Служба в честь преподобнаго отца нашего Макария Желтоводскаго, Унженскаго чудотворца

ВЕ́ЧЕР

Блаже́н муж: 1-й антифо́н. На Го́споди, воззва́х: стихи́ры, глас 2.

Подо́бен: Ки́ими похва́льными:

Го́споди, даждь ми язы́к светлогла́сен/ уго́ждшаго Тебе́ преблаже́ннаго отца́ па́мять/ ве́рным лю́дем Твои́м возвести́ти,/ я́коже рече́ песнопи́сец Дави́д:/ честна́ пред Го́сподем смерть преподо́бных Его́./ О́тче Богому́дре, пресве́тлый свети́льниче Мака́рие,/ мно́га у́бо воздая́ния от Бо́га прия́л еси́,/ твои́ми чудесы́ озаря́я нас,/ пога́ныя посрами́л еси́,/ моли́твами же твои́ми бесо́вская кова́рства вся потреби́л еси́,/ моли́ Христа́ Бо́га/ спасти́ и просвети́ти ду́ши на́ша.

Глас проро́ка Твоего́, Го́споди, испо́лнити хотя́,/ рече́ бо Богооте́ц Дави́д,/ поя́ и моля́ся не престая́ день и нощь:/ удали́хся, бе́гая, и водвори́хся в пусты́ню,/ ча́ях Бо́га, спаса́ющаго мя./ А́ще бы пусты́ня уха́ла струя́ми слез твои́х,/ се бы, я́ко громогла́сная труба́,/ не бы почи́ла вопи́ти трудополо́жных по́двиг твои́х:/ А́нгелы возвесели́л еси́ и челове́ки удиви́л еси́, о́тче Мака́рие./ Преподо́бне и приснопа́мятне,/ моли́ Христа́ Бо́га/ спасти́ся душа́м на́шим.

Богоно́се о́тче Мака́рие,/ ты от младе́нства жесто́ким и приско́рбным путе́м ше́ствовал еси́,/ доброде́тельми же твои́ми,/ я́ко плодови́т виногра́д, на высоту́ возше́л еси́,/ любо́вию Влады́це твоему́ неле́стно после́довав./ Сего́ ра́ди Небе́сный граждани́н был еси́/ и та́мо нам у Христа́ Бо́га покро́в испроси́ от бесо́вских искуше́ний,/ Его́же моли́ дарова́ти душа́м на́шим/ мир и ве́лию ми́лость.

Сла́ва, глас 4:

Ра́дуйся, всеблаже́нная главо́,/ и́же от млады́х ногте́й/ кре́постию ума́ Бо́га Вседержи́теля утвержда́емь,/ духо́вную пи́щу Христа́ па́че всех возлюби́л еси́,/ земны́я красоты́, и пи́щи, и поко́й отню́д возненави́дел еси́,/ того́ ра́ди Небе́сным си́лам собесе́дник яви́лся еси́, преподо́бне./ С ни́миже Христа́ Бо́га моли́ непреста́нно о всех нас,/ ве́рно чту́щих па́мять твою́.

И ны́не, Богоро́дичен: И́же Тебе́ ра́ди:

Вход. Проки́мен дне. Чте́ния 3

Прему́дрости Соломо́новы чте́ние (главы́ 5 и 6):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я́ и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, яко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́,/ внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник, преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На стихо́вне стихи́ры, глас 5:

Егда́ в честно́е успе́ние твое́/ град и су́щия ве́си вся,/ я́ко от фимиа́ма церко́внаго, напо́лнишася благово́ния,/ тогда́ позна́ша лю́дие твое́ преподо́бное преставле́ние/ и стеко́шася вси:/ луча́ми бо чуде́с всех озари́л еси́./ Тем и ны́не Христа́ Бо́га моли́/ спасти́ся душа́м на́шим.

Стих: Честна́ пред Го́сподем/ смерть преподо́бных Его́.

Днесь правове́рнии лю́дие стеко́шася/ в честно́е успе́ние твое́,/ тогда́ обре́тше, я́ко безце́нное сокро́вище некра́домое,/ лице́ же твое́, па́че со́лнечнаго све́та сия́юще,/ всю́ду благово́ния испо́лни./ Су́щим же хромы́м хожде́ние/ и слепы́м зре́ние дарова́л еси́./ Моли́ Христа́ Бо́га/ пода́ти отпуще́ние согреше́нием на́шим/ пресла́вно соверша́ющим па́мять твою́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Те́ло и ум очи́стив,/ себе́ при́сно Свята́го Ду́ха жили́ще соде́лал еси́,/ и ны́не, я́ко свети́ло, сия́еши,/ и от многоцеле́бнаго гро́ба твоего́ непреста́нно чудеса́ излива́еши,/ правове́рных же люде́й неизглаго́ланною ра́достию возвесели́л еси́./ Моли́ Христа́ Бо́га спасти́ся душа́м нашим.

Сла́ва, глас 5:

Востру́бим духо́вными пе́сньми/ во псалме́х и пе́ниих,/ стеце́мся в це́рковь Бо́жию/ и услы́шим засту́пника гра́ду на́шему Га́личу,/ его́же моли́твами свои́ми соблюда́ет всегда́ от наше́ствия сопроти́вных./ Те́мже ему́ вси та́ко рцем:/ о́тче Мака́рие приснопа́мятне,/ предвари́ и изба́ви нас от искуше́ний вся́ческих,/ любо́вию моля́щих тя,/ я́ко те́пла предста́теля ко Спа́су всех Бо́гу за лю́ди твоя́,/ да спасе́т ду́ши на́ша.

И ны́не, Богоро́дичен: Храм и дверь еси́:

Та́же, Ны́не отпуща́еши:

Тропа́рь, глас 5:

Днесь град твой Га́лич тобо́ю хва́лится,/ в конце́х бо его́ пресве́тло,/ я́ко ве́лие со́лнце, возсия́л еси́/ и чудесы́ твои́ми, преподо́бне Мака́рие, вся озари́л еси́./ И ны́не моли́ся Го́сподеви/ изба́витися душа́м на́шим от пре́лести вра́жия/ и спасти́ся гра́ду твоему́ от пога́нскаго наи́тия.

Ин тропа́рь, глас 4:

Богому́дрый Желтово́дския оби́тели первозда́телю,/ Бо́гом поста́вленный мона́шескаго жития́ сто́лпе,/ благопи́санный досточу́днаго по́стничества о́бразе,/ Богозда́нный Ду́ха Свята́го сосу́де,/ златоза́рное Ру́сския земли́ свети́ло всесве́тлое,/ мо́лим тя, о́тче Мака́рие,/ светоза́рною моли́тв твои́х луче́ю разреша́й мра́чных страсте́й на́ших о́блак.

Сла́ва, и ны́не, Богоро́дичен по гла́су.

НА У́ТРЕНИ

На Бог Госпо́дь: тропа́рь преподо́бнаго два́жды. Сла́ва, и ны́не, Богоро́дичен.

По 1-й стихоло́гии седа́лен, глас 4.

Подо́бен: Ско́ро предвари́:

Зва́нию Го́спода твоего́ после́довал еси́, мир оста́вив/ и вся, я́же в ми́ре, красова́ния, преблаже́нне Мака́рие:/ претерпе́л еси́ усе́рдно пусты́нное озлобле́ние,/ полки́ же бесо́вския отри́нул еси́ му́жески./ Те́мже па́мять твою́ при́сно восхваля́ем пе́сньми ве́рно.

Сла́ва, и ны́не, Богоро́дичен:

Обнови́ла еси́, Чи́стая, Боже́ственным Рождество́м Твои́м/ истле́вшее во страсте́х земноро́дных ме́ртвенное существо́/ и воздви́гла еси́ вся от сме́рти к животу́ нетле́ния./ Те́мже Тя по до́лгу блажи́м вси, Де́во Препросла́вленная,/ я́коже прорекла́ еси́.

По 2-й стихоло́гии седа́лен, глас 5.

Подо́бен: Собезнача́льное Сло́во:

По́стника Госпо́дня пе́сньми почти́м,/ я́ко умертви́вша вся прило́ги страсте́й воздержа́нием тве́рдым/ и кре́пким терпе́нием вои́стинну, и посрами́вша зело́ сопроти́внаго всю горды́ню,/ и ны́не моля́щася Го́сподеви поми́ловатися душа́м на́шим.

Сла́ва, и ны́не, Богоро́дичен:

Ужа́сно чу́до зача́тия и несказа́нен о́браз Рождества́ в Тебе́ позна́ся, Присноде́во Чи́стая,/ ужаса́ет мой ум, и удивля́ет помышле́ние./ Сла́ва Твоя́, Богоро́дице, во всех простре́ся ко спасе́нию душа́м на́шим.

По полиеле́и седа́лен, глас 1.

Подо́бен: Гроб Твой, Спа́се:

Погре́бл еси́ страсте́й все воста́ние умерщвле́нием пло́ти, свяще́нный о́тче,/ жизнь безконе́чную по сме́рти прия́л еси́./ Те́мже днесь Христо́ва Це́рковь пра́зднует твою́ досточу́дную па́мять,/ преподо́бных украше́ние.

Сла́ва, и ны́не, Богоро́дичен:

Наста́ви нас на путь покая́ния, укло́ньшияся при́сно к безпу́тием зол/ и Преблага́го прогне́вавшия Го́спода,/ Неискусобра́чная благослове́нная Мари́е,/ прибе́жище отча́янных челове́ков, Бо́жие жили́ще.

Степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду трудо́в твои́х,/ де́монския погуби́л еси полки́/ и а́нгельския дости́гл еси́ чи́ны,/ и́хже житию́ без поро́ка поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.

Кано́н, глас 4.

Песнь 1

Ирмо́с: Колесни́цы фарао́новы и си́лу его́/ вве́рже в мо́ре Кре́пкий в бра́нех,/ воспое́м песнь но́вую, я́ко просла́вися.

Весь освяще́н быв благода́тию Христо́вою, Мака́рие преподо́бне,/ вои́стинну, я́ко избра́н сосу́д, Бо́гови показа́лся еси́/ и жили́ще че́стно Свята́го Ду́ха.

От ю́ности Бо́га возлюби́л еси́, преподо́бне Мака́рие,/ и Тому́ от всея́ души́ порабо́тал еси́, преблаже́нне./ И ны́не помина́й нас, пресве́тло соверша́ющих па́мять твою́.

От страсте́й душетле́нных ми́ра сего́ избе́гл еси́, преподо́бне,/ и в пусты́ню всели́лся еси́ глубо́кую./ Ны́не же у́бо ра́дуется дух твой в Небе́сных оби́телех.

Богоро́дичен: О Тебе́ ра́дуется вся́кое созда́ние Бо́жие, Ма́ти Бо́га Вы́шняго,/ Его́же понесла́ еси́, нося́щаго вся́ческая./ И мы, чту́ще Тя вои́стинну, я́ко Богоро́дицу в пе́снех велича́ем.

Песнь 3

Ирмо́с: Утвержда́яй гром и созида́яй дух,/ утверди́ мене́, Го́споди,/ да Тя пою́ и́стинно/ и творю́ во́лю Твою́,/ я́ко несть свят, я́ко Ты, Бо́же наш.

Уха́ет твоя́ ра́ка бога́тно и дае́т незави́стно всем исцеле́ние,/ ду́ши же от бесо́вских наве́т избавля́еши моли́твами твои́ми, преподо́бне.

Отгна́л еси́, преподо́бне, от люде́й твои́х бесо́вская озлобле́ния,/ и гряду́щая их ополче́ния, я́же на нас, мо́лим тя укроти́ти,/ я́ко да при́сно соверша́ем па́мять твою́.

Утверди́ се́рдце мое́ све́тло воспева́ти па́мять твою́, о́тче всеблаже́нне Мака́рие:/ поще́нием бо и бде́нием, я́ко А́нгел, показа́лся еси́,/ в моли́твах воспева́я Бо́га, подаю́щаго нам тобо́ю всем исцеле́ние.

Богоро́дичен: Всепе́тая Ма́ти Бо́жия, ро́ждшая нам Жизнода́вца и Спа́са всех Бо́га,/ Того́ у́бо, Госпоже́, моли́ бо́дренною Твое́ю моли́твою, да спасе́т ду́ши на́ша.

Седа́лен, глас 3:

Моля́ приле́жно Го́спода и Того́ ра́ди свы́ше ве́лие дерзнове́ние прия́л еси́,/ я́коже и инове́рнии чудесе́м твои́м дивля́хуся вои́стинну, прехва́льне Мака́рие:/ их бо ага́рянское безбо́жное шата́ние посрами́л еси́/ и моли́твами твои́ми до конца́ их ослепи́л еси́,/ град же и вся су́щия лю́ди в нем неврежде́нны соблю́л еси́./ И ны́не, преподо́бне, Христа́ Бо́га моли́ ми́лостива быти нам днесь и во ве́ки.

Сла́ва, и ны́не, Богоро́дичен:

Устраши́ся вся́кое земноро́дное слы́шание,/ от недр Оте́ческих в деви́чу утро́бу всели́вшася слы́шаще,/ Его́же у́бо проро́цы провозвести́ша, из Тебе́ воплоще́нна бы́ти Сы́на Бо́жия,/ Ма́ти Де́во Всепе́тая,/ Его́же моли́ спасти́ ста́до Твое́, Богоро́дице.

Песнь 4

Ирмо́с: Услы́шах, Бо́же, слух Твой и убоя́хся,/ разуме́х дела́ Твоя́ и ужасо́хся, Го́споди,/ я́ко Твоего́ хвале́ния испо́лнь земли́.

Се удали́лся еси́, бе́гая ми́ра и су́щих в нем/ и прилепи́лся еси́ Го́сподеви твоему́, Влады́це и Бо́гу всех,/ Ему́же, при́сно поя́, благоугоди́л еси́, му́дре Мака́рие.

Удиви́шася а́нгельстии ли́цы твоему́ трудолю́бию, блаже́нне,/ и мы, ве́рнии, при́сно тя сла́вим,/ я́ко да моли́твами твои́ми изба́вимся бу́дущаго осужде́ния.

Украша́ется днесь ве́рных собо́р,/ торжеству́я, преподо́бне, в па́мять твою́,/ пога́ных же со́нмища ужаса́ются,/ ви́дяще тя кре́пка засту́пника гра́ду твоему́ и живу́щим в нем.

Богоро́дичен: Исцели́, Де́во, боле́зни серде́ц на́ших,/ Тебе́ бо и́мамы Помо́щницу и Хода́таицу к Сы́ну Твоему́ и Бо́гу на́шему,/ Его́же родила́ еси́, Спа́са и Врача́ всех, источи́вшаго спасе́ние душа́м на́шим.

Песнь 5

Ирмо́с: Возсия́й ми, Го́споди, свет повеле́ний Твои́х,/ я́ко к Тебе́ дух мой у́тренюет и пое́т Тя:/ Ты бо еси́ Бог наш,/ и к Тебе́ прибега́ю, Царю́ ми́ра.

В пусты́ни я́сно возсия́л еси́, Богодохнове́нне Мака́рие,/ нося́ во усте́х твои́х непреста́нныя моли́твы./ Тем мра́чныя собла́зны и бесо́вския полки́ до конца́ потреби́л еси́.

Возгреме́ Илия́ на колесни́це,/ ты же, свя́те, воспева́л еси́ богодохнове́нную песнь в пусты́ни,/ со А́нгелы вся́ческих Влады́ку умоля́я, е́же улучи́ти Го́рнее пребыва́ние.

Водвори́лся еси́, блаже́нне, в Небе́сныя оби́тели,/ и со А́нгелы, преподо́бне, лику́еши в Го́рних селе́ниих,/ и та́мо Вседержи́теля вы́ну зри́ши Бо́га,/ Его́же непреста́нно моли́ о всех нас.

Богоро́дичен: Вы́шша естества́ Бо́га пло́тию породила́ еси́, Де́во, я́коже Сам восхоте́./ Тем, ве́рнии, мо́лим Тя,/ изба́витися нам Рождество́м Твои́м ве́чнаго муче́ния.

Песнь 6

Ирмо́с: Бу́ря мя помышле́ний, пости́гши,/ во глубину́ низвлачи́т мя безме́рных грехо́в,/ но Ты, Упра́вителю Благи́й,/ предвари́в, упра́ви,/ я́ко проро́ка, и спаси́ мя.

Безпло́тных житие́ подража́л еси́, преподо́бне, я́ко А́нгел непоро́чно на земли́ пожи́в,/ воздержа́нием плотски́я стра́сти умертви́л еси́, о́тче Мака́рие,/ сла́ву же ми́ра сего́ возненави́дел еси́, Богому́дре.

Боже́ственный глас вня́л еси́ себе́, прему́дре,/ тем и в пусты́ню водвори́лся еси́, послуша́нием любе́зно нося́ Крест Его́./ И сего́ ра́ди потща́лся еси́ чи́ста себе́ сохрани́ти до конца́, преподо́бне.

Боже́ственным манове́нием тебе́ зве́рие ди́вии в пусты́ни покори́шася:/ стра́сти бо тебе́ плотски́я вся умири́шася./ Сего́ ра́ди и бесо́вская льще́ния посрами́л еси́.

Богоро́дичен: Боже́ственное селе́ние Ты еси́, Пречи́стая Богоро́дице:/ от Твоея́ бо утро́бы произы́де Сло́во О́тчее и бысть Бог и Челове́к,/ я́ко да за неизрече́нное милосе́рдие спасе́т челове́ческий род.

Конда́к, глас 2:

Вторы́й Моисе́й яви́лся еси́, преподо́бне:/ он бо жезло́м мо́ре раздели́,/ ты же стра́сти, я́ко Амали́ка, победи́л еси́/ и непрохо́дную пусты́ню немяте́жным умо́м проше́л еси́,/ в не́йже моли́твами твои́ми ве́лие чу́до сотвори́л еси́:/ гла́дныя лю́ди до изоби́лия прекорми́л еси́./ И ны́не моли́ся Го́сподеви/ пода́ти всем печа́льным утеше́ние,/ Мака́рие, о́тче приснопа́мятне,/ и́же Га́личестей стране́ и всей Росси́йстей земли́/ похвала́ и утвержде́ние.

И́кос:

Я́ко светоза́рная луча́, вселе́нней свет возвеща́я, днесь ты, всему́дре о́тче Мака́рие,/ озари́л еси́ Га́лическую страну́ и всю зе́млю Росси́йскую чудесы́ твои́ми,/ и́миже тя Христо́с Бог обогати́./ Тем и вопие́м ти:/ ра́дуйся, пребога́те о́тче Мака́рие,/ ра́дуйся, е́же всех по́стничествующих всечестно́е сосло́вие./ Ра́дуйся, я́ко ли́ку святы́х всему́дрое сочета́ние показа́лся еси́,/ ра́дуйся, преподо́бных всех удобре́ние и отце́в похвало́./ Ра́дуйся, крестоно́сное после́дование по гла́су Го́спода твоего́,/ ра́дуйся, и́же у Христа́ ве́рному во́инству на́шему на сопроти́вныя побе́ды испроша́еши./ Ра́дуйся, я́ко град наш от ва́рварскаго наи́тия невреди́м сохраня́еши,/ ра́дуйся, я́ко пусты́нным селе́нием светоли́чен вене́ц себе́ сплел еси́./ Ра́дуйся, я́ко Небе́снаго жи́тельства смиренному́дрия ра́ди твоего́ дости́гнути сподо́бился еси́,/ ра́дуйся, я́ко у престо́ла Вседержи́теля Бо́га со А́нгелы лику́еши./ Ра́дуйся, я́ко усе́рдно Того́ за ве́рныя рабы́ мо́лиши,/ ра́дуйся, Мака́рие приснопа́мятне,/ и́же Га́личестей стране́ и всей Росси́йской земли́ вели́кая похвала́ и утвержде́ние.

Песнь 7

Ирмо́с: Глаго́лавый на горе́ с Моисе́ом/ и о́браз де́вства явле́й в купине́,/ благослове́н еси́, Бо́же оте́ц на́ших.

Гла́сом любе́зным Тро́ицу воспева́я,/ и я́ко Богодохнове́нен орга́н яви́лся еси́, Мака́рие преподо́бне, и́же велегла́сно всем зовы́й:/ благослове́н Бог оте́ц на́ших.

Пусты́нная вита́ния бога́тно получи́в, свя́те Мака́рие,/ ю́же прехожда́л еси́ непреста́нною моли́твою,/ и та́мо получи́в духо́вную пи́щу, зовы́й:/ благослове́н Бог оте́ц на́ших.

Глаго́л Госпо́день исполня́я,/ за́поведи Бо́га твоего́ от ю́ности сохрани́л еси́, о́тче Мака́рие,/ и Того́ благода́тию возмо́гл еси́ пога́ных собо́рища твои́ми чудесы́ удиви́ти./ Сего́ ра́ди зове́м:/ благослове́н Бог оте́ц на́ших.

Богоро́дичен: Глаго́л Деви́ч Ио́сиф Тя нарече́, я́ко пра́во есть:/ утро́бу же не деви́чу, но Небе́сный круг и земну́ю широту́./ Во Твое́й бо утро́бе О́тчее Сло́во бысть, благослове́н Бог оте́ц на́ших.

Песнь 8

Ирмо́с: Земля́ и вся, я́же на ней,/ мо́ре и вси исто́чницы,/ Небеса́ небе́с, свет и тьма, мраз и зной,/ сы́нове челове́честии,/ свяще́нницы, благослови́те Го́спода/ и превозноси́те Его́ во ве́ки.

Земна́я вся оста́вив, пи́щу же и сла́ву ми́ра сего́, я́ко прах, вмени́л еси́/ и еди́наго Бо́га возжеле́л еси́, о́тче,/ Его́же моли́ пла́мень страсте́й угаси́ти в нас,/ пою́щих и превознося́щих Его́ во ве́ки.

Зе́млю от младе́нства слеза́ми твои́ми, я́ко ту́чами, напои́л еси́, блаже́нне,/ по́ты же и по́двиги трудо́в твои́х кто́ испове́сть?/ И́хже ра́ди венча́ тя Христо́с в Ца́рствии Свое́м,/ Е́го́же пое́м и превозно́сим во ве́ки.

Земля́ я́ко плодови́та, яви́лся еси́, о́тче Мака́рие:/ изне́сл бо еси богосажде́нный плод, ве́рных напитава́ющ сердца́/ бра́шном живоно́сным Ева́нгельскаго уче́ния Христо́вых усте́н,/ Его́же пое́м и превозно́сим во ве́ки.

Богоро́дичен: 3емле́ свята́я и Непоро́чная Де́во,/ из Тебе́ бо напосле́док прозябе́ Христо́с Бог,/ я́коже кля́лся есть Авраа́му, рабу́ Своему́, е́же умно́жити се́мя его́/ и Тобо́ю спасти́ седя́щия во тьме./ Спаси́, Влады́чице, всех, пою́щих Тя и превознося́щих Го́спода во ве́ки.

Песнь 9

Ирмо́с: Я́ко сотвори́ Мне вели́чия Си́льный,/ и Свя́то И́мя Его́,/ и ми́лость Его́/ в род и род боя́щимся Его́.

Я́ко те́пла засту́пника стяжа́хом тя в бране́х, о́тче Мака́рие:/ плене́нныя бо моли́твами твои́ми свобожда́еши и неве́рныя со́нмища посрамля́еши.

Я́ко со́лнце светоно́сное, чудесы́ сия́еши, Мака́рие,/ и равноа́нгельно на земли́ пожи́л еси́, Богому́дре,/ Боже́ственней же сла́ве со А́нгелы предстоя́ти сподо́бился еси́.

Прекра́сен дом Свята́го Ду́ха яви́лся еси́/ и Царя́ всех Христа́ Бо́га от всея́ души́ возлюби́л еси́,/ Его́же ра́ди в чудесе́х прославля́ешися, досточу́дне о́тче Мака́рие преподо́бне.

Богоро́дичен: Вся тварь воспева́ет Тя, Богоро́дице,/ и Небе́снии чи́нове Тебе́ велича́ют непреста́нно:/ Бо́га бо и Царя́ всех родила́ еси́, Де́во Чи́стая./ Его́же моли́ вся гра́ды и страны́ ве́рныя соблюсти́ от наве́та вра́жия.

Свети́лен:

Влады́чню престо́лу ны́не с преподо́бными ли́ки предстоя́, Богому́дре,/ моли́тися не преста́й дарова́ти побе́ды во́инству на́шему на сопроти́вныя вся,/ и междоусо́бныя бра́ни укроти́ти,/ и мир ми́рови устро́ити, о́тче Мака́рие,/ и спасти́ ду́ши на́ша.

Сла́ва, и ны́не, Богоро́дичен:

От нерукотворе́нных пеле́н небе́сных о́блак/ в смире́нныя пелены́ тле́нныя облече́ся Сло́во О́тчее,/ из Де́вы неизрече́нно без се́мене роди́вся,/ Ю́же, Чи́стую Ма́терь, Пресла́вную Богоро́дицу,/ непреста́нно пое́м и славосло́вим во ве́ки.

На хвали́тех поста́вим стихо́в 4, глас 8:

О́тче Богому́дре Мака́рие,/ в ме́ру похвалы́ преподо́бных дости́гл еси́:/ смиренному́дрия же ра́ди де́монов вы́и сокруши́л еси́,/ слеза́ми же пото́ки и по́стными труды́/ ва́рваров ро́ги сломи́л еси́./ Христу́ приле́жно моли́ся, преподо́бне,/ соверше́нне испроси́ти оте́честву побе́ды на сопроти́вныя.

Преподо́бне о́тче Мака́рие,/ нача́льниче мона́шествующих,/ егда́ у́бо бы́вшу гне́ву Бо́жию на лю́ди,/ тогда́ ва́рвары оби́тель твоея́ па́ствы плени́ша,/ и ча́да твоя́ мечи́, я́ко кла́сы пожа́ша;/ моли́твами же и моле́нием твои́м/ к невече́рнему Све́ту их посла́л еси́,/ иде́же от Влады́ки всех Бо́га досто́йныя венцы́ прия́ша;/ Его́же приле́жно моли́ дарова́ти нам ве́лию ми́лость.

В Вы́шних ве́чная взыска́л еси́,/ до́льняя же вся, я́ко мимоше́дшая, вмени́л еси́/ и та́ко изя́щен моли́твенник показа́лся еси́./ Егда́ же у́бо от шата́ния безбо́жных ва́рвар/ непрохо́дными пусты́нями ше́ствовал еси́,/ тогда́ моли́твами твои́ми до изоби́лия бра́шно лю́дем твои́м испроси́л еси́./ И ны́не нам па́че духо́вную пи́щу от Христа́ испроси́,/ о́тче Мака́рие, преподо́бне,/ я́ко да, любо́вию в па́мять твою́ соше́дшеся,/ тебе́ почита́ем.

Сла́ва, глас 6:

Псало́мски пе́сньми днесь почти́м преподо́бнаго/ с весе́лием о Го́споде и па́ки рцем:/ ра́дуйся, блаже́нства тезоимени́те Мака́рие,/ ра́йскаго ра́дования напо́лнивыйся,/ и от Христа́ Бо́га нетле́нный вене́ц прия́л еси́,/ и, я́ко свети́льник пресве́тлый, ду́шу твою́ просвети́л еси́./ И ны́не та́ко пе́сньми вси возопие́м:/ ра́дуйся, преподо́бне о́тче наш.

И ны́не, Богоро́дичен.

Славосло́вие вели́кое. И отпу́ст.

На Литурги́и слу́жба преподо́бническая.

Моли́тва

О преподо́бне и Богоно́сне о́тче наш Мака́рие! Ве́руем, я́ко ты, предстоя́ Престо́лу Пресвяты́я Тро́ицы, ве́лие и́маши дерзнове́ние в моли́твах ко Всеми́лостивому Го́споду Бо́гу, И́же всегда́ послу́шает тебе́, ве́рнаго раба́ и уго́дника Своего́. Сего́ ра́ди с умиле́нием смире́нно припа́даем к тебе́, свя́тче Бо́жий, не премолчи́ о нас моли́тися ко Го́споду Бо́гу, в Тро́ице покланя́емому и сла́вимому, да ми́лостиво призре́в на ны, не попу́стит нам поги́бнути во гресе́х на́ших, но да возста́вит па́дших, да пода́ст исправле́ние зло́му и окая́нному на́шему житию́, от гряду́щих грехопаде́ний восхища́я, и да прости́т нам вся, ели́ка са́ми собо́ю или́ чрез други́х кого́ согреши́хом мы́слию, сло́вом и де́лом, от рожде́ния до сего́ часа́. Ты, подви́жниче доброде́телей, о́тче наш Мака́рие, ве́си не́мощь естества́ на́шего и тя́жесть и скорбь време́н настоя́щих, моли́ у́бо вы́ну Го́спода Бо́га, да николи́же нас оставля́ет Его́ неизрече́нное милосе́рдие, но да храни́т нас от мирски́х искуше́ний, от диа́вольских сете́й и от плотски́х по́хотей, да прии́мем от Го́спода Бо́га тобо́ю и вся потре́бная к жи́зни вре́менней, освобожде́ние от бед и напа́стей, а среди́ их неосла́бное терпе́ние до конца́. Испроси́ нам у Го́спода Бо́га в ми́ре и покая́нии сконча́ти живо́т наш и невозбра́нно преити́ от земли́ на Не́бо, мыта́рств же и бесо́в возду́шных и ве́чныя му́ки изба́витися и сподо́битися Ца́рства Небе́снаго, с тобо́ю и со все́ми святы́ми, угоди́вшими Го́споду Бо́гу и Спаси́телю на́шему Иису́су Христу́, Ему́же подоба́ет вся́кая сла́ва, честь и поклоне́ние, со Безнача́льным Его́ Отце́м и с Пресвяты́м, и Благи́м, и Животворя́щим Его́ Ду́хом, ны́не, и при́сно, и во ве́ки веко́в. Ами́нь.

И́на моли́тва

Преподо́бне и Богоблаже́нне о́тче наш Мака́рие! Свети́льниче всеми́рный, мона́хов и подви́жников удобре́ние, Га́личския страны́ и всея́ Росси́йския земли́ засту́пниче! Неусыпа́емый и те́плый за ны, гре́шныя, моли́твенниче ко Всеми́лостивому Спа́су на́шему и Бо́гу Иису́су Христу́ и ко Пресвяте́й и Пречи́стей Ма́тери Его́, Влады́чице на́шей Богоро́дице и Присноде́ве Мари́и! Мо́лим твою́ всечестну́ю святы́ню, недосто́йнии ученицы́ твои́, не забу́ди ны, смире́нная ча́да твоя́, но я́ко чадолюби́вый оте́ц посеща́й ду́хом при́сно душ на́ших не́мощь. И́ испроси́ моли́твами твои́ми у Христа́ Бо́га на́шего, я́ко да освяти́т ду́ши на́ша и телеса́, и просвети́т наш ум и ра́зум, и очи́стит со́весть на́шу от вся́кия скве́рны, и от нечи́стых по́мыслов, и лука́вых умышле́ний, и вре́дных разуме́ний, и губи́тельнаго уны́ния, и изба́вит нас от вся́ких де́монских непреста́нных наве́тов же и озлобле́ний дневны́х и нощны́х. Да́рует же нам и́скреннее покая́ние, сокруше́ние се́рдцу, сле́зы и умиле́ние, воздержа́ние и тре́звость, смиренному́дрие, кро́тость же и безмо́лвие, и чистоту́ душе́вную и теле́сную, нищелю́бие же и страннолю́бие, и нелицеме́рную ко друг дру́гу любо́вь и милосе́рдие, и вся́кое и́ноческое благогове́ние. О всеблаже́нне о́тче наш Мака́рие, сподо́би ны после́довати, по си́ле на́шей, свято́му твоему́ и равноа́нгельному житию́! Я́ко да всеми́лостивым предста́тельством Преблагослове́нныя и Препросла́вленныя Присноде́вы Мари́и Богоро́дицы, Небе́сныя Цари́цы, христиа́нския Засту́пницы и Покрови́тельницы, и твои́ми святы́ми моли́твами Преблаги́й Христо́с Бог наш пока́жет на нас, гре́шных рабе́х Свои́х, благода́ть и ми́лость Свою́, и настоя́щих зол и бу́дущих мук ве́чных свободи́т нас, и сподо́бит ны насле́дники бы́ти Ца́рствия Своего́ Небе́снаго, сла́вящих и велича́ющих Его́ ку́пно, со Безнача́льным Его́ Отце́м, и Пресвяты́м, и Благи́м, и Животворя́щим Его́ Ду́хом, ны́не, и при́сно, и во ве́ки веко́в. Ами́нь.