Служба в честь преподобнаго Петра, царевича Ордынскаго, Ростовскаго чудотворца

ВЕ́ЧЕР

На Го́споди, воззва́х: стихи́ры, глас 5.

Преподо́бне о́тче Пе́тре,/ просвеще́н быв благода́тию/ Святы́я и Пресла́вныя Тро́ицы Единосу́щныя,/ све́том Безнача́льнаго Све́та/ и тем всю зе́млю просвети́в/ и мно́ги на́ша потреби́в грехи́,/ о́тче преподо́бне,/ моли́ о спасе́нии душ на́ших.

Све́тлости духо́вныя ты был еси́ сподо́блен, о́тче Пе́тре,/ проти́ву трудо́в твои́х вели́ких, свя́те:/ те́мже ны́не во тьме́ су́щия грехо́вней просвети́,/ дерзнове́ние име́яй ко Христу́ Бо́гу и Спа́су,/ Того́ моли́ всех нас поми́ловати.

Грехо́вный мрак от серде́ц на́ших отгна́в,/ тя́жесть облегчи́, лежа́щую на ра́мех на́ших, преподо́бне Пе́тре,/ да вси твою́ па́мять, соше́дшеся, воспои́м,/ очище́ния прося́ще согреше́ний:/ моли́ о спасе́нии душ на́ших.

Сла́ва, глас 8:

Равноа́нгельное житие́ пожи́в,/ боле́зньми пόстническими, о́тче преподо́бне Пе́тре,/ и воздержа́нием те́ло порабо́тив,/ покори́л еси́ ду́ху,/ де́латель был за́поведей Госпо́дних:/ испе́рва бо добро́ту о́браза сохрани́л еси́,/ страда́льныя по́двиги по́стными по́ты соверши́л еси́/ и, сугу́бым венце́м украси́вся,/ приле́жно Спа́са моли́ спасти́ся нам.

И ны́не, Богоро́дичен.

Вход. Проки́мен дне и чте́ния 3 преподо́бническая.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очеса́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же суть в ми́ре./ Ибо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (главы 5 и 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́,/ внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

На лити́и стихи́ры самогла́сны, глас 4.

Струя́ми слез твои́х/ се́мя Боже́ственное напои́л еси́,/ я́ко земля́ плодови́та, Богодухнове́нне,/ стори́цею преподо́бия плод прозя́бл еси́ вои́стинну/ и в жи́тницы собра́л еси́ мы́сленныя/ си́лою духо́вною тебе́ претво́ршаго премене́нием лу́чшим,/ Пе́тре пресла́вне.

Ве́рою и любо́вию, о празднолю́бцы, соше́дшеся дне́сь,/ псалмы́ и пе́сньми восхвали́м/ Небе́снаго челове́ка, земна́го А́нгела,/ к нему́ же возопии́м:/ о всеблаже́нне преподо́бне, по́стников похвало́!/ О нас моли́ся ко Го́споду, Пе́тре, о́тче наш,/ спасти́ся душа́м на́шим.

Име́я дерзнове́ние ко Христу́ Бо́гу,/ моли́ся о ста́де твое́м, преподо́бне,/ сохрани́тися от искуше́ний вра́жиих,/ огня́ и меча́, и вся́каго прило́га, и наве́та лука́ваго:/ тебе́ бо град и покро́в иму́ще,/ на тя наде́жду по Бо́зе стяжа́хом, блаже́нне.

Житие́ благоче́стно на земли́ стяжа́в,/ прия́телище чи́сто Ду́ха ты яви́лся еси́,/ просвеща́я ве́рою к тебе́ притека́ющия, блаже́нне,/ те́мже моли́ твоего́ Влады́ку/ просвети́ти ду́ши нас, воспева́ющих тя,/ Пе́тре преподо́бне, о́тче наш.

Ра́дуйся, преподо́бне о́тче Пе́тре всече́стне,/ и́же зако́н Госпо́день до́бре извы́кл еси́/ и ве́ру соблю́л еси́ невреди́му,/ хода́тай яви́вся о ста́де твое́м Христу́ Бо́гу:/ Того́ моли́ умири́ти мир и спасти́ ду́ши на́ша.

Сла́ва, глас 8:

Преподо́бне и Богоблаже́нне о́тче Пе́тре,/ вои́стинну сподо́бился еси́ Боже́ственныя жи́зни:/ посто́м и бде́нием изнуря́я те́ло твое́,/ о́браз быв мона́хом;/ а́ще бо и теле́сный язы́к умолче́,/ но чудеса́ свиде́тельствуют,/ град Росто́в хва́лится,/ име́юще в себе́ неотъе́млемое сокро́вище;/ наро́ди бо, зря́ще честну́ю ра́ку твои́х моще́й/ и чудеса́ быва́емая,/ прославля́ют просла́вльшаго тя Го́спода./ Ему́же моли́ся непреста́нно/ дарова́ти вселе́нней мир и ве́лию ми́лость.

На стихо́вне стихи́ры, глас 5:

Ра́дуйся, по́стнических вои́стинну по́двигов благоуха́нный сосу́де,/ Крест бо на ра́мо взем,/ Влады́це Христу́ себе́, преблаже́нне, возложи́в,/ пло́ти попра́л еси́ до́лу влеку́щее мудрова́ние,/ доброде́тельми же ду́шу просвети́л еси́,/ к Боже́ственному воскрили́вся раче́нию, Пе́тре пресла́вне./ Тем, пресве́тлую твою́ пра́зднующе па́мять,/ Боже́ственнаго человеколю́бия про́сим получи́ти твои́ми моли́твами/ и ми́рови дарова́ти ве́лию ми́лость.

Стих: Честна́ пред Го́сподем/ сме́рть преподо́бных Его́.

У́гль богосве́тлый,/ огню́ прибли́жися, Богоно́се, Ду́ха,/ показа́ся в ми́ре, Пе́тре, просвеща́я ду́ши/ и́же ве́рно, Богому́дре, приступа́ющих к тебе́,/ к Све́ту водя́ сия́ невече́рнему, преподо́бне,/ пусты́нныя же ороша́я свы́ше Боже́ственною благода́тию/ и у́глие страсте́й увяда́я./ Те́мже побе́ды тебе́ проявле́нно дарова́ вене́ц, блаже́нне,/ Боже́ственныя пра́вды Смотри́тель Христо́с,/ Его́же моли́ дарова́ти душа́м на́шим/ мир и ве́лию ми́лость.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ле́ствице на Не́бо подо́бно/ я́ве житие́ твое́, Богому́дре:/ е́ю бо к высоте́ взят был еси́/ и Христу́ Влады́це бесе́довати, всеблаже́нне Пе́тре, сподо́бился еси́,/ ум просвеща́я и́же отту́ду сия́нии,/ равноа́нгельну све́тлость прия́л еси́,/ Ему́же ны́не предстоя́, моли́ся, преподо́бне,/ соверша́ющих Боже́ственную и всесвяще́нную па́мять твою́/ с тобо́ю предста́вити/ и ми́ру дарова́ти ве́лию ми́лость.

Сла́ва, глас то́йже. Самогла́сен:

Преподо́бне о́тче,/ не дал еси́ сна свои́ма очи́ма,/ ни ве́ждома свои́ма дрема́ния,/ до́ндеже ду́шу и те́ло от страсте́й свободи́л еси́/ и себе́ угото́вал еси́ Ду́ху жили́ще:/ прише́д бо, Христо́с со Отце́м оби́тель в тебе́ сотвори́./ Единосу́щней Тро́ице уго́дник быв,/ великопропове́дниче Пе́тре,/ моли́ся о душа́х на́ших.

И ны́не, Богоро́дичен: Храм и две́рь:

Тропа́рь, глас 8:

Оте́чества своего́, блаже́нне Пе́тре, удали́вся,/ и богоме́рзкую ве́ру отню́д возненави́дев,/ от тьмы́ во свет прише́л еси́/ и всели́лся еси́ во сла́вный и многонаро́дный град Росто́в,/ в не́мже житие́ че́стно пожи́в,/ це́рковь во и́мя святы́х апо́стол Петра́ и Па́вла воздви́гл еси́ Христо́вою благода́тию,/ и сию́ чу́дными ико́нами, я́ко неве́сту, украси́в,/ святи́теля же, и кня́зя, и вся лю́ди житие́м свои́м удиви́л еси́,/ те́мже и по сме́рти твое́й Христо́с да́ром чуде́с обогати́ тя./ Помина́й нас, чту́щих пресве́тлую па́мять твою́, преподо́бне о́тче Пе́тре,/ и моли́ Христа́ Бо́га спасти́ся душа́м на́шим.

Сла́ва, и ны́не, Богоро́дичен.

НА У́ТРЕНИ

На Бог Госпо́дь: тропа́рь два́жды. Сла́ва, и ныне, Богоро́дичен.

По 1-м стихосло́вии седа́лен, глас 5.

Подо́бен: Собезнача́льное Сло́во:

По́стника Госпо́дня пе́сньми почти́м,/ я́ко умертви́вша вся прило́ги страсте́й воздержа́нием тве́рдым и кре́пким терпе́нием вои́стинну,/ и посрами́вшаго зело́ сопроти́внаго всю горды́ню,/ и ны́не моля́щагося Го́сподеви поми́ловатися душа́м на́шим.

Сла́ва, и ны́не, Богоро́дичен:

Стра́шно чу́до зача́тия и несказа́нен о́браз рождества́ в Тебе́ позна́ся, Чи́стая Присноде́во,/ ужаса́ет ми ум и удивля́ет помышле́ние,/ сла́ва Твоя́, Богоро́дице, всем простре́ся,/ во спасе́ние душ на́ших.

По 2-м стихосло́вии седа́лен, глас 4:

Посто́м, и воздержа́нием, и на земли́ лега́нием увяди́л еси́ плотски́я стра́сти,/ ду́шу же просвети́, и на Небесе́х от Христа́ вели́ко воздая́ние восприя́л еси́./ Тем благоугоди́л еси́ Бо́гу/ и досто́ин сосу́д чудесе́м по кончи́не яви́лся еси́,/ всем исцеле́ние подава́я, ве́рою притека́ющим к моще́м твои́м, Пе́тре преподо́бне.

Сла́ва, и ны́не, Богоро́дичен:

Обнови́ла еси́, Чи́стая, Боже́ственным рождество́м Свои́м, истле́вшее страстьми́ земноро́дных существо́,/ возста́вила еси́ вся от сме́рти к жи́зни нетле́нней./ Тем Тя ублажа́ем, вси, Де́во Препросла́вленная, я́коже прорекла́ еси́.

По полиеле́и седа́лен, глас 1.

Подо́бен: Лик а́нгельский:

Житие́ благоче́стно на земли́ сконча́в,/ прия́телище чи́стое Ду́ху яви́лся еси́,/ просвеща́я и́же ве́рою к тебе́ притека́ющия, блаже́нне./ Те́мже моли́ Влады́ку Христа́ Бо́га просвети́ти ду́ши на́ша,/ воспева́ющих тя, Пе́тре преподо́бне, о́тче наш.

Сла́ва, и ны́не, Богоро́дичен:

Всех Творца́, и Бо́га, и Созда́теля, Пренепоро́чная Чи́стая,/ Ду́хом Боже́ственным в ложесна́х зача́т,/ без истле́ния родила́ еси́,/ Его́же сла́вяще, Тя воспева́ем, Де́во,/ я́ко пала́ту всех Царя́ и ми́рови заступле́ние.

Та́же степе́нна, 1-й антифо́н 4-го гла́са. Проки́мен, глас 4: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, моли́тву мою́, внегда́ моли́тимися к Тебе́. Ева́нгелие от Матфе́я, зача́ло 43.

По 50-м псалме́ стихи́ра, глас 8. Самогла́сен:

На Не́бо теку́щую возше́д колесни́цу, чу́дне,/ кра́йнее житие́ стяжа́в воздержа́нием,/ и пусты́нею смотря́я Вы́шняго Иерусали́ма красоты́,/ и боле́зненных подвиго́в досто́йно по́честь восприи́м,/ с Небе́сными ра́дуешися чинонача́лии, преблаже́нне,/ ве́чных благ насле́дник яви́лся еси́,/ Небе́снаго Ца́рствия жи́тель сый,/ моли́ся, Богоно́се Пе́тре, Спа́су всех/ умири́ти мир и спасти́ ду́ши на́ша.

Кано́н, глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Ве́сь ты Творцу́ возложи́ себе́,/ вседуше́вное жела́ние излия́в Тому́,/ сего́ ра́ди духо́вную благода́ть восприя́л еси́,/ све́том благода́ти озаря́яся, блаже́нне Пе́тре пресла́вне,/ ве́рою твою́ па́мять соверша́ющия просвети́/ и от тьмы́ грехо́вныя моли́твами твои́ми изба́ви.

Измла́да Христа́ возлюби́л еси́,/ блаже́нне Пе́тре пресла́вне, всече́стне чудотво́рче,/ и Пречи́стую Его́ Богома́терь./ Тем просвеща́еши чудесы́, я́ко мо́лния, всю вселе́нную.

Ны́не, преблаже́нне Пе́тре, душа́ твоя́ почива́ет на Небесе́х,/ со Христо́м во Ца́рствии Небе́снем,/ зде же честны́я твоя́ мо́щи подаю́т исцеле́ния приходя́щим с ве́рою.

Богоро́дичен: Ра́дуйся, Пресвята́я Богоро́дице,/ А́нгельское удивле́ние, проро́ческое пропове́дание,/ апо́стольская немо́лчная уста́,/ моли́ся Сы́ну Твоему́ и Бо́гу на́шему, да сохрани́т ме́сто сие́ и всех нас блаже́ннаго моле́нием.

Песнь 3

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Я́ко светоза́рное сия́ние яви́ся ты Триипоста́снаго Божества́, Пе́тре блаже́нне,/ омраче́нных ду́ши просвеща́еши моли́твами твои́ми.

Из мла́да во́зраста восприя́л еси́ во Орде́/ Христо́во повеле́ние, и ве́ру, и утвержде́ние,/ прише́л еси́ во град Росто́в/ и сия́еши, я́ко сия́ние Триипоста́снаго Божества́, преблаже́нне.

Креста́ Госпо́дня си́лою укрепля́емь, блаже́нне Пе́тре,/ преще́нием ве́рныя твоея́ моли́твы,/ стремле́ния бесо́вская на земли́ победи́ Бо́жиею си́лою.

Богоро́дичен: Ра́дуйся, Влады́чице Де́во,/ це́рквам еси́ красота́, правосла́вным еси́ похвала́,/ непреста́нно моли́ся Сы́ну Своему́ и Бо́гу/ сохрани́ти град сей и лю́ди, моли́твами всеблаже́ннаго Петра́.

Седа́лен, глас 8:

Тве́рдостию ра́зума украша́яся,/ плотски́я тяготы́ отве́ргл еси́, и горды́ню попра́л еси́,/ и был еси́ оби́телище Ду́ху Пресвято́му,/ неукло́нным ра́зумом простира́яся ко Христу́ Бо́гу,/ многоко́зненнаго же стре́лы притупи́л еси́/ и лу́ки сокруши́л еси́, всеблаже́нне Пе́тре:/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ О́гнь бо всели́ся в Тя Божества́,/ и я́ко Младе́нца дои́ши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Песнь 4

Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спа́се зову́щия:/ сла́ва, Христе́, си́ле Твое́й.

И́же на земли́ степе́нь ца́рственный име́л еси́, всеблаже́нне Пе́тре,/ свои́ми моли́твами ми́рное Ца́рство восприя́л еси́/ и ны́не на Небесе́х со Христо́м ца́рствуеши.

Исцеле́ния содева́ет, блаже́нне, Боже́ственный гроб твой, Пе́тре,/ отгоня́еши бо неду́ги и ду́хи лука́выя от челове́к/ и укрепля́еши мудрова́ния их,/ е́же восхваля́ти труды́ твоя́, всече́стне.

Со враго́м дре́вле бо́ршися воздержа́нием,/ ны́не кре́пкую получи́л еси́ побе́ду, блаже́нне Пе́тре, пресла́вне чудотво́рче,/ му́ченически претерпе́в труды́ и низложи́в бесо́вския ополче́ния.

Богоро́дичен: Христа́ нам родила́ еси́,/ Пречи́стая Богоро́дице Влады́чице, Богора́дованная Де́во,/ спаси́ град и лю́ди, к Тебе́ прибега́ющия, Богоро́дице Пренепоро́чная.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Зако́нно моли́твами и посто́м всегда́ подвиза́лся еси́, блаже́нне Пе́тре,/ безме́рно покори́л еси́ плотски́й ра́зум,/ смири́в кре́постию Боже́ственнаго Ду́ха.

От ю́ности возжела́л еси́ о́браза мона́шескаго/ и от Христа́ восприя́л еси́ вене́ц златы́й и ри́зу нетле́нную,/ ны́не, всеблаже́нне Пе́тре, со А́нгелы ра́дуется дух твой.

Гроб честна́го телесе́ показа́ся ве́рным лю́дем душ и теле́с на исцеле́ние,/ и отгна́ние страсте́й от твои́х моще́й вси почерпа́ем.

Богоро́дичен: Всесве́тлым укра́шена еси́ све́том, Богора́дованная Ма́ти:/ Ты бо породи́ всех честне́йша Христа́ Бо́га на́шего,/ Его́же моли́, да изба́вит ны от всех напа́стей.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Удиви́ся чудесе́м твои́м ве́сь мир, преблаже́нне Пе́тре,/ восприя́л бо еси́ от Христа́ вене́ц Небе́сный,/ его́же сподо́би и нас причасти́тися твои́ми моли́твами, всече́стне.

Лук си́льных сокруши́л еси́,/ бра́нь вся́ку неприя́зненну потреби́л еси́, всеблаже́нне Пе́тре,/ веща́ние пусти́л еси́ во всю вселе́нную.

Всеблаже́нне Пе́тре, уго́дниче Бо́жий,/ на Небесе́х предстоя́ Престо́лу Бо́жию, мо́лишися о нас,/ зде же честны́я мо́щи боля́щих исцеля́ют и от грех изыма́ют.

Богоро́дичен: Изсуши́ла еси́ сады́ безбо́жия, Пренепоро́чная Де́во, Свои́м Прозябе́нием,/ прозя́бшую во мне зло́бу искорени́, Богоневе́сто.

Конда́к, глас 4:

Яви́ся ве́лие со́лнце Христо́вой Це́ркви,/ просвеща́я уче́ния светлостьми́, всече́стне,/ я́ко черпа́лом златы́м,/ от кла́дязя неиско́паннаго чуде́с поче́рпл еси́,/ от исто́чника неистощи́маго,/ на па́мять успе́ния твоего́ прише́дшим, всеблаже́нне Пе́тре,/ ны́не всем подава́еши грехо́в проще́ние, сла́во преподо́бным.

И́кос:

Возлюби́в, преподо́бне, Христо́вы Боже́ственныя за́поведи/ и возненави́дев ми́ра сего́ наслажде́ние,/ прии́де усе́рдно к Тому́/ и бы́сть свети́льник, просвеща́я концы́ блиста́нием духо́вным./ Тем, припа́дая, молю́ тя:/ просвети́ мои́ о́чи душе́вныя,/ воспева́ти твоя́ по́двиги, поще́ние, бде́ние и сле́зы,/ боле́зни и изможде́ние те́ла блаже́нныя ра́ди бу́дущия жи́зни,/ ея́же ны́не наслажда́ешися, Пе́тре преблаже́нне,/ всем подая́ грехо́в проще́ние, сла́во преподо́бным.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ Препе́тый отце́в Госпо́дь и Бог, благослове́н еси́.

Блаже́нно твое́ житие́ и кончи́на, всече́стне, безсме́ртна, блаже́нне Пе́тре,/ сего́ ра́ди тя Христо́с свы́ше украси́ венце́м,/ и просвеща́еши ве́сь мир чудесы́, преподо́бне.

Яви́лся еси́ ны́не гра́ду Росто́ву, Пе́тре Богоблаже́нне,/ столп непоколеби́мый, и стена́ неруши́мая, и вели́кое прибе́жище,/ от Тебе́ прие́млюще исцеле́ний благода́ть, пое́м:/ Бо́же, благослове́н еси́.

Хотя́ от мирски́х сла́достей отлучи́тися,/ стра́нен челове́ком яви́лся еси́:/ пло́ть бо нося́, бу́дущая и нетле́нная стяжа́в, святы́й,/ соверши́в тече́ние Богоно́сных оте́ц,/ я́влься о́бщник Небе́сному Ца́рствию.

Богоро́дичен: Без се́мени зачала́ еси́ Творца́ всех, Христа́ Бо́га, и неизрече́нно родила́ еси́,/ Его́же моли́, дерзнове́ние иму́щи к Нему́,/ да и нас спасе́т, вопию́щих:/ Бо́же, благослове́н еси́.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ е́сть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Лику́ют на Небесе́х чи́нове А́нгельстии, всеблаже́нне Пе́тре,/ ве́рных же собо́ри, на земли́ твою́ па́мять похваля́юще, пою́т:/ Го́спода по́йте, дела́, и превозноси́те Его́ во ве́ки.

Чудесы́, свя́те, твои́ми душе́вныя боле́зни исцели́,/ твои́ми моли́твами, Пе́тре пресла́вне, прося́щим отпуще́ние безчи́сленных зол испроси́,/ со Безпло́тными си́лами Христу́ предстоя́,/ с ни́ми же пое́м непреста́нно:/ Го́спода воспева́йте, дела́, и превозноси́те Его́ во ве́ки.

Богоро́дичен: Из пречи́стаго чре́ва, Богома́ти,/ Небе́снаго дождя́ ка́пля нам ука́ну71,/ на отмове́ние скве́рнам, на здра́вие телеси́, на прогна́ние лука́ваго,/ те́мже Тя блажи́м, Чи́стая, во ве́ки.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Удиви́ся во всем ми́ре, Пе́тре, твоя́ па́мять:/ чудесы́ сия́еши, я́ко со́лнце, злы́я боле́зни исцеля́я всем,/ те́мже моя́ стра́сти разжени́, молю́тися,/ прося́ мне отпуще́ния грехо́в, чудотво́рче Христо́в.

Да вхо́дят ны́не во святы́й храм сей в па́мяти твое́й, блаже́нне Пе́тре,/ свяще́нницы и мона́си, бога́тии и убо́зии,/ припа́дающе, про́сят от Тебе́ почерпа́ти исцеле́ния, здра́вие и спасе́ние,/ тем тя вси велича́ем.

Ны́не помоли́ся ко Го́споду, всечу́дне Пе́тре блаже́нне,/ о и́же твоя́ честны́я мо́щи почита́ющих, всегда́ приходя́щих с ве́рою:/ слепы́м – прозре́ние, хромы́м – хожде́ние,/ боля́щим всем здра́вие да́руй,/ да тя вси велича́ем.

Богоро́дичен: Арха́нгели и А́нгели, проро́цы и апо́столи/ и ве́сь лик преподо́бных оте́ц и священному́ченик, с преблаже́нным Петро́м/ ко Христу́ приле́жно с Пречи́стою Его́ Ма́терию за ве́сь мир моли́теся,/ да изба́вит нас от всех бед,/ Его́же вси велича́ем.

Свети́лен.

Подо́бен: Жены́, услы́шите:

Мирска́го пристра́стия, я́ко от скве́рны, уклони́лся еси́,/ и, а́лчбою пло́ть увяди́в,/ обнови́л еси́ души́ кре́пость, преподо́бне,/ и сла́вою обогати́лся еси́ Небе́сною, сла́вне,/ те́мже моли́ти о нас не преста́й, о́тче преподо́бне.

Сла́ва, и ны́не, Богоро́дичен:

И́стинную Богоро́дицу, Тя испове́дуем, Влады́чице, Тобо́ю спа́сшиися,/ Бо́га бо неизрече́нно родила́ еси́, разори́вшаго Кресто́м сме́рть,/ с Ни́мже Тя, Де́во, восхваля́ем.

На хвали́тех стихи́ры, глас 8:

Преподо́бне о́тче, досточу́дне и Богоблаже́нне Пе́тре,/ обре́л еси́ ду́шу твою́ от вся́кия скве́рны чи́сту,/ Ду́ха благода́ть Всесвята́го в тя всели́ся,/ я́ко незаходи́мый Свет,/ Его́же де́телию/ ду́хи боле́зненныя отго́ниши,/ вы́ну исцеля́еши неду́ги и боле́зни/ приступа́ющим к тебе́ просты́м се́рдцем,/ соверша́ющим твою́ святу́ю па́мять/ и кла́няющимся святы́м твои́м моще́м,/ Богоно́се, Христо́в уго́дниче,/ подая́й мир и ве́лию ми́лость.

Чу́вства вся уста́вил еси́/ и, наказа́в зако́нно, прему́дре,/ Боже́ственнаго ра́зума исто́чник показа́лся еси́,/ Ду́ха Свята́го си́лою чудеса́ содева́я, блаже́нне Пе́тре,/ и от сла́вы в сла́ву пре́йде,/ дея́нии сла́ву восприи́м,/ апо́столом собесе́дник быв.

Вы́шняго по́мощию и щито́м и́стинным огра́ждься,/ си́лою Креста́ укрепле́н,/ вся полки́ проти́вных победи́,/ челове́ческия умы́ просвеща́еши чудесы́ мно́гими/ и удивля́еши вся дея́ний твои́х по́двиги, Пе́тре.

Вся, чту́щия па́мять твою́ све́тло,/ сподо́би твои́ми моли́твами/ лю́тых напа́стей и стра́стных бу́рь всех гонзну́ти72,/ при́сно грехо́в проще́ние прия́ти/ и доити́ ми́лости и ра́дости ве́чныя, преблаже́нне Пе́тре.

Сла́ва, глас то́йже:

Прииди́те, вси ве́рнии,/ согла́сно воспои́м преблаже́ннаго Петра́,/ благоче́стия све́тлость, воздержа́ния пра́вило,/ терпе́ния столпа́, простоты́ сокро́вище,/ смире́ния реку́ незави́стну,/ ни́щих уте́ху, стра́нных странноприи́мника,/ и́стинныя любве́ Христо́вы де́лателя, вои́стинну бли́жняго:/ сей у́бо жив и по сме́рти/ челове́ком засту́пник и спаси́тель показа́ся,/ боле́знем неисцельным и вся́ческим страсте́м исцели́тель./ Христа́ моли́ спасти́ся душа́м на́шим.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое и ектении́.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник,/ от слу́ха зла не убои́тся.

Моли́тва

О преподо́бне Пе́тре царе́виче, Росто́вский чудотво́рче! Я́коже из мра́ка язы́ческаго во свет Ева́нгельскаго уче́ния Госпо́дь тя призва́, та́ко умоли́ Его́, да и нас по неизрече́нней Свое́й бла́гости и человеколю́бию и́змет всеси́льною Свое́ю десни́цею из тьмы́ грехо́вныя и осия́ет сердца́ на́ша к де́ланию Его́ Боже́ственных за́поведей. Я́коже ты, избе́г мяте́жа мирски́х волне́ний, во ангелоподо́бное безпеча́льное житие́ сподо́бился еси́ дости́гнути, та́ко сподо́би и нам, гре́шным, мо́ря сего́, вла́емаго страстьми́, пучи́ну безмяте́жно преплы́ти, име́я тя, о́тче, ко́рмчаго о Го́споде на́шем, и дости́гнути чи́стым покая́нием ко приста́нищу спасе́ния ве́чнаго. И я́коже име́л еси́ споспе́шников тебе́, верхо́вных апо́столов Петра́ и Па́вла, в созида́нии оби́тели, та́ко подви́гни их умилосе́рдитися и о нас, недосто́йных, и дарова́ти нам от сугу́быя апо́стольския бла́гости дерзнове́ние ко Христу́ Бо́гу. Ве́руем бо, я́ко а́ще мо́щи твоя́ святы́я и сокрове́ны в земли́, но ты ца́рствуеши со избра́нными Бо́жиими на Небеси́. Исхода́тайствуй у́бо, да и нам, гре́шным, моли́твами твои́ми отве́рзется две́рь Ца́рствия Небе́снаго в безконе́чныя ве́ки. Ами́нь.