ во а́нгельский о́браз облещи́ тя./ Те́мже и ты ско́рый нам в по́мощь бу́ди и жела́ние се́рдца на́шего исполня́й,/ моля́ а́нгельскаго Влады́ку облещи́ ны свы́ше ми́лостию Свое́ю.

Сла́ва, и ны́не, пра́здника или́ Богоро́дичен:

Ско́ро услы́ши моле́ния раб Твои́х, Влады́чице,/ и предвари́ покры́ти ны кро́вом крилу́ Твое́ю,/ да́же не порабо́тимся греху́ до конца́,/ но да порабо́таим усе́рдно Сы́ну Твоему́, Го́сподеви на́шему,/ да́рующему нам ве́лию ми́лость.

По полиеле́и седа́лен, глас 8.

Подо́бен: Прему́дрости возле́г:

Мно́гия боле́зни твоя́, блаже́нне Пи́мене, мно́гим здра́вия вино́вны бы́ша:/ сам боля́, боля́щия исцеля́л еси́,/ сам слежа́ в неду́зе, неду́жныя возставля́л еси́, сло́вом отгоня́л еси́ вся́ку не́мощь./ Те́мже, ны́не притека́юще к нетле́нным моще́м твои́м, мо́лим тя:/ источа́й телесе́м здра́вие и душа́м пода́ждь цельбу́,/ моля́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, пра́здника.

Степе́нна, 1-й антифо́н 4-го гла́са. Проки́мен, глас 4: Восхва́лятся преподо́бнии во сла́ве/ и возра́дуются на ло́жах свои́х. Стих: По́йте Го́сподеви, преподо́бнии его́. Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 5: Прииди́те, и́ночествующих ли́цы: зри Сла́вник на Го́споди, воззва́х:

Кано́н преподо́бнаго, глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь, сла́вно бо просла́вися.

Глубино́ю недоуме́ния содержи́м, молю́ Тя, прему́дрости глубино́, Иису́се:/ возведи́ ум мой и подви́гни язы́к/ восхвали́ти уго́дника Твоего́, Пи́мена, вели́кое терпе́ние.

Во глубине́ безстра́стия стра́сти, преподо́бне, потопи́в,/ преше́л еси́ мо́ре ми́ра немо́крыми нога́ми,/ я́ко ни ум твой тиме́нию грехо́вному не прикосну́ся,/ от него́же и мене́ сохрани́ моли́твами твои́ми.

Во глубине́ слез твои́х потопи́л еси́ мы́сленнаго фарао́на,/ ны́не же в приста́нищи небе́снем пое́ши песнь побе́дную,/ иде́же и о мне, преподо́бне, моли́ся.

Богоро́дичен: Во глубине́ зол потопля́ему ми, Влады́чице,/ пода́ждь ру́ку по́мощи, я́коже Сын Твой Петро́ви,/ и приведи́ к приста́нищу спасе́ния.

Песнь 3

Ирмо́с: Процвела́ есть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием Твои́м,/ в не́йже утверди́ся мое́ се́рдце.

Процвела́ есть оби́тель Пече́рская преподо́бными отцы́,/ я́коже вертогра́д благово́нными кри́ны,/ посреде́ же их и ты, преподо́бне, в житии́ святы́нею,/ по преставле́нии же нетле́нием кра́сно процве́л еси́.

Процве́л еси́ богоуго́дным твои́м житие́м, я́коже цвет по́льный, преподо́бне,/ ны́не же святы́я твоя́ мо́щи в пеще́ре издаю́т благоуха́ние, я́ко крин удо́льный,/ и источа́ют благода́ть с ве́рою притека́ющим.

Крин в те́рнии, Пи́мен в терпе́нии боле́зней процвете́ чи́стотою,/ и́же, в ра́йския пресажде́н вертогра́ды,/ облагоуха́ет нас ны́не моли́твами свои́ми.

Богоро́дичен: Цве́те благово́нный, Пречи́стая Де́во,/ отжени́ смрад греха́ моего́/ и яви́ мя благоуха́ние Христо́во моли́твами Твои́ми.

Седа́лен, глас 2:

Сильне́е бе моли́тва твоя́, свя́те, к Бо́гу,/ егда́ отцы́ Пече́рстии о исцеле́нии твое́м моля́хуся,/ ты же приложе́ния боле́зней себе́ у Го́спода проси́л еси́/ и преодолева́ше моле́ние твое́ еди́наго всех мольбы./ Ве́руем у́бо, я́ко и ны́не мно́го мо́гут святы́я твоя́ моли́твы.

Сла́ва, и ны́не, Богоро́дичен:

Мно́го может моли́тва Ма́терняя на умоле́ние Влады́ки,/ моли́ у́бо Его́ о нас, Де́во Ма́ти, и печа́ль нашу возвести́ Ему́,/ да, послу́шав Тя, ми́лостив нам бу́дет/ и, печа́ль в ра́дость претвори́в, пода́ст живо́т ве́чный.

Песнь 4

Ирмо́с: Пою́ Тя, слу́хом бо, Го́споди, услы́шах и ужасо́хся:/ до мене́ бо и́деши, мене́ ища́, заблу́ждшаго./ Тем мно́гое Твое́ снизхожде́ние, е́же на мя,/ прославля́ю, Многоми́лостиве.

Пе́ти и сла́вити Бо́га досто́йно пода́ждь нам, о́тче преподо́бне, моли́твами твои́ми,/ да всегда́ ублажа́ем тя.

Пе́ния а́нгельская в полу́нощи слы́шаша близ су́щии отцы́,/ егда́ в ри́зу тя спасе́ния облека́ху./ И нас у́бо а́нгельских пе́ний наслажда́тися сподо́би хода́тайством твои́м, блаже́нне.

Пою́ тебе́, о́тче, усе́рдно,/ ублажа́ю преподо́бие твое́,/ велича́ю незло́бие и кро́тость твою́,/ хвалю́ терпе́ние, удивля́юся нетле́нию твоему́/ и покланя́юся целе́бным моще́м твои́м.

Богоро́дичен: Певцы́ Твоя́ спаси́, о Всепе́тая Ма́ти, пла́ча ве́чнаго избавля́ющи,/ ми́лостию Твое́ю отри́ вся́ку сле́зу от о́чию мое́ю/ и ра́дости ве́чныя сподо́би.

Песнь 5

Ирмо́с: Хода́тай Бо́гу и челове́ком был еси́, Христе́ Бо́же,/ Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения/ приведе́ние и́мамы.

Хода́тайством твои́м, свя́те, от вся́каго наве́та вра́жия соблюда́й оби́тель,/ в не́йже сам богоуго́дне пожи́л еси́,/ и и́ночествующим помо́щник бу́ди,/ на твоя́ бо моли́твы упова́ем.

Хода́тай бу́ди мне к Пра́ведному Судии́, блаже́нне:/ есмь бо неради́в, я́коже о́ный схи́мник,/ его́же бра́тии при кончи́не свое́й показа́л еси́,/ и́же о́браз вели́к име́яше, де́ла же ни ма́ла./ Сего́ ра́ди схи́ма его́ нетле́нна на обличе́ние и осужде́ние ему́ блюде́тся.

Хода́тайствуй ми спасе́ние отча́янному, блаже́нне,/ наста́ви на покая́ние гре́шнаго, преподо́бне,/ пода́ждь исправле́ние развраще́нному, о́тче,/ да не постыжду́ся, наде́яся на твоя́ моли́твы.

Богоро́дичен: Хода́таице ко Творцу́, Пречи́стая Де́во,/ всего́ мя, грехми́ оскверне́ннаго, очи́сти моли́твами Твои́ми,/ на Тя бо все упова́ние мое́ возлага́я, не постыжду́ся во век.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

В бе́здне злых весь мир лежи́т,/ сего́ ра́ди отве́рглся еси́ его́, да Благо́му благоугожда́еши Бо́гу;/ Ему́же благоугоди́ти и мене́ сподо́би, уго́дниче Бо́жий.

В бе́здне боле́зней тя́жких лежа́,/ мно́гажды от служа́щих небрего́мый и оставля́емый быв,/ Бо́га то́чию посеща́ющаго тя име́л еси́;/ не оста́ви нас, о́тче, присеще́нием моли́тв твои́х,/ я́ко вы́ну боле́знуем.

В бе́здну а́дскую мно́жества ра́ди грехо́в мои́х да не осужде́н бу́ду,/ ты, о́тче, Пра́ведному Судии́ предста́ни и умоли́ Его́,/ да изба́вит мя пра́веднаго суда́ Своего́.

Богоро́дичен: Я́ко бе́здну ми́лости ро́ждшая,/ от бе́здны безме́рных беззако́ний мои́х исхи́ти мя,/ милосе́рдия Ма́ти, молю́ся Ти.

Конда́к, глас 6:

Долговре́менную боле́знь благода́рне претерпе́вшаго,/ прииди́те, соше́дшеся, восхва́лим Пи́мена многотерпели́ваго,/ и́же бо иногда́ за смрад в боле́зни бе гнуша́емь,/ сей ны́не благоуха́ние испуща́ет/ с ве́рою к ра́це моще́й его́ приходя́щим/ и прого́нит злосмра́дие страсте́й от вопию́щих:/ прииди́, Пи́мене, к нам, и ничто́же успе́ет враг на ны́.

И́кос:

Вси, и́же разли́чными боле́зньми и страстьми́ одержи́мии,/ соше́дшеся к многоболе́зненному Пи́мену, почуди́теся терпе́нию его́:/ той бо, мно́гажды гла́ден и жа́жден пребы́в,/ не поскорбе́ на служа́щих ему́,/ но с ра́достию вся терпя́ше, благодаря́ Бо́га;/ два́десять же лет в страда́нии свое́м препроводи́в,/ я́ко зла́то в горни́ле искуси́ся, и обре́теся досто́ин Бо́гови,/ и прия́т от Него́ дар цели́ти неду́ги и прогоня́ти стра́сти от притека́ющих к нему́ с ве́рою./ К тому́ у́бо и мы притеце́м и того́ призове́м, вопию́ще:/ прииди́, Пи́мене, к нам, и ничто́же успе́ет враг на ны.

Песнь 7

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Богопроти́внаго ми́ра возненави́дел еси́, о́тче, ве́дый Глаго́лющаго:/ хотяй бы́ти ми́ру друг, враг Бо́жий быва́ет./ Пода́ждь у́бо и нам бе́гати ми́ра и всех его́ по́хотей.

Богопроти́вный зако́н зла́то моего́ обы́чая ну́ждею влече́т мя на дела́ зла́я,/ и не е́же хощу́, сие́ творю, но е́же не хощу́, сие́ содева́ю./ Ты у́бо, преподо́бне, моли́твами твои́ми от того́ мя зла свободи́.

Богопроти́вное веле́ние ца́рствующаго греха́ во удесе́х мои́х/ принужда́ет мя ча́сто прогне́вати Бо́га,/ к тебе́ прибегаю, о́тче, от ну́ждных мя грехо́в изба́ви.

Богоро́дичен: Бо́га ро́ждшая, Де́во,/ даждь нам испо́лнити повеле́ния Сы́на Твоего́,/ и да ни в чем же проти́вни Ему́ обря́щемся по́мощию Твое́ю.

Песнь 8

Ирмо́с: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Пещь страсте́й да угаси́ши, о́тче,/ умноже́ния боле́зней от Бо́га проси́л еси́,/ в ни́хже прохла́да тебе́ бысть, о́тче, чистота́ душе́вная и теле́сная,/ ю́же и нам храни́ти моли́твами твои́ми даждь,/ да с тобо́ю Пречи́стому Бо́гу пое́м:/ благослови́те, вся дела́ Госпо́дня, Го́спода.

Пещь многоле́тных боле́зней а́ще опаля́ше ти те́ло,/ но святы́я души́ твоея́ ничи́мже вреди́ти можа́ше:/ во все́х бо сих приклю́чшихся не согреши́л еси́,/ но посреде́ искуше́ний, а́ки посреде́ пла́мене, неопали́м пребыва́я, со о́троки воспева́л еси́:/ благослови́те, вся дела́ Госпо́дня, Го́спода.

А́ки в пещи́, в пло́ти мое́й возжего́х огнь по́хотей/ и умно́жих нечистоты́ пла́мень невоздержа́нием мои́м;/ Ты, огнь пояда́яй, Бо́же,/ прохлади́ пла́мень, угаси́ огнь и ороси́ пещь страсте́й мои́х моли́твами уго́дника Твоего́, Пи́мена,/ да с ним Тебе́, в Тро́ице сла́вимому Бо́гу, пою́:/ благослови́те, вся дела́ Госпо́дня, Го́спода.

Богоро́дичен: Пещь иногда́ о́гненная, отроко́в неопали́вшая,/ прообрази́ рождество́ Твое́, Пречи́стая:/ Огнь бо заче́нши Боже́ственный, пребыла́ еси́ неопали́ма,/ и аз у́бо молю́ Тя, о Влады́чице,/ неопали́ма мя соблюди́ от огня́ сопроти́внаго, да, ра́дуяся, пою́ Ти:/ вся дела́ Госпо́дня, Госпожу́ Богоро́дицу по́йте/ и превозноси́те, прославля́юще пресвято́е и́мя Ея́ во ве́ки.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Безнача́льне Роди́телю, приво́дим Ти в моли́тву уго́дника Твоего́ Пи́мена,/ и́же от нача́ла и́ночества своего́ все́ю душе́ю возлюби́ Тя/ и все́ю кре́постию порабо́та Тебе́;/ при́зри на его́ по́двиги, и тех ра́ди послу́шай о нас его́ моле́ния,/ и благи́й коне́ц да́руй нам.

Собезнача́льный Отцу́ и Ду́ху, Сы́не,/ представля́ем Ти в моли́тву блага́го и ве́рнаго раба́ Твоего́ Пи́мена;/ при́зри на его́ многоле́тныя и тя́жкия боле́зни,/ и тех ра́ди послу́шай о нас его́ моле́ния, и ми́лостив нам бу́ди.

Соприсносу́щный Отцу́ и Сы́ну, Ду́ше Святы́й,/ предлага́ем Ти усе́рдныя моли́твы Пи́мена блаже́ннаго,/ того́ послу́шай и нас, его́ ра́ди, поми́луй.

Богоро́дичен: Ма́ти Бо́жия,/ с блаже́нным Пи́меном и со все́ми преподо́бными отцы́ Пече́рскими, Бо́гу угоди́вшими,/ моли́ Пресвяту́ю и Неразде́льную Тро́ицу поми́ловати рабы́ Своя́,/ Тя при́сно сла́вящия.

Свети́лен:

Черто́г Спа́сов отве́рст тебе́, преподо́бне Пи́мене,/ и́маши бо бра́чну а́нгельскаго о́браза от А́нгел на тя возложе́нную оде́жду,/ в не́йже вшед на брак А́гнчий,/ не забу́ди нас, тя почита́ющих.

Сла́ва, и ны́не, пра́здника или́ Богоро́дичен:

Черто́же нескве́рный, Пречи́стая Де́во,/ нас, одея́ния бра́чнаго неиму́щих, покры́й честно́ю ри́зою Твое́ю/ и введи́ в Черто́г Небе́сный.

На хвали́тех стихи́ры, глас 8.

Подо́бен: О, пресла́внаго чудесе́:

О, пресла́внаго чудесе́!/ О, ди́внаго на тебе́ де́йства Ду́ха Свята́го,/ де́йствующаго в немощне́й пло́ти твое́й, преподо́бне!/ Ты бо сам, немощству́я, и́ных исцеля́л еси́/ и ко исправле́нию терпе́нием твои́м приводи́л еси́./ Тем хва́лящим тя, о́тче, яви́ ми́лость твою́/ и испроси́ от Христа́ Бо́га в не́мощех на́ших исцеле́ние/ любо́вию свято́е твое́ преставле́ние почита́ющим.

О́тче Богому́дре Пи́мене,/ ты изде́тска моли́твою боле́знем преда́лся еси́/ и лю́тыми страда́нии те́ло свое́ изнури́л еси́,/ я́ко да чистоту́ пло́ти соблюде́ши/ и ду́шу непоро́чну Бо́гови предста́виши./ Ему́же в неболе́зненней жи́зни предстоя́,/ я́ко моли́твою свое́ю мо́щен посо́бствовати,/ о нас при́сно моли́ся,/ ве́рою пою́щих свято́е твое́ успе́ние.

О́тче преподо́бне Пи́мене,/ всяк боля́й в жи́зни сей многомяте́жней/ да навы́кнет терпе́нию твоему́ ревнова́ти/ и благода́рственная возсыла́ти Бо́гови,/ от Него́же в наказа́ние прие́млем искуше́ние/ ко исправле́нию душе́вныя боле́зни./ Но о всех, притека́ющих к ра́це моще́й твои́х, засту́пник бу́ди/ и испроси́ от Христа́ Бо́га/ душе́вныя и теле́сныя не́мощи свобожде́ние.

Сла́ва, глас 2:

Ми́ро вои́стинну та́инственное/ ко исцеле́нию боля́щим/ источа́ет ра́ка от святы́х твои́х моще́й/ и облагоуха́ет ве́рою приходя́щих,/ подаю́щи тем в ну́ждах посо́бие;/ пода́ждь у́бо и нам, о́тче всеблаже́нне,/ от при́снотеку́щаго исто́чника твоея́ любве́/ душе́вных и теле́сных боле́зней свобожде́ние,/ я́ко пе́сненными добро́тами/ честно́е твое́ успе́ние восхваляем.

И ны́не, пра́здника или́ Богоро́дичен:

Спаси́ от бед рабы́ Твоя́, Богоро́дице Де́во,/ я́ко вcи́ по Бо́зе к Тебе́ прибега́ем,/ я́ко неруши́мей стене́ и предста́тельству.

Славосло́вие вели́кое. Ектении́. И отпу́ст.

На Литурги́и слу́жба вся преподо́бному.