Служба в честь преподобнаго отца нашего Антония Печерскаго, иже в Киеве, бывшаго начальника всех российских монахов

НА МА́ЛОЙ ВЕЧЕ́РНИ

На Го́споди, воззва́х: поста́вим стихо́в 4 и пое́м стихи́ры, глас 1.

Подо́бен: Небе́сных чино́в:

Святы́я горы́ вели́ких отце́в,/ о́тче Анто́ние, стопа́м после́довал еси́/ и, я́ко безпло́тен, в пло́ти подвиза́вся,/ о́браз мно́гим доброде́телию был еси́./ Отону́дуже и даро́в чуде́с от Христа́ сподо́бился еси́,/ исцеля́ти челове́ков разли́чныя неду́ги,/ моли́ спасти́ся душа́м на́шим.

Нача́льник мона́шествующих, о́тче Анто́ние, был еси́,/ себе́ первонача́ток без кро́ве Бо́гу принося́/ воздержа́нием любому́дрия;/ смире́нием, высо́кими нра́вы/ и безме́рным поще́нием врага́ посрами́л еси́, преподо́бне,/ моли́ спасти́ся душа́м на́шим.

Светоно́сная па́мять твоя́,/ о́тче преподо́бне Анто́ние,/ испо́лнена ра́дости и весе́лия яви́ся,/ отону́дуже свяще́нная твоя́ ча́да, соше́дшеся,/ духо́вно пра́зднующе, прославля́ем Го́спода,/ тебе́ и́скренно просла́вльшаго.

Сла́ва, глас 6:

Днесь гора́ Афо́нская,/ я́коже но́ваго Авраа́ма пресе́льника,/ тя пресла́вно, о́тче, прие́мши, ра́дуется,/ оте́чество же твое́, блаже́нне,/ па́ки сожи́теля тя иму́щи,/ зело́ весели́тся,/ и пеще́ра, в не́йже подвиза́лся еси́,/ о тебе́ красу́ется./ Пресве́тлый град Ки́ев, па́мять твою́ пра́зднуя,/ торже́ственная Го́споду воспева́ет,/ тя сте́ну неразоре́нну сему́ дарова́вшаго./ Мы же, ча́да твоя́,/ твои́м науче́нием наставля́еми,/ ны́не пресла́вное твое́ успе́ние пра́зднующе, мо́лимся:/ моли́ спасти́ся душа́м на́шим.

И ны́не, Богоро́дичен: Богоро́дице, Ты еси́ лоза́:

На стихо́вне стихи́ры, глас 2.

Подо́бен: До́ме Евфра́фов:

От земны́х к Небе́сным оби́телем/ пресла́вно, о́тче, преше́л еси́/ и та́мо преподо́бных че́сти сподо́бился еси́:/ с ни́миже моли́/ спасти́ся душа́м на́шим.

Стих: Честна́ пред Го́сподем/ смерть преподо́бных Его́.

Теле́сная чу́вства воздержа́нием,/ о́тче, умертви́л еси́,/ тем и в те́мную пеще́ру,/ я́ко в пресве́тлый черто́г, всели́лся еси́,/ иде́же и учени́к мно́жество Христу́ приве́л еси́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ста́до твое́,/ тебе́ почита́ющее, преподо́бне,/ и твое́ успе́ние пра́зднующее,/ ва́рварскаго наше́ствия избавля́я,/ моли́ спасти́ся душа́м на́шим.

Сла́ва, и ны́не, глас 2:

Храм прече́стен Бо́жия Ма́тере,/ я́коже Сама́ Та восхоте́, воздви́гл еси́/ и та́мо мно́жество учени́к собра́л еси́ в нем/ воспева́ти Влады́чицу и Богоро́дицу,/ Юже моли́, мо́лим ти ся, преподо́бне Анто́ние, не оста́вити,/ я́коже обеща́лся еси́, свяще́нное твое́ ста́до,/ избавля́я и спаса́я от проти́вных наше́ствия,/ да тебе́ вси, я́ко чадолюби́ваго отца́,/ пе́сньми непреста́нно почита́ем,/ прося́ще от Христа́ прия́ти тобо́ю ве́лию ми́лость.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: поста́вим стихо́в 8. И пое́м стихи́ры, глас 4.

Подо́бен: Зва́нный свы́ше:

Егда́ Боже́ственное раче́ние на́йде на тя, преподо́бне,/ тогда́ мирско́е пристра́стие, я́ко ху́до, вмени́л еси́,/ те́мже и пресе́льник от твоего́ оте́чества/ Святы́я горы́ был еси́/ и та́мо, посреде́ о́нех оте́ц,/ я́ко свети́ло, возсия́л еси́ доброде́телию, Анто́ние./ Христа́, Ему́же от ю́ности послужи́л еси́,/ моли́ спасти́ и просвети́ти ду́ши на́ша.

Егда́ Христо́вою любо́вию распали́лся еси́, преподо́бне,/ тогда́ ми́ра сего́ мудрова́ние и сла́ву,/ я́ко преходя́щую, возненави́дел еси́./ Те́мже и пеще́ру себе́ соде́лал еси́/ и в ней подвиза́лся, я́ко безпло́тен,/ те́мже и свы́ше безпло́тных по́чести сподо́бился еси́,/ с ни́миже Христу́ предстоя́,/ моли́ спасти́ и просвети́ти ду́ши на́ша.

Егда́ Боже́ственную любо́вь прия́л еси́ в се́рдцы, о́тче,/ тогда́ в те́мную пеще́ру,/ я́ко в пресве́тлый черто́г, вшел еси́,/ и та́мо неизрече́нных ра́зума обогати́лся,/ зре́ти бу́дущая, я́ко настоя́щая,/ и всем я́сно глаго́лати:/ Христа́, Ему́же от ю́ности порабо́тился еси́,/ Того́ моли́, преподо́бне,/ спасти́ и просвети́ти ду́ши на́ша.

И́ны стихи́ры преподо́бнаго, глас 5.

Подо́бен: Преподо́бне о́тче:

Преподо́бне о́тче Анто́ние,/ благода́тию Пресвята́го Ду́ха ум твой озари́в,/ тем, я́ко прозорли́в, проро́чески проре́кл еси́/ хотя́щ гнев Бо́жий приити́ на правосла́вие./ Отню́дуже и Си́мону спасе́ние от ра́тных обручи́л еси́/ и пре́жде церко́внаго зда́ния/ тому́ в ней положе́ну бы́ти предре́кл еси́./ Тем я́ко хода́тая тя вы́ну/ всем благи́м воспева́ем,/ прося́ще тобо́ю от Христа́ прия́ти ве́лию ми́лость.

Преподо́бне о́тче Анто́ние,/ ты, и́стиннаго Па́стыря и Учи́теля Христа́ за́поведи исполня́я,/ любо́вное и по преставле́нии твое́м показа́в,/ Ера́зма о раска́янии име́ния,/ ле́ностно пожи́вшаго,/ моли́твами твои́ми и явле́нием/ сме́ртнаго неду́га премени́л еси́/ и, вре́мя покая́ния тому́ дарова́в,/ ины́х к целому́дрию наста́вил еси́,/ те́мже Христа́ моли́ спасти́ся душа́м на́шим.

Преподо́бне о́тче Анто́ние,/ ты с Бо́гом целому́дренно кора́бль ума́ твоего́ напра́вил еси́/ и страстну́ю пучи́ну мо́ря ми́ра сего́ немяте́жно преплы́л еси́,/ Ду́ха Пресвята́го ве́трилом направля́емь,/ в ти́хое приста́нище поро́ды44 дости́гл еси́,/ иде́же святы́х жили́ще и поко́й пра́ведных./ С ни́миже моли́ся/ и нам та́мо вход получи́ти, мо́лимся.

Сла́ва, глас 6:

Жесто́кое твое́ житие́/ и труды́, я́же по Бо́зе,/ я́ко позна́но бысть отца́ми Святы́я Горы́,/ тогда́ Боже́ственным промышле́нием/ па́ки ко оте́честву твоему́ посыла́емь быва́еши:/ иди́, ча́до, глаго́ля,/ я́ко да и та́мо тобо́ю неве́дущими Бог позна́ется./ Отону́дуже прише́д, преподо́бне,/ оте́чество твое́ просвети́л еси́/ и чинонача́льник мона́хов был еси́,/ тех мно́жества ко Христу́ приве́д./ Те́мже и нас, пресве́тлое твое́ успе́ние пра́зднующих,/ моли́ сохрани́ти от враг нера́тованных/ и спасти́ся душа́м на́шим.

И ны́не, Богоро́дичен: Кто́ Тебе́ не ублажи́т:

Вход. Проки́мен дне. Чте́ния три.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 5):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их, и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры самогла́сны, глас 1:

Тезоимени́таго ра́ди твоего́ жития́/ Боже́ственным про́мыслом, Анто́ние, нарече́н был еси́,/ именова́ние от дел восприе́м:/ учени́к бо мно́жества собра́в, твои́м уче́нием после́дующих,/ сих Бо́гу приве́л еси́./ Но я́ко преподо́бным сожи́тель и пра́ведным,/ с ни́миже Тро́ице предстоя́й, моли́ о всех,/ пресла́вное твое́ успе́ние пе́сньми сла́вящих.

Я́ко стра́стнаго мра́ка ми́ра сего́ избежа́в,/ Анто́ние преподо́бне,/ тогда́ в пеще́ру всели́лся еси́, пречу́дне,/ и та́мо прини́кл еси́ во глубину́ Боже́ственнаго ра́зума./ Те́мже и сподо́бился еси́,/ я́ко прозорли́в, да́льняя проразумева́ти/ и, я́ко близ су́щая, я́сно глаго́лати,/ и о согреше́ниих людски́х поболе́в,/ и хотя́щая бы́ти за грехи́ челове́ческия/ ва́рварское наше́ствие проро́чески предре́кл еси́./ Но моли́ся, о́тче, мо́лимся,/ изба́витися нам такова́го преще́ния/ и спасти́ся душа́м на́шим.

Глас 2:

Кий ра́зум челове́ческий/ или́ язы́к возмо́жет изрещи́/ или́ похвали́ти по досто́инству житие́ твое́?/ И са́ми бо А́нгели житию́ твоему́,/ е́же на земли́ в телеси́, удиви́шася/ и похвали́ша Христа́,/ толи́кую побе́ду, преподо́бне, тебе́ на стра́сти дарова́вшаго,/ Его́же моли́, прехва́льне,/ спасти́ся похвале́ние, ели́ко мо́щно, тебе́ плету́щу,/ Анто́ние пречу́дне.

Блаже́нна пеще́ра,/ иму́щая в себе́ честны́я мо́щи твоя́, преподо́бне,/ от ни́хже истека́ют ве́рным исцеле́ния;/ блаже́нни же ученицы́ твои́,/ такова́го учи́теля тебе́ стяжа́вшии/ и такова́ отца́ ча́да наре́кшиися,/ Анто́ние пречу́дне,/ моли́твенниче о душа́х на́ших.

Глас 4:

Ны́не всечестно́е и свяще́нное те́ло твое́,/ преподо́бне Анто́ние,/ в пеще́ре лежа́щее,/ в не́йже е́же в жи́зни сей мно́го потруди́ся,/ исцеле́ния оби́льно источа́ет ве́рою приходя́щим./ Те́мже мо́лим тя:/ и душе́вное здра́вие моли́твами твои́ми/ при́сно подава́й тебе́ ублажа́ющим.

Сла́ва, и ны́не, глас 8:

Вели́ко дерзнове́ние и ве́ра,/ ю́же к Бо́гу, стяжа́л еси́, преподо́бне Анто́ние:/ проро́ку бо Гедео́ну подо́бяся,/ руно́м искуша́ющу побе́ду,/ та́кожде и ты, о́тче,/ росо́ю хоте́л еси́ уве́дети,/ где ме́сто уго́дно есть Влады́чице и Цари́це./ Те́мже и рекл еси́:/ а́ще обрето́х благода́ть пред Тобо́ю,/ да бу́дет по всей земли́ роса́,/ на ме́сте, на не́мже изво́лиши хра́му бы́ти, су́ша да бу́дет./ И па́ки, да бу́дет на ме́сте роса́./ И сия́ обоя́, о́тче, получи́л еси́,/ те́мже и прече́стен храм Ма́тери Бо́жии воздви́гл еси́,/ с Не́юже моли́ся Христу́, мо́лим,/ спасти́ся душа́м на́шим.

На стихо́вне стихи́ры, глас 1.

Подо́бен: Прехва́льнии му́ченицы:

Стопа́м вели́каго Анто́ния после́довал еси́, преподо́бне,/ он бо в пусты́ню безмо́лвия ра́ди всели́ся/ и А́нгелом собесе́дник бы́ти сподо́бися,/ ты же в подзе́мная ме́ста пеще́ры затвори́лся еси́,/ Свет неизрече́нный сподо́бился еси́ зре́ти./ Те́мже о́наго житию́ поревнова́в,/ именова́ние от де́йства прие́м,/ с ни́мже Тро́ице Святе́й предстоя́,/ моли́ спасти́ся душа́м на́шим.

Стих: Честна́ пред Го́сподем/ смерть преподо́бных Его́.

Я́ко пресве́тлый свети́льник,/ в те́мне ме́сте просия́л еси́,/ и, я́ко фи́никс в дому́ Бо́жии, проро́чески процве́л еси́/ и плод пресвя́т – сам себе́ Влады́це,/ жи́ву же́ртву без кро́ве, прине́сл еси́, о́тче./ Те́мже тя вси, любо́вию соше́дшеся,/ по достоя́нию при́сно ублажа́ем.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Пеще́ра, в не́йже лежи́т свяще́нное те́ло твое́,/ преподо́бне Анто́ние,/ Ду́ха Пресвята́го си́лою/ неду́ги разли́чныя исцеля́ет ве́рою приходя́щих,/ бе́си от челове́к отгони́ми быва́ют,/ и разсла́бленнии, здра́вие прие́млюще, отхо́дят./ Мы же, похваля́юще Го́спода, глаго́лем:/ честна́ пред Го́сподем смерть святы́х Его́.

Сла́ва, глас 6: Ди́вно проше́ние, и ве́ра превели́ка,/ ю́же стяжа́л еси́, преподо́бне Анто́ние,/ проро́ку бо Илии́ подо́бяся./ Он бо огнь с небесе́ сведе́/ в пояде́ние же́ртвы,/ та́кожде и ты моли́твою огнь с небесе́ сво́диши/ в пояде́ние и очище́ние ме́ста,/ иде́же пресла́вный храм Влады́чицы и Богоро́дицы хотя́ше воздви́гнутися./ Те́мже тя, я́ко сожи́теля преподо́бным/ и проро́ком ревни́теля,/ ублажа́юще, мо́лим:/ моли́ся Христу́ спасти́ся душа́м на́шим.

И ны́не, Богоро́дичен: Творе́ц и Изба́витель:

На благослове́нии хле́бов тропа́рь преподо́бнаго два́жды и Богоро́дице, Де́во: еди́ножды.

Тропа́рь, преподо́бнаго, глас 4:

От мирска́го мяте́жа изше́д,/ отверже́нием же ми́ра ева́нгельски Христу́ после́довал еси́/ и, равноа́нгельное житие́ пожи́в,/ в ти́хое приста́нище Святы́я Горы́ Афо́на дости́гл еси́,/ отону́дуже благослове́нием отце́в в го́ру Ки́ева прише́д/ и та́мо трудолю́бно жизнь соверши́в,/ оте́чество твое́ просвети́л еси́/ и, мно́жеству мона́шествующих стезю́, веду́щую к Небе́сному Ца́рствию, показа́в,/ Христу́ сия́ приве́л еси́,/ Его́же моли́, Анто́ние преподо́бне,/ да спасе́т ду́ши на́ша.

НА У́ТРЕНИ

На Бог Госпо́дь: тропа́рь свята́го по уста́ву.

По 1-й стихоло́гии седа́лен, глас 4.

Подо́бен: Ско́ро предвари́:

Пресве́тлый и светоно́сный, Богому́дре Анто́ние, твой приспе́ пра́здник,/ созыва́ющий мона́хов мно́жества просла́вити и пе́ти твое́ честно́е успе́ние,/ прося́ще от Христа́ хода́тайством твои́м прия́ти ве́лию ми́лость.

Сла́ва, и ны́не, Богоро́дичен:

Яви́лася еси́ вы́шши Го́рних сил, Влады́ку ро́ждши, Богоро́дице,/ и земны́х естество́ вознесла́ еси́, Богоневе́стная,/ те́мже Тя, и́стинную Богороди́тельницу, душе́ю и язы́ком, ве́рнии, сла́вим.

По 2-й стихоло́гии седа́лен, глас 4.

Подо́бен: Удиви́ся Ио́сиф:

Собесе́дник и сослужи́тель отце́м Святы́я Горы́, о́тче, был еси́,/ и тех стопа́м после́довав, я́ко безпло́тен, на земли́ пожи́л еси́./ Те́мже преподо́бным яви́лся еси́ единожи́тель,/ с ни́миже и в Вы́шних ликовству́я, моли́ спасти́ся душа́м на́шим,/ тебе́ непреста́нно сла́вящим.

Сла́ва, и ны́не, Богоро́дичен:

Удиви́ся Ио́сиф, е́же па́че естества́ зря,/ и внима́ше мы́слию, и́же на руно́ дождь,/ в безсе́менном зача́тии Твое́м, Богоро́дице,/ купину́, огне́м неопали́мую, жезл Ааро́нов прозя́бший,/ и, свиде́тельствуя, обру́чник Твой и храни́тель свяще́нником взыва́ше:/ Де́ва ражда́ет, и по рождестве́ па́ки Де́ва пребыва́ет.

По полиеле́и седа́лен, глас 8.

Подо́бен: Прему́дрости:

В подзе́мныя пеще́ры вшел еси́, преподо́бне,/ и отту́ду я́ко победи́тель страсте́й, на колесни́цу доброде́телей возше́д,/ я́коже други́й Илия́, к Небесе́м возлете́в,/ та́мо пра́ведно пресве́тлым венце́м венча́лся еси́, блаже́нне./ Но я́ко егда́ с на́ми был еси́ в жи́зни сей,/ печа́ся и промышля́я нам поле́зная,/ та́ко и ны́не, о́тче Анто́ние, моли́ Христа́ Бо́га/ грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Всенепоро́чная Неве́ста Творцу́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Препе́тая,/ беззако́нию мя су́ща скве́рное оби́телище и бесо́м игра́лище в ра́зуме бы́вша,/ потщи́ся от тех злоде́йства мя изба́вити/ и све́тлое жили́ще доброде́телей соверши́, Светоно́сная Нетле́нная,/ отжени́ о́блак страсте́й и вы́шняго прича́стия сподо́би/ и Све́та невече́рняго моли́твами Твои́ми.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Жесто́кое твое́ житие́/ и труды́, я́же по Бо́зе,/ я́ко позна́но бысть отца́ми Святы́я Горы́,/ тогда́ Боже́ственным промышле́нием/ па́ки ко оте́честву твоему́ посыла́емь быва́еши:/ иди́, ча́до, глаго́ля,/ я́ко да и та́мо тобо́ю неве́дущими Бог позна́ется./ Отону́дуже прише́д, преподо́бне,/ оте́чество твое́ просвети́л еси́/ и чинонача́льник мона́хов был еси́,/ тех мно́жества ко Христу́ приве́д./ Те́мже и нас, пресве́тлое твое́ успе́ние пра́зднующих,/ моли́ сохрани́ти от враг нера́тованных/ и спасти́ся душа́м на́шим.

Кано́н Богоро́дицы со ирмосо́м на 6, гла́са 8-го. И преподо́бнаго на 8, глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери́,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Зе́льным воздержа́нием, и труды́, о́тче Анто́ние, и всено́щным стоя́нием/ ду́шу твою́ царя́ над страстьми́ теле́сными поста́вил еси́./ Те́мже, со святы́ми веселя́щеся, Христа́ пое́м,/ тебе́ такову́ побе́ду на стра́сти дарова́вшаго.

Приспе́ днесь всечестны́й день успе́ния твоего́, о́тче Анто́ние,/ бога́тно веселя́ ча́да твоя́, всече́стне./ Те́мже, помина́юще твое́ дре́внее житие́ и а́нгельскую жизнь,/ све́тло пра́зднующе, тебе́ воспева́ем, о́тче.

От те́мных мест восхи́тився,/ к превы́шним све́тлостем пресла́вно преше́л еси́, преподо́бне,/ и та́мо со святы́ми, я́ко победи́тель страсте́й, о́тче, венча́лся еси́.

Богоро́дичен: Лю́те погружа́емую ду́шу мою́ в пучи́не страсте́й бу́рею безме́рных обстоя́ний,/ спасе́ния просте́рши ми ру́ку, возведи́, Влады́чице, из глубины́ зол мои́х.

Други́й кано́н преподо́бнаго, глас 2.

Песнь 1

Ирмо́с: Во глубине́ постла́ иногда́/ фараони́тское всевоинство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь сла́вно бо просла́вися.

Еще́ от ма́лыя версты́45, преподо́бне Анто́ние, вели́ку любо́вь стяжа́л еси́ к Бо́гу,/ и сего́ ра́ди плотска́я взыгра́ния и стра́сти до конца́ умертви́л еси́,/ и чистото́ю, я́коже кри́лы, впери́вся пресла́вно,/ к Небесе́м возлете́л еси́, о́тче.

Влады́чнему любостра́нству, преподо́бне, подо́бяся,/ сам стра́нствовати изво́лил еси́, Анто́ние,/ те́мже Всеви́дящее Око, ви́дя твое́ благо́е произволе́ние,/ да́ром чуде́с обогати́ тя, я́ко пресла́вна.

Душе́вную ти́хость и любо́вь, я́же к Бо́гу,/ нра́вы и обы́чаи благи́ми укра́шена тя ви́дев,/ твой духо́вный настоя́тель, преподо́бне,/ проро́чески всем пропове́дует хотя́щая напосле́док тобо́ю бы́ти пресла́вная, Анто́ние.

Богоро́дичен: Мои́х прегреше́ний, Влады́чице, плени́цы расто́ргни,/ Твоего́ Сы́на и Бо́га моля́щи, и томя́щий мя грех, Присноде́во, низложи́,/ я́ко да воспева́ю Тя, всегда́, Пренепоро́чная, Тобо́ю спаса́емь.

Катава́сия: Отве́рзу уста́ моя́:

Песнь 3

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Пропове́дует пресла́вно и па́че трубы́ вопие́т/ свяще́нная твоя́, о́тче, вели́кая Ла́вра, я́же тобо́ю нача́ло прие́мшая,/ дом же Бо́жия Ма́тере, а́ще и не гла́сом, вещьми́ же хва́лится. глаго́ля:/ утверди́хся Тобо́ю, Го́споди.

Еди́наго Го́спода возлюби́л еси́/ и, Сего́ Крест на ра́мо взем, преподо́бне Анто́ние,/ странноле́пно пожи́л еси́, в посте́х, и бде́ниих, и моли́твах о́браз быв твои́м ученико́м./ Те́мже и от Христа́ просла́вился еси́.

Плотска́го жела́ния, преподо́бне, отве́ргся, го́рдость возненави́дел еси́,/ смире́нием же и нището́ю обогати́вся,/ превысо́кая дости́гл еси́ святы́х жили́ща.

Богоро́дичен: Поми́луй, еди́на Богома́ти, поми́луй и уще́дри ду́шу мою́ окая́нную,/ потопля́емую бе́сы и страстьми́ лука́выми,/ и пре́жде вре́мене исхо́да моего́ сию́ очи́стити умилосе́рдися.

Ин

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

Прозре́в бу́дущая воздая́ния, зде маловре́менная, я́ко не су́щая, о́тче, оста́вил еси́/ и сего ра́ди сугу́бая воздая́ния прия́л еси́, преподо́бне./ Те́мже со А́нгелы непреста́нно пое́ши Влады́ку твоего́.

Моли́тися, о́тче, не преста́й о ста́де твое́м,/ е́же мно́гими по́ты и труды́ стяжа́л еси́,/ изба́вити всех обстоя́ний, бед же и скорбе́й,/ да вси тебе́, я́ко чадолюби́ва отца́, воспева́ем.

Весе́лием, преподо́бне, с чи́нми святы́х Бо́гу предстои́ши,/ я́же та́мо весе́лия и ра́дости насыща́яся,/ сподо́би и нас та́мошняя ра́дования получи́ти,/ да, веселя́щеся, тебе́ велича́ем, о́тче Анто́ние.

Богоро́дичен: Просте́рши ру́ку благоутро́бия, Богороди́тельнице,/ вся́каго мя изми́ осужде́ния, к Тебе́ прибега́ющаго, и Тебе́ припа́дающа,/ и призыва́юща Твою́ по́мощь.

Ин конда́к, глас 8:

В ми́ре я́ко А́нгел, о́тче, пожи́л еси́,/ в земли́ пеще́ру себе́ соде́лав,/ в не́йже до́бре подвиза́вся проти́ву неви́димаго врага́ ко́зней,/ и отту́ду, веселя́ся, преше́л еси́ к Небе́сным черто́гом./ Помина́й нас, чту́щих па́мять твою́, да зове́м ти:/ ра́дуйся, Анто́ние, о́тче наш.

Седа́лен, глас 4.

Подо́бен: Удиви́ся Ио́сиф:

Удиви́ся твой духо́вный настоя́тель, в тебе́ вели́ко воздержа́ние зря,/ и внима́ше мы́слию хотя́щая о тебе́ напосле́док бы́ти, Анто́ние,/ ви́де бо по Бо́зе твое́ вели́кое житие́ и вра́жиими прило́ги ника́коже поколеби́ма./ Те́мже и свиде́тельствует, я́ко оте́ц и храни́тель твоего́ жития́,/ отце́м Святы́я Горы́ вопия́ше:/ сей, и́же посреде́ нас ви́дится ме́ньший/ но последи́ в Росси́и вели́кий свети́льник бу́дет.

Сла́ва, и ны́не, Богоро́дичен:

Удиви́ся Ио́сиф, е́же па́че естества́ зря,/ и внима́ше мы́слию, и́же на руно́ дождь,/ в безсе́меннем зача́тии Твое́м, Богоро́дице,/ купину́, огне́м неопали́мую, жезл Ааро́нов прозя́бший/ и, свиде́тельствуя, обру́чник Твой и храни́тель свяще́нником взыва́ше:/ Де́ва ражда́ет, и по рождестве́ па́ки Де́ва пребыва́ет.

Песнь 4

Ирмо́с: Неизсле́дный Бо́жий Сове́т/ е́же от Де́вы воплоще́ния/ Тебе́, Вы́шняго,/ проро́к Авваку́м усмотря́я, зовя́ше:/ сла́ва си́ле Твое́й, Го́споди.

Ме́сто, в не́мже лежи́т честно́е и свяще́нное те́ло твое́, преподо́бне Анто́ние о́тче,/ мно́га исцеле́ния отту́ду прие́млют ве́рнии, Христу́ от души́ вопию́ще:/ сла́ва си́ле Твое́й, Го́споди.

Не устраши́ тебе́, преподо́бне, долгота́ жесто́каго пути́,/ ниже́ та́мо разбо́йническое наше́ствие./ Те́мже Святу́ю Го́ру доше́д, с су́щими та́мо отцы́ воспева́л еси́:/ сла́ва си́ле Твое́й, Го́споди.

Ви́дев Всеблаги́й Бог тве́рдое твое́ и до́брое изволе́ние,/ та́мо во святы́х ме́стех посреде́ оте́ц, сла́вна тя сотворя́ет,/ с ни́миже сподо́би взыва́ти:/ сла́ва си́ле Твое́й, Го́споди.

Богоро́дичен: Ко́рень из чресл Тя ца́рских, всех Царь, я́ко су́щу, вожделе́в/ и вы́шшу Херуви́м и Серафи́м соде́лав,/ Богоро́дице, всели́ся в Тя.

Ин

Ирмо́с: Пою́ Тя, слу́хом бо, Го́споди, услы́шах и ужасо́хся:/ до мене́ бо и́деши, мене́ ища́, заблу́ждшаго./ Тем мно́гое Твое́ снизхожде́ние, е́же на мя,/ прославля́ю, Многоми́лостиве.

Про́мыслом Бо́жиим па́ки ко оте́честву твоему́, блаже́нне, посыла́емь быва́еши,/ я́ко да и та́мо мно́гих ко спаси́тельному пути́ наста́виши, Творцу́ воспева́ти:/ сла́ва си́ле Твое́й, Го́споди.

Упова́нием бу́дущих благ, Анто́ние, укрепля́емь,/ плотско́е стремле́ние обузда́л еси́/ и твое́й пло́ти враг неми́лостив, о́тче, был еси́,/ сего́ ра́ди и по́мощь свы́ше стяжа́л еси́.

В целому́дрии жизнь твою препроводи́в, преподо́бне,/ земна́я Небе́сными измени́л еси́ и нетле́нная тле́нными искупи́л еси́./ Те́мже Христу́ пое́ши:/ сла́ва си́ле Твое́й, Го́споди.

Богоро́дичен: До́брых всех обнажи́хся и лежу́ в зло́бе:/ оболки́й всех, дре́вле па́дших, и ны́не мя пре́ждними украси́,/ и вторы́х изба́ви, Богоневе́сто.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Мона́шествующих о́браз, о́тче, и наказа́тель был еси́,/ те́мже и си́льным запреща́еши на восхище́ние не жела́ти, но па́че маломо́щныя ми́ловати./ И от сего́ просла́вился еси́, Анто́ние,/ и вели́к нарече́н учи́тель яви́лся еси́.

Вы́ше челове́ка, Анто́ние, стяжа́л еси́ житие́, равноа́нгельно пожи́в на земли́,/ те́мже ра́вну я́же А́нгелом по́честь сподо́бился еси́ получи́ти/ и пое́ши с ни́ми Влады́ку твоего́.

Богодарова́нныя твоя́ благода́ти, о́тче Анто́ние,/ всяк слух челове́ческий удиви́ша и научи́ша,/ я́же зде мня́щаяся вели́кая, я́ко ма́ла и ху́да, презре́ти вся и после́довати стопа́м твои́м,/ отону́дуже моли́, преподо́бне, спасти́ся нам.

Богоро́дичен: Упова́ние еси́ мое́, Пречи́стая, и спасе́ние, и похвала́./ Те́мже прибега́ю к покро́ву Твоему́:/ не гнуша́йся мене́, грехи́ мно́гими, и боле́зньми, и скорбьми́ ны́не поглоще́ннаго,/ но, предвари́вши, спаси́ мя.

Ин

Ирмо́с: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения/ приведе́ние и́мамы.

Стра́нно твое́ житие́, преподо́бне; / ку́пно же и смире́ние, е́же стяжа́л еси́, Анто́ние,/ я́ко ни сама́го све́та того́, и́же в ми́ре,/ ниже́ со́лнечнаго сия́ния, досто́йна тебе́ того́ вмени́л еси́ зре́ния,/ но в те́мне ме́сте еди́н тебе́ затвори́л еси́.

Це́рковь и дом Пресвята́го Ду́ха, о́тче Анто́ние, был еси́,/ разли́чными доброде́тельми укра́шен быв,/ смире́нием Го́рнюю высоту́ насле́див,/ нището́ю Небе́сное бога́тство прия́л еси́, преподо́бне.

Па́мять твою́ творя́щих свяще́нную от вся́ких спаси́ прегреше́ний, и печа́лей, и напа́стей,/ твое́ Боже́ственное да́руй заступле́ние,/ всех Царю́ предстоя́й, о́тче Анто́ние.

Богоро́дичен: Я́ко невече́рний Свет, от чре́ва Твоего́ су́щий возсия́вший,/ отемне́нную ду́шу мою́ озари́, Влады́чице Чи́стая,/ и отжени́ вся́ку мглу се́рдца моего́.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Всегда́шним к Бо́гу раче́нием вне пло́ти и ми́ра, о́тче Анто́ние, был еси́./ Те́мже и жили́ще досто́йно Ду́ха Пресвята́го показа́лся еси́,/ я́коже и Сам Христо́с рече́:/ прише́д со Отце́м и Ду́хом, та́мо явлю́ся.

Я́ко пресла́дкий не́кий виногра́д, Свята́я Гора́ тебе́, о́тче, израсти́вши,/ пресла́вно тобо́ю красу́ется и, ра́дующися, Христа́ прославля́ет,/ тебе́ сим дарова́вшаго.

Нощь, я́ко день, и день, я́ко нощь, тебе́ вменя́шеся, Анто́ние:/ не дал бо еси́, по проро́ку, сна очи́ма твои́ма, ни ве́ждома дрема́ния,/ ниже́ поко́я телеси́ твоему́, до́ндеже сие́ чи́сто с душе́ю Бо́гу предста́вил еси́.

Богоро́дичен: Твою́ пода́ждь ми по́мощь/ и изба́ви мя бед, и скорбе́й, и прегреше́ний мои́х,/ я́же всех ро́ждшая при́сное Избавле́ние.

Ин

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Я́ко свобожде́на бы́вши блаже́нная твоя́ душа́ от тя́жести плотски́я/ и от го́рькаго фарао́на мучи́теля, ми́ра сего́ изше́дши,/ в зе́млю обетова́ния ра́йскаго пре́йде немяте́жно,/ со святы́ми пребыва́ет, веселя́щися.

Ны́не свяще́нное те́ло твое́, преподо́бне, в пеще́ре лежа́щее,/ исцеле́ния мно́гая источа́ет ве́рою приходя́щим./ Те́мже мо́лим тя:/ и душе́вная здра́вия мольба́ми твои́ми пода́ждь тебе́ сла́вящим.

Светле́йши со́лнца возсия́ пречестна́я па́мять твоя́, Анто́ние,/ в ню́же соше́дшеся, прославля́ем твое́ успе́ние и труды́,/ я́же претерпе́л еси́ в жи́зни сей,/ прося́ще от Христа́ тобо́ю прия́ти грехо́в оставле́ние.

Богоро́дичен: Красоты́ мя ви́дети сла́вы Твоея́ сподо́би,/ егда́ от пло́ти моея́ хощу́ разлучи́тися,/ я́ко утвержде́ние мое́ еси́, Влады́чице:/ да отсю́ду прииму́ избавле́ние.

Конда́к, глас 8.

Подо́бен: Взбра́нной:

Возложи́в себе́ Бо́гу, па́че всех возлю́бленному от ю́ности, преподо́бне,/ Тому́ от всея́ души́ любо́вию после́довал еси́,/ ми́ра же тле́нная ни во что́же вмени́в,/ в земли́ пеще́ру соде́лал еси́/ и, в ней до́бре проти́ву неви́димаго врага́ ко́зней подвиза́вся,/ я́ко светоза́рное со́лнце, во вся концы́ земли́ возсия́л еси́,/ отону́дуже, веселя́ся, преше́л еси́ к Небе́сным черто́гом./ И ны́не со А́нгелы Влады́чню престо́лу предстоя́,/ помина́й нас, чту́щих па́мять твою́, да зове́м ти:/ ра́дуйся, Анто́ние, о́тче наш.

И́кос:

Присносу́щнаго немерца́ющаго све́та Святы́я Тро́ицы наслади́тися жела́я/ и сего́ ра́ди четыредесятоле́тное вре́мя в еди́ной пеще́ре те́мне тебе́ затвори́в,/ отту́ду неисхо́ден, о́тче, пребы́л еси́,/ до́ндеже те́ло твое́ чи́сто с душе́ю Бо́гу предста́вил еси́./ Отону́дуже и по преставле́нии, я́ко жив, от Го́спода дарова́ния чуде́с прия́л еси́,/ исцеля́ти разли́чныя боле́зни зле стра́ждущих/ и бе́сы от челове́к приходя́щих изгони́ти./ Те́мже мо́лим тя:/ моли́ся, о́тче, сохрани́ти без вре́да оте́чество твое́, град же и лю́ди, да зове́м ти:/ ра́дуйся, Анто́ние, о́тче наш.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Повеле́нием духо́внаго твоего́ настоя́теля, блаже́нне Анто́ние,/ па́ки ко оте́честву твоему́ посыла́емь быва́еши./ Те́мже рече́нная тебе́ отце́м, я́ко от Бо́га повеле́нная, сотвори́л еси́,/ иде́же прише́д, о́тче, мно́гих ду́ши Го́споду приве́л еси́.

Святе́йшаго ме́ста, преподо́бне Анто́ние, я́ко дости́гл,/ мно́гих житие́м твои́м удиви́л еси́:/ вы́ше бо челове́ка восприе́м житие́,/ и́мже мно́гих мирска́я презира́ти сотвори́л еси́.

Святи́теля Иларио́на пеще́ру я́ко обре́т,/ трудолю́бне в ней пожи́л еси́, преподо́бне, в моли́твах и поще́ниих,/ до́ндеже ину́ю пеще́ру себе́ соде́лал еси́,/ в не́йже сподо́бился еси́ го́рняго зва́ния.

Богоро́дичен: Челове́ческия напа́сти и сове́ты, Чи́стая,/ разори́ Боже́ственными моли́твами Твои́ми/ и рабы́ Твоя́ изба́ви боле́зненных прегреше́ний,/ я́ко да Присноде́ву Тя ублажа́ем.

Ин

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ богочести́вым отроко́м ро́су духо́вную,/ Сый благослове́н и препросла́влен.

Вели́каго трудополо́жника и ревни́теля/ твоему́ житию́, преподо́бне Анто́ние, Феодо́сия блаже́ннаго, стяжа́л еси́,/ а́нгельскому твоему́ житию́ после́дующа,/ с ни́мже в Вы́шних водворя́яся, нас помина́й.

Но́ваго тя Моисе́я, о́тче, позна́хом, страсте́й победи́теля:/ я́коже бо он, дре́вле Амали́ка победи́в, лю́ди изведе́,/ ты же, о́тче, мно́жество мона́шествующих в зе́млю обетова́ния ра́йскаго приве́л еси́.

Гра́да и оте́чества твоего́ пресе́льник, о́тче, был еси́,/ но па́ки Бо́жиим промышле́нием ко оте́честву твоему́ сла́вно свиде́тельствован возвраща́ешися,/ иде́же благода́ть от Го́спода, о́тче, прия́л еси́.

Богоро́дичен: Пещь прообразова́ше Твое́ рождество́, Пренепоро́чная:/ о́троки бо не опали́, я́коже ни ложесна́ Твоя́ Огнь нестерпи́мый./ Те́мже мо́лим Тя: огня́ ве́чнаго изба́ви рабы́ Твоя́.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Влады́ки твоего́ Христа́, преподо́бне Анто́ние, смире́нию поревнова́л еси́/ и сего́ ра́ди смире́нное и жесто́кое житие́ возлюби́л еси́,/ земна́го пристра́стия отрева́яся./ Те́мже по́чести святы́х сподо́бился еси́/ и с ни́ми пое́ши Го́спода во ве́ки.

Твое́ пресла́вное успе́ние пра́зднующим, блаже́нне,/ моли́ся изба́витися всем от разли́чных напа́стей,/ да вси тебе́ прославля́ем, Анто́ние, и превозно́сим Го́спода во ве́ки.

О нас ми́лостивно о́ко, Анто́ние, простира́й ко Влады́це, чадолю́бное показу́я,/ и неотлу́чно от нас ду́хом пребыва́й, преподо́бне,/ я́коже обеща́лся еси́, егда́ был еси́ с на́ми,/ да вси с тобо́ю Христу́ воспое́м:/ благослови́те, вся дела́ Госпо́дня, Го́спода.

Богоро́дичен: На моле́ние мое умилосе́рдися ны́не и ра́дость ми в печа́ли ме́сто да́руй,/ да пою́ Тя, Влады́чице, Сы́ну Твоему́ воспева́я:/ Го́спода по́йте, дела́, и превозноси́те Его́ во ве́ки.

Ин

Ирмо́с: Пещь иногда́ о́гненная в Вавило́не де́йства разделя́ше/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Исцеле́ния оби́льна, преподо́бне, ве́рою приходя́щим ко хра́му твоему́/ и су́щим в ско́рбех утеше́ние подава́й, да вси с тобо́ю Христу́ вопие́м:/ благослови́те, вся дела́ Госпо́дня, Го́спода.

Благода́рное сие́ пе́ние принося́щия ти, о́тче, свы́ше ми́лостивно назира́й/ и моли́ Христа́ Изба́вителя спасти́ всех, вопию́щих Ему́:/ благослови́те, вся дела́ Госпо́дня, Го́спода.

Принесе́ся дар Вседержи́телю – тобо́ю мно́жество спаса́емых,/ твоему́ житию́ после́дующих, Анто́ние./ Те́мже моли́ спасти́ся всем, с тобо́ю Христу́ вопию́щим:/ благослови́те, вся дела́ Госпо́дня, Го́спода.

Богоро́дичен: Вели́кому та́инству рождества́ Твоего́ кто не удиви́тся, Богоро́дице?/ Или́ кий язы́к зе́мен или́ ум безпло́тен изрещи́ возмо́жет?/ Па́че естества́ бо и смы́сла, Богоро́дице, Зижди́теля родила́ еси́.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Анто́ния, дре́вле просия́вшаго,/ того́ житию́ вся́чески поревнова́ти потща́лся еси́:/ он бо в пусты́ню еди́н всели́ся,/ ты же в пеще́ре еди́наго себе́ затвори́л еси́/ и мно́гими ле́ты, о́тче, неисхо́ден пребы́л еси́.

Пече́рскому житию́ первонача́льник и наста́вник, о́тче, был еси́/ и та́мо подвиза́лся еси́, я́ко безпло́тен./ Те́мже и Христо́с дарова́нием чуде́с обогати́ тя, преподо́бне.

Мое́ю руку́ воздея́ние приими́, преподо́бне,/ Влады́чней подо́бяся бла́гости, презира́я прегреше́ния:/ ты бо ду́шу уязви́л еси́ Христо́вою любо́вию и Его́ Пречи́стыя Богома́тере,/ Ю́же умоли́ спасти́ ду́ши на́ша.

Богоро́дичен: Руко́ю твое́ю, преподо́бне Анто́ние,/ е́же к Бо́гу воздея́нием, пресла́вно чудоде́йствовася:/ моли́твами бо твои́ми огнь с Небесе́ сво́диши, во очище́ние ме́ста хра́ма Пречи́стыя,/ Ю́же вси с тобо́ю велича́ем.

Ин

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Пахо́мия Вели́каго, а́нгельскаго виде́ния сподо́бльшагося, житию́, о́тче, подража́в,/ равноа́нгельно в пеще́ре пожи́л еси́./ Те́мже и равноа́нгельную по́честь сподо́бился еси́ прия́ти, Анто́ние.

Иже от Святы́я Горы́ путе́м веду́щим, о́тче, ме́ста Ки́евскаго дости́гл еси́,/ иде́же бя́ше уго́дно Влады́чицы Ма́тере Бо́жия хра́му воздви́гнутися,/ и та́мо храм прече́стен в сла́ву Богома́тере, ку́пно со блаже́нным Феодо́сием, воздви́гл еси́./ Те́мже тя вси с ним велича́ем.

Богоро́дичен: Светороди́тельнице Де́во, души́ моея́ о́блак отжени́/ и дава́й чи́сто зре́ти, Влады́чице, спаси́тельную добро́ту,/ возсия́вшую неизглаго́ланно из Твоея́ пречи́стыя утро́бы,/ во свет язы́ков, Препе́тая.

Свети́лен:

Жите́йское сладостра́стие умертви́л еси́, Анто́ние,/ сла́ву же маловре́менную позна́в, сея́ вско́ре отступи́л еси́,/ те́сным путе́м изво́лив ходи́ти,/ веду́щим к ра́йскому простра́нству./ Те́мже моли́ся, Анто́ние, спасти́ся тебе́ почита́ющим.

Сла́ва, и ны́не, Богоро́дичен:

Богоро́дицу Тя вои́стинну испове́дающе, Влады́чице, и́же Тобо́ю спаса́емии:/ Ты бо Бо́га родила́ еси́,/ разо́ршаго Кресто́м смерть и к Себе́ привле́кша преподо́бных собо́ры,/ с ни́миже Тя восхваля́ем, Де́во.

На хвали́тех стихи́ры на 4, глас 2.

Подо́бен: Егда́ от Дре́ва:

Жела́я ви́дети неизрече́нную ра́дость святы́х/ и весе́лия пра́ведных, Бо́гу угоди́вших,/ вся́кое весе́лие, я́же в ми́ре, возненави́дел еси́,/ но в посте́х и слеза́х проводи́в дни твоя́,/ до́ндеже и стра́сти теле́сныя умертви́л еси́./ Те́мже и сподо́бился еси́ пра́ведных ра́дования,/ с ни́миже моли́ся спасти́ся душа́м на́шим.

Днесь похва́льную песнь в па́мяти твое́й, Анто́ние,/ тебе́ принося́щих приими́,/ и предвари́ к Бо́гу моли́твами твои́ми,/ и изба́ви нас от шу́яго стоя́ния,/ и избра́нных ча́сти сочета́ти моли́,/ да тебе́ вси, я́ко те́плаго предста́теля,/ досто́йно ублажа́ем.

В те́мном ме́сте, я́ко звезда́, возсия́л еси́, преподо́бне,/ и мра́чная ли́ца бесо́в посрами́л еси́, прему́дре./ Отню́дуже возше́д к Небесе́м,/ со дерзнове́нием престо́лу Христо́ву предстоя́,/ помина́й пра́зднующих па́мять твою́, преподо́бне,/ ми́лость обрести́ нам в День су́дный.

Сла́ва, глас 8:

Оте́чество твое́, преподо́бне о́тче Анто́ние, оста́вив/ и во́льное стра́нство Го́спода ра́ди прие́м,/ труды́ до́лгаго пути́ ше́ствия,/ жа́жду и глад, сту́день же и зной/ Христа́ ра́ди претерпе́л еси́./ Те́мже и слы́шиши:/ благи́й ра́бе и ве́рный,/ вни́ди в ра́дость Го́спода твоего́./ Сего́ же гла́са и нам услы́шати, о́тче, моли́ся,/ да всегда́ твою́ па́мять любо́вию ублажа́ем.

И ны́не, Богоро́дичен: Влады́чице, приими́:

Славосло́вие вели́кое. И отпу́ст.

НА ЛИТУРГИ́И

Проки́мен, глас 7: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех,/ я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода: Стих: Си́льно на земли́ бу́дет се́мя его́. Ева́нгелие от Матфе́я, зача́ло 10. Прича́стен: В па́мять ве́чную бу́дет пра́ведник:

Моли́тва

О до́брый наш па́стырю и наста́вниче, приснопомина́емый и́ноков росси́йских первонача́льниче, преподо́бне и богоно́сне о́тче наш Анто́ние! Ты горе́ на Небеси́ пребыва́еши, мы ни́зу на земли́, удале́ни су́ще от Тебе́ не толи́ко ме́стом, коли́ко грехо́вною нечистото́ю на́шею; оба́че па́мятующе оте́ческую любо́вь твою́ к лю́дем, ти сро́дным, припа́даем и мо́лимтися с умиле́нием и ве́рою: помози́ нам, гре́шным, покая́нием очи́ститися и досто́йным бы́ти поми́лования и проще́ния от Го́спода и Созда́теля на́шего. Умоли́ Его́ бла́гость дарова́ти нам вели́кия и бога́тыя ми́лости: земли́ плодоно́сие, возду́ха благорастворе́ние, мир глубо́к, братолю́бие и́скреннее, благоче́стие нелицеме́рное, жите́йских потре́б дово́льство, и да не во зло обрати́м блага́я, да́руемая нам от щедрода́тельныя Его́ десни́цы, но во сла́ву Имене Его́ свята́го и во спасе́ние на́ше. Соблюди́, чудотво́рче святы́й, благомо́щными твои́ми моли́твами росси́йския гра́ды, оби́тель твою́ и всю страну́ Правосла́вно Росси́йскую невреди́мы от вся́каго зла, и вся лю́ди, жи́тельствующия в оби́тели твое́й и на поклоне́ние в ню приходя́щия, осени́ Небе́сным твои́м благослове́нием, и в ско́рбех, беда́х и боле́знех утеше́ние, избавле́ние и исцеле́ние им пода́ждь, да благода́рно сла́вим, хва́лим и велича́ем просла́вльшаго тя Го́спода, чрез тебе́ ди́вно благоде́тельствующаго нам, Безнача́льнаго Отца́, Единоро́днаго Его́ Сы́на и Единосу́щнаго Его́ Ду́ха, Тро́ицу Живонача́льную и Неразде́льную, и твое́ свято́е заступле́ние во ве́ки веко́в. Ами́нь.